𑁭. 𑀓𑀺𑀩𑁆𑀩𑀺𑀥𑀸𑀦𑀓𑀧𑁆𑀧

𑀧𑀞𑀫𑀓𑀡𑁆𑀟

(𑀓)

𑀩𑀼𑀤𑁆𑀥𑀁 𑀜𑀸𑀡𑀲𑀫𑀼𑀤𑁆𑀤𑀁, 𑀲𑀩𑁆𑀩𑀜𑁆𑀜𑀼𑀁 𑀮𑁄𑀓𑀳𑁂𑀢𑀼’𑀔𑀻𑀡𑀫𑀢𑀺𑀁;

𑀯𑀦𑁆𑀤𑀺𑀢𑁆𑀯𑀸 𑀧𑀼𑀩𑁆𑀩𑀫𑀳𑀁, 𑀯𑀓𑁆𑀔𑀸𑀫𑀺 𑀲𑀲𑀸𑀥𑀦𑀁 𑀳𑀺 𑀓𑀺𑀢𑀓𑀧𑁆𑀧𑀁.

(𑀔)

𑀲𑀸𑀥𑀦𑀫𑀽𑀮𑀁 𑀳𑀺 𑀧𑀬𑁄𑀕𑀁,

𑀆𑀳𑀼 𑀧𑀬𑁄𑀕𑀫𑀽𑀮𑀫𑀢𑁆𑀣𑀜𑁆𑀘;

𑀅𑀢𑁆𑀣𑁂𑀲𑀼 𑀯𑀺𑀲𑀸𑀭𑀤𑀫𑀢𑀬𑁄,

𑀲𑀸𑀲𑀦𑀲𑁆𑀲𑀼𑀥𑀭𑀸 𑀚𑀺𑀦𑀲𑁆𑀲 𑀫𑀢𑀸.

(𑀕)

𑀅𑀦𑁆𑀥𑁄 𑀤𑁂𑀲𑀓𑀯𑀺𑀓𑀮𑁄,

𑀖𑀢𑀫𑀥𑀼𑀢𑁂𑀮𑀸𑀦𑀺 𑀪𑀸𑀚𑀦𑁂𑀦 𑀯𑀺𑀦𑀸;

𑀦𑀝𑁆𑀞𑁄 𑀦𑀝𑁆𑀞𑀸𑀦𑀺 𑀬𑀣𑀸,

𑀧𑀬𑁄𑀕𑀯𑀺𑀓𑀮𑁄 𑀢𑀣𑀸 𑀅𑀢𑁆𑀣𑁄.

(𑀖)

𑀢𑀲𑁆𑀫𑀸 𑀲𑀁𑀭𑀓𑁆𑀔𑀡𑀢𑁆𑀣𑀁, 𑀫𑀼𑀦𑀺𑀯𑀘𑀦𑀢𑁆𑀣𑀲𑁆𑀲 𑀤𑀼𑀮𑁆𑀮𑀪𑀲𑁆𑀲𑀸𑀳𑀁;

𑀯𑀓𑁆𑀔𑀸𑀫𑀺 𑀲𑀺𑀲𑁆𑀲𑀓𑀳𑀺𑀢𑀁, 𑀓𑀺𑀢𑀓𑀧𑁆𑀧𑀁 𑀲𑀸𑀥𑀦𑁂𑀦 𑀬𑀼𑀢𑀁.

𑁫𑁨𑁪. , 𑁫𑁬𑁧. 𑀥𑀸𑀢𑀼𑀬𑀸 𑀓𑀫𑁆𑀫𑀸𑀤𑀺𑀫𑁆𑀳𑀺 𑀡𑁄.

𑀥𑀸𑀢𑀼𑀬𑀸 𑀓𑀫𑁆𑀫𑀸𑀤𑀺𑀫𑁆𑀳𑀺 𑀡𑀧𑀘𑁆𑀘𑀬𑁄 𑀳𑁄𑀢𑀺.

𑀓𑀫𑁆𑀫𑀁 𑀓𑀭𑁄𑀢𑀻𑀢𑀺 𑀓𑀫𑁆𑀫𑀓𑀸𑀭𑁄, 𑀏𑀯𑀁 𑀓𑀼𑀫𑁆𑀪𑀓𑀸𑀭𑁄, 𑀫𑀸𑀮𑀸𑀓𑀸𑀭𑁄, 𑀓𑀝𑁆𑀞𑀓𑀸𑀭𑁄, 𑀭𑀣𑀓𑀸𑀭𑁄, 𑀭𑀚𑀢𑀓𑀸𑀭𑁄, 𑀲𑀼𑀯𑀡𑁆𑀡𑀓𑀸𑀭𑁄, 𑀧𑀢𑁆𑀢𑀕𑁆𑀕𑀸𑀳𑁄, 𑀢𑀦𑁆𑀢𑀯𑀸𑀬𑁄, 𑀥𑀜𑁆𑀜𑀫𑀸𑀬𑁄, 𑀥𑀫𑁆𑀫𑀓𑀸𑀫𑁄, 𑀥𑀫𑁆𑀫𑀘𑀸𑀭𑁄.

𑁫𑁨𑁫. , 𑁫𑁬𑁫. 𑀲𑀜𑁆𑀜𑀸𑀬𑀫 𑀦𑀼.

𑀲𑀜𑁆𑀜𑀸𑀬𑀫𑀪𑀺𑀥𑁂𑀬𑁆𑀬𑀸𑀬𑀁 𑀥𑀸𑀢𑀼𑀬𑀸 𑀓𑀫𑁆𑀫𑀸𑀤𑀺𑀫𑁆𑀳𑀺 𑀅𑀓𑀸𑀭𑀧𑀘𑁆𑀘𑀬𑁄 𑀳𑁄𑀢𑀺, 𑀦𑀸𑀫𑀫𑁆𑀳𑀺 𑀘 𑀦𑀼𑀓𑀸𑀭𑀸𑀕𑀫𑁄 𑀳𑁄𑀢𑀺.

