𑁬. 𑀆𑀔𑁆𑀬𑀸𑀢𑀓𑀡𑁆𑀟

𑀪𑀽𑀯𑀸𑀤𑀺𑀕𑀡

𑀯𑀺𑀪𑀢𑁆𑀢𑀺𑀯𑀺𑀥𑀸𑀦

𑀅𑀣 𑀆𑀔𑁆𑀬𑀸𑀢𑀯𑀺𑀪𑀢𑁆𑀢𑀺𑀬𑁄 𑀓𑁆𑀭𑀺𑀬𑀸𑀯𑀸𑀘𑀻𑀳𑀺 𑀥𑀸𑀢𑀽𑀳𑀺 𑀧𑀭𑀸 𑀯𑀼𑀘𑁆𑀘𑀦𑁆𑀢𑁂.

𑀢𑀢𑁆𑀣 𑀓𑁆𑀭𑀺𑀬𑀁 𑀆𑀘𑀺𑀓𑁆𑀔𑀢𑀻𑀢𑀺 𑀆𑀔𑁆𑀬𑀸𑀢𑀁, 𑀓𑁆𑀭𑀺𑀬𑀸𑀧𑀤𑀁. 𑀯𑀼𑀢𑁆𑀢𑀜𑁆𑀳𑀺 ‘‘𑀓𑀸𑀮𑀓𑀸𑀭𑀓𑀧𑀼𑀭𑀺𑀲𑀧𑀭𑀺𑀤𑀻𑀧𑀓𑀁 𑀓𑁆𑀭𑀺𑀬𑀸𑀮𑀓𑁆𑀔𑀡𑀫𑀸𑀔𑁆𑀬𑀸𑀢𑀺𑀓’’𑀦𑁆𑀢𑀺. 𑀢𑀢𑁆𑀣 𑀓𑀸𑀮𑁄𑀢𑀺 𑀅𑀢𑀻𑀢𑀸𑀤𑀬𑁄, 𑀓𑀸𑀭𑀓𑀫𑀺𑀢𑀺 𑀓𑀫𑁆𑀫𑀓𑀢𑁆𑀢𑀼𑀪𑀸𑀯𑀸, 𑀧𑀼𑀭𑀺𑀲𑀸𑀢𑀺 𑀧𑀞𑀫𑀫𑀚𑁆𑀛𑀺𑀫𑀼𑀢𑁆𑀢𑀫𑀸, 𑀓𑁆𑀭𑀺𑀬𑀸𑀢𑀺 𑀕𑀫𑀦𑀧𑀘𑀦𑀸𑀤𑀺𑀓𑁄 𑀥𑀸𑀢𑁆𑀯𑀢𑁆𑀣𑁄, 𑀓𑁆𑀭𑀺𑀬𑀸𑀮𑀓𑁆𑀔𑀡𑀁 𑀲𑀜𑁆𑀜𑀸𑀡𑀁 𑀏𑀢𑀲𑁆𑀲𑀸𑀢𑀺 𑀓𑁆𑀭𑀺𑀬𑀸𑀮𑀓𑁆𑀔𑀡𑀁, 𑀅𑀢𑀺𑀮𑀺𑀗𑁆𑀕𑀜𑁆𑀘.

𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑁋

‘‘𑀬𑀁 𑀢𑀺𑀓𑀸𑀮𑀁 𑀢𑀺𑀧𑀼𑀭𑀺𑀲𑀁, 𑀓𑁆𑀭𑀺𑀬𑀸𑀯𑀸𑀘𑀺 𑀢𑀺𑀓𑀸𑀭𑀓𑀁;

𑀅𑀢𑀺𑀮𑀺𑀗𑁆𑀕𑀁 𑀤𑁆𑀯𑀺𑀯𑀘𑀦𑀁, 𑀢𑀤𑀸𑀔𑁆𑀬𑀸𑀢𑀦𑁆𑀢𑀺 𑀯𑀼𑀘𑁆𑀘𑀢𑀻’’𑀢𑀺.

𑀓𑀸𑀮𑀸𑀤𑀺𑀯𑀲𑁂𑀦 𑀥𑀸𑀢𑁆𑀯𑀢𑁆𑀣𑀁 𑀯𑀺𑀪𑀚𑀦𑁆𑀢𑀻𑀢𑀺 𑀯𑀺𑀪𑀢𑁆𑀢𑀺𑀬𑁄, 𑀢𑁆𑀬𑀸𑀤𑀬𑁄, 𑀢𑀸 𑀧𑀦 𑀯𑀢𑁆𑀢𑀫𑀸𑀦𑀸 𑀧𑀜𑁆𑀘𑀫𑀻 𑀲𑀢𑁆𑀢𑀫𑀻 𑀧𑀭𑁄𑀓𑁆𑀔𑀸𑀳𑀺𑀬𑁆𑀬𑀢𑁆𑀢𑀦𑀻 𑀅𑀚𑁆𑀚𑀢𑀦𑀻 𑀪𑀯𑀺𑀲𑁆𑀲𑀦𑁆𑀢𑀻 𑀓𑀸𑀮𑀸𑀢𑀺𑀧𑀢𑁆𑀢𑀺 𑀘𑀸𑀢𑀺 𑀅𑀝𑁆𑀞𑀯𑀺𑀥𑀸 𑀪𑀯𑀦𑁆𑀢𑀺.

𑀓𑁆𑀭𑀺𑀬𑀁 𑀥𑀸𑀭𑁂𑀦𑁆𑀢𑀻𑀢𑀺 𑀥𑀸𑀢𑀯𑁄, 𑀪𑀽𑀯𑀸𑀤𑀬𑁄, 𑀔𑀸𑀤𑀺𑀥𑀸𑀢𑀼𑀧𑁆𑀧𑀘𑁆𑀘𑀬𑀦𑁆𑀢𑀸 𑀘, 𑀢𑁂 𑀧𑀦 𑀅𑀢𑁆𑀣𑀯𑀲𑀸 𑀤𑁆𑀯𑀺𑀥𑀸 𑀪𑀯𑀦𑁆𑀢𑀺 𑀲𑀓𑀫𑁆𑀫𑀓𑀸, 𑀅𑀓𑀫𑁆𑀫𑀓𑀸 𑀘𑀸𑀢𑀺. 𑀢𑀢𑁆𑀭 𑀲𑀓𑀫𑁆𑀫𑀓𑀸 𑀬𑁂 𑀥𑀸𑀢𑀯𑁄𑀓𑀫𑁆𑀫𑀸𑀧𑁂𑀓𑁆𑀔𑀁 𑀓𑁆𑀭𑀺𑀬𑀁 𑀯𑀤𑀦𑁆𑀢𑀺, 𑀬𑀣𑀸 𑁋 𑀓𑀝𑀁 𑀓𑀭𑁄𑀢𑀺, 𑀕𑀸𑀫𑀁 𑀕𑀘𑁆𑀙𑀢𑀺, 𑀑𑀤𑀦𑀁 𑀧𑀘𑀢𑀻𑀢𑀺𑀆𑀤𑀬𑁄, 𑀅𑀓𑀫𑁆𑀫𑀓𑀸 𑀬𑁂 𑀓𑀫𑁆𑀫𑀦𑀺𑀭𑀧𑁂𑀓𑁆𑀔𑀁 𑀓𑁆𑀭𑀺𑀬𑀁 𑀯𑀤𑀦𑁆𑀢𑀺, 𑀬𑀣𑀸 𑁋 𑀅𑀘𑁆𑀙𑀢𑀺, 𑀲𑁂𑀢𑀺, 𑀢𑀺𑀝𑁆𑀞𑀢𑀻𑀢𑀺𑀆𑀤𑀬𑁄.

𑀢𑁂 𑀧𑀦 𑀲𑀢𑁆𑀢𑀯𑀺𑀥𑀸 𑀪𑀯𑀦𑁆𑀢𑀺 𑀯𑀺𑀓𑀭𑀡𑀧𑁆𑀧𑀘𑁆𑀘𑀬𑀪𑁂𑀤𑁂𑀦, 𑀓𑀣𑀁? 𑀅𑀯𑀺𑀓𑀭𑀡𑀸 𑀪𑀽𑀯𑀸𑀤𑀬𑁄. 𑀦𑀺𑀕𑁆𑀕𑀳𑀻𑀢𑀧𑀼𑀩𑁆𑀩𑀓𑀅𑀯𑀺𑀓𑀭𑀡𑀸 𑀭𑀼𑀥𑀸𑀤𑀬𑁄, 𑀬𑀯𑀺𑀓𑀭𑀡𑀸 𑀤𑀺𑀯𑀸𑀤𑀬𑁄, 𑀡𑀼𑀡𑀸 𑀉𑀡𑀸𑀯𑀺𑀓𑀭𑀡𑀸 𑀲𑁆𑀯𑀸𑀤𑀬𑁄, 𑀦𑀸𑀧𑁆𑀧𑀡𑁆𑀳𑀸𑀯𑀺𑀓𑀭𑀡𑀸 𑀓𑀺𑀬𑀸𑀤𑀬𑁄, 𑀑𑀬𑀺𑀭𑀯𑀺𑀓𑀭𑀡𑀸 𑀢𑀦𑀸𑀤𑀬𑁄, 𑀲𑀓𑀢𑁆𑀣𑁂 𑀡𑁂 𑀡𑀬𑀦𑁆𑀢𑀸 𑀘𑀼𑀭𑀸𑀤𑀬𑁄𑀢𑀺.

𑀢𑀢𑁆𑀣 𑀧𑀞𑀫𑀁 𑀅𑀯𑀺𑀓𑀭𑀡𑁂𑀲𑀼 𑀪𑀽𑀯𑀸𑀤𑀻𑀲𑀼 𑀥𑀸𑀢𑀽𑀲𑀼 𑀧𑀞𑀫𑀪𑀽𑀢𑀸 𑀅𑀓𑀫𑁆𑀫𑀓𑀸 𑀪𑀽𑀇𑀘𑁆𑀘𑁂𑀢𑀲𑁆𑀫𑀸 𑀥𑀸𑀢𑀼𑀢𑁄 𑀢𑁆𑀬𑀸𑀤𑀬𑁄 𑀧𑀭𑀸 𑀬𑁄𑀚𑀻𑀬𑀦𑁆𑀢𑁂.

𑀪𑀽𑀲𑀢𑁆𑀢𑀸𑀬𑀁, ‘‘𑀪𑀽’’𑀇𑀘𑁆𑀘𑀬𑀁 𑀥𑀸𑀢𑀼 𑀲𑀢𑁆𑀢𑀸𑀬𑀫𑀢𑁆𑀣𑁂 𑀯𑀢𑁆𑀢𑀢𑁂, 𑀓𑁆𑀭𑀺𑀬𑀸𑀲𑀸𑀫𑀜𑁆𑀜𑀪𑀽𑀢𑁂 𑀪𑀯𑀦𑁂 𑀯𑀢𑁆𑀢𑀢𑁂𑀢𑀺 𑀅𑀢𑁆𑀣𑁄.

‘‘𑀪𑀽’’𑀇𑀢𑀺 𑀞𑀺𑀢𑁂 𑁋

𑁪𑁨𑁪. 𑀪𑀽𑀯𑀸𑀤𑀬𑁄 𑀥𑀸𑀢𑀯𑁄.

𑀪𑀽𑀇𑀘𑁆𑀘𑁂𑀯𑀫𑀸𑀤𑀬𑁄 𑀬𑁂 𑀓𑁆𑀭𑀺𑀬𑀸𑀯𑀸𑀘𑀺𑀦𑁄 𑀲𑀤𑁆𑀤𑀕𑀡𑀸, 𑀢𑁂 𑀥𑀸𑀢𑀼𑀲𑀜𑁆𑀜𑀸 𑀳𑁄𑀦𑁆𑀢𑀺. 𑀪𑀽 𑀆𑀤𑀺 𑀬𑁂𑀲𑀁 𑀢𑁂 𑀪𑀽𑀯𑀸𑀤𑀬𑁄, 𑀅𑀣 𑀯𑀸 𑀪𑀽𑀯𑀸 𑀆𑀤𑀻 𑀧𑀓𑀸𑀭𑀸 𑀬𑁂𑀲𑀁 𑀢𑁂 𑀪𑀽𑀯𑀸𑀤𑀬𑁄.

𑀪𑀽𑀯𑀸𑀤𑀻𑀲𑀼 𑀯𑀓𑀸𑀭𑁄𑀬𑀁, 𑀜𑁂𑀬𑁆𑀬𑁄 𑀆𑀕𑀫𑀲𑀦𑁆𑀥𑀺𑀚𑁄;

𑀪𑀽𑀯𑀸𑀧𑁆𑀧𑀓𑀸𑀭𑀸 𑀯𑀸 𑀥𑀸𑀢𑀽, 𑀲𑀓𑀫𑁆𑀫𑀸𑀓𑀫𑁆𑀫𑀓𑀢𑁆𑀣𑀢𑁄.

