𑁩. 𑀓𑀸𑀭𑀓𑀓𑀡𑁆𑀟

𑀧𑀞𑀫𑀸𑀯𑀺𑀪𑀢𑁆𑀢𑀺𑀭𑀸𑀲𑀺

𑀅𑀣 𑀦𑀸𑀫𑀯𑀺𑀪𑀢𑁆𑀢𑀻𑀦𑀁 𑀅𑀢𑁆𑀣𑀪𑁂𑀤𑀸 𑀯𑀼𑀘𑁆𑀘𑀦𑁆𑀢𑁂.

𑀓𑀲𑁆𑀫𑀺𑀁 𑀅𑀢𑁆𑀣𑁂 𑀧𑀞𑀫𑀸?

𑁨𑁮𑁯. 𑀧𑀞𑀫𑀢𑁆𑀣𑀫𑀢𑁆𑀢𑁂 [𑀘𑀁. 𑁨.𑁧.𑁯𑁩; 𑀧𑀸. 𑁨.𑁩.𑁪𑁬].

𑀦𑀸𑀫𑀲𑁆𑀲 𑀅𑀪𑀺𑀥𑁂𑀬𑁆𑀬𑀫𑀢𑁆𑀢𑁂 𑀧𑀞𑀫𑀸𑀯𑀺𑀪𑀢𑁆𑀢𑀺 𑀳𑁄𑀢𑀺.

𑀭𑀼𑀓𑁆𑀔𑁄, 𑀫𑀸𑀮𑀸, 𑀥𑀦𑀁.

𑀏𑀢𑁆𑀣 𑀘 𑀫𑀢𑁆𑀢𑀲𑀤𑁆𑀤𑁂𑀦 𑀓𑀢𑁆𑀢𑀼, 𑀓𑀫𑁆𑀫𑀸𑀤𑀺𑀓𑁂 𑀯𑀺𑀪𑀢𑁆𑀬𑀢𑁆𑀣𑁂 𑀦𑀺𑀯𑀢𑁆𑀢𑁂𑀢𑀺. 𑀢𑀲𑁆𑀫𑀸 𑀅𑀢𑁆𑀣𑀫𑀢𑁆𑀢𑀦𑁆𑀢𑀺 𑀮𑀺𑀗𑁆𑀕𑀢𑁆𑀣𑁄𑀬𑁂𑀯 𑀯𑀼𑀘𑁆𑀘𑀢𑀺.

𑀢𑀢𑁆𑀣 𑀅𑀦𑀼𑀘𑁆𑀘𑀸𑀭𑀺𑀢𑁂 𑀲𑀢𑀺 𑀲𑀼𑀡𑀦𑁆𑀢𑀲𑁆𑀲 𑀅𑀯𑀺𑀤𑀺𑀢𑁄 𑀅𑀢𑁆𑀣𑁄 𑀮𑀻𑀦𑀢𑁆𑀣𑁄 𑀦𑀸𑀫. 𑀢𑀁 𑀮𑀻𑀦𑀫𑀢𑁆𑀣𑀁 𑀕𑀫𑁂𑀢𑀺 𑀩𑁄𑀥𑁂𑀢𑀻𑀢𑀺 𑀮𑀺𑀗𑁆𑀕𑀁, 𑀉𑀘𑁆𑀘𑀸𑀭𑀺𑀢𑀧𑀤𑀁.

𑀢𑀁 𑀧𑀦 𑀧𑀓𑀢𑀺𑀮𑀺𑀗𑁆𑀕𑀁, 𑀦𑀺𑀧𑁆𑀨𑀦𑁆𑀦𑀮𑀺𑀗𑁆𑀕𑀦𑁆𑀢𑀺 𑀤𑀼𑀯𑀺𑀥𑀁. 𑀢𑀢𑁆𑀣 𑀯𑀺𑀪𑀢𑁆𑀢𑀺𑀭𑀳𑀺𑀢𑀁 𑀧𑀓𑀢𑀺𑀮𑀺𑀗𑁆𑀕𑀁 𑀇𑀥𑀸𑀥𑀺𑀧𑁆𑀧𑁂𑀢𑀁 𑀮𑀺𑀗𑁆𑀕, 𑀯𑀺𑀪𑀢𑁆𑀢𑀻𑀦𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀯𑀺𑀪𑀸𑀕𑀝𑁆𑀞𑀸𑀦𑀢𑁆𑀢𑀸.

𑀮𑀻𑀦𑀁 𑀅𑀗𑁆𑀕𑀦𑁆𑀢𑀺 𑀮𑀺𑀗𑁆𑀕𑀁. 𑀢𑀢𑁆𑀣 ‘𑀮𑀻𑀦’𑀦𑁆𑀢𑀺 𑀅𑀧𑀸𑀓𑀝𑀁. ‘𑀅𑀗𑁆𑀕’𑀦𑁆𑀢𑀺 𑀅𑀯𑀬𑀯𑁄. 𑀮𑀺𑀗𑁆𑀕𑀁, 𑀦𑀸𑀫𑀁, 𑀧𑀸𑀝𑀺𑀧𑀤𑀺𑀓𑀦𑁆𑀢𑀺 𑀅𑀢𑁆𑀣𑀢𑁄 𑀏𑀓𑀁.

𑀮𑀺𑀗𑁆𑀕𑀲𑁆𑀲 𑀅𑀢𑁆𑀣𑁄 𑀧𑀭𑀫𑀢𑁆𑀣𑁄, 𑀧𑀜𑁆𑀜𑀢𑁆𑀢𑀺𑀅𑀢𑁆𑀣𑁄𑀢𑀺 𑀤𑀼𑀯𑀺𑀥𑁄. 𑀢𑀣𑀸 𑀯𑀺𑀲𑁂𑀲𑀦𑀢𑁆𑀣𑁄, 𑀯𑀺𑀲𑁂𑀲𑁆𑀬𑀢𑁆𑀣𑁄𑀢𑀺.

𑀢𑀢𑁆𑀣 𑀯𑀺𑀲𑁂𑀲𑀦𑀢𑁆𑀣𑁄 𑀦𑀸𑀫 𑀲𑀓𑀢𑁆𑀣𑁄, 𑀢𑀲𑁆𑀲 𑀢𑀲𑁆𑀲 𑀲𑀤𑁆𑀤𑀲𑁆𑀲 𑀧𑀝𑀺𑀦𑀺𑀬𑀢𑁄 𑀧𑀸𑀝𑀺𑀧𑀼𑀕𑁆𑀕𑀮𑀺𑀓𑀢𑁆𑀣𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁄𑀬𑁂𑀯 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀆𑀤𑀺𑀫𑁆𑀳𑀺 𑀲𑀤𑁆𑀤𑀼𑀧𑁆𑀧𑀢𑁆𑀢𑀺𑀬𑀸 𑀘𑀺𑀭𑀓𑀸𑀮𑀜𑁆𑀘 𑀲𑀤𑁆𑀤𑀧𑀯𑀢𑁆𑀢𑀺𑀬𑀸 𑀦𑀺𑀩𑀤𑁆𑀥𑀓𑀸𑀭𑀡𑀢𑁆𑀢𑀸 𑀦𑀺𑀫𑀺𑀢𑁆𑀢𑀢𑁆𑀣𑁄𑀢𑀺 𑀘 𑀯𑀼𑀘𑁆𑀘𑀢𑀺. 𑀲𑁄 𑀲𑀼𑀢𑀺, 𑀚𑀸𑀢𑀺, 𑀕𑀼𑀡, 𑀤𑀩𑁆𑀩, 𑀓𑁆𑀭𑀺𑀬𑀸, 𑀦𑀸𑀫, 𑀲𑀫𑁆𑀩𑀦𑁆𑀥𑀯𑀲𑁂𑀦 𑀲𑀢𑁆𑀢𑀯𑀺𑀥𑁄 𑀳𑁄𑀢𑀺.

𑀯𑀺𑀲𑁂𑀲𑁆𑀬𑀢𑁆𑀣𑁄 𑀦𑀸𑀫 𑀲𑀸𑀫𑀜𑁆𑀜𑀢𑁆𑀣𑁄, 𑀩𑀳𑀼𑀦𑀺𑀫𑀺𑀢𑁆𑀢𑀸𑀦𑀁 𑀲𑀸𑀥𑀸𑀭𑀡𑀢𑁆𑀣𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀲𑁄𑀬𑁂𑀯 𑀢𑀁𑀢𑀁𑀦𑀺𑀫𑀺𑀢𑁆𑀢𑀬𑁄𑀕𑀸 𑀦𑁂𑀫𑀺𑀢𑁆𑀢𑀓𑀢𑁆𑀣𑁄𑀢𑀺 𑀘 𑀯𑀼𑀘𑁆𑀘𑀢𑀺, 𑀲𑁄 𑀚𑀸𑀢𑀺, 𑀕𑀼𑀡, 𑀤𑀩𑁆𑀩, 𑀓𑁆𑀭𑀺𑀬𑀸, 𑀦𑀸𑀫𑀯𑀲𑁂𑀦 𑀧𑀜𑁆𑀘𑀯𑀺𑀥𑁄. 𑀕𑁄, 𑀲𑀼𑀓𑁆𑀓𑁄, 𑀤𑀡𑁆𑀟𑀻, 𑀧𑀸𑀘𑀓𑁄, 𑀢𑀺𑀲𑁆𑀲𑁄𑀢𑀺.

𑀢𑀢𑁆𑀣 𑀕𑁄𑀲𑀤𑁆𑀤𑁄 𑀬𑀤𑀸 𑀚𑀸𑀢𑀺𑀫𑀢𑁆𑀢𑀁 𑀯𑀤𑀢𑀺 𑀕𑁄 𑀚𑀸𑀢𑀻𑀢𑀺, 𑀢𑀤𑀸 𑀲𑀼𑀢𑀺 𑀯𑀺𑀲𑁂𑀲𑀦𑀁. 𑀬𑀤𑀸 𑀤𑀩𑁆𑀩𑀁 𑀯𑀤𑀢𑀺 𑀕𑁄 𑀕𑀘𑁆𑀙𑀢𑀻𑀢𑀺, 𑀢𑀤𑀸 𑀲𑀼𑀢𑀺 𑀘 𑀚𑀸𑀢𑀺 𑀘 𑀯𑀺𑀲𑁂𑀲𑀦𑀁.

𑀲𑀼𑀓𑁆𑀓𑀲𑀤𑁆𑀤𑁄 𑀬𑀤𑀸 𑀕𑀼𑀡𑀫𑀢𑁆𑀢𑀁 𑀯𑀤𑀢𑀺 𑀲𑀼𑀓𑁆𑀓𑁄 𑀕𑀼𑀡𑁄𑀢𑀺, 𑀢𑀤𑀸 𑀲𑀼𑀢𑀺 𑀯𑀺𑀲𑁂𑀲𑀦𑀁. 𑀬𑀤𑀸 𑀕𑀼𑀡𑀯𑀺𑀲𑁂𑀲𑀁 𑀯𑀤𑀢𑀺 𑀕𑁄𑀲𑁆𑀲 𑀲𑀼𑀓𑁆𑀓𑁄𑀢𑀺, 𑀢𑀤𑀸 𑀲𑀼𑀢𑀺 𑀘 𑀕𑀼𑀡𑀚𑀸𑀢𑀺 𑀘 𑀯𑀺𑀲𑁂𑀲𑀦𑀁. 𑀬𑀤𑀸 𑀕𑀼𑀡𑀯𑀦𑁆𑀢𑀁 𑀤𑀩𑁆𑀩𑀁 𑀯𑀤𑀢𑀺 𑀲𑀼𑀓𑁆𑀓𑁄 𑀕𑁄𑀢𑀺, 𑀢𑀤𑀸 𑀲𑀼𑀢𑀺 𑀘 𑀕𑀼𑀡𑀚𑀸𑀢𑀺 𑀘 𑀕𑀼𑀡𑀯𑀺𑀲𑁂𑀲𑁄 𑀘 𑀲𑀫𑁆𑀩𑀦𑁆𑀥𑁄 𑀘 𑀯𑀺𑀲𑁂𑀲𑀦𑀁.

𑀤𑀡𑁆𑀟𑀻𑀲𑀤𑁆𑀤𑁄 𑀬𑀤𑀸 𑀚𑀸𑀢𑀺𑀫𑀢𑁆𑀢𑀁 𑀯𑀤𑀢𑀺 𑀤𑀡𑁆𑀟𑀻 𑀚𑀸𑀢𑀻𑀢𑀺, 𑀢𑀤𑀸 𑀲𑀼𑀢𑀺 𑀘 𑀤𑀩𑁆𑀩𑀜𑁆𑀘 𑀯𑀺𑀲𑁂𑀲𑀦𑀁. 𑀬𑀤𑀸 𑀤𑀩𑁆𑀩𑀯𑀦𑁆𑀢𑀁 𑀤𑀩𑁆𑀩𑀁 𑀯𑀤𑀢𑀺 𑀤𑀡𑁆𑀟𑀻 𑀧𑀼𑀭𑀺𑀲𑁄𑀢𑀺, 𑀢𑀤𑀸 𑀲𑀼𑀢𑀺 𑀘 𑀤𑀩𑁆𑀩𑀜𑁆𑀘 𑀚𑀸𑀢𑀺 𑀘 𑀲𑀫𑁆𑀩𑀦𑁆𑀥𑁄 𑀘 𑀯𑀺𑀲𑁂𑀲𑀦𑀁.

𑀧𑀸𑀘𑀓𑀲𑀤𑁆𑀤𑁄 𑀬𑀤𑀸 𑀚𑀸𑀢𑀺𑀫𑀢𑁆𑀢𑀁 𑀯𑀤𑀢𑀺 𑀧𑀸𑀘𑀓𑁄 𑀚𑀸𑀢𑀻𑀢𑀺, 𑀢𑀤𑀸 𑀲𑀼𑀢𑀺 𑀘 𑀓𑁆𑀭𑀺𑀬𑀸 𑀘 𑀯𑀺𑀲𑁂𑀲𑀦𑀁. 𑀬𑀤𑀸 𑀓𑁆𑀭𑀺𑀬𑀸𑀦𑀺𑀧𑁆𑀨𑀸𑀤𑀓𑀁 𑀤𑀩𑁆𑀩𑀁 𑀯𑀤𑀢𑀺 𑀧𑀸𑀘𑀓𑁄 𑀧𑀼𑀭𑀺𑀲𑁄𑀢𑀺, 𑀢𑀤𑀸 𑀲𑀼𑀢𑀺 𑀘 𑀓𑁆𑀭𑀺𑀬𑀸 𑀘 𑀚𑀸𑀢𑀺 𑀘 𑀓𑁆𑀭𑀺𑀬𑀸𑀓𑀸𑀭𑀓𑀲𑀫𑁆𑀩𑀦𑁆𑀥𑁄 𑀘 𑀯𑀺𑀲𑁂𑀲𑀦𑀁.

𑀢𑀺𑀲𑁆𑀲𑀲𑀤𑁆𑀤𑁄 𑀬𑀤𑀸 𑀦𑀸𑀫𑀫𑀢𑁆𑀢𑀁 𑀯𑀤𑀢𑀺 𑀢𑀺𑀲𑁆𑀲𑁄 𑀦𑀸𑀫𑀦𑁆𑀢𑀺, 𑀢𑀤𑀸 𑀲𑀼𑀢𑀺 𑀯𑀺𑀲𑁂𑀲𑀦𑀁. 𑀬𑀤𑀸 𑀦𑀸𑀫𑀯𑀦𑁆𑀢𑀁 𑀤𑀩𑁆𑀩𑀁 𑀯𑀤𑀢𑀺, 𑀢𑀺𑀲𑁆𑀲𑁄 𑀪𑀺𑀓𑁆𑀔𑀽𑀢𑀺, 𑀢𑀤𑀸 𑀲𑀼𑀢𑀺 𑀘 𑀦𑀸𑀫𑀚𑀸𑀢𑀺 𑀘 𑀲𑀫𑁆𑀩𑀦𑁆𑀥𑁄 𑀘 𑀯𑀺𑀲𑁂𑀲𑀦𑀁.

𑀲𑀩𑁆𑀩𑀢𑁆𑀣 𑀬𑀁 𑀬𑀁 𑀯𑀤𑀢𑀻𑀢𑀺 𑀯𑀼𑀢𑁆𑀢𑀁, 𑀢𑀁 𑀢𑀁 𑀯𑀺𑀲𑁂𑀲𑁆𑀬𑀦𑁆𑀢𑀺 𑀘 𑀤𑀩𑁆𑀩𑀦𑁆𑀢𑀺 𑀘 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀣 𑀘 𑀲𑀼𑀢𑀺 𑀦𑀸𑀫 𑀲𑀤𑁆𑀤𑀲𑀪𑀸𑀯𑀸 𑀏𑀯 𑀳𑁄𑀢𑀺, 𑀲𑀤𑁆𑀤𑀧𑀓𑁆𑀔𑀺𑀓𑀸 𑀏𑀯. 𑀲𑀩𑁆𑀩𑁄 𑀲𑀤𑁆𑀤𑁄 𑀧𑀞𑀫𑀁 𑀲𑀢𑁆𑀢𑀸𑀪𑀺𑀥𑀸𑀬𑀓𑁄𑀢𑀺 𑀘 𑀜𑀸𑀲𑁂 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀲𑀩𑁆𑀩𑀢𑁆𑀣 𑀲𑀼𑀢𑀺𑀝𑁆𑀞𑀸𑀦𑁂 𑀲𑀢𑁆𑀢𑀸 𑀏𑀯 𑀬𑀼𑀢𑁆𑀢𑀸 𑀯𑀢𑁆𑀢𑀼𑀦𑁆𑀢𑀺. 𑀲𑀢𑁆𑀢𑀸𑀢𑀺 𑀘 𑀢𑀲𑁆𑀲 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀯𑁄𑀳𑀸𑀭𑀫𑀢𑁆𑀢𑁂𑀦𑀧𑀺 𑀮𑁄𑀓𑁂 𑀯𑀺𑀚𑁆𑀚𑀫𑀸𑀦𑀢𑀸 𑀯𑀼𑀘𑁆𑀘𑀢𑀺, 𑀢𑀁 𑀢𑀁 𑀲𑀤𑁆𑀤𑀁 𑀲𑀼𑀡𑀦𑁆𑀢𑀲𑁆𑀲 𑀘 𑀜𑀸𑀡𑀁 𑀢𑀁𑀢𑀤𑀢𑁆𑀣𑀲𑁆𑀲 𑀅𑀢𑁆𑀣𑀺𑀢𑀸𑀫𑀢𑁆𑀢𑀁 𑀲𑀩𑁆𑀩𑀧𑀞𑀫𑀁 𑀚𑀸𑀦𑀸𑀢𑀺, 𑀢𑀢𑁄 𑀧𑀭𑀁 𑀚𑀸𑀢𑀺𑀲𑀤𑁆𑀤𑁂 𑀚𑀸𑀢𑀺𑀁 𑀚𑀸𑀦𑀸𑀢𑀺. 𑀕𑀼𑀡𑀲𑀤𑁆𑀤𑁂 𑀕𑀼𑀡𑀦𑁆𑀢𑀺 𑀏𑀯𑀫𑀸𑀤𑀺 𑀲𑀩𑁆𑀩𑀁 𑀯𑀢𑁆𑀢𑀩𑁆𑀩𑀁. 𑀮𑀺𑀗𑁆𑀕, 𑀲𑀗𑁆𑀔𑁆𑀬𑀸, 𑀧𑀭𑀺𑀫𑀸𑀡𑀸𑀦𑀺𑀧𑀺 𑀯𑀺𑀲𑁂𑀲𑀦𑀢𑁆𑀣𑁂 𑀲𑀗𑁆𑀕𑀬𑁆𑀳𑀦𑁆𑀢𑀺.

