𑀤𑀲𑀫 𑀧𑀭𑀺𑀘𑁆𑀙𑁂𑀤

𑀧𑀡𑁆𑀟𑀼𑀓𑀸𑀪𑀬𑀸𑀪𑀺𑀲𑁂𑀓𑁄

𑁧. 𑀉𑀫𑁆𑀫𑀸𑀤𑀘𑀺𑀢𑁆𑀢𑀸𑀬𑀸𑀡𑀢𑁆𑀢𑀸, 𑀤𑀸𑀲𑀻 𑀆𑀤𑀸𑀬 𑀤𑀸𑀭𑀓𑀁;

𑀲𑀫𑀼𑀕𑁆𑀕𑁂 𑀧𑀓𑁆𑀔𑀺𑀧𑀺𑀢𑁆𑀯𑀸𑀦, 𑀤𑁆𑀯𑀸𑀭𑀫𑀡𑁆𑀟𑀮 𑀓𑁂 𑀅𑀕𑀸.

𑁨. 𑀭𑀸𑀚𑀧𑀼𑀢𑁆𑀢𑀸 𑀘 𑀫𑀺𑀕𑀯𑀁, 𑀕𑀢𑀸 𑀢𑀼𑀫𑁆𑀩𑀭𑀓𑀦𑁆𑀤𑀭𑁂;

𑀤𑀺𑀲𑁆𑀯𑀸 𑀤𑀸𑀲𑀺𑀁 𑀓𑀼𑀳𑀺𑀁 𑀬𑀸𑀲𑀺, 𑀓𑀺𑀁 𑀫𑁂 𑀓𑀦𑁆𑀢𑀺 𑀘 𑀧𑀼𑀘𑁆𑀙𑀺𑀲𑀼𑀁.

𑁩. 𑀤𑁆𑀯𑀸𑀭𑀫𑀡𑁆𑀟𑀮𑀓𑀁 𑀬𑀸𑀫𑀺, 𑀥𑀻𑀢𑀼𑀫𑁂𑀕𑀼𑀴𑀧𑀽𑀯𑀓𑀁;

𑀇𑀘𑁆𑀘𑀸𑀳 𑀑𑀭𑁄𑀧𑁂𑀳𑀻𑀢𑀺, 𑀭𑀸𑀚𑀧𑀼𑀢𑁆𑀢𑀁 𑀓𑀫𑀩𑁆𑀭𑀯𑀼𑀁.

𑁪. 𑀘𑀺𑀢𑁆𑀢𑁄 𑀘 𑀓𑀸𑀮𑀯𑁂𑀮𑁄 𑀘, 𑀢𑀲𑁆𑀲𑀸’𑀭𑀓𑁆𑀔𑀸𑀬 𑀦𑀺𑀕𑁆𑀕𑀢𑀸;

𑀫𑀳𑀦𑁆𑀢𑀁 𑀲𑀽𑀓𑀭𑀯𑁂𑀲𑀁, 𑀢𑀁 𑀔𑀡𑀁𑀬𑁂𑀯 𑀤𑀲𑁆𑀲𑀬𑀼𑀁.

𑁫. 𑀢𑁂 𑀢𑀁 𑀲𑀫𑀦𑀼𑀩𑀦𑁆𑀥𑀺𑀁𑀲𑀼, 𑀲𑀸𑀲𑀫𑀸𑀤𑀸𑀬 𑀢𑀢𑁆𑀭’𑀕𑀸;

𑀤𑀸𑀭𑀓𑀜𑁆𑀘 𑀲𑀳𑀲𑁆𑀲𑀜𑁆𑀘, 𑀆𑀬𑀼𑀢𑁆𑀢𑀲𑁆𑀲 𑀅𑀤𑀸𑀭𑀳𑁄.

𑁬. 𑀢𑀲𑁆𑀫𑀺𑀁𑀬𑁂𑀯 𑀤𑀺𑀦𑁂 𑀢𑀲𑁆𑀲, 𑀪𑀭𑀺𑀬𑀸 𑀚𑀦𑀬𑀻 𑀲𑀼𑀢𑀁;

𑀬𑀫𑀓𑁂 𑀚𑀦𑀬𑀻 𑀧𑀼𑀢𑁆𑀢𑁂, 𑀪𑀭𑀺𑀬𑀁 𑀫𑁂’𑀢𑀺 𑀧𑁄𑀲𑀺𑀢𑀁.

𑁭. 𑀲𑁄 𑀲𑀢𑁆𑀢𑀯𑀲𑁆𑀲𑀺𑀓𑁄 𑀘𑀸’𑀲𑀺, 𑀢𑀁 𑀯𑀺𑀚𑀸𑀦𑀺𑀬 𑀫𑀸𑀢𑀼𑀮𑀸;

𑀕𑀦𑁆𑀢𑀼𑀁 𑀲𑀭𑀲𑀺 𑀓𑀻𑀴𑀦𑁆𑀢𑁂, 𑀤𑀸𑀭𑀓𑁂 𑀘 𑀧𑀬𑁄𑀚𑀬𑀼𑀁.

𑁮. 𑀚𑀮𑀝𑁆𑀞𑀁 𑀭𑀼𑀓𑁆𑀔𑀲𑀼𑀲𑀺𑀭𑀁, 𑀚𑀮𑀘𑁆𑀙𑀸𑀤𑀺𑀢𑀙𑀺𑀤𑁆𑀤𑀓𑀁;

𑀦𑀺𑀫𑀼𑀚𑁆𑀚𑀫𑀸𑀦𑁄 𑀙𑀺𑀤𑁆𑀤𑁂𑀦, 𑀧𑀯𑀺𑀲𑀺𑀢𑁆𑀯𑀸 𑀘𑀺𑀭𑀝𑁆𑀞𑀺𑀢𑁄.

𑁯. 𑀢𑀢𑁄 𑀢𑀣𑁂𑀯 𑀦𑀺𑀓𑁆𑀔𑀫𑁆𑀫, 𑀓𑀼𑀫𑀸𑀭𑁂 𑀲𑁂𑀲𑀤𑀸𑀭𑀓𑁂;

𑀉𑀧𑀘𑁆𑀘 𑀧𑀼𑀘𑁆𑀙𑀺𑀬𑀦𑁆𑀢𑁄𑀧𑀺, 𑀯𑀜𑁆𑀘𑁂𑀢’𑀜𑁆𑀜𑀯𑀘𑁄𑀳𑀺 𑀲𑁄.

