𑁫. 𑀢𑀤𑁆𑀥𑀺𑀢𑀓𑀡𑁆𑀟

𑀅𑀧𑀘𑁆𑀘𑀢𑀤𑁆𑀥𑀺𑀢

𑀅𑀣 𑀦𑀸𑀫𑀢𑁄 𑀏𑀯 𑀯𑀺𑀪𑀢𑁆𑀬𑀦𑁆𑀢𑀸 𑀅𑀧𑀘𑁆𑀘𑀸𑀤𑀺𑀅𑀢𑁆𑀣𑀯𑀺𑀲𑁂𑀲𑁂 𑀢𑀤𑁆𑀥𑀺𑀢𑀼𑀧𑁆𑀧𑀢𑁆𑀢𑀻𑀢𑀺 𑀦𑀸𑀫𑀢𑁄 𑀧𑀭𑀁 𑀢𑀤𑁆𑀥𑀺𑀢𑀯𑀺𑀥𑀸𑀦𑀫𑀸𑀭𑀪𑀻𑀬𑀢𑁂.

𑀢𑀢𑁆𑀣 𑀢𑀲𑁆𑀫𑀸 𑀢𑀺𑀯𑀺𑀥𑀮𑀺𑀗𑁆𑀕𑀢𑁄 𑀧𑀭𑀁 𑀳𑀼𑀢𑁆𑀯𑀸 𑀳𑀺𑀢𑀸 𑀲𑀳𑀺𑀢𑀸𑀢𑀺 𑀢𑀤𑁆𑀥𑀺𑀢𑀸, 𑀡𑀸𑀤𑀺𑀧𑀘𑁆𑀘𑀬𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁, 𑀢𑁂𑀲𑀁 𑀯𑀸 𑀦𑀸𑀫𑀺𑀓𑀸𑀦𑀁 𑀳𑀺𑀢𑀸 𑀉𑀧𑀓𑀸𑀭𑀸 𑀢𑀤𑁆𑀥𑀺𑀢𑀸𑀢𑀺 𑀅𑀦𑁆𑀯𑀢𑁆𑀣𑀪𑀽𑀢𑀧𑀭𑀲𑀫𑀜𑁆𑀜𑀸𑀯𑀲𑁂𑀦𑀸𑀧𑀺 𑀡𑀸𑀤𑀺𑀧𑁆𑀧𑀘𑁆𑀘𑀬𑀸𑀯 𑀢𑀤𑁆𑀥𑀺𑀢𑀸 𑀦𑀸𑀫.

‘‘𑀯𑀲𑀺𑀝𑁆𑀞𑀲𑁆𑀲 𑀅𑀧𑀘𑁆𑀘’’𑀦𑁆𑀢𑀺 𑀯𑀺𑀕𑁆𑀕𑀳𑁂 𑁋

‘‘𑀮𑀺𑀗𑁆𑀕𑀜𑁆𑀘 𑀦𑀺𑀧𑀘𑁆𑀘𑀢𑁂’’𑀢𑀺 𑀇𑀢𑁄 𑀮𑀺𑀗𑁆𑀕𑀕𑁆𑀕𑀳𑀡𑀫𑀦𑀼𑀯𑀢𑁆𑀢𑀢𑁂.

𑁩𑁬𑁧. 𑀯𑀸 𑀡’𑀧𑀘𑁆𑀘𑁂.

𑀙𑀝𑁆𑀞𑀺𑀬𑀦𑁆𑀢𑀢𑁄 𑀮𑀺𑀗𑁆𑀕𑀫𑁆𑀳𑀸 𑀡𑀧𑁆𑀧𑀘𑁆𑀘𑀬𑁄 𑀳𑁄𑀢𑀺 𑀯𑀺𑀓𑀧𑁆𑀧𑁂𑀦 ‘‘𑀢𑀲𑁆𑀲 𑀅𑀧𑀘𑁆𑀘’’𑀫𑀺𑀘𑁆𑀘𑁂𑀢𑀲𑁆𑀫𑀺𑀁 𑀅𑀢𑁆𑀣𑁂.

𑀲𑁄 𑀘 𑁋

𑁩𑁬𑁨. 𑀥𑀸𑀢𑀼𑀮𑀺𑀗𑁆𑀕𑁂𑀳𑀺 𑀧𑀭𑀸 𑀧𑀘𑁆𑀘𑀬𑀸.

𑀥𑀸𑀢𑀽𑀳𑀺, 𑀮𑀺𑀗𑁆𑀕𑁂𑀳𑀺 𑀘 𑀧𑀘𑁆𑀘𑀬𑀸 𑀧𑀭𑀸𑀯 𑀳𑁄𑀦𑁆𑀢𑀻𑀢𑀺 𑀧𑀭𑀺𑀪𑀸𑀲𑀢𑁄 𑀅𑀧𑀘𑁆𑀘𑀢𑁆𑀣𑀲𑀫𑁆𑀩𑀦𑁆𑀥𑀺𑀮𑀺𑀗𑁆𑀕𑀢𑁄 𑀙𑀝𑁆𑀞𑀺𑀬𑀦𑁆𑀢𑀸𑀬𑁂𑀯 𑀧𑀭𑁄 𑀳𑁄𑀢𑀺. 𑀧𑀝𑀺𑀘𑁆𑀘 𑀏𑀢𑀲𑁆𑀫𑀸 𑀅𑀢𑁆𑀣𑁄 𑀏𑀢𑀻𑀢𑀺 𑀧𑀘𑁆𑀘𑀬𑁄, 𑀧𑀢𑀻𑀬𑀦𑁆𑀢𑀺 𑀅𑀦𑁂𑀦 𑀅𑀢𑁆𑀣𑀸𑀢𑀺 𑀯𑀸 𑀧𑀘𑁆𑀘𑀬𑁄, ‘‘𑀯𑀼𑀢𑁆𑀢𑀢𑁆𑀣𑀸𑀦𑀫𑀧𑁆𑀧𑀬𑁄𑀕𑁄’’𑀢𑀺 𑀅𑀧𑀘𑁆𑀘𑀲𑀤𑁆𑀤𑀲𑁆𑀲 𑀅𑀧𑁆𑀧𑀬𑁄𑀕𑁄, ‘‘𑀢𑁂𑀲𑀁 𑀯𑀺𑀪𑀢𑁆𑀢𑀺𑀬𑁄 𑀮𑁄𑀧𑀸 𑀘𑁂’’𑀢𑀺 𑀯𑀺𑀪𑀢𑁆𑀢𑀺𑀮𑁄𑀧𑁄 𑀘.

𑁩𑁬𑁩. 𑀢𑁂𑀲𑀁 𑀡𑁄 𑀮𑁄𑀧𑀁.

𑀢𑁂𑀲𑀁 𑀢𑀤𑁆𑀥𑀺𑀢𑀧𑁆𑀧𑀘𑁆𑀘𑀬𑀸𑀦𑀁 𑀡𑀸𑀦𑀼𑀩𑀦𑁆𑀥𑀸𑀦𑀁 𑀡𑀓𑀸𑀭𑁄 𑀮𑁄𑀧𑀫𑀸𑀧𑀚𑁆𑀚𑀢𑁂.

𑁩𑁬𑁪. 𑀯𑀼𑀤𑁆𑀥𑀸𑀤𑀺𑀲𑀭𑀲𑁆𑀲 𑀯𑀸𑀲𑀁𑀬𑁄𑀕𑀦𑁆𑀢𑀲𑁆𑀲 𑀲𑀡𑁂 𑀘.

𑀆𑀤𑀺𑀲𑀭𑀲𑁆𑀲 𑀯𑀸 𑀆𑀤𑀺𑀩𑁆𑀬𑀜𑁆𑀚𑀦𑀲𑁆𑀲 𑀯𑀸 𑀅𑀲𑀁𑀬𑁄𑀕𑀦𑁆𑀢𑀲𑁆𑀲 𑀯𑀼𑀤𑁆𑀥𑀺 𑀳𑁄𑀢𑀺 𑀲𑀡𑀓𑀸𑀭𑀧𑁆𑀧𑀘𑁆𑀘𑀬𑁂 𑀧𑀭𑁂. 𑀲𑀁𑀬𑁄𑀕𑁄 𑀅𑀦𑁆𑀢𑁄 𑀅𑀲𑁆𑀲𑀸𑀢𑀺 𑀲𑀁𑀬𑁄𑀕𑀦𑁆𑀢𑁄, 𑀢𑀤𑀜𑁆𑀜𑁄 𑀅𑀲𑀁𑀬𑁄𑀕𑀦𑁆𑀢𑁄. 𑀅𑀣 𑀯𑀸 𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀢𑁆𑀣𑁄𑀬𑀁 𑀯𑀸𑀲𑀤𑁆𑀤𑁄, 𑀢𑀤𑀸 𑀘 𑀧𑀓𑀢𑀺𑀪𑀽𑀢𑁂 𑀮𑀺𑀗𑁆𑀕𑁂 𑀲𑀭𑀸𑀦𑀫𑀸𑀤𑀺𑀲𑀭𑀲𑁆𑀲 𑀅𑀲𑀁𑀬𑁄𑀕𑀦𑁆𑀢𑀲𑁆𑀲 𑀯𑀼𑀤𑁆𑀥𑀺 𑀳𑁄𑀢𑀺 𑀲𑀡𑀓𑀸𑀭𑁂 𑀢𑀤𑁆𑀥𑀺𑀢𑀧𑁆𑀧𑀘𑁆𑀘𑀬𑁂 𑀧𑀭𑁂𑀢𑀺 𑀅𑀢𑁆𑀣𑁄.

𑀢𑁂𑀦 𑁋

𑀯𑀸𑀲𑀺𑀝𑁆𑀞𑀸𑀤𑀻𑀲𑀼 𑀦𑀺𑀘𑁆𑀘𑀸𑀬𑀁, 𑀅𑀦𑀺𑀘𑁆𑀘𑁄𑀴𑀼𑀫𑁆𑀧𑀺𑀓𑀸𑀤𑀺𑀲𑀼;

𑀦 𑀯𑀼𑀤𑁆𑀥𑀺 𑀦𑀻𑀮𑀧𑀻𑀢𑀸𑀤𑁄, 𑀯𑀯𑀢𑁆𑀣𑀺𑀢𑀯𑀺𑀪𑀸𑀲𑀢𑁄.

𑀘𑀲𑀤𑁆𑀤𑀕𑁆𑀕𑀳𑀡𑀫𑀯𑀥𑀸𑀭𑀡𑀢𑁆𑀣𑀁.

𑀢𑀲𑁆𑀲𑀸 𑀯𑀼𑀤𑁆𑀥𑀺𑀬𑀸 𑀅𑀦𑀺𑀬𑀫𑀧𑁆𑀧𑀲𑀗𑁆𑀕𑁂 𑀦𑀺𑀬𑀫𑀢𑁆𑀣𑀁 𑀧𑀭𑀺𑀪𑀸𑀲𑀫𑀸𑀳.

𑁩𑁬𑁫. 𑀅𑀬𑀼𑀯𑀡𑁆𑀡𑀸𑀦𑀜𑁆𑀘𑀸𑀬𑁄 𑀯𑀼𑀤𑁆𑀥𑀻.

𑀢𑁂𑀲𑀁 𑀅𑀓𑀸𑀭𑀇𑀯𑀡𑁆𑀡𑀼𑀯𑀡𑁆𑀡𑀸𑀦𑀫𑁂𑀯 𑀬𑀣𑀸𑀓𑁆𑀓𑀫𑀁 𑀆 𑀏𑀑𑀇𑀘𑁆𑀘𑁂𑀢𑁂 𑀯𑀼𑀤𑁆𑀥𑀺𑀬𑁄 𑀳𑁄𑀦𑁆𑀢𑀺. 𑀘𑀲𑀤𑁆𑀤𑀕𑁆𑀕𑀳𑀡𑀫𑀯𑀼𑀤𑁆𑀥𑀺𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑀁, 𑀅𑀯𑀥𑀸𑀭𑀡𑀢𑁆𑀣𑀁 𑀯𑀸. 𑀇 𑀘 𑀉 𑀘 𑀬𑀼, 𑀬𑀼 𑀏𑀯 𑀯𑀡𑁆𑀡𑀸 𑀬𑀼𑀯𑀡𑁆𑀡𑀸, 𑀅 𑀘 𑀬𑀼𑀯𑀡𑁆𑀡𑀸 𑀘 𑀅𑀬𑀼𑀯𑀡𑁆𑀡𑀸. 𑀆 𑀘 𑀏 𑀘 𑀑 𑀘 𑀆𑀬𑁄. 𑀧𑀼𑀦 𑀯𑀼𑀤𑁆𑀥𑀺𑀕𑁆𑀕𑀳𑀡𑀁 ‘‘𑀦𑁂𑀕𑀫𑀚𑀸𑀦𑀧𑀤𑀸’’𑀢𑀺𑀆𑀤𑀻𑀲𑀼 𑀉𑀢𑁆𑀢𑀭𑀧𑀤𑀯𑀼𑀤𑁆𑀥𑀺𑀪𑀸𑀯𑀢𑁆𑀣𑀁, 𑀏𑀢𑁆𑀣 𑀘 ‘‘𑀅𑀬𑀼𑀯𑀡𑁆𑀡𑀸𑀦’’𑀦𑁆𑀢𑀺 𑀞𑀸𑀦𑀦𑀺𑀬𑀫𑀯𑀘𑀦𑀁 𑀆𑀬𑁄𑀦𑀁 𑀯𑀼𑀤𑁆𑀥𑀺𑀪𑀸𑀯𑀧𑁆𑀧𑀲𑀗𑁆𑀕𑀦𑀺𑀯𑀢𑁆𑀢𑀦𑀢𑁆𑀣𑀁.

𑀬𑀣𑀸 𑀳𑀺 𑀓𑀢𑀯𑀼𑀤𑁆𑀥𑀻𑀦𑀁, 𑀧𑀼𑀦 𑀯𑀼𑀤𑁆𑀥𑀺 𑀦 𑀳𑁄𑀢𑀺𑀳;

𑀢𑀣𑀸 𑀲𑀪𑀸𑀯𑀯𑀼𑀤𑁆𑀥𑀻𑀦𑀁, 𑀆𑀬𑁄𑀦𑀁 𑀧𑀼𑀦 𑀯𑀼𑀤𑁆𑀥𑀺 𑀦.

𑀢𑀢𑁄 𑀅𑀓𑀸𑀭𑀲𑁆𑀲 𑀆𑀓𑀸𑀭𑁄 𑀯𑀼𑀤𑁆𑀥𑀺, ‘‘𑀲𑀭𑀮𑁄𑀧𑁄𑀫𑀸𑀤𑁂𑀲𑀧𑁆𑀧𑀘𑁆𑀘𑀬𑀸𑀤𑀺𑀫𑁆𑀳𑀺 𑀲𑀭𑀮𑁄𑀧𑁂 𑀢𑀼 𑀧𑀓𑀢𑀻’’𑀢𑀺 𑀲𑀭𑀮𑁄𑀧𑀧𑀓𑀢𑀺𑀪𑀸𑀯𑀸, ‘‘𑀦𑀬𑁂 𑀧𑀭𑀁 𑀬𑀼𑀢𑁆𑀢𑁂’’𑀢𑀺 𑀧𑀭𑀦𑀬𑀦𑀁 𑀓𑀢𑁆𑀯𑀸 𑀢𑀤𑁆𑀥𑀺𑀢𑀢𑁆𑀢𑀸 ‘‘𑀢𑀤𑁆𑀥𑀺𑀢𑀲𑀫𑀸𑀲’’𑀇𑀘𑁆𑀘𑀸𑀤𑀺𑀦𑀸 𑀦𑀸𑀫𑀩𑁆𑀬𑀧𑀤𑁂𑀲𑁂 𑀓𑀢𑁂 𑀧𑀼𑀭𑁂 𑀯𑀺𑀬 𑀲𑁆𑀬𑀸𑀤𑁆𑀬𑀼𑀧𑁆𑀧𑀢𑁆𑀢𑀺.

𑀯𑀸𑀲𑀺𑀝𑁆𑀞𑁄, 𑀯𑀲𑀺𑀝𑁆𑀞𑀲𑁆𑀲 𑀧𑀼𑀢𑁆𑀢𑁄 𑀯𑀸, 𑀯𑀸𑀲𑀺𑀝𑁆𑀞𑀸 𑀇𑀘𑁆𑀘𑀸𑀤𑀺 𑀧𑀼𑀭𑀺𑀲𑀲𑀤𑁆𑀤𑀲𑀫𑀁. 𑀢𑀲𑁆𑀲 𑀦𑀢𑁆𑀢𑀼𑀧𑀦𑀢𑁆𑀢𑀸𑀤𑀬𑁄𑀧𑀺 𑀢𑀤𑀼𑀧𑀘𑀸𑀭𑀢𑁄 𑀯𑀸𑀲𑀺𑀝𑁆𑀞𑀸𑀬𑁂𑀯. 𑀏𑀯𑀁 𑀲𑀩𑁆𑀩𑀢𑁆𑀣 𑀕𑁄𑀢𑁆𑀢𑀢𑀤𑁆𑀥𑀺𑀢𑁂 𑀧𑀞𑀫𑀧𑁆𑀧𑀓𑀢𑀺𑀢𑁄𑀬𑁂𑀯 𑀧𑀘𑁆𑀘𑀬𑁄 𑀳𑁄𑀢𑀺.

𑀇𑀢𑁆𑀣𑀺𑀬𑀁 𑀡𑀧𑁆𑀧𑀘𑁆𑀘𑀬𑀦𑁆𑀢𑀢𑁆𑀢𑀸 ‘‘𑀡𑀯 𑀡𑀺𑀓 𑀡𑁂𑀬𑁆𑀬 𑀡 𑀦𑁆𑀢𑀽𑀳𑀻’’𑀢𑀺 𑀯𑀸𑀲𑀺𑀝𑁆𑀞𑀲𑀤𑁆𑀤𑀢𑁄 𑀈𑀧𑀘𑁆𑀘𑀬𑁄. 𑀲𑀭𑀮𑁄𑀧𑀸𑀤𑀺𑀁 𑀓𑀢𑁆𑀯𑀸 𑀇𑀢𑁆𑀣𑀺𑀧𑁆𑀧𑀘𑁆𑀘𑀬𑀦𑁆𑀢𑀢𑁆𑀢𑀸 ‘‘𑀢𑀤𑁆𑀥𑀺𑀢𑀲𑀫𑀸𑀲’’𑀇𑀘𑁆𑀘𑀸𑀤𑀺𑀲𑀼𑀢𑁆𑀢𑁂 𑀘𑀕𑁆𑀕𑀳𑀡𑁂𑀦 𑀦𑀸𑀫𑀩𑁆𑀬𑀧𑀤𑁂𑀲𑁂 𑀓𑀢𑁂 𑀲𑁆𑀬𑀸𑀤𑁆𑀬𑀼𑀧𑁆𑀧𑀢𑁆𑀢𑀺, 𑀯𑀸𑀲𑀺𑀝𑁆𑀞𑀻 𑀓𑀜𑁆𑀜𑀸, 𑀯𑀸𑀲𑀺𑀝𑁆𑀞𑀻, 𑀯𑀸𑀲𑀺𑀝𑁆𑀞𑀺𑀬𑁄 𑀇𑀘𑁆𑀘𑀸𑀤𑀺 𑀇𑀢𑁆𑀣𑀺𑀲𑀤𑁆𑀤𑀲𑀫𑀁.

