𑁯𑁧. 𑀬𑁆𑀯𑀸𑀤𑁄 𑀦𑁆𑀢𑀼𑀲𑁆𑀲

𑀬𑁄𑀆𑀤𑀻𑀲𑀼 𑀦𑁆𑀢𑀼𑀲𑁆𑀲 𑀅 𑀳𑁄𑀢𑀺. 𑀕𑀼𑀡𑀯𑀦𑁆𑀢𑀇𑀢𑀺 𑀅𑀓𑀸𑀭𑀦𑁆𑀢𑀸 𑀝𑀸+𑀝𑁂𑀆𑀤𑁂𑀲𑀸 𑀳𑁄𑀦𑁆𑀢𑀺, 𑀕𑀼𑀡𑀯𑀦𑁆𑀢𑀸. ‘‘𑀝𑀝𑀸𑀅𑀁 𑀕𑁂’’𑀢𑀺 𑀝𑀸𑀤𑀬𑁄, 𑀪𑁄 𑀕𑀼𑀡𑀯 𑀕𑀼𑀡𑀯𑀸 𑀕𑀼𑀡𑀯𑀁, 𑀕𑀼𑀡𑀯𑀦𑁆𑀢𑁄 𑀕𑀼𑀡𑀯𑀦𑁆𑀢𑀸. ‘‘𑀦𑁆𑀢𑀲𑁆𑀲 𑀘 𑀝 𑀯𑀁+𑀲𑁂’’𑀢𑀺 𑀅𑀁𑀲𑁂𑀲𑀼 𑀦𑁆𑀢𑀲𑁆𑀲 𑀝𑁄 𑀯𑀸, 𑀕𑀼𑀡𑀯𑀁 𑀕𑀼𑀡𑀯𑀦𑁆𑀢𑀁, 𑀕𑀼𑀡𑀯𑀦𑁆𑀢𑁂. ‘‘𑀢𑁄+𑀢𑀸+𑀢𑀺+𑀢𑀸 𑀲+𑀲𑁆𑀫𑀸+𑀲𑁆𑀫𑀺𑀁+𑀦𑀸𑀲𑀽’’𑀢𑀺 𑀢𑀸𑀆𑀤𑀬𑁄 𑀳𑁄𑀦𑁆𑀢𑀺, 𑀕𑀼𑀡𑀯𑀢𑀸 𑀕𑀼𑀡𑀯𑀦𑁆𑀢𑁂𑀦, 𑀕𑀼𑀡𑀯𑀦𑁆𑀢𑁂𑀳𑀺 𑀕𑀼𑀡𑀯𑀦𑁆𑀢𑁂𑀪𑀺. ‘‘𑀮𑀓𑁆𑀔𑀡𑀺𑀓𑀧𑀝𑀺𑀧𑀤𑁄𑀢𑁆𑀢𑁂𑀲𑀼 𑀧𑀝𑀺𑀧𑀤𑁄𑀢𑁆𑀢𑀲𑁆𑀲𑁂𑀯 𑀕𑀳𑀡𑀁, 𑀦 𑀮𑀓𑁆𑀔𑀡𑀺𑀓𑀲𑁆𑀲𑀸’’𑀢𑀺 𑀜𑀸𑀬𑀸 ‘‘𑀦 𑀮𑀓𑁆𑀔𑀡𑀺𑀓𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀩𑁆𑀬𑀢𑁆𑀢𑀺𑀧𑀓𑁆𑀔+𑀫𑀦𑀧𑁂𑀓𑁆𑀔𑀺𑀢𑁆𑀯𑀸 ‘‘𑀅𑀢𑁄’’𑀢𑀺 𑀭𑀲𑁆𑀲𑀸𑀓𑀸𑀭𑀚𑀸𑀢𑀺𑀬𑀸 𑀧𑁂𑀓𑁆𑀔𑀺𑀢𑀢𑁆𑀢𑀸 𑀕𑀼𑀡𑀯𑀦𑁆𑀢𑁂𑀦𑀸𑀢𑀺 ‘‘𑀅𑀢𑁂𑀦𑀸’’ 𑀢𑁆𑀬+𑀦𑁂𑀦 𑀲𑀺𑀚𑁆𑀛𑀢𑀺. 