𑁧𑁦. 𑀫𑀦𑀼𑀲𑁆𑀲𑁂𑀳𑀸’𑀕𑀢𑁂𑀳𑁂𑀲𑁄, 𑀦𑀺𑀯𑀸𑀲𑁂𑀢𑁆𑀯𑀸𑀦 𑀯𑀢𑁆𑀣𑀓𑀁;

𑀓𑀼𑀫𑀸𑀭𑁄 𑀯𑀸𑀭𑀺𑀫𑁄 𑀕𑀬𑁆𑀳, 𑀲𑀼𑀲𑀺𑀭𑀫𑁆𑀳𑀺 𑀞𑀺𑀢𑁄 𑀅𑀳𑀼.

𑁧𑁧. 𑀯𑀢𑁆𑀣𑀓𑀸𑀦𑀺 𑀕𑀡𑁂𑀢𑁆𑀯𑀸𑀦, 𑀫𑀸𑀭𑁂𑀢𑁆𑀯𑀸 𑀲𑁂𑀲𑀤𑀸𑀭𑀓𑁂;

𑀕𑀦𑁆𑀢𑁆𑀯𑀸 𑀆𑀭𑁄𑀘𑀬𑀼𑀁 𑀲𑀩𑁆𑀩𑁂, 𑀤𑀸𑀭𑀓𑀸 𑀫𑀸𑀭𑀺𑀢𑀸 𑀇𑀢𑀺.

𑁧𑁨. 𑀕𑀢𑁂𑀲𑀼 𑀢𑁂𑀲𑀼 𑀲𑁄 𑀕𑀦𑁆𑀢𑁆𑀯𑀸, 𑀆𑀬𑀼𑀢𑁆𑀢𑀓𑀖𑀭𑀁 𑀲𑀓𑀁;

𑀯𑀲𑀁 𑀅𑀲𑁆𑀲𑀸𑀲𑀺𑀢𑁄 𑀢𑁂𑀦, 𑀅𑀳𑀽 𑀤𑁆𑀯𑀸𑀤𑀲𑀯𑀲𑁆𑀲𑀺𑀓𑁄.

𑁧𑁩. 𑀧𑀼𑀦 𑀲𑀼𑀢𑁆𑀯𑀸𑀦 𑀚𑀻𑀯𑀦𑁆𑀢𑀁, 𑀓𑀼𑀫𑀸𑀭𑀁 𑀢𑀲𑁆𑀲 𑀫𑀸𑀢𑀼𑀮𑀁;

𑀢𑀢𑁆𑀣 𑀕𑁄𑀧𑀸𑀮𑀓𑁂 𑀲𑀩𑁆𑀩𑁂, 𑀫𑀸𑀭𑁂𑀢𑀼𑀁 𑀲𑀦𑁆𑀦𑀺𑀬𑁄𑀚𑀬𑀼𑀁.

𑁧𑁪. 𑀢𑀲𑁆𑀫𑀺𑀁 𑀅𑀳𑀦𑀺 𑀕𑁄𑀧𑀸𑀮𑀸, 𑀮𑀤𑁆𑀥𑀸 𑀏𑀓𑀁 𑀘𑀢𑀼𑀧𑁆𑀧𑀤𑀁;

𑀅𑀕𑁆𑀕𑀺𑀁 𑀆𑀳𑀭𑀺𑀢𑀼𑀁 𑀕𑀸𑀫𑀁, 𑀧𑁂𑀲𑁂𑀢𑀼𑀁 𑀢𑀁 𑀓𑀼𑀫𑀸𑀭𑀓𑀁.

𑁧𑁫. 𑀲𑁄 𑀕𑀦𑁆𑀢𑁆𑀯𑀸 𑀖𑀭𑀫𑀸𑀬𑀼𑀢𑁆𑀢-𑀧𑀼𑀢𑁆𑀢𑀓𑀁𑀬𑁂𑀯 𑀧𑁂𑀲𑀬𑀺;

𑀧𑀸𑀤𑀸 𑀭𑀼𑀚𑀦𑁆𑀢𑀺 𑀫𑁂 𑀢𑁂𑀳𑀺, 𑀅𑀕𑁆𑀕𑀺𑀁 𑀕𑁄𑀧𑀸𑀮𑀲𑀦𑁆𑀢𑀺𑀓𑀁.

𑁧𑁬. 𑀢𑀢𑁆𑀣 𑀅𑀗𑁆𑀕𑀸𑀭 𑀫𑀁𑀲𑀜𑁆𑀘,

𑀔𑀸𑀤𑀺𑀲𑁆𑀲𑀲𑀺 𑀢𑀼𑀯𑀁 𑀇𑀢𑀺;

𑀦𑁂 𑀲𑀺 𑀲𑁄 𑀢𑀁 𑀯𑀘𑁄 𑀲𑀼𑀢𑁆𑀯𑀸,

𑀅𑀕𑁆𑀕𑀺𑀁 𑀕𑁄𑀧𑀸𑀮𑀲𑀦𑁆𑀢𑀺𑀓𑀁.

𑁧𑁭. 𑀢𑀲𑁆𑀫𑀺𑀁 𑀔𑀡𑁂 𑀧𑁂𑀲𑀺𑀢𑀸 𑀢𑁂, 𑀧𑀭𑀺𑀓𑁆𑀔𑀺𑀧𑀺𑀬 𑀫𑀸𑀭𑀬𑀼𑀁;

𑀲𑀩𑁆𑀩𑁂 𑀕𑁄𑀧𑁂 𑀫𑀸𑀭𑀬𑀺𑀢𑁆𑀯𑀸, 𑀫𑀸𑀢𑀼𑀮𑀸𑀦𑀁 𑀦𑀺𑀯𑁂𑀤𑀬𑀼𑀁.

𑁧𑁮. 𑀢𑀣𑁄 𑀲𑁄𑀴𑀲𑀯𑀲𑁆𑀲𑀁 𑀢𑀁, 𑀯𑀺𑀚𑀸𑀦𑀺𑀁𑀲𑀼 𑀘 𑀫𑀸𑀢𑀼𑀮𑀸;

𑀫𑀸𑀢𑀸 𑀲𑀳𑀲𑁆𑀲𑀜𑁆𑀘𑀸’𑀤𑀸𑀲𑀺, 𑀢𑀲𑁆𑀲𑀸 𑀭𑀓𑁆𑀔𑀜𑁆𑀘 𑀆𑀤𑀺𑀲𑀺.