𑀢𑀢𑁆𑀣 𑀮𑀺𑀗𑁆𑀕𑀁 𑀦𑀸𑀫 𑀬𑁂 𑀇𑀢𑁆𑀣𑀺, 𑀧𑀼𑀭𑀺𑀲𑀸𑀦𑀁 𑀮𑀺𑀗𑁆𑀕, 𑀦𑀺𑀫𑀺𑀢𑁆𑀢, 𑀓𑀼𑀢𑁆𑀢𑀸’𑀓𑀧𑁆𑀧𑀸 𑀦𑀸𑀫 𑀅𑀪𑀺𑀥𑀫𑁆𑀫𑁂 𑀯𑀼𑀢𑁆𑀢𑀸, 𑀬𑁂 𑀘 𑀦𑀧𑀼𑀁𑀲𑀓𑀸𑀦𑀁 𑀮𑀺𑀗𑁆𑀕, 𑀦𑀺𑀫𑀺𑀢𑁆𑀢, 𑀓𑀼𑀢𑁆𑀢𑀸’𑀓𑀧𑁆𑀧𑀸 𑀦𑀸𑀫 𑀅𑀯𑀼𑀢𑁆𑀢𑀲𑀺𑀤𑁆𑀥𑀸, 𑀬𑁂 𑀘 𑀲𑀤𑁆𑀤𑁂𑀲𑀼 𑀘𑁂𑀯 𑀅𑀢𑁆𑀣𑁂𑀲𑀼 𑀘 𑀯𑀺𑀲𑀤𑀸’𑀯𑀺𑀲𑀤𑀸𑀓𑀸𑀭, 𑀫𑀚𑁆𑀛𑀺𑀫𑀸𑀓𑀸𑀭𑀸 𑀲𑀦𑁆𑀤𑀺𑀲𑁆𑀲𑀦𑁆𑀢𑀺, 𑀲𑀩𑁆𑀩𑀫𑁂𑀢𑀁 𑀮𑀺𑀗𑁆𑀕𑀁 𑀦𑀸𑀫.

𑀏𑀯𑀁 𑀯𑀺𑀲𑁂𑀲𑀦, 𑀯𑀺𑀲𑁂𑀲𑁆𑀬𑀯𑀲𑁂𑀦 𑀤𑀼𑀯𑀺𑀥𑁄 𑀅𑀢𑁆𑀣𑁄 𑀧𑀼𑀩𑁆𑀩𑁂 𑀯𑀼𑀢𑁆𑀢𑀲𑁆𑀲 𑀲𑀤𑁆𑀤𑀮𑀺𑀗𑁆𑀕𑀲𑁆𑀲 𑀅𑀢𑁆𑀣𑁄 𑀦𑀸𑀫, 𑀲𑁄 𑀲𑀮𑀺𑀗𑁆𑀕𑁄, 𑀲𑀲𑀗𑁆𑀔𑁆𑀬𑁄, 𑀲𑀧𑀭𑀺𑀫𑀸𑀡𑁄 𑀘𑀸𑀢𑀺 𑀢𑀺𑀯𑀺𑀥𑁄 𑀳𑁄𑀢𑀺.

𑀢𑀢𑁆𑀣 𑀲𑀮𑀺𑀗𑁆𑀕𑁄 𑀬𑀣𑀸? 𑀲𑀜𑁆𑀜𑀸, 𑀨𑀲𑁆𑀲𑁄, 𑀘𑀺𑀢𑁆𑀢𑀁. 𑀓𑀜𑁆𑀜𑀸, 𑀧𑀼𑀭𑀺𑀲𑁄, 𑀓𑀼𑀮𑀁. 𑀫𑀸𑀮𑀸, 𑀭𑀼𑀓𑁆𑀔𑁄, 𑀥𑀦𑀦𑁆𑀢𑀺.

𑀲𑀲𑀗𑁆𑀔𑁆𑀬𑁄 𑀬𑀣𑀸? 𑀏𑀓𑁄, 𑀤𑁆𑀯𑁂, 𑀢𑀬𑁄, 𑀩𑀳𑀽 𑀇𑀘𑁆𑀘𑀸𑀤𑀺.

𑀲𑀧𑀭𑀺𑀫𑀸𑀡𑁄 𑀬𑀣𑀸? 𑀯𑀺𑀤𑀢𑁆𑀣𑀺, 𑀳𑀢𑁆𑀣𑁄, 𑀤𑁄𑀡𑁄, 𑀆𑀴𑁆𑀳𑀓𑀁 𑀇𑀘𑁆𑀘𑀸𑀤𑀺.

𑀅𑀧𑀺 𑀘 𑀲𑀼𑀤𑁆𑀥𑁄, 𑀲𑀁𑀲𑀝𑁆𑀞𑁄𑀢𑀺 𑀤𑀼𑀯𑀺𑀥𑁄 𑀮𑀺𑀗𑁆𑀕𑀢𑁆𑀣𑁄. 𑀢𑀢𑁆𑀣 𑀓𑀫𑁆𑀫𑀸𑀤𑀺𑀲𑀁𑀲𑀕𑁆𑀕𑀭𑀳𑀺𑀢𑁄 𑀲𑀼𑀤𑁆𑀥𑁄 𑀦𑀸𑀫. 𑀲𑁄 𑀲𑀮𑀺𑀗𑁆𑀕𑁄, 𑀲𑀲𑀗𑁆𑀔𑁆𑀬𑁄, 𑀲𑀧𑀭𑀺𑀫𑀸𑀡𑁄, 𑀉𑀧𑀲𑀕𑁆𑀕𑀢𑁆𑀣𑁄, 𑀦𑀺𑀧𑀸𑀢𑀢𑁆𑀣𑁄, 𑀧𑀸𑀝𑀺-𑀧𑀤𑀺𑀓𑀢𑁆𑀣𑁄𑀢𑀺 𑀙𑀩𑁆𑀩𑀺𑀥𑁄. 𑀅𑀢𑁆𑀣𑀺, 𑀲𑀓𑁆𑀓𑀸, 𑀮𑀩𑁆𑀪𑀸𑀇𑀘𑁆𑀘𑀸𑀤𑀺 𑀇𑀥 𑀧𑀸𑀝𑀺𑀧𑀤𑀺𑀓𑀁 𑀦𑀸𑀫. 𑀢𑀼𑀦, 𑀢𑁆𑀯𑀸𑀦, 𑀢𑁆𑀯𑀸, 𑀢𑀯𑁂, 𑀢𑀼𑀁, 𑀔𑀢𑁆𑀢𑀼𑀁𑀧𑀘𑁆𑀘𑀬𑀦𑁆𑀢𑀸𑀧𑀺 𑀦𑀺𑀧𑀸𑀢𑁂𑀲𑀼 𑀕𑀬𑁆𑀳𑀦𑁆𑀢𑀺.

𑀲𑀁𑀲𑀝𑁆𑀞𑁄 𑀯𑀼𑀢𑁆𑀢𑀲𑀁𑀲𑀝𑁆𑀞𑁄, 𑀅𑀯𑀼𑀢𑁆𑀢𑀲𑀁𑀲𑀝𑁆𑀞𑁄𑀢𑀺 𑀤𑀼𑀯𑀺𑀥𑁄. 𑀢𑀢𑁆𑀣 𑀯𑀼𑀢𑁆𑀢𑀲𑀁𑀲𑀝𑁆𑀞𑁄 𑀘𑀢𑀼𑀩𑁆𑀩𑀺𑀥𑁄 𑀲𑀫𑀸𑀲𑁂𑀦 𑀯𑀼𑀢𑁆𑀢𑀲𑀁𑀲𑀝𑁆𑀞𑁄, 𑀢𑀤𑁆𑀥𑀺𑀢𑁂𑀦, 𑀆𑀔𑁆𑀬𑀸𑀢𑁂𑀦, 𑀓𑀺𑀢𑁂𑀦𑀸𑀢𑀺. 𑀢𑀢𑁆𑀣 𑀲𑀫𑀸𑀲𑁂𑀦 𑀯𑀼𑀢𑁆𑀢𑁄 𑀙𑀓𑀸𑀭𑀓𑀲𑀫𑁆𑀩𑀦𑁆𑀥𑀯𑀲𑁂𑀦 𑀲𑀢𑁆𑀢𑀯𑀺𑀥𑁄, 𑀪𑀸𑀯𑁂𑀦 𑀲𑀤𑁆𑀥𑀺𑀁 𑀅𑀝𑁆𑀞𑀯𑀺𑀥𑁄 𑀯𑀸, 𑀢𑀣𑀸 𑀢𑀤𑁆𑀥𑀺𑀢𑁂𑀦 𑀯𑀼𑀢𑁆𑀢𑁄. 𑀆𑀔𑁆𑀬𑀸𑀢𑁂𑀦 𑀯𑀼𑀢𑁆𑀢𑁄 𑀓𑀢𑁆𑀢𑀼, 𑀓𑀫𑁆𑀫, 𑀪𑀸𑀯𑀯𑀲𑁂𑀦 𑀢𑀺𑀯𑀺𑀥𑁄. 𑀓𑀺𑀢𑁂𑀦 𑀯𑀼𑀢𑁆𑀢𑁄 𑀙𑀓𑀸𑀭𑀓, 𑀪𑀸𑀯𑀯𑀲𑁂𑀦 𑀲𑀢𑁆𑀢𑀯𑀺𑀥𑁄. 𑀲𑀩𑁆𑀩𑁄 𑀲𑀼𑀤𑁆𑀥𑁄 𑀘𑁂𑀯 𑀯𑀼𑀢𑁆𑀢𑀲𑀁𑀲𑀝𑁆𑀞𑁄 𑀘 𑀧𑀞𑀫𑀸𑀬 𑀯𑀺𑀲𑀬𑁄.

𑀅𑀯𑀼𑀢𑁆𑀢𑀲𑀁𑀲𑀝𑁆𑀞𑁄𑀧𑀺 𑀓𑀢𑁆𑀢𑀼𑀲𑀁𑀲𑀝𑁆𑀞𑁄, 𑀓𑀫𑁆𑀫𑀲𑀁𑀲𑀝𑁆𑀞𑁄𑀢𑀺𑀆𑀤𑀺𑀦𑀸 𑀅𑀦𑁂𑀓𑀯𑀺𑀥𑁄. 𑀲𑁄 𑀤𑀼𑀢𑀺𑀬𑀸𑀤𑀻𑀦𑀁 𑀏𑀯 𑀯𑀺𑀲𑀬𑁄𑀢𑀺. 𑀏𑀢𑁆𑀣 𑀘 𑀯𑀺𑀪𑀢𑁆𑀢𑀺𑀬𑀸 𑀯𑀺𑀦𑀸 𑀓𑁂𑀯𑀮𑁄 𑀲𑀤𑁆𑀤𑁄 𑀧𑀬𑁄𑀕𑀁 𑀦𑀸𑀭𑀳𑀢𑀻𑀢𑀺 𑀓𑀢𑁆𑀯𑀸 𑀧𑀬𑁄𑀕𑀸𑀭𑀳𑀢𑁆𑀣𑀫𑁂𑀯 𑀙𑀩𑁆𑀩𑀺𑀥𑁂 𑀲𑀼𑀤𑁆𑀥𑁂 𑀘𑀢𑀼𑀩𑁆𑀩𑀺𑀥𑁂 𑀘 𑀯𑀼𑀢𑁆𑀢𑀲𑀁𑀲𑀝𑁆𑀞𑁂 𑀧𑀞𑀫𑀸 𑀧𑀬𑀼𑀚𑁆𑀚𑀢𑀺, 𑀦 𑀅𑀢𑁆𑀣𑀚𑁄𑀢𑀦𑀢𑁆𑀣𑀁.

𑀓𑁂𑀦𑀘𑀺 𑀯𑀸𑀘𑀓𑁂𑀦 𑀅𑀯𑀼𑀢𑁆𑀢𑀸𑀦𑀺 𑀧𑀦 𑀓𑀫𑁆𑀫𑀸𑀤𑀻𑀦𑀺 𑀯𑀺𑀪𑀢𑁆𑀢𑀻𑀳𑀺 𑀯𑀺𑀦𑀸 𑀯𑀺𑀤𑀺𑀢𑀸𑀦𑀺 𑀦 𑀳𑁄𑀦𑁆𑀢𑀻𑀢𑀺𑀓𑀢𑁆𑀯𑀸 𑀅𑀢𑁆𑀣𑀚𑁄𑀢𑀦𑀢𑁆𑀣𑀫𑁆𑀧𑀺 𑀓𑀫𑁆𑀫𑀸𑀤𑀻𑀲𑀼 𑀤𑀼𑀢𑀺𑀬𑀸𑀤𑀬𑁄 𑀧𑀬𑀼𑀚𑁆𑀚𑀦𑁆𑀢𑀺. 𑀢𑀲𑁆𑀫𑀸 𑀅𑀢𑁆𑀣𑀫𑀢𑁆𑀢𑁂𑀢𑀺 𑀇𑀥 𑀤𑁂𑀲𑀦𑁆𑀢𑀭𑀸𑀯𑀘𑁆𑀙𑁂𑀤𑀓𑁂 𑀯𑀺𑀲𑀬𑀫𑀢𑁆𑀢𑁂 𑀪𑀼𑀫𑁆𑀫𑀁. 𑀓𑀫𑁆𑀫𑁂 𑀤𑀼𑀢𑀺𑀬𑀸𑀇𑀘𑁆𑀘𑀸𑀤𑀻𑀲𑀼 𑀧𑀦 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑁂 𑀧𑀬𑁄𑀚𑀦𑁂 𑀪𑀼𑀫𑁆𑀫𑀦𑁆𑀢𑀺 𑀏𑀯𑀁 𑀤𑁆𑀯𑀺𑀦𑁆𑀦𑀁 𑀪𑀼𑀫𑁆𑀫𑀸𑀦𑀁 𑀦𑀸𑀦𑀢𑁆𑀢𑀁 𑀯𑁂𑀤𑀺𑀢𑀩𑁆𑀩𑀦𑁆𑀢𑀺.

𑁨𑁯𑁦. 𑀆𑀫𑀦𑁆𑀢𑀦𑁂 [𑀓. 𑁨𑁮𑁫; 𑀭𑀽. 𑁭𑁦; 𑀦𑀻. 𑁫𑁭𑁮; 𑀘𑀁. 𑁨.𑁧.𑁯𑁪; 𑀧𑀸. 𑁨.𑁩.𑁪𑁭; 𑀆𑀫𑀦𑁆𑀢𑀡𑁂 (𑀩𑀳𑀽𑀲𑀼)].

𑀧𑀕𑁂𑀯 𑀲𑀺𑀤𑁆𑀥𑀲𑁆𑀲 𑀯𑀢𑁆𑀣𑀼𑀦𑁄 𑀦𑀸𑀫𑁂𑀦 𑀯𑀸 𑀦𑀺𑀧𑀸𑀢𑁂𑀦 𑀯𑀸 𑀅𑀢𑁆𑀢𑀦𑁄 𑀅𑀪𑀺𑀫𑀼𑀔𑀻𑀓𑀭𑀡𑀁 𑀆𑀫𑀦𑁆𑀢𑀦𑀁 𑀦𑀸𑀫. 𑀅𑀥𑀺𑀓𑀸𑀫𑀦𑁆𑀢𑀦𑁂 𑀅𑀢𑁆𑀣𑀫𑀢𑁆𑀢𑁂 𑀧𑀞𑀫𑀸 𑀳𑁄𑀢𑀺. 𑀏𑀢𑁆𑀣 𑀘 𑀆𑀫𑀦𑁆𑀢𑀦𑀧𑀤𑀁 𑀦𑀸𑀫 𑀓𑁆𑀭𑀺𑀬𑀸𑀧𑁂𑀓𑁆𑀔𑀁 𑀦 𑀳𑁄𑀢𑀺, 𑀢𑀲𑁆𑀫𑀸 𑀓𑀸𑀭𑀓𑀲𑀜𑁆𑀜𑀁 𑀦 𑀮𑀪𑀢𑀺.

𑀢𑀁 𑀧𑀦 𑀤𑀼𑀯𑀺𑀥𑀁 𑀲𑀸𑀤𑀭𑀸’𑀦𑀸𑀤𑀭𑀯𑀲𑁂𑀦. 𑀏𑀳𑀺 𑀲𑀫𑁆𑀫, 𑀏𑀳𑀺 𑀚𑁂𑀢𑀺.

𑀢𑀣𑀸 𑀲𑀚𑀻𑀯, 𑀦𑀺𑀚𑁆𑀚𑀻𑀯𑀯𑀲𑁂𑀦, 𑀪𑁄 𑀧𑀼𑀭𑀺𑀲, 𑀯𑀤𑁂𑀳𑀺 𑀪𑁄 𑀲𑀗𑁆𑀔, 𑀯𑀤𑁂𑀳𑀺 𑀪𑁄 𑀲𑀗𑁆𑀔 [𑀤𑀻. 𑀦𑀺. 𑁨.𑁪𑁨𑁬]. 𑀉𑀫𑁆𑀫𑀼𑀚𑁆𑀚 𑀪𑁄 𑀧𑀼𑀣𑀼𑀲𑀺𑀮𑁂, 𑀉𑀫𑁆𑀫𑀼𑀚𑁆𑀚 𑀪𑁄 𑀧𑀼𑀣𑀼𑀲𑀺𑀮𑁂𑀢𑀺 [𑀲𑀁. 𑀦𑀺. 𑁪.𑁩𑁫𑁮].

𑀢𑀣𑀸 𑀧𑀘𑁆𑀘𑀓𑁆𑀔𑀸’𑀧𑀘𑁆𑀘𑀓𑁆𑀔𑀯𑀲𑁂𑀦, 𑀪𑁄 𑀧𑀼𑀭𑀺𑀲, 𑀓𑀳𑀁 𑀏𑀓𑀧𑀼𑀢𑁆𑀢𑀓, 𑀓𑀳𑀁 𑀏𑀓𑀧𑀼𑀢𑁆𑀢𑀓𑀸𑀢𑀺 [𑀲𑀁. 𑀦𑀺. 𑁨.𑁬𑁩; 𑀥. 𑀧. 𑀅𑀝𑁆𑀞. 𑁧.𑁨].

𑀢𑀣𑀸 𑀦𑀺𑀬𑀫𑀸’𑀦𑀺𑀬𑀫𑀯𑀲𑁂𑀦, 𑀪𑁄 𑀧𑀼𑀭𑀺𑀲, 𑀅𑀘𑁆𑀙𑀭𑀺𑀬𑀁 𑀯𑀢 𑀪𑁄 𑀅𑀩𑁆𑀪𑀼𑀢𑀁 𑀯𑀢 𑀪𑁄 [𑀤𑀻. 𑀦𑀺. 𑁨.𑁧𑁯𑁨]. 𑀬𑀢𑁆𑀭 𑀳𑀺 𑀦𑀸𑀫 𑀲𑀜𑁆𑀜𑀻 𑀲𑀫𑀸𑀦𑁄𑀢𑀺𑀆𑀤𑀺 [𑀤𑀻. 𑀦𑀺. 𑁨.𑁧𑁯𑁨]. 𑀇𑀤𑀁 𑀆𑀫𑀦𑁆𑀢𑀦𑀁 𑀦𑀸𑀫 𑀧𑀕𑁂𑀯 𑀲𑀺𑀤𑁆𑀥𑁂 𑀏𑀯 𑀳𑁄𑀢𑀺, 𑀦 𑀯𑀺𑀥𑀸𑀢𑀩𑁆𑀩𑁂, 𑀦 𑀳𑀺 𑀧𑀕𑁂𑀯 𑀭𑀸𑀚𑀪𑀸𑀯𑀁 𑀯𑀸 𑀪𑀺𑀓𑁆𑀔𑀼𑀪𑀸𑀯𑀁 𑀯𑀸 𑀅𑀧𑁆𑀧𑀢𑁆𑀢𑀁 𑀚𑀦𑀁 ‘‘𑀪𑁄 𑀭𑀸𑀚𑀸’’𑀢𑀺 𑀯𑀸 ‘‘𑀪𑁄 𑀪𑀺𑀓𑁆𑀔𑀽’’𑀢𑀺 𑀯𑀸 𑀆𑀫𑀦𑁆𑀢𑁂𑀦𑁆𑀢𑀻𑀢𑀺.