𑀦𑀧𑀼𑀁𑀲𑀓𑁂 𑀯𑀸𑀲𑀺𑀝𑁆𑀞𑀁 𑀅𑀧𑀘𑁆𑀘𑀁, 𑀯𑀸𑀲𑀺𑀝𑁆𑀞𑀸𑀦𑀺 𑀅𑀧𑀘𑁆𑀘𑀸𑀦𑀺 𑀇𑀘𑁆𑀘𑀸𑀤𑀺 𑀘𑀺𑀢𑁆𑀢𑀲𑀤𑁆𑀤𑀲𑀫𑀁. 𑀏𑀯𑀁 𑀉𑀧𑀭𑀺𑀧𑀺 𑀢𑀤𑁆𑀥𑀺𑀢𑀦𑁆𑀢𑀲𑁆𑀲 𑀢𑀺𑀮𑀺𑀗𑁆𑀕𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀪𑀸𑀭𑀤𑁆𑀯𑀸𑀚𑀲𑁆𑀲 𑀧𑀼𑀢𑁆𑀢𑁄 𑀪𑀸𑀭𑀤𑁆𑀯𑀸𑀚𑁄, 𑀯𑁂𑀲𑀸𑀫𑀺𑀢𑁆𑀢𑀲𑁆𑀲 𑀧𑀼𑀢𑁆𑀢𑁄 𑀯𑁂𑀲𑀸𑀫𑀺𑀢𑁆𑀢𑁄, 𑀕𑁄𑀢𑀫𑀲𑁆𑀲 𑀧𑀼𑀢𑁆𑀢𑁄 𑀕𑁄𑀢𑀫𑁄. 𑀏𑀢𑁆𑀣 𑀘 𑀅𑀬𑀼𑀯𑀡𑁆𑀡𑀢𑁆𑀢𑀸𑀪𑀸𑀯𑀸 𑀆𑀓𑀸𑀭𑀸𑀤𑀻𑀦𑀁 𑀦 𑀯𑀼𑀤𑁆𑀥𑀺 𑀳𑁄𑀢𑀺. 𑀯𑀲𑀼𑀤𑁂𑀯𑀲𑁆𑀲 𑀅𑀧𑀘𑁆𑀘𑀁 𑀯𑀸𑀲𑀼𑀤𑁂𑀯𑁄, 𑀩𑀮𑀤𑁂𑀯𑁄. ‘‘𑀘𑀺𑀢𑁆𑀢𑀓𑁄’’𑀢𑀺𑀆𑀤𑀻𑀲𑀼 𑀧𑀦 𑀲𑀁𑀬𑁄𑀕𑀦𑁆𑀢𑀢𑁆𑀢𑀸 𑀯𑀼𑀤𑁆𑀥𑀺 𑀦 𑀪𑀯𑀢𑀺.

‘‘𑀯𑀘𑁆𑀙𑀲𑁆𑀲 𑀅𑀧𑀘𑁆𑀘’’𑀦𑁆𑀢𑀺 𑀯𑀺𑀕𑁆𑀕𑀳𑁂 𑀡𑀫𑁆𑀳𑀺 𑀲𑀫𑁆𑀧𑀢𑁆𑀢𑁂 ‘‘𑀯𑀸 𑀡’𑀧𑀘𑁆𑀘𑁂’’𑀢𑀺 𑀇𑀢𑁄 𑀯𑀸𑀢𑀺 𑀢𑀤𑁆𑀥𑀺𑀢𑀯𑀺𑀥𑀸𑀦𑁂 𑀲𑀩𑁆𑀩𑀢𑁆𑀣 𑀯𑀢𑁆𑀢𑀢𑁂, 𑀢𑁂𑀦 𑀲𑀩𑁆𑀩𑀢𑁆𑀣 𑀯𑀸𑀓𑁆𑀬𑀯𑀼𑀢𑁆𑀢𑀺𑀬𑁄 𑀪𑀯𑀦𑁆𑀢𑀺. ‘‘𑀅𑀧𑀘𑁆𑀘𑁂’’𑀢𑀺 𑀧𑀤𑀁 𑀬𑀸𑀯 𑀲𑀁𑀲𑀝𑁆𑀞𑀕𑁆𑀕𑀳𑀡𑀸𑀯 𑀯𑀢𑁆𑀢𑀢𑁂.

𑁩𑁬𑁬. 𑀡𑀸𑀬𑀦 𑀡𑀸𑀦 𑀯𑀘𑁆𑀙𑀸𑀤𑀺𑀢𑁄.

𑀯𑀘𑁆𑀙 𑀓𑀘𑁆𑀘𑀇𑀘𑁆𑀘𑁂𑀯𑀫𑀸𑀤𑀺𑀢𑁄 𑀙𑀝𑁆𑀞𑀺𑀬𑀦𑁆𑀢𑀢𑁄 𑀕𑁄𑀢𑁆𑀢𑀕𑀡𑀢𑁄 𑀡𑀸𑀬𑀦 𑀡𑀸𑀦𑀇𑀘𑁆𑀘𑀢𑁂 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀯𑀸 ‘‘𑀢𑀲𑁆𑀲𑀸𑀧𑀘𑁆𑀘’’𑀫𑀺𑀘𑁆𑀘𑁂𑀢𑀲𑁆𑀫𑀺𑀁 𑀅𑀢𑁆𑀣𑁂. 𑀲𑀩𑁆𑀩𑀢𑁆𑀣 𑀡𑀓𑀸𑀭𑀸𑀦𑀼𑀩𑀦𑁆𑀥𑁄 𑀯𑀼𑀤𑁆𑀥𑀢𑁆𑀣𑁄, 𑀲𑁂𑀲𑀁 𑀧𑀼𑀩𑁆𑀩𑀲𑀫𑀁, 𑀲𑀁𑀬𑁄𑀕𑀦𑁆𑀢𑀢𑁆𑀢𑀸 𑀯𑀼𑀤𑁆𑀥𑀺𑀅𑀪𑀸𑀯𑁄𑀯 𑀯𑀺𑀲𑁂𑀲𑁄.

𑀯𑀘𑁆𑀙𑀸𑀬𑀦𑁄 𑀯𑀘𑁆𑀙𑀸𑀦𑁄 𑀯𑀘𑁆𑀙𑀲𑁆𑀲 𑀧𑀼𑀢𑁆𑀢𑁄 𑀯𑀸. 𑀏𑀯𑀁 𑀓𑀘𑁆𑀘𑀲𑁆𑀲 𑀧𑀼𑀢𑁆𑀢𑁄 𑀓𑀘𑁆𑀘𑀸𑀬𑀦𑁄 𑀓𑀘𑁆𑀘𑀸𑀦𑁄, 𑀫𑁄𑀕𑁆𑀕𑀮𑁆𑀮𑀲𑁆𑀲 𑀧𑀼𑀢𑁆𑀢𑁄 𑀫𑁄𑀕𑁆𑀕𑀮𑁆𑀮𑀸𑀬𑀦𑁄 𑀫𑁄𑀕𑁆𑀕𑀮𑁆𑀮𑀸𑀦𑁄. 𑀏𑀯𑀁 𑀅𑀕𑁆𑀕𑀺𑀯𑁂𑀲𑁆𑀲𑀸𑀬𑀦𑁄 𑀅𑀕𑁆𑀕𑀺𑀯𑁂𑀲𑁆𑀲𑀸𑀦𑁄, 𑀓𑀡𑁆𑀳𑀸𑀬𑀦𑁄 𑀓𑀡𑁆𑀳𑀸𑀦𑁄, 𑀲𑀸𑀓𑀝𑀸𑀬𑀦𑁄 𑀲𑀸𑀓𑀝𑀸𑀦𑁄, 𑀫𑀼𑀜𑁆𑀘𑀸𑀬𑀦𑁄 𑀫𑀼𑀜𑁆𑀘𑀸𑀦𑁄, 𑀓𑀼𑀜𑁆𑀚𑀸𑀬𑀦𑁄 𑀓𑀼𑀜𑁆𑀚𑀸𑀦𑁄 𑀇𑀘𑁆𑀘𑀸𑀤𑀺. 𑀆𑀓𑀢𑀺𑀕𑀡𑁄’𑀬𑀁.

‘‘𑀓𑀢𑁆𑀢𑀺𑀓𑀸𑀬 𑀅𑀧𑀘𑁆𑀘’’𑀦𑁆𑀢𑀺 𑀯𑀺𑀕𑁆𑀕𑀳𑁂 𑁋

𑁩𑁬𑁭. 𑀡𑁂𑀬𑁆𑀬𑁄 𑀓𑀢𑁆𑀢𑀺𑀓𑀸𑀤𑀻𑀳𑀺.

𑀆𑀤𑀺𑀲𑀤𑁆𑀤𑁄𑀬𑀁 𑀧𑀓𑀸𑀭𑁂 𑀯𑀢𑁆𑀢𑀢𑁂. 𑀓𑀢𑁆𑀢𑀺𑀓𑀸 𑀯𑀺𑀦𑀢𑀸𑀭𑁄𑀳𑀺𑀡𑀻𑀇𑀘𑁆𑀘𑁂𑀯𑀫𑀸𑀤𑀻𑀳𑀺 𑀇𑀢𑁆𑀣𑀺𑀬𑀁 𑀯𑀢𑁆𑀢𑀫𑀸𑀦𑁂𑀳𑀺 𑀮𑀺𑀗𑁆𑀕𑁂𑀳𑀺 𑀡𑁂𑀬𑁆𑀬𑀧𑁆𑀧𑀘𑁆𑀘𑀬𑁄 𑀳𑁄𑀢𑀺 𑀯𑀸 ‘‘𑀢𑀲𑁆𑀲𑀸𑀧𑀘𑁆𑀘’’𑀫𑀺𑀘𑁆𑀘𑁂𑀢𑀲𑁆𑀫𑀺𑀁 𑀅𑀢𑁆𑀣𑁂.

𑀯𑀺𑀪𑀢𑁆𑀢𑀺𑀮𑁄𑀧𑁂 ‘‘𑀧𑀓𑀢𑀺 𑀘𑀲𑁆𑀲 𑀲𑀭𑀦𑁆𑀢𑀲𑁆𑀲𑀸’’𑀢𑀺 𑀧𑀓𑀢𑀺𑀪𑀸𑀯𑁄. 𑀓𑀢𑁆𑀢𑀺𑀓𑁂𑀬𑁆𑀬𑁄, 𑀓𑀢𑁆𑀢𑀺𑀓𑀸𑀬 𑀧𑀼𑀢𑁆𑀢𑁄 𑀯𑀸. 𑀏𑀯𑀁 𑀯𑀺𑀦𑀢𑀸𑀬 𑀅𑀧𑀘𑁆𑀘𑀁 𑀯𑁂𑀦𑀢𑁂𑀬𑁆𑀬𑁄, 𑀇𑀓𑀸𑀭𑀲𑁆𑀲𑁂𑀓𑀸𑀭𑁄 𑀯𑀼𑀤𑁆𑀥𑀺, 𑀭𑁄𑀳𑀺𑀡𑀺𑀬𑀸 𑀧𑀼𑀢𑁆𑀢𑁄 𑀭𑁄𑀳𑀺𑀡𑁂𑀬𑁆𑀬𑁄, 𑀕𑀗𑁆𑀕𑀸𑀬 𑀅𑀧𑀘𑁆𑀘𑀁 𑀕𑀗𑁆𑀕𑁂𑀬𑁆𑀬𑁄, 𑀪𑀕𑀺𑀦𑀺𑀬𑀸 𑀧𑀼𑀢𑁆𑀢𑁄 𑀪𑀸𑀕𑀺𑀦𑁂𑀬𑁆𑀬𑁄, 𑀦𑀤𑀺𑀬𑀸𑀧𑀼𑀢𑁆𑀢𑁄 𑀦𑀸𑀤𑁂𑀬𑁆𑀬𑁄. 𑀏𑀯𑀁 𑀅𑀦𑁆𑀢𑁂𑀬𑁆𑀬𑁄, 𑀆𑀳𑁂𑀬𑁆𑀬𑁄, 𑀓𑀸𑀫𑁂𑀬𑁆𑀬𑁄. 𑀲𑀼𑀘𑀺𑀬𑀸 𑀅𑀧𑀘𑁆𑀘𑀁 𑀲𑁄𑀘𑁂𑀬𑁆𑀬𑁄, 𑀏𑀢𑁆𑀣 𑀉𑀓𑀸𑀭𑀲𑁆𑀲𑁄𑀓𑀸𑀭𑁄 𑀯𑀼𑀤𑁆𑀥𑀺, 𑀩𑀸𑀮𑀸𑀬 𑀅𑀧𑀘𑁆𑀘𑀁 𑀩𑀸𑀮𑁂𑀬𑁆𑀬𑁄 𑀇𑀘𑁆𑀘𑀸𑀤𑀺.

‘‘𑀤𑀓𑁆𑀔𑀲𑁆𑀲𑀸𑀧𑀘𑁆𑀘’’𑀦𑁆𑀢𑀺 𑀯𑀺𑀕𑁆𑀕𑀳𑁂 𑀡𑀫𑁆𑀳𑀺 𑀲𑀫𑁆𑀧𑀢𑁆𑀢𑁂 𑁋

𑁩𑁬𑁮. 𑀅𑀢𑁄 𑀡𑀺 𑀯𑀸.

𑀅𑀓𑀸𑀭𑀦𑁆𑀢𑀢𑁄 𑀮𑀺𑀗𑁆𑀕𑀫𑁆𑀳𑀸 𑀡𑀺𑀧𑀘𑁆𑀘𑀬𑁄 𑀳𑁄𑀢𑀺 𑀯𑀸 ‘‘𑀢𑀲𑁆𑀲𑀸𑀧𑀘𑁆𑀘’’𑀫𑀺𑀘𑁆𑀘𑁂𑀢𑀲𑁆𑀫𑀺𑀁 𑀅𑀢𑁆𑀣𑁂. 𑀤𑀓𑁆𑀔𑀺, 𑀤𑀓𑁆𑀔𑀻, 𑀤𑀓𑁆𑀔𑀬𑁄, 𑀤𑁄𑀡𑀲𑁆𑀲 𑀅𑀧𑀘𑁆𑀘𑀁 𑀤𑁄𑀡𑀺. 𑀏𑀯𑀁 𑀯𑀸𑀲𑀯𑀺, 𑀲𑀓𑁆𑀬𑀧𑀼𑀢𑁆𑀢𑀺, 𑀦𑀸𑀝𑀧𑀼𑀢𑁆𑀢𑀺, 𑀤𑀸𑀲𑀧𑀼𑀢𑁆𑀢𑀺, 𑀤𑀸𑀲𑀭𑀣𑀺. 𑀯𑀸𑀭𑀼𑀡𑀺, 𑀓𑀡𑁆𑀟𑀺, 𑀩𑀸𑀮𑀤𑁂𑀯𑀺, 𑀧𑀸𑀯𑀓𑀺, 𑀚𑀺𑀦𑀤𑀢𑁆𑀢𑀲𑁆𑀲 𑀅𑀧𑀘𑁆𑀘𑀁 𑀚𑁂𑀦𑀤𑀢𑁆𑀢𑀺, 𑀲𑀼𑀤𑁆𑀥𑁄𑀤𑀦𑀺, 𑀅𑀦𑀼𑀭𑀼𑀤𑁆𑀥𑀺 𑀇𑀘𑁆𑀘𑀸𑀤𑀺.

𑀧𑀼𑀦 𑀯𑀸𑀕𑁆𑀕𑀳𑀡𑁂𑀦 𑀅𑀧𑀘𑁆𑀘𑀢𑁆𑀣𑁂 𑀡𑀺𑀓𑀧𑁆𑀧𑀘𑁆𑀘𑀬𑁄, 𑀅𑀤𑀺𑀢𑀺𑀆𑀤𑀺𑀢𑁄 𑀡𑁆𑀬𑀧𑁆𑀧𑀘𑁆𑀘𑀬𑁄 𑀘. 𑀬𑀣𑀸 𑁋 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀧𑀼𑀢𑁆𑀢𑁄 𑀲𑀓𑁆𑀬𑀧𑀼𑀢𑁆𑀢𑀺𑀓𑁄, ‘‘𑀢𑁂𑀲𑀼 𑀯𑀼𑀤𑁆𑀥𑀻’’𑀢𑀺𑀆𑀤𑀺𑀦𑀸 𑀓𑀓𑀸𑀭𑀲𑁆𑀲 𑀬𑀓𑀸𑀭𑁄, 𑀲𑀓𑁆𑀬𑀧𑀼𑀢𑁆𑀢𑀺𑀬𑁄. 𑀏𑀯𑀁 𑀦𑀸𑀝𑀧𑀼𑀢𑁆𑀢𑀺𑀓𑁄, 𑀚𑁂𑀦𑀤𑀢𑁆𑀢𑀺𑀓𑁄, 𑀯𑀺𑀫𑀸𑀢𑀼𑀬𑀸 𑀧𑀼𑀢𑁆𑀢𑁄 𑀯𑁂𑀫𑀸𑀢𑀺𑀓𑁄.

‘‘𑀅𑀤𑀺𑀢𑀺𑀬𑀸 𑀧𑀼𑀢𑁆𑀢𑁄’’𑀢𑀺 𑀅𑀢𑁆𑀣𑁂 𑀡𑁆𑀬𑀧𑁆𑀧𑀘𑁆𑀘𑀬𑁄, 𑀯𑀼𑀤𑁆𑀥𑀺 𑀘.

𑁩𑁬𑁯. 𑀅𑀯𑀡𑁆𑀡𑁄 𑀬𑁂 𑀮𑁄𑀧𑀜𑁆𑀘.

𑀅𑀯𑀡𑁆𑀡𑁄 𑀢𑀤𑁆𑀥𑀺𑀢𑀪𑀽𑀢𑁂 𑀬𑀧𑁆𑀧𑀘𑁆𑀘𑀬𑁂 𑀧𑀭𑁂 𑀮𑁄𑀧𑀫𑀸𑀧𑀚𑁆𑀚𑀢𑁂. 𑀘𑀲𑀤𑁆𑀤𑁂𑀦 𑀇𑀯𑀡𑁆𑀡𑁄𑀧𑀻𑀢𑀺 𑀇𑀓𑀸𑀭𑀮𑁄𑀧𑁄, ‘‘𑀬𑀯𑀢𑀁 𑀢𑀮𑀦𑀤𑀓𑀸𑀭𑀸𑀦𑀁 𑀩𑁆𑀬𑀜𑁆𑀚𑀦𑀸𑀦𑀺 𑀘 𑀮 𑀜 𑀚𑀓𑀸𑀭𑀢𑁆𑀢’’𑀦𑁆𑀢𑀺 𑀢𑁆𑀬𑀓𑀸𑀭𑀲𑀁𑀬𑁄𑀕𑀲𑁆𑀲 𑀘𑀓𑀸𑀭𑁄, ‘‘𑀧𑀭𑀤𑁆𑀯𑁂𑀪𑀸𑀯𑁄 𑀞𑀸𑀦𑁂’’𑀢𑀺 𑀤𑁆𑀯𑀺𑀢𑁆𑀢𑀁, 𑀆𑀤𑀺𑀘𑁆𑀘𑁄. 𑀏𑀯𑀁 𑀤𑀺𑀢𑀺𑀬𑀸 𑀧𑀼𑀢𑁆𑀢𑁄 𑀤𑁂𑀘𑁆𑀘𑁄.

‘‘𑀓𑀼𑀡𑁆𑀟𑀦𑀺𑀬𑀸 𑀧𑀼𑀢𑁆𑀢𑁄’’𑀢𑀺 𑀅𑀢𑁆𑀣𑁂 𑀡𑁆𑀬𑀧𑁆𑀧𑀘𑁆𑀘𑀬𑁂 𑀓𑀢𑁂 𑁋

‘‘𑀓𑁆𑀯𑀘𑀸𑀤𑀺𑀫𑀚𑁆𑀛𑀼𑀢𑁆𑀢𑀭𑁂𑀲𑀽’’𑀢𑀺 𑀯𑀢𑁆𑀢𑀢𑁂.

𑁩𑁭𑁦. 𑀢𑁂𑀲𑀼 𑀯𑀼𑀤𑁆𑀥𑀺𑀮𑁄𑀧𑀸𑀕𑀫𑀯𑀺𑀓𑀸𑀭𑀯𑀺𑀧𑀭𑀻𑀢𑀸𑀤𑁂𑀲𑀸 𑀘.

