𑀦𑀯𑀫 𑀧𑀭𑀺𑀘𑁆𑀙𑁂𑀤

𑀅𑀪𑀬𑀸𑀪𑀺𑀲𑁂𑀓𑁄

𑁧. 𑀫𑀳𑁂𑀲𑀻 𑀚𑀦𑀬𑀻 𑀧𑀼𑀢𑁆𑀢𑁂, 𑀤𑀲 𑀏𑀓𑀜𑁆𑀘 𑀥𑀻𑀢𑀭𑀁;

𑀲𑀩𑁆𑀩𑀚𑁂𑀝𑁆𑀞𑁄’𑀪𑀬𑁄 𑀦𑀸𑀫, 𑀘𑀺𑀢𑁆𑀢𑀸𑀦𑀸𑀫 𑀓𑀦𑀺𑀝𑁆𑀞𑀺𑀓𑀸.

𑁨. 𑀧𑀲𑁆𑀲𑀺𑀢𑁆𑀯𑀸 𑀢𑀁 𑀯𑀺𑀬𑀸𑀓𑀁𑀲𑀼, 𑀩𑁆𑀭𑀸𑀳𑁆𑀫𑀡𑀸 𑀫𑀦𑁆𑀢𑀧𑀸𑀭𑀕𑀸;

‘‘𑀭𑀚𑁆𑀚𑀳𑁂𑀢𑀼 𑀲𑀼𑀢𑁄 𑀅𑀲𑁆𑀲𑀸, 𑀖𑀸𑀢𑀬𑀺𑀲𑁆𑀲𑀢𑀺 𑀫𑀸𑀢𑀼𑀮𑁂’’.

𑁩. 𑀖𑀸𑀢𑁂𑀲𑁆𑀲𑀸𑀫𑀺 𑀓𑀦𑀺𑀝𑁆𑀞𑀺𑀦𑁆𑀢𑀺, 𑀦𑀺𑀘𑁆𑀙𑀺𑀢𑁂 𑀪𑀸𑀢𑀭𑀸’𑀪𑀬𑁄;

𑀯𑀸𑀭𑁂𑀲𑀺 𑀓𑀸𑀮𑁂 𑀯𑀸𑀲𑁂𑀲𑀼𑀁, 𑀕𑁂𑀳𑀁 𑀢𑀁 𑀏𑀓𑀣𑀼𑀡𑀺𑀓𑁂.

𑁪. 𑀭𑀜𑁆𑀜𑁄 𑀘 𑀲𑀺𑀭𑀺𑀕𑀩𑁆𑀪𑁂𑀦, 𑀢𑀲𑁆𑀲 𑀤𑁆𑀯𑀸𑀭𑀫𑀓𑀸𑀭𑀬𑀼𑀁;

𑀅𑀦𑁆𑀢𑁄 𑀞𑀧𑁂𑀲𑀼𑀁 𑀏𑀓𑀜𑁆𑀘, 𑀤𑀸𑀲𑀺𑀁 𑀦𑀭𑀲𑀢𑀁 𑀩𑀳𑀺.

𑁫. 𑀭𑀽𑀧𑁂𑀦𑀼’𑀫𑁆𑀫𑀸𑀤𑀬𑀻 𑀦𑀭𑁂, 𑀤𑀺𑀝𑁆𑀞𑀫𑀢𑁆𑀢𑀸𑀯 𑀲𑀸𑀬𑀢𑁄;

𑀢𑀢𑁄 𑀉𑀫𑁆𑀫𑀸𑀤𑀘𑀺𑀢𑁆𑀢𑀸’𑀢𑀺, 𑀦𑀸𑀫𑀁 𑀲𑁄𑀧𑀧𑀤𑀁 𑀮𑀪𑀺.

𑁬. 𑀲𑀼𑀢𑁆𑀯𑀸𑀦 𑀮𑀁𑀓𑀸𑀕𑀫𑀦𑀁, 𑀪𑀤𑁆𑀤𑀓𑀘𑁆𑀘𑀸𑀦𑀤𑁂𑀯𑀺𑀬𑀸;

𑀫𑀸𑀢𑀭𑀸 𑀘𑁄𑀤𑀺𑀢𑀸 𑀧𑀼𑀢𑁆𑀢𑀸, 𑀞𑀧𑁂𑀢𑁆𑀯𑁂’𑀓𑀜𑁆𑀘 𑀆𑀕𑀫𑀼𑀁.