𑀧𑀞𑀫𑀸𑀯𑀺𑀪𑀢𑁆𑀢𑀺𑀭𑀸𑀲𑀺 𑀦𑀺𑀝𑁆𑀞𑀺𑀢𑁄.

𑀤𑀼𑀢𑀺𑀬𑀸𑀯𑀺𑀪𑀢𑁆𑀢𑀺𑀭𑀸𑀲𑀺

𑀓𑀲𑁆𑀫𑀺𑀁 𑀅𑀢𑁆𑀣𑁂 𑀤𑀼𑀢𑀺𑀬𑀸?

𑁨𑁯𑁧. 𑀓𑀫𑁆𑀫𑁂 𑀤𑀼𑀢𑀺𑀬𑀸 [𑀓. 𑁨𑁯𑁭; 𑀭𑀽. 𑁨𑁮𑁪; 𑀦𑀻. 𑁫𑁮𑁦; 𑀘𑀁. 𑁨.𑁧.𑁪𑁩; 𑀧𑀸. 𑁧.𑁪.𑁪𑁯-𑁫𑁧].

𑀓𑀫𑁆𑀫𑀢𑁆𑀣𑁂 𑀤𑀼𑀢𑀺𑀬𑀸 𑀳𑁄𑀢𑀺. 𑀓𑀭𑀺𑀬𑀢𑁂𑀢𑀺 𑀓𑀫𑁆𑀫𑀁, 𑀢𑀁 𑀦𑀺𑀩𑁆𑀩𑀢𑁆𑀢𑀺𑀓𑀫𑁆𑀫𑀁, 𑀯𑀺𑀓𑀢𑀺𑀓𑀫𑁆𑀫𑀁, 𑀧𑀢𑁆𑀢𑀺𑀓𑀫𑁆𑀫𑀦𑁆𑀢𑀺 𑀢𑀺𑀯𑀺𑀥𑀁 𑀳𑁄𑀢𑀺.

𑀢𑀢𑁆𑀣 𑀦𑀺𑀩𑁆𑀩𑀢𑁆𑀢𑀺𑀓𑀫𑁆𑀫𑀁 𑀬𑀣𑀸? 𑀇𑀤𑁆𑀥𑀺𑀫𑀸 𑀳𑀢𑁆𑀣𑀺𑀯𑀡𑁆𑀡𑀁 𑀫𑀸𑀧𑁂𑀢𑀺, 𑀭𑀸𑀚𑀸 𑀦𑀕𑀭𑀁 𑀫𑀸𑀧𑁂𑀢𑀺, 𑀫𑀸𑀢𑀸 𑀧𑀼𑀢𑁆𑀢𑀁 𑀯𑀺𑀚𑀸𑀬𑀢𑀺, 𑀩𑀻𑀚𑀁 𑀭𑀼𑀓𑁆𑀔𑀁 𑀚𑀦𑁂𑀢𑀺, 𑀓𑀫𑁆𑀫𑀁 𑀯𑀺𑀧𑀸𑀓𑀁 𑀚𑀦𑁂𑀢𑀺, 𑀆𑀳𑀸𑀭𑁄 𑀩𑀮𑀁 𑀚𑀦𑁂𑀢𑀺, 𑀚𑀦𑁄 𑀧𑀼𑀜𑁆𑀜𑀁 𑀓𑀭𑁄𑀢𑀺, 𑀧𑀸𑀧𑀁 𑀓𑀭𑁄𑀢𑀺, 𑀩𑀼𑀤𑁆𑀥𑁄 𑀥𑀫𑁆𑀫𑀁 𑀤𑁂𑀲𑁂𑀲𑀺, 𑀯𑀺𑀦𑀬𑀁 𑀧𑀜𑁆𑀜𑀧𑁂𑀲𑀺, 𑀪𑀺𑀓𑁆𑀔𑀼 𑀛𑀸𑀦𑀁 𑀉𑀧𑁆𑀧𑀸𑀤𑁂𑀢𑀺, 𑀫𑀕𑁆𑀕𑀁 𑀉𑀧𑁆𑀧𑀸𑀤𑁂𑀢𑀺 𑀇𑀘𑁆𑀘𑀸𑀤𑀺.

𑀯𑀺𑀓𑀢𑀺𑀓𑀫𑁆𑀫𑀁 𑀬𑀣𑀸? 𑀕𑁂𑀳𑀁 𑀓𑀭𑁄𑀢𑀺, 𑀭𑀣𑀁 𑀓𑀭𑁄𑀢𑀺, 𑀖𑀝𑀁 𑀓𑀭𑁄𑀢𑀺, 𑀧𑀝𑀁 𑀯𑀸𑀬𑀢𑀺, 𑀑𑀤𑀦𑀁 𑀧𑀘𑀢𑀺, 𑀪𑀢𑁆𑀢𑀁 𑀧𑀘𑀢𑀺, 𑀓𑀝𑁆𑀞𑀁 𑀅𑀗𑁆𑀕𑀸𑀭𑀁 𑀓𑀭𑁄𑀢𑀺, 𑀲𑀼𑀯𑀡𑁆𑀡𑀁 𑀓𑀝𑀓𑀁 𑀓𑀭𑁄𑀢𑀺, 𑀕𑁂𑀳𑀁 𑀛𑀸𑀧𑁂𑀢𑀺, 𑀭𑀼𑀓𑁆𑀔𑀁 𑀙𑀺𑀦𑁆𑀤𑀢𑀺, 𑀧𑀸𑀓𑀸𑀭𑀁 𑀪𑀺𑀦𑁆𑀤𑀢𑀺, 𑀯𑀺𑀳𑀬𑁄 𑀮𑀼𑀦𑀸𑀢𑀺, 𑀧𑀸𑀡𑀁 𑀳𑀦𑀢𑀺, 𑀪𑀢𑁆𑀢𑀁 𑀪𑀼𑀜𑁆𑀚𑀢𑀺 𑀇𑀘𑁆𑀘𑀸𑀤𑀺.

𑀧𑀢𑁆𑀢𑀺𑀓𑀫𑁆𑀫𑀁 𑀬𑀣𑀸? 𑀕𑀸𑀫𑀁 𑀕𑀘𑁆𑀙𑀢𑀺, 𑀕𑁂𑀳𑀁 𑀧𑀯𑀺𑀲𑀢𑀺, 𑀭𑀼𑀓𑁆𑀔𑀁 𑀆𑀭𑁄𑀳𑀢𑀺, 𑀦𑀤𑀺𑀁 𑀢𑀭𑀢𑀺, 𑀆𑀤𑀺𑀘𑁆𑀘𑀁 𑀧𑀲𑁆𑀲𑀢𑀺, 𑀥𑀫𑁆𑀫𑀁 𑀲𑀼𑀡𑀸𑀢𑀺, 𑀩𑀼𑀤𑁆𑀥𑀁 𑀯𑀦𑁆𑀤𑀢𑀺 𑀧𑀬𑀺𑀭𑀼𑀧𑀸𑀲𑀢𑀺 𑀇𑀘𑁆𑀘𑀸𑀤𑀺.

𑀧𑀓𑀢𑀺𑀓𑀫𑁆𑀫𑀁, 𑀯𑀺𑀓𑀢𑀺𑀓𑀫𑁆𑀫𑀦𑁆𑀢𑀺 𑀤𑀼𑀯𑀺𑀥𑀁. 𑀲𑀼𑀯𑀡𑁆𑀡𑀁 𑀓𑀝𑀓𑀁 𑀓𑀭𑁄𑀢𑀺, 𑀓𑀝𑁆𑀞𑀁 𑀅𑀗𑁆𑀕𑀸𑀭𑀁 𑀓𑀭𑁄𑀢𑀺, 𑀧𑀼𑀭𑀺𑀲𑀁 𑀞𑀺𑀢𑀁 𑀧𑀲𑁆𑀲𑀢𑀺, 𑀧𑀼𑀭𑀺𑀲𑀁 𑀕𑀘𑁆𑀙𑀦𑁆𑀢𑀁 𑀧𑀲𑁆𑀲𑀢𑀺, 𑀪𑀺𑀓𑁆𑀔𑀼𑀁 𑀧𑀲𑁆𑀲𑀢𑀺 𑀲𑀢𑀁, 𑀲𑀫𑁆𑀧𑀚𑀸𑀦𑀁, 𑀅𑀪𑀺𑀓𑁆𑀓𑀫𑀦𑁆𑀢𑀁, 𑀧𑀝𑀺𑀓𑁆𑀓𑀫𑀦𑁆𑀢𑀁, 𑀆𑀮𑁄𑀓𑁂𑀦𑁆𑀢𑀁, 𑀯𑀺𑀮𑁄𑀓𑁂𑀦𑁆𑀢𑀁, 𑀲𑀫𑀺𑀜𑁆𑀚𑁂𑀦𑁆𑀢𑀁, 𑀧𑀲𑀸𑀭𑁂𑀦𑁆𑀢𑀁.

𑀏𑀢𑁆𑀣 ‘𑀧𑀼𑀭𑀺𑀲𑀁, 𑀪𑀺𑀓𑁆𑀔𑀼’𑀦𑁆𑀢𑀺 𑀧𑀓𑀢𑀺𑀓𑀫𑁆𑀫𑀁, ‘𑀞𑀺𑀢𑀁, 𑀲𑀢𑀁’𑀇𑀘𑁆𑀘𑀸𑀤𑀻𑀦𑀺 𑀯𑀺𑀓𑀢𑀺𑀓𑀫𑁆𑀫𑀸𑀦𑀺.

𑀥𑀸𑀢𑀼𑀓𑀫𑁆𑀫𑀁, 𑀓𑀸𑀭𑀺𑀢𑀓𑀫𑁆𑀫𑀦𑁆𑀢𑀺 𑀤𑀼𑀯𑀺𑀥𑀁. 𑀕𑀸𑀫𑀁 𑀕𑀘𑁆𑀙𑀢𑀺, 𑀧𑀼𑀭𑀺𑀲𑀁 𑀕𑀸𑀫𑀁 𑀕𑀫𑁂𑀢𑀺.

𑀥𑀸𑀢𑀼𑀓𑀫𑁆𑀫𑀜𑁆𑀘 𑀤𑁆𑀯𑀺𑀓𑀫𑁆𑀫𑀺𑀓𑀥𑀸𑀢𑀽𑀦𑀁 𑀤𑀼𑀯𑀺𑀥𑀁 𑀧𑀥𑀸𑀦𑀓𑀫𑁆𑀫𑀁, 𑀅𑀧𑁆𑀧𑀥𑀸𑀦𑀓𑀫𑁆𑀫𑀦𑁆𑀢𑀺. 𑀅𑀚𑀧𑀸𑀮𑁄 𑀅𑀚𑀁 𑀕𑀸𑀫𑀁 𑀦𑁂𑀢𑀺, 𑀧𑀼𑀭𑀺𑀲𑁄 𑀪𑀸𑀭𑀁 𑀕𑀸𑀫𑀁 𑀯𑀳𑀢𑀺, 𑀳𑀭𑀢𑀺, 𑀕𑀸𑀫𑀁 𑀲𑀸𑀔𑀁 𑀓𑀟𑁆𑀠𑀢𑀺, 𑀕𑀸𑀯𑀺𑀁 𑀔𑀻𑀭𑀁 𑀤𑁄𑀳𑀢𑀺, 𑀩𑁆𑀭𑀸𑀳𑁆𑀫𑀡𑀁 𑀓𑀫𑁆𑀩𑀮𑀁 𑀬𑀸𑀘𑀢𑀺, 𑀩𑁆𑀭𑀸𑀳𑁆𑀫𑀡𑀁 𑀪𑀢𑁆𑀢𑀁 𑀪𑀺𑀓𑁆𑀔𑀢𑀺, 𑀕𑀸𑀯𑀺𑀬𑁄 𑀯𑀚𑀁 𑀅𑀯𑀭𑀼𑀦𑁆𑀥𑀢𑀺, 𑀪𑀕𑀯𑀦𑁆𑀢𑀁 𑀧𑀜𑁆𑀳𑀁 𑀧𑀼𑀘𑁆𑀙𑀢𑀺, 𑀭𑀼𑀓𑁆𑀔𑀁 𑀨𑀮𑀸𑀦𑀺 𑀑𑀘𑀺𑀦𑀸𑀢𑀺, 𑀲𑀺𑀲𑁆𑀲𑀁 𑀥𑀫𑁆𑀫𑀁 𑀩𑁆𑀭𑀯𑀻𑀢𑀺, 𑀪𑀕𑀯𑀸 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘 [𑀉𑀤𑀸. 𑁨𑁩 (𑀣𑁄𑀓𑀁 𑀯𑀺𑀲𑀤𑀺𑀲𑀁)], 𑀲𑀺𑀲𑁆𑀲𑀁 𑀥𑀫𑁆𑀫𑀁 𑀅𑀦𑀼𑀲𑀸𑀲𑀢𑀺 𑀇𑀘𑁆𑀘𑀸𑀤𑀺.

𑀏𑀢𑁆𑀣 𑀘 ‘𑀅𑀚𑀁, 𑀔𑀻𑀭𑀁’ 𑀇𑀘𑁆𑀘𑀸𑀤𑀺 𑀧𑀥𑀸𑀦𑀓𑀫𑁆𑀫𑀁 𑀦𑀸𑀫 𑀓𑀢𑁆𑀢𑀸𑀭𑀸 𑀧𑀭𑀺𑀕𑁆𑀕𑀳𑁂𑀢𑀼𑀁 𑀇𑀝𑁆𑀞𑀢𑀭𑀢𑁆𑀢𑀸. ‘𑀕𑀸𑀫𑀁, 𑀕𑀸𑀯𑀺𑀁’𑀇𑀘𑁆𑀘𑀸𑀤𑀺 𑀅𑀧𑁆𑀧𑀥𑀸𑀦𑀓𑀫𑁆𑀫𑀁 𑀦𑀸𑀫 𑀢𑀣𑀸 𑀅𑀦𑀺𑀝𑁆𑀞𑀢𑀭𑀢𑁆𑀢𑀸.

𑀢𑀢𑁆𑀣 𑀧𑀥𑀸𑀦𑀓𑀫𑁆𑀫𑀁 𑀓𑀣𑀺𑀦𑀓𑀫𑁆𑀫𑀁 𑀦𑀸𑀫, 𑀓𑀫𑁆𑀫𑀪𑀸𑀯𑁂 𑀣𑀺𑀭𑀓𑀫𑁆𑀫𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀧𑁆𑀧𑀥𑀸𑀦𑀓𑀫𑁆𑀫𑀁 𑀅𑀓𑀣𑀺𑀦𑀓𑀫𑁆𑀫𑀁 𑀦𑀸𑀫, 𑀅𑀣𑀺𑀭𑀓𑀫𑁆𑀫𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀜𑁆𑀳𑀺 𑀓𑀤𑀸𑀘𑀺 𑀲𑀫𑁆𑀧𑀤𑀸𑀦𑀁 𑀳𑁄𑀢𑀺, 𑀓𑀤𑀸𑀘𑀺 𑀅𑀧𑀸𑀤𑀸𑀦𑀁, 𑀓𑀤𑀸𑀘𑀺 𑀲𑀸𑀫𑀺, 𑀓𑀤𑀸𑀘𑀺 𑀑𑀓𑀸𑀲𑁄. 𑀬𑀣𑀸 𑁋 𑀲𑁄 𑀫𑀁 𑀤𑀓𑀸𑀬 𑀦𑁂𑀢𑀺, 𑀕𑀸𑀯𑀺𑀢𑁄 𑀔𑀻𑀭𑀁 𑀤𑁄𑀳𑀢𑀺, 𑀕𑀸𑀯𑀺𑀬𑀸 𑀔𑀻𑀭𑀁 𑀤𑁄𑀳𑀳𑀺, 𑀕𑀸𑀯𑀺𑀬𑀁 𑀔𑀻𑀭𑀁 𑀤𑁄𑀳𑀢𑀺 𑀇𑀘𑁆𑀘𑀸𑀤𑀺.

𑀓𑀫𑁆𑀫𑁂 𑀤𑀼𑀢𑀺𑀬𑀸𑀢𑀺 𑀯𑀢𑁆𑀢𑀢𑁂.

𑁨𑁯𑁨. 𑀕𑀢𑀺𑀩𑁄𑀥𑀸𑀳𑀸𑀭𑀲𑀤𑁆𑀤𑀢𑁆𑀣𑀸 𑀓𑀫𑁆𑀫𑀓 𑀪𑀚𑁆𑀚𑀸𑀤𑀻𑀦𑀁 𑀧𑀬𑁄𑀚𑁆𑀚𑁂 [𑀓. 𑁩𑁦𑁦; 𑀭𑀽. 𑁨𑁮𑁬; 𑀦𑀻. 𑁫𑁮𑁭; 𑀘𑀁. 𑁨.𑁧.𑁪𑁪; 𑀧𑀸. 𑁧.𑁪.𑁫𑁨].

𑀦𑀺𑀘𑁆𑀘𑀯𑀺𑀥𑀺𑀲𑀼𑀢𑁆𑀢𑀫𑀺𑀤𑀁. 𑀕𑀫𑀦𑀢𑁆𑀣𑀸𑀦𑀁 𑀩𑁄𑀥𑀦𑀢𑁆𑀣𑀸𑀦𑀁 𑀆𑀳𑀸𑀭𑀢𑁆𑀣𑀸𑀦𑀁 𑀲𑀤𑁆𑀤𑀢𑁆𑀣𑀸𑀦𑀁 𑀅𑀓𑀫𑁆𑀫𑀓𑀸𑀦𑀁 𑀪𑀚𑁆𑀚𑀸𑀤𑀻𑀦𑀜𑁆𑀘 𑀥𑀸𑀢𑀽𑀦𑀁 𑀧𑀬𑁄𑀚𑁆𑀚𑁂 𑀓𑀫𑁆𑀫𑀦𑀺 𑀤𑀼𑀢𑀺𑀬𑀸 𑀳𑁄𑀢𑀺. 𑀏𑀢𑁆𑀣 𑀘 𑀧𑀬𑁄𑀚𑁆𑀚𑀓𑀫𑁆𑀫𑀁 𑀦𑀸𑀫 𑀓𑀸𑀭𑀺𑀢𑀓𑀫𑁆𑀫𑀁 𑀯𑀼𑀘𑁆𑀘𑀢𑀺.