𑀢𑁂𑀲𑀼 𑀆𑀤𑀺𑀫𑀚𑁆𑀛𑀼𑀢𑁆𑀢𑀭𑁂𑀲𑀼 𑀅𑀯𑀺𑀳𑀺𑀢𑀮𑀓𑁆𑀔𑀡𑁂𑀲𑀼 𑀚𑀺𑀦𑀯𑀘𑀦𑀸𑀦𑀼𑀧𑀭𑁄𑀥𑁂𑀦 𑀓𑁆𑀯𑀘𑀺 𑀯𑀼𑀤𑁆𑀥𑀺 𑀮𑁄𑀧 𑀆𑀕𑀫 𑀯𑀺𑀓𑀸𑀭 𑀯𑀺𑀧𑀭𑀻𑀢𑀆𑀤𑁂𑀲𑀸 𑀳𑁄𑀦𑁆𑀢𑀻𑀢𑀺 𑀲𑀁𑀬𑁄𑀕𑀦𑁆𑀢𑀢𑁆𑀢𑁂𑀧𑀺 𑀆𑀤𑀺𑀯𑀼𑀤𑁆𑀥𑀺, 𑀇𑀓𑀸𑀭𑀮𑁄𑀧𑁂 𑀦𑁆𑀬𑀲𑁆𑀲𑀜𑀸𑀤𑁂𑀲𑁄, 𑀓𑁄𑀡𑁆𑀟𑀜𑁆𑀜𑁄, 𑀓𑀼𑀭𑀼𑀦𑁄 𑀧𑀼𑀢𑁆𑀢𑁄 𑀓𑁄𑀭𑀩𑁆𑀬𑁄, 𑀏𑀢𑁆𑀣𑀸𑀧𑀺 𑀢𑁂𑀦𑁂𑀯 𑀉𑀓𑀸𑀭𑀲𑁆𑀲 𑀅𑀯𑀸𑀤𑁂𑀲𑁄, 𑀪𑀸𑀢𑀼𑀦𑁄 𑀧𑀼𑀢𑁆𑀢𑁄 𑀪𑀸𑀢𑀩𑁆𑀬𑁄.

‘‘𑀉𑀧𑀕𑀼𑀲𑁆𑀲 𑀅𑀧𑀘𑁆𑀘’’𑀦𑁆𑀢𑀺 𑀯𑀺𑀕𑁆𑀕𑀳𑁂 𑁋

𑁩𑁭𑁧. 𑀡𑀯𑁄𑀧𑀕𑁆𑀯𑀸𑀤𑀻𑀳𑀺.

𑀉𑀧𑀕𑀼 𑀫𑀦𑀼𑀇𑀘𑁆𑀘𑁂𑀯𑀫𑀸𑀤𑀻𑀳𑀺 𑀉𑀓𑀸𑀭𑀦𑁆𑀢𑁂𑀳𑀺 𑀕𑁄𑀢𑁆𑀢𑀕𑀡𑁂𑀳𑀺 𑀡𑀯𑀧𑁆𑀧𑀘𑁆𑀘𑀬𑁄 𑀳𑁄𑀢𑀺 𑀯𑀸 ‘‘𑀢𑀲𑁆𑀲𑀸𑀧𑀘𑁆𑀘’’𑀫𑀺𑀘𑁆𑀘𑁂𑀢𑀲𑁆𑀫𑀺𑀁 𑀅𑀢𑁆𑀣𑁂. 𑀆𑀤𑀺𑀲𑀤𑁆𑀤𑀲𑁆𑀲 𑀘𑁂𑀢𑁆𑀣 𑀧𑀓𑀸𑀭𑀯𑀸𑀘𑀓𑀢𑁆𑀢𑀸 𑀉𑀓𑀸𑀭𑀦𑁆𑀢𑀢𑁄𑀬𑁂𑀯𑀸𑀬𑀁. 𑀑𑀧𑀕𑀯𑁄, 𑀑𑀧𑀕𑀯𑀻, 𑀑𑀧𑀕𑀯𑀁, 𑀫𑀦𑀼𑀦𑁄 𑀅𑀧𑀘𑁆𑀘𑀁 𑀫𑀸𑀦𑀯𑁄, ‘‘𑀫𑀸𑀦𑀼𑀲𑁄’’𑀢𑀺 𑀡𑀧𑁆𑀧𑀘𑁆𑀘𑀬𑁂, 𑀲𑀸𑀕𑀫𑁂 𑀘 𑀓𑀢𑁂 𑀭𑀽𑀧𑀁, 𑀪𑀕𑁆𑀕𑀼𑀦𑁄 𑀅𑀧𑀘𑁆𑀘𑀁 𑀪𑀕𑁆𑀕𑀯𑁄, 𑀧𑀡𑁆𑀟𑀼𑀦𑁄 𑀅𑀧𑀘𑁆𑀘𑀁 𑀧𑀡𑁆𑀟𑀯𑁄, 𑀉𑀧𑀯𑀺𑀦𑁆𑀤𑀼𑀲𑁆𑀲 𑀅𑀧𑀘𑁆𑀘𑀁 𑀑𑀧𑀯𑀺𑀦𑁆𑀤𑀯𑁄 𑀇𑀘𑁆𑀘𑀸𑀤𑀺.

‘‘𑀯𑀺𑀥𑀯𑀸𑀬 𑀅𑀧𑀘𑁆𑀘’’𑀦𑁆𑀢𑀺 𑀅𑀢𑁆𑀣𑁂 𑁋

𑁩𑁭𑁨. 𑀡𑁂𑀭 𑀯𑀺𑀥𑀯𑀸𑀤𑀺𑀢𑁄.

𑀯𑀺𑀥𑀯𑀸𑀤𑀺𑀢𑁄 𑀡𑁂𑀭𑀧𑁆𑀧𑀘𑁆𑀘𑀬𑁄 𑀳𑁄𑀢𑀺 𑀯𑀸 𑀅𑀧𑀘𑁆𑀘𑀢𑁆𑀣𑁂. 𑀯𑀺𑀕𑀢𑁄 𑀥𑀯𑁄 𑀧𑀢𑀺 𑀏𑀢𑀺𑀲𑁆𑀲𑀸𑀢𑀺 𑀯𑀺𑀥𑀯𑀸, 𑀯𑁂𑀥𑀯𑁂𑀭𑁄, 𑀩𑀦𑁆𑀥𑀼𑀓𑀺𑀬𑀸 𑀅𑀪𑀺𑀲𑀸𑀭𑀺𑀡𑀺𑀬𑀸 𑀧𑀼𑀢𑁆𑀢𑁄 𑀩𑀦𑁆𑀥𑀼𑀓𑁂𑀭𑁄, 𑀲𑀫𑀡𑀲𑁆𑀲 𑀉𑀧𑀚𑁆𑀛𑀸𑀬𑀲𑁆𑀲 𑀧𑀼𑀢𑁆𑀢𑁄 𑀧𑀼𑀢𑁆𑀢𑀝𑁆𑀞𑀸𑀦𑀺𑀬𑀢𑁆𑀢𑀸𑀢𑀺 𑀲𑀸𑀫𑀡𑁂𑀭𑁄, 𑀦𑀸𑀴𑀺𑀓𑁂𑀭𑁄 𑀇𑀘𑁆𑀘𑀸𑀤𑀺.

𑀅𑀧𑀘𑁆𑀘𑀢𑀤𑁆𑀥𑀺𑀢𑀁.

𑀲𑀁𑀲𑀝𑁆𑀞𑀸𑀤𑀺𑀅𑀦𑁂𑀓𑀢𑁆𑀣𑀢𑀤𑁆𑀥𑀺𑀢

‘‘𑀢𑀺𑀮𑁂𑀦 𑀲𑀁𑀲𑀝𑁆𑀞’’𑀦𑁆𑀢𑀺 𑀯𑀺𑀕𑁆𑀕𑀳𑁂 𑁋

𑁩𑁭𑁩. 𑀬𑁂𑀦 𑀯𑀸 𑀲𑀁𑀲𑀝𑁆𑀞𑀁 𑀢𑀭𑀢𑀺 𑀘𑀭𑀢𑀺 𑀯𑀳𑀢𑀺 𑀡𑀺𑀓𑁄.

𑀬𑁂𑀦 𑀯𑀸 𑀲𑀁𑀲𑀝𑁆𑀞𑀁, 𑀬𑁂𑀦 𑀯𑀸 𑀢𑀭𑀢𑀺, 𑀬𑁂𑀦 𑀯𑀸 𑀘𑀭𑀢𑀺, 𑀬𑁂𑀦 𑀯𑀸 𑀯𑀳𑀢𑀺, 𑀢𑀢𑁄 𑀢𑀢𑀺𑀬𑀦𑁆𑀢𑀢𑁄 𑀮𑀺𑀗𑁆𑀕𑀫𑁆𑀳𑀸 𑀢𑁂𑀲𑀼 𑀲𑀁𑀲𑀝𑁆𑀞𑀸𑀤𑀻𑀲𑁆𑀯𑀢𑁆𑀣𑁂𑀲𑀼 𑀡𑀺𑀓𑀧𑁆𑀧𑀘𑁆𑀘𑀬𑁄 𑀳𑁄𑀢𑀺 𑀯𑀸. 𑀢𑁂𑀮𑀺𑀓𑀁 𑀪𑁄𑀚𑀦𑀁, 𑀢𑀺𑀮𑁂𑀦 𑀅𑀪𑀺𑀲𑀗𑁆𑀔𑀢𑀦𑁆𑀢𑀺 𑀅𑀢𑁆𑀣𑁄. 𑀢𑁂𑀮𑀺𑀓𑀻 𑀬𑀸𑀕𑀼. 𑀕𑀼𑀴𑁂𑀦 𑀲𑀁𑀲𑀝𑁆𑀞𑀁 𑀏𑀕𑀸𑀴𑀺𑀓𑀁. 𑀏𑀯𑀁 𑀖𑀸𑀢𑀺𑀓𑀁, 𑀤𑀸𑀥𑀺𑀓𑀁, 𑀫𑀸𑀭𑀺𑀘𑀺𑀓𑀁, 𑀮𑁄𑀡𑀺𑀓𑀁.

𑀦𑀸𑀯𑀸𑀬 𑀢𑀭𑀢𑀻𑀢𑀺 𑀦𑀸𑀯𑀺𑀓𑁄, 𑀉𑀴𑀼𑀫𑁆𑀧𑁂𑀦 𑀢𑀭𑀢𑀻𑀢𑀺 𑀑𑀴𑀼𑀫𑁆𑀧𑀺𑀓𑁄, 𑀯𑀼𑀤𑁆𑀥𑀺𑀅𑀪𑀸𑀯𑀧𑀓𑁆𑀔𑁂 𑀉𑀴𑀼𑀫𑁆𑀧𑀺𑀓𑁄. 𑀏𑀯𑀁 𑀓𑀼𑀮𑁆𑀮𑀺𑀓𑁄, 𑀕𑁄𑀧𑀼𑀘𑁆𑀙𑀺𑀓𑁄. 𑀲𑀓𑀝𑁂𑀦 𑀘𑀭𑀢𑀻𑀢𑀺 𑀲𑀸𑀓𑀝𑀺𑀓𑁄. 𑀏𑀯𑀁 𑀧𑀸𑀤𑀺𑀓𑁄, 𑀤𑀡𑁆𑀟𑀺𑀓𑁄, 𑀥𑀫𑁆𑀫𑁂𑀦 𑀘𑀭𑀢𑀺 𑀧𑀯𑀢𑁆𑀢𑀢𑀻𑀢𑀺 𑀥𑀫𑁆𑀫𑀺𑀓𑁄. 𑀲𑀻𑀲𑁂𑀦 𑀯𑀳𑀢𑀻𑀢𑀺 𑀲𑀻𑀲𑀺𑀓𑁄, 𑀯𑀸𑀕𑁆𑀕𑀳𑀡𑁂𑀦 𑀈𑀓𑀸𑀭𑀲𑁆𑀲 𑀯𑀼𑀤𑁆𑀥𑀺 𑀦 𑀳𑁄𑀢𑀺. 𑀏𑀯𑀁 𑀅𑀁𑀲𑀺𑀓𑁄, 𑀔𑀦𑁆𑀥𑀺𑀓𑁄, 𑀳𑀢𑁆𑀣𑀺𑀓𑁄, 𑀅𑀗𑁆𑀕𑀼𑀮𑀺𑀓𑁄.

𑀧𑀼𑀦 𑀯𑀸𑀕𑁆𑀕𑀳𑀡𑁂𑀦 𑀅𑀜𑁆𑀜𑀢𑁆𑀣𑁂𑀲𑀼𑀧𑀺 𑀡𑀺𑀓𑀧𑁆𑀧𑀘𑁆𑀘𑀬𑁄, 𑀧𑀭𑀤𑀸𑀭𑀁 𑀕𑀘𑁆𑀙𑀢𑀻𑀢𑀺 𑀧𑀸𑀭𑀤𑀸𑀭𑀺𑀓𑁄, 𑀧𑀣𑀁 𑀕𑀘𑁆𑀙𑀢𑀻𑀢𑀺 𑀧𑀣𑀺𑀓𑁄.

‘‘𑀯𑀺𑀦𑀬𑀫𑀥𑀻𑀢𑁂, 𑀅𑀯𑁂𑀘𑁆𑀘𑀸𑀥𑀻𑀢𑁂’’𑀢𑀺 𑀯𑀸 𑀯𑀺𑀕𑁆𑀕𑀳𑁂 𑁋

‘‘𑀡𑀺𑀓𑁄’’𑀢𑀺 𑀯𑀢𑁆𑀢𑀢𑁂.

𑁩𑁭𑁪. 𑀢𑀫𑀥𑀻𑀢𑁂 𑀢𑁂𑀦𑀓𑀢𑀸𑀤𑀺𑀲𑀦𑁆𑀦𑀺𑀥𑀸𑀦𑀦𑀺𑀬𑁄𑀕𑀲𑀺𑀧𑁆𑀧𑀪𑀡𑁆𑀟𑀚𑀻𑀯𑀺𑀓𑀢𑁆𑀣𑁂𑀲𑀼 𑀘.

𑀘𑀢𑀼𑀧𑁆𑀧𑀤𑀫𑀺𑀤𑀁. 𑀢𑀫𑀥𑀻𑀢𑁂𑀢𑀺 𑀅𑀢𑁆𑀣𑁂, 𑀢𑁂𑀦 𑀓𑀢𑀸𑀤𑀻𑀲𑁆𑀯𑀢𑁆𑀣𑁂𑀲𑀼 𑀘 𑀢𑀫𑁆𑀳𑀺 𑀲𑀦𑁆𑀦𑀺𑀥𑀸𑀦𑁄, 𑀢𑀢𑁆𑀣 𑀦𑀺𑀬𑀼𑀢𑁆𑀢𑁄, 𑀢𑀫𑀲𑁆𑀲 𑀲𑀺𑀧𑁆𑀧𑀁, 𑀢𑀫𑀲𑁆𑀲 𑀪𑀡𑁆𑀟𑀁, 𑀢𑀫𑀲𑁆𑀲 𑀚𑀻𑀯𑀺𑀓𑀸 𑀇𑀘𑁆𑀘𑁂𑀢𑁂𑀲𑁆𑀯𑀢𑁆𑀣𑁂𑀲𑀼 𑀘 𑀤𑀼𑀢𑀺𑀬𑀸𑀤𑀺𑀯𑀺𑀪𑀢𑁆𑀬𑀦𑁆𑀢𑁂𑀳𑀺 𑀮𑀺𑀗𑁆𑀕𑁂𑀳𑀺 𑀡𑀺𑀓𑀧𑁆𑀧𑀘𑁆𑀘𑀬𑁄 𑀳𑁄𑀢𑀺 𑀯𑀸. 𑀯𑁂𑀦𑀬𑀺𑀓𑁄. 𑀏𑀯𑀁 𑀲𑀼𑀢𑁆𑀢𑀦𑁆𑀢𑀺𑀓𑁄, 𑀆𑀪𑀺𑀥𑀫𑁆𑀫𑀺𑀓𑁄.

‘‘𑀩𑁆𑀬𑀸𑀓𑀭𑀡𑀫𑀥𑀻𑀢𑁂’’𑀢𑀺 𑀅𑀢𑁆𑀣𑁂 𑀡𑀺𑀓𑀧𑁆𑀧𑀘𑁆𑀘𑀬𑀸𑀤𑀺𑀫𑁆𑀳𑀺 𑀓𑀢𑁂 𑁋

‘‘𑀯𑀼𑀤𑁆𑀥𑀸𑀤𑀺𑀲𑀭𑀲𑁆𑀲 𑀯𑀸𑀲𑀁𑀬𑁄𑀕𑀦𑁆𑀢𑀲𑁆𑀲 𑀲𑀡𑁂 𑀘𑀸’’𑀢𑀺 𑀯𑀢𑁆𑀢𑀫𑀸𑀦𑁂 𑁋

𑁩𑁭𑁫. 𑀫𑀸𑀬𑀽𑀦𑀫𑀸𑀕𑀫𑁄 𑀞𑀸𑀦𑁂.

𑀇 𑀉𑀇𑀘𑁆𑀘𑁂𑀪𑁂𑀲𑀁 𑀆𑀤𑀺𑀲𑀭𑀸𑀦𑀁 𑀅𑀲𑀁𑀬𑁄𑀕𑀦𑁆𑀢𑀸𑀦𑀁 𑀫𑀸 𑀯𑀼𑀤𑁆𑀥𑀺 𑀳𑁄𑀢𑀺 𑀲𑀡𑁂, 𑀢𑀢𑁆𑀭𑁂𑀯 𑀯𑀼𑀤𑁆𑀥𑀺 𑀆𑀕𑀫𑁄 𑀳𑁄𑀢𑀺 𑀘 𑀞𑀸𑀦𑁂𑀢𑀺 𑀏𑀓𑀸𑀭𑀯𑀼𑀤𑁆𑀥𑀸𑀕𑀫𑁄.

‘‘𑀞𑀸𑀦𑁂’’𑀢𑀺 𑀯𑀘𑀦𑀸 𑀘𑁂𑀢𑁆𑀣, 𑀬𑀽𑀦𑀫𑀸𑀤𑁂𑀲𑀪𑀽𑀢𑀢𑁄;

𑀬𑀯𑁂𑀳𑀺 𑀧𑀼𑀩𑁆𑀩𑁂𑀯 𑀏𑀑-𑀯𑀼𑀤𑁆𑀥𑀺𑀬𑁄 𑀳𑁄𑀦𑁆𑀢𑀺 𑀆𑀕𑀫𑀸.

𑀬𑀓𑀸𑀭𑀲𑁆𑀲 𑀤𑁆𑀯𑀺𑀪𑀸𑀯𑁄.

𑀯𑁂𑀬𑁆𑀬𑀸𑀓𑀭𑀡𑀺𑀓𑁄, 𑀦𑁆𑀬𑀸𑀬𑀫𑀥𑀻𑀢𑁂𑀢𑀺 𑀦𑁂𑀬𑁆𑀬𑀸𑀬𑀺𑀓𑁄. 𑀏𑀯𑀁 𑀢𑀓𑁆𑀓𑀺𑀓𑁄, 𑀯𑁂𑀤𑀺𑀓𑁄, 𑀦𑁂𑀫𑀺𑀢𑁆𑀢𑀺𑀓𑁄, 𑀓𑀸𑀬𑁂𑀦 𑀓𑀢𑁄 𑀧𑀬𑁄𑀕𑁄 𑀓𑀸𑀬𑀺𑀓𑁄, 𑀓𑀸𑀬𑁂𑀦 𑀓𑀢𑀁 𑀓𑀫𑁆𑀫𑀁 𑀓𑀸𑀬𑀺𑀓𑀁, 𑀯𑀘𑀲𑀸 𑀓𑀢𑀁 𑀓𑀫𑁆𑀫𑀁 𑀯𑀸𑀘𑀲𑀺𑀓𑀁. 𑀏𑀯𑀁 𑀫𑀸𑀦𑀲𑀺𑀓𑀁, 𑀏𑀢𑁆𑀣 𑀘 ‘‘𑀲𑀲𑀭𑁂 𑀯𑀸𑀕𑀫𑁄’’𑀢𑀺 𑀲𑀼𑀢𑁆𑀢𑁂 𑀯𑀯𑀢𑁆𑀣𑀺𑀢𑀯𑀸𑀲𑀤𑁆𑀤𑁂𑀦 𑀧𑀘𑁆𑀘𑀬𑁂 𑀧𑀭𑁂𑀧𑀺 𑀲𑀸𑀕𑀫𑁄, 𑀣𑁂𑀭𑁂𑀳𑀺 𑀓𑀢𑀸 𑀲𑀗𑁆𑀕𑀻𑀢𑀺 𑀣𑁂𑀭𑀺𑀓𑀸. 𑀏𑀯𑀁 𑀧𑀜𑁆𑀘𑀲𑀢𑀺𑀓𑀸, 𑀲𑀢𑁆𑀢𑀲𑀢𑀺𑀓𑀸, 𑀏𑀢𑁆𑀣 ‘‘𑀡𑀯𑀡𑀺𑀓𑀸’’𑀤𑀺𑀲𑀼𑀢𑁆𑀢𑁂 𑀅𑀦𑀼𑀯𑀢𑁆𑀢𑀺𑀢𑀯𑀸𑀕𑁆𑀕𑀳𑀡𑁂𑀦 𑀈𑀧𑀘𑁆𑀘𑀬𑁄 𑀦 𑀳𑁄𑀢𑀺.

