𑁧𑁯. 𑀘𑀢𑁆𑀣𑁂

𑀅𑀦𑁂𑀓𑀁𑀲𑁆𑀬𑀸𑀤𑁆𑀬𑀦𑁆𑀢𑀁 𑀘𑀢𑁆𑀣𑁂 𑀏𑀓𑀢𑁆𑀣𑀁 𑀯𑀸 𑀳𑁄𑀢𑀺. 𑀲𑀫𑀼𑀘𑁆𑀘𑀬𑁄 𑀅𑀦𑁆𑀯𑀸𑀘𑀬𑁄 𑀇𑀢𑀭𑀻𑀢𑀭𑀬𑁄𑀕𑁄 𑀲𑀫𑀸𑀳𑀸𑀭𑁄𑀢𑀺 𑀘𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀘𑀢𑀼𑀩𑁆𑀩𑀺𑀥𑁄.

𑀢𑀢𑁆𑀣 𑀲𑀫𑀼𑀘𑁆𑀘𑀬𑀸+𑀦𑁆𑀯𑀸𑀘𑀬𑁂𑀲𑀼 𑀲𑀫𑀸𑀲𑁄 𑀦 𑀳𑁄𑀢𑀺, 𑀓𑁆𑀭𑀺𑀬𑀸𑀲𑀸𑀧𑁂𑀓𑁆𑀔𑀢𑀸𑀬 𑀦𑀸𑀫𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀅𑀬𑀼𑀢𑁆𑀢𑀢𑁆𑀣𑀢𑁆𑀢𑀸, 𑀬𑀣𑀸-𑀘𑀻𑀯𑀭𑀁 𑀧𑀺𑀡𑁆𑀟𑀧𑀸𑀢𑀜𑁆𑀘 𑀧𑀘𑁆𑀘𑀬𑀁 𑀲𑀬𑀦𑀸𑀲𑀦𑀁 𑀅𑀤𑀸𑀲𑀺, 𑀤𑀸𑀦𑀜𑁆𑀘 𑀤𑁂𑀳𑀺, 𑀲𑀻𑀮𑀜𑁆𑀘𑀭𑀓𑁆𑀔𑀸𑀳𑀺. 𑀇𑀢𑀭𑀻𑀢𑀭𑀬𑁄𑀕𑁂 𑀲𑀫𑀸𑀳𑀸𑀭𑁂 𑀘 𑀅𑀜𑁆𑀜𑀫𑀜𑁆𑀜𑀸𑀧𑁂𑀓𑁆𑀔𑀢𑁆𑀢𑀸 𑀲𑀫𑀸𑀲𑁄.

𑀉𑀪𑀬𑀢𑁆𑀣𑀧𑀥𑀸𑀦𑁂 𑀘𑀢𑁆𑀣𑁂 𑀓𑀣+𑀫𑁂𑀓𑀢𑁆𑀣𑀻𑀪𑀸𑀯𑁄 𑀲𑀫𑁆𑀪𑀯𑁂+𑀢𑀺 𑀘𑁂, 𑀯𑀼𑀢𑁆𑀢𑀜𑁆𑀳𑀺 𑁋

𑀲𑀧𑁆𑀧𑀥𑀸𑀦𑀸𑀧𑀺 𑀬𑀢𑁆𑀣+𑀢𑁆𑀣𑀸, 𑀫𑀺𑀣𑁄 𑀲𑀸𑀧𑁂𑀓𑁆𑀔𑀢𑀸 𑀇𑀯;

𑀓𑁆𑀭𑀺𑀬𑀸𑀲𑀫𑁆𑀩𑀦𑁆𑀥𑀲𑀸𑀫𑀜𑁆𑀜𑀸, 𑀘𑀢𑁆𑀣𑁂+𑀓𑀢𑁆𑀣𑀁 𑀢+𑀤𑀼𑀘𑁆𑀘𑀢𑁂𑀢𑀺.

