𑁧𑁧𑁩. 𑀛𑀮𑀸 𑀯𑀸

𑀛𑀮𑀢𑁄 𑀬𑁄𑀦𑀁 𑀦𑀺 𑀳𑁄𑀢𑀺 𑀯𑀸 𑀦𑀧𑀼𑀁𑀲𑀓𑁂. 𑀅𑀝𑁆𑀞𑀻𑀦𑀺. ‘‘𑀮𑁄𑀧𑁄’’𑀢𑀺 𑀬𑁄𑀮𑁄𑀧𑁂 𑀤𑀻𑀖𑁄, 𑀅𑀝𑁆𑀞𑀻. 𑀪𑁄 𑀅𑀝𑁆𑀞𑀺 𑀅𑀝𑁆𑀞𑀻, 𑀅𑀝𑁆𑀞𑀻𑀦𑀺 𑀅𑀝𑁆𑀞𑀻. 𑀅𑀝𑁆𑀞𑀺𑀁, 𑀅𑀝𑁆𑀞𑀻𑀦𑀺 𑀅𑀝𑁆𑀞𑀻. 𑀅𑀝𑁆𑀞𑀺𑀦𑀸 𑀇𑀘𑁆𑀘𑀸𑀤𑀺 𑀫𑀼𑀦𑀺𑀲𑀤𑁆𑀤𑀲𑀫𑀁. 𑀏𑀯𑀁 𑀧𑀘𑁆𑀙𑀺+𑀅𑀓𑁆𑀔𑀺+𑀤𑀥𑀺+𑀲𑀢𑁆𑀣𑀺+𑀯𑀸𑀭𑀺+𑀅𑀘𑁆𑀘𑀺𑀆𑀤𑀬𑁄.

𑀇𑀓𑀸𑀭𑀦𑁆𑀢𑀁.

𑀤𑀡𑁆𑀟𑀺, 𑀦𑀧𑀼𑀁𑀲𑀓𑀢𑁆𑀢𑀸 ‘‘𑀏𑀓𑀯𑀘𑀦𑁂’’𑀘𑁆𑀘𑀸𑀤𑀺𑀦𑀸 𑀭𑀲𑁆𑀲𑁂 𑀲𑀺𑀮𑁄𑀧𑁄. 𑀤𑀡𑁆𑀟𑀻𑀦𑀺 𑀤𑀡𑁆𑀟𑀻. ‘‘𑀕𑁂 𑀯𑀸’’𑀢𑀺 𑀭𑀲𑁆𑀲𑁂 𑀪𑁄 𑀤𑀡𑁆𑀟𑀺 𑀤𑀡𑁆𑀟𑀻, 𑀤𑀡𑁆𑀟𑀻𑀦𑀺 𑀤𑀡𑁆𑀟𑀻. ‘‘𑀦𑀁 𑀛𑀻𑀢𑁄’’𑀢𑀺 𑀦𑀁. 𑀤𑀡𑁆𑀟𑀺𑀦𑀁 𑀤𑀡𑁆𑀟𑀺𑀁, 𑀤𑀡𑁆𑀟𑀻𑀦𑀺 𑀤𑀡𑁆𑀟𑀻. 𑀲𑁂𑀲𑀁 𑀧𑀼𑀮𑁆𑀮𑀺𑀗𑁆𑀕𑁂 𑀤𑀡𑁆𑀟𑀻𑀲𑀫𑀁. 𑀏𑀯𑀁 𑀲𑀼𑀔𑀓𑀸𑀭𑀻+𑀲𑀻𑀖𑀬𑀸𑀬𑀻𑀆𑀤𑀬𑁄.

𑀈𑀓𑀸𑀭𑀦𑁆𑀢𑀁.

