𑀅𑀝𑁆𑀞𑀫 𑀧𑀭𑀺𑀘𑁆𑀙𑁂𑀤

𑀧𑀡𑁆𑀟𑀼𑀯𑀸𑀲𑀼𑀤𑁂𑀯𑀸𑀪𑀺𑀲𑁂𑀓𑁄

𑁧. 𑀯𑀺𑀚𑀬𑁄 𑀲𑁄 𑀫𑀳𑀸𑀭𑀸𑀚𑀸, 𑀯𑀲𑁆𑀲𑁂 𑀅𑀦𑁆𑀢𑀺𑀫𑀓𑁂 𑀞𑀺𑀢𑁄;

𑀇𑀢𑀺 𑀘𑀺𑀦𑁆𑀢𑀬𑀺 ‘‘𑀯𑀼𑀤𑁆𑀥𑁄’𑀳𑀁, 𑀦 𑀘 𑀯𑀺𑀚𑁆𑀚𑀢𑀺 𑀫𑁂 𑀲𑀼𑀢𑁄.

𑁨. 𑀓𑀺𑀘𑁆𑀙𑁂𑀦 𑀯𑀸𑀲𑀺𑀢𑀁 𑀭𑀝𑁆𑀞𑀁, 𑀦𑀲𑁆𑀲𑁂𑀬𑁆𑀬 𑀫𑀫 𑀅𑀘𑁆𑀘𑀬𑁂;

𑀆𑀡𑀸𑀧𑁂𑀬𑁆𑀬𑀁 𑀭𑀚𑁆𑀚𑀳𑁂𑀢𑀼-𑀲𑀼𑀫𑀺𑀢𑁆𑀢𑀁 𑀪𑀸𑀢𑀭𑀁 𑀫𑀫.

𑁩. 𑀅𑀣𑀸’𑀫𑀘𑁆𑀘𑁂𑀳𑀺 𑀫𑀦𑁆𑀢𑁂𑀢𑁆𑀯𑀸, 𑀮𑁂𑀔𑀁 𑀢𑀢𑁆𑀣 𑀯𑀺𑀲𑀚𑁆𑀚𑀬𑀺;

𑀮𑁂𑀔𑀁 𑀤𑀢𑁆𑀯𑀸𑀦 𑀯𑀺𑀚𑀬𑁄, 𑀦 𑀘𑀺𑀭𑁂𑀦 𑀤𑀺𑀯𑀗𑁆𑀕𑀢𑁄.

𑁪. 𑀢𑀲𑁆𑀫𑀺𑀁 𑀫𑀢𑁂 𑀅𑀫𑀘𑁆𑀘𑀸 𑀢𑁂, 𑀧𑁂𑀓𑁆𑀔𑀦𑁆𑀢𑀸 𑀔𑀢𑁆𑀢𑀺𑀬𑀸𑀕𑀫𑀁;

𑀉𑀧𑀢𑀺𑀲𑁆𑀲𑀕𑀸𑀫𑁂 𑀞𑀢𑁆𑀯𑀸𑀦, 𑀭𑀝𑁆𑀞𑀁 𑀲𑀫𑀼𑀦𑀼𑀲𑀸𑀲𑀺𑀲𑀼𑀁.

𑁫. 𑀫𑀢𑁂 𑀯𑀺𑀚𑀬𑀭𑀸𑀚𑀫𑁆𑀳𑀺, 𑀔𑀢𑁆𑀢𑀺𑀬𑀸𑀕𑀫𑀦𑀸 𑀧𑀼𑀭𑀸;

𑀏𑀓𑀁 𑀯𑀲𑁆𑀲𑀁 𑀅𑀬𑀁 𑀮𑀁𑀓𑀸-𑀤𑀻𑀧𑁄 𑀆𑀲𑀺 𑀅𑀭𑀸𑀚𑀓𑁄.

