𑁪. 𑀲𑀫𑀸𑀲𑀓𑀡𑁆𑀟

𑀅𑀣 𑀦𑀸𑀫𑀫𑁂𑀯 𑀅𑀜𑁆𑀜𑀫𑀜𑁆𑀜𑀲𑀫𑁆𑀩𑀦𑁆𑀥𑀻𑀦𑀁 𑀲𑀫𑀸𑀲𑁄𑀢𑀺 𑀦𑀸𑀫𑀦𑀺𑀲𑁆𑀲𑀺𑀢𑀢𑁆𑀢𑀸, 𑀲𑀬𑀜𑁆𑀘 𑀦𑀸𑀫𑀺𑀓𑀢𑁆𑀢𑀸 𑀦𑀸𑀫𑀸𑀦𑀦𑁆𑀢𑀭𑀁 𑀲𑀫𑀸𑀲𑁄 𑀯𑀼𑀘𑁆𑀘𑀢𑁂.

𑀲𑁄 𑀘 𑀲𑀜𑁆𑀜𑀸𑀯𑀲𑁂𑀦 𑀙𑀩𑁆𑀩𑀺𑀥𑁄 𑀅𑀩𑁆𑀬𑀬𑀻𑀪𑀸𑀯𑁄 𑀓𑀫𑁆𑀫𑀥𑀸𑀭𑀬𑁄 𑀤𑀺𑀕𑀼 𑀢𑀧𑁆𑀧𑀼𑀭𑀺𑀲𑁄 𑀩𑀳𑀼𑀩𑁆𑀩𑀻𑀳𑀺 𑀤𑁆𑀯𑀦𑁆𑀤𑁄 𑀘𑀸𑀢𑀺.

𑀅𑀩𑁆𑀬𑀬𑀻𑀪𑀸𑀯𑀲𑀫𑀸𑀲

𑀢𑀢𑁆𑀭 𑀧𑀞𑀫𑀁 𑀅𑀩𑁆𑀬𑀬𑀻𑀪𑀸𑀯𑀲𑀫𑀸𑀲𑁄 𑀯𑀼𑀘𑁆𑀘𑀢𑁂;

𑀲𑁄 𑀘 𑀦𑀺𑀘𑁆𑀘𑀲𑀫𑀸𑀲𑁄𑀢𑀺 𑀅𑀲𑁆𑀲𑀧𑀤𑀯𑀺𑀕𑁆𑀕𑀳𑁄.

‘‘𑀉𑀧𑀦𑀕𑀭𑀁’’𑀇𑀢𑀻𑀥 𑁋 𑀉𑀧𑀲𑀤𑁆𑀤𑀢𑁄 𑀧𑀞𑀫𑁂𑀓𑀯𑀘𑀦𑀁 𑀲𑀺, 𑀢𑀲𑁆𑀲 𑀉𑀧𑀲𑀕𑁆𑀕𑀧𑀭𑀢𑁆𑀢𑀸 ‘‘𑀲𑀩𑁆𑀩𑀸𑀲𑀫𑀸𑀯𑀼𑀲𑁄𑀧𑀲𑀕𑁆𑀕𑀦𑀺𑀧𑀸𑀢𑀸𑀤𑀻𑀳𑀺 𑀘𑀸’’𑀢𑀺 𑀮𑁄𑀧𑁄, 𑀦𑀕𑀭𑀲𑀤𑁆𑀤𑀢𑁄 𑀙𑀝𑁆𑀞𑁂𑀓𑀯𑀘𑀦𑀁 𑀲, 𑀦𑀕𑀭𑀲𑁆𑀲 𑀲𑀫𑀻𑀧𑀦𑁆𑀢𑀺 𑀅𑀜𑁆𑀜𑀧𑀤𑁂𑀦 𑀯𑀺𑀕𑁆𑀕𑀳𑁂 𑁋

‘‘𑀦𑀸𑀫𑀸𑀦𑀁 𑀲𑀫𑀸𑀲𑁄 𑀬𑀼𑀢𑁆𑀢𑀢𑁆𑀣𑁄’’𑀢𑀺 𑀲𑀫𑀸𑀲𑀯𑀺𑀥𑀸𑀦𑁂 𑀲𑀩𑁆𑀩𑀢𑁆𑀣 𑀯𑀢𑁆𑀢𑀢𑁂.

𑁩𑁩𑁦. 𑀉𑀧𑀲𑀕𑁆𑀕𑀦𑀺𑀧𑀸𑀢𑀧𑀼𑀩𑁆𑀩𑀓𑁄 𑀅𑀩𑁆𑀬𑀬𑀻𑀪𑀸𑀯𑁄.

𑀉𑀧𑀲𑀕𑁆𑀕𑀧𑀼𑀩𑁆𑀩𑀓𑁄, 𑀦𑀺𑀧𑀸𑀢𑀧𑀼𑀩𑁆𑀩𑀓𑁄 𑀘 𑀦𑀸𑀫𑀺𑀓𑁄 𑀬𑀼𑀢𑁆𑀢𑀢𑁆𑀣𑁄 𑀢𑁂𑀳𑁂𑀯 𑀅𑀢𑁆𑀢𑀧𑀼𑀩𑁆𑀩𑀓𑁂𑀳𑀺 𑀉𑀧𑀲𑀕𑁆𑀕𑀦𑀺𑀧𑀸𑀢𑁂𑀳𑀺 𑀲𑀳 𑀦𑀺𑀘𑁆𑀘𑀁 𑀲𑀫𑀲𑀻𑀬𑀢𑁂, 𑀲𑁄 𑀘 𑀲𑀫𑀸𑀲𑁄 𑀅𑀩𑁆𑀬𑀬𑀻𑀪𑀸𑀯𑀲𑀜𑁆𑀜𑁄 𑀳𑁄𑀢𑀺. 𑀇𑀥 𑀅𑀩𑁆𑀬𑀬𑀻𑀪𑀸𑀯𑀸𑀤𑀺𑀲𑀜𑁆𑀜𑀸𑀯𑀺𑀥𑀸𑀬𑀓𑀲𑀼𑀢𑁆𑀢𑀸𑀦𑁂𑀯 𑀯𑀸 𑀲𑀜𑁆𑀜𑀸𑀯𑀺𑀥𑀸𑀦𑀫𑀼𑀔𑁂𑀦 𑀲𑀫𑀸𑀲𑀯𑀺𑀥𑀸𑀬𑀓𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀸𑀦𑀺.

𑀢𑀢𑁆𑀣 𑀅𑀩𑁆𑀬𑀬𑀫𑀺𑀢𑀺 𑀉𑀧𑀲𑀕𑁆𑀕𑀦𑀺𑀧𑀸𑀢𑀸𑀦𑀁 𑀲𑀜𑁆𑀜𑀸, 𑀮𑀺𑀗𑁆𑀕𑀯𑀘𑀦𑀪𑁂𑀤𑁂𑀧𑀺 𑀩𑁆𑀬𑀬𑀭𑀳𑀺𑀢𑀢𑁆𑀢𑀸, 𑀅𑀩𑁆𑀬𑀬𑀸𑀦𑀁 𑀅𑀢𑁆𑀣𑀁 𑀯𑀺𑀪𑀸𑀯𑀬𑀢𑀻𑀢𑀺 𑀅𑀩𑁆𑀬𑀬𑀻𑀪𑀸𑀯𑁄 𑀅𑀩𑁆𑀬𑀬𑀢𑁆𑀣𑀧𑀼𑀩𑁆𑀩𑀗𑁆𑀕𑀫𑀢𑁆𑀢𑀸, 𑀅𑀦𑀩𑁆𑀬𑀬𑀁 𑀅𑀩𑁆𑀬𑀬𑀁 𑀪𑀯𑀢𑀻𑀢𑀺 𑀯𑀸 𑀅𑀩𑁆𑀬𑀬𑀻𑀪𑀸𑀯𑁄. 𑀧𑀼𑀩𑁆𑀩𑀧𑀤𑀢𑁆𑀣𑀧𑁆𑀧𑀥𑀸𑀦𑁄 𑀳𑀺 𑀅𑀩𑁆𑀬𑀬𑀻𑀪𑀸𑀯𑁄, 𑀏𑀢𑁆𑀣 𑀘 ‘‘𑀉𑀧𑀲𑀕𑁆𑀕𑀦𑀺𑀧𑀸𑀢𑀧𑀼𑀩𑁆𑀩𑀓𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀉𑀧𑀲𑀕𑁆𑀕𑀦𑀺𑀧𑀸𑀢𑀸𑀦𑀫𑁂𑀯 𑀧𑀼𑀩𑁆𑀩𑀦𑀺𑀧𑀸𑀢𑁄.

𑁩𑁩𑁧. 𑀦𑀸𑀫𑀸𑀦𑀁 𑀲𑀫𑀸𑀲𑁄 𑀬𑀼𑀢𑁆𑀢𑀢𑁆𑀣𑁄.

𑀢𑁂𑀲𑀁 𑀦𑀸𑀫𑀸𑀦𑀁 𑀧𑀬𑀼𑀚𑁆𑀚𑀫𑀸𑀦𑀧𑀤𑀢𑁆𑀣𑀸𑀦𑀁 𑀬𑁄 𑀬𑀼𑀢𑁆𑀢𑀢𑁆𑀣𑁄, 𑀲𑁄 𑀲𑀫𑀸𑀲𑀲𑀜𑁆𑀜𑁄 𑀳𑁄𑀢𑀺, 𑀢𑀤𑀜𑁆𑀜𑀁 𑀯𑀸𑀓𑁆𑀬𑀫𑀺𑀢𑀺 𑀭𑀼𑀴𑁆𑀳𑀁.

𑀦𑀸𑀫𑀸𑀦𑀺 𑀲𑁆𑀬𑀸𑀤𑀺𑀯𑀺𑀪𑀢𑁆𑀬𑀦𑁆𑀢𑀸𑀦𑀺, 𑀲𑀫𑀲𑁆𑀲𑀢𑁂𑀢𑀺 𑀲𑀫𑀸𑀲𑁄, 𑀲𑀗𑁆𑀔𑀺𑀧𑀺𑀬𑀢𑀻𑀢𑀺 𑀅𑀢𑁆𑀣𑁄.

𑀯𑀼𑀢𑁆𑀢𑀜𑁆𑀳𑀺

‘‘𑀲𑀫𑀸𑀲𑁄 𑀧𑀤𑀲𑀗𑁆𑀔𑁂𑀧𑁄, 𑀧𑀤𑀧𑁆𑀧𑀘𑁆𑀘𑀬𑀲𑀁𑀳𑀺𑀢𑀁;

𑀢𑀤𑁆𑀥𑀺𑀢𑀁 𑀦𑀸𑀫 𑀳𑁄𑀢𑁂𑀯𑀁, 𑀯𑀺𑀜𑁆𑀜𑁂𑀬𑁆𑀬𑀁 𑀢𑁂𑀲𑀫𑀦𑁆𑀢𑀭’’𑀦𑁆𑀢𑀺.

𑀤𑀼𑀯𑀺𑀥𑀜𑁆𑀘𑀲𑁆𑀲 𑀲𑀫𑀲𑀦𑀁 𑀲𑀤𑁆𑀤𑀲𑀫𑀲𑀦𑀫𑀢𑁆𑀣𑀲𑀫𑀲𑀦𑀜𑁆𑀘, 𑀢𑀤𑀼𑀪𑀬𑀫𑁆𑀧𑀺 𑀮𑀼𑀢𑁆𑀢𑀲𑀫𑀸𑀲𑁂 𑀧𑀭𑀺𑀧𑀼𑀡𑁆𑀡𑀫𑁂𑀯 𑀮𑀩𑁆𑀪𑀢𑀺. 𑀅𑀮𑀼𑀢𑁆𑀢𑀲𑀫𑀸𑀲𑁂 𑀧𑀦 𑀅𑀢𑁆𑀣𑀲𑀫𑀲𑀦𑀫𑁂𑀯 𑀯𑀺𑀪𑀢𑁆𑀢𑀺𑀮𑁄𑀧𑀸𑀪𑀸𑀯𑀢𑁄, 𑀢𑀢𑁆𑀣𑀸𑀧𑀺 𑀯𑀸 𑀏𑀓𑀧𑀤𑀢𑁆𑀢𑀽𑀧𑀕𑀫𑀦𑀢𑁄 𑀤𑀼𑀯𑀺𑀥𑀫𑁆𑀧𑀺 𑀮𑀩𑁆𑀪𑀢𑁂𑀯. 𑀤𑁆𑀯𑁂 𑀳𑀺 𑀲𑀫𑀸𑀲𑀲𑁆𑀲 𑀧𑀬𑁄𑀚𑀦𑀸𑀦𑀺 𑀏𑀓𑀧𑀤𑀢𑁆𑀢𑀫𑁂𑀓𑀯𑀺𑀪𑀢𑁆𑀢𑀺𑀢𑁆𑀢𑀜𑁆𑀘𑀸𑀢𑀺.

𑀬𑀼𑀢𑁆𑀢𑁄 𑀅𑀢𑁆𑀣𑁄 𑀬𑀼𑀢𑁆𑀢𑀢𑁆𑀢𑁄, 𑀅𑀣 𑀯𑀸 𑀬𑀼𑀢𑁆𑀢𑁄 𑀲𑀗𑁆𑀕𑀢𑁄, 𑀲𑀫𑁆𑀩𑀦𑁆𑀥𑁄 𑀯𑀸 𑀅𑀢𑁆𑀣𑁄 𑀬𑀲𑁆𑀲 𑀲𑁄𑀬𑀁 𑀬𑀼𑀢𑁆𑀢𑀢𑁆𑀣𑁄, 𑀏𑀢𑁂𑀦 𑀲𑀗𑁆𑀕𑀢𑀢𑁆𑀣𑁂𑀦 𑀬𑀼𑀢𑁆𑀢𑀢𑁆𑀣𑀯𑀘𑀦𑁂𑀦 𑀪𑀺𑀦𑁆𑀦𑀢𑁆𑀣𑀸𑀦𑀁 𑀏𑀓𑀢𑁆𑀣𑀻𑀪𑀸𑀯𑁄 𑀲𑀫𑀸𑀲𑀮𑀓𑁆𑀔𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁆𑀣 𑀘 ‘‘𑀦𑀸𑀫𑀸𑀦’’𑀦𑁆𑀢𑀺 𑀯𑀘𑀦𑁂𑀦 ‘‘𑀤𑁂𑀯𑀤𑀢𑁆𑀢𑁄 𑀧𑀘𑀢𑀻’’𑀢𑀺𑀆𑀤𑀻𑀲𑀼 𑀆𑀔𑁆𑀬𑀸𑀢𑁂𑀦 𑀲𑀫𑀸𑀲𑁄 𑀦 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀲𑀫𑁆𑀩𑀦𑁆𑀥𑀢𑁆𑀣𑁂𑀦 𑀧𑀦 𑀬𑀼𑀢𑁆𑀢𑀢𑁆𑀣𑀕𑁆𑀕𑀳𑀡𑁂𑀦 ‘‘𑀪𑀝𑁄 𑀭𑀜𑁆𑀜𑁄 𑀧𑀼𑀢𑁆𑀢𑁄 𑀤𑁂𑀯𑀤𑀢𑁆𑀢𑀲𑁆𑀲𑀸’’𑀢𑀺𑀆𑀤𑀻𑀲𑀼 𑀅𑀜𑁆𑀜𑀫𑀜𑁆𑀜𑀸𑀦𑀧𑁂𑀓𑁆𑀔𑁂𑀲𑀼, ‘‘𑀤𑁂𑀯𑀤𑀢𑁆𑀢𑀲𑁆𑀲 𑀓𑀡𑁆𑀳𑀸 𑀤𑀦𑁆𑀢𑀸’’𑀢𑀺𑀆𑀤𑀻𑀲𑀼 𑀘 𑀅𑀜𑁆𑀜𑀲𑀸𑀧𑁂𑀓𑁆𑀔𑁂𑀲𑀼 𑀅𑀬𑀼𑀢𑁆𑀢𑀢𑁆𑀣𑀢𑀸𑀬 𑀲𑀫𑀸𑀲𑁄 𑀦 𑀳𑁄𑀢𑀻𑀢𑀺 𑀤𑀻𑀧𑁂𑀢𑀺.