𑀘𑀓𑁆𑀔𑀼, 𑀘𑀓𑁆𑀔𑀽𑀦𑀺 𑀘𑀓𑁆𑀔𑀽. 𑀲𑁂𑀲𑀁 𑀅𑀝𑁆𑀞𑀺𑀲𑀫𑀁. 𑀏𑀯𑀁 𑀆𑀬𑀼+𑀯𑀲𑀼+𑀥𑀦𑀼+𑀤𑀸𑀭𑀼+𑀢𑀺𑀧𑀼+𑀫𑀥𑀼+𑀲𑀺𑀗𑁆𑀕𑀼+𑀳𑀺𑀗𑁆𑀕𑀼+𑀯𑀢𑁆𑀣𑀼+𑀚𑀢𑀼+𑀅𑀫𑁆𑀩𑀼+ 𑀅𑀲𑁆𑀲𑀼𑀆𑀤𑀻𑀦𑀺. 𑀆𑀬𑀼𑀲𑀤𑁆𑀤𑀢𑁄 𑀦𑀸𑀲𑁆𑀲 𑀓𑁄𑀥𑀸𑀤𑀺𑀢𑁆𑀢𑀸 𑀲𑀸𑀯 𑀯𑀺𑀲𑁂𑀲𑁄.

𑀉𑀓𑀸𑀭𑀦𑁆𑀢𑀁.

𑀕𑁄𑀢𑁆𑀭𑀪𑀼, 𑀭𑀲𑁆𑀲𑁂 𑀲𑀺𑀮𑁄𑀧𑁄. 𑀕𑁄𑀢𑁆𑀭𑀪𑀽𑀦𑀺 𑀕𑁄𑀢𑁆𑀭𑀪𑀽. 𑀪𑁄 𑀕𑁄𑀢𑁆𑀭𑀪𑀼 𑀕𑁄𑀢𑁆𑀭𑀪𑀽, 𑀕𑁄𑀢𑁆𑀭𑀪𑀽𑀦𑀺 𑀕𑁄𑀢𑁆𑀭𑀪𑀽. 𑀕𑁄𑀢𑁆𑀭𑀪𑀼𑀁, 𑀕𑁄𑀢𑁆𑀭𑀪𑀽𑀦𑀺 𑀕𑁄𑀢𑁆𑀭𑀪𑀽 𑀇𑀘𑁆𑀘𑀸𑀤𑀺 𑀧𑀼𑀮𑁆𑀮𑀺𑀗𑁆𑀕𑁂 𑀯𑁂𑀲𑁆𑀲𑀪𑀽𑀲𑀫𑀁. 𑀏𑀯𑀁 𑀲𑀬𑀫𑁆𑀪𑀽+𑀅𑀪𑀺𑀪𑀽+𑀥𑀫𑁆𑀫𑀜𑁆𑀜𑀽 𑀆𑀤𑀬𑁄.

𑀊𑀓𑀸𑀭𑀦𑁆𑀢𑀁.

𑀯𑀺𑀲𑀤𑀸+𑀯𑀺𑀲𑀤𑀸𑀓𑀸𑀭-𑀯𑁄𑀳𑀸𑀭𑁄+𑀪𑀬𑀫𑀼𑀢𑁆𑀢𑀓𑁄;

𑀧𑀼𑀫𑀸𑀤𑀺𑀚𑀸𑀦𑀦𑁂 𑀳𑁂𑀢𑀼-𑀪𑀸𑀯𑀢𑁄 𑀮𑀺𑀗𑁆𑀕+𑀫𑀻𑀭𑀺𑀢𑁄.

𑀣𑀦+𑀓𑁂𑀲𑀸𑀯𑀢𑀻 𑀦𑀸𑀭𑀻, 𑀫𑀲𑁆𑀲𑀼𑀯𑀸 𑀧𑀼𑀭𑀺𑀲𑁄 𑀲𑀺𑀬𑀸;

𑀉𑀪𑀺𑀦𑁆𑀦+𑀫𑀦𑁆𑀢𑀭𑀁 𑀏𑀢𑀁, 𑀇𑀢𑀭𑁄+𑀪𑀬𑀫𑀼𑀢𑁆𑀢𑀓𑁄.

