𑀧𑀜𑁆𑀘𑀤𑀲𑀫 𑀧𑀭𑀺𑀘𑁆𑀙𑁂𑀤

𑀫𑀳𑀸𑀯𑀺𑀳𑀸𑀭 𑀧𑀝𑀺𑀕𑁆𑀕𑀳𑀓𑁄

𑁧. 𑀳𑀢𑁆𑀣𑀺𑀲𑀸𑀮𑀸𑀧𑀺 𑀲𑀫𑁆𑀩𑀸𑀥𑀸, 𑀇𑀢𑀺 𑀢𑀢𑁆𑀣 𑀲𑀫𑀸𑀕𑀢𑀸;

𑀢𑁂 𑀦𑀦𑁆𑀤𑀦𑀯𑀦𑁂 𑀭𑀫𑁆𑀫𑁂, 𑀤𑀓𑁆𑀔𑀺𑀡𑀤𑁆𑀯𑀸𑀭𑀢𑁄 𑀩𑀳𑀺.

𑁨. 𑀭𑀸𑀚𑀼𑀬𑁆𑀬𑀸𑀦𑁂 𑀖𑀦𑀘𑁆𑀙𑀸𑀬𑁂, 𑀲𑀻𑀢𑀮𑁂 𑀦𑀻𑀮𑀲𑀤𑁆𑀤𑀮𑁂;

𑀧𑀜𑁆𑀜𑀸𑀧𑁂𑀲𑀼𑀁 𑀆𑀲𑀦𑀸𑀦𑀺, 𑀣𑁂𑀭𑀸𑀦𑀁 𑀲𑀸𑀤𑀭𑀸 𑀦𑀭𑀸.

𑁩. 𑀦𑀺𑀓𑁆𑀔𑀫𑁆𑀫 𑀤𑀓𑁆𑀔𑀺𑀡𑀤𑁆𑀯𑀸𑀭𑀸, 𑀣𑁂𑀭𑁄 𑀢𑀢𑁆𑀣 𑀦𑀺𑀲𑀻𑀤𑀺 𑀘;

𑀫𑀳𑀸𑀓𑀼𑀮𑀻𑀦𑀸 𑀘𑀸’𑀕𑀫𑁆𑀫, 𑀇𑀢𑁆𑀣𑀺𑀬𑁄 𑀩𑀳𑀼𑀓𑀸 𑀢𑀳𑀺𑀁.

𑁪. 𑀣𑁂𑀭𑀁 𑀉𑀧𑀦𑀺𑀲𑀻𑀤𑀺𑀁𑀲𑀼, 𑀉𑀬𑁆𑀬𑀸𑀦𑀁 𑀧𑀽𑀭𑀬𑀦𑁆𑀢𑀺𑀬𑁄;

𑀩𑀸𑀮𑀧𑀡𑁆𑀟𑀺𑀢𑀲𑀼𑀢𑁆𑀢𑀦𑁆𑀢𑀁, 𑀢𑀸𑀲𑀁 𑀣𑁂𑀭𑁄 𑀅𑀤𑁂𑀲𑀬𑀺.

𑁫. 𑀲𑀳𑀲𑁆𑀲𑀁 𑀇𑀢𑁆𑀣𑀺𑀬𑁄 𑀢𑀸𑀲𑀼, 𑀧𑀞𑀫𑀁 𑀨𑀮𑀫𑀚𑁆𑀛𑀕𑀼𑀁;

𑀏𑀯𑀁 𑀢𑀢𑁆𑀣𑁂𑀯 𑀉𑀬𑁆𑀬𑀸𑀦𑁂, 𑀲𑀸𑀬𑀡𑁆𑀳𑀲𑀫𑀬𑁄 𑀅𑀳𑀼.

𑁬. 𑀢𑀢𑁄 𑀣𑁂𑀭𑀸 𑀦𑀺𑀓𑁆𑀔𑀫𑀺𑀁𑀲𑀼, ‘‘𑀬𑀸𑀫 𑀢𑀁 𑀧𑀩𑁆𑀩𑀢𑀁’’ 𑀇𑀢𑀺;

𑀭𑀜𑁆𑀜𑁄 𑀧𑀝𑀺𑀦𑀺𑀯𑁂𑀤𑁂𑀲𑀼𑀁, 𑀲𑀻𑀖𑀁 𑀭𑀸𑀚𑀸 𑀉𑀧𑀸𑀕𑀫𑀺.

𑁭. 𑀉𑀧𑀸𑀕𑀫𑁆𑀫𑀸’𑀩𑁆𑀭𑀯𑀻 𑀣𑁂𑀭𑀁, ‘‘𑀲𑀸𑀬𑀁 𑀤𑀽𑀭𑁄 𑀘 𑀧𑀩𑁆𑀩𑀢𑁄;

𑀇𑀥𑁂𑀯 𑀦𑀦𑁆𑀤𑀦𑀼𑀬𑁆𑀬𑀸𑀦𑁂, 𑀦𑀺𑀯𑀸𑀲𑁄 𑀨𑀸𑀲𑀼𑀓𑁄 𑀇𑀢𑀺.

𑁮. 𑀧𑀼𑀭𑀲𑁆𑀲 𑀅𑀘𑁆𑀘𑀸𑀲𑀦𑁆𑀦𑀢𑁆𑀢𑀸, ‘‘𑀅𑀲𑀸𑀭𑀼𑀧𑁆𑀧’’𑀦𑁆𑀢𑀺 𑀪𑀸𑀲𑀺𑀢𑁂;

‘‘𑀫𑀳𑀸𑀫𑁂𑀖𑀯𑀦𑀼𑀬𑁆𑀬𑀸𑀦𑀁, 𑀦𑀸𑀢𑀺𑀤𑀽𑀭𑀸𑀢𑀺 𑀲𑀦𑁆𑀢𑀺𑀓𑁂.

𑁯. 𑀭𑀫𑁆𑀫𑀁 𑀙𑀸𑀬𑀽𑀤𑀓𑀽𑀧𑁂𑀢𑀁, 𑀦𑀺𑀯𑀸𑀲𑁄 𑀢𑀢𑁆𑀣 𑀭𑁄𑀘𑀢𑀼;

𑀦𑀺𑀯𑀢𑁆𑀢𑀺𑀢𑀩𑁆𑀩𑀁 𑀪𑀦𑁆𑀢𑁂’’𑀦𑁆𑀢𑀺, 𑀣𑁂𑀭𑁄 𑀢𑀢𑁆𑀣 𑀦𑀺𑀯𑀢𑁆𑀢𑀬𑀺.

