𑁬. 𑀆𑀔𑁆𑀬𑀸𑀢𑀓𑀧𑁆𑀧

𑀧𑀞𑀫𑀓𑀡𑁆𑀟

(𑀓)

𑀆𑀔𑁆𑀬𑀸𑀢𑀲𑀸𑀕𑀭𑀫𑀣𑀚𑁆𑀚𑀢𑀦𑀻𑀢𑀭𑀗𑁆𑀕𑀁,

𑀥𑀸𑀢𑀼𑀚𑁆𑀚𑀮𑀁 𑀯𑀺𑀓𑀭𑀡𑀸𑀕𑀫𑀓𑀸𑀮𑀫𑀻𑀦𑀁;

𑀮𑁄𑀧𑀸𑀦𑀼𑀩𑀦𑁆𑀥𑀭𑀺𑀬𑀫𑀢𑁆𑀣𑀯𑀺𑀪𑀸𑀕𑀢𑀻𑀭𑀁,

𑀥𑀻𑀭𑀸 𑀢𑀭𑀦𑁆𑀢𑀺 𑀓𑀯𑀺𑀦𑁄 𑀧𑀼𑀣𑀼𑀩𑀼𑀤𑁆𑀥𑀺𑀦𑀸𑀯𑀸.

(𑀔)

𑀯𑀺𑀘𑀺𑀢𑁆𑀢𑀲𑀗𑁆𑀔𑀸𑀭𑀧𑀭𑀺𑀓𑁆𑀔𑀺𑀢𑀁 𑀇𑀫𑀁,

𑀆𑀔𑁆𑀬𑀸𑀢𑀲𑀤𑁆𑀤𑀁 𑀯𑀺𑀧𑀼𑀮𑀁 𑀅𑀲𑁂𑀲𑀢𑁄;

𑀧𑀡𑀫𑁆𑀬 𑀲𑀫𑁆𑀩𑀼𑀤𑁆𑀥𑀫𑀦𑀦𑁆𑀢𑀕𑁄𑀘𑀭𑀁,

𑀲𑀼𑀕𑁄𑀘𑀭𑀁 𑀬𑀁 𑀯𑀤𑀢𑁄 𑀲𑀼𑀡𑀸𑀣 𑀫𑁂.

(𑀕)

𑀅𑀥𑀺𑀓𑀸𑀭𑁂 𑀫𑀗𑁆𑀕𑀮𑁂 𑀘𑁂𑀯, 𑀦𑀺𑀧𑁆𑀨𑀦𑁆𑀦𑁂 𑀘𑀸𑀯𑀥𑀸𑀭𑀡𑁂;

𑀅𑀦𑀦𑁆𑀢𑀭𑁂 𑀘 𑀧𑀸𑀤𑀸𑀦𑁂, 𑀅𑀣𑀲𑀤𑁆𑀤𑁄 𑀧𑀯𑀢𑁆𑀢𑀢𑀺.

𑁪𑁧𑁬. , 𑁪𑁨𑁯. 𑀅𑀣 𑀧𑀼𑀩𑁆𑀩𑀸𑀦𑀺 𑀯𑀺𑀪𑀢𑁆𑀢𑀻𑀦𑀁 𑀙 𑀧𑀭𑀲𑁆𑀲𑀧𑀤𑀸𑀦𑀺.

𑀅𑀣 𑀲𑀩𑁆𑀩𑀸𑀲𑀁 𑀯𑀺𑀪𑀢𑁆𑀢𑀻𑀦𑀁 𑀬𑀸𑀦𑀺 𑀬𑀸𑀦𑀺 𑀧𑀼𑀩𑁆𑀩𑀓𑀸𑀦𑀺 𑀙 𑀧𑀤𑀸𑀦𑀺, 𑀢𑀸𑀦𑀺 𑀢𑀸𑀦𑀺 𑀧𑀭𑀲𑁆𑀲𑀧𑀤𑀲𑀜𑁆𑀜𑀸𑀦𑀺 𑀳𑁄𑀦𑁆𑀢𑀺.

𑀢𑀁 𑀬𑀣𑀸? 𑀢𑀺 𑀅𑀦𑁆𑀢𑀺, 𑀲𑀺 𑀣, 𑀫𑀺 𑀫.

𑀧𑀭𑀲𑁆𑀲𑀧𑀤𑀫𑀺𑀘𑁆𑀘𑀦𑁂𑀦 𑀓𑁆𑀯𑀢𑁆𑀣𑁄? 𑀓𑀢𑁆𑀢𑀭𑀺 𑀧𑀭𑀲𑁆𑀲𑀧𑀤𑀁.

𑁪𑁦𑁭. , 𑁪𑁩𑁯. 𑀧𑀭𑀸𑀡𑁆𑀬𑀢𑁆𑀢𑀦𑁄𑀧𑀤𑀸𑀦𑀺.

𑀲𑀩𑁆𑀩𑀸𑀲𑀁 𑀯𑀺𑀪𑀢𑁆𑀢𑀻𑀦𑀁 𑀬𑀸𑀦𑀺 𑀬𑀸𑀦𑀺 𑀧𑀭𑀸𑀦𑀺 𑀙 𑀧𑀤𑀸𑀦𑀺. 𑀢𑀸𑀦𑀺 𑀢𑀸𑀦𑀺 𑀅𑀢𑁆𑀢𑀦𑁄𑀧𑀤𑀲𑀜𑁆𑀜𑀸𑀦𑀺 𑀳𑁄𑀦𑁆𑀢𑀺.

𑀢𑀁 𑀬𑀣𑀸? 𑀢𑁂 𑀅𑀦𑁆𑀢𑁂, 𑀲𑁂 𑀯𑁆𑀳𑁂, 𑀏 𑀫𑁆𑀳𑁂.

𑀅𑀢𑁆𑀢𑀦𑁄𑀧𑀤𑀫𑀺𑀘𑁆𑀘𑀦𑁂𑀦 𑀓𑁆𑀯𑀢𑁆𑀣𑁄? 𑀅𑀢𑁆𑀢𑀦𑁄𑀧𑀤𑀸𑀦𑀺 𑀪𑀸𑀯𑁂 𑀘 𑀓𑀫𑁆𑀫𑀦𑀺.

𑁪𑁦𑁮. , 𑁪𑁩𑁧. 𑀤𑁆𑀯𑁂 𑀤𑁆𑀯𑁂 𑀧𑀞𑀫 𑀫𑀚𑁆𑀛𑀺𑀫𑀼𑀢𑁆𑀢𑀫𑀧𑀼𑀭𑀺𑀲𑀸.

𑀢𑀸𑀲𑀁 𑀲𑀩𑁆𑀩𑀸𑀲𑀁 𑀯𑀺𑀪𑀢𑁆𑀢𑀻𑀦𑀁 𑀧𑀭𑀲𑁆𑀲𑀧𑀤𑀸𑀦𑀁, 𑀅𑀢𑁆𑀢𑀦𑁄𑀧𑀤𑀸𑀦𑀜𑁆𑀘 𑀤𑁆𑀯𑁂 𑀤𑁆𑀯𑁂 𑀧𑀤𑀸𑀦𑀺 𑀧𑀞𑀫𑀫𑀚𑁆𑀛𑀺𑀫𑀼𑀢𑁆𑀢𑀫𑀧𑀼𑀭𑀺𑀲𑀲𑀜𑁆𑀜𑀸𑀦𑀺 𑀳𑁄𑀦𑁆𑀢𑀺.

𑀢𑀁 𑀬𑀣𑀸? 𑀢𑀺 𑀅𑀦𑁆𑀢𑀺 𑀇𑀢𑀺 𑀧𑀞𑀫𑀧𑀼𑀭𑀺𑀲𑀸, 𑀲𑀺 𑀣 𑀇𑀢𑀺 𑀫𑀚𑁆𑀛𑀺𑀫𑀧𑀼𑀭𑀺𑀲𑀸, 𑀫𑀺 𑀫 𑀇𑀢𑀺 𑀉𑀢𑁆𑀢𑀫𑀧𑀼𑀭𑀺𑀲𑀸. 𑀅𑀢𑁆𑀢𑀦𑁄𑀧𑀤𑀸𑀦𑀫𑁆𑀧𑀺 𑀢𑁂 𑀅𑀦𑁆𑀢𑁂 𑀇𑀢𑀺 𑀧𑀞𑀫𑀧𑀼𑀭𑀺𑀲𑀸, 𑀲𑁂 𑀯𑁆𑀳𑁂 𑀇𑀢𑀺 𑀫𑀚𑁆𑀛𑀺𑀫𑀧𑀼𑀭𑀺𑀲𑀸, 𑀏 𑀫𑁆𑀳𑁂 𑀇𑀢𑀺 𑀉𑀢𑁆𑀢𑀫𑀧𑀼𑀭𑀺𑀲𑀸. 𑀏𑀯𑀁 𑀲𑀩𑁆𑀩𑀢𑁆𑀣.