‘‘𑀓𑁆𑀯𑀘𑀺 𑀥𑀸𑀢𑀽’’𑀢𑀺𑀆𑀤𑀺𑀢𑁄 ‘‘𑀓𑁆𑀯𑀘𑀻’’𑀢𑀺 𑀯𑀢𑁆𑀢𑀢𑁂.

𑁪𑁨𑁫. 𑀥𑀸𑀢𑀼𑀲𑁆𑀲𑀦𑁆𑀢𑁄 𑀮𑁄𑀧𑁄𑀦𑁂𑀓𑀲𑁆𑀲𑀭𑀲𑁆𑀲.

𑀅𑀦𑁂𑀓𑀲𑁆𑀲𑀭𑀲𑁆𑀲 𑀥𑀸𑀢𑀼𑀲𑁆𑀲 𑀅𑀦𑁆𑀢𑁄 𑀓𑁆𑀯𑀘𑀺 𑀮𑁄𑀧𑁄 𑀳𑁄𑀢𑀺.

𑀓𑁆𑀯𑀘𑀺𑀕𑁆𑀕𑀳𑀡𑀁 ‘‘𑀫𑀳𑀻𑀬𑀢𑀺 𑀲𑀫𑀣𑁄’’𑀢𑀺𑀆𑀤𑀻𑀲𑀼 𑀦𑀺𑀯𑀢𑁆𑀢𑀦𑀢𑁆𑀣𑀁, 𑀇𑀢𑀺 𑀅𑀦𑁂𑀓𑀲𑁆𑀲𑀭𑀢𑁆𑀢𑀸𑀪𑀸𑀯𑀸 𑀇𑀥 𑀥𑀸𑀢𑁆𑀯𑀦𑁆𑀢𑀮𑁄𑀧𑁄 𑀦 𑀳𑁄𑀢𑀺.

𑀢𑀢𑁄 𑀥𑀸𑀢𑁆𑀯𑀸𑀥𑀺𑀓𑀸𑀭𑀯𑀺𑀳𑀺𑀢𑀸𑀦𑁂𑀓𑀧𑁆𑀧𑀘𑁆𑀘𑀬𑀧𑁆𑀧𑀲𑀗𑁆𑀕𑁂 ‘‘𑀯𑀢𑁆𑀢𑀺𑀘𑁆𑀙𑀸𑀦𑀼𑀧𑀼𑀩𑁆𑀩𑀺𑀓𑀸 𑀲𑀤𑁆𑀤𑀧𑁆𑀧𑀝𑀺𑀧𑀢𑁆𑀢𑀻’’𑀢𑀺 𑀓𑀢𑁆𑀯𑀸 𑀯𑀢𑁆𑀢𑀫𑀸𑀦𑀯𑀘𑀦𑀺𑀘𑁆𑀙𑀸𑀬𑀁 𑁋

𑁪𑁨𑁬. 𑀯𑀢𑁆𑀢𑀫𑀸𑀦𑀸 𑀢𑀺𑀅𑀦𑁆𑀢𑀺, 𑀲𑀺𑀣, 𑀫𑀺𑀫, 𑀢𑁂𑀅𑀦𑁆𑀢𑁂, 𑀲𑁂𑀯𑁆𑀳𑁂, 𑀏𑀫𑁆𑀳𑁂.

𑀢𑁆𑀬𑀸𑀤𑀬𑁄 𑀤𑁆𑀯𑀸𑀤𑀲 𑀯𑀢𑁆𑀢𑀫𑀸𑀦𑀸𑀲𑀜𑁆𑀜𑀸 𑀳𑁄𑀦𑁆𑀢𑀻𑀢𑀺 𑀢𑁆𑀬𑀸𑀤𑀻𑀦𑀁 𑀯𑀢𑁆𑀢𑀫𑀸𑀦𑀢𑁆𑀣𑀯𑀺𑀲𑀬𑀢𑁆𑀢𑀸 𑀯𑀢𑁆𑀢𑀫𑀸𑀦𑀸𑀲𑀜𑁆𑀜𑀸.

𑁪𑁨𑁭. 𑀓𑀸𑀮𑁂.

𑀅𑀬𑀫𑀥𑀺𑀓𑀸𑀭𑁄.

𑀇𑀢𑁄 𑀧𑀭𑀁 𑀢𑁆𑀬𑀸𑀤𑀺𑀯𑀺𑀪𑀢𑁆𑀢𑀺𑀯𑀺𑀥𑀸𑀦𑁂 𑀲𑀩𑁆𑀩𑀢𑁆𑀣 𑀯𑀢𑁆𑀢𑀢𑁂.

𑁪𑁨𑁮. 𑀯𑀢𑁆𑀢𑀫𑀸𑀦𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑁂.

𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀓𑀸𑀮𑁂 𑀕𑀫𑁆𑀬𑀫𑀸𑀦𑁂 𑀯𑀢𑁆𑀢𑀫𑀸𑀦𑀸𑀯𑀺𑀪𑀢𑁆𑀢𑀺 𑀳𑁄𑀢𑀺, 𑀓𑀸𑀮𑁄𑀢𑀺 𑀘𑁂𑀢𑁆𑀣 𑀓𑁆𑀭𑀺𑀬𑀸, 𑀓𑀭𑀡𑀁 𑀓𑀸𑀭𑁄, 𑀭𑀓𑀸𑀭𑀲𑁆𑀲 𑀮𑀓𑀸𑀭𑁄, 𑀓𑀸𑀮𑁄.

𑀢𑀲𑁆𑀫𑀸 𑁋

𑀓𑁆𑀭𑀺𑀬𑀸𑀬 𑀕𑀫𑁆𑀬𑀫𑀸𑀦𑀸𑀬, 𑀯𑀺𑀪𑀢𑁆𑀢𑀻𑀦𑀁 𑀯𑀺𑀥𑀸𑀦𑀢𑁄;

𑀥𑀸𑀢𑀽𑀳𑁂𑀯 𑀪𑀯𑀦𑁆𑀢𑀻𑀢𑀺, 𑀲𑀺𑀤𑁆𑀥𑀁 𑀢𑁆𑀬𑀸𑀤𑀺𑀯𑀺𑀪𑀢𑁆𑀢𑀺𑀬𑁄.

𑀇𑀥 𑀧𑀦 𑀓𑀸𑀮𑀲𑁆𑀲 𑀅𑀢𑀻𑀢𑀸𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀡𑀢𑁆𑀢𑀺𑀧𑀭𑀺𑀓𑀧𑁆𑀧𑀓𑀸𑀮𑀸𑀪𑀺𑀧𑀢𑁆𑀢𑀺𑀯𑀲𑁂𑀦 𑀙𑀥𑀸 𑀪𑀺𑀦𑁆𑀦𑀢𑁆𑀢𑀸 ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑁂’’𑀢𑀺 𑀯𑀺𑀲𑁂𑀲𑁂𑀢𑀺. 𑀢𑀁 𑀢𑀁 𑀓𑀸𑀭𑀡𑀁 𑀧𑀝𑀺𑀘𑁆𑀘 𑀉𑀧𑁆𑀧𑀦𑁆𑀦𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑁄, 𑀧𑀝𑀺𑀮𑀤𑁆𑀥𑀲𑀪𑀸𑀯𑁄, 𑀦 𑀢𑀸𑀯 𑀅𑀢𑀻𑀢𑁄𑀢𑀺 𑀅𑀢𑁆𑀣𑁄.

𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀫𑀻𑀧𑁂𑀧𑀺, 𑀢𑀩𑁆𑀩𑁄𑀳𑀸𑀭𑀽𑀧𑀘𑀸𑀭𑀢𑁄;

𑀯𑀢𑁆𑀢𑀫𑀸𑀦𑀸 𑀅𑀢𑀻𑀢𑁂𑀧𑀺, 𑀢𑀁𑀓𑀸𑀮𑀯𑀘𑀦𑀺𑀘𑁆𑀙𑀬𑀸𑀢𑀺.

𑀢𑀲𑁆𑀫𑀺𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀯𑀢𑁆𑀢𑀫𑀸𑀦𑀸𑀯𑀺𑀪𑀢𑁆𑀢𑀺𑀁 𑀓𑀢𑁆𑀯𑀸, 𑀢𑀲𑁆𑀲𑀸 𑀞𑀸𑀦𑀸𑀦𑀺𑀬𑀫𑁂 ‘‘𑀥𑀸𑀢𑀼𑀮𑀺𑀗𑁆𑀕𑁂𑀳𑀺 𑀧𑀭𑀸 𑀧𑀘𑁆𑀘𑀬𑀸’’𑀢𑀺 𑀧𑀭𑀺𑀪𑀸𑀲𑀢𑁄 𑀥𑀸𑀢𑀼𑀢𑁄 𑀧𑀭𑀁 𑀯𑀢𑁆𑀢𑀫𑀸𑀦𑀧𑁆𑀧𑀘𑁆𑀘𑀬𑁂 𑀓𑀢𑁆𑀯𑀸, 𑀢𑁂𑀲𑀫𑀦𑀺𑀬𑀫𑀧𑁆𑀧𑀲𑀗𑁆𑀕𑁂𑀲𑀢𑀺 ‘‘𑀯𑀢𑁆𑀢𑀺𑀘𑁆𑀙𑀸𑀦𑀼𑀧𑀼𑀩𑁆𑀩𑀺𑀓𑀸 𑀲𑀤𑁆𑀤𑀧𑁆𑀧𑀝𑀺𑀧𑀢𑁆𑀢𑀻’’𑀢𑀺 𑀧𑀭𑀲𑁆𑀲𑀧𑀤𑀯𑀘𑀦𑀺𑀘𑁆𑀙𑀸𑀬𑀁 𑁋

𑁪𑁨𑁯. 𑀅𑀣 𑀧𑀼𑀩𑁆𑀩𑀸𑀦𑀺 𑀯𑀺𑀪𑀢𑁆𑀢𑀻𑀦𑀁 𑀙 𑀧𑀭𑀲𑁆𑀲𑀧𑀤𑀸𑀦𑀺.

𑀅𑀣 𑀢𑀤𑁆𑀥𑀺𑀢𑀸𑀦𑀦𑁆𑀢𑀭𑀁 𑀯𑀼𑀘𑁆𑀘𑀫𑀸𑀦𑀸𑀦𑀁 𑀲𑀩𑁆𑀩𑀸𑀲𑀁 𑀯𑀢𑁆𑀢𑀫𑀸𑀦𑀸𑀤𑀻𑀦𑀁 𑀅𑀝𑁆𑀞𑀯𑀺𑀥𑀸𑀦𑀁 𑀯𑀺𑀪𑀢𑁆𑀢𑀻𑀦𑀁 𑀬𑀸𑀦𑀺 𑀬𑀸𑀦𑀺 𑀧𑀼𑀩𑁆𑀩𑀓𑀸𑀦𑀺 𑀙 𑀧𑀤𑀸𑀦𑀺, 𑀢𑀸𑀦𑀺 𑀢𑀸𑀦𑀺 𑀅𑀢𑁆𑀣𑀢𑁄 𑀅𑀝𑁆𑀞𑀘𑀢𑁆𑀢𑀸𑀮𑀻𑀲𑀫𑀢𑁆𑀢𑀸𑀦𑀺 𑀧𑀭𑀲𑁆𑀲𑀧𑀤𑀲𑀜𑁆𑀜𑀸𑀦𑀺 𑀳𑁄𑀦𑁆𑀢𑀻𑀢𑀺𑀆𑀤𑀺𑀫𑁆𑀳𑀺 𑀙𑀦𑁆𑀦𑀁 𑀧𑀭𑀲𑁆𑀲𑀧𑀤𑀲𑀜𑁆𑀜𑀸, 𑀧𑀭𑀲𑁆𑀲𑀢𑁆𑀣𑀸𑀦𑀺 𑀧𑀤𑀸𑀦𑀺 𑀧𑀭𑀲𑁆𑀲𑀧𑀤𑀸𑀦𑀺, 𑀢𑀩𑁆𑀩𑀸𑀳𑀼𑀮𑁆𑀮𑀢𑁄 𑀢𑀩𑁆𑀩𑁄𑀳𑀸𑀭𑁄.

‘‘𑀥𑀸𑀢𑀽𑀳𑀺 𑀡𑁂 𑀡𑀬’’𑀇𑀘𑁆𑀘𑀸𑀤𑀺𑀢𑁄 ‘‘𑀥𑀸𑀢𑀽𑀳𑀻’’𑀢𑀺 𑀯𑀢𑁆𑀢𑀫𑀸𑀦𑁂 𑁋

𑁪𑁩𑁦. 𑀓𑀢𑁆𑀢𑀭𑀺 𑀧𑀭𑀲𑁆𑀲𑀧𑀤𑀁.