𑁧𑁦. 𑀢𑀲𑁆𑀫𑀺𑀁 𑀦𑀺𑀯𑀢𑁆𑀢𑀞𑀸𑀦𑀫𑁆𑀳𑀺, 𑀓𑀤𑀫𑁆𑀩𑀦𑀤𑀺𑀬𑀦𑁆𑀢𑀺𑀓𑁂;

𑀦𑀺𑀯𑀢𑁆𑀢𑀘𑁂𑀢𑀺𑀬𑀁 𑀦𑀸𑀫, 𑀓𑀢𑀁 𑀯𑀼𑀘𑁆𑀘𑀢𑀺 𑀘𑁂𑀢𑀺𑀬𑀁.

𑁧𑁧. 𑀢𑀁 𑀦𑀦𑁆𑀤𑀦𑀸 𑀤𑀓𑁆𑀔𑀺𑀡𑁂𑀦, 𑀦𑀬𑀁 𑀣𑁂𑀭𑀁 𑀭𑀣𑁂𑀲𑀪𑁄;

𑀫𑀳𑀸𑀫𑁂𑀖𑀯𑀦𑀼𑀬𑁆𑀬𑀸𑀦𑀁, 𑀧𑀸𑀘𑀺𑀦𑀤𑁆𑀯𑀸𑀭𑀓𑀁 𑀦𑀬𑀺.

𑁧𑁨. 𑀢𑀢𑁆𑀣 𑀭𑀸𑀚𑀖𑀭𑁂 𑀭𑀫𑁆𑀫𑁂, 𑀫𑀜𑁆𑀘𑀧𑀻𑀞𑀸𑀦𑀺 𑀲𑀸𑀥𑀼𑀓𑀁;

𑀲𑀸𑀥𑀽𑀢𑀺 𑀲𑀦𑁆𑀣𑀭𑀸𑀧𑁂𑀢𑁆𑀯𑀸, ‘‘𑀯𑀲𑀢𑁂’𑀢𑁆𑀢 𑀲𑀼𑀔𑀁’’ 𑀇𑀢𑀺.

𑁧𑁩. 𑀭𑀸𑀚𑀸 𑀣𑁂𑀭𑁂’𑀪𑀺𑀯𑀸𑀤𑁂𑀢𑁆𑀯𑀸, 𑀅𑀫𑀘𑁆𑀘𑀧𑀭𑀺𑀯𑀸𑀭𑀺𑀢𑁄;

𑀧𑀼𑀭𑀁 𑀧𑀸𑀯𑀺𑀲𑀺 𑀣𑁂𑀭𑀸 𑀢𑀼, 𑀢𑀁 𑀭𑀢𑁆𑀢𑀺𑀁 𑀢𑀢𑁆𑀣 𑀢𑁂 𑀯𑀲𑀼𑀁.

𑁧𑁪. 𑀧𑀪𑀸𑀢𑁂𑀬𑁂𑀯 𑀧𑀼𑀧𑁆𑀨𑀸𑀦𑀺, 𑀕𑀸𑀳𑁂𑀢𑁆𑀯𑀸 𑀥𑀭𑀡𑀻𑀧𑀢𑀺;

𑀣𑁂𑀭𑁂 𑀉𑀧𑀘𑁆𑀘 𑀯𑀦𑁆𑀤𑀺𑀢𑁆𑀯𑀸, 𑀧𑀽𑀚𑁂𑀢𑁆𑀯𑀸 𑀓𑀼𑀲𑀼𑀫𑁂𑀳𑀺 𑀘.

𑁧𑁫. 𑀧𑀼𑀘𑁆𑀙𑀺 𑀓𑀘𑁆𑀘𑀺 𑀲𑀼𑀔𑀁 𑀯𑀼𑀝𑁆𑀞𑀁, 𑀉𑀬𑁆𑀬𑀸𑀦𑀁 𑀨𑀸𑀲𑀼𑀓𑀁 𑀇𑀢𑀺;

𑀲𑀼𑀔𑀁 𑀯𑀼𑀢𑁆𑀣𑀁 𑀫𑀳𑀸𑀭𑀸𑀚, 𑀉𑀬𑁆𑀬𑀸𑀦𑀁 𑀬𑀢𑀺 𑀨𑀸𑀲𑀼𑀓𑀁.

𑁧𑁬. 𑀆𑀭𑀸𑀫𑁄 𑀓𑀧𑁆𑀧𑀢𑁂 𑀪𑀦𑁆𑀢𑁂, 𑀲𑀗𑁆𑀖𑀲𑁆𑀲𑀸’’𑀢𑀺 𑀅𑀧𑀼𑀘𑁆𑀙𑀺 𑀲𑁄;

‘‘𑀓𑀧𑁆𑀧𑀢𑁂’’𑀇𑀢𑀺 𑀯𑀢𑁆𑀯𑀸𑀦, 𑀓𑀧𑁆𑀧𑀸𑀓𑀧𑁆𑀧𑁂𑀲𑀼 𑀓𑁄𑀯𑀺𑀤𑁄.

𑁧𑁭. 𑀣𑁂𑀭𑁄 𑀯𑁂𑀴𑀼𑀯𑀦𑀸𑀭𑀸𑀫, 𑀧𑀝𑀺𑀕𑁆𑀕𑀳𑀡𑀫𑀩𑁆𑀭𑀯𑀺;

𑀢𑀁 𑀲𑀼𑀢𑁆𑀯𑀸 𑀅𑀪𑀺𑀳𑀝𑁆𑀞𑁄 𑀲𑁄, 𑀢𑀼𑀝𑁆𑀞𑀳𑀝𑁆𑀞𑁄 𑀫𑀳𑀸𑀚𑀦𑁄.

𑁧𑁮. 𑀣𑁂𑀭𑀸𑀦𑀁 𑀯𑀦𑁆𑀤𑀦𑀢𑁆𑀣𑀸𑀬, 𑀤𑁂𑀯𑀻 𑀢𑀼 𑀅𑀦𑀼𑀮𑀸𑀕𑀢𑀸;

𑀲𑀤𑁆𑀥𑀺𑀁 𑀧𑀜𑁆𑀘𑀲𑀢𑀺𑀢𑁆𑀣𑀻𑀳𑀺, 𑀤𑀼𑀢𑀺𑀬𑀁 𑀨𑀮𑀫𑀚𑁆𑀛𑀕𑀸.