𑀧𑀞𑀫𑀫𑀚𑁆𑀛𑀺𑀫𑀼𑀢𑁆𑀢𑀫𑀧𑀼𑀭𑀺𑀲𑀫𑀺𑀘𑁆𑀘𑀦𑁂𑀦 𑀓𑁆𑀯𑀢𑁆𑀣𑁄? 𑀦𑀸𑀫𑀫𑁆𑀳𑀺 𑀧𑀬𑀼𑀚𑁆𑀚𑀫𑀸𑀦𑁂𑀧𑀺 𑀢𑀼𑀮𑁆𑀬𑀸𑀥𑀺𑀓𑀭𑀡𑁂 𑀧𑀞𑀫𑁄, 𑀢𑀼𑀫𑁆𑀳𑁂 𑀫𑀚𑁆𑀛𑀺𑀫𑁄, 𑀅𑀫𑁆𑀳𑁂 𑀉𑀢𑁆𑀢𑀫𑁄.

𑁪𑁦𑁯. , 𑁪𑁪𑁧. 𑀲𑀩𑁆𑀩𑁂𑀲𑀫𑁂𑀓𑀸𑀪𑀺𑀥𑀸𑀦𑁂 𑀧𑀭𑁄 𑀧𑀼𑀭𑀺𑀲𑁄.

𑀲𑀩𑁆𑀩𑁂𑀲𑀁 𑀢𑀺𑀡𑁆𑀡𑀁 𑀧𑀞𑀫𑀫𑀚𑁆𑀛𑀺𑀫𑀼𑀢𑁆𑀢𑀫 𑀧𑀼𑀭𑀺𑀲𑀸𑀦𑀁 𑀏𑀓𑀸𑀪𑀺𑀥𑀸𑀦𑁂 𑀧𑀭𑁄 𑀧𑀼𑀭𑀺𑀲𑁄 𑀕𑀳𑁂𑀢𑀩𑁆𑀩𑁄.

𑀲𑁄 𑀘 𑀧𑀞𑀢𑀺, 𑀢𑁆𑀯𑀜𑁆𑀘 𑀧𑀞𑀲𑀺, 𑀢𑀼𑀫𑁆𑀳𑁂 𑀧𑀞𑀣. 𑀲𑁄 𑀘 𑀧𑀘𑀢𑀺, 𑀢𑁆𑀯𑀜𑁆𑀘 𑀧𑀘𑀲𑀺. 𑀢𑀼𑀫𑁆𑀳𑁂 𑀧𑀘𑀣. 𑀏𑀯𑀁 𑀲𑁂𑀲𑀸𑀲𑀼 𑀯𑀺𑀪𑀢𑁆𑀢𑀻𑀲𑀼 𑀧𑀭𑁄 𑀧𑀼𑀭𑀺𑀲𑁄 𑀬𑁄𑀚𑁂𑀢𑀩𑁆𑀩𑁄.

𑁪𑁧𑁦. , 𑁪𑁩𑁨. 𑀦𑀸𑀫𑀫𑁆𑀳𑀺 𑀧𑀬𑀼𑀚𑁆𑀚𑀫𑀸𑀦𑁂𑀧𑀺 𑀢𑀼𑀮𑁆𑀬𑀸𑀥𑀺𑀓𑀭𑀡𑁂 𑀧𑀞𑀫𑁄.

𑀦𑀸𑀫𑀫𑁆𑀳𑀺 𑀧𑀬𑀼𑀚𑁆𑀚𑀫𑀸𑀦𑁂𑀧𑀺 𑀅𑀧𑁆𑀧𑀬𑀼𑀚𑁆𑀚𑀫𑀸𑀦𑁂𑀧𑀺 𑀢𑀼𑀮𑁆𑀬𑀸𑀥𑀺𑀓𑀭𑀡𑁂 𑀧𑀞𑀫𑀧𑀼𑀭𑀺𑀲𑁄 𑀳𑁄𑀢𑀺.

𑀲𑁄 𑀕𑀘𑁆𑀙𑀢𑀺, 𑀢𑁂 𑀕𑀘𑁆𑀙𑀦𑁆𑀢𑀺.

𑀅𑀧𑁆𑀧𑀬𑀼𑀚𑁆𑀚𑀫𑀸𑀦𑁂𑀧𑀺 𑁋 𑀕𑀘𑁆𑀙𑀢𑀺, 𑀕𑀘𑁆𑀙𑀦𑁆𑀢𑀺.

𑀢𑀼𑀮𑁆𑀬𑀸𑀥𑀺𑀓𑀭𑀡𑁂𑀢𑀺 𑀓𑀺𑀫𑀢𑁆𑀣𑀁? 𑀢𑁂𑀦 𑀳𑀜𑁆𑀜𑀲𑁂 𑀢𑁆𑀯𑀁 𑀤𑁂𑀯𑀤𑀢𑁆𑀢𑁂𑀦.

𑁪𑁧𑁧. , 𑁪𑁩𑁬. 𑀢𑀼𑀫𑁆𑀳𑁂 𑀫𑀚𑁆𑀛𑀺𑀫𑁄.

𑀢𑀼𑀫𑁆𑀳𑁂 𑀧𑀬𑀼𑀚𑁆𑀚𑀫𑀸𑀦𑁂𑀧𑀺 𑀅𑀧𑁆𑀧𑀬𑀼𑀚𑁆𑀚𑀫𑀸𑀦𑁂𑀧𑀺 𑀢𑀼𑀮𑁆𑀬𑀸𑀥𑀺𑀓𑀭𑀡𑁂 𑀫𑀚𑁆𑀛𑀺𑀫𑀧𑀼𑀭𑀺𑀲𑁄 𑀳𑁄𑀢𑀺.

𑀢𑁆𑀯𑀁 𑀬𑀸𑀲𑀺, 𑀢𑀼𑀫𑁆𑀳𑁂 𑀬𑀸𑀣.

𑀅𑀧𑁆𑀧𑀬𑀼𑀚𑁆𑀚𑀫𑀸𑀦𑁂𑀧𑀺 𑁋 𑀬𑀸𑀲𑀺, 𑀬𑀸𑀣.

𑀢𑀼𑀮𑁆𑀬𑀸𑀥𑀺𑀓𑀭𑀡𑁂𑀢𑀺 𑀓𑀺𑀫𑀢𑁆𑀣𑀁? 𑀢𑀬𑀸 𑀧𑀘𑁆𑀘𑀢𑁂 𑀑𑀤𑀦𑁄.

𑁪𑁧𑁨. , 𑁪𑁩𑁭. 𑀅𑀫𑁆𑀳𑁂 𑀉𑀢𑁆𑀢𑀫𑁄.

𑀅𑀫𑁆𑀳𑁂 𑀧𑀬𑀼𑀚𑁆𑀚𑀫𑀸𑀦𑁂𑀧𑀺 𑀅𑀧𑁆𑀧𑀬𑀼𑀚𑁆𑀚𑀫𑀸𑀦𑁂𑀧𑀺 𑀢𑀼𑀮𑁆𑀬𑀸𑀥𑀺𑀓𑀭𑀡𑁂 𑀉𑀢𑁆𑀢𑀫𑀧𑀼𑀭𑀺𑀲𑁄 𑀳𑁄𑀢𑀺.

𑀅𑀳𑀁 𑀬𑀚𑀸𑀫𑀺, 𑀫𑀬𑀁 𑀬𑀚𑀸𑀫.

𑀅𑀧𑁆𑀧𑀬𑀼𑀚𑁆𑀚𑀫𑀸𑀦𑁂𑀧𑀺 𑁋 𑀬𑀚𑀸𑀫𑀺, 𑀬𑀚𑀸𑀫.

𑀢𑀼𑀮𑁆𑀬𑀸𑀥𑀺𑀓𑀭𑀡𑁂𑀢𑀺 𑀓𑀺𑀫𑀢𑁆𑀣𑀁? 𑀫𑀬𑀸 𑀇𑀚𑁆𑀚𑀢𑁂 𑀩𑀼𑀤𑁆𑀥𑁄.

𑁪𑁧𑁩. , 𑁪𑁨𑁭. 𑀓𑀸𑀮𑁂.

‘‘𑀓𑀸𑀮𑁂’’ 𑀇𑀘𑁆𑀘𑁂𑀢𑀁 𑀅𑀥𑀺𑀓𑀸𑀭𑀢𑁆𑀣𑀁 𑀯𑁂𑀤𑀺𑀢𑀩𑁆𑀩𑀁.

𑁪𑁧𑁪. , 𑁪𑁨𑁮. 𑀯𑀢𑁆𑀢𑀫𑀸𑀦𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑁂.

𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀓𑀸𑀮𑁂 𑀯𑀢𑁆𑀢𑀫𑀸𑀦𑀸𑀯𑀺𑀪𑀢𑁆𑀢𑀺 𑀳𑁄𑀢𑀺.

𑀧𑀸𑀝𑀮𑀺𑀧𑀼𑀢𑁆𑀢𑀁 𑀕𑀘𑁆𑀙𑀢𑀺, 𑀲𑀸𑀯𑀢𑁆𑀣𑀺𑀁 𑀧𑀯𑀺𑀲𑀢𑀺.