𑁧𑁯. 𑀆𑀬𑀼𑀢𑁆𑀢𑁄 𑀫𑀸𑀢𑀼𑀲𑀦𑁆𑀤𑁂𑀲𑀁, 𑀲𑀩𑁆𑀩𑀁 𑀢𑀲𑁆𑀲 𑀦𑀺𑀯𑁂𑀤𑀺𑀬;

𑀤𑀢𑁆𑀯𑀸 𑀤𑀸𑀲𑀁 𑀲𑀳𑀲𑁆𑀲𑀜𑁆𑀘, 𑀧𑁂𑀲𑁂𑀲𑀺 𑀧𑀡𑁆𑀟𑀼𑀮𑀦𑁆𑀢𑀺𑀓𑀁.

𑁨𑁦. 𑀧𑀡𑁆𑀟𑀼𑀮𑀩𑁆𑀭𑀸𑀳𑁆𑀫𑀡𑁄 𑀦𑀸𑀫, 𑀪𑁄𑀕𑀯𑀸 𑀯𑁂𑀤𑀧𑀸𑀭𑀕𑁄;

𑀤𑀓𑁆𑀔𑀺𑀡𑀲𑁆𑀫𑀺𑀁 𑀤𑀺𑀲𑀸𑀪𑀸𑀕𑁂, 𑀯𑀲𑀻 𑀧𑀡𑁆𑀟𑀼𑀮𑀕𑀸𑀫𑀓𑁂.

𑁨𑁧. 𑀓𑀼𑀫𑀸𑀭𑁄 𑀢𑀢𑁆𑀣 𑀕𑀦𑁆𑀢𑁆𑀯𑀸𑀦, 𑀧𑀲𑁆𑀲𑀺 𑀧𑀡𑁆𑀟𑀼𑀮𑀩𑁆𑀭𑀸𑀳𑁆𑀫𑀡𑀁;

‘‘𑀢𑁆𑀯𑀁 𑀧𑀡𑁆𑀟𑀼𑀓𑀸𑀪𑀬𑁄 𑀢𑀸𑀢’’, 𑀇𑀢𑀺 𑀧𑀼𑀘𑁆𑀙𑀺𑀬 𑀩𑁆𑀬𑀸𑀓𑀢𑁂.

𑁨𑁨. 𑀢𑀲𑁆𑀲 𑀓𑀢𑁆𑀯𑀸𑀦 𑀲𑀓𑁆𑀓𑀸𑀭𑀁, 𑀆𑀳 𑀭𑀸𑀚𑀸 𑀪𑀯𑀺𑀲𑁆𑀲𑀲𑀺;

𑀲𑀫𑀲𑀢𑁆𑀢𑀢𑀺𑀯𑀲𑁆𑀲𑀸𑀦𑀺, 𑀭𑀚𑁆𑀚𑀁 𑀢𑁆𑀯𑀁 𑀓𑀸𑀭𑀬𑀺𑀲𑁆𑀲𑀲𑀺.

𑁨𑁩. 𑀲𑀺𑀧𑁆𑀧𑀁 𑀉𑀕𑁆𑀕𑀡𑁆𑀳 𑀢𑀸𑀢𑀸𑀢𑀺, 𑀲𑀺𑀧𑁆𑀧𑀼𑀕𑁆𑀕𑀳𑀫𑀓𑀸𑀭𑀬𑀻;

𑀘𑀦𑁆𑀤𑁂𑀦 𑀢𑀲𑁆𑀲 𑀧𑀼𑀢𑁆𑀢𑁂𑀦, 𑀔𑀺𑀧𑁆𑀧𑀁 𑀲𑀺𑀧𑁆𑀧𑀁 𑀲𑀫𑀸𑀧𑀺𑀢𑀁.

𑁨𑁪. 𑀅𑀤𑀸 𑀲𑀢𑀲𑀳𑀲𑁆𑀲𑀁 𑀲𑁄, 𑀬𑁄𑀥𑀲𑀗𑁆𑀕𑀳𑀓𑀸𑀭𑀡𑀸;

𑀬𑁄𑀥𑁂𑀲𑀼 𑀲𑀗𑁆𑀕𑀳𑀺𑀢𑁂𑀲𑀼, 𑀢𑁂𑀦 𑀧𑀜𑁆𑀘𑀲𑀢𑁂𑀲𑀼 𑀲𑁄.

𑁨𑁫. 𑀲𑀺𑀬𑀼𑀁 𑀬𑀸𑀬 𑀕𑀬𑀺𑀢𑀸𑀦𑀺, 𑀧𑀡𑁆𑀡𑀸𑀦𑀺 𑀓𑀦𑀓𑀸𑀦𑀺 𑀢𑀁;

𑀫𑀳𑁂𑀲𑀺𑀁 𑀓𑀼𑀭𑀼𑀘𑀦𑁆𑀤𑀜𑁆𑀘, 𑀫𑀫 𑀧𑀼𑀢𑁆𑀢𑀁 𑀧𑀼𑀭𑁄𑀳𑀺𑀢𑀁.

𑁨𑁬. 𑀇𑀪𑀺 𑀯𑀢𑁆𑀯𑀸 𑀥𑀦𑀁 𑀤𑀢𑁆𑀯𑀸, 𑀲𑀬𑁄𑀥𑀁 𑀦𑀺𑀳𑀭𑀺 𑀢𑀢𑁄;

𑀲𑁄 𑀦𑀸𑀫𑀁 𑀲𑀸𑀯𑀬𑀺𑀢𑁆𑀯𑀸𑀦, 𑀢𑀢𑁄 𑀦𑀺𑀓𑁆𑀔𑀫𑁆𑀫 𑀧𑀼𑀜𑁆𑀜𑀯𑀸.

𑁨𑁭. 𑀮𑀤𑁆𑀥𑀩𑀮𑁄 𑀦𑀕𑀭𑀓𑁂, 𑀓𑀸𑀲𑀧𑀩𑁆𑀩𑀢 𑀲𑀦𑁆𑀢𑀺𑀓𑁂;

𑀲𑀢𑁆𑀢𑀲𑀢𑀸𑀦𑀺 𑀧𑀼𑀭𑀺𑀲𑁂, 𑀲𑀩𑁆𑀩𑁂𑀲𑀁 𑀪𑁄𑀚𑀦𑀸𑀦𑀺 𑀘.

