𑀲𑀢𑁆𑀢𑀭𑀲𑀫 𑀧𑀭𑀺𑀘𑁆𑀙𑁂𑀤

𑀥𑀸𑀢𑀼𑀆𑀕𑀫𑀦𑁄

𑁧. 𑀯𑀼𑀢𑁆𑀣𑀯𑀲𑁆𑀲𑁄 𑀧𑀯𑀸𑀭𑁂𑀢𑁆𑀯𑀸, 𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸𑀲𑀺𑀬𑀁;

𑀅𑀯𑁄𑀘𑁂’𑀤𑀁 𑀫𑀳𑀸𑀭𑀸𑀚𑀁, 𑀫𑀳𑀸𑀣𑁂𑀭𑁄 𑀫𑀳𑀸𑀫𑀢𑀺.

𑁨. 𑀘𑀺𑀭𑀤𑀺𑀝𑁆𑀞𑁄 𑀳𑀺 𑀲𑀫𑁆𑀩𑀼𑀤𑁆𑀥𑁄, 𑀲𑀢𑁆𑀣𑀸 𑀦𑁄 𑀫𑀦𑀼𑀚𑀸𑀥𑀺𑀧;

𑀅𑀦𑀸𑀣𑀯𑀸𑀲𑀁 𑀅𑀯𑀲𑀺𑀫𑁆𑀳, 𑀦𑀢𑁆𑀣𑀺 𑀦𑁄 𑀧𑀽𑀚𑀺𑀬𑀁 𑀇𑀥.

𑁩. ‘‘𑀪𑀸𑀲𑀺𑀢𑁆𑀣 𑀦𑀦𑀼 𑀪𑀦𑁆𑀢𑁂𑀫𑁂, 𑀲𑀫𑁆𑀩𑀼𑀤𑁆𑀥𑁄 𑀦𑀺𑀩𑁆𑀩𑀼𑀢𑁄’’ 𑀇𑀢𑀺;

𑀆𑀳 𑀥𑀸𑀢𑀽𑀲𑀼 𑀤𑀺𑀝𑁆𑀞𑁂𑀲𑀼, 𑀤𑀺𑀝𑁆𑀞𑁄 𑀳𑁄𑀢𑀺 𑀚𑀺𑀦𑁄’’ 𑀇𑀢𑀺.

𑁪. 𑀯𑀺𑀤𑀺𑀢𑁄 𑀯𑁄 𑀅𑀥𑀺𑀧𑁆𑀧𑀸𑀬𑁄, 𑀣𑀽𑀧𑀲𑁆𑀲 𑀓𑀸𑀭𑀡𑁂 𑀫𑀬𑀸;

𑀓𑀸𑀭𑁂𑀲𑁆𑀲𑀸𑀫𑀺 𑀅𑀳𑀁 𑀣𑀽𑀧𑀁, 𑀢𑀼𑀫𑁆𑀳𑁂 𑀚𑀸𑀦𑀸𑀣 𑀥𑀸𑀢𑀼𑀬𑁄.

𑁫. 𑀫𑀦𑁆𑀢𑁂𑀳𑀺 𑀲𑀼𑀫𑀦𑁂𑀦𑀸𑀢𑀺, 𑀣𑁂𑀭𑁄 𑀭𑀸𑀚𑀸𑀦𑀫𑀩𑁆𑀭𑀯𑀺;

𑀭𑀸𑀚𑀸’𑀳 𑀲𑀸𑀫𑀡𑁂𑀭𑀁 𑀢𑀁, 𑀓𑀼𑀢𑁄 𑀮𑀘𑁆𑀙𑀸𑀫 𑀥𑀸𑀢𑀼𑀬𑁄.

𑁬. 𑀯𑀺𑀪𑀽𑀲𑀬𑀺𑀢𑁆𑀯𑀸 𑀦𑀕𑀭𑀁, 𑀫𑀕𑁆𑀕𑀜𑁆𑀘 𑀫𑀦𑀼𑀚𑀸𑀥𑀺𑀧;

𑀉𑀧𑁄𑀲𑀣𑀻 𑀲𑀧𑀭𑀺𑀲𑁄, 𑀳𑀢𑁆𑀣𑀺𑀁 𑀆𑀭𑀼𑀬𑁆𑀳 𑀫𑀗𑁆𑀕𑀮𑀁.

𑁭. 𑀲𑁂𑀢𑀘𑁆𑀙𑀢𑁆𑀢𑀁 𑀥𑀸𑀭𑀬𑀦𑁆𑀢𑁄, 𑀢𑀸𑀮𑀸𑀯𑀘𑀭𑀲𑀁𑀳𑀺𑀢𑁄;

𑀫𑀳𑀸𑀦𑀸𑀕𑀯𑀦𑀼𑀬𑁆𑀬𑀸𑀦𑀁, 𑀲𑀸𑀬𑀦𑁆𑀳𑀲𑀫𑀬𑁂 𑀯𑀚.

𑁮. 𑀥𑀸𑀢𑀼𑀪𑁂𑀤𑀜𑁆𑀜𑀼𑀦𑁄 𑀭𑀸𑀚, 𑀥𑀸𑀢𑀼𑀬𑁄 𑀢𑀢𑁆𑀣 𑀮𑀘𑁆𑀙𑀲𑀺;

𑀇𑀘𑁆𑀙𑀸𑀳 𑀲𑀸𑀫𑀡𑁂𑀭𑁄 𑀲𑁄, 𑀲𑀼𑀫𑀦𑁄 𑀢𑀁 𑀲𑀼𑀫𑀸𑀦𑀲𑀁.

