𑀅𑀝𑁆𑀞𑀸𑀭𑀲𑀫 𑀧𑀭𑀺𑀘𑁆𑀙𑁂𑀤

𑀫𑀳𑀸𑀩𑁄𑀥𑀺𑀕𑁆𑀕𑀳𑀡𑁄

𑁧. 𑀫𑀳𑀸𑀩𑁄𑀥𑀺𑀜𑁆𑀘 𑀣𑁂𑀭𑀺𑀜𑁆𑀘, 𑀆𑀡𑀸𑀧𑁂𑀢𑀼𑀁 𑀫𑀳𑀻𑀧𑀢𑀺;

𑀣𑁂𑀭𑁂𑀦 𑀯𑀼𑀢𑁆𑀢𑀯𑀘𑀦𑀁, 𑀲𑀭𑀫𑀸𑀦𑁄 𑀲𑀓𑁂 𑀖𑀭𑁂.

𑁨. 𑀅𑀦𑁆𑀢𑁄𑀯𑀲𑁆𑀲𑁂’𑀓 𑀤𑀺𑀯𑀲𑀁, 𑀦𑀺𑀲𑀺𑀦𑁆𑀦𑁄 𑀣𑁂𑀭𑀲𑀦𑁆𑀢𑀺𑀓𑁂;

𑀲𑀳𑀸’𑀫𑀘𑁆𑀘𑁂𑀳𑀺 𑀫𑀦𑁆𑀢𑁂𑀢𑁆𑀯𑀸, 𑀪𑀸𑀕𑀺𑀦𑁂𑀬𑁆𑀬𑀁 𑀲𑀬𑀁 𑀲𑀓𑀁.

𑁩. 𑀅𑀭𑀺𑀝𑁆𑀞𑀦𑀸𑀫𑀓𑀸’𑀫𑀘𑁆𑀘𑀁, 𑀢𑀲𑁆𑀫𑀺𑀁 𑀓𑀫𑁆𑀫𑁂 𑀦𑀺𑀬𑁄𑀚𑀺𑀢𑀼𑀁;

𑀫𑀦𑁆𑀢𑁆𑀯𑀸 𑀆𑀫𑀦𑁆𑀢𑀬𑀺𑀢𑁆𑀯𑀸𑀦, 𑀇𑀤𑀁 𑀯𑀘𑀦𑀫𑀩𑁆𑀭𑀯𑀺.

𑁪. 𑀢𑀸 𑀲𑀓𑁆𑀔𑀺𑀲𑁆𑀲𑀲𑀺…, 𑀥𑀫𑁆𑀫𑀸𑀲𑁄𑀓𑀲𑁆𑀲 𑀲𑀦𑁆𑀢𑀺𑀓𑀸;

𑀫𑀳𑀸𑀩𑁄𑀥𑀺𑀁 𑀲𑀗𑁆𑀖𑀫𑀺𑀢𑁆𑀢𑀁, 𑀣𑁂𑀭𑀺𑀁 𑀆𑀦𑀬𑀺𑀢𑀼𑀁 𑀇𑀥.

𑁫. 𑀲𑀓𑁆𑀔𑀺𑀲𑁆𑀲𑀸𑀫𑀺 𑀅𑀳𑀁 𑀤𑁂𑀯, 𑀆𑀦𑁂𑀢𑀼𑀁 𑀢𑀁 𑀤𑀼𑀯𑁂 𑀢𑀢𑁄;

𑀇𑀥𑀸’𑀕𑀢𑁄 𑀧𑀩𑁆𑀩𑀚𑀺𑀢𑀼𑀁, 𑀲𑀘𑁂 𑀮𑀘𑁆𑀙𑀸𑀫𑀺 𑀫𑀸𑀦𑀤.

𑁬. 𑀏𑀯𑀁 𑀳𑁄𑀢𑀽𑀢𑀺 𑀯𑀢𑁆𑀯𑀸𑀦, 𑀭𑀸𑀚𑀸 𑀢𑀁 𑀢𑀢𑁆𑀣 𑀧𑁂𑀲𑀬𑀺;

𑀲𑁄 𑀣𑁂𑀭𑀲𑁆𑀲 𑀘 𑀭𑀜𑁆𑀜𑁄 𑀘, 𑀲𑀸𑀲𑀦𑀁 𑀕𑀬𑁆𑀳 𑀯𑀦𑁆𑀤𑀺𑀬.

𑁭. 𑀅𑀲𑁆𑀲𑀬𑀼𑀚𑀲𑀼𑀓𑁆𑀓𑀧𑀓𑁆𑀔𑁂, 𑀦𑀺𑀓𑁆𑀔𑀦𑁆𑀢𑁄 𑀤𑀼𑀢𑀺𑀬𑁂’𑀳𑀦𑀺;

𑀲𑀸𑀦𑀼𑀬𑀼𑀢𑁆𑀢𑁄 𑀚𑀫𑁆𑀩𑀼𑀓𑁄𑀮𑁂, 𑀦𑀸𑀯𑀫𑀸𑀭𑀼𑀬𑁆𑀳 𑀧𑀝𑁆𑀝𑀦𑁂.

𑁮. 𑀫𑀳𑁄𑀤𑀫𑀺𑀁 𑀓𑀭𑀺𑀢𑁆𑀯𑀸𑀦, 𑀣𑁂𑀭𑀸𑀥𑀺𑀝𑁆𑀞𑀸𑀦𑀬𑁄𑀕𑀢𑁄;

𑀦𑀺𑀓𑁆𑀔𑀦𑁆𑀢𑀤𑀺𑀯𑀲𑁂𑀬𑁂𑀯, 𑀭𑀫𑁆𑀫𑀁 𑀧𑀼𑀧𑁆𑀨𑀧𑀼𑀭𑀁 𑀅𑀕𑀸.