𑁪𑁧𑁫. , 𑁪𑁫𑁧. 𑀆𑀡𑀢𑁆𑀬𑀸 𑀲𑀺𑀝𑁆𑀞𑁂’𑀦𑀼𑀢𑁆𑀢𑀓𑀸𑀮𑁂 𑀧𑀜𑁆𑀘𑀫𑀻.

𑀆𑀡𑀢𑁆𑀬𑀢𑁆𑀣𑁂 𑀘 𑀆𑀲𑀻𑀲𑀢𑁆𑀣𑁂 𑀘 𑀅𑀦𑀼𑀢𑁆𑀢𑀓𑀸𑀮𑁂 𑀧𑀜𑁆𑀘𑀫𑀻 𑀯𑀺𑀪𑀢𑁆𑀢𑀺 𑀳𑁄𑀢𑀺.

𑀓𑀭𑁄𑀢𑀼 𑀓𑀼𑀲𑀮𑀁, 𑀲𑀼𑀔𑀁 𑀢𑁂 𑀳𑁄𑀢𑀼.

𑁪𑁧𑁬. , 𑁪𑁫𑁪. 𑀅𑀦𑀼𑀫𑀢𑀺𑀧𑀭𑀺𑀓𑀧𑁆𑀧𑀢𑁆𑀣𑁂𑀲𑀼 𑀲𑀢𑁆𑀢𑀫𑀻.

𑀅𑀦𑀼𑀫𑀢𑁆𑀬𑀢𑁆𑀣𑁂 𑀘 𑀧𑀭𑀺𑀓𑀧𑁆𑀧𑀢𑁆𑀣𑁂 𑀘 𑀅𑀦𑀼𑀢𑁆𑀢𑀓𑀸𑀮𑁂 𑀲𑀢𑁆𑀢𑀫𑀻 𑀯𑀺𑀪𑀢𑁆𑀢𑀺 𑀳𑁄𑀢𑀺.

𑀢𑁆𑀯𑀁 𑀕𑀘𑁆𑀙𑁂𑀬𑁆𑀬𑀸𑀲𑀺, 𑀓𑀺𑀫𑀳𑀁 𑀓𑀭𑁂𑀬𑁆𑀬𑀸𑀫𑀺.

𑁪𑁧𑁭. , 𑁪𑁬𑁦. 𑀅𑀧𑀘𑁆𑀘𑀓𑁆𑀔𑁂 𑀧𑀭𑁄𑀓𑁆𑀔𑀸𑀢𑀻𑀢𑁂.

𑀅𑀧𑀘𑁆𑀘𑀓𑁆𑀔𑁂 𑀅𑀢𑀻𑀢𑁂 𑀓𑀸𑀮𑁂 𑀧𑀭𑁄𑀓𑁆𑀔𑀸𑀯𑀺𑀪𑀢𑁆𑀢𑀺 𑀳𑁄𑀢𑀺.

𑀲𑀼𑀧𑀺𑀦𑁂 𑀓𑀺𑀮𑀫𑀸𑀳, 𑀏𑀯𑀁 𑀓𑀺𑀮 𑀧𑁄𑀭𑀸𑀡𑀸𑀳𑀼.

𑁪𑁧𑁮. , 𑁪𑁫𑁬. 𑀳𑀺𑀬𑁆𑀬𑁄𑀧𑀪𑀼𑀢𑀺 𑀧𑀘𑁆𑀘𑀓𑁆𑀔𑁂 𑀳𑀺𑀬𑁆𑀬𑀢𑁆𑀢𑀦𑀻.

𑀳𑀺𑀬𑁆𑀬𑁄𑀧𑀪𑀼𑀢𑀺 𑀅𑀢𑀻𑀢𑁂 𑀓𑀸𑀮𑁂 𑀧𑀘𑁆𑀘𑀓𑁆𑀔𑁂 𑀯𑀸 𑀅𑀧𑀘𑁆𑀘𑀓𑁆𑀔𑁂 𑀯𑀸 𑀳𑀺𑀬𑁆𑀬𑀢𑁆𑀢𑀦𑀻 𑀯𑀺𑀪𑀢𑁆𑀢𑀺 𑀳𑁄𑀢𑀺.

𑀲𑁄 𑀅𑀕𑀫𑀸 𑀫𑀕𑁆𑀕𑀁, 𑀢𑁂 𑀅𑀕𑀫𑀽 𑀫𑀕𑁆𑀕𑀁.

𑁪𑁧𑁯. , 𑁪𑁬𑁯. 𑀲𑀫𑀻𑀧𑁂’𑀚𑁆𑀚𑀢𑀦𑀻.

𑀅𑀚𑁆𑀚𑀧𑁆𑀧𑀪𑀼𑀢𑀺 𑀅𑀢𑀻𑀢𑁂 𑀓𑀸𑀮𑁂 𑀧𑀘𑁆𑀘𑀓𑁆𑀔𑁂 𑀯𑀸 𑀅𑀧𑀘𑁆𑀘𑀓𑁆𑀔𑁂 𑀯𑀸 𑀲𑀫𑀻𑀧𑁂 𑀅𑀚𑁆𑀚𑀢𑀦𑀻𑀯𑀺𑀪𑀢𑁆𑀢𑀺 𑀳𑁄𑀢𑀺.

𑀲𑁄 𑀫𑀕𑁆𑀕𑀁 𑀅𑀕𑀫𑀻, 𑀢𑁂 𑀫𑀕𑁆𑀕𑀁 𑀅𑀕𑀫𑀼𑀁.

𑁪𑁨𑁦. , 𑁪𑁭𑁧. 𑀫𑀸𑀬𑁄𑀕𑁂 𑀲𑀩𑁆𑀩𑀓𑀸𑀮𑁂 𑀘.

𑀳𑀺𑀬𑁆𑀬𑀢𑁆𑀢𑀦𑀻𑀅𑀚𑁆𑀚𑀢𑀦𑀻𑀇𑀘𑁆𑀘𑁂𑀢𑀸 𑀯𑀺𑀪𑀢𑁆𑀢𑀺𑀬𑁄 𑀬𑀤𑀸 𑀫𑀸𑀬𑁄𑀕𑀸, 𑀢𑀤𑀸 𑀲𑀩𑁆𑀩𑀓𑀸𑀮𑁂 𑀘 𑀳𑁄𑀦𑁆𑀢𑀺.

𑀫𑀸 𑀕𑀫𑀸, 𑀫𑀸 𑀯𑀘𑀸, 𑀫𑀸 𑀕𑀫𑀻, 𑀫𑀸 𑀯𑀘𑀻.

𑀘𑀕𑁆𑀕𑀳𑀡𑁂𑀦 𑀧𑀜𑁆𑀘𑀫𑀻𑀯𑀺𑀪𑀢𑁆𑀢𑀺𑀧𑀺 𑀳𑁄𑀢𑀺. 𑀫𑀸 𑀕𑀘𑁆𑀙𑀸𑀳𑀺.

𑁪𑁨𑁧. , 𑁪𑁭𑁩. 𑀅𑀦𑀸𑀕𑀢𑁂 𑀪𑀯𑀺𑀲𑁆𑀲𑀦𑁆𑀢𑀻.

𑀅𑀦𑀸𑀕𑀢𑁂 𑀓𑀸𑀮𑁂 𑀪𑀯𑀺𑀲𑁆𑀲𑀦𑁆𑀢𑀻 𑀯𑀺𑀪𑀢𑁆𑀢𑀺 𑀳𑁄𑀢𑀺.

𑀲𑁄 𑀕𑀘𑁆𑀙𑀺𑀲𑁆𑀲𑀢𑀺, 𑀓𑀭𑀺𑀲𑁆𑀲𑀢𑀺. 𑀢𑁂 𑀕𑀘𑁆𑀙𑀺𑀲𑁆𑀲𑀦𑁆𑀢𑀺, 𑀓𑀭𑀺𑀲𑁆𑀲𑀦𑁆𑀢𑀺.

𑁪𑁨𑁨. , 𑁪𑁭𑁫. 𑀓𑁆𑀭𑀺𑀬𑀸𑀢𑀺𑀧𑀦𑁆𑀦𑁂’𑀢𑀻𑀢𑁂 𑀓𑀸𑀮𑀸𑀢𑀺𑀧𑀢𑁆𑀢𑀺.

𑀓𑁆𑀭𑀺𑀬𑀸𑀢𑀺𑀧𑀦𑁆𑀦𑀫𑀢𑁆𑀢𑁂 𑀅𑀢𑀻𑀢𑁂 𑀓𑀸𑀮𑁂 𑀓𑀸𑀮𑀸𑀢𑀺𑀧𑀢𑁆𑀢𑀺 𑀯𑀺𑀪𑀢𑁆𑀢𑀺 𑀳𑁄𑀢𑀺.