𑁨𑁮. 𑀢𑀢𑁄 𑀦𑀭𑀲𑀳𑀲𑁆𑀲𑁂𑀦, 𑀤𑁆𑀯𑀺𑀲𑀢𑁂𑀦 𑀓𑀼𑀫𑀸𑀭𑀓𑁄;

𑀕𑀺𑀭𑀺𑀓𑀡𑁆𑀟 𑀧𑀩𑁆𑀩𑀢𑀁 𑀦𑀸𑀫, 𑀅𑀕𑀫𑀸 𑀧𑀭𑀺𑀯𑀸𑀭𑀺𑀢𑁄.

𑁨𑁯. 𑀕𑀺𑀭𑀺𑀓𑀡𑁆𑀟𑀲𑀺𑀯𑁄 𑀦𑀸𑀫, 𑀧𑀡𑁆𑀟𑀼𑀓𑀸𑀪𑀬 𑀫𑀸𑀢𑀼𑀮𑁄;

𑀢𑀁 𑀧𑀡𑁆𑀟𑀼𑀯𑀸𑀲𑀼𑀤𑁂𑀯𑁂𑀦, 𑀤𑀺𑀦𑁆𑀦𑀁 𑀪𑀼𑀜𑁆𑀚𑀢𑀺 𑀤𑁂𑀲𑀓𑀁.

𑁩𑁦. 𑀲𑁄 𑀓𑀭𑀺𑀲𑀲𑀢𑀁 𑀧𑀓𑁆𑀓𑀁, 𑀢𑀤𑀸 𑀮𑀸𑀯𑁂𑀢𑀺 𑀔𑀢𑁆𑀢𑀺𑀬𑁄;

𑀢𑀲𑁆𑀲 𑀥𑀻𑀢𑀸 𑀭𑀽𑀧𑀯𑀢𑀻, 𑀧𑀸𑀮𑀻 𑀦𑀸𑀫𑀸’𑀲𑀺 𑀔𑀢𑁆𑀢𑀺𑀬𑀸.

𑁩𑁧. 𑀲𑀸 𑀫𑀳𑀸𑀧𑀭𑀺𑀯𑀸𑀭𑁂𑀦, 𑀬𑀸𑀦𑀫𑀸𑀭𑀼𑀬𑁆𑀳 𑀲𑁄𑀪𑀦𑀁;

𑀧𑀺𑀢𑀼𑀪𑀢𑁆𑀢𑀁 𑀕𑀸𑀳𑀬𑀺𑀢𑁆𑀯𑀸, 𑀮𑀸𑀯𑀓𑀸𑀦𑀜𑁆𑀘 𑀕𑀘𑁆𑀙𑀢𑀺.

𑁩𑁨. 𑀓𑀼𑀫𑀸𑀭𑀲𑁆𑀲 𑀫𑀦𑀼𑀲𑁆𑀲𑀸𑀦𑀁, 𑀤𑀺𑀲𑁆𑀯𑀸 𑀢𑀢𑁆𑀣 𑀓𑀼𑀫𑀸𑀭𑀺𑀓𑀁;

𑀆𑀭𑁄𑀘𑁂𑀲𑀼𑀁 𑀓𑀼𑀫𑀸𑀭𑀲𑁆𑀲, 𑀓𑀼𑀫𑀸𑀭𑁄 𑀲𑀳𑀲𑀸’𑀕𑀢𑁄.

𑁩𑁩. 𑀤𑁆𑀯𑁂𑀥𑀸 𑀢𑀁 𑀧𑀭𑀺𑀲𑀁 𑀓𑀢𑁆𑀯𑀸, 𑀲𑀢𑀁 𑀬𑀸𑀦𑀫𑀧𑁂𑀲𑀬𑀺;

𑀢𑀤𑀦𑁆𑀢𑀺𑀓𑀁 𑀲𑀧𑀭𑀺𑀲𑀸, 𑀓𑀢𑁆𑀣 𑀬𑀸𑀲𑀻𑀢𑀺 𑀧𑀼𑀘𑁆𑀙𑀺𑀢𑀁.

𑁩𑁪. 𑀢𑀸𑀬 𑀯𑀼𑀢𑁆𑀢𑁂𑀢𑀼 𑀲𑀩𑁆𑀩𑀲𑁆𑀫𑀺𑀁, 𑀢𑀲𑁆𑀲𑀁𑀲𑀸𑀭𑀢𑁆𑀢 𑀫𑀸𑀦𑀲𑁄;

𑀅𑀢𑁆𑀢𑀦𑁄 𑀲𑀁𑀯𑀺𑀪𑀸𑀕𑀢𑁆𑀣𑀁, 𑀪𑀦𑁆𑀢𑁂𑀦𑀸’𑀬𑀸𑀘𑀺 𑀔𑀢𑁆𑀢𑀺𑀬𑁄.

𑁩𑁫. 𑀲𑀸𑀲𑀫𑁄𑀭𑀼𑀬𑁆𑀳 𑀬𑀸𑀦𑀫𑁆𑀳𑀸, 𑀅𑀤𑀸 𑀲𑁄𑀯𑀡𑁆𑀡𑀧𑀸𑀢𑀺𑀬𑀸;

𑀪𑀢𑁆𑀢𑀁 𑀦𑀺𑀕𑁆𑀭𑁄𑀥 𑀫𑀽𑀮𑀲𑁆𑀫𑀺𑀁, 𑀭𑀸𑀚𑀧𑀼𑀢𑁆𑀢𑀲𑁆𑀲 𑀔𑀢𑁆𑀢𑀺𑀬𑀸.

𑁩𑁬. 𑀕𑀡𑁆𑀳𑀺 𑀦𑀺𑀕𑁆𑀭𑁄𑀥𑀧𑀡𑁆𑀡𑀸𑀦𑀺, 𑀪𑁄𑀚𑁂𑀢𑀼𑀁 𑀲𑁂𑀲𑀓𑁂 𑀚𑀦𑁂;

𑀲𑁄𑀯𑀡𑁆𑀡𑀪𑀸𑀚𑀦𑀸𑀦𑀸’𑀲𑀼𑀁, 𑀢𑀸𑀦𑀺 𑀧𑀡𑁆𑀡𑀸𑀦𑀺 𑀢𑀁 𑀔𑀡𑁂.