𑁯. 𑀣𑁂𑀭𑁄’𑀣 𑀭𑀸𑀚𑀓𑀼𑀮𑀢𑁄, 𑀕𑀦𑁆𑀢𑁆𑀯𑀸 𑀘𑁂𑀢𑀺𑀬𑀧𑀩𑁆𑀩𑀢𑀁;

𑀆𑀫𑀦𑁆𑀢𑀺𑀬 𑀲𑀸𑀫𑀡𑁂𑀭𑀁, 𑀲𑀼𑀫𑀦𑀁 𑀲𑀼𑀫𑀦𑁄 𑀕𑀢𑀺𑀁.

𑁧𑁦. 𑀏𑀳𑀺 𑀢𑁆𑀯𑀁 𑀪𑀤𑁆𑀭 𑀲𑀼𑀫𑀦, 𑀕𑀦𑁆𑀢𑁆𑀯𑀸 𑀧𑀼𑀧𑁆𑀨𑀧𑀼𑀭𑀁 𑀯𑀭𑀁;

𑀅𑀬𑁆𑀬𑀓𑀁 𑀢𑁂 𑀫𑀳𑀸𑀭𑀸𑀚𑀁, 𑀏𑀯𑀁 𑀦𑁄 𑀯𑀘𑀦𑀁 𑀯𑀤.

𑁧𑁧. 𑀲𑀳𑀸𑀬𑁄 𑀢𑁂 𑀫𑀳𑀸𑀭𑀸𑀚, 𑀫𑀳𑀸𑀭𑀸𑀚𑀸 𑀫𑀭𑀼𑀧𑁆𑀧𑀺𑀬𑁄;

𑀧𑀲𑀦𑁆𑀦𑁄 𑀩𑀼𑀤𑁆𑀥𑀲𑀫𑀬𑁂, 𑀣𑀽𑀧𑀁 𑀓𑀸𑀭𑁂𑀢𑀼𑀫𑀺𑀘𑁆𑀙𑀢𑀺.

𑁧𑁨. 𑀫𑀼𑀦𑀺𑀦𑁄 𑀥𑀸𑀢𑀼𑀬𑁄 𑀤𑁂𑀳𑀺, 𑀧𑀢𑁆𑀢𑀁 𑀪𑀼𑀢𑁆𑀢𑀜𑁆𑀘 𑀲𑀢𑁆𑀣𑀼𑀦𑀸;

𑀲𑀭𑀻𑀭𑀥𑀸𑀢𑀼𑀬𑁄 𑀲𑀦𑁆𑀢𑀺, 𑀩𑀳𑀯𑁄 𑀳𑀺 𑀢𑀯𑀦𑁆𑀢𑀺𑀓𑁂.

𑁧𑁩. 𑀧𑀢𑁆𑀢𑀧𑀽𑀭𑀸 𑀕𑀳𑁂𑀢𑁆𑀯𑀸 𑀢𑀸, 𑀕𑀦𑁆𑀢𑁆𑀯𑀸 𑀤𑁂𑀯𑀧𑀼𑀭𑀁 𑀯𑀭𑀁;

𑀲𑀓𑁆𑀓𑀁 𑀤𑁂𑀯𑀸𑀦𑀫𑀺𑀦𑁆𑀤𑀁 𑀢𑀁, 𑀏𑀯𑀁 𑀦𑁄 𑀯𑀘𑀦𑀁 𑀯𑀤.

𑁧𑁪. 𑀢𑀺𑀮𑁄𑀓𑀤𑀓𑁆𑀔𑀺𑀡𑁂𑀬𑁆𑀬𑀲𑁆𑀲, 𑀤𑀸𑀞𑀸𑀥𑀸𑀢𑀼 𑀘 𑀤𑀓𑁆𑀔𑀺𑀡𑀸;

𑀢𑀯𑀦𑁆𑀢𑀺𑀓𑀫𑁆𑀳𑀺 𑀤𑁂𑀯𑀺𑀦𑁆𑀤, 𑀤𑀓𑁆𑀔𑀺𑀡𑀓𑁆𑀔𑀓𑀥𑀸𑀢𑀼 𑀘.

𑁧𑁫. 𑀤𑀸𑀞𑀁 𑀢𑁆𑀯𑀫𑁂𑀯 𑀧𑀽𑀚𑁂𑀳𑀺, 𑀅𑀓𑁆𑀔𑀓𑀁 𑀤𑁂𑀳𑀺 𑀲𑀢𑁆𑀣𑀼𑀦𑁄;

𑀮𑀁𑀓𑀸𑀤𑀻𑀧𑀲𑁆𑀲 𑀓𑀺𑀘𑁆𑀘𑁂𑀲𑀼, 𑀫𑀸𑀧𑀫𑀚𑁆𑀚 𑀲𑀼𑀭𑀸𑀥𑀺𑀧.

𑁧𑁬. ‘‘𑀏𑀯𑀁 𑀪𑀦𑁆𑀢𑁂’’𑀢𑀺 𑀯𑀢𑁆𑀯𑀸 𑀲𑁄, 𑀲𑀸𑀫𑀡𑁂𑀭𑁄 𑀫𑀳𑀺𑀤𑁆𑀥𑀺𑀓𑁄;

𑀢𑀗𑁆𑀔𑀡𑀁𑀬𑁂𑀯 𑀅𑀕𑀫𑀸, 𑀥𑀫𑁆𑀫𑀸𑀲𑁄𑀓𑀲𑁆𑀲 𑀲𑀦𑁆𑀢𑀺𑀓𑀁.