𑁧𑁯. 𑀲𑀸 𑀧𑀜𑁆𑀘𑀲𑀢𑀸 𑀤𑁂𑀯𑀻, 𑀅𑀦𑀼𑀮𑀸’𑀳 𑀫𑀳𑀻𑀧𑀢𑀺;

‘‘𑀧𑀩𑁆𑀩𑀚𑀺𑀲𑁆𑀲𑀸𑀫 𑀤𑁂𑀯𑀸’’𑀢𑀺, 𑀭𑀸𑀚𑀸 𑀣𑁂𑀭𑀫𑀯𑁄𑀘 𑀲𑁄.

𑁨𑁦. 𑀧𑀩𑁆𑀩𑀸𑀚𑁂𑀣 𑀇𑀫𑀸𑀬𑁄’’𑀢𑀺, 𑀣𑁂𑀭𑁄 𑀆𑀳 𑀫𑀳𑀻𑀧𑀢𑀺𑀁;

‘‘𑀦 𑀓𑀧𑁆𑀧𑀢𑀺 𑀫𑀳𑀸𑀭𑀸𑀚, 𑀧𑀩𑁆𑀩𑀸𑀚𑁂𑀢𑀼𑀁 𑀣𑀺𑀬𑁄 𑀳𑀺𑀦𑁄.

𑁨𑁧. 𑀅𑀢𑁆𑀣𑀺 𑀧𑀸𑀝𑀮𑀺𑀧𑀼𑀢𑁆𑀢𑀲𑁆𑀫𑀺𑀁, 𑀪𑀺𑀓𑁆𑀔𑀼𑀦𑀻 𑀫𑁂 𑀓𑀦𑀺𑀝𑁆𑀞𑀺𑀓𑀸;

𑀲𑀗𑁆𑀖𑀫𑀺𑀢𑁆𑀢𑀸𑀢𑀺 𑀦𑀸𑀫𑁂𑀦, 𑀯𑀺𑀲𑁆𑀲𑀼𑀢𑀸 𑀲𑀸 𑀩𑀳𑀼𑀲𑁆𑀲𑀼𑀢𑀸.

𑁨𑁨. 𑀦𑀭𑀺𑀦𑁆𑀤𑀲𑀫𑀡𑀺𑀦𑁆𑀤𑀲𑁆𑀲, 𑀫𑀳𑀸𑀩𑁄𑀥𑀺𑀤𑀼𑀫𑀺𑀦𑁆𑀤𑀢𑁄;

𑀤𑀓𑁆𑀔𑀺𑀡𑀁 𑀲𑀸𑀔𑀫𑀸𑀤𑀸𑀬, 𑀢𑀣𑀸 𑀪𑀺𑀓𑁆𑀔𑀼𑀦𑀺𑀬𑁄 𑀯𑀭𑀸.

𑁨𑁩. 𑀆𑀕𑀘𑁆𑀙𑀢𑀽’𑀢𑀺 𑀧𑁂𑀲𑁂𑀳𑀺, 𑀭𑀜𑁆𑀜𑁄 𑀦𑁄 𑀧𑀺𑀢𑀼 𑀲𑀦𑁆𑀢𑀺𑀓𑀁;

𑀧𑀩𑁆𑀩𑀸𑀚𑁂𑀲𑁆𑀲𑀢𑀺 𑀲𑀸 𑀣𑁂𑀭𑀻, 𑀆𑀕𑀢𑀸 𑀇𑀢𑁆𑀣𑀺𑀬𑁄 𑀇𑀫𑀸.

𑁨𑁪. ‘‘𑀲𑀸𑀥𑀼’’𑀢𑀺 𑀯𑀢𑁆𑀯𑀸 𑀕𑀡𑁆𑀳𑀺𑀢𑁆𑀯𑀸, 𑀭𑀸𑀚𑀸 𑀪𑀺𑀗𑁆𑀓𑀸𑀭𑀫𑀼𑀢𑁆𑀢𑀫𑀁;

‘‘𑀫𑀳𑀸𑀫𑁂𑀖𑀯𑀦𑀼𑀬𑁆𑀬𑀸𑀦𑀁, 𑀤𑀫𑁆𑀫𑀺 𑀲𑀗𑁆𑀖𑀲𑁆𑀲𑀺’𑀫𑀁 𑀇𑀢𑀺.

𑁨𑁫. 𑀫𑀳𑀺𑀦𑁆𑀤𑀣𑁂𑀭𑀲𑁆𑀲 𑀓𑀭𑁂, 𑀤𑀓𑁆𑀔𑀺𑀡𑁄𑀤𑀓𑀫𑀸’𑀓𑀺𑀭𑀻;

𑀫𑀳𑀺𑀬𑀸 𑀧𑀢𑀺𑀢𑁂 𑀢𑁄𑀬𑁂, 𑀅𑀓𑀫𑁆𑀧𑀺𑀢𑁆𑀣 𑀫𑀳𑀸 𑀫𑀳𑀻.

𑁨𑁬. ‘‘𑀢𑀲𑁆𑀫𑀸 𑀓𑀫𑁆𑀧𑀢𑀺 𑀪𑀽𑀫𑀻’’𑀢𑀺, 𑀪𑀽𑀫𑀺𑀧𑀸𑀮𑁄 𑀅𑀧𑀼𑀘𑁆𑀙𑀺 𑀢𑀁;

𑀧𑀢𑀺𑀝𑁆𑀞𑀺𑀢𑀢𑁆𑀢𑀸 𑀤𑀻𑀧𑀫𑁆𑀳𑀺, 𑀲𑀸𑀲𑀦𑀲𑁆𑀲𑀸’𑀢𑀺 𑀲𑁄 𑀩𑁆𑀭𑀯𑀺.

𑁨𑁭. 𑀣𑁂𑀭𑀲𑁆𑀲 𑀉𑀧𑀦𑀸𑀫𑁂𑀲𑀺, 𑀚𑀸𑀢𑀺𑀧𑀼𑀧𑁆𑀨𑀸𑀦𑀺 𑀚𑀸𑀢𑀺𑀫𑀸;

𑀣𑁂𑀭𑁄 𑀭𑀸𑀚𑀖𑀭𑀁 𑀕𑀦𑁆𑀢𑁆𑀯𑀸, 𑀢𑀲𑁆𑀲 𑀤𑀓𑁆𑀔𑀺𑀡𑀢𑁄 𑀞𑀺𑀢𑁄.