𑁩𑁭. 𑀢𑀸𑀦𑀺 𑀤𑀺𑀲𑁆𑀯𑀸 𑀭𑀸𑀚𑀧𑀼𑀢𑁆𑀢𑁄, 𑀲𑀭𑀺𑀢𑁆𑀯𑀸 𑀤𑀺𑀚𑀪𑀸𑀲𑀺𑀢𑀁;

𑀫𑀳𑁂𑀲𑀺𑀪𑀸𑀯 𑀬𑁄𑀕𑁆𑀕𑀸𑀫𑁂, 𑀓𑀜𑁆𑀜𑀸𑀮𑀤𑁆𑀥𑀸𑀢𑀺 𑀢𑀼𑀲𑁆𑀲𑀺𑀲𑁄.

𑁩𑁮. 𑀲𑀩𑁆𑀩𑁂 𑀪𑁄𑀚𑀸𑀧𑀬𑀻 𑀢𑁂𑀲𑀸, 𑀢𑀁 𑀦 𑀔𑀻𑀬𑀺𑀢𑁆𑀣 𑀪𑁄𑀚𑀦𑀁;

𑀏𑀓𑀲𑁆𑀲 𑀧𑀝𑀺𑀯𑀺𑀲𑁄’𑀯, 𑀕𑀳𑀺𑀢𑁄 𑀢𑀢𑁆𑀣 𑀤𑀺𑀲𑁆𑀲𑀣.

𑁩𑁯. 𑀏𑀯𑀁 𑀧𑀼𑀜𑁆𑀜𑀕𑀼𑀡𑀽𑀧𑁂𑀢𑀸, 𑀲𑀼𑀓𑀼𑀫𑀸𑀭𑀻 𑀓𑀼𑀫𑀸𑀭𑀺𑀓𑀸;

𑀲𑀼𑀯𑀡𑁆𑀡𑀧𑀸𑀮𑀺 𑀦𑀸𑀫𑁂𑀦, 𑀢𑀢𑁄𑀧𑁆𑀧𑀪𑀼𑀢 𑀆𑀲𑀺 𑀲𑀸.

𑁪𑁦. 𑀢𑀁 𑀓𑀼𑀫𑀸𑀭 𑀕𑀳𑁂𑀢𑁆𑀯𑀸𑀦, 𑀬𑀸𑀦𑀫𑀸𑀭𑀼𑀬𑁆𑀳 𑀔𑀢𑁆𑀢𑀺𑀬𑁄;

𑀫𑀳𑀩𑁆𑀩𑀮 𑀧𑀭𑀺𑀩𑁆𑀬𑀽𑀴𑁆𑀳𑁄, 𑀅𑀦𑀼𑀲𑀁𑀡𑀻 𑀅𑀧𑀓𑁆𑀓𑀫𑀺.

𑁪𑁧. 𑀢𑀁 𑀲𑀼𑀢𑁆𑀯𑀸𑀦 𑀧𑀺𑀢𑀸 𑀢𑀲𑁆𑀲𑀸, 𑀦𑀭𑁂 𑀲𑀩𑁆𑀩𑁂 𑀅𑀧𑁂𑀲𑀬𑀺;

𑀢𑁂 𑀕𑀦𑁆𑀢𑁆𑀯𑀸 𑀓𑀮𑀳𑀁 𑀓𑀢𑁆𑀯𑀸, 𑀢𑀚𑁆𑀚𑀺𑀢𑀸 𑀢𑁂𑀳𑀺 𑀆𑀕𑀫𑀼𑀁.

𑁪𑁨. 𑀓𑀮𑀳𑀦𑀕𑀭𑀁 𑀦𑀸𑀫, 𑀕𑀸𑀫𑁄 𑀢𑀢𑁆𑀣 𑀓𑀢𑁂 𑀅𑀳𑀼;

𑀢𑀁 𑀲𑀼𑀢𑁆𑀯𑀸 𑀪𑀸𑀢𑀭𑁄 𑀢𑀲𑁆𑀲𑀸, 𑀧𑀜𑁆𑀘𑀬𑀼𑀤𑁆𑀥𑀸𑀬𑀼’𑀧𑀸𑀕𑀫𑀼𑀁.

𑁪𑁩. 𑀲𑀩𑁆𑀩𑁂 𑀢𑁂 𑀧𑀡𑁆𑀟𑀼𑀮𑀲𑀼𑀢𑁄, 𑀘𑀦𑁆𑀤𑁄𑀬𑁂𑀯 𑀅𑀖𑀸𑀢𑀬𑀺;

𑀮𑁄𑀳𑀺𑀢 𑀯𑀸𑀳𑀔𑀡𑁆𑀟𑁄𑀢𑀺, 𑀢𑁂𑀲𑀁 𑀬𑀼𑀤𑁆𑀥𑀫𑀳𑀻 𑀅𑀳𑀼.

𑁪𑁪. 𑀫𑀳𑀢𑀸 𑀩𑀮 𑀓𑀸𑀥𑀬𑀦,

𑀢𑀢𑁄 𑀲𑁄 𑀧𑀡𑁆𑀟𑀼𑀓𑀸𑀪𑀬𑁄;

𑀕𑀗𑁆𑀕𑀸𑀬 𑀧𑀸𑀭𑀺𑀫𑁂 𑀢𑀺𑀭𑁂,

𑀤𑁄𑀴𑀧𑀩𑁆𑀩𑀢𑀓𑀁 𑀅𑀕𑀸.

𑁪𑁫. 𑀢𑀢𑁆𑀣 𑀘𑀢𑁆𑀢𑀸𑀭𑀺 𑀯𑀲𑁆𑀲𑀸𑀦𑀺, 𑀯𑀲𑀺 𑀢𑀁 𑀢𑀢𑁆𑀣 𑀫𑀸𑀢𑀼𑀮𑀸;

𑀲𑀼𑀢𑁆𑀯𑀸 𑀞𑀧𑁂𑀢𑁆𑀯𑀸 𑀭𑀸𑀚𑀸𑀦𑀁, 𑀢𑀁 𑀬𑀼𑀤𑁆𑀥𑀢𑁆𑀣𑀫𑀼𑀧𑀸𑀕𑀫𑀼𑀁.