𑁬. 𑀢𑀲𑁆𑀫𑀺𑀁 𑀲𑀻𑀳𑀧𑀼𑀭𑁂 𑀢𑀲𑁆𑀲, 𑀲𑀻𑀳𑀩𑀸𑀳𑀼𑀲𑁆𑀲 𑀭𑀸𑀚𑀺𑀦𑁄;

𑀅𑀘𑁆𑀘𑀬𑁂𑀦 𑀲𑀼𑀫𑀺𑀢𑁆𑀢𑁄 𑀲𑁄, 𑀭𑀸𑀚𑀸 𑀢𑀲𑁆𑀲 𑀲𑀼𑀢𑁄 𑀅𑀳𑀼.

𑁭. 𑀢𑀲𑁆𑀲 𑀧𑀼𑀢𑁆𑀢𑀸 𑀢𑀬𑁄 𑀆𑀲𑀼𑀁, 𑀫𑀤𑁆𑀤𑀭𑀸𑀚𑀲𑁆𑀲 𑀥𑀻𑀢𑀼𑀬𑀸;

𑀤𑀽𑀢𑀸 𑀲𑀻𑀳𑀧𑀼𑀭𑀁 𑀕𑀦𑁆𑀢𑁆𑀯𑀸, 𑀭𑀜𑁆𑀜𑁄 𑀮𑁂𑀔𑀁 𑀅𑀤𑀁𑀲𑀼 𑀢𑁂.

𑁮. 𑀮𑁂𑀔𑀁 𑀲𑀼𑀢𑁆𑀯𑀸𑀦 𑀲𑁄 𑀭𑀸𑀚𑀸, 𑀧𑀼𑀢𑁆𑀢𑁂 𑀆𑀫𑀦𑁆𑀢𑀬𑀻 𑀢𑀬𑁄;

𑀅𑀳𑀁 𑀫𑀳𑀮𑁆𑀮𑀓𑁄 𑀢𑀸𑀢𑀸, 𑀏𑀓𑁄 𑀢𑀼𑀫𑁆𑀳𑁂𑀲𑀼 𑀕𑀘𑁆𑀙𑀢𑀼.

𑁯. 𑀮𑀁𑀓𑀁 𑀦𑁂𑀓𑀕𑀼𑀡𑀁 𑀓𑀦𑁆𑀢𑀁, 𑀫𑀫 𑀪𑀸𑀢𑀼𑀲𑁆𑀲 𑀲𑀦𑁆𑀢𑀓𑀁;

𑀢𑀲𑁆𑀲’𑀘𑁆𑀘 𑀬𑁂𑀦 𑀢𑀢𑁆𑀣𑁂𑀯, 𑀭𑀚𑁆𑀚𑀁 𑀓𑀸𑀭𑁂𑀢𑀼 𑀲𑁄𑀪𑀦𑀁.

𑁧𑁦. 𑀓𑀡𑀺𑀝𑁆𑀞𑀓𑁄 𑀧𑀡𑁆𑀟𑀼𑀯𑀸𑀲𑀼-𑀤𑁂𑀯𑁄 𑀭𑀸𑀚𑀓𑀼𑀫𑀸𑀭𑀓𑁄;

‘‘𑀕𑀫𑀺𑀲𑁆𑀲𑀸𑀫𑀻𑀢𑀺 𑀘𑀺𑀦𑁆𑀢𑁂𑀢𑁆𑀯𑀸, 𑀜𑀢𑁆𑀯𑀸 𑀲𑁄𑀢𑁆𑀣𑀺 𑀕𑀢𑀫𑁆𑀧𑀺 𑀘.

𑁧𑁧. 𑀧𑀺𑀢𑀭𑀸 𑀲𑀫𑀦𑀼𑀜𑁆𑀜𑀸𑀢𑁄, 𑀤𑁆𑀯𑀢𑁆𑀢𑀺𑀁𑀲𑀸𑀫𑀘𑁆𑀘 𑀤𑀸𑀭𑀓𑁂;

𑀆𑀤𑀸𑀬 𑀆𑀭𑀼𑀳𑀻 𑀦𑀸𑀯𑀁, 𑀧𑀭𑀺𑀩𑁆𑀩𑀸𑀚𑀓𑀮𑀺𑀗𑁆𑀕𑀯𑀸.