𑀧𑀼𑀭𑀺𑀲𑁄 𑀧𑀼𑀭𑀺𑀲𑀁 𑀕𑀸𑀫𑀁 𑀕𑀫𑀬𑀢𑀺, 𑀲𑀸𑀫𑀺𑀓𑁄 𑀅𑀚𑀧𑀸𑀮𑀁 𑀅𑀚𑀁 𑀕𑀸𑀫𑀁 𑀦𑀬𑀸𑀧𑁂𑀢𑀺, 𑀆𑀘𑀭𑀺𑀬𑁄 𑀲𑀺𑀲𑁆𑀲𑀁 𑀥𑀫𑁆𑀫𑀁 𑀩𑁄𑀥𑁂𑀢𑀺, 𑀧𑀼𑀭𑀺𑀲𑁄 𑀧𑀼𑀭𑀺𑀲𑀁 𑀪𑀢𑁆𑀢𑀁 𑀪𑁄𑀚𑁂𑀢𑀺, 𑀆𑀘𑀭𑀺𑀬𑁄 𑀲𑀺𑀲𑁆𑀲𑀁 𑀥𑀫𑁆𑀫𑀁 𑀧𑀸𑀞𑁂𑀢𑀺, 𑀧𑀼𑀭𑀺𑀲𑁄 𑀧𑀼𑀭𑀺𑀲𑀁 𑀲𑀬𑀸𑀧𑁂𑀢𑀺, 𑀅𑀘𑁆𑀙𑀸𑀧𑁂𑀢𑀺, 𑀉𑀝𑁆𑀞𑀸𑀧𑁂𑀢𑀺, 𑀧𑀼𑀭𑀺𑀲𑁄 𑀧𑀼𑀭𑀺𑀲𑀁 𑀥𑀜𑁆𑀜𑀁 𑀪𑀚𑁆𑀚𑀸𑀧𑁂𑀢𑀺, 𑀓𑁄𑀝𑁆𑀝𑀸𑀧𑁂𑀢𑀺, 𑀉𑀤𑁆𑀥𑀭𑀸𑀧𑁂𑀢𑀺.

𑀏𑀢𑁂𑀲𑀫𑀻𑀢𑀺 𑀓𑀺𑀁? 𑀧𑀼𑀭𑀺𑀲𑁄 𑀧𑀼𑀭𑀺𑀲𑁂𑀦 𑀑𑀤𑀦𑀁 𑀧𑀸𑀘𑁂𑀢𑀺.

𑀏𑀢𑁆𑀣 𑀘 𑀕𑀫𑀦𑀢𑁆𑀣𑀸𑀤𑀻𑀦𑀁 𑀧𑀬𑁄𑀚𑁆𑀚𑁂 𑀢𑀢𑀺𑀬𑀸𑀧𑀺 𑀭𑀽𑀧𑀲𑀺𑀤𑁆𑀥𑀺𑀬𑀁 [𑁧𑁪𑁧 𑀧𑀺𑀝𑁆𑀞𑁂] 𑀲𑀤𑁆𑀤𑀦𑀻𑀢𑀺𑀬𑀜𑁆𑀘 [𑀲𑀼𑀢𑁆𑀢-𑁧𑁪𑁮 𑀧𑀺𑀝𑁆𑀞𑁂] 𑀯𑀼𑀢𑁆𑀢𑀸. 𑀲𑀤𑁆𑀤𑀦𑀻𑀢𑀺𑀬𑀁 𑀢𑀢𑀺𑀬𑀸𑀧𑀬𑁄𑀕𑁂𑀧𑀺 𑀓𑀫𑁆𑀫𑀢𑁆𑀣𑀫𑁂𑀯 𑀇𑀘𑁆𑀙𑀢𑀺. 𑀜𑀸𑀲𑀸𑀤𑀻𑀲𑀼 𑀓𑀢𑁆𑀯𑀢𑁆𑀣𑀁 𑀇𑀘𑁆𑀙𑀦𑁆𑀢𑀺.

𑀬𑀤𑀸 𑀧𑀦 𑀧𑀞𑀫𑀁 𑀧𑀬𑁄𑀚𑀓𑀁 𑀅𑀜𑁆𑀜𑁄 𑀤𑀼𑀢𑀺𑀬𑁄 𑀧𑀬𑁄𑀚𑁂𑀢𑀺, 𑀢𑀤𑀸 𑀧𑀞𑀫𑁄 𑀧𑀬𑁄𑀚𑁆𑀚𑁄 𑀦𑀸𑀫. 𑀢𑀲𑁆𑀫𑀺𑀁 𑀢𑀢𑀺𑀬𑀸𑀏𑀯𑀸𑀢𑀺 𑀯𑀼𑀢𑁆𑀢𑀺𑀬𑀁 𑀯𑀼𑀢𑁆𑀢𑀁. 𑀅𑀢𑁆𑀢𑀦𑀸 𑀯𑀺𑀧𑁆𑀧𑀓𑀢𑀁 𑀓𑀼𑀝𑀺𑀁 𑀧𑀭𑁂𑀳𑀺 𑀧𑀭𑀺𑀬𑁄𑀲𑀸𑀧𑁂𑀢𑀺 [𑀧𑀸𑀭𑀸. 𑁩𑁬𑁩].

𑁨𑁯𑁩. 𑀳𑀭𑀸𑀤𑀻𑀦𑀁 𑀯𑀸 [𑀓. 𑁩𑁦𑁦; 𑀭𑀽. 𑁨𑁮𑁬; 𑀦𑀻. 𑁫𑁮𑁭; 𑀘𑀁. 𑁨.𑁧.𑁪𑁫; 𑀧𑀸. 𑁧.𑁪.𑁫𑁩].

𑀳𑀭𑀸𑀤𑀻𑀦𑀁 𑀧𑀬𑁄𑀚𑁆𑀚𑁂 𑀓𑀫𑁆𑀫𑀦𑀺 𑀯𑀺𑀓𑀧𑁆𑀧𑁂𑀦 𑀤𑀼𑀢𑀺𑀬𑀸 𑀳𑁄𑀢𑀺.

𑀲𑀸𑀫𑀺𑀓𑁄 𑀧𑀼𑀭𑀺𑀲𑀁 𑀪𑀸𑀭𑀁 𑀳𑀸𑀭𑁂𑀢𑀺 𑀧𑀼𑀭𑀺𑀲𑁂𑀦 𑀯𑀸, 𑀧𑀼𑀭𑀺𑀲𑀁 𑀆𑀳𑀸𑀭𑀁 𑀅𑀚𑁆𑀛𑁄𑀳𑀸𑀭𑁂𑀢𑀺 𑀧𑀼𑀭𑀺𑀲𑁂𑀦 𑀯𑀸, 𑀧𑀼𑀭𑀺𑀲𑀁 𑀓𑀫𑁆𑀫𑀁 𑀓𑀸𑀭𑁂𑀢𑀺 𑀧𑀼𑀭𑀺𑀲𑁂𑀦 𑀯𑀸, 𑀭𑀸𑀚𑀸 𑀧𑀼𑀭𑀺𑀲𑀁 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀢𑀺 𑀧𑀼𑀭𑀺𑀲𑁂𑀦 𑀯𑀸, 𑀧𑀼𑀭𑀺𑀲𑀁 𑀩𑀼𑀤𑁆𑀥𑀁 𑀯𑀦𑁆𑀤𑀸𑀧𑁂𑀢𑀺 𑀧𑀼𑀭𑀺𑀲𑁂𑀦 𑀯𑀸.

𑁧𑁯𑁪. 𑀦 𑀔𑀸𑀤𑀸𑀤𑀻𑀦𑀁 [𑀓. 𑁩𑁦𑁦; 𑀭𑀽. 𑁨𑁮𑁬; 𑀦𑀻. 𑁫𑁮𑁭; 𑀘𑀁. 𑁨.𑁧.𑁪𑁭; 𑀧𑀸. 𑁧.𑁪.𑁫𑁭].

𑀔𑀸𑀤𑀸𑀤𑀻𑀦𑀁 𑀧𑀬𑁄𑀚𑁆𑀚𑁂 𑀓𑀫𑁆𑀫𑀦𑀺 𑀦 𑀤𑀼𑀢𑀺𑀬𑀸 𑀳𑁄𑀢𑀺.

𑀲𑀸𑀫𑀺𑀓𑁄 𑀧𑀼𑀭𑀺𑀲𑁂𑀦 𑀔𑀚𑁆𑀚𑀁 𑀔𑀸𑀤𑀸𑀧𑁂𑀢𑀺, 𑀅𑀤-𑀪𑀓𑁆𑀔𑀦𑁂, 𑀪𑀢𑁆𑀢𑀁 𑀆𑀤𑁂𑀢𑀺, 𑀲𑀸𑀫𑀺𑀓𑁄 𑀤𑀸𑀲𑁂𑀦 𑀧𑀼𑀭𑀺𑀲𑀁 𑀅𑀯𑁆𑀳𑀸𑀧𑁂𑀢𑀺, 𑀲𑀤𑁆𑀤𑀸𑀬𑀸𑀧𑁂𑀢𑀺, 𑀓𑀦𑁆𑀤𑀬𑀢𑀺, 𑀦𑀸𑀤𑀬𑀢𑀺. 𑀏𑀢𑁆𑀣 𑀘 ‘𑀲𑀤𑁆𑀤𑀸𑀬𑀸𑀧𑁂𑀢𑀻’𑀢𑀺 𑀲𑀤𑁆𑀤𑀁 𑀓𑀸𑀭𑀸𑀧𑁂𑀢𑀺, 𑀦𑀸𑀫𑀥𑀸𑀢𑀼 𑀘𑁂𑀲𑀸. 𑀓𑀦𑁆𑀤, 𑀦𑀤𑀸𑀧𑀺 𑀲𑀤𑁆𑀤𑀢𑁆𑀣𑀸𑀬𑁂𑀯.

𑁨𑁯𑁫. 𑀯𑀳𑀺𑀲𑁆𑀲𑀸𑀦𑀺𑀬𑀦𑁆𑀢𑀼𑀓𑁂 [𑀓. 𑁩𑁦𑁦; 𑀭𑀽. 𑁨𑁮𑁬; 𑀦𑀻. 𑁫𑁮𑁭; 𑀘𑀁. 𑁨.𑁧.𑁪𑁮; 𑀧𑀸. 𑁧.𑁪.𑁫𑁨].

𑀯𑀳𑀺𑀲𑁆𑀲𑀸𑀢𑀺 𑀥𑀸𑀢𑀼𑀦𑀺𑀤𑁆𑀤𑁂𑀲𑁄 𑀇-𑀓𑀸𑀭𑁄, 𑀦𑀺𑀬𑀸𑀫𑁂𑀢𑀺 𑀧𑀬𑁄𑀚𑁂𑀢𑀻𑀢𑀺 𑀦𑀺𑀬𑀦𑁆𑀢𑀸, 𑀦𑀢𑁆𑀣𑀺 𑀦𑀺𑀬𑀦𑁆𑀢𑀸 𑀏𑀢𑀲𑁆𑀲𑀸𑀢𑀺 𑀅𑀦𑀺𑀬𑀦𑁆𑀢𑀼𑀓𑁄. 𑀬𑀲𑁆𑀲 𑀅𑀜𑁆𑀜𑁂𑀦 𑀧𑀬𑁄𑀚𑀓𑁂𑀦 𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀲𑀬𑀫𑁂𑀯 𑀜𑀢𑁆𑀯𑀸 𑀯𑀳𑀢𑀺, 𑀲𑁄 𑀅𑀦𑀺𑀬𑀦𑁆𑀢𑀼𑀓𑁄 𑀦𑀸𑀫, 𑀯𑀳𑀥𑀸𑀢𑀼𑀲𑁆𑀲 𑀢𑀸𑀤𑀺𑀲𑁂 𑀅𑀦𑀺𑀬𑀦𑁆𑀢𑀼𑀓𑁂 𑀧𑀬𑁄𑀚𑁆𑀚𑁂 𑀓𑀫𑁆𑀫𑀦𑀺 𑀤𑀼𑀢𑀺𑀬𑀸 𑀦 𑀳𑁄𑀢𑀺.

𑀲𑀸𑀫𑀺𑀓𑁄 𑀤𑀸𑀲𑁂𑀦 𑀪𑀸𑀭𑀁 𑀯𑀸𑀳𑁂𑀢𑀺.

𑀅𑀦𑀺𑀬𑀦𑁆𑀢𑀼𑀓𑁂𑀢𑀺 𑀓𑀺𑀁? 𑀩𑀮𑀻𑀩𑀤𑁆𑀤𑁂 𑀪𑀸𑀭𑀁 𑀯𑀸𑀳𑁂𑀢𑀺.

𑁨𑁯𑁬. 𑀪𑀓𑁆𑀔𑀺𑀲𑁆𑀲𑀸𑀳𑀺𑀁𑀲𑀸𑀬𑀁 [𑀓. 𑁩𑁦𑁦; 𑀭𑀽. 𑁨𑁮𑁬; 𑀦𑀻. 𑁫𑁮𑁭; 𑀘𑀁. 𑁨.𑁧.𑁪𑁯; 𑀧𑀸. 𑁧.𑁪.𑁫].

𑀪𑀓𑁆𑀔𑀺𑀢𑀼𑀁 𑀇𑀘𑁆𑀙𑀦𑁆𑀢𑀲𑁆𑀲 𑀪𑀓𑁆𑀔𑀸𑀧𑀦𑀁 𑀳𑀺𑀁𑀲𑀸 𑀦𑀸𑀫 𑀦 𑀳𑁄𑀢𑀺, 𑀅𑀦𑀺𑀘𑁆𑀙𑀦𑁆𑀢𑀲𑁆𑀲 𑀪𑀓𑁆𑀔𑀸𑀧𑀦𑀁 𑀳𑀺𑀁𑀲𑀸 𑀦𑀸𑀫, 𑀪𑀓𑁆𑀔𑀥𑀸𑀢𑀼𑀲𑁆𑀲 𑀧𑀬𑁄𑀚𑁆𑀚𑁂 𑀓𑀫𑁆𑀫𑀦𑀺 𑀅𑀳𑀺𑀁𑀲𑀸𑀯𑀺𑀲𑀬𑁂 𑀤𑀼𑀢𑀺𑀬𑀸 𑀦 𑀳𑁄𑀢𑀺.

𑀲𑀸𑀫𑀺𑀓𑁄 𑀧𑀼𑀭𑀺𑀲𑁂𑀦 𑀫𑁄𑀤𑀓𑁂 𑀪𑀓𑁆𑀔𑀸𑀧𑁂𑀢𑀺.

𑀅𑀳𑀺𑀁𑀲𑀸𑀬𑀦𑁆𑀢𑀺 𑀓𑀺𑀁? 𑀩𑀮𑀻𑀩𑀤𑁆𑀤𑁂 𑀲𑀲𑁆𑀲𑀁 𑀪𑀓𑁆𑀔𑀸𑀧𑁂𑀢𑀺. 𑀏𑀢𑁆𑀣 ‘𑀲𑀲𑁆𑀲’𑀦𑁆𑀢𑀺 𑀣𑀽𑀮𑀢𑀭𑀁 𑀲𑀲𑁆𑀲𑀦𑁆𑀢𑀺 𑀯𑀤𑀦𑁆𑀢𑀺.

𑀧𑀸𑀴𑀺𑀬𑀁 ‘‘𑀲𑀩𑁆𑀩𑁂𑀲𑀁 𑀯𑀺𑀜𑁆𑀜𑀸𑀧𑁂𑀢𑁆𑀯𑀸𑀦 [𑀅𑀧. 𑀣𑁂𑀭 𑁧.𑁧.𑁪𑁩𑁮], 𑀢𑁄𑀲𑁂𑀦𑁆𑀢𑀺 𑀲𑀩𑁆𑀩𑀧𑀸𑀡𑀺𑀦𑀁 [𑀅𑀧. 𑀣𑁂𑀭 𑁧.𑁧.𑁩𑁦𑁦]. 𑀣𑁂𑀭𑀲𑁆𑀲 𑀧𑀢𑁆𑀢𑁄 𑀤𑀼𑀢𑀺𑀬𑀲𑁆𑀲 𑀕𑀸𑀳𑁂𑀢𑀩𑁆𑀩𑁄’’ 𑀇𑀘𑁆𑀘𑀸𑀤𑀺𑀦𑀸 [𑀧𑀸𑀭𑀸. 𑁬𑁧𑁫] 𑀧𑀬𑁄𑀚𑁆𑀚𑁂 𑀙𑀝𑁆𑀞𑀻𑀧𑀺 𑀤𑀺𑀲𑁆𑀲𑀢𑀺.

𑁨𑁯𑁭. 𑀛𑀸𑀤𑀻𑀳𑀺 𑀬𑀼𑀢𑁆𑀢𑀸 [𑀓. 𑁨𑁯𑁯; 𑀭𑀽. 𑁨𑁮𑁮; 𑀦𑀻. 𑁫𑁮𑁨, 𑁫𑁮𑁬; 𑀘𑀁. 𑁨.𑁧.𑁫𑁦; 𑀧𑀸. 𑁨.𑁩.𑁨].

𑀥𑀻𑀇𑀘𑁆𑀘𑀸𑀤𑀻𑀳𑀺 𑀦𑀺𑀧𑀸𑀢𑁄𑀧𑀲𑀕𑁆𑀕𑁂𑀳𑀺 𑀬𑀼𑀢𑁆𑀢𑀸 𑀮𑀺𑀗𑁆𑀕𑀫𑁆𑀳𑀸 𑀤𑀼𑀢𑀺𑀬𑀸 𑀳𑁄𑀢𑀺.

𑀥𑀻 𑀩𑁆𑀭𑀸𑀳𑁆𑀫𑀡𑀲𑁆𑀲 𑀳𑀦𑁆𑀢𑀸𑀭𑀁 [𑀥. 𑀧. 𑁩𑁮𑁯], 𑀥𑀻𑀭𑀢𑁆𑀣𑀼’𑀫𑀁 𑀧𑀽𑀢𑀺𑀓𑀸𑀬𑀁 [𑀚𑀸. 𑁧.𑁩.𑁧𑁨𑁯], 𑀥𑀻𑀭𑀢𑁆𑀣𑀼 𑀢𑀁 𑀥𑀦𑀮𑀸𑀪𑀁 [𑀚𑀸. 𑁧.𑁪.𑁩𑁬], 𑀥𑀻𑀭𑀢𑁆𑀣𑀼 𑀩𑀳𑀼𑀓𑁂 𑀓𑀸𑀫𑁂. 𑀢𑀢𑀺𑀬𑀸𑀧𑀺 𑀤𑀺𑀲𑁆𑀲𑀢𑀺, 𑀥𑀻𑀭𑀢𑁆𑀣𑀼 𑀚𑀻𑀯𑀺𑀢𑁂𑀦 𑀫𑁂 [𑀚𑀸. 𑁨.𑁧𑁭.𑁧𑁩𑁫]. 𑀅𑀦𑁆𑀢𑀭𑀸 𑀘 𑀭𑀸𑀚𑀕𑀳𑀁 𑀅𑀦𑁆𑀢𑀭𑀸 𑀘 𑀦𑀸𑀴𑀦𑁆𑀤𑀁 [𑀤𑀻. 𑀦𑀺. 𑁧.𑁧], 𑀅𑀪𑀺𑀢𑁄 𑀕𑀸𑀫𑀁 𑀯𑀲𑀢𑀺, 𑀧𑀭𑀺𑀢𑁄𑀕𑀸𑀫𑀁 𑀯𑀲𑀢𑀺, 𑀦𑀤𑀺𑀁 𑀦𑁂𑀭𑀜𑁆𑀚𑀭𑀁 𑀧𑀢𑀺 [𑀲𑀼. 𑀦𑀺. 𑁪𑁨𑁭], 𑀏𑀢𑁂𑀲𑀼 𑀙𑀝𑁆𑀞𑁆𑀬𑀢𑁆𑀣𑁂 𑀤𑀼𑀢𑀺𑀬𑀸.