𑁨𑁮. 𑀭𑀼𑀓𑁆𑀔𑀫𑁆𑀳𑀺 𑀧𑀺𑀘𑀼𑀮𑁂 𑀅𑀝𑁆𑀞, 𑀧𑀼𑀧𑁆𑀨𑀫𑀼𑀝𑁆𑀞𑀻 𑀲𑀫𑁄𑀓𑀺𑀭𑀻;

𑀢𑀢𑁆𑀣𑀸𑀧𑀺 𑀧𑀼𑀣𑀯𑀻 𑀓𑀫𑁆𑀧𑀺, 𑀧𑀼𑀝𑁆𑀞𑁄 𑀢𑀲𑁆𑀲𑀸’𑀳 𑀓𑀸𑀭𑀡𑀁.

𑁨𑁯. 𑀅𑀳𑁄𑀲𑀺 𑀢𑀺𑀡𑁆𑀡𑀁 𑀩𑀼𑀤𑁆𑀥𑀸𑀦𑀁, 𑀓𑀸𑀮𑁂’𑀧𑀺 𑀇𑀥 𑀫𑀸𑀮𑀓𑁄;

𑀦𑀭𑀺𑀦𑁆𑀤𑀲𑀗𑁆𑀖𑀓𑀫𑁆𑀫𑀢𑁆𑀣𑀁, 𑀪𑀯𑀺𑀲𑁆𑀲𑀢𑀺 𑀇𑀤𑀸𑀦𑀺𑀧𑀺.

𑁩𑁦. 𑀭𑀸𑀚𑀕𑁂𑀳𑀸 𑀉𑀢𑁆𑀢𑀭𑀢𑁄, 𑀘𑀸𑀭𑀼𑀧𑁄𑀓𑁆𑀔𑀭𑀡𑀺𑀁 𑀅𑀕𑀸;

𑀢𑀢𑁆𑀢𑀓𑀸 𑀦𑁂𑀯 𑀧𑀼𑀧𑁆𑀨𑀸𑀦𑀺, 𑀣𑁂𑀭𑁄 𑀢𑀢𑁆𑀣𑀸𑀧𑀺 𑀑𑀓𑀺𑀭𑀺.

𑁩𑁧. 𑀢𑀢𑁆𑀣𑀸’𑀧𑀺 𑀧𑀼𑀣𑀼𑀯𑀻 𑀓𑀫𑁆𑀧𑀺, 𑀧𑀼𑀝𑁆𑀞𑁄 𑀢𑀲𑁆𑀲𑀸’𑀳 𑀓𑀸𑀭𑀡𑀁;

‘‘𑀚𑀦𑁆𑀢𑀖𑀭 𑀧𑁄𑀓𑁆𑀔𑀭𑀡𑀻, 𑀅𑀬𑀁 𑀳𑁂𑀲𑁆𑀲𑀢𑀺 𑀪𑀽𑀫𑀺𑀧’’.

𑁩𑁨. 𑀢𑀲𑁆𑀲𑁂𑀯 𑀭𑀸𑀚𑀕𑁂𑀳𑀲𑁆𑀲, 𑀕𑀦𑁆𑀢𑁆𑀯𑀸𑀦 𑀤𑁆𑀯𑀸𑀭𑀓𑁄𑀝𑁆𑀞𑀓𑀁;

𑀢𑀢𑁆𑀢𑀓𑁂𑀳𑁂’𑀯 𑀧𑀼𑀧𑁆𑀨𑁂𑀳𑀺, 𑀢𑀁 𑀞𑀸𑀦𑀁 𑀧𑀽𑀚𑀬𑀻 𑀇𑀲𑀺.

𑁩𑁩. 𑀢𑀢𑁆𑀣𑀸𑀧𑀺 𑀧𑀼𑀣𑀼𑀯𑀻𑀓𑀫𑁆𑀧𑀺, 𑀳𑀝𑁆𑀞𑀮𑁄𑀫𑁄 𑀅𑀢𑀻𑀯𑀲𑁄;

𑀭𑀸𑀚𑀸 𑀢𑀁 𑀓𑀸𑀭𑀡𑀁 𑀧𑀼𑀘𑁆𑀙𑀺, 𑀣𑁂𑀭𑁄 𑀢𑀲𑁆𑀲𑀸’𑀳 𑀓𑀸𑀭𑀡𑀁.

𑁩𑁪. 𑀇𑀫𑀫𑁆𑀳𑀺 𑀓𑀧𑁆𑀧𑁂 𑀩𑀼𑀤𑁆𑀥𑀸𑀦𑀁, 𑀢𑀺𑀡𑁆𑀡𑀦𑁆𑀦𑀁 𑀩𑁄𑀥𑀺𑀭𑀼𑀓𑁆𑀔𑀢𑁄;

𑀆𑀦𑁂𑀢𑁆𑀯𑀸 𑀤𑀓𑁆𑀔𑀺𑀡𑀸𑀲𑀸𑀔𑀸, 𑀭𑁄𑀧𑀺𑀢𑀸 𑀇𑀥 𑀪𑀽𑀫𑀺𑀧.

𑁩𑁫. 𑀢𑀣𑀸𑀕𑀢𑀲𑁆𑀲 𑀅𑀫𑁆𑀳𑀸𑀓𑀁, 𑀩𑁄𑀥𑀺𑀲𑀸𑀔𑀸𑀧𑀺 𑀤𑀓𑁆𑀔𑀺𑀡𑀸;

𑀇𑀫𑀲𑁆𑀫𑀺𑀁𑀬𑁂𑀯 𑀞𑀸𑀦𑀫𑁆𑀳𑀺, 𑀧𑀢𑀺𑀝𑁆𑀞𑀺𑀲𑁆𑀲𑀢𑀺 𑀪𑀽𑀫𑀺𑀧.

𑁩𑁬. 𑀢𑀢𑁄’𑀕𑀫𑀸 𑀫𑀳𑀸𑀣𑁂𑀭𑁄, 𑀫𑀳𑀸𑀫𑀼𑀘𑀮𑀫𑀸𑀮𑀓𑀁;

𑀢𑀢𑁆𑀢𑀓𑀸𑀦𑁂𑀯 𑀧𑀼𑀧𑁆𑀨𑀸𑀦𑀺, 𑀢𑀲𑁆𑀫𑀺𑀁 𑀞𑀸𑀦𑁂 𑀲𑀫𑁄𑀓𑀺𑀭𑀺.