𑁯. 𑀢𑀤𑀸 𑀢𑀼 𑀅𑀦𑀼𑀮𑀸𑀤𑁂𑀯𑀻, 𑀧𑀜𑁆𑀘𑀓𑀜𑁆𑀜𑀸𑀲𑀢𑁂𑀳𑀺 𑀘;

𑀅𑀦𑁆𑀢𑁂𑀧𑀼𑀭𑀺𑀓𑀇𑀢𑁆𑀣𑀻𑀦𑀁, 𑀲𑀤𑁆𑀥𑀺𑀁 𑀧𑀜𑁆𑀘𑀲𑀢𑁂𑀳𑀺 𑀘.

𑁧𑁦. 𑀤𑀲𑀲𑀻𑀮𑀁 𑀲𑀫𑀸𑀤𑀸𑀬, 𑀓𑀸𑀲𑀸𑀬 𑀯𑀲𑀦𑀸 𑀲𑀼𑀘𑀺;

𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑀺 𑀦𑀺𑀲𑁂𑀔𑀸, 𑀧𑁂𑀓𑁆𑀔𑀦𑁆𑀢𑀺 𑀣𑁂𑀭𑀺𑀬𑀸’𑀕𑀫𑀁.

𑁧𑁧. 𑀦𑀕𑀭𑀲𑁆𑀲𑁂’𑀓𑀤𑁂𑀲𑀫𑁆𑀳𑀺, 𑀭𑀫𑁆𑀫𑁂 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑁂;

𑀓𑀸𑀭𑀸𑀧𑀺𑀢𑁂 𑀦𑀭𑀺𑀦𑁆𑀤𑁂𑀦, 𑀯𑀸𑀲𑀁 𑀓𑀧𑁆𑀧𑁂𑀲𑀺 𑀲𑀼𑀩𑁆𑀩𑀢𑀸.

𑁧𑁨. 𑀉𑀧𑀸𑀲𑀺𑀓𑀸𑀳𑀺 𑀢𑀸𑀳𑁂’𑀲, 𑀯𑀼𑀢𑁆𑀢𑁄 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑁄;

𑀉𑀧𑀸𑀲𑀺𑀓𑀸 𑀯𑀺𑀳𑀸𑀭𑁄𑀢𑀺, 𑀢𑁂𑀦 𑀮𑀁𑀓𑀸𑀬 𑀯𑀺𑀲𑁆𑀲𑀼𑀢𑁄.

𑁧𑁩. 𑀪𑀸𑀕𑀺𑀦𑁂𑀬𑁆𑀬𑁄 𑀫𑀳𑀸’𑀭𑀺𑀝𑁆𑀞𑁄, 𑀥𑀫𑁆𑀫𑀸𑀲𑁄𑀓𑀲𑁆𑀲 𑀭𑀸𑀚𑀺𑀦𑁄;

𑀅𑀧𑁆𑀧𑁂𑀢𑁆𑀯𑀸 𑀭𑀸𑀚𑀲𑀦𑁆𑀤𑁂𑀲𑀁, 𑀣𑁂𑀭𑀲𑀦𑁆𑀤𑁂𑀲’𑀫𑀩𑁆𑀭𑀯𑀺.

𑁧𑁪. 𑀪𑀸𑀢𑀼𑀚𑀬𑀸 𑀲𑀳𑀸𑀬𑀲𑁆𑀲, 𑀭𑀜𑁆𑀜𑁄 𑀢𑁂 𑀭𑀸𑀚𑀓𑀼𑀜𑁆𑀚𑀭;

𑀆𑀓𑀗𑁆𑀔𑀫𑀸𑀦𑀸 𑀧𑀩𑁆𑀩𑀚𑁆𑀚𑀁, 𑀦𑀺𑀘𑁆𑀘𑀁 𑀯𑀲𑀢𑀺 𑀲𑀜𑁆𑀜𑀢𑀸.

𑁧𑁫. 𑀲𑀗𑁆𑀖𑀫𑀺𑀢𑁆𑀢𑀁 𑀪𑀺𑀓𑁆𑀔𑀼𑀦𑀺𑀁 𑀢𑀁, 𑀧𑀩𑁆𑀩𑀸𑀚𑁂𑀢𑀼𑀁 𑀯𑀺𑀲𑀚𑁆𑀚𑀬;

𑀢𑀸𑀬 𑀲𑀤𑁆𑀥𑀺𑀁 𑀫𑀳𑀸𑀩𑁄𑀥𑀺-𑀤𑀓𑁆𑀔𑀺𑀡𑀲𑀸𑀔𑀫𑁂𑀯 𑀘.

𑁧𑁬. 𑀣𑁂𑀭𑀺𑀬𑀸 𑀘 𑀢𑀫𑁂𑀯𑀢𑁆𑀣𑀁, 𑀅𑀩𑁆𑀭𑀯𑀺 𑀣𑁂𑀭𑀪𑀸𑀲𑀺𑀢𑀁;

𑀕𑀦𑁆𑀢𑁆𑀯𑀸 𑀧𑀺𑀢𑀼𑀲𑀫𑀻𑀧𑀁 𑀲𑀸, 𑀣𑁂𑀭𑀻 𑀣𑁂𑀭𑀫𑀢𑀁 𑀩𑁆𑀭𑀯𑀻.

𑁧𑁭. 𑀆𑀳 𑀭𑀸𑀚𑀸 𑀢𑀼𑀯𑀁 𑀅𑀫𑁆𑀫, 𑀅𑀧𑀲𑁆𑀲𑀦𑁆𑀢𑁄 𑀓𑀣𑀁 𑀅𑀳𑀁;

𑀲𑁄𑀓𑀁 𑀯𑀺𑀦𑁄𑀤𑀬𑀺𑀲𑁆𑀲𑀸𑀫𑀺, 𑀧𑀼𑀢𑁆𑀢𑀦𑀢𑁆𑀢𑀯𑀺𑀬𑁄𑀕𑀚𑀁.