𑀲𑀦𑁆𑀦𑀺𑀥𑀸𑀦𑀢𑁆𑀣𑁂 𑀲𑀭𑀻𑀭𑁂 𑀲𑀦𑁆𑀦𑀺𑀥𑀸𑀦𑀸 𑀯𑁂𑀤𑀦𑀸 𑀲𑀸𑀭𑀻𑀭𑀺𑀓𑀸, 𑀲𑀸𑀭𑀻𑀭𑀺𑀓𑀁 𑀤𑀼𑀓𑁆𑀔𑀁. 𑀏𑀯𑀁 𑀫𑀸𑀦𑀲𑀺𑀓𑀸, 𑀫𑀸𑀦𑀲𑀺𑀓𑀁.

𑀦𑀺𑀬𑀼𑀢𑁆𑀢𑀢𑁆𑀣𑁂 𑀤𑁆𑀯𑀸𑀭𑁂 𑀦𑀺𑀬𑀼𑀢𑁆𑀢𑁄 𑀤𑁄𑀯𑀸𑀭𑀺𑀓𑁄, 𑀏𑀢𑁆𑀣 ‘‘𑀫𑀸𑀬𑀽𑀦𑀫𑀸𑀕𑀫𑁄 𑀞𑀸𑀦𑁂’’𑀢𑀺 𑀯𑀓𑀸𑀭𑀢𑁄 𑀧𑀼𑀩𑁆𑀩𑁂𑀑𑀓𑀸𑀭𑀸𑀕𑀫𑁄. 𑀏𑀯𑀁 𑀪𑀡𑁆𑀟𑀸𑀕𑀸𑀭𑀺𑀓𑁄, 𑀦𑀸𑀕𑀭𑀺𑀓𑁄, 𑀦𑀯𑀓𑀫𑁆𑀫𑀺𑀓𑁄, 𑀯𑀦𑀓𑀫𑁆𑀫𑀺𑀓𑁄, 𑀆𑀤𑀺𑀓𑀫𑁆𑀫𑀺𑀓𑁄, 𑀑𑀤𑀭𑀺𑀓𑁄, 𑀭𑀣𑀺𑀓𑁄, 𑀧𑀣𑀺𑀓𑁄, 𑀉𑀧𑀸𑀬𑁂 𑀦𑀺𑀬𑀼𑀢𑁆𑀢𑁄 𑀑𑀧𑀸𑀬𑀺𑀓𑁄, 𑀘𑁂𑀢𑀲𑀺 𑀦𑀺𑀬𑀼𑀢𑁆𑀢𑀸 𑀘𑁂𑀢𑀲𑀺𑀓𑀸.

𑀲𑀺𑀧𑁆𑀧𑀢𑁆𑀣𑁂 𑀯𑀻𑀡𑀸𑀯𑀸𑀤𑀦𑀁 𑀯𑀻𑀡𑀸, 𑀯𑀻𑀡𑀸 𑀅𑀲𑁆𑀲 𑀲𑀺𑀧𑁆𑀧𑀁 𑀯𑁂𑀡𑀺𑀓𑁄. 𑀏𑀯𑀁 𑀧𑀸𑀡𑀯𑀺𑀓𑁄, 𑀫𑁄𑀤𑀺𑀗𑁆𑀕𑀺𑀓𑁄, 𑀯𑀁𑀲𑀺𑀓𑁄.

𑀪𑀡𑁆𑀟𑀢𑁆𑀣𑁂 𑀕𑀦𑁆𑀥𑁄 𑀅𑀲𑁆𑀲 𑀪𑀡𑁆𑀟𑀦𑁆𑀢𑀺 𑀕𑀦𑁆𑀥𑀺𑀓𑁄. 𑀏𑀯𑀁 𑀢𑁂𑀮𑀺𑀓𑁄, 𑀕𑁄𑀴𑀺𑀓𑁄, 𑀧𑀽𑀯𑀺𑀓𑁄, 𑀧𑀡𑁆𑀡𑀺𑀓𑁄, 𑀢𑀫𑁆𑀩𑀽𑀮𑀺𑀓𑁄, 𑀮𑁄𑀡𑀺𑀓𑁄.

𑀚𑀻𑀯𑀺𑀓𑀢𑁆𑀣𑁂 𑀉𑀭𑀩𑁆𑀪𑀁 𑀳𑀦𑁆𑀢𑁆𑀯𑀸 𑀚𑀻𑀯𑀢𑀺, 𑀉𑀭𑀩𑁆𑀪𑀫𑀲𑁆𑀲 𑀚𑀻𑀯𑀺𑀓𑀸𑀢𑀺 𑀯𑀸 𑀑𑀭𑀩𑁆𑀪𑀺𑀓𑁄. 𑀏𑀯𑀁 𑀫𑀸𑀕𑀯𑀺𑀓𑁄, 𑀏𑀢𑁆𑀣 𑀯𑀓𑀸𑀭𑀸𑀕𑀫𑁄. 𑀲𑀽𑀓𑀭𑀺𑀓𑁄, 𑀲𑀸𑀓𑀼𑀡𑀺𑀓𑁄, 𑀫𑀘𑁆𑀙𑀺𑀓𑁄 𑀇𑀘𑁆𑀘𑀸𑀤𑀺.

‘‘𑀢𑁂𑀦 𑀓𑀢𑀸𑀤𑀻’’𑀢𑀺 𑀏𑀢𑁆𑀣 𑀆𑀤𑀺𑀕𑁆𑀕𑀳𑀡𑁂𑀦 𑀢𑁂𑀦 𑀳𑀢𑀁, 𑀢𑁂𑀦 𑀩𑀤𑁆𑀥𑀁, 𑀢𑁂𑀦 𑀓𑀻𑀢𑀁, 𑀢𑁂𑀦 𑀤𑀺𑀩𑁆𑀩𑀢𑀺, 𑀲𑁄 𑀅𑀲𑁆𑀲 𑀆𑀯𑀼𑀥𑁄, 𑀲𑁄 𑀅𑀲𑁆𑀲 𑀆𑀩𑀸𑀥𑁄, 𑀢𑀢𑁆𑀣 𑀧𑀲𑀦𑁆𑀦𑁄, 𑀢𑀲𑁆𑀲 𑀲𑀦𑁆𑀢𑀓𑀁, 𑀢𑀫𑀲𑁆𑀲 𑀧𑀭𑀺𑀫𑀸𑀡𑀁, 𑀢𑀲𑁆𑀲 𑀭𑀸𑀲𑀺, 𑀢𑀁 𑀅𑀭𑀳𑀢𑀺, 𑀢𑀫𑀲𑁆𑀲 𑀲𑀻𑀮𑀁, 𑀢𑀢𑁆𑀣 𑀚𑀸𑀢𑁄, 𑀢𑀢𑁆𑀣 𑀯𑀲𑀢𑀺, 𑀢𑀢𑁆𑀭 𑀯𑀺𑀤𑀺𑀢𑁄, 𑀢𑀤𑀢𑁆𑀣𑀸𑀬 𑀲𑀁𑀯𑀢𑁆𑀢𑀢𑀺, 𑀢𑀢𑁄 𑀆𑀕𑀢𑁄, 𑀢𑀢𑁄 𑀲𑀫𑁆𑀪𑀽𑀢𑁄, 𑀢𑀤𑀲𑁆𑀲 𑀧𑀬𑁄𑀚𑀦𑀦𑁆𑀢𑀺 𑀏𑀯𑀫𑀸𑀤𑀺𑀅𑀢𑁆𑀣𑁂 𑀘 𑀡𑀺𑀓𑀧𑁆𑀧𑀘𑁆𑀘𑀬𑁄 𑀳𑁄𑀢𑀺. 𑀬𑀣𑀸 𑁋 𑀚𑀸𑀮𑁂𑀦 𑀳𑀢𑁄, 𑀳𑀦𑀢𑀻𑀢𑀺 𑀯𑀸 𑀚𑀸𑀮𑀺𑀓𑁄. 𑀏𑀯𑀁 𑀩𑀸𑀴𑀺𑀲𑀺𑀓𑁄, 𑀯𑀸𑀓𑀭𑀺𑀓𑁄, 𑀲𑀼𑀢𑁆𑀢𑁂𑀦 𑀩𑀤𑁆𑀥𑁄 𑀲𑀼𑀢𑁆𑀢𑀺𑀓𑁄, 𑀯𑀭𑀢𑁆𑀢𑀸𑀬 𑀩𑀤𑁆𑀥𑁄 𑀯𑀸𑀭𑀢𑁆𑀢𑀺𑀓𑁄 𑀦𑀸𑀕𑁄.

𑀯𑀢𑁆𑀣𑁂𑀦 𑀓𑀻𑀢𑀁 𑀪𑀡𑁆𑀟𑀁 𑀯𑀢𑁆𑀣𑀺𑀓𑀁. 𑀏𑀯𑀁 𑀓𑀼𑀫𑁆𑀪𑀺𑀓𑀁, 𑀨𑀸𑀮𑀺𑀓𑀁, 𑀲𑁄𑀯𑀡𑁆𑀡𑀺𑀓𑀁, 𑀲𑀸𑀢𑀺𑀓𑀁. 𑀅𑀓𑁆𑀔𑁂𑀦 𑀤𑀺𑀩𑁆𑀩𑀢𑀻𑀢𑀺 𑀅𑀓𑁆𑀔𑀺𑀓𑁄. 𑀏𑀯𑀁 𑀲𑀸𑀮𑀸𑀓𑀺𑀓𑁄, 𑀢𑀺𑀦𑁆𑀤𑀼𑀓𑀺𑀓𑁄, 𑀅𑀫𑁆𑀩𑀨𑀮𑀺𑀓𑁄. 𑀘𑀸𑀧𑁄 𑀅𑀲𑁆𑀲 𑀆𑀯𑀼𑀥𑁄𑀢𑀺 𑀘𑀸𑀧𑀺𑀓𑁄. 𑀏𑀯𑀁 𑀢𑁄𑀫𑀭𑀺𑀓𑁄, 𑀫𑀼𑀕𑁆𑀕𑀭𑀺𑀓𑁄, 𑀫𑁄𑀲𑀮𑀺𑀓𑁄.

𑀯𑀸𑀢𑁄 𑀅𑀲𑁆𑀲 𑀆𑀩𑀸𑀥𑁄𑀢𑀺 𑀯𑀸𑀢𑀺𑀓𑁄. 𑀏𑀯𑀁 𑀲𑁂𑀫𑁆𑀳𑀺𑀓𑁄, 𑀧𑀺𑀢𑁆𑀢𑀺𑀓𑁄.

𑀩𑀼𑀤𑁆𑀥𑁂 𑀧𑀲𑀦𑁆𑀦𑁄 𑀩𑀼𑀤𑁆𑀥𑀺𑀓𑁄. 𑀏𑀯𑀁 𑀥𑀫𑁆𑀫𑀺𑀓𑁄, 𑀲𑀗𑁆𑀖𑀺𑀓𑁄. 𑀩𑀼𑀤𑁆𑀥𑀲𑁆𑀲 𑀲𑀦𑁆𑀢𑀓𑁄 𑀩𑀼𑀤𑁆𑀥𑀺𑀓𑁄. 𑀏𑀯𑀁 𑀥𑀫𑁆𑀫𑀺𑀓𑁄, 𑀲𑀗𑁆𑀖𑀺𑀓𑁄 𑀯𑀺𑀳𑀸𑀭𑁄, 𑀲𑀗𑁆𑀖𑀺𑀓𑀸 𑀪𑀽𑀫𑀺, 𑀲𑀗𑁆𑀖𑀺𑀓𑀁 𑀘𑀻𑀯𑀭𑀁, 𑀧𑀼𑀕𑁆𑀕𑀮𑀺𑀓𑀁.

𑀓𑀼𑀫𑁆𑀪𑁄 𑀅𑀲𑁆𑀲 𑀧𑀭𑀺𑀫𑀸𑀡𑀦𑁆𑀢𑀺 𑀓𑀼𑀫𑁆𑀪𑀺𑀓𑀁. 𑀏𑀯𑀁 𑀔𑀸𑀭𑀺𑀓𑀁, 𑀤𑁄𑀡𑀺𑀓𑀁. 𑀓𑀼𑀫𑁆𑀪𑀲𑁆𑀲 𑀭𑀸𑀲𑀺 𑀓𑀼𑀫𑁆𑀪𑀺𑀓𑁄. 𑀓𑀼𑀫𑁆𑀪𑀁 𑀅𑀭𑀳𑀢𑀻𑀢𑀺 𑀓𑀼𑀫𑁆𑀪𑀺𑀓𑁄. 𑀏𑀯𑀁 𑀤𑁄𑀡𑀺𑀓𑁄, 𑀅𑀝𑁆𑀞𑀫𑀸𑀲𑀺𑀓𑁄, 𑀓𑀳𑀸𑀧𑀡𑀺𑀓𑁄, 𑀆𑀲𑀻𑀢𑀺𑀓𑀸 𑀕𑀸𑀣𑀸, 𑀦𑀸𑀯𑀼𑀢𑀺𑀓𑀸, 𑀲𑀸𑀢𑀺𑀓𑀁, 𑀲𑀸𑀳𑀲𑁆𑀲𑀺𑀓𑀁. 𑀲𑀦𑁆𑀤𑀺𑀝𑁆𑀞𑀫𑀭𑀳𑀢𑀻𑀢𑀺 𑀲𑀦𑁆𑀤𑀺𑀝𑁆𑀞𑀺𑀓𑁄, ‘‘𑀏𑀳𑀺 𑀧𑀲𑁆𑀲𑀸’’𑀢𑀺 𑀇𑀫𑀁 𑀯𑀺𑀥𑀺𑀁 𑀅𑀭𑀳𑀢𑀻𑀢𑀺 𑀏𑀳𑀺𑀧𑀲𑁆𑀲𑀺𑀓𑁄.

𑀲𑀻𑀮𑀢𑁆𑀣𑁂 𑀧𑀁𑀲𑀼𑀓𑀽𑀮𑀥𑀸𑀭𑀡𑀁 𑀧𑀁𑀲𑀼𑀓𑀽𑀮𑀁, 𑀢𑀁 𑀲𑀻𑀮𑀫𑀲𑁆𑀲𑀸𑀢𑀺 𑀧𑀁𑀲𑀼𑀓𑀽𑀮𑀺𑀓𑁄. 𑀏𑀯𑀁 𑀢𑁂𑀘𑀻𑀯𑀭𑀺𑀓𑁄, 𑀏𑀓𑀸𑀲𑀦𑁂 𑀪𑁄𑀚𑀦𑀲𑀻𑀮𑁄 𑀏𑀓𑀸𑀲𑀦𑀺𑀓𑁄, 𑀭𑀼𑀓𑁆𑀔𑀫𑀽𑀮𑁂 𑀯𑀲𑀦𑀲𑀻𑀮𑁄 𑀭𑀼𑀓𑁆𑀔𑀫𑀽𑀮𑀺𑀓𑁄, 𑀢𑀣𑀸 𑀆𑀭𑀜𑁆𑀜𑀺𑀓𑁄, 𑀲𑁄𑀲𑀸𑀦𑀺𑀓𑁄.

𑀚𑀸𑀢𑀢𑁆𑀣𑁂 𑀅𑀧𑀸𑀬𑁂 𑀚𑀸𑀢𑁄 𑀆𑀧𑀸𑀬𑀺𑀓𑁄. 𑀏𑀯𑀁 𑀦𑁂𑀭𑀬𑀺𑀓𑁄, 𑀲𑀸𑀫𑀼𑀤𑁆𑀤𑀺𑀓𑁄 𑀫𑀘𑁆𑀙𑁄, 𑀯𑀲𑁆𑀲𑁂𑀲𑀼 𑀚𑀸𑀢𑁄 𑀯𑀲𑁆𑀲𑀺𑀓𑁄, 𑀯𑀲𑁆𑀲𑀺𑀓𑀸, 𑀯𑀲𑁆𑀲𑀺𑀓𑀁 𑀧𑀼𑀧𑁆𑀨𑀁, 𑀲𑀸𑀭𑀤𑀺𑀓𑁄, 𑀳𑁂𑀫𑀦𑁆𑀢𑀺𑀓𑁄, 𑀯𑀸𑀲𑀦𑁆𑀢𑀺𑀓𑁄, 𑀘𑀸𑀢𑀼𑀤𑁆𑀤𑀲𑀺𑀓𑁄, 𑀭𑀸𑀚𑀕𑀳𑁂 𑀚𑀸𑀢𑁄, 𑀭𑀸𑀚𑀕𑀳𑁂 𑀯𑀲𑀢𑀻𑀢𑀺 𑀯𑀸 𑀭𑀸𑀚𑀕𑀳𑀺𑀓𑁄 𑀚𑀦𑁄, 𑀫𑀕𑀥𑁂𑀲𑀼 𑀚𑀸𑀢𑁄, 𑀯𑀲𑀢𑀻𑀢𑀺 𑀯𑀸 𑀫𑀸𑀕𑀥𑀺𑀓𑁄, 𑀫𑀸𑀕𑀥𑀺𑀓𑀸, 𑀫𑀸𑀕𑀥𑀺𑀓𑀁, 𑀲𑀸𑀯𑀢𑁆𑀣𑀺𑀬𑀁 𑀚𑀸𑀢𑁄, 𑀯𑀲𑀢𑀻𑀢𑀺 𑀯𑀸 𑀲𑀸𑀯𑀢𑁆𑀣𑀺𑀓𑁄, 𑀓𑀸𑀧𑀺𑀮𑀯𑀢𑁆𑀣𑀺𑀓𑁄, 𑀯𑁂𑀲𑀸𑀮𑀺𑀓𑁄.

𑀮𑁄𑀓𑁂 𑀯𑀺𑀤𑀺𑀢𑁄 𑀮𑁄𑀓𑀺𑀓𑁄, 𑀮𑁄𑀓𑀸𑀬 𑀲𑀁𑀯𑀢𑁆𑀢𑀢𑀻𑀢𑀺𑀧𑀺 𑀮𑁄𑀓𑀺𑀓𑁄. 𑀢𑀣𑀸 𑀫𑀸𑀢𑀺𑀢𑁄 𑀆𑀕𑀢𑀁 𑀫𑀸𑀢𑀺𑀓𑀁, 𑀧𑀺𑀢𑀺𑀢𑁄 𑀆𑀕𑀢𑀁 𑀧𑁂𑀢𑁆𑀢𑀺𑀓𑀁 𑀦𑀸𑀫𑀁.

𑀲𑀫𑁆𑀪𑀽𑀢𑀢𑁆𑀣𑁂 𑀫𑀸𑀢𑀺𑀢𑁄 𑀲𑀫𑁆𑀪𑀽𑀢𑀁 𑀫𑀢𑁆𑀢𑀺𑀓𑀁. 𑀏𑀯𑀁 𑀧𑁂𑀢𑁆𑀢𑀺𑀓𑀁. 𑀉𑀧𑀥𑀺𑀢𑀲𑁆𑀲 𑀧𑀬𑁄𑀚𑀦𑀁 𑀑𑀧𑀥𑀺𑀓𑀁.