‘‘𑀅𑀢𑁆𑀣𑀯𑀲𑀸 𑀯𑀺𑀪𑀢𑁆𑀢𑀺𑀯𑀺𑀧𑀭𑀺𑀡𑀸𑀫𑁄’’𑀢𑀺 𑀯𑀺𑀧𑀭𑀺𑀡𑀸𑀫𑁂𑀦 ‘‘𑀬𑀼𑀢𑁆𑀢𑀢𑁆𑀣𑀸𑀦’’𑀦𑁆𑀢𑀺 𑀯𑀢𑁆𑀢𑀢𑁂.

𑁩𑁩𑁨. 𑀢𑁂𑀲𑀁 𑀯𑀺𑀪𑀢𑁆𑀢𑀺𑀬𑁄 𑀮𑁄𑀧𑀸 𑀘.

𑀇𑀥 𑀧𑀤𑀦𑁆𑀢𑀭𑁂𑀦 𑀯𑀸 𑀢𑀤𑁆𑀥𑀺𑀢𑀧𑁆𑀧𑀘𑁆𑀘𑀬𑁂𑀳𑀺 𑀯𑀸 𑀆𑀬𑀸𑀤𑀺𑀧𑁆𑀧𑀘𑁆𑀘𑀬𑁂𑀳𑀺 𑀯𑀸 𑀏𑀓𑀢𑁆𑀣𑀻𑀪𑀽𑀢𑀸 𑀬𑀼𑀢𑁆𑀢𑀢𑁆𑀣𑀸 𑀦𑀸𑀫, 𑀢𑁂𑀦 ‘‘𑀢𑁂𑀲𑀁 𑀬𑀼𑀢𑁆𑀢𑀢𑁆𑀣𑀸𑀦𑀁 𑀲𑀫𑀸𑀲𑀸𑀦𑀁, 𑀢𑀤𑁆𑀥𑀺𑀢𑀸𑀬𑀸𑀤𑀺𑀧𑁆𑀧𑀘𑁆𑀘𑀬𑀦𑁆𑀢𑀸𑀦𑀜𑁆𑀘 𑀯𑀺𑀪𑀢𑁆𑀢𑀺𑀬𑁄 𑀮𑁄𑀧𑀦𑀻𑀬𑀸 𑀳𑁄𑀦𑁆𑀢𑀻’’𑀢𑀺 𑀅𑀢𑁆𑀣𑁄. 𑀲𑀫𑀸𑀲𑀕𑁆𑀕𑀳𑀡𑀸𑀥𑀺𑀓𑀸𑀭𑁂 𑀧𑀦 𑀲𑀢𑀺 𑀢𑁂𑀲𑀁𑀕𑀳𑀡𑁂𑀦 𑀯𑀸 𑀢𑀤𑁆𑀥𑀺𑀢𑀸𑀬𑀸𑀤𑀺𑀧𑁆𑀧𑀘𑁆𑀘𑀬𑀦𑁆𑀢 𑀯𑀺𑀪𑀢𑁆𑀢𑀺𑀮𑁄𑀧𑁄. 𑀘𑀕𑁆𑀕𑀳𑀡𑀁 ‘‘𑀧𑀪𑀗𑁆𑀓𑀭𑁄’’𑀢𑀺𑀆𑀤𑀻𑀲𑀼 𑀮𑁄𑀧𑀦𑀺𑀯𑀢𑁆𑀢𑀦𑀢𑁆𑀣𑀁.

𑀯𑀺𑀧𑀭𑀺𑀡𑀸𑀫𑁂𑀦 ‘‘𑀮𑀼𑀢𑁆𑀢𑀸𑀲𑀼, 𑀯𑀺𑀪𑀢𑁆𑀢𑀻𑀲𑀽’’𑀢𑀺 𑀯𑀢𑁆𑀢𑀢𑁂, 𑀬𑀼𑀢𑁆𑀢𑀢𑁆𑀣𑀕𑁆𑀕𑀳𑀡𑀜𑁆𑀘.

𑁩𑁩𑁩. 𑀧𑀓𑀢𑀺 𑀘𑀲𑁆𑀲 𑀲𑀭𑀦𑁆𑀢𑀲𑁆𑀲.

𑀮𑀼𑀢𑁆𑀢𑀸𑀲𑀼 𑀯𑀺𑀪𑀢𑁆𑀢𑀻𑀲𑀼 𑀲𑀭𑀦𑁆𑀢𑀲𑁆𑀲 𑀅𑀲𑁆𑀲 𑀬𑀼𑀢𑁆𑀢𑀢𑁆𑀣𑀪𑀽𑀢𑀲𑁆𑀲 𑀢𑀺𑀯𑀺𑀥𑀲𑁆𑀲𑀧𑀺 𑀮𑀺𑀗𑁆𑀕𑀲𑁆𑀲 𑀧𑀓𑀢𑀺𑀪𑀸𑀯𑁄 𑀳𑁄𑀢𑀺. 𑀘𑀲𑀤𑁆𑀤𑁂𑀦 𑀓𑀺𑀁𑀲𑀫𑀼𑀤𑀬 𑀇𑀤𑀧𑁆𑀧𑀘𑁆𑀘𑀬𑀢𑀸𑀤𑀻𑀲𑀼 𑀦𑀺𑀕𑁆𑀕𑀳𑀻𑀢𑀦𑁆𑀢𑀲𑁆𑀲𑀧𑀺. 𑀦𑀺𑀫𑀺𑀢𑁆𑀢𑀸𑀪𑀸𑀯𑁂 𑀦𑁂𑀫𑀺𑀢𑁆𑀢𑀓𑀸𑀪𑀸𑀯𑀲𑁆𑀲 𑀇𑀥 𑀅𑀦𑀺𑀘𑁆𑀙𑀺𑀢𑀢𑁆𑀢𑀸 𑀅𑀬𑀫𑀢𑀺𑀤𑁂𑀲𑁄.

𑀲𑀓𑀢𑁆𑀣𑀯𑀺𑀭𑀳𑁂𑀦𑀺𑀥 𑀲𑀫𑀸𑀲𑀲𑁆𑀲 𑀘 𑀮𑀺𑀗𑁆𑀕𑀪𑀸𑀯𑀸𑀪𑀸𑀯𑀸 𑀯𑀺𑀪𑀢𑁆𑀢𑀼𑀧𑁆𑀧𑀢𑁆𑀢𑀺𑀬𑀫𑀲𑀫𑁆𑀧𑀢𑁆𑀢𑀸𑀬𑀁 𑀦𑀸𑀫𑀩𑁆𑀬𑀧𑀤𑁂𑀲𑀸𑀢𑀺𑀤𑁂𑀲𑀫𑀸𑀳.

𑁩𑁩𑁪. 𑀢𑀤𑁆𑀥𑀺𑀢𑀲𑀫𑀸𑀲𑀓𑀺𑀢𑀓𑀸 𑀦𑀸𑀫𑀁𑀯𑀸’𑀢𑀯𑁂𑀢𑀼𑀦𑀸𑀤𑀻𑀲𑀼 𑀘.

𑀢𑀤𑁆𑀥𑀺𑀢𑀦𑁆𑀢𑀸, 𑀓𑀺𑀢𑀦𑁆𑀢𑀸, 𑀲𑀫𑀸𑀲𑀸 𑀘 𑀦𑀸𑀫𑀫𑀺𑀯 𑀤𑀝𑁆𑀞𑀩𑁆𑀩𑀸 𑀢𑀯𑁂𑀢𑀼𑀦 𑀢𑁆𑀯𑀸𑀦 𑀢𑁆𑀯𑀸𑀤𑀺𑀧𑁆𑀧𑀘𑁆𑀘𑀬𑀦𑁆𑀢𑁂 𑀯𑀚𑁆𑀚𑁂𑀢𑁆𑀯𑀸. 𑀘𑀕𑁆𑀕𑀳𑀡𑀁 𑀓𑀺𑀘𑁆𑀘𑀧𑁆𑀧𑀘𑁆𑀘𑀬𑀆𑀈𑀇𑀦𑀻𑀇𑀢𑁆𑀣𑀺𑀧𑁆𑀧𑀘𑁆𑀘𑀬𑀦𑁆𑀢𑀸𑀤𑀺𑀲𑁆𑀲𑀧𑀺 𑀦𑀸𑀫𑀩𑁆𑀬𑀧𑀤𑁂𑀲𑀢𑁆𑀣𑀁. 𑀇𑀥 𑀲𑀫𑀸𑀲𑀕𑁆𑀕𑀳𑀡𑀁 𑀅𑀢𑁆𑀣𑀯𑀢𑀁 𑀲𑀫𑀼𑀤𑀸𑀬𑀸𑀦𑀁 𑀦𑀸𑀫𑀩𑁆𑀬𑀧𑀤𑁂𑀲𑁄 𑀲𑀫𑀸𑀲𑀲𑁆𑀲𑁂𑀯𑀸𑀢𑀺 𑀦𑀺𑀬𑀫𑀢𑁆𑀣𑀦𑁆𑀢𑀺 𑀅𑀧𑀭𑁂.

‘‘𑀅𑀩𑁆𑀬𑀬𑀻𑀪𑀸𑀯𑁄’’𑀢𑀺 𑀯𑀢𑁆𑀢𑀢𑁂.

𑁩𑁩𑁫. 𑀲𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑁄.

𑀲𑁄 𑀅𑀩𑁆𑀬𑀬𑀻𑀪𑀸𑀯𑀲𑀫𑀸𑀲𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑁄𑀯 𑀤𑀝𑁆𑀞𑀩𑁆𑀩𑁄𑀢𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁆𑀢𑀁. 𑀏𑀢𑁆𑀣 𑀳𑀺 𑀲𑀢𑀺𑀧𑀺 𑀮𑀺𑀗𑁆𑀕𑀸𑀢𑀺𑀤𑁂𑀲𑁂 ‘‘𑀅𑀥𑀺𑀧𑀜𑁆𑀜’’𑀦𑁆𑀢𑀺𑀆𑀤𑀻𑀲𑀼 ‘‘𑀅𑀥𑀺𑀜𑀸𑀡𑀁’’𑀦𑁆𑀢𑀺𑀆𑀤𑀺 𑀭𑀽𑀧𑀧𑁆𑀧𑀲𑀗𑁆𑀕𑁄 𑀦 𑀳𑁄𑀢𑀺 𑀲𑀤𑁆𑀤𑀦𑁆𑀢𑀭𑀢𑁆𑀢𑀸, ‘‘𑀢𑀺𑀧𑀜𑁆𑀜’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬𑀸𑀢𑀺 𑀤𑀝𑁆𑀞𑀩𑁆𑀩𑀁, 𑀦 𑀘𑀸𑀬𑀁 𑀅𑀢𑀺𑀤𑁂𑀲𑁄, 𑀲𑀼𑀢𑁆𑀢𑁂 𑀅𑀢𑀺𑀤𑁂𑀲𑀮𑀺𑀗𑁆𑀕𑀲𑁆𑀲 𑀇𑀯𑀲𑀤𑁆𑀤𑀲𑁆𑀲 𑀅𑀤𑀲𑁆𑀲𑀦𑀢𑁄. 𑀧𑀼𑀭𑁂 𑀯𑀺𑀬 𑀲𑁆𑀬𑀸𑀤𑁆𑀬𑀼𑀧𑁆𑀧𑀢𑁆𑀢𑀺.

‘‘𑀓𑁆𑀯𑀘𑀻’’𑀢𑀺 𑀯𑀢𑁆𑀢𑀢𑁂.

𑁩𑁩𑁬. 𑀅𑀁 𑀯𑀺𑀪𑀢𑁆𑀢𑀻𑀦𑀫𑀓𑀸𑀭𑀦𑁆𑀢𑀸 𑀅𑀩𑁆𑀬𑀬𑀻𑀪𑀸𑀯𑀸.

𑀢𑀲𑁆𑀫𑀸 𑀅𑀓𑀸𑀭𑀦𑁆𑀢𑀸 𑀅𑀩𑁆𑀬𑀬𑀻𑀪𑀸𑀯𑀸 𑀧𑀭𑀸𑀲𑀁 𑀯𑀺𑀪𑀢𑁆𑀢𑀻𑀦𑀁 𑀓𑁆𑀯𑀘𑀺 𑀅𑀁 𑀳𑁄𑀢𑀺, 𑀲𑁂𑀲𑀁 𑀦𑁂𑀬𑁆𑀬𑀁.

𑀢𑀁 𑀉𑀧𑀦𑀕𑀭𑀁, 𑀦𑀕𑀭𑀲𑁆𑀲 𑀲𑀫𑀻𑀧𑀁 𑀢𑀺𑀝𑁆𑀞𑀢𑀻𑀢𑀺 𑀅𑀢𑁆𑀣𑁄. 𑀢𑀸𑀦𑀺 𑀉𑀧𑀦𑀕𑀭𑀁, 𑀆𑀮𑀧𑀦𑁂𑀧𑁂𑀯𑀁, 𑀢𑀁 𑀉𑀧𑀦𑀕𑀭𑀁 𑀧𑀲𑁆𑀲, 𑀢𑀸𑀦𑀺 𑀉𑀧𑀦𑀕𑀭𑀁.

𑀦 𑀧𑀜𑁆𑀘𑀫𑁆𑀬𑀸𑀬𑀫𑀫𑁆𑀪𑀸𑀯𑁄, 𑀓𑁆𑀯𑀘𑀻𑀢𑀺 𑀅𑀥𑀺𑀓𑀸𑀭𑀢𑁄;

𑀢𑀢𑀺𑀬𑀸𑀲𑀢𑁆𑀢𑀫𑀻𑀙𑀝𑁆𑀞𑀻-𑀦𑀦𑁆𑀢𑀼 𑀳𑁄𑀢𑀺 𑀯𑀺𑀓𑀧𑁆𑀧𑀢𑁄.

𑀢𑁂𑀦 𑀉𑀧𑀦𑀕𑀭𑀁 𑀓𑀢𑀁, 𑀉𑀧𑀦𑀕𑀭𑁂𑀦 𑀯𑀸, 𑀢𑁂𑀳𑀺 𑀉𑀧𑀦𑀕𑀭𑀁, 𑀉𑀧𑀦𑀕𑀭𑁂𑀳𑀺 𑀯𑀸, 𑀢𑀲𑁆𑀲 𑀉𑀧𑀦𑀕𑀭𑀁 𑀤𑁂𑀳𑀺, 𑀢𑁂𑀲𑀁 𑀉𑀧𑀦𑀕𑀭𑀁, 𑀉𑀧𑀦𑀕𑀭𑀸 𑀆𑀦𑀬, 𑀉𑀧𑀦𑀕𑀭𑀫𑁆𑀳𑀸 𑀉𑀧𑀦𑀕𑀭𑀲𑁆𑀫𑀸, 𑀉𑀧𑀦𑀕𑀭𑁂𑀳𑀺, 𑀉𑀧𑀦𑀕𑀭𑀁 𑀲𑀦𑁆𑀢𑀓𑀁, 𑀉𑀧𑀦𑀕𑀭𑀲𑁆𑀲 𑀯𑀸, 𑀢𑁂𑀲𑀁 𑀉𑀧𑀦𑀕𑀭𑀁, 𑀉𑀧𑀦𑀕𑀭𑀸𑀦𑀁 𑀯𑀸, 𑀉𑀧𑀦𑀕𑀭𑀁 𑀦𑀺𑀥𑁂𑀳𑀺, 𑀉𑀧𑀦𑀕𑀭𑀫𑁆𑀳𑀺 𑀉𑀧𑀦𑀕𑀭𑀲𑁆𑀫𑀺𑀁, 𑀉𑀧𑀦𑀕𑀭𑀁 𑀉𑀧𑀦𑀕𑀭𑁂𑀲𑀼 𑀯𑀸. 𑀏𑀯𑀁 𑀉𑀧𑀓𑀼𑀫𑁆𑀪𑀁.

