𑀲𑁄𑀴𑀲𑀫 𑀧𑀭𑀺𑀘𑁆𑀙𑁂𑀤

𑀘𑁂𑀢𑀺𑀬𑀧𑀩𑁆𑀩𑀢𑀯𑀺𑀳𑀸𑀭 𑀧𑀝𑀺𑀕𑁆𑀕𑀳𑀓𑁄

𑁧. 𑀧𑀼𑀭𑁂 𑀘𑀭𑀺𑀢𑁆𑀯𑀸 𑀧𑀺𑀡𑁆𑀟𑀸𑀬, 𑀓𑀭𑀺𑀢𑁆𑀯𑀸 𑀚𑀦𑀲𑀗𑁆𑀕𑀳𑀁;

𑀭𑀸𑀚𑀕𑁂𑀳𑀫𑁆𑀳𑀺 𑀪𑀼𑀜𑁆𑀚𑀦𑁆𑀢𑁄, 𑀓𑀸𑀭𑁂𑀦𑁆𑀢𑁄 𑀭𑀸𑀚𑀲𑀗𑁆𑀕𑀳𑀁.

𑁨. 𑀙𑀩𑁆𑀩𑀲𑀤𑀺𑀯𑀲𑁂 𑀣𑁂𑀭𑁄, 𑀫𑀳𑀸𑀫𑁂𑀖𑀯𑀦𑁂 𑀯𑀲𑀻;

𑀆𑀲𑀴𑁆𑀳𑀲𑀼𑀓𑁆𑀓𑀧𑀓𑁆𑀔𑀲𑁆𑀲, 𑀢𑁂𑀭𑀲𑁂 𑀤𑀺𑀯𑀲𑁂 𑀧𑀦.

𑁩. 𑀭𑀸𑀚𑀕𑁂𑀳𑀫𑁆𑀳𑀺 𑀪𑀼𑀜𑁆𑀚𑀺𑀢𑁆𑀯𑀸, 𑀫𑀳𑀸𑀭𑀜𑁆𑀜𑁄 𑀫𑀳𑀸𑀫𑀢𑀺;

𑀫𑀳𑀸’𑀧𑁆𑀧𑀫𑀸𑀤𑀲𑀼𑀢𑁆𑀢𑀦𑁆𑀢𑀁, 𑀤𑁂𑀲𑀬𑀺𑀢𑁆𑀯𑀸 𑀢𑀢𑁄 𑀘 𑀲𑁄.

𑁪. 𑀯𑀺𑀳𑀸𑀭𑀓𑀭𑀡𑀁 𑀇𑀘𑁆𑀙𑀁, 𑀢𑀢𑁆𑀣 𑀘𑁂𑀢𑀺𑀬𑀧𑀩𑁆𑀩𑀢𑁂;

𑀦𑀺𑀓𑁆𑀔𑀫𑁆𑀫 𑀧𑀼𑀭𑀺𑀫𑀤𑁆𑀯𑀸𑀭𑀸, 𑀅𑀕𑀸 𑀘𑁂𑀢𑀺𑀬𑀧𑀩𑁆𑀩𑀢𑀁.

𑁫. 𑀣𑁂𑀭𑀁 𑀢𑀢𑁆𑀣 𑀕𑀢𑀁 𑀲𑀼𑀢𑁆𑀯𑀸, 𑀭𑀣𑀁 𑀆𑀭𑀼𑀬𑁆𑀳 𑀪𑀽𑀧𑀢𑀺;

𑀤𑁂𑀯𑀺𑀬𑁄 𑀤𑁆𑀯𑁂 𑀘 𑀆𑀤𑀸𑀬, 𑀣𑁂𑀭𑀲𑁆𑀲𑀸𑀦𑀼𑀧𑀤𑀁 𑀅𑀓𑀸.

𑁬. 𑀣𑁂𑀭𑀸 𑀦𑀸𑀕𑀘𑀢𑀼𑀓𑁆𑀓𑀫𑁆𑀳𑀺, 𑀦𑀳𑀸𑀢𑁆𑀯𑀸 𑀭𑀳𑀤𑁂 𑀢𑀳𑀺𑀁;

𑀧𑀩𑁆𑀩𑀢𑀸𑀭𑁄𑀳𑀡𑀢𑁆𑀣𑀸𑀬, 𑀅𑀝𑁆𑀞𑀁𑀲𑀼 𑀧𑀝𑀺𑀧𑀸𑀝𑀺𑀬𑀸.