𑀲𑀓𑀢𑁆𑀣𑁂𑀧𑀺 𑀅𑀲𑀗𑁆𑀔𑀸𑀭𑁄𑀬𑁂𑀯 𑀅𑀲𑀗𑁆𑀔𑀸𑀭𑀺𑀓𑀁. 𑀏𑀯𑀁 𑀲𑀲𑀗𑁆𑀔𑀸𑀭𑀺𑀓𑀁, 𑀦𑀸𑀫𑀫𑁂𑀯 𑀦𑀸𑀫𑀺𑀓𑀁. 𑀏𑀯𑀁 𑀆𑀔𑁆𑀬𑀸𑀢𑀺𑀓𑀁, 𑀑𑀧𑀲𑀕𑁆𑀕𑀺𑀓𑀁, 𑀦𑁂𑀧𑀸𑀢𑀺𑀓𑀁, 𑀘𑀢𑀼𑀫𑀳𑀸𑀭𑀸𑀚𑁂 𑀪𑀢𑁆𑀢𑀺 𑀏𑀢𑁂𑀲𑀦𑁆𑀢𑀺 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸. 𑀏𑀯𑀁 𑀅𑀜𑁆𑀜𑀢𑁆𑀣𑁂𑀧𑀺 𑀬𑁄𑀚𑁂𑀢𑀩𑁆𑀩𑀁.

‘‘𑀓𑀲𑀸𑀯𑁂𑀦 𑀭𑀢𑁆𑀢’’𑀦𑁆𑀢𑀺 𑀯𑀺𑀕𑁆𑀕𑀳𑁂 𑁋

𑁩𑁭𑁬. 𑀡 𑀭𑀸𑀕𑀸 𑀢𑁂𑀦𑀭𑀢𑁆𑀢𑀁 𑀢𑀲𑁆𑀲𑁂𑀤𑀫𑀜𑁆𑀜𑀢𑁆𑀣𑁂𑀲𑀼 𑀘.

𑀭𑀸𑀕𑀢𑁆𑀣𑀯𑀸𑀘𑀓𑀸 𑀮𑀺𑀗𑁆𑀕𑀫𑁆𑀳𑀸 ‘‘𑀢𑁂𑀦 𑀭𑀢𑁆𑀢’’𑀫𑀺𑀘𑁆𑀘𑁂𑀢𑀲𑁆𑀫𑀺𑀁 𑀅𑀢𑁆𑀣𑁂, ‘‘𑀢𑀲𑁆𑀲𑁂’’𑀢𑀺 𑀙𑀝𑁆𑀞𑀺𑀬𑀦𑁆𑀢𑀢𑁄 ‘‘𑀇𑀤’’𑀫𑀺𑀘𑁆𑀘𑁂𑀢𑀲𑁆𑀫𑀺𑀁 𑀅𑀢𑁆𑀣𑁂 𑀘 𑀅𑀜𑁆𑀜𑀢𑁆𑀣𑁂𑀲𑀼 𑀘 𑀡𑀧𑁆𑀧𑀘𑁆𑀘𑀬𑁄 𑀳𑁄𑀢𑀺 𑀯𑀸.

𑀓𑀸𑀲𑀸𑀯𑀁 𑀯𑀢𑁆𑀣𑀁. 𑀏𑀯𑀁 𑀓𑀸𑀲𑀸𑀬𑀁, 𑀓𑀼𑀲𑀼𑀫𑁆𑀪𑁂𑀦 𑀭𑀢𑁆𑀢𑀁 𑀓𑁄𑀲𑀼𑀫𑁆𑀪𑀁, 𑀳𑀮𑀺𑀤𑁆𑀤𑀺𑀬𑀸 𑀭𑀢𑁆𑀢𑀁 𑀳𑀸𑀮𑀺𑀤𑁆𑀤𑀁, 𑀧𑀢𑁆𑀢𑀗𑁆𑀕𑀁, 𑀫𑀜𑁆𑀚𑀺𑀝𑁆𑀞𑀁, 𑀓𑀼𑀗𑁆𑀓𑀼𑀫𑀁, 𑀦𑀻𑀮𑁂𑀦 𑀭𑀢𑁆𑀢𑀁 𑀦𑀻𑀮𑀁. 𑀏𑀯𑀁 𑀧𑀻𑀢𑀁.

𑀇𑀤𑀫𑀢𑁆𑀣𑁂 𑀫𑀳𑀺𑀁𑀲𑀲𑁆𑀲 𑀇𑀤𑀁 𑀫𑀸𑀳𑀺𑀁𑀲𑀁 𑀫𑀁𑀲𑀁, 𑀤𑀥𑀺 𑀲𑀧𑁆𑀧𑀺 𑀘𑀫𑁆𑀫𑀸𑀤𑀺𑀓𑀁 𑀯𑀸, 𑀲𑀽𑀓𑀭𑀲𑁆𑀲 𑀇𑀤𑀁 𑀲𑀽𑀓𑀭𑀁, 𑀓𑀘𑁆𑀘𑀸𑀬𑀦𑀲𑁆𑀲 𑀇𑀤𑀁 𑀓𑀘𑁆𑀘𑀸𑀬𑀦𑀁 𑀩𑁆𑀬𑀸𑀓𑀭𑀡𑀁. 𑀏𑀯𑀁 𑀲𑁄𑀕𑀢𑀁 𑀲𑀸𑀲𑀦𑀁.

‘‘𑀇𑀲𑀺𑀲𑁆𑀲 𑀇𑀤’’𑀦𑁆𑀢𑀺 𑀅𑀢𑁆𑀣𑁂 𑀡𑀧𑁆𑀧𑀘𑁆𑀘𑀬𑁂 𑀓𑀢𑁂 𑀯𑀼𑀤𑁆𑀥𑀺𑀫𑁆𑀳𑀺 𑀲𑀫𑁆𑀧𑀢𑁆𑀢𑁂 𑁋

‘‘𑀲𑀡𑁂, 𑀬𑀽𑀦𑀫𑀸𑀕𑀫𑁄 𑀞𑀸𑀦𑁂’’𑀢𑀺 𑀘 𑀯𑀢𑁆𑀢𑀢𑁂.

𑁩𑁭𑁭. 𑀆𑀢𑁆𑀢𑀜𑁆𑀘.

𑀇 𑀉𑀇𑀘𑁆𑀘𑁂𑀢𑁂𑀲𑀁 𑀆𑀤𑀺𑀲𑀭𑀸𑀦𑀁 𑀆𑀢𑁆𑀢𑀜𑁆𑀘 𑀳𑁄𑀢𑀺 𑀲𑀡𑀓𑀸𑀭𑀧𑁆𑀧𑀘𑁆𑀘𑀬𑁂 𑀧𑀭𑁂, 𑀘𑀲𑀤𑁆𑀤𑁂𑀦 𑀭𑀺𑀓𑀸𑀭𑀸𑀕𑀫𑁄 𑀘 𑀞𑀸𑀦𑁂𑀢𑀺 𑀇𑀓𑀸𑀭𑀲𑁆𑀲 𑀆𑀢𑁆𑀢𑀁.

𑀞𑀸𑀦𑀸𑀥𑀺𑀓𑀸𑀭𑀢𑁄 𑀆𑀢𑁆𑀢𑀁, 𑀇𑀲𑀽𑀲𑀪𑀉𑀚𑀸𑀤𑀺𑀦𑀁;

𑀇𑀲𑀺𑀲𑁆𑀲 𑀢𑀼 𑀭𑀺𑀓𑀸𑀭𑀸𑀕-𑀫𑁄 𑀘𑀸𑀢𑁆𑀢𑀸𑀦𑀦𑁆𑀢𑀭𑁂 𑀪𑀯𑁂.

𑀆𑀭𑀺𑀲𑁆𑀬𑀁, 𑀉𑀲𑀪𑀲𑁆𑀲 𑀇𑀤𑀁 𑀆𑀲𑀪𑀁 𑀞𑀸𑀦𑀁, 𑀆𑀲𑀪𑀻 𑀯𑀸𑀘𑀸.

𑀅𑀜𑁆𑀜𑀢𑁆𑀣𑀕𑁆𑀕𑀳𑀡𑁂𑀦 𑀧𑀦 𑀅𑀯𑀺𑀤𑀽𑀭𑀪𑀯𑁄, 𑀢𑀢𑁆𑀭 𑀪𑀯𑁄, 𑀢𑀢𑁆𑀭 𑀚𑀸𑀢𑁄, 𑀢𑀢𑁄 𑀆𑀕𑀢𑁄, 𑀲𑁄 𑀅𑀲𑁆𑀲 𑀦𑀺𑀯𑀸𑀲𑁄, 𑀢𑀲𑁆𑀲 𑀇𑀲𑁆𑀲𑀭𑁄, 𑀓𑀢𑁆𑀢𑀺𑀓𑀸𑀤𑀻𑀳𑀺 𑀦𑀺𑀬𑀼𑀢𑁆𑀢𑁄 𑀫𑀸𑀲𑁄, 𑀲𑀸𑀲𑁆𑀲 𑀤𑁂𑀯𑀢𑀸, 𑀢𑀫𑀯𑁂𑀘𑁆𑀘𑀸𑀥𑀻𑀢𑁂, 𑀢𑀲𑁆𑀲 𑀯𑀺𑀲𑀬𑁄 𑀤𑁂𑀲𑁄, 𑀢𑀲𑁆𑀫𑀺𑀁 𑀤𑁂𑀲𑁂 𑀅𑀢𑁆𑀣𑀺, 𑀢𑁂𑀦 𑀦𑀺𑀩𑁆𑀩𑀢𑁆𑀢𑀁, 𑀢𑀁 𑀅𑀭𑀳𑀢𑀺, 𑀢𑀲𑁆𑀲 𑀯𑀺𑀓𑀸𑀭𑁄, 𑀢𑀫𑀲𑁆𑀲 𑀧𑀭𑀺𑀫𑀸𑀡𑀦𑁆𑀢𑀺 𑀇𑀘𑁆𑀘𑁂𑀯𑀫𑀸𑀤𑀻𑀲𑁆𑀯𑀢𑁆𑀣𑁂𑀲𑀼 𑀘 𑀡𑀧𑁆𑀧𑀘𑁆𑀘𑀬𑁄. 𑀬𑀣𑀸 𑁋 𑀯𑀺𑀤𑀺𑀲𑀸𑀬 𑀅𑀯𑀺𑀤𑀽𑀭𑁂 𑀪𑀯𑁄 𑀯𑁂𑀤𑀺𑀲𑁄 𑀕𑀸𑀫𑁄, 𑀉𑀤𑀼𑀫𑁆𑀩𑀭𑀲𑁆𑀲 𑀅𑀯𑀺𑀤𑀽𑀭𑁂 𑀪𑀯𑀁 𑀑𑀤𑀼𑀫𑁆𑀩𑀭𑀁 𑀯𑀺𑀫𑀸𑀦𑀁.

𑀪𑀯𑀢𑁆𑀣𑁂 𑀫𑀦𑀲𑀺 𑀪𑀯𑀁 𑀫𑀸𑀦𑀲𑀁 𑀲𑀼𑀔𑀁, 𑀲𑀸𑀕𑀫𑁄. 𑀲𑀭𑁂 𑀪𑀯𑁄 𑀲𑀸𑀭𑀲𑁄 𑀲𑀓𑀼𑀡𑁄, 𑀲𑀸𑀭𑀲𑀸 𑀲𑀓𑀼𑀡𑀻, 𑀲𑀸𑀭𑀲𑀁 𑀧𑀼𑀧𑁆𑀨𑀁, 𑀉𑀭𑀲𑀺 𑀪𑀯𑁄 𑀑𑀭𑀲𑁄 𑀧𑀼𑀢𑁆𑀢𑁄, 𑀉𑀭𑀲𑀺 𑀲𑀁𑀯𑀟𑁆𑀠𑀺𑀢𑀢𑁆𑀢𑀸, 𑀫𑀺𑀢𑁆𑀢𑁂 𑀪𑀯𑀸 𑀫𑁂𑀢𑁆𑀢𑀸, 𑀫𑁂𑀢𑁆𑀢𑀻 𑀯𑀸, 𑀧𑀼𑀭𑁂 𑀪𑀯𑀸 𑀧𑁄𑀭𑀻 𑀯𑀸𑀘𑀸.

𑀚𑀸𑀢𑀸𑀤𑀻𑀲𑀼 𑀧𑀸𑀯𑀼𑀲𑁂 𑀚𑀸𑀢𑁄 𑀧𑀸𑀯𑀼𑀲𑁄 𑀫𑁂𑀖𑁄, 𑀧𑀸𑀯𑀼𑀲𑀸 𑀭𑀢𑁆𑀢𑀺, 𑀧𑀸𑀯𑀼𑀲𑀁 𑀅𑀩𑁆𑀪𑀁, 𑀲𑀭𑀤𑁂 𑀚𑀸𑀢𑁄 𑀲𑀸𑀭𑀤𑁄 𑀫𑀸𑀲𑁄, 𑀲𑀸𑀭𑀤𑀸 𑀭𑀢𑁆𑀢𑀺, 𑀲𑀸𑀭𑀤𑀁 𑀧𑀼𑀧𑁆𑀨𑀁. 𑀏𑀯𑀁 𑀲𑀺𑀲𑀺𑀭𑁄, 𑀳𑁂𑀫𑀦𑁆𑀢𑁄, 𑀯𑀲𑀦𑁆𑀢𑁄, 𑀯𑀺𑀫𑁆𑀳𑁄, 𑀫𑀣𑀼𑀭𑀸𑀬𑀁 𑀚𑀸𑀢𑁄 𑀫𑀸𑀣𑀼𑀭𑁄 𑀚𑀦𑁄, 𑀫𑀸𑀣𑀼𑀭𑀸 𑀕𑀡𑀺𑀓𑀸, 𑀫𑀸𑀣𑀼𑀭𑀁 𑀯𑀢𑁆𑀣𑀁. 𑀫𑀣𑀼𑀭𑀸𑀬 𑀆𑀕𑀢𑁄 𑀫𑀸𑀣𑀼𑀭𑁄, 𑀫𑀣𑀼𑀭𑀸 𑀅𑀲𑁆𑀲 𑀦𑀺𑀯𑀸𑀲𑁄𑀢𑀺 𑀫𑀸𑀣𑀼𑀭𑁄, 𑀫𑀣𑀼𑀭𑀸𑀬 𑀇𑀲𑁆𑀲𑀭𑁄 𑀫𑀸𑀣𑀼𑀭𑁄 𑀭𑀸𑀚𑀸. ‘‘𑀲𑀩𑁆𑀩𑀢𑁄 𑀓𑁄’’𑀢𑀺 𑀏𑀢𑁆𑀣 𑀧𑀼𑀦 𑀲𑀩𑁆𑀩𑀢𑁄𑀕𑁆𑀕𑀳𑀡𑁂𑀦 𑀢𑀤𑁆𑀥𑀺𑀢𑀢𑁄𑀧𑀺 𑀓𑁆𑀯𑀘𑀺 𑀲𑀲𑀭𑀓𑀓𑀸𑀭𑀸𑀕𑀫𑁄, 𑀫𑀸𑀣𑀼𑀭𑀓𑁄 𑀯𑀸, 𑀭𑀸𑀚𑀕𑀳𑁂 𑀚𑀸𑀢𑁄, 𑀭𑀸𑀚𑀕𑀳𑀸 𑀆𑀕𑀢𑁄, 𑀭𑀸𑀚𑀕𑀳𑁄 𑀅𑀲𑁆𑀲 𑀦𑀺𑀯𑀸𑀲𑁄𑀢𑀺 𑀯𑀸, 𑀭𑀸𑀚𑀕𑀳𑀲𑁆𑀲 𑀇𑀲𑁆𑀲𑀭𑁄𑀢𑀺 𑀯𑀸 𑀭𑀸𑀚𑀕𑀳𑁄, 𑀭𑀸𑀚𑀕𑀳𑀓𑁄 𑀯𑀸. 𑀏𑀯𑀁 𑀲𑀸𑀕𑀮𑁄, 𑀲𑀸𑀕𑀮𑀓𑁄 𑀯𑀸, 𑀧𑀸𑀝𑀮𑀺𑀧𑀼𑀢𑁆𑀢𑁄, 𑀧𑀸𑀝𑀮𑀺𑀧𑀼𑀢𑁆𑀢𑀓𑁄 𑀯𑀸, 𑀯𑁂𑀲𑀸𑀮𑀺𑀬𑀁 𑀚𑀸𑀢𑁄𑀢𑀺𑀆𑀤𑀺𑀅𑀢𑁆𑀣𑁂 𑀯𑁂𑀲𑀸𑀮𑁄, 𑀯𑁂𑀲𑀸𑀮𑀓𑁄 𑀯𑀸, 𑀓𑀼𑀲𑀺𑀦𑀸𑀭𑁂 𑀚𑀸𑀢𑁄 𑀓𑁄𑀲𑀺𑀦𑀸𑀭𑁄, 𑀓𑁄𑀲𑀺𑀦𑀸𑀭𑀓𑁄 𑀯𑀸. 𑀏𑀯𑀁 𑀲𑀸𑀓𑁂𑀢𑁄, 𑀲𑀸𑀓𑁂𑀢𑀓𑁄 𑀯𑀸, 𑀓𑁄𑀲𑀫𑁆𑀩𑁄, 𑀓𑁄𑀲𑀫𑁆𑀩𑀓𑁄 𑀯𑀸, 𑀇𑀦𑁆𑀤𑀧𑀢𑁆𑀢𑁄, 𑀇𑀦𑁆𑀤𑀧𑀢𑁆𑀢𑀓𑁄 𑀯𑀸, 𑀓𑀧𑀺𑀮𑁆𑀮𑁄, 𑀓𑀧𑀺𑀮𑁆𑀮𑀓𑁄 𑀯𑀸, 𑀪𑀸𑀭𑀼𑀓𑀘𑁆𑀙𑁄, 𑀪𑀸𑀭𑀼𑀓𑀘𑁆𑀙𑀓𑁄 𑀯𑀸, 𑀦𑀕𑀭𑁂 𑀚𑀸𑀢𑁄, 𑀦𑀕𑀭𑀸 𑀆𑀕𑀢𑁄, 𑀦𑀕𑀭𑁂 𑀯𑀲𑀢𑀻𑀢𑀺 𑀯𑀸 𑀦𑀸𑀕𑀭𑁄, 𑀦𑀸𑀕𑀭𑀓𑁄 𑀯𑀸. 𑀏𑀯𑀁 𑀚𑀸𑀦𑀧𑀤𑁄.

𑀚𑀦𑀧𑀤𑀦𑀸𑀫𑁂𑀲𑀼 𑀧𑀦 𑀲𑀩𑁆𑀩𑀢𑁆𑀣 𑀩𑀳𑀼𑀯𑀘𑀦𑀫𑁂𑀯 𑀪𑀯𑀢𑀺. 𑀬𑀣𑀸 𑁋 𑀅𑀗𑁆𑀕𑁂𑀲𑀼 𑀚𑀸𑀢𑁄, 𑀅𑀗𑁆𑀕𑁂𑀳𑀺 𑀆𑀕𑀢𑁄, 𑀅𑀗𑁆𑀕𑀸 𑀅𑀲𑁆𑀲 𑀦𑀺𑀯𑀸𑀲𑁄, 𑀅𑀗𑁆𑀕𑀸𑀦𑀁 𑀇𑀲𑁆𑀲𑀭𑁄 𑀯𑀸 𑀅𑀗𑁆𑀕𑁄, 𑀅𑀗𑁆𑀕𑀓𑁄 𑀯𑀸, 𑀫𑀸𑀕𑀥𑁄, 𑀫𑀸𑀕𑀥𑀓𑁄 𑀯𑀸, 𑀓𑁄𑀲𑀮𑁄, 𑀓𑁄𑀲𑀮𑀓𑁄 𑀯𑀸, 𑀯𑁂𑀤𑁂𑀳𑁄, 𑀯𑁂𑀤𑁂𑀳𑀓𑁄 𑀯𑀸, 𑀓𑀫𑁆𑀩𑁄𑀚𑁄, 𑀓𑀫𑁆𑀩𑁄𑀚𑀓𑁄 𑀯𑀸, 𑀕𑀦𑁆𑀥𑀸𑀭𑁄, 𑀕𑀦𑁆𑀥𑀸𑀭𑀓𑁄 𑀯𑀸, 𑀲𑁄𑀯𑀻𑀭𑁄, 𑀲𑁄𑀯𑀻𑀭𑀓𑁄 𑀯𑀸, 𑀲𑀺𑀦𑁆𑀥𑀯𑁄, 𑀲𑀺𑀦𑁆𑀥𑀯𑀓𑁄 𑀯𑀸, 𑀅𑀲𑁆𑀲𑀓𑁄, 𑀓𑀸𑀮𑀺𑀗𑁆𑀕𑁄, 𑀧𑀜𑁆𑀘𑀸𑀮𑁄, 𑀲𑀓𑁆𑀓𑁄, 𑀢𑀣𑀸 𑀲𑀼𑀭𑀝𑁆𑀞𑁂 𑀚𑀸𑀢𑁄, 𑀲𑀼𑀭𑀝𑁆𑀞𑀲𑁆𑀲 𑀇𑀲𑁆𑀲𑀭𑁄 𑀯𑀸 𑀲𑁄𑀭𑀝𑁆𑀞𑁄, 𑀲𑁄𑀭𑀝𑁆𑀞𑀓𑁄 𑀯𑀸. 𑀏𑀯𑀁 𑀫𑀳𑀸𑀭𑀝𑁆𑀞𑁄, 𑀫𑀳𑀸𑀭𑀝𑁆𑀞𑀓𑁄 𑀯𑀸 𑀇𑀘𑁆𑀘𑀸𑀤𑀺.