𑀅𑀭𑀺𑀁 𑀤𑀫𑁂𑀢𑀻𑀢𑀺 𑀅𑀭𑀺𑀦𑁆𑀤𑀫𑁄, 𑀭𑀸𑀚𑀸. 𑀯𑁂𑀲𑁆𑀲𑀁 𑀢𑀭𑀢𑀻𑀢𑀺 𑀯𑁂𑀲𑁆𑀲𑀦𑁆𑀢𑀭𑁄, 𑀭𑀸𑀚𑀸. 𑀢𑀡𑁆𑀳𑀁 𑀓𑀭𑁄𑀢𑀻𑀢𑀺 𑀢𑀡𑁆𑀳𑀗𑁆𑀓𑀭𑁄, 𑀪𑀕𑀯𑀸. 𑀫𑁂𑀥𑀁 𑀓𑀭𑁄𑀢𑀻𑀢𑀺 𑀫𑁂𑀥𑀗𑁆𑀓𑀭𑁄, 𑀪𑀕𑀯𑀸. 𑀲𑀭𑀡𑀁 𑀓𑀭𑁄𑀢𑀻𑀢𑀺 𑀲𑀭𑀡𑀗𑁆𑀓𑀭𑁄, 𑀪𑀕𑀯𑀸. 𑀤𑀻𑀧𑀁 𑀓𑀭𑁄𑀢𑀻𑀢𑀺 𑀤𑀻𑀧𑀗𑁆𑀓𑀭𑁄, 𑀪𑀕𑀯𑀸.

𑁫𑁨𑁬. , 𑁫𑁬𑁭. 𑀧𑀼𑀭𑁂 𑀤𑀤𑀸 𑀘 𑀇𑀁.

𑀧𑀼𑀭𑀲𑀤𑁆𑀤𑁂 𑀆𑀤𑀺𑀫𑁆𑀳𑀺 𑀤𑀤𑀇𑀘𑁆𑀘𑁂𑀢𑀸𑀬 𑀥𑀸𑀢𑀼𑀬𑀸 𑀅𑀓𑀸𑀭𑀧𑀘𑁆𑀘𑀬𑁄 𑀳𑁄𑀢𑀺, 𑀧𑀼𑀭𑀲𑀤𑁆𑀤𑀲𑁆𑀲 𑀅𑀓𑀸𑀭𑀲𑁆𑀲 𑀘 𑀇𑀁 𑀳𑁄𑀢𑀺.

𑀧𑀼𑀭𑁂 𑀤𑀸𑀦𑀁 𑀅𑀤𑀸𑀲𑀻𑀢𑀺 𑀧𑀼𑀭𑀺𑀦𑁆𑀤𑀤𑁄 𑀤𑁂𑀯𑀭𑀸𑀚𑀸.

𑁫𑁨𑁭. , 𑁫𑁬𑁮. 𑀲𑀩𑁆𑀩𑀢𑁄 𑀡𑁆𑀯𑀼 𑀢𑁆𑀯𑀸𑀯𑀻 𑀯𑀸.

𑀲𑀩𑁆𑀩𑀢𑁄 𑀥𑀸𑀢𑀼𑀢𑁄 𑀓𑀫𑁆𑀫𑀸𑀤𑀺𑀫𑁆𑀳𑀺 𑀯𑀸 𑀅𑀓𑀫𑁆𑀫𑀸𑀤𑀺𑀫𑁆𑀳𑀺 𑀯𑀸 𑀅𑀓𑀸𑀭 𑀡𑁆𑀯𑀼 𑀢𑀼 𑀆𑀯𑀻𑀇𑀘𑁆𑀘𑁂𑀢𑁂 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺.

𑀢𑀁 𑀓𑀭𑁄𑀢𑀻𑀢𑀺 𑀢𑀓𑁆𑀓𑀭𑁄, 𑀳𑀺𑀢𑀁 𑀓𑀭𑁄𑀢𑀻𑀢𑀺 𑀳𑀺𑀢𑀓𑀭𑁄, 𑀯𑀺𑀦𑁂𑀢𑀺 𑀏𑀢𑁆𑀣, 𑀏𑀢𑁂𑀦𑀸𑀢𑀺 𑀯𑀸 𑀯𑀺𑀦𑀬𑁄 𑀦𑀺𑀲𑁆𑀲𑀸𑀬 𑀦𑀁 𑀯𑀲𑀢𑀻𑀢𑀺 𑀦𑀺𑀲𑁆𑀲𑀬𑁄.

𑀡𑁆𑀯𑀼𑀫𑁆𑀳𑀺 𑁋 𑀭𑀣𑀁 𑀓𑀭𑁄𑀢𑀻𑀢𑀺 𑀭𑀣𑀓𑀸𑀭𑀓𑁄, 𑀅𑀦𑁆𑀦𑀁, 𑀤𑀤𑀸𑀢𑀻𑀢𑀺 𑀅𑀦𑁆𑀦𑀤𑀸𑀬𑀓𑁄, 𑀯𑀺𑀦𑁂𑀢𑀺 𑀲𑀢𑁆𑀢𑁂𑀢𑀺 𑀯𑀺𑀦𑀸𑀬𑀓𑁄, 𑀓𑀭𑁄𑀢𑀻𑀢𑀺 𑀓𑀸𑀭𑀓𑁄, 𑀤𑀤𑀸𑀢𑀻𑀢𑀺 𑀤𑀸𑀬𑀓𑁄, 𑀦𑁂𑀢𑀻𑀢𑀺 𑀦𑀸𑀬𑀓𑁄.

𑀢𑀼𑀫𑁆𑀳𑀺 𑁋 𑀢𑀁 𑀓𑀭𑁄𑀢𑀻𑀢𑀺 𑀢𑀓𑁆𑀓𑀢𑁆𑀢𑀸, 𑀢𑀲𑁆𑀲 𑀓𑀢𑁆𑀢𑀸𑀢𑀺 𑀯𑀸 𑀢𑀓𑁆𑀓𑀢𑁆𑀢𑀸. 𑀪𑁄𑀚𑀦𑀁 𑀤𑀤𑀸𑀢𑀻𑀢𑀺 𑀪𑁄𑀚𑀦𑀤𑀸𑀢𑀸, 𑀪𑁄𑀚𑀦𑀲𑁆𑀲 𑀤𑀸𑀢𑀸𑀢𑀺 𑀯𑀸 𑀪𑁄𑀚𑀦𑀤𑀸𑀢𑀸. 𑀓𑀭𑁄𑀢𑀻𑀢𑀺 𑀓𑀢𑁆𑀢𑀸. 𑀲𑀭𑀢𑀻𑀢𑀺 𑀲𑀭𑀺𑀢𑀸.