𑀢𑀣𑀸 𑀧𑀝𑀺𑀪𑀸𑀢𑀺 𑀫𑀁 𑀪𑀕𑀯𑀸 [𑀉𑀤𑀸. 𑁪𑁫; 𑀲𑀁. 𑀦𑀺. 𑁧.𑁨𑁧𑁭], 𑀅𑀧𑀺𑀲𑁆𑀲𑀼 𑀫𑀁 𑀢𑀺𑀲𑁆𑀲𑁄 𑀉𑀧𑀫𑀸𑀬𑁄 𑀧𑀝𑀺𑀪𑀁𑀲𑀼 [𑀫. 𑀦𑀺. 𑁧.𑁩𑁭𑁪], 𑀧𑀝𑀺𑀪𑀸𑀢𑀼 𑀢𑀁 𑀪𑀺𑀓𑁆𑀔𑀼 𑀥𑀫𑁆𑀫𑁄 𑀪𑀸𑀲𑀺𑀢𑀼𑀁 [𑀫𑀳𑀸𑀯. 𑁨𑁫𑁮]. 𑀧𑀝𑀺𑀪𑀦𑁆𑀢𑀼 𑀢𑀁 𑀘𑀼𑀦𑁆𑀤 𑀩𑁄𑀚𑁆𑀛𑀗𑁆𑀕𑀸 [𑀲𑀁. 𑀦𑀺. 𑁩.𑁭𑁯] 𑁋 ‘𑀫’𑀦𑁆𑀢𑀺 𑀫𑀫, ‘𑀢’𑀦𑁆𑀢𑀺 𑀢𑀯, 𑀲𑀫𑁆𑀧𑀤𑀸𑀦𑀢𑁆𑀣𑁂 𑀤𑀼𑀢𑀺𑀬𑀸. ‘𑀫’𑀦𑁆𑀢𑀺 𑀫𑀫𑀜𑀸𑀡𑁂, ‘𑀢’𑀦𑁆𑀢𑀺 𑀢𑀯𑀜𑀸𑀡𑁂𑀢𑀺𑀧𑀺 𑀯𑀡𑁆𑀡𑁂𑀲𑀼𑀁. 𑀦 𑀉𑀧𑀸𑀬𑀫𑀦𑁆𑀢𑀭𑁂𑀦 𑀅𑀢𑁆𑀣𑀲𑁆𑀲 𑀲𑀺𑀤𑁆𑀥𑀺, 𑀦𑀢𑁆𑀣𑀺 𑀲𑀫𑀸𑀤𑀸𑀦𑀫𑀦𑁆𑀢𑀭𑁂𑀦 𑀲𑀺𑀓𑁆𑀔𑀸𑀧𑀝𑀺𑀮𑀸𑀪𑁄, 𑀦𑁂𑀯𑀺𑀥 𑀦 𑀳𑀼𑀭𑀁 𑀦 𑀉𑀪𑀬𑀫𑀦𑁆𑀢𑀭𑁂𑀦, 𑀏𑀲𑁂𑀯𑀦𑁆𑀢𑁄 𑀤𑀼𑀓𑁆𑀔𑀲𑁆𑀲 [𑀫. 𑀦𑀺. 𑁩.𑁩𑁯𑁩; 𑀉𑀤𑀸. 𑁭𑁪]. 𑀢𑀢𑁆𑀣 ‘𑀅𑀦𑁆𑀢𑀭𑁂𑀦𑀸’𑀢𑀺 𑀦𑀺𑀧𑀸𑀢𑀧𑀤𑀫𑁂𑀢𑀁, 𑀯𑀚𑁆𑀚𑁂𑀢𑁆𑀯𑀸𑀢𑁆𑀬𑀢𑁆𑀣𑁄. 𑀧𑀼𑀩𑁆𑀩𑁂𑀦 𑀕𑀸𑀫𑀁, 𑀤𑀓𑁆𑀔𑀺𑀡𑁂𑀦 𑀕𑀸𑀫𑀁, 𑀉𑀢𑁆𑀢𑀭𑁂𑀦 𑀕𑀸𑀫𑀁, 𑀕𑀸𑀫𑀲𑁆𑀲 𑀧𑀼𑀩𑁆𑀩𑁂𑀢𑀺 𑀅𑀢𑁆𑀣𑁄.

𑀉𑀧𑀲𑀕𑁆𑀕𑀧𑀼𑀩𑁆𑀩𑀸𑀦𑀁 𑀅𑀓𑀫𑁆𑀫𑀓𑀥𑀸𑀢𑀽𑀦𑀁 𑀧𑀬𑁄𑀕𑁂 𑀆𑀥𑀸𑀭𑁂 𑀤𑀼𑀢𑀺𑀬𑀸, 𑀧𑀣𑀯𑀺𑀁 𑀅𑀥𑀺𑀲𑁂𑀲𑁆𑀲𑀢𑀺, 𑀕𑀸𑀫𑀁 𑀅𑀥𑀺𑀢𑀺𑀝𑁆𑀞𑀢𑀺, 𑀭𑀼𑀓𑁆𑀔𑀁 𑀅𑀚𑁆𑀛𑀸𑀯𑀲𑀢𑀺, 𑀫𑀜𑁆𑀘𑀁 𑀯𑀸 𑀧𑀻𑀞𑀁 𑀯𑀸 𑀅𑀪𑀺𑀦𑀺𑀲𑀻𑀤𑁂𑀬𑁆𑀬 𑀯𑀸 𑀅𑀪𑀺𑀦𑀺𑀧𑀚𑁆𑀚𑁂𑀬𑁆𑀬 𑀯𑀸 [𑀧𑀸𑀘𑀺. 𑁧𑁩𑁦], 𑀕𑀸𑀫𑀁 𑀉𑀧𑀯𑀲𑀢𑀺, 𑀕𑀸𑀫𑀁 𑀅𑀦𑀼𑀯𑀲𑀢𑀺, 𑀧𑀩𑁆𑀩𑀢𑀁 𑀅𑀥𑀺𑀯𑀲𑀢𑀺, 𑀖𑀭𑀁 𑀆𑀯𑀲𑀢𑀺, 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺 [𑀤𑀻. 𑀦𑀺. 𑁧.𑁨𑁫𑁮; 𑀧𑀸𑀭𑀸. 𑁫𑁧𑁯], 𑀉𑀧𑁄𑀲𑀣𑀁 𑀉𑀧𑀯𑀲𑀢𑀺, 𑀓𑀸𑀫𑀸𑀯𑀘𑀭𑀁 𑀉𑀧𑀧𑀚𑁆𑀚𑀢𑀺, 𑀭𑀽𑀧𑀸𑀯𑀘𑀭𑀁 𑀉𑀧𑀧𑀚𑁆𑀚𑀢𑀺, 𑀅𑀭𑀽𑀧𑀸𑀯𑀘𑀭𑀁 𑀉𑀧𑀧𑀚𑁆𑀚𑀢𑀺, 𑀲𑀓𑁆𑀓𑀲𑁆𑀲 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀺, 𑀦𑀺𑀧𑀦𑁆𑀦𑀁 𑀯𑀸 𑀉𑀧𑀦𑀺𑀧𑀚𑁆𑀚𑁂𑀬𑁆𑀬 [𑀤𑀻. 𑀦𑀺. 𑁩.𑁨𑁮𑁨], 𑀦𑀺𑀲𑀺𑀦𑁆𑀦𑀁 𑀯𑀸 𑀉𑀧𑀦𑀺𑀲𑀻𑀤𑁂𑀬𑁆𑀬 [𑀤𑀻. 𑀦𑀺. 𑁩.𑁨𑁮𑁨], 𑀞𑀺𑀢𑀁 𑀯𑀸 𑀉𑀧𑀢𑀺𑀝𑁆𑀞𑁂𑀬𑁆𑀬 [𑀤𑀻. 𑀦𑀺. 𑁩.𑁨𑁮𑁨] 𑀇𑀘𑁆𑀘𑀸𑀤𑀺.

𑀢𑀧𑁆𑀧𑀸𑀦, 𑀘𑀸𑀭𑁂𑀧𑀺 𑀤𑀼𑀢𑀺𑀬𑀸, 𑀦𑀤𑀺𑀁 𑀧𑀺𑀯𑀢𑀺, 𑀲𑀫𑀼𑀤𑁆𑀤𑀁 𑀧𑀺𑀯𑀢𑀺, 𑀕𑀸𑀫𑀁 𑀘𑀭𑀢𑀺, 𑀅𑀭𑀜𑁆𑀜𑀁 𑀘𑀭𑀢𑀺, 𑀦𑀤𑀺𑀬𑀁, 𑀕𑀸𑀫𑁂𑀢𑀺 𑀅𑀢𑁆𑀣𑁄.

𑀓𑀸𑀮, 𑀤𑀺𑀲𑀸𑀲𑀼𑀧𑀺 𑀆𑀥𑀸𑀭𑁂 𑀏𑀯 𑀤𑀼𑀢𑀺𑀬𑀸, 𑀢𑀁 𑀔𑀡𑀁, 𑀢𑀁 𑀫𑀼𑀳𑀼𑀢𑁆𑀢𑀁, 𑀢𑀁 𑀓𑀸𑀮𑀁, 𑀏𑀓𑀫𑀦𑁆𑀢𑀁 [𑀔𑀼. 𑀧𑀸. 𑁫.𑁧], 𑀏𑀓𑀁 𑀲𑀫𑀬𑀁 [𑀔𑀼. 𑀧𑀸. 𑁫.𑁧; 𑀤𑀻. 𑀦𑀺. 𑁧.𑁧], 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 [𑀧𑀸𑀭𑀸. 𑁧𑁬], 𑀲𑀸𑀬𑀦𑁆𑀳𑀲𑀫𑀬𑀁, 𑀢𑀁 𑀤𑀺𑀯𑀲𑀁, 𑀇𑀫𑀁 𑀭𑀢𑁆𑀢𑀺𑀁 [𑀤𑀻. 𑀦𑀺. 𑁩.𑁨𑁮𑁫], 𑀤𑀼𑀢𑀺𑀬𑀫𑁆𑀧𑀺, 𑀢𑀢𑀺𑀬𑀫𑁆𑀧𑀺, 𑀘𑀢𑀼𑀢𑁆𑀣𑀁 𑀯𑀸 𑀧𑀜𑁆𑀘𑀫𑀁 𑀯𑀸 𑀅𑀧𑁆𑀧𑁂𑀢𑀺, 𑀢𑀢𑁄 𑀧𑀼𑀩𑁆𑀩𑀁, 𑀢𑀢𑁄 𑀧𑀭𑀁, 𑀧𑀼𑀭𑀺𑀫𑀁 𑀤𑀺𑀲𑀁 [𑀤𑀻. 𑀦𑀺. 𑁨.𑁩𑁩𑁬], 𑀤𑀓𑁆𑀔𑀺𑀡𑀁 𑀤𑀺𑀲𑀁 [𑀤𑀻. 𑀦𑀺. 𑁨.𑁩𑁩𑁬], 𑀧𑀘𑁆𑀙𑀺𑀫𑀁 𑀤𑀺𑀲𑀁 [𑀤𑀻. 𑀦𑀺. 𑁨.𑁩𑁩𑁬], 𑀉𑀢𑁆𑀢𑀭𑀁 𑀤𑀺𑀲𑀁 [𑀤𑀻. 𑀦𑀺. 𑁨.𑁩𑁩𑁬], 𑀇𑀫𑀸 𑀤𑀲 𑀤𑀺𑀲𑀸𑀬𑁄, 𑀓𑀢𑀫𑀁 𑀤𑀺𑀲𑀁 𑀢𑀺𑀝𑁆𑀞𑀢𑀺 𑀦𑀸𑀕𑀭𑀸𑀚𑀸 [𑀚𑀸. 𑁧.𑁧𑁬.𑁧𑁦𑁪], 𑀇𑀫𑀸𑀲𑀼 𑀤𑀺𑀲𑀸𑀲𑀼 𑀓𑀢𑀫𑀸𑀬 𑀤𑀺𑀲𑀸𑀬 𑀢𑀺𑀝𑁆𑀞𑀢𑀺 𑀙𑀤𑁆𑀤𑀦𑁆𑀢𑀦𑀸𑀕𑀭𑀸𑀚𑀸𑀢𑀺 𑀅𑀢𑁆𑀣𑁄𑀇𑀘𑁆𑀘𑀸𑀤𑀺.

𑁨𑁯𑁮. 𑀮𑀓𑁆𑀔𑀡𑀺𑀢𑁆𑀣𑀫𑁆𑀪𑀽𑀢𑀯𑀺𑀘𑁆𑀙𑀸𑀲𑁆𑀯𑀪𑀺𑀦𑀸 [𑀓. 𑁨𑁯𑁯; 𑀭𑀽. 𑁨𑁮𑁮; 𑀦𑀻. 𑁫𑁮𑁨, 𑁫𑁮𑁬; 𑀘𑀁. 𑁨.𑁧.𑁫𑁪; 𑀧𑀸. 𑁧.𑁪.𑁯𑁦, 𑁯𑁧; 𑁨.𑁩.𑁮].

𑀮𑀓𑁆𑀔𑀡𑀸𑀤𑀻𑀲𑀼 𑀅𑀢𑁆𑀣𑁂𑀲𑀼 𑀧𑀯𑀢𑁆𑀢𑁂𑀦 𑀅𑀪𑀺𑀦𑀸 𑀬𑀼𑀢𑁆𑀢𑀸 𑀮𑀺𑀗𑁆𑀕𑀫𑁆𑀳𑀸 𑀤𑀼𑀢𑀺𑀬𑀸 𑀳𑁄𑀢𑀺.

𑀮𑀓𑁆𑀔𑀻𑀬𑀢𑀺 𑀮𑀓𑁆𑀔𑀺𑀢𑀩𑁆𑀩𑀁 𑀅𑀦𑁂𑀦𑀸𑀢𑀺 𑀮𑀓𑁆𑀔𑀡𑀁. 𑀅𑀬𑀁 𑀧𑀓𑀸𑀭𑁄 𑀇𑀢𑁆𑀣𑀁, 𑀈𑀤𑀺𑀲𑁄 𑀯𑀺𑀲𑁂𑀲𑁄𑀢𑀺 𑀅𑀢𑁆𑀣𑁄. 𑀇𑀢𑁆𑀣𑀁 𑀪𑀽𑀢𑁄 𑀧𑀢𑁆𑀢𑁄𑀢𑀺 𑀇𑀢𑁆𑀣𑀫𑁆𑀪𑀽𑀢𑁄. 𑀪𑀺𑀦𑁆𑀦𑁂 𑀅𑀢𑁆𑀣𑁂 𑀩𑁆𑀬𑀸𑀧𑀺𑀢𑀼𑀁 𑀇𑀘𑁆𑀙𑀸 𑀯𑀺𑀘𑁆𑀙𑀸.

𑀢𑀢𑁆𑀣 𑀮𑀓𑁆𑀔𑀡𑁂 𑁋

𑀭𑀼𑀓𑁆𑀔𑀫𑀪𑀺 𑀯𑀺𑀚𑁆𑀚𑁄𑀢𑀢𑁂 𑀯𑀺𑀚𑁆𑀚𑀼, 𑀭𑀼𑀓𑁆𑀔𑀁 𑀅𑀪𑀺 𑀩𑁆𑀬𑀸𑀧𑁂𑀢𑁆𑀯𑀸 𑀯𑀺𑀚𑁆𑀚𑁄𑀢𑀢𑁂𑀢𑀺 𑀅𑀢𑁆𑀣𑁄, 𑀯𑀺𑀚𑁆𑀚𑁄𑀪𑀸𑀲𑁂𑀦 𑀩𑁆𑀬𑀸𑀧𑀺𑀢𑁄 𑀭𑀼𑀓𑁆𑀔𑁄 𑀯𑀺𑀚𑁆𑀚𑀼𑀧𑁆𑀧𑀸𑀤𑀲𑁆𑀲 𑀮𑀓𑁆𑀔𑀡𑀁 𑀲𑀜𑁆𑀜𑀸𑀡𑀁 𑀳𑁄𑀢𑀺.

𑀇𑀢𑁆𑀣𑀫𑁆𑀪𑀽𑀢𑁂 𑁋

𑀲𑀸𑀥𑀼 𑀤𑁂𑀯𑀤𑀢𑁆𑀢𑁄 𑀫𑀸𑀢𑀭𑀫𑀪𑀺, 𑀫𑀸𑀢𑀭𑀁 𑀅𑀪𑀺 𑀯𑀺𑀲𑀺𑀝𑁆𑀞𑀁 𑀓𑀢𑁆𑀯𑀸 𑀲𑀸𑀥𑀽𑀢𑀺 𑀅𑀢𑁆𑀣𑁄, 𑀤𑁂𑀯𑀤𑀢𑁆𑀢𑁄 𑀲𑀓𑁆𑀓𑀘𑁆𑀘𑀁 𑀫𑀸𑀢𑀼𑀧𑀝𑁆𑀞𑀸𑀦𑁂 𑀅𑀕𑁆𑀕𑀧𑀼𑀭𑀺𑀲𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀁 𑀔𑁄 𑀧𑀦 𑀪𑀯𑀦𑁆𑀢𑀁 𑀕𑁄𑀢𑀫𑀁 𑀏𑀯𑀁 𑀓𑀮𑁆𑀬𑀸𑀡𑁄 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄 [𑀧𑀸𑀭𑀸. 𑁧]. 𑀏𑀢𑁆𑀣 𑀘 ‘𑀅𑀩𑁆𑀪𑀼𑀕𑁆𑀕𑀢𑁄’𑀢𑀺 𑀅𑀪𑀺 𑀯𑀺𑀲𑀺𑀝𑁆𑀞𑀁 𑀓𑀢𑁆𑀯𑀸 𑀉𑀕𑁆𑀕𑀢𑁄𑀢𑀺 𑀅𑀢𑁆𑀣𑁄, 𑀅𑀬𑀁 𑀓𑀺𑀢𑁆𑀢𑀺𑀲𑀤𑁆𑀤𑁄 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀲𑀓𑀮𑀮𑁄𑀓𑀕𑁆𑀕𑀪𑀸𑀯𑀁 𑀧𑀓𑀸𑀲𑁂𑀢𑁆𑀯𑀸 𑀉𑀕𑁆𑀕𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀓𑀺𑀢𑁆𑀢𑀺𑀲𑀤𑁆𑀤𑀲𑀫𑁆𑀩𑀦𑁆𑀥𑁂 𑀧𑀦 𑀢𑀲𑁆𑀲 𑀔𑁄 𑀧𑀦 𑀪𑁄𑀢𑁄 𑀕𑁄𑀢𑀫𑀲𑁆𑀲𑀸𑀢𑀺 𑀅𑀢𑁆𑀣𑁄.

𑀯𑀺𑀘𑁆𑀙𑀸𑀬𑀁 𑁋

𑀭𑀼𑀓𑁆𑀔𑀁 𑀭𑀼𑀓𑁆𑀔𑀁 𑀅𑀪𑀺 𑀯𑀺𑀚𑁆𑀚𑁄𑀢𑀢𑁂 𑀘𑀦𑁆𑀤𑁄, 𑀩𑁆𑀬𑀸𑀧𑁂𑀢𑁆𑀯𑀸 𑀯𑀺𑀚𑁆𑀚𑁄𑀢𑀢𑁂𑀢𑁆𑀬𑀢𑁆𑀣𑁄.

𑀏𑀢𑁆𑀣 𑀘 𑀮𑀓𑁆𑀔𑀡𑀸𑀤𑀺𑀅𑀢𑁆𑀣𑀸 𑀅𑀪𑀺𑀲𑀤𑁆𑀤𑁂𑀦 𑀚𑁄𑀢𑀦𑀻𑀬𑀸 𑀧𑀺𑀡𑁆𑀟𑀢𑁆𑀣𑀸 𑀏𑀯, 𑀦 𑀯𑀘𑀦𑀻𑀬𑀢𑁆𑀣𑀸, 𑀩𑁆𑀬𑀸𑀧𑀦𑀸𑀤𑀺𑀅𑀢𑁆𑀣𑀸 𑀏𑀯 𑀯𑀘𑀦𑀻𑀬𑀢𑁆𑀣𑀸𑀢𑀺.

