𑁨𑁨. 𑀤𑀸𑀲𑁆𑀲 𑀤𑀁 𑀯𑀸 𑀫𑀺𑀫𑁂𑀲𑁆𑀯+𑀤𑁆𑀯𑀺𑀢𑁆𑀢𑁂

𑀅𑀤𑁆𑀯𑀺𑀢𑁆𑀢𑁂 𑀯𑀢𑁆𑀢𑀫𑀸𑀦𑀲𑁆𑀲 𑀤𑀸𑀲𑁆𑀲 𑀤𑀁 𑀳𑁄𑀢𑀺 𑀯𑀸 𑀫𑀺𑀫𑁂𑀲𑀼. 𑀯𑀕𑁆𑀕𑀦𑁆𑀢𑀁, 𑀤𑀫𑁆𑀫𑀺 𑀤𑁂𑀫𑀺, 𑀤𑀫𑁆𑀫 𑀤𑁂𑀫. 𑀈𑀓𑀸𑀭𑁂 𑀤𑀻𑀬𑀢𑀺 𑀇𑀘𑁆𑀘𑀸𑀤𑀺. 𑀅𑀦𑀸𑀕𑀢𑀢𑁆𑀣𑁂 𑀇𑀜𑀸𑀕𑀫𑁂 𑀲𑀭𑀡𑁄𑀧𑀸𑀤𑀺, 𑀤𑀤𑀺𑀲𑁆𑀲𑀢𑀺, 𑀤𑀤𑀺𑀲𑁆𑀲𑀦𑁆𑀢𑀺. 𑀤𑀚𑁆𑀚𑀺𑀲𑁆𑀲𑀢𑀺, 𑀤𑀚𑁆𑀚𑀺𑀲𑁆𑀲𑀦𑁆𑀢𑀺. 𑀮𑀯𑀺𑀓𑀭𑀡𑁂 𑀤𑀲𑁆𑀲𑀢𑀺, 𑀤𑀲𑁆𑀲𑀦𑁆𑀢𑀺. 𑀅𑀚𑁆𑀚𑀢𑀦𑁂-𑀅𑀤𑀤𑀺, 𑀅𑀤𑀤𑀺𑀁𑀲𑀼, 𑀅𑀤𑀚𑁆𑀚𑀺, 𑀅𑀤𑀚𑁆𑀚𑀺𑀁𑀲𑀼, 𑀅𑀤𑀸𑀲𑀺, 𑀅𑀤𑀁𑀲𑀼. 𑀅𑀦𑀚𑁆𑀚𑀢𑀦𑁂-𑀅𑀤𑀤𑀸, 𑀅𑀤𑀤𑀼. 𑀓𑀸𑀮𑀸𑀢𑀺𑀧𑀢𑁆𑀢𑀺𑀬𑀁-𑀅𑀤𑀤𑀺𑀲𑁆𑀲 𑀅𑀤𑀚𑁆𑀚𑀺𑀲𑁆𑀲, 𑀮𑁂 𑀅𑀤𑀲𑁆𑀲, 𑀤𑀲𑁆𑀲𑀁𑀲𑀼. 𑀏𑀬𑁆𑀬𑀸𑀤𑀺𑀫𑁆𑀳𑀺-𑀤𑀤𑁂 𑀤𑀤𑁂𑀬𑁆𑀬 𑀤𑀚𑁆𑀚𑁂 𑀤𑀚𑁆𑀚𑁂𑀬𑁆𑀬. ‘‘𑀝𑀸’’𑀢𑀺 𑀩𑀳𑀼𑀮𑀸𑀥𑀺𑀓𑀸𑀭𑀸 𑀤𑀚𑁆𑀚𑀸𑀤𑁂𑀲𑀸 𑀧𑀭𑀲𑁆𑀲 𑀏𑀬𑁆𑀬𑀲𑁆𑀲 𑀝𑀸, 𑀤𑀚𑁆𑀚𑀸, 𑀤𑀚𑁆𑀚𑀼𑀁 𑀤𑀚𑁆𑀚𑁂𑀬𑁆𑀬𑀁 𑀤𑀤𑁂𑀬𑁆𑀬𑀼𑀁. 𑀢𑁆𑀯𑀸𑀤𑀻𑀲𑀼-𑀤𑀤𑀸𑀢𑀼, 𑀤𑀤𑀦𑁆𑀢𑀼, 𑀤𑀚𑁆𑀚𑀢𑀼, 𑀤𑀚𑁆𑀚𑀦𑁆𑀢𑀼, 𑀮𑀲𑁆𑀲𑁂+𑀓𑀸𑀭𑁂 𑀤𑁂𑀢𑀼, 𑀤𑁂𑀦𑁆𑀢𑀼 𑀇𑀘𑁆𑀘𑀸𑀤𑀺. 𑀲𑀩𑁆𑀩𑀢𑁆𑀣 𑀓𑀫𑁆𑀫𑁂𑀧𑀺 𑀬𑁄𑀚𑀦𑀻𑀬𑀁.