𑀅𑀪𑀸𑀯𑁂 𑁋 𑀤𑀭𑀣𑀸𑀦𑀁 𑀅𑀪𑀸𑀯𑁄 𑀦𑀺𑀤𑁆𑀤𑀭𑀣𑀁, 𑀦𑀺𑀫𑁆𑀫𑀲𑀓𑀁.

𑀧𑀘𑁆𑀙𑀸𑀅𑀢𑁆𑀣𑁂 𑁋 𑀭𑀣𑀲𑁆𑀲 𑀧𑀘𑁆𑀙𑀸 𑀅𑀦𑀼𑀭𑀣𑀁, 𑀅𑀦𑀼𑀯𑀸𑀢𑀁.

𑀬𑁄𑀕𑁆𑀕𑀢𑀸𑀬𑀁 𑁋 𑀬𑀣𑀸𑀲𑀭𑀽𑀧𑀁, 𑀅𑀦𑀼𑀭𑀽𑀧𑀁, 𑀭𑀽𑀧𑀬𑁄𑀕𑁆𑀕𑀦𑁆𑀢𑀺 𑀅𑀢𑁆𑀣𑁄.

𑀯𑀺𑀘𑁆𑀙𑀸𑀬𑀁 𑁋 𑀅𑀢𑁆𑀢𑀸𑀦𑀫𑀢𑁆𑀢𑀸𑀦𑀁 𑀧𑀢𑀺 𑀧𑀘𑁆𑀘𑀢𑁆𑀢𑀁, 𑀅𑀤𑁆𑀥𑀫𑀸𑀲𑀁 𑀅𑀤𑁆𑀥𑀫𑀸𑀲𑀁 𑀅𑀦𑀼 𑀅𑀦𑁆𑀯𑀤𑁆𑀥𑀫𑀸𑀲𑀁.

𑀅𑀦𑀼𑀧𑀼𑀩𑁆𑀩𑀺𑀬𑀁 𑁋 𑀚𑁂𑀝𑁆𑀞𑀸𑀦𑀁 𑀅𑀦𑀼𑀧𑀼𑀩𑁆𑀩𑁄 𑀅𑀦𑀼𑀚𑁂𑀝𑁆𑀞𑀁.

𑀧𑀝𑀺𑀮𑁄𑀫𑁂 𑁋 𑀲𑁄𑀢𑀲𑁆𑀲 𑀧𑀝𑀺𑀮𑁄𑀫𑀁 𑀧𑀝𑀺𑀲𑁄𑀢𑀁, 𑀧𑀝𑀺𑀧𑀣𑀁, 𑀧𑀢𑀺𑀯𑀸𑀢𑀁, 𑀅𑀢𑁆𑀢𑀸𑀦𑀁 𑀅𑀥𑀺𑀓𑀺𑀘𑁆𑀘 𑀧𑀯𑀢𑁆𑀢𑀸 𑀅𑀚𑁆𑀛𑀢𑁆𑀢𑀁.

𑀧𑀭𑀺𑀬𑀸𑀤𑀸𑀪𑀺𑀯𑀺𑀥𑀻𑀲𑀼 𑀆𑀧𑀸𑀡𑀓𑁄𑀝𑀺𑀬𑀸 𑀆𑀧𑀸𑀡𑀓𑁄𑀝𑀺𑀓𑀁, ‘‘𑀓𑁆𑀯𑀘𑀺 𑀲𑀫𑀸𑀲𑀦𑁆𑀢𑀕𑀢𑀸𑀦𑀫𑀓𑀸𑀭𑀦𑁆𑀢𑁄’’𑀢𑀺 𑀓𑀧𑁆𑀧𑀘𑁆𑀘𑀬𑁄, 𑀆𑀓𑀼𑀫𑀸𑀭𑁂𑀳𑀺 𑀬𑀲𑁄 𑀓𑀘𑁆𑀘𑀸𑀬𑀦𑀲𑁆𑀲 𑀆𑀓𑀼𑀫𑀸𑀭𑀁.

𑀲𑀫𑀺𑀤𑁆𑀥𑀺𑀬𑀁 𑁋 𑀪𑀺𑀓𑁆𑀔𑀸𑀬 𑀲𑀫𑀺𑀤𑁆𑀥𑀻𑀢𑀺 𑀅𑀢𑁆𑀣𑁂 𑀲𑀫𑀸𑀲𑁂𑀯 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁆𑀢𑁂 𑀘 𑀓𑀢𑁂 𑁋

‘‘𑀲𑀫𑀸𑀲𑀲𑁆𑀲, 𑀅𑀦𑁆𑀢𑁄’’𑀢𑀺 𑀘 𑀯𑀢𑁆𑀢𑀢𑁂.

𑁩𑁩𑁭. 𑀲𑀭𑁄 𑀭𑀲𑁆𑀲𑁄 𑀦𑀧𑀼𑀁𑀲𑀓𑁂.

𑀦𑀧𑀼𑀁𑀲𑀓𑁂 𑀯𑀢𑁆𑀢𑀫𑀸𑀦𑀲𑁆𑀲 𑀲𑀫𑀸𑀲𑀲𑁆𑀲 𑀅𑀦𑁆𑀢𑁄 𑀲𑀭𑁄 𑀭𑀲𑁆𑀲𑁄 𑀳𑁄𑀢𑀺. 𑀏𑀢𑁆𑀣 𑀘 𑀅𑀩𑁆𑀬𑀬𑀻𑀪𑀸𑀯𑀕𑁆𑀕𑀳𑀡𑀁 𑀦𑀸𑀦𑀼𑀯𑀢𑁆𑀢𑁂𑀢𑀩𑁆𑀩𑀁, 𑀢𑁂𑀦 𑀤𑀺𑀕𑀼𑀤𑁆𑀯𑀦𑁆𑀤𑀩𑀳𑀼𑀩𑁆𑀩𑀻𑀳𑀻𑀲𑀼𑀧𑀺 𑀦𑀧𑀼𑀁𑀲𑀓𑁂 𑀯𑀢𑁆𑀢𑀫𑀸𑀦𑀲𑁆𑀲 𑀲𑀫𑀸𑀲𑀦𑁆𑀢𑀲𑁆𑀲𑀭𑀲𑁆𑀲 𑀭𑀲𑁆𑀲𑀢𑁆𑀢𑀁 𑀲𑀺𑀤𑁆𑀥𑀁 𑀳𑁄𑀢𑀺. ‘‘𑀅𑀁 𑀯𑀺𑀪𑀢𑁆𑀢𑀻𑀦’’𑀫𑀺𑀘𑁆𑀘𑀸𑀤𑀺𑀦𑀸 𑀅𑀫𑀸𑀤𑁂𑀲𑁄, 𑀲𑀼𑀪𑀺𑀓𑁆𑀔𑀁. 𑀕𑀗𑁆𑀕𑀸𑀬 𑀲𑀫𑀻𑀧𑁂 𑀯𑀢𑁆𑀢𑀢𑀻𑀢𑀺 𑀉𑀧𑀕𑀗𑁆𑀕𑀁, 𑀫𑀡𑀺𑀓𑀸𑀬 𑀲𑀫𑀻𑀧𑀁 𑀉𑀧𑀫𑀡𑀺𑀓𑀁.

𑀇𑀢𑁆𑀣𑀻𑀲𑀼 𑀅𑀫𑀺𑀓𑀺𑀘𑁆𑀘𑀸𑀢𑀺 𑀅𑀢𑁆𑀣𑁂 𑀲𑀫𑀸𑀲𑀦𑀧𑀼𑀁𑀲𑀓𑀭𑀲𑁆𑀲𑀢𑁆𑀢𑀸𑀤𑀻𑀲𑀼 𑀓𑀢𑁂𑀲𑀼 𑁋

‘‘𑀅𑀩𑁆𑀬𑀬𑀻𑀪𑀸𑀯𑀸, 𑀯𑀺𑀪𑀢𑁆𑀢𑀻𑀦’’𑀦𑁆𑀢𑀺 𑀘 𑀯𑀢𑁆𑀢𑀢𑁂.

𑁩𑁩𑁮. 𑀅𑀜𑁆𑀜𑀲𑁆𑀫𑀸 𑀮𑁄𑀧𑁄 𑀘.

𑀅𑀓𑀸𑀭𑀦𑁆𑀢𑀢𑁄 𑀅𑀜𑁆𑀜𑀲𑁆𑀫𑀸 𑀅𑀩𑁆𑀬𑀬𑀻𑀪𑀸𑀯𑀲𑀫𑀸𑀲𑀸 𑀧𑀭𑀸𑀲𑀁 𑀯𑀺𑀪𑀢𑁆𑀢𑀻𑀦𑀁 𑀮𑁄𑀧𑁄 𑀘 𑀳𑁄𑀢𑀺. 𑀅𑀥𑀺𑀢𑁆𑀢𑀺, 𑀇𑀢𑁆𑀣𑀻𑀲𑀼 𑀅𑀥𑀺𑀓𑀺𑀘𑁆𑀘 𑀓𑀣𑀸 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀅𑀥𑀺𑀢𑁆𑀣𑀺 𑀧𑀲𑁆𑀲, 𑀅𑀥𑀺𑀢𑁆𑀣𑀺 𑀓𑀢𑀁 𑀇𑀘𑁆𑀘𑀸𑀤𑀺, 𑀏𑀯𑀁 𑀅𑀥𑀺𑀓𑀼𑀫𑀸𑀭𑀺, 𑀯𑀥𑀼𑀬𑀸 𑀲𑀫𑀻𑀧𑀁 𑀉𑀧𑀯𑀥𑀼, 𑀕𑀼𑀦𑁆𑀦𑀁 𑀲𑀫𑀻𑀧𑀁 𑀉𑀧𑀕𑀼, 𑀑𑀓𑀸𑀭𑀲𑁆𑀲 𑀭𑀲𑁆𑀲𑀢𑁆𑀢𑀁 𑀉𑀓𑀸𑀭𑁄. 𑀏𑀯𑀁 𑀉𑀧𑀲𑀕𑁆𑀕𑀧𑀼𑀩𑁆𑀩𑀓𑁄.

𑀦𑀺𑀧𑀸𑀢𑀧𑀼𑀩𑁆𑀩𑀓𑁄 𑀬𑀣𑀸 𑁋 𑀯𑀼𑀟𑁆𑀠𑀸𑀦𑀁 𑀧𑀝𑀺𑀧𑀸𑀝𑀺, 𑀬𑁂 𑀬𑁂 𑀯𑀼𑀟𑁆𑀠𑀸 𑀯𑀸 𑀬𑀣𑀸𑀯𑀼𑀟𑁆𑀠𑀁, 𑀧𑀤𑀢𑁆𑀣𑀸𑀦𑀢𑀺𑀓𑁆𑀓𑀫𑁂 𑁋 𑀬𑀣𑀸𑀓𑁆𑀓𑀫𑀁, 𑀬𑀣𑀸𑀲𑀢𑁆𑀢𑀺, 𑀬𑀣𑀸𑀩𑀮𑀁 𑀓𑀭𑁄𑀢𑀺, 𑀩𑀮𑀫𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀚𑀻𑀯𑀲𑁆𑀲 𑀬𑀢𑁆𑀢𑀓𑁄 𑀧𑀭𑀺𑀘𑁆𑀙𑁂𑀤𑁄 𑀬𑀸𑀯𑀚𑀻𑀯𑀁, 𑀬𑀸𑀯𑀢𑀸𑀬𑀼𑀓𑀁, 𑀓𑀧𑁆𑀧𑀘𑁆𑀘𑀬𑁄. 𑀬𑀢𑁆𑀢𑀓𑁂𑀦 𑀅𑀢𑁆𑀣𑁄 𑀬𑀸𑀯𑀤𑀢𑁆𑀣𑀁, 𑀧𑀩𑁆𑀩𑀢𑀲𑁆𑀲 𑀧𑀭𑀪𑀸𑀕𑁄 𑀢𑀺𑀭𑁄𑀧𑀩𑁆𑀩𑀢𑀁, 𑀢𑀺𑀭𑁄𑀧𑀸𑀓𑀸𑀭𑀁, 𑀢𑀺𑀭𑁄𑀓𑀼𑀝𑁆𑀝𑀁, 𑀧𑀸𑀲𑀸𑀤𑀲𑁆𑀲 𑀅𑀦𑁆𑀢𑁄 𑀅𑀦𑁆𑀢𑁄𑀧𑀸𑀲𑀸𑀤𑀁, 𑀅𑀦𑁆𑀢𑁄𑀦𑀕𑀭𑀁, 𑀅𑀦𑁆𑀢𑁄𑀯𑀲𑁆𑀲𑀁, 𑀦𑀕𑀭𑀲𑁆𑀲 𑀩𑀳𑀺 𑀩𑀳𑀺𑀦𑀕𑀭𑀁, 𑀧𑀸𑀲𑀸𑀤𑀲𑁆𑀲 𑀉𑀧𑀭𑀺 𑀉𑀧𑀭𑀺𑀧𑀸𑀲𑀸𑀤𑀁, 𑀉𑀧𑀭𑀺𑀫𑀜𑁆𑀘𑀁, 𑀫𑀜𑁆𑀘𑀲𑁆𑀲 𑀳𑁂𑀝𑁆𑀞𑀸 𑀳𑁂𑀝𑁆𑀞𑀸𑀫𑀜𑁆𑀘𑀁, 𑀳𑁂𑀝𑁆𑀞𑀸𑀧𑀸𑀲𑀸𑀤𑀁, 𑀪𑀢𑁆𑀢𑀲𑁆𑀲 𑀧𑀼𑀭𑁂 𑀧𑀼𑀭𑁂𑀪𑀢𑁆𑀢𑀁, 𑀏𑀯𑀁 𑀧𑀘𑁆𑀙𑀸𑀪𑀢𑁆𑀢𑀁.

𑀲𑀸𑀓𑀮𑁆𑀮𑀢𑁆𑀣𑁂 𑁋 𑀲𑀳 𑀫𑀓𑁆𑀔𑀺𑀓𑀸𑀬 𑀲𑀫𑀓𑁆𑀔𑀺𑀓𑀁 𑀪𑀼𑀜𑁆𑀚𑀢𑀺, 𑀦 𑀓𑀺𑀜𑁆𑀘𑀺 𑀧𑀭𑀺𑀯𑀚𑁆𑀚𑁂𑀢𑀻𑀢𑀺 𑀅𑀢𑁆𑀣𑁄. ‘‘𑀢𑁂𑀲𑀼 𑀯𑀼𑀤𑁆𑀥𑀻’’𑀢𑀺𑀆𑀤𑀺𑀦𑀸 𑀲𑀳𑀲𑀤𑁆𑀤𑀲𑁆𑀲 𑀲𑀸𑀤𑁂𑀲𑁄. 𑀕𑀗𑁆𑀕𑀸𑀬 𑀑𑀭𑀁 𑀑𑀭𑀕𑀗𑁆𑀕𑀫𑀺𑀘𑁆𑀘𑀸𑀤𑀺.