𑁩𑁭. 𑀢𑀣𑀸𑀧𑀺 𑀧𑀼𑀣𑀯𑀻 𑀓𑀫𑁆𑀧𑀺, 𑀧𑀼𑀝𑁆𑀞𑁄 𑀢𑀲𑁆𑀲𑀸’𑀳 𑀓𑀸𑀭𑀡𑀁;

𑀲𑀗𑁆𑀖𑀲𑁆𑀲𑀼 𑀧𑁄𑀲𑀣𑀸 𑀕𑀸𑀭𑀁, 𑀇𑀥 𑀳𑁂𑀲𑁆𑀲𑀢𑀺 𑀪𑀽𑀫𑀺𑀧.

𑁩𑁮. 𑀧𑀜𑁆𑀳𑀫𑁆𑀩𑀫𑀸𑀮𑀓𑀝𑁆𑀞𑀸𑀦𑀁, 𑀢𑀢𑁄’𑀕𑀫𑀸 𑀫𑀳𑀻𑀧𑀢𑀺;

𑀲𑀼𑀧𑀓𑁆𑀓𑀁 𑀅𑀫𑁆𑀩𑀧𑀓𑁆𑀓𑀜𑁆𑀘, 𑀯𑀡𑁆𑀡𑀕𑀦𑁆𑀥𑀭𑀲𑀼𑀢𑁆𑀢𑀫𑀁.

𑁩𑁯. 𑀫𑀳𑀦𑁆𑀢𑀁 𑀉𑀧𑀦𑀸𑀫𑁂𑀲𑀺, 𑀭𑀜𑁆𑀜𑁄 𑀉𑀬𑁆𑀬𑀸𑀦𑀧𑀸𑀮𑀓𑁄;

𑀢𑀁 𑀣𑁂𑀭𑀲𑁆𑀲𑀼𑀧𑀦𑀸𑀫𑁂𑀲𑀺, 𑀭𑀸𑀚𑀸 𑀅𑀢𑀺𑀫𑀦𑁄𑀭𑀫𑀁.

𑁪𑁦. 𑀣𑁂𑀭𑁄 𑀦𑀺𑀲𑀻𑀤𑀦𑀸𑀓𑀸𑀭𑀁, 𑀤𑀲𑁆𑀲𑁂𑀲𑀺 𑀚𑀦𑀢𑀸 𑀳𑀺𑀢𑁄;

𑀅𑀢𑁆𑀣𑀭𑀸𑀧𑁂𑀲𑀺 𑀢𑀢𑁆𑀣𑁂𑀯, 𑀭𑀸𑀚𑀸 𑀅𑀢𑁆𑀣𑀭𑀡𑀁 𑀯𑀭𑀁.

𑁪𑁧. 𑀅𑀤𑀸 𑀢𑀢𑁆𑀣 𑀦𑀺𑀲𑀺𑀦𑁆𑀦𑀲𑁆𑀲, 𑀣𑁂𑀭𑀲𑁆𑀲𑀫𑁆𑀩𑀁 𑀫𑀳𑀻𑀧𑀢𑀺;

𑀣𑁂𑀭𑁄 𑀢𑀁 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸, 𑀭𑁄𑀧𑀦𑀢𑁆𑀣𑀸𑀬 𑀭𑀸𑀚𑀺𑀦𑁄.

𑁪𑁨. 𑀅𑀫𑁆𑀩𑀝𑁆𑀞𑀺𑀓𑀁 𑀅𑀤𑀸 𑀭𑀸𑀚𑀸, 𑀢𑀁 𑀲𑀬𑀁 𑀢𑀢𑁆𑀣 𑀭𑁄𑀧𑀬𑀺;

𑀳𑀢𑁆𑀣𑁂 𑀢𑀲𑁆𑀲𑁄𑀧𑀭𑀺𑀣𑁂𑀭𑁄, 𑀥𑁄𑀯𑀺 𑀢𑀲𑁆𑀲 𑀯𑀺𑀭𑀼𑀴𑁆𑀳𑀺𑀬𑀸.

𑁪𑁩. 𑀢𑀁 𑀔𑀡𑀁𑀬𑁂𑀯 𑀩𑀻𑀚𑀫𑁆𑀳𑀸, 𑀢𑀫𑁆𑀳𑀸 𑀦𑀺𑀓𑁆𑀔𑀫𑁆𑀫 𑀅𑀗𑁆𑀓𑀼𑀭𑁄;

𑀓𑀫𑁂𑀦𑀸’𑀢𑀺 𑀫𑀳𑀸𑀭𑀼𑀓𑁆𑀔𑁄, 𑀧𑀢𑁆𑀢𑀧𑀓𑁆𑀓𑀥𑀭𑁄 𑀅𑀳𑀼.

𑁪𑁪. 𑀢𑀁 𑀧𑀸𑀝𑀺𑀳𑀸𑀭𑀺𑀬𑀁 𑀤𑀺𑀲𑁆𑀯𑀸, 𑀧𑀭𑀺𑀲𑀸 𑀲𑀸 𑀲𑀭𑀸𑀚𑀺𑀓𑀸;

𑀦𑀫𑀲𑁆𑀲𑀫𑀸𑀦𑀸 𑀅𑀝𑁆𑀞𑀸𑀲𑀺, 𑀣𑁂𑀭𑁂 𑀳𑀢𑁆𑀣𑀢𑀦𑀼𑀭𑀼𑀳𑀸.

𑁪𑁫. 𑀣𑁂𑀭𑁄 𑀢𑀤𑀸 𑀧𑀼𑀧𑁆𑀨𑀫𑀼𑀝𑁆𑀞𑀺, 𑀅𑀝𑁆𑀞 𑀢𑀢𑁆𑀣 𑀲𑀫𑁄𑀓𑀺𑀭𑀺;

𑀢𑀣𑀸𑀧𑀺 𑀧𑀼𑀣𑀯𑀻𑀓𑀫𑁆𑀧𑀺, 𑀧𑀼𑀝𑁆𑀞𑁄 𑀢𑀲𑁆𑀲𑀸’𑀳 𑀓𑀸𑀭𑀡𑀁.

𑁪𑁬. 𑀲𑀗𑁆𑀖𑀲𑁆𑀲𑀧𑁆𑀧𑀦𑁆𑀦𑀮𑀸𑀪𑀸𑀦𑀁, 𑀅𑀦𑁂𑀓𑁂𑀲𑀁 𑀦𑀭𑀸𑀥𑀺𑀧;

𑀲𑀗𑁆𑀕𑀫𑁆𑀫𑀪𑀸𑀚𑀦𑀞𑀸𑀦𑀁, 𑀇𑀤𑀁 𑀞𑀸𑀦𑀁 𑀪𑀯𑀺𑀲𑁆𑀲𑀢𑀺.

