𑁨𑁩. 𑀲𑁆𑀬𑀸𑀤𑀻𑀲𑀼 𑀭𑀲𑁆𑀲𑁄𑀢𑀺

𑀦𑀧𑀼𑀁𑀲𑀓𑁂 𑀯𑀢𑁆𑀢𑀫𑀸𑀦𑀲𑁆𑀲 𑀲𑁆𑀬𑀸𑀤𑀻𑀲𑀼 𑀭𑀲𑁆𑀲𑁄. 𑀪𑁄 𑀙𑀢𑁆𑀢𑀼𑀧𑀸𑀳𑀦, 𑀙𑀢𑁆𑀢𑀼𑀧𑀸𑀳𑀦𑀁, 𑀙𑀢𑁆𑀢𑀼𑀧𑀸𑀳𑀦𑁂𑀦 𑀇𑀘𑁆𑀘𑀸𑀤𑀺.

𑀢𑁂 𑀘 𑀲𑀫𑀸𑀳𑀸𑀭𑀺𑀢𑀭𑀻𑀢𑀭𑀬𑁄𑀕𑀸 𑀩𑀳𑀼𑀮𑀁𑀯𑀺𑀥𑀸𑀦𑀸 𑀦𑀺𑀬𑀢𑀯𑀺𑀲𑀬𑀸𑀬𑁂𑀯 𑀳𑁄𑀦𑁆𑀢𑀺, 𑀢𑀢𑁆𑀭𑀸+𑀬𑀁 𑀯𑀺𑀲𑀬𑀯𑀺𑀪𑀸𑀕𑁄-𑀦𑀺𑀭𑀼𑀢𑁆𑀢𑀺𑀧𑀺𑀝𑀓𑀸𑀕𑀢𑁄-𑀧𑀸𑀡𑀺+𑀢𑀽𑀭𑀺𑀬+𑀬𑁄𑀕𑁆𑀕+𑀲𑁂𑀦𑀗𑁆𑀕𑀸𑀦𑀁, 𑀦𑀺𑀘𑁆𑀘𑀯𑁂𑀭𑀻𑀦𑀁, 𑀲𑀗𑁆𑀔𑁆𑀬𑀸𑀧𑀭𑀺𑀫𑀸𑀡𑀲𑀜𑁆𑀜𑀸𑀦𑀁, 𑀔𑀼𑀤𑁆𑀤𑀚𑀦𑁆𑀢𑀼𑀓𑀸𑀦𑀁, 𑀧𑀘𑀦𑀘𑀡𑁆𑀟𑀸𑀮𑀸𑀦𑀁, 𑀘𑀭𑀡𑀲𑀸𑀥𑀸𑀭𑀡𑀸𑀦𑀁, 𑀏𑀓𑀚𑁆𑀛𑀸𑀬𑀦𑀧𑀸𑀯𑀘𑀦𑀸𑀦𑀁, 𑀮𑀺𑀗𑁆𑀕𑀯𑀺𑀲𑁂𑀲𑀸𑀦𑀁, 𑀯𑀺𑀯𑀺𑀥𑀯𑀺𑀭𑀼𑀤𑁆𑀥𑀸𑀦𑀁, 𑀤𑀺𑀲𑀸𑀦𑀁, 𑀦𑀤𑀻𑀦𑀜𑁆𑀘 𑀦𑀺𑀘𑁆𑀘𑀲𑀫𑀸𑀳𑀸𑀭𑁂𑀓𑀢𑁆𑀣𑀁 𑀪𑀯𑀢𑀺.

𑀧𑀸𑀡𑀗𑁆𑀕𑀸𑀦𑀁-𑀘𑀓𑁆𑀔𑀼 𑀘 𑀲𑁄𑀢𑀜𑁆𑀘 𑀘𑀓𑁆𑀔𑀼𑀲𑁄𑀢𑀁, 𑀫𑀼𑀔𑀜𑁆𑀘 𑀦𑀸𑀲𑀺𑀓𑀸 𑀘 𑀫𑀼𑀔𑀦𑀸𑀲𑀺𑀓𑀁, ‘‘𑀲𑁆𑀬𑀸𑀤𑀻𑀲𑀼 𑀭𑀲𑁆𑀲𑁄’’𑀢𑀺 𑀦𑀧𑀼𑀁𑀲𑀓𑁂 𑀯𑀢𑁆𑀢𑀫𑀸𑀦𑀲𑁆𑀲 𑀭𑀲𑁆𑀲𑁄. 𑀳𑀦𑀼 𑀘 𑀕𑀻𑀯𑀸 𑀘 𑀳𑀦𑀼𑀕𑀻𑀯𑀁, 𑀓𑀡𑁆𑀡𑀸 𑀘 𑀦𑀸𑀲𑀸 𑀘 𑀓𑀡𑁆𑀡𑀦𑀸𑀲𑀁, 𑀧𑀸𑀡𑀺 𑀘 𑀧𑀸𑀤𑁄 𑀘 𑀧𑀸𑀡𑀺𑀧𑀸𑀤𑀁, 𑀙𑀯𑀺 𑀘 𑀫𑀁𑀲𑀜𑁆𑀘 𑀮𑁄𑀳𑀺𑀢𑀜𑁆𑀘 𑀙𑀯𑀺𑀫𑀁𑀲𑀮𑁄𑀳𑀺𑀢𑀁, 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘 𑀦𑀸𑀫𑀭𑀽𑀧𑀁, 𑀚𑀭𑀸 𑀘 𑀫𑀭𑀡𑀜𑁆𑀘 𑀚𑀭𑀸𑀫𑀭𑀡𑀁.