𑀲𑁄 𑀘𑁂 𑀢𑀁 𑀬𑀸𑀦𑀁 𑀅𑀮𑀪𑀺𑀲𑁆𑀲𑀸, 𑀅𑀕𑀘𑁆𑀙𑀺𑀲𑁆𑀲𑀸. 𑀢𑁂 𑀘𑁂 𑀢𑀁 𑀬𑀸𑀦𑀁 𑀅𑀮𑀪𑀺𑀲𑁆𑀲𑀁𑀲𑀼, 𑀅𑀕𑀘𑁆𑀙𑀺𑀲𑁆𑀲𑀁𑀲𑀼.

𑁪𑁨𑁩. , 𑁪𑁨𑁬. 𑀯𑀢𑁆𑀢𑀫𑀸𑀦𑀸 𑀢𑀺 𑀅𑀦𑁆𑀢𑀺, 𑀲𑀺 𑀣, 𑀫𑀺 𑀫, 𑀢𑁂 𑀅𑀦𑁆𑀢𑁂, 𑀲𑁂 𑀯𑁆𑀳𑁂, 𑀏 𑀫𑁆𑀳𑁂.

𑀯𑀢𑁆𑀢𑀫𑀸𑀦𑀸 𑀇𑀘𑁆𑀘𑁂𑀲𑀸 𑀲𑀜𑁆𑀜𑀸 𑀳𑁄𑀢𑀺 𑀢𑀺 𑀅𑀦𑁆𑀢𑀺, 𑀲𑀺 𑀣, 𑀫𑀺 𑀫, 𑀢𑁂 𑀅𑀦𑁆𑀢𑁂, 𑀲𑁂 𑀯𑁆𑀳𑁂, 𑀏 𑀫𑁆𑀳𑁂 𑀇𑀘𑁆𑀘𑁂𑀢𑁂𑀲𑀁 𑀤𑁆𑀯𑀸𑀤𑀲𑀦𑁆𑀦𑀁 𑀧𑀤𑀸𑀦𑀁.

𑀯𑀢𑁆𑀢𑀫𑀸𑀦𑀸 𑀇𑀘𑁆𑀘𑀦𑁂𑀦 𑀓𑁆𑀯𑀢𑁆𑀣𑁄? 𑀯𑀢𑁆𑀢𑀫𑀸𑀦𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑁂.

𑁪𑁨𑁪. , 𑁪𑁫𑁦. 𑀧𑀜𑁆𑀘𑀫𑀻 𑀢𑀼 𑀅𑀦𑁆𑀢𑀼, 𑀳𑀺𑀣, 𑀫𑀺𑀫, 𑀢𑀁 𑀅𑀦𑁆𑀢𑀁, 𑀲𑁆𑀲𑀼 𑀯𑁆𑀳𑁄, 𑀏 𑀆𑀫𑀲𑁂.

𑀧𑀜𑁆𑀘𑀫𑀻𑀇𑀘𑁆𑀘𑁂𑀲𑀸 𑀲𑀜𑁆𑀜𑀸 𑀳𑁄𑀢𑀺 𑀢𑀼 𑀅𑀦𑁆𑀢𑀼, 𑀳𑀺 𑀣, 𑀫𑀺𑀫, 𑀢𑀁 𑀅𑀦𑁆𑀢𑀁, 𑀲𑁆𑀲𑀼 𑀯𑁆𑀳𑁄, 𑀏 𑀆𑀫𑀲𑁂 𑀇𑀘𑁆𑀘𑁂𑀢𑁂𑀲𑀁 𑀤𑁆𑀯𑀸𑀤𑀲𑀦𑁆𑀦𑀁 𑀧𑀤𑀸𑀦𑀁.

𑀧𑀜𑁆𑀘𑀫𑀻𑀇𑀘𑁆𑀘𑀦𑁂𑀦 𑀓𑁆𑀯𑀢𑁆𑀣𑁄? 𑀆𑀡𑀢𑁆𑀬𑀸𑀲𑀺𑀝𑁆𑀞𑁂, 𑀦𑀼𑀢𑁆𑀢𑀓𑀸𑀮𑁂 𑀧𑀜𑁆𑀘𑀫𑀻.

𑁪𑁨𑁫. , 𑁪𑁫𑁩. 𑀲𑀢𑁆𑀢𑀫𑀻 𑀏𑀬𑁆𑀬 𑀏𑀬𑁆𑀬𑀼𑀁, 𑀏𑀬𑁆𑀬𑀸 𑀲𑀺 𑀏𑀬𑁆𑀬𑀸 𑀣, 𑀏𑀬𑁆𑀬𑀸𑀫𑀺 𑀏𑀬𑁆𑀬𑀸𑀫, 𑀏𑀣 𑀏𑀭𑀁, 𑀏𑀣𑁄 𑀏𑀬𑁆𑀬𑀸𑀯𑁆𑀳𑁄, 𑀏𑀬𑁆𑀬𑀁 𑀏𑀬𑁆𑀬𑀸𑀫𑁆𑀳𑁂.

𑀲𑀢𑁆𑀢𑀫𑀻 𑀇𑀘𑁆𑀘𑁂𑀲𑀸 𑀲𑀜𑁆𑀜𑀸 𑀳𑁄𑀢𑀺 𑀏𑀬𑁆𑀬 𑀏𑀬𑁆𑀬𑀼𑀁, 𑀏𑀬𑁆𑀬𑀸𑀲𑀺 𑀏𑀬𑁆𑀬𑀸𑀣, 𑀏𑀬𑁆𑀬𑀸𑀫𑀺 𑀏𑀬𑁆𑀬𑀸𑀫, 𑀏𑀣 𑀏𑀭𑀁, 𑀏𑀣𑁄, 𑀏𑀬𑁆𑀬𑀸𑀯𑁆𑀳𑁄, 𑀏𑀬𑁆𑀬𑀁 𑀏𑀬𑁆𑀬𑀸𑀫𑁆𑀳𑁂 𑀇𑀘𑁆𑀘𑁂𑀢𑁂𑀲𑀁 𑀤𑁆𑀯𑀸𑀤𑀲𑀦𑁆𑀦𑀁 𑀧𑀤𑀸𑀦𑀁.

𑀲𑀢𑁆𑀢𑀫𑀻 𑀇𑀘𑁆𑀘𑀦𑁂𑀦 𑀓𑁆𑀯𑀢𑁆𑀣𑁄? 𑀅𑀦𑀼𑀫𑀢𑀺𑀧𑀭𑀺𑀓𑀧𑁆𑀧𑀢𑁆𑀣𑁂𑀲𑀼 𑀲𑀢𑁆𑀢𑀫𑀻.

𑁪𑁨𑁬. , 𑁪𑁫𑁯. 𑀧𑀭𑁄𑀓𑁆𑀔𑀸 𑀅𑀉 𑀏𑀢𑁆𑀣, 𑀅𑀁𑀫𑁆𑀳, 𑀢𑁆𑀣𑀭𑁂, 𑀢𑁆𑀣𑁄 𑀯𑁆𑀳𑁄, 𑀇𑀁 𑀫𑁆𑀳𑁂.

𑀧𑀭𑁄𑀓𑁆𑀔𑀸 𑀇𑀘𑁆𑀘𑁂𑀲𑀸 𑀲𑀜𑁆𑀜𑀸 𑀳𑁄𑀢𑀺 𑀅 𑀉, 𑀏𑀢𑁆𑀣, 𑀅𑀁 𑀫𑁆𑀳, 𑀢𑁆𑀣 𑀭𑁂 𑀢𑁆𑀣𑁄 𑀯𑁆𑀳𑁄, 𑀇𑀁 𑀫𑁆𑀳𑁂 𑀇𑀘𑁆𑀘𑁂𑀢𑁂𑀲𑀁 𑀤𑁆𑀯𑀸𑀤𑀲𑀦𑁆𑀦𑀁 𑀧𑀤𑀸𑀦𑀁.

𑀧𑀭𑁄𑀓𑁆𑀔𑀸 𑀇𑀘𑁆𑀘𑀦𑁂𑀦 𑀓𑁆𑀯𑀢𑁆𑀣𑁄? 𑀅𑀧𑀘𑁆𑀘𑀓𑁆𑀔𑁂 𑀧𑀭𑁄𑀓𑁆𑀔𑀸𑀢𑀻𑀢𑁂.

𑁪𑁨𑁭. , 𑁪𑁫𑁫. 𑀳𑀺𑀬𑁆𑀬𑀢𑁆𑀢𑀦𑀻 𑀆𑀊, 𑀑𑀢𑁆𑀣, 𑀅𑀁𑀫𑁆𑀳𑀸, 𑀢𑁆𑀣𑀢𑁆𑀣𑀼𑀁, 𑀲𑁂 𑀯𑁆𑀳𑀁, 𑀇𑀁 𑀫𑁆𑀳𑀲𑁂.

