𑁭. 𑀓𑀺𑀩𑁆𑀩𑀺𑀥𑀸𑀦𑀓𑀡𑁆𑀟

𑀢𑁂𑀓𑀸𑀮𑀺𑀓

𑀓𑀺𑀘𑁆𑀘𑀧𑁆𑀧𑀘𑁆𑀘𑀬𑀦𑁆𑀢𑀦𑀬

𑀅𑀣 𑀥𑀸𑀢𑀽𑀳𑀺𑀬𑁂𑀯 𑀪𑀸𑀯𑀓𑀫𑁆𑀫𑀓𑀢𑁆𑀢𑀼𑀓𑀭𑀡𑀸𑀤𑀺𑀲𑀸𑀥𑀦𑀲𑀳𑀺𑀢𑀁 𑀓𑀺𑀩𑁆𑀩𑀺𑀥𑀸𑀦𑀫𑀸𑀭𑀪𑀻𑀬𑀢𑁂.

𑀢𑀢𑁆𑀣 𑀓𑀺𑀘𑁆𑀘𑀓𑀺𑀢𑀓𑀯𑀲𑁂𑀦 𑀤𑀼𑀯𑀺𑀥𑀸 𑀳𑀺 𑀧𑀘𑁆𑀘𑀬𑀸, 𑀢𑁂𑀲𑀼 𑀓𑀺𑀘𑁆𑀘𑀲𑀜𑁆𑀜𑀸𑀬 𑀧𑀞𑀫𑀁 𑀯𑀼𑀢𑁆𑀢𑀢𑁆𑀢𑀸, 𑀓𑀺𑀘𑁆𑀘𑀸𑀦𑀫𑀧𑁆𑀧𑀓𑀢𑁆𑀢𑀸 𑀘 𑀓𑀺𑀘𑁆𑀘𑀧𑁆𑀧𑀘𑁆𑀘𑀬𑀸 𑀢𑀸𑀯 𑀯𑀼𑀘𑁆𑀘𑀦𑁆𑀢𑁂.

𑀪𑀽 𑀲𑀢𑁆𑀢𑀸𑀬𑀁, ‘‘𑀪𑀽𑀬𑀢𑁂, 𑀅𑀪𑀯𑀺𑀢𑁆𑀣, 𑀪𑀯𑀺𑀲𑁆𑀲𑀢𑁂 𑀯𑀸 𑀤𑁂𑀯𑀤𑀢𑁆𑀢𑁂𑀦𑀸’’𑀢𑀺 𑀯𑀺𑀕𑁆𑀕𑀳𑁂 𑁋

‘‘𑀥𑀸𑀢𑀼𑀬𑀸 𑀓𑀫𑁆𑀫𑀸𑀤𑀺𑀫𑁆𑀳𑀺 𑀡𑁄’’𑀢𑀺 𑀇𑀢𑁄 ‘‘𑀥𑀸𑀢𑀼𑀬𑀸’’𑀢𑀺 𑀲𑀩𑁆𑀩𑀢𑁆𑀣 𑀧𑀘𑁆𑀘𑀬𑀸𑀤𑀺𑀯𑀺𑀥𑀸𑀦𑁂 𑀯𑀢𑁆𑀢𑀢𑁂, ‘‘𑀧𑀭𑀸, 𑀧𑀘𑁆𑀘𑀬𑀸’’𑀢𑀺 𑀘 𑀅𑀥𑀺𑀓𑀸𑀭𑁄.

𑁫𑁪𑁫. 𑀪𑀸𑀯𑀓𑀫𑁆𑀫𑁂𑀲𑀼 𑀢𑀩𑁆𑀩𑀸𑀦𑀻𑀬𑀸.

𑀪𑀸𑀯𑀓𑀫𑁆𑀫𑀇𑀘𑁆𑀘𑁂𑀢𑁂𑀲𑁆𑀯𑀢𑁆𑀣𑁂𑀲𑀼 𑀲𑀩𑁆𑀩𑀥𑀸𑀢𑀽𑀳𑀺 𑀢𑀩𑁆𑀩 𑀅𑀦𑀻𑀬𑀇𑀘𑁆𑀘𑁂𑀢𑁂 𑀧𑀘𑁆𑀘𑀬𑀸 𑀧𑀭𑀸 𑀳𑁄𑀦𑁆𑀢𑀺. 𑀬𑁄𑀕𑀯𑀺𑀪𑀸𑀕𑁂𑀦 𑀅𑀜𑁆𑀜𑀢𑁆𑀣𑀸𑀧𑀺.

𑀢𑀢𑁆𑀣 𑁋

𑀅𑀓𑀫𑁆𑀫𑀓𑁂𑀳𑀺 𑀥𑀸𑀢𑀽𑀳𑀺, 𑀪𑀸𑀯𑁂 𑀓𑀺𑀘𑁆𑀘𑀸 𑀪𑀯𑀦𑁆𑀢𑀺 𑀢𑁂;

𑀲𑀓𑀫𑁆𑀫𑀓𑁂𑀳𑀺 𑀓𑀫𑁆𑀫𑀢𑁆𑀣𑁂, 𑀅𑀭𑀳𑀲𑀓𑁆𑀓𑀢𑁆𑀣𑀤𑀻𑀧𑀓𑀸.

𑀢𑁂 𑀘 𑁋

𑁫𑁪𑁬. 𑀡𑀸𑀤𑀬𑁄 𑀢𑁂𑀓𑀸𑀮𑀺𑀓𑀸.

𑀢𑀺𑀓𑀸𑀮𑁂 𑀦𑀺𑀬𑀼𑀢𑁆𑀢𑀸 𑀢𑁂𑀓𑀸𑀮𑀺𑀓𑀸, 𑀬𑁂 𑀇𑀥 𑀢𑀢𑀺𑀬𑁂 𑀥𑀸𑀢𑁆𑀯𑀸𑀥𑀺𑀓𑀸𑀭𑁂 𑀯𑀺𑀳𑀺𑀢𑀸 𑀅𑀦𑀺𑀤𑁆𑀤𑀺𑀝𑁆𑀞𑀓𑀸𑀮𑀸 𑀡𑀸𑀤𑀬𑁄 𑀧𑀘𑁆𑀘𑀬𑀸, 𑀢𑁂 𑀢𑁂𑀓𑀸𑀮𑀺𑀓𑀸 𑀳𑁄𑀦𑁆𑀢𑀻𑀢𑀺 𑀧𑀭𑀺𑀪𑀸𑀲𑀢𑁄 𑀓𑀸𑀮𑀢𑁆𑀢𑀬𑁂𑀧𑀺 𑀳𑁄𑀦𑁆𑀢𑀺.

𑀲𑀻𑀳𑀕𑀢𑀺𑀬𑀸 ‘‘𑀓𑁆𑀯𑀘𑀻’’𑀢𑀺 𑀯𑀢𑁆𑀢𑀢𑁂.

𑁫𑁪𑁭. 𑀬𑀣𑀸𑀕𑀫𑀫𑀺𑀓𑀸𑀭𑁄.

𑀬𑀣𑀸𑀕𑀫𑀁 𑀬𑀣𑀸𑀧𑀬𑁄𑀕𑀁 𑀚𑀺𑀦𑀯𑀘𑀦𑀸𑀦𑀼𑀧𑀭𑁄𑀥𑁂𑀦 𑀥𑀸𑀢𑀽𑀳𑀺 𑀧𑀭𑁄 𑀇𑀓𑀸𑀭𑀸𑀕𑀫𑁄 𑀳𑁄𑀢𑀺 𑀓𑁆𑀯𑀘𑀺 𑀩𑁆𑀬𑀜𑁆𑀚𑀦𑀸𑀤𑀺𑀓𑁂𑀲𑀼 𑀓𑀺𑀘𑁆𑀘𑀓𑀺𑀢𑀓𑀧𑁆𑀧𑀘𑁆𑀘𑀬𑁂𑀲𑀼, ‘‘𑀅𑀜𑁆𑀜𑁂𑀲𑀼 𑀘𑀸’’𑀢𑀺 𑀯𑀼𑀤𑁆𑀥𑀺, ‘‘𑀑 𑀅𑀯 𑀲𑀭𑁂’’𑀢𑀺 𑀅𑀯𑀸𑀤𑁂𑀲𑁄, ‘‘𑀦𑀬𑁂 𑀧𑀭𑀁 𑀬𑀼𑀢𑁆𑀢𑁂’’𑀢𑀺 𑀧𑀭𑀁 𑀦𑁂𑀢𑀩𑁆𑀩𑀁.

𑁫𑁪𑁮. 𑀢𑁂 𑀓𑀺𑀘𑁆𑀘𑀸.

𑀬𑁂 𑀇𑀥 𑀯𑀼𑀢𑁆𑀢𑀸 𑀢𑀩𑁆𑀩𑀸𑀦𑀻𑀬𑀡𑁆𑀬 𑀢𑁂𑀬𑁆𑀬 𑀭𑀺𑀘𑁆𑀘𑀧𑁆𑀧𑀘𑁆𑀘𑀬𑀸, 𑀢𑁂 𑀓𑀺𑀘𑁆𑀘𑀲𑀜𑁆𑀜𑀸 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁄 ‘‘𑀅𑀜𑁆𑀜𑁂 𑀓𑀺𑀢𑀺’’𑀢𑀺 𑀯𑀘𑀦𑀢𑁄 𑀓𑀺𑀘𑁆𑀘𑀧𑁆𑀧𑀘𑁆𑀘𑀬𑀸𑀦𑀫𑀓𑀺𑀢𑀓𑀢𑁆𑀢𑀸 𑀦𑀸𑀫𑀩𑁆𑀬𑀧𑀤𑁂𑀲𑁂 𑀅𑀲𑀫𑁆𑀧𑀢𑁆𑀢𑁂 ‘‘𑀢𑀤𑁆𑀥𑀺𑀢𑀲𑀫𑀸𑀲𑀓𑀺𑀢𑀓𑀸 𑀦𑀸𑀫𑀁𑀯𑀸𑀢𑀯𑁂𑀢𑀼𑀦𑀸𑀤𑀻𑀲𑀼 𑀘𑀸’’𑀢𑀺 𑀏𑀢𑁆𑀣 𑀘𑀕𑁆𑀕𑀳𑀡𑁂𑀦 𑀦𑀸𑀫𑀩𑁆𑀬𑀧𑀤𑁂𑀲𑁄, 𑀢𑀢𑁄 𑀲𑁆𑀬𑀸𑀤𑁆𑀬𑀼𑀧𑁆𑀧𑀢𑁆𑀢𑀺. 𑀪𑀸𑀯𑁂 𑀪𑀸𑀯𑀲𑁆𑀲𑁂𑀓𑀢𑁆𑀢𑀸 𑀏𑀓𑀯𑀘𑀦𑀫𑁂𑀯, ‘‘𑀲𑀺’’𑀦𑁆𑀢𑀺 𑀅𑀫𑀸𑀤𑁂𑀲𑁄. 𑀪𑀯𑀺𑀢𑀩𑁆𑀩𑀁 𑀪𑀯𑀢𑀸 𑀧𑀜𑁆𑀜𑁂𑀦, 𑀪𑀯𑀦𑀻𑀬𑀁.

𑀇𑀥 𑀩𑁆𑀬𑀜𑁆𑀚𑀦𑀸𑀤𑀺𑀢𑁆𑀢𑀸𑀪𑀸𑀯𑀸 𑀅𑀦𑀼𑀯𑀢𑁆𑀢𑀺𑀢𑀓𑁆𑀯𑀘𑀺𑀕𑁆𑀕𑀳𑀡𑁂𑀦 𑀇𑀓𑀸𑀭𑀸𑀕𑀫𑀸𑀪𑀸𑀯𑁄. 𑀪𑀸𑀯𑁂 𑀓𑀺𑀘𑁆𑀘𑀧𑁆𑀧𑀘𑁆𑀘𑀬𑀦𑁆𑀢𑀸 𑀦𑀧𑀼𑀁𑀲𑀓𑀸. 𑀓𑀫𑁆𑀫𑁂 𑀢𑀺𑀮𑀺𑀗𑁆𑀕𑀸.

𑀓𑀫𑁆𑀫𑀦𑀺 𑀅𑀪𑀺𑀧𑀼𑀩𑁆𑀩𑁄, 𑀅𑀪𑀺𑀪𑀽𑀬𑀢𑁂, 𑀅𑀪𑀺𑀪𑀽𑀬𑀺𑀢𑁆𑀣, 𑀅𑀪𑀺𑀪𑀽𑀬𑀺𑀲𑁆𑀲𑀢𑁂𑀢𑀺 𑀅𑀪𑀺𑀪𑀯𑀺𑀢𑀩𑁆𑀩𑁄 𑀓𑁄𑀥𑁄 𑀧𑀡𑁆𑀟𑀺𑀢𑁂𑀦, 𑀅𑀪𑀺𑀪𑀯𑀺𑀢𑀩𑁆𑀩𑀸 𑀢𑀡𑁆𑀳𑀸, 𑀅𑀪𑀺𑀪𑀯𑀺𑀢𑀩𑁆𑀩𑀁 𑀤𑀼𑀓𑁆𑀔𑀁, 𑀏𑀯𑀁 𑀅𑀪𑀺𑀪𑀯𑀦𑀻𑀬𑁄, 𑀅𑀪𑀺𑀪𑀯𑀦𑀻𑀬𑀸, 𑀅𑀪𑀺𑀪𑀯𑀦𑀻𑀬𑀁, 𑀧𑀼𑀭𑀺𑀲 𑀓𑀜𑁆𑀜𑀸 𑀘𑀺𑀢𑁆𑀢𑀲𑀤𑁆𑀤𑀦𑀬𑁂𑀦 𑀦𑁂𑀢𑀩𑁆𑀩𑀁, 𑀏𑀯𑀁 𑀲𑀩𑁆𑀩𑀢𑁆𑀣.

𑀏𑀢𑁆𑀣 𑀳𑀺 𑁋

𑀢𑀩𑁆𑀩𑀸𑀤𑀻𑀳𑁂𑀯 𑀓𑀫𑁆𑀫𑀲𑁆𑀲, 𑀯𑀼𑀢𑁆𑀢𑀢𑁆𑀢𑀸𑀯 𑀧𑀼𑀦𑀢𑁆𑀢𑀦𑀸;

𑀯𑀢𑁆𑀢𑀩𑁆𑀩𑀲𑁆𑀲 𑀅𑀪𑀸𑀯𑀸 𑀦, 𑀤𑀼𑀢𑀺𑀬𑀸 𑀧𑀞𑀫𑀸 𑀢𑀢𑁄.

𑀆𑀲 𑀉𑀧𑀯𑁂𑀲𑀦𑁂, 𑀆𑀲𑀻𑀬𑀺𑀢𑁆𑀣, 𑀆𑀲𑀻𑀬𑀢𑁂, 𑀆𑀲𑀻𑀬𑀺𑀲𑁆𑀲𑀢𑁂𑀢𑀺 𑀆𑀲𑀺𑀢𑀩𑁆𑀩𑀁 𑀢𑀬𑀸, 𑀆𑀲𑀦𑀻𑀬𑀁. 𑀓𑀫𑁆𑀫𑁂 𑀉𑀧𑀸𑀲𑀺𑀢𑀩𑁆𑀩𑁄 𑀕𑀭𑀼, 𑀉𑀧𑀸𑀲𑀦𑀻𑀬𑁄.

𑀲𑀻 𑀲𑀬𑁂, 𑀅𑀲𑀻𑀬𑀺𑀢𑁆𑀣, 𑀲𑀻𑀬𑀢𑁂, 𑀲𑀻𑀬𑀺𑀲𑁆𑀲𑀢𑁂𑀢𑀺 𑀲𑀬𑀺𑀢𑀩𑁆𑀩𑀁 𑀪𑀯𑀢𑀸, 𑀲𑀬𑀦𑀻𑀬𑀁, ‘‘𑀏 𑀅𑀬𑀸’’𑀢𑀺 𑀅𑀬𑀸𑀤𑁂𑀲𑁄, 𑀅𑀢𑀺𑀲𑀬𑀺𑀢𑀩𑁆𑀩𑁄 𑀧𑀭𑁄, 𑀅𑀢𑀺𑀲𑀬𑀦𑀻𑀬𑁄.