𑁧𑁨. 𑀫𑀳𑀸𑀓𑀦𑁆𑀤𑀭𑀦𑀚𑁆𑀚𑀸 𑀢𑁂, 𑀫𑀼𑀔𑀤𑁆𑀯𑀸𑀭𑀫𑁆𑀳𑀺 𑀑𑀢𑀭𑀁;

𑀢𑁂 𑀧𑀭𑀺𑀩𑁆𑀩𑀸𑀚𑀓𑁂 𑀤𑀺𑀲𑁆𑀯𑀸, 𑀚𑀦𑁄 𑀲𑀓𑁆𑀓𑀭𑀺 𑀲𑀸𑀥𑀼𑀓𑀁.

𑁧𑁩. 𑀧𑀼𑀘𑁆𑀙𑀺𑀢𑁆𑀯𑀸 𑀦𑀕𑀭𑀁 𑀏𑀢𑁆𑀣, 𑀉𑀧𑀬𑀦𑁆𑀢𑀁 𑀓𑀫𑁂𑀦 𑀢𑁂;

𑀉𑀧𑀢𑀺𑀲𑁆𑀲 𑀕𑀸𑀫𑀁 𑀲𑀫𑁆𑀧𑀢𑁆𑀢𑀸, 𑀤𑁂𑀯𑀢𑀸 𑀧𑀭𑀺𑀧𑀸𑀮𑀺𑀢𑀸.

𑁧𑁪. 𑀅𑀫𑀘𑁆𑀘𑀸’𑀦𑀼𑀫𑀢𑁄’𑀫𑀘𑁆𑀘𑁄, 𑀧𑀼𑀘𑁆𑀙𑀺 𑀦𑁂𑀫𑀺𑀢𑁆𑀢𑀓𑀸 𑀢𑀳𑀺𑀁;

𑀔𑀢𑁆𑀢𑀺𑀬𑀸’𑀕𑀫𑀦𑀁 𑀢𑀲𑁆𑀲, 𑀲𑁄 𑀩𑁆𑀬𑀸𑀓𑀸𑀲𑀺 𑀧𑀭𑀁𑀧𑀺 𑀘.

𑁧𑁫. 𑀲𑀢𑁆𑀢𑀫𑁂 𑀤𑀻𑀯𑀲𑁂𑀬𑁂𑀯, 𑀆𑀕𑀫𑀺𑀲𑁆𑀲𑀢𑀺 𑀔𑀢𑁆𑀢𑀺𑀬𑁄;

𑀩𑀼𑀤𑁆𑀥𑀲𑀸𑀲𑀦 𑀫𑁂𑀢𑀲𑁆𑀲, 𑀯𑀁𑀲𑀚𑁄’𑀯 𑀞𑀧𑁂𑀲𑁆𑀲𑀢𑀺.

𑁧𑁬. 𑀲𑀢𑁆𑀢𑀫𑁂 𑀤𑀺𑀯𑀲𑁂𑀬𑁂𑀯, 𑀢𑁂 𑀧𑀭𑀺𑀩𑁆𑀩𑀸𑀚𑀓𑁂 𑀢𑀳𑀺𑀁;

𑀧𑀢𑁆𑀢𑁂 𑀤𑀺𑀲𑁆𑀯𑀸𑀦 𑀧𑀼𑀘𑁆𑀙𑀺𑀢𑁆𑀯𑀸, 𑀅𑀫𑀘𑁆𑀘𑀸 𑀢𑁂 𑀯𑀺𑀚𑀸𑀦𑀺𑀬.

𑁧𑁭. 𑀢𑀁 𑀧𑀡𑁆𑀡𑀼𑀯𑀸𑀲𑀼𑀤𑁂𑀯𑀁 𑀢𑁂, 𑀮𑀁𑀓𑀸𑀭𑀚𑁆𑀚𑁂𑀦 𑀅𑀧𑁆𑀧𑀬𑀼𑀁;

𑀫𑀳𑁂𑀲𑀺𑀬𑀸 𑀅𑀪𑀸𑀯𑀸𑀲𑁄, 𑀦 𑀢𑀸𑀯 𑀅𑀪𑀺𑀲𑁂𑀘𑀬𑀺.