𑀳𑀺𑀬𑁆𑀬𑀢𑁆𑀢𑀦𑀻 𑀇𑀘𑁆𑀘𑁂𑀲𑀸 𑀲𑀜𑁆𑀜𑀸 𑀳𑁄𑀢𑀺 𑀆 𑀊, 𑀑 𑀢𑁆𑀣, 𑀅𑀁 𑀫𑁆𑀳𑀸, 𑀢𑁆𑀣 𑀢𑁆𑀣𑀼𑀁, 𑀲𑁂 𑀯𑁆𑀳𑀁, 𑀇𑀁 𑀫𑁆𑀳𑀲𑁂 𑀇𑀘𑁆𑀘𑁂𑀢𑁂𑀲𑀁 𑀤𑁆𑀯𑀸𑀤𑀲𑀦𑁆𑀦𑀁 𑀧𑀤𑀸𑀦𑀁.

𑀳𑀺𑀬𑁆𑀬𑀢𑁆𑀢𑀦𑀻 𑀇𑀘𑁆𑀘𑀦𑁂𑀦 𑀓𑁆𑀯𑀢𑁆𑀣𑁄? 𑀳𑀺𑀬𑁆𑀬𑁄𑀧𑀪𑀼𑀢𑀺 𑀧𑀘𑁆𑀘𑀓𑁆𑀔𑁂 𑀳𑀺𑀬𑁆𑀬𑀢𑁆𑀢𑀦𑀻.

𑁪𑁨𑁮. , 𑁪𑁬𑁮. 𑀅𑀚𑁆𑀚𑀢𑀦𑀻 𑀈 𑀉𑀁, 𑀑 𑀢𑁆𑀣, 𑀇𑀁 𑀫𑁆𑀳𑀸, 𑀆 𑀊, 𑀲𑁂 𑀯𑁆𑀳𑀁, 𑀅𑀁 𑀫𑁆𑀳𑁂.

𑀅𑀚𑁆𑀚𑀢𑀦𑀻 𑀇𑀘𑁆𑀘𑁂𑀲𑀸 𑀲𑀜𑁆𑀜𑀸 𑀳𑁄𑀢𑀺 𑀈 𑀉𑀁, 𑀑 𑀢𑁆𑀣, 𑀇𑀁𑀫𑁆𑀳𑀸, 𑀆 𑀊, 𑀲𑁂𑀯𑁆𑀳𑀁, 𑀅𑀁 𑀫𑁆𑀳𑁂 𑀇𑀘𑁆𑀘𑁂𑀢𑁂𑀲𑀁 𑀤𑁆𑀯𑀸𑀤𑀲𑀦𑁆𑀦𑀁 𑀧𑀤𑀸𑀦𑀁.

𑀅𑀚𑁆𑀚𑀢𑀦𑀻 𑀇𑀘𑁆𑀘𑀦𑁂𑀦 𑀓𑁆𑀯𑀢𑁆𑀣𑁄? 𑀲𑀫𑀻𑀧𑁂𑀚𑁆𑀚𑀢𑀦𑀻.

𑁪𑁨𑁯. , 𑁪𑁭𑁨. 𑀪𑀯𑀺𑀲𑁆𑀲𑀦𑁆𑀢𑀻 𑀲𑁆𑀲𑀢𑀺 𑀲𑁆𑀲𑀦𑁆𑀢𑀺, 𑀲𑁆𑀲𑀲𑀺 𑀲𑁆𑀲𑀣, 𑀲𑁆𑀲𑀸𑀫𑀺 𑀲𑁆𑀲𑀸𑀫, 𑀲𑁆𑀲𑀢𑁂 𑀲𑁆𑀲𑀦𑁆𑀢𑁂, 𑀲𑁆𑀲𑀲𑁂 𑀲𑁆𑀲𑀯𑁆𑀳𑁂, 𑀲𑁆𑀲𑀁 𑀲𑁆𑀲𑀸𑀫𑁆𑀳𑁂.

𑀪𑀯𑀺𑀲𑁆𑀲𑀦𑁆𑀢𑀻 𑀇𑀘𑁆𑀘𑁂𑀲𑀸 𑀲𑀜𑁆𑀜𑀸 𑀳𑁄𑀢𑀺 𑀲𑁆𑀲𑀢𑀺 𑀲𑁆𑀲𑀦𑁆𑀢𑀺, 𑀲𑁆𑀲𑀲𑀺 𑀲𑁆𑀲𑀣, 𑀲𑁆𑀲𑀸𑀫𑀺 𑀲𑁆𑀲𑀸𑀫, 𑀲𑁆𑀲𑀢𑁂 𑀲𑁆𑀲𑀦𑁆𑀢𑁂, 𑀲𑁆𑀲𑀲𑁂 𑀲𑁆𑀲𑀯𑁆𑀳𑁂, 𑀲𑁆𑀲𑀁 𑀲𑁆𑀲𑀸𑀫𑁆𑀳𑁂 𑀇𑀘𑁆𑀘𑁂𑀢𑁂𑀲𑀁 𑀤𑁆𑀯𑀸𑀤𑀲𑀦𑁆𑀦𑀁 𑀧𑀤𑀸𑀦𑀁.

𑀪𑀯𑀺𑀲𑁆𑀲𑀦𑁆𑀢𑀻 𑀇𑀘𑁆𑀘𑀦𑁂𑀦 𑀓𑁆𑀯𑀢𑁆𑀣𑁄? 𑀅𑀦𑀸𑀕𑀢𑁂 𑀪𑀯𑀺𑀲𑁆𑀲𑀦𑁆𑀢𑀻.

𑁪𑁩𑁦. , 𑁩𑁭𑁩. 𑀓𑀸𑀮𑀸𑀢𑀺𑀧𑀢𑁆𑀢𑀺 𑀲𑁆𑀲𑀸 𑀲𑁆𑀲𑀁𑀲𑀼, 𑀲𑁆𑀲𑁂 𑀲𑁆𑀲𑀣, 𑀲𑁆𑀲𑀁 𑀲𑁆𑀲𑀸𑀫𑁆𑀳𑀸, 𑀲𑁆𑀲𑀣 𑀲𑀺𑀲𑁆𑀲𑀼, 𑀲𑁆𑀲𑀲𑁂 𑀲𑁆𑀲𑀯𑁆𑀳𑁂, 𑀲𑁆𑀲𑀺𑀁 𑀲𑁆𑀲𑀸𑀫𑁆𑀳𑀲𑁂.

𑀓𑀸𑀮𑀸𑀢𑀺𑀧𑀢𑁆𑀢𑀺 𑀇𑀘𑁆𑀘𑁂𑀲𑀸 𑀲𑀜𑁆𑀜𑀸 𑀳𑁄𑀢𑀺 𑀲𑁆𑀲𑀸 𑀲𑁆𑀲𑀁𑀲𑀼, 𑀲𑁆𑀲𑁂 𑀲𑁆𑀲𑀣, 𑀲𑁆𑀲𑀁 𑀲𑁆𑀲𑀸𑀫𑁆𑀳𑀸, 𑀲𑁆𑀲𑀣 𑀲𑁆𑀲𑀺𑀲𑀼, 𑀲𑁆𑀲𑀲𑁂 𑀲𑁆𑀲𑀯𑁆𑀳𑁂, 𑀲𑁆𑀲𑀺𑀁 𑀲𑁆𑀲𑀸𑀫𑁆𑀳𑀲𑁂 𑀇𑀘𑁆𑀘𑁂𑀢𑁂𑀲𑀁 𑀤𑁆𑀯𑀸𑀤𑀲𑀦𑁆𑀦𑀁 𑀧𑀤𑀸𑀦𑀁.

𑀓𑀸𑀮𑀸𑀢𑀺𑀧𑀢𑁆𑀢𑀺 𑀇𑀘𑁆𑀘𑀦𑁂𑀦 𑀓𑁆𑀯𑀢𑁆𑀣𑁄? 𑀓𑁆𑀭𑀺𑀬𑀸𑀢𑀺𑀧𑀦𑁆𑀦𑁂’ 𑀢𑀻𑀢𑁂 𑀓𑀸𑀮𑀸𑀢𑀺𑀧𑀢𑁆𑀢𑀺.

𑁪𑁩𑁧. , 𑁪𑁫𑁮. 𑀳𑀺𑀬𑁆𑀬𑀢𑁆𑀢𑀦𑀻 𑀲𑀢𑁆𑀢𑀫𑀻 𑀧𑀜𑁆𑀘𑀫𑀻 𑀯𑀢𑁆𑀢𑀫𑀸𑀦𑀸 𑀲𑀩𑁆𑀩𑀥𑀸𑀢𑀼𑀓𑀁.

𑀳𑀺𑀬𑁆𑀬𑀢𑁆𑀢𑀦𑀸𑀤𑀬𑁄 𑀘𑀢𑀲𑁆𑀲𑁄 𑀯𑀺𑀪𑀢𑁆𑀢𑀺𑀬𑁄 𑀲𑀩𑁆𑀩𑀥𑀸𑀢𑀼𑀓 𑀲𑀜𑁆𑀜𑀸 𑀳𑁄𑀦𑁆𑀢𑀺.

𑀅𑀕𑀫𑀸, 𑀕𑀘𑁆𑀙𑁂𑀬𑁆𑀬, 𑀕𑀘𑁆𑀙𑀢𑀼, 𑀕𑀘𑁆𑀙𑀢𑀺.