𑀧𑀤 𑀕𑀢𑀺𑀫𑁆𑀳𑀺, 𑀉𑀧𑁆𑀧𑀚𑁆𑀚𑀺𑀢𑁆𑀣, 𑀉𑀧𑁆𑀧𑀚𑁆𑀚𑀢𑁂, 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑁂𑀢𑀺 𑀉𑀧𑁆𑀧𑀚𑁆𑀚𑀺𑀢𑀩𑁆𑀩𑀁 𑀢𑁂𑀦, 𑀉𑀧𑁆𑀧𑀚𑁆𑀚𑀦𑀻𑀬𑀁, 𑀏𑀢𑁆𑀣 𑀘 ‘‘𑀓𑀢𑁆𑀢𑀭𑀻’’𑀢𑀺 𑀅𑀥𑀺𑀓𑀸𑀭𑀁 𑀯𑀺𑀦𑀸 ‘‘𑀤𑀺𑀯𑀸𑀤𑀺𑀢𑁄 𑀬𑁄’’𑀢𑀺 𑀯𑀺𑀦𑀸𑀥𑀺𑀓𑀸𑀭𑀬𑁄𑀕𑀯𑀺𑀪𑀸𑀕𑁂𑀦 𑀬𑀧𑁆𑀧𑀘𑁆𑀘𑀬𑁄, ‘‘𑀢𑀲𑁆𑀲 𑀘𑀯𑀕𑁆𑀕𑀬𑀓𑀸𑀭’’𑀇𑀘𑁆𑀘𑀸𑀤𑀺𑀦𑀸 𑀘𑀯𑀕𑁆𑀕𑁄, ‘‘𑀧𑀭𑀤𑁆𑀯𑁂𑀪𑀸𑀯𑁄 𑀞𑀸𑀦𑁂’’𑀢𑀺 𑀤𑁆𑀯𑀺𑀪𑀸𑀯𑁄, 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑁄 𑀫𑀕𑁆𑀕𑁄, 𑀧𑀝𑀺𑀧𑀚𑁆𑀚𑀦𑀻𑀬𑁄.

𑀩𑀼𑀥 𑀅𑀯𑀕𑀫𑀦𑁂, 𑀅𑀩𑀼𑀚𑁆𑀛𑀺𑀢𑁆𑀣, 𑀩𑀼𑀚𑁆𑀛𑀢𑁂, 𑀩𑀼𑀚𑁆𑀛𑀺𑀲𑁆𑀲𑀢𑁂𑀢𑀺 𑀩𑀼𑀚𑁆𑀛𑀺𑀢𑀩𑁆𑀩𑁄 𑀥𑀫𑁆𑀫𑁄, 𑀩𑀼𑀚𑁆𑀛𑀦𑀻𑀬𑁄.

𑀲𑀼 𑀲𑀯𑀡𑁂, 𑀅𑀲𑀽𑀬𑀺𑀢𑁆𑀣, 𑀲𑀽𑀬𑀢𑁂, 𑀲𑀽𑀬𑀺𑀲𑁆𑀲𑀢𑁂𑀢𑀺 𑀲𑁄𑀢𑀩𑁆𑀩𑁄 𑀥𑀫𑁆𑀫𑁄, 𑀇𑀥 𑀬𑀣𑀸𑀕𑀫𑀕𑁆𑀕𑀳𑀡𑁂𑀦 𑀇𑀓𑀸𑀭𑀸𑀕𑀫𑀸𑀪𑀸𑀯𑁄, 𑀲𑀼𑀡𑀺𑀢𑀩𑁆𑀩𑁄, ‘‘𑀲𑁆𑀯𑀸𑀤𑀺𑀢𑁄 𑀡𑀼 𑀡𑀸 𑀉𑀡𑀸 𑀘𑀸’’𑀢𑀺 𑀯𑀺𑀦𑀸𑀥𑀺𑀓𑀸𑀭𑀬𑁄𑀕𑀯𑀺𑀪𑀸𑀕𑁂𑀦 𑀡𑀸𑀧𑀘𑁆𑀘𑀬𑁄, 𑀲𑀯𑀡𑀻𑀬𑁄.

𑀓𑀭 𑀓𑀭𑀡𑁂, 𑀓𑀭𑀻𑀬𑀺𑀢𑁆𑀣, 𑀓𑀭𑀻𑀬𑀢𑀺, 𑀓𑀭𑀻𑀬𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁂 𑀢𑀩𑁆𑀩𑀸’𑀦𑀻𑀬𑀸.

‘‘𑀅𑀦𑁆𑀢𑀲𑁆𑀲, 𑀓𑀭𑀲𑁆𑀲, 𑀘, 𑀢𑀢𑁆𑀢’’𑀦𑁆𑀢𑀺 𑀘 𑀯𑀢𑁆𑀢𑀢𑁂.

𑁫𑁪𑁯. 𑀢𑀼𑀁 𑀢𑀼 𑀦 𑀢𑀩𑁆𑀩𑁂𑀲𑀼 𑀯𑀸.

𑀓𑀭𑀇𑀘𑁆𑀘𑁂𑀢𑀲𑁆𑀲 𑀥𑀸𑀢𑀼𑀲𑁆𑀲 𑀅𑀦𑁆𑀢𑀪𑀽𑀢𑀲𑁆𑀲 𑀭𑀓𑀸𑀭𑀲𑁆𑀲 𑀢𑀓𑀸𑀭𑀢𑁆𑀢𑀁 𑀳𑁄𑀢𑀺 𑀯𑀸 𑀢𑀼𑀁 𑀢𑀼 𑀦 𑀢𑀩𑁆𑀩𑀇𑀘𑁆𑀘𑁂𑀢𑁂𑀲𑀼 𑀧𑀘𑁆𑀘𑀬𑁂𑀲𑀼 𑀧𑀭𑁂𑀲𑀼. 𑀓𑀢𑁆𑀢𑀩𑁆𑀩𑁄 𑀪𑀯𑀢𑀸 𑀥𑀫𑁆𑀫𑁄, 𑀓𑀢𑁆𑀢𑀩𑁆𑀩𑀸 𑀧𑀽𑀚𑀸, 𑀓𑀢𑁆𑀢𑀩𑁆𑀩𑀁 𑀓𑀼𑀲𑀮𑀁, 𑀢𑀢𑁆𑀢𑀸𑀪𑀸𑀯𑁂 ‘‘𑀓𑀭𑁄𑀢𑀺𑀲𑁆𑀲𑀸’’𑀢𑀺 𑀯𑀢𑁆𑀢𑀫𑀸𑀦𑁂 ‘‘𑀢𑀯𑁂𑀢𑀼𑀦𑀸𑀤𑀻𑀲𑀼 𑀓𑀸’’𑀢𑀺 𑀏𑀢𑁆𑀣 𑀆𑀤𑀺𑀲𑀤𑁆𑀤𑁂𑀦 𑀢𑀩𑁆𑀩𑁂𑀧𑀺 𑀓𑀸𑀤𑁂𑀲𑁄, 𑀓𑀸𑀢𑀩𑁆𑀩𑀁 𑀳𑀺𑀢𑀁.

𑁫𑁫𑁦. 𑀭𑀳𑀸𑀤𑀺𑀢𑁄 𑀡.

𑀭𑀓𑀸𑀭 𑀳𑀳𑀸𑀭𑀸𑀤𑁆𑀬𑀦𑁆𑀢𑁂𑀳𑀺 𑀥𑀸𑀢𑀽𑀳𑀺 𑀧𑀭𑀲𑁆𑀲 𑀅𑀦𑀸𑀦𑀻𑀬𑀸𑀤𑀺𑀦𑀓𑀸𑀭𑀲𑁆𑀲 𑀡𑀓𑀸𑀭𑁄 𑀳𑁄𑀢𑀺. 𑀆𑀤𑀺𑀲𑀤𑁆𑀤𑁂𑀦 𑀭𑀫𑀼 𑀅𑀧𑀜𑀸𑀢𑀸𑀤𑀺𑀢𑁄𑀧𑀺.

𑀭𑀳𑀸𑀤𑀺𑀢𑁄 𑀧𑀭𑀲𑁆𑀲𑁂𑀢𑁆𑀣, 𑀦𑀓𑀸𑀭𑀲𑁆𑀲 𑀅𑀲𑀫𑁆𑀪𑀯𑀸;

𑀅𑀦𑀸𑀦𑀻𑀬𑀸𑀤𑀺𑀦𑀲𑁆𑀲𑁂𑀯, 𑀲𑀸𑀫𑀣𑁆𑀬𑀸𑀬𑀁 𑀡𑀓𑀸𑀭𑀢𑀸.

𑀓𑀭𑀡𑀻𑀬𑁄 𑀥𑀫𑁆𑀫𑁄, 𑀓𑀭𑀡𑀸𑀭𑀳𑁄𑀢𑀺 𑀅𑀢𑁆𑀣𑁄, 𑀓𑀭𑀡𑀻𑀬𑀸, 𑀓𑀭𑀡𑀻𑀬𑀁.

𑀪𑀭 𑀪𑀭𑀡𑁂, 𑀪𑀭𑀻𑀬𑀢𑀻𑀢𑀺 𑀪𑀭𑀺𑀢𑀩𑁆𑀩𑁄, 𑀪𑀭𑀡𑀻𑀬𑁄.

𑀕𑀳 𑀉𑀧𑀸𑀤𑀸𑀦𑁂, 𑀅𑀕𑀬𑁆𑀳𑀺𑀢𑁆𑀣, 𑀕𑀬𑁆𑀳𑀢𑀺, 𑀕𑀬𑁆𑀳𑀺𑀲𑁆𑀲𑀢𑀻𑀢𑀺 𑀕𑀳𑁂𑀢𑀩𑁆𑀩𑁄, ‘‘𑀢𑁂𑀲𑀼 𑀯𑀼𑀤𑁆𑀥𑀻’’𑀢𑀺𑀆𑀤𑀺𑀦𑀸 𑀇𑀓𑀸𑀭𑀲𑁆𑀲𑁂𑀓𑀸𑀭𑁄, 𑀲𑀗𑁆𑀕𑀡𑁆𑀳𑀺𑀢𑀩𑁆𑀩𑁄, ‘‘𑀕𑀳𑀸𑀤𑀺𑀢𑁄 𑀧𑁆𑀧𑀡𑁆𑀳𑀸’’𑀢𑀺 𑀯𑀺𑀦𑀸𑀥𑀺𑀓𑀸𑀭𑀬𑁄𑀕𑀯𑀺𑀪𑀸𑀕𑁂𑀦 𑀡𑁆𑀳𑀸𑀧𑀘𑁆𑀘𑀬𑁄, 𑀳𑀮𑁄𑀧𑀲𑀭𑀮𑁄𑀧𑀸𑀤𑀺, 𑀲𑀗𑁆𑀕𑀡𑁆𑀳𑀡𑀻𑀬𑁄, 𑀕𑀳𑀡𑀻𑀬𑁄.

𑀆𑀤𑀺𑀕𑁆𑀕𑀳𑀡𑁂𑀦 𑀭𑀫𑀼 𑀓𑀻𑀴𑀸𑀬𑀁, 𑀭𑀫𑀻𑀬𑀺𑀢𑁆𑀣, 𑀭𑀫𑀻𑀬𑀢𑀺, 𑀭𑀫𑀻𑀬𑀺𑀲𑁆𑀲𑀢𑀻𑀢𑀺 𑀭𑀫𑀺𑀢𑀩𑁆𑀩𑁄, 𑀭𑀫𑀡𑀻𑀬𑁄 𑀯𑀺𑀳𑀸𑀭𑁄.

𑀅𑀧 𑀧𑀸𑀧𑀼𑀡𑀦𑁂, 𑀉𑀡𑀸𑀧𑀘𑁆𑀘𑀬𑁄, 𑀧𑀸𑀧𑀻𑀬𑀢𑀻𑀢𑀺 𑀧𑀸𑀧𑀼𑀡𑀺𑀢𑀩𑁆𑀩𑁄, ‘‘𑀕𑀼𑀧𑀸𑀤𑀻𑀦𑀜𑁆𑀘𑀸’’𑀢𑀺 𑀥𑀸𑀢𑁆𑀯𑀦𑁆𑀢𑀲𑁆𑀲 𑀮𑁄𑀧𑁄, 𑀤𑁆𑀯𑀺𑀢𑁆𑀢𑀜𑁆𑀘, 𑀧𑀢𑁆𑀢𑀩𑁆𑀩𑁄, 𑀧𑀢𑁆𑀢𑁂𑀬𑁆𑀬𑁄, 𑀧𑀸𑀧𑀼𑀡𑀡𑀻𑀬𑁄, 𑀧𑀸𑀧𑀡𑀻𑀬𑁄.

‘‘𑀅𑀦𑁆𑀢𑀲𑁆𑀲, 𑀯𑀸’’𑀢𑀺 𑀘 𑀯𑀢𑁆𑀢𑀢𑁂.

𑁫𑁫𑁧. 𑀕𑀫 𑀔𑀦 𑀳𑀦𑀸𑀤𑀻𑀦𑀁 𑀢𑀼𑀁𑀢𑀩𑁆𑀩𑀸𑀤𑀻𑀲𑀼 𑀦.

𑀕𑀫 𑀔𑀦 𑀳𑀦𑀇𑀘𑁆𑀘𑁂𑀯𑀫𑀸𑀤𑀻𑀦𑀁 𑀫𑀓𑀸𑀭 𑀦𑀓𑀸𑀭𑀦𑁆𑀢𑀸𑀦𑀁 𑀥𑀸𑀢𑀽𑀦𑀫𑀦𑁆𑀢𑀲𑁆𑀲 𑀦𑀓𑀸𑀭𑁄 𑀳𑁄𑀢𑀺 𑀯𑀸 𑀢𑀼𑀁 𑀢𑀩𑁆𑀩 𑀢𑀯𑁂 𑀢𑀼𑀦 𑀢𑁆𑀯𑀸𑀦𑀢𑁆𑀯𑀸𑀇𑀘𑁆𑀘𑁂𑀯𑀫𑀸𑀤𑀻𑀲𑀼 𑀢𑀓𑀸𑀭𑀸𑀤𑀺𑀧𑁆𑀧𑀘𑁆𑀘𑀬𑁂𑀲𑀼 𑀧𑀭𑁂𑀲𑀼. 𑀅𑀕𑀘𑁆𑀙𑀻𑀬𑀺𑀢𑁆𑀣, 𑀕𑀘𑁆𑀙𑀻𑀬𑀢𑀺, 𑀕𑀘𑁆𑀙𑀻𑀬𑀺𑀲𑁆𑀲𑀢𑀻𑀢𑀺 𑀕𑀦𑁆𑀢𑀩𑁆𑀩𑁄 𑀫𑀕𑁆𑀕𑁄, 𑀕𑀫𑀺𑀢𑀩𑁆𑀩𑀁, 𑀕𑀫𑀦𑀻𑀬𑀁.

𑀔𑀦𑀼 𑀅𑀯𑀤𑀸𑀭𑀡𑁂, 𑀅𑀔𑀜𑁆𑀜𑀺𑀢𑁆𑀣, 𑀔𑀜𑁆𑀜𑀢𑀺, 𑀔𑀜𑁆𑀜𑀺𑀲𑁆𑀲𑀢𑀻𑀢𑀺 𑀔𑀦𑁆𑀢𑀩𑁆𑀩𑀁 𑀆𑀯𑀸𑀝𑀁, 𑀔𑀦𑀺𑀢𑀩𑁆𑀩𑀁, ‘‘𑀓𑁆𑀯𑀘𑀺 𑀥𑀸𑀢𑀽’’𑀢𑀺𑀆𑀤𑀺𑀦𑀸 𑀔𑀦𑀦𑁆𑀢𑀲𑁆𑀲 𑀡𑀢𑁆𑀢𑀜𑁆𑀘, 𑀔𑀡𑀺𑀢𑀩𑁆𑀩𑀁, 𑀔𑀡𑀡𑀻𑀬𑀁, 𑀔𑀦𑀦𑀻𑀬𑀁 𑀯𑀸.

