𑁭𑁮. 𑀚𑀸𑀬𑀸𑀬 𑀚𑀬𑀁 𑀧𑀢𑀺𑀫𑁆𑀳𑀺

𑀧𑀢𑀺𑀫𑁆𑀳𑀺 𑀧𑀭𑁂 𑀚𑀸𑀬𑀸𑀬 𑀚𑀬𑀁 𑀳𑁄𑀢𑀺. 𑀚𑀸𑀬𑀸 𑀘 𑀧𑀢𑀺 𑀘 𑀚𑀬𑀫𑁆𑀧𑀢𑀬𑁄. 𑀚𑀸𑀦𑀺𑀧𑀢𑀻𑀢𑀺 𑀧𑀓𑀢𑀦𑁆𑀢𑀭𑁂𑀦 𑀲𑀺𑀤𑁆𑀥𑀁, 𑀚𑀸𑀦𑀺 𑀘 𑀧𑀢𑀺 𑀘 𑀚𑀸𑀦𑀺𑀧𑀢𑀺. 𑀏𑀯𑀁 𑀚𑀫𑁆𑀧𑀢𑀺 𑀤𑀫𑁆𑀧𑀢𑀻𑀢𑀺.

𑀓𑁆𑀯𑀘𑀺 𑀅𑀧𑁆𑀧𑀲𑀭𑀁 𑀧𑀼𑀩𑁆𑀩𑀁 𑀦𑀺𑀧𑀢𑀢𑀺, 𑀬𑀣𑀸-𑀘𑀦𑁆𑀤𑁄 𑀘 𑀲𑀽𑀭𑀺𑀬𑁄 𑀘 𑀘𑀦𑁆𑀤𑀲𑀽𑀭𑀺𑀬𑀸, 𑀦𑀺𑀕𑀫𑀸 𑀘 𑀚𑀦𑀧𑀤𑀸 𑀘 𑀦𑀺𑀕𑀫𑀚𑀦𑀧𑀤𑀸. 𑀏𑀯𑀁 𑀲𑀼𑀭𑀸𑀲𑀼𑀭𑀕𑀭𑀼𑀟𑀫𑀦𑀼𑀚𑀪𑀼𑀚𑀕𑀕𑀦𑁆𑀥𑀩𑁆𑀩𑀸.

𑀓𑁆𑀯𑀘𑀺 𑀇𑀯𑀡𑁆𑀡𑀼+𑀯𑀡𑁆𑀡𑀦𑁆𑀢𑀸𑀦𑀁 𑀧𑀼𑀩𑁆𑀩𑀦𑀺𑀧𑀸𑀢𑁄, 𑀬𑀣𑀸-𑀅𑀕𑁆𑀕𑀺𑀥𑀼𑀫𑀸, 𑀕𑀢𑀺𑀩𑀼𑀤𑁆𑀥𑀺𑀪𑀼𑀚𑀧𑀞𑀳𑀭𑀓𑀭𑀲𑀬𑀸, 𑀥𑀸𑀢𑀼𑀮𑀺𑀗𑁆𑀕𑀸𑀦𑀺.

𑀓𑁆𑀯𑀘𑀺 𑀲𑀭𑀸𑀤𑀺𑀅𑀓𑀸𑀭𑀦𑁆𑀢𑀁 𑀧𑀼𑀩𑁆𑀩𑀁 𑀦𑀺𑀧𑀢𑀢𑀺, 𑀬𑀣𑀸-𑀅𑀢𑁆𑀣𑀥𑀫𑁆𑀫𑀸, 𑀅𑀢𑁆𑀣𑀲𑀤𑁆𑀤𑀸, 𑀲𑀤𑁆𑀤𑀢𑁆𑀣𑀸 𑀯𑀸.

𑀅𑀜𑁆𑀜𑀫𑀜𑁆𑀜𑀲𑀸𑀧𑁂𑀓𑁆𑀔𑀸𑀦𑀫𑁂𑀯 𑀢𑀺𑀭𑁄𑀳𑀺𑀢𑀸𑀯𑀬𑀯𑀪𑁂𑀤𑁄 𑀲𑀫𑀼𑀤𑀸𑀬𑀧𑀥𑀸𑀦𑁄 𑀲𑀫𑀸𑀳𑀸𑀭𑁄, 𑀬𑀣𑀸-𑀙𑀢𑁆𑀢𑀜𑁆𑀘 𑀉𑀧𑀸𑀳𑀦𑀸 𑀘 𑀙𑀢𑁆𑀢𑀼𑀧𑀸𑀳𑀦𑀁.