𑁪𑁬. 𑀔𑀦𑁆𑀥𑀸𑀯𑀸𑀭𑀁 𑀦𑀺𑀯𑁂𑀲𑁂𑀢𑁆𑀯𑀸, 𑀥𑀽𑀫𑀭𑀓𑁆𑀔𑀸𑀕 𑀲𑀦𑁆𑀢𑀺𑀓𑁂;

𑀪𑀸𑀕𑀺𑀦𑁂𑀬𑁆𑀬𑁂𑀦 𑀬𑀼𑀚𑁆𑀛𑀺𑀁𑀲𑀼, 𑀪𑀸𑀕𑀺𑀦𑁂𑀬𑁆𑀬𑁄 𑀢𑀼 𑀫𑀸𑀢𑀼𑀮𑁂.

𑁪𑁭. 𑀅𑀦𑀼𑀩𑀦𑁆𑀥𑀻 𑀑𑀭𑀕𑀗𑁆𑀕𑀁, 𑀫𑀮𑀸𑀧𑁂𑀢𑁆𑀯𑀸 𑀦𑀺𑀯𑀢𑁆𑀢𑀺𑀬;

𑀢𑁂𑀲𑀜𑁆𑀘 𑀔𑀦𑁆𑀥𑀸𑀯𑀸𑀭𑀫𑁆𑀳𑀺, 𑀤𑀼𑀯𑁂 𑀯𑀲𑁆𑀲𑀸𑀦𑀺 𑀲𑁄 𑀯𑀲𑀻.

𑁪𑁮. 𑀕𑀦𑁆𑀢𑁆𑀯𑁄’𑀧𑀢𑀺𑀲𑁆𑀲𑀕𑀸𑀫𑀁 𑀢𑁂, 𑀢𑀫𑀢𑁆𑀣𑀁 𑀭𑀸𑀚𑀺𑀦𑁄’𑀩𑁆𑀭𑀯𑀼𑀁;

𑀭𑀸𑀚𑀸𑀮𑁂𑀔𑀁 𑀓𑀼𑀫𑀸𑀭𑀲𑁆𑀲, 𑀲𑀭𑀳𑀲𑁆𑀲𑀁 𑀲𑀧𑀸𑀳𑀺𑀡𑀺.

𑁪𑁯. ‘‘𑀧𑀼𑀜𑁆𑀚𑀲𑁆𑀲𑀼 𑀧𑀸𑀭𑀕𑀗𑁆𑀕𑀁 𑀢𑁆𑀯𑀁, 𑀫𑀸’𑀕𑀸 𑀑𑀭𑀁𑀢𑀢𑁄’’𑀇𑀢𑀺;

𑀢𑀁 𑀲𑀼𑀢𑁆𑀯𑀸 𑀢𑀲𑁆𑀲 𑀓𑀼𑀚𑁆𑀚𑀺𑀁𑀲𑀼, 𑀪𑀸𑀢𑀭𑁄 𑀦𑀯 𑀭𑀸𑀚𑀺𑀦𑁄.

𑁫𑁦. 𑀉𑀧𑀢𑁆𑀣𑀫𑁆𑀪𑁄 𑀢𑁆𑀯𑀫𑁂𑀯𑀸’𑀲𑀺, 𑀘𑀺𑀭𑀁 𑀢𑀲𑁆𑀲 𑀇𑀤𑀸𑀦𑀺 𑀢𑀼;

𑀭𑀝𑁆𑀞𑀁 𑀤𑀤𑀸𑀲𑀺 𑀢𑀲𑁆𑀫𑀸 𑀢𑁆𑀯𑀁, 𑀫𑀸𑀭𑁂𑀲𑁆𑀲𑀸𑀫𑀸’𑀢𑀺 𑀅𑀩𑁆𑀭𑀯𑀼𑀁.

𑁫𑁧. 𑀲𑁄 𑀢𑁂𑀲𑀁 𑀭𑀚𑁆𑀚𑀫𑀧𑁆𑀧𑁂𑀲𑀺, 𑀢𑁂 𑀢𑀺𑀲𑁆𑀲𑀁 𑀦𑀸𑀫 𑀪𑀸𑀢𑀭𑀁;

𑀲𑀩𑁆𑀩𑁂𑀯 𑀲𑀳𑀺𑀢𑀸’𑀓𑀁𑀲𑀼, 𑀭𑀚𑁆𑀚𑀲𑁆𑀲 𑀧𑀭𑀺𑀦𑀸𑀬𑀓𑀁.

𑁫𑁨. 𑀏𑀲𑁄 𑀯𑀻𑀲𑀢𑀺𑀯𑀲𑁆𑀲𑀸𑀦𑀺, 𑀅𑀪𑀬𑁄’𑀪𑀬 𑀤𑀸𑀬𑀓𑁄;

𑀢𑀢𑁆𑀣𑁄’𑀧𑀢𑀺𑀲𑁆𑀲𑀕𑀸𑀫𑀫𑁆𑀳𑀺, 𑀭𑀸𑀚𑀸 𑀭𑀚𑁆𑀚𑀫𑀓𑀸𑀭𑀬𑀺.

𑁫𑁩. 𑀯𑀲𑀦𑁆𑀢𑀺 𑀥𑀽𑀫𑀭𑀓𑁆𑀔𑀸𑀕𑁂, 𑀲𑀭𑁂 𑀢𑀼𑀫𑁆𑀩𑀭𑀺𑀬𑀗𑁆𑀕𑀡𑁂;

𑀘𑀭𑀢𑁂 𑀯𑀴𑀯𑀸 𑀭𑀼𑀧𑀸, 𑀬𑀓𑁆𑀔𑀻 𑀘𑁂𑀢𑀺𑀬𑀦𑀸𑀫𑀺𑀓𑀸.

𑁫𑁪. 𑀏𑀓𑁄 𑀤𑀺𑀲𑁆𑀯𑀸𑀦 𑀲𑁂𑀦𑀗𑁆𑀕𑀁, 𑀉𑀢𑁆𑀢𑀧𑀸𑀤𑀁 𑀫𑀦𑁄𑀭𑀫𑀁;

𑀆𑀭𑁄𑀘𑁂𑀲𑀺 𑀓𑀼𑀫𑀸𑀭𑀲𑁆𑀲, 𑀯𑀴𑀯𑁂’𑀢𑁆𑀢𑀻’𑀤𑀺𑀲𑀻 𑀇𑀢𑀺.