𑀢𑀽𑀭𑀺𑀬𑀗𑁆𑀕𑀸𑀦𑀁-𑀅𑀮𑀲𑁄 𑀘 𑀢𑀸𑀮𑀫𑁆𑀩𑀭𑁄 𑀘 𑀅𑀮𑀲𑀢𑀸𑀮𑀫𑁆𑀩𑀭𑀁, 𑀫𑀼𑀭𑀚𑁄 𑀘 𑀕𑁄𑀫𑀼𑀔𑁄 𑀘 𑀫𑀼𑀭𑀚𑀕𑁄𑀫𑀼𑀔𑀁, 𑀲𑀁𑀔𑁄 𑀘 𑀧𑀡𑀯𑁄 𑀘 𑀤𑁂𑀡𑁆𑀟𑀺𑀫𑁄 𑀘, 𑀲𑀁𑀔𑀸 𑀘 𑀧𑀡𑀯𑀸 𑀘 𑀤𑁂𑀡𑁆𑀟𑀺𑀫𑀸 𑀘𑀸𑀢𑀺 𑀯𑀸 𑀲𑀁𑀔𑀧𑀡𑀯𑀤𑁂𑀡𑁆𑀟𑀺𑀫𑀁, 𑀧𑀡𑀯𑀸𑀤𑀬𑁄 𑀤𑁆𑀯𑁂𑀧𑀺 𑀪𑁂𑀭𑀺𑀯𑀺𑀲𑁂𑀲𑀸, 𑀫𑀤𑁆𑀤𑀯𑀺𑀓𑁄 𑀘 𑀧𑀸𑀡𑀯𑀺𑀓𑁄 𑀘 𑀫𑀤𑁆𑀤𑀯𑀺𑀓𑀧𑀸𑀡𑀯𑀺𑀓𑀁, 𑀕𑀻𑀢𑀜𑁆𑀘 𑀯𑀸𑀤𑀺𑀢𑀜𑁆𑀘 𑀕𑀻𑀢𑀯𑀸𑀤𑀺𑀢𑀁, 𑀲𑀫𑁆𑀫𑀜𑁆𑀘 𑀢𑀸𑀴𑀜𑁆𑀘 𑀲𑀫𑁆𑀫𑀢𑀸𑀴𑀁, 𑀲𑀫𑁆𑀫𑀁𑀢𑀺 𑀓𑀁𑀲𑀢𑀸𑀮𑀁, 𑀢𑀸𑀴𑀁𑀢𑀺 𑀳𑀢𑁆𑀣𑀢𑀸𑀴𑀁.

𑀬𑁄𑀕𑁆𑀕𑀗𑁆𑀕𑀸𑀦𑀁-𑀨𑀸𑀮𑁄 𑀘 𑀧𑀸𑀘𑀦𑀜𑁆𑀘 𑀨𑀸𑀮𑀧𑀸𑀘𑀦𑀁, 𑀬𑀼𑀕𑀜𑁆𑀘 𑀦𑀗𑁆𑀕𑀮𑀜𑁆𑀘 𑀬𑀼𑀕𑀦𑀗𑁆𑀕𑀮𑀁.

𑀲𑁂𑀦𑀗𑁆𑀕𑀸𑀦𑀁-𑀳𑀢𑁆𑀣𑀺𑀦𑁄 𑀘 𑀅𑀲𑁆𑀲𑀸 𑀘 𑀳𑀢𑁆𑀣𑀺𑀅𑀲𑁆𑀲𑀁, 𑀭𑀣𑀸 𑀘 𑀧𑀢𑁆𑀢𑀺𑀓𑀸 𑀘 𑀭𑀣𑀧𑀢𑁆𑀢𑀺𑀓𑀁, 𑀅𑀲𑀺 𑀘 𑀲𑀢𑁆𑀢𑀺 𑀘 𑀢𑁄𑀫𑀭𑀜𑁆𑀘 𑀧𑀺𑀡𑁆𑀟𑀜𑁆𑀘 𑀅𑀲𑀺𑀲𑀢𑁆𑀢𑀺𑀢𑁄𑀫𑀭𑀧𑀺𑀡𑁆𑀟𑀁, 𑀅𑀲𑀺 𑀘 𑀘𑀫𑁆𑀫𑀜𑁆𑀘 𑀅𑀲𑀺𑀘𑀫𑁆𑀫𑀁, 𑀘𑀫𑁆𑀫𑀦𑁆𑀢𑀺 𑀲𑀭𑀯𑀸𑀭𑀡-𑀨𑀮𑀓𑀁. 𑀥𑀦𑀼 𑀘 𑀓𑀮𑀸𑀧𑁄 𑀘 𑀥𑀦𑀼𑀓𑀮𑀸𑀧𑀁, 𑀓𑀮𑀸𑀧𑁄=𑀢𑀼𑀡𑀻𑀭𑀁. 𑀧𑀳𑀭𑀡𑀜𑁆𑀘 𑀆𑀯𑀭𑀡𑀜𑁆𑀘 𑀧𑀳𑀭𑀡𑀸𑀯𑀭𑀡𑀁.

