𑁪. 𑀲𑀫𑀸𑀲𑀓𑀡𑁆𑀟

𑀅𑀣 𑀬𑀼𑀢𑁆𑀢𑀢𑁆𑀣𑀸𑀦𑀁 𑀲𑁆𑀬𑀸𑀤𑁆𑀬𑀦𑁆𑀢𑀧𑀤𑀸𑀦𑀁 𑀏𑀓𑀢𑁆𑀣𑀻𑀪𑀸𑀯𑁄 𑀯𑀼𑀘𑁆𑀘𑀢𑁂. 𑀏𑀓𑀢𑁆𑀣𑀻𑀪𑀸𑀯𑁄𑀢𑀺 𑀘 𑀇𑀥 𑀲𑀫𑀸𑀲𑁄 𑀯𑀼𑀘𑁆𑀘𑀢𑀺. 𑀲𑁄 𑀘 𑀲𑀫𑀸𑀲𑁄 𑀙𑀩𑁆𑀩𑀺𑀥𑁄 𑀅𑀩𑁆𑀬𑀬𑀻𑀪𑀸𑀯𑁄, 𑀢𑀧𑁆𑀧𑀼𑀭𑀺𑀲𑁄, 𑀓𑀫𑁆𑀫𑀥𑀸𑀭𑀬𑁄, 𑀤𑀺𑀕𑀼, 𑀩𑀳𑀼𑀩𑁆𑀩𑀻𑀳𑀺, 𑀤𑁆𑀯𑀦𑁆𑀤𑁄𑀢𑀺.

𑀅𑀩𑁆𑀬𑀬𑀻𑀪𑀸𑀯𑀲𑀫𑀸𑀲

𑀢𑀢𑁆𑀣 𑀅𑀩𑁆𑀬𑀬𑀻𑀪𑀸𑀯𑁄 𑀧𑀞𑀫𑀁 𑀯𑀼𑀘𑁆𑀘𑀢𑁂. 𑀩𑁆𑀬𑀬𑁄 𑀯𑀼𑀘𑁆𑀘𑀢𑀺 𑀯𑀺𑀓𑀸𑀭𑁄, 𑀦𑀢𑁆𑀣𑀺 𑀩𑁆𑀬𑀬𑁄 𑀏𑀢𑀲𑁆𑀲𑀸𑀢𑀺 𑀅𑀩𑁆𑀬𑀬𑁄, 𑀅𑀩𑁆𑀬𑀬𑁄 𑀳𑀼𑀢𑁆𑀯𑀸 𑀪𑀯𑀢𑀻𑀢𑀺 𑀅𑀩𑁆𑀬𑀬𑀻𑀪𑀸𑀯𑁄, 𑀦𑀸𑀦𑀸𑀮𑀺𑀗𑁆𑀕, 𑀯𑀺𑀪𑀢𑁆𑀢𑀺, 𑀯𑀘𑀦𑁂𑀲𑀼 𑀭𑀽𑀧𑀯𑀺𑀓𑀸𑀭𑀭𑀳𑀺𑀢𑁄 𑀳𑀼𑀢𑁆𑀯𑀸 𑀪𑀯𑀢𑀻𑀢𑀺 𑀅𑀢𑁆𑀣𑁄, 𑀲𑀩𑁆𑀩𑀮𑀺𑀗𑁆𑀕,-𑀯𑀺𑀪𑀢𑁆𑀢𑀺, 𑀯𑀘𑀦𑁂𑀲𑀼𑀧𑀺 𑀬𑁂𑀪𑀼𑀬𑁆𑀬𑁂𑀦 𑀏𑀓𑀭𑀽𑀧𑁂𑀦 𑀧𑀯𑀢𑁆𑀢𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀅𑀩𑁆𑀬𑀬𑀦𑁆𑀢𑀺 𑀯𑀸 𑀉𑀧𑀲𑀕𑁆𑀕𑀦𑀺𑀧𑀸𑀢𑀸𑀦𑀁 𑀏𑀯 𑀦𑀸𑀫𑀁, 𑀅𑀬𑀁 𑀧𑀦 𑀧𑀓𑀢𑀺 𑀅𑀩𑁆𑀬𑀬𑀁 𑀦 𑀳𑁄𑀢𑀺, 𑀅𑀲𑀗𑁆𑀔𑁆𑀬𑁂𑀳𑀺 𑀲𑀳 𑀏𑀓𑀢𑁆𑀣𑀢𑀸𑀯𑀲𑁂𑀦 𑀅𑀩𑁆𑀬𑀬𑀁 𑀳𑁄𑀢𑀺, 𑀇𑀢𑀺 𑀅𑀦𑀩𑁆𑀬𑀬𑀫𑁆𑀧𑀺 𑀅𑀩𑁆𑀬𑀬𑀁 𑀪𑀯𑀢𑀻𑀢𑀺 𑀅𑀩𑁆𑀬𑀬𑀻𑀪𑀸𑀯𑁄.

𑁩𑁩𑁧. 𑀲𑁆𑀬𑀸𑀤𑀺𑀲𑁆𑀬𑀸𑀤𑀺𑀦𑁂𑀓𑀢𑁆𑀣𑀁 [𑀓. 𑁩𑁧𑁬; 𑀭𑀽. 𑁩𑁩𑁧; 𑀦𑀻. 𑁬𑁭𑁫; 𑀘𑀁. 𑁨.𑁨.𑁧; 𑀧𑀸. 𑁨.𑁧.𑁪].

𑀅𑀥𑀺𑀓𑀸𑀭𑀲𑀼𑀢𑁆𑀢𑀫𑀺𑀤𑀁. 𑀲𑁆𑀬𑀸𑀤𑀺 𑀯𑀼𑀘𑁆𑀘𑀢𑀺 𑀲𑁆𑀬𑀸𑀤𑁆𑀬𑀦𑁆𑀢𑀧𑀤𑀁, ‘𑀲𑁆𑀬𑀸𑀤𑀺𑀦𑀸’𑀢𑀺 𑀲𑁆𑀬𑀸𑀤𑁆𑀬𑀦𑁆𑀢𑀧𑀤𑁂𑀦, 𑀏𑀓𑁄 𑀅𑀢𑁆𑀣𑁄 𑀬𑀲𑁆𑀲 𑀢𑀁 𑀏𑀓𑀢𑁆𑀣𑀁, 𑀲𑁆𑀬𑀸𑀤𑀺𑀧𑀤𑀁 𑀲𑁆𑀬𑀸𑀤𑀺𑀧𑀤𑁂𑀦 𑀲𑀳 𑀏𑀓𑀢𑁆𑀣𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀏𑀢𑁆𑀣 𑀘 ‘𑀲𑁆𑀬𑀸𑀤𑀻’𑀢𑀺 𑀯𑀘𑀦𑁂𑀦 𑀉𑀧𑀲𑀕𑁆𑀕, 𑀦𑀺𑀧𑀸𑀢𑁂𑀳𑀺 𑀲𑀤𑁆𑀥𑀺𑀁 𑀲𑀩𑁆𑀩𑀸𑀦𑀺 𑀦𑀸𑀫𑀺𑀓𑀧𑀤𑀸𑀦𑀺 𑀦𑀸𑀫𑀧𑀝𑀺𑀭𑀽𑀧𑀓𑀸𑀦𑀺 𑀘 𑀲𑀗𑁆𑀕𑀡𑁆𑀳𑀸𑀢𑀺, 𑀢𑁆𑀬𑀸𑀤𑁆𑀬𑀦𑁆𑀢𑀧𑀤𑀸𑀦𑀺 𑀦𑀺𑀯𑀢𑁆𑀢𑁂𑀢𑀺.

𑀢𑀢𑁆𑀣 𑀦𑀸𑀫𑀧𑀝𑀺𑀭𑀽𑀧𑀓𑀸𑀦𑀺 𑀦𑀸𑀫 ‘𑀬𑁂𑀯𑀸𑀯𑀦𑀓𑀥𑀫𑁆𑀫𑀸’ 𑀇𑀘𑁆𑀘𑀸𑀤𑀻𑀦𑀺. 𑀢𑀣𑀸 𑀲𑀜𑁆𑀜𑀸𑀲𑀤𑁆𑀤𑀪𑀸𑀯𑀁 𑀧𑀢𑁆𑀢𑀸𑀦𑀺 ‘‘𑀅𑀢𑁆𑀣𑀺𑀧𑀘𑁆𑀘𑀬𑁄, 𑀦𑀢𑁆𑀣𑀺𑀧𑀘𑁆𑀘𑀬𑁄, 𑀅𑀢𑁆𑀣𑀺𑀔𑀻𑀭𑀸 𑀩𑁆𑀭𑀸𑀳𑁆𑀫𑀡𑀻, 𑀅𑀜𑁆𑀜𑀸𑀲𑀺𑀓𑁄𑀡𑁆𑀟𑀜𑁆𑀜𑁄, 𑀫𑀓𑁆𑀔𑀮𑀺𑀕𑁄𑀲𑀸𑀮𑁄’’ 𑀇𑀘𑁆𑀘𑀸𑀤𑀻𑀲𑀼 ‘𑀅𑀢𑁆𑀣𑀺’ 𑀇𑀘𑁆𑀘𑀸𑀤𑀻𑀦𑀺.

‘𑀏𑀓𑀢𑁆𑀣’𑀦𑁆𑀢𑀺 𑀏𑀢𑁂𑀦 𑀤𑁆𑀯𑀦𑁆𑀤𑀲𑀫𑀸𑀲𑁂𑀧𑀺 𑀧𑀤𑀸𑀦𑀁 𑀏𑀓𑀓𑀢𑁆𑀢𑀼, 𑀏𑀓𑀓𑀫𑁆𑀫𑀸𑀤𑀺𑀪𑀸𑀯𑁂𑀦 𑀏𑀓𑀢𑁆𑀣𑀻𑀪𑀸𑀯𑁄 𑀯𑀼𑀢𑁆𑀢𑁄 𑀳𑁄𑀢𑀻𑀢𑀺.

𑁩𑁩𑁨. 𑀅𑀲𑀗𑁆𑀔𑁆𑀬𑀁 𑀯𑀺𑀪𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀲𑀫𑀻𑀧𑀲𑀸𑀓𑀮𑁆𑀬𑀸𑀪𑀸𑀯𑀬𑀣𑀸𑀧𑀘𑁆𑀙𑀸𑀬𑀼𑀕𑀧𑀤𑀢𑁆𑀣𑁂 [𑀓. 𑁩𑁧𑁯; 𑀭𑀽. 𑁩𑁩𑁦; 𑀦𑀻. 𑁬𑁯𑁬; 𑀘𑀁. 𑁨.𑁨.𑁨; 𑀧𑀸. 𑁨.𑁧.𑁬].

‘𑀅𑀲𑀗𑁆𑀔𑁆𑀬’𑀦𑁆𑀢𑀺 𑀉𑀧𑀲𑀕𑁆𑀕𑀧𑀤𑀁 𑀦𑀺𑀧𑀸𑀢𑀧𑀤𑀜𑁆𑀘 𑀯𑀼𑀘𑁆𑀘𑀢𑀺. 𑀢𑀁 𑀤𑁆𑀯𑀬𑀫𑁆𑀧𑀺 𑀳𑀺 𑀏𑀓𑀢𑁆𑀢, 𑀩𑀳𑀼𑀢𑁆𑀢𑀲𑀗𑁆𑀔𑁆𑀬𑀁 𑀧𑀝𑀺𑀘𑁆𑀘 𑀭𑀽𑀧𑀯𑀺𑀓𑀸𑀭𑀭𑀳𑀺𑀢𑀢𑁆𑀢𑀸 ‘𑀅𑀲𑀗𑁆𑀔𑁆𑀬’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀯𑀺𑀪𑀢𑁆𑀬𑀢𑁆𑀣𑁂, 𑀲𑀫𑁆𑀧𑀢𑁆𑀬𑀢𑁆𑀣𑁂, 𑀲𑀫𑀻𑀧𑀢𑁆𑀣𑁂, 𑀲𑀸𑀓𑀮𑁆𑀬𑀢𑁆𑀣𑁂, 𑀅𑀪𑀸𑀯𑀢𑁆𑀣𑁂, 𑀬𑀣𑀸𑀢𑁆𑀣𑁂, 𑀧𑀘𑁆𑀙𑀸𑀢𑁆𑀣𑁂, 𑀬𑀼𑀕𑀧𑀤𑀢𑁆𑀣𑁂 𑀧𑀯𑀢𑁆𑀢𑀁 𑀅𑀲𑀗𑁆𑀔𑁆𑀬𑀁 𑀦𑀸𑀫 𑀲𑁆𑀬𑀸𑀤𑀺𑀧𑀤𑀁 𑀅𑀜𑁆𑀜𑁂𑀦 𑀲𑁆𑀬𑀸𑀤𑀺𑀧𑀤𑁂𑀦 𑀲𑀳 𑀏𑀓𑀢𑁆𑀣𑀁 𑀳𑁄𑀢𑀺. 𑀅𑀬𑀜𑁆𑀘 𑀲𑀫𑀸𑀲𑁄 𑀅𑀦𑁆𑀯𑀢𑁆𑀣𑀯𑀲𑁂𑀦 ‘𑀅𑀲𑀗𑁆𑀔𑁆𑀬𑁄’𑀢𑀺 𑀘 ‘𑀅𑀩𑁆𑀬𑀬𑀻𑀪𑀸𑀯𑁄’𑀢𑀺 𑀘 𑀯𑀼𑀘𑁆𑀘𑀢𑀺.

𑀯𑀺𑀪𑀢𑁆𑀬𑀢𑁆𑀣𑁂 𑀢𑀸𑀯 𑁋

𑀅𑀥𑀺𑀢𑁆𑀣𑀺. 𑀏𑀢𑁆𑀣 𑀘 𑀅𑀥𑀺𑀢𑁄 𑀲𑀺, 𑀢𑀲𑁆𑀲 ‘𑀅𑀲𑀗𑁆𑀔𑁆𑀬𑁂𑀳𑀺 𑀲𑀩𑁆𑀩𑀸𑀲’𑀦𑁆𑀢𑀺 𑀲𑀼𑀢𑁆𑀢𑁂𑀦 𑀮𑁄𑀧𑁄, 𑀇𑀢𑁆𑀣𑀺𑀢𑁄 𑀲𑀼, ‘𑀅𑀥𑀺 𑀇𑀢𑁆𑀣𑀻𑀲𑀽’𑀢𑀺 𑀯𑀸𑀓𑁆𑀬𑀁, 𑀢𑀲𑁆𑀲 𑀘 𑀅𑀢𑁆𑀣𑀁 𑀓𑀣𑁂𑀦𑁆𑀢𑁂𑀦 𑀦𑀺𑀘𑁆𑀘𑀲𑀫𑀸𑀲𑀢𑁆𑀢𑀸 𑀅𑀜𑁆𑀜𑀧𑀤𑁂𑀦 𑀯𑀺𑀕𑁆𑀕𑀳𑁄 𑀓𑀸𑀢𑀩𑁆𑀩𑁄 ‘‘𑀇𑀢𑁆𑀣𑀻𑀲𑀼 𑀧𑀯𑀢𑁆𑀢𑀸 𑀓𑀣𑀸’’𑀢𑀺 𑀯𑀸 ‘‘𑀇𑀢𑁆𑀣𑀻𑀲𑀼 𑀧𑀯𑀢𑁆𑀢𑁄 𑀯𑀘𑀦𑀧𑀣𑁄’’𑀢𑀺 𑀯𑀸 ‘‘𑀇𑀢𑁆𑀣𑀻𑀲𑀼 𑀧𑀯𑀢𑁆𑀢𑀁 𑀯𑀘𑀦’’𑀦𑁆𑀢𑀺 𑀯𑀸, 𑀢𑀢𑁄 𑀧𑀼𑀭𑀺𑀫𑀲𑀼𑀢𑁆𑀢𑁂𑀦 𑀏𑀓𑀢𑁆𑀣𑀲𑀜𑁆𑀜𑀸, 𑀇𑀫𑀺𑀦𑀸 𑀲𑀼𑀢𑁆𑀢𑁂𑀦 𑀅𑀲𑀗𑁆𑀔𑁆𑀬𑁂𑀓𑀢𑁆𑀣𑀲𑀜𑁆𑀜𑀸 𑀘 𑀓𑀭𑀺𑀬𑀢𑁂, 𑀏𑀓𑀢𑁆𑀣𑀲𑀜𑁆𑀜𑀸𑀬 𑀧𑀦 𑀓𑀢𑀸𑀬 𑀯𑀸𑀓𑁆𑀬𑀢𑁆𑀣𑀸𑀬 𑀧𑀬𑀼𑀢𑁆𑀢𑀸𑀦𑀁 𑀯𑀺𑀪𑀢𑁆𑀢𑀻𑀦𑀁 𑀅𑀢𑁆𑀣𑁄 𑀏𑀓𑀢𑁆𑀣𑀧𑀤𑁂𑀦 𑀯𑀼𑀢𑁆𑀢𑁄 𑀳𑁄𑀢𑀺, 𑀢𑀤𑀸 𑀯𑀺𑀪𑀢𑁆𑀢𑀺𑀬𑁄 𑀯𑀼𑀢𑁆𑀢𑀢𑁆𑀣𑀸 𑀦𑀸𑀫.

𑀇𑀤𑀸𑀦𑀺 𑀯𑀼𑀢𑁆𑀢𑀢𑁆𑀣𑀸𑀦𑀁 𑀅𑀧𑁆𑀧𑀬𑁄𑀕𑀸𑀭𑀳𑀢𑁆𑀢𑀸 𑀮𑁄𑀧𑀯𑀺𑀥𑀸𑀦𑀫𑀸𑀳.

𑁩𑁩𑁩. 𑀏𑀓𑀢𑁆𑀣𑀢𑀸𑀬𑀁 [𑀓. 𑁩𑁧𑁬; 𑀭𑀽. 𑁩𑁩𑁧; 𑀦𑀻. 𑁬𑁭𑁫; 𑀘𑀁. 𑁨.𑁧.𑁩𑁯; 𑀧𑀸. 𑁨.𑁪.𑁭𑁧; 𑁧.𑁨.𑁪𑁫, 𑁪𑁬].

𑀏𑀓𑁄 𑀅𑀢𑁆𑀣𑁄 𑀬𑁂𑀲𑀁 𑀢𑀸𑀦𑀺 𑀏𑀓𑀢𑁆𑀣𑀸𑀦𑀺, ‘𑀅𑀢𑁆𑀣𑁄’𑀢𑀺 𑀘𑁂𑀢𑁆𑀣 𑀧𑀤𑀦𑁆𑀢𑀭𑁂 𑀓𑀢𑁆𑀢𑀼, 𑀓𑀫𑁆𑀫𑀸𑀤𑀺𑀪𑀸𑀯𑁂𑀦 𑀯𑀺𑀥𑁂𑀬𑁆𑀬𑁄 𑀧𑀥𑀸𑀦𑀢𑁆𑀣𑁄 𑀏𑀯 𑀯𑁂𑀤𑀺𑀢𑀩𑁆𑀩𑁄. 𑀢𑀣𑀸 𑀳𑀺 ‘𑀭𑀸𑀚𑀧𑀼𑀢𑁆𑀢𑁄’𑀢𑀺 𑀏𑀢𑁆𑀣 𑀧𑀼𑀢𑁆𑀢𑀲𑀤𑁆𑀤𑀢𑁆𑀣𑁄 𑀏𑀯 𑀢𑀣𑀸𑀯𑀺𑀥𑁂𑀬𑁆𑀬𑁄 𑀳𑁄𑀢𑀺, 𑀦 𑀭𑀸𑀚𑀲𑀤𑁆𑀤𑀢𑁆𑀣𑁄, 𑀲𑀩𑁆𑀩𑀜𑁆𑀘 𑀯𑀘𑀦𑀯𑀸𑀓𑁆𑀬𑀁 𑀦𑀸𑀫 𑀯𑀺𑀥𑁂𑀬𑁆𑀬𑀢𑁆𑀣𑁂𑀳𑀺 𑀏𑀯 𑀲𑀺𑀚𑁆𑀛𑀢𑀺, 𑀦𑁄 𑀅𑀜𑁆𑀜𑀣𑀸, 𑀬𑀲𑁆𑀫𑀸 𑀘 ‘𑀭𑀸𑀚𑀧𑀼𑀢𑁆𑀢𑁄’𑀢𑀺 𑀏𑀢𑀁 𑀧𑀼𑀢𑁆𑀢𑀲𑀤𑁆𑀤𑀢𑁆𑀣𑀲𑁆𑀲𑁂𑀯 𑀦𑀸𑀫𑀁 𑀳𑁄𑀢𑀺, 𑀦 𑀭𑀸𑀚𑀲𑀤𑁆𑀤𑀢𑁆𑀣𑀲𑁆𑀲, 𑀢𑀲𑁆𑀫𑀸 𑀏𑀓𑁄 𑀧𑀥𑀸𑀦𑀪𑀽𑀢𑁄 𑀧𑀼𑀢𑁆𑀢𑀲𑀤𑁆𑀤𑀢𑁆𑀣𑁄 𑀏𑀯 𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀲𑀤𑁆𑀤𑀸𑀦𑀁 𑀅𑀢𑁆𑀣𑁄 𑀦𑀸𑀫 𑀳𑁄𑀢𑀺, 𑀦 𑀭𑀸𑀚𑀲𑀤𑁆𑀤𑀢𑁆𑀣𑁄𑀢𑀺, 𑀏𑀓𑀢𑁆𑀣𑀸𑀦𑀁 𑀪𑀸𑀯𑁄 𑀏𑀓𑀢𑁆𑀣𑀢𑀸, 𑀏𑀓𑀢𑁆𑀣𑀻𑀪𑀸𑀯𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑁄 𑀢𑀺𑀯𑀺𑀥𑁄 𑀲𑀫𑀸𑀲𑁄, 𑀢𑀤𑁆𑀥𑀺𑀢𑁄, 𑀥𑀸𑀢𑀼𑀧𑀘𑁆𑀘𑀬𑀦𑁆𑀢𑁄 𑀘𑀸𑀢𑀺. 𑀢𑀺𑀲𑁆𑀲𑀁 𑀢𑀺𑀯𑀺𑀥𑀸𑀬𑀁 𑀏𑀓𑀢𑁆𑀣𑀢𑀸𑀬𑀁 𑀲𑀩𑁆𑀩𑀸𑀲𑀁 𑀯𑀼𑀢𑁆𑀢𑀢𑁆𑀣𑀸𑀦𑀁 𑀲𑁆𑀬𑀸𑀤𑀺𑀯𑀺𑀪𑀢𑁆𑀢𑀻𑀦𑀁 𑀮𑁄𑀧𑁄 𑀳𑁄𑀢𑀻𑀢𑀺 𑀇𑀫𑀺𑀦𑀸 𑀲𑀼𑀲𑁆𑀲 𑀮𑁄𑀧𑁄. 𑀩𑀳𑀼𑀮𑀸𑀥𑀺𑀓𑀸𑀭𑀢𑁆𑀢𑀸 𑀧𑀦 𑀅𑀮𑀼𑀢𑁆𑀢𑀲𑀫𑀸𑀲𑁄𑀧𑀺 𑀤𑀺𑀲𑁆𑀲𑀢𑀺.

𑁩𑁩𑁪. 𑀢𑀁 𑀦𑀧𑀼𑀁𑀲𑀓𑀁 [𑀓. 𑁩𑁨𑁦; 𑀭𑀽. 𑁩𑁩𑁫; 𑀦𑀻. 𑁬𑁯𑁮; 𑀘𑀁. 𑁨.𑁨.𑁧𑁫; 𑀧𑀸. 𑁨.𑁪.𑁧𑁮].

𑀢𑀁 𑀅𑀲𑀗𑁆𑀔𑁆𑀬𑀁 𑀦𑀸𑀫 𑀏𑀓𑀢𑁆𑀣𑀁 𑀦𑀧𑀼𑀁𑀲𑀓𑀁 𑀳𑁄𑀢𑀻𑀢𑀺 𑀇𑀫𑀺𑀦𑀸 𑀅𑀥𑀺𑀢𑁆𑀣𑀻𑀲𑀤𑁆𑀤𑀲𑁆𑀲 𑀦𑀧𑀼𑀁𑀲𑀓𑀪𑀸𑀯𑀁 𑀓𑀢𑁆𑀯𑀸 𑀢𑀢𑁄 𑀲𑁆𑀬𑀸𑀤𑁆𑀬𑀼𑀧𑁆𑀧𑀢𑁆𑀢𑀺.

𑁩𑁩𑁫. 𑀲𑁆𑀬𑀸𑀤𑀻𑀲𑀼 𑀭𑀲𑁆𑀲𑁄 [𑀓. 𑁩𑁪𑁨; 𑀭𑀽. 𑁩𑁩𑁭; 𑀦𑀻. 𑁭𑁩𑁪; 𑀘𑀁. 𑁨.𑁨.𑁮𑁪; 𑀧𑀸. 𑁧.𑁨.𑁪𑁭].

𑀦𑀧𑀼𑀁𑀲𑀓𑀲𑁆𑀲 𑀏𑀓𑀢𑁆𑀣𑀲𑁆𑀲 𑀭𑀲𑁆𑀲𑁄 𑀳𑁄𑀢𑀺 𑀲𑁆𑀬𑀸𑀤𑀻𑀲𑀼 𑀯𑀺𑀪𑀢𑁆𑀢𑀻𑀲𑀽𑀢𑀺 𑀇𑀫𑀺𑀦𑀸 𑀈𑀓𑀸𑀭𑀲𑁆𑀲 𑀭𑀲𑁆𑀲𑁄.

𑁩𑁩𑁬. 𑀧𑀼𑀩𑁆𑀩𑀲𑁆𑀫𑀸𑀫𑀸𑀤𑀺𑀢𑁄 [𑀓. 𑁩𑁪𑁩; 𑀭𑀽. 𑁩𑁩𑁮; 𑀦𑀻. 𑁩𑁭𑁫; 𑀘𑀁. 𑁨.𑁧.𑁪𑁦; 𑀧𑀸. 𑁧.𑁧.𑁪𑁧].