𑀆𑀯𑀻𑀫𑁆𑀳𑀺 𑁋 𑀪𑀬𑀁 𑀧𑀲𑁆𑀲𑀢𑀻𑀢𑀺 𑀪𑀬𑀤𑀲𑁆𑀲𑀸𑀯𑀻 𑀇𑀘𑁆𑀘𑁂𑀯𑀫𑀸𑀤𑀺.

𑁫𑁨𑁮. , 𑁫𑁭𑁭. 𑀯𑀺𑀲 𑀭𑀼𑀚 𑀧𑀤𑀸𑀤𑀺𑀢𑁄 𑀡.

𑀯𑀺𑀲 𑀭𑀼𑀚 𑀧𑀤𑀇𑀘𑁆𑀘𑁂𑀯𑀫𑀸𑀤𑀻𑀳𑀺 𑀥𑀸𑀢𑀽𑀳𑀺 𑀡 𑀧𑀘𑁆𑀘𑀬𑁄 𑀳𑁄𑀢𑀺.

𑀧𑀯𑀺𑀲𑀢𑀻𑀢𑀺 𑀧𑀯𑁂𑀲𑁄, 𑀭𑀼𑀚𑀢𑀻𑀢𑀺 𑀭𑁄𑀕𑁄, 𑀉𑀧𑁆𑀧𑀚𑁆𑀚𑀢𑀻𑀢𑀺 𑀉𑀧𑁆𑀧𑀸𑀤𑁄, 𑀨𑀼𑀲𑀢𑀻𑀢𑀺 𑀨𑀲𑁆𑀲𑁄, 𑀉𑀘𑀢𑀻𑀢𑀺 𑀑𑀓𑁄, 𑀪𑀯𑀢𑀻𑀢𑀺 𑀪𑀸𑀯𑁄, 𑀅𑀬𑀢𑀻𑀢𑀺 𑀆𑀬𑁄, 𑀲𑀫𑁆𑀫𑀸 𑀩𑀼𑀚𑁆𑀛𑀢𑀻𑀢𑀺 𑀲𑀫𑁆𑀩𑁄𑀥𑁄, 𑀯𑀺𑀳𑀭𑀢𑀻𑀢𑀺 𑀯𑀺𑀳𑀸𑀭𑁄.

𑁫𑁨𑁯. , 𑁫𑁮𑁦. 𑀪𑀸𑀯𑁂 𑀘.

𑀪𑀸𑀯𑀢𑁆𑀣𑀸𑀪𑀺𑀥𑁂𑀬𑁆𑀬𑁂 𑀲𑀩𑁆𑀩𑀥𑀸𑀢𑀽𑀳𑀺 𑀡𑀧𑀘𑁆𑀘𑀬𑁄 𑀳𑁄𑀢𑀺.

𑀧𑀘𑁆𑀘𑀢𑁂, 𑀧𑀘𑀦𑀁 𑀯𑀸 𑀧𑀸𑀢𑁄, 𑀘𑀚𑀢𑁂, 𑀘𑀚𑀦𑀁 𑀯𑀸 𑀘𑀸𑀕𑁄, 𑀏𑀯𑀁 𑀬𑀸𑀕𑁄, 𑀬𑁄𑀕𑁄, 𑀪𑀸𑀕𑁄, 𑀧𑀭𑀺𑀤𑀸𑀳𑁄.

𑁫𑁩𑁦. , 𑁫𑁮𑁪. 𑀓𑁆𑀯𑀺 𑀘.

𑀲𑀩𑁆𑀩𑀥𑀸𑀢𑀽𑀳𑀺 𑀓𑁆𑀯𑀺𑀧𑀘𑁆𑀘𑀬𑁄 𑀳𑁄𑀢𑀺.

𑀲𑀫𑁆𑀪𑀯𑀢𑀻𑀢𑀺 𑀲𑀫𑁆𑀪𑀽, 𑀯𑀺𑀲𑁂𑀲𑁂𑀦 𑀪𑀯𑀢𑀻𑀢𑀺 𑀯𑀺𑀪𑀽, 𑀪𑀼𑀚𑁂𑀦 𑀕𑀘𑁆𑀙𑀢𑀻𑀢𑀺 𑀪𑀼𑀚𑀕𑁄, 𑀲𑀁 𑀅𑀢𑁆𑀢𑀸𑀦𑀁 𑀔𑀦𑀢𑀺, 𑀲𑀁 𑀲𑀝𑁆𑀞𑀼 𑀔𑀦𑀢𑀻𑀢𑀺 𑀯𑀸 𑀲𑀗𑁆𑀔𑁄.

𑁫𑁩𑁧. , 𑁫𑁮𑁯. 𑀥𑀭𑀸𑀤𑀻𑀳𑀺 𑀭𑀫𑁆𑀫𑁄.

𑀥𑀭𑀇𑀘𑁆𑀘𑁂𑀯𑀫𑀸𑀤𑀻𑀳𑀺 𑀥𑀸𑀢𑀽𑀳𑀺 𑀭𑀫𑁆𑀫𑀧𑀘𑁆𑀘𑀬𑁄 𑀳𑁄𑀢𑀺.

𑀥𑀭𑀢𑀺 𑀢𑁂𑀦𑀸𑀢𑀺 𑀥𑀫𑁆𑀫𑁄, 𑀓𑀭𑀻𑀬𑀢𑁂 𑀢𑀦𑁆𑀢𑀺 𑀓𑀫𑁆𑀫𑀁.

𑁫𑁩𑁨. , 𑁫𑁯𑁦. 𑀢𑀲𑁆𑀲𑀻𑀮𑀸𑀤𑀻𑀲𑀼 𑀡𑀻𑀢𑁆𑀯𑀸𑀯𑀻 𑀘.

𑀲𑀩𑁆𑀩𑁂𑀳𑀺 𑀥𑀸𑀢𑀽𑀳𑀺 𑀢𑀲𑁆𑀲𑀻𑀮𑀸𑀤𑀻𑀲𑁆𑀯𑀢𑁆𑀣𑁂𑀲𑀼 𑀡𑀻 𑀢𑀼 𑀆𑀯𑀻 𑀇𑀘𑁆𑀘𑁂𑀢𑁂 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺.

