𑀲𑀢𑁆𑀢𑀫 𑀧𑀭𑀺𑀘𑁆𑀙𑁂𑀤

𑀯𑀺𑀚𑀬𑀸𑀪𑀺𑀲𑁂𑀓𑁄

𑁧. 𑀲𑀩𑁆𑀩𑀮𑁄𑀓𑀳𑀻𑀢𑀁 𑀓𑀢𑁆𑀯𑀸, 𑀧𑀢𑁆𑀯𑀸 𑀲𑀦𑁆𑀢𑀺𑀓𑀭𑀁 𑀧𑀤𑀁;

𑀧𑀭𑀺𑀦𑀺𑀩𑁆𑀩𑀸𑀦𑀫𑀜𑁆𑀘𑀫𑁆𑀳𑀺, 𑀦𑀺𑀧𑀦𑁆𑀦𑁄 𑀮𑁄𑀓𑀦𑀸𑀬𑀓𑁄.

𑁨. 𑀤𑁂𑀯𑀢𑀸𑀲𑀦𑁆𑀦𑀺𑀧𑀸𑀢𑀫𑁆𑀳𑀺, 𑀫𑀳𑀦𑁆𑀢𑀫𑁆𑀳𑀺 𑀫𑀳𑀸𑀫𑀼𑀦𑀺;

𑀲𑀓𑁆𑀓 𑀢𑀢𑁆𑀭𑀲𑀫𑀻𑀧𑀝𑁆𑀞𑀁, 𑀅𑀯𑁄𑀘 𑀯𑀤𑀢𑀁 𑀯𑀭𑁄.

𑁩. 𑀯𑀺𑀚𑀬𑁄 𑀮𑀸𑀴𑀸𑀯𑀺𑀲𑀬𑀸, 𑀲𑀻𑀳𑀩𑀸𑀳𑀼𑀦𑀭𑀺𑀦𑁆𑀤𑀚𑁄;

𑀏𑀲𑀮𑀗𑁆𑀓𑀸𑀥𑀦𑀼𑀧𑀢𑁆𑀢𑁄, 𑀲𑀢𑁆𑀢𑀪𑀘𑁆𑀘𑀲𑀢𑀸𑀦𑀼𑀕𑁄.

𑁪. 𑀧𑀢𑀺𑀝𑁆𑀞𑀳𑀺𑀲𑁆𑀲𑀢𑀺 𑀤𑁂𑀯𑀺𑀦𑁆𑀤𑀁, 𑀮𑀁𑀓𑀸𑀬𑀁 𑀫𑀫 𑀲𑀸𑀲𑀦𑀁;

𑀢𑀲𑁆𑀫𑀸 𑀲𑀧𑀭𑀺𑀯𑀸𑀭𑀁 𑀢𑀁, 𑀭𑀓𑁆𑀔𑀮𑀁𑀓𑀜𑁆𑀘 𑀲𑀸𑀥𑀼𑀓𑀁.

𑁫. 𑀢𑀣𑀸𑀕𑀢𑀲𑁆𑀲 𑀤𑁂𑀯𑀺𑀦𑁆𑀤𑁄, 𑀯𑀘𑁄 𑀲𑀼𑀢𑁆𑀯𑀸𑀯 𑀲𑀸𑀤𑀭𑁄;

𑀤𑁂𑀯𑀲𑁆𑀲𑀼𑀧𑁆𑀧𑀮𑀯𑀡𑁆𑀡𑀲𑁆𑀲, 𑀮𑀁𑀓𑀸𑀭𑀓𑁆𑀔𑀁 𑀲𑀫𑀧𑁆𑀧𑀬𑀺.

𑁬. 𑀲𑀓𑁆𑀓𑁂𑀦 𑀯𑀼𑀢𑁆𑀢𑀫𑀢𑁆𑀢𑁄𑀲𑁄, 𑀮𑀗𑁆𑀓𑀸𑀫𑀸𑀕𑀫𑁆𑀫𑀲𑀚𑁆𑀚𑀼𑀓𑀁;

𑀧𑀭𑀺𑀩𑁆𑀩𑀸𑀚𑀓 𑀯𑁂𑀲𑁂𑀦, 𑀭𑀼𑀓𑁆𑀔𑀫𑀽𑀮 𑀫𑀽𑀧𑀯𑀺𑀲𑀺𑀁.

𑁭. 𑀯𑀺𑀚𑀬𑀲𑀫𑁆𑀫𑀼𑀔𑀸 𑀲𑀩𑁆𑀩𑁂,

𑀢𑀁 𑀉𑀧𑀘𑁆𑀘 𑀅𑀧𑀼𑀘𑁆𑀙𑀺𑀲𑀼𑀁;

𑀅𑀬𑀁 𑀪𑁄 𑀓𑁄𑀦𑀼 𑀤𑀻𑀧𑁄𑀢𑀻,

𑀮𑀁𑀓𑀸𑀤𑀻𑀧𑁄𑀢𑀺 𑀲𑁄 𑀩𑁆𑀭𑀯𑀺.

𑁮. 𑀦 𑀲𑀦𑁆𑀢𑀺 𑀫𑀦𑀼𑀚𑀸 𑀳𑁂𑀢𑁆𑀣, 𑀦 𑀘 𑀳𑁂𑀲𑁆𑀲𑀢𑀺 𑀯𑁄 𑀪𑀬𑀁;

𑀇𑀢𑀺 𑀯𑀢𑁆𑀯𑀸 𑀓𑀼𑀡𑁆𑀟𑀻𑀓𑀸𑀬, 𑀢𑁂 𑀚𑀮𑁂𑀦 𑀦𑀺𑀲𑀺𑀜𑁆𑀘𑀺𑀬.

𑁯. 𑀲𑀼𑀢𑁆𑀢𑀜𑁆𑀘 𑀢𑁂𑀲𑀁 𑀳𑀢𑁆𑀣𑁂𑀲𑀼, 𑀮𑀕𑁂𑀢𑁆𑀯𑀸𑀦𑀪𑀲𑀸’𑀕𑀫𑀸;

𑀤𑀲𑁆𑀲𑁂𑀲𑀺 𑀲𑁄𑀡𑀺𑀭𑀽𑀧𑁂𑀦, 𑀧𑀭𑀺𑀯𑀸𑀭𑀺𑀓𑀬𑀓𑁆𑀔𑀺𑀦𑀻.