𑁪𑁭. 𑀢𑀢𑁄 𑀕𑀦𑁆𑀢𑁆𑀯𑀸 𑀘𑀢𑀼𑀲𑁆𑀲𑀸𑀮-𑀞𑀸𑀦𑀁 𑀢𑀢𑁆𑀣 𑀲𑀫𑁄𑀓𑀺𑀭𑀺;

𑀢𑀢𑁆𑀢𑀓𑀸𑀦𑁂𑀯 𑀧𑀼𑀧𑁆𑀨𑀸𑀦𑀺, 𑀓𑀫𑁆𑀧𑀺 𑀢𑀢𑁆𑀣𑀸𑀧𑀺 𑀫𑁂𑀤𑀺𑀦𑀻.

𑁪𑁮. 𑀢𑀁 𑀓𑀫𑁆𑀧𑀓𑀸𑀭𑀡𑀁 𑀧𑀼𑀘𑁆𑀙𑀺, 𑀭𑀸𑀚𑀸 𑀣𑁂𑀭𑁄 𑀯𑀺𑀬𑀸𑀓𑀭𑀺;

𑀢𑀺𑀡𑁆𑀡𑀦𑁆𑀦𑀁 𑀧𑀼𑀩𑁆𑀩𑀩𑀼𑀤𑁆𑀥𑀸𑀦𑀁, 𑀭𑀸𑀚𑀼𑀬𑁆𑀬𑀸𑀦 𑀧𑀝𑀺𑀕𑁆𑀕𑀳𑁂.

𑁪𑁯. 𑀤𑀸𑀦 𑀯𑀢𑁆𑀣𑀼𑀦𑀸’𑀳𑀝𑀸𑀦𑀺, 𑀤𑀻𑀧𑀯𑀸𑀲𑀻𑀳𑀺 𑀲𑀩𑁆𑀩𑀢𑁄;

𑀇𑀥 𑀞𑀧𑁂𑀢𑁆𑀯𑀸 𑀪𑁄𑀚𑁂𑀲𑀼𑀁, 𑀲𑀲𑀗𑁆𑀖𑁂 𑀲𑀼𑀕𑀢𑁂 𑀢𑀬𑁄.

𑁫𑁦. 𑀇𑀤𑀸𑀦𑀺 𑀧𑀦 𑀏𑀢𑁆𑀣𑁂𑀯, 𑀘𑀢𑀼𑀲𑁆𑀲𑀸𑀮𑀸 𑀪𑀯𑀺𑀲𑁆𑀲𑀢𑀺;

𑀲𑀗𑁆𑀖𑀲𑁆𑀲 𑀇𑀥 𑀪𑀢𑁆𑀢𑀕𑁆𑀕𑀁, 𑀪𑀯𑀺𑀲𑁆𑀲𑀢𑀺 𑀦𑀭𑀸𑀥𑀺𑀧.

𑁫𑁧. 𑀫𑀳𑀣𑀽𑀧𑀞𑀺𑀢𑀞𑀸𑀦𑀁, 𑀞𑀸𑀦𑀸𑀞𑀸𑀦𑀯𑀺𑀤𑀽𑀢𑀢𑁄;

𑀅𑀕𑀫𑀸𑀲𑀺 𑀫𑀳𑀸𑀣𑁂𑀭𑁄, 𑀫𑀳𑀺𑀦𑁆𑀤𑁄 𑀤𑀻𑀧𑀤𑀻𑀧𑀦𑁄.

𑁫𑁨. 𑀢𑀤𑀸 𑀅𑀦𑁆𑀢𑁄𑀧𑀭𑀺𑀓𑁆𑀔𑁂𑀧𑁂, 𑀭𑀸𑀚𑀼𑀬𑁆𑀬𑀸𑀦𑀲𑁆𑀲 𑀔𑀼𑀤𑁆𑀤𑀺𑀓𑀸;

𑀓𑀓𑀼𑀥𑀯𑁆𑀳𑀸 𑀅𑀳𑀼 𑀯𑀸𑀧𑀻, 𑀢𑀲𑁆𑀲𑁄’𑀧𑀭𑀺 𑀚𑀮𑀦𑁆𑀢𑀺𑀓𑁂.

𑁫𑁩. 𑀣𑀽𑀧𑀸𑀭𑀳𑀁 𑀣𑀮𑀞𑀸𑀦𑀁, 𑀅𑀳𑀼 𑀣𑁂𑀭𑁂 𑀢𑀳𑀺𑀁 𑀕𑀢𑁂;

𑀭𑀜𑁆𑀜𑁄 𑀘𑀫𑁆𑀧𑀓𑀧𑀼𑀧𑁆𑀨𑀸𑀦𑀁, 𑀧𑀼𑀝𑀓𑀸𑀦’𑀝𑁆𑀞 𑀆𑀳𑀭𑀼𑀁.

𑁫𑁪. 𑀢𑀸𑀦𑀺 𑀘𑀫𑁆𑀧𑀓𑀧𑀼𑀧𑁆𑀨𑀸𑀦𑀺, 𑀭𑀸𑀚𑀸 𑀣𑁂𑀭𑀲𑁆𑀲𑀼’𑀧𑀸𑀦𑀬𑀺;

𑀣𑁂𑀭𑁄 𑀘𑀫𑁆𑀧𑀓𑀧𑀼𑀧𑁆𑀨𑁂𑀳𑀺, 𑀢𑁂𑀳𑀺 𑀧𑀽𑀚𑁂𑀲𑀺 𑀢𑀁 𑀨𑀮𑀁.

𑁫𑁫. 𑀢𑀢𑁆𑀣𑀸𑀧𑀺 𑀧𑀼𑀣𑀯𑀻 𑀓𑀫𑁆𑀧𑀺, 𑀭𑀸𑀚𑀸 𑀢𑀁 𑀓𑀫𑁆𑀧𑀓𑀸𑀭𑀡𑀁;

𑀧𑀼𑀘𑁆𑀙𑀺 𑀣𑁂𑀭𑁄’𑀦𑀼 𑀧𑀼𑀩𑁆𑀩𑁂𑀦, 𑀆𑀳𑀢𑀁 𑀓𑀫𑁆𑀧𑀓𑀸𑀭𑀡𑀁.