𑀏𑀲𑁂+𑀲𑀸 𑀏𑀢+𑀫𑀻𑀢𑀺 𑀘,

𑀧𑀲𑀺𑀤𑁆𑀥𑀺𑀅𑀢𑁆𑀣𑁂𑀲𑀼 𑀬𑁂𑀲𑀼 𑀮𑁄𑀓𑀲𑁆𑀲;

𑀣𑀻+𑀧𑀼𑀫+𑀦𑀧𑀼𑀁𑀲𑀓𑀸𑀦𑀻+𑀢𑀺,

𑀯𑀼𑀘𑁆𑀘𑀦𑁆𑀢𑁂 𑀢𑀸𑀦𑀺 𑀦𑀸𑀫𑀸𑀦𑀺.

𑀦𑀧𑀼𑀁𑀲𑀓𑀮𑀺𑀗𑁆𑀕𑀁.

𑀅𑀣 𑀲𑀩𑁆𑀩𑀸𑀤𑀻𑀦𑀁 𑀭𑀽𑀧𑀦𑀬𑁄 𑀦𑀺𑀤𑁆𑀤𑀺𑀲𑀺𑀬𑀢𑁂,

𑀲𑀩𑁆𑀩 𑀓𑀢𑀭 𑀓𑀢𑀫 𑀉𑀪𑀬 𑀇𑀢𑀭 𑀅𑀜𑁆𑀜 𑀅𑀜𑁆𑀜𑀢𑀭 𑀅𑀜𑁆𑀜𑀢𑀫, 𑀧𑀼𑀩𑁆𑀩+𑀧𑀭𑀸+𑀧𑀭+𑀤𑀓𑁆𑀔𑀺𑀡𑀼+𑀢𑁆𑀢𑀭𑀸+𑀥𑀭𑀸𑀦𑀺 𑀯𑀯𑀢𑁆𑀣𑀸𑀬+𑀫𑀲𑀜𑁆𑀜𑀸𑀬𑀁. ‘‘𑀊𑀦𑀧𑀽𑀭𑀢𑁆𑀣+𑀫𑀥𑀺𑀓𑀧𑀤𑁄𑀤𑀸𑀳𑀭𑀡+𑀫𑀚𑁆𑀛𑀸𑀳𑀸𑀭𑁄’’𑀢𑀺 𑀜𑀸𑀬𑀸 𑀲𑀩𑁆𑀩𑀸𑀤𑀻𑀲𑀼 𑀧𑀞𑀻𑀬𑀦𑁆𑀢𑁂𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀬 𑀢𑁆𑀬 𑀢 𑀏𑀢 𑀇𑀫 𑀅𑀫𑀼 𑀓𑀺𑀁 𑀏𑀓 𑀢𑀼𑀫𑁆𑀳 𑀅𑀫𑁆𑀳 𑀇𑀘𑁆𑀘𑁂𑀢𑁂 𑀲𑀩𑁆𑀩𑀸𑀤𑀬𑁄. 𑀓𑀘𑁆𑀘𑀸𑀬𑀦𑁂 𑀅𑀤𑀲𑁆𑀲𑀺𑀢𑀲𑁆𑀲𑀸𑀧𑀺 𑀢𑁆𑀬𑀲𑀤𑁆𑀤𑀲𑁆𑀲 𑁋

𑀔𑀺𑀟𑁆𑀟𑀸 𑀧𑀡𑀺𑀳𑀺𑀢𑀸 𑀢𑁆𑀬𑀸𑀲𑀼, 𑀭𑀢𑀺 𑀢𑁆𑀬𑀸𑀲𑀼 𑀧𑀢𑀺𑀝𑁆𑀞𑀺𑀢𑀸;