𑀧𑀼𑀩𑁆𑀩𑀅𑀫𑀸𑀤𑀺 𑀦𑀸𑀫 𑀧𑀼𑀩𑁆𑀩𑀧𑀤𑀢𑁆𑀣𑀧𑀥𑀸𑀦𑀪𑀽𑀢𑁄 𑀅𑀲𑀗𑁆𑀔𑁆𑀬𑀲𑀫𑀸𑀲𑁄 𑀯𑀼𑀘𑁆𑀘𑀢𑀺, 𑀢𑀢𑁄 𑀧𑀭𑀸𑀲𑀁 𑀲𑀩𑁆𑀩𑀸𑀲𑀁 𑀯𑀺𑀪𑀢𑁆𑀢𑀻𑀦𑀁 𑀮𑁄𑀧𑁄 𑀳𑁄𑀢𑀺, 𑀆𑀤𑀺𑀲𑀤𑁆𑀤𑁂𑀦 𑀘𑁂𑀢𑁆𑀣 𑀧𑀞𑀫𑀸𑀯𑀺𑀪𑀢𑁆𑀢𑀺𑀧𑀺 𑀕𑀬𑁆𑀳𑀢𑀺. 𑀅𑀣 𑀯𑀸 𑀅𑀫𑀸𑀤𑀺 𑀯𑀼𑀘𑁆𑀘𑀢𑀺 𑀢𑀧𑁆𑀧𑀼𑀭𑀺𑀲𑁄, 𑀢𑀢𑁄 𑀧𑀼𑀩𑁆𑀩𑀁 𑀦𑀸𑀫 𑀅𑀲𑀗𑁆𑀔𑁆𑀬𑀲𑀫𑀸𑀲𑁄, 𑀇𑀢𑀺 𑀅𑀫𑀸𑀤𑀺𑀢𑁄 𑀧𑀼𑀩𑁆𑀩𑀪𑀽𑀢𑀸 𑀅𑀲𑀗𑁆𑀔𑁆𑀬𑁂𑀓𑀢𑁆𑀣𑀸 𑀧𑀭𑀸𑀲𑀁 𑀲𑀩𑁆𑀩𑀸𑀲𑀁 𑀯𑀺𑀪𑀢𑁆𑀢𑀻𑀦𑀁 𑀮𑁄𑀧𑁄 𑀳𑁄𑀢𑀻𑀢𑀺 𑀇𑀫𑀺𑀦𑀸 𑀅𑀥𑀺𑀢𑁆𑀣𑀺𑀲𑀤𑁆𑀤𑀢𑁄 𑀲𑀩𑁆𑀩𑀯𑀺𑀪𑀢𑁆𑀢𑀻𑀦𑀁 𑀮𑁄𑀧𑁄.

𑀅𑀥𑀺𑀢𑁆𑀣𑀺 𑀢𑀺𑀝𑁆𑀞𑀢𑀺, 𑀇𑀢𑁆𑀣𑀻𑀲𑀼 𑀧𑀯𑀢𑁆𑀢𑀸 𑀓𑀣𑀸 𑀢𑀺𑀝𑁆𑀞𑀢𑀻𑀢𑀺 𑀅𑀢𑁆𑀣𑁄. 𑀅𑀥𑀺𑀢𑁆𑀣𑀺 𑀢𑀺𑀝𑁆𑀞𑀦𑁆𑀢𑀺, 𑀇𑀢𑁆𑀣𑀻𑀲𑀼 𑀧𑀯𑀢𑁆𑀢𑀸 𑀓𑀣𑀸𑀬𑁄 𑀢𑀺𑀝𑁆𑀞𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀏𑀲 𑀦𑀬𑁄 𑀲𑁂𑀲𑀯𑀺𑀪𑀢𑁆𑀢𑀻𑀲𑀼 𑀲𑁂𑀲𑀯𑀘𑀦𑁂𑀲𑀼 𑀲𑁂𑀲𑀮𑀺𑀗𑁆𑀕𑁂𑀲𑀼 𑀘. 𑀏𑀯𑀁 𑀲𑀩𑁆𑀩𑀮𑀺𑀗𑁆𑀕𑁂𑀲𑀼 𑀲𑀩𑁆𑀩𑀯𑀺𑀪𑀢𑁆𑀢𑀻𑀲𑀼 𑀲𑀩𑁆𑀩𑀯𑀘𑀦𑁂𑀲𑀼 𑀘 𑀏𑀓𑁂𑀦𑁂𑀯 𑀭𑀽𑀧𑁂𑀦 𑀢𑀺𑀝𑁆𑀞𑀢𑀺, 𑀢𑀲𑁆𑀫𑀸 𑀅𑀬𑀁 𑀲𑀫𑀸𑀲𑁄 𑀭𑀽𑀧𑀯𑀺𑀓𑀸𑀭𑀭𑀳𑀺𑀢𑀢𑁆𑀢𑀸 ‘𑀅𑀩𑁆𑀬𑀬𑀻𑀪𑀸𑀯𑁄’𑀢𑀺 𑀯𑀼𑀘𑁆𑀘𑀢𑀺.

𑀏𑀢𑁆𑀣 𑀘 𑀯𑀺𑀪𑀢𑁆𑀬𑀢𑁆𑀣𑁄 𑀦𑀸𑀫 ‘‘𑀅𑀥𑀺𑀢𑁆𑀣𑀺, 𑀩𑀳𑀺𑀕𑀸𑀫𑀁, 𑀉𑀧𑀭𑀺𑀕𑀗𑁆𑀕’’ 𑀫𑀺𑀘𑁆𑀘𑀸𑀤𑀻𑀲𑀼 𑀲𑀫𑁆𑀧𑀢𑁆𑀬𑀸𑀤𑀻𑀳𑀺 𑀯𑀺𑀲𑁂𑀲𑀢𑁆𑀣𑁂𑀳𑀺 𑀭𑀳𑀺𑀢𑁄 𑀓𑁂𑀯𑀮𑁄 𑀯𑀺𑀪𑀢𑁆𑀢𑀻𑀦𑀁 𑀅𑀢𑁆𑀣𑁄 𑀯𑀼𑀘𑁆𑀘𑀢𑀺. 𑀯𑀺𑀕𑁆𑀕𑀳𑁂 𑀧𑀦 ‘‘𑀓𑀣𑀸, 𑀧𑀯𑀢𑁆𑀢𑀸’’ 𑀇𑀘𑁆𑀘𑀸𑀤𑀻𑀦𑀺 𑀲𑀫𑀸𑀲𑀲𑀸𑀫𑀢𑁆𑀣𑀺𑀬𑁂𑀦 𑀯𑀺𑀤𑀺𑀢𑀸𑀦𑀺 𑀅𑀢𑁆𑀣𑀧𑀤𑀸𑀦𑀺 𑀦𑀸𑀫, 𑀅𑀥𑀺𑀲𑀤𑁆𑀤𑀲𑁆𑀲 𑀅𑀢𑁆𑀣𑀧𑀤𑀸𑀦𑀻𑀢𑀺𑀧𑀺 𑀯𑀤𑀦𑁆𑀢𑀺. 𑀏𑀯𑀁 𑀅𑀥𑀺𑀓𑀼𑀫𑀸𑀭𑀺, 𑀅𑀥𑀺𑀯𑀥𑀼, 𑀅𑀥𑀺𑀚𑀫𑁆𑀩𑀼𑀇𑀘𑁆𑀘𑀸𑀤𑀺.

𑀅𑀢𑁆𑀢𑀦𑀺 𑀧𑀯𑀢𑁆𑀢𑁄 𑀥𑀫𑁆𑀫𑁄, 𑀧𑀯𑀢𑁆𑀢𑀸 𑀯𑀸𑀥𑀫𑁆𑀫𑀸𑀢𑀺 𑀅𑀢𑁆𑀣𑁂 𑀯𑀺𑀪𑀢𑁆𑀢𑀻𑀦𑀁 𑀮𑁄𑀧𑁂 𑀓𑀢𑁂 𑀅𑀥𑀺𑀅𑀢𑁆𑀢𑀲𑀤𑁆𑀤𑀲𑁆𑀲 𑀦𑀧𑀼𑀁𑀲𑀓𑀪𑀸𑀯𑀁 𑀓𑀢𑁆𑀯𑀸 𑀢𑀢𑁄 𑀲𑁆𑀬𑀸𑀤𑁆𑀬𑀼𑀧𑁆𑀧𑀢𑁆𑀢𑀺, ‘𑀧𑀼𑀩𑁆𑀩𑀲𑁆𑀫𑀸𑀫𑀸𑀤𑀺𑀢𑁄’𑀢𑀺 𑀲𑁆𑀬𑀸𑀤𑀻𑀦𑀁 𑀮𑁄𑀧𑁂 𑀲𑀫𑁆𑀧𑀢𑁆𑀢𑁂 𑁋

𑁩𑁩𑁭. 𑀦𑀸𑀢𑁄𑀫𑀧𑀜𑁆𑀘𑀫𑀺𑀬𑀸 [𑀓. 𑁩𑁪𑁧; 𑀭𑀽. 𑁩𑁩𑁬; 𑀦𑀻. 𑁭𑁩𑁩; 𑀘𑀁. 𑁨.𑁧.𑁪𑁧; 𑀧𑀸. 𑁨.𑁪.𑁮𑁩; 𑀫𑀼. 𑁪.𑁩.𑁩𑁭𑁪].

𑀅𑀓𑀸𑀭𑀦𑁆𑀢𑀫𑁆𑀳𑀸 𑀅𑀲𑀗𑁆𑀔𑁆𑀬𑁂𑀓𑀢𑁆𑀣𑀸 𑀧𑀭𑀁 𑀲𑀩𑁆𑀩𑀸𑀲𑀁 𑀯𑀺𑀪𑀢𑁆𑀢𑀻𑀦𑀁 𑀮𑁄𑀧𑁄 𑀦 𑀳𑁄𑀢𑀺, 𑀧𑀜𑁆𑀘𑀫𑀻𑀯𑀚𑁆𑀚𑀺𑀢𑀸𑀦𑀁 𑀯𑀺𑀪𑀢𑁆𑀢𑀻𑀦𑀁 𑀅𑀁 𑀳𑁄𑀢𑀺.

𑀅𑀚𑁆𑀛𑀢𑁆𑀢𑀁 𑀥𑀫𑁆𑀫𑁄 𑀚𑀸𑀬𑀢𑀺, 𑀅𑀚𑁆𑀛𑀢𑁆𑀢𑀁 𑀥𑀫𑁆𑀫𑀸 𑀚𑀸𑀬𑀦𑁆𑀢𑀺, 𑀅𑀚𑁆𑀛𑀢𑁆𑀢𑀁 𑀥𑀫𑁆𑀫𑀁 𑀧𑀲𑁆𑀲𑀢𑀺, 𑀅𑀚𑁆𑀛𑀢𑁆𑀢𑀁 𑀥𑀫𑁆𑀫𑁂 𑀧𑀲𑁆𑀲𑀦𑁆𑀢𑀺.

𑀅𑀧𑀜𑁆𑀘𑀫𑀺𑀬𑀸𑀢𑀺 𑀓𑀺𑀁? 𑀅𑀚𑁆𑀛𑀢𑁆𑀢𑀸 𑀅𑀧𑁂𑀢𑀺, 𑀅𑀚𑁆𑀛𑀢𑁆𑀢𑁂𑀳𑀺 𑀅𑀧𑁂𑀢𑀺.

𑁩𑁩𑁮. 𑀯𑀸 𑀢𑀢𑀺𑀬𑀸𑀲𑀢𑁆𑀢𑀫𑀻𑀦𑀁 [𑀓. 𑁩𑁪𑁧; 𑀭𑀽. 𑁩𑁩𑁬; 𑀦𑀻. 𑁭𑁩𑁩; 𑀘𑀁. 𑁨.𑁧.𑁪𑁨; 𑀧𑀸. 𑁨.𑁪.𑁮𑁪; 𑀫𑀼. 𑁪.𑁩.𑁩𑁭𑁫].

𑀅𑀓𑀸𑀭𑀦𑁆𑀢𑀫𑁆𑀳𑀸 𑀅𑀲𑀗𑁆𑀔𑁆𑀬𑁂𑀓𑀢𑁆𑀣𑀸 𑀧𑀭𑀁 𑀢𑀢𑀺𑀬𑀸, 𑀲𑀢𑁆𑀢𑀫𑀻𑀦𑀁 𑀯𑀺𑀓𑀧𑁆𑀧𑁂𑀦 𑀅𑀁 𑀳𑁄𑀢𑀺.

𑀅𑀚𑁆𑀛𑀢𑁆𑀢𑀁 𑀥𑀫𑁆𑀫𑁂𑀦 𑀯𑀢𑁆𑀢𑀢𑀺 𑀅𑀚𑁆𑀛𑀢𑁆𑀢𑁂𑀦 𑀯𑀸, 𑀅𑀚𑁆𑀛𑀢𑁆𑀢𑀁 𑀥𑀫𑁆𑀫𑁂𑀳𑀺 𑀯𑀢𑁆𑀢𑀢𑀺 𑀅𑀚𑁆𑀛𑀢𑁆𑀢𑁂𑀳𑀺 𑀯𑀸, 𑀅𑀚𑁆𑀛𑀢𑁆𑀢𑀁 𑀥𑀫𑁆𑀫𑀲𑁆𑀲 𑀤𑁂𑀢𑀺, 𑀅𑀚𑁆𑀛𑀢𑁆𑀢𑀁 𑀥𑀫𑁆𑀫𑀸𑀦𑀁 𑀤𑁂𑀢𑀺, 𑀅𑀚𑁆𑀛𑀢𑁆𑀢𑀸 𑀥𑀫𑁆𑀫𑀸 𑀅𑀧𑁂𑀢𑀺, 𑀅𑀚𑁆𑀛𑀢𑁆𑀢𑁂𑀳𑀺 𑀥𑀫𑁆𑀫𑁂𑀳𑀺 𑀅𑀧𑁂𑀢𑀺, 𑀅𑀚𑁆𑀛𑀢𑁆𑀢𑀁 𑀥𑀫𑁆𑀫𑀲𑁆𑀲 𑀲𑀦𑁆𑀢𑀓𑀁, 𑀅𑀚𑁆𑀛𑀢𑁆𑀢𑀁 𑀥𑀫𑁆𑀫𑀸𑀦𑀁 𑀲𑀦𑁆𑀢𑀓𑀁, 𑀅𑀚𑁆𑀛𑀢𑁆𑀢𑀁 𑀥𑀫𑁆𑀫𑁂 𑀢𑀺𑀝𑁆𑀞𑀢𑀺 𑀅𑀚𑁆𑀛𑀢𑁆𑀢𑁂 𑀯𑀸, 𑀅𑀚𑁆𑀛𑀢𑁆𑀢𑀁 𑀥𑀫𑁆𑀫𑁂𑀲𑀼 𑀢𑀺𑀝𑁆𑀞𑀢𑀺 𑀅𑀚𑁆𑀛𑀢𑁆𑀢𑁂𑀲𑀼 𑀯𑀸. 𑀏𑀢𑁆𑀣 𑀘 ‘𑀅𑀚𑁆𑀛𑀢𑁆𑀢𑀁 𑀥𑀫𑁆𑀫𑁄’𑀢𑀺 𑀅𑀚𑁆𑀛𑀢𑁆𑀢𑀪𑀽𑀢𑁄 𑀥𑀫𑁆𑀫𑁄, ‘𑀅𑀚𑁆𑀛𑀢𑁆𑀢𑀁 𑀥𑀫𑁆𑀫𑀸’𑀢𑀺 𑀅𑀚𑁆𑀛𑀢𑁆𑀢𑀪𑀽𑀢𑀸 𑀥𑀫𑁆𑀫𑀸 𑀇𑀘𑁆𑀘𑀸𑀤𑀺𑀦𑀸 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀢𑁆𑀢𑀸𑀦𑀁 𑀅𑀥𑀺𑀓𑀺𑀘𑁆𑀘 𑀧𑀯𑀢𑁆𑀢𑁄 𑀧𑀯𑀢𑁆𑀢𑀸𑀢𑀺 𑀯𑀸 𑀯𑀼𑀢𑁆𑀢𑁂𑀧𑀺 𑀅𑀢𑁆𑀢𑀲𑁆𑀲 𑀆𑀥𑀸𑀭𑀪𑀸𑀯𑁄 𑀲𑀺𑀚𑁆𑀛𑀢𑀺𑀬𑁂𑀯. 𑀏𑀯𑀁 𑀅𑀥𑀺𑀘𑀺𑀢𑁆𑀢𑀁, 𑀅𑀢𑁆𑀢𑀦𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀧𑀯𑀢𑁆𑀢𑀁 𑀧𑀯𑀢𑁆𑀢𑀸𑀦𑀺 𑀯𑀸 𑀧𑀘𑁆𑀘𑀢𑁆𑀢𑀁. 𑀏𑀢𑁆𑀣 𑀘 ‘‘𑀅𑀚𑁆𑀛𑀢𑁆𑀢𑀁 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀅𑀚𑁆𑀛𑀢𑁆𑀢𑀁 𑀯𑀼𑀝𑁆𑀞𑀸𑀢𑀺, 𑀩𑀳𑀺𑀤𑁆𑀥𑀸 𑀅𑀪𑀺𑀦𑀺𑀯𑀺𑀲𑀺𑀢𑁆𑀯𑀸 𑀅𑀚𑁆𑀛𑀢𑁆𑀢𑀁 𑀯𑀼𑀝𑁆𑀞𑀸𑀢𑀻’’𑀢𑀺 [𑀥. 𑀲. 𑀅𑀝𑁆𑀞. 𑁩𑁫𑁦; 𑀲𑀁. 𑀦𑀺. 𑀅𑀝𑁆𑀞. 𑁨.𑁨.𑁩𑁨] 𑀧𑀸𑀞𑁄 𑀅𑀢𑁆𑀣𑀺, 𑀢𑀲𑁆𑀫𑀸 𑀧𑀜𑁆𑀘𑀫𑀺𑀬𑀸 𑀅𑀁𑀪𑀸𑀯𑀯𑀚𑁆𑀚𑀦𑀁 𑀅𑀧𑁆𑀧𑀓𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀅𑀚𑁆𑀛𑀢𑁆𑀢𑀸 𑀥𑀫𑁆𑀫𑀸, 𑀩𑀳𑀺𑀤𑁆𑀥𑀸 𑀥𑀫𑁆𑀫𑀸’’𑀢𑀺 [𑀥. 𑀲. 𑀢𑀺𑀓𑀫𑀸𑀢𑀺𑀓𑀸 𑁨𑁦] 𑀧𑀸𑀞𑁄 𑀅𑀢𑁆𑀣𑀺, 𑀢𑀲𑁆𑀫𑀸 𑀧𑀞𑀫𑀸𑀤𑀻𑀦𑀫𑁆𑀧𑀺 𑀯𑀺𑀓𑀧𑁆𑀧𑁄 𑀮𑀩𑁆𑀪𑀢𑀻𑀢𑀺.

𑀲𑀫𑁆𑀧𑀢𑁆𑀢𑀺𑀅𑀢𑁆𑀣𑁂 𑁋

𑀲𑀫𑁆𑀧𑀦𑁆𑀦𑀁 𑀩𑁆𑀭𑀳𑁆𑀫𑀁 𑀲𑀩𑁆𑀭𑀳𑁆𑀫𑀁, ‘𑀩𑁆𑀭𑀳𑁆𑀫’𑀦𑁆𑀢𑀺 𑀯𑁂𑀤𑁄 𑀯𑀼𑀘𑁆𑀘𑀢𑀺. 𑀏𑀢𑁆𑀣 𑀘 ‘𑀅𑀓𑀸𑀮𑁂 𑀲𑀓𑀢𑁆𑀣𑀲𑁆𑀲𑀸’𑀢𑀺 𑀲𑀼𑀢𑁆𑀢𑁂𑀦 𑀲𑀳𑀲𑀤𑁆𑀤𑀲𑁆𑀲 𑀲𑀸𑀤𑁂𑀲𑁄, 𑀪𑀺𑀓𑁆𑀔𑀸𑀦𑀁 𑀲𑀫𑀺𑀤𑁆𑀥𑀺 𑀲𑀼𑀪𑀺𑀓𑁆𑀔𑀁, ‘𑀲𑁆𑀬𑀸𑀤𑀻𑀲𑀼 𑀭𑀲𑁆𑀲𑁄’𑀢𑀺 𑀲𑀼𑀢𑁆𑀢𑁂𑀦 𑀓𑀢𑀦𑀧𑀼𑀁𑀲𑀓𑀲𑁆𑀲 𑀭𑀲𑁆𑀲𑀢𑁆𑀢𑀁.

𑀲𑀫𑀻𑀧𑁂 𑁋

𑀦𑀕𑀭𑀲𑁆𑀲 𑀲𑀫𑀻𑀧𑀁 𑀉𑀧𑀦𑀕𑀭𑀁, 𑀓𑀼𑀫𑁆𑀪𑀲𑁆𑀲 𑀲𑀫𑀻𑀧𑀁 𑀉𑀧𑀓𑀼𑀫𑁆𑀪𑀁, 𑀫𑀡𑀺𑀓𑀸𑀬 𑀲𑀫𑀻𑀧𑀁 𑀉𑀧𑀫𑀡𑀺𑀓𑀁, 𑀯𑀥𑀼𑀬𑀸 𑀲𑀫𑀻𑀧𑀁 𑀉𑀧𑀯𑀥𑀼, 𑀕𑀼𑀦𑁆𑀦𑀁 𑀲𑀫𑀻𑀧𑀁 𑀉𑀧𑀕𑀼, ‘𑀕𑁄𑀲𑁆𑀲𑀽’𑀢𑀺 𑀲𑀼𑀢𑁆𑀢𑁂𑀦 𑀑𑀲𑁆𑀲 𑀉𑀢𑁆𑀢𑀁.

𑀲𑀸𑀓𑀮𑁆𑀬𑁂 𑁋

𑀢𑀺𑀡𑁂𑀦 𑀲𑀳 𑀲𑀓𑀮𑀁 𑀲𑀢𑀺𑀡𑀁, 𑀢𑀺𑀡𑁂𑀦 𑀲𑀤𑁆𑀥𑀺𑀁 𑀲𑀓𑀮𑀁 𑀯𑀢𑁆𑀣𑀼𑀁 𑀅𑀚𑁆𑀛𑁄𑀳𑀭𑀢𑀻𑀢𑀺 𑀅𑀢𑁆𑀣𑁄. 𑀲𑀳𑀲𑀤𑁆𑀤𑀲𑁆𑀲 𑀲𑀸𑀤𑁂𑀲𑁄.

𑀅𑀪𑀸𑀯𑁂 𑁋

𑀫𑀓𑁆𑀔𑀺𑀓𑀸𑀦𑀁 𑀅𑀪𑀸𑀯𑁄 𑀦𑀺𑀫𑁆𑀫𑀓𑁆𑀔𑀺𑀓𑀁, 𑀤𑀭𑀣𑀸𑀦𑀁 𑀅𑀪𑀸𑀯𑁄 𑀦𑀺𑀤𑁆𑀤𑀭𑀣𑀁, 𑀪𑀺𑀓𑁆𑀔𑀸𑀦𑀁 𑀅𑀪𑀸𑀯𑁄 𑀤𑀼𑀩𑁆𑀪𑀺𑀓𑁆𑀔𑀁, 𑀅𑀪𑀸𑀯𑀢𑁆𑀣𑁄𑀧𑀺 𑀤𑀼𑀲𑀤𑁆𑀤𑁄 𑀅𑀢𑁆𑀣𑀺. 𑀬𑀣𑀸? 𑀤𑀼𑀲𑁆𑀲𑀻𑀮𑁄 𑀤𑀼𑀧𑁆𑀧𑀜𑁆𑀜𑁄𑀢𑀺. 𑀏𑀢𑁆𑀣 𑀘 ‘𑀲𑀫𑁆𑀧𑀦𑁆𑀦𑀁 𑀩𑁆𑀭𑀳𑁆𑀫’𑀦𑁆𑀢𑀺𑀆𑀤𑀺𑀦𑀸 𑀲𑀤𑁆𑀤𑀩𑁆𑀬𑀸𑀓𑀭𑀡𑁂𑀲𑀼 𑀅𑀢𑁆𑀣𑀯𑀘𑀦𑀁 𑀲𑀤𑁆𑀤𑀢𑁆𑀣𑀯𑀺𑀪𑀸𑀯𑀦𑀫𑀢𑁆𑀢𑀁. 𑀲𑀼𑀢𑁆𑀢𑀦𑁆𑀢𑁂𑀲𑀼 𑀧𑀦 𑀇𑀫𑁂𑀲𑀁 𑀧𑀤𑀸𑀦𑀁 𑀬𑀼𑀢𑁆𑀢𑀁 𑀅𑀪𑀺𑀥𑁂𑀬𑁆𑀬𑀢𑁆𑀣𑀁 𑀜𑀢𑁆𑀯𑀸 𑀢𑀤𑀦𑀼𑀭𑀽𑀧𑀁 𑀅𑀢𑁆𑀣𑀯𑀘𑀦𑀫𑁆𑀧𑀺 𑀯𑁂𑀤𑀺𑀢𑀩𑁆𑀩𑀁.

𑀬𑀣𑀸𑀲𑀤𑁆𑀤𑀢𑁆𑀣𑁂 𑁋

𑀭𑀽𑀧𑀲𑁆𑀲 𑀲𑀪𑀸𑀯𑀲𑁆𑀲 𑀬𑁄𑀕𑁆𑀬𑀁 𑀅𑀦𑀼𑀭𑀽𑀧𑀁, 𑀅𑀢𑁆𑀢𑀸𑀦𑀁 𑀅𑀢𑁆𑀢𑀸𑀦𑀁 𑀧𑀝𑀺𑀘𑁆𑀘 𑀧𑀯𑀢𑁆𑀢𑀁 𑀧𑀘𑁆𑀘𑀢𑁆𑀢𑀁, 𑀅𑀟𑁆𑀠𑀫𑀸𑀲𑀁 𑀅𑀟𑁆𑀠𑀫𑀸𑀲𑀁 𑀅𑀦𑀼𑀕𑀢𑀁 𑀅𑀦𑁆𑀯𑀟𑁆𑀠𑀫𑀸𑀲𑀁, 𑀖𑀭𑀁 𑀖𑀭𑀁 𑀅𑀦𑀼𑀕𑀢𑀁 𑀅𑀦𑀼𑀖𑀭𑀁, 𑀯𑀲𑁆𑀲𑀁 𑀯𑀲𑁆𑀲𑀁 𑀅𑀦𑀼𑀕𑀢𑀁 𑀅𑀦𑀼𑀯𑀲𑁆𑀲𑀁, 𑀚𑁂𑀝𑁆𑀞𑀸𑀦𑀁 𑀅𑀦𑀼𑀧𑀼𑀩𑁆𑀩𑀁 𑀅𑀦𑀼𑀚𑁂𑀝𑁆𑀞𑀁, 𑀲𑀢𑁆𑀢𑀺𑀬𑀸 𑀅𑀦𑀼𑀭𑀽𑀧𑀁 𑀬𑀣𑀸𑀲𑀢𑁆𑀢𑀺, 𑀩𑀮𑀲𑁆𑀲 𑀅𑀦𑀼𑀭𑀽𑀧𑀁 𑀬𑀣𑀸𑀩𑀮𑀁, 𑀓𑀫𑀲𑁆𑀲 𑀅𑀦𑀼𑀭𑀽𑀧𑀁 𑀬𑀣𑀸𑀓𑁆𑀓𑀫𑀁. 𑀏𑀯𑀁 𑀬𑀣𑀸𑀲𑀗𑁆𑀔𑁆𑀬𑀁, 𑀬𑀣𑀸𑀮𑀸𑀪𑀁. 𑀲𑁄𑀢𑀲𑁆𑀲 𑀧𑀝𑀺𑀮𑁄𑀫𑀁 𑀧𑀝𑀺𑀲𑁄𑀢𑀁, 𑀧𑀝𑀺𑀯𑀸𑀢𑀁, 𑀧𑀝𑀺𑀲𑀤𑁆𑀤𑀁.