𑁧𑁭. 𑀲𑀸𑀮𑀫𑀽𑀮𑀫𑁆𑀳𑀺 𑀞𑀧𑀺𑀢𑀁, 𑀫𑀳𑀸𑀩𑁄𑀥𑀺𑀁 𑀢𑀳𑀺𑀁 𑀲𑀼𑀢𑀁;

𑀓𑀢𑁆𑀢𑀺𑀓𑀘𑁆𑀙𑀡𑀧𑀽𑀚𑀸𑀳𑀺, 𑀧𑀽𑀚𑀺𑀬𑀁 𑀢𑀜𑁆𑀘 𑀅𑀤𑁆𑀤𑀲.

𑁧𑁮. 𑀣𑁂𑀭𑀲𑁆𑀲 𑀯𑀘𑀦𑀁 𑀯𑀢𑁆𑀯𑀸, 𑀭𑀸𑀚𑀢𑁄 𑀮𑀤𑁆𑀥𑀥𑀸𑀢𑀼𑀬𑁄;

𑀧𑀢𑁆𑀢𑀧𑀽𑀭𑀁 𑀕𑀳𑁂𑀢𑁆𑀯𑀸𑀦, 𑀳𑀺𑀫𑀯𑀦𑁆𑀢𑀫𑀼𑀧𑀸𑀕𑀫𑀺.

𑁧𑁯. 𑀳𑀺𑀫𑀯𑀦𑁆𑀢𑁂 𑀞𑀧𑁂𑀢𑁆𑀯𑀸𑀦, 𑀲𑀥𑀸𑀢𑀼𑀁 𑀧𑀢𑁆𑀢𑀫𑀼𑀢𑁆𑀢𑀫𑀁;

𑀤𑁂𑀯𑀺𑀦𑁆𑀤𑀲𑀦𑁆𑀢𑀺𑀓𑀁 𑀕𑀦𑁆𑀢𑁆𑀯𑀸, 𑀣𑁂𑀭𑀲𑁆𑀲 𑀯𑀘𑀦𑀁 𑀪𑀡𑀺.

𑁨𑁦. 𑀘𑀽𑀴𑀸𑀫𑀡𑀺 𑀘𑁂𑀢𑀺𑀬𑀫𑁆𑀳𑀸, 𑀕𑀳𑁂𑀢𑁆𑀯𑀸 𑀤𑀓𑁆𑀔𑀺𑀡𑀓𑁆𑀔𑀓𑀁;

𑀲𑀸𑀫𑀡𑁂𑀭𑀲𑁆𑀲 𑀧𑀸𑀤𑀸𑀲𑀺, 𑀲𑀓𑁆𑀓𑁄 𑀤𑁂𑀯𑀸𑀦𑀫𑀺𑀲𑁆𑀲𑀭𑁄.

𑁨𑁧. 𑀢𑀁 𑀥𑀸𑀢𑀼𑀁 𑀥𑀸𑀢𑀼𑀧𑀢𑁆𑀢𑀜𑁆𑀘, 𑀆𑀤𑀸𑀬 𑀲𑀼𑀫𑀦𑁄 𑀢𑀢𑁄;

𑀆𑀕𑀫𑁆𑀫 𑀘𑁂𑀢𑀺𑀬𑀕𑀺𑀭𑀺𑀁, 𑀣𑁂𑀭𑀲𑁆𑀲’𑀤𑀸𑀲𑀺 𑀢𑀁 𑀬𑀢𑀺.

𑁨𑁨. 𑀫𑀳𑀸𑀦𑀸𑀕𑀯𑀦𑀼𑀬𑁆𑀬𑀸𑀦𑀁, 𑀯𑀼𑀢𑁆𑀢𑁂𑀦𑀸 𑀯𑀺𑀥𑀺𑀦𑀸’𑀕𑀫𑀸;

𑀲𑀸𑀬𑀦𑁆𑀳𑀸𑀲𑀫𑀬𑁂 𑀭𑀸𑀚𑀸, 𑀭𑀸𑀚𑀲𑁂𑀦𑀸 𑀧𑀼𑀭𑀓𑁆𑀔𑀢𑁄.

𑁨𑁩. 𑀞𑀧𑁂𑀲𑀺 𑀥𑀸𑀢𑀼𑀬𑁄 𑀲𑀩𑁆𑀩𑀸, 𑀣𑁂𑀭𑁄 𑀢𑀢𑁆𑀣𑁂𑀯 𑀧𑀩𑁆𑀩𑀢𑁂;

𑀫𑀺𑀲𑁆𑀲𑀓𑀁 𑀧𑀩𑁆𑀩𑀢𑀁 𑀢𑀲𑁆𑀫𑀸, 𑀆𑀳𑀼 𑀘𑁂𑀢𑀺𑀬 𑀧𑀩𑁆𑀩𑀢𑀁.

𑁨𑁪. 𑀞𑀧𑁂𑀢𑁆𑀯𑀸 𑀥𑀸𑀢𑀼𑀧𑀢𑁆𑀢𑀁 𑀢𑀁, 𑀣𑁂𑀭𑁄 𑀘𑁂𑀢𑀺𑀬𑀧𑀩𑁆𑀩𑀢𑁂;

𑀕𑀳𑁂𑀢𑁆𑀯𑀸 𑀅𑀓𑁆𑀔𑀓𑀁 𑀥𑀸𑀢𑀼𑀁, 𑀲𑀗𑁆𑀓𑁂𑀢𑀁 𑀲𑀕𑀡𑁄’𑀕𑀫𑀸.

𑁨𑁫. 𑀲𑀘𑀸𑀬𑀁 𑀫𑀼𑀦𑀺𑀦𑁄 𑀥𑀸𑀢𑀼, 𑀙𑀢𑁆𑀢𑀁 𑀦𑀫𑀢𑀼 𑀫𑁂 𑀲𑀬𑀁;

𑀚𑀡𑁆𑀡𑀼𑀓𑁂𑀳𑀺 𑀓𑀭𑀻𑀥𑀸𑀢𑀼, 𑀥𑀸𑀢𑀼𑀘𑀗𑁆𑀓𑁄𑀝𑀓𑁄 𑀅𑀬𑀁.