𑁫𑁫. 𑀓𑀼𑀫𑀸𑀭𑁄 𑀭𑀲𑁆𑀫𑀺𑀫𑀸𑀤𑀸𑀬, 𑀕𑀳𑁂𑀢𑀼𑀁 𑀢𑀁 𑀉𑀧𑀸𑀕𑀫𑀺;

𑀧𑀘𑁆𑀙𑀢𑁄 𑀅𑀕𑀢𑀁 𑀤𑀺𑀲𑁆𑀯𑀸, 𑀪𑀻𑀢𑀸 𑀢𑁂𑀚𑁂𑀦 𑀢𑀲𑁆𑀲𑀲𑀸.

𑁫𑁬. 𑀥𑀸𑀯𑀺’𑀦𑀦𑁆𑀢𑀭𑀥𑀸𑀬𑀺𑀢𑁆𑀯𑀸, 𑀥𑀸𑀯𑀦𑁆𑀢𑀺 𑀫𑀦𑀼𑀩𑀦𑁆𑀥𑀺𑀲𑁄;

𑀥𑀸𑀯𑀫𑀸𑀦𑀸 𑀲𑀭𑀁 𑀳𑀁 𑀲𑀸, 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀧𑀭𑀺𑀓𑁆𑀔𑀺𑀧𑀺.

𑁫𑁭. 𑀑𑀢𑀭𑀺𑀢𑁆𑀯𑀸 𑀫𑀳𑀸𑀕𑀗𑁆𑀕𑀁, 𑀉𑀢𑁆𑀢𑀭𑀺𑀢𑁆𑀯𑀸 𑀢𑀢𑁄 𑀧𑀦;

𑀥𑀼𑀫𑀭𑀓𑁆𑀔𑀁 𑀧𑀩𑁆𑀩𑀢𑀁 𑀢𑀁, 𑀲𑀢𑁆𑀢𑀓𑁆𑀔𑀢𑁆𑀢𑀼𑀁 𑀧𑀭𑀺𑀓𑁆𑀔𑀺𑀧𑀺.

𑁫𑁮. 𑀢𑀁 𑀲𑀭𑀁 𑀧𑀼𑀦 𑀢𑀺𑀓𑁆𑀔𑀢𑁆𑀢𑀼𑀁, 𑀧𑀭𑀺𑀓𑁆𑀔𑀺𑀧𑀺 𑀢𑀢𑁄 𑀧𑀼𑀦;

𑀕𑀗𑁆𑀕𑀁 𑀓𑀘𑁆𑀙𑀓𑀢𑀺𑀢𑁆𑀣𑁂𑀦, 𑀲𑀫𑁄𑀢𑀭𑀺 𑀢𑀳𑀺𑀁 𑀢𑀼 𑀲𑁄.

𑁫𑁯. 𑀕𑀳𑁂𑀲𑀺𑀢𑀁 𑀯𑀸𑀮𑀥𑀺𑀲𑁆𑀫𑀺𑀁, 𑀢𑀸𑀮𑀧𑀢𑁆𑀢𑀜𑁆𑀘 𑀢𑁄𑀬𑀕𑀁;

𑀢𑀲𑁆𑀲 𑀧𑀼𑀜𑁆𑀜𑀸𑀦𑀼𑀪𑀸𑀯𑁂𑀦, 𑀲𑁄 𑀅𑀳𑁄𑀲𑀺 𑀫𑀳𑀸 𑀅𑀲𑀺.

𑁬𑁦. 𑀉𑀘𑁆𑀘𑀸𑀭𑁂𑀲𑀺 𑀅𑀲𑀺𑀁 𑀤𑀚𑁆𑀚𑀁, ‘‘𑀫𑀸𑀭𑁄𑀫𑀻’’𑀢𑀺 𑀢𑀫𑀸𑀳 𑀲𑀸;

𑀭𑀚𑁆𑀚𑀁 𑀕𑀳𑁂𑀢𑁆𑀯𑀸 𑀢𑁂 𑀤𑀚𑁆𑀚𑀁, 𑀲𑀸𑀫𑀺 𑀫𑀸𑀫𑀁 𑀅𑀫𑀸𑀭𑀬𑀺.

𑁬𑁧. 𑀕𑀻𑀯𑀸𑀬 𑀢𑀁 𑀕𑀳𑁂𑀢𑁆𑀯𑀸 𑀲𑁄, 𑀯𑀺𑀚𑁆𑀛𑀺𑀢𑁆𑀯𑀸 𑀅𑀲𑀺𑀓𑁄𑀝𑀺𑀬𑀸;

𑀦𑀸𑀲𑀸𑀬 𑀭𑀚𑁆𑀚𑀼𑀬𑀸 𑀩𑀦𑁆𑀥𑀺, 𑀲𑀸 𑀅𑀳𑁄𑀲𑀺 𑀯𑀲𑀸𑀦𑀼𑀕𑀸.

𑁬𑁨. 𑀕𑀦𑁆𑀢𑁆𑀯𑀸 𑀢𑀁 𑀥𑀼𑀫𑀭𑀓𑁆𑀔𑀁 𑀲𑁄, 𑀢𑀫𑀸𑀭𑀼𑀬𑁆𑀳 𑀫𑀳𑀩𑁆𑀩𑀮𑁄;

𑀢𑀢𑁆𑀣 𑀘𑀢𑁆𑀢𑀸𑀭𑀺 𑀯𑀲𑁆𑀲𑀸𑀦𑀺, 𑀥𑀽𑀫𑀭𑀓𑁆𑀔𑀦 𑀕𑁂 𑀯𑀲𑀺.

𑁬𑁩. 𑀢𑀢𑁄 𑀦𑀺𑀓𑁆𑀔𑀫𑁆𑀫 𑀲𑀩𑀮𑁄, 𑀆𑀕𑀫𑁆𑀫𑀸’𑀭𑀺𑀝𑁆𑀞𑀧𑀩𑁆𑀩𑀢𑀁;

𑀲𑀼𑀤𑁆𑀥𑀺𑀓𑀸𑀮𑀫𑀧𑁂𑀓𑁆𑀔𑀦𑁆𑀢𑁄, 𑀢𑀢𑁆𑀣 𑀲𑀢𑁆𑀢𑀲𑀫𑀸𑀯𑀲𑀺.