𑀦𑀺𑀘𑁆𑀘𑀯𑁂𑀭𑀻𑀦𑀁-𑀅𑀳𑀺 𑀘 𑀦𑀓𑀼𑀮𑁄 𑀘, 𑀅𑀳𑀻 𑀘 𑀦𑀓𑀼𑀮𑀸 𑀘𑀸𑀢𑀺 𑀯𑀸 𑀅𑀳𑀺𑀦𑀓𑀼𑀮𑀁. 𑀏𑀯𑀁 𑀩𑀺𑀴𑀸𑀭𑀫𑀽𑀲𑀺𑀓𑀁, 𑀅𑀦𑁆𑀢𑀲𑁆𑀲 𑀭𑀲𑁆𑀲𑀢𑁆𑀢𑀁. 𑀓𑀸𑀓𑁄𑀮𑀼𑀓𑀁, 𑀲𑀧𑁆𑀧𑀫𑀡𑁆𑀟𑀽𑀓𑀁, 𑀕𑀭𑀼𑀴𑀲𑀧𑁆𑀧𑀁, 𑀦𑀸𑀕𑀲𑀼𑀧𑀡𑁆𑀡𑀁.

𑀲𑀗𑁆𑀔𑁆𑀬𑀸𑀧𑀭𑀺𑀫𑀸𑀡𑀲𑀜𑁆𑀜𑀸𑀦𑀁-𑀏𑀓𑀓𑀜𑁆𑀘 𑀤𑀼𑀓𑀜𑁆𑀘 𑀏𑀓𑀓𑀤𑀼𑀓𑀁. 𑀏𑀯𑀁, 𑀤𑀼𑀓𑀢𑀺𑀓𑀁, 𑀢𑀺𑀓𑀘𑀢𑀼𑀓𑁆𑀓𑀁, 𑀘𑀢𑀼𑀓𑁆𑀓𑀧𑀜𑁆𑀘𑀓𑀁. 𑀤𑀲𑀓𑀜𑁆𑀘 𑀏𑀓𑀸𑀤𑀲𑀓𑀜𑁆𑀘 𑀤𑀲𑁂𑀓𑀸𑀤𑀲𑀓𑀁, ‘‘𑀢𑀺𑀢𑀸𑀮𑀻𑀲’’ 𑀇𑀢𑀺 𑀘𑀓-𑀪𑀸𑀕𑀮𑁄𑀧𑀦𑀺𑀤𑁆𑀤𑁂𑀲𑁂𑀦 𑀓𑀓𑀸𑀭𑀲𑁆𑀲 𑀮𑁄𑀧𑁄.

𑀔𑀼𑀤𑁆𑀤𑀚𑀦𑁆𑀢𑀼𑀓𑀸𑀦𑀁-𑀓𑀻𑀝𑀸 𑀘 𑀧𑀝𑀗𑁆𑀕𑀸 𑀘 𑀓𑀻𑀝𑀧𑀝𑀗𑁆𑀕𑀁, 𑀓𑀻𑀝𑀸=𑀓𑀧𑀸𑀮𑀧𑀺𑀝𑁆𑀞𑀺𑀓𑀧𑀸𑀡𑀸. 𑀏𑀯𑀁 𑀓𑀼𑀦𑁆𑀣𑀓𑀺𑀧𑀺𑀮𑁆𑀮𑀺𑀓𑀁, 𑀟𑀁𑀲𑀸 𑀘 𑀫𑀓𑀲𑀸 𑀘 𑀟𑀁𑀲𑀫𑀓𑀲𑀁, 𑀫𑀓𑁆𑀔𑀺𑀓𑀸 𑀘 𑀓𑀺𑀧𑀺𑀮𑁆𑀮𑀺𑀓𑀸 𑀘 𑀫𑀓𑁆𑀔𑀺𑀓𑀓𑀺𑀧𑀺𑀮𑁆𑀮𑀺𑀓𑀁, 𑀓𑀻𑀝𑀸 𑀘 𑀲𑀭𑀺𑀁𑀲𑀧𑀸 𑀘 𑀓𑀻𑀝𑀲𑀭𑀺𑀁𑀲𑀧𑀁. 𑀢𑀢𑁆𑀣 𑀓𑀼𑀦𑁆𑀣𑀸=𑀲𑀼𑀔𑀼𑀫𑀓𑀺𑀧𑀺𑀮𑁆𑀮𑀺𑀓𑀸.