𑀳𑀦 𑀳𑀺𑀁𑀲𑀸 𑀕𑀢𑀻𑀲𑀼, 𑀅𑀳𑀜𑁆𑀜𑀺𑀢𑁆𑀣, 𑀳𑀜𑁆𑀜𑀢𑁂, 𑀳𑀜𑁆𑀜𑀺𑀲𑁆𑀲𑀢𑁂𑀢𑀺 𑀳𑀦𑁆𑀢𑀩𑁆𑀩𑀁, 𑀳𑀦𑀺𑀢𑀩𑁆𑀩𑀁, 𑀳𑀦𑀦𑀻𑀬𑀁.

𑀫𑀦 𑀜𑀸𑀡𑁂, 𑀅𑀫𑀜𑁆𑀜𑀺𑀢𑁆𑀣, 𑀫𑀜𑁆𑀜𑀢𑁂, 𑀫𑀜𑁆𑀜𑀺𑀲𑁆𑀲𑀢𑁂𑀢𑀺 𑀫𑀦𑁆𑀢𑀩𑁆𑀩𑁄, 𑀫𑀦𑀺𑀢𑀩𑁆𑀩𑁄, 𑀬𑀧𑁆𑀧𑀘𑁆𑀘𑀬𑁂 𑀘𑀯𑀕𑁆𑀕𑀸𑀤𑀺, 𑀫𑀜𑁆𑀜𑀺𑀢𑀩𑁆𑀩𑀁, 𑀫𑀜𑁆𑀜𑀦𑀻𑀬𑀁.

𑀧𑀽𑀚 𑀧𑀽𑀚𑀸𑀬𑀁, 𑀅𑀧𑀽𑀚𑀻𑀬𑀺𑀢𑁆𑀣, 𑀧𑀽𑀚𑀻𑀬𑀢𑀺, 𑀧𑀽𑀚𑀻𑀬𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁂 𑀢𑀩𑁆𑀩𑀸𑀦𑀻𑀬𑀸. ‘‘𑀘𑀼𑀭𑀸𑀤𑀺𑀢𑁄 𑀡𑁂 𑀡𑀬𑀸’’𑀢𑀺 𑀅𑀓𑀢𑁆𑀢𑀭𑀺𑀧𑀺 𑀡𑁂𑀡𑀬𑀸, 𑀇𑀓𑀸𑀭𑀸𑀕𑀫𑀸𑀦𑀻𑀬𑁂𑀲𑀼 ‘‘𑀲𑀭𑀮𑁄𑀧𑁄’’𑀢𑀺𑀆𑀤𑀺𑀦𑀸 𑀓𑀸𑀭𑀺𑀢𑀲𑀭𑀲𑁆𑀲 𑀮𑁄𑀧𑁄, 𑀧𑀽𑀚𑁂𑀢𑀩𑁆𑀩𑁄, 𑀧𑀽𑀚𑀬𑀺𑀢𑀩𑁆𑀩𑁄, 𑀧𑀽𑀚𑀦𑀻𑀬𑁄 𑀪𑀕𑀯𑀸.

‘‘𑀢𑀩𑁆𑀩𑀸𑀦𑀻𑀬𑀸’’𑀢𑀺 𑀬𑁄𑀕𑀯𑀺𑀪𑀸𑀕𑁂𑀦 𑀓𑀢𑁆𑀢𑀼𑀓𑀭𑀡𑁂𑀲𑀼𑀧𑀺, 𑀬𑀸 𑀧𑀸𑀧𑀼𑀡𑀦𑁂, 𑀦𑀺𑀬𑁆𑀬𑀸𑀢𑀻𑀢𑀺 𑀦𑀺𑀬𑁆𑀬𑀸𑀦𑀻𑀓𑁄 𑀫𑀕𑁆𑀕𑁄. 𑀕𑀘𑁆𑀙𑀦𑁆𑀢𑀻𑀢𑀺 𑀕𑀫𑀦𑀻𑀬𑀸 𑀪𑁄𑀕𑀸. 𑀦𑀳 𑀲𑁄𑀘𑁂, 𑀦𑀳𑀸𑀬𑀢𑀺 𑀏𑀢𑁂𑀦𑀸𑀢𑀺 𑀦𑀳𑀸𑀦𑀻𑀬𑀁 𑀘𑀼𑀡𑁆𑀡𑀁.

‘‘𑀪𑀸𑀯𑀓𑀫𑁆𑀫𑁂𑀲𑀽’’𑀢𑀺 𑀅𑀥𑀺𑀓𑀸𑀭𑁄.

𑁫𑁫𑁨. 𑀡𑁆𑀬𑁄 𑀘.

𑀪𑀸𑀯𑀓𑀫𑁆𑀫𑁂𑀲𑀼 𑀲𑀩𑁆𑀩𑀥𑀸𑀢𑀽𑀳𑀺 𑀡𑁆𑀬𑀧𑁆𑀧𑀘𑁆𑀘𑀬𑁄 𑀳𑁄𑀢𑀺, 𑀘𑀕𑁆𑀕𑀳𑀡𑁂𑀦 ‘‘𑀜𑀸𑀢𑁂𑀬𑁆𑀬’’𑀦𑁆𑀢𑀺𑀆𑀤𑀻𑀲𑀼 𑀢𑁂𑀬𑁆𑀬𑀧𑁆𑀧𑀘𑁆𑀘𑀬𑁄 𑀘.

𑁫𑁫𑁩. 𑀓𑀸𑀭𑀺𑀢𑀁 𑀯𑀺𑀬 𑀡𑀸𑀦𑀼𑀩𑀦𑁆𑀥𑁄.

𑀅𑀦𑀼𑀩𑀦𑁆𑀥𑁄 𑀅𑀧𑁆𑀧𑀬𑁄𑀕𑀻, 𑀡𑀓𑀸𑀭𑀸𑀦𑀼𑀩𑀦𑁆𑀥𑁄 𑀧𑀘𑁆𑀘𑀬𑁄 𑀓𑀸𑀭𑀺𑀢𑀁 𑀯𑀺𑀬 𑀤𑀝𑁆𑀞𑀩𑁆𑀩𑁄𑀢𑀺 𑀓𑀸𑀭𑀺𑀢𑀩𑁆𑀬𑀧𑀤𑁂𑀲𑁄, ‘‘𑀓𑀸𑀭𑀺𑀢𑀸𑀦𑀁 𑀡𑁄 𑀮𑁄𑀧’’𑀦𑁆𑀢𑀺 𑀡𑀮𑁄𑀧𑁄, ‘‘𑀅𑀲𑀁𑀬𑁄𑀕𑀦𑁆𑀢𑀲𑁆𑀲 𑀯𑀼𑀤𑁆𑀥𑀺 𑀓𑀸𑀭𑀺𑀢𑁂’’𑀢𑀺 𑀯𑀼𑀤𑁆𑀥𑀺, 𑀇𑀓𑀸𑀭𑀸𑀕𑀫𑁄, 𑀓𑀢𑁆𑀢𑀩𑁆𑀩𑀁 𑀓𑀸𑀭𑀺𑀬𑀁.

𑀳𑀭 𑀳𑀭𑀡𑁂, 𑀅𑀳𑀭𑀻𑀬𑀺𑀢𑁆𑀣, 𑀳𑀭𑀻𑀬𑀢𑀺, 𑀳𑀭𑀻𑀬𑀺𑀲𑁆𑀲𑀢𑀻𑀢𑀺 𑀯𑀸 𑀳𑀭𑀺𑀢𑀩𑁆𑀩𑀁 𑀳𑀸𑀭𑀺𑀬𑀁.

𑀪𑀭 𑀪𑀭𑀡𑁂, 𑀪𑀭𑀺𑀢𑀩𑁆𑀩𑀁 𑀪𑀸𑀭𑀺𑀬𑀁.

𑀮𑀪 𑀮𑀸𑀪𑁂, 𑀮𑀪𑀺𑀢𑀩𑁆𑀩𑀁 𑀮𑀩𑁆𑀪𑀁, ‘‘𑀬𑀯𑀢𑀁 𑀢𑀮𑀦’’𑀇𑀘𑁆𑀘𑀸𑀤𑀺𑀲𑀼𑀢𑁆𑀢𑁂 𑀓𑀸𑀭𑀕𑁆𑀕𑀳𑀡𑁂𑀦 𑀬𑀯𑀢𑁄 𑀪𑀓𑀸𑀭𑀲𑁆𑀲 𑀪𑀓𑀸𑀭𑁄, 𑀤𑁆𑀯𑀺𑀢𑁆𑀢𑀁.

𑀲𑀸𑀲 𑀅𑀦𑀼𑀲𑀺𑀝𑁆𑀞𑀺𑀫𑁆𑀳𑀺, 𑀲𑀸𑀲𑀺𑀢𑀩𑁆𑀩𑁄 𑀲𑀺𑀲𑁆𑀲𑁄, ‘‘𑀓𑁆𑀯𑀘𑀺 𑀥𑀸𑀢𑀽’’𑀢𑀺𑀆𑀤𑀺𑀦𑀸 𑀆𑀓𑀸𑀭𑀲𑁆𑀲𑀺𑀓𑀸𑀭𑁄.

𑀯𑀘 𑀯𑀺𑀬𑀢𑁆𑀢𑀺𑀬𑀁 𑀯𑀸𑀘𑀸𑀬𑀁, 𑀡𑁆𑀬𑀧𑁆𑀧𑀘𑁆𑀘𑀬𑀸𑀤𑀺𑀫𑁆𑀳𑀺 𑀓𑀢𑁂 ‘‘𑀅𑀦𑁆𑀢𑀸𑀦𑀁, 𑀡𑀸𑀦𑀼𑀩𑀦𑁆𑀥𑁂’’𑀢𑀺 𑀘 𑀯𑀢𑁆𑀢𑀢𑁂.

𑁫𑁫𑁪. 𑀓𑀕𑀸 𑀘𑀚𑀸𑀦𑀁.

𑀘𑀚𑀇𑀘𑁆𑀘𑁂𑀢𑁂𑀲𑀁 𑀥𑀸𑀢𑁆𑀯𑀦𑁆𑀢𑀸𑀦𑀁 𑀓𑀓𑀸𑀭 𑀕𑀓𑀸𑀭𑀸𑀤𑁂𑀲𑀸 𑀳𑁄𑀦𑁆𑀢𑀺 𑀡𑀓𑀸𑀭𑀸𑀦𑀼𑀩𑀦𑁆𑀥𑁂 𑀧𑀘𑁆𑀘𑀬𑁂 𑀧𑀭𑁂𑀢𑀺 𑀘𑀲𑁆𑀲 𑀓𑀸𑀤𑁂𑀲𑁄. 𑀯𑀘𑀦𑀻𑀬𑀁 𑀯𑀸𑀓𑁆𑀬𑀁.

𑀪𑀚 𑀲𑁂𑀯𑀸𑀬𑀁, 𑀪𑀚𑀦𑀻𑀬𑀁 𑀪𑀸𑀕𑁆𑀬𑀁, 𑀚𑀲𑁆𑀲 𑀕𑀸𑀤𑁂𑀲𑁄.

𑀘𑀺 𑀘𑀬𑁂, 𑀅𑀘𑀻𑀬𑀺𑀢𑁆𑀣, 𑀘𑀻𑀬𑀢𑀺, 𑀘𑀻𑀬𑀺𑀲𑁆𑀲𑀢𑀻𑀢𑀺 𑀘𑁂𑀢𑀩𑁆𑀩𑀁 𑀘𑁂𑀬𑁆𑀬𑀁, 𑀇𑀓𑀸𑀭𑀲𑁆𑀲𑁂𑀓𑀸𑀭𑁄 𑀯𑀼𑀤𑁆𑀥𑀺, 𑀬𑀓𑀸𑀭𑀲𑁆𑀲 𑀤𑁆𑀯𑀺𑀢𑁆𑀢𑀁, 𑀯𑀺𑀦𑀺𑀧𑀼𑀩𑁆𑀩𑁄 ‘‘𑀤𑁄 𑀥𑀲𑁆𑀲 𑀘𑀸’’𑀢𑀺 𑀲𑀼𑀢𑁆𑀢𑁂 𑀘𑀕𑁆𑀕𑀳𑀡𑁂𑀦 𑀘𑀓𑀸𑀭𑀲𑁆𑀲 𑀙𑀓𑀸𑀭𑁄, 𑀯𑀺𑀦𑀺𑀘𑁆𑀙𑁂𑀬𑁆𑀬𑀁, 𑀯𑀺𑀦𑀺𑀘𑁆𑀙𑀺𑀢𑀩𑁆𑀩𑀁, 𑀯𑀺𑀦𑀺𑀘𑁆𑀙𑀦𑀻𑀬𑀁. ‘‘𑀓𑀺𑀬𑀸𑀤𑀺𑀢𑁄 𑀦𑀸’’𑀢𑀺 𑀯𑀺𑀦𑀸𑀥𑀺𑀓𑀸𑀭𑀬𑁄𑀕𑀯𑀺𑀪𑀸𑀕𑁂𑀦 𑀢𑀩𑁆𑀩𑀸𑀦𑀻𑀬 𑀢𑀼𑀁 𑀢𑀼𑀦𑀸 𑀤𑀻𑀲𑀼 𑀘 𑀦𑀸𑀧𑀘𑁆𑀘𑀬𑁄, 𑀯𑀺𑀦𑀺𑀘𑁆𑀙𑀺𑀦𑀺𑀢𑀩𑁆𑀩𑀁, 𑀯𑀺𑀦𑀺𑀘𑁆𑀙𑀺𑀦𑀦𑀻𑀬𑀁.

𑀦𑀻 𑀧𑀸𑀧𑀼𑀡𑀦𑁂, 𑀅𑀦𑀻𑀬𑀺𑀢𑁆𑀣, 𑀦𑀻𑀬𑀢𑀺, 𑀦𑀻𑀬𑀺𑀲𑁆𑀲𑀢𑀻𑀢𑀺 𑀦𑁂𑀬𑁆𑀬𑁄, 𑀦𑁂𑀬𑁆𑀬𑀸, 𑀦𑁂𑀬𑁆𑀬𑀁. 𑀦𑁂𑀢𑀩𑁆𑀩𑀁.

𑀡𑁆𑀬𑀕𑁆𑀕𑀳𑀡𑀁 𑀙𑀝𑁆𑀞𑀻𑀬𑀦𑁆𑀢𑀯𑀲𑁂𑀦𑀸𑀦𑀼𑀯𑀢𑁆𑀢𑀢𑁂, 𑀫𑀡𑁆𑀟𑀽𑀓𑀕𑀢𑀺𑀬𑀸 𑀅𑀦𑁆𑀢𑀕𑁆𑀕𑀳𑀡𑀜𑁆𑀘 𑀢𑀢𑀺𑀬𑀦𑁆𑀢𑀯𑀲𑁂𑀦.

𑁫𑁫𑁫. 𑀪𑀽𑀢𑁄𑀩𑁆𑀩.

𑀪𑀽 𑀇𑀘𑁆𑀘𑁂𑀢𑀲𑁆𑀫𑀸 𑀧𑀭𑀲𑁆𑀲 𑀡𑁆𑀬𑀧𑁆𑀧𑀘𑁆𑀘𑀬𑀲𑁆𑀲 𑀲𑀳 𑀥𑀸𑀢𑁆𑀯𑀦𑁆𑀢𑁂𑀦 𑀅𑀩𑁆𑀩𑀸𑀤𑁂𑀲𑁄 𑀳𑁄𑀢𑀺. 𑀪𑀯𑀺𑀢𑀩𑁆𑀩𑁄 𑀪𑀩𑁆𑀩𑁄, 𑀪𑀩𑁆𑀩𑀸, 𑀪𑀩𑁆𑀩𑀁.

‘‘𑀡𑁆𑀬𑀲𑁆𑀲, 𑀅𑀦𑁆𑀢𑁂𑀦𑀸’’𑀢𑀺 𑀘 𑀯𑀢𑁆𑀢𑀢𑁂.

𑁫𑁫𑁬. 𑀯𑀤 𑀫𑀤 𑀕𑀫𑀼 𑀬𑀼𑀚 𑀕𑀭𑀳𑀸𑀓𑀸𑀭𑀸𑀤𑀻𑀳𑀺 𑀚𑁆𑀚𑀫𑁆𑀫𑀕𑁆𑀕𑀬𑁆𑀳𑁂𑀬𑁆𑀬𑀸𑀕𑀸𑀭𑁄 𑀯𑀸.