𑁬𑁪. 𑀤𑁆𑀯𑁂 𑀫𑀸𑀢𑀼𑀮𑁂 𑀞𑀧𑁂𑀢𑁆𑀯𑀸𑀦, 𑀢𑀲𑁆𑀲 𑀲𑁂𑀲𑀝𑁆𑀞𑀫𑀸𑀢𑀼𑀮𑀸;

𑀬𑀼𑀤𑁆𑀥𑀲𑀚𑁆𑀚𑀸 𑀅𑀭𑀺𑀝𑁆𑀞𑀁 𑀢𑀁, 𑀉𑀧𑀲𑀗𑁆𑀓𑀫𑁆𑀫 𑀧𑀩𑁆𑀩𑀢𑀁.

𑁬𑁫. 𑀔𑀦𑁆𑀥𑀸𑀯𑀸𑀭𑀁 𑀦𑀕𑀭𑀓𑁂, 𑀦𑀺𑀯𑁂𑀲𑁂𑀢𑁆𑀯𑀸 𑀘𑀫𑀽𑀧𑀢𑀺𑀁;

𑀤𑀢𑁆𑀯𑀸 𑀧𑀭𑀺𑀓𑁆𑀔𑀺𑀧𑀸𑀧𑁂𑀲𑀼𑀁, 𑀲𑀫𑀦𑁆𑀢𑀸’𑀭𑀺𑀝𑁆𑀞𑀧𑀩𑁆𑀩𑀢𑀁.

𑁬𑁬. 𑀬𑀓𑁆𑀔𑀺𑀦𑀺𑀬𑀸 𑀫𑀦𑁆𑀢𑀬𑀺𑀢𑁆𑀯𑀸, 𑀢𑀲𑁆𑀲𑀸 𑀯𑀘𑀦𑀬𑀼𑀢𑁆𑀢𑀺𑀬𑀸;

𑀤𑀢𑁆𑀯𑀸 𑀭𑀸𑀚𑀧𑀭𑀺𑀓𑁆𑀔𑀸𑀭𑀁, 𑀧𑀡𑁆𑀡𑀸𑀓𑀸𑀭𑀸 𑀬𑀼𑀯𑀸𑀦𑀺 𑀘.

𑁬𑁭. ‘‘𑀕𑀡𑁆𑀳𑀸𑀣 𑀲𑀩𑁆𑀩𑀸𑀦𑁂’𑀢𑀸𑀦𑀺, 𑀔𑀫𑀸𑀧𑁂𑀲𑁆𑀲𑀸𑀫𑀺 𑀯𑁄 𑀅𑀳𑀁’’;

𑀇𑀢𑀺 𑀯𑀢𑁆𑀯𑀸𑀦 𑀧𑁂𑀲𑁂𑀲𑀺, 𑀓𑀼𑀫𑀸𑀭𑁄 𑀧𑀼𑀭𑀢𑁄 𑀩𑀮𑀁.

𑁬𑁮. 𑀕𑀡𑁆𑀳𑀺𑀲𑁆𑀲𑀸𑀫𑀺 𑀧𑀯𑀺𑀝𑁆𑀞𑀦𑁆𑀢𑀺, 𑀯𑀺𑀲𑁆𑀲𑀝𑁆𑀞𑁂𑀲𑀼 𑀢𑀼 𑀢𑁂𑀲𑀼 𑀲𑁄;

𑀆𑀭𑀼𑀬𑁆𑀳 𑀬𑀓𑁆𑀔𑀯𑀴𑀯𑀁, 𑀫𑀳𑀸𑀩𑀮𑀧𑀼𑀭𑀓𑁆𑀔𑀢𑁄.

𑁬𑁯. 𑀬𑀼𑀤𑁆𑀥𑀸𑀬 𑀧𑀸𑀯𑀺𑀲𑀺 𑀬𑀓𑁆𑀔𑀻, 𑀫𑀳𑀸𑀭𑀸𑀯 𑀫𑀭𑀸𑀧𑀺𑀲𑀸;

𑀅𑀦𑁆𑀢𑁄 𑀩𑀳𑀺𑀩𑀮𑀜𑁆𑀘𑀲𑁆𑀲, 𑀉𑀓𑁆𑀓𑀼𑀝𑁆𑀞𑀺𑀁 𑀫𑀳𑀢𑀺𑀁 𑀅𑀓𑀸.

𑁭𑁦. 𑀓𑀼𑀫𑀸𑀭𑀧𑀼𑀭𑀺𑀲𑀸 𑀲𑀩𑁆𑀩𑁂, 𑀧𑀭𑀲𑁂𑀦𑀸 𑀦𑀭𑁂 𑀩𑀳𑀽;

𑀖𑀸𑀢𑁂𑀢𑁆𑀯𑀸 𑀫𑀸𑀢𑀼𑀮𑁂 𑀘’𑀢𑁆𑀣, 𑀲𑀻𑀲𑀭𑀸𑀲𑀺𑀁 𑀅𑀓𑀁𑀲𑀼 𑀢𑁂.

𑁭𑁧. 𑀲𑁂𑀦𑀸𑀧𑀢𑀺 𑀧𑀸𑀮𑀬𑀺𑀢𑁆𑀯𑀸, 𑀕𑀼𑀫𑁆𑀩𑀝𑁆𑀞𑀸𑀦𑀁 𑀲𑀧𑀸𑀯𑀺𑀲𑀺;

𑀲𑁂𑀦𑀸𑀧𑀢𑀺 𑀕𑀼𑀫𑁆𑀩𑀓𑁄’𑀢𑀺, 𑀢𑁂𑀦 𑀏𑀲 𑀧𑀯𑀼𑀘𑁆𑀘𑀢𑀺.

𑁭𑁨. 𑀉𑀧𑀭𑀺𑀝𑁆𑀞𑀫𑀸𑀢𑀼𑀮𑀲𑀺𑀭𑀁, 𑀲𑀻𑀲𑀭𑀸𑀲𑀺𑀁 𑀲𑀧𑀲𑁆𑀲𑀺𑀬;

𑀮𑀸𑀩𑀼𑀭𑀸𑀲𑀻’𑀯 𑀇𑀘𑁆𑀙𑀸𑀳, 𑀢𑁂𑀦𑀸’𑀲𑀺 𑀮𑀸𑀩𑀼𑀕𑀸𑀫𑀓𑁄.