𑁧𑁨𑁭. 𑀓𑁄𑀲𑀚𑁆𑀚𑀸+𑀚𑁆𑀚𑀯+𑀧𑀸𑀭𑀺𑀲𑀚𑁆𑀚+𑀲𑁄𑀳𑀚𑁆𑀚+𑀫𑀤𑁆𑀤𑀯𑀸+𑀭𑀺𑀲𑁆𑀲𑀸+𑀲𑀪𑀸+𑀚𑀜𑁆𑀜+𑀣𑁂𑀬𑁆𑀬+ 𑀩𑀸𑀳𑀼𑀲𑀘𑁆𑀘𑀸

𑀏𑀢𑁂 𑀲𑀤𑁆𑀤𑀸 𑀦𑀺𑀧𑀘𑁆𑀘𑀦𑁆𑀢𑁂 𑀡𑀸𑀦𑀼𑀩𑀦𑁆𑀥𑁂. 𑀓𑀼𑀲𑀻𑀢𑀲𑁆𑀲 𑀪𑀸𑀯𑁄𑀢𑀺 𑀪𑀸𑀯𑁂 𑀡𑁆𑀬𑁄 𑀳𑁄𑀢𑀺, 𑀇𑀫𑀺𑀦𑀸 𑀈𑀲𑁆𑀲 𑀅𑀓𑀸𑀭𑁂 𑀘 𑀢𑀲𑁆𑀲 𑀚𑁂 𑀘 𑀓𑀢𑁂 𑀬𑀲𑁆𑀲 𑀧𑀼𑀩𑁆𑀩𑀭𑀽𑀧𑀁, 𑀓𑁄𑀲𑀚𑁆𑀚𑀁. 𑀉𑀚𑀼𑀦𑁄 𑀪𑀸𑀯𑁂 𑀅𑀚𑁆𑀚𑀯𑀁𑀢𑀺 𑀡𑁄, 𑀇𑀫𑀺𑀦𑀸 𑀉𑀲𑁆𑀲 𑀅𑀢𑁆𑀢𑀁, ‘‘𑀉𑀯𑀡𑁆𑀡𑀲𑁆𑀲𑀸+𑀯𑀗 𑀲𑀭𑁂’’𑀢𑀺 𑀅𑀯𑀗𑀆𑀤𑁂𑀲𑁂 𑀚𑀲𑁆𑀲 𑀤𑁆𑀯𑀺𑀢𑁆𑀢𑀁. 𑀧𑀭𑀺𑀲𑀸𑀲𑀼 𑀲𑀸𑀥𑀽𑀢𑀺 𑀯𑀸𑀓𑁆𑀬𑁂 ‘‘𑀡𑁆𑀬𑁄 𑀢𑀢𑁆𑀣 𑀲𑀸𑀥𑀽’’𑀢𑀺 𑀡𑁆𑀬𑁄, 𑀇𑀫𑀺𑀦𑀸 𑀚𑀸𑀕𑀫𑁄 𑀘, ‘‘𑀩𑁆𑀬𑀜𑁆𑀚𑀦𑁂 𑀤𑀻𑀖𑀭𑀲𑁆𑀲𑀸’’𑀢𑀺 𑀆𑀲𑁆𑀲 𑀭𑀲𑁆𑀲𑁂 𑀘 𑀓𑀢𑁂 𑀚𑀲𑁆𑀲 𑀧𑀼𑀩𑁆𑀩𑀭𑀽𑀧𑀁, 𑀧𑀸𑀭𑀺𑀲𑀚𑁆𑀚𑁄. 𑀇𑀫𑀺𑀦𑀸 𑀓𑀫𑁂𑀦 𑀯𑀸𑀓𑁆𑀬𑁂𑀦𑁂𑀯 𑀲𑀤𑁆𑀤𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀼𑀳𑀤𑀬𑁄𑀯 𑀲𑀼𑀳𑀚𑁆𑀚𑁄, 𑀢𑀲𑁆𑀲 𑀪𑀸𑀯𑁄 𑀲𑁄𑀳𑀚𑁆𑀚𑀁, 𑀇𑀫𑀺𑀦𑀸 𑀅𑀬𑀮𑁄𑀧𑁄. 𑀫𑀼𑀤𑀼𑀦𑁄 𑀪𑀸𑀯𑁄 𑀫𑀤𑁆𑀤𑀯𑀁, 𑀇𑀫𑀺𑀦𑀸 𑀉𑀲𑁆𑀲 𑀅𑀢𑁆𑀢𑀁. 𑀇𑀲𑀺𑀦𑁄 𑀇𑀤𑀁 𑀪𑀸𑀯𑁄 𑀯𑀸 𑀆𑀭𑀺𑀲𑁆𑀲𑀁, 𑀡𑁆𑀬𑀧𑀘𑁆𑀘𑀬𑁂 𑀇𑀫𑀺𑀦𑀸 𑀆𑀭𑀜𑀸𑀕𑀫𑁂 ‘‘𑀮𑁄𑀧𑁄+𑀯𑀡𑁆𑀡𑀺+𑀯𑀡𑁆𑀡𑀸𑀦𑀁’’𑀢𑀺 𑀅𑀦𑁆𑀢𑀇𑀓𑀸𑀭𑀮𑁄𑀧𑁄 𑀘. 𑀉𑀲𑀪𑀲𑁆𑀲 𑀇𑀤𑀁 𑀪𑀸𑀯𑁄 𑀯𑀸 𑀆𑀲𑀪𑀁, 𑀇𑀫𑀺𑀦𑀸 𑀉𑀲𑁆𑀲 𑀆. 𑀆𑀚𑀸𑀦𑀻𑀬𑀲𑁆𑀲 𑀪𑀸𑀯𑁄 𑀆𑀚𑀜𑁆𑀜𑀁, 𑀇𑀫𑀺𑀦𑀸 𑀬𑀮𑁄𑀧𑁂 ‘‘𑀮𑁄𑀧𑁄+𑀯𑀡𑁆𑀡𑀺+𑀯𑀡𑁆𑀡𑀸𑀦𑀁’’𑀢𑀺 𑀈𑀓𑀸𑀭𑀮𑁄𑀧𑁄. 𑀣𑁂𑀦𑀲𑁆𑀲 𑀪𑀸𑀯𑁄 𑀣𑁂𑀬𑁆𑀬𑀁, 𑀇𑀫𑀺𑀦𑀸 𑀦𑀲𑁆𑀲 𑀬𑀓𑀸𑀭𑁄. 𑀩𑀳𑀼𑀲𑁆𑀲𑀼𑀢𑀲𑁆𑀲 𑀪𑀸𑀯𑁄 𑀩𑀸𑀳𑀼𑀲𑀘𑁆𑀘𑀁, 𑀇𑀫𑀺𑀦𑀸 𑀉𑀲𑁆𑀲 𑀅𑀓𑀸𑀭𑁄 𑀲𑀁𑀬𑁄𑀕𑀸𑀤𑀺𑀮𑁄𑀧𑁄. (𑀪𑀸𑀯𑀢𑀤𑁆𑀥𑀺𑀢𑀁).