𑀧𑀺𑀬𑀁 𑀧𑀲𑀁𑀲𑀺𑀢𑀼𑀁 𑀲𑀻𑀮𑀁 𑀬𑀲𑁆𑀲 𑀭𑀜𑁆𑀜𑁄, 𑀲𑁄 𑀳𑁄𑀢𑀺 𑀭𑀸𑀚𑀸 𑀧𑀺𑀬𑀧𑀲𑀁𑀲𑀻, 𑀩𑁆𑀭𑀳𑁆𑀫𑀁 𑀘𑀭𑀺𑀢𑀼𑀁 𑀲𑀻𑀮𑀁 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑁄 𑀳𑁄𑀢𑀺 𑀧𑀼𑀕𑁆𑀕𑀮𑁄 𑀩𑁆𑀭𑀳𑁆𑀫𑀘𑀸𑀭𑀻, 𑀧𑀲𑀬𑁆𑀳 𑀧𑀯𑀢𑁆𑀢𑀺𑀢𑀼𑀁 𑀲𑀻𑀮𑀁 𑀬𑀲𑁆𑀲 𑀭𑀜𑁆𑀜𑁄, 𑀲𑁄 𑀳𑁄𑀢𑀺 𑀭𑀸𑀚𑀸 𑀧𑀲𑀬𑁆𑀳𑀧𑀯𑀢𑁆𑀣𑀸, 𑀪𑀬𑀁 𑀧𑀲𑁆𑀲𑀺𑀢𑀼𑀁 𑀲𑀻𑀮𑀁 𑀬𑀲𑁆𑀲 𑀲𑀫𑀡𑀲𑁆𑀲, 𑀲𑁄 𑀳𑁄𑀢𑀺 𑀲𑀫𑀡𑁄 𑀪𑀬𑀤𑀲𑁆𑀲𑀸𑀯𑀻 𑀇𑀘𑁆𑀘𑁂𑀯𑀫𑀸𑀤𑀺.

𑁫𑁩𑁩. , 𑁫𑁯𑁧. 𑀲𑀤𑁆𑀤 𑀓𑀼 𑀥 𑀘𑀮 𑀫𑀡𑁆𑀟𑀢𑁆𑀣𑀭𑀼𑀥𑀸𑀤𑀻𑀳𑀺𑀬𑀼.

𑀲𑀤𑁆𑀤 𑀓𑀼𑀥 𑀘𑀮 𑀫𑀡𑁆𑀟𑀢𑁆𑀣𑁂𑀳𑀺 𑀘 𑀭𑀼𑀘𑀸𑀤𑀻𑀳𑀺 𑀘 𑀥𑀸𑀢𑀽𑀳𑀺 𑀬𑀼𑀧𑀘𑁆𑀘𑀬𑁄 𑀳𑁄𑀢𑀺 𑀢𑀲𑁆𑀲𑀻𑀮𑀸𑀤𑀻𑀲𑁆𑀯𑀢𑁆𑀣𑁂𑀲𑀼.

𑀖𑁄𑀲𑀦𑀲𑀻𑀮𑁄 𑀖𑁄𑀲𑀦𑁄, 𑀪𑀸𑀲𑀦𑀲𑀻𑀮𑁄 𑀪𑀸𑀲𑀦𑁄. 𑀏𑀯𑀁 𑀯𑀺𑀕𑁆𑀕𑀳𑁄 𑀓𑀸𑀢𑀩𑁆𑀩𑁄. 𑀓𑁄𑀥𑀦𑁄, 𑀤𑁄𑀲𑀦𑁄, 𑀘𑀮𑀦𑁄, 𑀓𑀫𑁆𑀧𑀦𑁄, 𑀨𑀦𑁆𑀤𑀦𑁄, 𑀫𑀡𑁆𑀟𑀦𑁄, 𑀯𑀺𑀪𑀽𑀲𑀦𑁄, 𑀭𑁄𑀘𑀦𑁄, 𑀚𑁄𑀢𑀦𑁄, 𑀯𑀟𑁆𑀠𑀦𑁄.

𑁫𑁩𑁪. , 𑁫𑁬𑁨. 𑀧𑀸𑀭𑀸𑀤𑀺𑀕𑀫𑀺𑀫𑁆𑀳𑀸 𑀭𑀽.

𑀕𑀫𑀼𑀇𑀘𑁆𑀘𑁂𑀢𑀫𑁆𑀳𑀸 𑀥𑀸𑀢𑀼𑀫𑁆𑀳𑀸 𑀧𑀸𑀭𑀲𑀤𑁆𑀤𑀸𑀤𑀺𑀫𑁆𑀳𑀸 𑀭𑀽𑀧𑀘𑁆𑀘𑀬𑁄 𑀳𑁄𑀢𑀺 𑀢𑀲𑁆𑀲𑀻𑀮𑀸𑀤𑀻𑀲𑁆𑀯𑀢𑁆𑀣𑁂𑀲𑀼.

𑀪𑀯𑀲𑁆𑀲 𑀧𑀸𑀭𑀁 𑀪𑀯𑀧𑀸𑀭𑀁, 𑀪𑀯𑀧𑀸𑀭𑀁 𑀕𑀦𑁆𑀢𑀼𑀁 𑀲𑀻𑀮𑀁 𑀬𑀲𑁆𑀲 𑀧𑀼𑀭𑀺𑀲𑀲𑁆𑀲, 𑀲𑁄 𑀳𑁄𑀢𑀺 𑀧𑀼𑀭𑀺𑀲𑁄 𑀪𑀯𑀧𑀸𑀭𑀕𑀽.

𑀢𑀲𑁆𑀲𑀻𑀮𑀸𑀤𑀻𑀲𑁆𑀯𑀻𑀢𑀺 𑀓𑀺𑀫𑀢𑁆𑀣𑀁? 𑀧𑀸𑀭𑀗𑁆𑀕𑀢𑁄.

𑀧𑀸𑀭𑀸𑀤𑀺𑀕𑀫𑀺𑀫𑁆𑀳𑀸𑀢𑀺 𑀓𑀺𑀫𑀢𑁆𑀣𑀁? 𑀅𑀦𑀼𑀕𑀸𑀫𑀻.

𑁫𑁩𑁫. , 𑁫𑁯𑁩. 𑀪𑀺𑀓𑁆𑀔𑀸𑀤𑀺𑀢𑁄 𑀘.