𑀧𑀘𑁆𑀙𑀸𑀧𑀤𑀢𑁆𑀣𑁂 𑁋

𑀭𑀣𑀲𑁆𑀲 𑀧𑀘𑁆𑀙𑀸 𑀅𑀦𑀼𑀭𑀣𑀁.

𑀬𑀼𑀕𑀪𑀽𑀢𑁄 𑀧𑀤𑀢𑁆𑀣𑁄 𑀬𑀼𑀕𑀧𑀤𑀢𑁆𑀣𑁄, 𑀲𑀳𑀪𑀸𑀯𑀻𑀅𑀢𑁆𑀣𑀤𑁆𑀯𑀬𑀲𑁆𑀲𑁂𑀢𑀁 𑀦𑀸𑀫𑀁. 𑀢𑀢𑁆𑀣 𑀅𑀲𑀦𑀺𑀨𑀮𑁂𑀦 𑀲𑀳 𑀧𑀯𑀢𑁆𑀢𑀁 𑀘𑀓𑁆𑀓𑀁 𑀲𑀘𑀓𑁆𑀓𑀁, 𑀕𑀤𑀸𑀯𑀼𑀥𑁂𑀦 𑀬𑀼𑀕𑀴𑀧𑀯𑀢𑁆𑀢𑀁 𑀯𑀸𑀲𑀼𑀤𑁂𑀯𑀲𑁆𑀲 𑀘𑀓𑁆𑀓𑀸𑀯𑀼𑀥𑀦𑁆𑀢𑀺𑀧𑀺 𑀯𑀤𑀦𑁆𑀢𑀺 [𑀬𑀼𑀕𑀧𑀤𑀢𑁆𑀣𑁂 𑀲𑀘𑀓𑁆𑀓𑀁 𑀦𑀺𑀥𑁂𑀳𑀺, (𑀫𑁄𑀕𑁆𑀕𑀮𑁆𑀮𑀸𑀦𑀯𑀼𑀢𑁆𑀢𑀺𑀬𑀁). 𑀘𑀓𑁆𑀓𑁂𑀦 𑀬𑀼𑀕𑀧𑀢 𑀥𑁂𑀳𑀺 𑀲𑀘𑀓𑁆𑀓𑀁, (𑀫𑀼𑀕𑁆𑀥𑀩𑁄𑀥𑀯𑀼𑀢𑁆𑀢𑀺𑀬𑀁). 𑀳𑁂 𑀩𑀺𑀲𑀡𑀼! 𑀘𑀓𑁆𑀓𑁂𑀦 𑀲𑀳 𑀬𑀼𑀕𑀧𑀤𑁂𑀓𑀓𑀸𑀮𑁂 𑀕𑀤𑀁 𑀥𑀸𑀭𑀬. (𑀫𑀼𑀕𑁆𑀥𑀩𑁄𑀥𑀝𑀻𑀓𑀸𑀬𑀁 𑁨𑁨𑁬 𑀧𑀺𑀝𑁆𑀞𑁂)], 𑀲𑀳𑀲𑁆𑀲 𑀲𑀢𑁆𑀢𑀁.

𑁩𑁩𑁯. 𑀬𑀣𑀸 𑀦𑀢𑀼𑀮𑁆𑀬𑁂 [𑀓. 𑁩𑁧𑁯; 𑀭𑀽. 𑁩𑁩𑁦; 𑀦𑀻. 𑁬𑁯𑁬; 𑀘𑀁. 𑁨.𑁨.𑁩; 𑀧𑀸. 𑁨.𑁧.𑁭].

𑀢𑀼𑀮𑁆𑀬𑀢𑁄 𑀅𑀜𑁆𑀜𑀲𑁆𑀫𑀺𑀁 𑀅𑀢𑁆𑀣𑁂 𑀧𑀯𑀢𑁆𑀢𑁄 𑀬𑀣𑀸𑀲𑀤𑁆𑀤𑁄 𑀲𑁆𑀬𑀸𑀤𑀺𑀦𑀸 𑀲𑀳 𑀏𑀓𑀢𑁆𑀣𑁄 𑀳𑁄𑀢𑀺 [𑀫𑁄𑀕𑁆𑀕𑀮𑁆𑀮𑀸𑀦𑁂 𑀅𑀜𑁆𑀜𑀣𑀸𑀯𑀼𑀢𑁆𑀢𑀺 𑀤𑀲𑁆𑀲𑀺𑀢𑀸].

𑀬𑀣𑀸𑀲𑀢𑁆𑀢𑀺, 𑀬𑀣𑀸𑀩𑀮𑀁, 𑀬𑀣𑀸𑀓𑁆𑀓𑀫𑀁, 𑀬𑁂 𑀬𑁂 𑀯𑀼𑀟𑁆𑀠𑀸 𑀬𑀣𑀸𑀯𑀼𑀟𑁆𑀠𑀁, 𑀯𑀼𑀟𑁆𑀠𑀸𑀦𑀁 𑀧𑀝𑀺𑀧𑀸𑀝𑀺 𑀯𑀸 𑀬𑀣𑀸𑀯𑀼𑀟𑁆𑀠𑀁.

𑀦𑀢𑀼𑀮𑁆𑀬𑁂𑀢𑀺 𑀓𑀺𑀁? 𑀬𑀣𑀸 𑀤𑁂𑀯𑀤𑀢𑁆𑀢𑁄, 𑀢𑀣𑀸 𑀬𑀜𑁆𑀜𑀤𑀢𑁆𑀢𑁄.

𑁩𑁪𑁦. 𑀬𑀸𑀯𑀸𑀯𑀥𑀸𑀭𑀡𑁂 [𑀓. 𑁩𑁧𑁯; 𑀭𑀽. 𑁩𑁩𑁦; 𑀦𑀻. 𑁬𑁯𑁬; 𑀘𑀁. 𑁨.𑁨.𑁪; 𑀧𑀸. 𑁨.𑁧.𑁮].

𑀅𑀯𑀥𑀸𑀭𑀡𑀁 𑀯𑀼𑀘𑁆𑀘𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀦𑀁, 𑀅𑀯𑀥𑀸𑀭𑀡𑁂 𑀧𑀯𑀢𑁆𑀢𑁄 𑀬𑀸𑀯𑀲𑀤𑁆𑀤𑁄 𑀲𑁆𑀬𑀸𑀤𑀺𑀦𑀸 𑀲𑀳 𑀏𑀓𑀢𑁆𑀣𑁄 𑀪𑀯𑀢𑀺.

𑀬𑀢𑁆𑀢𑀓𑀁 𑀅𑀢𑁆𑀣𑁄 𑀯𑀢𑁆𑀢𑀢𑀻𑀢𑀺 𑀬𑀸𑀯𑀤𑀢𑁆𑀣𑀁, 𑀤𑀸𑀕𑀫𑁄. 𑀬𑀢𑁆𑀢𑀓𑀁 𑀚𑀻𑀯𑁄 𑀯𑀢𑁆𑀢𑀢𑀻𑀢𑀺 𑀬𑀸𑀯𑀚𑀻𑀯𑀁, 𑀬𑀢𑁆𑀢𑀓𑀁 𑀆𑀬𑀼 𑀯𑀢𑁆𑀢𑀢𑀻𑀢𑀺 𑀬𑀸𑀯𑀢𑀸𑀬𑀼𑀓𑀁, 𑀢𑀓𑀸𑀭, 𑀓𑀓𑀸𑀭𑀸 𑀆𑀕𑀫𑀸.

𑁩𑁪𑁧. 𑀧𑀭𑀸𑀧𑀸𑀩𑀳𑀺𑀢𑀺𑀭𑁄𑀧𑀼𑀭𑁂𑀧𑀘𑁆𑀙𑀸 𑀯𑀸 𑀧𑀜𑁆𑀘𑀫𑁆𑀬𑀸 [𑀓. 𑁩𑁧𑁯; 𑀭𑀽. 𑁩𑁩𑁦; 𑀦𑀻. 𑁬𑁯𑁬; 𑀘𑀁. 𑁨.𑁨.𑁭; 𑀧𑀸. 𑁨.𑁧.𑁧𑁨, 𑁧𑁩; ‘𑀧𑀬𑁆𑀬𑀧𑀸…’ (𑀩𑀳𑀽𑀲𑀼)].

𑀧𑀭𑀺, 𑀅𑀧, 𑀆𑀇𑀘𑁆𑀘𑀸𑀤𑀬𑁄 𑀲𑀤𑁆𑀤𑀸 𑀧𑀜𑁆𑀘𑀫𑁆𑀬𑀦𑁆𑀢𑁂𑀦 𑀲𑁆𑀬𑀸𑀤𑀺𑀦𑀸 𑀲𑀳 𑀏𑀓𑀢𑁆𑀣𑀸 𑀪𑀯𑀦𑁆𑀢𑀺 𑀯𑀸.

𑀧𑀩𑁆𑀩𑀢𑀢𑁄 𑀧𑀭𑀺 𑀲𑀫𑀦𑁆𑀢𑀸 𑀯𑀲𑁆𑀲𑀻𑀢𑀺 𑀤𑁂𑀯𑁄 𑀧𑀭𑀺𑀧𑀩𑁆𑀩𑀢𑀁 𑀧𑀭𑀺𑀧𑀩𑁆𑀩𑀢𑀸 𑀯𑀸, 𑀧𑀩𑁆𑀩𑀢𑀁 𑀯𑀚𑁆𑀚𑁂𑀢𑁆𑀯𑀸 𑀯𑀲𑁆𑀲𑀻𑀢𑀺 𑀅𑀢𑁆𑀣𑁄. 𑀧𑀩𑁆𑀩𑀢𑀢𑁄 𑀩𑀳𑀺𑀤𑁆𑀥𑀸 𑀅𑀧𑀧𑀩𑁆𑀩𑀢𑀁 𑀅𑀧𑀧𑀩𑁆𑀩𑀢𑀸 𑀯𑀸, 𑀧𑀸𑀝𑀮𑀺𑀧𑀼𑀢𑁆𑀢𑀢𑁄 𑀩𑀳𑀺𑀤𑁆𑀥𑀸 𑀯𑀲𑁆𑀲𑀻𑀢𑀺 𑀤𑁂𑀯𑁄 𑀆𑀧𑀸𑀝𑀮𑀺𑀧𑀼𑀢𑁆𑀢𑀁 𑀆𑀧𑀸𑀝𑀮𑀺𑀧𑀼𑀢𑁆𑀢𑀸 𑀯𑀸, 𑀆𑀓𑀼𑀫𑀸𑀭𑁂𑀳𑀺 𑀓𑀘𑁆𑀘𑀸𑀬𑀦𑀲𑁆𑀲 𑀬𑀲𑁄 𑀯𑀢𑁆𑀢𑀢𑀻𑀢𑀺 𑀆𑀓𑀼𑀫𑀸𑀭𑀁 𑀆𑀓𑀼𑀫𑀸𑀭𑀸 𑀯𑀸, 𑀆𑀪𑀯𑀕𑁆𑀕𑀸 𑀪𑀕𑀯𑀢𑁄 𑀬𑀲𑁄 𑀯𑀢𑁆𑀢𑀢𑀻𑀢𑀺 𑀆𑀪𑀯𑀕𑁆𑀕𑀁 𑀆𑀪𑀯𑀕𑁆𑀕𑀸 𑀯𑀸, 𑀆𑀧𑀸𑀡𑀓𑁄𑀝𑀺𑀬𑀸 𑀲𑀭𑀡𑀕𑀫𑀦𑀁 𑀯𑀢𑁆𑀢𑀢𑀻𑀢𑀺 𑀆𑀧𑀸𑀡𑀓𑁄𑀝𑀺𑀓𑀁, 𑀓𑀸𑀕𑀫𑁄. 𑀕𑀸𑀫𑀢𑁄 𑀩𑀳𑀺 𑀩𑀳𑀺𑀕𑀸𑀫𑀁 𑀩𑀳𑀺𑀕𑀸𑀫𑀸 𑀯𑀸, 𑀏𑀯𑀁 𑀩𑀳𑀺𑀦𑀕𑀭𑀁, 𑀩𑀳𑀺𑀮𑁂𑀡𑀁, 𑀧𑀩𑁆𑀩𑀢𑀢𑁄 𑀢𑀺𑀭𑁄 𑀢𑀺𑀭𑁄𑀧𑀩𑁆𑀩𑀢𑀁 𑀢𑀺𑀭𑁄𑀧𑀩𑁆𑀩𑀢𑀸 𑀯𑀸, 𑀏𑀯𑀁 𑀢𑀺𑀭𑁄𑀧𑀸𑀓𑀸𑀭𑀁, 𑀢𑀺𑀭𑁄𑀓𑀼𑀝𑁆𑀝𑀁. 𑀏𑀢𑁆𑀣 𑀘 ‘𑀢𑀺𑀭𑁄’𑀢𑀺 𑀧𑀭𑀪𑀸𑀕𑁄 𑀯𑀼𑀘𑁆𑀘𑀢𑀺. 𑀪𑀢𑁆𑀢𑀫𑁆𑀳𑀸 𑀧𑀼𑀭𑁂 𑀧𑀼𑀭𑁂𑀪𑀢𑁆𑀢𑀁 𑀧𑀼𑀭𑁂𑀪𑀢𑁆𑀢𑀸 𑀯𑀸, 𑀅𑀭𑀼𑀡𑀫𑁆𑀳𑀸 𑀧𑀼𑀭𑁂 𑀧𑀼𑀭𑀸𑀭𑀼𑀡𑀁 𑀧𑀼𑀭𑀸𑀭𑀼𑀡𑀸 𑀯𑀸, 𑀪𑀢𑁆𑀢𑀲𑁆𑀲 𑀧𑀘𑁆𑀙𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀘𑁆𑀙𑀸𑀪𑀢𑁆𑀢𑀸 𑀯𑀸.

𑁩𑁪𑁨. 𑀲𑀫𑀻𑀧𑀸𑀬𑀸𑀫𑁂𑀲𑁆𑀯𑀦𑀼 [𑀓. 𑁩𑁧𑁯; 𑀭𑀽. 𑁩𑁩𑁦; 𑀦𑀻. 𑁬𑁯𑁬; 𑀘𑀁. 𑁨.𑁨.𑁯; 𑀧𑀸. 𑁨.𑁧.𑁧𑁫, 𑁧𑁬].

𑀲𑀫𑀻𑀧𑁂 𑀆𑀬𑀸𑀫𑁂 𑀘 𑀧𑀯𑀢𑁆𑀢𑁄 𑀅𑀦𑀼𑀲𑀤𑁆𑀤𑁄 𑀲𑁆𑀬𑀸𑀤𑀺𑀦𑀸 𑀲𑀳 𑀏𑀓𑀢𑁆𑀣𑁄 𑀪𑀯𑀢𑀺 𑀯𑀸.

𑀯𑀦𑀲𑁆𑀲 𑀲𑀫𑀻𑀧𑀁 𑀅𑀦𑀼𑀯𑀦𑀁, 𑀅𑀲𑀦𑀺 𑀅𑀦𑀼𑀯𑀦𑀁 𑀕𑀢𑀸, 𑀕𑀗𑁆𑀕𑀁 𑀅𑀦𑀼𑀬𑀸𑀢𑀸 𑀅𑀦𑀼𑀕𑀗𑁆𑀕𑀁, 𑀩𑀸𑀭𑀸𑀡𑀲𑀻.

𑁩𑁪𑁩. 𑀑𑀭𑁄 𑀧𑀭𑀺 𑀧𑀝𑀺 𑀧𑀸𑀭𑁂 𑀫𑀚𑁆𑀛𑁂 𑀳𑁂𑀝𑁆𑀞𑀼𑀤𑁆𑀥𑀸𑀥𑁄𑀦𑁆𑀢𑁄 𑀯𑀸 𑀙𑀝𑁆𑀞𑀺𑀬𑀸 [𑀓. 𑁩𑁧𑁯; 𑀭𑀽. 𑁩𑁩𑁦; 𑀦𑀻. 𑁬𑁯𑁬; 𑀘𑀁. 𑁨.𑁨.𑁧𑁧; 𑀧𑀸. 𑁨.𑁧.𑁧𑁮; ‘𑀑𑀭𑁂𑀧𑀭𑀺…’ (𑀩𑀳𑀽𑀲𑀼)].

𑀑𑀭𑀸𑀤𑀬𑁄 𑀲𑀤𑁆𑀤𑀸 𑀙𑀝𑁆𑀞𑀻𑀬𑀦𑁆𑀢𑁂𑀦 𑀲𑁆𑀬𑀸𑀤𑀺𑀦𑀸 𑀲𑀳 𑀏𑀓𑀢𑁆𑀣𑀸 𑀪𑀯𑀦𑁆𑀢𑀺 𑀯𑀸.

𑀏𑀢𑁆𑀣 𑀘 𑀑𑀭𑁂, 𑀧𑀸𑀭𑁂, 𑀫𑀚𑁆𑀛𑁂𑀲𑀤𑁆𑀤𑁂𑀲𑀼 ‘𑀢𑀤𑀫𑀺𑀦𑀸𑀤𑀻𑀦𑀻’𑀢𑀺 𑀲𑀼𑀢𑁆𑀢𑁂𑀦 𑀏𑀓𑀸𑀭𑁄, 𑀕𑀗𑁆𑀕𑀸𑀬 𑀑𑀭𑀁 𑀑𑀭𑁂𑀕𑀗𑁆𑀕𑀁, 𑀲𑀺𑀔𑀭𑀲𑁆𑀲 𑀉𑀧𑀭𑀺 𑀉𑀧𑀭𑀺𑀲𑀺𑀔𑀭𑀁. 𑀏𑀯𑀁 𑀉𑀧𑀭𑀺𑀧𑀸𑀲𑀸𑀤𑀁, 𑀉𑀧𑀭𑀺𑀫𑀜𑁆𑀘𑀁, 𑀉𑀧𑀭𑀺𑀧𑀩𑁆𑀩𑀢𑀁, 𑀲𑁄𑀢𑀲𑁆𑀲 𑀧𑀝𑀺𑀮𑁄𑀫𑀁 𑀧𑀝𑀺𑀲𑁄𑀢𑀁. 𑀏𑀯𑀁 𑀧𑀝𑀺𑀯𑀸𑀢𑀁, 𑀬𑀫𑀼𑀦𑀸𑀬 𑀧𑀸𑀭𑀁 𑀧𑀸𑀭𑁂𑀬𑀫𑀼𑀦𑀁, 𑀕𑀗𑁆𑀕𑀸𑀬 𑀫𑀚𑁆𑀛𑀁 𑀫𑀚𑁆𑀛𑁂𑀕𑀗𑁆𑀕𑀁, 𑀧𑀸𑀲𑀸𑀤𑀲𑁆𑀲 𑀳𑁂𑀝𑁆𑀞𑀸 𑀳𑁂𑀝𑁆𑀞𑀸𑀧𑀸𑀲𑀸𑀤𑀁, 𑀳𑁂𑀝𑁆𑀞𑀸𑀫𑀜𑁆𑀘𑀁, 𑀕𑀗𑁆𑀕𑀸𑀬 𑀉𑀤𑁆𑀥𑀁 𑀉𑀤𑁆𑀥𑀁𑀕𑀗𑁆𑀕𑀁, 𑀕𑀗𑁆𑀕𑀸𑀬 𑀅𑀥𑁄 𑀅𑀥𑁄𑀕𑀗𑁆𑀕𑀁, 𑀧𑀸𑀲𑀸𑀤𑀲𑁆𑀲 𑀅𑀦𑁆𑀢𑁄 𑀅𑀦𑁆𑀢𑁄𑀧𑀸𑀲𑀸𑀤𑀁. 𑀏𑀯𑀁 𑀅𑀦𑁆𑀢𑁄𑀕𑀸𑀫𑀁, 𑀅𑀦𑁆𑀢𑁄𑀦𑀕𑀭𑀁, 𑀅𑀦𑁆𑀢𑁄𑀯𑀲𑁆𑀲𑀁.

𑀯𑀸𑀢𑀺 𑀓𑀺𑀁? 𑀕𑀗𑁆𑀕𑀸𑀑𑀭𑀁, 𑀫𑀚𑁆𑀛𑁂𑀲𑀫𑀼𑀤𑁆𑀤𑀲𑁆𑀫𑀺𑀁 𑀇𑀘𑁆𑀘𑀸𑀤𑀺.

𑁩𑁪𑁪. 𑀢𑀺𑀝𑁆𑀞𑀕𑁆𑀯𑀸𑀤𑀻𑀦𑀺 [𑀓. 𑁩𑁧𑁯; 𑀭𑀽. 𑁩𑁩𑁦; 𑀦𑀻. 𑁬𑁯𑁭; 𑀘𑀁. 𑁨.𑁨.𑁧𑁦; 𑀧𑀸. 𑁨.𑁧.𑁧𑁭].

𑀢𑀺𑀝𑁆𑀞𑀕𑀼𑀇𑀘𑁆𑀘𑀸𑀤𑀻𑀦𑀺 𑀅𑀲𑀗𑁆𑀔𑁆𑀬𑁂𑀓𑀢𑁆𑀣𑁂 𑀲𑀺𑀚𑁆𑀛𑀦𑁆𑀢𑀺.

𑀢𑀺𑀝𑁆𑀞𑀦𑁆𑀢𑀺 𑀕𑀸𑀯𑁄 𑀬𑀲𑁆𑀫𑀺𑀁 𑀓𑀸𑀮𑁂 𑀢𑀺𑀝𑁆𑀞𑀕𑀼, 𑀯𑀳𑀦𑁆𑀢𑀺 𑀕𑀸𑀯𑁄𑀬𑀲𑁆𑀫𑀺𑀁 𑀓𑀸𑀮𑁂 𑀯𑀳𑀕𑀼, ‘𑀕𑁄𑀲𑁆𑀲𑀽’𑀢𑀺 𑀲𑀼𑀢𑁆𑀢𑁂𑀦 𑀑𑀲𑁆𑀲 𑀉𑀢𑁆𑀢𑀁. 𑀆𑀬𑀢𑀺𑀁 𑀬𑀯𑁄 𑀬𑀲𑁆𑀫𑀺𑀁 𑀓𑀸𑀮𑁂𑀢𑀺 𑀆𑀬𑀢𑀺𑀬𑀯𑁄, 𑀔𑀮𑁂 𑀬𑀯𑁄 𑀬𑀲𑁆𑀫𑀺𑀁 𑀓𑀸𑀮𑁂𑀢𑀺 𑀔𑀮𑁂𑀬𑀯𑀁. 𑀧𑀼𑀩𑁆𑀩𑀧𑀤𑁂 𑀯𑀺𑀪𑀢𑁆𑀢𑀺𑀅𑀮𑁄𑀧𑁄. 𑀮𑀼𑀦𑀸 𑀬𑀯𑀸 𑀬𑀲𑁆𑀫𑀺𑀁 𑀓𑀸𑀮𑁂𑀢𑀺 𑀮𑀼𑀦𑀬𑀯𑀁, 𑀏𑀢𑁆𑀣 ‘𑀮𑀼𑀦𑀸’𑀢𑀺 𑀮𑀸𑀯𑀺𑀢𑀸, 𑀮𑀼𑀬𑀫𑀸𑀦𑀸 𑀬𑀯𑀸 𑀬𑀲𑁆𑀫𑀺𑀦𑁆𑀢𑀺 𑀮𑀼𑀬𑀫𑀸𑀦𑀬𑀯𑀁 𑀇𑀘𑁆𑀘𑀸𑀤𑀺.

𑀢𑀣𑀸 𑀧𑀸𑀢𑁄 𑀦𑀳𑀸𑀦𑀁 𑀬𑀲𑁆𑀫𑀺𑀁 𑀓𑀸𑀮𑁂𑀢𑀺 𑀧𑀸𑀢𑀦𑀳𑀸𑀦𑀁. 𑀏𑀯𑀁 𑀲𑀸𑀬𑀦𑀳𑀸𑀦𑀁, 𑀧𑀸𑀢𑁄 𑀓𑀫𑁆𑀫𑀓𑀭𑀡𑀓𑀸𑀮𑁄 𑀬𑀲𑁆𑀫𑀺𑀦𑁆𑀢𑀺 𑀧𑀸𑀢𑀓𑀸𑀮𑀁. 𑀏𑀯𑀁 𑀲𑀸𑀬𑀓𑀸𑀮𑀁, 𑀧𑀸𑀢𑁄 𑀯𑀲𑁆𑀲𑀢𑀺 𑀫𑁂𑀖𑁄 𑀬𑀲𑁆𑀫𑀺𑀦𑁆𑀢𑀺 𑀧𑀸𑀢𑀫𑁂𑀖𑀁. 𑀏𑀯𑀁 𑀲𑀸𑀬𑀫𑁂𑀖𑀁, 𑀧𑀸𑀢𑁄 𑀕𑀦𑁆𑀢𑀩𑁆𑀩𑁄 𑀫𑀕𑁆𑀕𑁄 𑀬𑀲𑁆𑀫𑀺𑀦𑁆𑀢𑀺 𑀧𑀸𑀢𑀫𑀕𑁆𑀕𑀁. 𑀏𑀯𑀁 𑀲𑀸𑀬𑀫𑀕𑁆𑀕𑀁 𑀇𑀘𑁆𑀘𑀸𑀤𑀺. 𑀫𑀳𑀸𑀯𑀼𑀢𑁆𑀢𑀺𑀦𑀸 𑀧𑀸𑀢𑁄𑀲𑀤𑁆𑀤𑀲𑁆𑀲 𑀧𑀸𑀢𑀢𑁆𑀢𑀁. 𑀏𑀢𑁆𑀣 𑀘 ‘𑀢𑀺𑀝𑁆𑀞𑀕𑀼’ 𑀇𑀘𑁆𑀘𑀸𑀤𑀻𑀦𑀺 𑀯𑀺𑀕𑁆𑀕𑀳𑀢𑁆𑀣𑀯𑀲𑁂𑀦 𑀅𑀜𑁆𑀜𑀧𑀤𑀢𑁆𑀣𑁂 𑀲𑀺𑀤𑁆𑀥𑀸𑀦𑀺 𑀯𑀺𑀬 𑀤𑀺𑀲𑁆𑀲𑀦𑁆𑀢𑀺, 𑀅𑀜𑁆𑀜𑀧𑀤𑀲𑁆𑀲 𑀧𑀦 𑀮𑀺𑀗𑁆𑀕𑀸𑀤𑀻𑀦𑀁 𑀯𑀲𑁂𑀦 𑀢𑁂𑀲𑀁 𑀭𑀽𑀧𑀯𑀺𑀓𑀸𑀭𑁄 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀅𑀩𑁆𑀬𑀬𑀭𑀽𑀧𑀢𑁆𑀢𑀸 𑀇𑀥 𑀕𑀳𑀺𑀢𑀸𑀦𑀺, 𑀲𑀩𑁆𑀩𑀜𑁆𑀘𑁂𑀢𑀁 𑀅𑀲𑀗𑁆𑀔𑁆𑀬𑀲𑀫𑀸𑀲𑀧𑀤𑀁 𑀦𑀸𑀫 𑀦𑀧𑀼𑀁𑀲𑀓𑀁 𑀏𑀯 𑀳𑁄𑀢𑀺, 𑀭𑀲𑁆𑀲𑀦𑁆𑀢𑀫𑁂𑀯 𑀳𑁄𑀢𑀺. 𑀲𑀩𑁆𑀩𑀯𑀺𑀪𑀢𑁆𑀢𑀻𑀦𑀜𑁆𑀘 𑀅𑀓𑀸𑀭𑀦𑁆𑀢𑀫𑁆𑀳𑀸 𑀩𑀳𑀼𑀮𑀁 𑀅𑀁 𑀳𑁄𑀢𑀺, 𑀇𑀓𑀸𑀭𑀼𑀓𑀸𑀭𑀦𑁆𑀢𑁂𑀳𑀺 𑀮𑁄𑀧𑁄 𑀳𑁄𑀢𑀺.