𑁨𑁯𑁯. 𑀧𑀢𑀺𑀧𑀭𑀻𑀳𑀺 𑀪𑀸𑀕𑁂 𑀘 [𑀓. 𑁨𑁯𑁯; 𑀭𑀽. 𑁨𑁮𑁮; 𑀦𑀻. 𑁫𑁮𑁨, 𑁫𑁮𑁬; 𑀘𑀁. 𑁨.𑁧.𑁫𑁫; 𑀧𑀸. 𑁧.𑁪.𑁯𑁦].

𑀮𑀓𑁆𑀔𑀡𑀺’𑀢𑁆𑀣𑀫𑁆𑀪𑀽𑀢, 𑀯𑀺𑀘𑁆𑀙𑀸𑀲𑀼 𑀘 𑀪𑀸𑀕𑁂 𑀘 𑀧𑀯𑀢𑁆𑀢𑁂𑀳𑀺 𑀧𑀢𑀺, 𑀧𑀭𑀻𑀳𑀺 𑀬𑀼𑀢𑁆𑀢𑀸 𑀮𑀺𑀗𑁆𑀕𑀫𑁆𑀳𑀸 𑀤𑀼𑀢𑀺𑀬𑀸 𑀳𑁄𑀢𑀺.

𑀮𑀓𑁆𑀔𑀡𑁂 𑁋

𑀭𑀼𑀓𑁆𑀔𑀁 𑀧𑀢𑀺 𑀯𑀺𑀚𑁆𑀚𑁄𑀢𑀢𑁂 𑀯𑀺𑀚𑁆𑀚𑀼, 𑀭𑀼𑀓𑁆𑀔𑀁 𑀧𑀭𑀺 𑀯𑀺𑀚𑁆𑀚𑁄𑀢𑀢𑁂 𑀯𑀺𑀚𑁆𑀚𑀼. 𑀢𑀢𑁆𑀣 ‘𑀧𑀢𑀻’𑀢𑀺 𑀧𑀝𑀺𑀘𑁆𑀘, ‘𑀧𑀭𑀻’𑀢𑀺 𑀨𑀭𑀺𑀢𑁆𑀯𑀸.

𑀇𑀢𑁆𑀣𑀫𑁆𑀪𑀽𑀢𑁂 𑁋

𑀲𑀸𑀥𑀼 𑀤𑁂𑀯𑀤𑀢𑁆𑀢𑁄 𑀫𑀸𑀢𑀭𑀁 𑀧𑀢𑀺, 𑀲𑀸𑀥𑀼 𑀤𑁂𑀯𑀤𑀢𑁆𑀢𑁄 𑀫𑀸𑀢𑀭𑀁 𑀧𑀭𑀺.

𑀯𑀺𑀘𑁆𑀙𑀸𑀬𑀁 𑁋

𑀭𑀼𑀓𑁆𑀔𑀁 𑀭𑀼𑀓𑁆𑀔𑀁 𑀧𑀢𑀺 𑀯𑀺𑀚𑁆𑀚𑁄𑀢𑀢𑁂 𑀘𑀦𑁆𑀤𑁄, 𑀭𑀼𑀓𑁆𑀔𑀁 𑀭𑀼𑀓𑁆𑀔𑀁 𑀧𑀭𑀺 𑀯𑀺𑀚𑁆𑀚𑁄𑀢𑀢𑁂 𑀘𑀦𑁆𑀤𑁄.

𑀪𑀸𑀕𑁂 𑁋

𑀢𑀁 𑀤𑀻𑀬𑀢𑀼, 𑀬𑀤𑁂𑀢𑁆𑀣 𑀫𑀁 𑀧𑀢𑀺 𑀲𑀺𑀬𑀸, 𑀢𑀁 𑀤𑀻𑀬𑀢𑀼, 𑀬𑀤𑁂𑀢𑁆𑀣 𑀫𑀁 𑀧𑀭𑀺 𑀲𑀺𑀬𑀸. 𑀢𑀢𑁆𑀣 ‘𑀧𑀢𑀻’𑀢𑀺 𑀧𑀝𑀺𑀘𑁆𑀘, ‘𑀧𑀭𑀻’𑀢𑀺 𑀧𑀭𑀺𑀘𑁆𑀘, 𑀉𑀤𑁆𑀤𑀺𑀲𑁆𑀲𑀸𑀢𑀺 𑀅𑀢𑁆𑀣𑁄, ‘𑀞𑀧𑀺𑀢’𑀦𑁆𑀢𑀺 𑀧𑀸𑀞𑀲𑁂𑀲𑁄. 𑀏𑀢𑁆𑀣 𑀫𑀁 𑀉𑀤𑁆𑀤𑀺𑀲𑁆𑀲 𑀬𑀁 𑀯𑀢𑁆𑀣𑀼 𑀞𑀧𑀺𑀢𑀁 𑀲𑀺𑀬𑀸, 𑀢𑀁 𑀫𑁂 𑀤𑀻𑀬𑀢𑀽𑀢𑁆𑀬𑀢𑁆𑀣𑁄, 𑀏𑀢𑁂𑀲𑀼 𑀩𑀳𑀽𑀲𑀼 𑀪𑀸𑀕𑁂𑀲𑀼 𑀬𑁄 𑀫𑀫 𑀪𑀸𑀕𑁄, 𑀲𑁄 𑀫𑀬𑁆𑀳𑀁 𑀤𑀻𑀬𑀢𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺.

𑁩𑁦𑁦. 𑀅𑀦𑀼𑀦𑀸 [𑀓. 𑁨𑁯𑁯; 𑀭𑀽. 𑁨𑁮𑁮; 𑀦𑀻. 𑁫𑁮𑁨, 𑁫𑁮𑁬; 𑀘𑀁. 𑁨.𑁧.𑁫𑁬; 𑀧𑀸. 𑁧.𑁪.𑁮𑁪, 𑁯𑁦].

𑀮𑀓𑁆𑀔𑀡𑀺’𑀢𑁆𑀣𑀫𑁆𑀪𑀽𑀢, 𑀯𑀺𑀘𑁆𑀙𑀸𑀲𑀼 𑀘 𑀪𑀸𑀕𑁂 𑀘 𑀧𑀯𑀢𑁆𑀢𑁂𑀦 𑀅𑀦𑀼𑀦𑀸 𑀬𑀼𑀢𑁆𑀢𑀸 𑀮𑀺𑀗𑁆𑀕𑀫𑁆𑀳𑀸 𑀤𑀼𑀢𑀺𑀬𑀸 𑀳𑁄𑀢𑀺.

𑀮𑀓𑁆𑀔𑀡𑁂 𑁋

𑀭𑀼𑀓𑁆𑀔𑀁 𑀅𑀦𑀼 𑀯𑀺𑀚𑁆𑀚𑁄𑀢𑀢𑁂 𑀯𑀺𑀚𑁆𑀚𑀼, 𑀭𑀼𑀓𑁆𑀔𑀁 𑀅𑀦𑀼 𑀨𑀭𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀘𑀢𑀼𑀭𑀸𑀲𑀻𑀢𑀺𑀲𑀳𑀲𑁆𑀲𑀸𑀦𑀺, 𑀲𑀫𑁆𑀩𑀼𑀤𑁆𑀥𑀫𑀦𑀼𑀧𑀩𑁆𑀩𑀚𑀼𑀁 [𑀩𑀼. 𑀯𑀁. 𑁨𑁧.𑁫], ‘𑀲𑀫𑁆𑀩𑀼𑀤𑁆𑀥’𑀦𑁆𑀢𑀺 𑀩𑁄𑀥𑀺𑀲𑀢𑁆𑀢𑀁, 𑀅𑀦𑀼 𑀕𑀦𑁆𑀢𑁆𑀯𑀸 𑀧𑀩𑁆𑀩𑀚𑀺𑀁𑀲𑀽𑀢𑀺 𑀅𑀢𑁆𑀣𑁄, 𑀯𑀺𑀧𑀲𑁆𑀲𑀺𑀩𑁄𑀥𑀺𑀲𑀢𑁆𑀢𑁂 𑀧𑀩𑁆𑀩𑀚𑀺𑀢𑁂 𑀲𑀢𑀺 𑀢𑀸𑀦𑀺𑀧𑀺 𑀘𑀢𑀼𑀭𑀸𑀲𑀻𑀢𑀺𑀓𑀼𑀮𑀧𑀼𑀢𑁆𑀢𑀲𑀳𑀲𑁆𑀲𑀸𑀦𑀺 𑀧𑀩𑁆𑀩𑀚𑀺𑀁𑀲𑀽𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀘𑁆𑀘𑀓𑁆𑀭𑀺𑀬𑀫𑀦𑀼 𑀯𑀼𑀝𑁆𑀞𑀺 𑀧𑀸𑀯𑀲𑁆𑀲𑀺, ‘𑀅𑀦𑀽’𑀢𑀺 𑀅𑀦𑁆𑀯𑀸𑀬, 𑀧𑀝𑀺𑀘𑁆𑀘𑀸𑀢𑀺 𑀅𑀢𑁆𑀣𑁄, 𑀲𑀘𑁆𑀘𑀓𑁆𑀭𑀺𑀬𑀸𑀬 𑀲𑀢𑀺 𑀲𑀘𑁆𑀘𑀓𑁆𑀭𑀺𑀬𑀳𑁂𑀢𑀼 𑀤𑁂𑀯𑁄 𑀧𑀸𑀯𑀲𑁆𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. ‘‘𑀳𑁂𑀢𑀼 𑀘 𑀮𑀓𑁆𑀔𑀡𑀁 𑀪𑀯𑀢𑀻’’𑀢𑀺 𑀯𑀼𑀢𑁆𑀢𑀺𑀬𑀁 𑀯𑀼𑀢𑁆𑀢𑀁. 𑀲𑀘𑁆𑀘𑀓𑁆𑀭𑀺𑀬𑀸𑀬 𑀲𑀳𑁂𑀯𑀸𑀢𑀺𑀧𑀺 𑀬𑀼𑀚𑁆𑀚𑀢𑀺. ‘‘𑀲𑀳 𑀲𑀘𑁆𑀘𑁂 𑀓𑀢𑁂 𑀫𑀬𑁆𑀳’’𑀦𑁆𑀢𑀺 [𑀘𑀭𑀺𑀬𑀸. 𑁩.𑁮𑁨] 𑀳𑀺 𑀯𑀼𑀢𑁆𑀢𑀁.

𑀇𑀢𑁆𑀣𑀫𑁆𑀪𑀽𑀢𑁂 𑁋

𑀲𑀸𑀥𑀼 𑀤𑁂𑀯𑀤𑀢𑁆𑀢𑁄 𑀫𑀸𑀢𑀭𑀫𑀦𑀼. 𑀢𑀢𑁆𑀣 ‘𑀅𑀦𑀽’𑀢𑀺 𑀅𑀦𑁆𑀯𑀸𑀬 𑀧𑀝𑀺𑀘𑁆𑀘.

𑀯𑀺𑀘𑁆𑀙𑀸𑀬𑀁 𑁋

𑀭𑀼𑀓𑁆𑀔𑀁 𑀭𑀼𑀓𑁆𑀔𑀁 𑀅𑀦𑀼 𑀯𑀺𑀚𑁆𑀚𑁄𑀢𑀢𑁂 𑀘𑀦𑁆𑀤𑁄. 𑀢𑀢𑁆𑀣 ‘𑀅𑀦𑀽’𑀢𑀺 𑀅𑀦𑀼 𑀨𑀭𑀺𑀢𑁆𑀯𑀸.

𑀪𑀸𑀕𑁂 𑁋

𑀬𑀤𑁂𑀢𑁆𑀣 𑀫𑀁 𑀅𑀦𑀼 𑀲𑀺𑀬𑀸, 𑀢𑀁 𑀤𑀻𑀬𑀢𑀼. 𑀢𑀢𑁆𑀣 ‘𑀅𑀦𑀽’𑀢𑀺 𑀅𑀦𑁆𑀯𑀸𑀬. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑁩𑁦𑁧. 𑀲𑀳𑀢𑁆𑀣𑁂 [𑀓. 𑁨𑁯𑁯; 𑀭𑀽. 𑁨𑁮𑁮; 𑀦𑀻. 𑁫𑁮𑁨, 𑁫𑁮𑁬; 𑀘𑀁. 𑁨.𑁧.𑁫𑁭; 𑀧𑀸. 𑁧.𑁪.𑁮𑁫].

𑀲𑀳𑀢𑁆𑀣𑁂 𑀅𑀦𑀼𑀦𑀸 𑀬𑀼𑀢𑁆𑀢𑀸 𑀮𑀺𑀗𑁆𑀕𑀫𑁆𑀳𑀸 𑀤𑀼𑀢𑀺𑀬𑀸 𑀳𑁄𑀢𑀺.

𑀧𑀩𑁆𑀩𑀢𑀁 𑀅𑀦𑀼 𑀢𑀺𑀝𑁆𑀞𑀢𑀺 [𑀧𑀩𑁆𑀩𑀢𑀫𑀦𑀼𑀲𑁂𑀦𑀸 𑀢𑀺𑀝𑁆𑀞𑀢𑀺 (𑀫𑁄𑀕𑁆𑀕𑀮𑁆𑀮𑀸𑀦𑀯𑀼𑀢𑁆𑀢𑀺𑀬𑀁)]. 𑀦𑀤𑀺𑀁 𑀅𑀦𑁆𑀯𑀸𑀯𑀲𑀺𑀢𑀸 𑀩𑀸𑀭𑀸𑀡𑀲𑀻. ‘𑀅𑀦𑀽’𑀢𑀺 𑀅𑀦𑀼𑀕𑀦𑁆𑀢𑁆𑀯𑀸, 𑀦𑀤𑀺𑀬𑀸 𑀲𑀳 𑀆𑀩𑀤𑁆𑀥𑀸 𑀢𑀺𑀝𑁆𑀞𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁩𑁦𑁨. 𑀳𑀻𑀦𑁂 [𑀓. 𑁨𑁯𑁯; 𑀭𑀽. 𑁨𑁮𑁮; 𑀦𑀻. 𑁫𑁮𑁨, 𑁫𑁮𑁬; 𑀘𑀁. 𑁨.𑁧.𑁫𑁮; 𑀧𑀸. 𑁧.𑁪.𑁮𑁬].

𑀳𑀻𑀦𑁂 𑀧𑀯𑀢𑁆𑀢𑁂𑀦 𑀅𑀦𑀼𑀦𑀸 𑀬𑀼𑀢𑁆𑀢𑀸 𑀮𑀺𑀗𑁆𑀕𑀫𑁆𑀳𑀸 𑀤𑀼𑀢𑀺𑀬𑀸 𑀳𑁄𑀢𑀺.

𑀅𑀦𑀼 𑀲𑀸𑀭𑀺𑀧𑀼𑀢𑁆𑀢𑀁 𑀧𑀜𑁆𑀜𑀯𑀦𑁆𑀢𑁄, 𑀅𑀦𑀼𑀕𑀢𑀸 𑀧𑀘𑁆𑀙𑀢𑁄 𑀕𑀢𑀸𑀢𑀺 𑀅𑀢𑁆𑀣𑁄, 𑀲𑀩𑁆𑀩𑁂 𑀧𑀜𑁆𑀜𑀯𑀦𑁆𑀢𑁄 𑀲𑀸𑀭𑀺𑀧𑀼𑀢𑁆𑀢𑀢𑁄 𑀳𑀻𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁩𑁦𑁩. 𑀉𑀧𑁂𑀦 [𑀓. 𑁨𑁯𑁯; 𑀭𑀽. 𑁨𑁮𑁮; 𑀦𑀻. 𑁫𑁮𑁨, 𑁫𑁮𑁬; 𑀘𑀁. 𑁨.𑁧.𑁫𑁯; 𑀧𑀸. 𑁧.𑁪.𑁮𑁭].

𑀳𑀻𑀦𑁂 𑀉𑀧𑁂𑀦 𑀬𑀼𑀢𑁆𑀢𑀸 𑀮𑀺𑀗𑁆𑀕𑀫𑁆𑀳𑀸 𑀤𑀼𑀢𑀺𑀬𑀸 𑀳𑁄𑀢𑀺.

𑀉𑀧 𑀲𑀸𑀭𑀺𑀧𑀼𑀢𑁆𑀢𑀁 𑀧𑀜𑁆𑀜𑀯𑀦𑁆𑀢𑁄, 𑀉𑀧𑁂𑀘𑁆𑀘 𑀕𑀢𑀸 𑀲𑀫𑀻𑀧𑁂 𑀕𑀢𑀸𑀢𑀺 𑀅𑀢𑁆𑀣𑁄, 𑀳𑀻𑀦𑀸𑀢𑁆𑀯𑁂𑀯 𑀯𑀼𑀢𑁆𑀢𑀁 𑀳𑁄𑀢𑀺.

𑀏𑀢𑁆𑀣 𑀘 𑀅𑀪𑀺𑀇𑀘𑁆𑀘𑀸𑀤𑀬𑁄 𑀓𑀫𑁆𑀫𑀧𑁆𑀧𑀯𑀘𑀦𑀻𑀬𑀸𑀢𑀺 𑀲𑀤𑁆𑀤𑀲𑀢𑁆𑀣𑁂𑀲𑀼 𑀯𑀼𑀢𑁆𑀢𑀸. 𑀢𑀢𑁆𑀣 𑀧𑀓𑀸𑀭𑁂𑀦 𑀯𑀼𑀘𑁆𑀘𑀢𑀻𑀢𑀺 𑀧𑀯𑀘𑀦𑀻𑀬𑀁, 𑀧𑀓𑀸𑀭𑁄 𑀘 𑀮𑀓𑁆𑀔𑀡𑀺’𑀢𑁆𑀣𑀫𑁆𑀪𑀽𑀢, 𑀯𑀺𑀘𑁆𑀙𑀸𑀤𑀺𑀓𑁄 𑀧𑀺𑀡𑁆𑀟𑀢𑁆𑀣𑁄 𑀯𑀼𑀘𑁆𑀘𑀢𑀺, 𑀓𑀫𑁆𑀫𑀦𑁆𑀢𑀺 𑀩𑁆𑀬𑀸𑀧𑀦𑀸𑀤𑀺𑀓𑁆𑀭𑀺𑀬𑀸, 𑀓𑀫𑁆𑀫𑀁 𑀧𑀯𑀘𑀦𑀻𑀬𑀁 𑀬𑁂𑀳𑀺 𑀢𑁂 𑀓𑀫𑁆𑀫𑀧𑁆𑀧𑀯𑀘𑀦𑀻𑀬𑀸.

𑀢𑀢𑁆𑀣 𑀩𑁆𑀬𑀸𑀧𑀦𑀸𑀤𑀺𑀓𑁆𑀭𑀺𑀬𑀸𑀯𑀺𑀲𑁂𑀲𑀯𑀸𑀘𑀻𑀳𑀺 𑀉𑀧𑀲𑀕𑁆𑀕𑁂𑀳𑀺 𑀲𑀫𑁆𑀩𑀦𑁆𑀥𑁂𑀲𑀢𑀺 𑀓𑀫𑁆𑀫𑀢𑁆𑀣𑁂 𑀤𑀼𑀢𑀺𑀬𑀸 𑀳𑁄𑀢𑀺, 𑀅𑀲𑀫𑁆𑀩𑀦𑁆𑀥𑁂 𑀧𑀦 𑀆𑀥𑀸𑀭, 𑀲𑀸𑀫𑁆𑀬𑀸𑀤𑀺𑀅𑀢𑁆𑀣𑁂𑀲𑀼 𑀳𑁄𑀢𑀺, 𑀮𑀓𑁆𑀔𑀡𑀸𑀤𑀬𑁄 𑀧𑀦 𑀲𑀸𑀫𑀢𑁆𑀣𑀺𑀬𑀲𑀺𑀤𑁆𑀥𑀸 𑀧𑀺𑀡𑁆𑀟𑀢𑁆𑀣𑀸 𑀏𑀯𑀸𑀢𑀺.