𑁨𑁬. 𑀲𑀺𑀭𑀲𑁆𑀫𑀺𑀁 𑀫𑁂 𑀧𑀢𑀺𑀝𑁆𑀞𑀸𑀢𑀼, 𑀆𑀕𑀫𑁆𑀫 𑀲𑀳 𑀥𑀸𑀢𑀼𑀓𑁄;

𑀇𑀢𑀺 𑀭𑀸𑀚𑀸 𑀯𑀺𑀘𑀺𑀦𑁆𑀢𑁂𑀲𑀺, 𑀘𑀺𑀦𑁆𑀢𑀺𑀢𑀁 𑀢𑀁 𑀢𑀣𑀸 𑀅𑀳𑀼.

𑁨𑁭. 𑀅𑀫𑀢𑁂𑀦𑀸’𑀪𑀺𑀲𑀺𑀢𑁆𑀢𑁄𑀯, 𑀅𑀳𑀼 𑀳𑀝𑁆𑀞𑁄’𑀢𑀺 𑀪𑀽𑀧𑀢𑀺;

𑀲𑀻𑀲𑀢𑁄 𑀢𑀁 𑀕𑀳𑁂𑀢𑁆𑀯𑀸𑀦, 𑀳𑀢𑁆𑀣𑀺𑀓𑁆𑀔𑀦𑁆𑀥𑁂 𑀞𑀧𑁂𑀲𑀺𑀢𑀁.

𑁨𑁮. 𑀳𑀝𑁆𑀞𑁄 𑀳𑀢𑁆𑀢𑀻 𑀓𑀼𑀜𑁆𑀘𑀦𑀸𑀤𑀁, 𑀅𑀓𑀸 𑀓𑀫𑁆𑀧𑀺𑀢𑁆𑀣 𑀫𑁂𑀤𑀺𑀦𑀻;

𑀢𑀢𑁄 𑀦𑀸𑀕𑁄 𑀦𑀺𑀯𑀢𑁆𑀢𑀺𑀢𑁆𑀯𑀸, 𑀲𑀣𑁂𑀭 𑀩𑀮𑀯𑀸𑀳𑀦𑁄.

𑁨𑁯. 𑀧𑀼𑀭𑀢𑁆𑀣𑀺𑀫𑁂𑀦 𑀤𑁆𑀯𑀸𑀭𑁂𑀦, 𑀧𑀯𑀺𑀲𑀺𑀢𑁆𑀯𑀸 𑀧𑀼𑀭𑀁 𑀲𑀼𑀪𑀁;

𑀤𑀓𑁆𑀔𑀺𑀡𑁂𑀦 𑀘 𑀤𑁆𑀯𑀸𑀭𑁂𑀦, 𑀦𑀺𑀓𑁆𑀔𑀫𑀺𑀢𑁆𑀯𑀸 𑀢𑀢𑁄 𑀧𑀼𑀦.

𑁩𑁦. 𑀣𑀽𑀧𑀸𑀭𑀸𑀫𑁂 𑀘𑁂𑀢𑀺𑀬𑀲𑁆𑀲, 𑀞𑀸𑀦𑀢𑁄 𑀧𑀘𑁆𑀙𑀢𑁄 𑀓𑀢𑀁;

𑀧𑀫𑁄𑀚𑀯𑀢𑁆𑀣𑀼𑀁 𑀕𑀦𑁆𑀢𑁆𑀯𑀸𑀦, 𑀩𑁄𑀥𑀺𑀞𑀸𑀦𑁂 𑀦𑀺𑀯𑀢𑁆𑀢𑀺𑀬.

𑁩𑁧. 𑀧𑀼𑀭𑀢𑁆𑀣𑀸𑀯𑀤𑀦𑁄 𑀅𑀞𑀸, 𑀣𑀽𑀧𑀞𑀸𑀦𑀁 𑀢𑀤𑀸 𑀳𑀺𑀢𑀁;

𑀓𑀤𑀫𑁆𑀩𑀧𑀼𑀧𑁆𑀨𑀆𑀤𑀸𑀭𑀺-𑀯𑀮𑁆𑀮𑀻𑀳𑀺 𑀘𑀺𑀢𑀓𑀁 𑀅𑀳𑀼.

𑁩𑁨. 𑀫𑀦𑀼𑀲𑁆𑀲𑀤𑁂𑀯𑁄 𑀤𑁂𑀯𑁂𑀳𑀺, 𑀢𑀁 𑀞𑀸𑀦𑀁 𑀭𑀓𑁆𑀔𑀺𑀢𑀁 𑀲𑀼𑀘𑀺𑀁;

𑀲𑁄𑀥𑀸𑀧𑁂𑀢𑁆𑀯𑀸 𑀪𑀽𑀲𑀬𑀺𑀢𑁆𑀯𑀸, 𑀢𑀗𑁆𑀔𑀡𑀁𑀬𑁂𑀯 𑀲𑀸𑀥𑀼𑀓𑀁.

𑁩𑁩. 𑀥𑀸𑀢𑀼𑀁 𑀑𑀭𑁄𑀧𑀦𑀢𑁆𑀣𑀸𑀬, 𑀆𑀭𑀪𑀻 𑀳𑀢𑁆𑀣𑀺𑀓𑁆𑀔𑀦𑁆𑀥𑀢𑁄;

𑀦𑀸𑀕𑁄 𑀦 𑀇𑀘𑁆𑀙𑀺𑀢𑀁 𑀭𑀸𑀚𑀸, 𑀣𑁂𑀭𑀁 𑀧𑀼𑀘𑁆𑀙𑀺𑀢𑁆𑀣 𑀢𑀁 𑀫𑀦𑀁.