𑁭. 𑀭𑀸𑀚𑀸 𑀭𑀣𑀸 𑀢𑀤𑁄’𑀭𑀼𑀬𑁆𑀳, 𑀲𑀩𑁆𑀩𑁂 𑀣𑁂𑀭𑁂’𑀪𑀺𑀯𑀸𑀤𑀬𑀺;

𑀉𑀡𑁆𑀳𑁂 𑀓𑀺𑀮𑀦𑁆𑀢𑁂 𑀓𑀺𑀁𑀭𑀸𑀚, 𑀆𑀕𑀢𑁄𑀲𑀻’𑀢𑀺 𑀅𑀳𑀼𑀢𑁂.

𑁮. 𑀢𑀼𑀫𑁆𑀳𑀸𑀓𑀁 𑀕𑀫𑀦𑀸𑀲𑀗𑁆𑀓𑀻, 𑀆𑀕𑀢𑁄𑀫𑁆𑀳𑀻’𑀢𑀺 𑀪𑀸𑀲𑀺𑀢𑁂;

𑀇𑀥𑁂𑀯 𑀯𑀲𑁆𑀲𑀁 𑀯𑀲𑀺𑀢𑀼𑀁, 𑀆𑀕𑀢𑀫𑁆𑀳𑀸’𑀢𑀺 𑀪𑀸𑀲𑀺𑀬.

𑁯. 𑀢𑀲𑁆𑀲𑀽𑀧𑀦𑀸𑀬𑀺𑀓𑀁 𑀣𑁂𑀭𑁄, 𑀔𑀦𑁆𑀥𑀓𑀁 𑀔𑀦𑁆𑀥𑀓𑁄𑀯𑀺𑀤𑁄;

𑀓𑀣𑁂𑀲𑀺 𑀭𑀜𑁆𑀜𑁄 𑀢𑀁 𑀲𑀼𑀢𑁆𑀯𑀸, 𑀪𑀸𑀕𑀺𑀦𑁂𑀬𑁆𑀬𑁄 𑀘 𑀭𑀸𑀚𑀺𑀦𑁄.

𑁧𑁦. 𑀫𑀳𑀸𑀭𑀺𑀝𑁆𑀞𑁄 𑀫𑀳𑀸𑀫𑀘𑁆𑀘𑁄, 𑀧𑀜𑁆𑀘𑀧𑀜𑁆𑀜𑀸𑀲𑀪𑀸𑀢𑀼𑀳𑀺;

𑀲𑀤𑁆𑀥𑀺𑀁 𑀚𑁂𑀝𑁆𑀞𑀓𑀦𑀺𑀝𑁆𑀞𑁂𑀳𑀺, 𑀭𑀸𑀚𑀸𑀦𑀫𑀪𑀺𑀢𑁄 𑀞𑀺𑀢𑁄.

𑁧𑁧. 𑀬𑀸𑀘𑀺𑀢𑁆𑀯𑀸 𑀢𑀤𑀳𑀼 𑀘𑁂𑀯, 𑀧𑀩𑁆𑀩𑀚𑀼𑀁 𑀣𑁂𑀭𑀲𑀦𑁆𑀢𑀺𑀓𑁂;

𑀧𑀢𑁆𑀢𑀸𑀭𑀳𑀢𑁆𑀢𑀁 𑀲𑀩𑁆𑀩𑁂𑀧𑀺, 𑀢𑁂 𑀔𑀼𑀭𑀕𑁆𑀕𑁂 𑀫𑀳𑀸𑀫𑀢𑀻.

𑁧𑁨. 𑀓𑀦𑁆𑀢𑀓𑀘𑁂𑀢𑀺𑀬𑀞𑀸𑀦𑁂, 𑀧𑀭𑀺𑀢𑁄 𑀢𑀤𑀳𑁂𑀯 𑀲𑁄;

𑀓𑀫𑁆𑀫𑀸𑀦𑀺 𑀆𑀭𑀪𑀸𑀧𑁂𑀢𑁆𑀯𑀸, 𑀮𑁂𑀡𑀸𑀦𑀺 𑀅𑀝𑁆𑀞𑀲𑀝𑁆𑀞𑀺𑀬𑁄.

𑁧𑁩. 𑀅𑀕𑀫𑀸𑀲𑀺 𑀧𑀼𑀭𑀁 𑀭𑀸𑀚𑀸, 𑀣𑁂𑀭𑀸 𑀢𑀢𑁆𑀣𑁂𑀯 𑀢𑁂 𑀯𑀲𑀼𑀁;

𑀓𑀸𑀮𑁂 𑀧𑀺𑀡𑁆𑀟𑀸𑀬 𑀦𑀕𑀭𑀁, 𑀧𑀯𑀺𑀲𑀦𑁆𑀢𑀸’𑀦𑀼𑀓𑀫𑁆𑀧𑀓𑀸.