𑀪𑀺𑀓𑁆𑀔𑀇𑀘𑁆𑀘𑁂𑀯𑀫𑀸𑀤𑀻𑀳𑀺 𑀥𑀸𑀢𑀽𑀳𑀺 𑀭𑀽𑀧𑀘𑁆𑀘𑀬𑁄 𑀳𑁄𑀢𑀺 𑀢𑀲𑁆𑀲𑀻𑀮𑀸𑀤𑀻𑀲𑁆𑀯𑀢𑁆𑀣𑁂𑀲𑀼.

𑀪𑀺𑀓𑁆𑀔𑀦𑀲𑀻𑀮𑁄 𑀬𑀸𑀘𑀦𑀲𑀻𑀮𑁄 𑀪𑀺𑀓𑁆𑀔𑀼, 𑀯𑀺𑀚𑀸𑀦𑀦𑀲𑀻𑀮𑁄 𑀯𑀺𑀜𑁆𑀜𑀽.

𑁫𑁩𑁬. , 𑁫𑁯𑁪. 𑀢𑀦𑀢𑁆𑀬𑀸𑀤𑀻𑀦𑀁 𑀡𑀼𑀓𑁄.

𑀳𑀦𑀢𑁆𑀬𑀸𑀤𑀻𑀦𑀁 𑀥𑀸𑀢𑀽𑀦𑀁 𑀅𑀦𑁆𑀢𑁂 𑀡𑀼𑀓𑀧𑀘𑁆𑀘𑀬𑁄 𑀳𑁄𑀢𑀺 𑀢𑀲𑁆𑀲𑀻𑀮𑀸𑀤𑀻𑀲𑁆𑀯𑀢𑁆𑀣𑁂𑀲𑀼.

𑀆𑀳𑀦𑀦𑀲𑀻𑀮𑁄 𑀆𑀖𑀸𑀢𑀼𑀓𑁄, 𑀓𑀭𑀡𑀲𑀻𑀮𑁄 𑀓𑀸𑀭𑀼𑀓𑁄.

𑁫𑁩𑁭. , 𑁫𑁬𑁬. 𑀦𑀼 𑀦𑀺𑀕𑁆𑀕𑀳𑀺𑀢𑀁 𑀧𑀤𑀦𑁆𑀢𑁂.

𑀧𑀤𑀦𑁆𑀢𑁂 𑀦𑀼𑀓𑀸𑀭𑀸𑀕𑀫𑁄 𑀦𑀺𑀕𑁆𑀕𑀳𑀺𑀢𑀫𑀸𑀧𑀚𑁆𑀚𑀢𑁂.

𑀅𑀭𑀺𑀁 𑀤𑀫𑁂𑀢𑀻𑀢𑀺 𑀅𑀭𑀺𑀦𑁆𑀤𑀫𑁄, 𑀭𑀸𑀚𑀸. 𑀯𑁂𑀲𑁆𑀲𑀁 𑀢𑀭𑀢𑀻𑀢𑀺 𑀯𑁂𑀲𑁆𑀲𑀦𑁆𑀢𑀭𑁄, 𑀭𑀸𑀚𑀸. 𑀧𑀪𑀁 𑀓𑀭𑁄𑀢𑀻𑀢𑀺 𑀧𑀪𑀗𑁆𑀓𑀭𑁄, 𑀪𑀕𑀯𑀸.

𑁫𑁩𑁮. , 𑁫𑁯𑁫. 𑀲𑀁𑀳𑀦𑀸𑀜𑁆𑀜𑀸𑀬 𑀯𑀸 𑀭𑁄 𑀖𑁄.

𑀲𑀁𑀧𑀼𑀩𑁆𑀩𑀸𑀬 𑀳𑀦𑀇𑀘𑁆𑀘𑁂𑀢𑀸𑀬 𑀥𑀸𑀢𑀼𑀬𑀸, 𑀅𑀜𑁆𑀜𑀸𑀬 𑀯𑀸 𑀥𑀸𑀢𑀼𑀬𑀸 𑀭𑀧𑀘𑁆𑀘𑀬𑁄, 𑀳𑀦𑀲𑁆𑀲 𑀘 𑀖𑁄 𑀳𑁄𑀢𑀺.

𑀲𑀫𑀕𑁆𑀕𑀁 𑀓𑀫𑁆𑀫𑀁 𑀲𑀫𑀼𑀧𑀕𑀘𑁆𑀙𑀢𑀻𑀢𑀺 𑀲𑀗𑁆𑀖𑁄, 𑀲𑀫𑀦𑁆𑀢𑀢𑁄 𑀦𑀕𑀭𑀲𑁆𑀲 𑀫𑀸𑀳𑀺𑀭𑁂 𑀔𑀜𑁆𑀜𑀢𑀻𑀢𑀺 𑀧𑀭𑀺𑀔𑀸, 𑀅𑀦𑁆𑀢𑀁 𑀓𑀭𑁄𑀢𑀻𑀢𑀺 𑀅𑀦𑁆𑀢𑀓𑁄.

𑀲𑀁𑀇𑀢𑀺 𑀓𑀺𑀫𑀢𑁆𑀣𑀁? 𑀉𑀧𑀳𑀦𑀦𑀁 𑀉𑀧𑀖𑀸𑀢𑁄.

𑁫𑁩𑁯. , 𑁫𑁫𑁮. 𑀭𑀫𑁆𑀳𑀺 𑀭𑀦𑁆𑀢𑁄 𑀭𑀸𑀤𑀺𑀦𑁄.

𑀭𑀫𑁆𑀳𑀺 𑀧𑀘𑁆𑀘𑀬𑁂 𑀧𑀭𑁂 𑀲𑀩𑁆𑀩𑁄 𑀥𑀸𑀢𑁆𑀯𑀦𑁆𑀢𑁄 𑀭𑀓𑀸𑀭𑀸𑀤𑀺 𑀮𑁄𑀧𑁄 𑀳𑁄𑀢𑀺.

𑀅𑀦𑁆𑀢𑀓𑁄, 𑀧𑀸𑀭𑀕𑀽, 𑀲𑀢𑁆𑀣𑀸, 𑀤𑀺𑀝𑁆𑀞𑁄 𑀇𑀘𑁆𑀘𑁂𑀯𑀫𑀸𑀤𑀺.

𑁫𑁪𑁦. , 𑁫𑁪𑁫. 𑀪𑀸𑀯𑀓𑀫𑁆𑀫𑁂𑀲𑀼 𑀢𑀩𑁆𑀩𑀸𑀦𑀻𑀬𑀸.