𑁩𑁪. 𑀅𑀢𑁆𑀢𑀦𑁄 𑀔𑀦𑁆𑀥𑀲𑀫𑀓𑁂, 𑀞𑀸𑀦𑁂 𑀞𑀧𑀦𑀫𑀺𑀘𑁆𑀙𑀢𑀺;

𑀥𑀸𑀢𑀼𑀑𑀭𑁄𑀧𑀦𑀁 𑀢𑁂𑀦, 𑀦 𑀇𑀝𑁆𑀞𑀫𑀻’𑀢𑀺 𑀲𑁄 𑀩𑁆𑀭𑀯𑀺.

𑁩𑁫. 𑀆𑀡𑀸𑀧𑁂𑀢𑁆𑀯𑀸 𑀔𑀡𑀁𑀬𑁂𑀯,

𑀲𑀼𑀓𑁆𑀔𑀸𑀢𑁄’𑀪𑀬𑀯𑀸𑀧𑀺𑀢𑁄;

𑀲𑀼𑀓𑁆𑀔𑀓𑀤𑁆𑀤𑀫 𑀔𑀡𑁆𑀟𑁂𑀳𑀺,

𑀘𑀺𑀢𑀸 𑀧𑁂𑀢𑁆𑀯𑀸𑀦 𑀢𑀁 𑀲𑀫𑀁.

𑁩𑁬. 𑀅𑀮𑀗𑁆𑀓𑀭𑀺𑀢𑁆𑀯𑀸𑀦 𑀩𑀳𑀼𑀥𑀸, 𑀭𑀸𑀚𑀸 𑀢𑀁 𑀞𑀸𑀦𑀫𑀼𑀢𑁆𑀢𑀫𑀁;

𑀑𑀭𑁄𑀧𑁂𑀢𑁆𑀯𑀸 𑀳𑀢𑁆𑀣𑀺𑀓𑁆𑀔𑀦𑁆𑀥𑀸, 𑀥𑀸𑀢𑀼𑀁 𑀢𑀢𑁆𑀣 𑀞𑀧𑁂𑀲𑀺𑀢𑀁.

𑁩𑁭. 𑀥𑀸𑀢𑀸𑀭𑀓𑁆𑀔𑀁 𑀲𑀁𑀯𑀺𑀥𑀸𑀬, 𑀞𑀧𑁂𑀢𑁆𑀯𑀸 𑀢𑀢𑁆𑀣 𑀳𑀢𑁆𑀣𑀺𑀦𑀁;

𑀥𑀸𑀢𑀼𑀣𑀽𑀧𑀲𑁆𑀲 𑀓𑀭𑀡𑁂, 𑀭𑀸𑀚𑀸 𑀢𑀼𑀭𑀺𑀢𑀫𑀸𑀦𑀲𑁄.

𑁩𑁮. 𑀩𑀳𑀽 𑀫𑀦𑀼𑀲𑁆𑀲𑁂 𑀬𑁄𑀚𑁂𑀢𑁆𑀯𑀸, 𑀇𑀢𑁆𑀣𑀺𑀓𑀸𑀓𑀭𑀡𑁂 𑀮𑀳𑀼𑀁;

𑀥𑀸𑀢𑀼𑀓𑀺𑀘𑁆𑀘𑀁 𑀯𑀺𑀘𑀺𑀦𑁆𑀢𑁂𑀦𑁆𑀢𑁄, 𑀲𑀸𑀫𑀘𑁆𑀘𑁄 𑀧𑀸𑀯𑀺𑀲𑀻 𑀧𑀼𑀭𑀁.

𑁩𑁯. 𑀫𑀳𑀸𑀫𑀳𑀺𑀦𑁆𑀤𑀢𑁆𑀣𑁂𑀭𑁄 𑀢𑀼, 𑀫𑀳𑀸 𑀫𑁂𑀖𑀯𑀦𑀁 𑀲𑀼𑀪𑀁;

𑀲𑀕𑀡𑁄 𑀅𑀪𑀺𑀕𑀦𑁆𑀢𑁆𑀯𑀸𑀦, 𑀢𑀢𑁆𑀣 𑀯𑀸𑀲𑀫𑀓𑀧𑁆𑀧𑀬𑀺.

𑁪𑁦. 𑀭𑀢𑁆𑀢𑀺𑀁 𑀦𑀸𑀕𑁄’𑀦𑀼𑀧𑀭𑀺𑀬𑀸𑀢𑀺, 𑀢𑀁 𑀞𑀸𑀦𑀁 𑀲𑁄 𑀲𑀥𑀸𑀢𑀼 𑀓𑀁;

𑀩𑁄𑀥𑀺𑀞𑀸𑀦𑀫𑁆𑀳𑀺 𑀲𑀸𑀮𑀸𑀬, 𑀤𑀺𑀯𑀸𑀞𑀸𑀢𑀺 𑀲𑀥𑀸𑀢𑀼𑀓𑁄.

𑁪𑁧. 𑀯𑀢𑁆𑀣𑀼𑀲𑁆𑀲 𑀢𑀲𑁆𑀲𑁄’𑀧𑀭𑀺𑀢𑁄, 𑀣𑀽𑀧𑀁 𑀣𑁂𑀭𑀫𑀢𑀸𑀦𑀼 𑀕𑁄;

𑀚𑀗𑁆𑀖𑀸𑀫𑀢𑁆𑀢𑀁 𑀘𑀺𑀢𑀸𑀧𑁂𑀢𑁆𑀯𑀸, 𑀓𑀢𑀺𑀧𑀸𑀳𑁂𑀦 𑀪𑀽𑀧𑀢𑀺.