𑀅𑀩𑁆𑀬𑀬𑀻𑀪𑀸𑀯𑀲𑀫𑀸𑀲𑁄 𑀦𑀺𑀝𑁆𑀞𑀺𑀢𑁄.

𑀓𑀫𑁆𑀫𑀥𑀸𑀭𑀬𑀲𑀫𑀸𑀲

𑀅𑀣 𑀓𑀫𑁆𑀫𑀥𑀸𑀭𑀬𑀲𑀫𑀸𑀲𑁄 𑀯𑀼𑀘𑁆𑀘𑀢𑁂.

𑀲𑁄 𑀘 𑀦𑀯𑀯𑀺𑀥𑁄 𑀯𑀺𑀲𑁂𑀲𑀦𑀧𑀼𑀩𑁆𑀩𑀧𑀤𑁄 𑀯𑀺𑀲𑁂𑀲𑀦𑀼𑀢𑁆𑀢𑀭𑀧𑀤𑁄 𑀯𑀺𑀲𑁂𑀲𑀦𑁄𑀪𑀬𑀧𑀤𑁄 𑀉𑀧𑀫𑀸𑀦𑀼𑀢𑁆𑀢𑀭𑀧𑀤𑁄 𑀲𑀫𑁆𑀪𑀸𑀯𑀦𑀸𑀧𑀼𑀩𑁆𑀩𑀧𑀤𑁄 𑀅𑀯𑀥𑀸𑀭𑀡𑀧𑀼𑀩𑁆𑀩𑀧𑀤𑁄 𑀦𑀦𑀺𑀧𑀸𑀢𑀧𑀼𑀩𑁆𑀩𑀧𑀤𑁄 𑀓𑀼𑀧𑀼𑀩𑁆𑀩𑀧𑀤𑁄 𑀧𑀸𑀤𑀺𑀧𑀼𑀩𑁆𑀩𑀧𑀤𑁄 𑀘𑀸𑀢𑀺.

𑀢𑀢𑁆𑀣 𑀯𑀺𑀲𑁂𑀲𑀦𑀧𑀼𑀩𑁆𑀩𑀧𑀤𑁄 𑀢𑀸𑀯 𑁋 ‘‘𑀫𑀳𑀦𑁆𑀢 𑀧𑀼𑀭𑀺𑀲’’𑀇𑀢𑀻𑀥 𑀉𑀪𑀬𑀢𑁆𑀣 𑀧𑀞𑀫𑁂𑀓𑀯𑀘𑀦𑀁 𑀲𑀺, 𑀢𑀼𑀮𑁆𑀬𑀸𑀥𑀺𑀓𑀭𑀡𑀪𑀸𑀯𑀧𑁆𑀧𑀲𑀺𑀤𑁆𑀥𑀢𑁆𑀣𑀁 𑀘𑀲𑀤𑁆𑀤 𑀢𑀲𑀤𑁆𑀤𑀧𑁆𑀧𑀬𑁄𑀕𑁄, 𑀫𑀳𑀦𑁆𑀢𑁄 𑀘 𑀲𑁄 𑀧𑀼𑀭𑀺𑀲𑁄 𑀘𑀸𑀢𑀺 𑀯𑀺𑀕𑁆𑀕𑀳𑁂 𑁋

𑀇𑀢𑁄 𑀧𑀭𑀁 ‘‘𑀯𑀺𑀪𑀸𑀲𑀸 𑀭𑀼𑀓𑁆𑀔𑀢𑀺𑀡’’𑀇𑀘𑁆𑀘𑀸𑀤𑀺𑀢𑁄 ‘‘𑀯𑀺𑀪𑀸𑀲𑀸’’𑀢𑀺 𑀲𑀫𑀸𑀲𑀯𑀺𑀥𑀸𑀦𑁂 𑀲𑀩𑁆𑀩𑀢𑁆𑀣 𑀯𑀢𑁆𑀢𑀢𑁂.

𑁩𑁩𑁯. 𑀤𑁆𑀯𑀺𑀧𑀤𑁂 𑀢𑀼𑀮𑁆𑀬𑀸𑀥𑀺𑀓𑀭𑀡𑁂 𑀓𑀫𑁆𑀫𑀥𑀸𑀭𑀬𑁄.

𑀤𑁆𑀯𑁂 𑀧𑀤𑀸𑀦𑀺 𑀦𑀸𑀫𑀺𑀓𑀸𑀦𑀺 𑀢𑀼𑀮𑁆𑀬𑀸𑀥𑀺𑀓𑀭𑀡𑀸𑀦𑀺 𑀅𑀜𑁆𑀜𑀫𑀜𑁆𑀜𑁂𑀦 𑀲𑀳 𑀯𑀺𑀪𑀸𑀲𑀸 𑀲𑀫𑀲𑁆𑀬𑀦𑁆𑀢𑁂, 𑀢𑀲𑁆𑀫𑀺𑀁 𑀤𑁆𑀯𑀺𑀧𑀤𑁂 𑀢𑀼𑀮𑁆𑀬𑀸𑀥𑀺𑀓𑀭𑀡𑁂 𑀲𑀢𑀺 𑀲𑁄 𑀲𑀫𑀸𑀲𑁄 𑀓𑀫𑁆𑀫𑀥𑀸𑀭𑀬𑀲𑀜𑁆𑀜𑁄 𑀘 𑀳𑁄𑀢𑀺.

𑀤𑁆𑀯𑁂 𑀧𑀤𑀸𑀦𑀺 𑀤𑁆𑀯𑀺𑀧𑀤𑀁, 𑀢𑀼𑀮𑁆𑀬𑀁 𑀲𑀫𑀸𑀦𑀁 𑀅𑀥𑀺𑀓𑀭𑀡𑀁 𑀅𑀢𑁆𑀣𑁄 𑀬𑀲𑁆𑀲 𑀧𑀤𑀤𑁆𑀯𑀬𑀲𑁆𑀲 𑀢𑀁 𑀢𑀼𑀮𑁆𑀬𑀸𑀥𑀺𑀓𑀭𑀡𑀁, 𑀢𑀲𑁆𑀫𑀺𑀁 𑀤𑁆𑀯𑀺𑀧𑀤𑁂 𑀢𑀼𑀮𑁆𑀬𑀸𑀥𑀺𑀓𑀭𑀡𑁂. 𑀪𑀺𑀦𑁆𑀦𑀧𑁆𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀸𑀦𑀁 𑀤𑁆𑀯𑀺𑀦𑁆𑀦𑀁 𑀧𑀤𑀸𑀦𑀁 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑁂𑀦 𑀏𑀓𑀲𑁆𑀫𑀺𑀁 𑀅𑀢𑁆𑀣𑁂 𑀧𑀯𑀢𑁆𑀢𑀺 𑀢𑀼𑀮𑁆𑀬𑀸𑀥𑀺𑀓𑀭𑀡𑀢𑀸. 𑀓𑀫𑁆𑀫𑀫𑀺𑀯 𑀤𑁆𑀯𑀬𑀁 𑀥𑀸𑀭𑀬𑀢𑀻𑀢𑀺 𑀓𑀫𑁆𑀫𑀥𑀸𑀭𑀬𑁄. 𑀬𑀣𑀸 𑀳𑀺 𑀓𑀫𑁆𑀫𑀁 𑀓𑁆𑀭𑀺𑀬𑀜𑁆𑀘 𑀧𑀬𑁄𑀚𑀦𑀜𑁆𑀘 𑀤𑁆𑀯𑀬𑀁 𑀥𑀸𑀭𑀬𑀢𑀺, 𑀓𑀫𑁆𑀫𑁂 𑀲𑀢𑀺 𑀓𑁆𑀭𑀺𑀬𑀸𑀬, 𑀧𑀬𑁄𑀚𑀦𑀲𑁆𑀲 𑀘 𑀲𑀫𑁆𑀪𑀯𑀢𑁄, 𑀢𑀣𑀸 𑀅𑀬𑀁 𑀲𑀫𑀸𑀲𑁄 𑀏𑀓𑀲𑁆𑀲 𑀅𑀢𑁆𑀣𑀲𑁆𑀲 𑀤𑁆𑀯𑁂 𑀦𑀸𑀫𑀸𑀦𑀺 𑀥𑀸𑀭𑀬𑀢𑀺, 𑀢𑀲𑁆𑀫𑀺𑀁 𑀲𑀫𑀸𑀲𑁂 𑀲𑀢𑀺 𑀏𑀓𑀢𑁆𑀣𑀚𑁄𑀢𑀓𑀲𑁆𑀲 𑀦𑀸𑀫𑀤𑁆𑀯𑀬𑀲𑁆𑀲 𑀲𑀫𑁆𑀪𑀯𑀢𑁄.

𑀧𑀼𑀭𑁂 𑀯𑀺𑀬 𑀲𑀫𑀸𑀲𑀲𑀜𑁆𑀜𑀸𑀯𑀺𑀪𑀢𑁆𑀢𑀺𑀮𑁄𑀧𑀧𑀓𑀢𑀺𑀪𑀸𑀯𑀸, 𑀲𑀫𑀸𑀲𑁂𑀦𑁂𑀯 𑀢𑀼𑀮𑁆𑀬𑀸𑀥𑀺𑀓𑀭𑀡𑀪𑀸𑀯𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 ‘‘𑀯𑀼𑀢𑁆𑀢𑀢𑁆𑀣𑀸𑀦𑀫𑀧𑁆𑀧𑀬𑁄𑀕𑁄’’𑀢𑀺 𑀘𑀲𑀤𑁆𑀤 𑀢𑀲𑀤𑁆𑀤𑀸𑀦𑀫𑀧𑁆𑀧𑀬𑁄𑀕𑁄.

𑁩𑁪𑁦. 𑀫𑀳𑀢𑀁 𑀫𑀳𑀸 𑀢𑀼𑀮𑁆𑀬𑀸𑀥𑀺𑀓𑀭𑀡𑁂 𑀧𑀤𑁂.

𑀫𑀳𑀦𑁆𑀢 𑀲𑀤𑁆𑀤𑀲𑁆𑀲 𑀫𑀳𑀸 𑀳𑁄𑀢𑀺 𑀢𑀼𑀮𑁆𑀬𑀸𑀥𑀺𑀓𑀭𑀡𑁂 𑀉𑀢𑁆𑀢𑀭𑀧𑀤𑁂 𑀧𑀭𑁂. 𑀫𑀳𑀢𑀦𑁆𑀢𑀺 𑀩𑀳𑀼𑀯𑀘𑀦𑀕𑁆𑀕𑀳𑀡𑁂𑀦 𑀓𑁆𑀯𑀘𑀺 𑀫𑀳𑀆𑀤𑁂𑀲𑁄 𑀘, 𑀏𑀢𑁆𑀣 𑀘 𑀯𑀺𑀲𑁂𑀲𑀦𑀲𑁆𑀲 𑀧𑀼𑀩𑁆𑀩𑀦𑀺𑀧𑀸𑀢𑁄 𑀯𑀺𑀲𑁂𑀲𑀦𑀪𑀽𑀢𑀲𑁆𑀲 𑀧𑀼𑀩𑁆𑀩𑀧𑀤𑀲𑁆𑀲 𑀫𑀳𑀸𑀤𑁂𑀲𑀯𑀺𑀥𑀸𑀦𑀢𑁄𑀯 𑀯𑀺𑀜𑁆𑀜𑀸𑀬𑀢𑀺.

‘‘𑀓𑀫𑁆𑀫𑀥𑀸𑀭𑀬𑁄, 𑀤𑀺𑀕𑀽’’𑀢𑀺 𑀘 𑀯𑀢𑁆𑀢𑀢𑁂.

𑁩𑁪𑁧. 𑀉𑀪𑁂 𑀢𑀧𑁆𑀧𑀼𑀭𑀺𑀲𑀸.

𑀉𑀪𑁂 𑀓𑀫𑁆𑀫𑀥𑀸𑀭𑀬𑀤𑀺𑀕𑀼𑀲𑀫𑀸𑀲𑀸 𑀢𑀧𑁆𑀧𑀼𑀭𑀺𑀲𑀲𑀜𑁆𑀜𑀸 𑀳𑁄𑀦𑁆𑀢𑀺.

𑀢𑀲𑁆𑀲 𑀧𑀼𑀭𑀺𑀲𑁄 𑀢𑀧𑁆𑀧𑀼𑀭𑀺𑀲𑁄, 𑀢𑀧𑁆𑀧𑀼𑀭𑀺𑀲𑀲𑀤𑀺𑀲𑀢𑁆𑀢𑀸 𑀅𑀬𑀫𑁆𑀧𑀺 𑀲𑀫𑀸𑀲𑁄 𑀅𑀦𑁆𑀯𑀢𑁆𑀣𑀲𑀜𑁆𑀜𑀸𑀬 𑀢𑀧𑁆𑀧𑀼𑀭𑀺𑀲𑁄𑀢𑀺 𑀯𑀼𑀢𑁆𑀢𑁄. 𑀬𑀣𑀸 𑀳𑀺 𑀢𑀧𑁆𑀧𑀼𑀭𑀺𑀲𑀲𑀤𑁆𑀤𑁄 𑀕𑀼𑀡𑀫𑀢𑀺𑀯𑀢𑁆𑀢𑁄, 𑀢𑀣𑀸 𑀅𑀬𑀁 𑀲𑀫𑀸𑀲𑁄𑀧𑀺. 𑀉𑀢𑁆𑀢𑀭𑀧𑀤𑀢𑁆𑀣𑀧𑁆𑀧𑀥𑀸𑀦𑁄 𑀳𑀺 𑀢𑀧𑁆𑀧𑀼𑀭𑀺𑀲𑁄𑀢𑀺. 𑀢𑀢𑁄 𑀦𑀸𑀫𑀩𑁆𑀬𑀧𑀤𑁂𑀲𑁄 𑀲𑁆𑀬𑀸𑀤𑁆𑀬𑀼𑀧𑁆𑀧𑀢𑁆𑀢𑀺. 𑀅𑀬𑀁 𑀧𑀦 𑀢𑀧𑁆𑀧𑀼𑀭𑀺𑀲𑁄 𑀅𑀪𑀺𑀥𑁂𑀬𑁆𑀬𑀯𑀘𑀦𑁄, 𑀧𑀭𑀮𑀺𑀗𑁆𑀕𑁄 𑀘.