𑁧𑁮. 𑀆𑀳 𑀲𑀸 𑀫𑁂 𑀫𑀳𑀸𑀭𑀸𑀚, 𑀪𑀸𑀢𑀼𑀦𑁄 𑀯𑀘𑀦𑀁 𑀕𑀭𑀼;

𑀧𑀩𑁆𑀩𑀸𑀚𑀦𑀻𑀬𑀸 𑀘 𑀩𑀳𑀽, 𑀕𑀦𑁆𑀢𑀩𑁆𑀩𑀁 𑀢𑀢𑁆𑀣 𑀢𑁂𑀦 𑀫𑁂.

𑁧𑁯. ‘‘𑀲𑀢𑁆𑀣𑀖𑀸𑀢𑀫𑀦𑀸𑀭𑀳𑀸, 𑀫𑀳𑀸𑀩𑁄𑀥𑀺𑀫𑀳𑀻𑀭𑀼𑀳𑀸;

𑀓𑀣𑀦𑁆𑀦𑀼 𑀲𑀸𑀔𑀁 𑀕𑀡𑀺𑀲𑁆𑀲𑀁’’, 𑀇𑀢𑀺 𑀭𑀸𑀚𑀸 𑀯𑀺𑀘𑀺𑀦𑁆𑀢𑀬𑀻.

𑁨𑁦. 𑀅𑀫𑀘𑁆𑀘𑀲𑁆𑀲 𑀫𑀳𑀸𑀤𑁂𑀯-𑀦𑀸𑀫𑀓𑀲𑁆𑀲 𑀫𑀢𑁂𑀦 𑀲𑁄;

𑀪𑀺𑀓𑁆𑀔𑀼𑀲𑀗𑁆𑀖𑀁 𑀦𑀺𑀫𑀦𑁆𑀢𑁂𑀢𑁆𑀯𑀸, 𑀪𑁄𑀚𑁂𑀢𑁆𑀯𑀸 𑀧𑀼𑀘𑁆𑀙𑀺 𑀪𑀽𑀧𑀢𑀺𑀁.

𑁨𑁧. 𑀪𑀦𑁆𑀢𑁂 𑀮𑀁𑀓𑀁 𑀫𑀳𑀸𑀩𑁄𑀥𑀺, 𑀧𑁂𑀲𑁂𑀢𑀩𑁆𑀩𑀸 𑀦𑀼 𑀔𑁄 𑀇𑀢𑀺;

𑀣𑁂𑀭𑁄 𑀫𑁄𑀕𑁆𑀕𑀮𑀺𑀧𑀼𑀢𑁆𑀢𑁄 𑀲𑁄, 𑀧𑁂𑀲𑁂𑀢𑀩𑁆𑀩𑀸𑀢𑀺 𑀪𑀸𑀲𑀺𑀬.

𑁨𑁨. 𑀓𑀢𑀁 𑀫𑀳𑀸𑀅𑀥𑀺𑀝𑁆𑀞𑀸𑀦-𑀧𑀜𑁆𑀘𑀓𑀁 𑀧𑀜𑁆𑀘𑀘𑀓𑁆𑀔𑀼𑀦𑀸;

𑀆𑀪𑀸𑀲𑀺 𑀭𑀜𑁆𑀜𑁄 𑀢𑀁 𑀲𑀼𑀢𑁆𑀯𑀸, 𑀢𑀼𑀲𑁆𑀲𑀺𑀢𑁆𑀯𑀸 𑀥𑀭𑀡𑀻𑀧𑀢𑀺.

𑁨𑁩. 𑀲𑀢𑁆𑀢𑀬𑁄𑀚𑀦𑀺𑀓𑀁 𑀫𑀕𑁆𑀕𑀁, 𑀲𑁄 𑀫𑀳𑀸𑀩𑁄𑀥𑀺𑀕𑀸𑀫𑀺𑀦𑀁;

𑀲𑁄𑀥𑀸𑀧𑁂𑀢𑁆𑀯𑀸𑀦 𑀲𑀓𑁆𑀓𑀘𑁆𑀘𑀁, 𑀪𑀽𑀲𑀸𑀧𑁂𑀢𑀺 𑀅𑀦𑁂𑀓𑀥𑀸.

𑁨𑁪. 𑀲𑀼𑀯𑀡𑁆𑀡𑀁 𑀦𑀻𑀳𑀭𑀸𑀧𑁂𑀲𑀺, 𑀓𑀝𑀸𑀳𑀓𑀭𑀡𑀸𑀬 𑀘;

𑀯𑀺𑀲𑁆𑀲𑀓𑀫𑁆𑀫𑁄 𑀘 𑀆𑀕𑀦𑁆𑀢𑁆𑀯𑀸, 𑀲𑀢𑀼𑀮𑀸𑀥𑀸𑀭𑀭𑀽𑀧𑀯𑀸.

𑁨𑁫. ‘‘𑀓𑀝𑀸𑀳𑀁 𑀓𑀺𑀁 𑀧𑀫𑀸𑀡𑀁 𑀦𑀼, 𑀓𑀭𑁄𑀫𑀻’𑀢𑀺 𑀅𑀧𑀼𑀘𑁆𑀙𑀺𑀢𑀁;

‘‘𑀜𑀢𑁆𑀯𑀸 𑀧𑀫𑀸𑀡𑀁 𑀢𑁆𑀯𑀁𑀬𑁂𑀯, 𑀓𑀭𑁄𑀳𑀺’’ 𑀇𑀢𑀺 𑀪𑀸𑀲𑀺𑀬.