𑀔𑀼𑀤𑁆𑀤𑀚𑀦𑁆𑀢𑀼 𑀅𑀦𑀝𑁆𑀞𑀻 𑀯𑀸, 𑀅𑀣 𑀔𑁄 𑀔𑀼𑀤𑁆𑀤𑀓𑁄𑀧𑀺 𑀯𑀸;

𑀲𑀢𑀁 𑀯𑀸 𑀧𑀲𑀢𑁄 𑀬𑁂𑀲𑀁, 𑀓𑁂𑀘𑀺 𑀆𑀦𑀢𑀼𑀮𑀸 𑀇𑀢𑀺.

𑀧𑀘𑀦𑀘𑀡𑁆𑀟𑀸𑀮𑀸𑀦𑀁-𑀑𑀭𑀩𑁆𑀪𑀺𑀓𑀸 𑀘 𑀲𑀽𑀓𑀭𑀺𑀓𑀸 𑀘 𑀑𑀭𑀩𑁆𑀪𑀺𑀓𑀲𑀽𑀓𑀭𑀺𑀓𑀁, 𑀏𑀯𑀁 𑀲𑀸𑀓𑀼𑀦𑁆𑀢𑀺𑀓𑀫𑀸𑀕𑀯𑀺𑀓𑀁. 𑀲𑀧𑀸𑀓𑁄 𑀘 𑀘𑀡𑁆𑀟𑀸𑀮𑁄 𑀘 𑀲𑀧𑀸𑀓𑀘𑀡𑁆𑀟𑀸𑀮𑀁, 𑀧𑀼𑀓𑁆𑀓𑀼𑀲𑀙𑀯𑀟𑀸𑀳𑀓𑀁, 𑀯𑁂𑀦𑀭𑀣𑀓𑀸𑀭𑀁, 𑀢𑀢𑁆𑀣 𑀯𑁂𑀦𑀸=𑀢𑀘𑁆𑀙𑀓𑀸, 𑀭𑀣𑀓𑀸𑀭𑀸=𑀘𑀫𑁆𑀫𑀓𑀸𑀭𑀸.

𑀘𑀭𑀡𑀲𑀸𑀥𑀸𑀭𑀡𑀸𑀦𑀁-𑀅𑀢𑀺𑀲𑁄 𑀘 𑀪𑀸𑀭𑀤𑁆𑀯𑀸𑀚𑁄 𑀘 𑀅𑀢𑀺𑀲𑀪𑀸𑀭𑀤𑁆𑀯𑀸𑀚𑀁, 𑀓𑀝𑁆𑀞𑁄 𑀘 𑀓𑀧𑀸𑀮𑁄 𑀘 𑀓𑀝𑁆𑀞𑀓𑀧𑀸𑀮𑀁, 𑀲𑀻𑀮𑀜𑁆𑀘 𑀧𑀜𑁆𑀜𑀸𑀡𑀜𑁆𑀘 𑀲𑀻𑀮𑀧𑀜𑁆𑀜𑀸𑀡𑀁, 𑀲𑀫𑀣𑁄 𑀘 𑀯𑀺𑀧𑀲𑁆𑀲𑀦𑀸 𑀘 𑀲𑀫𑀣𑀯𑀺𑀧𑀲𑁆𑀲𑀦𑀁, 𑀯𑀺𑀚𑁆𑀚𑀸 𑀘 𑀘𑀭𑀡𑀜𑁆𑀘 𑀯𑀺𑀚𑁆𑀚𑀸𑀘𑀭𑀡𑀁, 𑀏𑀯𑀁 𑀦𑀸𑀫𑀭𑀽𑀧𑀁, 𑀳𑀺𑀭𑁄𑀢𑁆𑀢𑀧𑁆𑀧𑀁, 𑀲𑀢𑀺𑀲𑀫𑁆𑀧-𑀚𑀜𑁆𑀜𑀁, 𑀮𑁄𑀪𑀫𑁄𑀳𑀁, 𑀤𑁄𑀲𑀫𑁄𑀳𑀁, 𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑀁, 𑀣𑀺𑀦𑀫𑀺𑀤𑁆𑀥𑀁, 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘+𑀫𑀺𑀘𑁆𑀘𑀸𑀤𑀺.

𑀏𑀓𑀚𑁆𑀛𑀸𑀬𑀦𑀧𑀸𑀯𑀘𑀦𑀸𑀦𑀁-𑀤𑀻𑀖𑁄 𑀘 𑀫𑀚𑁆𑀛𑀺𑀫𑁄 𑀘 𑀤𑀻𑀖𑀫𑀚𑁆𑀛𑀺𑀫𑀁, 𑀏𑀯𑀁 𑀏𑀓𑀼𑀢𑁆𑀢𑀭 𑀲𑀁𑀬𑀼𑀢𑁆𑀢𑀓𑀁, 𑀔𑀦𑁆𑀥𑀓𑀯𑀺𑀪𑀗𑁆𑀕𑀁.