𑁪𑁨. 𑀢𑀢𑁆𑀣 𑀥𑀸𑀢𑀼𑀧𑀢𑀺𑀝𑁆𑀞𑀸𑀦𑀁, 𑀖𑁄𑀲𑀸𑀧𑁂𑀢𑁆𑀯𑀸 𑀉𑀧𑀸𑀕𑀫𑀺;

𑀢𑀢𑁄 𑀢𑀢𑁄 𑀲𑀫𑀦𑁆𑀢𑁄 𑀘, 𑀲𑀫𑀸𑀕𑀫𑀺 𑀫𑀳𑀸𑀚𑀦𑁄.

𑁪𑁩. 𑀢𑀲𑁆𑀫𑀺𑀁 𑀲𑀫𑀸𑀕𑀫𑁂 𑀥𑀸𑀢𑀼, 𑀳𑀢𑁆𑀣𑀺𑀓𑁆𑀔𑀦𑁆𑀥𑀸 𑀦𑀕𑀸𑀕𑁆𑀕𑀢𑀸;

𑀲𑀢𑁆𑀢𑀢𑀸𑀮𑀧𑁆𑀧𑀫𑀸𑀡𑀫𑁆𑀳𑀺, 𑀤𑀺𑀲𑁆𑀲𑀦𑁆𑀢𑀺 𑀦𑀪𑀲𑀺𑀝𑁆𑀞𑀺𑀢𑀸.

𑁪𑁪. 𑀯𑀺𑀫𑁆𑀳𑀸𑀧𑀬𑀦𑁆𑀢𑀺 𑀚𑀦𑀢𑀁, 𑀬𑀫𑀓𑀁 𑀧𑀸𑀝𑀺𑀳𑀸𑀭𑀺𑀬𑀁;

𑀓𑀡𑁆𑀡𑀫𑁆𑀩𑀫𑀽𑀮𑁂 𑀩𑀼𑀤𑁆𑀥𑁄’𑀯, 𑀅𑀓𑀭𑀺 𑀮𑁄𑀫𑀳𑀁𑀲𑀦𑀁.

𑁪𑁫. 𑀢𑀢𑁄 𑀦𑀺𑀓𑁆𑀔𑀦𑁆𑀢𑀚𑀸𑀮𑀸𑀳𑀺, 𑀚𑀮𑀥𑀸𑀭𑀸𑀳𑀺 𑀘𑀸’𑀲𑀓𑀺𑀁;

𑀅𑀬𑀁 𑀑𑀪𑀸𑀲𑀺𑀢𑀸’𑀲𑀺𑀢𑁆𑀢𑀸, 𑀲𑀩𑁆𑀩𑀸𑀮𑀁𑀓𑀸𑀫𑀳𑀻 𑀫𑀳𑀼.

𑁪𑁬. 𑀧𑀭𑀺𑀦𑀺𑀩𑁆𑀩𑀸𑀦𑀫𑀜𑁆𑀘𑀫𑁆𑀳𑀺, 𑀦𑀺𑀧𑀦𑁆𑀦𑁂𑀦 𑀚𑀺𑀦𑁂𑀦 𑀳𑀺;

𑀓𑀢𑀁 𑀫𑀳𑀸𑀅𑀥𑀺𑀝𑁆𑀞𑀸𑀦-𑀧𑀜𑁆𑀘𑀓𑀁 𑀧𑀜𑁆𑀘𑀘𑀓𑁆𑀔𑀼𑀦𑀸.

𑁪𑁭. 𑀕𑀬𑁆𑀳𑀫𑀸𑀦𑀸 𑀫𑀳𑀸𑀩𑁄𑀥𑀺 𑀲𑀸𑀔𑀸𑀲𑁄𑀓𑁂𑀦 𑀤𑀓𑁆𑀔𑀺𑀡𑀸;

𑀙𑀺𑀚𑁆𑀚𑀺𑀢𑁆𑀯𑀸𑀦 𑀲𑀬𑀁𑀬𑁂𑀯, 𑀧𑀢𑀺𑀝𑁆𑀞𑀸𑀢𑀼 𑀓𑀝𑀸𑀳𑀓𑁂.

𑁪𑁮. 𑀧𑀢𑀺𑀝𑁆𑀞𑀳𑀺𑀢𑁆𑀯𑀸 𑀲𑀸 𑀲𑀸𑀔𑀸, 𑀙𑀩𑁆𑀩𑀡𑁆𑀡𑀭𑀲𑁆𑀫𑀺𑀬𑁄 𑀲𑀼𑀪𑀸;

𑀭𑀜𑁆𑀚𑀬𑀦𑁆𑀢𑀻 𑀤𑀺𑀲𑀸 𑀲𑀩𑁆𑀩𑀸, 𑀨𑀮𑀧𑀢𑁆𑀢𑁂𑀳𑀺 𑀫𑀼𑀘𑁆𑀘𑀢𑀼.

𑁪𑁯. 𑀲𑀲𑀼𑀯𑀡𑁆𑀡𑀓𑀝𑀸𑀳𑀸 𑀲𑀸, 𑀉𑀕𑁆𑀕𑀦𑁆𑀢𑁆𑀯𑀸𑀦 𑀫𑀦𑁄𑀭𑀫𑀸;

𑀅𑀤𑀺𑀲𑁆𑀲𑀫𑀸𑀦𑀸 𑀲𑀢𑁆𑀢𑀸𑀳𑀁, 𑀳𑀺𑀫𑀕𑀩𑁆𑀪𑀫𑁆𑀳𑀺 𑀢𑀺𑀝𑁆𑀞𑀢𑀼.