𑀪𑀸𑀯𑀓𑀫𑁆𑀫𑀇𑀘𑁆𑀘𑁂𑀢𑁂𑀲𑁆𑀯𑀢𑁆𑀣𑁂𑀲𑀼 𑀢𑀩𑁆𑀩 𑀅𑀦𑀻𑀬𑀇𑀘𑁆𑀘𑁂𑀢𑁂 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀲𑀩𑁆𑀩𑀥𑀸𑀢𑀽𑀳𑀺.

𑀪𑀯𑀺𑀢𑀩𑁆𑀩𑀁, 𑀪𑀯𑀦𑀻𑀬𑀁, 𑀆𑀲𑀺𑀢𑀩𑁆𑀩𑀁, 𑀆𑀲𑀦𑀻𑀬𑀁, 𑀧𑀚𑁆𑀚𑀺𑀢𑀩𑁆𑀩𑀁, 𑀧𑀚𑁆𑀚𑀦𑀻𑀬𑀁, 𑀓𑀢𑁆𑀢𑀩𑁆𑀩𑀁, 𑀓𑀭𑀡𑀻𑀬𑀁, 𑀕𑀦𑁆𑀢𑀩𑁆𑀩𑀁, 𑀕𑀫𑀦𑀻𑀬𑀁.

𑁫𑁪𑁧. , 𑁫𑁫𑁨. 𑀡𑁆𑀬𑁄 𑀘.

𑀪𑀸𑀯𑀓𑀫𑁆𑀫𑁂𑀲𑀼 𑀲𑀩𑁆𑀩𑀥𑀸𑀢𑀽𑀳𑀺 𑀡𑁆𑀬𑀧𑀘𑁆𑀘𑀬𑁄 𑀳𑁄𑀢𑀺.

𑀓𑀢𑁆𑀢𑀩𑁆𑀩𑀁 𑀓𑀸𑀭𑀺𑀬𑀁, 𑀚𑁂𑀢𑀩𑁆𑀩𑀁 𑀚𑁂𑀬𑁆𑀬𑀁, 𑀦𑁂𑀢𑀩𑁆𑀩𑀁 𑀦𑁂𑀬𑁆𑀬𑀁, 𑀇𑀘𑁆𑀘𑁂𑀯𑀫𑀸𑀤𑀺.

𑀘𑀕𑁆𑀕𑀳𑀡𑁂𑀦 𑀢𑁂𑀬𑁆𑀬𑀧𑀘𑁆𑀘𑀬𑁄 𑀳𑁄𑀢𑀺. 𑀜𑀸𑀢𑀩𑁆𑀩𑀁 𑀜𑀸𑀢𑁂𑀬𑁆𑀬𑀁, 𑀤𑀝𑁆𑀞𑁂𑀬𑁆𑀬𑀁, 𑀧𑀢𑁆𑀢𑁂𑀬𑁆𑀬𑀁 𑀇𑀘𑁆𑀘𑁂𑀯𑀫𑀸𑀤𑀺.

𑁫𑁪𑁨. , 𑁫𑁫𑁭. 𑀓𑀭𑀫𑁆𑀳𑀸 𑀭𑀺𑀘𑁆𑀘.

𑀓𑀭𑀇𑀘𑁆𑀘𑁂𑀢𑀫𑁆𑀳𑀸 𑀥𑀸𑀢𑀼𑀫𑁆𑀳𑀸 𑀭𑀺𑀘𑁆𑀘𑀧𑀘𑁆𑀘𑀬𑁄 𑀳𑁄𑀢𑀺 𑀪𑀸𑀯𑀓𑀫𑁆𑀫𑁂𑀲𑀼.

𑀓𑀢𑁆𑀢𑀩𑁆𑀩𑀁 𑀓𑀺𑀘𑁆𑀘𑀁.

𑁫𑁪𑁩. , 𑁫𑁫𑁫. 𑀪𑀽𑀢𑁄’𑀩𑁆𑀩.

𑀪𑀽𑀇𑀘𑁆𑀘𑁂𑀢𑀸𑀬 𑀥𑀸𑀢𑀼𑀬𑀸 𑀡𑁆𑀬𑀧𑀘𑁆𑀘𑀬𑀲𑁆𑀲 𑀊𑀓𑀸𑀭𑁂𑀦 𑀲𑀳 𑀅𑀩𑁆𑀩𑀸𑀤𑁂𑀲𑁄 𑀳𑁄𑀢𑀺 𑀪𑀸𑀯𑀓𑀫𑁆𑀫𑁂𑀲𑀼.

𑀪𑀯𑀺𑀢𑀩𑁆𑀩𑁄 𑀪𑀩𑁆𑀩𑁄, 𑀪𑀯𑀺𑀢𑀩𑁆𑀩𑀁 𑀪𑀩𑁆𑀩𑀁.

𑁫𑁪𑁪. , 𑁫𑁫𑁬. 𑀯𑀤 𑀫𑀤 𑀕𑀫𑀼 𑀬𑀼𑀚 𑀕𑀭𑀳𑀸𑀓𑀸𑀭𑀸𑀤𑀻𑀳𑀺 𑀚𑁆𑀚 𑀫𑁆𑀫 𑀕𑁆𑀕 𑀬𑁆𑀳𑁂𑀬𑁆𑀬𑀸 𑀕𑀸𑀭𑁄 𑀯𑀸.

𑀯𑀤 𑀫𑀤 𑀕𑀫𑀼 𑀬𑀼𑀚 𑀕𑀭𑀳𑀸𑀓𑀸𑀭𑀦𑁆𑀢𑀇𑀘𑁆𑀘𑁂𑀯𑀫𑀸𑀤𑀻𑀳𑀺 𑀥𑀸𑀢𑀽𑀳𑀺 𑀡𑁆𑀬𑀧𑀘𑁆𑀘𑀬𑀲𑁆𑀲 𑀬𑀣𑀸𑀲𑀗𑁆𑀔𑁆𑀬𑀁 𑀚𑁆𑀚 𑀫𑁆𑀫 𑀕𑁆𑀕 𑀬𑁆𑀳 𑀏𑀬𑁆𑀬𑀸𑀤𑁂𑀲𑀸 𑀳𑁄𑀦𑁆𑀢𑀺 𑀯𑀸 𑀥𑀸𑀢𑁆𑀯𑀦𑁆𑀢𑁂𑀦 𑀲𑀳, 𑀕𑀭𑀲𑁆𑀲𑀁 𑀘 𑀕𑀸𑀭𑁄 𑀳𑁄𑀢𑀺 𑀪𑀸𑀯𑀓𑀫𑁆𑀫𑁂𑀲𑀼.