𑀫𑀳𑀸𑀧𑀼𑀭𑀺𑀲𑁄, 𑀫𑀳𑀸𑀧𑀼𑀭𑀺𑀲𑀸 𑀇𑀘𑁆𑀘𑀸𑀤𑀺 𑀧𑀼𑀭𑀺𑀲𑀲𑀤𑁆𑀤𑀲𑀫𑀁, 𑀏𑀯𑀁 𑀫𑀳𑀸𑀯𑀻𑀭𑁄, 𑀫𑀳𑀸𑀫𑀼𑀦𑀺, 𑀫𑀳𑀦𑁆𑀢𑀜𑁆𑀘 𑀢𑀁 𑀩𑀮𑀜𑁆𑀘𑀸𑀢𑀺 𑀫𑀳𑀸𑀩𑀮𑀁, 𑀫𑀳𑀩𑁆𑀪𑀬𑀁, 𑀫𑀳𑀆𑀤𑁂𑀲𑁄. 𑀲𑀦𑁆𑀢𑁄 𑀘 𑀲𑁄 𑀧𑀼𑀭𑀺𑀲𑁄 𑀘𑀸𑀢𑀺 𑀲𑀧𑁆𑀧𑀼𑀭𑀺𑀲𑁄, ‘‘𑀲𑀦𑁆𑀢𑀲𑀤𑁆𑀤𑀲𑁆𑀲 𑀲𑁄 𑀪𑁂 𑀩𑁄 𑀘𑀦𑁆𑀢𑁂’’𑀢𑀺 𑀏𑀢𑁆𑀣 𑀘𑀲𑀤𑁆𑀤𑁂𑀦 𑀲𑀦𑁆𑀢𑀲𑀤𑁆𑀤𑀲𑁆𑀲 𑀲𑀫𑀸𑀲𑁂 𑀅𑀪𑀓𑀸𑀭𑁂𑀧𑀺 𑀲𑀸𑀤𑁂𑀲𑁄, 𑀢𑀣𑀸 𑀧𑀼𑀩𑁆𑀩𑀧𑀼𑀭𑀺𑀲𑁄, 𑀧𑀭𑀧𑀼𑀭𑀺𑀲𑁄, 𑀧𑀞𑀫𑀧𑀼𑀭𑀺𑀲𑁄, 𑀫𑀚𑁆𑀛𑀺𑀫𑀧𑀼𑀭𑀺𑀲𑁄, 𑀉𑀢𑁆𑀢𑀫𑀧𑀼𑀭𑀺𑀲𑁄, 𑀤𑀦𑁆𑀢𑀧𑀼𑀭𑀺𑀲𑁄, 𑀧𑀭𑀫𑀧𑀼𑀭𑀺𑀲𑁄, 𑀯𑀻𑀭𑀧𑀼𑀭𑀺𑀲𑁄, 𑀲𑁂𑀢𑀳𑀢𑁆𑀣𑀻, 𑀓𑀡𑁆𑀳𑀲𑀧𑁆𑀧𑁄, 𑀦𑀻𑀮𑀼𑀧𑁆𑀧𑀮𑀁, 𑀮𑁄𑀳𑀺𑀢𑀘𑀦𑁆𑀤𑀦𑀁.

𑀓𑁆𑀯𑀘𑀺 𑀯𑀺𑀪𑀸𑀲𑀸𑀥𑀺𑀓𑀸𑀭𑀢𑁄 𑀦 𑀪𑀯𑀢𑀺, 𑀬𑀣𑀸 𑁋 𑀧𑀼𑀡𑁆𑀡𑁄 𑀫𑀦𑁆𑀢𑀸𑀦𑀺𑀧𑀼𑀢𑁆𑀢𑁄, 𑀘𑀺𑀢𑁆𑀢𑁄 𑀕𑀳𑀧𑀢𑀺, 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸𑀢𑀺.

𑀧𑀼𑀫𑀸 𑀘 𑀲𑁄 𑀓𑁄𑀓𑀺𑀮𑁄 𑀘𑀸𑀢𑀺 𑀅𑀢𑁆𑀣𑁂 𑀲𑀫𑀸𑀲𑁂 𑀓𑀢𑁂 𑁋

‘‘𑀮𑁄𑀧’’𑀦𑁆𑀢𑀺 𑀯𑀢𑁆𑀢𑀢𑁂.

𑁩𑁪𑁨. 𑀧𑀼𑀫𑀲𑁆𑀲 𑀮𑀺𑀗𑁆𑀕𑀸𑀤𑀻𑀲𑀼 𑀲𑀫𑀸𑀲𑁂𑀲𑀼.

𑀧𑀼𑀫𑀇𑀘𑁆𑀘𑁂𑀢𑀲𑁆𑀲 𑀅𑀦𑁆𑀢𑁄 𑀅𑀓𑀸𑀭𑁄 𑀮𑁄𑀧𑀫𑀸𑀧𑀚𑁆𑀚𑀢𑁂 𑀮𑀺𑀗𑁆𑀕𑀸𑀤𑀻𑀲𑀼 𑀧𑀭𑀧𑀤𑁂𑀲𑀼 𑀲𑀫𑀸𑀲𑁂𑀲𑀼, ‘‘𑀅𑀁𑀫𑁄 𑀦𑀺𑀕𑁆𑀕𑀳𑀻𑀢𑀁 𑀛𑀮𑀧𑁂𑀳𑀻’’𑀢𑀺 𑀫𑀓𑀸𑀭𑀲𑁆𑀲 𑀦𑀺𑀕𑁆𑀕𑀳𑀻𑀢𑀁. 𑀧𑀼𑀗𑁆𑀓𑁄𑀓𑀺𑀮𑁄. 𑀏𑀯𑀁 𑀧𑀼𑀦𑁆𑀦𑀸𑀕𑁄.

𑀔𑀢𑁆𑀢𑀺𑀬𑀸 𑀘 𑀲𑀸 𑀓𑀜𑁆𑀜𑀸 𑀘𑀸𑀢𑀺 𑀯𑀺𑀕𑁆𑀕𑀬𑁆𑀳 𑀲𑀫𑀸𑀲𑁂 𑀓𑀢𑁂 𑁋

‘‘𑀢𑀼𑀮𑁆𑀬𑀸𑀥𑀺𑀓𑀭𑀡𑁂, 𑀧𑀤𑁂, 𑀇𑀢𑁆𑀣𑀺𑀬𑀁 𑀪𑀸𑀲𑀺𑀢𑀧𑀼𑀫𑀺𑀢𑁆𑀣𑀻 𑀧𑀼𑀫𑀸𑀯 𑀘𑁂’’𑀢𑀺 𑀘 𑀯𑀢𑁆𑀢𑀢𑁂.

𑁩𑁪𑁩. 𑀓𑀫𑁆𑀫𑀥𑀸𑀭𑀬𑀲𑀜𑁆𑀜𑁂 𑀘.

𑀓𑀫𑁆𑀫𑀥𑀸𑀭𑀬𑀲𑀜𑁆𑀜𑁂 𑀘 𑀲𑀫𑀸𑀲𑁂 𑀇𑀢𑁆𑀣𑀺𑀬𑀁 𑀯𑀢𑁆𑀢𑀫𑀸𑀦𑁂 𑀢𑀼𑀮𑁆𑀬𑀸𑀥𑀺𑀓𑀭𑀡𑁂 𑀉𑀢𑁆𑀢𑀭𑀧𑀤𑁂 𑀧𑀭𑁂 𑀧𑀼𑀩𑁆𑀩𑀪𑀽𑀢𑁄 𑀇𑀢𑁆𑀣𑀺𑀯𑀸𑀘𑀓𑁄 𑀲𑀤𑁆𑀤𑁄 𑀧𑀼𑀩𑁆𑀩𑁂 𑀪𑀸𑀲𑀺𑀢𑀧𑀼𑀫𑀸 𑀘𑁂, 𑀲𑁄 𑀧𑀼𑀫𑀸 𑀇𑀯 𑀤𑀝𑁆𑀞𑀩𑁆𑀩𑁄𑀢𑀺 𑀧𑀼𑀩𑁆𑀩𑀧𑀤𑁂 𑀇𑀢𑁆𑀣𑀺𑀧𑁆𑀧𑀘𑁆𑀘𑀬𑀲𑁆𑀲 𑀦𑀺𑀯𑀢𑁆𑀢𑀺 𑀳𑁄𑀢𑀺.

𑀔𑀢𑁆𑀢𑀺𑀬𑀓𑀜𑁆𑀜𑀸, 𑀔𑀢𑁆𑀢𑀺𑀬𑀓𑀜𑁆𑀜𑀸𑀬𑁄 𑀇𑀘𑁆𑀘𑀸𑀤𑀺. 𑀏𑀯𑀁 𑀭𑀢𑁆𑀢𑀮𑀢𑀸, 𑀤𑀼𑀢𑀺𑀬𑀪𑀺𑀓𑁆𑀔𑀸, 𑀩𑁆𑀭𑀸𑀳𑁆𑀫𑀡𑀻 𑀘 𑀲𑀸 𑀤𑀸𑀭𑀺𑀓𑀸 𑀘𑀸𑀢𑀺 𑀩𑁆𑀭𑀸𑀳𑁆𑀫𑀡𑀤𑀸𑀭𑀺𑀓𑀸, 𑀦𑀸𑀕𑀫𑀸𑀡𑀯𑀺𑀓𑀸.

𑀧𑀼𑀩𑁆𑀩𑀧𑀤𑀲𑁆𑀲𑁂𑀯𑀸𑀬𑀁 𑀧𑀼𑀫𑁆𑀪𑀸𑀯𑀸𑀢𑀺𑀤𑁂𑀲𑁄, 𑀢𑁂𑀦 ‘‘𑀔𑀢𑁆𑀢𑀺𑀬𑀓𑀼𑀫𑀸𑀭𑀻 𑀓𑀼𑀫𑀸𑀭𑀲𑀫𑀡𑀻 𑀢𑀭𑀼𑀡𑀩𑁆𑀭𑀸𑀳𑁆𑀫𑀡𑀻’’𑀢𑀺𑀆𑀤𑀻𑀲𑀼 𑀉𑀢𑁆𑀢𑀭𑀧𑀤𑁂𑀲𑀼 𑀇𑀢𑁆𑀣𑀺𑀧𑁆𑀧𑀘𑁆𑀘𑀬𑀲𑁆𑀲 𑀦 𑀦𑀺𑀯𑀢𑁆𑀢𑀺 𑀳𑁄𑀢𑀺.

𑀇𑀢𑁆𑀣𑀺𑀬𑀫𑀺𑀘𑁆𑀘𑁂𑀯 𑀓𑀺𑀁? 𑀓𑀼𑀫𑀸𑀭𑀻𑀭𑀢𑀦𑀁, 𑀲𑀫𑀡𑀻𑀧𑀤𑀼𑀫𑀁.

𑀪𑀸𑀲𑀺𑀢𑀧𑀼𑀫𑀸𑀢𑀺 𑀓𑀺𑀁? 𑀕𑀗𑁆𑀕𑀸𑀦𑀤𑀻, 𑀢𑀡𑁆𑀳𑀸𑀦𑀤𑀻, 𑀧𑀣𑀯𑀻𑀥𑀸𑀢𑀼. ‘‘𑀦𑀦𑁆𑀤𑀸𑀧𑁄𑀓𑁆𑀔𑀭𑀡𑀻, 𑀦𑀦𑁆𑀤𑀸𑀤𑁂𑀯𑀻’’𑀢𑀺𑀆𑀤𑀻𑀲𑀼 𑀧𑀦 𑀲𑀜𑁆𑀜𑀸𑀲𑀤𑁆𑀤𑀢𑁆𑀢𑀸 𑀦 𑀳𑁄𑀢𑀺.

𑀢𑀣𑀸 𑀧𑀼𑀭𑀢𑁆𑀣𑀺𑀫𑁄 𑀘 𑀲𑁄 𑀓𑀸𑀬𑁄 𑀘𑀸𑀢𑀺 𑀧𑀼𑀭𑀢𑁆𑀣𑀺𑀫𑀓𑀸𑀬𑁄, 𑀏𑀢𑁆𑀣 𑀘 𑀓𑀸𑀬𑁂𑀓𑀤𑁂𑀲𑁄 𑀓𑀸𑀬𑀲𑀤𑁆𑀤𑁄. 𑀏𑀯𑀁 𑀧𑀘𑁆𑀙𑀺𑀫𑀓𑀸𑀬𑁄, 𑀳𑁂𑀝𑁆𑀞𑀺𑀫𑀓𑀸𑀬𑁄, 𑀉𑀧𑀭𑀺𑀫𑀓𑀸𑀬𑁄, 𑀲𑀩𑁆𑀩𑀓𑀸𑀬𑁄, 𑀧𑀼𑀭𑀸𑀡𑀯𑀺𑀳𑀸𑀭𑁄, 𑀦𑀯𑀸𑀯𑀸𑀲𑁄, 𑀓𑀢𑀭𑀦𑀺𑀓𑀸𑀬𑁄, 𑀓𑀢𑀫𑀦𑀺𑀓𑀸𑀬𑁄, 𑀳𑁂𑀢𑀼𑀧𑁆𑀧𑀘𑁆𑀘𑀬𑁄, 𑀅𑀩𑀳𑀼𑀮𑀁 𑀩𑀳𑀼𑀮𑀁 𑀓𑀢𑀦𑁆𑀢𑀺 𑀩𑀳𑀼𑀮𑀻𑀓𑀢𑀁, 𑀚𑀻𑀯𑀺𑀢𑀧𑁆𑀧𑀥𑀸𑀦𑀁 𑀦𑀯𑀓𑀁 𑀚𑀻𑀯𑀺𑀢𑀦𑀯𑀓𑀁 𑀇𑀘𑁆𑀘𑀸𑀤𑀺.

𑀯𑀺𑀲𑁂𑀲𑀦𑀼𑀢𑁆𑀢𑀭𑀧𑀤𑁂 𑀚𑀺𑀦𑀯𑀘𑀦𑀸𑀦𑀼𑀧𑀭𑁄𑀥𑀢𑁄 𑀣𑁂𑀭𑀸𑀘𑀭𑀺𑀬𑀧𑀡𑁆𑀟𑀺𑀢𑀸𑀤𑀺 𑀯𑀺𑀲𑁂𑀲𑀦𑀁 𑀧𑀭𑀜𑁆𑀘 𑀪𑀯𑀢𑀺. 𑀬𑀣𑀸 𑁋 𑀲𑀸𑀭𑀺𑀧𑀼𑀢𑁆𑀢𑁄 𑀘 𑀲𑁄 𑀣𑁂𑀭𑁄 𑀘𑀸𑀢𑀺 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄. 𑀏𑀯𑀁 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑁄, 𑀫𑀳𑀸𑀓𑀲𑁆𑀲𑀧𑀢𑁆𑀣𑁂𑀭𑁄, 𑀩𑀼𑀤𑁆𑀥𑀖𑁄𑀲𑀸𑀘𑀭𑀺𑀬𑁄, 𑀥𑀫𑁆𑀫𑀧𑀸𑀮𑀸𑀘𑀭𑀺𑀬𑁄, 𑀆𑀘𑀭𑀺𑀬𑀕𑀼𑀢𑁆𑀢𑀺𑀮𑁄𑀢𑀺 𑀯𑀸, 𑀫𑀳𑁄𑀲𑀥𑁄 𑀘 𑀲𑁄 𑀧𑀡𑁆𑀟𑀺𑀢𑁄 𑀘𑀸𑀢𑀺 𑀫𑀳𑁄𑀲𑀥𑀧𑀡𑁆𑀟𑀺𑀢𑁄. 𑀏𑀯𑀁 𑀯𑀺𑀥𑀼𑀭𑀧𑀡𑁆𑀟𑀺𑀢𑁄, 𑀯𑀢𑁆𑀣𑀼𑀯𑀺𑀲𑁂𑀲𑁄.

𑀯𑀺𑀲𑁂𑀲𑀦𑁄𑀪𑀬𑀧𑀤𑁄 𑀬𑀣𑀸 𑁋 𑀲𑀻𑀢𑀜𑁆𑀘 𑀢𑀁 𑀉𑀡𑁆𑀳𑀜𑁆𑀘𑀸𑀢𑀺 𑀲𑀻𑀢𑀼𑀡𑁆𑀳𑀁, 𑀲𑀺𑀦𑀺𑀤𑁆𑀥𑁄 𑀘 𑀲𑁄 𑀉𑀡𑁆𑀳𑁄 𑀘𑀸𑀢𑀺 𑀲𑀺𑀦𑀺𑀤𑁆𑀥𑀼𑀡𑁆𑀳𑁄, 𑀫𑀸𑀲𑁄. 𑀔𑀜𑁆𑀚𑁄 𑀘 𑀲𑁄 𑀔𑀼𑀚𑁆𑀚𑁄 𑀘𑀸𑀢𑀺 𑀔𑀜𑁆𑀚𑀔𑀼𑀚𑁆𑀚𑁄. 𑀏𑀯𑀁 𑀅𑀦𑁆𑀥𑀩𑀥𑀺𑀭𑁄, 𑀓𑀢𑀸𑀓𑀢𑀁, 𑀙𑀺𑀤𑁆𑀤𑀸𑀯𑀙𑀺𑀤𑁆𑀤𑀁, 𑀉𑀘𑁆𑀘𑀸𑀯𑀘𑀁, 𑀙𑀺𑀦𑁆𑀦𑀪𑀺𑀦𑁆𑀦𑀁, 𑀲𑀺𑀢𑁆𑀢𑀲𑀫𑁆𑀫𑀝𑁆𑀞𑀁, 𑀕𑀢𑀧𑀘𑁆𑀘𑀸𑀕𑀢𑀁.