𑁧𑁦. 𑀏𑀓𑁄 𑀢𑀁 𑀯𑀸𑀭𑀺𑀬𑀦𑁆𑀢𑁄𑀧𑀺, 𑀭𑀸𑀚𑀧𑀼𑀢𑁆𑀢𑁂𑀦 𑀅𑀦𑁆𑀯𑀕𑀸;

𑀕𑀸𑀫𑀫𑁆𑀳𑀺 𑀯𑀺𑀚𑁆𑀚𑀫𑀸𑀦𑀫𑁆𑀳𑀺, 𑀪𑀯𑀦𑁆𑀢𑀺 𑀲𑀼𑀦𑀔𑀸 𑀇𑀢𑀺.

𑁧𑁧. 𑀢𑀲𑁆𑀲𑀸 𑀘 𑀲𑀸𑀫𑀻𑀦𑀻 𑀢𑀢𑁆𑀣, 𑀓𑀼𑀯𑁂𑀡𑀻𑀦𑀸𑀫 𑀬𑀓𑁆𑀔𑀺𑀦𑀻;

𑀦𑀺𑀲𑀻𑀤𑀺 𑀭𑀼𑀓𑁆𑀔𑀫𑀽𑀮𑀫𑁆𑀳𑀺, 𑀓𑀦𑁆𑀢𑀦𑁆𑀢𑀺 𑀢𑀸𑀧𑀲𑀻 𑀯𑀺𑀬.

𑁧𑁨. 𑀤𑀺𑀲𑁆𑀯𑀸𑀦 𑀲𑁄 𑀧𑁄𑀓𑁆𑀔𑀭𑀡𑀻, 𑀦𑀺𑀲𑀺𑀦𑁆𑀦𑀁 𑀢𑀜𑁆𑀘 𑀢𑀸𑀧𑀲𑀺𑀁;

𑀢𑀢𑁆𑀣 𑀦𑁆𑀳𑀸𑀢𑁆𑀯𑀸 𑀧𑀺𑀯𑀺𑀢𑁆𑀯𑀸 𑀘, 𑀆𑀤𑀸𑀬 𑀘 𑀫𑀼𑀮𑀸𑀮𑀺𑀬𑁄.

𑁧𑁩. 𑀯𑀸𑀭𑀺𑀜𑁆𑀘 𑀧𑁄𑀓𑁆𑀔𑀭𑁂𑀳𑁂𑀯, 𑀯𑀼𑀝𑁆𑀞𑀸𑀲𑀺 𑀲𑀸𑀢𑀫𑀩𑁆𑀭𑀯𑀺;

𑀪𑀓𑁆𑀔𑁄’𑀲𑀺 𑀫𑀫 𑀢𑀺𑀝𑁆𑀞𑀸𑀢𑀺, 𑀅𑀝𑁆𑀞𑀸 𑀩𑀤𑁆𑀥𑁄 𑀯𑀲𑁄 𑀦𑀭𑁄.

𑁧𑁪. 𑀧𑀭𑀺𑀢𑁆𑀢𑀲𑀼𑀢𑁆𑀢 𑀢𑁂𑀚𑁂𑀦, 𑀪𑀓𑁆𑀔𑀺𑀢𑀼𑀁 𑀲𑀸 𑀦 𑀲𑀓𑁆𑀓𑀼𑀡𑀻;

𑀬𑀸𑀘𑀺𑀬𑀦𑁆𑀢𑁄𑀧𑀺 𑀢𑀁 𑀲𑀼𑀢𑁆𑀢𑀁, 𑀦𑀸’𑀤𑀸𑀬𑀓𑁆𑀔𑀺𑀦𑀺𑀬𑀸 𑀦𑀭𑁄.

𑁧𑁫. 𑀢𑀁 𑀕𑀳𑁂𑀢𑁆𑀯𑀸 𑀲𑀼𑀭𑀼𑀗𑁆𑀕𑀸𑀬𑀁, 𑀭𑀼𑀤𑀦𑁆𑀢𑀁 𑀬𑀓𑁆𑀔𑀺𑀦𑀻 𑀔𑀺𑀧𑀺;

𑀏𑀯𑀁 𑀏𑀓𑁂𑀓𑀲𑁄 𑀢𑀢𑁆𑀣, 𑀔𑀺𑀧𑀻 𑀲𑀢𑁆𑀢𑀲𑀢𑀸𑀦𑀺𑀧𑀺.

𑁧𑁬. 𑀅𑀦𑀸𑀬𑀦𑁆𑀢𑁂𑀲𑀼 𑀲𑀩𑁆𑀩𑁂𑀲𑀼, 𑀯𑀺𑀚𑀬𑁄 𑀪𑀬𑀲𑀁𑀓𑀺𑀢𑁄;

𑀦𑀦𑁆𑀢𑀧𑀜𑁆𑀘𑀸𑀬𑀼𑀥𑁄 𑀕𑀦𑁆𑀢𑁆𑀯𑀸, 𑀤𑀺𑀲𑁆𑀯𑀸 𑀧𑁄𑀓𑁆𑀔𑀭𑀡𑀺𑀁 𑀲𑀼𑀪𑀁.

𑁧𑁭. 𑀅𑀧𑀲𑁆𑀲 𑀫𑀼𑀢𑁆𑀢𑀺𑀡𑁆𑀡𑀧𑀤𑀁, 𑀧𑀲𑁆𑀲𑀁 𑀢𑀜𑁆𑀘𑁂𑀯 𑀢𑀸𑀧𑀲𑀺𑀁;

‘‘𑀇𑀫𑀸𑀬 𑀔𑀮𑀼 𑀪𑀘𑁆𑀘𑀸 𑀫𑁂, 𑀕𑀳𑀺𑀢𑀸𑀦𑀼’’𑀢𑀺 𑀘𑀺𑀦𑁆𑀢𑀺𑀬.