𑁨𑁬. 𑀲𑀼𑀯𑀡𑁆𑀡𑀸 𑀕𑀳𑁂𑀢𑁆𑀯𑀸𑀦, 𑀳𑀢𑁆𑀣𑁂𑀦 𑀧𑀭𑀺𑀫𑀚𑁆𑀚𑀺𑀬;

𑀓𑀝𑀸𑀳𑀁 𑀢𑀗𑁆𑀔𑀡𑀁𑀬𑁂𑀯, 𑀦𑀺𑀫𑁆𑀫𑀺𑀦𑀺𑀢𑁆𑀯𑀸𑀦 𑀧𑀓𑁆𑀓𑀫𑀺.

𑁨𑁭. 𑀦𑀯𑀳𑀢𑁆𑀣𑀧𑀭𑀺𑀓𑁆𑀔𑁂𑀧𑀁, 𑀧𑀜𑁆𑀘𑀳𑀢𑁆𑀣𑀁 𑀕𑀪𑀻𑀭𑀢𑁄;

𑀢𑀺𑀳𑀢𑁆𑀣𑀯𑀺𑀓𑁆𑀔𑀫𑁆𑀪𑀬𑀼𑀢𑀁, 𑀅𑀝𑁆𑀞𑀗𑁆𑀕𑀼𑀮𑀖𑀦𑀁 𑀲𑀼𑀪𑀁.

𑁨𑁮. 𑀬𑀼𑀯𑀲𑁆𑀲 𑀳𑀢𑁆𑀣𑀺𑀦𑁄 𑀲𑁄𑀡𑁆𑀟-𑀧𑀫𑀸𑀡𑀫𑀼𑀔𑀯𑀝𑁆𑀝𑀺𑀓𑀁;

𑀕𑀸𑀳𑀸 𑀧𑁂𑀢𑁆𑀯𑀸𑀦 𑀢𑀁 𑀭𑀸𑀚𑀸, 𑀩𑀸𑀮𑀲𑀼𑀭𑀲𑀫𑀧𑁆𑀧𑀓𑀁.

𑁨𑁯. 𑀲𑀢𑁆𑀢𑀬𑁄𑀚𑀦𑀤𑀻𑀖𑀸𑀬, 𑀯𑀺𑀢𑁆𑀣𑀢𑀸𑀬𑀢𑀺 𑀬𑁄𑀚𑀦𑀁;

𑀲𑁂𑀦𑀸𑀬 𑀘𑀢𑀼𑀭𑀗𑁆𑀕𑀺𑀦𑁆𑀬𑀸, 𑀫𑀳𑀸𑀪𑀺𑀓𑁆𑀔𑀼𑀕𑀡𑁂𑀦 𑀘.

𑁩𑁦. 𑀉𑀧𑀕𑀫𑁆𑀫 𑀫𑀳𑀸𑀩𑁄𑀥𑀺𑀁, 𑀦𑀸𑀦𑀸𑀮𑀗𑁆𑀓𑀸𑀭𑀪𑀽𑀲𑀺𑀢𑀁;

𑀦𑀸𑀦𑀸𑀭𑀢𑀦𑀘𑀺𑀢𑁆𑀢𑀁 𑀢𑀁, 𑀯𑀺𑀯𑀺𑀥𑀤𑁆𑀥𑀚𑀫𑀸𑀮𑀺𑀦𑀺𑀁.

𑁩𑁧. 𑀦𑀸𑀦𑀸𑀓𑀼𑀲𑀼𑀫𑀲𑀁𑀓𑀺𑀡𑁆𑀡𑀁, 𑀦𑀸𑀦𑀸𑀢𑀼𑀭𑀺𑀬𑀖𑁄𑀲𑀺𑀢𑀁;

𑀲𑁂𑀦𑀸𑀬 𑀧𑀭𑀺𑀯𑀸𑀭𑁂𑀢𑁆𑀯𑀸, 𑀧𑀭𑀺𑀓𑁆𑀔𑀺𑀧𑀺𑀬 𑀲𑀸𑀡𑀺𑀬𑀸.

𑁩𑁨. 𑀫𑀳𑀸𑀣𑁂𑀭𑀲𑀳𑀲𑁆𑀲𑁂𑀦, 𑀧𑀫𑀼𑀔𑁂𑀦 𑀫𑀳𑀸𑀕𑀡𑁂;

𑀭𑀜𑁆𑀜𑀁 𑀧𑀢𑁆𑀢𑀸𑀪𑀺𑀲𑁂𑀓𑀸𑀦𑀁, 𑀲𑀳𑀲𑁆𑀲𑁂𑀦𑀸’𑀥𑀺𑀓𑁂𑀦 𑀘.

𑁩𑁩. 𑀅𑀢𑁆𑀢𑀸𑀦𑀁 𑀧𑀭𑀺𑀯𑀸𑀭𑁂𑀢𑁆𑀯𑀸, 𑀫𑀳𑀸𑀩𑁄𑀥𑀺𑀜𑁆𑀘 𑀲𑀸𑀥𑀼𑀓𑀁;

𑀑𑀮𑁄𑀓𑁂𑀲𑀺 𑀫𑀳𑀸𑀩𑁄𑀥𑀺𑀁, 𑀧𑀕𑁆𑀕𑀳𑁂𑀢𑁆𑀯𑀸𑀦 𑀅𑀜𑁆𑀚𑀮𑀺𑀁.

𑁩𑁪. 𑀢𑀲𑁆𑀲𑀸 𑀤𑀓𑁆𑀔𑀺𑀡𑀲𑀸𑀔𑀸𑀬, 𑀘𑀢𑀼𑀳𑀢𑁆𑀣𑀧𑀫𑀸𑀡𑀓𑀁;

𑀞𑀸𑀦𑀁 𑀔𑀦𑁆𑀥𑀜𑁆𑀘 𑀯𑀚𑁆𑀚𑁂𑀢𑁆𑀯𑀸, 𑀲𑀸𑀔𑀸 𑀅𑀦𑁆𑀢𑀭𑀥𑀸𑀬𑀺𑀲𑀼𑀁.