𑀦𑀓𑁆𑀔𑀢𑁆𑀢𑀬𑁄𑀕𑁂 𑀓𑀢𑁆𑀢𑀺𑀓𑀸𑀬 𑀧𑀼𑀡𑁆𑀡𑀘𑀦𑁆𑀤𑀬𑀼𑀢𑁆𑀢𑀸𑀬 𑀬𑀼𑀢𑁆𑀢𑁄 𑀫𑀸𑀲𑁄 𑀓𑀢𑁆𑀢𑀺𑀓𑁄, 𑀫𑀕𑀲𑀺𑀭𑁂𑀦 𑀘𑀦𑁆𑀤𑀬𑀼𑀢𑁆𑀢𑁂𑀦 𑀦𑀓𑁆𑀔𑀢𑁆𑀢𑁂𑀦 𑀬𑀼𑀢𑁆𑀢𑁄 𑀫𑀸𑀲𑁄 𑀫𑀸𑀕𑀲𑀺𑀭𑁄. 𑀏𑀯𑀁 𑀨𑀼𑀲𑁆𑀲𑁂𑀦 𑀬𑀼𑀢𑁆𑀢𑁄 𑀫𑀸𑀲𑁄 𑀨𑀼𑀲𑁆𑀲𑁄, 𑀫𑀖𑀸𑀬 𑀬𑀼𑀢𑁆𑀢𑁄 𑀫𑀸𑀲𑁄 𑀫𑀸𑀖𑁄, 𑀨𑀕𑁆𑀕𑀼𑀦𑀺𑀬𑀸 𑀬𑀼𑀢𑁆𑀢𑁄 𑀫𑀸𑀲𑁄 𑀨𑀕𑁆𑀕𑀼𑀦𑁄, 𑀘𑀺𑀢𑁆𑀢𑀸𑀬 𑀬𑀼𑀢𑁆𑀢𑁄 𑀫𑀸𑀲𑁄 𑀘𑀺𑀢𑁆𑀢𑁄, 𑀯𑀺𑀲𑀸𑀔𑀸𑀬 𑀬𑀼𑀢𑁆𑀢𑁄 𑀫𑀸𑀲𑁄 𑀯𑁂𑀲𑀸𑀔𑁄, 𑀚𑁂𑀝𑁆𑀞𑀸𑀬 𑀬𑀼𑀢𑁆𑀢𑁄 𑀫𑀸𑀲𑁄 𑀚𑁂𑀝𑁆𑀞𑁄, 𑀉𑀢𑁆𑀢𑀭𑀸𑀲𑀸𑀴𑁆𑀳𑀸𑀬 𑀬𑀼𑀢𑁆𑀢𑁄 𑀫𑀸𑀲𑁄 𑀆𑀲𑀸𑀴𑁆𑀳𑁄, 𑀆𑀲𑀸𑀴𑁆𑀳𑀻 𑀯𑀸, 𑀲𑀯𑀡𑁂𑀦 𑀬𑀼𑀢𑁆𑀢𑁄 𑀫𑀸𑀲𑁄 𑀲𑀸𑀯𑀡𑁄, 𑀲𑀸𑀯𑀡𑀻. 𑀪𑀤𑁆𑀤𑁂𑀦 𑀬𑀼𑀢𑁆𑀢𑁄 𑀫𑀸𑀲𑁄 𑀪𑀤𑁆𑀤𑁄, 𑀅𑀲𑁆𑀲𑀬𑀼𑀚𑁂𑀦 𑀬𑀼𑀢𑁆𑀢𑁄 𑀫𑀸𑀲𑁄 𑀅𑀲𑁆𑀲𑀬𑀼𑀚𑁄, 𑀩𑀼𑀤𑁆𑀥𑁄 𑀅𑀲𑁆𑀲 𑀤𑁂𑀯𑀢𑀸𑀢𑀺 𑀩𑀼𑀤𑁆𑀥𑁄. 𑀏𑀯𑀁 𑀲𑁄𑀕𑀢𑁄, 𑀫𑀸𑀳𑀺𑀦𑁆𑀤𑁄, 𑀬𑀸𑀫𑁄, 𑀲𑁄𑀫𑁄.

𑀩𑁆𑀬𑀸𑀓𑀭𑀡𑀁 𑀅𑀯𑁂𑀘𑁆𑀘𑀸𑀥𑀻𑀢𑁂 𑀯𑁂𑀬𑁆𑀬𑀸𑀓𑀭𑀡𑁄. 𑀏𑀯𑀁 𑀫𑁄𑀳𑀼𑀢𑁆𑀢𑁄, 𑀦𑁂𑀫𑀺𑀢𑁆𑀢𑁄, 𑀅𑀗𑁆𑀕𑀯𑀺𑀚𑁆𑀚𑁄, 𑀯𑀢𑁆𑀣𑀼𑀯𑀺𑀚𑁆𑀚𑁄. 𑀯𑀲𑀸𑀢𑀻𑀦𑀁 𑀯𑀺𑀲𑀬𑁄 𑀤𑁂𑀲𑁄 𑀯𑀸𑀲𑀸𑀢𑁄, 𑀉𑀤𑀼𑀫𑁆𑀩𑀭𑀸 𑀅𑀲𑁆𑀫𑀺𑀁 𑀧𑀤𑁂𑀲𑁂 𑀲𑀦𑁆𑀢𑀻𑀢𑀺 𑀑𑀤𑀼𑀫𑁆𑀩𑀭𑁄 𑀤𑁂𑀲𑁄.

𑀲𑀳𑀲𑁆𑀲𑁂𑀦 𑀦𑀺𑀩𑁆𑀩𑀢𑁆𑀢𑀸 𑀲𑀸𑀳𑀲𑁆𑀲𑀻 𑀧𑀭𑀺𑀔𑀸, 𑀧𑀬𑀲𑀸 𑀦𑀺𑀩𑁆𑀩𑀢𑁆𑀢𑀁 𑀧𑀸𑀬𑀸𑀲𑀁, 𑀲𑀳𑀲𑁆𑀲𑀁 𑀅𑀭𑀳𑀢𑀻𑀢𑀺 𑀲𑀸𑀳𑀲𑁆𑀲𑀻 𑀕𑀸𑀣𑀸, 𑀅𑀬𑀲𑁄 𑀯𑀺𑀓𑀸𑀭𑁄 𑀆𑀬𑀲𑁄. 𑀏𑀯𑀁 𑀲𑁄𑀯𑀡𑁆𑀡𑁄, 𑀧𑀼𑀭𑀺𑀲𑁄 𑀧𑀭𑀺𑀫𑀸𑀡𑀫𑀲𑁆𑀲𑀸𑀢𑀺 𑀧𑁄𑀭𑀺𑀲𑀁 𑀉𑀤𑀓𑀁.

𑀘𑀕𑁆𑀕𑀳𑀡𑁂𑀦 𑀢𑀢𑁆𑀣 𑀚𑀸𑀢𑁄, 𑀢𑀢𑁆𑀣 𑀯𑀲𑀢𑀺, 𑀢𑀲𑁆𑀲 𑀳𑀺𑀢𑀁, 𑀢𑀁 𑀅𑀭𑀳𑀢𑀻𑀢𑀺𑀆𑀤𑀻𑀲𑀼 𑀡𑁂𑀬𑁆𑀬𑀧𑁆𑀧𑀘𑁆𑀘𑀬𑁄. 𑀩𑀸𑀭𑀸𑀡𑀲𑀺𑀬𑀁 𑀚𑀸𑀢𑁄, 𑀯𑀲𑀢𑀻𑀢𑀺 𑀯𑀸 𑀩𑀸𑀭𑀸𑀡𑀲𑁂𑀬𑁆𑀬𑀓𑁄, 𑀧𑀼𑀭𑁂 𑀯𑀺𑀬 𑀓𑀓𑀸𑀭𑀸𑀕𑀫𑁄. 𑀏𑀯𑀁 𑀘𑀫𑁆𑀧𑁂𑀬𑁆𑀬𑀓𑁄, 𑀲𑀸𑀕𑀮𑁂𑀬𑁆𑀬𑀓𑁄, 𑀫𑀺𑀣𑀺𑀮𑁂𑀬𑁆𑀬𑀓𑁄 𑀚𑀦𑁄, 𑀕𑀗𑁆𑀕𑁂𑀬𑁆𑀬𑁄 𑀫𑀘𑁆𑀙𑁄, 𑀲𑀺𑀮𑀸𑀬 𑀚𑀸𑀢𑀁 𑀲𑁂𑀮𑁂𑀬𑁆𑀬𑀓𑀁, 𑀓𑀼𑀮𑁂 𑀚𑀸𑀢𑁄 𑀓𑁄𑀮𑁂𑀬𑁆𑀬𑀓𑁄 𑀲𑀼𑀦𑀔𑁄, 𑀯𑀦𑁂 𑀚𑀸𑀢𑀁 𑀯𑀸𑀦𑁂𑀬𑁆𑀬𑀁 𑀧𑀼𑀧𑁆𑀨𑀁. 𑀏𑀯𑀁 𑀧𑀩𑁆𑀩𑀢𑁂𑀬𑁆𑀬𑁄 𑀫𑀸𑀦𑀼𑀲𑁄, 𑀧𑀩𑁆𑀩𑀢𑁂𑀬𑁆𑀬𑀸 𑀦𑀤𑀻, 𑀧𑀩𑁆𑀩𑀢𑁂𑀬𑁆𑀬𑀁 𑀑𑀲𑀥𑀁, 𑀧𑀣𑀲𑁆𑀲 𑀳𑀺𑀢𑀁 𑀧𑀸𑀣𑁂𑀬𑁆𑀬𑀁, 𑀲𑀧𑀢𑀺𑀲𑁆𑀲 𑀳𑀺𑀢𑀁 𑀲𑀸𑀧𑀢𑁂𑀬𑁆𑀬𑀁 𑀥𑀦𑀁, 𑀧𑀤𑀻𑀧𑁂𑀬𑁆𑀬𑀁 𑀢𑁂𑀮𑀁, 𑀫𑀸𑀢𑀼 𑀳𑀺𑀢𑀁 𑀫𑀢𑁆𑀢𑁂𑀬𑁆𑀬𑀁. 𑀏𑀯𑀁 𑀧𑁂𑀢𑁆𑀢𑁂𑀬𑁆𑀬𑀁. 𑀤𑀓𑁆𑀔𑀺𑀡𑀫𑀭𑀳𑀢𑀻𑀢𑀺 𑀤𑀓𑁆𑀔𑀺𑀡𑁂𑀬𑁆𑀬𑁄 𑀇𑀘𑁆𑀘𑀸𑀤𑀺.

𑁩𑁭𑁮. 𑀚𑀸𑀢𑀸𑀤𑀻𑀦𑀫𑀺𑀫𑀺𑀬𑀸 𑀘.

𑀚𑀸𑀢𑀇𑀘𑁆𑀘𑁂𑀯𑀫𑀸𑀤𑀻𑀦𑀁 𑀲𑀤𑁆𑀤𑀸𑀦𑀁 𑀅𑀢𑁆𑀣𑁂 𑀇𑀫 𑀇𑀬𑀇𑀘𑁆𑀘𑁂𑀢𑁂 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀯𑀸.

𑀧𑀘𑁆𑀙𑀸 𑀚𑀸𑀢𑁄 𑀧𑀘𑁆𑀙𑀺𑀫𑁄, 𑀧𑀘𑁆𑀙𑀺𑀫𑀸 𑀚𑀦𑀢𑀸, 𑀧𑀘𑁆𑀙𑀺𑀫𑀁 𑀘𑀺𑀢𑁆𑀢𑀁, 𑀅𑀦𑁆𑀢𑁂 𑀚𑀸𑀢𑁄 𑀅𑀦𑁆𑀢𑀺𑀫𑁄, 𑀅𑀦𑁆𑀢𑀺𑀫𑀸, 𑀅𑀦𑁆𑀢𑀺𑀫𑀁. 𑀏𑀯𑀁 𑀫𑀚𑁆𑀛𑀺𑀫𑁄, 𑀧𑀼𑀭𑀺𑀫𑁄, 𑀉𑀧𑀭𑀺𑀫𑁄, 𑀳𑁂𑀝𑁆𑀞𑀺𑀫𑁄, 𑀧𑀘𑁆𑀘𑀦𑁆𑀢𑀺𑀫𑁄, 𑀕𑁄𑀧𑁆𑀨𑀺𑀫𑁄, 𑀕𑀦𑁆𑀣𑀺𑀫𑁄.

𑀢𑀣𑀸 𑀇𑀬𑀧𑁆𑀧𑀘𑁆𑀘𑀬𑁂 𑀫𑀦𑀼𑀲𑁆𑀲𑀚𑀸𑀢𑀺𑀬𑀸 𑀚𑀸𑀢𑁄 𑀫𑀦𑀼𑀲𑁆𑀲𑀚𑀸𑀢𑀺𑀬𑁄, 𑀫𑀦𑀼𑀲𑁆𑀲𑀚𑀸𑀢𑀺𑀬𑀸, 𑀫𑀦𑀼𑀲𑁆𑀲𑀚𑀸𑀢𑀺𑀬𑀁. 𑀏𑀯𑀁 𑀅𑀲𑁆𑀲𑀚𑀸𑀢𑀺𑀬𑁄, 𑀳𑀢𑁆𑀣𑀺𑀚𑀸𑀢𑀺𑀬𑁄, 𑀩𑁄𑀥𑀺𑀲𑀢𑁆𑀢𑀚𑀸𑀢𑀺𑀬𑁄, 𑀤𑀩𑁆𑀩𑀚𑀸𑀢𑀺𑀬𑁄, 𑀲𑀫𑀸𑀦𑀚𑀸𑀢𑀺𑀬𑁄, 𑀮𑁄𑀓𑀺𑀬𑁄 𑀇𑀘𑁆𑀘𑀸𑀤𑀺.

𑀆𑀤𑀺𑀕𑁆𑀕𑀳𑀡𑁂𑀦 𑀢𑀢𑁆𑀣 𑀦𑀺𑀬𑀼𑀢𑁆𑀢𑁄, 𑀢𑀤𑀲𑁆𑀲 𑀅𑀢𑁆𑀣𑀺, 𑀢𑀢𑁆𑀣 𑀪𑀯𑁄𑀢𑀺𑀆𑀤𑀻𑀲𑁆𑀯𑀧𑀺 𑀇𑀫 𑀇𑀬𑀧𑁆𑀧𑀘𑁆𑀘𑀬𑀸 𑀳𑁄𑀦𑁆𑀢𑀺, 𑀘𑀲𑀤𑁆𑀤𑁂𑀦 𑀇𑀓𑀧𑁆𑀧𑀘𑁆𑀘𑀬𑁄 𑀘. 𑀅𑀦𑁆𑀢𑁂 𑀦𑀺𑀬𑀼𑀢𑁆𑀢𑁄 𑀅𑀦𑁆𑀢𑀺𑀫𑁄, 𑀅𑀦𑁆𑀢𑀺𑀬𑁄, 𑀅𑀦𑁆𑀢𑀺𑀓𑁄, 𑀧𑀼𑀢𑁆𑀢𑁄 𑀅𑀲𑁆𑀲 𑀅𑀢𑁆𑀣𑀺, 𑀢𑀲𑁆𑀫𑀺𑀁 𑀯𑀸 𑀯𑀺𑀚𑁆𑀚𑀢𑀻𑀢𑀺 𑀧𑀼𑀢𑁆𑀢𑀺𑀫𑁄, 𑀧𑀼𑀢𑁆𑀢𑀺𑀬𑁄, 𑀯𑀼𑀢𑁆𑀢𑀺𑀓𑁄, 𑀓𑀧𑁆𑀧𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀓𑀧𑁆𑀧𑀺𑀬𑁄, 𑀚𑀝𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀚𑀝𑀺𑀬𑁄, 𑀳𑀸𑀦𑀪𑀸𑀕𑁄 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀳𑀸𑀦𑀪𑀸𑀕𑀺𑀬𑁄. 𑀏𑀯𑀁 𑀞𑀺𑀢𑀺𑀪𑀸𑀕𑀺𑀬𑁄, 𑀩𑁄𑀥𑀺𑀲𑁆𑀲 𑀧𑀓𑁆𑀔𑁂 𑀪𑀯𑀸 𑀩𑁄𑀥𑀺𑀧𑀓𑁆𑀔𑀺𑀬𑀸, 𑀧𑀜𑁆𑀘𑀯𑀕𑁆𑀕𑁂 𑀪𑀯𑀸 𑀧𑀜𑁆𑀘𑀯𑀕𑁆𑀕𑀺𑀬𑀸. 𑀏𑀯𑀁 𑀙𑀩𑁆𑀩𑀕𑁆𑀕𑀺𑀬𑀸, 𑀉𑀤𑀭𑀺𑀬𑀁, 𑀅𑀢𑁆𑀢𑀦𑁄 𑀇𑀤𑀦𑁆𑀢𑀺 𑀅𑀢𑁆𑀢𑀦𑀺𑀬𑀁, 𑀦𑀓𑀸𑀭𑀸𑀕𑀫𑁄.

𑀘𑀲𑀤𑁆𑀤𑀕𑁆𑀕𑀳𑀡𑁂𑀦 𑀓𑀺𑀬 𑀬𑀡𑁆𑀬𑀧𑁆𑀧𑀘𑁆𑀘𑀬𑀸 𑀘. 𑀚𑀸𑀢𑀺𑀬𑀸 𑀦𑀺𑀬𑀼𑀢𑁆𑀢𑁄 𑀚𑀸𑀢𑀺𑀓𑀺𑀬𑁄. 𑀏𑀯𑀁 𑀅𑀦𑁆𑀥𑀓𑀺𑀬𑁄, 𑀚𑀘𑁆𑀘𑀦𑁆𑀥𑁂 𑀦𑀺𑀬𑀼𑀢𑁆𑀢𑁄 𑀚𑀘𑁆𑀘𑀦𑁆𑀥𑀓𑀺𑀬𑁄. 𑀲𑀲𑁆𑀲 𑀅𑀬𑀦𑁆𑀢𑀺 𑀲𑀓𑀺𑀬𑁄. 𑀏𑀯𑀁 𑀧𑀭𑀓𑀺𑀬𑁄.