𑁧𑁮. 𑀓𑀺𑀁 𑀦 𑀧𑀲𑁆𑀲𑀲𑀺 𑀪𑀘𑁆𑀘𑁂 𑀫𑁂,

𑀳𑁄𑀢𑀺 𑀢𑁆𑀯𑀁 𑀇𑀢𑀺 𑀆𑀳𑀢𑀁;

‘‘𑀓𑀺𑀁 𑀭𑀸𑀚𑀧𑀼𑀢𑁆𑀢 𑀪𑀘𑁆𑀘𑁂𑀳𑀺,

𑀧𑀺𑀯 𑀦𑀳𑀸𑀬𑀸’’𑀢𑀺 𑀆𑀳𑀲𑀸.

𑁧𑁯. 𑀬𑀓𑁆𑀔𑀺𑀦𑀻 𑀢𑀸𑀯 𑀚𑀸𑀦𑀸𑀢𑀺, 𑀫𑀫 𑀚𑀸𑀢𑀺𑀦𑁆𑀢𑀺 𑀦𑀺𑀘𑁆𑀙𑀺𑀢𑁄;

𑀲𑀗𑁆𑀖𑀁 𑀲𑀦𑀸𑀫𑀁 𑀲𑀸𑀯𑁂𑀢𑁆𑀯𑀸, 𑀥𑀦𑀼𑀁 𑀲𑀦𑁆𑀥𑀸𑀬𑀼’ 𑀧𑀸𑀕𑀢𑁄.

𑁨𑁦. 𑀬𑀓𑁆𑀔𑀺𑀁 𑀆𑀤𑀸𑀬 𑀕𑀻𑀯𑀸𑀬, 𑀦𑀸𑀭𑀸 𑀘 𑀯𑀮𑀬𑁂𑀦 𑀲𑁄;

𑀯𑀸𑀫𑀳𑀢𑁆𑀣𑁂𑀦 𑀓𑁂𑀲𑁂𑀲𑀼, 𑀕𑀳𑁂𑀢𑁆𑀯𑀸 𑀤𑀓𑁆𑀔𑀺𑀡𑁂 𑀦 𑀢𑀼.

𑁨𑁧. 𑀉𑀓𑁆𑀔𑀺𑀧𑀺𑀢𑁆𑀯𑀸 𑀅𑀲𑀺𑀁𑀆𑀳, ‘‘𑀪𑀘𑁆𑀘𑁂 𑀫𑁂 𑀤𑁂𑀳𑀺 𑀤𑀸𑀲𑀺𑀢𑀁;

𑀫𑀸𑀭𑁂𑀫𑀻’’𑀢𑀺 𑀪𑀬𑀝𑁆𑀝𑀸𑀲𑀸, 𑀚𑀻𑀯𑀺𑀢𑀁 𑀬𑀸𑀘𑀺 𑀬𑀓𑁆𑀔𑀺𑀦𑀻.

𑁨𑁨. 𑀚𑀻𑀯𑀺𑀢𑀁 𑀤𑁂𑀳𑀺 𑀫𑁂 𑀲𑀸𑀫𑀺, 𑀭𑀚𑁆𑀚𑀁 𑀤𑀚𑁆𑀚𑀸𑀫𑀺 𑀢𑁂 𑀅𑀳𑀁;

𑀓𑀭𑀺𑀲𑁆𑀲𑀫𑀺’𑀢𑁆𑀢𑀺 𑀓𑀺𑀘𑁆𑀘𑀜𑁆𑀘, 𑀓𑀺𑀘𑁆𑀘𑀁 𑀅𑀜𑁆𑀜𑀁 𑀬𑀣𑀺𑀘𑁆𑀙𑀺𑀢𑀁.

𑁨𑁩. 𑀅𑀤𑀼𑀩𑁆𑀪𑀸𑀢𑁆𑀣𑀸𑀬 𑀲𑀧𑀣𑀁, 𑀲𑁄 𑀢𑀁 𑀬𑀓𑁆𑀔𑀺𑀁 𑀅𑀓𑀸𑀭𑀬𑀺;

‘‘𑀆𑀦𑁂𑀳𑀺 𑀪𑀘𑁆𑀘𑁂 𑀲𑀻𑀖’’𑀦𑁆𑀢𑀺, 𑀯𑀼𑀢𑁆𑀢𑀫𑀢𑁆𑀢𑀸𑀯 𑀲𑀸’𑀦𑀬𑀺.

𑁨𑁪. ‘‘𑀇𑀫𑁂 𑀚𑀸𑀢𑀸’’𑀢𑀺 𑀯𑀼𑀢𑁆𑀢𑀸𑀲𑀸,

𑀢𑀡𑁆𑀟𑀼𑀮𑀸𑀤𑀺𑀁 𑀯𑀺𑀦𑀺𑀤𑁆𑀤𑀺𑀲𑀺;

𑀪𑀓𑁆𑀔𑀺𑀢𑀸𑀦𑀁 𑀯𑀸𑀡𑀺𑀚𑀸𑀦𑀁,

𑀦𑀸𑀯𑀝𑁆𑀞𑀁 𑀯𑀺𑀯𑀺𑀔𑀁 𑀩𑀳𑀼𑀁.

𑁨𑁫. 𑀪𑀘𑁆𑀘𑀸 𑀢𑁂 𑀲𑀸𑀥𑀬𑀺𑀢𑁆𑀯𑀸𑀦, 𑀪𑀢𑁆𑀢𑀸𑀦𑀺 𑀩𑁆𑀬𑀜𑁆𑀚𑀦𑀸𑀦𑀺𑀘;

𑀭𑀸𑀚𑀸 𑀧𑀼𑀢𑁆𑀢𑀁 𑀪𑁄𑀚𑀬𑀺𑀢𑁆𑀯𑀸, 𑀲𑀩𑁆𑀩𑁂𑀘𑀸𑀧𑀺 𑀅𑀪𑀼𑀜𑁆𑀚𑀺𑀲𑀼𑀁.

