𑁩𑁫. 𑀙𑀝𑁆𑀞𑀻 𑀘𑀸+𑀦𑀸𑀤𑀭𑁂

𑀬𑀲𑁆𑀲 𑀪𑀸𑀯𑁄 𑀪𑀸𑀯𑀦𑁆𑀢𑀭𑀲𑁆𑀲 𑀮𑀓𑁆𑀔𑀡𑀁 𑀪𑀯𑀢𑀺, 𑀢𑀢𑁄 𑀙𑀝𑁆𑀞𑀻 𑀳𑁄𑀢𑀺 𑀲𑀢𑁆𑀢𑀫𑀻 𑀘𑀸+𑀦𑀸𑀤𑀭𑁂 𑀕𑀫𑁆𑀬𑀫𑀸𑀦𑁂. 𑀅𑀓𑀸𑀫𑀓𑀸𑀦𑀁 𑀫𑀸𑀢𑀸𑀧𑀺𑀢𑀽𑀦𑀁 𑀭𑀼𑀤𑀦𑁆𑀢𑀸𑀦𑀁 𑀧𑀩𑁆𑀩𑀚𑀺, 𑀫𑀸𑀢𑀸𑀧𑀺𑀢𑀽𑀲𑀼 𑀭𑀼𑀤𑀦𑁆𑀢𑁂𑀲𑀼 𑀯𑀸. ‘‘𑀆𑀓𑁄𑀝𑀬𑀦𑁆𑀢𑁄 𑀲𑁄 𑀦𑁂𑀢𑀺, 𑀲𑀺𑀯𑀺𑀭𑀸𑀚𑀲𑁆𑀲 𑀧𑁂𑀓𑁆𑀔𑀢𑁂’’, ‘‘𑀫𑀘𑁆𑀘𑀼 𑀆𑀤𑀸𑀬 𑀕𑀘𑁆𑀙𑀢𑀺, 𑀧𑁂𑀓𑁆𑀔𑀫𑀸𑀦𑁂 𑀫𑀳𑀸𑀚𑀦𑁂’’.

𑀕𑀼𑀦𑁆𑀦𑀁 𑀲𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁂 𑀙𑀝𑁆𑀞𑀻, 𑀕𑁄𑀲𑀼 𑀲𑀸𑀫𑀻𑀢𑀺 𑀯𑀺𑀲𑀬𑀲𑀢𑁆𑀢𑀫𑀻. 𑀏𑀯𑀁 𑀕𑀼𑀦𑁆𑀦𑀫𑀺𑀲𑁆𑀲𑀭𑁄, 𑀕𑁄𑀲𑁆𑀯𑀺+𑀲𑁆𑀲𑀭𑁄, 𑀕𑀼𑀦𑁆𑀦𑀁 𑀅𑀥𑀺𑀧𑀢𑀺, 𑀕𑁄𑀲𑀼 𑀅𑀥𑀺𑀧𑀢𑀺, 𑀕𑀼𑀦𑁆𑀦𑀁 𑀤𑀸𑀬𑀸𑀤𑁄, 𑀕𑁄𑀲𑀼 𑀤𑀸𑀬𑀸𑀤𑁄, 𑀕𑀼𑀦𑁆𑀦𑀁 𑀲𑀓𑁆𑀔𑀻, 𑀕𑁄𑀲𑀼 𑀲𑀓𑁆𑀔𑀻, 𑀕𑀼𑀦𑁆𑀦𑀁 𑀧𑀢𑀺𑀪𑀽, 𑀕𑁄𑀲𑀼 𑀧𑀢𑀺𑀪𑀽, 𑀕𑀼𑀦𑁆𑀦𑀁 𑀧𑀲𑀼𑀢𑁄, 𑀕𑁄𑀲𑀼 𑀧𑀲𑀼𑀢𑁄, 𑀓𑀼𑀲𑀮𑀸 𑀦𑀘𑁆𑀘𑀕𑀻𑀢𑀲𑁆𑀲, 𑀓𑀼𑀲𑀮𑀸 𑀦𑀘𑁆𑀘𑀕𑀻𑀢𑁂, 𑀆𑀬𑀼𑀢𑁆𑀢𑁄 𑀓𑀝𑀓𑀭𑀡𑀲𑁆𑀲, 𑀆𑀬𑀼𑀢𑁆𑀢𑁄 𑀓𑀝𑀓𑀭𑀡𑁂. 𑀢𑀣𑀸 𑀆𑀥𑀸𑀭𑀯𑀘𑀦𑀺𑀘𑁆𑀙𑀸𑀬𑀁 𑀲𑀢𑁆𑀢𑀫𑀻, 𑀪𑀺𑀓𑁆𑀔𑀽𑀲𑀼 𑀅𑀪𑀺𑀯𑀸𑀤𑁂𑀦𑁆𑀢𑀺, 𑀫𑀼𑀤𑁆𑀥𑀦𑀺 𑀘𑀼𑀫𑁆𑀩𑀺𑀢𑁆𑀯𑀸, 𑀩𑀸𑀳𑀸𑀲𑀼 𑀕𑀳𑁂𑀢𑁆𑀯𑀸, 𑀳𑀢𑁆𑀣𑁂𑀲𑀼 𑀧𑀺𑀡𑁆𑀟𑀸𑀬 𑀘𑀭𑀦𑁆𑀢𑀺, 𑀓𑀤𑀮𑀻𑀲𑀼 𑀕𑀚𑁂 𑀭𑀓𑁆𑀔𑀦𑁆𑀢𑀺, 𑀜𑀸𑀡𑀲𑁆𑀫𑀺𑀁 𑀧𑀲𑀦𑁆𑀦𑁄, 𑀜𑀸𑀡𑀲𑁆𑀫𑀺𑀁 𑀉𑀲𑁆𑀲𑀼𑀓𑁆𑀓𑁄𑀢𑀺 𑀯𑀺𑀲𑀬𑀲𑀢𑁆𑀢𑀫𑀻.