𑀬𑀧𑁆𑀧𑀘𑁆𑀘𑀬𑁄 𑀲𑀸𑀥𑀼𑀳𑀺𑀢𑀪𑀯𑀚𑀸𑀢𑀸𑀤𑀺𑀅𑀢𑁆𑀣𑁂𑀲𑀼. 𑀬𑀣𑀸 𑁋 𑀓𑀫𑁆𑀫𑀦𑀺 𑀲𑀸𑀥𑀼 𑀓𑀫𑁆𑀫𑀜𑁆𑀜𑀁. 𑀲𑀪𑀸𑀬𑀁 𑀲𑀸𑀥𑀼 𑀲𑀩𑁆𑀪𑀁, ‘‘𑀬𑀯𑀢𑀁 𑀢𑀮𑀦𑀸’’𑀤𑀺𑀦𑀸 𑀉𑀓𑀸𑀭𑀸𑀤𑀺. 𑀏𑀯𑀁 𑀫𑁂𑀥𑀸𑀬 𑀳𑀺𑀢𑀁 𑀫𑁂𑀚𑁆𑀛𑀁 𑀖𑀝𑀁. 𑀧𑀸𑀤𑀸𑀦𑀁 𑀳𑀺𑀢𑀁 𑀧𑀚𑁆𑀚𑀁 𑀢𑁂𑀮𑀁, 𑀭𑀣𑀲𑁆𑀲 𑀳𑀺𑀢𑀸 𑀭𑀘𑁆𑀙𑀸, 𑀕𑀸𑀫𑁂 𑀪𑀯𑁄 𑀕𑀫𑁆𑀫𑁄, 𑀕𑀯𑁂 𑀪𑀯𑀁 𑀕𑀩𑁆𑀬𑀁, ‘‘𑀑𑀲𑀭𑁂 𑀘𑀸’’𑀢𑀺 𑀲𑀼𑀢𑁆𑀢𑁂 𑀘𑀲𑀤𑁆𑀤𑁂𑀦 𑀬𑀧𑁆𑀧𑀘𑁆𑀘𑀬𑁂 𑀧𑀭𑁂𑀧𑀺 𑀅𑀯𑀸𑀤𑁂𑀲𑁄. 𑀓𑀯𑀺𑀫𑁆𑀳𑀺 𑀪𑀯𑀁 𑀓𑀩𑁆𑀬𑀁, 𑀤𑀺𑀯𑀺 𑀪𑀯𑀸 𑀤𑀺𑀩𑁆𑀬𑀸, 𑀣𑀦𑀢𑁄 𑀚𑀸𑀢𑀁 𑀣𑀜𑁆𑀜𑀁, 𑀥𑀦𑀸𑀬 𑀲𑀁𑀯𑀢𑁆𑀢𑀢𑀻𑀢𑀺 𑀥𑀜𑁆𑀜𑀁.

𑀡𑁆𑀬𑀧𑁆𑀧𑀘𑁆𑀘𑀬𑁄 𑀧𑀭𑀺𑀲𑀸𑀬𑀁 𑀲𑀸𑀥𑀼 𑀧𑀸𑀭𑀺𑀲𑀚𑁆𑀚𑁄, 𑀤𑀓𑀸𑀭𑀸𑀕𑀫𑁄, 𑀲𑀫𑀡𑀸𑀦𑀁 𑀳𑀺𑀢𑀸 𑀲𑀸𑀫𑀜𑁆𑀜𑀸 𑀚𑀦𑀸, 𑀩𑁆𑀭𑀸𑀳𑁆𑀫𑀡𑀸𑀦𑀁 𑀳𑀺𑀢𑀸 𑀩𑁆𑀭𑀸𑀳𑁆𑀫𑀜𑁆𑀜𑀸, 𑀅𑀭𑀽𑀧𑁂 𑀪𑀯𑀸 𑀆𑀭𑀼𑀧𑁆𑀧𑀸 𑀇𑀘𑁆𑀘𑀸𑀤𑀺.

‘‘𑀭𑀸𑀚𑀧𑀼𑀢𑁆𑀢𑀸𑀦𑀁 𑀲𑀫𑀽𑀳𑁄’’𑀢𑀺 𑀯𑀺𑀕𑁆𑀕𑀳𑁂 𑁋

𑁩𑁭𑁯. 𑀲𑀫𑀽𑀳𑀢𑁆𑀣𑁂 𑀓𑀡𑀡𑀸.

𑀙𑀝𑁆𑀞𑀺𑀬𑀦𑁆𑀢𑀢𑁄 ‘‘𑀢𑁂𑀲𑀁 𑀲𑀫𑀽𑀳𑁄’’𑀢𑀺 𑀅𑀢𑁆𑀣𑁂 𑀓𑀡𑀡𑀇𑀘𑁆𑀘𑁂𑀢𑁂 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀭𑀸𑀚𑀧𑀼𑀢𑁆𑀢𑀓𑁄, 𑀭𑀸𑀚𑀧𑀼𑀢𑁆𑀢𑀓𑀁 𑀯𑀸, 𑀭𑀸𑀚𑀧𑀼𑀢𑁆𑀢𑁄. 𑀏𑀯𑀁 𑀫𑀸𑀦𑀼𑀲𑁆𑀲𑀓𑁄, 𑀫𑀸𑀦𑀼𑀲𑁆𑀲𑁄, 𑀫𑀸𑀣𑀼𑀭𑀓𑁄, 𑀫𑀸𑀣𑀼𑀭𑁄, 𑀧𑁄𑀭𑀺𑀲𑀓𑁄, 𑀧𑁄𑀭𑀺𑀲𑁄, 𑀯𑀼𑀤𑁆𑀥𑀸𑀦𑀁 𑀲𑀫𑀽𑀳𑁄 𑀯𑀼𑀤𑁆𑀥𑀓𑁄, 𑀯𑀼𑀤𑁆𑀥𑁄. 𑀏𑀯𑀁 𑀫𑀸𑀬𑀽𑀭𑀓𑁄, 𑀫𑀸𑀬𑀽𑀭𑁄, 𑀓𑀸𑀧𑁄𑀢𑁄, 𑀓𑁄𑀓𑀺𑀮𑁄, 𑀫𑀸𑀳𑀺𑀁𑀲𑀓𑁄, 𑀫𑀸𑀳𑀺𑀁𑀲𑁄, 𑀑𑀝𑁆𑀞𑀓𑁄, 𑀑𑀭𑀩𑁆𑀪𑀓𑁄, 𑀅𑀝𑁆𑀞𑀦𑁆𑀦𑀁 𑀲𑀫𑀽𑀳𑁄 𑀅𑀝𑁆𑀞𑀓𑁄, 𑀭𑀸𑀚𑀸𑀦𑀁 𑀲𑀫𑀽𑀳𑁄 𑀭𑀸𑀚𑀓𑁄, 𑀪𑀺𑀓𑁆𑀔𑀸𑀦𑀁 𑀲𑀫𑀽𑀳𑁄 𑀪𑀺𑀓𑁆𑀔𑁄, 𑀲𑀺𑀓𑁆𑀔𑀸𑀦𑀁 𑀲𑀫𑀽𑀳𑁄 𑀲𑀺𑀓𑁆𑀔𑁄, 𑀤𑁆𑀯𑀺𑀦𑁆𑀦𑀁 𑀲𑀫𑀽𑀳𑁄 𑀤𑁆𑀯𑀬𑀁, ‘‘𑀢𑁂𑀲𑀼 𑀯𑀼𑀤𑁆𑀥𑀻’’𑀢𑀺𑀆𑀤𑀺𑀦𑀸 𑀇𑀓𑀸𑀭𑀲𑁆𑀲 𑀅𑀬𑀸𑀤𑁂𑀲𑁄. 𑀏𑀯𑀁 𑀢𑀺𑀡𑁆𑀡𑀁 𑀲𑀫𑀽𑀳𑁄 𑀢𑀬𑀁 𑀇𑀘𑁆𑀘𑀸𑀤𑀺.

‘‘𑀲𑀫𑀽𑀳𑀢𑁆𑀣𑁂’’𑀢𑀺 𑀯𑀢𑁆𑀢𑀢𑁂.

𑁩𑁮𑁦. 𑀕𑀸𑀫𑀚𑀦𑀩𑀦𑁆𑀥𑀼𑀲𑀳𑀸𑀬𑀸𑀤𑀻𑀳𑀺 𑀢𑀸.

𑀕𑀸𑀫𑀚𑀦𑀩𑀦𑁆𑀥𑀼𑀲𑀳𑀸𑀬𑀇𑀘𑁆𑀘𑁂𑀯𑀫𑀸𑀤𑀻𑀳𑀺 𑀢𑀸𑀧𑀘𑁆𑀘𑀬𑁄 𑀳𑁄𑀢𑀺 𑀲𑀫𑀽𑀳𑀢𑁆𑀣𑁂. 𑀕𑀸𑀫𑀸𑀦𑀁 𑀲𑀫𑀽𑀳𑁄 𑀕𑀸𑀫𑀢𑀸. 𑀏𑀯𑀁 𑀚𑀦𑀢𑀸, 𑀩𑀦𑁆𑀥𑀼𑀢𑀸, 𑀲𑀳𑀸𑀬𑀢𑀸, 𑀦𑀸𑀕𑀭𑀢𑀸. ‘‘𑀢𑀸’’𑀢𑀺 𑀬𑁄𑀕𑀯𑀺𑀪𑀸𑀕𑁂𑀦 𑀲𑀓𑀢𑁆𑀣𑁂𑀧𑀺 𑀤𑁂𑀯𑁄𑀬𑁂𑀯 𑀤𑁂𑀯𑀢𑀸, 𑀢𑀸𑀧𑀘𑁆𑀘𑀬𑀦𑁆𑀢𑀲𑁆𑀲 𑀦𑀺𑀘𑁆𑀘𑀫𑀺𑀢𑁆𑀣𑀺𑀮𑀺𑀗𑁆𑀕𑀢𑀸.

𑁩𑁮𑁧. 𑀢𑀤𑀲𑁆𑀲 𑀞𑀸𑀦𑀫𑀺𑀬𑁄 𑀘.

‘‘𑀢𑀤𑀲𑁆𑀲 𑀞𑀸𑀦’’𑀫𑀺𑀘𑁆𑀘𑁂𑀢𑀲𑁆𑀫𑀺𑀁 𑀅𑀢𑁆𑀣𑁂 𑀙𑀝𑁆𑀞𑀺𑀬𑀦𑁆𑀢𑀢𑁄 𑀇𑀬𑀧𑁆𑀧𑀘𑁆𑀘𑀬𑁄 𑀳𑁄𑀢𑀺. 𑀫𑀤𑀦𑀲𑁆𑀲 𑀞𑀸𑀦𑀁 𑀫𑀤𑀦𑀺𑀬𑁄, 𑀫𑀤𑀦𑀺𑀬𑀸, 𑀫𑀤𑀦𑀺𑀬𑀁, 𑀩𑀦𑁆𑀥𑀦𑀲𑁆𑀲 𑀞𑀸𑀦𑀁 𑀩𑀦𑁆𑀥𑀦𑀺𑀬𑀁. 𑀏𑀯𑀁 𑀫𑀼𑀘𑁆𑀙𑀦𑀺𑀬𑀁. 𑀭𑀚𑀦𑀺𑀬𑀁, 𑀕𑀫𑀦𑀺𑀬𑀁, 𑀤𑀲𑁆𑀲𑀦𑀺𑀬𑀁, 𑀉𑀧𑀸𑀤𑀸𑀦𑀺𑀬𑀁, 𑀧𑀲𑀸𑀤𑀦𑀺𑀬𑀁. 𑀘𑀲𑀤𑁆𑀤𑁂𑀦 𑀳𑀺𑀢𑀸𑀤𑀺𑀅𑀢𑁆𑀣𑁂𑀧𑀺 𑀉𑀧𑀸𑀤𑀸𑀦𑀸𑀦𑀁 𑀳𑀺𑀢𑀸 𑀉𑀧𑀸𑀤𑀸𑀦𑀺𑀬𑀸 𑀇𑀘𑁆𑀘𑀸𑀤𑀺.

𑁩𑁮𑁨. 𑀉𑀧𑀫𑀢𑁆𑀣𑀸𑀬𑀺𑀢𑀢𑁆𑀢𑀁.

𑀉𑀧𑀫𑀢𑁆𑀣𑁂 𑀉𑀧𑀫𑀸𑀯𑀸𑀘𑀺𑀮𑀺𑀗𑁆𑀕𑀢𑁄 𑀆𑀬𑀺𑀢𑀢𑁆𑀢𑀧𑁆𑀧𑀘𑁆𑀘𑀬𑁄 𑀳𑁄𑀢𑀺. 𑀥𑀽𑀫𑁄 𑀯𑀺𑀬 𑀤𑀺𑀲𑁆𑀲𑀢𑀻𑀢𑀺 𑀥𑀽𑀫𑀸𑀬𑀺𑀢𑀢𑁆𑀢𑀁. 𑀏𑀯𑀁 𑀢𑀺𑀫𑀺𑀭𑀸𑀬𑀺𑀢𑀢𑁆𑀢𑀁.

‘‘𑀢𑀤𑀲𑁆𑀲 𑀞𑀸𑀦’’𑀦𑁆𑀢𑀺 𑀯𑀢𑁆𑀢𑀢𑁂.

𑁩𑁮𑁩. 𑀢𑀦𑁆𑀦𑀺𑀲𑁆𑀲𑀺𑀢𑀢𑁆𑀣𑁂 𑀮𑁄.

‘‘𑀢𑀦𑁆𑀦𑀺𑀲𑁆𑀲𑀺𑀢’’𑀦𑁆𑀢𑀺 𑀅𑀢𑁆𑀣𑁂, ‘‘𑀢𑀤𑀲𑁆𑀲𑀞𑀸𑀦’’𑀦𑁆𑀢𑀺 𑀅𑀢𑁆𑀣𑁂 𑀘 𑀮𑀧𑁆𑀧𑀘𑁆𑀘𑀬𑁄 𑀳𑁄𑀢𑀺. 𑀤𑀼𑀝𑁆𑀞𑀼 𑀦𑀺𑀲𑁆𑀲𑀺𑀢𑀁, 𑀤𑀼𑀝𑁆𑀞𑀼 𑀞𑀸𑀦𑀁 𑀯𑀸 𑀤𑀼𑀝𑁆𑀞𑀼𑀮𑁆𑀮𑀁, 𑀤𑀼𑀝𑁆𑀞𑀼𑀮𑁆𑀮𑀸 𑀯𑀸𑀘𑀸, 𑀮𑀲𑁆𑀲 𑀤𑁆𑀯𑀺𑀪𑀸𑀯𑁄. 𑀏𑀯𑀁 𑀯𑁂𑀤𑀮𑁆𑀮𑀁.

‘‘𑀅𑀪𑀺𑀚𑁆𑀛𑀸 𑀅𑀲𑁆𑀲 𑀧𑀓𑀢𑀺, 𑀅𑀪𑀺𑀚𑁆𑀛𑀸 𑀅𑀲𑁆𑀲 𑀩𑀳𑀼𑀮𑀸’’𑀢𑀺 𑀯𑀸 𑀯𑀺𑀕𑁆𑀕𑀳𑁂 𑁋

𑁩𑁮𑁪. 𑀆𑀮𑀼 𑀢𑀩𑁆𑀩𑀳𑀼𑀮𑁂.

𑀧𑀞𑀫𑀸𑀯𑀺𑀪𑀢𑁆𑀬𑀦𑁆𑀢𑀢𑁄 𑀆𑀮𑀼𑀧𑁆𑀧𑀘𑁆𑀘𑀬𑁄 𑀳𑁄𑀢𑀺 ‘‘𑀢𑀤𑀲𑁆𑀲 𑀩𑀳𑀼𑀮’’𑀫𑀺𑀘𑁆𑀘𑁂𑀢𑀲𑁆𑀫𑀺𑀁 𑀅𑀢𑁆𑀣𑁂. 𑀅𑀪𑀺𑀚𑁆𑀛𑀸𑀮𑀼, 𑀅𑀪𑀺𑀚𑁆𑀛𑀸𑀮𑀽, 𑀅𑀪𑀺𑀚𑁆𑀛𑀸𑀮𑀯𑁄. 𑀏𑀯𑀁 𑀲𑀻𑀢𑀸𑀮𑀼, 𑀥𑀚𑀸𑀮𑀼, 𑀤𑀬𑀸𑀮𑀼. ‘‘𑀲𑀩𑁆𑀩𑀢𑁄 𑀓𑁄’’𑀢𑀺 𑀏𑀢𑁆𑀣 𑀧𑀼𑀦 𑀲𑀩𑁆𑀩𑀢𑁄𑀕𑁆𑀕𑀳𑀡𑁂𑀦 𑀓𑀓𑀸𑀭𑀸𑀕𑀫𑁄, 𑀅𑀪𑀺𑀚𑁆𑀛𑀸𑀮𑀼𑀓𑁄, 𑀅𑀪𑀺𑀚𑁆𑀛𑀸𑀮𑀼𑀓𑀸, 𑀅𑀪𑀺𑀚𑁆𑀛𑀸𑀮𑀼𑀓𑀁. 𑀏𑀯𑀁 𑀲𑀻𑀢𑀸𑀮𑀼𑀓𑁄, 𑀤𑀬𑀸𑀮𑀼𑀓𑁄, 𑀢𑀣𑀸 𑀳𑀻𑀦𑁄𑀯 𑀳𑀻𑀦𑀓𑁄. 𑀏𑀯𑀁 𑀧𑁄𑀢𑀓𑁄, 𑀓𑀼𑀫𑀸𑀭𑀓𑁄, 𑀫𑀸𑀡𑀯𑀓𑁄, 𑀫𑀼𑀤𑀼𑀓𑁄, 𑀉𑀚𑀼𑀓𑁄, 𑀅𑀧𑁆𑀧𑀫𑀢𑁆𑀢𑀓𑀁, 𑀑𑀭𑀫𑀢𑁆𑀢𑀓𑀁, 𑀲𑀻𑀮𑀫𑀢𑁆𑀢𑀓𑀁 𑀇𑀘𑁆𑀘𑀸𑀤𑀺.

‘‘𑀬𑀤𑀦𑀼𑀧𑀧𑀦𑁆𑀦𑀸 𑀦𑀺𑀧𑀸𑀢𑀦𑀸 𑀲𑀺𑀚𑁆𑀛𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀧𑀝𑀺𑀪𑀸𑀕𑀓𑀼𑀘𑁆𑀙𑀺𑀢𑀲𑀜𑁆𑀜𑀸𑀦𑀼𑀓𑀫𑁆𑀧𑀸𑀤𑀺𑀅𑀢𑁆𑀣𑁂𑀲𑀼 𑀓𑀧𑁆𑀧𑀘𑁆𑀘𑀬𑁄. 𑀧𑀝𑀺𑀪𑀸𑀕𑀢𑁆𑀣𑁂 𑀳𑀢𑁆𑀣𑀺𑀦𑁄 𑀇𑀯 𑀳𑀢𑁆𑀣𑀺𑀓𑀸. 𑀏𑀯𑀁 𑀅𑀲𑁆𑀲𑀓𑀸. 𑀓𑀼𑀘𑁆𑀙𑀺𑀢𑀢𑁆𑀣𑁂 𑀓𑀼𑀘𑁆𑀙𑀺𑀢𑁄 𑀲𑀫𑀡𑁄 𑀲𑀫𑀡𑀓𑁄. 𑀏𑀯𑀁 𑀩𑁆𑀭𑀸𑀳𑁆𑀫𑀡𑀓𑁄, 𑀫𑀼𑀡𑁆𑀟𑀓𑁄, 𑀧𑀡𑁆𑀟𑀺𑀢𑀓𑁄, 𑀯𑁂𑀬𑁆𑀬𑀸𑀓𑀭𑀡𑀓𑁄. 𑀲𑀜𑁆𑀜𑀸𑀬𑀁 𑀓𑀢𑀓𑁄, 𑀪𑀝𑀓𑁄. 𑀅𑀦𑀼𑀓𑀫𑁆𑀧𑀸𑀬𑀁 𑀧𑀼𑀢𑁆𑀢𑀓𑁄.