𑁩𑁫. 𑀢𑀁 𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸, 𑀧𑀢𑀻𑀢𑁄 𑀧𑀼𑀣𑀯𑀻𑀧𑀢𑀺;

‘‘𑀧𑀽𑀚𑁂𑀫’𑀳𑀁 𑀫𑀳𑀸𑀩𑁄𑀥𑀺𑀁, 𑀭𑀚𑁆𑀚𑁂𑀦𑀸’𑀳𑀺 𑀉𑀤𑀻𑀭𑀺𑀬.

𑁩𑁬. 𑀅𑀪𑀺𑀲𑀺𑀜𑁆𑀘𑀺 𑀫𑀳𑀸𑀩𑁄𑀥𑀻𑀁, 𑀫𑀳𑀸𑀭𑀚𑁆𑀚𑁂 𑀫𑀳𑀻𑀧𑀢𑀺;

𑀧𑀼𑀧𑁆𑀨𑀸𑀤𑀻𑀳𑀺 𑀫𑀳𑀸𑀩𑁄𑀥𑀺𑀁, 𑀧𑀽𑀚𑁂𑀢𑁆𑀯𑀸𑀦 𑀧𑀤𑀓𑁆𑀔𑀺𑀡𑀁.

𑁩𑁭. 𑀓𑀢𑁆𑀯𑀸 𑀅𑀝𑁆𑀞𑀲𑀼 𑀞𑀸𑀦𑁂𑀲𑀼, 𑀯𑀦𑁆𑀤𑀺𑀢𑁆𑀯𑀸𑀦 𑀓𑀢𑀜𑁆𑀚𑀮𑀻;

𑀲𑀼𑀯𑀡𑁆𑀡𑀔𑀘𑀺𑀢𑁂 𑀧𑀻𑀞𑁂, 𑀦𑀸𑀦𑀸𑀭𑀢𑀦𑀫𑀡𑁆𑀟𑀺𑀢𑁂.

𑁩𑁮. 𑀲𑁆𑀯𑀸𑀭𑁄𑀳𑁂 𑀬𑀸𑀯 𑀲𑀸𑀉𑀘𑁆𑀘𑁂, 𑀢𑀁 𑀲𑀼𑀯𑀡𑁆𑀡𑀓𑀝𑀸𑀳𑀓𑀁;

𑀞𑀧𑀸𑀧𑁂𑀢𑁆𑀯𑀸𑀦 𑀆𑀭𑀼𑀬𑁆𑀳, 𑀕𑀳𑁂𑀢𑀼𑀁 𑀲𑀸𑀔𑀫𑀼𑀢𑁆𑀢𑀫𑀁.

𑁩𑁯. 𑀆𑀤𑀺𑀬𑀺𑀢𑁆𑀯𑀸𑀦 𑀲𑁄𑀯𑀡𑁆𑀡 𑀢𑀼𑀮𑀺𑀓𑀸𑀬 𑀫𑀦𑁄𑀲𑀺𑀮𑀁;

𑀮𑁂𑀔𑀁 𑀤𑀢𑁆𑀯𑀸𑀦 𑀲𑀸𑀔𑀸𑀬, 𑀲𑀘𑁆𑀘𑀓𑁆𑀭𑀺𑀬𑀫𑀓𑀸 𑀇𑀢𑀺.

𑁪𑁦. ‘‘𑀮𑀁𑀓𑀸𑀤𑀻𑀧𑀁 𑀬𑀤𑀺 𑀇𑀢𑁄, 𑀕𑀦𑁆𑀢𑀩𑁆𑀩𑀁 𑀉𑀭𑀼𑀩𑁄𑀥𑀺𑀬𑀸;

𑀦𑀺𑀩𑁆𑀩𑁂𑀫𑀢𑀺𑀓𑁄 𑀩𑀼𑀤𑁆𑀥𑀲𑁆𑀲, 𑀲𑀸𑀲𑀦𑀫𑁆𑀳𑀺 𑀲𑀘𑁂 𑀅𑀳𑀁.

𑁪𑁧. 𑀲𑀬𑀁𑀬𑁂𑀯 𑀫𑀳𑀸𑀩𑁄𑀥𑀺-𑀲𑀸𑀔𑀸𑀬𑀁 𑀤𑀓𑁆𑀔𑀺𑀡𑀸 𑀲𑀼𑀪𑀸;

𑀙𑀺𑀚𑁆𑀚𑀺𑀢𑁆𑀯𑀸𑀦 𑀧𑀢𑀺𑀝𑁆𑀞𑀸𑀢𑀼, 𑀇𑀥 𑀳𑁂𑀫𑀓𑀝𑀸𑀳𑀓𑁂.

𑁪𑁨. 𑀮𑁂𑀔𑀞𑀸𑀦𑁂 𑀫𑀳𑀸𑀩𑁄𑀥𑀺, 𑀙𑀺𑀚𑁆𑀚𑀺𑀢𑁆𑀯𑀸 𑀲𑀬𑀫𑁂𑀯 𑀲𑀸;

𑀕𑀦𑁆𑀥𑀓𑀤𑁆𑀤𑀫𑀧𑀽𑀭𑀲𑁆𑀲, 𑀓𑀝𑀸𑀳𑀲𑁆𑀲𑁄’𑀧𑀭𑀺𑀝𑁆𑀞𑀺𑀢𑀸.

𑁪𑁩. 𑀫𑀽𑀮𑀮𑁂𑀔𑀸𑀬 𑀉𑀧𑀭𑀺, 𑀢𑀺𑀬𑀗𑁆𑀕𑀼𑀮𑀢𑀺𑀬𑀗𑁆𑀕𑀼𑀮𑁂;

𑀤𑀤𑀁 𑀫𑀦𑁄𑀲𑀺𑀮𑀸 𑀮𑁂𑀔𑀸, 𑀧𑀭𑀺𑀓𑁆𑀔𑀺𑀧𑀺 𑀦𑀭𑀺𑀲𑁆𑀲𑀭𑁄.