𑀅𑀩𑁆𑀬𑀬𑀻𑀪𑀸𑀯𑀲𑀫𑀸𑀲𑁄 𑀦𑀺𑀝𑁆𑀞𑀺𑀢𑁄.

𑀢𑀧𑁆𑀧𑀼𑀭𑀺𑀲𑀲𑀫𑀸𑀲

𑀤𑀼𑀢𑀺𑀬𑀸𑀢𑀧𑁆𑀧𑀼𑀭𑀺𑀲

𑀅𑀣 𑀅𑀫𑀸𑀤𑀺𑀲𑀫𑀸𑀲𑁄 𑀯𑀼𑀘𑁆𑀘𑀢𑁂, 𑀲𑁄 𑀢𑀧𑁆𑀧𑀼𑀭𑀺𑀲𑁄𑀢𑀺 𑀘 𑀯𑀼𑀘𑁆𑀘𑀢𑀺. 𑀢𑀲𑁆𑀲 𑀧𑀼𑀭𑀺𑀲𑁄 𑀢𑀧𑁆𑀧𑀼𑀭𑀺𑀲𑁄, 𑀢𑀧𑁆𑀧𑀼𑀭𑀺𑀲𑀲𑀤𑁆𑀤𑁂𑀦 𑀲𑀤𑀺𑀲𑀢𑁆𑀢𑀸 𑀅𑀬𑀁 𑀲𑀫𑀸𑀲𑁄 𑀢𑀧𑁆𑀧𑀼𑀭𑀺𑀲𑁄𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸 𑀳𑀺 𑀢𑀧𑁆𑀧𑀼𑀭𑀺𑀲𑀲𑀤𑁆𑀤𑁄 𑀯𑀺𑀲𑁂𑀲𑀦𑀧𑀤𑀢𑁆𑀣𑀁 𑀚𑀳𑀺𑀢𑁆𑀯𑀸 𑀯𑀺𑀲𑁂𑀲𑁆𑀬𑀧𑀤𑀢𑁆𑀣𑁂 𑀢𑀺𑀝𑁆𑀞𑀢𑀺, 𑀏𑀯𑀁 𑀅𑀬𑀁 𑀲𑀫𑀸𑀲𑁄𑀧𑀻𑀢𑀺.

𑁩𑁪𑁫. 𑀅𑀫𑀸𑀤𑀺 [𑀓. 𑁩𑁨𑁭; 𑀭𑀽. 𑁩𑁫𑁧; 𑀦𑀻. 𑁭𑁦𑁪; 𑀘𑀁. 𑁨.𑁨.𑁧𑁬].

𑀅𑀫𑀸𑀤𑀺𑀯𑀺𑀪𑀢𑁆𑀢𑀺𑀬𑀼𑀢𑁆𑀢𑀁 𑀲𑁆𑀬𑀸𑀤𑁆𑀬𑀦𑁆𑀢𑀧𑀤𑀁 𑀧𑀞𑀫𑀦𑁆𑀢𑁂𑀦 𑀲𑁆𑀬𑀸𑀤𑁆𑀬𑀦𑁆𑀢𑀧𑀤𑁂𑀦 𑀲𑀳 𑀏𑀓𑀢𑁆𑀣𑀁 𑀪𑀯𑀢𑀺, 𑀅𑀬𑀜𑁆𑀘 𑀲𑀫𑀸𑀲𑁄 𑀅𑀦𑁆𑀯𑀢𑁆𑀣𑀯𑀲𑁂𑀦 ‘‘𑀅𑀫𑀸𑀤𑀺𑀲𑀫𑀸𑀲𑁄’’𑀢𑀺 𑀘 ‘‘𑀢𑀧𑁆𑀧𑀼𑀭𑀺𑀲𑀲𑀫𑀸𑀲𑁄’’𑀢𑀺 𑀘 𑀯𑀼𑀘𑁆𑀘𑀢𑀺. 𑀇𑀫𑀺𑀦𑀸 𑀅𑀫𑀸𑀤𑀺𑀲𑀳𑀺𑀢𑀲𑁆𑀲 𑀯𑀸𑀓𑁆𑀬𑀲𑁆𑀲 𑀅𑀫𑀸𑀤𑁂𑀓𑀢𑁆𑀣𑀲𑀜𑁆𑀜𑀁 𑀓𑀢𑁆𑀯𑀸 𑀯𑀼𑀢𑁆𑀢𑀢𑁆𑀣𑀸𑀦𑀁 𑀯𑀺𑀪𑀢𑁆𑀢𑀻𑀦𑀁 𑀮𑁄𑀧𑁄, 𑀢𑀢𑁄 𑀏𑀓𑀢𑁆𑀣𑀧𑀤𑀦𑁆𑀢𑁂 𑀲𑁆𑀬𑀸𑀤𑁆𑀬𑀼𑀧𑁆𑀧𑀢𑁆𑀢𑀺 𑀳𑁄𑀢𑀺.

𑀲𑁄 𑀧𑀦 𑀲𑀫𑀸𑀲𑁄 𑀤𑀼𑀢𑀺𑀬𑀸𑀢𑀧𑁆𑀧𑀼𑀭𑀺𑀲𑁄, 𑀢𑀢𑀺𑀬𑀸𑀢𑀧𑁆𑀧𑀼𑀭𑀺𑀲𑁄, 𑀘𑀢𑀼𑀢𑁆𑀣𑀻𑀢𑀧𑁆𑀧𑀼𑀭𑀺𑀲𑁄, 𑀧𑀜𑁆𑀘𑀫𑀻𑀢𑀧𑁆𑀧𑀼𑀭𑀺𑀲𑁄, 𑀙𑀝𑁆𑀞𑀻𑀢𑀧𑁆𑀧𑀼𑀭𑀺𑀲𑁄, 𑀲𑀢𑁆𑀢𑀫𑀻𑀢𑀧𑁆𑀧𑀼𑀭𑀺𑀲𑁄𑀢𑀺 𑀙𑀩𑁆𑀩𑀺𑀥𑁄. 𑀏𑀓𑀫𑁂𑀓𑀲𑁆𑀫𑀺𑀜𑁆𑀘𑁂𑀢𑁆𑀣 ‘‘𑀦𑀺𑀘𑁆𑀘𑀲𑀫𑀸𑀲𑁄, 𑀅𑀦𑀺𑀘𑁆𑀘𑀲𑀫𑀸𑀲𑁄’’𑀢𑀺 𑀘 ‘‘𑀮𑀼𑀢𑁆𑀢𑀲𑀫𑀸𑀲𑁄, 𑀅𑀮𑀼𑀢𑁆𑀢𑀲𑀫𑀸𑀲𑁄’’𑀢𑀺 𑀘 𑀤𑀼𑀯𑀺𑀥𑁄.

𑀢𑀢𑁆𑀣 𑀤𑀼𑀢𑀺𑀬𑀸𑀢𑀧𑁆𑀧𑀼𑀭𑀺𑀲𑁄 𑀓𑀢𑁆𑀢𑀼𑀯𑀸𑀘𑀓𑁂𑀲𑀼 𑀕𑀢, 𑀦𑀺𑀲𑁆𑀲𑀺𑀢,-𑀅𑀢𑀻𑀢, 𑀅𑀢𑀺𑀓𑁆𑀓𑀦𑁆𑀢, 𑀧𑀢𑁆𑀢, 𑀆𑀧𑀦𑁆𑀦𑀇𑀘𑁆𑀘𑀸𑀤𑀻𑀲𑀼 𑀧𑀭𑁂𑀲𑀼 𑀳𑁄𑀢𑀺.

𑀕𑀸𑀫𑀁 𑀕𑀢𑁄𑀢𑀺 𑀕𑀸𑀫𑀕𑀢𑁄 𑀕𑀸𑀫𑀁 𑀕𑀢𑁄 𑀯𑀸. 𑀏𑀯𑀁 𑀅𑀭𑀜𑁆𑀜𑀕𑀢𑁄, 𑀪𑀽𑀫𑀺𑀕𑀢𑁄, 𑀭𑀸𑀚𑀸𑀦𑀁 𑀦𑀺𑀲𑁆𑀲𑀺𑀢𑁄𑀢𑀺 𑀭𑀸𑀚𑀦𑀺𑀲𑁆𑀲𑀺𑀢𑁄. 𑀏𑀯𑀁 𑀅𑀢𑁆𑀣𑀦𑀺𑀲𑁆𑀲𑀺𑀢𑁄, 𑀥𑀫𑁆𑀫𑀦𑀺𑀲𑁆𑀲𑀺𑀢𑁄. 𑀪𑀯𑀁 𑀅𑀢𑀻𑀢𑁄 𑀪𑀯𑀸𑀢𑀻𑀢𑁄. 𑀏𑀯𑀁 𑀪𑀬𑀸𑀢𑀻𑀢𑁄, 𑀓𑀸𑀮𑀸𑀢𑀻𑀢𑁄, 𑀔𑀡𑀸𑀢𑀻𑀢𑁄, 𑀧𑀫𑀸𑀡𑀁 𑀅𑀢𑀺𑀓𑁆𑀓𑀦𑁆𑀢𑁄𑀢𑀺 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑁄, 𑀲𑀼𑀔𑀁 𑀧𑀢𑁆𑀢𑁄𑀢𑀺 𑀲𑀼𑀔𑀧𑁆𑀧𑀢𑁆𑀢𑁄. 𑀏𑀯𑀁 𑀤𑀼𑀓𑁆𑀔𑀧𑁆𑀧𑀢𑁆𑀢𑁄, 𑀲𑁄𑀢𑀁 𑀆𑀧𑀦𑁆𑀦𑁄𑀢𑀺 𑀲𑁄𑀢𑀸𑀧𑀦𑁆𑀦𑁄. 𑀏𑀯𑀁 𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑁄, 𑀅𑀤𑁆𑀥𑀸𑀦𑀫𑀕𑁆𑀕𑀁 𑀧𑀝𑀺𑀧𑀦𑁆𑀦𑁄𑀢𑀺 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄, 𑀭𑀼𑀓𑁆𑀔𑀁 𑀆𑀭𑀽𑀴𑁆𑀳𑁄𑀢𑀺 𑀭𑀼𑀓𑁆𑀔𑀸𑀭𑀽𑀴𑁆𑀳𑁄, 𑀭𑀣𑀸𑀭𑀽𑀴𑁆𑀳𑁄, 𑀑𑀖𑀁 𑀢𑀺𑀡𑁆𑀡𑁄𑀢𑀺 𑀑𑀖𑀢𑀺𑀡𑁆𑀡𑁄 𑀑𑀖𑀁 𑀢𑀺𑀡𑁆𑀡𑁄 𑀯𑀸 𑀇𑀘𑁆𑀘𑀸𑀤𑀺.

𑀓𑀫𑁆𑀫𑀼𑀧𑀧𑀤𑀯𑀺𑀳𑀺𑀢𑁂𑀳𑀺 𑀓𑀺𑀢𑀦𑁆𑀢𑀧𑀤𑁂𑀳𑀺 𑀧𑀦 𑀦𑀺𑀘𑁆𑀘𑀲𑀫𑀸𑀲𑁄𑀬𑁂𑀯, 𑀓𑀼𑀫𑁆𑀪𑀁 𑀓𑀭𑁄𑀢𑀻𑀢𑀺 𑀓𑀼𑀫𑁆𑀪𑀓𑀸𑀭𑁄, 𑀭𑀣𑀓𑀸𑀭𑁄, 𑀧𑀢𑁆𑀢𑀁 𑀕𑀡𑁆𑀳𑀸𑀢𑀻𑀢𑀺 𑀧𑀢𑁆𑀢𑀕𑁆𑀕𑀸𑀳𑁄, 𑀅𑀢𑁆𑀣𑀁 𑀓𑀸𑀫𑁂𑀢𑀻𑀢𑀺 𑀅𑀢𑁆𑀣𑀓𑀸𑀫𑁄, 𑀥𑀫𑁆𑀫𑀓𑀸𑀫𑁄, 𑀯𑀺𑀦𑀬𑀁 𑀥𑀸𑀭𑁂𑀢𑀻𑀢𑀺 𑀯𑀺𑀦𑀬𑀥𑀭𑁄, 𑀥𑀫𑁆𑀫𑀥𑀭𑁄, 𑀩𑁆𑀭𑀳𑁆𑀫𑀁 𑀘𑀭𑀢𑀺 𑀲𑀻𑀮𑁂𑀦𑀸𑀢𑀺 𑀩𑁆𑀭𑀳𑁆𑀫𑀘𑀸𑀭𑀻, 𑀪𑀯𑀧𑀸𑀭𑀁 𑀕𑀘𑁆𑀙𑀢𑀺 𑀲𑀻𑀮𑁂𑀦𑀸𑀢𑀺 𑀪𑀯𑀧𑀸𑀭𑀕𑀽, 𑀲𑀩𑁆𑀩𑀁 𑀚𑀸𑀦𑀸𑀢𑀻𑀢𑀺 𑀲𑀩𑁆𑀩𑀜𑁆𑀜𑀽, 𑀅𑀢𑁆𑀣𑀜𑁆𑀜𑀽, 𑀥𑀫𑁆𑀫𑀜𑁆𑀜𑀽𑀇𑀘𑁆𑀘𑀸𑀤𑀺.

𑀩𑀳𑀼𑀮𑀸𑀥𑀺𑀓𑀸𑀭𑀢𑁆𑀢𑀸 𑀢, 𑀢𑀯𑀦𑁆𑀢𑀼, 𑀢𑀸𑀯𑀻, 𑀅𑀦𑁆𑀢, 𑀫𑀸𑀦, 𑀢𑀼𑀦, 𑀢𑁆𑀯𑀸𑀦, 𑀢𑁆𑀯𑀸, 𑀢𑀼𑀁, 𑀢𑀯𑁂𑀧𑀘𑁆𑀘𑀬𑀦𑁆𑀢𑁂𑀲𑀼 𑀧𑀭𑁂𑀲𑀼 𑀲𑀫𑀸𑀲𑁄 𑀦 𑀳𑁄𑀢𑀺, 𑀯𑀲𑁆𑀲𑀁 𑀯𑀼𑀢𑁆𑀣𑁄, 𑀑𑀤𑀦𑀁 𑀪𑀼𑀢𑁆𑀢𑁄, 𑀑𑀤𑀦𑀁 𑀪𑀼𑀢𑁆𑀢𑀯𑀸, 𑀑𑀤𑀦𑀁 𑀪𑀼𑀢𑁆𑀢𑀸𑀯𑀻, 𑀥𑀫𑁆𑀫𑀁 𑀲𑀼𑀡𑀦𑁆𑀢𑁄, 𑀥𑀫𑁆𑀫𑀁 𑀲𑀼𑀡𑀫𑀸𑀦𑁄 𑀥𑀫𑁆𑀫𑀁 𑀲𑁄𑀢𑀼𑀦, 𑀥𑀫𑁆𑀫𑀁 𑀲𑀼𑀢𑁆𑀯𑀸𑀦, 𑀥𑀫𑁆𑀫𑀁 𑀲𑀼𑀢𑁆𑀯𑀸, 𑀥𑀫𑁆𑀫𑀁 𑀲𑁄𑀢𑀼𑀁, 𑀥𑀫𑁆𑀫𑀁 𑀲𑁄𑀢𑀯𑁂.

𑀇𑀢𑀺 𑀤𑀼𑀢𑀺𑀬𑀸𑀢𑀧𑁆𑀧𑀼𑀭𑀺𑀲𑁄.

𑀢𑀢𑀺𑀬𑀸𑀢𑀧𑁆𑀧𑀼𑀭𑀺𑀲

𑀢𑀢𑀺𑀬𑀸𑀢𑀧𑁆𑀧𑀼𑀭𑀺𑀲𑁄 𑀓𑀫𑁆𑀫𑀯𑀸𑀘𑀓𑁂𑀲𑀼 𑀓𑀺𑀢𑀦𑁆𑀢𑁂𑀲𑀼 𑀘 𑀲𑀫𑁆𑀧𑀦𑁆𑀦, 𑀲𑀳𑀕𑀢𑀸𑀤𑀻𑀲𑀼 𑀘 𑀧𑀼𑀩𑁆𑀩, 𑀲𑀤𑀺𑀲, 𑀲𑀫, 𑀊𑀦𑀢𑁆𑀣, 𑀓𑀮𑀳, 𑀦𑀺𑀧𑀼𑀡,-𑀫𑀺𑀲𑁆𑀲𑀓, 𑀲𑀔𑀺𑀮𑀸𑀤𑀻𑀲𑀼 𑀘 𑀧𑀭𑁂𑀲𑀼 𑀳𑁄𑀢𑀺.

𑀩𑀼𑀤𑁆𑀥𑁂𑀦 𑀪𑀸𑀲𑀺𑀢𑁄 𑀩𑀼𑀤𑁆𑀥𑀪𑀸𑀲𑀺𑀢𑁄. 𑀏𑀯𑀁 𑀩𑀼𑀤𑁆𑀥𑀤𑁂𑀲𑀺𑀢𑁄, 𑀩𑀼𑀤𑁆𑀥𑀧𑀜𑁆𑀜𑀢𑁆𑀢𑁄, 𑀩𑀼𑀤𑁆𑀥𑀭𑀓𑁆𑀔𑀺𑀢𑁄, 𑀲𑀢𑁆𑀣𑀸𑀭𑀸 𑀯𑀡𑁆𑀡𑀺𑀢𑁄 𑀲𑀢𑁆𑀣𑀼𑀯𑀡𑁆𑀡𑀺𑀢𑁄, 𑀯𑀺𑀜𑁆𑀜𑀽𑀳𑀺 𑀕𑀭𑀳𑀺𑀢𑁄 𑀯𑀺𑀜𑁆𑀜𑀼𑀕𑀭𑀳𑀺𑀢𑁄, 𑀯𑀺𑀜𑁆𑀜𑀼𑀧𑀲𑀢𑁆𑀣𑁄, 𑀇𑀲𑁆𑀲𑀭𑁂𑀦 𑀓𑀢𑀁 𑀇𑀲𑁆𑀲𑀭𑀓𑀢𑀁, 𑀅𑀢𑁆𑀢𑀦𑀸 𑀓𑀢𑀁 𑀲𑀬𑀁𑀓𑀢𑀁, 𑀧𑀭𑁂𑀳𑀺 𑀓𑀢𑀁 𑀧𑀭𑀁𑀓𑀢𑀁, 𑀩𑀺𑀦𑁆𑀤𑀸𑀕𑀫𑁄. 𑀲𑀼𑀓𑁂𑀳𑀺 𑀆𑀳𑀝𑀁 𑀲𑀼𑀓𑀸𑀳𑀝𑀁, 𑀭𑀜𑁆𑀜𑀸 𑀳𑀢𑁄 𑀭𑀸𑀚𑀳𑀢𑁄, 𑀭𑁄𑀕𑁂𑀦 𑀧𑀻𑀴𑀺𑀢𑁄 𑀭𑁄𑀕𑀧𑀻𑀴𑀺𑀢𑁄, 𑀅𑀕𑁆𑀕𑀺𑀦𑀸 𑀤𑀟𑁆𑀠𑁄 𑀅𑀕𑁆𑀕𑀺𑀤𑀟𑁆𑀠𑁄, 𑀲𑀧𑁆𑀧𑁂𑀦 𑀤𑀝𑁆𑀞𑁄 𑀲𑀧𑁆𑀧𑀤𑀝𑁆𑀞𑁄, 𑀲𑀮𑁆𑀮𑁂𑀦 𑀯𑀺𑀤𑁆𑀥𑁄 𑀲𑀮𑁆𑀮𑀯𑀺𑀤𑁆𑀥𑁄, 𑀇𑀘𑁆𑀙𑀸𑀬 𑀅𑀧𑀓𑀢𑁄 𑀅𑀪𑀺𑀪𑀽𑀢𑁄 𑀇𑀘𑁆𑀙𑀸𑀧𑀓𑀢𑁄.

𑀲𑀻𑀮𑁂𑀦 𑀲𑀫𑁆𑀧𑀦𑁆𑀦𑁄 𑀲𑀻𑀮𑀲𑀫𑁆𑀧𑀦𑁆𑀦𑁄. 𑀏𑀯𑀁 𑀲𑀼𑀔𑀲𑀳𑀕𑀢𑀁, 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀁, 𑀫𑀺𑀢𑁆𑀢𑀲𑀁𑀲𑀕𑁆𑀕𑁄, 𑀧𑀺𑀬𑀲𑀫𑁆𑀧𑀬𑁄𑀕𑁄, 𑀧𑀺𑀬𑀯𑀺𑀧𑁆𑀧𑀬𑁄𑀕𑁄, 𑀚𑀸𑀢𑀺𑀬𑀸 𑀅𑀦𑁆𑀥𑁄 𑀚𑀘𑁆𑀘𑀦𑁆𑀥𑁄, 𑀕𑀼𑀡𑀳𑀻𑀦𑁄, 𑀕𑀼𑀡𑀯𑀼𑀟𑁆𑀠𑁄, 𑀘𑀢𑀼𑀯𑀕𑁆𑀕𑁂𑀦 𑀲𑀗𑁆𑀖𑁂𑀦 𑀓𑀭𑀡𑀻𑀬𑀁 𑀓𑀫𑁆𑀫𑀁 𑀘𑀢𑀼𑀯𑀕𑁆𑀕𑀓𑀭𑀡𑀻𑀬𑀁. 𑀏𑀯𑀁 𑀧𑀜𑁆𑀘𑀯𑀕𑁆𑀕𑀓𑀭𑀡𑀻𑀬𑀁, 𑀓𑀸𑀓𑁂𑀳𑀺 𑀧𑁂𑀬𑁆𑀬𑀸 𑀓𑀸𑀓𑀧𑁂𑀬𑁆𑀬𑀸, 𑀦𑀤𑀻.

𑀏𑀓𑀓𑁆𑀔𑀭𑁂𑀲𑀼 𑀧𑀭𑀧𑀤𑁂𑀲𑀼 𑀦𑀺𑀘𑁆𑀘𑀲𑀫𑀸𑀲𑁄, 𑀉𑀭𑁂𑀦 𑀕𑀘𑁆𑀙𑀢𑀻𑀢𑀺 𑀉𑀭𑀕𑁄, 𑀧𑀸𑀤𑁂𑀦 𑀧𑀺𑀯𑀢𑀻𑀢𑀺 𑀧𑀸𑀤𑀧𑁄 𑀇𑀘𑁆𑀘𑀸𑀤𑀺.

𑀓𑁆𑀯𑀘𑀺 𑀫𑀚𑁆𑀛𑁂𑀧𑀤𑀮𑁄𑀧𑁄, 𑀕𑀼𑀴𑁂𑀦 𑀲𑀁𑀲𑀝𑁆𑀞𑁄 𑀑𑀤𑀦𑁄 𑀕𑀼𑀴𑁄𑀤𑀦𑁄. 𑀏𑀯𑀁 𑀔𑀻𑀭𑁄𑀤𑀦𑁄, 𑀅𑀲𑁆𑀲𑁂𑀦 𑀬𑀼𑀢𑁆𑀢𑁄 𑀭𑀣𑁄 𑀅𑀲𑁆𑀲𑀭𑀣𑁄. 𑀏𑀯𑀁 𑀆𑀚𑀜𑁆𑀜𑀭𑀣𑁄, 𑀫𑀕𑁆𑀕𑁂𑀦 𑀲𑀫𑁆𑀧𑀬𑀼𑀢𑁆𑀢𑀁 𑀘𑀺𑀢𑁆𑀢𑀁 𑀫𑀕𑁆𑀕𑀘𑀺𑀢𑁆𑀢𑀁, 𑀚𑀫𑁆𑀩𑀼𑀬𑀸 𑀧𑀜𑁆𑀜𑀸𑀢𑁄 𑀤𑀻𑀧𑁄 𑀚𑀫𑁆𑀩𑀼𑀤𑀻𑀧𑁄, 𑀏𑀓𑁂𑀦 𑀅𑀥𑀺𑀓𑀸 𑀤𑀲 𑀏𑀓𑀸𑀤𑀲 𑀇𑀘𑁆𑀘𑀸𑀤𑀺.