𑁫𑁬. 𑀇𑀤𑀁 𑀞𑀸𑀦𑀁 𑀫𑀳𑀸𑀭𑀸𑀚, 𑀘𑀢𑀼𑀩𑀼𑀤𑁆𑀥 𑀦𑀺𑀲𑁂𑀯𑀺𑀢𑀁;

𑀣𑀽𑀧𑀸𑀭𑀳𑀁 𑀳𑀺𑀢𑀢𑁆𑀣𑀸𑀬, 𑀲𑀼𑀔𑀢𑁆𑀣𑀸𑀬 𑀘 𑀧𑀸𑀡𑀺𑀦𑀁.

𑁫𑁭. 𑀇𑀫𑀫𑁆𑀳𑀺 𑀓𑀧𑁆𑀧𑁂 𑀧𑀞𑀫𑀁, 𑀓𑀓𑀼𑀲𑀦𑁆𑀥𑁄 𑀚𑀺𑀦𑁄 𑀅𑀳𑀼;

𑀲𑀩𑁆𑀩 𑀥𑀫𑁆𑀫𑀯𑀺𑀤𑀽 𑀲𑀢𑁆𑀣𑀸, 𑀲𑀩𑁆𑀩𑀮𑁄𑀓𑀸𑀦𑀼𑀓𑀫𑁆𑀧𑀓𑁄.

𑁫𑁮. 𑀫𑀳𑀸𑀢𑀺𑀢𑁆𑀣𑀯𑁆𑀳𑀬𑀁 𑀆𑀲𑀺, 𑀫𑀳𑀸𑀫𑁂𑀖𑀯𑀦𑀁 𑀇𑀤𑀁;

𑀦𑀕𑀭𑀁 𑀅𑀪𑀬𑀁 𑀦𑀸𑀫, 𑀧𑀼𑀭𑀢𑁆𑀣𑀺𑀫𑀤𑀺𑀲𑀸𑀬’𑀳𑀼.

𑁫𑁯. 𑀓𑀤𑀫𑁆𑀩 𑀦𑀤𑀺𑀬𑀸 𑀧𑀸𑀭𑁂, 𑀢𑀢𑁆𑀣 𑀭𑀸𑀚𑀸’𑀪𑀬𑁄 𑀅𑀳𑀼;

𑀑𑀚𑀤𑀻𑀧𑁄𑀢𑀺 𑀦𑀸𑀫𑁂𑀦, 𑀅𑀬𑀁 𑀤𑀻𑀧𑁄 𑀢𑀤𑀸𑀅𑀳𑀼.

𑁬𑁦. 𑀭𑀓𑁆𑀔𑀲𑁂𑀳𑀺 𑀚𑀦𑀲𑁆𑀲𑁂’𑀢𑁆𑀣, 𑀭𑁄𑀕𑁄 𑀧𑀚𑁆𑀚𑀭𑀓𑁄 𑀅𑀳𑀼;

𑀓𑀓𑀼𑀲𑀦𑁆𑀥𑁄 𑀤𑀲𑀩𑀮𑁄, 𑀤𑀺𑀲𑁆𑀯𑀸𑀦 𑀢𑀤𑀼𑀧𑀤𑁆𑀤𑀯𑀁.

𑁬𑁧. 𑀢𑀁 𑀕𑀦𑁆𑀢𑁆𑀯𑀸 𑀲𑀢𑁆𑀢𑀯𑀺𑀦𑀬𑀁, 𑀧𑀯𑀢𑁆𑀢𑀺𑀁 𑀲𑀸𑀲𑀦𑀲𑁆𑀲 𑀘;

𑀓𑀸𑀢𑀼𑀁 𑀇𑀫𑀲𑁆𑀫𑀺𑀁 𑀤𑀻𑀧𑀲𑁆𑀫𑀺𑀁, 𑀓𑀭𑀼𑀡𑀸 𑀩𑀮𑀘𑁄𑀤𑀺𑀢𑁄.

𑁬𑁨. 𑀘𑀢𑁆𑀢𑀸𑀮𑀻𑀲𑀲𑀳𑀲𑁆𑀲𑁂𑀳𑀺, 𑀢𑀸𑀤𑀻𑀳𑀺 𑀧𑀭𑀺𑀯𑀸𑀭𑀺𑀢𑁄;

𑀦𑀪𑀲𑀸’𑀕𑀫𑁆𑀫 𑀅𑀝𑁆𑀞𑀸𑀲𑀺, 𑀤𑁂𑀯𑀓𑀽𑀝𑀫𑁆𑀳𑀺 𑀧𑀩𑁆𑀩𑀢𑁂.

𑁬𑁩. 𑀲𑀫𑁆𑀩𑀼𑀤𑁆𑀥𑀲𑁆𑀲𑀸’𑀦𑀼𑀪𑀸𑀯𑁂𑀦, 𑀭𑁄𑀕𑁄 𑀧𑀚𑁆𑀚𑀭𑀓𑁄 𑀇𑀥;

𑀉𑀧𑀲𑀦𑁆𑀢𑁄 𑀫𑀳𑀸𑀭𑀸𑀚, 𑀤𑀻𑀧𑀫𑁆𑀳𑀺 𑀲𑀓𑀮𑁂 𑀢𑀤𑀸.

𑁬𑁪. 𑀓𑀢𑁆𑀣 𑀞𑀺𑀢𑁄 𑀅𑀥𑀺𑀝𑁆𑀞𑀸𑀲𑀺, 𑀦𑀭𑀺𑀲𑁆𑀲𑀭 𑀫𑀼𑀦𑀺𑀲𑁆𑀲𑀭𑁄;

𑀲𑀩𑁆𑀩𑁂 𑀫𑀁 𑀅𑀚𑁆𑀚 𑀧𑀲𑁆𑀲𑀦𑁆𑀢𑀼, 𑀑𑀚𑀤𑀻𑀧𑀫𑁆𑀳𑀺 𑀫𑀸𑀦𑀼𑀲𑀸.

𑁬𑁫. 𑀆𑀕𑀦𑁆𑀢𑀼𑀓𑀸𑀫𑀸 𑀲𑀩𑁆𑀩𑁂𑀯, 𑀫𑀦𑀼𑀲𑁆𑀲𑀸 𑀫𑀫 𑀲𑀦𑁆𑀢𑀺𑀓𑀁;

𑀆𑀕𑀘𑁆𑀙𑀦𑁆𑀢𑀼 𑀅𑀓𑀺𑀘𑁆𑀙𑁂𑀦, 𑀔𑀺𑀧𑁆𑀧𑀜𑁆𑀘𑀸𑀧𑀺 𑀫𑀳𑀸𑀫𑀼𑀦𑀺.