𑁪𑁪. 𑀆𑀤𑀺𑀬𑀸 𑀣𑀽𑀮𑀫𑀽𑀮𑀸𑀦𑀺, 𑀔𑀼𑀤𑁆𑀤𑀓𑀸𑀦𑀺’𑀢𑀭𑀸𑀳𑀺 𑀢𑀼;

𑀦𑀺𑀓𑁆𑀔𑀫𑀺𑀢𑁆𑀯𑀸 𑀤𑀲 𑀤𑀲, 𑀚𑀸𑀮𑀻𑀪𑀽𑀢𑀸 𑀦𑀺𑀑𑀢𑀭𑀼𑀁.

𑁪𑁫. 𑀢𑀁 𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸, 𑀭𑀸𑀚𑀸’𑀢𑀻𑀯 𑀧𑀫𑁄𑀤𑀺𑀢𑁄;

𑀢𑀢𑁆𑀣𑁂𑀯𑀸’𑀓𑀸𑀲𑀺 𑀉𑀓𑁆𑀓𑀼𑀝𑁆𑀞𑀺𑀁, 𑀲𑀫𑀦𑁆𑀢𑀸 𑀧𑀭𑀺𑀲𑀸𑀧𑀺 𑀘.

𑁪𑁬. 𑀪𑀺𑀓𑁆𑀔𑀼𑀲𑀗𑁆𑀖𑁄 𑀲𑀸𑀥𑀼𑀓𑀸𑀭𑀁, 𑀢𑀼𑀝𑁆𑀞𑀘𑀺𑀢𑁆𑀢𑁄 𑀧𑀫𑁄𑀤𑀬𑀺;

𑀘𑁂𑀮𑀼𑀓𑁆𑀔𑁂𑀧𑀲𑀳𑀲𑁆𑀲𑀸𑀦𑀺, 𑀧𑀯𑀢𑁆𑀢𑀺𑀁𑀲𑀼 𑀲𑀫𑀦𑁆𑀢𑀢𑁄.

𑁪𑁭. 𑀏𑀯𑀁 𑀲𑀢𑁂𑀦 𑀫𑀽𑀮𑀸𑀦𑀁, 𑀢𑀢𑁆𑀣 𑀲𑀸 𑀕𑀦𑁆𑀥𑀓𑀤𑁆𑀤𑀫𑁂;

𑀧𑀢𑀺𑀝𑁆𑀞𑀸𑀲𑀺 𑀫𑀳𑀸𑀩𑁄𑀥𑀺, 𑀧𑀲𑀸𑀤𑁂𑀦𑁆𑀢𑀻 𑀫𑀳𑀸𑀚𑀦𑀁.

𑁪𑁮. 𑀢𑀲𑁆𑀲𑀸 𑀔𑀦𑁆𑀥𑁄 𑀤𑀲𑀳𑀢𑁆𑀣𑁄, 𑀧𑀜𑁆𑀘𑀲𑀸𑀔𑀸 𑀫𑀦𑁄𑀭𑀫𑀸;

𑀘𑀢𑀼𑀳𑀢𑁆𑀣𑀸 𑀘𑀢𑀼𑀳𑀢𑁆𑀣𑀸, 𑀤𑀲𑀟𑁆𑀠𑀨𑀮𑀫𑀡𑁆𑀟𑀺𑀢𑀸.

𑁪𑁯. 𑀲𑀳𑀲𑁆𑀲𑀦𑁆𑀢𑀼 𑀧𑀲𑀸𑀔𑀸𑀦𑀁, 𑀲𑀸𑀔𑀸𑀦𑀁 𑀢𑀸𑀲𑀫𑀸𑀲𑀺 𑀘;

𑀏𑀯𑀁 𑀆𑀲𑀺 𑀫𑀳𑀸𑀩𑁄𑀥𑀺, 𑀫𑀦𑁄𑀳𑀭𑀲𑀺𑀭𑀺𑀥𑀭𑀸.

𑁫𑁦. 𑀓𑀝𑀸𑀳𑀫𑁆𑀳𑀺 𑀫𑀳𑀸𑀩𑁄𑀥𑀺-𑀧𑀢𑀺𑀝𑁆𑀞𑀺𑀢𑀓𑁆𑀔𑀡𑁂 𑀫𑀳𑀻;

𑀅𑀓𑀫𑁆𑀧𑀺 𑀧𑀸𑀝𑀺𑀳𑀻𑀭𑀸𑀦𑀺, 𑀅𑀳𑁂𑀲𑀼𑀁 𑀯𑀺𑀯𑀺𑀥𑀸𑀦𑀺 𑀘.

𑁫𑁧. 𑀲𑀬𑀁 𑀦𑀸𑀤𑁂𑀳𑀺 𑀢𑀽𑀭𑀺𑀬𑀸𑀦𑀁, 𑀤𑁂𑀯𑁂𑀲𑀼 𑀫𑀸𑀦𑀼𑀲𑁂𑀲𑀼 𑀘;

𑀲𑀸𑀥𑀼𑀓𑀸𑀭𑀦𑀺𑀦𑀸𑀤𑁂𑀢𑀺, 𑀤𑁂𑀯𑀩𑁆𑀭𑀳𑁆𑀫𑀕𑀡𑀲𑁆𑀲 𑀘.

𑁫𑁨. 𑀫𑁂𑀖𑀸𑀦𑀁 𑀫𑀺𑀕𑀧𑀓𑁆𑀔𑀺𑀦𑀁, 𑀬𑀓𑁆𑀔𑀸𑀤𑀻𑀦𑀁 𑀭𑀯𑁂𑀳𑀺 𑀘;

𑀭𑀯𑁂𑀳𑀺𑀘𑀫𑀳𑀻𑀓𑀫𑁆𑀧𑁂, 𑀏𑀓𑀓𑁄𑀮𑀸𑀳𑀮𑀁 𑀅𑀳𑀼.