𑀧𑀼𑀩𑁆𑀩𑀸𑀤𑀻𑀲𑀼 𑁋 𑀫𑀸𑀲𑁂𑀦 𑀧𑀼𑀩𑁆𑀩𑁄 𑀫𑀸𑀲𑀧𑀼𑀩𑁆𑀩𑁄, 𑀫𑀸𑀢𑀭𑀸 𑀲𑀤𑀺𑀲𑁄 𑀫𑀸𑀢𑀼𑀲𑀤𑀺𑀲𑁄. 𑀏𑀯𑀁 𑀫𑀸𑀢𑀼𑀲𑀫𑁄, 𑀧𑀺𑀢𑀼𑀲𑀫𑁄, 𑀏𑀓𑁂𑀦 𑀊𑀦𑀸 𑀯𑀻𑀲𑀢𑀺 𑀏𑀓𑀽𑀦𑀯𑀻𑀲𑀢𑀺, 𑀲𑀻𑀮𑁂𑀦 𑀯𑀺𑀓𑀮𑁄 𑀲𑀻𑀮𑀯𑀺𑀓𑀮𑁄, 𑀅𑀲𑀺𑀦𑀸 𑀓𑀮𑀳𑁄 𑀅𑀲𑀺𑀓𑀮𑀳𑁄, 𑀯𑀸𑀘𑀸𑀬 𑀦𑀺𑀧𑀼𑀡𑁄 𑀯𑀸𑀘𑀸𑀦𑀺𑀧𑀼𑀡𑁄. 𑀏𑀯𑀁 𑀬𑀸𑀯𑀓𑀸𑀮𑀺𑀓𑀲𑀫𑁆𑀫𑀺𑀲𑁆𑀲𑀁, 𑀯𑀸𑀘𑀸𑀲𑀔𑀺𑀮𑁄, 𑀲𑀢𑁆𑀣𑀸𑀭𑀸 𑀲𑀤𑀺𑀲𑁄 𑀲𑀢𑁆𑀣𑀼𑀓𑀧𑁆𑀧𑁄, 𑀧𑀼𑀜𑁆𑀜𑁂𑀦 𑀅𑀢𑁆𑀣𑁄 𑀧𑀼𑀜𑁆𑀜𑀢𑁆𑀣𑁄, 𑀧𑀼𑀜𑁆𑀜𑁂𑀦 𑀅𑀢𑁆𑀣𑀺𑀓𑁄 𑀧𑀼𑀜𑁆𑀜𑀢𑁆𑀣𑀺𑀓𑁄. 𑀏𑀯𑀁 𑀲𑁂𑀬𑁆𑀬𑀢𑁆𑀣𑀺𑀓𑁄, 𑀫𑀳𑀕𑁆𑀖𑀢𑁆𑀣𑀺𑀓𑁄, 𑀕𑀼𑀡𑁂𑀦 𑀅𑀥𑀺𑀓𑁄 𑀕𑀼𑀡𑀸𑀥𑀺𑀓𑁄 𑀇𑀘𑁆𑀘𑀸𑀤𑀺.

𑀩𑀳𑀼𑀮𑀸𑀥𑀺𑀓𑀸𑀭𑀸 𑀓𑁆𑀯𑀘𑀺 𑀲𑀫𑀸𑀲𑁄 𑀦 𑀳𑁄𑀢𑀺, 𑀨𑀭𑀲𑀼𑀦𑀸 𑀙𑀺𑀦𑁆𑀦𑀁, 𑀓𑀸𑀓𑁂𑀳𑀺 𑀧𑀸𑀢𑀩𑁆𑀩𑀸, 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸 𑀥𑀫𑁆𑀫𑀸, 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸 𑀥𑀫𑁆𑀫𑀸 𑀇𑀘𑁆𑀘𑀸𑀤𑀺.

𑀇𑀢𑀺 𑀢𑀢𑀺𑀬𑀸𑀢𑀧𑁆𑀧𑀼𑀭𑀺𑀲𑁄.

𑀘𑀢𑀼𑀢𑁆𑀣𑀻𑀢𑀧𑁆𑀧𑀼𑀭𑀺𑀲

𑀘𑀢𑀼𑀢𑁆𑀣𑀻𑀢𑀧𑁆𑀧𑀼𑀭𑀺𑀲𑁄 𑀢𑀤𑀢𑁆𑀣𑁂 𑀯𑀸 𑀅𑀢𑁆𑀣, 𑀳𑀺𑀢, 𑀤𑁂𑀬𑁆𑀬𑀸𑀤𑀻𑀲𑀼 𑀯𑀸 𑀧𑀭𑁂𑀲𑀼 𑀳𑁄𑀢𑀺.

𑀓𑀣𑀺𑀦𑀲𑁆𑀲 𑀤𑀼𑀲𑁆𑀲𑀁 𑀓𑀣𑀺𑀦𑀤𑀼𑀲𑁆𑀲𑀁, 𑀓𑀣𑀺𑀦𑀢𑁆𑀣𑀸𑀬 𑀆𑀪𑀝𑀁 𑀤𑀼𑀲𑁆𑀲𑀦𑁆𑀢𑀺 𑀅𑀢𑁆𑀣𑁄. 𑀏𑀯𑀁 𑀓𑀣𑀺𑀦𑀘𑀻𑀯𑀭𑀁, 𑀓𑀣𑀺𑀦𑀸𑀬 𑀤𑀼𑀲𑁆𑀲𑀁, 𑀓𑀣𑀺𑀦𑀸𑀬 𑀘𑀻𑀯𑀭𑀦𑁆𑀢𑀺𑀧𑀺 𑀬𑀼𑀚𑁆𑀚𑀢𑀺, 𑀓𑀣𑀺𑀦𑀢𑁆𑀣𑀸𑀭𑀸𑀬𑀸𑀢𑀺 𑀅𑀢𑁆𑀣𑁄. 𑀘𑀻𑀯𑀭𑀸𑀬 𑀤𑀼𑀲𑁆𑀲𑀁 𑀘𑀻𑀯𑀭𑀤𑀼𑀲𑁆𑀲𑀁. 𑀏𑀯𑀁 𑀘𑀻𑀯𑀭𑀫𑀽𑀮𑀁 [𑀘𑀻𑀯𑀭𑀫𑀽𑀮𑁆𑀬𑀁 (𑀭𑀽. 𑀦𑀻.)], 𑀲𑀗𑁆𑀖𑀲𑁆𑀲 𑀆𑀪𑀝𑀁 𑀪𑀢𑁆𑀢𑀁 𑀲𑀗𑁆𑀖𑀪𑀢𑁆𑀢𑀁, 𑀲𑀗𑁆𑀖𑀢𑁆𑀣𑀸𑀬 𑀯𑀸 𑀧𑀝𑀺𑀬𑀢𑁆𑀢𑀁 𑀪𑀢𑁆𑀢𑀁 𑀲𑀗𑁆𑀖𑀪𑀢𑁆𑀢𑀁. 𑀏𑀯𑀁 𑀆𑀕𑀦𑁆𑀢𑀼𑀓𑀪𑀢𑁆𑀢𑀁, 𑀕𑀫𑀺𑀓𑀪𑀢𑁆𑀢𑀁, 𑀕𑀺𑀮𑀸𑀦𑀪𑀢𑁆𑀢𑀁.

𑀲𑀗𑁆𑀖𑀲𑁆𑀲 𑀅𑀢𑁆𑀣𑁄 𑀲𑀗𑁆𑀖𑀢𑁆𑀣𑁄, 𑀮𑁄𑀓𑀲𑁆𑀲 𑀳𑀺𑀢𑁄 𑀮𑁄𑀓𑀳𑀺𑀢𑁄, 𑀩𑀼𑀤𑁆𑀥𑀲𑁆𑀲 𑀤𑁂𑀬𑁆𑀬𑀁 𑀩𑀼𑀤𑁆𑀥𑀤𑁂𑀬𑁆𑀬𑀁, 𑀩𑀼𑀤𑁆𑀥𑀲𑁆𑀲 𑀧𑀡𑀸𑀫𑁄 𑀩𑀼𑀤𑁆𑀥𑀧𑁆𑀧𑀡𑀸𑀫𑁄. 𑀏𑀯𑀁 𑀩𑀼𑀤𑁆𑀥𑀣𑁄𑀫𑀦𑀸, 𑀩𑀼𑀤𑁆𑀥𑀼𑀧𑀝𑁆𑀞𑀸𑀦𑀁, 𑀲𑀼𑀢𑁆𑀢𑀲𑁆𑀲 𑀅𑀦𑀼𑀮𑁄𑀫𑀁 𑀲𑀼𑀢𑁆𑀢𑀸𑀦𑀼𑀮𑁄𑀫𑀁. 𑀏𑀯𑀁 𑀲𑀼𑀢𑁆𑀢𑀸𑀦𑀼𑀭𑀽𑀧𑀁, 𑀲𑀼𑀢𑁆𑀢𑀸𑀦𑀼𑀓𑀽𑀮𑀁, 𑀲𑀼𑀢𑁆𑀢𑀸𑀦𑀼𑀕𑀼𑀡𑀁, 𑀞𑀸𑀦𑀲𑁆𑀲 𑀅𑀭𑀳𑀁 𑀞𑀸𑀦𑀸𑀭𑀳𑀁, 𑀭𑀜𑁆𑀜𑁄 𑀅𑀭𑀳𑀁 𑀭𑀸𑀚𑀸𑀭𑀳𑀁. 𑀏𑀯𑀁 𑀭𑀸𑀚𑀕𑁆𑀖𑀁, 𑀭𑀸𑀚𑀤𑁂𑀬𑁆𑀬𑀁, 𑀓𑀢𑁆𑀢𑀼𑀁 𑀓𑀸𑀫𑁂𑀢𑀻𑀢𑀺 𑀓𑀢𑁆𑀢𑀼𑀓𑀸𑀫𑁄. 𑀏𑀯𑀁 𑀕𑀦𑁆𑀢𑀼𑀓𑀸𑀫𑁄, 𑀓𑀣𑁂𑀢𑀼𑀓𑀸𑀫𑁄, 𑀤𑀝𑁆𑀞𑀼𑀓𑀸𑀫𑁄, 𑀲𑁄𑀢𑀼𑀓𑀸𑀫𑁄. 𑀏𑀢𑁆𑀣 𑀘 𑀢𑀼𑀫𑀦𑁆𑀢𑀲𑁆𑀲 𑀅𑀲𑀗𑁆𑀔𑁆𑀬𑀢𑁆𑀢𑀸 ‘𑀅𑀲𑀗𑁆𑀔𑁆𑀬𑁂𑀳𑀺 𑀲𑀩𑁆𑀩𑀸𑀲’𑀦𑁆𑀢𑀺 𑀢𑀢𑁄 𑀦𑀺𑀘𑁆𑀘𑀁 𑀘𑀢𑀼𑀢𑁆𑀣𑀻𑀮𑁄𑀧𑁄 𑀳𑁄𑀢𑀺, 𑀲𑀫𑀸𑀲𑁂 𑀓𑀢𑁂 𑀦𑀺𑀘𑁆𑀘𑀁 𑀦𑀺𑀕𑁆𑀕𑀳𑀻𑀢𑀮𑁄𑀧𑁄 𑀘. ‘‘𑀲𑀗𑁆𑀖𑀲𑁆𑀲 𑀤𑀸𑀢𑀩𑁆𑀩𑀁, 𑀲𑀗𑁆𑀖𑀲𑁆𑀲 𑀤𑀸𑀢𑀼𑀁’’ 𑀇𑀘𑁆𑀘𑀸𑀤𑀻𑀲𑀼 𑀲𑀫𑀸𑀲𑁄 𑀦 𑀳𑁄𑀢𑀺.

𑀇𑀢𑀺 𑀘𑀢𑀼𑀢𑁆𑀣𑀻𑀢𑀧𑁆𑀧𑀼𑀭𑀺𑀲𑁄.

𑀧𑀜𑁆𑀘𑀫𑀻𑀢𑀧𑁆𑀧𑀼𑀭𑀺𑀲

𑀧𑀜𑁆𑀘𑀫𑀻𑀢𑀧𑁆𑀧𑀼𑀭𑀺𑀲𑁄 𑀅𑀧𑀕𑀫𑀦, 𑀪𑀬, 𑀯𑀺𑀭𑀢𑀺, 𑀫𑁄𑀘𑀦𑀸𑀤𑀺𑀅𑀢𑁆𑀣𑁂𑀲𑀼 𑀧𑀭𑁂𑀲𑀼 𑀳𑁄𑀢𑀺.

𑀫𑁂𑀣𑀼𑀦𑀸 𑀅𑀧𑁂𑀢𑁄𑀢𑀺 𑀫𑁂𑀣𑀼𑀦𑀸𑀧𑁂𑀢𑁄, 𑀧𑀮𑀸𑀲𑀢𑁄 𑀅𑀧𑀕𑀢𑁄𑀢𑀺 𑀧𑀮𑀸𑀲𑀸𑀧𑀕𑀢𑁄, 𑀦𑀕𑀭𑀫𑁆𑀳𑀸 𑀦𑀺𑀕𑁆𑀕𑀢𑁄𑀢𑀺 𑀦𑀕𑀭𑀦𑀺𑀕𑁆𑀕𑀢𑁄, 𑀧𑀺𑀡𑁆𑀟𑀧𑀸𑀢𑀢𑁄 𑀧𑀝𑀺𑀓𑁆𑀓𑀦𑁆𑀢𑁄𑀢𑀺 𑀧𑀺𑀡𑁆𑀟𑀧𑀸𑀢𑀧𑁆𑀧𑀝𑀺𑀓𑁆𑀓𑀦𑁆𑀢𑁄. 𑀏𑀯𑀁 𑀕𑀸𑀫𑀦𑀺𑀓𑁆𑀔𑀦𑁆𑀢𑁄, 𑀭𑀼𑀓𑁆𑀔𑀧𑀢𑀺𑀢𑁄, 𑀲𑀸𑀲𑀦𑀫𑁆𑀳𑀸 𑀘𑀼𑀢𑁄𑀢𑀺 𑀲𑀸𑀲𑀦𑀘𑀼𑀢𑁄, 𑀆𑀧𑀢𑁆𑀢𑀺𑀬𑀸 𑀯𑀼𑀝𑁆𑀞𑀸𑀦𑀁 𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀁, 𑀉𑀤𑀓𑀢𑁄 𑀉𑀕𑁆𑀕𑀢𑁄 𑀉𑀤𑀓𑀼𑀕𑁆𑀕𑀢𑁄, 𑀪𑀯𑀢𑁄 𑀦𑀺𑀲𑁆𑀲𑀝𑁄 𑀪𑀯𑀦𑀺𑀲𑁆𑀲𑀝𑁄, 𑀔𑀦𑁆𑀥𑀲𑀗𑁆𑀕𑀳𑀢𑁄 𑀦𑀺𑀲𑁆𑀲𑀝𑀦𑁆𑀢𑀺 𑀔𑀦𑁆𑀥𑀲𑀗𑁆𑀕𑀳𑀦𑀺𑀲𑁆𑀲𑀝𑀁, 𑀘𑁄𑀭𑀫𑁆𑀳𑀸 𑀪𑀻𑀢𑁄𑀢𑀺 𑀘𑁄𑀭𑀪𑀻𑀢𑁄, 𑀧𑀸𑀧𑀢𑁄 𑀪𑀸𑀬𑀢𑀺 𑀲𑀻𑀮𑁂𑀦𑀸𑀢𑀺 𑀧𑀸𑀧𑀪𑀻𑀭𑀼𑀓𑁄, 𑀧𑀸𑀧𑀢𑁄 𑀚𑀺𑀕𑀼𑀘𑁆𑀙𑀢𑀺 𑀲𑀻𑀮𑁂𑀦𑀸𑀢𑀺 𑀧𑀸𑀧𑀚𑀺𑀕𑀼𑀘𑁆𑀙𑀻, 𑀯𑀝𑁆𑀝𑀢𑁄 𑀦𑀺𑀩𑁆𑀩𑀺𑀦𑁆𑀤𑀢𑀻𑀢𑀺 𑀯𑀝𑁆𑀝𑀦𑀺𑀩𑁆𑀩𑀺𑀦𑁆𑀦𑁄, 𑀓𑀸𑀬𑀤𑀼𑀘𑁆𑀘𑀭𑀺𑀢𑀢𑁄 𑀯𑀺𑀭𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑀯𑀺𑀭𑀢𑀺. 𑀏𑀯𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀯𑀺𑀭𑀢𑀺, 𑀩𑀦𑁆𑀥𑀦𑀸 𑀫𑀼𑀢𑁆𑀢𑁄 𑀩𑀦𑁆𑀥𑀦𑀫𑀼𑀢𑁆𑀢𑁄. 𑀏𑀯𑀁 𑀩𑀦𑁆𑀥𑀦𑀫𑁄𑀓𑁆𑀔𑁄, 𑀓𑀫𑁆𑀫𑀢𑁄 𑀲𑀫𑀼𑀝𑁆𑀞𑀺𑀢𑀁 𑀓𑀫𑁆𑀫𑀲𑀫𑀼𑀝𑁆𑀞𑀺𑀢𑀁. 𑀏𑀯𑀁 𑀓𑀫𑁆𑀫𑀚𑀸𑀢𑀁, 𑀓𑀫𑁆𑀫𑀲𑀫𑁆𑀪𑀽𑀢𑀁, 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀁, 𑀮𑁄𑀓𑀢𑁄 𑀅𑀕𑁆𑀕𑁄 𑀮𑁄𑀓𑀕𑁆𑀕𑁄. 𑀏𑀯𑀁 𑀮𑁄𑀓𑀚𑁂𑀝𑁆𑀞𑁄, 𑀮𑁄𑀓𑀼𑀢𑁆𑀢𑀫𑁄, 𑀲𑀩𑁆𑀩𑁂𑀳𑀺 𑀚𑁂𑀝𑁆𑀞𑁄 𑀲𑀩𑁆𑀩𑀚𑁂𑀝𑁆𑀞𑁄, 𑀲𑀩𑁆𑀩𑁂𑀳𑀺 𑀓𑀦𑀺𑀝𑁆𑀞𑁄 𑀲𑀩𑁆𑀩𑀓𑀦𑀺𑀝𑁆𑀞𑁄. 𑀏𑀯𑀁 𑀲𑀩𑁆𑀩𑀳𑀻𑀦𑁄, 𑀲𑀩𑁆𑀩𑀧𑀘𑁆𑀙𑀺𑀫𑁄, 𑀉𑀓𑁆𑀓𑀝𑁆𑀞𑀢𑁄 𑀉𑀓𑁆𑀓𑀝𑁆𑀞𑁄𑀢𑀺 𑀉𑀓𑁆𑀓𑀝𑁆𑀞𑀼𑀓𑁆𑀓𑀝𑁆𑀞𑁄, 𑀑𑀫𑀓𑀢𑁄 𑀑𑀫𑀓𑁄𑀢𑀺 𑀑𑀫𑀓𑁄𑀫𑀓𑁄.

𑀓𑁆𑀯𑀘𑀺 𑀦𑀺𑀘𑁆𑀘𑀲𑀫𑀸𑀲𑁄 𑀳𑁄𑀢𑀺, 𑀫𑀸𑀢𑀺𑀢𑁄 𑀚𑀸𑀢𑁄 𑀫𑀸𑀢𑀼𑀚𑁄. 𑀏𑀯𑀁 𑀧𑀺𑀢𑀼𑀚𑁄, 𑀓𑀫𑁆𑀫𑀚𑀁, 𑀘𑀺𑀢𑁆𑀢𑀚𑀁, 𑀉𑀢𑀼𑀚𑀁 𑀇𑀘𑁆𑀘𑀸𑀤𑀺.

𑀇𑀢𑀺 𑀧𑀜𑁆𑀘𑀫𑀻𑀢𑀧𑁆𑀧𑀼𑀭𑀺𑀲𑁄.

𑀙𑀝𑁆𑀞𑀻𑀢𑀧𑁆𑀧𑀼𑀭𑀺𑀲

𑀭𑀜𑁆𑀜𑁄 𑀧𑀼𑀢𑁆𑀢𑁄 𑀭𑀸𑀚𑀧𑀼𑀢𑁆𑀢𑁄. 𑀏𑀯𑀁 𑀭𑀸𑀚𑀧𑀼𑀭𑀺𑀲𑁄, 𑀩𑀼𑀤𑁆𑀥𑀲𑀸𑀯𑀓𑁄, 𑀲𑀫𑀼𑀤𑁆𑀤𑀖𑁄𑀲𑁄, 𑀥𑀜𑁆𑀜𑀸𑀦𑀁 𑀭𑀸𑀲𑀺 𑀥𑀜𑁆𑀜𑀭𑀸𑀲𑀺, 𑀫𑀢𑁆𑀢𑀺𑀓𑀸𑀬 𑀧𑀢𑁆𑀢𑁄𑀢𑀺 𑀫𑀢𑁆𑀢𑀺𑀓𑀸𑀧𑀢𑁆𑀢𑁄, 𑀯𑀺𑀓𑀸𑀭𑀲𑀫𑁆𑀩𑀦𑁆𑀥𑁂 𑀙𑀝𑁆𑀞𑀻, 𑀫𑀢𑁆𑀢𑀺𑀓𑀸𑀫𑀬𑀧𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀏𑀯𑀁 𑀲𑀼𑀯𑀡𑁆𑀡𑀓𑀝𑀸𑀳𑀁, 𑀲𑀼𑀯𑀡𑁆𑀡𑀪𑀸𑀚𑀦𑀁, 𑀧𑀸𑀦𑀻𑀬𑀲𑁆𑀲 𑀣𑀸𑀮𑀓𑀁 𑀧𑀸𑀦𑀻𑀬𑀣𑀸𑀮𑀓𑀁.

𑀲𑀫𑀸𑀲𑀫𑀚𑁆𑀛𑁂 𑀈, 𑀊𑀦𑀁 𑀩𑀳𑀼𑀮𑀁 𑀭𑀲𑁆𑀲𑀢𑁆𑀢𑀁, 𑀤𑀡𑁆𑀟𑀺𑀦𑁄 𑀓𑀼𑀮𑀁 𑀤𑀡𑁆𑀟𑀺𑀓𑀼𑀮𑀁, 𑀳𑀢𑁆𑀣𑀺𑀧𑀤𑀁, 𑀇𑀢𑁆𑀣𑀺𑀭𑀽𑀧𑀁, 𑀦𑀤𑀺𑀓𑀽𑀮𑀁, 𑀦𑀤𑀺𑀢𑀻𑀭𑀁, 𑀪𑀺𑀓𑁆𑀔𑀼𑀦𑀻𑀦𑀁 𑀲𑀗𑁆𑀖𑁄 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄, 𑀚𑀫𑁆𑀩𑀼𑀬𑀸 𑀲𑀸𑀔𑀸 𑀚𑀫𑁆𑀩𑀼𑀲𑀸𑀔𑀸 𑀇𑀘𑁆𑀘𑀸𑀤𑀺.

𑀅𑀦𑁆𑀢, 𑀫𑀸𑀦, 𑀦𑀺𑀤𑁆𑀥𑀸𑀭𑀡𑀺𑀬, 𑀧𑀽𑀭𑀡, 𑀪𑀸𑀯, 𑀲𑀼𑀳𑀺𑀢𑀢𑁆𑀣𑁂𑀳𑀺 𑀲𑀫𑀸𑀲𑁄 𑀦 𑀳𑁄𑀢𑀺, 𑀫𑀫𑀁 𑀅𑀦𑀼𑀓𑀼𑀩𑁆𑀩𑀦𑁆𑀢𑁄, 𑀫𑀫𑀁 𑀅𑀦𑀼𑀓𑀼𑀭𑀼𑀫𑀸𑀦𑁄, 𑀕𑀼𑀦𑁆𑀦𑀁 𑀓𑀡𑁆𑀳𑀸 𑀲𑀫𑁆𑀧𑀦𑁆𑀦𑀔𑀻𑀭𑀢𑀫𑀸. 𑀯𑀺𑀪𑀢𑁆𑀢𑀸𑀯𑀥𑀺𑀙𑀝𑁆𑀞𑀺𑀬𑀸 𑀧𑀦 𑀳𑁄𑀢𑀺𑀬𑁂𑀯, 𑀦𑀭𑀸𑀦𑀁 𑀉𑀢𑁆𑀢𑀫𑁄 𑀦𑀭𑀼𑀢𑁆𑀢𑀫𑁄, 𑀦𑀭𑀲𑁂𑀝𑁆𑀞𑁄, 𑀦𑀭𑀯𑀭𑁄, 𑀕𑀡𑀸𑀦𑀁 𑀉𑀢𑁆𑀢𑀫𑁄 𑀕𑀡𑀼𑀢𑁆𑀢𑀫𑁄, 𑀤𑁆𑀯𑀺𑀧𑀤𑀸𑀦𑀁 𑀉𑀢𑁆𑀢𑀫𑁄 𑀤𑁆𑀯𑀺𑀧𑀤𑀼𑀢𑁆𑀢𑀫𑁄 𑀇𑀘𑁆𑀘𑀸𑀤𑀺. 𑀲𑀺𑀲𑁆𑀲𑀸𑀦𑀁 𑀧𑀜𑁆𑀘𑀫𑁄 𑀲𑀺𑀲𑁆𑀲𑁄, 𑀓𑀧𑁆𑀧𑀲𑁆𑀲 𑀢𑀢𑀺𑀬𑁄 𑀪𑀸𑀕𑁄, 𑀧𑀓𑁆𑀔𑀲𑁆𑀲 𑀅𑀝𑁆𑀞𑀫𑀻, 𑀧𑀝𑀲𑁆𑀲 𑀲𑀼𑀓𑁆𑀓𑀢𑀸, 𑀭𑀽𑀧𑀲𑁆𑀲 𑀮𑀳𑀼𑀢𑀸, 𑀭𑀽𑀧𑀲𑁆𑀲 𑀫𑀼𑀤𑀼𑀢𑀸, 𑀭𑀽𑀧𑀲𑁆𑀲 𑀓𑀫𑁆𑀫𑀜𑁆𑀜𑀢𑀸. 𑀓𑁆𑀯𑀘𑀺 𑀳𑁄𑀢𑀺, 𑀓𑀸𑀬𑀮𑀳𑀼𑀢𑀸, 𑀘𑀺𑀢𑁆𑀢𑀮𑀳𑀼𑀢𑀸, 𑀩𑀼𑀤𑁆𑀥𑀲𑀼𑀩𑀼𑀤𑁆𑀥𑀢𑀸. 𑀥𑀫𑁆𑀫𑀲𑀼𑀥𑀫𑁆𑀫𑀢𑀸, 𑀨𑀮𑀸𑀦𑀁 𑀲𑀼𑀳𑀺𑀢𑁄, 𑀨𑀮𑀸𑀦𑀁 𑀢𑀺𑀢𑁆𑀢𑁄, 𑀨𑀮𑀸𑀦𑀁 𑀅𑀲𑀺𑀢𑁄, 𑀓𑀭𑀡𑀢𑁆𑀣𑁂 𑀙𑀝𑁆𑀞𑀻.