𑀯𑀢𑁆𑀢𑀩𑁆𑀩𑀁 𑀯𑀚𑁆𑀚𑀁, 𑀫𑀤𑀦𑀻𑀬𑀁 𑀫𑀚𑁆𑀚𑀁, 𑀕𑀫𑀦𑀻𑀬𑀁 𑀕𑀫𑁆𑀫𑀁, 𑀬𑁄𑀚𑀦𑀻𑀬𑀁 𑀬𑁄𑀕𑁆𑀕𑀁, 𑀕𑀭𑀳𑀺𑀢𑀩𑁆𑀩𑀁 𑀕𑀸𑀭𑀬𑁆𑀳𑀁, 𑀤𑀸𑀢𑀩𑁆𑀩𑀁 𑀤𑁂𑀬𑁆𑀬𑀁, 𑀧𑀸𑀢𑀩𑁆𑀩𑀁 𑀧𑁂𑀬𑁆𑀬𑀁, 𑀳𑀸𑀢𑀩𑁆𑀩𑀁 𑀳𑁂𑀬𑁆𑀬𑀁, 𑀫𑀸𑀢𑀩𑁆𑀩𑀁 𑀫𑁂𑀬𑁆𑀬𑀁, 𑀜𑀸𑀢𑀩𑁆𑀩𑀁 𑀜𑁂𑀬𑁆𑀬𑀁, 𑀇𑀘𑁆𑀘𑁂𑀯𑀫𑀸𑀤𑀺.

𑁫𑁪𑁫. , 𑁫𑁪𑁮. 𑀢𑁂 𑀓𑀺𑀘𑁆𑀘𑀸.

𑀬𑁂 𑀧𑀘𑁆𑀘𑀬𑀸 𑀢𑀩𑁆𑀩𑀸𑀤𑀬𑁄 𑀭𑀺𑀘𑁆𑀘𑀦𑁆𑀢𑀸, 𑀢𑁂 𑀓𑀺𑀘𑁆𑀘𑀲𑀜𑁆𑀜𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀓𑀺𑀘𑁆𑀘𑀲𑀜𑁆𑀜𑀸𑀬 𑀓𑀺𑀁𑀧𑀬𑁄𑀚𑀦𑀁? 𑀪𑀸𑀯𑀓𑀫𑁆𑀫𑁂𑀲𑀼 𑀓𑀺𑀘𑁆𑀘𑀢𑁆𑀢𑀔𑀢𑁆𑀣𑀸.

𑁫𑁪𑁬. , 𑁫𑁬𑁨. 𑀅𑀜𑁆𑀜𑁂 𑀓𑀺𑀢.

𑀅𑀜𑁆𑀜𑁂 𑀧𑀘𑁆𑀘𑀬𑀸 𑀓𑀺𑀢 𑀏𑀯 𑀲𑀜𑁆𑀜𑀸 𑀳𑁄𑀦𑁆𑀢𑀺.

𑀓𑀺𑀢 𑀲𑀜𑁆𑀜𑀸𑀬 𑀓𑀺𑀁𑀧𑀬𑁄𑀚𑀦𑀁? 𑀓𑀢𑁆𑀢𑀭𑀺 𑀓𑀺𑀢.

𑁫𑁪𑁭. , 𑁫𑁯𑁬. 𑀦𑀦𑁆𑀤𑀸𑀤𑀻𑀳𑀺 𑀬𑀼.

𑀦𑀦𑁆𑀤𑀸𑀤𑀻𑀳𑀺 𑀥𑀸𑀢𑀽𑀳𑀺 𑀬𑀼𑀧𑀘𑁆𑀘𑀬𑁄 𑀳𑁄𑀢𑀺 𑀪𑀸𑀯𑀓𑀫𑁆𑀫𑁂𑀲𑀼.

𑀦𑀦𑁆𑀤𑀻𑀬𑀢𑁂 𑀦𑀦𑁆𑀤𑀦𑀁, 𑀦𑀺𑀦𑁆𑀤𑀺𑀢𑀩𑁆𑀩𑀁 𑀯𑀸 𑀦𑀦𑁆𑀤𑀦𑀁, 𑀕𑀳𑀡𑀻𑀬𑀁 𑀕𑀳𑀡𑀁, 𑀘𑀭𑀺𑀢𑀩𑁆𑀩𑀁 𑀘𑀭𑀡𑀁, 𑀏𑀯𑀁 𑀲𑀩𑁆𑀩𑀢𑁆𑀣 𑀬𑁄𑀚𑁂𑀢𑀩𑁆𑀩𑀸.

𑁫𑁪𑁮. , 𑁫𑁯𑁭. 𑀓𑀢𑁆𑀢𑀼𑀓𑀭𑀡𑀧𑀤𑁂𑀲𑁂𑀲𑀼 𑀘.

𑀓𑀢𑁆𑀢𑀼𑀓𑀭𑀡𑀧𑀤𑁂𑀲𑀇𑀘𑁆𑀘𑁂𑀢𑁂𑀲𑁆𑀯𑀢𑁆𑀣𑁂𑀲𑀼 𑀘 𑀬𑀼𑀧𑀘𑁆𑀘𑀬𑁄 𑀳𑁄𑀢𑀺.

𑀓𑀢𑁆𑀢𑀭𑀺 𑀢𑀸𑀯 𑁋 𑀭𑀚𑀁 𑀳𑀭𑀢𑀻𑀢𑀺 𑀭𑀚𑁄𑀳𑀭𑀡𑀁 𑀢𑁄𑀬𑀁.

𑀓𑀭𑀡𑁂 𑀢𑀸𑀯 𑁋 𑀓𑀭𑁄𑀢𑀺 𑀢𑁂𑀦𑀸𑀢𑀺 𑀓𑀭𑀡𑀁.

𑀧𑀤𑁂𑀲𑁂 𑀢𑀸𑀯 𑁋 𑀢𑀺𑀝𑁆𑀞𑀦𑁆𑀢𑀺 𑀢𑀲𑁆𑀫𑀺𑀦𑁆𑀢𑀺 𑀞𑀸𑀦𑀁. 𑀏𑀯𑀁 𑀲𑀩𑁆𑀩𑀢𑁆𑀣 𑀬𑁄𑀚𑁂𑀢𑀩𑁆𑀩𑀸.