𑁫𑁩. 𑀩𑁄𑀥𑀺𑀬𑀸 𑀨𑀮𑀧𑀢𑁆𑀢𑁂𑀳𑀺, 𑀙𑀩𑁆𑀩𑀡𑁆𑀡𑀭𑀲𑁆𑀫𑀺𑀬𑁄 𑀲𑀼𑀪𑀸;

𑀦𑀺𑀓𑁆𑀔𑀫𑀺𑀢𑁆𑀯𑀸 𑀘𑀓𑁆𑀓𑀯𑀸𑀴𑀁, 𑀲𑀓𑀮𑀸 𑀲𑁄𑀪𑀬𑀺𑀁𑀲𑀼 𑀘.

𑁫𑁪. 𑀲𑀓𑀝𑀸𑀳𑀸 𑀫𑀳𑀸𑀩𑁄𑀥𑀺, 𑀉𑀕𑁆𑀕𑀦𑁆𑀢𑁆𑀯𑀸𑀦 𑀢𑀢𑁄 𑀦𑀪𑀁;

𑀅𑀝𑁆𑀞𑀸𑀲𑀺 𑀳𑀺𑀫𑀕𑀩𑁆𑀪𑀫𑁆𑀳𑀺, 𑀲𑀢𑁆𑀢𑀸𑀳𑀸𑀦𑀺 𑀅𑀤𑀲𑁆𑀲𑀦𑀸.

𑁫𑁫. 𑀭𑀸𑀚𑀸 𑀑𑀭𑀼𑀬𑁆𑀳 𑀧𑀻𑀞𑀫𑁆𑀳𑀸, 𑀢𑀁 𑀲𑀢𑁆𑀢𑀸𑀳𑀁 𑀢𑀳𑀺𑀁 𑀯𑀲𑀁;

𑀦𑀺𑀘𑁆𑀘𑀁 𑀫𑀳𑀸𑀩𑁄𑀥𑀺𑀧𑀽𑀚𑀁, 𑀅𑀓𑀸𑀲𑀺 𑀘 𑀅𑀦𑁂𑀓𑀥𑀸.

𑁫𑁬. 𑀅𑀢𑀻𑀢𑁂 𑀢𑀫𑁆𑀳𑀺 𑀲𑀢𑁆𑀢𑀸𑀳𑁂, 𑀲𑀩𑁆𑀩𑁂 𑀳𑀺𑀫𑀯𑀮𑀸𑀯𑀓𑀸;

𑀧𑀯𑀺𑀲𑀺𑀁𑀲𑀼 𑀫𑀳𑀸𑀩𑁄𑀥𑀺𑀁, 𑀲𑀩𑁆𑀩𑀸𑀓𑀸 𑀭𑀁𑀲𑀺𑀬𑁄𑀧𑀺 𑀘.

𑁫𑁭. 𑀲𑀼𑀤𑁆𑀥𑁂𑀦𑀓𑀤𑀺𑀲𑀺𑀲𑁆𑀲𑀺𑀢𑁆𑀣, 𑀲𑀸𑀓𑀝𑀸𑀳𑁂 𑀧𑀢𑁆𑀢𑀺𑀝𑁆𑀞𑀺𑀢𑀸;

𑀫𑀳𑀸𑀚𑀦𑀲𑁆𑀲 𑀲𑀩𑁆𑀩𑀲𑁆𑀲, 𑀫𑀳𑀸𑀩𑁄𑀥𑀺 𑀫𑀦𑁄𑀭𑀫𑀸.

𑁫𑁮. 𑀧𑀯𑀢𑁆𑀢𑀫𑁆𑀳𑀺 𑀫𑀳𑀸𑀩𑁄𑀥𑀺, 𑀯𑀺𑀯𑀺𑀥𑁂 𑀧𑀸𑀝𑀺𑀳𑀸𑀭𑀺𑀬𑁂;

𑀯𑀺𑀫𑁆𑀳𑀸𑀧𑀬𑀦𑁆𑀢𑀺 𑀚𑀦𑀢𑀁, 𑀧𑀣𑀯𑀻𑀢𑀮𑀫𑁄𑀭𑀼𑀳𑀺.

𑁫𑁯. 𑀧𑀸𑀝𑀺𑀳𑀺𑀭𑁂𑀳𑀺’𑀦𑁂𑀓𑁂𑀳𑀺, 𑀢𑁂𑀳𑀺 𑀲𑁄 𑀧𑀻𑀡𑀺𑀢𑁄 𑀧𑀼𑀦;

𑀫𑀳𑀸𑀭𑀸𑀚𑀸 𑀫𑀳𑀸𑀩𑁄𑀥𑀺𑀁, 𑀫𑀳𑀸𑀭𑀚𑁆𑀚𑁂𑀦 𑀧𑀽𑀚𑀬𑀺.

𑁬𑁦. 𑀫𑀳𑀸𑀩𑁄𑀥𑀺𑀁 𑀫𑀳𑀸𑀭𑀚𑁆𑀚𑁂-𑀦𑀸𑀪𑀺𑀲𑀺𑀜𑁆𑀘𑀺𑀬 𑀧𑀽𑀚𑀬𑀁;

𑀦𑀸𑀦𑀸𑀧𑀽𑀚𑀸𑀳𑀺 𑀲𑀢𑁆𑀢𑀸𑀳𑀁, 𑀧𑀼𑀦 𑀢𑀢𑁆𑀣𑁂𑀯 𑀲𑁄 𑀯𑀲𑀺.