𑁭. 𑀤𑀺𑀲𑁆𑀯𑀸𑀦 𑀢𑁂 𑀧𑀡𑁆𑀟𑀼𑀯𑀸𑀲𑀼-𑀤𑁂𑀯𑀁 𑀮𑀗𑁆𑀓𑀺𑀦𑁆𑀤𑀫𑀸𑀕𑀢𑀸;

𑀤𑀺𑀲𑁆𑀯𑀸𑀦 𑀢𑀁 𑀓𑀦𑀺𑀝𑁆𑀞𑀺𑀜𑁆𑀘, 𑀭𑁄𑀤𑀺𑀢𑁆𑀯𑀸 𑀲𑀳 𑀢𑀸𑀬 𑀘.

𑁮. 𑀭𑀜𑁆𑀜𑀸 𑀲𑀼𑀓𑀢𑀲𑀓𑁆𑀓𑀸𑀭𑀸, 𑀭𑀜𑁆𑀜𑁄’𑀦𑀼𑀜𑁆𑀜𑀸𑀬 𑀘𑀸𑀭𑀺𑀓𑀁;

𑀘𑀭𑀺𑀁𑀲𑀼 𑀮𑀁𑀓𑀸𑀤𑀻𑀧𑀫𑁆𑀳𑀺, 𑀦𑀺𑀯𑀲𑀼𑀜𑁆𑀘 𑀬𑀣𑀸𑀭𑀼𑀘𑀺𑀁.

𑁯. 𑀭𑀸𑀫𑁂𑀦 𑀯𑀼𑀲𑀺𑀢𑀞𑀸𑀦𑀁, 𑀭𑀸𑀫𑀕𑁄𑀡𑀦𑁆𑀢𑀺 𑀯𑀼𑀘𑁆𑀘𑀢𑀺;

𑀉𑀭𑀼𑀯𑁂𑀮𑀸’𑀦𑀼𑀭𑀸𑀥𑀸𑀦𑀁, 𑀦𑀺𑀯𑀸𑀲𑀸 𑀘 𑀢𑀣𑀸 𑀢𑀣𑀸.

𑁧𑁦. 𑀢𑀣𑀸 𑀯𑀺𑀚𑀺𑀢𑀤𑀻𑀖𑀸𑀬𑀼-𑀭𑁄𑀳𑀡𑀸𑀦𑀁 𑀦𑀺𑀯𑀸𑀲𑀓𑀸;

𑀯𑀺𑀚𑀺𑀢𑀕𑀸𑀫𑁄 𑀤𑀻𑀖𑀸𑀬𑀼-𑀭𑁄𑀳𑀡𑀦𑁆𑀢𑀺 𑀘 𑀯𑀼𑀘𑁆𑀘𑀢𑀺.

𑁧𑁧. 𑀓𑀸𑀭𑁂𑀲𑀺 𑀅𑀦𑀼𑀭𑀸𑀥𑁄 𑀲𑁄, 𑀯𑀸𑀧𑀺𑀁 𑀤𑀓𑁆𑀔𑀺𑀡𑀢𑁄 𑀢𑀢𑁄;

𑀓𑀸𑀭𑀸𑀧𑁂𑀢𑁆𑀯𑀸 𑀭𑀸𑀚𑀕𑁂𑀳𑀁, 𑀢𑀢𑁆𑀣 𑀯𑀸𑀲𑀫𑀓𑀧𑁆𑀧𑀬𑀻.

𑁧𑁨. 𑀫𑀳𑀸𑀭𑀸𑀚𑀸 𑀧𑀡𑁆𑀟𑀼𑀯𑀸𑀲𑀼-𑀤𑁂𑀯𑁄 𑀚𑀝𑁆𑀞𑀲𑀼𑀢𑀁 𑀲𑀓𑀁;

𑀅𑀪𑀬𑀁 𑀉𑀧𑀭𑀚𑁆𑀚𑀫𑁆𑀳𑀺, 𑀓𑀸𑀮𑁂 𑀲𑀫𑀪𑀺𑀲𑁂𑀘𑀬𑀺.