𑀲𑀩𑁆𑀩𑀥𑀸𑀢𑀼𑀓 𑀇𑀘𑁆𑀘𑀦𑁂𑀦 𑀓𑁆𑀯𑀢𑁆𑀣𑁄? 𑀇𑀓𑀸𑀭𑀸𑀕𑀫𑁄 𑀅𑀲𑀩𑁆𑀩𑀥𑀸𑀢𑀼𑀓𑀫𑁆𑀳𑀺.

𑀇𑀢𑀺 𑀆𑀔𑁆𑀬𑀸𑀢𑀓𑀧𑁆𑀧𑁂 𑀧𑀞𑀫𑁄 𑀓𑀡𑁆𑀟𑁄.

𑀤𑀼𑀢𑀺𑀬𑀓𑀡𑁆𑀟

𑁪𑁩𑁨. , 𑁩𑁬𑁨. 𑀥𑀸𑀢𑀼𑀮𑀺𑀗𑁆𑀕𑁂𑀳𑀺 𑀧𑀭𑀸 𑀧𑀘𑁆𑀘𑀬𑀸.

𑀥𑀸𑀢𑀼𑀮𑀺𑀗𑁆𑀕𑀇𑀘𑁆𑀘𑁂𑀢𑁂𑀳𑀺 𑀧𑀭𑀸 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺.

𑀓𑀭𑁄𑀢𑀺, 𑀕𑀘𑁆𑀙𑀢𑀺. 𑀬𑁄 𑀓𑁄𑀘𑀺 𑀓𑀭𑁄𑀢𑀺, 𑀢𑀁 𑀅𑀜𑁆𑀜𑁄 ‘‘𑀓𑀭𑁄𑀳𑀺 𑀓𑀭𑁄𑀳𑀺’’ 𑀇𑀘𑁆𑀘𑁂𑀯𑀁 𑀩𑁆𑀭𑀯𑀻𑀢𑀺, 𑀅𑀣 𑀯𑀸 𑀓𑀭𑁄𑀦𑁆𑀢𑀁 𑀧𑀬𑁄𑀚𑀬𑀢𑀺 = 𑀓𑀸𑀭𑁂𑀢𑀺. 𑀲𑀗𑁆𑀖𑁄 𑀧𑀩𑁆𑀩𑀢𑀫𑀺𑀯 𑀅𑀢𑁆𑀢𑀸𑀦𑀫𑀸𑀘𑀭𑀢𑀺 = 𑀧𑀩𑁆𑀩𑀢𑀸𑀬𑀢𑀺. 𑀢𑀴𑀸𑀓𑀁 𑀲𑀫𑀼𑀤𑁆𑀤𑀫𑀺𑀯 𑀅𑀢𑁆𑀢𑀸𑀦𑀫𑀸𑀘𑀭𑀢𑀺 = 𑀲𑀫𑀼𑀤𑁆𑀤𑀸𑀬𑀢𑀺, 𑀲𑀤𑁆𑀤𑁄 𑀘𑀺𑀘𑁆𑀘𑀺𑀝𑀫𑀺𑀯 𑀅𑀢𑁆𑀢𑀸𑀦𑀫𑀸𑀘𑀭𑀢𑀺 = 𑀘𑀺𑀘𑁆𑀘𑀺𑀝𑀸𑀬𑀢𑀺, 𑀯𑀲𑀺𑀝𑁆𑀞𑀲𑁆𑀲 𑀅𑀧𑀘𑁆𑀘𑀁 𑀯𑀸𑀲𑀺𑀝𑁆𑀞𑁄. 𑀏𑀯𑀫𑀜𑁆𑀜𑁂𑀧𑀺 𑀬𑁄𑀚𑁂𑀢𑀩𑁆𑀩𑀸.

𑁪𑁩𑁩. , 𑁫𑁨𑁮. 𑀢𑀺𑀚 𑀕𑀼𑀧 𑀓𑀺𑀢 𑀫𑀸𑀦𑁂 𑀳𑀺 𑀔 𑀙 𑀲𑀸 𑀯𑀸.

𑀢𑀺𑀚 𑀕𑀼𑀧 𑀓𑀺𑀢 𑀫𑀸𑀦𑀼 𑀇𑀘𑁆𑀘𑁂𑀢𑁂𑀳𑀺 𑀥𑀸𑀢𑀽𑀳𑀺 𑀔 𑀙 𑀲 𑀇𑀘𑁆𑀘𑁂𑀢𑁂 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀯𑀸.

𑀢𑀺𑀢𑀺𑀓𑁆𑀔𑀢𑀺, 𑀚𑀺𑀕𑀼𑀘𑁆𑀙𑀢𑀺, 𑀢𑀺𑀓𑀺𑀘𑁆𑀙𑀢𑀺, 𑀯𑀻𑀫𑀁𑀲𑀢𑀺.

𑀯𑀸𑀢𑀺 𑀓𑀺𑀫𑀢𑁆𑀣𑀁? 𑀢𑁂𑀚𑀢𑀺, 𑀕𑁄𑀧𑀢𑀺, 𑀫𑀸𑀦𑁂𑀢𑀺.

𑁪𑁩𑁪. , 𑁫𑁩𑁪. 𑀪𑀼𑀚 𑀖𑀲 𑀳𑀭 𑀲𑀼 𑀧𑀸𑀤𑀻𑀳𑀺 𑀢𑀼𑀫𑀺𑀘𑁆𑀙𑀢𑁆𑀣𑁂𑀲𑀼.

𑀪𑀼𑀚 𑀖𑀲 𑀳𑀭 𑀲𑀼 𑀧𑀸𑀇𑀘𑁆𑀘𑁂𑀯𑀫𑀸𑀤𑀻𑀳𑀺 𑀥𑀸𑀢𑀽𑀳𑀺 𑀢𑀼𑀫𑀺𑀘𑁆𑀙𑀢𑁆𑀣𑁂𑀲𑀼 𑀔 𑀙 𑀲𑀇𑀘𑁆𑀘𑁂𑀢𑁂 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀯𑀸.

𑀪𑁄𑀢𑁆𑀢𑀼𑀫𑀺𑀘𑁆𑀙𑀢𑀺=𑀩𑀼𑀪𑀼𑀓𑁆𑀔𑀢𑀺, 𑀖𑀲𑀺𑀢𑀼𑀫𑀺𑀘𑁆𑀙𑀢𑀺=𑀚𑀺𑀖𑀘𑁆𑀙𑀢𑀺, 𑀳𑀭𑀺𑀢𑀼𑀫𑀺𑀘𑁆𑀙𑀢𑀺=𑀚𑀺𑀕𑀻𑀲𑀢𑀺, 𑀲𑁄𑀢𑀼𑀫𑀺𑀘𑁆𑀙𑀢𑀺=𑀲𑀼𑀲𑁆𑀲𑀼𑀲𑀢𑀺, 𑀧𑀸𑀢𑀼𑀫𑀺𑀘𑁆𑀙𑀢𑀺=𑀧𑀺𑀯𑀸𑀲𑀢𑀺.

𑀯𑀸𑀢𑀺 𑀓𑀺𑀫𑀢𑁆𑀣𑀁? 𑀪𑁄𑀢𑁆𑀢𑀼𑀫𑀺𑀘𑁆𑀙𑀢𑀺.

𑀢𑀼𑀫𑀺𑀘𑁆𑀙𑀢𑁆𑀣𑁂𑀲𑀽𑀢𑀺 𑀓𑀺𑀫𑀢𑁆𑀣𑀁? 𑀪𑀼𑀜𑁆𑀚𑀢𑀺.

𑁪𑁩𑁫. , 𑁫𑁩𑁬. 𑀆𑀬 𑀦𑀸𑀫𑀢𑁄 𑀓𑀢𑁆𑀢𑀽𑀧𑀫𑀸𑀦𑀸𑀤𑀸𑀘𑀸𑀭𑁂.

𑀦𑀸𑀫𑀢𑁄 𑀓𑀢𑁆𑀢𑀽𑀧𑀫𑀸𑀦𑀸 𑀆𑀘𑀸𑀭𑀢𑁆𑀣𑁂 𑀆𑀬𑀧𑀘𑁆𑀘𑀬𑁄 𑀳𑁄𑀢𑀺.

𑀲𑀗𑁆𑀖𑁄 𑀧𑀩𑁆𑀩𑀢𑀫𑀺𑀯 𑀅𑀢𑁆𑀢𑀸𑀦𑀫𑀸𑀘𑀭𑀢𑀺 = 𑀧𑀩𑁆𑀩𑀢𑀸𑀬𑀢𑀺, 𑀢𑀴𑀸𑀓𑀁 𑀲𑀫𑀼𑀤𑁆𑀤𑀫𑀺𑀯 𑀅𑀢𑁆𑀢𑀸𑀦𑀫𑀸𑀘𑀭𑀢𑀺 = 𑀲𑀫𑀼𑀤𑁆𑀤𑀸𑀬𑀢𑀺, 𑀲𑀤𑁆𑀤𑁄 𑀘𑀺𑀘𑁆𑀘𑀺𑀝𑀫𑀺𑀯 𑀅𑀢𑁆𑀢𑀸𑀦𑀫𑀸𑀘𑀭𑀢𑀺 = 𑀘𑀺𑀘𑁆𑀘𑀺𑀝𑀸𑀬𑀢𑀺. 𑀏𑀯𑀫𑀜𑁆𑀜𑁂𑀧𑀺 𑀬𑁄𑀚𑁂𑀢𑀩𑁆𑀩𑀸.