𑁨𑁬. 𑀤𑀸𑀧𑀺𑀢𑀁 𑀯𑀺𑀚𑀬𑁂𑀦’𑀕𑁆𑀕𑀁, 𑀬𑀓𑁆𑀔𑀻 𑀪𑀼𑀜𑁆𑀚𑀺𑀬 𑀧𑀻𑀡𑀺𑀢𑀸;

𑀲𑁄𑀴𑀲𑀯𑀲𑁆𑀲𑀺𑀓𑀁 𑀭𑀽𑀧𑀁, 𑀫𑀸𑀧𑀬𑀺𑀢𑁆𑀯𑀸 𑀫𑀦𑁄𑀳𑀭𑀁.

𑁨𑁭. 𑀭𑀸𑀚𑀧𑀼𑀢𑁆𑀢 𑀫𑀼𑀧𑀕𑀜𑁆𑀙𑀺, 𑀲𑀩𑁆𑀩𑀸𑀪𑀭𑀡𑀪𑀽𑀲𑀺𑀢𑀸;

𑀫𑀸𑀧𑁂𑀲𑀺 𑀭𑀼𑀓𑁆𑀔𑀫𑀽𑀮𑀲𑁆𑀫𑀺𑀁, 𑀲𑀬𑀦𑀜𑁆𑀘 𑀫𑀳𑀸𑀭𑀳𑀁.

𑁨𑁮. 𑀲𑀸𑀡𑀺𑀬𑀸 𑀲𑀼𑀧𑀭𑀺𑀓𑁆𑀔𑀺𑀢𑁆𑀢𑀁, 𑀯𑀺𑀢𑀸𑀦𑀲𑀫𑀮𑀗𑁆𑀓𑀢𑀁;

𑀢𑀁 𑀤𑀺𑀲𑁆𑀯𑀸 𑀭𑀸𑀚𑀢𑀦𑀬𑁄, 𑀧𑁂𑀓𑁆𑀔𑀁 𑀅𑀢𑁆𑀣𑀫𑀦𑀸𑀕𑀢𑀁.

𑁨𑁯. 𑀓𑀢𑁆𑀯𑀸𑀦 𑀢𑀸𑀬𑀦𑀸𑀯𑀸𑀬𑀁, 𑀦𑀺𑀧𑀚𑁆𑀚 𑀲𑀬𑀦𑁂 𑀲𑀼𑀔𑀁;

𑀲𑀸𑀡𑀻 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸𑀦, 𑀲𑀩𑁆𑀩𑁂 𑀪𑀘𑁆𑀘𑀸 𑀦𑀺𑀧𑀚𑁆𑀚𑀺𑀲𑀼𑀁.

𑁩𑁦. 𑀭𑀢𑁆𑀢𑀺𑀁 𑀢𑀽𑀭𑀺𑀬𑀲𑀤𑁆𑀤𑀜𑁆𑀘, 𑀲𑀼𑀢𑁆𑀯𑀸 𑀕𑀻𑀢𑀭𑀯𑀜𑁆𑀘 𑀲𑁄;

𑀅𑀧𑀼𑀘𑁆𑀙𑀺 𑀲𑀳𑀲𑁂𑀫𑀸𑀦𑀁, 𑀓𑀺𑀁 𑀲𑀤𑁆𑀤𑁄 𑀇𑀢𑀺 𑀬𑀓𑁆𑀔𑀺𑀦𑀺𑀁.

𑁩𑁧. 𑀭𑀚𑁆𑀚𑀜𑁆𑀘 𑀲𑀸𑀫𑀺𑀦𑁄 𑀤𑁂𑀬𑁆𑀬𑀁, 𑀲𑀩𑁆𑀩𑁂 𑀬𑀓𑁆𑀔𑁂 𑀘 𑀖𑀸𑀢𑀺𑀬;

𑀫𑀦𑀼𑀲𑁆𑀲𑀸 𑀯𑀸𑀲𑀓𑀭𑀡𑀸, 𑀬𑀓𑁆𑀔𑀸 𑀫𑀁 𑀖𑀸𑀢𑀬𑀦𑁆𑀢𑀺𑀳𑀺.

𑁩𑁨. 𑀇𑀢𑀺 𑀘𑀺𑀦𑁆𑀢𑀺𑀬 𑀬𑀓𑁆𑀔𑀻 𑀲𑀸, 𑀅𑀩𑁆𑀭𑀯𑀺 𑀭𑀸𑀚𑀦𑀦𑁆𑀤𑀦𑀁;

𑀲𑀻𑀭𑀻𑀲𑀯𑀢𑁆𑀣𑀼𑀦𑀸 𑀫𑁂𑀢𑀁, 𑀲𑀸𑀫𑀺 𑀬𑀓𑁆𑀔𑀧𑀼𑀭𑀁 𑀇𑀥.

𑁩𑁩. 𑀢𑀢𑁆𑀣 𑀚𑁂𑀝𑁆𑀞𑀲𑁆𑀲 𑀬𑀓𑁆𑀔𑀲𑁆𑀲, 𑀮𑀁𑀓𑀸𑀦𑀕𑀭𑀯𑀸𑀲𑀺𑀦𑀻;

𑀓𑀼𑀫𑀸𑀭𑀺𑀓𑀸 𑀇𑀥𑀸’𑀦𑀻𑀢𑀸, 𑀢𑀲𑁆𑀲𑀸 𑀫𑀸𑀢𑀸 𑀘 𑀆𑀕𑀢𑀸.

𑁩𑁪. 𑀆𑀯𑀸𑀳 𑀫𑀗𑁆𑀕𑀮𑁂 𑀢𑀢𑁆𑀣, 𑀇𑀥𑀸𑀧𑀺 𑀉𑀲𑁆𑀲𑀯𑁂 𑀫𑀳𑀸;

𑀯𑀢𑁆𑀢𑀢𑁂 𑀢𑀢𑁆𑀣 𑀲𑀤𑁆𑀤𑁄𑀬𑀁, 𑀫𑀳𑀸𑀳𑁂𑀲 𑀲𑀫𑀸𑀕𑀫𑁄.

𑁩𑁫. 𑀅𑀚𑁆𑀚𑁂𑀯 𑀬𑀓𑁆𑀔𑁂 𑀖𑀸𑀢𑁂𑀳𑀺,

𑀦 𑀳𑀺 𑀲𑀓𑁆𑀔𑀸 𑀇𑀢𑁄 𑀧𑀭𑀁;

𑀲𑁄 𑀆𑀳𑀸’𑀤𑀺𑀲𑁆𑀲 𑀫𑀸𑀦𑁂𑀢𑁂,

𑀖𑀸𑀢𑁂𑀲𑁆𑀲𑀸𑀫𑀺 𑀓𑀣𑀁 𑀅𑀳𑀁.