𑀓𑀢𑁆𑀢𑀭𑀺𑀓𑀸𑀭𑀓𑁂 𑀅𑀪𑀺𑀥𑁂𑀬𑁆𑀬𑁂 𑀲𑀩𑁆𑀩𑀥𑀸𑀢𑀽𑀳𑀺 𑀧𑀭𑀲𑁆𑀲𑀧𑀤𑀁 𑀳𑁄𑀢𑀻𑀢𑀺 𑀧𑀭𑀲𑁆𑀲𑀧𑀤𑀁 𑀓𑀢𑁆𑀯𑀸, 𑀢𑀲𑁆𑀲𑀸𑀧𑁆𑀬𑀦𑀺𑀬𑀫𑀧𑁆𑀧𑀲𑀗𑁆𑀕𑁂 𑀯𑀢𑁆𑀢𑀺𑀘𑁆𑀙𑀸𑀯𑀲𑀸 𑁋

𑀯𑀺𑀧𑀭𑀺𑀡𑀸𑀫𑁂𑀦 ‘‘𑀧𑀭𑀲𑁆𑀲𑀧𑀤𑀸𑀦𑀁, 𑀅𑀢𑁆𑀢𑀦𑁄𑀧𑀤𑀸𑀦’’𑀦𑁆𑀢𑀺 𑀘 𑀯𑀢𑁆𑀢𑀢𑁂.

𑁪𑁩𑁧. 𑀤𑁆𑀯𑁂 𑀤𑁆𑀯𑁂 𑀧𑀞𑀫𑀫𑀚𑁆𑀛𑀺𑀫𑀼𑀢𑁆𑀢𑀫𑀧𑀼𑀭𑀺𑀲𑀸.

𑀢𑀸𑀲𑀁 𑀯𑀺𑀪𑀢𑁆𑀢𑀻𑀦𑀁 𑀧𑀭𑀲𑁆𑀲𑀧𑀤𑀸𑀦’𑀫𑀢𑁆𑀢𑀦𑁄𑀧𑀤𑀸𑀦𑀜𑁆𑀘 𑀤𑁆𑀯𑁂 𑀤𑁆𑀯𑁂 𑀯𑀘𑀦𑀸𑀦𑀺 𑀬𑀣𑀸𑀓𑁆𑀓𑀫𑀁 𑀧𑀞𑀫𑀫𑀚𑁆𑀛𑀺𑀫𑀼𑀢𑁆𑀢𑀫𑀧𑀼𑀭𑀺𑀲𑀲𑀜𑁆𑀜𑀸𑀦𑀺 𑀳𑁄𑀦𑁆𑀢𑀺. 𑀢𑀁 𑀬𑀣𑀸? 𑀢𑀺 𑀅𑀦𑁆𑀢𑀺𑀇𑀢𑀺 𑀧𑀞𑀫𑀧𑀼𑀭𑀺𑀲𑀸, 𑀲𑀺 𑀣𑀇𑀢𑀺 𑀫𑀚𑁆𑀛𑀺𑀫𑀧𑀼𑀭𑀺𑀲𑀸, 𑀫𑀺 𑀫𑀇𑀢𑀺 𑀉𑀢𑁆𑀢𑀫𑀧𑀼𑀭𑀺𑀲𑀸. 𑀅𑀢𑁆𑀢𑀦𑁄𑀧𑀤𑁂𑀲𑀼𑀧𑀺 𑀢𑁂 𑀅𑀦𑁆𑀢𑁂𑀇𑀢𑀺 𑀧𑀞𑀫𑀧𑀼𑀭𑀺𑀲𑀸, 𑀲𑁂 𑀯𑁆𑀳𑁂𑀇𑀢𑀺 𑀫𑀚𑁆𑀛𑀺𑀫𑀧𑀼𑀭𑀺𑀲𑀸, 𑀏 𑀫𑁆𑀳𑁂𑀇𑀢𑀺 𑀉𑀢𑁆𑀢𑀫𑀧𑀼𑀭𑀺𑀲𑀸. 𑀏𑀯𑀁 𑀲𑁂𑀲𑀸𑀲𑀼 𑀲𑀢𑁆𑀢𑀲𑀼 𑀯𑀺𑀪𑀢𑁆𑀢𑀻𑀲𑀼𑀧𑀺 𑀬𑁄𑀚𑁂𑀢𑀩𑁆𑀩𑀦𑁆𑀢𑀺. 𑀏𑀯𑀁 𑀅𑀝𑁆𑀞𑀯𑀺𑀪𑀢𑁆𑀢𑀺𑀯𑀲𑁂𑀦 𑀙𑀦𑁆𑀦𑀯𑀼𑀢𑀺𑀯𑀺𑀥𑁂 𑀆𑀔𑁆𑀬𑀸𑀢𑀧𑀤𑁂 𑀤𑁆𑀯𑀢𑁆𑀢𑀺𑀁𑀲 𑀤𑁆𑀯𑀢𑁆𑀢𑀺𑀁𑀲 𑀧𑀞𑀫𑀫𑀚𑁆𑀛𑀺𑀫𑀉𑀢𑁆𑀢𑀫𑀧𑀼𑀭𑀺𑀲𑀸 𑀳𑁄𑀦𑁆𑀢𑀻𑀢𑀺 𑀯𑀢𑁆𑀢𑀫𑀸𑀦𑀧𑀭𑀲𑁆𑀲𑀧𑀤𑀸𑀤𑀺𑀫𑁆𑀳𑀺 𑀤𑁆𑀯𑀺𑀦𑁆𑀦𑀁 𑀧𑀞𑀫𑀧𑀼𑀭𑀺𑀲𑀲𑀜𑁆𑀜𑀸.

𑁪𑁩𑁨. 𑀦𑀸𑀫𑀫𑁆𑀳𑀺 𑀧𑀬𑀼𑀚𑁆𑀚𑀫𑀸𑀦𑁂𑀧𑀺𑀢𑀼𑀮𑁆𑀬𑀸𑀥𑀺𑀓𑀭𑀡𑁂 𑀧𑀞𑀫𑁄.

𑀢𑀼𑀫𑁆𑀳𑀸𑀫𑁆𑀳𑀲𑀤𑁆𑀤𑀯𑀚𑁆𑀚𑀺𑀢𑁂 𑀢𑀼𑀮𑁆𑀬𑀸𑀥𑀺𑀓𑀭𑀡𑀪𑀽𑀢𑁂 𑀲𑀸𑀥𑀓𑀯𑀸𑀘𑀓𑁂 𑀦𑀸𑀫𑀫𑁆𑀳𑀺 𑀧𑀬𑀼𑀚𑁆𑀚𑀫𑀸𑀦𑁂𑀧𑀺 𑀅𑀧𑁆𑀧𑀬𑀼𑀚𑁆𑀚𑀫𑀸𑀦𑁂𑀧𑀺 𑀥𑀸𑀢𑀽𑀳𑀺 𑀧𑀞𑀫𑀧𑀼𑀭𑀺𑀲𑁄 𑀳𑁄𑀢𑀻𑀢𑀺 𑀧𑀞𑀫𑀧𑀼𑀭𑀺𑀲𑀁 𑀓𑀢𑁆𑀯𑀸, 𑀢𑀲𑁆𑀲𑀸𑀧𑁆𑀬𑀦𑀺𑀬𑀫𑀧𑁆𑀧𑀲𑀗𑁆𑀕𑁂 𑀓𑁆𑀭𑀺𑀬𑀸𑀲𑀸𑀥𑀓𑀲𑁆𑀲 𑀓𑀢𑁆𑀢𑀼𑀦𑁄 𑀏𑀓𑀢𑁆𑀢𑁂 𑀯𑀢𑁆𑀢𑀼𑀫𑀺𑀘𑁆𑀙𑀺𑀢𑁂 ‘‘𑀏𑀓𑀫𑁆𑀳𑀺 𑀯𑀢𑁆𑀢𑀩𑁆𑀩𑁂 𑀏𑀓𑀯𑀘𑀦’’𑀦𑁆𑀢𑀺 𑀯𑀢𑁆𑀢𑀫𑀸𑀦𑀧𑀭𑀲𑁆𑀲𑀧𑀤𑀧𑀞𑀫𑀧𑀼𑀭𑀺𑀲𑁂𑀓𑀯𑀘𑀦𑀁 𑀢𑀺.

‘‘𑀧𑀭𑁄, 𑀧𑀘𑁆𑀘𑀬𑁄, 𑀥𑀸𑀢𑀽’’𑀢𑀺 𑀘 𑀅𑀥𑀺𑀓𑀸𑀭𑁄, ‘‘𑀬𑀣𑀸 𑀓𑀢𑁆𑀢𑀭𑀺 𑀘𑀸’’𑀢𑀺 𑀇𑀢𑁄 ‘‘𑀓𑀢𑁆𑀢𑀭𑀻’’𑀢𑀺 𑀯𑀺𑀓𑀭𑀡𑀧𑁆𑀧𑀘𑁆𑀘𑀬𑀯𑀺𑀥𑀸𑀦𑁂 𑀲𑀩𑁆𑀩𑀢𑁆𑀣 𑀯𑀢𑁆𑀢𑀢𑁂.

𑁪𑁩𑁩. 𑀪𑀽𑀯𑀸𑀤𑀺𑀢𑁄 𑀅.

𑀪𑀽𑀇𑀘𑁆𑀘𑁂𑀯𑀫𑀸𑀤𑀺𑀢𑁄 𑀥𑀸𑀢𑀼𑀕𑀡𑀢𑁄 𑀧𑀭𑁄 𑀅𑀧𑀘𑁆𑀘𑀬𑁄 𑀳𑁄𑀢𑀺 𑀓𑀢𑁆𑀢𑀭𑀺 𑀯𑀺𑀳𑀺𑀢𑁂𑀲𑀼 𑀯𑀺𑀪𑀢𑁆𑀢𑀺𑀧𑁆𑀧𑀘𑁆𑀘𑀬𑁂𑀲𑀼 𑀧𑀭𑁂𑀲𑀼. 𑀲𑀩𑁆𑀩𑀥𑀸𑀢𑀼𑀓𑀫𑁆𑀳𑀺𑀬𑁂𑀯𑀸𑀬𑀫𑀺𑀲𑁆𑀲𑀢𑁂.

‘‘𑀅𑀲𑀁𑀬𑁄𑀕𑀦𑁆𑀢𑀲𑁆𑀲, 𑀯𑀼𑀤𑁆𑀥𑀻’’𑀢𑀺 𑀘 𑀯𑀢𑁆𑀢𑀢𑁂.

𑁪𑁩𑁪. 𑀅𑀜𑁆𑀜𑁂𑀲𑀼 𑀘.

𑀓𑀸𑀭𑀺𑀢𑀢𑁄 𑀅𑀜𑁆𑀜𑁂𑀲𑀼 𑀧𑀘𑁆𑀘𑀬𑁂𑀲𑀼 𑀅𑀲𑀁𑀬𑁄𑀕𑀦𑁆𑀢𑀸𑀦𑀁 𑀥𑀸𑀢𑀽𑀦𑀁 𑀯𑀼𑀤𑁆𑀥𑀺 𑀳𑁄𑀢𑀺. 𑀘𑀕𑁆𑀕𑀳𑀡𑁂𑀦 𑀡𑀼𑀧𑁆𑀧𑀘𑁆𑀘𑀬𑀲𑁆𑀲𑀸𑀧𑀺 𑀯𑀼𑀤𑁆𑀥𑀺 𑀳𑁄𑀢𑀺. 𑀏𑀢𑁆𑀣 𑀘 ‘‘𑀖𑀝𑀸𑀤𑀻𑀦𑀁 𑀯𑀸’’𑀢𑀺 𑀇𑀢𑁄 𑀯𑀸𑀲𑀤𑁆𑀤𑁄 𑀅𑀦𑀼𑀯𑀢𑁆𑀢𑁂𑀢𑀩𑁆𑀩𑁄, 𑀲𑁄 𑀘 𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀢𑁆𑀣𑁄. 𑀢𑁂𑀦 𑁋

𑀇𑀯𑀡𑁆𑀡𑀼𑀯𑀡𑁆𑀡𑀦𑁆𑀢𑀸𑀦𑀜𑁆𑀘, 𑀮𑀳𑀽𑀧𑀦𑁆𑀢𑀸𑀦 𑀥𑀸𑀢𑀼𑀦𑀁;

𑀇𑀯𑀡𑁆𑀡𑀼𑀯𑀡𑁆𑀡𑀸𑀦𑀫𑁂𑀯, 𑀯𑀼𑀤𑁆𑀥𑀺 𑀳𑁄𑀢𑀺 𑀧𑀭𑀲𑁆𑀲 𑀦.

𑀬𑀼𑀯𑀡𑁆𑀡𑀸𑀦𑀫𑁆𑀧𑀺 𑀬 𑀡𑀼 𑀡𑀸-𑀦𑀸𑀦𑀺𑀝𑁆𑀞𑀸𑀤𑀻𑀲𑀼 𑀯𑀼𑀤𑁆𑀥𑀺 𑀦;

𑀢𑀼𑀤𑀸𑀤𑀺𑀲𑁆𑀲𑀸𑀯𑀺𑀓𑀭𑀡𑁂, 𑀦 𑀙𑁂𑀢𑁆𑀯𑀸𑀤𑀻𑀲𑀼 𑀯𑀸 𑀲𑀺𑀬𑀸.