𑁧𑁩. 𑀤𑀻𑀖𑀸𑀬𑀼𑀲𑁆𑀲 𑀓𑀼𑀫𑀸𑀭𑀲𑁆𑀲, 𑀢𑀦𑀬𑁄 𑀤𑀻𑀖𑀕𑀸𑀫𑀡𑀺;

𑀲𑀼𑀢𑁆𑀯𑀸 𑀉𑀫𑁆𑀫𑀸𑀤𑀘𑀺𑀢𑁆𑀢𑀁 𑀢𑀁, 𑀢𑀲𑁆𑀲𑀁 𑀚𑀸𑀢𑀓𑀼𑀢𑀽𑀳𑀮𑁄.

𑁧𑁪. 𑀕𑀳𑁂𑀢𑁆𑀯𑀸’𑀧𑀢𑀺𑀲𑁆𑀲 𑀕𑀸𑀫𑀁, 𑀢𑀁 𑀅𑀧𑀲𑁆𑀲𑀺 𑀫𑀦𑀼𑀚𑀸𑀥𑀺𑀧𑀁;

𑀅𑀤𑀸 𑀲𑀳𑁄𑀧𑀭𑀸𑀚𑁂𑀦, 𑀭𑀸𑀚𑀼𑀧𑀝𑁆𑀞𑀸𑀦𑀫𑀲𑁆𑀲𑀲𑁄.

𑁧𑁫. 𑀕𑀯𑀓𑁆𑀔𑀸𑀪𑀺𑀫𑀼𑀔𑀝𑁆𑀞𑀸𑀦𑁂, 𑀢𑀁 𑀉𑀧𑁂𑀘𑁆𑀘 𑀞𑀺𑀢𑀁 𑀢𑀼𑀲𑀸;

𑀤𑀺𑀲𑁆𑀯𑀸𑀦 𑀕𑀸𑀫𑀺𑀡𑀺𑀁 𑀘𑀺𑀢𑁆𑀢𑀸, 𑀭𑀢𑁆𑀢𑀘𑀺𑀢𑁆𑀢𑀸’𑀳 𑀤𑀸𑀲𑀺𑀓𑀁.

𑁧𑁬. ‘‘𑀓𑁄 𑀏𑀲𑁄’’𑀢𑀺 𑀢𑀢𑁄 𑀲𑀼𑀢𑁆𑀯𑀸,

𑀫𑀸𑀢𑀼𑀮𑀲𑁆𑀲 𑀲𑀼𑀢𑁄𑀇𑀢𑀺;

𑀤𑀸𑀲𑀺𑀁 𑀢𑀢𑁆𑀣 𑀦𑀺𑀬𑁄𑀚𑁂𑀲𑀺,

𑀲𑀤𑁆𑀥𑀺𑀁𑀓𑀢𑁆𑀯𑀸𑀦 𑀲𑁄 𑀢𑀢𑁄.

𑁧𑁭. 𑀕𑀯𑀓𑁆𑀔𑀫𑁆𑀳𑀺 𑀟𑀲𑀸𑀧𑁂𑀢𑁆𑀯𑀸, 𑀭𑀢𑁆𑀢𑀺𑀁 𑀓𑀓𑁆𑀓𑀝𑀬𑀦𑁆𑀢𑀓𑀁;

𑀆𑀭𑀼𑀬𑁆𑀳 𑀙𑀺𑀦𑁆𑀤𑀬𑀺𑀢𑁆𑀯𑀸𑀦, 𑀓𑀯𑀸𑀝𑀁 𑀢𑁂𑀦 𑀧𑀸𑀯𑀺𑀲𑀺.

𑁧𑁮. 𑀢𑀸𑀬 𑀲𑀤𑁆𑀥𑀺𑀁 𑀯𑀲𑀺𑀢𑁆𑀯𑀸𑀦, 𑀧𑀘𑁆𑀘𑀽𑀲𑁂𑀬𑁂𑀯 𑀦𑀺𑀓𑁆𑀔𑀫𑀺;

𑀏𑀯𑀁 𑀦𑀺𑀘𑁆𑀘𑀁 𑀯𑀲𑀻 𑀢𑀢𑁆𑀣, 𑀙𑀺𑀤𑁆𑀤𑀸𑀪𑀸𑀯𑀸 𑀅𑀧𑀸𑀓𑀝𑁄.