𑀮𑀺𑀗𑁆𑀕𑀯𑀺𑀲𑁂𑀲𑀸𑀦𑀁-𑀇𑀢𑁆𑀣𑀻 𑀘 𑀧𑀼𑀫𑀸 𑀘 𑀇𑀢𑁆𑀣𑀺𑀧𑀼𑀫𑀁, 𑀤𑀸𑀲𑀻 𑀘 𑀤𑀸𑀲𑁄 𑀘 𑀤𑀸𑀲𑀺𑀤𑀸𑀲𑀁, 𑀘𑀻𑀯𑀭𑀜𑁆𑀘 𑀧𑀺𑀡𑁆𑀟𑀧𑀸𑀢𑁄 𑀘 𑀲𑁂𑀦𑀸𑀲𑀦𑀜𑁆𑀘 𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑁄 𑀘 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀁, 𑀢𑀺𑀡𑀜𑁆𑀘 𑀓𑀝𑁆𑀞𑁄 𑀘 𑀲𑀸𑀔𑀸 𑀘 𑀧𑀮𑀸𑀲𑀜𑁆𑀘 𑀢𑀺𑀡𑀓𑀝𑁆𑀞𑀲𑀸𑀔𑀸𑀧𑀮𑀸𑀲𑀁. ‘‘𑀮𑀸𑀪𑀻 𑀳𑁄𑀢𑀺 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸𑀦𑀁’’𑀢𑀺𑀧𑀺 𑀤𑀺𑀲𑁆𑀲𑀢𑀺.

𑀯𑀺𑀯𑀺𑀥𑀯𑀺𑀭𑀼𑀤𑁆𑀥𑀸𑀦𑀁-𑀓𑀼𑀲𑀮𑀜𑁆𑀘 𑀅𑀓𑀼𑀲𑀮𑀜𑁆𑀘 𑀓𑀼𑀲𑀮𑀸𑀓𑀼𑀲𑀮𑀁, 𑀏𑀯𑀁 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀁, 𑀳𑀻𑀦𑀧𑀡𑀻𑀢𑀁, 𑀓𑀡𑁆𑀳𑀲𑀼𑀓𑁆𑀓𑀁, 𑀙𑁂𑀓𑀧𑀸𑀧𑀓𑀁, 𑀲𑀼𑀔𑀤𑀼𑀓𑁆𑀔𑀁, 𑀅𑀥𑀫𑀼𑀢𑁆𑀢𑀫𑀁, 𑀧𑀝𑀺𑀖𑀸𑀦𑀼𑀦𑀬𑀁, 𑀙𑀸𑀬𑀸𑀢𑀧𑀁, 𑀆𑀮𑁄𑀓𑀦𑁆𑀥𑀓𑀸𑀭𑀁. 𑀭𑀢𑁆𑀢𑀺𑀜𑁆𑀘 𑀤𑀺𑀯𑀸 𑀘 𑀭𑀢𑁆𑀢𑀺𑀦𑁆𑀤𑀺𑀯𑀁, ‘‘𑀭𑀢𑁆𑀢𑀺𑀦𑁆𑀤𑀺𑀯𑀤𑀸𑀭𑀕𑀯𑀘𑀢𑀼𑀭𑀲𑁆𑀲𑀸’’𑀢𑀺 𑀅𑀧𑀘𑁆𑀘𑀬𑁂 𑀓𑀢𑁂 𑀦𑀼𑀫𑀆𑀕𑀫𑁄. 𑀅𑀳𑁄 𑀘 𑀭𑀢𑁆𑀢𑀺 𑀘 𑀅𑀳𑁄𑀭𑀢𑁆𑀢𑀁, ‘‘𑀤𑀻𑀖𑀸+𑀳𑁄𑀯𑀲𑁆𑀲𑁂𑀓𑀤𑁂𑀲𑁂𑀳𑀺 𑀘 𑀭𑀢𑁆𑀬𑀸’’𑀢𑀺 𑀅𑀧𑀘𑁆𑀘𑀬𑁂 𑀓𑀢𑁂 ‘‘𑀫𑀦𑀸𑀤𑁆𑀬𑀸𑀧𑀸𑀤𑀻𑀦+𑀫𑁄 𑀫𑀬𑁂 𑀘𑁂’’𑀢𑀺 𑀑𑀓𑀸𑀭𑁄.

𑀤𑀺𑀲𑀸𑀦𑀁-𑀧𑀼𑀩𑁆𑀩𑀸 𑀘 𑀅𑀧𑀭𑀸 𑀘 𑀧𑀼𑀩𑁆𑀩𑀸𑀧𑀭𑀁, 𑀏𑀯𑀁 𑀧𑀼𑀭𑀢𑁆𑀣𑀺𑀫𑀧𑀘𑁆𑀙𑀺𑀫𑀁, 𑀤𑀓𑁆𑀔𑀺𑀡𑀼𑀢𑁆𑀢𑀭𑀁, 𑀧𑀼𑀩𑁆𑀩𑀤𑀓𑁆𑀔𑀺𑀡𑀁, 𑀧𑀼𑀩𑁆𑀩𑀼𑀢𑁆𑀢𑀭𑀁, 𑀅𑀧𑀭𑀤𑀓𑁆𑀔𑀺𑀡𑀁, 𑀅𑀧𑀭𑀼𑀢𑁆𑀢𑀭𑀁.