𑀯𑀤 𑀫𑀤 𑀕𑀫𑀼 𑀬𑀼𑀚 𑀕𑀭𑀳𑀇𑀘𑁆𑀘𑁂𑀯𑀫𑀸𑀤𑀻𑀳𑀺 𑀥𑀸𑀢𑀽𑀳𑀺, 𑀆𑀓𑀸𑀭𑀦𑁆𑀢𑁂𑀳𑀺 𑀘 𑀧𑀭𑀲𑁆𑀲 𑀡𑁆𑀬𑀧𑁆𑀧𑀘𑁆𑀘𑀬𑀲𑁆𑀲 𑀥𑀸𑀢𑁆𑀯𑀦𑁆𑀢𑁂𑀦 𑀲𑀳 𑀬𑀣𑀸𑀓𑁆𑀓𑀫𑀁 𑀚𑁆𑀚 𑀫𑁆𑀫 𑀕𑁆𑀕 𑀬𑁆𑀳 𑀏 𑀬𑁆𑀬𑀇𑀘𑁆𑀘𑁂𑀢𑁂 𑀆𑀤𑁂𑀲𑀸 𑀳𑁄𑀦𑁆𑀢𑀺 𑀯𑀸, 𑀕𑀭𑀲𑁆𑀲 𑀘 𑀕𑀸𑀭𑀸𑀤𑁂𑀲𑁄, 𑀕𑀭𑀳𑀲𑁆𑀲 𑀕𑀭𑀲𑁆𑀲𑁂𑀯𑀸𑀬𑀁 𑀕𑀸𑀭𑁄. 𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀢𑁆𑀣𑁄𑀬𑀁 𑀯𑀸𑀲𑀤𑁆𑀤𑁄.

𑀯𑀤 𑀯𑀺𑀬𑀢𑁆𑀢𑀺𑀬𑀁 𑀯𑀸𑀘𑀸𑀬𑀁, 𑀅𑀯𑀚𑁆𑀚𑀺𑀢𑁆𑀣, 𑀯𑀚𑁆𑀚𑀢𑀺, 𑀯𑀚𑁆𑀚𑀺𑀲𑁆𑀲𑀢𑀻𑀢𑀺 𑀯𑀸 𑀯𑀚𑁆𑀚𑀁 𑀯𑀤𑀦𑀻𑀬𑀁, 𑀭𑀲𑁆𑀲𑀢𑁆𑀢𑀁. 𑀯𑀚𑁆𑀚𑀁 𑀤𑁄𑀲𑁄.

𑀫𑀤 𑀉𑀫𑁆𑀫𑀸𑀤𑁂, 𑀅𑀫𑀚𑁆𑀚𑀺𑀢𑁆𑀣, 𑀫𑀚𑁆𑀚𑀢𑁂, 𑀫𑀚𑁆𑀚𑀺𑀲𑁆𑀲𑀢𑀺 𑀏𑀢𑁂𑀦𑀸𑀢𑀺 𑀫𑀚𑁆𑀚𑀁 𑀫𑀤𑀦𑀻𑀬𑀁. 𑀫𑀤𑀕𑁆𑀕𑀳𑀡𑁂𑀦 𑀓𑀭𑀡𑁂𑀧𑀺 𑀡𑁆𑀬𑀧𑁆𑀧𑀘𑁆𑀘𑀬𑁄. 𑀕𑀫𑀼 𑀲𑀧𑁆𑀧 𑀕𑀢𑀺𑀫𑁆𑀳𑀺, 𑀕𑀦𑁆𑀢𑀩𑁆𑀩𑀁 𑀕𑀫𑁆𑀫𑀁.

𑀬𑀼𑀚 𑀬𑁄𑀕𑁂, 𑀅𑀬𑀼𑀚𑁆𑀚𑀺𑀢𑁆𑀣, 𑀬𑀼𑀚𑁆𑀚𑀢𑁂, 𑀬𑀼𑀚𑁆𑀚𑀺𑀲𑁆𑀲𑀢𑀻𑀢𑀺 𑀬𑁄𑀕𑁆𑀕𑀁, 𑀦𑀺𑀬𑁄𑀚𑁆𑀚𑁄 𑀯𑀸.

𑀕𑀭𑀳 𑀦𑀺𑀦𑁆𑀤𑀸𑀬𑀁, 𑀅𑀕𑀭𑀬𑁆𑀳𑀺𑀢𑁆𑀣, 𑀕𑀭𑀳𑀻𑀬𑀢𑀺, 𑀕𑀭𑀳𑀻𑀬𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁂 𑀡𑁆𑀬𑀧𑁆𑀧𑀘𑁆𑀘𑀬𑁄, 𑀢𑀲𑁆𑀲𑀺𑀫𑀺𑀦𑀸 𑀥𑀸𑀢𑁆𑀯𑀦𑁆𑀢𑁂𑀦 𑀲𑀳 𑀬𑁆𑀳𑀸𑀤𑁂𑀲𑁄, 𑀕𑀭𑀲𑁆𑀲 𑀕𑀸𑀭𑀸𑀤𑁂𑀲𑁄 𑀘, 𑀕𑀸𑀭𑀬𑁆𑀳𑁄, 𑀕𑀸𑀭𑀬𑁆𑀳𑀸, 𑀕𑀸𑀭𑀬𑁆𑀳𑀁, 𑀕𑀭𑀳𑀡𑀻𑀬𑀁.

𑀆𑀤𑀺𑀲𑀤𑁆𑀤𑁂𑀦 𑀅𑀜𑁆𑀜𑁂𑀧𑀺 𑀤𑀫𑀚𑀳𑀦𑁆𑀢𑀸 𑀕𑀬𑁆𑀳𑀦𑁆𑀢𑁂. 𑀕𑀤 𑀯𑀺𑀬𑀢𑁆𑀢𑀺𑀬𑀁 𑀯𑀸𑀘𑀸𑀬𑀁, 𑀕𑀚𑁆𑀚𑀢𑁂, 𑀕𑀤𑀦𑀻𑀬𑀁 𑀯𑀸 𑀕𑀚𑁆𑀚𑀁. 𑀧𑀤 𑀕𑀢𑀺𑀫𑁆𑀳𑀺, 𑀧𑀚𑁆𑀚𑀦𑀻𑀬𑀁 𑀧𑀚𑁆𑀚𑀁 𑀕𑀸𑀣𑀸. 𑀔𑀸𑀤 𑀪𑀓𑁆𑀔𑀡𑁂, 𑀔𑀚𑁆𑀚𑀢𑁂𑀢𑀺 𑀔𑀚𑁆𑀚𑀁 𑀔𑀸𑀤𑀦𑀻𑀬𑀁. 𑀤𑀫𑀼 𑀤𑀫𑀦𑁂, 𑀅𑀤𑀫𑁆𑀫𑀺𑀢𑁆𑀣, 𑀤𑀫𑁆𑀫𑀢𑁂, 𑀤𑀫𑀻𑀬𑀺𑀲𑁆𑀲𑀢𑀻𑀢𑀺 𑀤𑀫𑁆𑀫𑁄 𑀤𑀫𑀦𑀻𑀬𑁄. 𑀪𑀼𑀚 𑀧𑀸𑀮𑀦𑀩𑁆𑀬𑀯𑀳𑀭𑀡𑁂𑀲𑀼, 𑀅𑀪𑀼𑀚𑁆𑀚𑀺𑀢𑁆𑀣, 𑀪𑀼𑀚𑁆𑀚𑀢𑀺, 𑀪𑀼𑀚𑁆𑀚𑀺𑀲𑁆𑀲𑀢𑀻𑀢𑀺 𑀪𑁄𑀕𑁆𑀕𑀁, 𑀪𑁄𑀚𑁆𑀚𑀁 𑀯𑀸, 𑀓𑀸𑀭𑀕𑁆𑀕𑀳𑀡𑁂𑀦 𑀬𑀲𑁆𑀲 𑀚𑀓𑀸𑀭𑁄. 𑀕𑀳𑁂𑀢𑀩𑁆𑀩𑀁 𑀕𑀬𑁆𑀳𑀫𑀺𑀘𑁆𑀘𑀸𑀤𑀺.

𑀆𑀓𑀸𑀭𑀦𑁆𑀢𑀢𑁄 𑀧𑀦 𑀤𑀸 𑀤𑀸𑀦𑁂, 𑀅𑀤𑀻𑀬𑀺𑀢𑁆𑀣, 𑀤𑀻𑀬𑀢𑀺, 𑀤𑀻𑀬𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁂 𑀡𑁆𑀬𑀧𑁆𑀧𑀘𑁆𑀘𑀬𑁄, 𑀢𑀲𑁆𑀲𑀺𑀫𑀺𑀦𑀸 𑀥𑀸𑀢𑁆𑀯𑀦𑁆𑀢𑁂𑀦 𑀆𑀓𑀸𑀭𑁂𑀦 𑀲𑀳 𑀏𑀬𑁆𑀬𑀸𑀤𑁂𑀲𑁄, 𑀤𑁂𑀬𑁆𑀬𑀁, 𑀤𑀸𑀢𑀩𑁆𑀩𑀁. 𑀅𑀦𑀻𑀬𑁂 ‘‘𑀲𑀭𑀮𑁄𑀧𑁄’’𑀢𑀺𑀆𑀤𑀺𑀦𑀸 𑀧𑀼𑀩𑁆𑀩𑀲𑀭𑀲𑁆𑀲 𑀮𑁄𑀧𑁂 𑀲𑀫𑁆𑀧𑀢𑁆𑀢𑁂 𑀢𑀢𑁆𑀣𑁂𑀯 𑀢𑀼𑀕𑁆𑀕𑀳𑀡𑁂𑀦 𑀦𑀺𑀲𑁂𑀥𑁂𑀢𑁆𑀯𑀸 ‘‘𑀲𑀭𑀸 𑀲𑀭𑁂 𑀮𑁄𑀧’’𑀦𑁆𑀢𑀺 𑀆𑀓𑀸𑀭𑁂 𑀮𑀼𑀢𑁆𑀢𑁂 𑀧𑀭𑀲𑀭𑀲𑁆𑀲 𑀤𑀻𑀖𑁄, 𑀤𑀸𑀦𑀻𑀬𑀁.

𑀧𑀸 𑀧𑀸𑀦𑁂, 𑀅𑀧𑀻𑀬𑀺𑀢𑁆𑀣, 𑀧𑀻𑀬𑀢𑀺, 𑀧𑀻𑀬𑀺𑀲𑁆𑀲𑀢𑀻𑀢𑀺 𑀧𑁂𑀬𑁆𑀬𑀁, 𑀧𑀸𑀢𑀩𑁆𑀩𑀁, 𑀧𑀸𑀦𑀻𑀬𑀁. 𑀳𑀸 𑀘𑀸𑀕𑁂, 𑀅𑀳𑀻𑀬𑀺𑀢𑁆𑀣, 𑀳𑀻𑀬𑀢𑀺, 𑀳𑀻𑀬𑀺𑀲𑁆𑀲𑀢𑀻𑀢𑀺 𑀳𑁂𑀬𑁆𑀬𑀁, 𑀳𑀸𑀢𑀩𑁆𑀩𑀁, 𑀳𑀸𑀦𑀻𑀬𑀁. 𑀫𑀸 𑀫𑀸𑀦𑁂, 𑀅𑀫𑀻𑀬𑀺𑀢𑁆𑀣, 𑀫𑀻𑀬𑀢𑀺, 𑀫𑀻𑀬𑀺𑀲𑁆𑀲𑀢𑀻𑀢𑀺 𑀫𑁂𑀬𑁆𑀬𑀁, 𑀫𑀸𑀢𑀩𑁆𑀩𑀁, 𑀫𑀺𑀦𑀺𑀢𑀩𑁆𑀩𑀁, 𑀫𑁂𑀢𑀩𑁆𑀩𑀁 𑀯𑀸. 𑀜𑀸 𑀅𑀯𑀩𑁄𑀥𑀦𑁂, 𑀅𑀜𑁆𑀜𑀸𑀬𑀺𑀢𑁆𑀣, 𑀜𑀸𑀬𑀢𑀺, 𑀜𑀸𑀬𑀺𑀲𑁆𑀲𑀢𑀻𑀢𑀺 𑀜𑁂𑀬𑁆𑀬𑀁, 𑀜𑀸𑀢𑀩𑁆𑀩𑀁, 𑀜𑀸𑀢𑁂𑀬𑁆𑀬𑀁. ‘‘𑀜𑀸𑀲𑁆𑀲 𑀚𑀸 𑀚𑀁 𑀦𑀸’’𑀢𑀺 𑀚𑀸𑀤𑁂𑀲𑁂 ‘‘𑀓𑀺𑀬𑀸𑀤𑀺𑀢𑁄 𑀦𑀸’’𑀢𑀺 𑀯𑀺𑀦𑀸𑀥𑀺𑀓𑀸𑀭𑀬𑁄𑀕𑀯𑀺𑀪𑀸𑀕𑁂𑀦 𑀦𑀸𑀧𑀘𑁆𑀘𑀬𑁄, 𑀇𑀓𑀸𑀭𑀸𑀕𑀫𑁄 𑀘, 𑀚𑀸𑀦𑀺𑀢𑀩𑁆𑀩𑀁, 𑀯𑀺𑀚𑀸𑀦𑀦𑀻𑀬𑀁. 𑀔𑁆𑀬𑀸𑀧𑀓𑀣𑀦𑁂, 𑀲𑀗𑁆𑀔𑁆𑀬𑀸𑀢𑀩𑁆𑀩𑀁, 𑀲𑀗𑁆𑀔𑁆𑀬𑁂𑀬𑁆𑀬𑀁 𑀇𑀘𑁆𑀘𑀸𑀤𑀺.

𑁫𑁫𑁭. 𑀓𑀭𑀫𑁆𑀳𑀸 𑀭𑀺𑀘𑁆𑀘.

𑀓𑀭𑀥𑀸𑀢𑀼𑀢𑁄 𑀭𑀺𑀘𑁆𑀘𑀧𑁆𑀧𑀘𑁆𑀘𑀬𑁄 𑀳𑁄𑀢𑀺 𑀪𑀸𑀯𑀓𑀫𑁆𑀫𑁂𑀲𑀼.

𑁫𑁫𑁮. 𑀭𑀫𑁆𑀳𑀺 𑀭𑀦𑁆𑀢𑁄 𑀭𑀸𑀤𑀺 𑀦𑁄.

𑀭𑀓𑀸𑀭𑀸𑀦𑀼𑀩𑀦𑁆𑀥𑁂 𑀧𑀘𑁆𑀘𑀬𑁂 𑀧𑀭𑁂 𑀲𑀩𑁆𑀩𑁄 𑀥𑀸𑀢𑁆𑀯𑀦𑁆𑀢𑁄 𑀭𑀸𑀤𑀺 𑀧𑀘𑁆𑀘𑀬𑀭𑀓𑀸𑀭𑀫𑀭𑀺𑀬𑀸𑀤𑁄 𑀦𑁄 𑀳𑁄𑀢𑀺, 𑀮𑁄𑀧𑀫𑀸𑀧𑀚𑁆𑀚𑀢𑁂𑀢𑀺 𑀅𑀢𑁆𑀣𑁄. 𑀭𑀦𑁆𑀢𑁄𑀢𑀺 𑀏𑀢𑁆𑀣 𑀭𑀓𑀸𑀭𑁄 𑀲𑀦𑁆𑀥𑀺𑀚𑁄, 𑀓𑀢𑁆𑀢𑀩𑁆𑀩𑀁 𑀓𑀺𑀘𑁆𑀘𑀁. ‘‘𑀭𑀺𑀘𑁆𑀘𑀸’’𑀢𑀺 𑀬𑁄𑀕𑀯𑀺𑀪𑀸𑀕𑁂𑀦 𑀪𑀭𑀸𑀤𑀺𑀢𑁄𑀧𑀺 𑀭𑀺𑀘𑁆𑀘𑀧𑁆𑀧𑀘𑁆𑀘𑀬𑁄, 𑀬𑀣𑀸, 𑀪𑀭𑀻𑀬𑀢𑀻𑀢𑀺 𑀪𑀘𑁆𑀘𑁄, 𑀲𑀭𑀮𑁄𑀧𑁄. 𑀇 𑀕𑀢𑀺𑀫𑁆𑀳𑀺, 𑀧𑀢𑀺 𑀏𑀢𑀩𑁆𑀩𑁄 𑀧𑀝𑀺𑀘𑁆𑀘𑁄.