𑀉𑀧𑀫𑀸𑀦𑀼𑀢𑁆𑀢𑀭𑀧𑀤𑁂 𑀅𑀪𑀺𑀥𑀸𑀦𑀸𑀦𑀼𑀭𑁄𑀥𑀢𑁄 𑀉𑀧𑀫𑀸𑀦𑀪𑀽𑀢𑀁 𑀯𑀺𑀲𑁂𑀲𑀦𑀁 𑀧𑀭𑀁 𑀪𑀯𑀢𑀺. 𑀬𑀣𑀸 𑁋 𑀲𑀻𑀳𑁄 𑀯𑀺𑀬 𑀲𑀻𑀳𑁄, 𑀫𑀼𑀦𑀺 𑀘 𑀲𑁄 𑀲𑀻𑀳𑁄 𑀘𑀸𑀢𑀺 𑀫𑀼𑀦𑀺𑀲𑀻𑀳𑁄. 𑀏𑀯𑀁 𑀫𑀼𑀦𑀺𑀯𑀲𑀪𑁄, 𑀫𑀼𑀦𑀺𑀧𑀼𑀗𑁆𑀕𑀯𑁄, 𑀩𑀼𑀤𑁆𑀥𑀦𑀸𑀕𑁄, 𑀩𑀼𑀤𑁆𑀥𑀸𑀤𑀺𑀘𑁆𑀘𑁄, 𑀭𑀁𑀲𑀺 𑀯𑀺𑀬 𑀭𑀁𑀲𑀺, 𑀲𑀤𑁆𑀥𑀫𑁆𑀫𑁄 𑀘 𑀲𑁄 𑀭𑀁𑀲𑀺 𑀘𑀸𑀢𑀺 𑀲𑀤𑁆𑀥𑀫𑁆𑀫𑀭𑀁𑀲𑀺. 𑀏𑀯𑀁 𑀯𑀺𑀦𑀬𑀲𑀸𑀕𑀭𑁄, 𑀧𑀼𑀡𑁆𑀟𑀭𑀻𑀓𑀫𑀺𑀯 𑀧𑀼𑀡𑁆𑀟𑀭𑀻𑀓𑁄, 𑀲𑀫𑀡𑁄 𑀘 𑀲𑁄 𑀧𑀼𑀡𑁆𑀟𑀭𑀻𑀓𑁄 𑀘𑀸𑀢𑀺 𑀲𑀫𑀡𑀧𑀼𑀡𑁆𑀟𑀭𑀻𑀓𑁄, 𑀲𑀫𑀡𑀧𑀤𑀼𑀫𑁄. 𑀘𑀦𑁆𑀤𑁄 𑀯𑀺𑀬 𑀘𑀦𑁆𑀤𑁄, 𑀫𑀼𑀔𑀜𑁆𑀘 𑀢𑀁 𑀘𑀦𑁆𑀤𑁄 𑀘𑀸𑀢𑀺 𑀫𑀼𑀔𑀘𑀦𑁆𑀤𑁄. 𑀏𑀯𑀁 𑀫𑀼𑀔𑀧𑀤𑀼𑀫𑀁 𑀇𑀘𑁆𑀘𑀸𑀤𑀺.

𑀲𑀫𑁆𑀪𑀸𑀯𑀦𑀸𑀧𑀼𑀩𑁆𑀩𑀧𑀤𑁄 𑀬𑀣𑀸 𑁋 𑀥𑀫𑁆𑀫𑁄 𑀇𑀢𑀺 𑀩𑀼𑀤𑁆𑀥𑀺 𑀥𑀫𑁆𑀫𑀩𑀼𑀤𑁆𑀥𑀺. 𑀏𑀯𑀁 𑀥𑀫𑁆𑀫𑀲𑀜𑁆𑀜𑀸, 𑀥𑀫𑁆𑀫𑀲𑀗𑁆𑀔𑀸𑀢𑁄, 𑀥𑀫𑁆𑀫𑀲𑀫𑁆𑀫𑀢𑁄, 𑀧𑀸𑀡𑀲𑀜𑁆𑀜𑀺𑀢𑀸, 𑀅𑀲𑀼𑀪𑀲𑀜𑁆𑀜𑀸, 𑀅𑀦𑀺𑀘𑁆𑀘𑀲𑀜𑁆𑀜𑀸, 𑀅𑀦𑀢𑁆𑀢𑀲𑀜𑁆𑀜𑀸, 𑀥𑀸𑀢𑀼𑀲𑀜𑁆𑀜𑀸, 𑀥𑀻𑀢𑀼𑀲𑀜𑁆𑀜𑀸, 𑀅𑀢𑁆𑀢𑀲𑀜𑁆𑀜𑀸, 𑀅𑀢𑁆𑀣𑀺𑀲𑀜𑁆𑀜𑀸, 𑀅𑀢𑁆𑀢𑀤𑀺𑀝𑁆𑀞𑀺 𑀇𑀘𑁆𑀘𑀸𑀤𑀺.

𑀅𑀯𑀥𑀸𑀭𑀡𑀧𑀼𑀩𑁆𑀩𑀧𑀤𑁄 𑀬𑀣𑀸 𑁋 𑀕𑀼𑀡𑁄 𑀏𑀯 𑀥𑀦𑀁 𑀕𑀼𑀡𑀥𑀦𑀁. 𑀏𑀯𑀁 𑀲𑀤𑁆𑀥𑀸𑀥𑀦𑀁, 𑀲𑀻𑀮𑀥𑀦𑀁, 𑀧𑀜𑁆𑀜𑀸𑀥𑀦𑀁, 𑀘𑀓𑁆𑀔𑀼 𑀏𑀯 𑀇𑀦𑁆𑀤𑁆𑀭𑀺𑀬𑀁 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁. 𑀏𑀯𑀁 𑀘𑀓𑁆𑀔𑀸𑀬𑀢𑀦𑀁, 𑀘𑀓𑁆𑀔𑀼𑀥𑀸𑀢𑀼, 𑀘𑀓𑁆𑀔𑀼𑀤𑁆𑀯𑀸𑀭𑀁, 𑀭𑀽𑀧𑀸𑀭𑀫𑁆𑀫𑀡𑀫𑀺𑀘𑁆𑀘𑀸𑀤𑀺.

𑀦𑀦𑀺𑀧𑀸𑀢𑀧𑀼𑀩𑁆𑀩𑀧𑀤𑁄 𑀬𑀣𑀸 𑁋 𑀦 𑀩𑁆𑀭𑀸𑀳𑁆𑀫𑀡𑁄𑀢𑀺 𑀅𑀢𑁆𑀣𑁂 𑀓𑀫𑁆𑀫𑀥𑀸𑀭𑀬𑀲𑀫𑀸𑀲𑁂, 𑀯𑀺𑀪𑀢𑁆𑀢𑀺𑀮𑁄𑀧𑀸𑀤𑀺𑀫𑁆𑀳𑀺 𑀘 𑀓𑀢𑁂 𑁋

‘‘𑀉𑀪𑁂 𑀢𑀧𑁆𑀧𑀼𑀭𑀺𑀲𑀸’’𑀢𑀺 𑀢𑀧𑁆𑀧𑀼𑀭𑀺𑀲𑀲𑀜𑁆𑀜𑀸.

𑁩𑁪𑁪. 𑀅𑀢𑁆𑀢𑀁 𑀦𑀲𑁆𑀲 𑀢𑀧𑁆𑀧𑀼𑀭𑀺𑀲𑁂.

𑀦𑀲𑁆𑀲 𑀦𑀺𑀧𑀸𑀢𑀧𑀤𑀲𑁆𑀲 𑀢𑀧𑁆𑀧𑀼𑀭𑀺𑀲𑁂 𑀉𑀢𑁆𑀢𑀭𑀧𑀤𑁂 𑀧𑀭𑁂 𑀲𑀩𑁆𑀩𑀲𑁆𑀲𑁂𑀯 𑀅𑀢𑁆𑀢𑀁 𑀳𑁄𑀢𑀺. 𑀢𑀧𑁆𑀧𑀼𑀭𑀺𑀲𑁂𑀓𑀤𑁂𑀲𑀢𑁆𑀢𑀸 𑀢𑀧𑁆𑀧𑀼𑀭𑀺𑀲𑁄, 𑀅𑀩𑁆𑀭𑀸𑀳𑁆𑀫𑀡𑁄.

𑀦 𑀦𑀺𑀲𑁂𑀥𑁄 𑀲𑀢𑁄 𑀬𑀼𑀢𑁆𑀢𑁄,

𑀤𑁂𑀲𑀸𑀤𑀺𑀦𑀺𑀬𑀫𑀁 𑀯𑀺𑀦𑀸;

𑀅𑀲𑀢𑁄 𑀘𑀸𑀨𑀮𑁄 𑀢𑀲𑁆𑀫𑀸,

𑀓𑀣𑀫𑀩𑁆𑀭𑀸𑀳𑁆𑀫𑀡𑁄𑀢𑀺 𑀘𑁂?

𑀦𑀺𑀲𑁂𑀥𑀢𑁆𑀣𑀸𑀦𑀼𑀯𑀸𑀤𑁂𑀦, 𑀧𑀝𑀺𑀲𑁂𑀥𑀯𑀺𑀥𑀺 𑀓𑁆𑀯𑀘𑀺;

𑀧𑀭𑀲𑁆𑀲 𑀫𑀺𑀘𑁆𑀙𑀸𑀜𑀸𑀡𑀢𑁆𑀢𑀸-𑀔𑁆𑀬𑀸𑀧𑀦𑀸𑀬𑁄𑀧𑀧𑀚𑁆𑀚𑀢𑁂.

𑀤𑀼𑀯𑀺𑀥𑁄 𑀘𑀲𑁆𑀲𑀢𑁆𑀣𑁄 𑀧𑀲𑀚𑁆𑀚𑀧𑁆𑀧𑀝𑀺𑀲𑁂𑀥𑀧𑀭𑀺𑀬𑀼𑀤𑀸𑀲𑀯𑀲𑁂𑀦.

𑀢𑀢𑁆𑀣 𑀬𑁄 ‘‘𑀅𑀲𑀽𑀭𑀺𑀬𑀧𑀲𑁆𑀲𑀸 𑀭𑀸𑀚𑀤𑀸𑀭𑀸’’𑀢𑀺𑀆𑀤𑀻𑀲𑀼 𑀯𑀺𑀬 𑀉𑀢𑁆𑀢𑀭𑀧𑀤𑀢𑁆𑀣𑀲𑁆𑀲 𑀲𑀩𑁆𑀩𑀣𑀸 𑀅𑀪𑀸𑀯𑀁 𑀤𑀻𑀧𑁂𑀢𑀺, 𑀲𑁄 𑀧𑀲𑀚𑁆𑀚𑀧𑁆𑀧𑀝𑀺𑀲𑁂𑀥𑀯𑀸𑀘𑀻 𑀦𑀸𑀫. 𑀬𑁄 𑀧𑀦 ‘‘𑀅𑀩𑁆𑀭𑀸𑀳𑁆𑀫𑀡 𑀅𑀫𑀦𑀼𑀲𑁆𑀲𑀸’’𑀢𑀺𑀆𑀤𑀻𑀲𑀼 𑀯𑀺𑀬 𑀉𑀢𑁆𑀢𑀭𑀧𑀤𑀢𑁆𑀣𑀁 𑀧𑀭𑀺𑀬𑀼𑀤𑀸𑀲𑀺𑀢𑁆𑀯𑀸 𑀢𑀁𑀲𑀤𑀺𑀲𑁂 𑀯𑀢𑁆𑀣𑀼𑀫𑁆𑀳𑀺 𑀓𑀸𑀭𑀺𑀬𑀁 𑀧𑀝𑀺𑀧𑀸𑀤𑀬𑀢𑀺, 𑀲𑁄 𑀧𑀭𑀺𑀬𑀼𑀤𑀸𑀲𑀯𑀸𑀘𑀻 𑀦𑀸𑀫.

𑀯𑀼𑀢𑁆𑀢𑀜𑁆𑀘

‘‘𑀧𑀲𑀚𑁆𑀚𑀧𑁆𑀧𑀝𑀺𑀲𑁂𑀥𑀲𑁆𑀲, 𑀮𑀓𑁆𑀔𑀡𑀁 𑀯𑀢𑁆𑀣𑀼𑀦𑀢𑁆𑀣𑀺𑀢𑀸;

𑀯𑀢𑁆𑀣𑀼𑀢𑁄 𑀅𑀜𑁆𑀜𑀢𑁆𑀭 𑀯𑀼𑀢𑁆𑀢𑀺, 𑀧𑀭𑀺𑀬𑀼𑀤𑀸𑀲𑀮𑀓𑁆𑀔𑀡’’𑀦𑁆𑀢𑀺.

𑀦𑀦𑁆𑀯𑁂𑀯𑀁 𑀲𑀦𑁆𑀢𑁂𑀧𑀺 ‘‘𑀅𑀩𑁆𑀭𑀸𑀳𑁆𑀫𑀡𑁄’’𑀢𑀺𑀆𑀤𑀻𑀲𑀼 𑀓𑀣𑀫𑀼𑀢𑁆𑀢𑀭𑀧𑀤𑀢𑁆𑀣𑀧𑁆𑀧𑀥𑀸𑀦𑀢𑀸 𑀲𑀺𑀬𑀸𑀢𑀺?