𑁧𑁮. 𑀅𑀫𑀺𑀢𑁄𑀤𑀦𑀲𑀓𑁆𑀓𑀲𑁆𑀲, 𑀧𑀡𑁆𑀟𑀼𑀲𑀓𑁆𑀓𑁄 𑀲𑀼𑀢𑁄 𑀅𑀳𑀼;

𑀜𑀢𑁆𑀯𑀸 𑀯𑀺𑀦𑀸𑀲𑀁 𑀲𑀓𑁆𑀬𑀸𑀦𑀁, 𑀲𑁄 𑀆𑀤𑀸𑀬 𑀲𑀓𑀁 𑀚𑀦𑀁.

𑁧𑁯. 𑀕𑀦𑁆𑀢𑁆𑀯𑀸 𑀅𑀜𑁆𑀜𑀸𑀧𑀤𑁂𑀲𑁂𑀦, 𑀕𑀗𑁆𑀕𑀸𑀧𑀸𑀭𑀁 𑀢𑀳𑀺𑀁 𑀧𑀼𑀭𑀁;

𑀫𑀸𑀧𑁂𑀢𑁆𑀯𑀸 𑀢𑀢𑁆𑀣 𑀓𑀸𑀭𑁂𑀲𑀺, 𑀭𑀚𑁆𑀚𑀁 𑀢𑀲𑁆𑀲 𑀲𑀼𑀢𑁂 𑀮𑀪𑀺.

𑁨𑁦. 𑀥𑀻𑀢𑀸 𑀓𑀡𑀺𑀝𑁆𑀞𑀺𑀢𑀸 𑀆𑀲𑀺, 𑀪𑀤𑁆𑀤𑀓𑀘𑁆𑀘𑀸𑀦 𑀦𑀸𑀫𑀺𑀓𑀸;

𑀲𑀩𑁆𑀩𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑀸, 𑀲𑀼𑀭𑀽𑀧𑀸 𑀅𑀪𑀺𑀧𑀢𑁆𑀣𑀺𑀢𑀸.

𑁨𑁧. 𑀢𑀤𑀢𑁆𑀣𑀁 𑀲𑀢𑁆𑀢𑀭𑀸𑀚𑀸𑀦𑁄, 𑀧𑀡𑁆𑀡𑀸𑀓𑀸𑀭𑁂 𑀫𑀳𑀸𑀭𑀳𑁂;

𑀧𑁂𑀲𑁂𑀲𑀼𑀁 𑀭𑀸𑀚𑀺𑀦𑁄 𑀢𑀲𑁆𑀲, 𑀪𑀻𑀢𑁄 𑀭𑀸𑀚𑀽𑀳𑀺 𑀲𑁄 𑀧𑀦.

𑁨𑁨. 𑀜𑀢𑁆𑀯𑀸𑀦 𑀲𑁄𑀢𑁆𑀣𑀺𑀕𑀫𑀦𑀁, 𑀅𑀪𑀺𑀲𑁂𑀓𑀨𑀮𑀫𑁆𑀧𑀺 𑀘;

𑀲𑀳𑀤𑁆𑀯𑀢𑁆𑀢𑀺𑀁𑀲 𑀇𑀢𑁆𑀣𑀻𑀳𑀺, 𑀦𑀸𑀯𑀁 𑀆𑀭𑁄𑀧𑀺𑀬𑀸’𑀲𑀼𑀢𑀁.

𑁨𑁩. 𑀕𑀗𑁆𑀕𑀸𑀬 𑀔𑀺𑀧𑀺 𑀕𑀡𑁆𑀳𑀸𑀢𑀼, 𑀧𑀳𑀼 𑀫𑁂 𑀥𑀻𑀢𑀭𑀁 𑀇𑀢𑀺;

𑀕𑀳𑁂𑀢𑀼𑀁 𑀢𑁂 𑀦 𑀲𑀓𑁆𑀔𑀺𑀁𑀲𑀼, 𑀦𑀸𑀯𑀸𑀲𑀸𑀧𑀦 𑀲𑀻𑀖𑀕𑀸.