𑁧𑁯. 𑀲𑀸 𑀢𑁂𑀦 𑀅𑀕𑁆𑀕𑀳𑀻 𑀕𑀩𑁆𑀪𑀁, 𑀕𑀩𑁆𑀪𑁂 𑀧𑀭𑀺𑀡𑀢𑁂 𑀢𑀢𑁄;

𑀫𑀸𑀢𑀼 𑀆𑀭𑁄𑀘𑀬𑀻 𑀤𑀸𑀲𑀻, 𑀫𑀸𑀢𑀸 𑀧𑀼𑀘𑁆𑀙𑀺𑀬 𑀥𑀻𑀢𑀭𑀁.

𑁨𑁦. 𑀭𑀜𑁆𑀜𑁄 𑀆𑀭𑁄𑀘𑀬𑀻 𑀭𑀸𑀚𑀸, 𑀅𑀫𑀦𑁆𑀢𑁂𑀢𑁆𑀯𑀸 𑀲𑀼𑀢𑁂’𑀩𑁆𑀭𑀳𑁆𑀫𑀸;

𑀧𑁄𑀲𑀺𑀬𑁄𑀲𑁄’𑀧𑀺 𑀅𑀫𑁆𑀳𑁂𑀳𑀺, 𑀤𑁂𑀯 𑀢𑀲𑁆𑀲𑁂𑀯 𑀢𑀁 𑀇𑀢𑀺.

𑁨𑁧. 𑀧𑀼𑀢𑁆𑀢𑁄 𑀘𑁂 𑀫𑀸𑀭𑀬𑀺𑀲𑁆𑀲𑀸𑀫, 𑀢’𑀦𑁆𑀢𑀺 𑀢𑀲𑁆𑀲 𑀅𑀤𑀁𑀲𑀼 𑀢𑀁;

𑀲𑀸 𑀲𑀽𑀢𑀺𑀓𑀸𑀮𑀲𑀫𑁆𑀧𑀢𑁆𑀢𑁂, 𑀲𑀽𑀢𑀺 𑀕𑁂𑀳𑀜𑁆𑀘 𑀧𑀸𑀯𑀺𑀲𑀺𑀁.

𑁨𑁨. 𑀲𑀗𑁆𑀓𑀺𑀢𑁆𑀯𑀸 𑀕𑁄𑀧𑀓𑀁 𑀘𑀺𑀢𑁆𑀢𑀁, 𑀓𑀸𑀮𑀯𑁂𑀮𑀜𑁆𑀘 𑀤𑀸𑀲𑀓𑀁;

𑀢𑀲𑁆𑀫𑀺𑀁 𑀓𑀫𑁆𑀫𑁂 𑀦𑀺𑀲𑁆𑀲𑀸𑀬𑀸’𑀢𑀺, 𑀕𑀸𑀫𑀡𑀺 𑀧𑀭𑀺𑀘𑀸𑀭𑀓𑁂.

𑁨𑁩. 𑀢𑁂 𑀧𑀝𑀺𑀜𑁆𑀜𑀁 𑀅𑀤𑁂𑀦𑁆𑀢𑁂 𑀢𑁂, 𑀭𑀸𑀚𑀧𑀼𑀢𑁆𑀢𑀸 𑀅𑀖𑀸𑀢𑀬𑀼𑀁;

𑀬𑀓𑁆𑀔𑀸 𑀳𑀼𑀢𑁆𑀯𑀸𑀦 𑀭𑀓𑁆𑀔𑀺𑀁𑀲𑀼, 𑀉𑀪𑁄 𑀕𑀩𑁆𑀪𑁂 𑀓𑀼𑀫𑀸𑀭𑀓𑀁.

𑁨𑁪. 𑀅𑀜𑁆𑀜𑀁 𑀉𑀧𑀯𑀺𑀚𑀜𑁆𑀜𑀁 𑀲𑀸, 𑀲𑀮𑁆𑀮𑀓𑁆𑀔𑀸 𑀧𑁂𑀲𑀺 𑀤𑀸𑀲𑀺𑀬𑀸;

𑀘𑀺𑀢𑁆𑀢𑀸 𑀲𑀸 𑀚𑀦𑀬𑀻 𑀧𑀼𑀢𑁆𑀢𑀁, 𑀲𑀸 𑀇𑀢𑁆𑀣𑀺 𑀧𑀦 𑀥𑀻𑀢𑀭𑀁.