𑁫𑁫𑁯. 𑀧𑁂𑀲𑀸𑀢𑀺𑀲𑀕𑁆𑀕𑀧𑀢𑁆𑀢𑀓𑀸𑀮𑁂𑀲𑀼 𑀓𑀺𑀘𑁆𑀘𑀸.

𑀧𑁂𑀲 𑀅𑀢𑀺𑀲𑀕𑁆𑀕 𑀧𑀢𑁆𑀢𑀓𑀸𑀮𑀇𑀘𑁆𑀘𑁂𑀢𑁂𑀲𑁆𑀯𑀢𑁆𑀣𑁂𑀲𑀼 𑀓𑀺𑀘𑁆𑀘𑀧𑁆𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀧𑁂𑀲𑀦𑀁 𑀦𑀸𑀫 ‘‘𑀓𑀢𑁆𑀢𑀩𑁆𑀩𑀫𑀺𑀤𑀁 𑀪𑀯𑀢𑀸’’𑀢𑀺 𑀆𑀡𑀸𑀧𑀦𑀁, 𑀅𑀚𑁆𑀛𑁂𑀲𑀦𑀜𑁆𑀘. 𑀅𑀢𑀺𑀲𑀕𑁆𑀕𑁄𑀦𑀸𑀫 ‘‘𑀓𑀺𑀫𑀺𑀤𑀁 𑀫𑀬𑀸 𑀓𑀢𑁆𑀢𑀩𑁆𑀩’’𑀦𑁆𑀢𑀺 𑀧𑀼𑀝𑁆𑀞𑀲𑁆𑀲 𑀯𑀸 ‘‘𑀧𑀸𑀡𑁄 𑀦 𑀳𑀦𑁆𑀢𑀩𑁆𑀩𑁄’’𑀢𑀺𑀆𑀤𑀺𑀦𑀸 𑀧𑀝𑀺𑀧𑀢𑁆𑀢𑀺𑀤𑀲𑁆𑀲𑀦𑀫𑀼𑀔𑁂𑀦 𑀯𑀸 𑀓𑀢𑁆𑀢𑀩𑁆𑀩𑀲𑁆𑀲 𑀅𑀦𑀼𑀜𑁆𑀜𑀸. 𑀧𑀢𑁆𑀢𑀓𑀸𑀮𑁄 𑀦𑀸𑀫 𑀲𑀫𑁆𑀧𑀢𑁆𑀢𑀲𑀫𑀬𑁄 𑀬𑁄 𑀅𑀢𑁆𑀢𑀦𑁄 𑀓𑀺𑀘𑁆𑀘𑀓𑀭𑀡𑀲𑀫𑀬𑀫𑀦𑀼𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀦 𑀓𑀭𑁄𑀢𑀺, 𑀢𑀲𑁆𑀲 𑀲𑀫𑀬𑀸𑀭𑁄𑀘𑀦𑀁, 𑀦 𑀢𑀢𑁆𑀣 𑀅𑀚𑁆𑀛𑁂𑀲𑀦𑀫𑀢𑁆𑀣𑀻𑀢𑀺. 𑀢𑁂 𑀘 ‘‘𑀪𑀸𑀯𑀓𑀫𑁆𑀫𑁂𑀲𑀼 𑀓𑀺𑀘𑁆𑀘𑀢𑁆𑀢𑀓𑁆𑀔𑀢𑁆𑀣𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀪𑀸𑀯𑀓𑀫𑁆𑀫𑁂𑀲𑁆𑀯𑁂𑀯 𑀪𑀯𑀦𑁆𑀢𑀺.

𑀧𑁂𑀲𑀦𑁂 𑀢𑀸𑀯 𑁋 𑀓𑀭𑀻𑀬𑀢𑀼 𑀪𑀯𑀢𑀸 𑀓𑀫𑁆𑀫𑀦𑁆𑀢𑀺 𑀅𑀢𑁆𑀣𑁂 𑀇𑀫𑀺𑀦𑀸 𑀢𑀩𑁆𑀩𑀸𑀦𑀻𑀬𑀸, 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯, 𑀓𑀢𑁆𑀢𑀩𑁆𑀩𑀁 𑀓𑀫𑁆𑀫𑀁 𑀪𑀯𑀢𑀸, 𑀓𑀭𑀡𑀻𑀬𑀁 𑀓𑀺𑀘𑁆𑀘𑀁 𑀪𑀯𑀢𑀸.

𑀅𑀢𑀺𑀲𑀕𑁆𑀕𑁂 𑀪𑀼𑀚𑁆𑀚𑀢𑀼 𑀪𑀯𑀢𑀸𑀢𑀺 𑀅𑀢𑁆𑀣𑁂 𑀢𑀩𑁆𑀩𑀸𑀤𑀺, ‘‘𑀅𑀜𑁆𑀜𑁂𑀲𑀼 𑀘𑀸’’𑀢𑀺 𑀯𑀼𑀤𑁆𑀥𑀺.

‘‘𑀢𑀲𑁆𑀲𑀸’’𑀢𑀺 𑀯𑀢𑁆𑀢𑀢𑁂.

𑁫𑁬𑁦. 𑀪𑀼𑀚𑀸𑀤𑀻𑀦𑀫𑀦𑁆𑀢𑁄 𑀦𑁄 𑀤𑁆𑀯𑀺 𑀘.

𑀪𑀼𑀚𑀇𑀘𑁆𑀘𑁂𑀯𑀫𑀸𑀤𑀻𑀦𑀁 𑀚𑀓𑀸𑀭𑀸𑀤𑀺𑀅𑀦𑁆𑀢𑀸𑀦𑀁 𑀥𑀸𑀢𑀽𑀦𑀫𑀦𑁆𑀢𑁄 𑀦𑁄 𑀳𑁄𑀢𑀺, 𑀧𑀭𑀲𑁆𑀲 𑀓𑀺𑀘𑁆𑀘𑀓𑀺𑀢𑀓𑀧𑁆𑀧𑀘𑁆𑀘𑀬𑀢𑀓𑀸𑀭𑀲𑁆𑀲 𑀘 𑀤𑁆𑀯𑁂𑀪𑀸𑀯𑁄 𑀳𑁄𑀢𑀺. 𑀪𑁄𑀢𑁆𑀢𑀩𑁆𑀩𑀁 𑀪𑁄𑀚𑀦𑀁 𑀪𑀯𑀢𑀸, 𑀪𑁄𑀚𑀦𑀻𑀬𑀁 𑀪𑁄𑀚𑁆𑀚𑀁 𑀪𑀯𑀢𑀸.

𑀇𑀓𑀸𑀭𑀸𑀕𑀫𑀬𑀼𑀢𑁆𑀢𑀢𑀓𑀸𑀭𑁂 𑀧𑀦 𑁋 ‘‘𑀦𑀫𑀓𑀭𑀸𑀦𑀫𑀦𑁆𑀢𑀸𑀦𑀁 𑀦𑀺𑀬𑀼𑀢𑁆𑀢𑀢𑀫𑁆𑀳𑀻’’𑀢𑀺 𑀏𑀢𑁆𑀣 ‘‘𑀅𑀦𑁆𑀢𑀸𑀦𑀁 𑀦𑀺𑀬𑀼𑀢𑁆𑀢𑀢𑀫𑁆𑀳𑀻’’𑀢𑀺 𑀬𑁄𑀕𑀯𑀺𑀪𑀸𑀕𑁂𑀦 𑀥𑀸𑀢𑁆𑀯𑀦𑁆𑀢𑀮𑁄𑀧𑀸𑀤𑀺𑀦𑀺𑀲𑁂𑀥𑁄, ‘‘𑀭𑀼𑀥𑀸𑀤𑀺𑀢𑁄 𑀦𑀺𑀕𑁆𑀕𑀳𑀻𑀢𑀧𑀼𑀩𑁆𑀩’’𑀦𑁆𑀢𑀺 𑀯𑀺𑀦𑀸𑀥𑀺𑀓𑀸𑀭𑀬𑁄𑀕𑀯𑀺𑀪𑀸𑀕𑁂𑀦, ‘‘𑀦𑀺𑀕𑁆𑀕𑀳𑀻𑀢𑀜𑁆𑀘𑀸’’𑀢𑀺 𑀯𑀸 𑀦𑀺𑀕𑁆𑀕𑀳𑀻𑀢𑀸𑀕𑀫𑁄, 𑀪𑀼𑀜𑁆𑀚𑀺𑀢𑀩𑁆𑀩𑀁 𑀢𑀬𑀸, 𑀬𑀼𑀜𑁆𑀚𑀺𑀢𑀩𑁆𑀩𑀁.

𑀲𑀫𑀬𑀸𑀭𑁄𑀘𑀦𑁂 𑀧𑀦 𑁋 𑀇 𑀅𑀚𑁆𑀛𑀬𑀦𑁂 𑀅𑀥𑀺𑀧𑀼𑀩𑁆𑀩𑁄, 𑀅𑀥𑀻𑀬𑀢𑀁 𑀪𑀯𑀢𑀸𑀢𑀺 𑀅𑀢𑁆𑀣𑁂 𑀢𑀩𑁆𑀩𑀸𑀦𑀻𑀬𑀸𑀤𑀺, 𑀇𑀓𑀸𑀭𑀸𑀕𑀫𑀯𑀼𑀤𑁆𑀥𑀺𑀅𑀬𑀸𑀤𑁂𑀲𑀅𑀚𑁆𑀛𑀸𑀤𑁂𑀲𑀸 𑀘, 𑀡𑁆𑀬𑀧𑁆𑀧𑀘𑁆𑀘𑀬𑁂 𑀢𑀼 𑀯𑀼𑀤𑁆𑀥𑀺, 𑀬𑀓𑀸𑀭𑀲𑁆𑀲 𑀤𑁆𑀯𑀺𑀢𑁆𑀢𑀜𑁆𑀘, 𑀅𑀚𑁆𑀛𑀬𑀺𑀢𑀩𑁆𑀩𑀁, 𑀅𑀚𑁆𑀛𑁂𑀬𑁆𑀬𑀁 𑀪𑀯𑀢𑀸, 𑀅𑀚𑁆𑀛𑀬𑀦𑀻𑀬𑀁 𑀪𑀯𑀢𑀸, 𑀅𑀯𑀲𑁆𑀲𑀁 𑀓𑀢𑁆𑀢𑀩𑁆𑀩𑀦𑁆𑀢𑀺 𑀯𑀸𑀓𑁆𑀬𑁂 𑀧𑀦 ‘‘𑀓𑀺𑀘𑁆𑀘𑀸’’𑀢𑀺 𑀅𑀥𑀺𑀓𑀺𑀘𑁆𑀘 ‘‘𑀅𑀯𑀲𑁆𑀲𑀓𑀸𑀥𑀫𑀺𑀡𑁂𑀲𑀼 𑀡𑀻 𑀘𑀸’’𑀢𑀺 𑀅𑀯𑀲𑁆𑀲𑀓𑀸𑀥𑀫𑀺𑀡𑀢𑁆𑀣𑁂 𑀘 𑀢𑀩𑁆𑀩𑀸𑀤𑀬𑁄, 𑀓𑀢𑁆𑀢𑀩𑁆𑀩𑀁 𑀫𑁂 𑀪𑀯𑀢𑀸 𑀕𑁂𑀳𑀁, 𑀓𑀭𑀡𑀻𑀬𑀁, 𑀓𑀸𑀭𑀺𑀬𑀁. 𑀏𑀯𑀁 𑀤𑀸𑀢𑀩𑁆𑀩𑀁 𑀫𑁂 𑀪𑀯𑀢𑀸 𑀲𑀢𑀁, 𑀤𑀸𑀦𑀻𑀬𑀁, 𑀤𑁂𑀬𑁆𑀬𑀁.

𑀥𑀭 𑀥𑀸𑀭𑀡𑁂, 𑀘𑀼𑀭𑀸𑀤𑀺𑀢𑁆𑀢𑀸 𑀡𑁂𑀡𑀬𑀸, 𑀯𑀼𑀤𑁆𑀥𑀺, 𑀇𑀓𑀸𑀭𑀸𑀕𑀫𑁄 𑀘, 𑀥𑀸𑀭𑁂𑀢𑀩𑁆𑀩𑀁, 𑀥𑀸𑀭𑀬𑀺𑀢𑀩𑁆𑀩𑀁 𑀇𑀘𑁆𑀘𑀸𑀤𑀺.

‘‘𑀦𑀼𑀤𑀸𑀤𑀻𑀳𑀺 𑀬𑀼𑀡𑁆𑀯𑀽𑀦𑀫𑀦𑀸𑀦𑀦𑀸𑀓𑀸𑀦𑀦𑀓𑀸 𑀲𑀓𑀸𑀭𑀺𑀢𑁂𑀳𑀺 𑀘𑀸’’𑀢𑀺 𑀲𑀓𑀸𑀭𑀺𑀢𑁂𑀳𑀺𑀧𑀺 𑀬𑀼𑀡𑁆𑀯𑀽𑀦𑀫𑀸𑀤𑁂𑀲𑀯𑀺𑀥𑀸𑀦𑀢𑁄𑀬𑁂𑀯 𑀥𑀸𑀢𑀼𑀧𑁆𑀧𑀘𑁆𑀘𑀬𑀦𑁆𑀢𑀢𑁄𑀧𑀺 𑀓𑀺𑀘𑁆𑀘𑀓𑀺𑀢𑀓𑀧𑁆𑀧𑀘𑁆𑀘𑀬𑀸 𑀪𑀯𑀦𑁆𑀢𑀻𑀢𑀺 𑀤𑀝𑁆𑀞𑀩𑁆𑀩𑁄. 𑀢𑁂𑀦 𑀢𑀺𑀢𑀺𑀓𑁆𑀔𑀸𑀧𑀻𑀬𑀢𑀻𑀢𑀺 𑀢𑀺𑀢𑀺𑀓𑁆𑀔𑀸𑀧𑁂𑀢𑀩𑁆𑀩𑁄. 𑀏𑀯𑀁 𑀢𑀺𑀓𑀺𑀘𑁆𑀙𑀸𑀧𑁂𑀢𑀩𑁆𑀩𑁄 𑀢𑀺𑀓𑀺𑀘𑁆𑀙𑀸𑀧𑀦𑀻𑀬𑁄. 𑀅𑀪𑀸𑀯𑀻𑀬𑀺𑀢𑁆𑀣, 𑀪𑀸𑀯𑀻𑀬𑀢𑀺, 𑀪𑀸𑀯𑀻𑀬𑀺𑀲𑁆𑀲𑀢𑀻𑀢𑀺 𑀪𑀸𑀯𑁂𑀢𑀩𑁆𑀩𑁄 𑀫𑀕𑁆𑀕𑁄. 𑀪𑀸𑀯𑀬𑀺𑀢𑀩𑁆𑀩𑁄, 𑀪𑀸𑀯𑀦𑀻𑀬𑁄, 𑀪𑀸𑀯𑀦𑀻𑀬𑀁, 𑀪𑀸𑀯𑀦𑀻𑀬𑀸, 𑀅𑀓𑀸𑀭𑀻𑀬𑀺𑀢𑁆𑀣, 𑀓𑀸𑀭𑀻𑀬𑀢𑀺, 𑀓𑀸𑀭𑀻𑀬𑀺𑀲𑁆𑀲𑀢𑀻𑀢𑀺 𑀓𑀸𑀭𑁂𑀢𑀩𑁆𑀩𑀁, 𑀓𑀸𑀭𑀬𑀺𑀢𑀩𑁆𑀩𑀁, 𑀓𑀸𑀭𑀸𑀧𑁂𑀢𑀩𑁆𑀩𑀁, 𑀓𑀸𑀭𑀸𑀧𑀬𑀺𑀢𑀩𑁆𑀩𑀁, 𑀓𑀸𑀭𑀸𑀧𑀦𑀻𑀬𑀫𑀺𑀘𑁆𑀘𑀸𑀤𑀺 𑀘 𑀲𑀺𑀤𑁆𑀥𑀁 𑀪𑀯𑀢𑀺.