𑀩𑀻𑀚𑀸𑀦𑀺 𑀢𑁆𑀬𑀸𑀲𑀼 𑀭𑀼𑀳𑀦𑁆𑀢𑀺, 𑀬𑀤𑀺𑀤𑀁 𑀲𑀢𑁆𑀢𑀸 𑀧𑀚𑀸𑀬𑀭𑁂𑀢𑀺 𑁋

𑀧𑀸𑀴𑀺𑀬𑀁 𑀤𑀺𑀲𑁆𑀲𑀫𑀸𑀦𑀢𑁆𑀢𑀸 𑀇𑀥 𑀲𑀗𑁆𑀕𑀳𑁄.

𑀢𑀢𑁆𑀣 𑀲𑀩𑁆𑀩𑀲𑀤𑁆𑀤𑁄 𑀦𑀺𑀭𑀯𑀲𑁂𑀲𑀢𑁆𑀣𑁄. 𑀓𑀢𑀭+𑀓𑀢𑀫𑀲𑀤𑁆𑀤𑀸 𑀧𑀼𑀘𑁆𑀙𑀦𑀢𑁆𑀣𑀸. 𑀉𑀪𑀬𑀲𑀤𑁆𑀤𑁄 𑀤𑁆𑀯𑀺𑀅𑀯𑀬𑀯𑀲𑀫𑀼𑀤𑀸𑀬𑀯𑀘𑀦𑁄. 𑀇𑀢𑀭𑀲𑀤𑁆𑀤𑁄 𑀯𑀼𑀢𑁆𑀢𑀧𑀝𑀺𑀬𑁄𑀕𑀻𑀯𑀘𑀦𑁄. 𑀅𑀜𑁆𑀜𑀲𑀤𑁆𑀤𑁄 𑀅𑀥𑀺𑀓𑀢𑀸𑀧𑀭𑀯𑀘𑀦𑁄. 𑀅𑀜𑁆𑀜- 𑀢𑀭+𑀅𑀜𑁆𑀜𑀢𑀫𑀲𑀤𑁆𑀤𑀸 𑀅𑀦𑀺𑀬𑀫𑀢𑁆𑀣𑀸. 𑀧𑀼𑀩𑁆𑀩𑀸𑀤𑀬𑁄 𑀤𑀺𑀲𑀸𑀤𑀺𑀯𑀯𑀢𑁆𑀣𑀸𑀯𑀘𑀦𑀸. 𑀬𑀲𑀤𑁆𑀤𑁄 𑀅𑀦𑀺𑀬𑀫𑀢𑁆𑀣𑁄. 𑀢𑁆𑀬+𑀢𑀲𑀤𑁆𑀤𑀸 𑀧𑀭𑀫𑁆𑀫𑀼𑀔𑀯𑀘𑀦𑀸. 𑀏𑀢+𑀇𑀫+𑀅𑀫𑀼+𑀓𑀺𑀁 𑀇𑀘𑁆𑀘𑁂𑀢𑁂 𑀲𑀫𑀻𑀧+𑀅𑀘𑁆𑀘𑀦𑁆𑀢𑀲𑀫𑀻𑀧+𑀤𑀽𑀭+𑀧𑀼𑀘𑁆𑀙𑀦𑀢𑁆𑀣𑀯𑀘𑀦𑀸. 𑀏𑀓𑀲𑀤𑁆𑀤𑁄 𑀲𑀁𑀔𑁆𑀬𑀸𑀤𑀺𑀯𑀘𑀦𑁄. 𑀢𑀼𑀫𑁆𑀳+𑀅𑀫𑁆𑀳𑀲𑀤𑁆𑀤𑀸 𑀧𑀭+𑀅𑀢𑁆𑀢 𑀦𑀺𑀤𑁆𑀤𑁂𑀲𑀯𑀘𑀦𑀸.

𑀲𑀩𑁆𑀩𑁄, 𑀲𑀺𑀲𑁆𑀲 𑀑,