𑁫,𑁧. 𑀢𑀺𑀚+𑀫𑀸𑀦𑁂𑀳𑀺 𑀔+𑀲𑀸 𑀔𑀫𑀸+𑀯𑀻𑀫𑀁𑀲𑀸𑀲𑀼

𑀔𑀦𑁆𑀢𑀺𑀬𑀁 𑀢𑀺𑀚𑀸, 𑀯𑀻𑀫𑀁𑀲𑀸𑀬𑀁 𑀫𑀸𑀦𑀸 𑀘 𑀔+𑀲𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀬𑀣𑀸𑀓𑁆𑀓𑀫𑀁. 𑀢𑀺𑀚=𑀦𑀺𑀲𑀸𑀦𑁂, 𑀅𑀓𑀸𑀭𑀲𑁆𑀲𑀸+𑀧𑀬𑁄𑀕𑁄. 𑀔𑁂 ‘‘𑀮𑀳𑀼𑀲𑁆𑀲𑀼𑀧𑀦𑁆𑀢𑀲𑁆𑀲𑀸’’𑀢𑀺 𑀧𑀢𑁆𑀢𑁂+𑀓𑀸𑀭𑀲𑁆𑀲 ‘‘𑀅𑀜𑁆𑀜𑀢𑁆𑀭𑀸𑀧𑀻’’𑀢𑀺 𑀧𑀝𑀺𑀲𑁂𑀥𑁄. 𑀬𑀓𑀸𑀭𑀯𑀚𑁆𑀚𑀺𑀢𑀩𑁆𑀬𑀜𑁆𑀚𑀦𑀲𑁆𑀲 ‘‘𑀧𑀭𑀭𑀽𑀧+𑀫𑀬𑀓𑀸𑀭𑁂 𑀩𑁆𑀬𑀜𑁆𑀚𑀦𑁂’’𑀢𑀺 𑀧𑀭𑀭𑀽𑀧𑀜𑁆𑀘. ‘‘𑀘𑀢𑀼𑀢𑁆𑀣𑀤𑀼𑀢𑀺𑀬𑀸’’ 𑀤𑀺𑀦𑀸 𑀧𑀞𑀫𑀓𑁆𑀔𑀭𑀓𑀓𑀸𑀭𑁂 𑀘 ‘‘𑀔𑀙𑀲𑀸𑀦+𑀫𑁂𑀓𑀲𑁆𑀲𑀭𑁄+𑀤𑀺 𑀤𑁆𑀯𑁂’’𑀢𑀺 𑀢𑀺𑀓𑁆𑀔 𑀢𑀺𑀓𑁆𑀔 𑀇𑀢𑀺 𑀤𑁆𑀯𑀺𑀪𑀸𑀯𑁂 ‘‘𑀮𑁄𑀧𑁄+𑀦𑀸𑀤𑀺𑀩𑁆𑀬𑀜𑁆𑀚𑀦𑀲𑁆𑀲𑀸’’𑀢𑀺𑀆𑀤𑀺𑀢𑁄+𑀜𑁆𑀜𑀲𑁆𑀲 𑀩𑁆𑀬𑀜𑁆𑀚𑀦𑀲𑁆𑀲 𑀮𑁄𑀧𑁂 𑀘 𑀓𑀢𑁂 𑀢𑀺𑀢𑀺𑀓𑁆𑀔𑀸𑀥𑀸𑀢𑀼𑀢𑁄 𑀢𑁆𑀬𑀸𑀤𑀺𑀧𑀘𑁆𑀘𑀬+𑀮𑀯𑀺𑀓𑀭𑀡𑀸𑀦𑀺. 𑀢𑀺𑀢𑀺𑀓𑁆𑀔𑀢𑀺 𑀇𑀘𑁆𑀘𑀸𑀤𑀺 𑀧𑀼𑀭𑀺𑀫𑀲𑀫𑀁. 𑀓𑀫𑁆𑀫𑁂-𑀢𑀺𑀢𑀺𑀓𑁆𑀔𑀻𑀬𑀢𑀺 𑀇𑀘𑁆𑀘𑀸𑀤𑀺. 𑀇𑀢𑁄 𑀧𑀭𑀁 𑀓𑀫𑁆𑀫𑁄𑀤𑀸𑀳𑀭𑀡𑀁 𑀦 𑀓𑀭𑀺𑀲𑁆𑀲𑀸𑀫.

𑀫𑀸𑀦=𑀧𑀽𑀚𑀸𑀬𑀁+𑀢𑀺𑀫𑀲𑁆𑀫𑀸 𑀲𑀧𑀘𑁆𑀘𑀬, 𑀤𑁆𑀯𑀺𑀢𑁆𑀢𑀸𑀤𑀺𑀫𑁆𑀳𑀺 𑀓𑀢𑁂 ‘‘𑀫𑀸𑀦𑀲𑁆𑀲 𑀯𑀻 𑀧𑀭𑀲𑁆𑀲 𑀘 𑀫𑀁’’𑀢𑀺 𑀧𑀼𑀩𑁆𑀩𑀫𑀸𑀦𑀲𑁆𑀲 𑀯𑀻 𑀘 𑀧𑀭𑀫𑀸𑀦𑀲𑁆𑀲 𑀫𑀜𑁆𑀘 𑀳𑁄𑀢𑀺. 𑀯𑀻𑀫𑀁𑀲𑀥𑀸𑀢𑀼𑀢𑁄 𑀢𑀺𑀧𑀘𑁆𑀘𑀬𑀸𑀤𑀺𑀫𑁆𑀳𑀺 𑀓𑀢𑁂 𑀯𑀻𑀫𑀁𑀲𑀢𑀺 𑀇𑀘𑁆𑀘𑀸𑀤𑀺. 𑀢𑀺𑀢𑀺𑀓𑁆𑀔𑀺𑀲𑁆𑀲𑀢𑀺, 𑀯𑀻𑀫𑀁𑀲𑀺𑀲𑁆𑀲𑀢𑀺 𑀇𑀘𑁆𑀘𑀸𑀤𑀺. 𑀏𑀯+𑀫𑀼𑀧𑀭𑀺𑀧𑀺 𑀅𑀚𑁆𑀚𑀢𑀦𑀸𑀤𑀻𑀲𑀼𑀧𑀺 𑀬𑁄𑀚𑁂𑀢𑀩𑁆𑀩𑀁. 𑀧𑀬𑁄𑀚𑀓𑀢𑁆𑀢𑀸 𑀡𑀺, ‘‘𑀡𑀺𑀡𑀸𑀧𑁆𑀬𑀸𑀧𑀻𑀳𑀺 𑀯𑀸’’𑀢𑀺 𑀮𑀯𑀺𑀓𑀭𑀡𑀁, 𑀢𑁂𑀚𑀬𑀢𑀺 𑀢𑁂𑀚𑁂𑀢𑀺. 𑀢𑀣𑀸 𑀘𑀼𑀭𑀸𑀤𑀺𑀢𑁆𑀢𑀸 𑀦 𑀮𑀯𑀺𑀓𑀭𑀡𑀁, 𑀫𑀸𑀦𑀬𑀢𑀺 𑀫𑀸𑀦𑁂𑀢𑀺.