𑀯𑀼𑀘𑁆𑀘𑀢𑁂 𑁋 𑀩𑁆𑀭𑀸𑀳𑁆𑀫𑀡𑀸𑀤𑀺𑀲𑀤𑁆𑀤𑀸𑀦𑀁 𑀩𑁆𑀭𑀸𑀳𑁆𑀫𑀡𑀸𑀤𑀺𑀅𑀢𑁆𑀣𑀲𑁆𑀲𑁂𑀯 𑀢𑀁𑀲𑀤𑀺𑀲𑀸𑀤𑀺𑀅𑀢𑁆𑀣𑀲𑁆𑀲𑀸𑀧𑀺 𑀯𑀸𑀘𑀓𑀢𑁆𑀢𑀸, 𑀩𑁆𑀭𑀸𑀳𑁆𑀫𑀡𑀸𑀤𑀺𑀲𑀤𑁆𑀤𑀸 𑀳𑀺 𑀓𑁂𑀯𑀮𑀸𑀩𑁆𑀭𑀸𑀳𑁆𑀫𑀡𑀸𑀤𑀺𑀅𑀢𑁆𑀣𑁂𑀲𑁆𑀯𑁂𑀯 𑀧𑀸𑀓𑀝𑀸, 𑀪𑀽𑀲𑀤𑁆𑀤𑁄 𑀯𑀺𑀬𑀲𑀢𑁆𑀢𑀸𑀬𑀁, 𑀬𑀤𑀸 𑀢𑁂 𑀧𑀦 𑀅𑀜𑁆𑀜𑁂𑀦 𑀲𑀤𑀺𑀲𑀸𑀤𑀺𑀯𑀸𑀘𑀓𑁂𑀦 𑀦𑀇𑀢𑀺 𑀦𑀺𑀧𑀸𑀢𑁂𑀦 𑀬𑀼𑀚𑁆𑀚𑀦𑁆𑀢𑀺, 𑀢𑀤𑀸 𑀢𑀁𑀲𑀤𑀺𑀲𑀢𑀤𑀜𑁆𑀜𑀢𑀩𑁆𑀩𑀺𑀭𑀼𑀤𑁆𑀥𑀢𑀤𑀪𑀸𑀯𑁂𑀲𑀼𑀧𑀺 𑀯𑀢𑁆𑀢𑀦𑁆𑀢𑀺, 𑀪𑀽𑀲𑀤𑁆𑀤𑁄 𑀯𑀺𑀬 𑀅𑀦𑁆𑀯𑀪𑀺𑀬𑀸𑀤𑀺𑀬𑁄𑀕𑁂 𑀅𑀦𑀼𑀪𑀯𑀦𑀅𑀪𑀺𑀪𑀯𑀦𑀸𑀤𑀻𑀲𑀼, 𑀢𑀲𑁆𑀫𑀸 𑀉𑀢𑁆𑀢𑀭𑀧𑀤𑀢𑁆𑀣𑀚𑁄𑀢𑀓𑁄𑀬𑁂𑀯𑁂𑀢𑁆𑀣 𑀦𑀇𑀢𑀺 𑀦𑀺𑀧𑀸𑀢𑁄𑀢𑀺 𑀦 𑀤𑁄𑀲𑁄, 𑀢𑁂𑀦 𑀅𑀩𑁆𑀭𑀸𑀳𑁆𑀫𑀡𑁄𑀢𑀺 𑀩𑁆𑀭𑀸𑀳𑁆𑀫𑀡𑀲𑀤𑀺𑀲𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀯𑀁 𑀅𑀫𑀦𑀼𑀲𑁆𑀲𑁄, 𑀅𑀲𑁆𑀲𑀫𑀡𑁄.

𑀅𑀜𑁆𑀜𑀢𑁆𑀣𑁂 𑁋 𑀦 𑀩𑁆𑀬𑀸𑀓𑀢𑀸 𑀅𑀩𑁆𑀬𑀸𑀓𑀢𑀸, 𑀅𑀲𑀁𑀓𑀺𑀮𑀺𑀝𑁆𑀞𑀸, 𑀅𑀧𑀭𑀺𑀬𑀸𑀧𑀦𑁆𑀦𑀸.

𑀯𑀺𑀭𑀼𑀤𑁆𑀥𑀢𑁆𑀣𑁂 𑁋 𑀦 𑀓𑀼𑀲𑀮𑀸 𑀅𑀓𑀼𑀲𑀮𑀸, 𑀓𑀼𑀲𑀮𑀧𑀝𑀺𑀧𑀓𑁆𑀔𑀸𑀢𑀺 𑀅𑀢𑁆𑀣𑁄. 𑀏𑀯𑀁 𑀅𑀮𑁄𑀪𑁄, 𑀅𑀫𑀺𑀢𑁆𑀢𑁄.

𑀧𑀲𑀚𑁆𑀚𑀧𑁆𑀧𑀝𑀺𑀲𑁂𑀥𑁂 𑁋 𑀦 𑀓𑀢𑁆𑀯𑀸 𑀅𑀓𑀢𑁆𑀯𑀸, 𑀅𑀓𑀸𑀢𑀼𑀦 𑀧𑀼𑀜𑁆𑀜𑀁 𑀅𑀓𑀭𑁄𑀦𑁆𑀢𑁄.

‘‘𑀦𑀲𑁆𑀲, 𑀢𑀧𑁆𑀧𑀼𑀭𑀺𑀲𑁂’’𑀢𑀺 𑀘 𑀯𑀢𑁆𑀢𑀢𑁂.

𑁩𑁪𑁫. 𑀲𑀭𑁂 𑀅𑀦.

𑀦𑀇𑀘𑁆𑀘𑁂𑀢𑀲𑁆𑀲 𑀧𑀤𑀲𑁆𑀲 𑀢𑀧𑁆𑀧𑀼𑀭𑀺𑀲𑁂 𑀉𑀢𑁆𑀢𑀭𑀧𑀤𑁂 𑀅𑀦 𑀳𑁄𑀢𑀺 𑀲𑀭𑁂 𑀧𑀭𑁂.

𑀦 𑀅𑀲𑁆𑀲𑁄 𑀅𑀦𑀲𑁆𑀲𑁄, 𑀦 𑀅𑀭𑀺𑀬𑁄 𑀅𑀦𑀭𑀺𑀬𑁄. 𑀏𑀯𑀁 𑀅𑀦𑀺𑀲𑁆𑀲𑀭𑁄, 𑀅𑀦𑀺𑀝𑁆𑀞𑁄, 𑀅𑀦𑀼𑀧𑀯𑀸𑀤𑁄, 𑀦 𑀆𑀤𑀸𑀬 𑀅𑀦𑀸𑀤𑀸𑀬, 𑀅𑀦𑁄𑀮𑁄𑀓𑁂𑀢𑁆𑀯𑀸 𑀇𑀘𑁆𑀘𑀸𑀤𑀺.

𑀓𑀼𑀧𑀼𑀩𑁆𑀩𑀧𑀤𑁄 𑀬𑀣𑀸 𑁋 𑀓𑀼𑀘𑁆𑀙𑀺𑀢𑀫𑀦𑁆𑀦𑀦𑁆𑀢𑀺 𑀦𑀺𑀘𑁆𑀘𑀲𑀫𑀸𑀲𑀢𑁆𑀢𑀸 𑀅𑀜𑁆𑀜𑀧𑀤𑁂𑀦 𑀯𑀺𑀕𑁆𑀕𑀳𑁄, 𑀓𑀫𑁆𑀫𑀥𑀸𑀭𑀬𑀲𑀫𑀸𑀲𑁂 𑀓𑀢𑁂 𑁋

‘‘𑀢𑀧𑁆𑀧𑀼𑀭𑀺𑀲𑁂, 𑀲𑀭𑁂’’𑀢𑀺 𑀘 𑀯𑀢𑁆𑀢𑀢𑁂.

𑁩𑁪𑁬. 𑀓𑀤𑀤 𑀓𑀼𑀲𑁆𑀲.

𑀓𑀼𑀇𑀘𑁆𑀘𑁂𑀢𑀲𑁆𑀲 𑀦𑀺𑀧𑀸𑀢𑀲𑁆𑀲 𑀢𑀧𑁆𑀧𑀼𑀭𑀺𑀲𑁂 𑀉𑀢𑁆𑀢𑀭𑀧𑀤𑁂 𑀓𑀤 𑀳𑁄𑀢𑀺 𑀲𑀭𑁂 𑀧𑀭𑁂. 𑀓𑀤𑀦𑁆𑀦𑀁. 𑀏𑀯𑀁 𑀓𑀤𑀲𑀦𑀁.

𑀲𑀭𑁂𑀢𑀺 𑀓𑀺𑀁? 𑀓𑀼𑀤𑀸𑀭𑀸, 𑀓𑀼𑀧𑀼𑀢𑁆𑀢𑀸, 𑀓𑀼𑀤𑀸𑀲𑀸, 𑀓𑀼𑀤𑀺𑀝𑁆𑀞𑀺.

‘‘𑀓𑀼𑀲𑁆𑀲𑀸’’𑀢𑀺 𑀯𑀢𑁆𑀢𑀢𑁂.

𑁩𑁪𑁭. 𑀓𑀸𑀧𑁆𑀧𑀢𑁆𑀣𑁂𑀲𑀼 𑀘.

𑀓𑀼𑀇𑀘𑁆𑀘𑁂𑀢𑀲𑁆𑀲 𑀅𑀧𑁆𑀧𑀢𑁆𑀣𑁂 𑀯𑀢𑁆𑀢𑀫𑀸𑀦𑀲𑁆𑀲 𑀓𑀸 𑀳𑁄𑀢𑀺 𑀢𑀧𑁆𑀧𑀼𑀭𑀺𑀲𑁂 𑀉𑀢𑁆𑀢𑀭𑀧𑀤𑁂 𑀧𑀭𑁂. 𑀩𑀳𑀼𑀯𑀘𑀦𑀼𑀘𑁆𑀘𑀸𑀭𑀡𑀢𑁄 𑀓𑀼𑀘𑁆𑀙𑀺𑀢𑀢𑁆𑀣𑁂 𑀘 𑀓𑁆𑀯𑀘𑀺 𑀢𑀧𑁆𑀧𑀼𑀭𑀺𑀲𑁂. 𑀅𑀧𑁆𑀧𑀓𑀁 𑀮𑀯𑀡𑀁 𑀓𑀸𑀮𑀯𑀡𑀁. 𑀏𑀯𑀁 𑀓𑀸𑀧𑀼𑀧𑁆𑀨𑀁, 𑀓𑀼𑀘𑁆𑀙𑀺𑀢𑁄 𑀧𑀼𑀭𑀺𑀲𑁄 𑀓𑀸𑀧𑀼𑀭𑀺𑀲𑁄, 𑀓𑀼𑀧𑀼𑀭𑀺𑀲𑁄 𑀯𑀸.

𑀧𑀸𑀤𑀺𑀧𑀼𑀩𑁆𑀩𑀧𑀤𑁄 𑀘 𑀦𑀺𑀘𑁆𑀘𑀲𑀫𑀸𑀲𑁄𑀯, 𑀧𑀥𑀸𑀦𑀁 𑀯𑀘𑀦𑀁 𑀧𑀸𑀯𑀘𑀦𑀁, 𑀪𑀼𑀲𑀁 𑀯𑀤𑁆𑀥𑀁 𑀧𑀯𑀤𑁆𑀥𑀁, 𑀲𑀭𑀻𑀭𑀁, 𑀲𑀫𑀁, 𑀲𑀫𑁆𑀫𑀸 𑀯𑀸 𑀆𑀥𑀸𑀦𑀁 𑀲𑀫𑀸𑀥𑀸𑀦𑀁, 𑀯𑀺𑀯𑀺𑀥𑀸 𑀫𑀢𑀺 𑀯𑀺𑀫𑀢𑀺, 𑀯𑀺𑀯𑀺𑀥𑁄 𑀓𑀧𑁆𑀧𑁄 𑀯𑀺𑀓𑀧𑁆𑀧𑁄, 𑀯𑀺𑀲𑀺𑀝𑁆𑀞𑁄 𑀯𑀸 𑀓𑀧𑁆𑀧𑁄 𑀯𑀺𑀓𑀧𑁆𑀧𑁄, 𑀅𑀥𑀺𑀓𑁄 𑀤𑁂𑀯𑁄 𑀅𑀢𑀺𑀤𑁂𑀯𑁄. 𑀏𑀯𑀁 𑀅𑀥𑀺𑀤𑁂𑀯𑁄, 𑀅𑀥𑀺𑀲𑀻𑀮𑀁, 𑀲𑀼𑀦𑁆𑀤𑀭𑁄 𑀕𑀦𑁆𑀥𑁄 𑀲𑀼𑀕𑀦𑁆𑀥𑁄, 𑀓𑀼𑀘𑁆𑀙𑀺𑀢𑁄 𑀕𑀦𑁆𑀥𑁄 𑀤𑀼𑀕𑁆𑀕𑀦𑁆𑀥𑁄, 𑀲𑁄𑀪𑀦𑀁 𑀓𑀢𑀁 𑀲𑀼𑀓𑀢𑀁, 𑀅𑀲𑁄𑀪𑀦𑀁 𑀓𑀢𑀁 𑀤𑀼𑀓𑁆𑀓𑀝𑀁 𑀇𑀘𑁆𑀘𑀸𑀤𑀺.

𑀬𑁂 𑀇𑀥 𑀅𑀯𑀺𑀳𑀺𑀢𑀮𑀓𑁆𑀔𑀡𑀸 𑀦𑀸𑀫𑀦𑀺𑀧𑀸𑀢𑁄𑀧𑀲𑀕𑁆𑀕𑀸, 𑀢𑁂𑀲𑀁 ‘‘𑀦𑀸𑀫𑀸𑀦𑀁 𑀲𑀫𑀸𑀲𑁄’’𑀢𑀺 𑀬𑁄𑀕𑀯𑀺𑀪𑀸𑀕𑁂𑀦 𑀲𑀫𑀸𑀲𑁄 𑀤𑀝𑁆𑀞𑀩𑁆𑀩𑁄. 𑀬𑀣𑀸 𑁋 𑀅𑀧𑀼𑀦𑀕𑁂𑀬𑁆𑀬𑀸 𑀕𑀸𑀣𑀸, 𑀅𑀘𑀦𑁆𑀤𑀫𑀼𑀮𑁆𑀮𑁄𑀓𑀺𑀓𑀸𑀦𑀺 𑀫𑀼𑀔𑀸𑀦𑀺, 𑀅𑀲𑁆𑀲𑀤𑁆𑀥𑀪𑁄𑀚𑀻, 𑀅𑀮𑀯𑀡𑀪𑁄𑀚𑀻𑀢𑀺𑀆𑀤𑀻𑀲𑀼 𑀅𑀬𑀼𑀢𑁆𑀢𑀢𑁆𑀣𑀢𑁆𑀢𑀸 𑀦𑀸𑀜𑁆𑀜𑁂𑀦 𑀲𑀫𑀸𑀲𑁄.

𑀢𑀣𑀸 𑀤𑀺𑀝𑁆𑀞𑁄 𑀧𑀼𑀩𑁆𑀩𑀦𑁆𑀢𑀺 𑀤𑀺𑀝𑁆𑀞𑀧𑀼𑀩𑁆𑀩𑁄 𑀢𑀣𑀸𑀕𑀢𑀁. 𑀏𑀯𑀁 𑀲𑀼𑀢𑀧𑀼𑀩𑁆𑀩𑁄 𑀥𑀫𑁆𑀫𑀁, 𑀕𑀢𑀧𑀼𑀩𑁆𑀩𑁄 𑀫𑀕𑁆𑀕𑀁, 𑀓𑀫𑁆𑀫𑀦𑀺 𑀤𑀺𑀝𑁆𑀞𑀸 𑀧𑀼𑀩𑁆𑀩𑀦𑁆𑀢𑀺 𑀤𑀺𑀝𑁆𑀞𑀧𑀼𑀩𑁆𑀩𑀸 𑀤𑁂𑀯𑀸 𑀢𑁂𑀦. 𑀏𑀯𑀁 𑀲𑀼𑀢𑀧𑀼𑀩𑁆𑀩𑀸 𑀥𑀫𑁆𑀫𑀸, 𑀕𑀢𑀧𑀼𑀩𑁆𑀩𑀸 𑀤𑀺𑀲𑀸, 𑀧𑀳𑀸𑀭𑁄, 𑀧𑀭𑀸𑀪𑀯𑁄, 𑀯𑀺𑀳𑀸𑀭𑁄, 𑀆𑀳𑀸𑀭𑁄, 𑀉𑀧𑀳𑀸𑀭𑁄 𑀇𑀘𑁆𑀘𑀸𑀤𑀺.

𑀓𑀫𑁆𑀫𑀥𑀸𑀭𑀬𑀲𑀫𑀸𑀲𑁄.

𑀤𑀺𑀕𑀼𑀲𑀫𑀸𑀲

𑀅𑀣 𑀤𑀺𑀕𑀼𑀲𑀫𑀸𑀲𑁄 𑀯𑀼𑀘𑁆𑀘𑀢𑁂.