𑁨𑁫. 𑀘𑀺𑀢𑁆𑀢𑀁 𑀲𑀳𑀲𑁆𑀲𑀁 𑀤𑀸𑀧𑁂𑀢𑁆𑀯𑀸, 𑀢𑀲𑁆𑀲𑀸 𑀧𑀼𑀢𑁆𑀢𑀁 𑀲𑀓𑀫𑁆𑀧𑀺 𑀘;

𑀆𑀡𑀸𑀧𑁂𑀢𑁆𑀯𑀸 𑀥𑀻𑀢𑀭𑀁 𑀢𑀁, 𑀦𑀺𑀧𑀚𑁆𑀚𑀸𑀧𑁂𑀲𑀺 𑀲𑀦𑁆𑀢𑀺𑀓𑁂.

𑁨𑁬. 𑀥𑀻𑀢𑀸 𑀮𑀤𑁆𑀥𑀸’𑀢𑀺 𑀲𑀼𑀢𑁆𑀯𑀸𑀦, 𑀢𑀼𑀝𑁆𑀞𑀸 𑀭𑀸𑀚𑀲𑀼𑀢𑀸 𑀅𑀳𑀼𑀁;

𑀫𑀸𑀢𑀸 𑀘 𑀫𑀸𑀢𑀼𑀫𑀸𑀢𑀸 𑀘, 𑀉𑀪𑁄 𑀧𑀦 𑀓𑀼𑀫𑀸𑀭𑀓𑀁.

𑁨𑁭. 𑀫𑀸𑀢𑀸𑀫𑀳𑀲𑁆𑀲 𑀦𑀸𑀫𑀜𑁆𑀘, 𑀚𑁂𑀝𑁆𑀞𑀲𑁆𑀲 𑀫𑀸𑀢𑀼𑀮𑀲𑁆𑀲 𑀘;

𑀏𑀓𑀁 𑀓𑀢𑁆𑀯𑀸 𑀢𑀫𑀓𑀭𑀼𑀁, 𑀧𑀡𑁆𑀟𑀼𑀓𑀸𑀪𑀬𑀦𑀸𑀫𑀓𑀁.

𑁨𑁮. 𑀮𑀁𑀓𑀸 𑀧𑀸𑀮𑁄 𑀧𑀡𑁆𑀟𑀼𑀯𑀸𑀲𑀼-𑀤𑁂𑀯𑁄 𑀭𑀚𑁆𑀚𑀫𑀓𑀸𑀭𑀬𑀺;

𑀢𑀺𑀁𑀲 𑀯𑀲𑁆𑀲𑀫𑁆𑀳𑀺 𑀚𑀸𑀢𑀫𑁆𑀳𑀺, 𑀫𑀢𑁄 𑀲𑁄 𑀧𑀡𑁆𑀟𑀼𑀓𑀸𑀪𑀬𑁂.

𑁨𑁯. 𑀢𑀲𑁆𑀫𑀺𑀁 𑀫𑀢𑀲𑁆𑀫𑀺𑀁 𑀫𑀦𑀼𑀚𑀸𑀥𑀺𑀧𑀲𑁆𑀫𑀺𑀁,

𑀲𑀩𑁆𑀩𑁂 𑀲𑀫𑀸𑀕𑀫𑁆𑀫 𑀦𑀭𑀺𑀦𑁆𑀤𑀧𑀼𑀢𑁆𑀢𑀸;

𑀢𑀲𑁆𑀲𑀸𑀪𑀬𑀲𑁆𑀲𑀸𑀪𑀬𑀤𑀲𑁆𑀲 𑀪𑀸𑀢𑀼,

𑀭𑀸𑀚𑀸𑀪𑀺𑀲𑁂𑀓𑀁 𑀅𑀓𑀭𑀼𑀁 𑀉𑀴𑀸𑀭𑀸𑀢𑀺.

𑀲𑀼𑀚𑀦𑀧𑁆𑀧𑀲𑀸𑀤 𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀅𑀪𑀬𑀸𑀪𑀺𑀲𑁂𑀓𑁄 𑀦𑀸𑀫

𑀦𑀯𑀫𑁄 𑀧𑀭𑀺𑀘𑁆𑀙𑁂𑀤𑁄.