𑀢𑀣𑀸 𑀓𑀺𑀁𑀬𑀢𑁂𑀢𑀢𑁄 𑀧𑀭𑀺𑀫𑀸𑀡𑀢𑁆𑀣𑁂 𑀢𑁆𑀢𑀓𑀯𑀦𑁆𑀢𑀼𑀧𑁆𑀧𑀘𑁆𑀘𑀬𑀸. 𑀓𑀺𑀁 𑀧𑀭𑀺𑀫𑀸𑀡𑀫𑀲𑁆𑀲𑀸𑀢𑀺 𑀓𑀺𑀢𑁆𑀢𑀓𑀁. 𑀏𑀯𑀁 𑀬𑀢𑁆𑀢𑀓𑀁, 𑀢𑀢𑁆𑀢𑀓𑀁, 𑀏𑀢𑁆𑀢𑀓𑀁. 𑀯𑀦𑁆𑀢𑀼𑀫𑁆𑀳𑀺 𑀆𑀢𑁆𑀢𑀜𑁆𑀘, 𑀬𑀁 𑀧𑀭𑀺𑀫𑀸𑀡𑀫𑀲𑁆𑀲𑀸𑀢𑀺 𑀬𑀸𑀯𑀸, 𑀬𑀸𑀯𑀦𑁆𑀢𑁄, 𑀕𑀼𑀡𑀯𑀦𑁆𑀢𑀼𑀲𑀫𑀁. 𑀏𑀯𑀁 𑀢𑀸𑀯𑀸, 𑀢𑀸𑀯𑀦𑁆𑀢𑁄. 𑀏𑀢𑀸𑀯𑀸, 𑀏𑀢𑀸𑀯𑀦𑁆𑀢𑁄 𑀇𑀘𑁆𑀘𑀸𑀤𑀺.

‘‘𑀲𑀼𑀯𑀡𑁆𑀡𑁂𑀦 𑀧𑀓𑀢’’𑀦𑁆𑀢𑀺 𑀯𑀺𑀕𑁆𑀕𑀳𑁂 𑁋

𑁩𑁮𑁫. 𑀢𑀧𑁆𑀧𑀓𑀢𑀺𑀯𑀘𑀦𑁂 𑀫𑀬𑁄.

𑀢𑀧𑁆𑀧𑀓𑀢𑀺𑀯𑀘𑀦𑀢𑁆𑀣𑁂 𑀫𑀬𑀧𑁆𑀧𑀘𑁆𑀘𑀬𑁄 𑀳𑁄𑀢𑀺, 𑀧𑀓𑀭𑀻𑀬𑀢𑀻𑀢𑀺 𑀧𑀓𑀢𑀺, 𑀢𑁂𑀦 𑀧𑀓𑀢𑀺 𑀢𑀧𑁆𑀧𑀓𑀢𑀺, 𑀢𑀧𑁆𑀧𑀓𑀢𑀺𑀬𑀸 𑀯𑀘𑀦𑀁 𑀓𑀣𑀦𑀁 𑀢𑀧𑁆𑀧𑀓𑀢𑀺𑀯𑀘𑀦𑀁. 𑀲𑀼𑀯𑀡𑁆𑀡𑀫𑀬𑁄 𑀭𑀣𑁄, 𑀲𑁄𑀯𑀡𑁆𑀡𑀫𑀬𑁄 𑀯𑀸, 𑀲𑀼𑀯𑀡𑁆𑀡𑀫𑀬𑀸 𑀪𑀸𑀚𑀦𑀯𑀺𑀓𑀢𑀺, 𑀲𑀼𑀯𑀡𑁆𑀡𑀫𑀬𑀁 𑀪𑀸𑀚𑀦𑀁. 𑀏𑀯𑀁 𑀭𑀽𑀧𑀺𑀬𑀫𑀬𑀁, 𑀭𑀚𑀢𑀫𑀬𑀁, 𑀚𑀢𑀼𑀫𑀬𑀁, 𑀤𑀸𑀭𑀼𑀫𑀬𑀁, 𑀫𑀢𑁆𑀢𑀺𑀓𑀸𑀫𑀬𑀁, 𑀇𑀤𑁆𑀥𑀺𑀬𑀸 𑀦𑀺𑀩𑁆𑀩𑀢𑁆𑀢𑀁 𑀇𑀤𑁆𑀥𑀺𑀫𑀬𑀁.

𑀫𑀦𑀢𑁄 𑀦𑀺𑀧𑁆𑀨𑀦𑁆𑀦𑀸 𑀫𑀦𑁄𑀫𑀬𑀸, 𑀅𑀬𑀲𑀸𑀧𑀓𑀢𑀁 𑀅𑀬𑁄𑀫𑀬𑀁. 𑀏𑀢𑁆𑀣 𑀘 ‘‘𑀫𑀦𑁄𑀕𑀡𑀸𑀤𑀻𑀦’’𑀦𑁆𑀢𑀺 𑀯𑀢𑁆𑀢𑀫𑀸𑀦𑁂 𑁋

𑁩𑁮𑁬. 𑀏𑀢𑁂𑀲𑀫𑁄 𑀮𑁄𑀧𑁂.

𑀏𑀢𑁂𑀲𑀁 𑀫𑀦𑁄𑀕𑀡𑀸𑀤𑀻𑀦𑀁 𑀅𑀦𑁆𑀢𑁄 𑀑𑀢𑁆𑀢𑀫𑀸𑀧𑀚𑁆𑀚𑀢𑁂 𑀯𑀺𑀪𑀢𑁆𑀢𑀺𑀮𑁄𑀧𑁂 𑀓𑀢𑁂𑀢𑀺 𑀑𑀓𑀸𑀭𑁄.

𑀕𑀯𑁂𑀦 𑀧𑀓𑀢𑀁 𑀓𑀭𑀻𑀲𑀁, 𑀕𑁄𑀢𑁄 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀯𑀸 𑀕𑁄𑀫𑀬𑀁. ‘‘𑀫𑀬𑁄’’𑀢𑀺𑀬𑁄𑀕𑀯𑀺𑀪𑀸𑀕𑁂𑀦 𑀲𑀓𑀢𑁆𑀣𑁂𑀧𑀺 𑀤𑀸𑀦𑀫𑁂𑀯 𑀤𑀸𑀦𑀫𑀬𑀁, 𑀲𑀻𑀮𑀫𑀬𑀁 𑀇𑀘𑁆𑀘𑀸𑀤𑀺.

𑀲𑀁𑀲𑀝𑁆𑀞𑀸𑀤𑀺𑀅𑀦𑁂𑀓𑀢𑁆𑀣𑀢𑀤𑁆𑀥𑀺𑀢𑀁.

𑀪𑀸𑀯𑀢𑀤𑁆𑀥𑀺𑀢

‘‘𑀅𑀮𑀲𑀲𑁆𑀲 𑀪𑀸𑀯𑁄’’𑀢𑀺 𑀯𑀺𑀕𑁆𑀕𑀳𑁂 𑁋

𑁩𑁮𑁭. 𑀡𑁆𑀬𑀢𑁆𑀢𑀢𑀸 𑀪𑀸𑀯𑁂 𑀢𑀼.

𑀙𑀝𑁆𑀞𑀺𑀬𑀦𑁆𑀢𑀢𑁄 𑀡𑁆𑀬𑀢𑁆𑀢𑀢𑀸𑀇𑀘𑁆𑀘𑁂𑀢𑁂 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 ‘‘𑀢𑀲𑁆𑀲 𑀪𑀸𑀯𑁄’’ 𑀇𑀘𑁆𑀘𑁂𑀢𑀲𑁆𑀫𑀺𑀁 𑀅𑀢𑁆𑀣𑁂, 𑀢𑀼𑀲𑀤𑁆𑀤𑀕𑁆𑀕𑀳𑀡𑁂𑀦 𑀢𑁆𑀢𑀦𑀡𑁂𑀬𑁆𑀬𑀸𑀤𑀺𑀧𑁆𑀧𑀘𑁆𑀘𑀬𑀸 𑀘. 𑀪𑀯𑀦𑁆𑀢𑀺 𑀏𑀢𑀲𑁆𑀫𑀸 𑀩𑀼𑀤𑁆𑀥𑀺𑀲𑀤𑁆𑀤𑀸 𑀇𑀢𑀺 𑀪𑀸𑀯𑁄, 𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀁 𑀯𑀼𑀘𑁆𑀘𑀢𑀺, 𑀯𑀼𑀢𑁆𑀢𑀜𑁆𑀘 𑁋 ‘‘𑀬𑀲𑁆𑀲 𑀕𑀼𑀡𑀲𑁆𑀲 𑀳𑀺 𑀪𑀸𑀯𑀸 𑀤𑀩𑁆𑀩𑁂 𑀲𑀤𑁆𑀤𑀦𑀺𑀯𑁂𑀲𑁄 𑀢𑀤𑀪𑀺𑀥𑀸𑀦𑁂𑀡𑁆𑀬𑀢𑁆𑀢𑀢𑀸𑀤𑀬𑁄’’𑀢𑀺. 𑀡𑁆𑀬𑀢𑁆𑀢𑀢𑁆𑀢𑀦𑀦𑁆𑀢𑀸𑀦𑀁 𑀦𑀺𑀘𑁆𑀘𑀁 𑀦𑀧𑀼𑀁𑀲𑀓𑀢𑁆𑀢𑀁, 𑀢𑀸𑀧𑀘𑁆𑀘𑀬𑀦𑁆𑀢𑀲𑁆𑀲 𑀲𑀪𑀸𑀯𑀢𑁄 𑀦𑀺𑀘𑁆𑀘𑀫𑀺𑀢𑁆𑀣𑀺𑀮𑀺𑀗𑁆𑀕𑀢𑀸. 𑀡𑁆𑀬𑀧𑁆𑀧𑀘𑁆𑀘𑀬𑁄𑀬𑀁 𑀕𑀼𑀡𑀯𑀘𑀦𑁂 𑀩𑁆𑀭𑀸𑀳𑁆𑀫𑀡𑀸𑀤𑀻𑀳𑀺, 𑀢𑀢𑁆𑀣 ‘‘𑀅𑀯𑀡𑁆𑀡𑁄 𑀬𑁂 𑀮𑁄𑀧𑀜𑁆𑀘𑀸’’𑀢𑀺 𑀅𑀯𑀡𑁆𑀡𑀮𑁄𑀧𑁄, 𑀆𑀤𑀺𑀯𑀼𑀤𑁆𑀥𑀺.

𑀆𑀮𑀲𑁆𑀬𑀁. 𑀏𑀯𑀁 𑀆𑀭𑁄𑀕𑁆𑀬𑀁, 𑀉𑀤𑀕𑁆𑀕𑀲𑁆𑀲 𑀪𑀸𑀯𑁄 𑀑𑀤𑀕𑁆𑀬𑀁, 𑀲𑀔𑀺𑀦𑁄 𑀪𑀸𑀯𑁄 𑀲𑀔𑁆𑀬𑀁, 𑀅𑀡𑀡𑀲𑁆𑀲 𑀪𑀸𑀯𑁄 𑀆𑀡𑀡𑁆𑀬𑀁, 𑀯𑀺𑀥𑀯𑀸𑀬 𑀪𑀸𑀯𑁄 𑀯𑁂𑀥𑀩𑁆𑀬𑀁, 𑀤𑀼𑀩𑁆𑀩𑀮𑀲𑁆𑀲 𑀪𑀸𑀯𑁄 𑀤𑀼𑀩𑁆𑀩𑀮𑁆𑀬𑀁, 𑀘𑀧𑀮𑀲𑁆𑀲 𑀪𑀸𑀯𑁄 𑀘𑀸𑀧𑀮𑁆𑀬𑀁.

𑀯𑀺𑀬𑀢𑁆𑀢𑀲𑁆𑀲 𑀪𑀸𑀯𑁄 𑀯𑁂𑀬𑁆𑀬𑀢𑁆𑀢𑀺𑀬𑀁, 𑀫𑀘𑁆𑀙𑀭𑀲𑁆𑀲 𑀪𑀸𑀯𑁄 𑀫𑀘𑁆𑀙𑀭𑀺𑀬𑀁. 𑀏𑀯𑀁 𑀇𑀲𑁆𑀲𑀭𑀺𑀬𑀁, 𑀆𑀮𑀲𑀺𑀬𑀁, 𑀫𑀼𑀡𑁆𑀟𑀺𑀬𑀁, 𑀫𑀽𑀴𑁆𑀳𑀺𑀬𑀁. 𑀏𑀢𑁆𑀣 ‘‘𑀯𑁂𑀬𑁆𑀬𑀢𑁆𑀢𑀺𑀬’’𑀦𑁆𑀢𑀺𑀆𑀤𑀻𑀲𑀼 ‘‘𑀢𑁂𑀲𑀼 𑀯𑀼𑀤𑁆𑀥𑀻’’𑀢𑀺𑀆𑀤𑀺𑀦𑀸 𑀬𑀫𑁆𑀳𑀺 𑀇𑀓𑀸𑀭𑀸𑀕𑀫𑁄.

‘‘𑀧𑀡𑁆𑀟𑀺𑀢𑀲𑁆𑀲 𑀪𑀸𑀯𑁄 𑀧𑀡𑁆𑀟𑀺𑀢𑁆𑀬’’𑀦𑁆𑀢𑀺𑀆𑀤𑀻𑀲𑀼 ‘‘𑀬𑀯𑀢𑀁 𑀢𑀮𑀦𑀤𑀓𑀸𑀭𑀸𑀦𑀁 𑀩𑁆𑀬𑀜𑁆𑀚𑀦𑀸𑀦𑀺 𑀘𑀮𑀜𑀚𑀓𑀸𑀭𑀢𑁆𑀢’’𑀦𑁆𑀢𑀺 𑀢𑁆𑀬𑀓𑀸𑀭𑀲𑀁𑀬𑁄𑀕𑀸𑀤𑀻𑀦𑀁 𑀘𑀮𑀜𑀚𑀓𑀸𑀭𑀸𑀤𑁂𑀲𑀸, 𑀤𑁆𑀯𑀺𑀢𑁆𑀢𑀁. 𑀧𑀡𑁆𑀟𑀺𑀘𑁆𑀘𑀁, 𑀩𑀳𑀼𑀲𑁆𑀲𑀼𑀢𑀲𑁆𑀲 𑀪𑀸𑀯𑁄 𑀩𑀸𑀳𑀼𑀲𑁆𑀲𑀘𑁆𑀘𑀁, ‘‘𑀢𑁂𑀲𑀼 𑀯𑀼𑀤𑁆𑀥𑀻’’𑀢𑀺𑀆𑀤𑀺𑀦𑀸 𑀉𑀓𑀸𑀭𑀲𑁆𑀲 𑀅𑀓𑀸𑀭𑁄, 𑀏𑀯𑀁 𑀧𑁄𑀭𑁄𑀳𑀺𑀘𑁆𑀘𑀁, 𑀅𑀥𑀺𑀧𑀢𑀺𑀲𑁆𑀲 𑀪𑀸𑀯𑁄 𑀆𑀥𑀺𑀧𑀘𑁆𑀘𑀁, 𑀫𑀼𑀝𑁆𑀞𑀲𑁆𑀲𑀢𑀺𑀲𑁆𑀲 𑀪𑀸𑀯𑁄 𑀫𑀼𑀝𑁆𑀞𑀲𑁆𑀲𑀘𑁆𑀘𑀁, 𑀇𑀯𑀡𑁆𑀡𑀮𑁄𑀧𑁄. 𑀓𑀼𑀲𑀮𑀲𑁆𑀲 𑀪𑀸𑀯𑁄 𑀓𑁄𑀲𑀮𑁆𑀮𑀁. 𑀏𑀯𑀁 𑀯𑁂𑀧𑀼𑀮𑁆𑀮𑀁, 𑀲𑀫𑀸𑀦𑀸𑀦𑀁 𑀪𑀸𑀯𑁄 𑀲𑀸𑀫𑀜𑁆𑀜𑀁, 𑀕𑀺𑀮𑀸𑀦𑀲𑁆𑀲 𑀪𑀸𑀯𑁄 𑀕𑁂𑀮𑀜𑁆𑀜𑀁, ‘‘𑀓𑁆𑀯𑀘𑀸𑀤𑀺𑀫𑀚𑁆𑀛𑀼𑀢𑁆𑀢𑀭𑀸’’𑀤𑀺𑀲𑀼𑀢𑁆𑀢𑁂𑀦 𑀲𑀁𑀬𑁄𑀕𑁂 𑀧𑀭𑁂 𑀭𑀲𑁆𑀲𑀢𑁆𑀢𑀁.

𑀲𑀼𑀳𑀤𑀲𑁆𑀲 𑀪𑀸𑀯𑁄𑀲𑁄𑀳𑀚𑁆𑀚𑀁. 𑀏𑀯𑀁 𑀯𑁂𑀲𑀸𑀭𑀚𑁆𑀚𑀁, 𑀓𑀼𑀲𑀻𑀤𑀲𑁆𑀲𑀪𑀸𑀯𑁄𑀓𑁄𑀲𑀚𑁆𑀚𑀁, ‘‘𑀢𑁂𑀲𑀼 𑀯𑀼𑀤𑁆𑀥𑀻’’𑀢𑀺𑀆𑀤𑀺𑀦𑀸 𑀈𑀓𑀸𑀭𑀲𑁆𑀲 𑀅𑀓𑀸𑀭𑁄. 𑀢𑀣𑀸 ‘‘𑀧𑀼𑀭𑀺𑀲𑀲𑁆𑀲 𑀪𑀸𑀯𑁄 𑀧𑁄𑀭𑀺𑀲’’𑀦𑁆𑀢𑀺𑀆𑀤𑀻𑀲𑀼 ‘‘𑀬𑀯𑀢𑀁 𑀢𑀮𑀦𑀸’’𑀤𑀺𑀲𑀼𑀢𑁆𑀢𑁂 𑀓𑀸𑀭𑀕𑁆𑀕𑀳𑀡𑁂𑀦 𑀬𑀯𑀢𑀁 𑀲𑀓𑀸𑀭𑀓𑀘𑀝𑀧𑀯𑀕𑁆𑀕𑀸𑀦𑀁 𑀲𑀓𑀸𑀭𑀓𑀘𑀝𑀧𑀯𑀕𑁆𑀕𑀸𑀤𑁂𑀲𑀸. 𑀲𑀼𑀫𑀦𑀲𑁆𑀲 𑀪𑀸𑀯𑁄 𑀲𑁄𑀫𑀦𑀲𑁆𑀲𑀁. 𑀏𑀯𑀁 𑀤𑁄𑀫𑀦𑀲𑁆𑀲𑀁, 𑀲𑁄𑀯𑀘𑀲𑁆𑀲𑀁, 𑀤𑁄𑀯𑀘𑀲𑁆𑀲𑀁, 𑀏𑀢𑁆𑀣 𑀲𑀓𑀸𑀭𑀸𑀕𑀫𑁄. 𑀢𑀣𑀸 𑀦𑀺𑀧𑀓𑀲𑁆𑀲 𑀪𑀸𑀯𑁄 𑀦𑁂𑀧𑀓𑁆𑀓𑀁, 𑀤𑁆𑀯𑀺𑀢𑁆𑀢𑀁. 𑀏𑀯𑀁 𑀆𑀥𑀺𑀓𑁆𑀓𑀁, 𑀤𑀼𑀪𑀕𑀲𑁆𑀲 𑀪𑀸𑀯𑁄 𑀤𑁄𑀪𑀕𑁆𑀕𑀁, 𑀯𑀸𑀡𑀺𑀚𑀲𑁆𑀲 𑀪𑀸𑀯𑁄 𑀯𑀸𑀡𑀺𑀚𑁆𑀚𑀁, 𑀭𑀸𑀚𑀺𑀦𑁄 𑀪𑀸𑀯𑁄 𑀭𑀚𑁆𑀚𑀁, ‘‘𑀓𑁆𑀯𑀘𑀸’’𑀤𑀺𑀦𑀸 𑀭𑀲𑁆𑀲𑀢𑁆𑀢𑀁. 𑀲𑀭𑀽𑀧𑀲𑁆𑀲 𑀪𑀸𑀯𑁄 𑀲𑀸𑀭𑀼𑀧𑁆𑀧𑀁. 𑀏𑀯𑀁 𑀑𑀧𑀫𑁆𑀫𑀁, 𑀲𑁄𑀔𑀼𑀫𑁆𑀫𑀁.