𑁩𑁬. 𑀬𑀢𑁆𑀣 𑀲𑀤𑁆𑀤𑀁 𑀓𑀭𑀺𑀲𑁆𑀲𑀸𑀫, 𑀢𑁂𑀦 𑀲𑀤𑁆𑀤𑁂𑀦 𑀖𑀸𑀢𑀬;

𑀆𑀬𑀼𑀥𑀁 𑀫𑁂’𑀦𑀼𑀪𑀸𑀯𑁂𑀦, 𑀢𑁂𑀲𑀁 𑀓𑀸𑀬𑁂 𑀧𑀢𑀺𑀲𑁆𑀲𑀢𑀺.

𑁩𑁭. 𑀢𑀲𑁆𑀲𑀸 𑀲𑀼𑀢𑁆𑀯𑀸 𑀢𑀣𑀸 𑀓𑀢𑁆𑀯𑀸, 𑀲𑀩𑁆𑀩𑁂 𑀬𑀓𑁆𑀔𑁂 𑀅𑀖𑀸𑀢𑀬𑀺;

𑀲𑀬𑀫𑁆𑀧𑀺 𑀮𑀤𑁆𑀥𑀯𑀺𑀚𑀬𑁄, 𑀬𑀓𑁆𑀔𑀭𑀸𑀚 𑀧𑀲𑀸𑀥𑀦𑀁.

𑁩𑁮. 𑀧𑀲𑀸𑀥𑀦𑁂𑀳𑀺 𑀲𑁂𑀲𑁂𑀳𑀺, 𑀢𑀁𑀢𑀁 𑀪𑀘𑁆𑀘𑀁 𑀧𑀲𑀸𑀥𑀬𑀺;

𑀓𑀢𑀺𑀧𑀳𑀁 𑀯𑀲𑀺𑀢𑁆𑀯𑁂’𑀢𑁆𑀣, 𑀢𑀫𑁆𑀩𑀧𑀡𑁆𑀡𑀺𑀫𑀼𑀧𑀸𑀕𑀫𑀺.

𑁩𑁯. 𑀫𑀸𑀧𑀬𑀺𑀢𑁆𑀯𑀸 𑀢𑀫𑁆𑀧𑀧𑀡𑁆𑀡𑀺-𑀦𑀕𑀭𑀁 𑀯𑀺𑀚𑀬𑁄 𑀢𑀳𑀺𑀁;

𑀯𑀲𑀻 𑀬𑀓𑁆𑀔𑀺𑀦𑀺𑀬𑀸 𑀲𑀤𑁆𑀥𑀺𑀁, 𑀅𑀫𑀘𑁆𑀘 𑀧𑀭𑀺𑀯𑀸𑀭𑀺𑀢𑁄.

𑁪𑁦. 𑀦𑀸𑀯𑀸𑀬 𑀪𑀽𑀫𑀺𑀫𑁄𑀢𑀺𑀡𑁆𑀡𑀸, 𑀯𑀺𑀚𑀬𑀧𑀫𑀼𑀔𑀸 𑀢𑀤𑀸;

𑀓𑀺𑀮𑀦𑁆𑀢𑀸 𑀧𑀸𑀡𑀺𑀦𑀸𑀪𑀽𑀫𑀺𑀁, 𑀆𑀮𑀫𑁆𑀩𑀺𑀬 𑀦𑀺𑀲𑀻𑀤𑀺𑀲𑀼𑀁.

𑁪𑁧. 𑀢𑀫𑁆𑀩𑀪𑀽𑀫𑀺𑀭𑀚𑁄𑀨𑀼𑀝𑁆𑀞𑁄, 𑀢𑀫𑁆𑀩𑁄𑀧𑀸𑀡𑀺 𑀬𑀢𑁄 𑀅𑀳𑀼𑀁;

𑀲𑁄 𑀤𑁂𑀲𑁄𑀘𑁂𑀯 𑀤𑀻𑀧𑁄 𑀘, 𑀢𑁂𑀦 𑀢𑀦𑁆𑀦𑀸𑀫𑀓𑁄 𑀅𑀳𑀼.

𑁪𑁨. 𑀲𑀻𑀳𑀩𑀸𑀳𑀼 𑀦𑀭𑀺𑀦𑁆𑀤𑁄 𑀲𑁄, 𑀲𑀻𑀳𑀫𑀸𑀤𑀺𑀦𑁆𑀦𑀯𑀸 𑀇𑀢𑀺;

𑀲𑀻𑀳𑀴𑁄 𑀢𑁂𑀦 𑀲𑀫𑁆𑀩𑀦𑁆𑀥𑀸, 𑀏𑀢𑁂 𑀲𑀩𑁆𑀩𑁂𑀧𑀺 𑀲𑀻𑀳𑀴𑀸.

𑁪𑁩. 𑀢𑀢𑁆𑀣 𑀢𑀢𑁆𑀣 𑀘 𑀕𑀸𑀫𑁂 𑀢𑁂, 𑀢𑀲𑁆𑀲𑀸’𑀫𑀘𑁆𑀘𑀸 𑀦𑀺𑀯𑁂𑀲𑀬𑀼𑀁;

𑀅𑀦𑀼𑀭𑀸𑀥𑀕𑀸𑀫𑀁 𑀢𑀦𑁆𑀦𑀸𑀫𑁄, 𑀓𑀤𑀫𑁆𑀩 𑀦𑀤𑀻𑀬𑀦𑁆𑀢𑀺𑀓𑁂.

𑁪𑁪. 𑀕𑀫𑁆𑀪𑀻𑀭𑀦𑀤𑀻𑀬𑀸 𑀢𑀻𑀭𑁂, 𑀉𑀧𑀢𑀺𑀲𑁆𑀲𑁄 𑀧𑀼𑀭𑁄𑀳𑀺𑀢𑁄;

𑀉𑀧𑀢𑀺𑀲𑁆𑀲𑀕𑀸𑀫𑀁 𑀫𑀸𑀧𑁂𑀲𑀺, 𑀅𑀦𑀼𑀭𑀸𑀥𑀲𑁆𑀲 𑀉𑀢𑁆𑀢𑀭𑁂.