𑀓𑀢𑁆𑀢𑀩𑁆𑀩𑀁 𑀓𑀭𑀡𑀻𑀬𑀜𑁆𑀘, 𑀓𑀸𑀭𑀺𑀬𑀁 𑀓𑀺𑀘𑁆𑀘𑀫𑀺𑀘𑁆𑀘𑀧𑀺;

𑀓𑀸𑀭𑁂𑀢𑀩𑁆𑀩𑀁 𑀢𑀣𑀸 𑀓𑀸𑀭𑀸-𑀧𑁂𑀢𑀩𑁆𑀩𑀁 𑀓𑀺𑀘𑁆𑀘𑀲𑀗𑁆𑀕𑀳𑁄.

𑀓𑀺𑀘𑁆𑀘𑀧𑁆𑀧𑀘𑁆𑀘𑀬𑀦𑁆𑀢𑀦𑀬𑁄.

𑀢𑁂𑀓𑀸𑀮𑀺𑀓

𑀓𑀺𑀢𑀓𑀧𑁆𑀧𑀘𑁆𑀘𑀬𑀦𑁆𑀢𑀦𑀬

𑀇𑀤𑀸𑀦𑀺 𑀓𑀺𑀢𑀓𑀧𑁆𑀧𑀘𑁆𑀘𑀬𑀸 𑀯𑀼𑀘𑁆𑀘𑀦𑁆𑀢𑁂.

𑀓𑀭 𑀓𑀭𑀡𑁂, 𑀧𑀼𑀭𑁂 𑀯𑀺𑀬 𑀥𑀸𑀢𑀼𑀲𑀜𑁆𑀜𑀸𑀤𑀺.

𑀓𑀼𑀫𑁆𑀪𑀇𑀘𑁆𑀘𑀼𑀧𑀧𑀤𑀁, 𑀢𑀢𑁄 𑀤𑀼𑀢𑀺𑀬𑀸.

‘‘𑀓𑀼𑀫𑁆𑀪𑀁 𑀓𑀭𑁄𑀢𑀺, 𑀅𑀓𑀸𑀲𑀺, 𑀓𑀭𑀺𑀲𑁆𑀲𑀢𑀻’’𑀢𑀺 𑀯𑀸 𑀯𑀺𑀕𑁆𑀕𑀳𑁂 𑁋

‘‘𑀧𑀭𑀸, 𑀧𑀘𑁆𑀘𑀬𑀸’’𑀢𑀺 𑀘 𑀯𑀢𑁆𑀢𑀢𑁂.

𑁫𑁬𑁧. 𑀥𑀸𑀢𑀼𑀬𑀸 𑀓𑀫𑁆𑀫𑀸𑀤𑀺𑀫𑁆𑀳𑀺 𑀡𑁄.

𑀓𑀫𑁆𑀫𑀲𑁆𑀫𑀺𑀁 𑀆𑀤𑀺𑀫𑁆𑀳𑀺 𑀲𑀢𑀺 𑀥𑀸𑀢𑀼𑀬𑀸 𑀧𑀭𑁄 𑀡𑀧𑁆𑀧𑀘𑁆𑀘𑀬𑁄 𑀳𑁄𑀢𑀺.

𑀲𑁄 𑀘 𑁋

𑁫𑁬𑁨. 𑀅𑀜𑁆𑀜𑁂 𑀓𑀺𑀢.

𑀢𑀢𑀺𑀬𑁂 𑀥𑀸𑀢𑁆𑀯𑀸𑀥𑀺𑀓𑀸𑀭𑁂 𑀯𑀺𑀳𑀺𑀢𑀸 𑀓𑀺𑀘𑁆𑀘𑁂𑀳𑀺 𑀅𑀜𑁆𑀜𑁂 𑀧𑀘𑁆𑀘𑀬𑀸 𑀓𑀺𑀢𑀺𑀘𑁆𑀘𑁂𑀯 𑀲𑀜𑁆𑀜𑀸 𑀳𑁄𑀦𑁆𑀢𑀻𑀢𑀺 𑀓𑀺𑀢𑀲𑀜𑁆𑀜𑀸 𑀓𑀢𑀸.

𑁫𑁬𑁩. 𑀓𑀢𑁆𑀢𑀭𑀺 𑀓𑀺𑀢.

𑀓𑀢𑁆𑀢𑀭𑀺 𑀓𑀸𑀭𑀓𑁂 𑀓𑀺𑀢𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀦𑀺𑀬𑀫𑀢𑁄 𑀓𑀢𑁆𑀢𑀭𑀺 𑀪𑀯𑀢𑀺, 𑀲𑁄 𑀘 ‘‘𑀡𑀸𑀤𑀬𑁄 𑀢𑁂𑀓𑀸𑀮𑀺𑀓𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀓𑀸𑀮𑀢𑁆𑀢𑀬𑁂 𑀘 𑀳𑁄𑀢𑀺. 𑀧𑀼𑀭𑁂 𑀯𑀺𑀬 𑀓𑀸𑀭𑀺𑀢𑀩𑁆𑀬𑀧𑀤𑁂𑀲𑀡𑀮𑁄𑀧𑀯𑀼𑀤𑁆𑀥𑀺𑀬𑁄, 𑀧𑀘𑁆𑀘𑀬𑀦𑁆𑀢𑀲𑁆𑀲𑀸𑀮𑀺𑀗𑁆𑀕𑀢𑁆𑀢𑀸 𑀲𑁆𑀬𑀸𑀤𑀺𑀫𑁆𑀳𑀺 𑀅𑀲𑀫𑁆𑀧𑀢𑁆𑀢𑁂 ‘‘𑀢𑀤𑁆𑀥𑀺𑀢𑀲𑀫𑀸𑀲𑀓𑀺𑀢𑀓𑀸 𑀦𑀸𑀫𑀁𑀯𑀸𑀢𑀯𑁂𑀢𑀼𑀦𑀸𑀤𑀻𑀲𑀼 𑀘𑀸’’𑀢𑀺 𑀓𑀺𑀢𑀓𑀦𑁆𑀢𑀢𑁆𑀢𑀸 𑀦𑀸𑀫𑀁𑀯 𑀓𑀢𑁂 𑀲𑁆𑀬𑀸𑀤𑁆𑀬𑀼𑀧𑁆𑀧𑀢𑁆𑀢𑀺, 𑀢𑀢𑁄 𑀓𑀼𑀫𑁆𑀪𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁂 ‘‘𑀅𑀫𑀸𑀤𑀬𑁄 𑀧𑀭𑀧𑀤𑁂𑀪𑀻’’𑀢𑀺 𑀤𑀼𑀢𑀺𑀬𑀸𑀢𑀧𑁆𑀧𑀼𑀭𑀺𑀲𑀲𑀫𑀸𑀲𑁄, ‘‘𑀦𑀸𑀫𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀲𑀫𑀸𑀲𑀲𑀜𑁆𑀜𑀸, ‘‘𑀢𑁂𑀲𑀁 𑀯𑀺𑀪𑀢𑁆𑀢𑀺𑀬𑁄 𑀮𑁄𑀧𑀸 𑀘𑀸’’𑀢𑀺 𑀯𑀺𑀪𑀢𑁆𑀢𑀺𑀮𑁄𑀧𑁄, ‘‘𑀧𑀓𑀢𑀺 𑀘𑀲𑁆𑀲 𑀲𑀭𑀦𑁆𑀢𑀲𑁆𑀲𑀸’’𑀢𑀺 𑀧𑀓𑀢𑀺𑀪𑀸𑀯𑁄, 𑀧𑀼𑀦 𑀲𑀫𑀸𑀲𑀢𑁆𑀢𑀸 𑀦𑀸𑀫𑀫𑀺𑀯 𑀓𑀢𑁂 𑀲𑁆𑀬𑀸𑀤𑁆𑀬𑀼𑀧𑁆𑀧𑀢𑁆𑀢𑀺.

𑀲𑁄 𑀓𑀼𑀫𑁆𑀪𑀓𑀸𑀭𑁄, 𑀢𑁂 𑀓𑀼𑀫𑁆𑀪𑀓𑀸𑀭𑀸 𑀇𑀘𑁆𑀘𑀸𑀤𑀺. 𑀇𑀢𑁆𑀣𑀺𑀬𑀁 𑀓𑀼𑀫𑁆𑀪𑀓𑀸𑀭𑀻, 𑀓𑀼𑀫𑁆𑀪𑀓𑀸𑀭𑀺𑀬𑁄 𑀇𑀘𑁆𑀘𑀸𑀤𑀺, 𑀢𑀣𑀸 𑀓𑀫𑁆𑀫𑀁 𑀓𑀭𑁄𑀢𑀻𑀢𑀺 𑀓𑀫𑁆𑀫𑀓𑀸𑀭𑁄. 𑀏𑀯𑀁 𑀫𑀸𑀮𑀸𑀓𑀸𑀭𑁄, 𑀓𑀝𑁆𑀞𑀓𑀸𑀭𑁄, 𑀭𑀣𑀓𑀸𑀭𑁄, 𑀲𑀼𑀯𑀡𑁆𑀡𑀓𑀸𑀭𑁄, 𑀲𑀼𑀢𑁆𑀢𑀓𑀸𑀭𑁄, 𑀯𑀼𑀢𑁆𑀢𑀺𑀓𑀸𑀭𑁄, 𑀝𑀻𑀓𑀸𑀓𑀸𑀭𑁄.

𑀕𑀳 𑀉𑀧𑀸𑀤𑀸𑀦𑁂, 𑀧𑀢𑁆𑀢𑀁 𑀅𑀕𑀡𑁆𑀳𑀺, 𑀕𑀡𑁆𑀳𑀸𑀢𑀺, 𑀕𑀡𑁆𑀳𑀺𑀲𑁆𑀲𑀢𑀻𑀢𑀺 𑀯𑀸 𑀧𑀢𑁆𑀢𑀕𑁆𑀕𑀸𑀳𑁄. 𑀏𑀯𑀁 𑀭𑀲𑁆𑀫𑀺𑀕𑁆𑀕𑀸𑀳𑁄, 𑀭𑀚𑁆𑀚𑀼𑀕𑁆𑀕𑀸𑀳𑁄.

𑀯𑁂 𑀢𑀦𑁆𑀢𑀲𑀦𑁆𑀢𑀸𑀦𑁂, 𑀢𑀦𑁆𑀢𑀁 𑀅𑀯𑀸𑀬𑀺, 𑀯𑀸𑀬𑀢𑀺, 𑀯𑀸𑀬𑀺𑀲𑁆𑀲𑀢𑀻𑀢𑀺 𑀯𑀸 𑀢𑀦𑁆𑀢𑀯𑀸𑀬𑁄, ‘‘𑀢𑁂 𑀆𑀯𑀸𑀬𑀸 𑀓𑀸𑀭𑀺𑀢𑁂’’𑀢𑀺 𑀆𑀬𑀸𑀤𑁂𑀲𑁄, 𑀯𑀸𑀓𑁆𑀬𑁂 𑀧𑀦𑁂𑀢𑁆𑀣 ‘‘𑀢𑁂 𑀆𑀯𑀸𑀬𑀸’’𑀢𑀺 𑀬𑁄𑀕𑀯𑀺𑀪𑀸𑀕𑁂𑀦 𑀆𑀬𑀸𑀤𑁂𑀲𑁄. 𑀏𑀯𑀁 𑀢𑀼𑀦𑁆𑀦𑀯𑀸𑀬𑁄.

𑀫𑀸 𑀧𑀭𑀺𑀫𑀸𑀡𑁂, 𑀥𑀜𑁆𑀜𑀁 𑀅𑀫𑀺𑀦𑀺, 𑀫𑀺𑀦𑀸𑀢𑀺, 𑀫𑀺𑀦𑀺𑀲𑁆𑀲𑀢𑀻𑀢𑀺 𑀯𑀸 𑀅𑀢𑁆𑀣𑁂 𑀡𑀧𑁆𑀧𑀘𑁆𑀘𑀬𑁂 𑀓𑀢𑁂 𑁋

‘‘𑀡𑀫𑁆𑀳𑀻’’𑀢𑀺 𑀯𑀢𑁆𑀢𑀢𑁂.

𑁫𑁬𑁪. 𑀆𑀓𑀸𑀭𑀦𑁆𑀢𑀸𑀦𑀫𑀸𑀬𑁄.

𑀆𑀓𑀸𑀭𑀦𑁆𑀢𑀸𑀦𑀁 𑀥𑀸𑀢𑀽𑀦𑀁 𑀅𑀦𑁆𑀢𑀲𑁆𑀲 𑀆𑀬𑀸𑀤𑁂𑀲𑁄 𑀳𑁄𑀢𑀺 𑀡𑀓𑀸𑀭𑀸𑀦𑀼𑀩𑀦𑁆𑀥𑁂 𑀧𑀘𑁆𑀘𑀬𑁂 𑀧𑀭𑁂, 𑀲𑀭𑀮𑁄𑀧𑀸𑀤𑀺. 𑀥𑀜𑁆𑀜𑀫𑀸𑀬𑁄. 𑀏𑀯𑀁 𑀤𑀸𑀦𑀁 𑀤𑀤𑀸𑀢𑀻𑀢𑀺 𑀤𑀸𑀦𑀤𑀸𑀬𑁄.

𑀓𑀫𑀼 𑀓𑀦𑁆𑀢𑀺𑀫𑁆𑀳𑀺, 𑀥𑀫𑁆𑀫𑀁 𑀅𑀓𑀸𑀫𑀬𑀺, 𑀓𑀸𑀫𑀬𑀢𑀺, 𑀓𑀸𑀫𑀬𑀺𑀲𑁆𑀲𑀢𑀻𑀢𑀺 𑀯𑀸 𑀥𑀫𑁆𑀫𑀓𑀸𑀫𑁄 𑀧𑀼𑀭𑀺𑀲𑁄, 𑀥𑀫𑁆𑀫𑀓𑀸𑀫𑀸 𑀓𑀜𑁆𑀜𑀸, 𑀥𑀫𑁆𑀫𑀓𑀸𑀫𑀁 𑀘𑀺𑀢𑁆𑀢𑀁. 𑀏𑀯𑀁 𑀅𑀢𑁆𑀣𑀓𑀸𑀫𑁄, 𑀳𑀺𑀢𑀓𑀸𑀫𑁄, 𑀲𑀼𑀔𑀓𑀸𑀫𑁄, 𑀥𑀫𑁆𑀫𑀁 𑀧𑀸𑀮𑁂𑀢𑀻𑀢𑀺 𑀥𑀫𑁆𑀫𑀧𑀸𑀮𑁄 𑀇𑀘𑁆𑀘𑀸𑀤𑀺.

𑀤𑀫𑀼 𑀤𑀫𑀦𑁂, ‘‘𑀅𑀭𑀺𑀁 𑀅𑀤𑀫𑀺, 𑀤𑀫𑁂𑀢𑀺, 𑀤𑀫𑀺𑀲𑁆𑀲𑀢𑀻’’𑀢𑀺 𑀯𑀺𑀕𑁆𑀕𑀳𑁂 ‘‘𑀥𑀸𑀢𑀼𑀬𑀸’’𑀢𑀺 𑀅𑀥𑀺𑀓𑀸𑀭𑁄, ‘‘𑀓𑀫𑁆𑀫𑀸𑀤𑀺𑀫𑁆𑀳𑀻’’𑀢𑀺 𑀘 𑀯𑀢𑁆𑀢𑀢𑁂.

𑁫𑁬𑁫. 𑀲𑀜𑁆𑀜𑀸𑀬𑀫𑀦𑀼.