𑁧𑁪. 𑀦𑀺𑀝𑁆𑀞𑀺𑀢𑁂 𑀮𑁂𑀡𑀓𑀫𑁆𑀫𑀫𑁆𑀳𑀺, 𑀆𑀲𑀴𑁆𑀳𑀺𑀧𑀼𑀡𑁆𑀡𑀫𑀸𑀲𑀺𑀬𑀁;

𑀕𑀦𑁆𑀢𑁆𑀯𑀸 𑀅𑀤𑀸𑀲𑀺 𑀣𑁂𑀭𑀸𑀦𑀁, 𑀭𑀸𑀚𑀸 𑀯𑀺𑀳𑀸𑀭𑀤𑀓𑁆𑀔𑀺𑀡𑀁.

𑁧𑁫. 𑀤𑁆𑀯𑀢𑁆𑀢𑀺𑀁𑀲𑀫𑀸𑀴𑀓𑀸𑀦𑀜𑁆𑀘, 𑀯𑀺𑀳𑀸𑀭𑀲𑁆𑀲 𑀘 𑀢𑀲𑁆𑀲 𑀔𑁄;

𑀲𑀻𑀫𑀁 𑀲𑀻𑀫𑀸𑀢𑀺𑀕𑁄 𑀣𑁂𑀭𑁄, 𑀩𑀦𑁆𑀥𑀺𑀢𑁆𑀯𑀸 𑀢𑀤𑀳𑁂𑀯 𑀲𑁄.

𑁧𑁬. 𑀢𑁂𑀲𑀁 𑀧𑀩𑁆𑀩𑀚𑁆𑀚𑀸𑀧𑁂𑀓𑁆𑀔𑀸𑀦𑀁, 𑀅𑀓𑀸𑀲𑀺 𑀉𑀧𑀲𑀫𑁆𑀧𑀤𑀁;

𑀲𑀩𑁆𑀩𑁂𑀲𑀁 𑀲𑀩𑁆𑀩𑀧𑀞𑀫𑀁, 𑀩𑀤𑁆𑀥𑁂 𑀢𑀼𑀫𑁆𑀩𑀭𑀼𑀫𑀸𑀴𑀓𑁂.

𑁧𑁭. 𑀏𑀢𑁂 𑀤𑁆𑀯𑀸𑀲𑀝𑁆𑀞𑀺 𑀅𑀭𑀳𑀦𑁆𑀢𑁄, 𑀲𑀩𑁆𑀩𑁂 𑀘𑁂𑀢𑀺𑀬𑀧𑀩𑁆𑀩𑀢𑁂;

𑀢𑀢𑁆𑀣 𑀯𑀲𑁆𑀲𑀁 𑀉𑀧𑀕𑀦𑁆𑀢𑁆𑀯𑀸, 𑀅𑀓𑀁𑀲𑀼 𑀭𑀸𑀚𑀲𑀗𑁆𑀕𑀳𑀁.

𑁧𑁮. 𑀤𑁂𑀯𑀫𑀦𑀼𑀲𑁆𑀲𑀕𑀡𑀕𑀡𑀺𑀢𑀁 𑀢𑀁,

𑀢𑀜𑁆𑀘 𑀕𑀡𑀁 𑀕𑀼𑀡𑀯𑀺𑀢𑁆𑀣𑀢𑀓𑀺𑀢𑁆𑀢𑀺𑀁;

𑀬𑀸𑀦𑀫𑀼𑀧𑀘𑁆𑀘 𑀘 𑀫𑀸𑀦𑀬𑀫𑀸𑀦𑀸,

𑀧𑀼𑀜𑁆𑀜𑀘𑀬𑀁 𑀯𑀺𑀧𑀼𑀮𑀁 𑀅𑀓𑀭𑀺𑀁𑀲𑀽𑀢𑀺.

𑀲𑀼𑀚𑀦𑀧𑀲𑀸𑀤𑀲𑀁𑀯𑁂𑀕𑀢𑁆𑀣𑀸𑀬 𑀓𑀢𑁂 𑀫𑀳𑀸𑀯𑀁𑀲𑁂

𑀘𑁂𑀢𑀺𑀬𑀧𑀩𑁆𑀩𑀢𑀯𑀺𑀳𑀸𑀭𑀧𑀝𑀺𑀕𑁆𑀕𑀳𑀓𑁄 𑀦𑀸𑀫

𑀲𑁄𑀴𑀲𑀫𑁄 𑀧𑀭𑀺𑀘𑁆𑀙𑁂𑀤𑁄.