𑁨𑁩𑁨. 𑀅𑀧𑀸𑀤𑀸𑀤𑁄 𑀧𑀤𑀢𑁂+𑀓𑀯𑀸𑀓𑁆𑀬𑁂𑀢𑀺

𑀅𑀥𑀺𑀓𑀸𑀭𑁄. 𑀏𑀢𑁆𑀣 𑀧𑀸𑀤𑁄 𑀦𑀸𑀫 𑀕𑀸𑀣𑀸𑀬 𑀘𑀢𑀼𑀢𑁆𑀣𑀁𑀲𑁄, 𑀢𑀲𑁆𑀫𑀸 ‘‘𑀢𑀼𑀫𑁆𑀳𑁂𑀳𑀺 𑀧𑀼𑀜𑁆𑀜𑀁 𑀧𑀲𑀼𑀢𑀁 𑀅𑀦𑀧𑁆𑀧𑀓𑀁’’𑀢𑀺 𑀏𑀢𑁆𑀣 𑀯𑁄 𑀦 𑀳𑁄𑀢𑀺. 𑀏𑀢𑁆𑀣 𑀧𑀤𑀦𑁆𑀢𑀺 𑀯𑀼𑀢𑁆𑀢 𑀲𑀤𑁆𑀤𑁄 𑀲𑀪𑀸𑀯𑀢𑁄 𑁋

𑀆𑀓𑀸𑀲𑀯𑀸𑀬𑀼𑀧𑁆𑀧𑀪𑀯𑁄 𑀲𑀭𑀻𑀭𑀸,

𑀲𑀫𑀼𑀘𑁆𑀘𑀭𑀁 𑀯𑀢𑁆𑀢+𑀫𑀼𑀧𑁂𑀢𑀺 𑀦𑀸𑀤𑁄;

𑀞𑀸𑀦𑀦𑁆𑀢𑀭𑁂 𑀲𑀼𑀧𑁆𑀧𑀝𑀺𑀳𑀜𑁆𑀜𑀫𑀸𑀦𑁄,

𑀯𑀡𑁆𑀡𑀢𑁆𑀢+𑀫𑀸𑀕𑀘𑁆𑀙𑀢𑀺 𑀲𑁄 𑀢𑀼 𑀲𑀤𑁆𑀤𑁄𑀢𑀺 𑁋

𑀯𑀼𑀢𑁆𑀢𑀢𑁆𑀢𑀸 𑀏𑀓𑁂𑀓𑁄 𑀯𑀡𑁆𑀡𑁄 𑀲𑀤𑁆𑀤𑁄 𑀦𑀸𑀫, 𑀢𑀩𑁆𑀩𑀡𑁆𑀡𑀲𑀫𑀽𑀳𑁄 𑀧𑀤𑀁, 𑀢𑀧𑁆𑀧𑀤𑀲𑀫𑀽𑀳𑁄 𑀯𑀸𑀓𑁆𑀬𑀜𑁆𑀘. 𑀢𑀣𑀸 𑀳𑀺 𑁋

𑀯𑀺𑀢𑀢𑁆𑀬𑀦𑁆𑀢𑀁 𑀧𑀤𑀁 𑀢𑀲𑁆𑀲, 𑀘 𑀬𑁄 𑀯𑀸𑀓𑁆𑀬𑀦𑁆𑀢𑀺 𑀫𑀦𑁆𑀯𑀬𑀁;

𑀉𑀧𑀘𑀸𑀭𑀸 𑀯𑀡𑁆𑀡𑀲𑀤𑁆𑀤-𑀯𑀸𑀘𑁆𑀘𑀁 𑀢𑀁 𑀦 𑀧𑀭𑀺𑀘𑁆𑀘𑀚𑁂.

𑀢𑀁 𑀧𑀤𑀜𑁆𑀘 𑁋

𑀧𑀤𑀁 𑀘𑀢𑀼𑀩𑁆𑀩𑀺𑀥𑀁 𑀯𑀼𑀢𑁆𑀢𑀁, 𑀦𑀸𑀫𑀸+𑀔𑁆𑀬𑀸𑀢𑁄+𑀧𑀲𑀕𑁆𑀕𑀚𑀁;

𑀦𑀺𑀧𑀸𑀢𑀚𑀜𑁆𑀘 𑀢𑀜𑁆𑀜𑀽 𑀳𑀺, 𑀅𑀲𑁆𑀲𑁄 𑀔𑀮𑁆𑀯𑀸+𑀪𑀺𑀥𑀸𑀯𑀢𑀻𑀢𑀺.

𑀢𑀁 𑀯𑀸𑀓𑁆𑀬𑀜𑁆𑀘 𑁋

𑀏𑀓𑀸𑀔𑁆𑀬𑀸𑀢𑁄 𑀧𑀤𑀘𑁆𑀘𑀬𑁄, 𑀲𑀺𑀬𑀸 𑀯𑀸𑀓𑁆𑀬𑀁 𑀲𑀓𑀸𑀭𑀓𑁄𑀢𑀺 𑁋

𑀯𑀼𑀢𑁆𑀢𑀁. 𑀢𑀲𑁆𑀫𑀸 ‘‘𑀯𑀺𑀪𑀢𑁆𑀬𑀦𑁆𑀢𑀁 𑀧𑀤𑀁, 𑀧𑀤𑀲𑀫𑀽𑀳𑁄 𑀯𑀸𑀓𑁆𑀬’’𑀦𑁆𑀢𑀺 𑀘 𑀯𑀼𑀘𑁆𑀘𑀢𑀺.