𑁩𑁦𑁪. 𑀓𑀸𑀮𑀤𑁆𑀥𑀸𑀦𑀫𑀘𑁆𑀘𑀦𑁆𑀢𑀲𑀁𑀬𑁄𑀕𑁂 [𑀓. 𑁨𑁯𑁮; 𑀭𑀽. 𑁨𑁮𑁭; 𑀦𑀻. 𑁫𑁮𑁧; 𑀧𑀸. 𑁨.𑁩.𑁫]

𑀓𑀸𑀮𑀲𑁆𑀲 𑀯𑀸 𑀅𑀤𑁆𑀥𑀼𑀦𑁄 𑀯𑀸 𑀤𑀩𑁆𑀩, 𑀕𑀼𑀡, 𑀓𑁆𑀭𑀺𑀬𑀸𑀳𑀺 𑀅𑀘𑁆𑀘𑀦𑁆𑀢𑀁 𑀦𑀺𑀭𑀦𑁆𑀢𑀭𑀁 𑀲𑀁𑀬𑁄𑀕𑁂 𑀓𑀸𑀮’𑀤𑁆𑀥𑀸𑀦𑀯𑀸𑀘𑀻𑀳𑀺 𑀮𑀺𑀗𑁆𑀕𑁂𑀳𑀺 𑀧𑀭𑀁 𑀤𑀼𑀢𑀺𑀬𑀸 𑀳𑁄𑀢𑀺.

𑀓𑀸𑀮𑁂 𑁋

𑀲𑀢𑁆𑀢𑀸𑀳𑀁 𑀕𑀯𑀧𑀸𑀦𑀁, 𑀫𑀸𑀲𑀁 𑀫𑀁𑀲𑁄𑀤𑀦𑀁, 𑀲𑀭𑀤𑀁 𑀭𑀫𑀡𑀻𑀬𑀸 𑀦𑀤𑀻, 𑀲𑀩𑁆𑀩𑀓𑀸𑀮𑀁 𑀭𑀫𑀡𑀻𑀬𑀁 𑀦𑀦𑁆𑀤𑀦𑀁, 𑀫𑀸𑀲𑀁 𑀲𑀚𑁆𑀛𑀸𑀬𑀢𑀺, 𑀯𑀲𑁆𑀲𑀲𑀢𑀁 𑀚𑀻𑀯𑀢𑀺, 𑀢𑀬𑁄 𑀫𑀸𑀲𑁂 𑀅𑀪𑀺𑀥𑀫𑁆𑀫𑀁 𑀤𑁂𑀲𑁂𑀢𑀺.

𑀅𑀤𑁆𑀥𑀸𑀦𑁂 𑁋

𑀬𑁄𑀚𑀦𑀁 𑀯𑀦𑀭𑀸𑀚𑀺, 𑀬𑁄𑀚𑀦𑀁 𑀤𑀻𑀖𑁄 𑀧𑀩𑁆𑀩𑀢𑁄, 𑀓𑁄𑀲𑀁 𑀲𑀚𑁆𑀛𑀸𑀬𑀢𑀺.

𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂𑀢𑀺 𑀓𑀺𑀁? 𑀫𑀸𑀲𑁂 𑀫𑀸𑀲𑁂 𑀪𑀼𑀜𑁆𑀚𑀢𑀺, 𑀬𑁄𑀚𑀦𑁂 𑀬𑁄𑀚𑀦𑁂 𑀯𑀺𑀳𑀸𑀭𑁄.

𑀏𑀢𑁆𑀣 𑀘 𑀓𑁆𑀭𑀺𑀬𑀸𑀯𑀺𑀲𑁂𑀲𑀦𑀫𑁆𑀧𑀺 𑀓𑀢𑁆𑀢𑀸𑀭𑀸 𑀲𑀸𑀥𑁂𑀢𑀩𑁆𑀩𑀢𑁆𑀢𑀸 𑀓𑀫𑁆𑀫𑀕𑀢𑀺𑀓𑀁 𑀳𑁄𑀢𑀺, 𑀢𑀲𑁆𑀫𑀸 𑀢𑀫𑁆𑀧𑀺 ‘𑀓𑀫𑁆𑀫𑁂 𑀤𑀼𑀢𑀺𑀬𑀸’𑀢𑀺 𑀏𑀢𑁆𑀣 𑀓𑀫𑁆𑀫𑀲𑀤𑁆𑀤𑁂𑀦 𑀕𑀬𑁆𑀳𑀢𑀺.

𑀲𑀼𑀔𑀁 𑀲𑁂𑀢𑀺, 𑀤𑀼𑀓𑁆𑀔𑀁 𑀲𑁂𑀢𑀺, 𑀲𑀻𑀖𑀁 𑀕𑀘𑁆𑀙𑀢𑀺, 𑀔𑀺𑀧𑁆𑀧𑀁 𑀕𑀘𑁆𑀙𑀢𑀺, 𑀤𑀦𑁆𑀥𑀁 𑀕𑀘𑁆𑀙𑀢𑀺, 𑀫𑀼𑀤𑀼𑀁 𑀧𑀘𑀢𑀺, 𑀕𑀭𑀼𑀁 𑀏𑀲𑁆𑀲𑀢𑀺, 𑀮𑀳𑀼𑀁 𑀏𑀲𑁆𑀲𑀢𑀺, 𑀲𑀦𑁆𑀦𑀺𑀥𑀺𑀓𑀸𑀭𑀓𑀁 𑀪𑀼𑀜𑁆𑀚𑀢𑀺, 𑀲𑀫𑁆𑀧𑀭𑀺𑀯𑀢𑁆𑀢𑀓𑀁 𑀑𑀢𑀸𑀧𑁂𑀢𑀺, 𑀓𑀸𑀬𑀧𑁆𑀧𑀘𑀸𑀮𑀓𑀁 𑀕𑀘𑁆𑀙𑀢𑀺 [𑀧𑀸𑀘𑀺. 𑁫𑁯𑁦], 𑀳𑀢𑁆𑀣𑀧𑁆𑀧𑀘𑀸𑀮𑀓𑀁 𑀕𑀘𑁆𑀙𑀢𑀺, 𑀲𑀻𑀲𑀧𑁆𑀧𑀘𑀸𑀮𑀓𑀁 𑀕𑀘𑁆𑀙𑀢𑀺 [𑀧𑀸𑀘𑀺. 𑁫𑁯𑁪-𑁫𑁯𑁫], 𑀲𑀼𑀭𑀼𑀲𑀼𑀭𑀼𑀓𑀸𑀭𑀓𑀁 𑀪𑀼𑀜𑁆𑀚𑀢𑀺 [𑀧𑀸𑀘𑀺. 𑁬𑁨𑁭], 𑀅𑀯𑀕𑀡𑁆𑀟𑀓𑀸𑀭𑀓𑀁 𑀪𑀼𑀜𑁆𑀚𑀢𑀺 [𑀧𑀸𑀘𑀺. 𑁬𑁨𑁨], 𑀧𑀺𑀡𑁆𑀟𑀼𑀓𑁆𑀔𑁂𑀧𑀓𑀁 𑀪𑀼𑀜𑁆𑀚𑀢𑀺 [𑀧𑀸𑀘𑀺. 𑁬𑁨𑁦], 𑀳𑀢𑁆𑀣𑀦𑀺𑀤𑁆𑀥𑀼𑀦𑀓𑀁 𑀪𑀼𑀜𑁆𑀚𑀢𑀺 [𑀧𑀸𑀘𑀺. 𑁬𑁨𑁩], 𑀳𑀢𑁆𑀣𑀦𑀺𑀮𑁆𑀮𑁂𑀳𑀓𑀁 𑀪𑀼𑀜𑁆𑀚𑀢𑀺 [𑀧𑀸𑀘𑀺. 𑁬𑁨𑁮], 𑀘𑀦𑁆𑀤𑀺𑀫𑀲𑀽𑀭𑀺𑀬𑀸 𑀲𑀫𑀁 𑀧𑀭𑀺𑀬𑀸𑀬𑀦𑁆𑀢𑀺, 𑀯𑀺𑀲𑀫𑀁 𑀧𑀭𑀺𑀬𑀸𑀬𑀦𑁆𑀢𑀺 𑀇𑀘𑁆𑀘𑀸𑀤𑀺.

𑀤𑀼𑀢𑀺𑀬𑀸𑀯𑀺𑀪𑀢𑁆𑀢𑀺𑀭𑀸𑀲𑀺 𑀦𑀺𑀝𑁆𑀞𑀺𑀢𑁄.

𑀢𑀢𑀺𑀬𑀸𑀯𑀺𑀪𑀢𑁆𑀢𑀺𑀭𑀸𑀲𑀺

𑀓𑀲𑁆𑀫𑀺𑀁 𑀅𑀢𑁆𑀣𑁂 𑀢𑀢𑀺𑀬𑀸?

𑁩𑁦𑁫. 𑀓𑀢𑁆𑀢𑀼𑀓𑀭𑀡𑁂𑀲𑀼 𑀢𑀢𑀺𑀬𑀸 [𑀓. 𑁨𑁮𑁬, 𑁨𑁮𑁮; 𑀭𑀽. 𑁨𑁯𑁧, 𑁨𑁯𑁩; 𑀦𑀻. 𑁫𑁯𑁧, 𑁫𑁯𑁪; 𑀘𑀁. 𑁨.𑁧.𑁬𑁨-𑁩; 𑀧𑀸. 𑁨.𑁩.𑁧𑁮].

𑀓𑀢𑁆𑀢𑀭𑀺 𑀓𑀭𑀡𑁂 𑀘 𑀢𑀢𑀺𑀬𑀸 𑀳𑁄𑀢𑀺. 𑀓𑀢𑁆𑀢𑀸𑀢𑀺 𑀘 𑀓𑀸𑀭𑀓𑁄𑀢𑀺 𑀘 𑀅𑀢𑁆𑀣𑀢𑁄 𑀏𑀓𑀁 ‘‘𑀓𑀭𑁄𑀢𑀻𑀢𑀺 𑀓𑀢𑁆𑀢𑀸, 𑀓𑀭𑁄𑀢𑀻𑀢𑀺 𑀓𑀸𑀭𑀓𑁄’’𑀢𑀺, 𑀢𑀲𑁆𑀫𑀸 ‘‘𑀓𑀢𑁆𑀢𑀼𑀓𑀸𑀭𑀓𑁄’’𑀢𑀺 𑀯𑀼𑀢𑁆𑀢𑁂 𑀤𑁆𑀯𑀺𑀦𑁆𑀦𑀁 𑀧𑀭𑀺𑀬𑀸𑀬𑀲𑀤𑁆𑀤𑀸𑀦𑀁 𑀯𑀲𑁂𑀦 𑀅𑀬𑀫𑁂𑀯 𑀓𑁆𑀭𑀺𑀬𑀁 𑀏𑀓𑀦𑁆𑀢𑀁 𑀓𑀭𑁄𑀢𑀺, 𑀲𑀸𑀫𑀻 𑀳𑀼𑀢𑁆𑀯𑀸 𑀓𑀭𑁄𑀢𑀺, 𑀅𑀢𑁆𑀢𑀧𑁆𑀧𑀥𑀸𑀦𑁄 𑀳𑀼𑀢𑁆𑀯𑀸 𑀓𑀭𑁄𑀢𑀻𑀢𑀺 𑀯𑀺𑀜𑁆𑀜𑀸𑀬𑀢𑀺, 𑀢𑀢𑁄 𑀓𑁆𑀭𑀺𑀬𑀸 𑀦𑀸𑀫 𑀓𑀢𑁆𑀢𑀼𑀦𑁄 𑀏𑀯 𑀩𑁆𑀬𑀸𑀧𑀸𑀭𑁄, 𑀦 𑀅𑀜𑁆𑀜𑁂𑀲𑀦𑁆𑀢𑀺 𑀘, 𑀅𑀜𑁆𑀜𑁂 𑀧𑀦 𑀓𑁆𑀭𑀺𑀬𑀸𑀲𑀸𑀥𑀦𑁂 𑀓𑀢𑁆𑀢𑀼𑀦𑁄 𑀉𑀧𑀓𑀸𑀭𑀓𑀢𑁆𑀢𑀸 𑀓𑀸𑀭𑀓𑀸 𑀦𑀸𑀫𑀸𑀢𑀺 𑀘, 𑀢𑀣𑀸 𑀅𑀦𑀼𑀧𑀓𑀸𑀭𑀓𑀢𑁆𑀢𑀸 𑀅𑀓𑀸𑀭𑀓𑀸 𑀦𑀸𑀫𑀸𑀢𑀺 𑀘 𑀯𑀺𑀜𑁆𑀜𑀸𑀬𑀦𑁆𑀢𑀻𑀢𑀺.

𑀢𑀢𑁆𑀣 𑀓𑀢𑁆𑀢𑀸 𑀢𑀺𑀯𑀺𑀥𑁄 𑀲𑀬𑀁𑀓𑀢𑁆𑀢𑀸, 𑀧𑀬𑁄𑀚𑀓𑀓𑀢𑁆𑀢𑀸, 𑀓𑀫𑁆𑀫𑀓𑀢𑁆𑀢𑀸𑀢𑀺.

𑀢𑀢𑁆𑀣 𑀥𑀸𑀢𑁆𑀯𑀢𑁆𑀣𑀁 𑀲𑀬𑀁 𑀓𑀭𑁄𑀦𑁆𑀢𑁄 𑀲𑀬𑀁𑀓𑀢𑁆𑀢𑀸 𑀦𑀸𑀫, 𑀧𑀼𑀭𑀺𑀲𑁄 𑀓𑀫𑁆𑀫𑀁 𑀓𑀭𑁄𑀢𑀺.

𑀧𑀭𑀁 𑀦𑀺𑀬𑁄𑀚𑁂𑀦𑁆𑀢𑁄 𑀧𑀬𑁄𑀚𑀓𑀓𑀢𑁆𑀢𑀸 𑀦𑀸𑀫, 𑀧𑀼𑀭𑀺𑀲𑁄 𑀤𑀸𑀲𑀁 𑀓𑀫𑁆𑀫𑀁 𑀓𑀸𑀭𑁂𑀢𑀺.

𑀓𑀫𑁆𑀫𑀓𑀢𑁆𑀢𑀸 𑀦𑀸𑀫 𑀧𑀬𑁄𑀚𑁆𑀚𑀓𑀓𑀢𑁆𑀢𑀸𑀧𑀺 𑀯𑀼𑀘𑁆𑀘𑀢𑀺, 𑀧𑀼𑀭𑀺𑀲𑁄 𑀤𑀸𑀲𑁂𑀦 𑀓𑀫𑁆𑀫𑀁 𑀓𑀸𑀭𑁂𑀢𑀺 𑀤𑀸𑀲𑀲𑁆𑀲 𑀯𑀸, 𑀬𑁄 𑀘 𑀅𑀜𑁆𑀜𑁂𑀦 𑀓𑀢𑀁 𑀧𑀬𑁄𑀕𑀁 𑀧𑀝𑀺𑀘𑁆𑀘 𑀓𑀫𑁆𑀫𑀪𑀽𑀢𑁄𑀧𑀺 𑀲𑀼𑀓𑀭𑀢𑁆𑀢𑀸 𑀯𑀸 𑀓𑀫𑁆𑀫𑀪𑀸𑀯𑁂𑀦 𑀅𑀯𑀢𑁆𑀢𑀼𑀓𑀸𑀫𑀢𑀸𑀬 𑀯𑀸 𑀅𑀚𑀸𑀦𑀦𑀢𑀸𑀬 𑀯𑀸 𑀯𑀜𑁆𑀘𑁂𑀢𑀼𑀓𑀸𑀫𑀢𑀸𑀬 𑀯𑀸 𑀓𑀢𑁆𑀢𑀼𑀪𑀸𑀯𑁂𑀦 𑀯𑁄𑀳𑀭𑀻𑀬𑀢𑀺, 𑀲𑁄 𑀓𑀫𑁆𑀫𑀓𑀢𑁆𑀢𑀸 𑀦𑀸𑀫, 𑀓𑀼𑀲𑀽𑀮𑁄 𑀲𑀬𑀫𑁂𑀯 𑀪𑀺𑀚𑁆𑀚𑀢𑀺, 𑀖𑀝𑁄 𑀲𑀬𑀫𑁂𑀯 𑀪𑀺𑀚𑁆𑀚𑀢𑀺. 𑀅𑀧𑀺𑀘 𑀲𑀼𑀓𑀭𑁄 𑀯𑀸 𑀳𑁄𑀢𑀼 𑀤𑀼𑀓𑁆𑀓𑀭𑁄 𑀯𑀸, 𑀬𑁄 𑀓𑀫𑁆𑀫𑀭𑀽𑀧𑀓𑁆𑀭𑀺𑀬𑀸𑀧𑀤𑁂 𑀧𑀞𑀫𑀦𑁆𑀢𑁄 𑀓𑀢𑁆𑀢𑀸, 𑀲𑁄 𑀓𑀫𑁆𑀫𑀓𑀢𑁆𑀢𑀸𑀢𑀺 𑀯𑀼𑀘𑁆𑀘𑀢𑀺. 𑀲𑀤𑁆𑀤𑀭𑀽𑀧𑁂𑀦 𑀓𑀫𑁆𑀫𑀜𑁆𑀘 𑀢𑀁 𑀅𑀢𑁆𑀣𑀭𑀽𑀧𑁂𑀦 𑀓𑀢𑁆𑀢𑀸 𑀘𑀸𑀢𑀺 𑀓𑀫𑁆𑀫𑀓𑀢𑁆𑀢𑀸, 𑀓𑀼𑀲𑀽𑀮𑁄 𑀪𑀺𑀚𑁆𑀚𑀢𑀺, 𑀖𑀝𑁄 𑀪𑀺𑀚𑁆𑀚𑀢𑀺, 𑀧𑀘𑁆𑀘𑀢𑀺 𑀫𑀼𑀦𑀺𑀦𑁄 𑀪𑀢𑁆𑀢𑀁, 𑀣𑁄𑀓𑀁 𑀣𑁄𑀓𑀁 𑀖𑀭𑁂 𑀖𑀭𑁂 𑀇𑀘𑁆𑀘𑀸𑀤𑀺.