𑀓𑀫𑁆𑀫𑀽𑀧𑀧𑀤𑁂 𑀆𑀤𑀺𑀫𑁆𑀳𑀺 𑀲𑀢𑀺 𑀲𑀜𑁆𑀜𑀸𑀬𑀁 𑀕𑀫𑁆𑀬𑀫𑀸𑀦𑀸𑀬𑀁 𑀥𑀸𑀢𑀼𑀬𑀸 𑀅𑀧𑁆𑀧𑀘𑁆𑀘𑀬𑁄 𑀳𑁄𑀢𑀺, 𑀉𑀧𑀧𑀤𑀦𑁆𑀢𑁂 𑀦𑀼𑀓𑀸𑀭𑀸𑀕𑀫𑁄 𑀘. 𑀏𑀢𑁆𑀣 𑀘 ‘‘𑀦𑀼 𑀦𑀺𑀕𑁆𑀕𑀳𑀻𑀢𑀁 𑀧𑀤𑀦𑁆𑀢𑁂’’𑀢𑀺 𑀲𑀼𑀢𑁆𑀢𑁂 ‘‘𑀧𑀤𑀦𑁆𑀢𑁂’’𑀢𑀺 𑀯𑀘𑀦𑀢𑁄 𑀉𑀧𑀧𑀤𑀦𑁆𑀢𑁂𑀬𑁂𑀯 𑀦𑀼𑀓𑀸𑀭𑀸𑀕𑀫𑁄 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀢𑁂𑀲𑀼 𑀯𑀼𑀤𑁆𑀥𑀻’’𑀢𑀺𑀆𑀤𑀺𑀦𑀸 𑀉𑀓𑀸𑀭𑀮𑁄𑀧𑁄. 𑀅𑀬𑀁 𑀧𑀦 𑀦𑁆𑀯𑀸𑀕𑀫𑁄 𑀲𑀫𑀸𑀲𑀁 𑀓𑀢𑁆𑀯𑀸 𑀉𑀧𑀧𑀤𑀯𑀺𑀪𑀢𑁆𑀢𑀺𑀮𑁄𑀧𑁂 𑀓𑀢𑁂𑀬𑁂𑀯 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁫𑁬𑁬. 𑀦𑀼 𑀦𑀺𑀕𑁆𑀕𑀳𑀻𑀢𑀁 𑀧𑀤𑀦𑁆𑀢𑁂.

𑀉𑀧𑀧𑀤𑀪𑀽𑀢𑀦𑀸𑀫𑀧𑀤𑀦𑁆𑀢𑁂 𑀯𑀢𑁆𑀢𑀫𑀸𑀦𑁄 𑀦𑀼𑀓𑀸𑀭𑀸𑀕𑀫𑁄 𑀦𑀺𑀕𑁆𑀕𑀳𑀻𑀢𑀫𑀸𑀧𑀚𑁆𑀚𑀢𑁂, 𑀦𑀺𑀕𑁆𑀕𑀳𑀻𑀢𑀲𑁆𑀲 𑀯𑀕𑁆𑀕𑀦𑁆𑀢𑀢𑁆𑀢𑀁, 𑀲𑁂𑀲𑀁 𑀲𑀫𑀁, 𑀯𑀼𑀤𑁆𑀥𑀸𑀪𑀸𑀯𑁄𑀯 𑀯𑀺𑀲𑁂𑀲𑁄, 𑀅𑀭𑀺𑀦𑁆𑀤𑀫𑁄 𑀭𑀸𑀚𑀸.

𑀢𑀣𑀸 𑀢𑀭 𑀢𑀭𑀡𑁂, 𑀯𑁂𑀲𑁆𑀲𑀁 𑀢𑀭𑀢𑀻𑀢𑀺 𑀯𑁂𑀲𑁆𑀲𑀦𑁆𑀢𑀭𑁄, 𑀢𑀡𑁆𑀳𑀁 𑀓𑀭𑁄𑀢𑀺 𑀳𑀺𑀁𑀲𑀢𑀻𑀢𑀺 𑀢𑀡𑁆𑀳𑀗𑁆𑀓𑀭𑁄 𑀪𑀕𑀯𑀸. 𑀏𑀯𑀁 𑀫𑁂𑀥𑀗𑁆𑀓𑀭𑁄, 𑀲𑀭𑀡𑀗𑁆𑀓𑀭𑁄, 𑀤𑀻𑀧𑀗𑁆𑀓𑀭𑁄.

‘‘𑀆𑀤𑀺𑀫𑁆𑀳𑀺, 𑀅’’𑀇𑀢𑀺 𑀘 𑀯𑀢𑁆𑀢𑀢𑁂.

𑁫𑁬𑁭. 𑀧𑀼𑀭𑁂 𑀤𑀤𑀸 𑀘 𑀇𑀁.

𑀧𑀼𑀭𑀲𑀤𑁆𑀤𑁂 𑀆𑀤𑀺𑀫𑁆𑀳𑀺 𑀲𑀢𑀺 ‘‘𑀤𑀤 𑀤𑀸𑀦𑁂’’𑀇𑀘𑁆𑀘𑁂𑀢𑀸𑀬 𑀥𑀸𑀢𑀼𑀬𑀸 𑀅𑀧𑁆𑀧𑀘𑁆𑀘𑀬𑁄 𑀳𑁄𑀢𑀺, 𑀧𑀼𑀭𑀲𑀤𑁆𑀤𑁂 𑀅𑀓𑀸𑀭𑀲𑁆𑀲 𑀇𑀜𑁆𑀘 𑀳𑁄𑀢𑀺. 𑀏𑀢𑁆𑀣 𑀘 ‘‘𑀢𑀤𑀦𑀼𑀧𑀭𑁄𑀥𑁂𑀦𑀸’’𑀢𑀺 𑀧𑀭𑀺𑀪𑀸𑀲𑀢𑁄 𑀧𑀼𑀭𑀲𑀤𑁆𑀤𑀦𑁆𑀢𑀲𑁆𑀲𑁂𑀯 𑀇𑀁 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀡𑀸𑀤𑀻𑀦𑀁 𑀢𑁂𑀓𑀸𑀮𑀺𑀓𑀢𑁆𑀢𑁂𑀧𑀺 𑀉𑀧𑀧𑀤𑀢𑁆𑀣𑀯𑀺𑀲𑁂𑀲𑁂𑀦 𑀅𑀢𑀻𑀢𑁂𑀬𑁂𑀯𑀸𑀬𑀫𑀧𑁆𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀼𑀭𑁂 𑀤𑀸𑀦𑀁 𑀅𑀤𑀤𑀻𑀢𑀺 𑀧𑀼𑀭𑀺𑀦𑁆𑀤𑀤𑁄 𑀲𑀓𑁆𑀓𑁄. 𑀇𑀥𑀸𑀧𑀺 𑀯𑀺𑀪𑀢𑁆𑀢𑀺𑀮𑁄𑀧𑁂 𑀓𑀢𑁂𑀬𑁂𑀯 𑀇𑀁𑀆𑀤𑁂𑀲𑁄.

‘‘𑀓𑀫𑁆𑀫𑀸𑀤𑀺𑀫𑁆𑀳𑀺, 𑀅’’𑀇𑀢𑀺 𑀘 𑀯𑀢𑁆𑀢𑀢𑁂.

𑁫𑁬𑁮. 𑀲𑀩𑁆𑀩𑀢𑁄 𑀡𑁆𑀯𑀼 𑀢𑁆𑀯𑀸𑀯𑀻 𑀯𑀸.

𑀲𑀩𑁆𑀩𑀢𑁄 𑀥𑀸𑀢𑀼𑀢𑁄 𑀓𑀫𑁆𑀫𑀸𑀤𑀺𑀫𑁆𑀳𑀺 𑀯𑀸 𑀅𑀓𑀫𑁆𑀫𑀸𑀤𑀺𑀫𑁆𑀳𑀺 𑀯𑀸 𑀲𑀢𑀺 𑀅 𑀡𑁆𑀯𑀼 𑀢𑀼 𑀆𑀯𑀻 𑀇𑀘𑁆𑀘𑁂𑀢𑁂 𑀘𑀢𑁆𑀢𑀸𑀭𑁄 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀯𑀸𑀕𑁆𑀕𑀳𑀡𑀁 ‘‘𑀅𑀓𑀫𑁆𑀫𑀸𑀤𑀺𑀫𑁆𑀳𑀺 𑀯𑀸’’𑀢𑀺 𑀯𑀺𑀓𑀧𑁆𑀧𑀦𑀢𑁆𑀣𑀁.

𑀅𑀧𑁆𑀧𑀘𑁆𑀘𑀬𑁂 𑀢𑀸𑀯 𑁋 𑀥𑀭 𑀥𑀸𑀭𑀡𑁂, 𑀥𑀫𑁆𑀫𑀁 𑀅𑀥𑀭𑀺, 𑀥𑀭𑀢𑀺, 𑀥𑀭𑀺𑀲𑁆𑀲𑀢𑀻𑀢𑀺 𑀯𑀸 𑀥𑀫𑁆𑀫𑀥𑀭𑁄. 𑀏𑀯𑀁 𑀯𑀺𑀦𑀬𑀥𑀭𑁄. 𑀢𑀣𑀸 𑀢𑀁 𑀓𑀭𑁄𑀢𑀻𑀢𑀺 𑀢𑀓𑁆𑀓𑀭𑁄, 𑀤𑁆𑀯𑀺𑀢𑁆𑀢𑀁. 𑀏𑀯𑀁 𑀳𑀺𑀢𑀓𑀭𑁄, 𑀤𑀺𑀯𑀲𑀓𑀭𑁄, 𑀤𑀺𑀦𑀓𑀭𑁄, 𑀤𑀺𑀯𑀸𑀓𑀭𑁄, 𑀦𑀺𑀲𑀸𑀓𑀭𑁄, 𑀥𑀦𑀼𑀁 𑀕𑀡𑁆𑀳𑀸𑀢𑀻𑀢𑀺 𑀥𑀦𑀼𑀕𑁆𑀕𑀳𑁄. 𑀏𑀯𑀁 𑀓𑀝𑀕𑁆𑀕𑀳𑁄, 𑀲𑀩𑁆𑀩𑀓𑀸𑀫𑀁 𑀤𑀤𑀸𑀢𑀻𑀢𑀺 𑀲𑀩𑁆𑀩𑀓𑀸𑀫𑀤𑀤𑁄, 𑀲𑀩𑁆𑀩𑀤𑀤𑁄.

𑀆𑀢𑁄 𑀧𑀦 𑁋 𑀅𑀦𑁆𑀦𑀁 𑀅𑀤𑀸𑀲𑀺, 𑀤𑀤𑀸𑀢𑀺, 𑀤𑀤𑀺𑀲𑁆𑀲𑀢𑀻𑀢𑀺 𑀅𑀦𑁆𑀦𑀤𑁄. 𑀏𑀯𑀁 𑀥𑀦𑀤𑁄, 𑀲𑀘𑁆𑀘𑀁 𑀲𑀦𑁆𑀤𑀳𑀢𑀻𑀢𑀺 𑀲𑀘𑁆𑀘𑀲𑀦𑁆𑀥𑁄. 𑀧𑀸 𑀧𑀸𑀦𑁂, 𑀫𑀚𑁆𑀚𑀁 𑀧𑀺𑀯𑀢𑀻𑀢𑀺 𑀫𑀚𑁆𑀚𑀧𑁄. 𑀢𑀸 𑀧𑀸𑀮𑀦𑁂, 𑀕𑀯𑀁 𑀲𑀤𑁆𑀤𑀁 𑀢𑀸𑀬𑀢𑀻𑀢𑀺 𑀕𑁄𑀢𑁆𑀢𑀁. 𑀏𑀯𑀁 𑀓𑀢𑁆𑀢𑀭𑀺.

𑀅𑀓𑀫𑁆𑀫𑀸𑀤𑀺𑀫𑁆𑀳𑀺 𑀧𑀦 ‘‘𑀬𑀲𑁆𑀫𑀸 𑀤𑀧𑁂𑀢𑀻’’𑀢𑀺 𑀲𑀼𑀢𑁆𑀢𑁂 𑀪𑀬𑀕𑁆𑀕𑀳𑀡𑁂𑀦 𑀲𑁂𑀲𑀲𑀸𑀥𑀦𑁂𑀧𑀺 𑀅𑀧𑁆𑀧𑀘𑁆𑀘𑀬𑁄.

𑀦𑀻 𑀧𑀸𑀧𑀼𑀡𑀦𑁂 𑀯𑀺𑀧𑀼𑀩𑁆𑀩𑁄, 𑀯𑀺𑀦𑁂𑀲𑀺, 𑀯𑀺𑀦𑁂𑀢𑀺, 𑀯𑀺𑀦𑁂𑀲𑁆𑀲𑀢𑀺 𑀏𑀢𑁂𑀦, 𑀏𑀢𑁆𑀣𑀸𑀢𑀺 𑀯𑀸 𑀯𑀺𑀦𑀬𑁄, ‘‘𑀅𑀜𑁆𑀜𑁂𑀲𑀼 𑀘𑀸’’𑀢𑀺 𑀯𑀼𑀤𑁆𑀥𑀺, 𑀅𑀬𑀸𑀤𑁂𑀲𑁄 𑀘, 𑀦𑀬𑀦𑀁 𑀦𑀬𑁄. 𑀲𑀺 𑀲𑁂𑀯𑀸𑀬𑀁 𑀦𑀺𑀧𑀼𑀩𑁆𑀩𑁄, 𑀦𑀺𑀲𑁆𑀲𑀻𑀬𑀺𑀢𑁆𑀣, 𑀦𑀺𑀲𑁆𑀲𑀻𑀬𑀢𑀺, 𑀦𑀺𑀲𑁆𑀲𑀻𑀬𑀺𑀲𑁆𑀲𑀢𑀻𑀢𑀺 𑀯𑀸 𑀦𑀺𑀲𑁆𑀲𑀬𑁄. 𑀲𑀺 𑀲𑀬𑁂, 𑀅𑀦𑀼𑀲𑀬𑀺, 𑀅𑀦𑀼𑀲𑁂𑀢𑀺, 𑀅𑀦𑀼𑀲𑁂𑀲𑁆𑀲𑀢𑀻𑀢𑀺 𑀯𑀸 𑀅𑀦𑀼𑀲𑀬𑁄.

𑀇 𑀕𑀢𑀺𑀫𑁆𑀳𑀺 𑀧𑀢𑀺𑀧𑀼𑀩𑁆𑀩𑁄, 𑀧𑀝𑀺𑀘𑁆𑀘 𑀏𑀓𑀲𑁆𑀫𑀸 𑀨𑀮𑀫𑁂𑀢𑀻𑀢𑀺 𑀧𑀘𑁆𑀘𑀬𑁄, 𑀲𑀫𑀼𑀤𑀬𑁄. 𑀘𑀺 𑀘𑀬𑁂, 𑀯𑀺𑀦𑀺𑀘𑁆𑀙𑀻𑀬𑀢𑁂 𑀅𑀦𑁂𑀦, 𑀯𑀺𑀦𑀺𑀘𑁆𑀙𑀬𑀦𑀁 𑀯𑀸 𑀯𑀺𑀦𑀺𑀘𑁆𑀙𑀬𑁄, 𑀉𑀘𑁆𑀘𑀬𑀦𑀁 𑀉𑀘𑁆𑀘𑀬𑁄, 𑀲𑀜𑁆𑀘𑀬𑁄, 𑀥𑀫𑁆𑀫𑀁 𑀯𑀺𑀘𑀺𑀦𑀸𑀢𑀻𑀢𑀺 𑀥𑀫𑁆𑀫𑀯𑀺𑀘𑀬𑁄. 𑀔𑀻 𑀔𑀬𑁂, 𑀔𑀬𑀦𑀁 𑀔𑀬𑁄. 𑀚𑀺 𑀚𑀬𑁂, 𑀯𑀺𑀚𑀬𑀦𑀁 𑀯𑀺𑀚𑀬𑁄, 𑀚𑀬𑁄. 𑀓𑀻 𑀤𑀩𑁆𑀩𑀯𑀺𑀦𑀺𑀫𑀬𑁂, 𑀯𑀺𑀓𑁆𑀓𑀬𑀦𑀁 𑀯𑀺𑀓𑁆𑀓𑀬𑁄, 𑀓𑀬𑁄. 𑀮𑀻 𑀲𑀺𑀮𑁂𑀲𑀦𑁂, 𑀅𑀮𑁆𑀮𑀻𑀬𑀢𑀺 𑀏𑀢𑁆𑀣𑀸𑀢𑀺 𑀆𑀮𑀬𑁄, 𑀮𑀬𑁄. 𑀏𑀯𑀁 𑀇𑀯𑀡𑁆𑀡𑀦𑁆𑀢𑀢𑁄.