𑀢𑀲𑁆𑀲𑀸𑀧𑁆𑀬𑀦𑀺𑀬𑀫𑀧𑁆𑀧𑀲𑀗𑁆𑀕𑁂 𑁋 ‘‘𑀅𑀬𑀼𑀯𑀡𑁆𑀡𑀸𑀦𑀜𑁆𑀘𑀸𑀬𑁄 𑀯𑀼𑀤𑁆𑀥𑀻’’𑀢𑀺 𑀧𑀭𑀺𑀪𑀸𑀲𑀢𑁄 𑀊𑀓𑀸𑀭𑀲𑁆𑀲𑁄𑀓𑀸𑀭𑁄 𑀯𑀼𑀤𑁆𑀥𑀺.

𑀯𑀺𑀧𑀭𑀺𑀡𑀸𑀫𑁂𑀦 ‘‘𑀥𑀸𑀢𑀽𑀦’’𑀦𑁆𑀢𑀺 𑀯𑀢𑁆𑀢𑀢𑁂.

𑁪𑁩𑁫. 𑀑 𑀅𑀯 𑀲𑀭𑁂.

𑀑𑀓𑀸𑀭𑀲𑁆𑀲 𑀥𑀸𑀢𑁆𑀯𑀦𑁆𑀢𑀲𑁆𑀲 𑀲𑀭𑁂 𑀧𑀭𑁂 𑀅𑀯𑀸𑀤𑁂𑀲𑁄 𑀳𑁄𑀢𑀺. ‘‘𑀲𑀭𑀮𑁄𑀧𑁄 𑀫𑀸𑀤𑁂𑀲’’𑀇𑀘𑁆𑀘𑀸𑀤𑀺𑀦𑀸 𑀲𑀭𑀮𑁄𑀧𑀸𑀤𑀺𑀫𑁆𑀳𑀺 𑀓𑀢𑁂 ‘‘𑀦𑀬𑁂 𑀧𑀭𑀁 𑀬𑀼𑀢𑁆𑀢𑁂’’𑀢𑀺 𑀧𑀭𑀦𑀬𑀦𑀁 𑀓𑀸𑀢𑀩𑁆𑀩𑀁.

𑀲𑁄 𑀧𑀼𑀭𑀺𑀲𑁄 𑀲𑀸𑀥𑀼 𑀪𑀯𑀢𑀺, 𑀲𑀸 𑀓𑀜𑁆𑀜𑀸 𑀲𑀸𑀥𑀼 𑀪𑀯𑀢𑀺, 𑀢𑀁 𑀘𑀺𑀢𑁆𑀢𑀁 𑀲𑀸𑀥𑀼 𑀪𑀯𑀢𑀺.

𑀏𑀢𑁆𑀣 𑀳𑀺 𑁋

𑀓𑀢𑁆𑀢𑀼𑀦𑁄𑀪𑀺𑀳𑀺𑀢𑀢𑁆𑀢𑀸𑀯, 𑀆𑀔𑁆𑀬𑀸𑀢𑁂𑀦 𑀦 𑀓𑀢𑁆𑀢𑀭𑀺;

𑀢𑀢𑀺𑀬𑀸 𑀧𑀞𑀫𑀸 𑀳𑁄𑀢𑀺, 𑀮𑀺𑀗𑁆𑀕𑀢𑁆𑀣𑀁 𑀧𑀦𑀧𑁂𑀓𑁆𑀔𑀺𑀬.

𑀲𑀢𑀺𑀧𑀺 𑀓𑁆𑀭𑀺𑀬𑀸𑀬𑁂𑀓𑀢𑁆𑀢𑁂 𑀓𑀢𑁆𑀢𑀽𑀦𑀁 𑀩𑀳𑀼𑀢𑁆𑀢𑀸 ‘‘𑀩𑀳𑀼𑀫𑁆𑀳𑀺 𑀯𑀢𑁆𑀢𑀩𑁆𑀩𑁂 𑀩𑀳𑀼𑀯𑀘𑀦’’𑀦𑁆𑀢𑀺 𑀯𑀢𑁆𑀢𑀫𑀸𑀦𑀧𑀭𑀲𑁆𑀲𑀧𑀤𑀧𑀞𑀫𑀧𑀼𑀭𑀺𑀲𑀩𑀳𑀼𑀯𑀘𑀦𑀁 𑀅𑀦𑁆𑀢𑀺, 𑀧𑀼𑀭𑁂 𑀯𑀺𑀬 𑀅𑀧𑁆𑀧𑀘𑁆𑀘𑀬𑀯𑀼𑀤𑁆𑀥𑀺𑀅𑀯𑀸𑀤𑁂𑀲𑀸, 𑀲𑀭𑀮𑁄𑀧𑀸𑀤𑀺. 𑀢𑁂 𑀧𑀼𑀭𑀺𑀲𑀸 𑀪𑀯𑀦𑁆𑀢𑀺, 𑀅𑀧𑁆𑀧𑀬𑀼𑀚𑁆𑀚𑀫𑀸𑀦𑁂𑀧𑀺 𑀪𑀯𑀢𑀺, 𑀪𑀯𑀦𑁆𑀢𑀺.

‘‘𑀧𑀬𑀼𑀚𑁆𑀚𑀫𑀸𑀦𑁂𑀧𑀺, 𑀢𑀼𑀮𑁆𑀬𑀸𑀥𑀺𑀓𑀭𑀡𑁂’’𑀢𑀺 𑀘 𑀯𑀢𑁆𑀢𑀢𑁂.

𑁪𑁩𑁬. 𑀢𑀼𑀫𑁆𑀳𑁂 𑀫𑀚𑁆𑀛𑀺𑀫𑁄.

𑀢𑀼𑀮𑁆𑀬𑀸𑀥𑀺𑀓𑀭𑀡𑀪𑀽𑀢𑁂 𑀢𑀼𑀫𑁆𑀳𑀲𑀤𑁆𑀤𑁂 𑀧𑀬𑀼𑀚𑁆𑀚𑀫𑀸𑀦𑁂𑀧𑀺 𑀅𑀧𑁆𑀧𑀬𑀼𑀚𑁆𑀚𑀫𑀸𑀦𑁂𑀧𑀺 𑀥𑀸𑀢𑀽𑀳𑀺 𑀫𑀚𑁆𑀛𑀺𑀫𑀧𑀼𑀭𑀺𑀲𑁄 𑀳𑁄𑀢𑀻𑀢𑀺 𑀯𑀢𑁆𑀢𑀫𑀸𑀦𑀧𑀭𑀲𑁆𑀲𑀧𑀤𑀫𑀚𑁆𑀛𑀺𑀫𑀧𑀼𑀭𑀺𑀲𑁂𑀓𑀯𑀘𑀦𑀁𑀲𑀺, 𑀲𑁂𑀲𑀁 𑀧𑀼𑀭𑀺𑀫𑀲𑀫𑀁. 𑀢𑁆𑀯𑀁 𑀪𑀯𑀲𑀺, 𑀢𑀼𑀫𑁆𑀳𑁂 𑀪𑀯𑀣, 𑀅𑀧𑁆𑀧𑀬𑀼𑀚𑁆𑀚𑀫𑀸𑀦𑁂𑀧𑀺 𑀪𑀯𑀲𑀺, 𑀪𑀯𑀣.

𑀢𑀼𑀮𑁆𑀬𑀸𑀥𑀺𑀓𑀭𑀡𑁂𑀢𑀺 𑀓𑀺𑀫𑀢𑁆𑀣𑀁? 𑀢𑀬𑀸 𑀧𑀘𑁆𑀘𑀢𑁂 𑀑𑀤𑀦𑁄.

𑀢𑀲𑁆𑀫𑀺𑀁𑀬𑁂𑀯𑀸𑀥𑀺𑀓𑀸𑀭𑁂 𑁋

𑁪𑁩𑁭. 𑀅𑀫𑁆𑀳𑁂 𑀉𑀢𑁆𑀢𑀫𑁄.

𑀢𑀼𑀮𑁆𑀬𑀸𑀥𑀺𑀓𑀭𑀡𑀪𑀽𑀢𑁂 𑀅𑀫𑁆𑀳𑀲𑀤𑁆𑀤𑁂 𑀧𑀬𑀼𑀚𑁆𑀚𑀫𑀸𑀦𑁂𑀧𑀺 𑀅𑀧𑁆𑀧𑀬𑀼𑀚𑁆𑀚𑀫𑀸𑀦𑁂𑀧𑀺 𑀥𑀸𑀢𑀽𑀳𑀺 𑀉𑀢𑁆𑀢𑀫𑀧𑀼𑀭𑀺𑀲𑁄 𑀳𑁄𑀢𑀻𑀢𑀺 𑀯𑀢𑁆𑀢𑀫𑀸𑀦𑀧𑀭𑀲𑁆𑀲𑀧𑀤𑀉𑀢𑁆𑀢𑀫𑀧𑀼𑀭𑀺𑀲𑁂𑀓𑀯𑀘𑀦𑀁 𑀫𑀺, 𑀅𑀧𑁆𑀧𑀘𑁆𑀘𑀬𑀯𑀼𑀤𑁆𑀥𑀺𑀅𑀯𑀸𑀤𑁂𑀲𑀸.

𑁪𑁩𑁮. 𑀅𑀓𑀸𑀭𑁄 𑀤𑀻𑀖𑀁 𑀳𑀺𑀫𑀺𑀫𑁂𑀲𑀼.

𑀅𑀓𑀸𑀭𑁄 𑀤𑀻𑀖𑀫𑀸𑀧𑀚𑁆𑀚𑀢𑁂 𑀳𑀺𑀫𑀺𑀫𑀇𑀘𑁆𑀘𑁂𑀢𑀸𑀲𑀼 𑀯𑀺𑀪𑀢𑁆𑀢𑀻𑀲𑀼. 𑀅𑀳𑀁 𑀪𑀯𑀸𑀫𑀺, 𑀫𑀬𑀁 𑀪𑀯𑀸𑀫. 𑀪𑀯𑀸𑀫𑀺, 𑀪𑀯𑀸𑀫.

‘‘𑀯𑀺𑀪𑀢𑁆𑀢𑀻𑀦𑀁, 𑀙𑀸’’𑀢𑀺 𑀘 𑀯𑀢𑁆𑀢𑀢𑁂.

𑁪𑁩𑁯. 𑀧𑀭𑀸𑀡𑁆𑀬𑀢𑁆𑀢𑀦𑁄𑀧𑀤𑀸𑀦𑀺.

𑀲𑀩𑁆𑀩𑀸𑀲𑀁 𑀯𑀢𑁆𑀢𑀫𑀸𑀦𑀸𑀦𑀁 𑀅𑀝𑁆𑀞𑀯𑀺𑀥𑀸𑀦𑀁 𑀯𑀺𑀪𑀢𑁆𑀢𑀻𑀦𑀁 𑀬𑀸𑀦𑀺 𑀬𑀸𑀦𑀺 𑀧𑀭𑀸𑀦𑀺 𑀙 𑀧𑀤𑀸𑀦𑀺, 𑀢𑀸𑀦𑀺 𑀢𑀸𑀦𑀺 𑀅𑀢𑁆𑀢𑀦𑁄𑀧𑀤𑀲𑀜𑁆𑀜𑀸𑀦𑀺 𑀳𑁄𑀦𑁆𑀢𑀻𑀢𑀺 𑀢𑁂𑀆𑀤𑀻𑀦𑀁 𑀅𑀢𑁆𑀢𑀦𑁄𑀧𑀤𑀲𑀜𑁆𑀜𑀸.

‘‘𑀥𑀸𑀢𑀽𑀳𑀺, 𑀅𑀢𑁆𑀢𑀦𑁄𑀧𑀤𑀸𑀦𑀻’’𑀢𑀺 𑀘 𑀯𑀢𑁆𑀢𑀢𑁂.

𑁪𑁪𑁦. 𑀓𑀢𑁆𑀢𑀭𑀺 𑀘.

𑀓𑀢𑁆𑀢𑀭𑀺 𑀘 𑀓𑀸𑀭𑀓𑁂 𑀅𑀪𑀺𑀥𑁂𑀬𑁆𑀬𑁂 𑀥𑀸𑀢𑀽𑀳𑀺 𑀅𑀢𑁆𑀢𑀦𑁄𑀧𑀤𑀸𑀦𑀺 𑀳𑁄𑀦𑁆𑀢𑀺. 𑀘𑀕𑁆𑀕𑀳𑀡𑀁 𑀓𑀢𑁆𑀣𑀘𑀺 𑀦𑀺𑀯𑀢𑁆𑀢𑀦𑀢𑁆𑀣𑀁, 𑀲𑁂𑀲𑀁 𑀧𑀭𑀲𑁆𑀲𑀧𑀤𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀪𑀯𑀢𑁂, 𑀪𑀯𑀦𑁆𑀢𑁂, 𑀪𑀯𑀲𑁂, 𑀪𑀯𑀯𑁆𑀳𑁂, 𑀪𑀯𑁂, 𑀪𑀯𑀸𑀫𑁆𑀳𑁂.