𑀦𑀤𑀻𑀦𑀁-𑀕𑀗𑁆𑀕𑀸 𑀘 𑀬𑀫𑀼𑀦𑀸 𑀘 𑀕𑀗𑁆𑀕𑀸𑀬𑀫𑀼𑀦𑀁, 𑀏𑀯𑀁 𑀫𑀳𑀻𑀲𑀭𑀪𑀽.

𑀢𑀺𑀡+𑀭𑀼𑀓𑁆𑀔+𑀧𑀲𑀼+𑀲𑀓𑀼𑀡+𑀥𑀦+𑀔𑀜𑁆𑀜+𑀩𑁆𑀬𑀜𑁆𑀚𑀦+𑀚𑀦𑀧𑀤𑀸𑀦𑀁 𑀯𑀸. 𑀢𑀺𑀡𑀯𑀺𑀲𑁂𑀲𑀸𑀦𑀁-𑀉𑀲𑀻𑀭𑀸𑀦𑀺 𑀘 𑀩𑀻𑀭𑀡𑀸𑀦𑀺 𑀘 𑀉𑀲𑀻𑀭𑀩𑀻𑀭𑀡𑀁 𑀉𑀲𑀻𑀭𑀩𑀻𑀭𑀡𑀸𑀦𑀺 𑀯𑀸. 𑀏𑀯𑀁 𑀫𑀼𑀜𑁆𑀚𑀧𑀩𑁆𑀩𑀚𑀁 𑀫𑀼𑀜𑁆𑀚𑀧𑀩𑁆𑀩𑀚𑀸𑀦𑀺 𑀯𑀸, 𑀓𑀸𑀲𑀓𑀼𑀲𑀁 𑀓𑀸𑀲𑀓𑀼𑀲𑀸 𑀯𑀸.

𑀭𑀼𑀓𑁆𑀔𑀯𑀺𑀲𑁂𑀲𑀸𑀦𑀁-𑀅𑀲𑁆𑀲𑀢𑁆𑀣𑀸 𑀘 𑀓𑀧𑀺𑀝𑁆𑀞𑀸 𑀘 𑀅𑀲𑁆𑀲𑀢𑁆𑀣𑀓𑀧𑀺𑀝𑁆𑀞𑀁 𑀅𑀲𑁆𑀲𑀢𑁆𑀣𑀓𑀧𑀺𑀝𑁆𑀞𑀸 𑀯𑀸, 𑀏𑀯𑀁 𑀅𑀫𑁆𑀩𑀧𑀦𑀲𑀁 𑀅𑀫𑁆𑀩𑀧𑀦𑀲𑀸, 𑀔𑀤𑀺𑀭𑀧𑀮𑀸𑀲𑀁 𑀔𑀤𑀺𑀭𑀧𑀮𑀸𑀲𑀸, 𑀥𑀯𑀸𑀲𑁆𑀲𑀓𑀡𑁆𑀡𑀁 𑀥𑀯𑀸𑀲𑁆𑀲𑀓𑀡𑁆𑀡𑀸, 𑀧𑀺𑀮𑀓𑁆𑀔𑀦𑀺𑀕𑁆𑀭𑁄𑀥𑀁 𑀧𑀺𑀮𑀓𑁆𑀔𑀦𑀺𑀕𑁆𑀭𑁄𑀥𑀸, 𑀲𑀸𑀓𑀲𑀸𑀮𑀁 𑀲𑀸𑀓𑀲𑀸𑀮𑀸.

𑀧𑀲𑀼𑀯𑀺𑀲𑁂𑀲𑀸𑀦𑀁-𑀕𑀚𑀸 𑀘 𑀕𑀯𑀚𑀸 𑀘 𑀕𑀚𑀕𑀯𑀚𑀁 𑀕𑀚𑀕𑀯𑀚𑀸 𑀯𑀸, 𑀅𑀚𑀸 𑀘 𑀏𑀴𑀓𑀸 𑀘 𑀅𑀚𑁂𑀴𑀓𑀁 𑀅𑀚𑁂𑀴𑀓𑀸, 𑀳𑀢𑁆𑀣𑀻 𑀘 𑀕𑀸𑀯𑁄 𑀘 𑀅𑀲𑁆𑀲𑀸 𑀘 𑀯𑀴𑀯𑀸 𑀘 𑀳𑀢𑁆𑀣𑀻𑀕𑀯𑀲𑁆𑀲𑀯𑀴𑀯𑀁 𑀳𑀢𑁆𑀣𑀻𑀕𑀯𑀲𑁆𑀲𑀯𑀴𑀯𑀸, 𑀭𑀲𑁆𑀲𑀢𑁆𑀢𑀁. 𑀏𑀯𑀁 𑀕𑁄𑀫𑀳𑀺𑀲𑀁 𑀕𑁄𑀫𑀳𑀺𑀲𑀸, 𑀏𑀡𑁂𑀬𑁆𑀬𑀯𑀭𑀸𑀳𑀁 𑀏𑀡𑁂𑀬𑁆𑀬𑀯𑀭𑀸𑀳𑀸, 𑀲𑀻𑀳𑀩𑁆𑀬𑀕𑁆𑀖𑀢𑀭𑀘𑁆𑀙𑀁 𑀲𑀻𑀳𑀩𑁆𑀬𑀕𑁆𑀖𑀢𑀭𑀘𑁆𑀙𑀸, 𑀓𑀼𑀓𑁆𑀓𑀼𑀝𑀲𑀽𑀓𑀭𑀁 𑀓𑀼𑀓𑁆𑀓𑀼𑀝𑀲𑀽𑀓𑀭𑀸, 𑀏𑀡𑁂𑀬𑁆𑀬𑀕𑁄𑀫𑀳𑀺𑀲𑀁 𑀏𑀡𑁂𑀬𑁆𑀬𑀕𑁄𑀫𑀳𑀺𑀲𑀸.