𑁫𑁦. 𑀣𑀽𑀧𑀸𑀭𑀸𑀫𑁂 𑀧𑀢𑀺𑀝𑁆𑀞𑀦𑁆𑀢𑀁, 𑀫𑀫 𑀤𑀓𑁆𑀔𑀺𑀡𑀅𑀓𑁆𑀔𑀓𑀁;

𑀓𑀭𑁄𑀢𑀼 𑀦𑀪𑀫𑀼𑀕𑁆𑀕𑀦𑁆𑀢𑁆𑀯𑀸, 𑀬𑀫𑀬𑀁 𑀧𑀸𑀝𑀺𑀳𑀸𑀭𑀺𑀬𑀁.

𑁫𑁧. 𑀮𑀗𑁆𑀓𑀸 𑀮𑀗𑁆𑀓𑀸𑀭𑀪𑀽𑀢𑀫𑁆𑀳𑀺, 𑀳𑁂𑀫𑀫𑀸𑀮𑀺𑀓𑀘𑁂𑀢𑀺𑀬𑁂;

𑀧𑀢𑀺𑀝𑁆𑀞𑀳𑀦𑁆𑀢𑀺𑀬𑁄 𑀥𑀸𑀢𑀼, 𑀤𑁄𑀡𑀫𑀢𑁆𑀢𑀸 𑀧𑀫𑀸𑀡𑀢𑁄.

𑁫𑁨. 𑀩𑀼𑀤𑁆𑀥𑀯𑁂𑀲𑀥𑀭𑀸 𑀳𑀼𑀢𑁆𑀯𑀸, 𑀉𑀕𑁆𑀕𑀦𑁆𑀢𑁆𑀯𑀸 𑀦𑀪𑀲𑀺𑀝𑁆𑀞𑀺𑀢𑀸;

𑀧𑀢𑀺𑀝𑁆𑀞𑀁 𑀢𑀼 𑀓𑀭𑀺𑀢𑁆𑀯𑀸𑀦, 𑀬𑀫𑀓𑀁 𑀧𑀸𑀝𑀺𑀳𑀸𑀭𑀺𑀬𑀁.

𑁫𑁩. 𑀅𑀥𑀺𑀝𑁆𑀞𑀸𑀦𑀸𑀦𑀺 𑀧𑀜𑁆𑀘𑁂’𑀯, 𑀅𑀥𑀺𑀝𑁆𑀞𑀸𑀲𑀺 𑀢𑀣𑀸𑀕𑀢𑁄;

𑀅𑀓𑀸𑀲𑀺 𑀢𑀲𑁆𑀫𑀸 𑀲𑀸 𑀥𑀸𑀢𑀼, 𑀢𑀤𑀸 𑀢𑀁 𑀧𑀸𑀝𑀺𑀳𑀸𑀭𑀺𑀬𑀁.

𑁫𑁪. 𑀆𑀓𑀸𑀲𑀸 𑀑𑀢𑀭𑀺𑀢𑁆𑀯𑀸 𑀲𑀸, 𑀅𑀝𑁆𑀞𑀸𑀪𑀽𑀧𑀲𑁆𑀲 𑀫𑀼𑀤𑁆𑀥𑀦𑀺;

𑀅𑀢𑀻𑀯𑀳𑀝𑁆𑀞𑁄 𑀢𑀁 𑀭𑀸𑀚𑀸, 𑀧𑀢𑀺𑀝𑁆𑀞𑀸𑀧𑁂𑀲𑀺 𑀘𑁂𑀢𑀺𑀬𑁂.

𑁫𑁫. 𑀧𑀢𑀺𑀝𑁆𑀞𑀺𑀢𑀸𑀬 𑀢𑀲𑁆𑀲𑀸 𑀘, 𑀥𑀸𑀢𑀼𑀬𑀸 𑀘𑁂𑀢𑀺𑀬𑁂 𑀢𑀤𑀸;

𑀅𑀳𑀼 𑀫𑀳𑀸𑀪𑀽𑀫𑀺𑀘𑀸𑀮𑁄, 𑀅𑀩𑁆𑀪𑀼𑀢𑁄 𑀮𑁄𑀫𑀳𑀁𑀲𑀦𑁄.

𑁫𑁬. 𑀏𑀯𑀁 𑀅𑀘𑀺𑀦𑁆𑀢𑀺𑀬𑀸 𑀩𑀼𑀤𑁆𑀥𑀸, 𑀩𑀼𑀤𑁆𑀥𑀥𑀫𑁆𑀫𑀸 𑀅𑀘𑀺𑀦𑁆𑀢𑀺𑀬𑀸;

𑀅𑀘𑀺𑀦𑁆𑀢𑀺𑀬𑁂 𑀧𑀲𑀦𑁆𑀦𑀸𑀦𑀁, 𑀯𑀺𑀧𑀸𑀓𑁄 𑀳𑁄𑀢𑀺 𑀅𑀘𑀺𑀦𑁆𑀢𑀺𑀬𑁄.

𑁫𑁭. 𑀢𑀁 𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸, 𑀧𑀲𑀻𑀤𑀺𑀁𑀲𑀼 𑀚𑀦𑁂 𑀚𑀦𑀸;

𑀫𑀢𑁆𑀢𑀸𑀪𑀬𑁄 𑀭𑀸𑀚𑀧𑀼𑀢𑁆𑀢𑁄, 𑀓𑀦𑀺𑀝𑁆𑀞𑁄 𑀭𑀸𑀚𑀺𑀦𑁄 𑀧𑀦.