𑁨𑁪. 𑀤𑀼𑀢𑀺𑀬𑁂 𑀤𑀺𑀯𑀲𑁂𑀬𑁂𑀯, 𑀕𑁄𑀡𑀸𑀕𑀸𑀫𑀓 𑀧𑀝𑁆𑀝𑀦𑀁;

𑀧𑀢𑁆𑀢𑀸𑀧𑀩𑁆𑀩𑀚𑀺𑀢𑀸 𑀓𑀸𑀭𑀸, 𑀲𑀩𑁆𑀩𑀸 𑀢𑀸 𑀢𑀢𑁆𑀣 𑀑𑀢𑀭𑀼𑀁.

𑁨𑁫. 𑀧𑀼𑀘𑁆𑀙𑀺𑀢𑁆𑀯𑀸 𑀦𑀕𑀭𑀁 𑀏𑀢𑁆𑀣, 𑀢𑀸 𑀓𑀫𑁂𑀦𑁄𑀧𑀬𑀦𑁆𑀢𑀺𑀬𑁄;

𑀉𑀧𑀢𑀺𑀲𑁆𑀲𑀕𑀸𑀫𑀁 𑀲𑀫𑁆𑀧𑀢𑁆𑀢𑀸, 𑀤𑁂𑀯𑀢𑀸 𑀧𑀭𑀺𑀧𑀸𑀮𑀺𑀢𑀸.

𑁨𑁬. 𑀦𑁂𑀫𑀺𑀢𑁆𑀢𑀓𑀲𑁆𑀲 𑀯𑀘𑀦𑀁, 𑀲𑀼𑀢𑁆𑀯𑀸 𑀢𑀢𑁆𑀣𑀸’𑀕𑀢𑀸 𑀢𑀼 𑀢𑀸;

𑀤𑀺𑀲𑁆𑀯𑀸 𑀅𑀫𑀘𑁆𑀘𑁄 𑀧𑀼𑀘𑁆𑀙𑀺𑀢𑁆𑀯𑀸, 𑀜𑀢𑁆𑀯𑀸 𑀭𑀜𑁆𑀜𑁄 𑀲𑀫𑀧𑁆𑀧𑀬𑀺.

𑁨𑁭. 𑀢𑀁 𑀧𑀡𑁆𑀟𑀼𑀯𑀸𑀲𑀼𑀤𑁂𑀯𑀁 𑀢𑁂, 𑀅𑀫𑀘𑁆𑀘𑀸 𑀲𑀼𑀤𑁆𑀥𑀩𑀼𑀤𑁆𑀥𑀺𑀦𑁄;

𑀭𑀚𑁆𑀚𑁂 𑀲𑀫𑀪𑀺𑀲𑀺𑀜𑁆𑀘𑀺𑀁𑀲𑀼, 𑀧𑀼𑀡𑁆𑀡𑀲𑀩𑁆𑀩𑀫𑀦𑁄𑀭𑀣𑀁.

𑁨𑁮. 𑀲𑀼𑀪𑀤𑁆𑀤𑀓𑀘𑁆𑀘𑀸𑀦 𑀫𑀦𑁄𑀫𑀭𑀽𑀧𑀺𑀦𑀺𑀁;

𑀫𑀳𑁂𑀲𑀻𑀪𑀸𑀯𑁂 𑀅𑀪𑀺𑀲𑀺𑀜𑁆𑀘𑀺𑀬’𑀢𑁆𑀢𑀦𑁄;

𑀲𑀳𑀕𑀢𑀸 𑀢𑀸𑀬 𑀧𑀤𑀸𑀲𑀺 𑀅𑀢𑁆𑀢𑀦𑀸;

𑀲𑀳𑀸𑀕𑀢𑀸𑀦𑀁 𑀯𑀲𑀺 𑀪𑀽𑀫𑀺𑀧𑁄 𑀲𑀼𑀔𑀦𑁆𑀢𑀻.

𑀲𑀼𑀚𑀦𑀧𑁆𑀧𑀲𑀸𑀤 𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀧𑀡𑁆𑀟𑀼𑀯𑀸𑀲𑀼𑀤𑁂𑀯𑀸𑀪𑀺𑀲𑁂𑀓𑁄 𑀦𑀸𑀫

𑀅𑀝𑁆𑀞𑀫𑁄 𑀧𑀭𑀺𑀘𑁆𑀙𑁂𑀤𑁄.