𑀲𑀓𑀼𑀡𑀯𑀺𑀲𑁂𑀲𑀸𑀦𑀁-𑀳𑀁𑀲𑀸 𑀘 𑀩𑀓𑀸 𑀘 𑀳𑀁𑀲𑀩𑀓𑀁 𑀳𑀁𑀲𑀩𑀓𑀸. 𑀏𑀯𑀁 𑀓𑀸𑀭𑀡𑁆𑀟𑀯𑀘𑀓𑁆𑀓𑀯𑀸𑀓𑀁 𑀓𑀸𑀭𑀡𑁆𑀟𑀯𑀘𑀓𑁆𑀓𑀯𑀸𑀓𑀸, 𑀫𑀬𑀽𑀭𑀓𑁄𑀜𑁆𑀘𑀁 𑀫𑀬𑀽𑀭𑀓𑁄𑀜𑁆𑀘𑀸, 𑀲𑀼𑀓𑀲𑀸𑀮𑀺𑀓𑀁 𑀲𑀼𑀓𑀲𑀸𑀮𑀺𑀓𑀸, 𑀩𑀓𑀩𑀮𑀸𑀓𑀁 𑀩𑀓𑀩𑀮𑀸𑀓𑀸.

𑀥𑀦𑀸𑀦𑀁-𑀳𑀺𑀭𑀜𑁆𑀜𑀜𑁆𑀘 𑀲𑀼𑀯𑀡𑁆𑀡𑀜𑁆𑀘 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸𑀦𑀺. 𑀏𑀯𑀁 𑀚𑀸𑀢𑀭𑀽𑀧𑀭𑀚𑀢𑀁 𑀚𑀸𑀢𑀭𑀽𑀧𑀭𑀚𑀢𑀸𑀦𑀺, 𑀫𑀡𑀺𑀲𑀗𑁆𑀔𑀫𑀼𑀢𑁆𑀢𑀯𑁂𑀴𑀼𑀭𑀺𑀬𑀁 𑀫𑀡𑀺𑀲𑀗𑁆𑀔𑀫𑀼𑀢𑁆𑀢𑀯𑁂𑀴𑀼𑀭𑀺𑀬𑀸.

𑀥𑀜𑁆𑀜𑀸𑀦𑀁-𑀲𑀸𑀮𑀻 𑀘 𑀬𑀯𑀸 𑀘 𑀲𑀸𑀮𑀺𑀬𑀯𑀁 𑀲𑀸𑀮𑀺𑀬𑀯𑀸 𑀯𑀸. 𑀏𑀯𑀁 𑀢𑀺𑀮𑀫𑀼𑀕𑁆𑀕𑀫𑀸𑀲𑀁 𑀢𑀺𑀮𑀫𑀼𑀕𑁆𑀕𑀫𑀸𑀲𑀸𑀦𑀺, 𑀦𑀺𑀧𑁆𑀧𑀸𑀯𑀓𑀼𑀮𑀢𑁆𑀣𑀁 𑀦𑀺𑀧𑁆𑀧𑀸𑀯𑀓𑀼𑀮𑀢𑁆𑀣𑀸.

𑀩𑁆𑀬𑀜𑁆𑀚𑀦𑀸𑀦𑀁-𑀲𑀸𑀓𑁄 𑀘 𑀲𑀼𑀯𑀸 𑀘 𑀲𑀸𑀓𑀲𑀼𑀯𑀁 𑀲𑀸𑀓𑀲𑀼𑀯𑀸. 𑀏𑀯𑀁 𑀕𑀩𑁆𑀬𑀫𑀸𑀳𑀺𑀲𑀁 𑀕𑀩𑁆𑀬𑀫𑀸𑀳𑀺𑀲𑀸, 𑀏𑀡𑁂𑀬𑁆𑀬𑀯𑀭𑀸𑀳𑀁 𑀏𑀡𑁂𑀬, 𑀯𑀭𑀸𑀳𑀸. 𑀫𑀺𑀕𑀫𑀬𑀽𑀭𑀁 𑀫𑀺𑀕𑀫𑀬𑀽𑀭𑀸.