𑀬𑀲𑁆𑀫𑀸 𑀏𑀓𑀢𑁆𑀣𑀻𑀪𑀸𑀯𑁂𑀧𑀺 𑀲𑀢𑀻𑀬𑀲𑀢𑀻𑀬𑀢𑁆𑀣𑁂 𑀧𑀥𑀸𑀦𑀁, 𑀢𑀲𑁆𑀫𑀸 𑀇𑀤𑀁 𑀯𑀼𑀘𑁆𑀘𑀢𑁂 𑁋

𑀦+𑀜𑁆𑀜𑀫𑀜𑁆𑀜𑀁 𑀯𑀺𑀲𑁂𑀲𑁂𑀦𑁆𑀢𑀺, 𑀘𑀢𑁆𑀣𑁂 𑀅𑀢𑁆𑀣𑀸 𑀧𑀤𑀸𑀦𑀺𑀯;

𑀲𑀢𑁆𑀣𑀯𑀼𑀢𑁆𑀬𑀻 𑀅𑀢𑁄 𑀢𑁂𑀲𑀁, 𑀧𑀥𑀸𑀦𑀢𑁆𑀣𑀁+𑀪𑀺𑀬𑀼𑀚𑁆𑀚𑀢𑁂.

𑀇𑀢𑀭𑀻𑀢𑀭𑀬𑁄𑀕𑁄 𑀘, 𑀲𑀫𑀸𑀳𑀸𑀭𑁄𑀢𑁆𑀬+𑀬𑀁 𑀤𑁆𑀯𑀺𑀥𑀸;

𑀲𑀫𑀸𑀲𑁄 𑀢𑀼 𑀇𑀫𑀁 𑀅𑀜𑁆𑀜𑁂, 𑀚𑀸𑀦𑀦𑁆𑀢𑁂 𑀤𑁆𑀯𑀦𑁆𑀤𑀦𑀸𑀫𑀢𑁄.

𑀇𑀢𑀭𑀻𑀢𑀭𑀬𑁄𑀕𑀲𑁆𑀫𑀺𑀁+𑀯𑀬𑀯𑀢𑁆𑀣𑀲𑁆𑀲 𑀲𑀫𑁆𑀪𑀯𑁄;

𑀲𑀫𑀼𑀤𑀸𑀬𑀢𑀺𑀭𑁄𑀪𑀸𑀯𑁄, 𑀧𑀭𑀁𑀯 𑀮𑀺𑀗𑁆𑀕+𑀫𑀲𑁆𑀲 𑀘.

𑀲𑀫𑀼𑀤𑀸𑀬𑀩𑁆𑀪𑀯𑁄 𑀬𑀲𑁆𑀫𑀺𑀁+𑀯𑀬𑀯𑀸 𑀘 𑀢𑀺𑀭𑁄𑀳𑀺𑀢𑀸;

𑀲𑀫𑀸𑀳𑀸𑀭𑁄𑀢𑁆𑀬+𑀬𑀁 𑀘𑀢𑁆𑀣𑁄, 𑀲𑁄 𑀘 𑀳𑁄𑀢𑀺 𑀦𑀧𑀼𑀁𑀲𑀓𑁂.

𑀇𑀢𑀭𑀻𑀢𑀭𑀬𑁄𑀕𑁄 𑀬𑀣𑀸-𑀲𑀸𑀭𑀺𑀧𑀼𑀢𑁆𑀢𑁄 𑀘 𑀫𑁄𑀕𑁆𑀕𑀮𑁆𑀮𑀸𑀦𑁄 𑀘 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸, 𑀪𑁄 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸 𑀇𑀘𑁆𑀘𑀸𑀤𑀺. 𑀅𑀯𑀬𑀯𑀧𑀥𑀸𑀦𑀢𑁆𑀢𑀸 𑀩𑀳𑀼𑀯𑀘𑀦𑀫𑁂𑀯. 𑀲𑀫𑀡𑀸 𑀘 𑀩𑁆𑀭𑀸𑀳𑁆𑀫𑀡𑀸 𑀘 𑀲𑀫𑀡𑀩𑁆𑀭𑀸𑀳𑁆𑀫𑀡𑀸, 𑀏𑀯𑀁 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸, 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀸, 𑀤𑁂𑀯𑀫𑀦𑀼𑀲𑁆𑀲𑀸, 𑀘𑀦𑁆𑀤𑀺𑀫𑀲𑀽𑀭𑀺𑀬𑀸.