𑀧𑀘 𑀧𑀸𑀓𑁂, 𑀥𑀸𑀢𑀼𑀲𑀜𑁆𑀜𑀸𑀬𑀁 𑀥𑀸𑀢𑁆𑀯𑀦𑁆𑀢𑀮𑁄𑀧𑁄, 𑀯𑀼𑀢𑁆𑀢𑀦𑀬𑁂𑀦𑁂𑀯 𑀢𑁆𑀬𑀸𑀤𑁆𑀬𑀼𑀧𑁆𑀧𑀢𑁆𑀢𑀺, 𑀇𑀯𑀡𑁆𑀡𑀼𑀯𑀡𑁆𑀡𑀸𑀦𑀫𑀪𑀸𑀯𑀸 𑀯𑀼𑀤𑁆𑀥𑀺𑀅𑀪𑀸𑀯𑁄𑀯𑁂𑀢𑁆𑀣 𑀯𑀺𑀲𑁂𑀲𑁄. 𑀲𑁄 𑀤𑁂𑀯𑀤𑀢𑁆𑀢𑁄 𑀑𑀤𑀦𑀁 𑀧𑀘𑀢𑀺, 𑀧𑀘𑀦𑁆𑀢𑀺, 𑀧𑀘𑀲𑀺, 𑀧𑀘𑀣, 𑀧𑀘𑀸𑀫𑀺, 𑀧𑀘𑀸𑀫, 𑀲𑁄 𑀑𑀤𑀦𑀁 𑀧𑀘𑀢𑁂, 𑀢𑁂 𑀧𑀘𑀦𑁆𑀢𑁂, 𑀢𑁆𑀯𑀁 𑀧𑀘𑀲𑁂, 𑀢𑀼𑀫𑁆𑀳𑁂 𑀧𑀘𑀯𑁆𑀳𑁂, 𑀅𑀳𑀁 𑀧𑀘𑁂, 𑀫𑀬𑀁 𑀧𑀘𑀸𑀫𑁆𑀳𑁂.

𑀧𑀞𑀫𑀧𑀼𑀭𑀺𑀲𑀸𑀤𑀻𑀦𑀫𑁂𑀓𑀚𑁆𑀛𑀧𑁆𑀧𑀯𑀢𑁆𑀢𑀺𑀧𑁆𑀧𑀲𑀗𑁆𑀕𑁂 𑀧𑀭𑀺𑀪𑀸𑀲𑀫𑀸𑀳 𑁋

𑁪𑁪𑁧. 𑀲𑀩𑁆𑀩𑁂𑀲𑀫𑁂𑀓𑀸𑀪𑀺𑀥𑀸𑀦𑁂 𑀧𑀭𑁄 𑀧𑀼𑀭𑀺𑀲𑁄.

𑀲𑀩𑁆𑀩𑁂𑀲𑀁 𑀧𑀞𑀫𑀫𑀚𑁆𑀛𑀺𑀫𑀸𑀦𑀁, 𑀧𑀞𑀫𑀼𑀢𑁆𑀢𑀫𑀸𑀦𑀁, 𑀫𑀚𑁆𑀛𑀺𑀫𑀼𑀢𑁆𑀢𑀫𑀸𑀦𑀁 𑀢𑀺𑀡𑁆𑀡𑀁 𑀯𑀸 𑀧𑀼𑀭𑀺𑀲𑀸𑀦𑀁 𑀏𑀓𑀢𑁄𑀪𑀺𑀥𑀸𑀦𑁂 𑀓𑀸𑀢𑀩𑁆𑀩𑁂 𑀧𑀭𑁄 𑀧𑀼𑀭𑀺𑀲𑁄 𑀬𑁄𑀚𑁂𑀢𑀩𑁆𑀩𑁄. 𑀏𑀓𑀓𑀸𑀮𑀸𑀦𑀫𑁂𑀯𑀸𑀪𑀺𑀥𑀸𑀦𑁂 𑀘𑀸𑀬𑀁. 𑀲𑁄 𑀘 𑀧𑀘𑀢𑀺, 𑀢𑁆𑀯𑀜𑁆𑀘 𑀧𑀘𑀲𑀻𑀢𑀺 𑀧𑀭𑀺𑀬𑀸𑀬𑀧𑁆𑀧𑀲𑀗𑁆𑀕𑁂 𑀢𑀼𑀫𑁆𑀳𑁂 𑀧𑀘𑀣𑀸𑀢𑀺 𑀪𑀯𑀢𑀺. 𑀏𑀯𑀁 𑀲𑁄 𑀘 𑀧𑀘𑀢𑀺, 𑀅𑀳𑀜𑁆𑀘 𑀧𑀘𑀸𑀫𑀻𑀢𑀺 𑀫𑀬𑀁 𑀧𑀘𑀸𑀫, 𑀢𑀣𑀸 𑀢𑁆𑀯𑀜𑁆𑀘 𑀧𑀘𑀲𑀺, 𑀅𑀳𑀜𑁆𑀘 𑀧𑀘𑀸𑀫𑀺, 𑀫𑀬𑀁 𑀧𑀘𑀸𑀫, 𑀲𑁄 𑀘 𑀧𑀘𑀢𑀺, 𑀢𑁆𑀯𑀜𑁆𑀘 𑀧𑀘𑀲𑀺, 𑀅𑀳𑀜𑁆𑀘 𑀧𑀘𑀸𑀫𑀺, 𑀫𑀬𑀁 𑀧𑀘𑀸𑀫. 𑀏𑀯𑀁 𑀲𑀩𑁆𑀩𑀢𑁆𑀣 𑀬𑁄𑀚𑁂𑀢𑀩𑁆𑀩𑀁.

𑀏𑀓𑀸𑀪𑀺𑀥𑀸𑀦𑁂𑀢𑀺 𑀓𑀺𑀫𑀢𑁆𑀣𑀁? ‘‘𑀲𑁄 𑀘 𑀧𑀘𑀢𑀺, 𑀢𑁆𑀯𑀜𑁆𑀘 𑀧𑀘𑀺𑀲𑁆𑀲𑀲𑀺, 𑀅𑀳𑀁 𑀧𑀘𑀺𑀁’’ 𑀏𑀢𑁆𑀣 𑀪𑀺𑀦𑁆𑀦𑀓𑀸𑀮𑀢𑁆𑀢𑀸 ‘‘𑀫𑀬𑀁 𑀧𑀘𑀺𑀫𑁆𑀳𑀸’’𑀢𑀺 𑀦 𑀪𑀯𑀢𑀺.

𑀕𑀫𑀼 𑀲𑀧𑁆𑀧 𑀕𑀢𑀺𑀫𑁆𑀳𑀺, 𑀧𑀼𑀭𑁂 𑀯𑀺𑀬 𑀥𑀸𑀢𑀼𑀲𑀜𑁆𑀜𑀸𑀬𑀁 𑀥𑀸𑀢𑁆𑀯𑀦𑁆𑀢𑀮𑁄𑀧𑁄.

𑀓𑀢𑁆𑀢𑀭𑀺 𑀢𑁆𑀬𑀸𑀤𑁆𑀬𑀼𑀧𑁆𑀧𑀢𑁆𑀢𑀺.

𑁪𑁪𑁨. 𑀕𑀫𑀺𑀲𑁆𑀲𑀦𑁆𑀢𑁄 𑀘𑁆𑀙𑁄 𑀯𑀸 𑀲𑀩𑁆𑀩𑀸𑀲𑀼.

𑀕𑀫𑀼𑀇𑀘𑁆𑀘𑁂𑀢𑀲𑁆𑀲 𑀥𑀸𑀢𑀼𑀲𑁆𑀲𑀦𑁆𑀢𑁄 𑀫𑀓𑀸𑀭𑁄 𑀘𑁆𑀙𑁄 𑀳𑁄𑀢𑀺 𑀯𑀸 𑀲𑀩𑁆𑀩𑀸𑀲𑀼 𑀯𑀺𑀪𑀢𑁆𑀢𑀻𑀲𑀼, 𑀲𑀩𑁆𑀩𑀕𑁆𑀕𑀳𑀡𑁂𑀦 𑀫𑀸𑀦𑀦𑁆𑀢 𑀬 𑀓𑀸𑀭𑀺𑀢𑀧𑁆𑀧𑀘𑁆𑀘𑀬𑁂𑀲𑀼 𑀘. 𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀢𑁆𑀣𑁄𑀬𑀁 𑀯𑀸𑀲𑀤𑁆𑀤𑁄. 𑀢𑁂𑀦𑀸𑀬𑀁 𑁋

𑀯𑀺𑀥𑀺𑀁 𑀦𑀺𑀘𑁆𑀘𑀜𑁆𑀘 𑀯𑀸𑀲𑀤𑁆𑀤𑁄, 𑀫𑀸𑀦’𑀦𑁆𑀢𑁂𑀲𑀼 𑀢𑀼 𑀓𑀢𑁆𑀢𑀭𑀺;

𑀤𑀻𑀧𑁂𑀢𑀸𑀦𑀺𑀘𑁆𑀘𑀫𑀜𑁆𑀜𑀢𑁆𑀣, 𑀧𑀭𑁄𑀓𑁆𑀔𑀸𑀬𑀫𑀲𑀦𑁆𑀢𑀓𑀁.

𑀅𑀧𑁆𑀧𑀘𑁆𑀘𑀬𑀧𑀭𑀦𑀬𑀦𑀸𑀦𑀺, 𑀲𑁄 𑀧𑀼𑀭𑀺𑀲𑁄 𑀕𑀸𑀫𑀁 𑀕𑀘𑁆𑀙𑀢𑀺, 𑀢𑁂 𑀕𑀘𑁆𑀙𑀦𑁆𑀢𑀺, ‘‘𑀓𑁆𑀯𑀘𑀺 𑀥𑀸𑀢𑀽’’𑀢𑀺𑀆𑀤𑀺𑀦𑀸 𑀕𑀭𑀼𑀧𑀼𑀩𑁆𑀩𑀭𑀲𑁆𑀲𑀢𑁄 𑀧𑀭𑀲𑁆𑀲 𑀧𑀞𑀫𑀧𑀼𑀭𑀺𑀲𑀩𑀳𑀼𑀯𑀘𑀦𑀲𑁆𑀲 𑀭𑁂 𑀯𑀸 𑀳𑁄𑀢𑀺, 𑀕𑀘𑁆𑀙𑀭𑁂. 𑀢𑁆𑀯𑀁 𑀕𑀘𑁆𑀙𑀲𑀺, 𑀢𑀼𑀫𑁆𑀳𑁂 𑀕𑀘𑁆𑀙𑀣. 𑀅𑀳𑀁 𑀕𑀘𑁆𑀙𑀸𑀫𑀺, 𑀫𑀬𑀁 𑀕𑀘𑁆𑀙𑀸𑀫.

𑀘𑁆𑀙𑀸𑀤𑁂𑀲𑀸𑀪𑀸𑀯𑁂 ‘‘𑀮𑁄𑀧𑀜𑁆𑀘𑁂𑀢𑁆𑀢𑀫𑀓𑀸𑀭𑁄’’𑀢𑀺 𑀅𑀧𑁆𑀧𑀘𑁆𑀘𑀬𑀲𑁆𑀲 𑀏𑀓𑀸𑀭𑁄. 𑀕𑀫𑁂𑀢𑀺, 𑀕𑀫𑁂𑀦𑁆𑀢𑀺, 𑀲𑀭𑀮𑁄𑀧𑁄. 𑀕𑀫𑁂𑀲𑀺, 𑀕𑀫𑁂𑀣. 𑀕𑀫𑁂𑀫𑀺, 𑀕𑀫𑁂𑀫.

𑀅𑀢𑁆𑀢𑀦𑁄𑀧𑀤𑁂𑀧𑀺 𑀲𑁄 𑀕𑀸𑀫𑀁 𑀕𑀘𑁆𑀙𑀢𑁂, 𑀕𑀘𑁆𑀙𑀦𑁆𑀢𑁂, 𑀕𑀘𑁆𑀙𑀭𑁂. 𑀕𑀘𑁆𑀙𑀲𑁂, 𑀕𑀘𑁆𑀙𑀯𑁆𑀳𑁂. 𑀕𑀘𑁆𑀙𑁂, 𑀕𑀘𑁆𑀙𑀸𑀫𑁆𑀳𑁂.