𑀚𑀸𑀢𑀺=𑀲𑀸𑀫𑀜𑁆𑀜𑀁, 𑀩𑁆𑀬𑀢𑁆𑀢𑀺=𑀯𑀺𑀲𑁂𑀲𑁄. 𑀕𑀼𑀡𑀯𑀢𑁄 𑀕𑀼𑀡𑀯𑀲𑁆𑀲 𑀕𑀼𑀡𑀯𑀦𑁆𑀢𑀲𑁆𑀲, ‘‘𑀢𑀁 𑀦𑀁𑀫𑁆𑀳𑀺’’𑀢𑀺 𑀦𑀁𑀫𑁆𑀳𑀻 𑀢𑀁 𑀯𑀸, 𑀕𑀼𑀡𑀯𑀢𑀁 𑀕𑀼𑀡𑀯𑀦𑁆𑀢𑀸𑀦𑀁. 𑀕𑀼𑀡𑀯𑀢𑀸 𑀕𑀼𑀡𑀯𑀦𑁆𑀢𑀸 𑀕𑀼𑀡𑀯𑀦𑁆𑀢𑀫𑁆𑀳𑀸 𑀕𑀼𑀡𑀯𑀦𑁆𑀢𑀲𑁆𑀫𑀸. 𑀕𑀼𑀡𑀯𑀢𑀺 𑀕𑀼𑀡𑀯𑀦𑁆𑀢𑁂 𑀕𑀼𑀡𑀯𑀦𑁆𑀢𑀫𑁆𑀳𑀺 𑀕𑀼𑀡𑀯𑀦𑁆𑀢𑀲𑁆𑀫𑀺𑀁, 𑀕𑀼𑀡𑀯𑀦𑁆𑀢𑁂𑀲𑀼. ‘‘𑀦𑁆𑀢𑀲𑁆𑀲 𑀘 𑀝 𑀯𑀸’’𑀢𑀺 𑀬𑁄𑀕𑀯𑀺𑀪𑀸𑀕𑀸 𑀬𑁄𑀲𑀼 𑀘 𑀦𑁆𑀢𑀼𑀲𑁆𑀲 𑀯𑀸 𑀝𑀸𑀤𑁂𑀲𑁂 𑀓𑀢𑁂 𑀬𑁄𑀲𑁆𑀲 𑀝𑀸, ‘‘𑀘𑀓𑁆𑀔𑀼𑀫𑀸 𑀅𑀦𑁆𑀥𑀺𑀢𑀸 𑀳𑁄𑀦𑁆𑀢𑀺’’, ‘‘𑀯𑀕𑁆𑀕𑀼𑀫𑀼𑀤𑀸𑀢𑀻𑀭𑀺𑀬𑀸 𑀪𑀺𑀓𑁆𑀔𑀼 𑀯𑀡𑁆𑀡𑀯𑀸’’ 𑀇𑀘𑁆𑀘𑀸𑀤𑀻 𑀳𑁄𑀦𑁆𑀢𑀺.

𑀏𑀯𑀁 𑀕𑀡𑀯𑀸 𑀓𑀼𑀮𑀯𑀸 𑀨𑀮𑀯𑀸 𑀬𑀲𑀯𑀸 𑀥𑀦𑀯𑀸 𑀲𑀼𑀢𑀯𑀸 𑀪𑀕𑀯𑀸 𑀳𑀺𑀫𑀯𑀸 𑀩𑀮𑀯𑀸 𑀲𑀻𑀮𑀯𑀸 𑀧𑀜𑁆𑀜𑀯𑀸 𑀇𑀘𑁆𑀘𑀸𑀤𑀻.