𑁫𑁮. 𑀫𑀼𑀦𑀺𑀲𑁆𑀲𑀭𑁂 𑀧𑀲𑀻𑀤𑀺𑀢𑁆𑀯𑀸, 𑀬𑀸𑀘𑀺𑀢𑁆𑀯𑀸𑀦 𑀦𑀭𑀺𑀲𑁆𑀲𑀭𑀁;

𑀧𑀼𑀭𑀺𑀲𑀸𑀦𑀁 𑀲𑀳𑀲𑁆𑀲𑁂𑀦, 𑀲𑀳 𑀧𑀩𑁆𑀩𑀚𑀺𑀲𑀸𑀲𑀦𑁂.

𑁫𑁯. 𑀘𑁂𑀢𑀸𑀭𑀺𑀕𑀸𑀫𑀢𑁄 𑀘𑀸𑀧𑀺, 𑀤𑁆𑀯𑀸𑀭𑀫𑀡𑁆𑀟𑀮𑀢𑁄𑀧𑀺 𑀘;

𑀯𑀺𑀳𑀻𑀭𑀩𑀻𑀚𑀢𑁄 𑀘𑀸𑀧𑀺, 𑀢𑀣𑀸 𑀕𑀮𑁆𑀮𑀓𑀧𑀺𑀝𑁆𑀞𑀺𑀢𑁄.

𑁬𑁦. 𑀢𑀣𑁄’𑀧𑀢𑀺𑀲𑁆𑀲𑀕𑀸𑀫𑀸 𑀘, 𑀧𑀜𑁆𑀘 𑀧𑀜𑁆𑀘 𑀲𑀢𑀸𑀦𑀺 𑀘;

𑀧𑀩𑁆𑀩𑀚𑀼𑀁 𑀤𑀸𑀭𑀓𑀸 𑀳𑀝𑁆𑀞𑀸, 𑀚𑀸𑀢𑀲𑀤𑁆𑀥𑀸 𑀢𑀣𑀸𑀕𑀢𑁂.

𑁬𑁧. 𑀏𑀯𑀁 𑀧𑀼𑀭𑀸 𑀩𑀸𑀳𑀺𑀭𑀸 𑀘, 𑀲𑀩𑁆𑀩𑁂 𑀧𑀩𑁆𑀩𑀚𑀺𑀢𑀸 𑀢𑀤𑀸;

𑀢𑀺𑀁𑀲 𑀪𑀺𑀓𑁆𑀔𑀼𑀲𑀳𑀲𑁆𑀲𑀸𑀦𑀺, 𑀅𑀳𑁂𑀲𑀼𑀁 𑀚𑀺𑀦𑀲𑀸𑀲𑀦𑁂.

𑁬𑁨. 𑀣𑀽𑀧𑀸𑀭𑀸𑀫𑁂 𑀣𑀽𑀧𑀯𑀭𑀁, 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀫𑀳𑀻𑀧𑀢𑀺;

𑀭𑀢𑀦𑀸𑀤𑀻𑀳𑀺’𑀦𑁂𑀓𑁂𑀳𑀺, 𑀲𑀤𑀸 𑀧𑀽𑀚𑀫𑀓𑀸𑀭𑀬𑀺.

𑁬𑁩. 𑀭𑀸𑀚𑁄𑀭𑁄𑀥𑀸 𑀔𑀢𑁆𑀢𑀺𑀬𑀸 𑀘, 𑀅𑀫𑀘𑁆𑀘𑀸 𑀦𑀸𑀕𑀭𑀸 𑀢𑀣𑀸;

𑀲𑀩𑁆𑀩𑁂 𑀚𑀦𑀧𑀤𑀸 𑀘𑁂𑀯, 𑀧𑀼𑀚𑀸’𑀓𑀁𑀲𑀼 𑀯𑀺𑀲𑀼𑀁 𑀯𑀺𑀲𑀼𑀁.

𑁬𑁪. 𑀣𑀽𑀧𑀧𑀼𑀩𑁆𑀩𑀗𑁆𑀕𑀫𑀁 𑀭𑀸𑀚𑀸, 𑀯𑀺𑀳𑀸𑀭𑀁 𑀢𑀢𑁆𑀣 𑀓𑀸𑀭𑀬𑀺;

𑀣𑀽𑀧𑀸𑀭𑀸𑀫𑁄𑀢𑀺 𑀢𑁂𑀦𑁂’𑀲, 𑀯𑀺𑀳𑀸𑀭𑁄 𑀯𑀺𑀲𑁆𑀲𑀼𑀢𑁄 𑀅𑀳𑀼.

𑁬𑁫. 𑀲𑀓𑀥𑀸𑀢𑀼𑀲𑀭𑀻𑀭𑀓𑁂𑀦 𑀘𑁂’𑀯𑀁,

𑀧𑀭𑀺𑀦𑀺𑀩𑁆𑀩𑀸𑀦𑀕𑀢𑁄𑀧𑀺 𑀮𑁄𑀓𑀦𑀸𑀣𑁄;

𑀚𑀦𑀓𑀸𑀬𑀳𑀺𑀢𑀁 𑀲𑀼𑀔𑀜𑁆𑀘 𑀲𑀫𑁆𑀫𑀸,

𑀩𑀳𑀼𑀥𑀸’𑀓𑀸𑀲𑀺 𑀞𑀺𑀢𑁂 𑀚𑀺𑀦𑁂 𑀓𑀣𑀸𑀯𑀓𑀸𑀢𑀺.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀥𑀸𑀢𑀼𑀅𑀕𑀫𑀦𑁄 𑀦𑀸𑀫

𑀲𑀢𑁆𑀢𑀭𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.