‘‘𑀓𑀼𑀢𑁄 𑀦𑀼 𑀢𑁆𑀯𑀁 𑀆𑀕𑀘𑁆𑀙𑀲𑀺, 𑀭𑀸𑀚𑀕𑀳𑀢𑁄 𑀆𑀕𑀘𑁆𑀙𑀸𑀫𑀻’’𑀢𑀺𑀆𑀤𑀻𑀲𑀼 𑀧𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑀫𑀻𑀧𑁂 𑀯𑀢𑁆𑀢𑀫𑀸𑀦𑀯𑀘𑀦𑀁.

‘‘𑀯𑀸’’𑀢𑀺 𑀯𑀢𑁆𑀢𑀢𑁂.

𑁪𑁪𑁩. 𑀕𑀫𑀺𑀲𑁆𑀲 𑀖𑀫𑁆𑀫𑀁.

𑀕𑀫𑀼𑀇𑀘𑁆𑀘𑁂𑀢𑀲𑁆𑀲 𑀥𑀸𑀢𑀼𑀲𑁆𑀲 𑀲𑀩𑁆𑀩𑀲𑁆𑀲 𑀖𑀫𑁆𑀫𑀸𑀤𑁂𑀲𑁄 𑀳𑁄𑀢𑀺 𑀯𑀸. 𑀖𑀫𑁆𑀫𑀢𑀺, 𑀖𑀫𑁆𑀫𑀦𑁆𑀢𑀺 𑀇𑀘𑁆𑀘𑀸𑀤𑀺.

𑀪𑀸𑀯𑀓𑀫𑁆𑀫𑁂𑀲𑀼 𑀧𑀦 𑁋

𑁪𑁪𑁪. 𑀅𑀢𑁆𑀢𑀦𑁄𑀧𑀤𑀸𑀦𑀺 𑀪𑀸𑀯𑁂 𑀘 𑀓𑀫𑁆𑀫𑀦𑀺.

𑀪𑀸𑀯𑁂 𑀘 𑀓𑀫𑁆𑀫𑀦𑀺 𑀘 𑀓𑀸𑀭𑀓𑁂 𑀅𑀪𑀺𑀥𑁂𑀬𑁆𑀬𑁂 𑀅𑀢𑁆𑀢𑀦𑁄𑀧𑀤𑀸𑀦𑀺 𑀳𑁄𑀦𑁆𑀢𑀺, 𑀘𑀲𑀤𑁆𑀤𑁂𑀦 𑀓𑀫𑁆𑀫𑀓𑀢𑁆𑀢𑀭𑀺𑀧𑀺. 𑀪𑀯𑀦𑀁 𑀪𑀸𑀯𑁄, 𑀲𑁄 𑀘 𑀓𑀸𑀭𑀓𑀦𑁆𑀢𑀭𑁂𑀦 𑀅𑀲𑀁𑀲𑀝𑁆𑀞𑁄 𑀓𑁂𑀯𑀮𑁄 𑀪𑀯𑀦𑀮𑀯𑀦𑀸𑀤𑀺𑀓𑁄 𑀥𑀸𑀢𑁆𑀯𑀢𑁆𑀣𑁄. 𑀓𑀭𑀻𑀬𑀢𑀻𑀢𑀺 𑀓𑀫𑁆𑀫𑀁. 𑀅𑀓𑀫𑁆𑀫𑀓𑀸𑀧𑀺 𑀥𑀸𑀢𑀯𑁄 𑀲𑁄𑀧𑀲𑀕𑁆𑀕𑀸 𑀲𑀓𑀫𑁆𑀫𑀓𑀸𑀧𑀺 𑀪𑀯𑀦𑁆𑀢𑀺, 𑀢𑀲𑁆𑀫𑀸 𑀓𑀫𑁆𑀫𑀦𑀺 𑀅𑀦𑀼𑀧𑀼𑀩𑁆𑀩𑀸 𑀪𑀽𑀥𑀸𑀢𑀼𑀢𑁄 𑀯𑀢𑁆𑀢𑀫𑀸𑀦𑀢𑁆𑀢𑀦𑁄𑀧𑀤𑀧𑀞𑀫𑀧𑀼𑀭𑀺𑀲𑁂𑀓𑀯𑀘𑀦𑀁 𑀢𑁂.

‘‘𑀥𑀸𑀢𑀽𑀳𑀺 𑀡𑁂 𑀡𑀬’’𑀇𑀘𑁆𑀘𑀸𑀤𑀺𑀢𑁄 ‘‘𑀥𑀸𑀢𑀽𑀳𑀻’’𑀢𑀺 𑀯𑀢𑁆𑀢𑀫𑀸𑀦𑁂 𑁋

𑁪𑁪𑁫. 𑀪𑀸𑀯𑀓𑀫𑁆𑀫𑁂𑀲𑀼 𑀬𑁄.

𑀲𑀩𑁆𑀩𑀥𑀸𑀢𑀽𑀳𑀺 𑀧𑀭𑁄 𑀪𑀸𑀯𑀓𑀫𑁆𑀫𑁂𑀲𑀼 𑀬𑀧𑁆𑀧𑀘𑁆𑀘𑀬𑁄 𑀳𑁄𑀢𑀺. 𑀅𑀢𑁆𑀢𑀦𑁄𑀧𑀤𑀯𑀺𑀲𑀬𑁂𑀯𑀸𑀬𑀫𑀺𑀲𑁆𑀲𑀢𑁂, ‘‘𑀅𑀜𑁆𑀜𑁂𑀲𑀼 𑀘𑀸’’𑀢𑀺 𑀲𑀼𑀢𑁆𑀢𑁂 𑀅𑀦𑀼𑀯𑀢𑁆𑀢𑀺𑀢𑀯𑀸𑀕𑁆𑀕𑀳𑀡𑁂𑀦 𑀬𑀧𑁆𑀧𑀘𑁆𑀘𑀬𑁂 𑀯𑀼𑀤𑁆𑀥𑀺 𑀦 𑀪𑀯𑀢𑀺, 𑀅𑀦𑀼𑀪𑀽𑀬𑀢𑁂 𑀲𑀼𑀔𑀁 𑀤𑁂𑀯𑀤𑀢𑁆𑀢𑁂𑀦.

𑀆𑀔𑁆𑀬𑀸𑀢𑁂𑀦 𑀅𑀯𑀼𑀢𑁆𑀢𑀢𑁆𑀢𑀸, 𑀢𑀢𑀺𑀬𑀸 𑀳𑁄𑀢𑀺 𑀓𑀢𑁆𑀢𑀭𑀺;

𑀓𑀫𑁆𑀫𑀲𑁆𑀲𑀸𑀪𑀺𑀳𑀺𑀢𑀢𑁆𑀢𑀸 𑀦, 𑀤𑀼𑀢𑀺𑀬𑀸 𑀧𑀞𑀫𑀸𑀯𑀺𑀥.

𑀅𑀦𑀼𑀪𑀽𑀬𑀦𑁆𑀢𑁂 𑀲𑀫𑁆𑀧𑀢𑁆𑀢𑀺𑀬𑁄 𑀢𑀬𑀸. 𑀅𑀦𑀼𑀪𑀽𑀬𑀲𑁂 𑀢𑁆𑀯𑀁 𑀤𑁂𑀯𑀤𑀢𑁆𑀢𑁂𑀦, 𑀅𑀦𑀼𑀪𑀽𑀬𑀯𑁆𑀳𑁂 𑀢𑀼𑀫𑁆𑀳𑁂. 𑀅𑀳𑀁 𑀅𑀦𑀼𑀪𑀽𑀬𑁂 𑀢𑀬𑀸, 𑀫𑀬𑀁 𑀅𑀦𑀼𑀪𑀽𑀬𑀸𑀫𑁆𑀳𑁂.

‘‘𑀓𑁆𑀯𑀘𑀺 𑀥𑀸𑀢𑀼’’𑀇𑀘𑁆𑀘𑀸𑀤𑀺𑀢𑁄 ‘‘𑀓𑁆𑀯𑀘𑀻’’𑀢𑀺 𑀯𑀢𑁆𑀢𑀫𑀸𑀦𑁂 𑁋

𑁪𑁪𑁬. 𑀅𑀢𑁆𑀢𑀦𑁄𑀧𑀤𑀸𑀦𑀺 𑀧𑀭𑀲𑁆𑀲𑀧𑀤𑀢𑁆𑀢𑀁.

𑀅𑀢𑁆𑀢𑀦𑁄𑀧𑀤𑀸𑀦𑀺 𑀓𑁆𑀯𑀘𑀺 𑀧𑀭𑀲𑁆𑀲𑀧𑀤𑀢𑁆𑀢𑀫𑀸𑀧𑀚𑁆𑀚𑀦𑁆𑀢𑁂, 𑀅𑀓𑀢𑁆𑀢𑀭𑀺𑀬𑁂𑀯𑁂𑀢𑀁. 𑀬𑀓𑀸𑀭𑀲𑁆𑀲 𑀤𑁆𑀯𑀺𑀢𑁆𑀢𑀁, 𑀅𑀦𑀼𑀪𑀽𑀬𑁆𑀬𑀢𑀺 𑀫𑀬𑀸 𑀲𑀼𑀔𑀁, 𑀅𑀦𑀼𑀪𑀽𑀬𑁆𑀬𑀢𑁂 𑀯𑀸, 𑀅𑀦𑀼𑀪𑀽𑀬𑁆𑀬𑀦𑁆𑀢𑀺. 𑀅𑀦𑀼𑀪𑀽𑀬𑁆𑀬𑀲𑀺, 𑀅𑀦𑀼𑀪𑀽𑀬𑁆𑀬𑀣. 𑀅𑀦𑀼𑀪𑀽𑀬𑁆𑀬𑀸𑀫𑀺, 𑀅𑀦𑀼𑀪𑀽𑀬𑁆𑀬𑀸𑀫. 𑀤𑁆𑀯𑀺𑀢𑁆𑀢𑀸𑀪𑀸𑀯𑁂 𑁋 𑀅𑀦𑀼𑀪𑀽𑀬𑀢𑀺, 𑀅𑀦𑀼𑀪𑀽𑀬𑀦𑁆𑀢𑀺.

𑀓𑁆𑀯𑀘𑀻𑀢𑀺 𑀓𑀺𑀁? 𑀅𑀦𑀼𑀪𑀽𑀬𑀢𑁂.

𑀪𑀸𑀯𑁂 𑀅𑀤𑀩𑁆𑀩𑀯𑀼𑀢𑁆𑀢𑀺𑀦𑁄 𑀪𑀸𑀯𑀲𑁆𑀲𑁂𑀓𑀢𑁆𑀢𑀸 𑀏𑀓𑀯𑀘𑀦𑀫𑁂𑀯, 𑀢𑀜𑁆𑀘 𑀧𑀞𑀫𑀧𑀼𑀭𑀺𑀲𑀲𑁆𑀲𑁂𑀯, 𑀪𑀽𑀬𑀢𑁂 𑀤𑁂𑀯𑀤𑀢𑁆𑀢𑁂𑀦, 𑀤𑁂𑀯𑀤𑀢𑁆𑀢𑁂𑀦 𑀲𑀫𑁆𑀧𑀢𑀺 𑀪𑀯𑀦𑀦𑁆𑀢𑀺 𑀅𑀢𑁆𑀣𑁄.

𑀧𑀘𑀥𑀸𑀢𑀼𑀢𑁄 𑀓𑀫𑁆𑀫𑀦𑀺 𑀅𑀢𑁆𑀢𑀦𑁄𑀧𑀤𑁂 𑀬𑀧𑁆𑀧𑀘𑁆𑀘𑀬𑁂 𑀘 𑀓𑀢𑁂 𑁋

𑀯𑀺𑀧𑀭𑀺𑀡𑀸𑀫𑁂𑀦 ‘‘𑀬𑀲𑁆𑀲𑀸’’𑀢𑀺 𑀯𑀢𑁆𑀢𑀫𑀸𑀦𑁂 𑁋

𑁪𑁪𑁭. 𑀢𑀲𑁆𑀲 𑀘𑀯𑀕𑁆𑀕𑀬𑀓𑀸𑀭𑀯𑀓𑀸𑀭𑀢𑁆𑀢𑀁 𑀲𑀥𑀸𑀢𑁆𑀯𑀦𑁆𑀢𑀲𑁆𑀲.