‘‘𑀪𑀝𑁄 𑀭𑀜𑁆𑀜𑁄 𑀧𑀼𑀢𑁆𑀢𑁄 𑀤𑁂𑀯𑀤𑀢𑁆𑀢𑀲𑁆𑀲𑀸’’𑀢𑀺 𑀏𑀢𑁆𑀣 ‘𑀭𑀸𑀚𑀧𑀼𑀢𑁆𑀢𑁄’𑀢𑀺 𑀦 𑀳𑁄𑀢𑀺 𑀅𑀜𑁆𑀜𑀫𑀜𑁆𑀜𑀸𑀦𑀧𑁂𑀓𑁆𑀔𑀢𑁆𑀢𑀸. ‘‘𑀤𑁂𑀯𑀤𑀢𑁆𑀢𑀲𑁆𑀲 𑀓𑀡𑁆𑀳𑀸 𑀤𑀦𑁆𑀢𑀸’’𑀢𑀺 𑀏𑀢𑁆𑀣 ‘𑀤𑁂𑀯𑀤𑀢𑁆𑀢𑀓𑀡𑁆𑀳𑀤𑀦𑁆𑀢𑀸’𑀢𑀺 𑀦 𑀳𑁄𑀢𑀺 𑀅𑀜𑁆𑀜𑀲𑀸𑀧𑁂𑀓𑁆𑀔𑀢𑁆𑀢𑀸 [𑀦𑀻. 𑁬𑁯𑁦]. 𑀅𑀜𑁆𑀜𑀲𑀸𑀧𑁂𑀓𑁆𑀔𑀢𑁆𑀢𑁂𑀧𑀺 𑀦𑀺𑀘𑁆𑀘𑀁 𑀲𑀫𑁆𑀩𑀦𑁆𑀥𑀻𑀧𑁂𑀓𑁆𑀔𑀲𑀤𑁆𑀤𑀸𑀦𑀁 𑀲𑀫𑀸𑀲𑁄 𑀳𑁄𑀢𑀺 𑀯𑀸𑀓𑁆𑀬𑁂 𑀯𑀺𑀬 𑀲𑀫𑀸𑀲𑁂𑀧𑀺 𑀲𑀫𑁆𑀩𑀦𑁆𑀥𑀲𑁆𑀲 𑀯𑀺𑀤𑀺𑀢𑀢𑁆𑀢𑀸. 𑀯𑀼𑀢𑁆𑀢𑀜𑁆𑀘 ‘‘𑀲𑀢𑀺𑀧𑀺 𑀲𑀸𑀧𑁂𑀓𑁆𑀔𑀢𑁆𑀢𑁂 𑀕𑀫𑀓𑀢𑁆𑀢𑀸 𑀲𑀫𑀸𑀲𑁄 𑀳𑁄𑀢𑀻’’𑀢𑀺 [𑀓. 𑁩𑁨𑁮; 𑀭𑀽. 𑁩𑁫𑁨; 𑀦𑀻. 𑁬𑁯𑁧], 𑀤𑁂𑀯𑀤𑀢𑁆𑀢𑀕𑀼𑀭𑀼𑀓𑀼𑀮𑀁, 𑀭𑀸𑀚𑀤𑀸𑀲𑀻𑀧𑀼𑀢𑁆𑀢𑁄, 𑀤𑁂𑀯𑀤𑀸𑀲𑀻𑀧𑀼𑀢𑁆𑀢𑁄 𑀇𑀘𑁆𑀘𑀸𑀤𑀺. 𑀢𑀢𑁆𑀣 𑀤𑁂𑀯𑀤𑀢𑁆𑀢𑀲𑁆𑀲 𑀕𑀼𑀭𑀼 𑀤𑁂𑀯𑀤𑀢𑁆𑀢𑀕𑀼𑀭𑀼, 𑀢𑀲𑁆𑀲 𑀓𑀼𑀮𑀁 𑀤𑁂𑀯𑀤𑀢𑁆𑀢𑀕𑀼𑀭𑀼𑀓𑀼𑀮𑀦𑁆𑀢𑀺 𑀯𑀺𑀕𑁆𑀕𑀳𑁄. 𑀕𑀼𑀭𑀼𑀦𑁄 𑀓𑀼𑀮𑀁 𑀕𑀼𑀭𑀼𑀓𑀼𑀮𑀁, 𑀤𑁂𑀯𑀤𑀢𑁆𑀢𑀲𑁆𑀲 𑀕𑀼𑀭𑀼𑀓𑀼𑀮𑀁 𑀤𑁂𑀯𑀤𑀢𑁆𑀢𑀕𑀼𑀭𑀼𑀓𑀼𑀮𑀦𑁆𑀢𑀺𑀧𑀺 𑀯𑀤𑀦𑁆𑀢𑀺. ‘‘𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀩𑀺𑀫𑁆𑀩𑀺𑀲𑀸𑀭𑀲𑁆𑀲 𑀧𑀼𑀢𑁆𑀢𑁄’’𑀢𑀺 𑀏𑀢𑁆𑀣𑀧𑀺 𑀅𑀜𑁆𑀜𑀲𑀸𑀧𑁂𑀓𑁆𑀔𑀢𑁆𑀢𑀸 ‘𑀩𑀺𑀫𑁆𑀩𑀺𑀲𑀸𑀭𑀧𑀼𑀢𑁆𑀢𑁄’𑀢𑀺 𑀦 𑀳𑁄𑀢𑀺, 𑀭𑀜𑁆𑀜𑁄 𑀕𑁄 𑀘 𑀅𑀲𑁆𑀲𑁄 𑀘 𑀧𑀼𑀭𑀺𑀲𑁄 𑀘𑀸𑀢𑀺 𑀅𑀢𑁆𑀣𑁂 ‘𑀭𑀸𑀚𑀕𑀯𑀲𑁆𑀲𑀧𑀼𑀭𑀺𑀲𑀸’𑀢𑀺 𑀳𑁄𑀢𑀺 𑀤𑁆𑀯𑀦𑁆𑀤𑀢𑁄 𑀧𑀼𑀩𑁆𑀩𑀧𑀤𑀲𑁆𑀲 𑀤𑁆𑀯𑀦𑁆𑀤𑀧𑀤𑁂𑀳𑀺𑀧𑀺 𑀧𑀘𑁆𑀘𑁂𑀓𑀁 𑀲𑀫𑁆𑀩𑀦𑁆𑀥𑀲𑁆𑀲 𑀯𑀺𑀤𑀺𑀢𑀢𑁆𑀢𑀸. 𑀢𑀣𑀸 𑀤𑁆𑀯𑀦𑁆𑀤𑀢𑁄 𑀧𑀭𑀧𑀤𑀲𑁆𑀲𑀧𑀺, 𑀦𑀭𑀸𑀦𑀜𑁆𑀘 𑀤𑁂𑀯𑀸𑀦𑀜𑁆𑀘 𑀲𑀸𑀭𑀣𑀺 𑀦𑀭𑀤𑁂𑀯𑀲𑀸𑀭𑀣𑀺.

𑀇𑀢𑀺 𑀙𑀝𑁆𑀞𑀻𑀢𑀧𑁆𑀧𑀼𑀭𑀺𑀲𑁄.

𑀲𑀢𑁆𑀢𑀫𑀻𑀢𑀧𑁆𑀧𑀼𑀭𑀺𑀲

𑀲𑀢𑁆𑀢𑀫𑀻𑀢𑀧𑁆𑀧𑀼𑀭𑀺𑀲𑁂 𑀭𑀽𑀧𑁂 𑀲𑀜𑁆𑀜𑀸 𑀭𑀽𑀧𑀲𑀜𑁆𑀜𑀸. 𑀏𑀢𑁆𑀣 𑀘 𑀓𑀸𑀭𑀓𑀸𑀦𑀁 𑀓𑁆𑀭𑀺𑀬𑀸𑀲𑀸𑀥𑀦𑀮𑀓𑁆𑀔𑀡𑀢𑁆𑀢𑀸 𑀓𑁆𑀭𑀺𑀬𑀸𑀧𑀤𑁂𑀳𑁂𑀯 𑀲𑀫𑁆𑀩𑀦𑁆𑀥𑁄 𑀳𑁄𑀢𑀺, 𑀢𑀲𑁆𑀫𑀸 𑀅𑀓𑁆𑀭𑀺𑀬𑀯𑀸𑀘𑀓𑁂𑀦 𑀧𑀭𑀧𑀤𑁂𑀦 𑀲𑀤𑁆𑀥𑀺𑀁 𑀲𑀫𑀸𑀲𑁂 𑀚𑀸𑀢𑁂 𑀫𑀚𑁆𑀛𑁂 𑀅𑀦𑀼𑀭𑀽𑀧𑀁 𑀓𑁆𑀭𑀺𑀬𑀸𑀧𑀤𑀁 𑀯𑀺𑀜𑁆𑀜𑀸𑀬𑀢𑀺, 𑀬𑀣𑀸 ‘𑀅𑀲𑁆𑀲𑁂𑀦 𑀬𑀼𑀢𑁆𑀢𑁄 𑀭𑀣𑁄 𑀅𑀲𑁆𑀲𑀭𑀣𑁄’ 𑀇𑀢𑀺 ‘𑀭𑀽𑀧𑁂 𑀲𑀜𑁆𑀜𑀸’𑀢𑀺 𑀭𑀽𑀧𑁂 𑀉𑀧𑁆𑀧𑀦𑁆𑀦𑀸 𑀲𑀜𑁆𑀜𑀸𑀢𑀺 𑀅𑀢𑁆𑀣𑁄. 𑀘𑀓𑁆𑀔𑀼𑀲𑁆𑀫𑀺𑀁 𑀯𑀺𑀜𑁆𑀜𑀸𑀡𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁, 𑀥𑀫𑁆𑀫𑁂 𑀭𑀢𑁄 𑀥𑀫𑁆𑀫𑀭𑀢𑁄. 𑀏𑀯𑀁 𑀥𑀫𑁆𑀫𑀭𑀼𑀘𑀺, 𑀥𑀫𑁆𑀫𑀕𑀸𑀭𑀯𑁄, 𑀤𑀸𑀦𑁂 𑀅𑀚𑁆𑀛𑀸𑀲𑀬𑁄 𑀤𑀸𑀦𑀚𑁆𑀛𑀸𑀲𑀬𑁄. 𑀏𑀯𑀁 𑀤𑀸𑀦𑀸𑀥𑀺𑀫𑀼𑀢𑁆𑀢𑀺, 𑀯𑀝𑁆𑀝𑁂 𑀪𑀬𑀁 𑀯𑀝𑁆𑀝𑀪𑀬𑀁, 𑀯𑀝𑁆𑀝𑀤𑀼𑀓𑁆𑀔𑀁, 𑀕𑀸𑀫𑁂 𑀲𑀽𑀓𑀭𑁄 𑀕𑀸𑀫𑀲𑀽𑀓𑀭𑁄, 𑀯𑀦𑀫𑀳𑀺𑀁𑀲𑁄, 𑀲𑀫𑀼𑀤𑁆𑀤𑀫𑀘𑁆𑀙𑁄, 𑀇𑀢𑁆𑀣𑀻𑀲𑀼 𑀥𑀼𑀢𑁆𑀢𑁄 𑀇𑀢𑁆𑀣𑀺𑀥𑀼𑀢𑁆𑀢𑁄, 𑀇𑀢𑁆𑀣𑀺𑀲𑁄𑀡𑁆𑀟𑁄.

𑀉𑀧𑀧𑀤𑀓𑀺𑀢𑀦𑁆𑀢𑁂𑀲𑀼 𑀦𑀺𑀘𑁆𑀘𑀲𑀫𑀸𑀲𑁄 [𑀦𑀻. 𑁬𑁮𑁨], 𑀯𑀦𑁂 𑀘𑀭𑀢𑀻𑀢𑀺 𑀯𑀦𑀘𑀭𑁄, 𑀓𑀸𑀫𑀸𑀯𑀘𑀭𑁄, 𑀓𑀼𑀘𑁆𑀙𑀺𑀫𑁆𑀳𑀺 𑀲𑀬𑀢𑀻𑀢𑀺 𑀓𑀼𑀘𑁆𑀙𑀺𑀲𑁆𑀲𑀬𑁄, 𑀕𑀩𑁆𑀪𑁂 𑀲𑁂𑀢𑀻𑀢𑀺 𑀕𑀩𑁆𑀪𑀲𑁂𑀬𑁆𑀬𑁄, 𑀣𑀮𑁂 𑀢𑀺𑀝𑁆𑀞𑀢𑀻𑀢𑀺 𑀣𑀮𑀝𑁆𑀞𑁄, 𑀚𑀮𑀝𑁆𑀞𑁄, 𑀧𑀩𑁆𑀩𑀢𑀝𑁆𑀞𑁄, 𑀧𑀗𑁆𑀓𑁂 𑀚𑀸𑀢𑀁 𑀧𑀗𑁆𑀓𑀚𑀁. 𑀏𑀯𑀁 𑀅𑀢𑁆𑀭𑀚𑁄, 𑀔𑁂𑀢𑁆𑀭𑀚𑁄 𑀇𑀘𑁆𑀘𑀸𑀤𑀺. 𑀇𑀥 𑀦 𑀳𑁄𑀢𑀺 [𑀦𑀻. 𑁬𑁮𑁧], 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑁄, 𑀆𑀲𑀦𑁂 𑀦𑀺𑀲𑀺𑀦𑁆𑀦𑁄, 𑀆𑀲𑀦𑁂 𑀦𑀺𑀲𑀻𑀤𑀺𑀢𑀩𑁆𑀩𑀁.

𑀇𑀢𑀺 𑀲𑀢𑁆𑀢𑀫𑀻𑀢𑀧𑁆𑀧𑀼𑀭𑀺𑀲𑁄.

𑀮𑀼𑀢𑁆𑀢𑀢𑀧𑁆𑀧𑀼𑀭𑀺𑀲

𑀢𑀧𑁆𑀧𑀼𑀭𑀺𑀲𑀧𑀤𑀸𑀦𑀁 𑀫𑀳𑀸𑀯𑀼𑀢𑁆𑀢𑀺𑀲𑀼𑀢𑁆𑀢𑁂𑀦 𑀓𑁆𑀯𑀘𑀺 𑀯𑀺𑀧𑀮𑁆𑀮𑀸𑀲𑁄.

𑀉𑀧𑀭𑀺𑀕𑀗𑁆𑀕𑀸, 𑀳𑁂𑀝𑁆𑀞𑀸𑀦𑀤𑀻, 𑀅𑀦𑁆𑀢𑁄𑀯𑀺𑀳𑀸𑀭𑁄, 𑀅𑀦𑁆𑀢𑁄𑀲𑀫𑀸𑀧𑀢𑁆𑀢𑀺, 𑀳𑀁𑀲𑀸𑀦𑀁 𑀭𑀸𑀚𑀸 𑀭𑀸𑀚𑀳𑀁𑀲𑁄 𑀳𑀁𑀲𑀭𑀸𑀚𑀸 𑀯𑀸, 𑀫𑀸𑀲𑀲𑁆𑀲 𑀅𑀟𑁆𑀠𑀁 𑀅𑀟𑁆𑀠𑀫𑀸𑀲𑀁, 𑀓𑀳𑀸𑀧𑀡𑀲𑁆𑀲 𑀅𑀟𑁆𑀠𑀁 𑀅𑀟𑁆𑀠𑀓𑀳𑀸𑀧𑀡𑀁, 𑀅𑀟𑁆𑀠𑀫𑀸𑀲𑀁, 𑀭𑀢𑁆𑀢𑀺𑀬𑀸 𑀅𑀟𑁆𑀠𑀁 𑀅𑀟𑁆𑀠𑀭𑀢𑁆𑀢𑀁. 𑀏𑀯𑀁 𑀧𑀼𑀩𑁆𑀩𑀭𑀢𑁆𑀢𑀁, 𑀧𑀭𑀭𑀢𑁆𑀢𑀁, 𑀇𑀲𑁆𑀲 𑀅𑀢𑁆𑀢𑀁. 𑀓𑀸𑀬𑀲𑁆𑀲 𑀧𑀼𑀩𑁆𑀩𑀪𑀸𑀕𑁄 𑀧𑀼𑀩𑁆𑀩𑀓𑀸𑀬𑁄, 𑀧𑀭𑀓𑀸𑀬𑁄, 𑀅𑀳𑀲𑁆𑀲 𑀧𑀼𑀩𑁆𑀩𑁄 𑀧𑀼𑀩𑁆𑀩𑀡𑁆𑀳𑁄, 𑀫𑀚𑁆𑀛𑀡𑁆𑀳𑁄, 𑀲𑀸𑀬𑀦𑁆𑀳𑁄, 𑀧𑀼𑀩𑁆𑀩𑁂𑀤𑀺𑀝𑁆𑀞𑁄 𑀤𑀺𑀝𑁆𑀞𑀧𑀼𑀩𑁆𑀩𑁄, 𑀢𑀣𑀸𑀕𑀢𑀁 𑀤𑀺𑀝𑁆𑀞𑀧𑀼𑀩𑁆𑀩𑁄 𑀣𑁂𑀭𑁄, 𑀢𑀣𑀸𑀕𑀢𑁄 𑀤𑀺𑀝𑁆𑀞𑀧𑀼𑀩𑁆𑀩𑁄 𑀣𑁂𑀭𑁂𑀦 𑀇𑀘𑁆𑀘𑀸𑀤𑀺.

𑀇𑀢𑀺 𑀮𑀼𑀢𑁆𑀢𑀢𑀧𑁆𑀧𑀼𑀭𑀺𑀲𑁄.

𑀅𑀮𑀼𑀢𑁆𑀢𑀢𑀧𑁆𑀧𑀼𑀭𑀺𑀲

𑀇𑀤𑀸𑀦𑀺 𑀅𑀮𑀼𑀢𑁆𑀢𑀢𑀧𑁆𑀧𑀼𑀭𑀺𑀲𑀸 𑀯𑀼𑀘𑁆𑀘𑀦𑁆𑀢𑁂.

𑀤𑀻𑀧𑀗𑁆𑀓𑀭𑁄, 𑀧𑀪𑀗𑁆𑀓𑀭𑁄, 𑀅𑀫𑀢𑀦𑁆𑀤𑀤𑁄, 𑀧𑀼𑀭𑀺𑀦𑁆𑀤𑀤𑁄, 𑀯𑁂𑀲𑁆𑀲𑀦𑁆𑀢𑀭𑁄, 𑀅𑀢𑁆𑀢𑀦𑁆𑀢𑀧𑁄, 𑀧𑀭𑀦𑁆𑀢𑀧𑁄, 𑀭𑀡𑀜𑁆𑀚𑀳𑁄, 𑀚𑀼𑀢𑀺𑀦𑁆𑀥𑀭𑁄, 𑀯𑀺𑀚𑁆𑀚𑀦𑁆𑀥𑀭𑁄, 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀥𑀫𑁆𑀫𑁄, 𑀓𑀼𑀢𑁄𑀚𑁄, 𑀢𑀢𑁄𑀚𑁄, 𑀇𑀢𑁄𑀚𑁄, 𑀪𑀬𑀢𑁄 𑀉𑀧𑀝𑁆𑀞𑀸𑀦𑀁 𑀪𑀬𑀢𑀼𑀧𑀝𑁆𑀞𑀸𑀦𑀁, 𑀓𑀝𑀢𑁆𑀢𑀸𑀓𑀫𑁆𑀫𑀁, 𑀓𑀝𑀢𑁆𑀢𑀸𑀭𑀽𑀧𑀁, 𑀧𑀭𑀲𑁆𑀲𑀧𑀤𑀁, 𑀅𑀢𑁆𑀢𑀦𑁄𑀧𑀤𑀁, 𑀤𑁂𑀯𑀸𑀦𑀫𑀺𑀦𑁆𑀤𑁄, 𑀤𑁂𑀯𑀸𑀦𑀁𑀧𑀺𑀬𑀢𑀺𑀲𑁆𑀲𑁄, 𑀕𑀯𑀫𑁆𑀧𑀢𑀺𑀢𑁆𑀣𑁂𑀭𑁄, 𑀧𑀼𑀩𑁆𑀩𑁂𑀦𑀺𑀯𑀸𑀲𑁄, 𑀫𑀚𑁆𑀛𑁂𑀓𑀮𑁆𑀬𑀸𑀡𑀁, 𑀤𑀽𑀭𑁂𑀭𑀽𑀧𑀁, 𑀲𑀦𑁆𑀢𑀺𑀓𑁂𑀭𑀽𑀧𑀁, 𑀤𑀽𑀭𑁂𑀦𑀺𑀤𑀸𑀦𑀁, 𑀲𑀦𑁆𑀢𑀺𑀓𑁂𑀦𑀺𑀤𑀸𑀦𑀁, 𑀅𑀦𑁆𑀢𑁂𑀯𑀸𑀲𑀺𑀓𑁄, 𑀚𑀦𑁂𑀲𑀼𑀢𑁄, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑁄 𑀇𑀘𑁆𑀘𑀸𑀤𑀺 [𑀓. 𑁩𑁨𑁭; 𑀭𑀽. 𑁩𑁫𑁧; 𑀦𑀻. 𑁬𑁮𑁬].

𑀇𑀢𑀺 𑀅𑀮𑀼𑀢𑁆𑀢𑀢𑀧𑁆𑀧𑀼𑀭𑀺𑀲𑁄.

𑀲𑀩𑁆𑀩𑁄 𑀘𑀸𑀬𑀁 𑀅𑀫𑀸𑀤𑀺𑀢𑀧𑁆𑀧𑀼𑀭𑀺𑀲𑁄 𑀅𑀪𑀺𑀥𑁂𑀬𑁆𑀬𑀯𑀘𑀦𑁄 𑀧𑀭𑀧𑀤𑀮𑀺𑀗𑁆𑀕𑁄 𑀘.

𑀅𑀫𑀸𑀤𑀺𑀢𑀧𑁆𑀧𑀼𑀭𑀺𑀲𑁄 𑀦𑀺𑀝𑁆𑀞𑀺𑀢𑁄.

𑀓𑀫𑁆𑀫𑀥𑀸𑀭𑀬𑀲𑀫𑀸𑀲

𑀅𑀣 𑀓𑀫𑁆𑀫𑀥𑀸𑀭𑀬𑀲𑀜𑁆𑀜𑀺𑀢𑁄 𑀧𑀞𑀫𑀸𑀢𑀧𑁆𑀧𑀼𑀭𑀺𑀲𑁄 𑀯𑀼𑀘𑁆𑀘𑀢𑁂.

𑀓𑀫𑁆𑀫𑀫𑀺𑀯 𑀤𑁆𑀯𑀬𑀁 𑀥𑀸𑀭𑁂𑀢𑀻𑀢𑀺 𑀓𑀫𑁆𑀫𑀥𑀸𑀭𑀬𑁄. 𑀬𑀣𑀸 𑀓𑀫𑁆𑀫𑀁 𑀓𑁆𑀭𑀺𑀬𑀜𑁆𑀘 𑀧𑀬𑁄𑀚𑀦𑀜𑁆𑀘 𑀤𑁆𑀯𑀬𑀁 𑀥𑀸𑀭𑁂𑀢𑀺 𑀓𑀫𑁆𑀫𑁂 𑀲𑀢𑀺 𑀢𑀲𑁆𑀲 𑀤𑁆𑀯𑀬𑀲𑁆𑀲 𑀲𑀫𑁆𑀪𑀯𑀢𑁄, 𑀢𑀣𑀸 𑀅𑀬𑀁 𑀲𑀫𑀸𑀲𑁄 𑀏𑀓𑀲𑁆𑀲 𑀅𑀢𑁆𑀣𑀲𑁆𑀲 𑀤𑁆𑀯𑁂 𑀦𑀸𑀫𑀸𑀦𑀺 𑀥𑀸𑀭𑁂𑀢𑀺 𑀇𑀫𑀲𑁆𑀫𑀺𑀁 𑀲𑀫𑀸𑀲𑁂 𑀲𑀢𑀺 𑀏𑀓𑀢𑁆𑀣𑀚𑁄𑀢𑀓𑀲𑁆𑀲 𑀦𑀸𑀫𑀤𑁆𑀯𑀬𑀲𑁆𑀲 𑀲𑀫𑁆𑀪𑀯𑀢𑁄𑀢𑀺 [𑀓. 𑁩𑁨𑁪; 𑀭𑀽. 𑁩𑁩𑁯; 𑀦𑀻. 𑁭𑁦𑁨].

𑀅𑀧𑀺 𑀘 𑀓𑀢𑁆𑀢𑀩𑁆𑀩𑀦𑁆𑀢𑀺 𑀓𑀫𑁆𑀫𑀁, 𑀥𑀸𑀭𑁂𑀢𑀩𑁆𑀩𑀦𑁆𑀢𑀺 𑀥𑀸𑀭𑀺𑀬𑀁, 𑀓𑀫𑁆𑀫𑀜𑁆𑀘 𑀢𑀁 𑀥𑀸𑀭𑀺𑀬𑀜𑁆𑀘𑀸𑀢𑀺 𑀓𑀫𑁆𑀫𑀥𑀸𑀭𑀺𑀬𑀁, 𑀬𑀁𑀓𑀺𑀜𑁆𑀘𑀺 𑀳𑀺𑀢𑀓𑀫𑁆𑀫𑀁, 𑀓𑀫𑁆𑀫𑀥𑀸𑀭𑀺𑀬𑀲𑀤𑁆𑀤𑀲𑀤𑀺𑀲𑀢𑁆𑀢𑀸 𑀲𑀩𑁆𑀩𑁄 𑀘𑀸𑀬𑀁 𑀲𑀫𑀸𑀲𑁄 𑀓𑀫𑁆𑀫𑀥𑀸𑀭𑀬𑁄𑀢𑀺 𑀯𑀼𑀘𑁆𑀘𑀢𑀺 𑀇𑀲𑁆𑀲 𑀅𑀢𑁆𑀢𑀁 𑀓𑀢𑁆𑀯𑀸. 𑀬𑀣𑀸 𑀳𑀺 𑀓𑀫𑁆𑀫𑀥𑀸𑀭𑀺𑀬𑀲𑀤𑁆𑀤𑁄 𑀏𑀓𑀲𑁆𑀲 𑀅𑀢𑁆𑀣𑀲𑁆𑀲 𑀤𑁆𑀯𑁂 𑀦𑀸𑀫𑀸𑀦𑀺 𑀥𑀸𑀭𑁂𑀢𑀺, 𑀢𑀣𑀸 𑀅𑀬𑀁 𑀲𑀫𑀸𑀲𑁄𑀧𑀻𑀢𑀺. 𑀲𑁄 𑀏𑀯 𑀉𑀢𑁆𑀢𑀭𑀧𑀤𑀢𑁆𑀣𑀧𑀥𑀸𑀦𑀢𑀸𑀲𑀗𑁆𑀔𑀸𑀢𑁂𑀦 𑀢𑀧𑁆𑀧𑀼𑀭𑀺𑀲𑀮𑀓𑁆𑀔𑀡𑁂𑀦 𑀬𑀼𑀢𑁆𑀢𑀢𑁆𑀢𑀸 ‘𑀢𑀧𑁆𑀧𑀼𑀭𑀺𑀲𑁄’𑀢𑀺 𑀘 𑀯𑀼𑀘𑁆𑀘𑀢𑀺. 𑀪𑀺𑀦𑁆𑀦𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀸𑀦𑀁 𑀤𑁆𑀯𑀺𑀦𑁆𑀦𑀁 𑀧𑀤𑀸𑀦𑀁 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑁂𑀦 𑀏𑀓𑀲𑁆𑀫𑀺𑀁 𑀅𑀢𑁆𑀣𑁂 𑀧𑀯𑀢𑁆𑀢𑀺 𑀢𑀼𑀮𑁆𑀬𑀸𑀥𑀺𑀓𑀭𑀡𑀢𑀸 𑀦𑀸𑀫, 𑀢𑁂𑀦 𑀢𑀼𑀮𑁆𑀬𑀸𑀥𑀺𑀓𑀭𑀡𑀮𑀓𑁆𑀔𑀡𑁂𑀦 𑀬𑀼𑀢𑁆𑀢𑀢𑁆𑀢𑀸 ‘𑀢𑀼𑀮𑁆𑀬𑀸𑀥𑀺𑀓𑀭𑀡𑀲𑀫𑀸𑀲𑁄’𑀢𑀺 𑀘 𑀯𑀼𑀘𑁆𑀘𑀢𑀺. 𑀲𑁄 𑀏𑀯 𑀘 𑀯𑀺𑀲𑁂𑀲𑀦𑀧𑀤𑀯𑀲𑁂𑀦 𑀕𑀼𑀡𑀯𑀺𑀲𑁂𑀲𑀤𑀻𑀧𑀦𑀢𑁆𑀢𑀸 ‘𑀯𑀺𑀲𑁂𑀲𑀦𑀲𑀫𑀸𑀲𑁄’𑀢𑀺 𑀘 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀺𑀁 𑀯𑀺𑀲𑁂𑀲𑀦𑀲𑀫𑀸𑀲𑁂 𑁋

𑁩𑁪𑁬. 𑀯𑀺𑀲𑁂𑀲𑀦𑀫𑁂𑀓𑀢𑁆𑀣𑁂𑀦 [𑀓. 𑁩𑁨𑁪; 𑀭𑀽. 𑁩𑁩𑁯; 𑀦𑀻. 𑁭𑁦𑁨; 𑀘𑀁. 𑁨.𑁨.𑁧𑁮; 𑀧𑀸. 𑁨.𑁧.𑁫𑁭].