𑀢𑀬𑁄 𑀮𑁄𑀓𑀸 𑀲𑀫𑀸𑀳𑀝𑀸 𑀘𑀺𑀢𑁆𑀢𑁂𑀦 𑀲𑀫𑁆𑀧𑀺𑀡𑁆𑀟𑀺𑀢𑀸, 𑀢𑀺𑀡𑁆𑀡𑀁 𑀮𑁄𑀓𑀸𑀦𑀁 𑀲𑀫𑀸𑀳𑀸𑀭𑁄𑀢𑀺 𑀯𑀸 𑀅𑀢𑁆𑀣𑁂 𑁋

‘‘𑀦𑀸𑀫𑀸𑀦𑀁 𑀲𑀫𑀸𑀲𑁄 𑀬𑀼𑀢𑁆𑀢𑀢𑁆𑀣𑁄’’𑀢𑀺 𑀯𑀢𑁆𑀢𑀫𑀸𑀦𑁂 ‘‘𑀤𑁆𑀯𑀺𑀧𑀤𑁂’’𑀢𑀺𑀆𑀤𑀺𑀦𑀸 𑀓𑀫𑁆𑀫𑀥𑀸𑀭𑀬𑀲𑀫𑀸𑀲𑁄, 𑀢𑀢𑁄 𑀲𑀫𑀸𑀲𑀲𑀜𑁆𑀜𑀸𑀬𑀁, 𑀯𑀺𑀪𑀢𑁆𑀢𑀺𑀮𑁄𑀧𑁂, 𑀧𑀓𑀢𑀺𑀪𑀸𑀯𑁂 𑀘 𑀓𑀢𑁂 𑁋

‘‘𑀓𑀫𑁆𑀫𑀥𑀸𑀭𑀬𑁄’’𑀢𑀺 𑀯𑀢𑁆𑀢𑀢𑁂.

𑁩𑁪𑁮. 𑀲𑀗𑁆𑀔𑁆𑀬𑀸𑀧𑀼𑀩𑁆𑀩𑁄 𑀤𑀺𑀕𑀼.

𑀲𑀗𑁆𑀔𑁆𑀬𑀸𑀧𑀼𑀩𑁆𑀩𑁄 𑀓𑀫𑁆𑀫𑀥𑀸𑀭𑀬𑀲𑀫𑀸𑀲𑁄 𑀤𑀺𑀕𑀼𑀲𑀜𑁆𑀜𑁄 𑀳𑁄𑀢𑀺.

𑀤𑁆𑀯𑁂 𑀕𑀸𑀯𑁄 𑀤𑀺𑀕𑀼, 𑀤𑀺𑀕𑀼𑀲𑀤𑀺𑀲𑀢𑁆𑀢𑀸 𑀅𑀬𑀫𑁆𑀧𑀺 𑀲𑀫𑀸𑀲𑁄 𑀤𑀺𑀕𑀽𑀢𑀺 𑀯𑀼𑀢𑁆𑀢𑁄. 𑀅𑀣 𑀯𑀸 𑀲𑀗𑁆𑀔𑁆𑀬𑀸𑀧𑀼𑀩𑁆𑀩𑀢𑁆𑀢𑀦𑀧𑀼𑀁𑀲𑀓𑁂𑀓𑀢𑁆𑀢𑀲𑀗𑁆𑀔𑀸𑀢𑁂𑀳𑀺 𑀤𑁆𑀯𑀻𑀳𑀺 𑀮𑀓𑁆𑀔𑀡𑁂𑀳𑀺 𑀕𑀢𑁄 𑀅𑀯𑀕𑀢𑁄𑀢𑀺 𑀤𑀺𑀕𑀽𑀢𑀺 𑀯𑀼𑀘𑁆𑀘𑀢𑀺, 𑀤𑁆𑀯𑀻𑀳𑀺 𑀯𑀸 𑀮𑀓𑁆𑀔𑀡𑁂𑀳𑀺 𑀕𑀘𑁆𑀙𑀢𑀺 𑀧𑀯𑀢𑁆𑀢𑀢𑀻𑀢𑀺 𑀤𑀺𑀕𑀼. 𑀏𑀢𑁆𑀣 𑀘 ‘‘𑀲𑀗𑁆𑀔𑁆𑀬𑀸𑀧𑀼𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑀗𑁆𑀔𑁆𑀬𑀸𑀲𑀤𑁆𑀤𑀲𑁆𑀲𑁂𑀯 𑀧𑀼𑀩𑁆𑀩𑀦𑀺𑀧𑀸𑀢𑁄, ‘‘𑀉𑀪𑁂 𑀢𑀧𑁆𑀧𑀼𑀭𑀺𑀲𑀸’’𑀢𑀺 𑀢𑀧𑁆𑀧𑀼𑀭𑀺𑀲𑀲𑀜𑁆𑀜𑀸.

‘‘𑀦𑀧𑀼𑀁𑀲𑀓𑀮𑀺𑀗𑁆𑀕𑁄’’𑀢𑀺 𑀯𑀢𑁆𑀢𑀢𑁂.

𑁩𑁪𑁯. 𑀤𑀺𑀕𑀼𑀲𑁆𑀲𑁂𑀓𑀢𑁆𑀢𑀁.

𑀤𑀺𑀕𑀼𑀲𑁆𑀲 𑀲𑀫𑀸𑀲𑀲𑁆𑀲 𑀏𑀓𑀢𑁆𑀢𑀁 𑀳𑁄𑀢𑀺, 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁆𑀢𑀜𑁆𑀘.

𑀲𑀫𑀸𑀳𑀸𑀭𑀤𑀺𑀕𑀼𑀲𑁆𑀲𑁂𑀢𑀁 𑀕𑀳𑀡𑀁, 𑀢𑀢𑁆𑀣 𑀲𑀩𑁆𑀩𑀢𑁆𑀣𑁂𑀓𑀯𑀘𑀦𑀫𑁂𑀯 𑀳𑁄𑀢𑀺, 𑀅𑀜𑁆𑀜𑀢𑁆𑀭 𑀧𑀦 𑀩𑀳𑀼𑀯𑀘𑀦𑀫𑁆𑀧𑀺, 𑀦𑀸𑀫𑀩𑁆𑀬𑀧𑀤𑁂𑀲𑀲𑁆𑀬𑀸𑀤𑁆𑀬𑀼𑀧𑁆𑀧𑀢𑁆𑀢𑀺 𑀅𑀫𑀸𑀤𑁂𑀲𑀸𑀤𑀺.

𑀢𑀺𑀮𑁄𑀓𑀁, 𑀳𑁂 𑀢𑀺𑀮𑁄𑀓, 𑀢𑀺𑀮𑁄𑀓𑀁, 𑀢𑀺𑀮𑁄𑀓𑁂𑀦, 𑀢𑀺𑀮𑁄𑀓𑀲𑁆𑀲, 𑀢𑀺𑀮𑁄𑀓𑀸 𑀢𑀺𑀮𑁄𑀓𑀲𑁆𑀫𑀸 𑀢𑀺𑀮𑁄𑀓𑀫𑁆𑀳𑀸, 𑀢𑀺𑀮𑁄𑀓𑀲𑁆𑀲, 𑀢𑀺𑀮𑁄𑀓𑁂 𑀢𑀺𑀮𑁄𑀓𑀫𑁆𑀳𑀺 𑀢𑀺𑀮𑁄𑀓𑀲𑁆𑀫𑀺𑀁.

𑀏𑀯𑀁 𑀢𑀬𑁄 𑀤𑀡𑁆𑀟𑀸 𑀢𑀺𑀤𑀡𑁆𑀟𑀁, 𑀢𑀻𑀡𑀺 𑀫𑀮𑀸𑀦𑀺 𑀲𑀫𑀸𑀳𑀝𑀸𑀦𑀺, 𑀢𑀺𑀡𑁆𑀡𑀁 𑀫𑀮𑀸𑀦𑀁 𑀲𑀫𑀸𑀳𑀸𑀭𑁄𑀢𑀺 𑀯𑀸 𑀢𑀺𑀫𑀮𑀁, 𑀢𑀺𑀮𑀓𑁆𑀔𑀡𑀁, 𑀘𑀢𑀼𑀲𑁆𑀲𑀘𑁆𑀘𑀁, 𑀘𑀢𑀲𑁆𑀲𑁄 𑀤𑀺𑀲𑀸 𑀘𑀢𑀼𑀤𑁆𑀤𑀺𑀲𑀁, ‘‘𑀲𑀭𑁄 𑀭𑀲𑁆𑀲𑁄 𑀦𑀧𑀼𑀁𑀲𑀓𑁂’’𑀢𑀺 𑀭𑀲𑁆𑀲𑀢𑁆𑀢𑀁, 𑀧𑀜𑁆𑀘𑀲𑀺𑀓𑁆𑀔𑀸𑀧𑀤𑀁, 𑀲𑀴𑀸𑀬𑀢𑀦𑀁, 𑀲𑀢𑁆𑀢𑀸𑀳𑀁, 𑀅𑀝𑁆𑀞𑀲𑀻𑀮𑀁, 𑀦𑀯𑀮𑁄𑀓𑀼𑀢𑁆𑀢𑀭𑀁, 𑀤𑀲𑀲𑀻𑀮𑀁, 𑀲𑀢𑀬𑁄𑀚𑀦𑀁.

𑀢𑀣𑀸 𑁋 𑀤𑁆𑀯𑁂 𑀭𑀢𑁆𑀢𑀺𑀬𑁄 𑀤𑁆𑀯𑀺𑀭𑀢𑁆𑀢𑀁, 𑀢𑀺𑀲𑁆𑀲𑁄 𑀭𑀢𑁆𑀢𑀺𑀬𑁄 𑀢𑀺𑀭𑀢𑁆𑀢𑀁, 𑀤𑁆𑀯𑁂 𑀅𑀗𑁆𑀕𑀼𑀮𑀺𑀬𑁄 𑀤𑁆𑀯𑀗𑁆𑀕𑀼𑀮𑀁, 𑀲𑀢𑁆𑀢 𑀕𑁄𑀤𑀸𑀯𑀭𑀺𑀬𑁄, 𑀢𑀸𑀲𑀁 𑀲𑀫𑀸𑀳𑀸𑀭𑁄𑀢𑀺 𑀯𑀸 𑀲𑀢𑁆𑀢𑀕𑁄𑀤𑀸𑀯𑀭𑀁.

𑀏𑀢𑁆𑀣 𑀘 𑀭𑀢𑁆𑀢𑀺 𑀅𑀗𑁆𑀕𑀼𑀮𑀺 𑀕𑁄𑀤𑀸𑀯𑀭𑀻𑀦𑀫𑀦𑁆𑀢𑀲𑁆𑀲 𑁋

𑁩𑁫𑁦. 𑀓𑁆𑀯𑀘𑀺 𑀲𑀫𑀸𑀲𑀦𑁆𑀢𑀕𑀢𑀸𑀦𑀫𑀓𑀸𑀭𑀦𑁆𑀢𑁄.

𑀭𑀸𑀚𑀸𑀤𑀺𑀕𑀡𑀲𑁆𑀲𑁂𑀢𑀁 𑀕𑀳𑀡𑀁, 𑀢𑁂𑀦 𑀲𑀫𑀸𑀲𑀦𑁆𑀢𑀕𑀢𑀸𑀦𑀁 𑀭𑀸𑀚𑀸𑀤𑀻𑀦𑀁 𑀦𑀸𑀫𑀸𑀦𑀁 𑀅𑀦𑁆𑀢𑁄 𑀓𑁆𑀯𑀘𑀺 𑀅𑀓𑀸𑀭𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀓𑀸𑀭𑀕𑁆𑀕𑀳𑀡𑁂𑀦 𑀩𑀳𑀼𑀩𑁆𑀩𑀻𑀳𑀸𑀤𑀺𑀫𑁆𑀳𑀺 𑀲𑀫𑀸𑀲𑀦𑁆𑀢𑁂 𑀓𑁆𑀯𑀘𑀺 𑀓𑀧𑁆𑀧𑀘𑁆𑀘𑀬𑁄 𑀳𑁄𑀢𑀺, 𑀲𑀼𑀭𑀪𑀺 𑀲𑀼 𑀤𑀼 𑀧𑀽𑀢𑀻𑀳𑀺 𑀕𑀦𑁆𑀥𑀦𑁆𑀢𑀲𑁆𑀲𑀺𑀓𑀸𑀭𑁄 𑀘.

𑀅𑀣 𑀯𑀸 𑀅 𑀘 𑀓𑁄 𑀘 𑀅𑀓𑀸, 𑀭𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄, 𑀢𑁂𑀦 𑀓𑁆𑀯𑀘𑀺 𑀲𑀫𑀸𑀲𑀦𑁆𑀢𑀕𑀢𑀸𑀦𑀫𑀦𑁆𑀢𑁄 𑀳𑀼𑀢𑁆𑀯𑀸 𑀅 𑀓 𑀇𑀘𑁆𑀘𑁂𑀢𑁂 𑀧𑀘𑁆𑀘𑀬𑀸 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦 𑀧𑀜𑁆𑀘 𑀕𑀸𑀯𑁄 𑀲𑀫𑀸𑀳𑀝𑀸𑀢𑀺 𑀅𑀢𑁆𑀣𑁂 𑀲𑀫𑀸𑀲𑀸𑀤𑀺𑀁 𑀓𑀢𑁆𑀯𑀸 𑀲𑀫𑀸𑀲𑀦𑁆𑀢𑁂 𑀅𑀧𑁆𑀧𑀘𑁆𑀘𑀬𑁂, ‘‘𑀑 𑀲𑀭𑁂 𑀘𑀸’’𑀢𑀺 𑀅𑀯𑀸𑀤𑁂𑀲𑁂 𑀘 𑀓𑀢𑁂 ‘‘𑀧𑀜𑁆𑀘𑀕𑀯’’𑀦𑁆𑀢𑀺𑀆𑀤𑀺 𑀘 𑀲𑀺𑀚𑁆𑀛𑀢𑀺. ‘‘𑀤𑁆𑀯𑀺𑀭𑀢𑁆𑀢’’𑀦𑁆𑀢𑀺𑀆𑀤𑀻𑀲𑀼 𑀧𑀦 𑀅𑀧𑁆𑀧𑀘𑁆𑀘𑀬𑁂 𑀓𑀢𑁂 𑀧𑀼𑀩𑁆𑀩𑀲𑀭𑀲𑁆𑀲 ‘‘𑀲𑀭𑀮𑁄𑀧𑁄’’𑀢𑀺𑀆𑀤𑀺𑀦𑀸 𑀮𑁄𑀧𑁄.

𑀅𑀲𑀫𑀸𑀳𑀸𑀭𑀤𑀺𑀕𑀼 𑀬𑀣𑀸 𑁋 𑀏𑀓𑁄 𑀘 𑀲𑁄 𑀧𑀼𑀕𑁆𑀕𑀮𑁄 𑀘𑀸𑀢𑀺 𑀏𑀓𑀧𑀼𑀕𑁆𑀕𑀮𑁄. 𑀏𑀯𑀁 𑀏𑀓𑀥𑀫𑁆𑀫𑁄, 𑀏𑀓𑀧𑀼𑀢𑁆𑀢𑁄, 𑀢𑀬𑁄 𑀪𑀯𑀸 𑀢𑀺𑀪𑀯𑀸, 𑀘𑀢𑀲𑁆𑀲𑁄 𑀤𑀺𑀲𑀸 𑀘𑀢𑀼𑀤𑁆𑀤𑀺𑀲𑀸, 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀸𑀦𑀺 𑀇𑀘𑁆𑀘𑀸𑀤𑀺.

𑀤𑀺𑀕𑀼𑀲𑀫𑀸𑀲𑁄.

𑀢𑀧𑁆𑀧𑀼𑀭𑀺𑀲𑀲𑀫𑀸𑀲

𑀅𑀣 𑀢𑀧𑁆𑀧𑀼𑀭𑀺𑀲𑀲𑀫𑀸𑀲𑁄 𑀯𑀼𑀘𑁆𑀘𑀢𑁂.