𑀆𑀲𑀼𑀡𑀦𑁆𑀢𑀻𑀢𑀺 𑀅𑀲𑁆𑀲𑀯𑀸, 𑀅𑀯𑀸𑀤𑁂𑀲𑁄, 𑀧𑀝𑀺𑀲𑁆𑀲𑀯𑀦𑀁 𑀧𑀝𑀺𑀲𑁆𑀲𑀯𑁄. 𑀲𑀼 𑀕𑀢𑀺𑀫𑁆𑀳𑀺, 𑀆𑀪𑀯𑀕𑁆𑀕𑀸 𑀲𑀯𑀦𑁆𑀢𑀻𑀢𑀺 𑀆𑀲𑀯𑀸. 𑀭𑀼 𑀲𑀤𑁆𑀤𑁂, 𑀭𑀯𑀢𑀻𑀢𑀺 𑀭𑀯𑁄. 𑀪𑀯𑀢𑀻𑀢𑀺 𑀪𑀯𑁄. 𑀧𑀪𑀯𑀢𑀺 𑀏𑀢𑀲𑁆𑀫𑀸𑀢𑀺 𑀧𑀪𑀯𑁄. 𑀮𑀽 𑀙𑁂𑀤𑀦𑁂, 𑀮𑀯𑀦𑀁 𑀮𑀯𑁄. 𑀏𑀯𑀁 𑀉𑀯𑀡𑁆𑀡𑀦𑁆𑀢𑀢𑁄.

𑀦𑀺𑀕𑁆𑀕𑀡𑁆𑀳𑀸𑀢𑀺, 𑀦𑀺𑀕𑁆𑀕𑀳𑀡𑀁 𑀯𑀸 𑀦𑀺𑀕𑁆𑀕𑀳𑁄, 𑀧𑀕𑁆𑀕𑀳𑁄, 𑀲𑀗𑁆𑀕𑀡𑁆𑀳𑀸𑀢𑀺 𑀢𑁂𑀦, 𑀲𑀗𑁆𑀕𑀳𑀡𑀁 𑀯𑀸 𑀲𑀗𑁆𑀕𑀳𑁄. 𑀯𑀭 𑀯𑀭𑀡𑁂, 𑀲𑀁𑀯𑀭𑀡𑀁 𑀲𑀁𑀯𑀭𑁄. 𑀤𑀭 𑀆𑀤𑀭𑁂, 𑀆𑀤𑀭𑀡𑀁 𑀆𑀤𑀭𑁄. 𑀆𑀕𑀘𑁆𑀙𑀢𑀺, 𑀆𑀕𑀫𑀦𑀦𑁆𑀢𑀺 𑀯𑀸 𑀆𑀕𑀫𑁄, 𑀆𑀕𑀫𑀻𑀬𑀦𑁆𑀢𑀺 𑀏𑀢𑁆𑀣, 𑀏𑀢𑁂𑀦 𑀯𑀸 𑀅𑀢𑁆𑀣𑀸𑀢𑀺 𑀆𑀕𑀫𑁄 𑀧𑀭𑀺𑀬𑀢𑁆𑀢𑀺. 𑀲𑀧𑁆𑀧𑀢𑀻𑀢𑀺 𑀲𑀧𑁆𑀧𑁄. 𑀤𑀺𑀩𑁆𑀩𑀢𑀻𑀢𑀺 𑀤𑁂𑀯𑁄. 𑀓𑀫𑀼 𑀧𑀤𑀯𑀺𑀓𑁆𑀔𑁂𑀧𑁂, 𑀧𑀓𑁆𑀓𑀫𑀦𑀁, 𑀧𑀓𑁆𑀓𑀫𑀢𑀻𑀢𑀺 𑀯𑀸 𑀧𑀓𑁆𑀓𑀫𑁄. 𑀏𑀯𑀁 𑀯𑀺𑀓𑁆𑀓𑀫𑁄.

𑀘𑀭 𑀘𑀭𑀡𑁂, 𑀯𑀦𑁂 𑀘𑀭𑀢𑀻𑀢𑀺 𑀯𑀦𑀘𑀭𑁄, 𑀓𑀸𑀫𑁄 𑀅𑀯𑀘𑀭𑀢𑀺 𑀏𑀢𑁆𑀣𑀸𑀢𑀺 𑀓𑀸𑀫𑀸𑀯𑀘𑀭𑁄 𑀮𑁄𑀓𑁄, 𑀓𑀸𑀫𑀸𑀯𑀘𑀭𑀸 𑀲𑀜𑁆𑀜𑀸, 𑀓𑀸𑀫𑀸𑀯𑀘𑀭𑀁 𑀘𑀺𑀢𑁆𑀢𑀁. 𑀕𑀸𑀯𑁄 𑀘𑀭𑀦𑁆𑀢𑀺 𑀏𑀢𑁆𑀣𑀸𑀢𑀺 𑀕𑁄𑀘𑀭𑁄, 𑀙𑀝𑁆𑀞𑀻𑀢𑀧𑁆𑀧𑀼𑀭𑀺𑀲𑁄.

𑀧𑀸𑀤𑁂𑀦 𑀧𑀺𑀯𑀢𑀻𑀢𑀺 𑀧𑀸𑀤𑀧𑁄. 𑀏𑀯𑀁 𑀓𑀘𑁆𑀙𑀧𑁄, 𑀢𑀢𑀺𑀬𑀸𑀢𑀧𑁆𑀧𑀼𑀭𑀺𑀲𑁄.

𑀭𑀼𑀳 𑀚𑀦𑀦𑁂, 𑀲𑀺𑀭𑀲𑁆𑀫𑀺𑀁 𑀭𑀼𑀳𑀢𑀻𑀢𑀺 𑀲𑀺𑀭𑁄𑀭𑀼𑀳𑁄, 𑀕𑀼𑀳𑀸𑀬𑀁 𑀲𑀬𑀢𑀻𑀢𑀺 𑀕𑀼𑀳𑀸𑀲𑀬𑀁 𑀘𑀺𑀢𑁆𑀢𑀁. 𑀏𑀯𑀁 𑀓𑀼𑀘𑁆𑀙𑀺𑀲𑀬𑀸 𑀯𑀸𑀢𑀸. 𑀞𑀸 𑀕𑀢𑀺𑀦𑀺𑀯𑀢𑁆𑀢𑀺𑀫𑁆𑀳𑀺, 𑀧𑀩𑁆𑀩𑀢𑁂 𑀅𑀝𑁆𑀞𑀸𑀲𑀺, 𑀢𑀺𑀝𑁆𑀞𑀢𑀺, 𑀞𑀲𑁆𑀲𑀢𑀻𑀢𑀺 𑀯𑀸 𑀧𑀩𑁆𑀩𑀢𑀝𑁆𑀞𑁄 𑀧𑀼𑀭𑀺𑀲𑁄, 𑀧𑀩𑁆𑀩𑀢𑀝𑁆𑀞𑀸 𑀦𑀤𑀻, 𑀧𑀩𑁆𑀩𑀢𑀝𑁆𑀞𑀁 𑀑𑀲𑀥𑀁. 𑀏𑀯𑀁 𑀣𑀮𑀝𑁆𑀞𑀁, 𑀚𑀮𑀝𑁆𑀞𑀁, 𑀲𑀢𑁆𑀢𑀫𑀻𑀢𑀧𑁆𑀧𑀼𑀭𑀺𑀲𑁄.

𑁫𑁬𑁯. 𑀕𑀳𑀲𑁆𑀲𑀼𑀧𑀥𑀲𑁆𑀲𑁂 𑀯𑀸.

𑀕𑀳𑀇𑀘𑁆𑀘𑁂𑀢𑀲𑁆𑀲 𑀥𑀸𑀢𑀼𑀲𑁆𑀲 𑀉𑀧𑀥𑀲𑁆𑀲 𑀏𑀢𑁆𑀢𑀁 𑀳𑁄𑀢𑀺 𑀯𑀸, 𑀉𑀧𑀥𑀸𑀢𑀺 𑀅𑀦𑁆𑀢𑀓𑁆𑀔𑀭𑀢𑁄 𑀧𑀼𑀩𑁆𑀩𑀓𑁆𑀔𑀭𑀲𑁆𑀲 𑀧𑀭𑀲𑀫𑀜𑁆𑀜𑀸, 𑀕𑀬𑁆𑀳𑀢𑀻𑀢𑀺 𑀕𑁂𑀳𑀁, 𑀕𑀳𑀁 𑀯𑀸.

𑀡𑁆𑀯𑀼𑀧𑁆𑀧𑀘𑁆𑀘𑀬𑁂 𑀭𑀣𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁂 𑀡𑁆𑀯𑀼𑀧𑁆𑀧𑀘𑁆𑀘𑀬𑁄, 𑀲𑁄 𑀘 ‘‘𑀅𑀜𑁆𑀜𑁂 𑀓𑀺𑀢’’𑀢𑀺 𑀓𑀺𑀢𑀲𑀜𑁆𑀜𑀢𑁆𑀢𑀸 ‘‘𑀓𑀢𑁆𑀢𑀭𑀺 𑀓𑀺𑀢’’𑀢𑀺 𑀓𑀢𑁆𑀢𑀭𑀺𑀬𑁂𑀯 𑀪𑀯𑀢𑀺, 𑀢𑀢𑁄 𑀓𑀸𑀭𑀺𑀢𑀩𑁆𑀬𑀧𑀤𑁂𑀲 𑀡𑀮𑁄𑀧𑀯𑀼𑀤𑁆𑀥𑀺𑀬𑁄.

𑁫𑁭𑁦. 𑀅𑀦𑀓𑀸 𑀬𑀼𑀡𑁆𑀯𑀽𑀦𑀁.

𑀬𑀼𑀡𑁆𑀯𑀼𑀇𑀘𑁆𑀘𑁂𑀢𑁂𑀲𑀁 𑀧𑀘𑁆𑀘𑀬𑀸𑀦𑀁 𑀅𑀦 𑀅𑀓𑀇𑀘𑁆𑀘𑁂𑀢𑁂 𑀆𑀤𑁂𑀲𑀸 𑀳𑁄𑀦𑁆𑀢𑀻𑀢𑀺 𑀅𑀓𑀸𑀤𑁂𑀲𑁄. 𑀲𑁂𑀲𑀁 𑀓𑀼𑀫𑁆𑀪𑀓𑀸𑀭𑀲𑀤𑁆𑀤𑀲𑀫𑀁, 𑀭𑀣𑀓𑀸𑀭𑀓𑁄. 𑀢𑀣𑀸 𑀅𑀦𑁆𑀦𑀁 𑀤𑀤𑀸𑀢𑀻𑀢𑀺 𑀅𑀦𑁆𑀦𑀤𑀸𑀬𑀓𑁄, ‘‘𑀆𑀓𑀸𑀭𑀦𑁆𑀢𑀸𑀦𑀫𑀸𑀬𑁄’’𑀢𑀺 𑀆𑀬𑀸𑀤𑁂𑀲𑁄, ‘‘𑀇𑀢𑁆𑀣𑀺𑀬𑀫𑀢𑁄 𑀆𑀧𑀘𑁆𑀘𑀬𑁄’’𑀢𑀺 𑀆𑀧𑀘𑁆𑀘𑀬𑁄, ‘‘𑀢𑁂𑀲𑀼 𑀯𑀼𑀤𑁆𑀥𑀻’’𑀢𑀺𑀆𑀤𑀺𑀦𑀸 𑀅𑀓𑀸𑀭𑀲𑁆𑀲 𑀇𑀓𑀸𑀭𑁄, 𑀅𑀦𑁆𑀦𑀤𑀸𑀬𑀺𑀓𑀸 𑀓𑀜𑁆𑀜𑀸, 𑀅𑀦𑁆𑀦𑀤𑀸𑀬𑀓𑀁 𑀓𑀼𑀮𑀁. 𑀮𑁄𑀓𑀁 𑀦𑁂𑀢𑀻𑀢𑀺 𑀮𑁄𑀓𑀦𑀸𑀬𑀓𑁄, 𑀯𑀺𑀦𑁂𑀢𑀺 𑀲𑀢𑁆𑀢𑁂𑀢𑀺 𑀯𑀺𑀦𑀸𑀬𑀓𑁄, ‘‘𑀢𑁂 𑀆𑀯𑀸𑀬𑀸 𑀓𑀸𑀭𑀺𑀢𑁂’’𑀢𑀺 𑀆𑀬𑀸𑀤𑁂𑀲𑁄.

𑀅𑀓𑀫𑁆𑀫𑀽𑀧𑀧𑀤𑁂 𑀓𑀭𑁄𑀢𑀻𑀢𑀺 𑀓𑀸𑀭𑀓𑁄, 𑀓𑀸𑀭𑀺𑀓𑀸, 𑀓𑀸𑀭𑀓𑀁. 𑀤𑀤𑀸𑀢𑀻𑀢𑀺 𑀤𑀸𑀬𑀓𑁄, 𑀤𑀸𑀬𑀺𑀓𑀸, 𑀤𑀸𑀬𑀓𑀁. 𑀦𑁂𑀢𑀻𑀢𑀺 𑀦𑀸𑀬𑀓𑁄, 𑀦𑀸𑀬𑀺𑀓𑀸, 𑀦𑀸𑀬𑀓𑀁. 𑀪𑀕𑀯𑀢𑁄 𑀑𑀯𑀸𑀤𑀸𑀦𑀼𑀲𑀸𑀲𑀦𑀺𑀁 𑀅𑀲𑀼𑀡𑀺, 𑀲𑀼𑀡𑀸𑀢𑀺, 𑀲𑀼𑀡𑀺𑀲𑁆𑀲𑀢𑀻𑀢𑀺 𑀯𑀸 𑀲𑀸𑀯𑀓𑁄, 𑀲𑀸𑀯𑀺𑀓𑀸, 𑀆𑀯𑀸𑀤𑁂𑀲𑁄. 𑀮𑀼𑀦𑀸𑀢𑀻𑀢𑀺 𑀮𑀸𑀯𑀓𑁄. 𑀧𑀼 𑀧𑀯𑀦𑁂, 𑀧𑀼𑀦𑀸𑀢𑀻𑀢𑀺 𑀧𑀸𑀯𑀓𑁄, 𑀪𑀯𑀢𑀻𑀢𑀺 𑀪𑀸𑀯𑀓𑁄, 𑀉𑀧𑀸𑀲𑀢𑀻𑀢𑀺 𑀉𑀧𑀸𑀲𑀓𑁄, 𑀉𑀧𑀸𑀲𑀺𑀓𑀸. 𑀕𑀡𑁆𑀳𑀸𑀢𑀻𑀢𑀺 𑀕𑀸𑀳𑀓𑁄.

𑀧𑀘𑀢𑀻𑀢𑀺 𑀧𑀸𑀘𑀓𑁄. 𑀅𑀬𑀚𑀺, 𑀬𑀚𑀢𑀺, 𑀬𑀚𑀺𑀲𑁆𑀲𑀢𑀻𑀢𑀺 𑀯𑀸 𑀬𑀸𑀚𑀓𑁄. 𑀏𑀢𑁆𑀣 𑀳𑀺 ‘‘𑀓𑀕𑀸 𑀘𑀚𑀸𑀦’’𑀦𑁆𑀢𑀺 𑀘𑀚𑀸𑀦𑀁 𑀓𑀕𑀢𑁆𑀢𑁂 𑀲𑀫𑁆𑀧𑀢𑁆𑀢𑁂 𑁋

𑁫𑁭𑁧. 𑀦 𑀓𑀕𑀢𑁆𑀢𑀁 𑀘𑀚𑀸 𑀡𑁆𑀯𑀼𑀫𑁆𑀳𑀺.

𑀥𑀸𑀢𑁆𑀯𑀦𑁆𑀢𑀪𑀽𑀢𑀸 𑀘𑀓𑀸𑀭𑀚𑀓𑀸𑀭𑀸 𑀓𑀓𑀸𑀭 𑀕𑀓𑀸𑀭𑀢𑁆𑀢𑀁 𑀦𑀸𑀧𑀚𑁆𑀚𑀦𑁆𑀢𑁂 𑀡𑁆𑀯𑀼𑀧𑁆𑀧𑀘𑁆𑀘𑀬𑁂 𑀧𑀭𑁂𑀢𑀺 𑀧𑀝𑀺𑀲𑀺𑀤𑁆𑀥𑀢𑁆𑀢𑀸 𑀦 𑀪𑀯𑀢𑀺.