𑁪𑁩𑁬. , 𑁫𑁩𑁭. 𑀈𑀬𑀽𑀧𑀫𑀸𑀦𑀸 𑀘.

𑀦𑀸𑀫𑀢𑁄 𑀉𑀧𑀫𑀸𑀦𑀸 𑀆𑀘𑀸𑀭𑀢𑁆𑀣𑁂 𑀘 𑀈𑀬𑀧𑀘𑁆𑀘𑀬𑁄 𑀳𑁄𑀢𑀺.

𑀅𑀙𑀢𑁆𑀢𑀁 𑀙𑀢𑁆𑀢𑀫𑀺𑀯 𑀆𑀘𑀭𑀢𑀺 =𑀙𑀢𑁆𑀢𑀻𑀬𑀢𑀺, 𑀅𑀧𑀼𑀢𑁆𑀢𑀁 𑀧𑀼𑀢𑁆𑀢𑀫𑀺𑀯 𑀆𑀘𑀭𑀢𑀺=𑀧𑀼𑀢𑁆𑀢𑀻𑀬𑀢𑀺.

𑀉𑀧𑀫𑀸𑀦𑀸𑀢𑀺 𑀓𑀺𑀫𑀢𑁆𑀣𑀁? 𑀥𑀫𑁆𑀫𑀁 𑀆𑀘𑀭𑀢𑀺.

𑀆𑀘𑀸𑀭𑁂𑀢𑀺 𑀓𑀺𑀫𑀢𑁆𑀣𑀁? 𑀅𑀙𑀢𑁆𑀢𑀁 𑀙𑀢𑁆𑀢𑀫𑀺𑀯 𑀭𑀓𑁆𑀔𑀢𑀺. 𑀏𑀯𑀫𑀜𑁆𑀜𑁂𑀧𑀺 𑀬𑁄𑀚𑁂𑀢𑀩𑁆𑀩𑀸.

𑁪𑁩𑁭. , 𑁫𑁩𑁮. 𑀦𑀸𑀫𑀫𑁆𑀳𑀸’𑀢𑁆𑀢𑀺𑀘𑁆𑀙𑀢𑁆𑀣𑁂.

𑀦𑀸𑀫𑀫𑁆𑀳𑀸 𑀅𑀢𑁆𑀢𑀦𑁄 𑀇𑀘𑁆𑀙𑀢𑁆𑀣𑁂 𑀈𑀬𑀧𑀘𑁆𑀘𑀬𑁄 𑀳𑁄𑀢𑀺.

𑀅𑀢𑁆𑀢𑀦𑁄 𑀧𑀢𑁆𑀢𑀫𑀺𑀘𑁆𑀙𑀢𑀺 = 𑀧𑀢𑁆𑀢𑀻𑀬𑀢𑀺. 𑀏𑀯𑀁 𑀯𑀢𑁆𑀣𑀻𑀬𑀢𑀺, 𑀧𑀭𑀺𑀓𑁆𑀔𑀸𑀭𑀻𑀬𑀢𑀺, 𑀘𑀻𑀯𑀭𑀻𑀬𑀢𑀺, 𑀥𑀦𑀻𑀬𑀢𑀺, 𑀖𑀝𑀻𑀬𑀢𑀺.

𑀅𑀢𑁆𑀢𑀺𑀘𑁆𑀙𑀢𑁆𑀣𑁂𑀢𑀺 𑀓𑀺𑀫𑀢𑁆𑀣𑀁? 𑀅𑀜𑁆𑀜𑀲𑁆𑀲 𑀧𑀢𑁆𑀢𑀫𑀺𑀘𑁆𑀙𑀢𑀺. 𑀏𑀯𑀫𑀜𑁆𑀜𑁂𑀧𑀺 𑀬𑁄𑀚𑁂𑀢𑀩𑁆𑀩𑀸.

𑁪𑁩𑁮. , 𑁫𑁪𑁦. 𑀥𑀸𑀢𑀽𑀳𑀺 𑀡𑁂 𑀡𑀬 𑀡𑀸𑀧𑁂 𑀡𑀸𑀧𑀬𑀸 𑀓𑀸𑀭𑀺𑀢𑀸𑀦𑀺 𑀳𑁂𑀢𑁆𑀯𑀢𑁆𑀣𑁂.

𑀲𑀩𑁆𑀩𑁂𑀳𑀺 𑀥𑀸𑀢𑀽𑀳𑀺 𑀡𑁂𑀡𑀬 𑀡𑀸𑀧𑁂 𑀡𑀸𑀧𑀬𑀇𑀘𑁆𑀘𑁂𑀢𑁂 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀓𑀸𑀭𑀺𑀢𑀲𑀜𑁆𑀜𑀸 𑀘 𑀳𑁂𑀢𑁆𑀯𑀢𑁆𑀣𑁂.

𑀬𑁄 𑀓𑁄𑀘𑀺 𑀓𑀭𑁄𑀢𑀺, 𑀢𑀁 𑀅𑀜𑁆𑀜𑁄 ‘‘𑀓𑀭𑁄𑀳𑀺 𑀓𑀭𑁄𑀳𑀺’’ 𑀇𑀘𑁆𑀘𑁂𑀯𑀁 𑀩𑁆𑀭𑀯𑀻𑀢𑀺, 𑀅𑀣 𑀯𑀸 𑀓𑀭𑁄𑀦𑁆𑀢𑀁 𑀧𑀬𑁄𑀚𑀬𑀢𑀺 = 𑀓𑀸𑀭𑁂𑀢𑀺, 𑀓𑀸𑀭𑀬𑀢𑀺, 𑀓𑀸𑀭𑀸𑀧𑁂𑀢𑀺, 𑀓𑀸𑀭𑀸 𑀧𑀬𑀢𑀺. 𑀬𑁂 𑀓𑁂𑀘𑀺 𑀓𑀭𑁄𑀦𑁆𑀢𑀺, 𑀢𑁂 𑀅𑀜𑁆𑀜𑁂 ‘‘𑀓𑀭𑁄𑀣 𑀓𑀭𑁄𑀣’’ 𑀇𑀘𑁆𑀘𑁂𑀯𑀁 𑀩𑁆𑀭𑀼𑀯𑀦𑁆𑀢𑀺 = 𑀓𑀸𑀭𑁂𑀦𑁆𑀢𑀺, 𑀓𑀸𑀭𑀬𑀦𑁆𑀢𑀺, 𑀓𑀸𑀭𑀸𑀧𑁂𑀦𑁆𑀢𑀺, 𑀓𑀸𑀭𑀸𑀧𑀬𑀦𑁆𑀢𑀺. 𑀬𑁄 𑀓𑁄𑀘𑀺 𑀧𑀘𑀢𑀺, 𑀢𑀁 𑀅𑀜𑁆𑀜𑁄 ‘‘𑀧𑀘𑀸𑀳𑀺 𑀧𑀘𑀸𑀳𑀺’’𑀇𑀘𑁆𑀘𑁂𑀯𑀁 𑀩𑁆𑀭𑀯𑀻𑀢𑀺, 𑀅𑀣 𑀯𑀸 𑀧𑀘𑀦𑁆𑀢𑀁 𑀧𑀬𑁄𑀚𑀬𑀢𑀺 = 𑀧𑀸𑀘𑁂𑀢𑀺, 𑀧𑀸𑀘𑀬𑀢𑀺, 𑀧𑀸𑀘𑀸𑀧𑁂𑀢𑀺, 𑀧𑀸𑀘𑀸𑀧𑀬𑀢𑀺. 𑀬𑁂 𑀓𑁂𑀘𑀺 𑀧𑀘𑀦𑁆𑀢𑀺, 𑀢𑁂 𑀅𑀜𑁆𑀜𑁂 ‘‘𑀧𑀘𑀣 𑀧𑀘𑀣’’ 𑀇𑀘𑁆𑀘𑁂𑀯𑀁 𑀩𑁆𑀭𑀼𑀯𑀦𑁆𑀢𑀺 = 𑀧𑀸𑀘𑁂𑀦𑁆𑀢𑀺, 𑀧𑀸𑀘𑀬𑀦𑁆𑀢𑀺, 𑀧𑀸𑀘𑀸𑀧𑁂𑀦𑁆𑀢𑀺. 𑀧𑀸𑀘𑀸𑀧𑀬𑀦𑁆𑀢𑀺. 𑀏𑀯𑀁 𑀪𑀡𑁂𑀢𑀺, 𑀪𑀡𑀬𑀢𑀺, 𑀪𑀡𑀸𑀧𑁂𑀢𑀺, 𑀪𑀡𑀸𑀧𑀬𑀢𑀺. 𑀪𑀡𑁂𑀦𑁆𑀢𑀺, 𑀪𑀡𑀬𑀦𑁆𑀢𑀺, 𑀪𑀡𑀸𑀧𑁂𑀦𑁆𑀢𑀺, 𑀪𑀡𑀸𑀧𑀬𑀦𑁆𑀢𑀺. 𑀢𑀣𑀭𑀺𑀯 𑀅𑀜𑁆𑀜𑁂𑀧𑀺 𑀬𑁄𑀚𑁂𑀢𑀩𑁆𑀩𑀸.