𑁬𑁬. 𑀑𑀪𑀸𑀲𑀬𑀦𑁆𑀢𑀁 𑀫𑀼𑀦𑀺𑀦𑁆𑀤𑀁 𑀢𑀁, 𑀑𑀪𑀸𑀲𑀦𑁆𑀢𑀜𑁆𑀘 𑀧𑀩𑁆𑀩𑀢𑀁;

𑀭𑀸𑀚𑀸 𑀘 𑀦𑀸𑀕𑀭𑀸 𑀘𑁂𑀯, 𑀤𑀺𑀲𑁆𑀯𑀸 𑀔𑀺𑀧𑁆𑀧𑀁 𑀉𑀧𑀸𑀕𑀫𑀼𑀁.

𑁬𑁭. 𑀤𑁂𑀯𑀢𑀸 𑀩𑀮𑀺𑀤𑀸𑀦𑀢𑁆𑀣𑀁, 𑀫𑀦𑀼𑀲𑁆𑀲𑀸 𑀘 𑀢𑀳𑀺𑀁 𑀕𑀢𑀸;

𑀤𑁂𑀯𑀢𑀸 𑀇𑀢𑀺 𑀫𑀜𑁆𑀜𑀺𑀁𑀲𑀼, 𑀲𑀲𑀗𑁆𑀖𑀁 𑀮𑁄𑀓𑀦𑀸𑀬𑀓𑀁.

𑁬𑁮. 𑀭𑀸𑀚𑀸 𑀲𑁄 𑀫𑀼𑀦𑀺𑀭𑀸𑀚𑀁 𑀢𑀁, 𑀅𑀢𑀺𑀳𑀝𑁆𑀞𑁄’𑀪𑀺 𑀯𑀸𑀤𑀺𑀬;

𑀦𑀺𑀫𑀦𑁆𑀢𑀬𑀺𑀢𑁆𑀯𑀸 𑀪𑀢𑁆𑀢𑁂𑀦, 𑀆𑀦𑁂𑀢𑁆𑀯𑀸 𑀧𑀼𑀭𑀲𑀦𑁆𑀢𑀺 𑀓𑀁.

𑁬𑁯. 𑀲𑀲𑀗𑁆𑀖𑀲𑁆𑀲 𑀫𑀼𑀦𑀺𑀦𑁆𑀤𑀲𑁆𑀲, 𑀦𑀺𑀲𑀚𑁆𑀚𑀸𑀭𑀳𑀫𑀼𑀢𑁆𑀢𑀫𑀁;

𑀭𑀫𑀡𑀻𑀬𑀫𑀺𑀤𑀁 𑀞𑀸𑀦-𑀫𑀲𑀫𑁆𑀩𑀸𑀥𑀦𑁆𑀢𑀺 𑀘𑀺𑀦𑁆𑀢𑀺𑀬.

𑁭𑁦. 𑀓𑀸𑀭𑀺𑀢𑁂 𑀫𑀡𑁆𑀟𑀧𑁂 𑀭𑀫𑁆𑀫𑁂, 𑀧𑀮𑁆𑀮𑀗𑁆𑀓𑁂𑀲𑀼 𑀯𑀭𑁂 𑀲𑀼𑀢𑀁;

𑀦𑀺𑀲𑀻𑀤𑀸𑀧𑁂𑀲𑀺 𑀲𑀫𑁆𑀩𑀼𑀤𑁆𑀥𑀁, 𑀲𑀲𑀗𑁆𑀖𑀁 𑀇𑀥 𑀪𑀽𑀧𑀢𑀺.

𑁭𑁧. 𑀦𑀺𑀲𑀺𑀦𑁆𑀦𑀫𑁆𑀧𑀺 𑀘 𑀧𑀲𑁆𑀲𑀦𑁆𑀢𑀸, 𑀲𑀲𑀗𑁆𑀖𑀁 𑀮𑁄𑀓𑀦𑀸𑀬𑀓𑀁;

𑀤𑀻𑀧𑁂 𑀫𑀦𑀼𑀲𑁆𑀲𑀸 𑀆𑀦𑁂𑀲𑀼𑀁, 𑀧𑀡𑁆𑀡𑀸𑀓𑀸𑀭𑁂 𑀲𑀫𑀦𑁆𑀢𑀢𑁄.

𑁭𑁨. 𑀅𑀢𑁆𑀢𑀦𑁄 𑀔𑀚𑁆𑀚𑀪𑁄𑀚𑁆𑀚𑁂𑀳𑀺, 𑀢𑁂𑀳𑀺 𑀢𑁂𑀳𑀸’𑀪𑀢𑁂𑀳𑀺 𑀘;

𑀲𑀦𑁆𑀢𑀧𑁆𑀧𑁂𑀲𑀺 𑀲𑀲𑀗𑁆𑀖𑀁 𑀢𑀁, 𑀭𑀸𑀚𑀸 𑀲𑁄 𑀮𑁄𑀓𑀦𑀸𑀬𑀓𑀁.

𑁭𑁩. 𑀇𑀥𑁂𑀯 𑀧𑀘𑁆𑀙𑀸𑀪𑀢𑁆𑀢𑀁 𑀢𑀁, 𑀦𑀺𑀲𑀺𑀦𑁆𑀦𑀲𑁆𑀲 𑀚𑀺𑀦𑀲𑁆𑀲 𑀲𑁄;

𑀫𑀳𑀸 𑀢𑀺𑀢𑁆𑀣𑀓𑀫𑀼𑀬𑁆𑀬𑀸𑀦𑀁, 𑀭𑀸𑀚𑀸’𑀤𑀸 𑀤𑀓𑁆𑀔𑀺𑀡𑀁 𑀯𑀭𑀁.

𑁭𑁪. 𑀅𑀓𑀸𑀮𑀧𑀼𑀧𑁆𑀨𑀸 𑀮𑀗𑁆𑀓𑀸𑀭𑁂, 𑀫𑀳𑀸𑀢𑀺𑀢𑁆𑀣𑀯𑀦𑁂 𑀢𑀤𑀸;

𑀧𑀝𑀺𑀕𑁆𑀕𑀳𑀺𑀢𑁂 𑀩𑀼𑀤𑁆𑀥𑁂𑀦, 𑀅𑀓𑀫𑁆𑀧𑀺𑀢𑁆𑀣 𑀫𑀳𑀸𑀫𑀳𑀻.