𑁪𑁫. 𑀅𑀜𑁆𑀜𑁂 𑀢𑀬𑁄 𑀅𑀫𑀘𑁆𑀘𑀸 𑀢𑁂, 𑀫𑀸𑀧𑀬𑀺𑀁𑀲𑀼 𑀯𑀺𑀲𑀼𑀁 𑀯𑀺𑀲𑀼𑀁;

𑀉𑀚𑁆𑀚𑁂𑀦𑀺𑀁 𑀉𑀭𑀼𑀯𑁂𑀮𑀜𑁆𑀘, 𑀯𑀺𑀚𑀺𑀢𑀁 𑀦𑀕𑀭𑀁 𑀢𑀣𑀸.

𑁪𑁬. 𑀦𑀺𑀯𑀸𑀲𑁂𑀢𑁆𑀯𑀸 𑀚𑀦𑀧𑀤𑀁, 𑀲𑀩𑁆𑀩𑁂’𑀫𑀘𑁆𑀘𑀸 𑀲𑀫𑀘𑁆𑀘𑀢𑀁;

𑀅𑀯𑁄𑀘𑀼𑀁 𑀭𑀸𑀚𑀢𑀦𑀬𑀸, 𑀲𑀸𑀫𑀺 𑀭𑀚𑁆𑀚𑁂𑀪𑀺𑀲𑁂𑀘𑀬.

𑁪𑁭. 𑀇𑀢𑀺 𑀯𑀼𑀢𑁆𑀢𑁄 𑀭𑀸𑀚𑀧𑀼𑀢𑁆𑀢𑁄, 𑀦 𑀇𑀘𑁆𑀙𑀺 𑀅𑀪𑀺𑀲𑁂𑀘𑀦𑀁;

𑀯𑀺𑀦𑀸 𑀔𑀢𑁆𑀢𑀺𑀬𑀓𑀜𑁆𑀜𑀸𑀬, 𑀅𑀪𑀺𑀲𑁂𑀓𑀁 𑀫𑀳𑁂𑀲𑀺𑀬𑀸.

𑁪𑁮. 𑀅𑀣𑀸𑀫𑀘𑁆𑀘𑀸 𑀲𑀸𑀫𑀺𑀦𑁄 𑀳𑁂, 𑀅𑀪𑀺𑀲𑁂𑀓 𑀓𑀢𑀸 𑀤𑀭𑀸;

𑀤𑀼𑀓𑁆𑀓𑀭𑁂𑀲𑀼𑀧𑀺 𑀓𑀺𑀘𑁆𑀘𑁂𑀲𑀼, 𑀢𑀤𑀢𑁆𑀣𑀪𑀺𑀭𑀼𑀢𑀸 𑀢𑀺𑀕𑀸.

𑁪𑁯. 𑀧𑀡𑁆𑀡𑀸𑀓𑀸𑀭𑁂 𑀫𑀳𑀸𑀲𑀸𑀭𑁂, 𑀫𑀡𑀺𑀫𑀼𑀢𑁆𑀢𑀸𑀤𑀺𑀓𑁂 𑀩𑀳𑀽;

𑀕𑀸𑀳𑀸𑀧𑀬𑀺𑀢𑁆𑀯𑀸 𑀧𑀸𑀳𑁂𑀲𑀼𑀁, 𑀤𑀓𑁆𑀔𑀺𑀡𑀁 𑀫𑀥𑀼𑀭𑀁 𑀧𑀼𑀭𑀁.

𑁫𑁦. 𑀧𑀡𑁆𑀟𑀼𑀭𑀸𑀚𑀲𑁆𑀲 𑀥𑀻𑀢𑀢𑁆𑀣𑀁, 𑀲𑀸𑀫𑀺𑀦𑁄 𑀲𑀸𑀫𑀺𑀪𑀢𑁆𑀢𑀺𑀦𑁄;

𑀅𑀜𑁆𑀜𑁂𑀲𑀁 𑀘𑀸𑀧𑀺 𑀥𑀻𑀢𑀢𑁆𑀣𑀁, 𑀅𑀫𑀘𑁆𑀘𑀸𑀦𑀁 𑀚𑀦𑀲𑁆𑀲 𑀘.

𑁫𑁧. 𑀲𑀻𑀖𑀁 𑀦𑀸𑀯𑀸𑀬 𑀕𑀦𑁆𑀢𑁆𑀯𑀸𑀦, 𑀤𑀽𑀢𑀸 𑀢𑁂 𑀫𑀥𑀼𑀭𑀁 𑀧𑀼𑀭𑀁;

𑀧𑀡𑁆𑀡𑀸𑀓𑀸𑀭𑁂 𑀘 𑀮𑁂𑀔𑀜𑁆𑀘, 𑀢𑀲𑁆𑀲 𑀭𑀜𑁆𑀜𑁄 𑀅𑀤𑀲𑁆𑀲𑀬𑀼𑀁.

𑁫𑁨. 𑀢𑀢𑁄 𑀭𑀸𑀚𑀸𑀅𑀫𑀘𑁆𑀘𑁂𑀳𑀺, 𑀫𑀦𑁆𑀢𑀬𑀺𑀢𑁆𑀯𑀸 𑀲𑀥𑀻𑀢𑀭𑀁;

𑀧𑀸𑀳𑁂𑀢𑀼𑀓𑀸𑀫𑁄’𑀫𑀘𑁆𑀘𑀸𑀦𑀁, 𑀅𑀜𑁆𑀜𑁂𑀲𑀁 𑀘𑀸𑀧𑀺 𑀥𑀻𑀢𑀭𑁄.

𑁫𑁩. 𑀮𑀤𑁆𑀥𑀸 𑀊𑀦𑀲𑀢𑀁 𑀓𑀜𑁆𑀜𑀸, 𑀅𑀣𑀪𑁂𑀭𑀺𑀁 𑀘𑀭𑀸𑀧𑀬𑀺;

𑀮𑀁𑀓𑀸𑀬 𑀥𑀻𑀢𑀼𑀕𑀫𑀦𑀁, 𑀇𑀘𑁆𑀙𑀫𑀸𑀦𑀸 𑀦𑀭𑀸 𑀇𑀥.