𑀯𑀺𑀲𑁂𑀲𑀦𑀪𑀽𑀢𑀁 𑀲𑁆𑀬𑀸𑀤𑁆𑀬𑀦𑁆𑀢𑀧𑀤𑀁 𑀏𑀓𑀢𑁆𑀣𑁂𑀦 𑀯𑀺𑀲𑁂𑀲𑁆𑀬𑀪𑀽𑀢𑁂𑀦 𑀲𑁆𑀬𑀸𑀤𑁆𑀬𑀦𑁆𑀢𑀧𑀤𑁂𑀦 𑀲𑀤𑁆𑀥𑀺𑀁 𑀏𑀓𑀢𑁆𑀣𑀁 𑀳𑁄𑀢𑀺.

𑀏𑀢𑁆𑀣 𑀘 𑀯𑀺𑀲𑁂𑀲𑀻𑀬𑀢𑀺 𑀤𑀩𑁆𑀩𑀁 𑀯𑀺𑀲𑀺𑀝𑁆𑀞𑀁 𑀓𑀭𑀻𑀬𑀢𑀺 𑀏𑀢𑁂𑀦𑀸𑀢𑀺 𑀯𑀺𑀲𑁂𑀲𑀦𑀁. 𑀏𑀓𑁄 𑀅𑀢𑁆𑀣𑁄 𑀬𑀲𑁆𑀲𑀸𑀢𑀺 𑀏𑀓𑀢𑁆𑀣𑀁, ‘𑀏𑀓𑁄’𑀢𑀺 𑀲𑀫𑀸𑀦𑁄, ‘𑀅𑀢𑁆𑀣𑁄’𑀢𑀺 𑀅𑀪𑀺𑀥𑁂𑀬𑁆𑀬𑀢𑁆𑀣𑁄, 𑀦𑁂𑀫𑀺𑀢𑁆𑀢𑀓𑀢𑁆𑀣𑁄, 𑀲𑁄𑀬𑁂𑀯 𑀤𑁆𑀯𑀺𑀦𑁆𑀦𑀁 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀸𑀦𑀁 𑀅𑀥𑀺𑀝𑁆𑀞𑀸𑀦𑀝𑁆𑀞𑁂𑀦 ‘𑀅𑀥𑀺𑀓𑀭𑀡’𑀦𑁆𑀢𑀺 𑀘 𑀯𑀼𑀘𑁆𑀘𑀢𑀺. 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀸𑀦𑀜𑁆𑀘 𑀅𑀥𑀺𑀝𑁆𑀞𑀸𑀦𑀢𑁆𑀢𑁂 𑀲𑀢𑀺 𑀧𑀤𑀸𑀦𑀫𑁆𑀧𑀺 𑀅𑀥𑀺𑀝𑁆𑀞𑀸𑀦𑀢𑀸 𑀲𑀺𑀤𑁆𑀥𑀸 𑀳𑁄𑀢𑀺. 𑀇𑀢𑀺 𑀏𑀓𑀢𑁆𑀣𑀦𑁆𑀢𑀺 𑀢𑀼𑀮𑁆𑀬𑀸𑀥𑀺𑀓𑀭𑀡𑀁, 𑀲𑀫𑀸𑀦𑀸𑀥𑀺𑀓𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀢𑁂𑀦 𑀏𑀓𑀢𑁆𑀣𑁂𑀦. ‘𑀏𑀓𑀢𑁆𑀣𑀁 𑀳𑁄𑀢𑀻’𑀢𑀺 𑀏𑀓𑀢𑁆𑀣𑀻𑀪𑀽𑀢𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑀲𑁄 𑀘 𑀲𑀫𑀸𑀲𑁄 𑀦𑀯𑀯𑀺𑀥𑁄 𑀯𑀺𑀲𑁂𑀲𑀦𑀧𑀼𑀩𑁆𑀩𑀧𑀤𑁄, 𑀯𑀺𑀲𑁂𑀲𑀦𑀼𑀢𑁆𑀢𑀭𑀧𑀤𑁄, 𑀯𑀺𑀲𑁂𑀲𑀦𑁄𑀪𑀬𑀧𑀤𑁄, 𑀉𑀧𑀫𑀸𑀦𑀼𑀢𑁆𑀢𑀭𑀧𑀤𑁄, 𑀲𑀫𑁆𑀪𑀸𑀯𑀦𑀸𑀧𑀼𑀩𑁆𑀩𑀧𑀤𑁄, 𑀅𑀯𑀥𑀸𑀭𑀡𑀧𑀼𑀩𑁆𑀩𑀧𑀤𑁄, 𑀦𑀦𑀺𑀧𑀸𑀢𑀧𑀼𑀩𑁆𑀩𑀧𑀤𑁄, 𑀓𑀼𑀦𑀺𑀧𑀸𑀢𑀧𑀼𑀩𑁆𑀩𑀧𑀤𑁄, 𑀧𑀸𑀤𑀺𑀧𑀼𑀩𑁆𑀩𑀧𑀤𑁄 𑀘𑀸𑀢𑀺.

𑀢𑀢𑁆𑀣 𑀯𑀺𑀲𑁂𑀲𑀦𑀧𑀼𑀩𑁆𑀩𑀧𑀤𑁄 𑀬𑀣𑀸? 𑀫𑀳𑀸𑀧𑀼𑀭𑀺𑀲𑁄, 𑀫𑀳𑀸𑀦𑀤𑀻, 𑀫𑀳𑀩𑁆𑀪𑀬𑀁. 𑀏𑀢𑁆𑀣 𑀘 ‘‘𑀲𑀸 𑀲𑁂𑀦𑀸 𑀤𑀺𑀲𑁆𑀲𑀢𑁂 𑀫𑀳𑀸 [𑀚𑀸. 𑁨.𑁨𑁨.𑁭𑁭𑁧], 𑀩𑀸𑀭𑀸𑀡𑀲𑀺𑀭𑀚𑁆𑀚𑀁 𑀦𑀸𑀫 𑀫𑀳𑀸’’𑀢𑀺 [𑀚𑀸. 𑀅𑀝𑁆𑀞. 𑁧.𑁧.𑀫𑀳𑀸𑀲𑀻𑀮𑀯𑀚𑀸𑀢𑀓𑀯𑀡𑁆𑀡𑀦𑀸] 𑀧𑀸𑀴𑀺 𑀤𑀺𑀲𑁆𑀲𑀢𑀺. 𑀢𑀲𑁆𑀫𑀸 𑀲𑀫𑀸𑀲𑁂𑀧𑀺 𑀢𑀺𑀮𑀺𑀗𑁆𑀕𑁂 𑀦𑀺𑀧𑀸𑀢𑀭𑀽𑀧𑁄 𑀫𑀳𑀸𑀲𑀤𑁆𑀤𑁄 𑀬𑀼𑀚𑁆𑀚𑀢𑀺. 𑀫𑀳𑀸 𑀘 𑀲𑁄 𑀧𑀼𑀭𑀺𑀲𑁄 𑀘𑀸𑀢𑀺 𑀫𑀳𑀸𑀧𑀼𑀭𑀺𑀲𑁄, 𑀫𑀳𑀸 𑀘 𑀲𑀸 𑀦𑀤𑀻 𑀘𑀸𑀢𑀺 𑀫𑀳𑀸𑀦𑀤𑀻, 𑀫𑀳𑀸 𑀘 𑀢𑀁 𑀪𑀬𑀜𑁆𑀘𑀸𑀢𑀺 𑀫𑀳𑀩𑁆𑀪𑀬𑀁, 𑀤𑁆𑀯𑀺𑀢𑁆𑀢𑀁 𑀲𑀁𑀬𑁄𑀕𑁂 𑀘 𑀭𑀲𑁆𑀲𑀢𑁆𑀢𑀁. 𑀫𑀳𑀸𑀲𑀤𑁆𑀤𑀯𑁂𑀯𑀘𑀦𑁂𑀦 𑀫𑀳𑀦𑁆𑀢𑀲𑀤𑁆𑀤𑁂𑀦𑀧𑀺 𑀯𑀸𑀓𑁆𑀬𑀁 𑀤𑀲𑁆𑀲𑁂𑀢𑀼𑀁 𑀬𑀼𑀚𑁆𑀚𑀢𑀺, 𑀫𑀳𑀦𑁆𑀢𑁄 𑀧𑀼𑀭𑀺𑀲𑁄 𑀫𑀳𑀸𑀧𑀼𑀭𑀺𑀲𑁄, 𑀫𑀳𑀦𑁆𑀢𑀻 𑀦𑀤𑀻 𑀫𑀳𑀸𑀦𑀤𑀻, 𑀫𑀳𑀦𑁆𑀢𑀁 𑀪𑀬𑀁 𑀫𑀳𑀩𑁆𑀪𑀬𑀦𑁆𑀢𑀺. 𑀘, 𑀢𑀲𑀤𑁆𑀤𑁂𑀳𑀺 𑀘 𑀲𑀤𑁆𑀥𑀺𑀁 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀬𑀼𑀚𑁆𑀚𑀢𑀺, 𑀫𑀳𑀦𑁆𑀢𑁄 𑀘 𑀲𑁄 𑀧𑀼𑀭𑀺𑀲𑁄 𑀘𑀸𑀢𑀺 𑀫𑀳𑀸𑀧𑀼𑀭𑀺𑀲𑁄, 𑀫𑀳𑀦𑁆𑀢𑀻 𑀘 𑀲𑀸 𑀦𑀤𑀻 𑀘𑀸𑀢𑀺 𑀫𑀳𑀸𑀦𑀤𑀻, 𑀫𑀳𑀦𑁆𑀢𑀜𑁆𑀘 𑀢𑀁 𑀪𑀬𑀜𑁆𑀘𑀸𑀢𑀺 𑀫𑀳𑀩𑁆𑀪𑀬𑀦𑁆𑀢𑀺. 𑀫𑀳𑀦𑁆𑀢𑀲𑀤𑁆𑀤𑁄 𑀯𑀸 𑀫𑀳𑀸 𑀳𑁄𑀢𑀺, ‘𑀝 𑀦𑁆𑀢𑀦𑁆𑀢𑀽𑀦’𑀦𑁆𑀢𑀺 𑀲𑀼𑀢𑁆𑀢𑁂𑀦 𑀉𑀢𑁆𑀢𑀭𑀧𑀤𑁂 𑀧𑀭𑁂 𑀦𑁆𑀢𑀲𑁆𑀲 𑀲𑀩𑁆𑀩𑀲𑁆𑀲 𑀅𑀢𑁆𑀢𑀁, 𑀫𑀳𑀸𑀯𑀼𑀢𑁆𑀢𑀺𑀦𑀸 𑀤𑀻𑀖𑁄 𑀘.

𑀏𑀢𑁆𑀣 𑀘 𑀤𑁆𑀯𑀻𑀳𑀺 𑀘𑀲𑀤𑁆𑀤𑁂𑀳𑀺 𑀤𑁆𑀯𑀺𑀦𑁆𑀦𑀁 𑀧𑀤𑀸𑀦𑀁 𑀲𑀓𑀢𑁆𑀣𑀦𑀸𑀦𑀸𑀢𑁆𑀢𑀁 𑀤𑀻𑀧𑁂𑀢𑀺. 𑀢𑀁𑀲𑀤𑁆𑀤𑁂𑀦 𑀲𑀓𑀢𑁆𑀣𑀦𑀸𑀦𑀸𑀢𑁆𑀢𑁂𑀧𑀺 𑀲𑀓𑀢𑁆𑀣𑀸𑀦𑀁 𑀅𑀥𑀺𑀓𑀭𑀡𑀪𑀽𑀢𑀲𑁆𑀲 𑀤𑀩𑁆𑀩𑀢𑁆𑀣𑀲𑁆𑀲 𑀏𑀓𑀢𑁆𑀢𑀁 𑀤𑀻𑀧𑁂𑀢𑀺. 𑀇𑀫𑀲𑁆𑀫𑀺𑀁 𑀩𑁆𑀬𑀸𑀓𑀭𑀡𑁂 𑀯𑀺𑀲𑀼𑀁 𑀭𑀽𑀧𑀯𑀺𑀥𑀸𑀦𑀓𑀺𑀘𑁆𑀘𑀁 𑀦𑀸𑀫 𑀦𑀢𑁆𑀣𑀺, 𑀢𑀁𑀢𑀁𑀲𑀼𑀢𑁆𑀢𑀯𑀺𑀥𑀸𑀦𑀜𑁆𑀘 𑀢𑀤𑀦𑀼𑀭𑀽𑀧𑀁 𑀤𑀲𑁆𑀲𑀺𑀢𑀯𑀺𑀕𑁆𑀕𑀳𑀯𑀸𑀓𑁆𑀬𑀜𑁆𑀘 𑀤𑀺𑀲𑁆𑀯𑀸 𑀢𑀲𑁆𑀲 𑀢𑀲𑁆𑀲 𑀲𑀺𑀤𑁆𑀥𑀧𑀤𑀲𑁆𑀲 𑀅𑀢𑁆𑀣𑀩𑁆𑀬𑀜𑁆𑀚𑀦𑀯𑀺𑀦𑀺𑀘𑁆𑀙𑀬𑁂 𑀜𑀸𑀢𑁂 𑀭𑀽𑀧𑀯𑀺𑀥𑀸𑀦𑀓𑀺𑀘𑁆𑀘𑀁 𑀲𑀺𑀤𑁆𑀥𑀁 𑀳𑁄𑀢𑀺, 𑀲𑀦𑁆𑀢𑁄 𑀘 𑀲𑁄 𑀧𑀼𑀭𑀺𑀲𑁄 𑀘𑀸𑀢𑀺 𑀲𑀧𑁆𑀧𑀼𑀭𑀺𑀲𑁄, 𑀲𑁂𑀢𑀳𑀢𑁆𑀣𑀻, 𑀦𑀻𑀮𑀼𑀧𑁆𑀧𑀮𑀁, 𑀮𑁄𑀳𑀺𑀢𑀘𑀦𑁆𑀤𑀦𑀁.

𑀯𑀺𑀲𑀤𑀺𑀲𑀮𑀺𑀗𑁆𑀕, 𑀯𑀘𑀦𑀸𑀧𑀺 𑀲𑀤𑁆𑀤𑀸 𑀏𑀓𑀢𑁆𑀣𑀸 𑀳𑁄𑀦𑁆𑀢𑀺, 𑀯𑀺𑀦𑀬𑁄 𑀘 𑀲𑁄 𑀧𑀭𑀺𑀬𑀢𑁆𑀢𑀺 𑀘𑀸𑀢𑀺 𑀯𑀺𑀦𑀬𑀧𑀭𑀺𑀬𑀢𑁆𑀢𑀺, 𑀯𑀺𑀦𑀬𑁄 𑀘 𑀲𑁄 𑀧𑀺𑀝𑀓𑀜𑁆𑀘𑀸𑀢𑀺 𑀯𑀺𑀦𑀬𑀧𑀺𑀝𑀓𑀁, 𑀅𑀯𑀺𑀚𑁆𑀚𑀸 𑀘 𑀲𑀸 𑀧𑀘𑁆𑀘𑀬𑁄 𑀘𑀸𑀢𑀺 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑁄, 𑀅𑀯𑀺𑀚𑁆𑀚𑀸 𑀘 𑀲𑀸 𑀦𑀻𑀯𑀭𑀡𑀜𑁆𑀘𑀸𑀢𑀺 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀁. 𑀏𑀯𑀁 𑀇𑀢𑁆𑀣𑀺𑀭𑀢𑀦𑀁, 𑀲𑀻𑀮𑀜𑁆𑀘 𑀢𑀁 𑀕𑀼𑀡𑁄 𑀘𑀸𑀢𑀺 𑀲𑀻𑀮𑀕𑀼𑀡𑁄, 𑀲𑀻𑀮𑀜𑁆𑀘 𑀢𑀁 𑀧𑀢𑀺𑀝𑁆𑀞𑀸 𑀘𑀸𑀢𑀺 𑀲𑀻𑀮𑀧𑀢𑀺𑀝𑁆𑀞𑀸 𑀇𑀘𑁆𑀘𑀸𑀤𑀺.

𑀢𑀣𑀸 𑀯𑀻𑀲𑀢𑀺 𑀘 𑀲𑀸 𑀧𑀼𑀭𑀺𑀲𑀸 𑀘𑀸𑀢𑀺 𑀯𑀻𑀲𑀢𑀺𑀧𑀼𑀭𑀺𑀲𑀸, 𑀲𑀢𑀜𑁆𑀘 𑀢𑀁 𑀧𑀼𑀭𑀺𑀲𑀸 𑀘𑀸𑀢𑀺 𑀲𑀢𑀧𑀼𑀭𑀺𑀲𑀸, 𑀲𑀗𑁆𑀔𑀸𑀭𑀸 𑀘 𑀢𑁂 𑀧𑀘𑁆𑀘𑀬𑁄 𑀘𑀸𑀢𑀺 𑀲𑀗𑁆𑀔𑀸𑀭𑀧𑀘𑁆𑀘𑀬𑁄, 𑀅𑀗𑁆𑀕𑀸 𑀘 𑀢𑁂 𑀚𑀦𑀧𑀤𑀜𑁆𑀘𑀸𑀢𑀺 𑀅𑀗𑁆𑀕𑀚𑀦𑀧𑀤𑀁, 𑀫𑀕𑀥𑀸 𑀘 𑀢𑁂 𑀭𑀝𑁆𑀞𑀜𑁆𑀘𑀸𑀢𑀺 𑀫𑀕𑀥𑀭𑀝𑁆𑀞𑀁. 𑀏𑀯𑀁 𑀓𑀸𑀲𑀺𑀭𑀝𑁆𑀞𑀁 𑀇𑀘𑁆𑀘𑀸𑀤𑀺.

𑀇𑀥 𑀦 𑀳𑁄𑀢𑀺 [𑀭𑀽. 𑁩𑁪𑁧; 𑀦𑀻. 𑁬𑁮𑁧], 𑀧𑀼𑀡𑁆𑀡𑁄 𑀫𑀦𑁆𑀢𑀸𑀦𑀻𑀧𑀼𑀢𑁆𑀢𑁄, 𑀘𑀺𑀢𑁆𑀢𑁄 𑀕𑀳𑀧𑀢𑀺, 𑀲𑀓𑁆𑀓𑁄 𑀤𑁂𑀯𑀭𑀸𑀚𑀸, 𑀩𑁆𑀭𑀳𑁆𑀫𑀸 𑀲𑀳𑀫𑁆𑀧𑀢𑀺 𑀇𑀘𑁆𑀘𑀸𑀤𑀺.

𑀓𑁆𑀯𑀘𑀺 𑀦𑀺𑀘𑁆𑀘𑀲𑀫𑀸𑀲𑁄, 𑀓𑀡𑁆𑀳𑀲𑀧𑁆𑀧𑁄, 𑀮𑁄𑀳𑀺𑀢𑀫𑀸𑀮𑀁 𑀇𑀘𑁆𑀘𑀸𑀤𑀺.

𑀯𑀺𑀲𑁂𑀲𑀦𑀼𑀢𑁆𑀢𑀭𑀧𑀤𑁄 𑀬𑀣𑀸? 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄, 𑀩𑀼𑀤𑁆𑀥𑀖𑁄𑀲𑀸𑀘𑀭𑀺𑀬𑁄, 𑀆𑀘𑀭𑀺𑀬𑀕𑀼𑀢𑁆𑀢𑀺𑀮𑁄 𑀯𑀸, 𑀫𑀳𑁄𑀲𑀥𑀧𑀡𑁆𑀟𑀺𑀢𑁄, 𑀧𑀼𑀭𑀺𑀲𑀼𑀢𑁆𑀢𑀫𑁄, 𑀧𑀼𑀭𑀺𑀲𑀯𑀭𑁄, 𑀧𑀼𑀭𑀺𑀲𑀯𑀺𑀲𑁂𑀲𑁄 𑀇𑀘𑁆𑀘𑀸𑀤𑀺.

𑀯𑀺𑀲𑁂𑀲𑀦𑁄𑀪𑀬𑀧𑀤𑁄 𑀬𑀣𑀸? 𑀙𑀺𑀦𑁆𑀦𑀜𑁆𑀘 𑀢𑀁 𑀧𑀭𑀽𑀴𑁆𑀳𑀜𑁆𑀘𑀸𑀢𑀺 𑀙𑀺𑀦𑁆𑀦𑀧𑀭𑀽𑀴𑁆𑀳𑀁, 𑀲𑀻𑀢𑀜𑁆𑀘 𑀢𑀁 𑀉𑀡𑁆𑀳𑀜𑁆𑀘𑀸𑀢𑀺 𑀲𑀻𑀢𑀼𑀡𑁆𑀳𑀁, 𑀔𑀜𑁆𑀚𑁄 𑀘 𑀲𑁄 𑀔𑀼𑀚𑁆𑀚𑁄 𑀘𑀸𑀢𑀺 𑀔𑀜𑁆𑀚𑀔𑀼𑀚𑁆𑀚𑁄. 𑀏𑀯𑀁 𑀅𑀦𑁆𑀥𑀩𑀥𑀺𑀭𑁄, 𑀓𑀢𑀜𑁆𑀘 𑀢𑀁 𑀅𑀓𑀢𑀜𑁆𑀘𑀸𑀢𑀺 𑀓𑀢𑀸𑀓𑀢𑀁, 𑀙𑀺𑀤𑁆𑀤𑀸𑀯𑀙𑀺𑀤𑁆𑀤𑀁, 𑀙𑀺𑀦𑁆𑀦𑀪𑀺𑀦𑁆𑀦𑀁, 𑀲𑀺𑀢𑁆𑀢𑀜𑁆𑀘 𑀢𑀁 𑀲𑀫𑁆𑀫𑀝𑁆𑀞𑀜𑁆𑀘𑀸𑀢𑀺 𑀲𑀺𑀢𑁆𑀢𑀲𑀫𑁆𑀫𑀝𑁆𑀞𑀁, 𑀲𑀦𑁆𑀢𑀲𑁆𑀲 𑀪𑀸𑀯𑁄 𑀲𑀘𑁆𑀘𑀁, 𑀅𑀔𑁂𑀫𑀝𑁆𑀞𑁂𑀦 𑀤𑀼𑀓𑁆𑀔𑀜𑁆𑀘 𑀢𑀁 𑀅𑀯𑀺𑀧𑀭𑀻𑀢𑀝𑁆𑀞𑁂𑀦 𑀲𑀘𑁆𑀘𑀜𑁆𑀘𑀸𑀢𑀺 𑀤𑀼𑀓𑁆𑀔𑀲𑀘𑁆𑀘𑀁 𑀇𑀘𑁆𑀘𑀸𑀤𑀺.

𑀉𑀧𑀫𑀸𑀦𑀼𑀢𑁆𑀢𑀭𑀧𑀤𑁄 𑀬𑀣𑀸? 𑀲𑀻𑀳𑁄 𑀯𑀺𑀬𑀸𑀢𑀺 𑀲𑀻𑀳𑁄, 𑀫𑀼𑀦𑀺 𑀘 𑀲𑁄 𑀲𑀻𑀳𑁄 𑀘𑀸𑀢𑀺 𑀫𑀼𑀦𑀺𑀲𑀻𑀳𑁄. 𑀏𑀯𑀁 𑀫𑀼𑀦𑀺𑀧𑀼𑀗𑁆𑀕𑀯𑁄, 𑀩𑀼𑀤𑁆𑀥𑀦𑀸𑀕𑁄, 𑀩𑀼𑀤𑁆𑀥𑀸𑀤𑀺𑀘𑁆𑀘𑁄, 𑀭𑀁𑀲𑀺 𑀯𑀺𑀬𑀸𑀢𑀺 𑀭𑀁𑀲𑀺, 𑀲𑀤𑁆𑀥𑀫𑁆𑀫𑁄 𑀘 𑀲𑁄 𑀭𑀁𑀲𑀺 𑀘𑀸𑀢𑀺 𑀲𑀤𑁆𑀥𑀫𑁆𑀫𑀭𑀁𑀲𑀺. 𑀏𑀯𑀁 𑀯𑀺𑀦𑀬𑀲𑀸𑀕𑀭𑁄, 𑀲𑀫𑀡𑀧𑀤𑀼𑀫𑁄, 𑀲𑀫𑀡𑀧𑀼𑀡𑁆𑀟𑀭𑀻𑀓𑁄 𑀇𑀘𑁆𑀘𑀸𑀤𑀺.

