𑁧𑁬. 𑀓𑀢𑁆𑀢𑀼𑀓𑀭𑀡𑁂𑀲𑀼 𑀢𑀢𑀺𑀬𑀸

𑀓𑀢𑁆𑀢𑀭𑀺 𑀓𑀭𑀡𑁂 𑀘 𑀓𑀸𑀭𑀓𑁂 𑀢𑀢𑀺𑀬𑀸 𑀳𑁄𑀢𑀺. 𑀚𑀺𑀦𑁂𑀦 𑀤𑁂𑀲𑀺𑀢𑁄 𑀥𑀫𑁆𑀫𑁄, 𑀩𑀼𑀤𑁆𑀥𑁂𑀦 𑀚𑀺𑀢𑁄 𑀫𑀸𑀭𑁄, 𑀅𑀳𑀺𑀦𑀸 𑀤𑀝𑁆𑀞𑁄 𑀦𑀭𑁄. 𑀬𑀢𑁆𑀣 𑀓𑀸𑀭𑀡𑀓𑀸𑀭𑀡𑀫𑁆𑀧𑀺 𑀓𑀸𑀭𑀡𑀯𑀲𑁂𑀦 𑀯𑀼𑀘𑁆𑀘𑀢𑀺, 𑀢𑀢𑁆𑀣𑀸𑀧𑀺 𑀢𑀢𑀺𑀬𑀸, 𑀘𑁄𑀭𑁂𑀳𑀺 𑀕𑀸𑀫𑁄 𑀤𑀟𑁆𑀠𑁄, 𑀢𑀺𑀡𑁂𑀳𑀺 𑀪𑀢𑁆𑀢𑀁 𑀲𑀺𑀤𑁆𑀥𑀁, 𑀲𑀤𑁆𑀥𑁂𑀳𑀺 𑀓𑀸𑀭𑀺𑀢𑀸 𑀯𑀺𑀳𑀸𑀭𑀸.

𑀅𑀢𑁆𑀢𑀧𑀥𑀸𑀦𑁄 𑀓𑀺𑀭𑀺𑀬𑀁, 𑀬𑁄 𑀦𑀺𑀩𑁆𑀩𑀢𑁆𑀢𑁂𑀢𑀺 𑀓𑀸𑀭𑀓𑁄;

𑀅𑀧𑀬𑀼𑀢𑁆𑀢𑁄 𑀧𑀬𑀼𑀢𑁆𑀢𑁄 𑀯𑀸, 𑀲 𑀓𑀢𑁆𑀢𑀸𑀢𑀺 𑀧𑀯𑀼𑀘𑁆𑀘𑀢𑀺.

𑀓𑀭𑀡𑁂-𑀢𑀁 𑀧𑀦 𑀤𑀼𑀯𑀺𑀥𑀁 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀯𑀲𑁂𑀦, 𑀬𑀣𑀸 𑀳𑀢𑁆𑀣𑁂𑀦 𑀓𑀫𑁆𑀫𑀁 𑀓𑀭𑁄𑀢𑀺, 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀧𑀲𑁆𑀲𑀢𑀺, 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀜𑁆𑀜𑀸𑀬𑀢𑀺. 𑀤𑀢𑁆𑀢𑁂𑀦 𑀯𑀺𑀳𑀬𑁄 𑀮𑀼𑀦𑀸𑀢𑀺, 𑀅𑀕𑁆𑀕𑀺𑀦𑀸 𑀓𑀼𑀝𑀺𑀁 𑀛𑀸𑀧𑁂𑀢𑀺.

𑀩𑀸𑀳𑀺𑀭𑀜𑁆𑀘 𑀢𑀣𑀸+𑀚𑁆𑀛𑀢𑁆𑀢𑀁, 𑀓𑀭𑀡𑀁 𑀤𑀼𑀯𑀺𑀥𑀁 𑀬𑀣𑀸;

𑀯𑀻𑀳𑀺𑀁 𑀮𑀼𑀦𑀸𑀢𑀺 𑀤𑀢𑁆𑀢𑁂𑀦, 𑀦𑁂𑀢𑁆𑀢𑁂𑀦 𑀘𑀦𑁆𑀤+𑀫𑀺𑀓𑁆𑀔𑀢𑁂.

𑀧𑀓𑀢𑀺𑀬𑀸 𑀅𑀪𑀺𑀭𑀽𑀧𑁄, 𑀕𑁄𑀢𑁆𑀢𑁂𑀦 𑀕𑁄𑀢𑀫𑁄 𑀇𑀘𑁆𑀘𑀸𑀤𑀺 𑀪𑀽𑀥𑀸𑀢𑀼𑀲𑁆𑀲 𑀲𑀫𑁆𑀪𑀯𑀸 𑀓𑀭𑀡𑁂 𑀢𑀢𑀺𑀬𑀸. 𑀢𑀣𑀸 𑀲𑀸𑀭𑀺𑀧𑀼𑀢𑁆𑀢𑁄𑀢𑀺 𑀦𑀸𑀫𑁂𑀦 𑀯𑀺𑀲𑁆𑀲𑀼𑀢𑁄, 𑀚𑀸𑀢𑀺𑀬𑀸 𑀔𑀢𑁆𑀢𑀺𑀬𑁄 𑀩𑀼𑀤𑁆𑀥𑁄, 𑀚𑀸𑀢𑀺𑀬𑀸 𑀲𑀢𑁆𑀢𑀯𑀲𑁆𑀲𑀺𑀓𑁄, 𑀲𑀺𑀧𑁆𑀧𑁂𑀦 𑀦𑀴𑀓𑀸𑀭𑁄 𑀲𑁄, 𑀏𑀓𑀽𑀦𑀢𑀺𑀁𑀲𑁄 𑀯𑀬𑀲𑀸, 𑀏𑀯𑀁 𑀲𑀫𑁂𑀦 𑀥𑀸𑀯𑀢𑀺, 𑀯𑀺𑀲𑀫𑁂𑀦 𑀥𑀸𑀯𑀢𑀺, 𑀤𑁆𑀯𑀺𑀤𑁄𑀡𑁂𑀦 𑀥𑀜𑁆𑀜𑀁 𑀓𑀺𑀡𑀸𑀢𑀺.