𑁫𑁪. 𑀦𑀺𑀯𑀸𑀲𑀬𑀺𑀢𑁆𑀯𑀸 𑀤𑀺𑀕𑀼𑀡𑀁, 𑀖𑀭𑀤𑁆𑀯𑀸𑀭𑁂𑀲𑀼 𑀥𑀻𑀢𑀭𑁄;

𑀞𑀧𑁂𑀦𑁆𑀢𑀼 𑀢𑁂𑀦 𑀮𑀺𑀗𑁆𑀕𑁂𑀦, 𑀆𑀤𑀻𑀬𑀺𑀲𑁆𑀲𑀸𑀫𑀺𑀢𑀸 𑀇𑀢𑀺.

𑁫𑁫. 𑀏𑀯𑀁 𑀮𑀤𑁆𑀥𑀸 𑀩𑀳𑀽𑀓𑀜𑁆𑀜𑀸, 𑀢𑀧𑁆𑀧𑀬𑀺𑀢𑁆𑀯𑀸𑀦 𑀢𑀁 𑀓𑀼𑀮𑀁;

𑀲𑀫𑁆𑀧𑀦𑁆𑀦𑀲𑀩𑁆𑀩𑀸𑀮𑀗𑁆𑀓𑀸𑀭𑀁, 𑀥𑀻𑀢𑀭𑀁 𑀲𑀫𑁆𑀧𑀝𑀺𑀘𑁆𑀙𑀤𑀁.

𑁫𑁬. 𑀲𑀩𑁆𑀩𑀸 𑀢𑀸 𑀮𑀤𑁆𑀥𑀲𑀓𑁆𑀓𑀸𑀭𑀸, 𑀓𑀜𑁆𑀜𑀸𑀬𑁄 𑀘 𑀬𑀣𑀸𑀭𑀳𑀁;

𑀭𑀸𑀚𑀸𑀭𑀳𑁂 𑀘 𑀳𑀢𑁆𑀣𑀲𑁆𑀲-𑀭𑀣𑀧𑁂𑀲𑁆𑀲𑀺𑀬 𑀓𑀸𑀭𑀓𑁂.

𑁫𑁭. 𑀅𑀝𑁆𑀞𑀸𑀭𑀲𑀦𑁆𑀦𑀁 𑀲𑁂𑀡𑀻𑀦𑀁, 𑀲𑀳𑀲𑁆𑀲𑀜𑁆𑀘 𑀓𑀼𑀮𑀸𑀦𑀺 𑀲𑁄;

𑀮𑁂𑀔𑀁 𑀤𑀢𑁆𑀯𑀸𑀦 𑀧𑁂𑀲𑁂𑀲𑀺, 𑀯𑀺𑀚𑀬𑀲𑁆𑀲 𑀚𑀺𑀢𑀸’𑀭𑀺𑀦𑁄.

𑁫𑁮. 𑀲𑀩𑁆𑀩𑁄𑀲𑁄’𑀢𑀭𑀻 𑀦𑀸𑀯𑀸𑀳𑀺, 𑀫𑀳𑀸𑀢𑀺𑀢𑁆𑀣𑁂 𑀫𑀳𑀸𑀚𑀦𑁄;

𑀢𑁂𑀦𑁂𑀯 𑀧𑀝𑁆𑀝𑀦𑀁 𑀢𑀜𑁆𑀳𑀺, 𑀫𑀳𑀸𑀢𑀺𑀢𑁆𑀣𑀁𑀢𑀺 𑀯𑀼𑀘𑁆𑀘𑀢𑀺.

𑁫𑁯. 𑀯𑀺𑀚𑀬𑀲𑁆𑀲 𑀲𑀼𑀢𑁄𑀥𑀻𑀢𑀸, 𑀢𑀲𑁆𑀲𑀸 𑀬𑀓𑁆𑀔𑀺𑀦𑀺𑀬𑀸 𑀅𑀳𑀼;

𑀭𑀸𑀚𑀓𑀜𑁆𑀜𑀸𑀕𑀫𑀁 𑀲𑀼𑀢𑁆𑀯𑀸, 𑀯𑀺𑀚𑀬𑁄 𑀆𑀳 𑀬𑀓𑁆𑀔𑀺𑀦𑀺𑀁.

𑁬𑁦. ‘‘𑀕𑀘𑁆𑀙 𑀤𑀸𑀦𑀺 𑀢𑀼𑀯𑀁 𑀪𑁄𑀢𑀺, 𑀞𑀧𑁂𑀢𑁆𑀯𑀸 𑀧𑀼𑀢𑁆𑀢𑀓𑁂 𑀤𑀼𑀯𑁂;

𑀫𑀦𑀼𑀲𑁆𑀲𑀸 𑀅𑀫𑀦𑀼𑀲𑁆𑀲𑁂𑀳𑀺, 𑀪𑀸𑀬𑀺𑀦𑁆𑀢𑀻𑀳𑀺 𑀲𑀤𑀸’’ 𑀇𑀢𑀺.

𑁬𑁧. 𑀲𑀼𑀢𑁆𑀯𑀸 𑀢𑀁 𑀬𑀓𑁆𑀔𑀪𑀬𑀢𑁄, 𑀪𑀻𑀢𑀁 𑀢𑀁 𑀆𑀳 𑀬𑀓𑁆𑀔𑀺𑀦𑀺𑀁;

𑀫𑀸 𑀘𑀺𑀦𑁆𑀢𑀬𑀺 𑀲𑀸𑀳𑀲𑁆𑀲𑁂𑀦, 𑀤𑀸𑀧𑀬𑀺𑀲𑁆𑀲𑀸𑀫𑀺 𑀢𑁂 𑀩𑀮𑀺𑀁.