𑀲𑀫𑁆𑀪𑀸𑀯𑀦𑀸𑀧𑀼𑀩𑁆𑀩𑀧𑀤𑁄 𑀬𑀣𑀸? 𑀳𑁂𑀢𑀼 𑀳𑀼𑀢𑁆𑀯𑀸 𑀧𑀘𑁆𑀘𑀬𑁄 𑀳𑁂𑀢𑀼𑀧𑀘𑁆𑀘𑀬𑁄. 𑀏𑀯𑀁 𑀆𑀭𑀫𑁆𑀫𑀡𑀧𑀘𑁆𑀘𑀬𑁄, 𑀫𑀦𑀼𑀲𑁆𑀲𑀪𑀽𑀢𑁄, 𑀤𑁂𑀯𑀪𑀽𑀢𑁄, 𑀥𑀫𑁆𑀫𑁄 𑀇𑀢𑀺 𑀲𑀗𑁆𑀔𑀸𑀢𑁄 𑀥𑀫𑁆𑀫𑀲𑀗𑁆𑀔𑀸𑀢𑁄, 𑀥𑀫𑁆𑀫𑀲𑀫𑁆𑀫𑀢𑁄, 𑀥𑀫𑁆𑀫𑀲𑀜𑁆𑀜𑀺𑀢𑁄, 𑀥𑀫𑁆𑀫𑀮𑀓𑁆𑀔𑀺𑀢𑁄, 𑀏𑀯 𑀇𑀢𑀺 𑀲𑀗𑁆𑀔𑀸𑀢𑁄 𑀲𑀤𑁆𑀤𑁄 𑀏𑀯𑀲𑀤𑁆𑀤𑁄. 𑀏𑀯𑀁 𑀘𑀲𑀤𑁆𑀤𑁄, 𑀯𑀸𑀲𑀤𑁆𑀤𑁄, 𑀅𑀭𑀺𑀬𑀪𑀽𑀢𑁄 𑀲𑀗𑁆𑀖𑁄 𑀅𑀭𑀺𑀬𑀲𑀗𑁆𑀖𑁄. 𑀏𑀯𑀁 𑀩𑀼𑀤𑁆𑀥𑀫𑀼𑀦𑀺, 𑀧𑀘𑁆𑀘𑁂𑀓𑀫𑀼𑀦𑀺 𑀇𑀘𑁆𑀘𑀸𑀤𑀺. 𑀏𑀢𑁆𑀣 𑀘 𑀲𑀫𑁆𑀪𑀸𑀯𑀦𑀸 𑀦𑀸𑀫 𑀲𑀸𑀫𑀜𑁆𑀜𑀪𑀽𑀢𑀲𑁆𑀲 𑀉𑀢𑁆𑀢𑀭𑀧𑀤𑀢𑁆𑀣𑀲𑁆𑀲 𑀤𑀴𑁆𑀳𑀁 𑀓𑀢𑁆𑀯𑀸 𑀣𑁄𑀫𑀦𑀸 𑀲𑀭𑀽𑀧𑀯𑀺𑀲𑁂𑀲𑀤𑀻𑀧𑀦𑀸, 𑀦 𑀕𑀼𑀡𑀫𑀢𑁆𑀢𑀤𑀻𑀧𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀕𑀭𑀽 𑀧𑀦 ‘‘𑀥𑀫𑁆𑀫𑁄 𑀇𑀢𑀺 𑀩𑀼𑀤𑁆𑀥𑀺 𑀥𑀫𑁆𑀫𑀩𑀼𑀤𑁆𑀥𑀺. 𑀏𑀯𑀁 𑀥𑀫𑁆𑀫𑀲𑀜𑁆𑀜𑀸, 𑀅𑀦𑀺𑀘𑁆𑀘𑀲𑀜𑁆𑀜𑀸, 𑀥𑀸𑀢𑀼𑀲𑀜𑁆𑀜𑀸, 𑀫𑀸𑀢𑀼𑀲𑀜𑁆𑀜𑀸, 𑀧𑀸𑀡𑀲𑀜𑁆𑀜𑀺𑀢𑀸, 𑀅𑀢𑁆𑀢𑀤𑀺𑀝𑁆𑀞𑀺’’ 𑀇𑀘𑁆𑀘𑀸𑀤𑀻𑀦𑀺𑀧𑀺 𑀏𑀢𑁆𑀣 𑀆𑀳𑀭𑀦𑁆𑀢𑀺, 𑀇𑀫𑀸𑀦𑀺 𑀧𑀦 ‘‘𑀲𑀭𑀡𑀁 𑀇𑀢𑀺 𑀕𑀢𑁄 𑀉𑀧𑀕𑀢𑁄 𑀲𑀭𑀡𑀗𑁆𑀕𑀢𑁄’’𑀢𑀺 𑀧𑀤𑀁 𑀯𑀺𑀬 𑀇𑀢𑀺𑀮𑀼𑀢𑁆𑀢𑀸𑀦𑀺 𑀧𑀞𑀫𑀸𑀢𑀧𑁆𑀧𑀼𑀭𑀺𑀲𑀧𑀤𑀸𑀦𑀺 𑀦𑀸𑀫 𑀬𑀼𑀚𑁆𑀚𑀦𑁆𑀢𑀻𑀢𑀺 [𑀭𑀽. 𑁩𑁪𑁩; 𑀦𑀻. 𑁭𑁦𑁨].

𑀅𑀯𑀥𑀸𑀭𑀡𑀧𑀼𑀩𑁆𑀩𑀧𑀤𑁄 𑀬𑀣𑀸? 𑀕𑀼𑀡𑁄 𑀏𑀯 𑀥𑀦𑀁 𑀦 𑀫𑀡𑀺𑀲𑀼𑀯𑀡𑁆𑀡𑀸𑀤𑀻𑀢𑀺 𑀕𑀼𑀡𑀥𑀦𑀁. 𑀏𑀯𑀁 𑀲𑀤𑁆𑀥𑀸𑀥𑀦𑀁, 𑀲𑀻𑀮𑀥𑀦𑀁, 𑀘𑀓𑁆𑀔𑀼 𑀏𑀯 𑀤𑁆𑀯𑀸𑀭𑀁 𑀦 𑀕𑀸𑀫𑀤𑁆𑀯𑀸𑀭𑀸𑀤𑀻𑀢𑀺 𑀘𑀓𑁆𑀔𑀼𑀤𑁆𑀯𑀸𑀭𑀁. 𑀏𑀯𑀁 𑀘𑀓𑁆𑀔𑀼𑀯𑀢𑁆𑀣𑀼, 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁, 𑀘𑀓𑁆𑀔𑀸𑀬𑀢𑀦𑀁, 𑀘𑀓𑁆𑀔𑀼𑀥𑀸𑀢𑀼, 𑀔𑀦𑁆𑀥𑀸 𑀏𑀯 𑀪𑀸𑀭𑀸 𑀔𑀦𑁆𑀥𑀪𑀸𑀭𑀸. 𑀏𑀢𑁆𑀣 𑀘 𑀬𑀤𑀺 𑀪𑀭𑀺𑀢𑀩𑁆𑀩𑀝𑁆𑀞𑁂𑀦 𑀪𑀸𑀭𑀸 𑀦𑀸𑀫 𑀲𑀺𑀬𑀼𑀁, 𑀧𑀜𑁆𑀘𑀓𑁆𑀔𑀦𑁆𑀥𑀸 𑀏𑀯 𑀪𑀸𑀭𑀸 𑀦𑀸𑀫 𑀲𑀺𑀬𑀼𑀁, 𑀦 𑀲𑀻𑀲𑀪𑀸𑀭, 𑀅𑀁𑀲𑀪𑀸𑀭𑀸𑀤𑀬𑁄. 𑀔𑀦𑁆𑀥𑀸 𑀳𑀺 𑀦𑀺𑀘𑁆𑀘𑀪𑀸𑀭𑀸 𑀳𑁄𑀦𑁆𑀢𑀺, 𑀇𑀢𑀭𑁂 𑀢𑀸𑀯𑀓𑀸𑀮𑀺𑀓𑀸, 𑀔𑀦𑁆𑀥𑀫𑀽𑀮𑀺𑀓𑀸 𑀘𑀸𑀢𑀺. 𑀏𑀯𑀁 𑀅𑀢𑀺𑀲𑀬𑀢𑁆𑀣𑀲𑀫𑁆𑀪𑀸𑀯𑀦𑀢𑁆𑀣𑀁 𑀔𑀦𑁆𑀥𑀸 𑀏𑀯 𑀪𑀸𑀭𑀸𑀢𑀺 𑀅𑀯𑀥𑀸𑀭𑀡𑀯𑀸𑀓𑁆𑀬𑀁 𑀧𑀬𑀼𑀚𑁆𑀚𑀢𑀺, 𑀦 𑀲𑀻𑀲𑀪𑀸𑀭𑀸𑀤𑀻𑀦𑀁 𑀲𑀩𑁆𑀩𑀲𑁄 𑀪𑀸𑀭𑀪𑀸𑀯𑀧𑀝𑀺𑀓𑁆𑀔𑀺𑀧𑀦𑀢𑁆𑀣𑀦𑁆𑀢𑀺. 𑀏𑀯𑀁 𑀲𑀩𑁆𑀩𑀢𑁆𑀣, 𑀅𑀯𑀺𑀚𑁆𑀚𑀸 𑀏𑀯 𑀫𑀮𑀁 𑀦 𑀓𑀁𑀲𑀫𑀮𑀸𑀤𑀺𑀓𑀦𑁆𑀢𑀺 𑀅𑀯𑀺𑀚𑁆𑀚𑀸𑀫𑀮𑀁, 𑀅𑀯𑀺𑀚𑁆𑀚𑀸 𑀏𑀯 𑀆𑀲𑀯𑁄 𑀦 𑀫𑀥𑁆𑀯𑀸𑀲𑀯𑀸𑀤𑀺𑀓𑁄𑀢𑀺 𑀅𑀯𑀺𑀚𑁆𑀚𑀸𑀲𑀯𑁄. 𑀏𑀯𑀁 𑀢𑀡𑁆𑀳𑀸𑀲𑀮𑁆𑀮𑀁, 𑀧𑀜𑁆𑀜𑀸𑀲𑀢𑁆𑀣𑀁, 𑀧𑀜𑁆𑀜𑀸𑀮𑁄𑀓𑁄, 𑀧𑀜𑁆𑀜𑀸𑀧𑀚𑁆𑀚𑁄𑀢𑁄, 𑀭𑀸𑀕𑀕𑁆𑀕𑀺, 𑀤𑁄𑀲𑀕𑁆𑀕𑀺, 𑀫𑁄𑀳𑀕𑁆𑀕𑀺 𑀇𑀘𑁆𑀘𑀸𑀤𑀺. 𑀕𑀭𑀽 𑀧𑀦 ‘‘𑀥𑀦𑀁 𑀯𑀺𑀬𑀸𑀢𑀺 𑀥𑀦𑀁, 𑀲𑀤𑁆𑀥𑀸 𑀏𑀯 𑀅𑀭𑀺𑀬𑀸𑀦𑀁 𑀥𑀦𑀁 𑀲𑀤𑁆𑀥𑀸𑀥𑀦𑀁, 𑀲𑀢𑁆𑀣𑀁 𑀯𑀺𑀬𑀸𑀢𑀺 𑀲𑀢𑁆𑀣𑀁, 𑀧𑀜𑁆𑀜𑀸 𑀏𑀯 𑀲𑀢𑁆𑀣𑀁 𑀧𑀜𑁆𑀜𑀸𑀲𑀢𑁆𑀣’’𑀦𑁆𑀢𑀺 𑀬𑁄𑀚𑁂𑀦𑁆𑀢𑀺, 𑀏𑀯𑀁 𑀲𑀢𑀺 𑀅𑀢𑀺𑀲𑀬𑀲𑀫𑁆𑀪𑀸𑀯𑀦𑀢𑁆𑀣𑁄 𑀦 𑀲𑀺𑀚𑁆𑀛𑀢𑀺 [𑀭𑀽. 𑁩𑁪𑁩; 𑀦𑀻. 𑁭𑁦𑁨].

𑁩𑁪𑁭. 𑀦𑀦𑀺𑀧𑀸𑀢𑀧𑀼𑀩𑁆𑀩𑀧𑀤𑁂 𑀦𑀉 [𑀓. 𑁩𑁨𑁬; 𑀭𑀽. 𑁩𑁪𑁧; 𑀦𑀻. 𑁭𑁦𑁭].

𑀜𑀸𑀦𑀼𑀩𑀦𑁆𑀥𑁄 𑀧𑀝𑀺𑀲𑁂𑀥𑀫𑁆𑀳𑀸 𑀅𑀜𑁆𑀜𑀦𑀓𑀸𑀭 𑀦𑀺𑀯𑀢𑁆𑀢𑀦𑀢𑁆𑀣𑁄, 𑀦𑀉𑀇𑀘𑁆𑀘𑁂𑀢𑀁 𑀲𑁆𑀬𑀸𑀤𑁆𑀬𑀦𑁆𑀢𑀁 𑀅𑀜𑁆𑀜𑁂𑀦 𑀲𑁆𑀬𑀸𑀤𑁆𑀬𑀦𑁆𑀢𑁂𑀦 𑀲𑀳 𑀏𑀓𑀢𑁆𑀣𑀁 𑀳𑁄𑀢𑀺. 𑀇𑀫𑀺𑀦𑀸 𑀦𑀜𑁂 𑀓𑀢𑁆𑀣𑀲𑀜𑁆𑀜𑀁 𑀓𑀢𑁆𑀯𑀸 𑁋

𑁩𑁪𑁮. 𑀝 𑀦𑀉𑀲𑁆𑀲 [𑀓. 𑁩𑁩𑁩; 𑀭𑀽. 𑁩𑁪𑁪; 𑀦𑀻. 𑁭𑁧𑁭; 𑀘𑀁. 𑁨.𑁨.𑁨𑁦; 𑀧𑀸. 𑁨.𑁨.𑁬; ‘‘𑀦𑀉’’ (𑀩𑀳𑀽𑀲𑀼)].

𑀉𑀢𑁆𑀢𑀭𑀧𑀤𑁂 𑀧𑀭𑁂 𑀦𑀉𑀇𑀘𑁆𑀘𑁂𑀢𑀲𑁆𑀲 𑀝𑀸𑀦𑀼𑀩𑀦𑁆𑀥𑁄 𑀅 𑀳𑁄𑀢𑀻𑀢𑀺 𑀦𑀲𑁆𑀲 𑀅𑀢𑁆𑀢𑀁.

𑀦 𑀩𑁆𑀭𑀸𑀳𑁆𑀫𑀡𑁄 𑀅𑀩𑁆𑀭𑀸𑀳𑁆𑀫𑀡𑁄. 𑀏𑀢𑁆𑀣 𑀲𑀺𑀬𑀸 𑁋 𑀓𑀺𑀁 𑀯𑀺𑀚𑁆𑀚𑀫𑀸𑀦𑀲𑁆𑀲 𑀯𑀸𑀬𑀁 𑀦𑀺𑀲𑁂𑀥𑁄, 𑀉𑀤𑀸𑀳𑀼 𑀅𑀯𑀺𑀚𑁆𑀚𑀫𑀸𑀦𑀲𑁆𑀲 𑀯𑀸𑀢𑀺, 𑀓𑀺𑀜𑁆𑀘𑁂𑀢𑁆𑀣 𑁋 𑀬𑀤𑀺 𑀯𑀺𑀚𑁆𑀚𑀫𑀸𑀦𑀲𑁆𑀲 𑀦𑀺𑀲𑁂𑀥𑁄, 𑀏𑀯𑀁 𑀲𑀢𑀺 𑀮𑁄𑀓𑁂 𑀯𑀺𑀚𑁆𑀚𑀫𑀸𑀦𑀸 𑀲𑀩𑁆𑀩𑁂 𑀩𑁆𑀭𑀸𑀳𑁆𑀫𑀡𑀸 𑀅𑀩𑁆𑀭𑀸𑀳𑁆𑀫𑀡𑀸 𑀦𑀸𑀫 𑀪𑀯𑁂𑀬𑁆𑀬𑀼𑀁. 𑀢𑀲𑁆𑀫𑀸 ‘‘𑀇𑀥 𑀚𑀦𑁄 𑀦 𑀩𑁆𑀭𑀸𑀳𑁆𑀫𑀡𑁄, 𑀢𑀢𑁆𑀣 𑀚𑀦𑁄 𑀦 𑀩𑁆𑀭𑀸𑀳𑁆𑀫𑀡𑁄’’𑀢𑀺𑀆𑀤𑀺𑀦𑀸 𑀤𑁂𑀲𑀸𑀤𑀺𑀦𑀺𑀬𑀫𑀁 𑀯𑀺𑀦𑀸 𑀮𑁄𑀓𑁂 𑀯𑀺𑀚𑁆𑀚𑀫𑀸𑀦𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀦𑀺𑀲𑁂𑀥𑁄 𑀦 𑀬𑀼𑀚𑁆𑀚𑀢𑀺, 𑀅𑀣 𑀮𑁄𑀓𑁂 𑀅𑀯𑀺𑀚𑁆𑀚𑀫𑀸𑀦𑀲𑁆𑀲 𑀦𑀺𑀲𑁂𑀥𑁄, 𑀏𑀯𑀜𑁆𑀘 𑀲𑀢𑀺 𑀓𑀺𑀁 𑀅𑀯𑀺𑀚𑁆𑀚𑀫𑀸𑀦𑀲𑁆𑀲 𑀦𑀺𑀲𑁂𑀥𑁂𑀦 𑀦𑀺𑀲𑁂𑀥𑀦𑀻𑀬𑀲𑁆𑀲𑁂𑀯 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸𑀢𑀺? 𑀯𑀼𑀘𑁆𑀘𑀢𑁂 𑁋 𑀢𑀁𑀲𑀤𑀺𑀲𑀸𑀤𑀺𑀅𑀢𑁆𑀣𑁂𑀲𑀼 𑀢𑀩𑁆𑀩𑁄𑀳𑀸𑀭𑀲𑁆𑀲𑁂𑀯𑀸𑀬𑀁 𑀦𑀺𑀲𑁂𑀥𑁄. 𑀢𑀣𑀸 𑀳𑀺 𑀩𑁆𑀭𑀸𑀳𑁆𑀫𑀡𑀲𑀤𑀺𑀲𑁂 𑀅𑀩𑁆𑀭𑀸𑀳𑁆𑀫𑀡𑁂 𑀓𑁂𑀲𑀜𑁆𑀘𑀺 𑀩𑁆𑀭𑀸𑀳𑁆𑀫𑀡𑀲𑀜𑁆𑀜𑀸 𑀲𑀡𑁆𑀞𑀸𑀢𑀺, 𑀲𑀜𑁆𑀜𑀸𑀦𑀼𑀭𑀽𑀧𑀜𑁆𑀘 𑀩𑁆𑀭𑀸𑀳𑁆𑀫𑀡𑀯𑁄𑀳𑀸𑀭𑁄 𑀢𑀲𑁆𑀫𑀺𑀁 𑀧𑀯𑀢𑁆𑀢𑀢𑀺, 𑀏𑀯𑀁 𑀧𑀯𑀢𑁆𑀢𑀲𑁆𑀲 𑀅𑀩𑁆𑀭𑀸𑀳𑁆𑀫𑀡𑁂 𑀩𑁆𑀭𑀸𑀳𑁆𑀫𑀡𑀯𑁄𑀳𑀸𑀭𑀲𑁆𑀲 𑀅𑀬𑀁 𑀧𑀝𑀺𑀲𑁂𑀥𑁄 𑀳𑁄𑀢𑀺. 𑀬𑀣𑀸 𑀢𑀁? 𑀮𑁄𑀓𑀲𑁆𑀫𑀺𑀁 𑀩𑀸𑀮𑀚𑀦𑀸𑀦𑀁 𑀫𑀺𑀘𑁆𑀙𑀸𑀲𑀜𑁆𑀜𑀸𑀯𑀲𑁂𑀦 𑀫𑀺𑀘𑁆𑀙𑀸𑀯𑁄𑀳𑀸𑀭𑁄 𑀧𑀯𑀢𑁆𑀢𑀢𑀺𑀬𑁂𑀯 ‘‘𑀭𑀽𑀧𑀁 𑀅𑀢𑁆𑀢𑀸, 𑀯𑁂𑀤𑀦𑀸 𑀅𑀢𑁆𑀢𑀸’’ 𑀇𑀘𑁆𑀘𑀸𑀤𑀺, 𑀢𑁂𑀲𑀁 𑀢𑀲𑁆𑀲 𑀫𑀺𑀘𑁆𑀙𑀸𑀪𑀸𑀯𑀔𑁆𑀬𑀸𑀧𑀦𑀢𑁆𑀣𑀁 𑀧𑀝𑀺𑀲𑁂𑀥𑁄 𑀬𑁄𑀚𑀺𑀬𑀢𑀺 ‘‘𑀭𑀽𑀧𑀁 𑀅𑀦𑀢𑁆𑀢𑀸, 𑀯𑁂𑀤𑀦𑀸 𑀅𑀦𑀢𑁆𑀢𑀸’’ [𑀫𑀳𑀸𑀯. 𑁨𑁦] 𑀇𑀘𑁆𑀘𑀸𑀤𑀺. 𑀏𑀢𑁆𑀢𑀸𑀯𑀢𑀸 𑀲𑀼𑀤𑁆𑀥𑀩𑁆𑀭𑀸𑀳𑁆𑀫𑀡𑀲𑀤𑁆𑀤𑀲𑁆𑀲𑀧𑀺 𑀫𑀺𑀘𑁆𑀙𑀸𑀯𑀲𑁂𑀦 𑀢𑀁𑀲𑀤𑀺𑀲𑁂 𑀅𑀢𑁆𑀣𑁂 𑀧𑀯𑀢𑁆𑀢𑀺𑀲𑀫𑁆𑀪𑀯𑁄 𑀲𑀺𑀤𑁆𑀥𑁄 𑀳𑁄𑀢𑀺, 𑀦𑀓𑀸𑀭𑀲𑁆𑀲 𑀘 𑀢𑀤𑀢𑁆𑀣𑀚𑁄𑀢𑀓𑀫𑀢𑁆𑀢𑀢𑀸 𑀲𑀺𑀤𑁆𑀥𑀸 𑀳𑁄𑀢𑀺, 𑀏𑀯𑀜𑁆𑀘 𑀲𑀢𑀺 𑀉𑀢𑁆𑀢𑀭𑀧𑀤𑀢𑁆𑀣𑀧𑀥𑀸𑀦𑀢𑀸𑀲𑀗𑁆𑀔𑀸𑀢𑀁 𑀢𑀧𑁆𑀧𑀼𑀭𑀺𑀲𑀮𑀓𑁆𑀔𑀡𑀫𑁆𑀧𑀺 𑀇𑀥 𑀦 𑀯𑀺𑀭𑀼𑀚𑁆𑀛𑀢𑀺, 𑀢𑀲𑁆𑀫𑀸 𑀅𑀩𑁆𑀭𑀸𑀳𑁆𑀫𑀡𑁄𑀢𑀺 𑀩𑁆𑀭𑀸𑀳𑁆𑀫𑀡𑀲𑀤𑀺𑀲𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀲 𑀦𑀬𑁄 𑀢𑀤𑀜𑁆𑀜, 𑀢𑀩𑁆𑀩𑀺𑀭𑀼𑀤𑁆𑀥, 𑀢𑀤𑀪𑀸𑀯𑀢𑁆𑀣𑀸𑀤𑀻𑀲𑀼.

𑀢𑀢𑁆𑀣 𑀢𑀤𑀜𑁆𑀜𑀢𑁆𑀣𑁂 𑁋

𑀲𑀗𑁆𑀔𑀢𑀸 𑀥𑀫𑁆𑀫𑀸 𑀅𑀲𑀗𑁆𑀔𑀢𑀸 𑀥𑀫𑁆𑀫𑀸 [𑀥. 𑀲. 𑀤𑀼𑀓𑀫𑀸𑀢𑀺𑀓𑀸 𑁮]. 𑀏𑀢𑁆𑀣 𑀘 𑀦 𑀲𑀗𑁆𑀔𑀢𑀸 𑀅𑀲𑀗𑁆𑀔𑀢𑀸, 𑀲𑀗𑁆𑀔𑀢𑀥𑀫𑁆𑀫𑁂𑀳𑀺 𑀅𑀜𑁆𑀜𑁂 𑀥𑀫𑁆𑀫𑀸𑀢𑀺 𑀅𑀢𑁆𑀣𑁄.

𑀢𑀩𑁆𑀩𑀺𑀭𑀼𑀤𑁆𑀥𑁂 𑁋

𑀅𑀓𑀼𑀲𑀮𑁄, 𑀓𑀼𑀲𑀮𑀧𑀝𑀺𑀧𑀓𑁆𑀔𑁄 𑀥𑀫𑁆𑀫𑁄𑀢𑀺 𑀅𑀢𑁆𑀣𑁄.

𑀢𑀤𑀪𑀸𑀯𑁂 𑁋

𑀦 𑀓𑀢𑁆𑀯𑀸 𑀅𑀓𑀢𑁆𑀯𑀸, 𑀓𑀭𑀡𑁂𑀦 𑀲𑀩𑁆𑀩𑀲𑁄 𑀯𑀺𑀦𑀸𑀢𑀺 𑀅𑀢𑁆𑀣𑁄.

𑀤𑀼𑀯𑀺𑀥𑁄 𑀧𑀝𑀺𑀲𑁂𑀥𑁄 𑀧𑀲𑀚𑁆𑀚𑀧𑀝𑀺𑀲𑁂𑀥𑁄, 𑀧𑀬𑀺𑀭𑀼𑀤𑀸𑀲𑀧𑀝𑀺𑀲𑁂𑀥𑁄 𑀘𑀸𑀢𑀺.

𑀢𑀢𑁆𑀣 𑀅𑀢𑁆𑀢𑀦𑀸 𑀬𑀼𑀢𑁆𑀢𑀧𑀤𑀢𑁆𑀣𑀁 𑀧𑀲𑀚𑁆𑀚 𑀮𑀕𑁆𑀕𑁂𑀢𑁆𑀯𑀸 𑀧𑀝𑀺𑀲𑁂𑀥𑁂𑀢𑀻𑀢𑀺 𑀧𑀲𑀚𑁆𑀚𑀧𑀝𑀺𑀲𑁂𑀥𑁄, 𑀢𑀤𑀪𑀸𑀯𑀫𑀢𑁆𑀢𑀚𑁄𑀢𑀓𑁄 𑀦𑀓𑀸𑀭𑁄, 𑀓𑁆𑀭𑀺𑀬𑀸𑀫𑀢𑁆𑀢𑀦𑀺𑀲𑁂𑀥𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀓𑀢𑁆𑀯𑀸, 𑀅𑀓𑀸𑀢𑀼𑀁, 𑀅𑀓𑀭𑁄𑀦𑁆𑀢𑁄, 𑀦 𑀓𑀭𑁄𑀢𑀺, 𑀦 𑀓𑀸𑀢𑀩𑁆𑀩𑀁 𑀇𑀘𑁆𑀘𑀸𑀤𑀺.