𑀳𑁂𑀢𑁆𑀯𑀢𑁆𑀣𑁂𑀢𑀺 𑀓𑀺𑀫𑀢𑁆𑀣𑀁? 𑀓𑀭𑁄𑀢𑀺, 𑀧𑀘𑀢𑀺.

𑀅𑀢𑁆𑀣𑀕𑁆𑀕𑀳𑀡𑁂𑀦 𑀅𑀮𑀧𑀘𑁆𑀘𑀬𑁄 𑀳𑁄𑀢𑀺, 𑀚𑁄𑀢𑀮𑀢𑀺.

𑁪𑁩𑁯. , 𑁫𑁩𑁯. 𑀥𑀸𑀢𑀼𑀭𑀽𑀧𑁂 𑀦𑀸𑀫𑀲𑁆𑀫𑀸 𑀡𑀬𑁄 𑀘.

𑀢𑀲𑁆𑀫𑀸 𑀦𑀸𑀫𑀲𑁆𑀫𑀸 𑀡𑀬𑀧𑀘𑁆𑀘𑀬𑁄 𑀳𑁄𑀢𑀺 𑀓𑀸𑀭𑀺𑀢𑀲𑀜𑁆𑀜𑁄 𑀘 𑀥𑀸𑀢𑀼𑀭𑀽𑀧𑁂 𑀲𑀢𑀺.

𑀳𑀢𑁆𑀣𑀺𑀦𑀸 𑀅𑀢𑀺𑀓𑁆𑀓𑀫𑀢𑀺 𑀫𑀕𑁆𑀕𑀁 = 𑀅𑀢𑀺𑀳𑀢𑁆𑀣𑀬𑀢𑀺, 𑀯𑀻𑀡𑀸𑀬 𑀉𑀧𑀕𑀸𑀬𑀢𑀺 𑀕𑀻𑀢𑀁 = 𑀉𑀧𑀯𑀻𑀡𑀬𑀢𑀺, 𑀤𑀴𑁆𑀳𑀁 𑀓𑀭𑁄𑀢𑀺 𑀯𑀻𑀭𑀺𑀬𑀁 = 𑀤𑀴𑁆𑀳𑀬𑀢𑀺, 𑀯𑀺𑀲𑀼𑀤𑁆𑀥𑀸 𑀳𑁄𑀢𑀺 𑀭𑀢𑁆𑀢𑀺 = 𑀯𑀺𑀲𑀼𑀤𑁆𑀥𑀬𑀢𑀺.

𑀘𑀕𑁆𑀕𑀳𑀡𑁂𑀦 𑀆𑀭 𑀆𑀮𑀇𑀘𑁆𑀘𑁂𑀢𑁂 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺. 𑀲𑀦𑁆𑀢𑀁 𑀓𑀭𑁄𑀢𑀺 = 𑀲𑀦𑁆𑀢𑀸𑀭𑀢𑀺, 𑀉𑀧𑀓𑁆𑀓𑀫𑀁 𑀓𑀭𑁄𑀢𑀺 = 𑀉𑀧𑀓𑁆𑀓𑀫𑀸𑀮𑀢𑀺.

𑁪𑁪𑁦. , 𑁪𑁪𑁫. 𑀪𑀸𑀯𑀓𑀫𑁆𑀫𑁂𑀲𑀼 𑀬𑁄.

𑀲𑀩𑁆𑀩𑁂𑀳𑀺 𑀥𑀸𑀢𑀽𑀳𑀺 𑀪𑀸𑀯𑀓𑀫𑁆𑀫𑁂𑀲𑀼 𑀬𑀧𑀘𑁆𑀘𑀬𑁄 𑀳𑁄𑀢𑀺.

𑀞𑀻𑀬𑀢𑁂, 𑀩𑀼𑀚𑁆𑀛𑀢𑁂, 𑀧𑀘𑁆𑀘𑀢𑁂, 𑀮𑀩𑁆𑀪𑀢𑁂, 𑀓𑀭𑀻𑀬𑀢𑁂, 𑀬𑀼𑀚𑁆𑀚𑀢𑁂, 𑀉𑀘𑁆𑀘𑀢𑁂.

𑀪𑀸𑀯𑀓𑀫𑁆𑀫𑁂𑀲𑀽𑀢𑀺 𑀓𑀺𑀫𑀢𑁆𑀣𑀁? 𑀓𑀭𑁄𑀢𑀺, 𑀧𑀘𑀢𑀺, 𑀧𑀞𑀢𑀺.

𑁪𑁪𑁧. , 𑁪𑁪𑁭. 𑀢𑀲𑁆𑀲 𑀘𑀯𑀕𑁆𑀕𑀬𑀓𑀸𑀭𑀯𑀓𑀸𑀭𑀢𑁆𑀢𑀁 𑀲𑀥𑀸𑀢𑁆𑀯𑀦𑁆𑀢𑀲𑁆𑀲.

𑀢𑀲𑁆𑀲 𑀬𑀧𑀘𑁆𑀘𑀬𑀲𑁆𑀲 𑀘𑀯𑀕𑁆𑀕𑀬𑀓𑀸𑀭𑀯𑀓𑀸𑀭𑀢𑁆𑀢𑀁 𑀳𑁄𑀢𑀺 𑀥𑀸𑀢𑀽𑀦𑀁 𑀅𑀦𑁆𑀢𑁂𑀦 𑀲𑀳 𑀬𑀣𑀸𑀲𑀫𑁆𑀪𑀯𑀁.

𑀯𑀼𑀘𑁆𑀘𑀢𑁂, 𑀯𑀼𑀘𑁆𑀘𑀦𑁆𑀢𑁂, 𑀉𑀘𑁆𑀘𑀢𑁂, 𑀉𑀘𑁆𑀘𑀦𑁆𑀢𑁂, 𑀧𑀘𑁆𑀘𑀢𑁂, 𑀧𑀘𑁆𑀘𑀦𑁆𑀢𑁂. 𑀫𑀚𑁆𑀚𑀢𑁂, 𑀫𑀚𑁆𑀚𑀦𑁆𑀢𑁂, 𑀬𑀼𑀚𑁆𑀚𑀢𑁂, 𑀬𑀼𑀚𑁆𑀚𑀦𑁆𑀢𑁂. 𑀩𑀼𑀚𑁆𑀛𑀢𑁂, 𑀩𑀼𑀚𑁆𑀛𑀦𑁆𑀢𑁂, 𑀓𑀼𑀚𑁆𑀛𑀢𑁂, 𑀓𑀼𑀚𑁆𑀛𑀦𑁆𑀢𑁂, 𑀉𑀚𑁆𑀛𑀢𑁂, 𑀉𑀚𑁆𑀛𑀦𑁆𑀢𑁂. 𑀳𑀜𑁆𑀜𑀢𑁂, 𑀳𑀜𑁆𑀜𑀦𑁆𑀢𑁂. 𑀓𑀬𑁆𑀬𑀢𑁂, 𑀓𑀬𑁆𑀬𑀦𑁆𑀢𑁂. 𑀤𑀺𑀩𑁆𑀩𑀢𑁂, 𑀤𑀺𑀩𑁆𑀩𑀦𑁆𑀢𑁂.

𑁪𑁪𑁨. , 𑁪𑁪𑁮. 𑀇𑀯𑀡𑁆𑀡𑀸𑀕𑀫𑁄 𑀯𑀸.

𑀲𑀩𑁆𑀩𑁂𑀳𑀺 𑀥𑀸𑀢𑀽𑀳𑀺 𑀬𑀫𑁆𑀳𑀺 𑀧𑀘𑁆𑀘𑀬𑁂, 𑀧𑀭𑁂 𑀇𑀯𑀡𑁆𑀡𑀸𑀕𑀫𑁄 𑀳𑁄𑀢𑀺 𑀯𑀸.

𑀓𑀭𑀻𑀬𑀢𑁂, 𑀓𑀭𑀻𑀬𑀢𑀺, 𑀕𑀘𑁆𑀙𑀻𑀬𑀢𑁂, 𑀕𑀘𑁆𑀙𑀻𑀬𑀢𑀺.

𑀯𑀸𑀢𑀺 𑀓𑀺𑀫𑀢𑁆𑀣𑀁? 𑀓𑀬𑁆𑀬𑀢𑁂.

𑁪𑁪𑁩. , 𑁪𑁪𑁯. 𑀧𑀼𑀩𑁆𑀩𑀭𑀽𑀧𑀜𑁆𑀘.