𑀢𑀲𑁆𑀲 𑀪𑀸𑀯𑀓𑀫𑁆𑀫𑀯𑀺𑀲𑀬𑀲𑁆𑀲 𑀬𑀧𑁆𑀧𑀘𑁆𑀘𑀬𑀲𑁆𑀲 𑀘𑀯𑀕𑁆𑀕𑀬𑀓𑀸𑀭𑀯𑀓𑀸𑀭𑀢𑁆𑀢𑀁 𑀳𑁄𑀢𑀺 𑀥𑀸𑀢𑁆𑀯𑀦𑁆𑀢𑁂𑀦 𑀲𑀳 𑀬𑀣𑀸𑀲𑀫𑁆𑀪𑀯𑀁. 𑀏𑀢𑁆𑀣 𑀘 ‘‘𑀇𑀯𑀡𑁆𑀡𑀸𑀕𑀫𑁄 𑀯𑀸’’𑀢𑀺 𑀇𑀢𑁄 𑀲𑀻𑀳𑀕𑀢𑀺𑀬𑀸 𑀯𑀸𑀲𑀤𑁆𑀤𑁄 𑀅𑀦𑀼𑀯𑀢𑁆𑀢𑁂𑀢𑀩𑁆𑀩𑁄, 𑀲𑁄 𑀘 𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀢𑁆𑀣𑁄. 𑀢𑁂𑀦 𑁋

𑀘𑀯𑀕𑁆𑀕𑁄 𑀘 𑀢 𑀯𑀕𑁆𑀕𑀸𑀦𑀁, 𑀥𑀸𑀢𑁆𑀯𑀦𑁆𑀢𑀸𑀦𑀁 𑀬𑀯𑀢𑁆𑀢𑀦𑀁;

𑀭𑀯𑀸𑀦𑀜𑁆𑀘 𑀲𑀬𑀧𑁆𑀧𑀘𑁆𑀘-𑀬𑀸𑀦𑀁 𑀳𑁄𑀢𑀺 𑀬𑀣𑀸𑀓𑁆𑀓𑀫𑀦𑁆𑀢𑀺.

𑀥𑀸𑀢𑁆𑀯𑀦𑁆𑀢𑀲𑁆𑀲 𑀘𑀯𑀕𑁆𑀕𑀸𑀤𑀺𑀢𑁆𑀢𑀸 𑀘𑀓𑀸𑀭𑁂 𑀓𑀢𑁂 ‘‘𑀧𑀭𑀤𑁆𑀯𑁂𑀪𑀸𑀯𑁄 𑀞𑀸𑀦𑁂’’𑀢𑀺 𑀘𑀓𑀸𑀭𑀲𑁆𑀲 𑀤𑁆𑀯𑀺𑀢𑁆𑀢𑀁. 𑀧𑀘𑁆𑀘𑀢𑁂 𑀑𑀤𑀦𑁄 𑀤𑁂𑀯𑀤𑀢𑁆𑀢𑁂𑀦, ‘‘𑀓𑁆𑀯𑀘𑀺 𑀥𑀸𑀢𑀽’’𑀢𑀺𑀆𑀤𑀺𑀦𑀸 𑀕𑀭𑀼𑀧𑀼𑀩𑁆𑀩𑀭𑀲𑁆𑀲𑀢𑁄 𑀧𑀭𑀲𑁆𑀲 𑀧𑀞𑀫𑀧𑀼𑀭𑀺𑀲𑀩𑀳𑀼𑀯𑀘𑀦𑀲𑁆𑀲 𑀓𑁆𑀯𑀘𑀺 𑀭𑁂 𑀳𑁄𑀢𑀺. 𑀧𑀘𑁆𑀘𑀭𑁂, 𑀧𑀘𑁆𑀘𑀦𑁆𑀢𑁂. 𑀧𑀘𑁆𑀘𑀲𑁂, 𑀧𑀘𑁆𑀘𑀯𑁆𑀳𑁂. 𑀧𑀘𑁆𑀘𑁂, 𑀧𑀘𑁆𑀘𑀸𑀫𑁆𑀳𑁂.

𑀧𑀭𑀲𑁆𑀲𑀧𑀤𑀸𑀤𑁂𑀲𑁂 𑀧𑀘𑁆𑀘𑀢𑀺, 𑀧𑀘𑁆𑀘𑀦𑁆𑀢𑀺. 𑀧𑀘𑁆𑀘𑀲𑀺, 𑀧𑀘𑁆𑀘𑀣. 𑀧𑀘𑁆𑀘𑀸𑀫𑀺, 𑀧𑀘𑁆𑀘𑀸𑀫. 𑀢𑀣𑀸 𑀓𑀫𑁆𑀫𑀓𑀢𑁆𑀢𑀭𑀺 𑀧𑀘𑁆𑀘𑀢𑁂 𑀑𑀤𑀦𑁄 𑀲𑀬𑀫𑁂𑀯, 𑀧𑀘𑁆𑀘𑀦𑁆𑀢𑁂. 𑀧𑀘𑁆𑀘𑀢𑀺, 𑀧𑀘𑁆𑀘𑀦𑁆𑀢𑀺 𑀯𑀸 𑀇𑀘𑁆𑀘𑀸𑀤𑀺.

𑀕𑀫𑀺𑀢𑁄 𑀓𑀫𑁆𑀫𑀦𑀺 𑀅𑀢𑁆𑀢𑀦𑁄𑀧𑀤𑁂, 𑀬𑀧𑁆𑀧𑀘𑁆𑀘𑀬𑁂 𑀘 𑀓𑀢𑁂 𑁋

‘‘𑀥𑀸𑀢𑀽𑀳𑀺, 𑀢𑀲𑁆𑀫𑀺𑀁, 𑀬𑁂’’𑀢𑀺 𑀘 𑀯𑀢𑁆𑀢𑀢𑁂.

𑁪𑁪𑁮. 𑀇𑀯𑀡𑁆𑀡𑀸𑀕𑀫𑁄 𑀯𑀸.

𑀲𑀩𑁆𑀩𑁂𑀳𑀺 𑀥𑀸𑀢𑀽𑀳𑀺 𑀢𑀲𑁆𑀫𑀺𑀁 𑀪𑀸𑀯𑀓𑀫𑁆𑀫𑀯𑀺𑀲𑀬𑁂 𑀬𑀧𑁆𑀧𑀘𑁆𑀘𑀬𑁂 𑀧𑀭𑁂 𑀇𑀯𑀡𑁆𑀡𑀸𑀕𑀫𑁄 𑀳𑁄𑀢𑀺 𑀯𑀸𑀢𑀺 𑀈𑀓𑀸𑀭𑀸𑀕𑀫𑁄. 𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀢𑁆𑀣𑁄𑀬𑀁 𑀯𑀸𑀲𑀤𑁆𑀤𑁄. 𑀘𑁆𑀙𑀸𑀤𑁂𑀲𑁄, 𑀕𑀘𑁆𑀙𑀻𑀬𑀢𑁂 𑀕𑀸𑀫𑁄 𑀤𑁂𑀯𑀤𑀢𑁆𑀢𑁂𑀦, 𑀕𑀘𑁆𑀙𑀻𑀬𑀦𑁆𑀢𑁂. 𑀕𑀘𑁆𑀙𑀻𑀬𑀲𑁂, 𑀕𑀘𑁆𑀙𑀻𑀬𑀯𑁆𑀳𑁂. 𑀕𑀘𑁆𑀙𑀻𑀬𑁂, 𑀕𑀘𑁆𑀙𑀻𑀬𑀸𑀫𑁆𑀳𑁂.

𑀘𑁆𑀙𑀸𑀤𑁂𑀲𑀸𑀪𑀸𑀯𑁂 𑁋

‘‘𑀥𑀸𑀢𑀽𑀳𑀺, 𑀬𑁄, 𑀯𑀸’’𑀢𑀺 𑀘 𑀯𑀢𑁆𑀢𑀢𑁂.

𑁪𑁪𑁯. 𑀧𑀼𑀩𑁆𑀩𑀭𑀽𑀧𑀜𑁆𑀘.

𑀳𑁂𑀝𑁆𑀞𑀸𑀦𑀼𑀢𑁆𑀢𑁂𑀳𑀺 𑀧𑀭𑀲𑁆𑀲𑁂𑀯𑁂𑀤𑀁, 𑀢𑁂𑀦 𑀓𑀝𑀧𑀯𑀕𑁆𑀕𑀬𑀓𑀸𑀭𑀮𑀲𑀦𑁆𑀢𑁂𑀳𑁂𑀯 𑀥𑀸𑀢𑀽𑀳𑀺 𑀧𑀭𑁄 𑀬𑀧𑁆𑀧𑀘𑁆𑀘𑀬𑁄 𑀧𑀼𑀩𑁆𑀩𑀭𑀽𑀧𑀫𑀸𑀧𑀚𑁆𑀚𑀢𑁂 𑀯𑀸𑀢𑀺 𑀫𑀓𑀸𑀭𑀸 𑀧𑀭𑀲𑁆𑀲 𑀬𑀓𑀸𑀭𑀲𑁆𑀲 𑀫𑀓𑀸𑀭𑁄. 𑀕𑀫𑁆𑀫𑀢𑁂, 𑀕𑀫𑀻𑀬𑀢𑁂, 𑀕𑀫𑁆𑀫𑀦𑁆𑀢𑁂, 𑀕𑀫𑀻𑀬𑀦𑁆𑀢𑁂. 𑀕𑀫𑁆𑀫𑀲𑁂, 𑀕𑀫𑀻𑀬𑀲𑁂, 𑀕𑀫𑁆𑀫𑀯𑁆𑀳𑁂, 𑀕𑀫𑀻𑀬𑀯𑁆𑀳𑁂. 𑀕𑀫𑁆𑀫𑁂, 𑀕𑀫𑀻𑀬𑁂, 𑀕𑀫𑁆𑀫𑀸𑀫𑁆𑀳𑁂, 𑀕𑀫𑀻𑀬𑀸𑀫𑁆𑀳𑁂.

𑀧𑀭𑀲𑁆𑀲𑀧𑀤𑀢𑁆𑀢𑁂 𑁋 𑀕𑀘𑁆𑀙𑀻𑀬𑁆𑀬𑀢𑀺, 𑀕𑀘𑁆𑀙𑀻𑀬𑁆𑀬𑀦𑁆𑀢𑀺. 𑀕𑀘𑁆𑀙𑀻𑀬𑀢𑀺, 𑀕𑀘𑁆𑀙𑀻𑀬𑀦𑁆𑀢𑀺 𑀯𑀸. 𑀕𑀫𑁆𑀫𑀢𑀺, 𑀕𑀫𑁆𑀫𑀦𑁆𑀢𑀺. 𑀕𑀫𑀻𑀬𑀢𑀺, 𑀕𑀫𑀻𑀬𑀦𑁆𑀢𑀺. 𑀇𑀓𑀸𑀭𑀸𑀕𑀫𑁂 𑀕𑀫𑀺𑀬𑁆𑀬𑀢𑀺, 𑀕𑀫𑀺𑀬𑁆𑀬𑀦𑁆𑀢𑀺. 𑀢𑀣𑀸 𑀖𑀫𑁆𑀫𑀻𑀬𑀢𑀺, 𑀖𑀫𑁆𑀫𑀻𑀬𑀦𑁆𑀢𑀺 𑀇𑀘𑁆𑀘𑀸𑀤𑀺.

𑀯𑀢𑁆𑀢𑀫𑀸𑀦𑀸𑀯𑀺𑀪𑀢𑁆𑀢𑀺.

𑁪𑁫𑁦. 𑀧𑀜𑁆𑀘𑀫𑀻 𑀢𑀼 𑀅𑀦𑁆𑀢𑀼, 𑀳𑀺 𑀣, 𑀫𑀺 𑀫, 𑀢𑀁 𑀅𑀦𑁆𑀢𑀁, 𑀲𑁆𑀲𑀼𑀯𑁆𑀳𑁄, 𑀏 𑀆𑀫𑀲𑁂.

𑀢𑁆𑀯𑀸𑀤𑀬𑁄 𑀤𑁆𑀯𑀸𑀤𑀲 𑀧𑀜𑁆𑀘𑀫𑀻𑀲𑀜𑁆𑀜𑀸 𑀳𑁄𑀦𑁆𑀢𑀺.

𑁪𑁫𑁧. 𑀆𑀡𑀢𑁆𑀬𑀸𑀲𑀺𑀝𑁆𑀞𑁂𑀦𑀼𑀢𑁆𑀢𑀓𑀸𑀮𑁂 𑀧𑀜𑁆𑀘𑀫𑀻.

𑀆𑀡𑀢𑁆𑀬𑀢𑁆𑀣𑁂 𑀘 𑀆𑀲𑀻𑀲𑀢𑁆𑀣𑁂 𑀅𑀦𑀼𑀢𑁆𑀢𑀓𑀸𑀮𑁂 𑀧𑀜𑁆𑀘𑀫𑀻𑀯𑀺𑀪𑀢𑁆𑀢𑀺 𑀳𑁄𑀢𑀺.