𑀏𑀢𑁆𑀣 𑀘 𑀲𑀤𑁆𑀤𑀢𑁆𑀣𑁄 𑀤𑀼𑀯𑀺𑀥𑁄 𑀧𑀭𑀫𑀢𑁆𑀣𑁄, 𑀧𑀜𑁆𑀜𑀢𑁆𑀢𑀢𑁆𑀣𑁄𑀢𑀺. 𑀢𑀢𑁆𑀣 𑀧𑀭𑀫𑀢𑁆𑀣𑁄 𑀏𑀓𑀦𑁆𑀢𑁂𑀦 𑀯𑀺𑀚𑁆𑀚𑀫𑀸𑀦𑁄𑀬𑁂𑀯. 𑀧𑀜𑁆𑀜𑀢𑁆𑀢𑀢𑁆𑀣𑁄 𑀧𑀦 𑀓𑁄𑀘𑀺 𑀯𑀺𑀚𑁆𑀚𑀫𑀸𑀦𑁄𑀢𑀺 𑀲𑀫𑁆𑀫𑀢𑁄. 𑀬𑀣𑀸? 𑀭𑀸𑀚𑀧𑀼𑀢𑁆𑀢𑁄, 𑀕𑁄𑀯𑀺𑀲𑀸𑀡𑀁, 𑀘𑀫𑁆𑀧𑀓𑀧𑀼𑀧𑁆𑀨𑀦𑁆𑀢𑀺. 𑀓𑁄𑀘𑀺 𑀅𑀯𑀺𑀚𑁆𑀚𑀫𑀸𑀦𑁄𑀢𑀺 𑀲𑀫𑁆𑀫𑀢𑁄. 𑀬𑀣𑀸? 𑀯𑀜𑁆𑀛𑀸𑀧𑀼𑀢𑁆𑀢𑁄, 𑀲𑀲𑀯𑀺𑀲𑀸𑀡𑀁, 𑀉𑀤𑀼𑀫𑁆𑀩𑀭𑀧𑀼𑀧𑁆𑀨𑀦𑁆𑀢𑀺. 𑀲𑀤𑁆𑀤𑁄 𑀘 𑀦𑀸𑀫 𑀯𑀢𑁆𑀢𑀺𑀘𑁆𑀙𑀸𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀻 𑀳𑁄𑀢𑀺, 𑀯𑀢𑁆𑀢𑀫𑀸𑀦𑁄 𑀘 𑀲𑀤𑁆𑀤𑁄 𑀅𑀢𑁆𑀣𑀁 𑀦 𑀤𑀻𑀧𑁂𑀢𑀻𑀢𑀺 𑀦𑀢𑁆𑀣𑀺, 𑀲𑀗𑁆𑀓𑁂𑀢𑁂 𑀲𑀢𑀺 𑀲𑀼𑀡𑀦𑁆𑀢𑀲𑁆𑀲 𑀅𑀢𑁆𑀣𑀯𑀺𑀲𑀬𑀁 𑀩𑀼𑀤𑁆𑀥𑀺𑀁 𑀦 𑀚𑀦𑁂𑀢𑀻𑀢𑀺 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀢𑀺 𑀅𑀯𑀺𑀚𑁆𑀚𑀫𑀸𑀦𑀲𑀫𑁆𑀫𑀢𑁄𑀧𑀺 𑀅𑀢𑁆𑀣𑁄 𑀲𑀤𑁆𑀤𑀩𑀼𑀤𑁆𑀥𑀻𑀦𑀁 𑀯𑀺𑀲𑀬𑀪𑀸𑀯𑁂𑀦 𑀯𑀺𑀚𑁆𑀚𑀫𑀸𑀦𑁄 𑀏𑀯 𑀳𑁄𑀢𑀺. 𑀇𑀢𑀭𑀣𑀸 ‘𑀯𑀜𑁆𑀛𑀸𑀧𑀼𑀢𑁆𑀢𑁄’𑀢𑀺 𑀧𑀤𑀁 𑀲𑀼𑀡𑀦𑁆𑀢𑀲𑁆𑀲 𑀢𑀤𑀢𑁆𑀣𑀯𑀺𑀲𑀬𑀁 𑀘𑀺𑀢𑁆𑀢𑀁 𑀦𑀸𑀫 𑀦 𑀧𑀯𑀢𑁆𑀢𑁂𑀬𑁆𑀬𑀸𑀢𑀺, 𑀲𑀤𑁆𑀤𑀩𑀼𑀤𑁆𑀥𑀻𑀦𑀜𑁆𑀘 𑀯𑀺𑀲𑀬𑀪𑀸𑀯𑁂𑀦 𑀯𑀺𑀚𑁆𑀚𑀫𑀸𑀦𑁄 𑀦𑀸𑀫 𑀅𑀢𑁆𑀣𑁄 𑀲𑀤𑁆𑀤𑀦𑀸𑀦𑀸𑀢𑁆𑀢𑁂 𑀩𑀼𑀤𑁆𑀥𑀺𑀦𑀸𑀦𑀸𑀢𑁆𑀢𑁂 𑀘 𑀲𑀢𑀺 𑀦𑀸𑀦𑀸 𑀳𑁄𑀢𑀺, 𑀯𑀺𑀲𑀼𑀁 𑀯𑀺𑀲𑀼𑀁 𑀯𑀺𑀚𑁆𑀚𑀫𑀸𑀦𑁄 𑀦𑀸𑀫 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀁 𑀲𑀤𑁆𑀤𑀩𑀼𑀤𑁆𑀥𑀺𑀯𑀺𑀲𑀬𑀪𑀸𑀯𑁂𑀦 𑀯𑀺𑀚𑁆𑀚𑀫𑀸𑀦𑀜𑁆𑀘 𑀦𑀸𑀦𑀸𑀪𑀽𑀢𑀜𑁆𑀘 𑀅𑀢𑁆𑀣𑀁 𑀧𑀝𑀺𑀘𑁆𑀘 𑀓𑀸𑀭𑀓𑀦𑀸𑀦𑀸𑀢𑁆𑀢𑀁 𑀓𑁆𑀭𑀺𑀬𑀸𑀓𑀸𑀭𑀓𑀦𑀸𑀦𑀸𑀢𑁆𑀢𑀜𑁆𑀘 𑀳𑁄𑀢𑀺, 𑀦 𑀧𑀦 𑀲𑀪𑀸𑀯𑀢𑁄 𑀯𑀺𑀚𑁆𑀚𑀫𑀸𑀦𑀫𑁂𑀯 𑀦𑀸𑀦𑀸𑀪𑀽𑀢𑀫𑁂𑀯 𑀘 𑀅𑀢𑁆𑀣𑀦𑁆𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁. 𑀢𑀲𑁆𑀫𑀸 ‘‘𑀲𑀁𑀬𑁄𑀕𑁄 𑀚𑀸𑀬𑀢𑁂’’ 𑀇𑀘𑁆𑀘𑀸𑀤𑀻𑀲𑀼 𑀲𑀤𑁆𑀤𑀩𑀼𑀤𑁆𑀥𑀻𑀦𑀁 𑀦𑀸𑀦𑀸𑀢𑁆𑀢𑀲𑀺𑀤𑁆𑀥𑁂𑀦 𑀅𑀢𑁆𑀣𑀦𑀸𑀦𑀸𑀢𑁆𑀢𑁂𑀦 𑀤𑁆𑀯𑀺𑀦𑁆𑀦𑀁 𑀲𑀤𑁆𑀤𑀸𑀦𑀁 𑀤𑁆𑀯𑀺𑀦𑁆𑀦𑀁 𑀅𑀢𑁆𑀣𑀸𑀦𑀜𑁆𑀘 𑀓𑁆𑀭𑀺𑀬𑀸𑀓𑀸𑀭𑀓𑀢𑀸𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸𑀢𑀺.

𑀓𑀬𑀺𑀭𑀢𑁂 𑀅𑀦𑁂𑀦𑀸𑀢𑀺 𑀓𑀭𑀡𑀁, 𑀓𑁆𑀭𑀺𑀬𑀸𑀲𑀸𑀥𑀦𑁂 𑀓𑀢𑁆𑀢𑀼𑀦𑁄 𑀲𑀳𑀓𑀸𑀭𑀻𑀓𑀸𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀁 𑀤𑀼𑀯𑀺𑀥𑀁 𑀅𑀚𑁆𑀛𑀢𑁆𑀢𑀺𑀓𑀓𑀭𑀡𑀁, 𑀩𑀸𑀳𑀺𑀭𑀓𑀭𑀡𑀦𑁆𑀢𑀺.

𑀢𑀢𑁆𑀣 𑀓𑀢𑁆𑀢𑀼𑀦𑁄 𑀅𑀗𑁆𑀕𑀪𑀽𑀢𑀁 𑀓𑀭𑀡𑀁 𑀅𑀚𑁆𑀛𑀢𑁆𑀢𑀺𑀓𑀁 𑀦𑀸𑀫, 𑀧𑀼𑀭𑀺𑀲𑁄 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀧𑀲𑁆𑀲𑀢𑀺, 𑀫𑀦𑀲𑀸 𑀥𑀫𑁆𑀫𑀁 𑀯𑀺𑀚𑀸𑀦𑀸𑀢𑀺, 𑀳𑀢𑁆𑀣𑁂𑀦 𑀓𑀫𑁆𑀫𑀁 𑀓𑀭𑁄𑀢𑀺, 𑀧𑀸𑀤𑁂𑀦 𑀫𑀕𑁆𑀕𑀁 𑀕𑀘𑁆𑀙𑀢𑀺, 𑀭𑀼𑀓𑁆𑀔𑁄 𑀨𑀮𑀪𑀸𑀭𑁂𑀦 𑀑𑀡𑀫𑀢𑀺.

𑀓𑀢𑁆𑀢𑀼𑀦𑁄 𑀩𑀳𑀺𑀪𑀽𑀢𑀁 𑀩𑀸𑀳𑀺𑀭𑀁 𑀦𑀸𑀫, 𑀧𑀼𑀭𑀺𑀲𑁄 𑀬𑀸𑀦𑁂𑀦 𑀕𑀘𑁆𑀙𑀢𑀺, 𑀨𑀭𑀲𑀼𑀦𑀸 [𑀧𑀭𑀲𑀼𑀦𑀸 (𑀲𑀓𑁆𑀓𑀢𑀕𑀦𑁆𑀣𑁂𑀲𑀼)] 𑀙𑀺𑀦𑁆𑀤𑀢𑀺, 𑀭𑀼𑀓𑁆𑀔𑁄 𑀯𑀸𑀢𑁂𑀦 𑀑𑀡𑀫𑀢𑀺.

𑁩𑁦𑁬. 𑀲𑀳𑀢𑁆𑀣𑁂𑀦 [𑀓. 𑁨𑁮𑁭; 𑀭𑀽. 𑁨𑁯𑁬; 𑀦𑀻. 𑁫𑁯𑁨; 𑀘𑀁. 𑁨.𑁧.𑁬𑁫; 𑀧𑀸. 𑁨.𑁩.𑁧𑁯].

𑀲𑀳𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀬𑀲𑁆𑀲 𑀲𑁄𑀢𑀺 𑀲𑀳𑀢𑁆𑀣𑁄, 𑀲𑀳𑀢𑁆𑀣𑁂𑀦 𑀲𑀤𑁆𑀤𑁂𑀦 𑀬𑀼𑀢𑁆𑀢𑀸 𑀮𑀺𑀗𑁆𑀕𑀫𑁆𑀳𑀸 𑀢𑀢𑀺𑀬𑀸 𑀳𑁄𑀢𑀺. 𑀲𑀳𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀦𑀸𑀫 𑀲𑀫𑀯𑀸𑀬𑀢𑁆𑀣𑁄.

𑀲𑁄 𑀢𑀺𑀯𑀺𑀥𑁄 𑀤𑀩𑁆𑀩𑀲𑀫𑀯𑀸𑀬𑁄, 𑀕𑀼𑀡𑀲𑀫𑀯𑀸𑀬𑁄, 𑀓𑁆𑀭𑀺𑀬𑀸𑀲𑀫𑀯𑀸𑀬𑁄𑀢𑀺. 𑀧𑀼𑀢𑁆𑀢𑁂𑀦 𑀲𑀳 𑀥𑀦𑀯𑀸 𑀧𑀺𑀢𑀸, 𑀧𑀼𑀢𑁆𑀢𑁂𑀦 𑀲𑀳 𑀣𑀽𑀮𑁄 𑀧𑀺𑀢𑀸, 𑀧𑀼𑀢𑁆𑀢𑁂𑀦 𑀲𑀳 𑀆𑀕𑀢𑁄 𑀧𑀺𑀢𑀸. 𑀲𑀳, 𑀲𑀤𑁆𑀥𑀺𑀁, 𑀲𑀫𑀁, 𑀦𑀸𑀦𑀸, 𑀯𑀺𑀦𑀸𑀇𑀘𑁆𑀘𑀸𑀤𑀺𑀓𑁄 𑀲𑀳𑀢𑁆𑀣𑀲𑀤𑁆𑀤𑁄 𑀦𑀸𑀫.

𑀦𑀺𑀲𑀻𑀤𑀺 𑀪𑀕𑀯𑀸 𑀲𑀤𑁆𑀥𑀺𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 [𑀫𑀳𑀸𑀯. 𑁫𑁯], 𑀲𑀳𑀲𑁆𑀲𑁂𑀦 𑀲𑀫𑀁 𑀫𑀺𑀢𑀸 [𑀲𑀁. 𑀦𑀺. 𑁧.𑁩𑁨], 𑀧𑀺𑀬𑁂𑀳𑀺 𑀦𑀸𑀦𑀸𑀪𑀸𑀯𑁄 𑀯𑀺𑀦𑀸𑀪𑀸𑀯𑁄 [𑀤𑀻. 𑀦𑀺. 𑁨.𑁧𑁮𑁩, 𑁨𑁦𑁭], 𑀲𑀗𑁆𑀖𑁄 𑀲𑀳 𑀯𑀸 𑀕𑀕𑁆𑀕𑁂𑀦 𑀯𑀺𑀦𑀸 𑀯𑀸 𑀕𑀕𑁆𑀕𑁂𑀦 𑀉𑀧𑁄𑀲𑀣𑀁 𑀓𑀭𑁂𑀬𑁆𑀬 [𑀫𑀳𑀸𑀯. 𑁧𑁬𑁭].

𑁩𑁦𑁭. 𑀮𑀓𑁆𑀔𑀡𑁂 [𑀭𑀽. 𑁧𑁪𑁭 𑀧𑀺𑀝𑁆𑀞𑁂; 𑀦𑀻. 𑁫𑁯𑁮; 𑀘𑀁. 𑁨.𑁧.𑁬𑁬; 𑀧𑀸. 𑁨.𑁩.𑁨𑁧].

𑀮𑀓𑁆𑀔𑀡𑀁 𑀯𑀼𑀘𑁆𑀘𑀢𑀺 𑀇𑀢𑁆𑀣𑀫𑁆𑀪𑀽𑀢𑀮𑀓𑁆𑀔𑀡𑀁, 𑀢𑀲𑁆𑀫𑀺𑀁 𑀢𑀢𑀺𑀬𑀸 𑀳𑁄𑀢𑀺.

𑀅𑀲𑁆𑀲𑀼𑀧𑀼𑀡𑁆𑀡𑁂𑀳𑀺 𑀦𑁂𑀢𑁆𑀢𑁂𑀳𑀺, 𑀧𑀺𑀢𑀭𑀁 𑀲𑁄 𑀉𑀤𑀺𑀓𑁆𑀔𑀢𑀺 [𑀚𑀸. 𑁨.𑁨𑁨.𑁨𑁧𑁨𑁩]. 𑀩𑁆𑀭𑀳𑁆𑀫𑀪𑀽𑀢𑁂𑀦 𑀅𑀢𑁆𑀢𑀦𑀸 𑀯𑀺𑀳𑀭𑀢𑀺 [𑀅. 𑀦𑀺. 𑁩.𑁬𑁭], 𑀅𑀲𑀫𑁆𑀪𑀺𑀦𑁆𑀦𑁂𑀦 𑀯𑀺𑀮𑁂𑀧𑀦𑁂𑀦 𑀭𑀸𑀚𑀸𑀦𑀫𑀤𑀓𑁆𑀔𑀺, 𑀢𑀺𑀤𑀡𑁆𑀟𑀓𑁂𑀦 𑀧𑀭𑀺𑀩𑁆𑀩𑀸𑀚𑀓𑀫𑀤𑀓𑁆𑀔𑀺, 𑀊𑀦𑀧𑀜𑁆𑀘𑀩𑀦𑁆𑀥𑀦𑁂𑀦 𑀧𑀢𑁆𑀢𑁂𑀦 𑀅𑀜𑁆𑀜𑀁 𑀧𑀢𑁆𑀢𑀁 𑀘𑁂𑀢𑀸𑀧𑁂𑀢𑀺 [𑀧𑀸𑀭𑀸. 𑁬𑁧𑁨 (𑀣𑁄𑀓𑀁 𑀯𑀺𑀲𑀤𑀺𑀲𑀁)], 𑀪𑀺𑀓𑁆𑀔𑀼 𑀧𑀸𑀲𑀸𑀤𑀺𑀓𑁂𑀦 𑀅𑀪𑀺𑀓𑁆𑀓𑀦𑁆𑀢𑁂𑀦 𑀧𑀝𑀺𑀓𑁆𑀓𑀦𑁆𑀢𑁂𑀦 𑀆𑀮𑁄𑀓𑀺𑀢𑁂𑀦 𑀯𑀺𑀮𑁄𑀓𑀺𑀢𑁂𑀦 𑀲𑀫𑀺𑀜𑁆𑀚𑀺𑀢𑁂𑀦 𑀧𑀲𑀸𑀭𑀺𑀢𑁂𑀦 𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺, 𑀲𑀸 𑀓𑀸𑀴𑀻 𑀤𑀸𑀲𑀻 𑀪𑀺𑀦𑁆𑀦𑁂𑀦 𑀲𑀻𑀲𑁂𑀦 𑀮𑁄𑀳𑀺𑀢𑁂𑀦 𑀕𑀮𑀦𑁆𑀢𑁂𑀦 𑀧𑀢𑀺𑀯𑀺𑀲𑁆𑀲𑀓𑀸𑀦𑀁 𑀉𑀚𑁆𑀛𑀸𑀧𑁂𑀲𑀺 [𑀫. 𑀦𑀺. 𑁧.𑁨𑁨𑁬], 𑀉𑀓𑁆𑀔𑀺𑀢𑁆𑀢𑀓𑀸𑀬 𑀅𑀦𑁆𑀢𑀭𑀖𑀭𑁂 𑀕𑀘𑁆𑀙𑀦𑁆𑀢𑀺 [𑀧𑀸𑀘𑀺. 𑁫𑁮𑁪], 𑀧𑀮𑁆𑀮𑀢𑁆𑀣𑀺𑀓𑀸𑀬 𑀅𑀦𑁆𑀢𑀭𑀖𑀭𑁂 𑀦𑀺𑀲𑀻𑀤𑀦𑁆𑀢𑀺 [𑀧𑀸𑀘𑀺. 𑁫𑁯𑁯].

𑀅𑀗𑁆𑀕𑀯𑀺𑀓𑀸𑀭𑁄𑀧𑀺 𑀇𑀥 𑀲𑀗𑁆𑀕𑀬𑁆𑀳𑀢𑀺 [𑀓. 𑁨𑁯𑁧; 𑀭𑀽. 𑁨𑁯𑁯; 𑀦𑀻. 𑁬𑁦𑁩], 𑀅𑀓𑁆𑀔𑀺𑀦𑀸 𑀓𑀸𑀡𑀁 𑀧𑀲𑁆𑀲𑀢𑀺, ‘𑀅𑀓𑁆𑀔𑀻’𑀢𑀺 𑀇𑀤𑀁 ‘𑀓𑀸𑀡’𑀦𑁆𑀢𑀺 𑀧𑀤𑁂 𑀯𑀺𑀲𑁂𑀲𑀦𑀁, 𑀯𑀺𑀓𑀮𑁂𑀦 𑀘𑀓𑁆𑀔𑀼𑀅𑀗𑁆𑀕𑁂𑀦 𑀲𑁄 𑀓𑀸𑀡𑁄 𑀦𑀸𑀫 𑀳𑁄𑀢𑀺. 𑀳𑀢𑁆𑀣𑁂𑀦 𑀓𑀼𑀡𑀺𑀁 𑀧𑀲𑁆𑀲𑀢𑀺, 𑀧𑀸𑀤𑁂𑀦 𑀔𑀜𑁆𑀚𑀁 𑀧𑀲𑁆𑀲𑀢𑀺.

𑁩𑁦𑁮. 𑀳𑁂𑀢𑀼𑀫𑁆𑀳𑀺 [𑀓. 𑁨𑁮𑁯; 𑀭𑀽. 𑁨𑁯𑁭; 𑀦𑀻. 𑁬𑁦𑁧].