𑁬𑁧. 𑀅𑀲𑁆𑀲𑀬𑀼𑀚𑀲𑀼𑀓𑁆𑀓𑀧𑀓𑁆𑀔𑁂, 𑀧𑀦𑁆𑀦𑀭𑀲𑀉𑀧𑁄𑀲𑀣𑁂;

𑀅𑀕𑁆𑀕𑀳𑁂𑀲𑀺 𑀫𑀳𑀸𑀩𑁄𑀥𑀺𑀁, 𑀤𑁆𑀯𑀺𑀲𑀢𑁆𑀢𑀸𑀳𑀫𑀘𑁆𑀘𑀬𑁂 𑀢𑀢𑁄.

𑁬𑁨. 𑀅𑀲𑁆𑀲𑀬𑀼𑀚𑀓𑀸𑀴𑀧𑀓𑁆𑀔𑁂, 𑀘𑀢𑀼𑀤𑁆𑀤𑀲𑀉𑀧𑁄𑀲𑀣𑁂;

𑀭𑀣𑁂 𑀲𑀼𑀪𑁂 𑀞𑀧𑁂𑀢𑁆𑀯𑀸𑀦, 𑀫𑀳𑀸𑀩𑁄𑀥𑀺𑀁 𑀭𑀣𑁂𑀲𑀪𑁄.

𑁬𑁩. 𑀧𑀽𑀚𑁂𑀦𑁆𑀢𑁄 𑀢𑀁 𑀤𑀺𑀦𑀁𑀬𑁂𑀯, 𑀉𑀧𑀦𑁂𑀢𑁆𑀯𑀸 𑀲𑀓𑀁 𑀧𑀼𑀭𑀁;

𑀅𑀮𑀗𑁆𑀓𑀭𑀺𑀢𑁆𑀯𑀸 𑀩𑀳𑀼𑀥𑀸, 𑀓𑀸𑀭𑁂𑀢𑁆𑀯𑀸 𑀫𑀡𑁆𑀟𑀧𑀁 𑀲𑀼𑀪𑀁.

𑁬𑁪. 𑀓𑀢𑁆𑀢𑀺𑀓𑀲𑀼𑀓𑁆𑀓𑀧𑀓𑁆𑀔𑀲𑁆𑀲, 𑀤𑀺𑀦𑁂 𑀧𑀸𑀝𑀺𑀧𑀤𑁂 𑀢𑀳𑀺𑀁;

𑀫𑀳𑀸𑀩𑁄𑀥𑀺𑀁 𑀫𑀳𑀸𑀲𑀸𑀮-𑀫𑀽𑀮𑁂 𑀧𑀸𑀘𑀺𑀦𑀢𑁂 𑀲𑀼𑀪𑁂.

𑁬𑁫. 𑀞𑀧𑀸𑀧𑁂𑀢𑁆𑀯𑀸𑀦 𑀓𑀸𑀭𑁂𑀲𑀺, 𑀧𑀽𑀚𑀸’𑀦𑁂𑀓𑀸 𑀤𑀺𑀦𑁂 𑀤𑀺𑀦𑁂;

𑀕𑀸𑀳𑀢𑁄 𑀲𑀢𑁆𑀢𑀭𑀲𑀫𑁂, 𑀯𑀺𑀯𑀲𑁂 𑀢𑀼 𑀦𑀯𑀗𑁆𑀓𑀺𑀭𑀸.

𑁬𑁬. 𑀲𑀓𑀺𑀁 𑀬𑁂𑀯𑀅𑀚𑀸𑀬𑀺𑀁𑀲𑀼, 𑀢𑀲𑁆𑀲𑀸’𑀦𑁂𑀓𑀦𑀭𑀸𑀥𑀺𑀧𑁄;

𑀢𑀼𑀝𑁆𑀞𑀘𑀺𑀢𑁆𑀢𑁄 𑀫𑀳𑀸𑀩𑁄𑀥𑀺𑀁, 𑀧𑀼𑀦 𑀭𑀚𑁆𑀚𑁂𑀦 𑀧𑀽𑀚𑀬𑀺.

𑁬𑁭. 𑀫𑀳𑀸𑀭𑀚𑁆𑀚𑁂’𑀪𑀺 𑀲𑀺𑀜𑁆𑀘𑀺𑀢𑁆𑀯𑀸, 𑀫𑀳𑀸𑀩𑁄𑀥𑀺𑀁 𑀫𑀳𑀺𑀲𑁆𑀲𑀭𑁄;

𑀓𑀸𑀭𑁂𑀲𑀺 𑀘 𑀫𑀳𑀸𑀩𑁄𑀥𑀺-𑀧𑀽𑀚𑀸 𑀦𑀸𑀦𑀧𑁆𑀧𑀓𑀸𑀭𑀓𑀁.

𑁬𑁮. 𑀇𑀢𑀺 𑀓𑀼𑀲𑀼𑀫𑀧𑀼𑀭𑁂 𑀲𑀭𑁂𑀲𑀭𑀁𑀲𑀸,

𑀩𑀳𑀼𑀯𑀺𑀥𑀘𑀸𑀭𑀼𑀥𑀚𑀸𑀓𑀼𑀮𑀸𑀯𑀺𑀲𑀸𑀮𑀸;

𑀲𑀼𑀭𑀼𑀘𑀺𑀭𑀧𑀯𑀭𑁄𑀭𑀼 𑀩𑁄𑀥𑀺𑀧𑀽𑀚𑀸,

𑀫𑀭𑀼𑀦𑀭𑀘𑀺𑀢𑁆𑀢𑀯𑀺𑀓𑀸𑀲𑀺𑀦𑀻 𑀅𑀳𑁄𑀲𑀻𑀢𑀺.

𑀲𑀼𑀚𑀦𑀧𑁆𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀫𑀳𑀸𑀩𑁄𑀥𑀺𑀕𑁆𑀕𑀳𑀡𑁄 𑀦𑀸𑀫

𑀅𑀝𑁆𑀞𑀸𑀭𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.