𑀲𑀢𑀺𑀧𑀺 𑀓𑀸𑀮𑀸𑀥𑀺𑀓𑀸𑀭𑁂 𑀧𑀼𑀦 𑀓𑀸𑀮𑀕𑁆𑀕𑀳𑀡𑁂𑀦 𑀯𑀺𑀥𑀺𑀦𑀺𑀫𑀦𑁆𑀢𑀦𑀸𑀚𑁆𑀛𑁂𑀲𑀦𑀸𑀦𑀼𑀫𑀢𑀺𑀧𑀢𑁆𑀣𑀦𑀸𑀧𑀢𑁆𑀢𑀓𑀸𑀮𑀸𑀤𑀻𑀲𑀼 𑀘 𑀧𑀜𑁆𑀘𑀫𑀻. 𑀆𑀡𑀸𑀧𑀦𑀫𑀸𑀡𑀢𑁆𑀢𑀺, 𑀆𑀲𑀻𑀲𑀦𑀫𑀸𑀲𑀺𑀝𑁆𑀞𑁄, 𑀲𑁄 𑀘 𑀇𑀝𑁆𑀞𑀲𑁆𑀲 𑀅𑀲𑀫𑁆𑀧𑀢𑁆𑀢𑀲𑁆𑀲 𑀅𑀢𑁆𑀣𑀲𑁆𑀲 𑀧𑀢𑁆𑀣𑀦𑀁, 𑀢𑀲𑁆𑀫𑀺𑀁 𑀆𑀡𑀢𑁆𑀬𑀸𑀲𑀺𑀝𑁆𑀞𑁂. 𑀅𑀦𑀼 𑀲𑀫𑀻𑀧𑁂 𑀉𑀢𑁆𑀢𑀓𑀸𑀮𑁄 𑀅𑀦𑀼𑀢𑁆𑀢𑀓𑀸𑀮𑁄, 𑀧𑀘𑁆𑀘𑀼𑀧𑁆𑀧𑀦𑁆𑀦𑀓𑀸𑀮𑁄𑀢𑀺 𑀅𑀢𑁆𑀣𑁄, 𑀦 𑀉𑀢𑁆𑀢𑀓𑀸𑀮𑁄𑀢𑀺 𑀯𑀸 𑀅𑀦𑀼𑀢𑁆𑀢𑀓𑀸𑀮𑁄, 𑀢𑀲𑁆𑀫𑀺𑀁 𑀅𑀦𑀼𑀢𑁆𑀢𑀓𑀸𑀮𑁂, 𑀓𑀸𑀮𑀫𑀦𑀸𑀫𑀲𑀺𑀢𑁆𑀯𑀸 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀢𑀢𑁆𑀣 𑀆𑀲𑀻𑀲𑀦𑀢𑁆𑀣𑁂 𑀪𑀽𑀥𑀸𑀢𑀼𑀢𑁄 𑀧𑀜𑁆𑀘𑀫𑀻𑀧𑀭𑀲𑁆𑀲𑀧𑀤𑀧𑀞𑀫𑀧𑀼𑀭𑀺𑀲𑁂𑀓𑀯𑀘𑀦𑀁 𑀢𑀼, 𑀅𑀧𑁆𑀧𑀘𑁆𑀘𑀬𑀯𑀼𑀤𑁆𑀥𑀺𑀅𑀯𑀸𑀤𑁂𑀲𑀸. 𑀲𑁄 𑀲𑀼𑀔𑀻 𑀪𑀯𑀢𑀼, 𑀢𑁂 𑀲𑀼𑀔𑀺𑀢𑀸 𑀪𑀯𑀦𑁆𑀢𑀼.

𑀯𑀺𑀧𑀭𑀺𑀡𑀸𑀫𑁂𑀦 ‘‘𑀅𑀓𑀸𑀭𑀢𑁄’’𑀢𑀺 𑀯𑀢𑁆𑀢𑀢𑁂.

𑁪𑁫𑁨. 𑀳𑀺𑀮𑁄𑀧𑀁 𑀯𑀸.

𑀅𑀓𑀸𑀭𑀢𑁄 𑀧𑀭𑁄 𑀳𑀺𑀯𑀺𑀪𑀢𑁆𑀢𑀺 𑀮𑁄𑀧𑀫𑀸𑀧𑀚𑁆𑀚𑀢𑁂 𑀯𑀸. 𑀢𑁆𑀯𑀁 𑀲𑀼𑀔𑀻 𑀪𑀯, 𑀪𑀯𑀸𑀳𑀺 𑀯𑀸, 𑀳𑀺𑀫𑁆𑀳𑀺 𑀤𑀻𑀖𑁄. 𑀢𑀼𑀫𑁆𑀳𑁂 𑀲𑀼𑀔𑀺𑀢𑀸 𑀪𑀯𑀣. 𑀅𑀳𑀁 𑀲𑀼𑀔𑀻 𑀪𑀯𑀸𑀫𑀺, 𑀫𑀬𑀁 𑀲𑀼𑀔𑀺𑀦𑁄 𑀪𑀯𑀸𑀫.

𑀅𑀢𑁆𑀢𑀦𑁄𑀧𑀤𑁂 𑀲𑁄 𑀲𑀼𑀔𑀻 𑀪𑀯𑀢𑀁, 𑀢𑁂 𑀲𑀼𑀔𑀺𑀢𑀸 𑀪𑀯𑀦𑁆𑀢𑀁. 𑀢𑁆𑀯𑀁 𑀲𑀼𑀔𑀻 𑀪𑀯𑀲𑁆𑀲𑀼, 𑀢𑀼𑀫𑁆𑀳𑁂 𑀲𑀼𑀔𑀺𑀢𑀸 𑀪𑀯𑀯𑁆𑀳𑁄. 𑀅𑀳𑀁 𑀲𑀼𑀔𑀻 𑀪𑀯𑁂, 𑀫𑀬𑀁 𑀲𑀼𑀔𑀺𑀢𑀸 𑀪𑀯𑀸𑀫𑀲𑁂.

𑀓𑀫𑁆𑀫𑀦𑀺 𑀅𑀦𑀼𑀪𑀽𑀬𑀢𑀁 𑀢𑀬𑀸, 𑀅𑀦𑀼𑀪𑀽𑀬𑀦𑁆𑀢𑀁. 𑀅𑀦𑀼𑀪𑀽𑀬𑀲𑁆𑀲𑀼, 𑀅𑀦𑀼𑀪𑀽𑀬𑀯𑁆𑀳𑁄. 𑀅𑀦𑀼𑀪𑀽𑀬𑁂, 𑀅𑀦𑀼𑀪𑀽𑀬𑀸𑀫𑀲𑁂. 𑀧𑀭𑀲𑁆𑀲𑀧𑀤𑀢𑁆𑀢𑁂 𑀅𑀦𑀼𑀪𑀽𑀬𑁆𑀬𑀢𑀼, 𑀅𑀦𑀼𑀪𑀽𑀬𑁆𑀬𑀦𑁆𑀢𑀼. 𑀅𑀦𑀼𑀪𑀽𑀬𑀢𑀼, 𑀅𑀦𑀼𑀪𑀽𑀬𑀦𑁆𑀢𑀼 𑀯𑀸, 𑀅𑀦𑀼𑀪𑀽𑀬𑁆𑀬𑀸𑀳𑀺 𑀇𑀘𑁆𑀘𑀸𑀤𑀺. 𑀪𑀸𑀯𑁂 𑀪𑀽𑀬𑀢𑀁.

𑀆𑀡𑀢𑁆𑀢𑀺𑀬𑀁 𑀓𑀢𑁆𑀢𑀭𑀺 𑀤𑁂𑀯𑀤𑀢𑁆𑀢𑁄 𑀤𑀸𑀦𑀺 𑀑𑀤𑀦𑀁 𑀧𑀘𑀢𑀼, 𑀧𑀘𑀦𑁆𑀢𑀼. 𑀧𑀘, 𑀧𑀘𑀸𑀳𑀺, 𑀧𑀘𑀣. 𑀧𑀘𑀸𑀫𑀺, 𑀧𑀘𑀸𑀫. 𑀧𑀘𑀢𑀁, 𑀧𑀘𑀦𑁆𑀢𑀁. 𑀧𑀘𑀲𑁆𑀲𑀼, 𑀧𑀘𑀯𑁆𑀳𑁄. 𑀧𑀘𑁂, 𑀧𑀘𑀸𑀫𑀲𑁂.

𑀓𑀫𑁆𑀫𑀦𑀺 𑀬𑀧𑁆𑀧𑀘𑁆𑀘𑀬𑀘𑀯𑀕𑁆𑀕𑀸𑀤𑀺, 𑀧𑀘𑁆𑀘𑀢𑀁 𑀑𑀤𑀦𑁄 𑀤𑁂𑀯𑀤𑀢𑁆𑀢𑁂𑀦, 𑀧𑀘𑁆𑀘𑀦𑁆𑀢𑀁. 𑀧𑀘𑁆𑀘𑀲𑁆𑀲𑀼, 𑀧𑀘𑁆𑀘𑀯𑁆𑀳𑁄. 𑀧𑀘𑁆𑀘𑁂, 𑀧𑀘𑁆𑀘𑀸𑀫𑀲𑁂. 𑀧𑀭𑀲𑁆𑀲𑀧𑀤𑀢𑁆𑀢𑁂 𑀧𑀘𑁆𑀘𑀢𑀼, 𑀧𑀘𑁆𑀘𑀦𑁆𑀢𑀼. 𑀧𑀘𑁆𑀘, 𑀧𑀘𑁆𑀘𑀸𑀳𑀺, 𑀧𑀘𑁆𑀘𑀣. 𑀧𑀘𑁆𑀘𑀸𑀫𑀺, 𑀧𑀘𑁆𑀘𑀸𑀫.

𑀢𑀣𑀸 𑀲𑁄 𑀕𑀸𑀫𑀁 𑀕𑀘𑁆𑀙𑀢𑀼, 𑀕𑀘𑁆𑀙𑀦𑁆𑀢𑀼. 𑀕𑀘𑁆𑀙, 𑀕𑀘𑁆𑀙𑀸𑀳𑀺, 𑀕𑀘𑁆𑀙𑀣. 𑀕𑀘𑁆𑀙𑀸𑀫𑀺, 𑀕𑀘𑁆𑀙𑀸𑀫. 𑀕𑀫𑁂𑀢𑀼, 𑀕𑀫𑁂𑀦𑁆𑀢𑀼. 𑀕𑀫, 𑀕𑀫𑀸𑀳𑀺, 𑀕𑀫𑁂𑀣. 𑀕𑀫𑁂𑀫𑀺, 𑀕𑀫𑁂𑀫. 𑀕𑀘𑁆𑀙𑀢𑀁, 𑀕𑀘𑁆𑀙𑀦𑁆𑀢𑀁. 𑀕𑀘𑁆𑀙𑀲𑁆𑀲𑀼, 𑀕𑀘𑁆𑀙𑀯𑁆𑀳𑁄. 𑀕𑀘𑁆𑀙𑁂, 𑀕𑀘𑁆𑀙𑀸𑀫𑀲𑁂. 𑀖𑀫𑁆𑀫𑀸𑀤𑁂𑀲𑁂 𑀖𑀫𑁆𑀫𑀢𑀼, 𑀖𑀫𑁆𑀫𑀦𑁆𑀢𑀼 𑀇𑀘𑁆𑀘𑀸𑀤𑀺.

𑀓𑀫𑁆𑀫𑀦𑀺 𑀕𑀘𑁆𑀙𑀻𑀬𑀢𑀁, 𑀕𑀘𑁆𑀙𑀻𑀬𑀢𑀼, 𑀕𑀫𑀻𑀬𑀢𑀁, 𑀕𑀫𑀻𑀬𑀢𑀼, 𑀕𑀫𑁆𑀫𑀢𑀁, 𑀕𑀫𑁆𑀫𑀢𑀼 𑀇𑀘𑁆𑀘𑀸𑀤𑀺.

𑀯𑀺𑀥𑀺𑀫𑁆𑀳𑀺 𑀇𑀥 𑀧𑀩𑁆𑀩𑀢𑁄 𑀳𑁄𑀢𑀼, 𑀅𑀬𑀁 𑀧𑀸𑀲𑀸𑀤𑁄 𑀲𑀼𑀯𑀡𑁆𑀡𑀫𑀬𑁄 𑀳𑁄𑀢𑀽𑀢𑀺𑀆𑀤𑀺.

𑀦𑀺𑀫𑀦𑁆𑀢𑀦𑁂 𑀅𑀥𑀺𑀯𑀸𑀲𑁂𑀢𑀼 𑀫𑁂 𑀪𑀦𑁆𑀢𑁂 𑀪𑀕𑀯𑀸 𑀪𑁄𑀚𑀦𑀁, 𑀇𑀥 𑀦𑀺𑀲𑀻𑀤𑀢𑀼 𑀪𑀯𑀁.

𑀅𑀚𑁆𑀛𑁂𑀲𑀦𑁂 𑀤𑁂𑀲𑁂𑀢𑀼 𑀪𑀦𑁆𑀢𑁂 𑀪𑀕𑀯𑀸 𑀥𑀫𑁆𑀫𑀁.

𑀅𑀦𑀼𑀫𑀢𑀺𑀬𑀁 𑀧𑀼𑀘𑁆𑀙𑀢𑀼 𑀪𑀯𑀁 𑀧𑀜𑁆𑀳𑀁, 𑀧𑀯𑀺𑀲𑀢𑀼 𑀪𑀯𑀁, 𑀏𑀢𑁆𑀣 𑀦𑀺𑀲𑀻𑀤𑀢𑀼.