𑀥𑀸=𑀥𑀸𑀭𑀡𑁂, 𑀢𑁆𑀬𑀸𑀤𑀺𑀫𑁆𑀳𑀺 𑀘𑀕𑁆𑀕𑀳𑀡𑁂𑀦 𑀤𑁆𑀯𑀺𑀢𑁆𑀢𑁂 𑀧𑀼𑀩𑁆𑀩𑀸𑀓𑀸𑀭𑀲𑁆𑀲 𑀭𑀲𑁆𑀲𑀢𑁆𑀢𑁂 𑀮𑀮𑁄𑀧𑁂 ‘‘𑀘𑀢𑀼𑀢𑁆𑀣𑀤𑀼𑀢𑀺𑀬𑀸𑀦𑀁 𑀢𑀢𑀺𑀬𑀧𑀞𑀫𑀸’’𑀢𑀺 𑀧𑀼𑀩𑁆𑀩𑀥𑀓𑀸𑀭𑀲𑁆𑀲 𑀤𑀓𑀸𑀭𑁂 𑀘 𑀓𑀢𑁂 𑀤𑀥𑀸𑀢𑀺, 𑀤𑀥𑀦𑁆𑀢𑀺. 𑀧𑀺𑀧𑀼𑀩𑁆𑀩𑁄, ‘‘𑀢𑀤𑀫𑀺𑀦𑀸’’ 𑀤𑀺𑀦𑀸 𑀆𑀲𑁆𑀲 𑀮𑁄𑀧𑁄, ‘‘𑀥𑀸𑀲𑁆𑀲 𑀳𑁄’’𑀢𑀺 𑀤𑁆𑀯𑀺𑀢𑁆𑀢𑁂 𑀧𑀭𑀲𑁆𑀲 𑀥𑀸𑀲𑁆𑀲 𑀳𑀓𑀸𑀭𑁄, 𑀤𑁆𑀯𑀸𑀭𑀁 𑀧𑀺𑀤𑀳𑀢𑀺, 𑀧𑀺𑀤𑀳𑀦𑁆𑀢𑀺. 𑀮𑀲𑁆𑀲𑁂+𑀓𑀸𑀭𑁂 𑀦𑀺𑀥𑁂𑀢𑀺, 𑀦𑀺𑀥𑁂𑀦𑁆𑀢𑀺. 𑀓𑀫𑁆𑀫𑁂-𑀯𑀺𑀥𑀻𑀬𑀢𑀺, 𑀯𑀺𑀥𑀻𑀬𑀦𑁆𑀢𑀺 𑀇𑀘𑁆𑀘𑀸𑀤𑀺. 𑀥𑀲𑁆𑀲𑀢𑀺, 𑀧𑀺𑀤𑀳𑀺𑀲𑁆𑀲𑀢𑀺, 𑀧𑀭𑀺𑀤𑀳𑁂𑀲𑁆𑀲𑀢𑀺. 𑀅𑀥𑀸𑀲𑀺, 𑀧𑀺𑀤𑀳𑀺. 𑀅𑀥𑀲𑁆𑀲, 𑀧𑀺𑀤𑀳𑀺𑀲𑁆𑀲. 𑀤𑀥𑁂 𑀤𑀥𑁂𑀬𑁆𑀬, 𑀧𑀺𑀤𑀳𑁂 𑀧𑀺𑀤𑀳𑁂𑀬𑁆𑀬. 𑀤𑀤𑀸𑀢𑀼, 𑀧𑀺𑀤𑀳𑀢𑀼, 𑀦𑀺𑀥𑁂𑀢𑀼, 𑀦𑀺𑀥𑁂𑀦𑁆𑀢𑀼 𑀇𑀘𑁆𑀘𑀸𑀤𑀺. (𑀚𑀼𑀳𑁄𑀢𑁆𑀬𑀸𑀤𑀬𑁄).

𑀪𑀽𑀯𑀸𑀤𑀺 𑀘 𑀚𑀼𑀳𑀸𑀤𑀺 𑀘, 𑀳𑀼𑀯𑀸𑀤𑀺𑀥𑀸𑀢𑀯𑁄 𑀘𑀺+𑀫𑁂;

𑀲𑀯𑀼𑀤𑁆𑀥𑀺𑀓𑀪𑀽𑀯𑀸𑀤𑀻𑀳𑀺, 𑀢𑀺𑀥𑀸 𑀪𑁂𑀤𑀁 𑀉𑀧𑁂𑀦𑁆𑀢𑀺 𑀢𑁂.

(𑀪𑀽𑀯𑀸𑀤𑀺𑀦𑀬𑁄.)

𑀅𑀥𑀼𑀦𑀸 𑀯𑀺𑀓𑀭𑀡𑀧𑀪𑁂𑀤𑀧𑀓𑀸𑀲𑀦𑀢𑁆𑀣𑀁 𑀭𑀼𑀥𑀸𑀤𑀻𑀦𑀁 𑀅𑀝𑁆𑀞𑀕𑀡𑀸𑀦𑀁 𑀓𑀸𑀦𑀺𑀘𑀺 𑀭𑀽𑀧𑀸𑀦𑀺 𑀉𑀤𑀸𑀳𑀭𑀺𑀬𑀦𑁆𑀢𑁂 𑁋

𑀭𑀼𑀥=𑀆𑀯𑀭𑀡𑁂, 𑀢𑁆𑀬𑀸𑀤𑀬𑁄 𑀳𑁄𑀦𑁆𑀢𑀺. 𑀏𑀯+𑀫𑀼𑀧𑀭𑀺𑀧𑀺 𑀲𑀩𑁆𑀩𑀕𑀡𑁂𑀲𑀼.