𑀚𑀦𑀧𑀤𑀸𑀦𑀁-𑀓𑀸𑀲𑀺 𑀘 𑀓𑁄𑀲𑀮𑀸 𑀘 𑀓𑀸𑀲𑀺𑀓𑁄𑀲𑀮𑀁 𑀓𑀸𑀲𑀺𑀓𑁄𑀲𑀮𑀸, 𑀯𑀚𑁆𑀚𑀻 𑀘 𑀫𑀮𑁆𑀮𑀸 𑀘 𑀯𑀚𑁆𑀚𑀺𑀫𑀮𑁆𑀮𑀁 𑀯𑀚𑁆𑀚𑀺𑀫𑀮𑁆𑀮𑀸, 𑀅𑀗𑁆𑀕𑀸 𑀘 𑀫𑀕𑀥𑀸 𑀘 𑀅𑀗𑁆𑀕𑀫𑀕𑀥𑀁 𑀅𑀗𑁆𑀕𑀫𑀕𑀥𑀸, 𑀏𑀯𑀁 𑀘𑁂𑀢𑀺𑀯𑀁𑀲𑀁 𑀘𑁂𑀢𑀺𑀯𑀁𑀲𑀸, 𑀫𑀘𑁆𑀙𑀲𑀽𑀭𑀲𑁂𑀦𑀁 𑀫𑀘𑁆𑀙𑀲𑀽𑀭𑀲𑁂𑀦𑀸, 𑀓𑀼𑀭𑀼𑀧𑀜𑁆𑀘𑀸𑀮𑀁 𑀓𑀼𑀭𑀼𑀧𑀜𑁆𑀘𑀸𑀮𑀸. 𑀦𑀸𑀫𑀜𑁆𑀘 𑀭𑀽𑀧𑀜𑁆𑀘 𑀦𑀸𑀫𑀭𑀽𑀧𑀜𑁆𑀘 𑀦𑀸𑀫𑀭𑀽𑀧𑀦𑀸𑀫𑀭𑀽𑀧𑀦𑁆𑀢𑀺 𑀘𑀢𑀼𑀭𑁂𑀓𑀧𑀜𑁆𑀘𑀯𑁄𑀓𑀸𑀭𑀯𑀲𑁂𑀦 𑀯𑀢𑁆𑀢𑀩𑁆𑀩𑁂 𑀩𑀳𑀼𑀮𑀸𑀥𑀺𑀓𑀸𑀭𑀸 𑀲𑀭𑀽𑀧𑁂𑀓𑀲𑁂𑀲𑀁 𑀓𑀢𑁆𑀯𑀸 𑀦𑀸𑀫𑀭𑀽𑀧𑀦𑁆𑀢𑀺 𑀯𑀼𑀢𑁆𑀢𑀁.

𑀏𑀢𑀲𑁆𑀫𑀺𑀁 𑀏𑀓𑀢𑁆𑀣𑀻𑀪𑀸𑀯𑀓𑀡𑁆𑀟𑁂 𑀬𑀁 𑀯𑀼𑀢𑁆𑀢𑀁 𑀧𑀼𑀩𑁆𑀩𑀁, 𑀢𑀤𑁂𑀯 𑀧𑀼𑀩𑁆𑀩𑀁 𑀦𑀺𑀧𑀢𑀢𑀺, 𑀓𑀫𑀸𑀢𑀺𑀓𑁆𑀓𑀫𑁂 𑀧𑀬𑁄𑀚𑀦𑀲𑁆𑀲𑀸+𑀪𑀸𑀯𑀸. 𑀓𑁆𑀯𑀘𑀺 𑀯𑀺𑀧𑀮𑁆𑀮𑀸𑀲𑁄𑀧𑀺 𑀳𑁄𑀢𑀺, 𑀩𑀳𑀼𑀮𑀸𑀥𑀺𑀓𑀸𑀭𑀢𑁄, 𑀤𑀦𑁆𑀢𑀸𑀦𑀁 𑀭𑀸𑀚𑀸 𑀭𑀸𑀚𑀤𑀦𑁆𑀢𑁄. 𑀘𑀢𑁆𑀣𑁂 𑀲𑀫𑀸𑀳𑀸𑀭𑁂 ‘‘𑀲𑀪𑀸𑀧𑀭𑀺𑀲𑀸𑀬𑀸’’𑀢𑀺 𑀜𑀸𑀧𑀓𑀸 𑀓𑁆𑀯𑀘𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀁 𑀦 𑀪𑀯𑀢𑀺, 𑀆𑀥𑀺𑀧𑀘𑁆𑀘𑀜𑁆𑀘 𑀧𑀭𑀺𑀯𑀸𑀭𑁄 𑀘 𑀆𑀥𑀺𑀧𑀘𑁆𑀘𑀧𑀭𑀺𑀯𑀸𑀭𑁄. 𑀏𑀯𑀁 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺, 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀺𑀬𑀁.