𑁬𑁨. 𑀧𑀼𑀦𑀧𑁆𑀧𑀼𑀦𑀁 𑀢𑀁 𑀬𑀸𑀘𑀺𑀢𑁆𑀯𑀸, 𑀉𑀪𑁄 𑀆𑀤𑀸𑀬 𑀧𑀼𑀢𑁆𑀢𑀓𑁂;

𑀪𑀻𑀢𑀸𑀧𑀺 𑀲𑀸 𑀅𑀕𑀢𑀺𑀬𑀸, 𑀮𑀁𑀓𑀸𑀧𑀼𑀭𑀫𑀼𑀧𑀸𑀕𑀫𑀺.

𑁬𑁩. 𑀧𑀼𑀢𑁆𑀢𑁂 𑀩𑀺𑀳𑀺 𑀦𑀺𑀲𑀻𑀤𑁂𑀢𑁆𑀯𑀸, 𑀲𑀬𑀁 𑀧𑀸𑀯𑀺𑀲𑀺 𑀢𑀁 𑀧𑀼𑀭𑀁;

𑀲𑀜𑁆𑀚𑀸𑀦𑀺𑀢𑁆𑀯𑀸𑀦 𑀢𑀁 𑀬𑀓𑁆𑀔𑀺𑀁, 𑀪𑀻𑀢𑀸 𑀘𑁄𑀭𑀻𑀢𑀺 𑀲𑀜𑁆𑀜𑀺𑀢𑁄.

𑁬𑁪. 𑀲𑀁𑀔𑀼𑀪𑀺𑀁𑀲𑀼 𑀧𑀼𑀭𑁂 𑀬𑀓𑁆𑀔𑀸, 𑀏𑀓𑁄 𑀲𑀸𑀳𑀲𑀺𑀓𑁄 𑀧𑀦;

𑀏𑀓𑀧𑀸𑀡𑀺𑀧𑁆𑀧𑀳𑀸𑀭𑁂𑀦, 𑀯𑀺𑀮𑀬𑀁 𑀦𑀬𑀺 𑀬𑀓𑁆𑀔𑀺𑀦𑀺𑀁.

𑁬𑁫. 𑀢𑀲𑁆𑀲𑀸𑀢𑀼 𑀫𑀸𑀢𑀼𑀮𑁄 𑀬𑀓𑁆𑀔𑁄, 𑀦𑀺𑀓𑁆𑀔𑀫𑁆𑀫 𑀦𑀕𑀭𑀸 𑀩𑀳𑀺;

𑀤𑀺𑀲𑁆𑀯𑀸 𑀢𑁂 𑀤𑀸𑀭𑀓𑁂 𑀧𑀼𑀘𑁆𑀙𑀺, 𑀢𑀼𑀫𑁆𑀳𑁂 𑀓𑀲𑁆𑀲 𑀲𑀼𑀢𑀸 𑀇𑀢𑀺.

𑁬𑁬. 𑀓𑀼𑀯𑁂𑀡𑀺𑀬𑀸’𑀢𑀺 𑀲𑀼𑀢𑁆𑀯𑀸’𑀳, 𑀫𑀸𑀢𑀸 𑀯𑁄 𑀫𑀸𑀭𑀺𑀢𑀸 𑀇𑀥;

𑀢𑀼𑀫𑁆𑀳𑁂𑀧𑀺 𑀤𑀺𑀲𑁆𑀯𑀸 𑀫𑀸𑀭𑁂𑀬𑁆𑀬𑀼𑀁, 𑀧𑀮𑀸𑀬𑀣 𑀮𑀳𑀼𑀁 𑀇𑀢𑀺.

𑁬𑁭. 𑀆𑀕𑀼𑀁 𑀲𑀼𑀫𑀦𑀓𑀽𑀝𑀁 𑀢𑁂, 𑀧𑀮𑀸𑀬𑀺𑀢𑁆𑀯𑀸 𑀢𑀢𑁄 𑀮𑀳𑀼𑀁;

𑀯𑀸𑀲𑀁 𑀓𑀧𑁆𑀧𑁂𑀲𑀺 𑀚𑁂𑀝𑁆𑀞𑁄 𑀲𑁄, 𑀯𑀼𑀤𑁆𑀥𑁄 𑀢𑀸𑀬 𑀓𑀡𑀺𑀝𑁆𑀞𑀺𑀬𑀸.

𑁬𑁮. 𑀧𑀼𑀢𑁆𑀢𑀥𑀻𑀢𑀸𑀳𑀺 𑀯𑀟𑁆𑀠𑀺𑀢𑁆𑀯𑀸, 𑀭𑀸𑀚𑀸𑀦𑀼𑀜𑁆𑀜𑀸𑀬 𑀢𑁂 𑀯𑀲𑀼𑀁;

𑀢𑀢𑁆𑀣𑁂𑀯 𑀫𑀮𑀬𑁂 𑀏𑀲𑁄, 𑀧𑀼𑀮𑀺𑀦𑁆𑀤𑀸𑀦𑀜𑁆𑀳𑀺 𑀲𑀫𑁆𑀪𑀯𑁄.

𑁬𑁯. 𑀧𑀡𑁆𑀟𑀼𑀭𑀸𑀚𑀲𑁆𑀲 𑀤𑀽𑀢𑀸 𑀢𑁂, 𑀧𑀡𑁆𑀡𑀸𑀓𑀸𑀭𑀁 𑀲𑀫𑀧𑁆𑀧𑀬𑀼𑀁;

𑀯𑀺𑀚𑀬𑀲𑁆𑀲 𑀓𑀼𑀫𑀸𑀭𑀲𑁆𑀲, 𑀭𑀸𑀚𑀸𑀥𑀺𑀓𑀸𑀭𑀺𑀓𑀸 𑀘 𑀢𑀸.

𑁭𑁦. 𑀓𑀢𑁆𑀯𑀸 𑀲𑀓𑁆𑀓𑀸𑀭𑀲𑀫𑁆𑀫𑀸𑀦𑀁, 𑀤𑀽𑀢𑀸𑀦𑀁 𑀯𑀺𑀚𑀬𑁄 𑀧𑀦;

𑀅𑀤𑀸 𑀬𑀸𑀣𑀸𑀭𑀳𑀁 𑀓𑀜𑁆𑀜𑀸, 𑀅𑀫𑀘𑁆𑀘𑀸𑀦𑀁 𑀚𑀦𑀲𑁆𑀲 𑀘.