𑁫𑁪𑁯. , 𑁫𑁫𑁦. 𑀭𑀳𑀸𑀤𑀺𑀢𑁄 𑀡.

𑀭𑀓𑀸𑀭𑀳𑀓𑀸𑀭𑀸𑀤𑁆𑀬𑀦𑁆𑀢𑁂𑀳𑀺 𑀥𑀸𑀢𑀽𑀳𑀺 𑀅𑀦𑀸𑀤𑁂𑀲𑀲𑁆𑀲 𑀦𑀲𑁆𑀲 𑀡𑁄 𑀳𑁄𑀢𑀺.

𑀓𑀭𑁄𑀢𑀺 𑀢𑁂𑀦𑀸𑀢𑀺 𑀓𑀭𑀡𑀁, 𑀧𑀽𑀭𑁂𑀢𑀺 𑀢𑁂𑀦𑀸𑀢𑀺 𑀧𑀽𑀭𑀡𑀁. 𑀕𑀳𑀡𑀻𑀬𑀁 𑀢𑁂𑀦𑀸𑀢𑀺 𑀕𑀳𑀡𑀁. 𑀏𑀯𑀫𑀜𑁆𑀜𑁂𑀧𑀺 𑀬𑁄𑀚𑁂𑀢𑀩𑁆𑀩𑀸.

𑀇𑀢𑀺 𑀓𑀺𑀩𑁆𑀩𑀺𑀥𑀸𑀦𑀓𑀧𑁆𑀧𑁂 𑀧𑀞𑀫𑁄 𑀓𑀡𑁆𑀟𑁄.

𑀤𑀼𑀢𑀺𑀬𑀓𑀡𑁆𑀟

𑁫𑁫𑁦. , 𑁫𑁪𑁬. 𑀡𑀸𑀤𑀬𑁄 𑀢𑁂𑀓𑀸𑀮𑀺𑀓𑀸.

𑀡𑀸𑀤𑀬𑁄 𑀧𑀘𑁆𑀘𑀬𑀸 𑀬𑀼𑀧𑀘𑁆𑀘𑀬𑀦𑁆𑀢𑀸 𑀢𑁂𑀓𑀸𑀮𑀺𑀓𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀓𑀼𑀫𑁆𑀪𑀁 𑀓𑀭𑁄𑀢𑀺 𑀅𑀓𑀸𑀲𑀺 𑀓𑀭𑀺𑀲𑁆𑀲𑀢𑀻𑀢𑀺 𑀓𑀼𑀫𑁆𑀪𑀓𑀸𑀭𑁄, 𑀓𑀭𑁄𑀢𑀺 𑀅𑀓𑀸𑀲𑀺 𑀓𑀭𑀺𑀲𑁆𑀲𑀢𑀺 𑀢𑁂𑀦𑀸𑀢𑀺 𑀓𑀭𑀡𑀁. 𑀏𑀯𑀫𑀜𑁆𑀜𑁂𑀧𑀺 𑀬𑁄𑀚𑁂𑀢𑀩𑁆𑀩𑀸.

𑁫𑁫𑁧. , 𑁫𑁯𑁮. 𑀲𑀜𑁆𑀜𑀸𑀬𑀁 𑀤𑀸 𑀥𑀸𑀢𑁄 𑀇.

𑀲𑀜𑁆𑀜𑀸𑀬𑀫𑀪𑀺𑀥𑁂𑀬𑁆𑀬𑀸𑀬𑀁 𑀤𑀸 𑀥𑀸𑀢𑁄 𑀇𑀧𑀘𑁆𑀘𑀬𑁄 𑀳𑁄𑀢𑀺.

𑀧𑀞𑀫𑀁 𑀆𑀤𑀻𑀬𑀢𑀻𑀢𑀺 𑀆𑀤𑀺, 𑀉𑀤𑀓𑀁 𑀤𑀥𑀸𑀢𑀻𑀢𑀺 𑀉𑀤𑀫𑀺, 𑀫𑀳𑁄𑀤𑀓𑀸𑀦𑀺 𑀤𑀥𑀸𑀢𑀻𑀢𑀺 𑀫𑀳𑁄𑀤𑀥𑀺, 𑀯𑀸𑀮𑀸𑀦𑀺 𑀤𑀥𑀸𑀢𑀺 𑀢𑀲𑁆𑀫𑀺𑀦𑁆𑀢𑀺 𑀯𑀸𑀮𑀥𑀺, 𑀲𑀫𑁆𑀫𑀸 𑀥𑀻𑀬𑀢𑀻𑀢𑀺 𑀲𑀦𑁆𑀥𑀺.

𑁫𑁫𑁨. , 𑁬𑁦𑁯. 𑀢𑀺 𑀓𑀺𑀢 𑀘𑀸𑀲𑀺𑀝𑁆𑀞𑁂.

𑀲𑀜𑁆𑀜𑀸𑀬𑀫𑀪𑀺𑀥𑁂𑀬𑁆𑀬𑀸𑀬𑀁 𑀲𑀩𑁆𑀩𑀥𑀸𑀢𑀽𑀳𑀺 𑀢𑀺𑀧𑀘𑁆𑀘𑀬𑁄 𑀳𑁄𑀢𑀺, 𑀓𑀺𑀢 𑀘 𑀆𑀲𑀺𑀝𑁆𑀞𑁂.

𑀚𑀺𑀦𑁄 𑀚𑀦𑀁 𑀩𑀼𑀚𑁆𑀛𑀢𑀽𑀢𑀺 𑀚𑀺𑀦𑀩𑀼𑀤𑁆𑀥𑀺, 𑀥𑀦𑀁 𑀅𑀲𑁆𑀲 𑀪𑀯𑀢𑀽𑀢𑀺 𑀥𑀦𑀪𑀽𑀢𑀺, 𑀪𑀯𑀢𑀽𑀢𑀺 𑀪𑀽𑀢𑁄, 𑀪𑀯𑀢𑀽𑀢𑀺 𑀪𑀸𑀯𑁄, 𑀥𑀫𑁆𑀫𑁄 𑀚𑀦𑀁 𑀤𑀤𑀸𑀢𑀽𑀢𑀺 𑀥𑀫𑁆𑀫𑀤𑀺𑀦𑁆𑀦𑁄, 𑀯𑀟𑁆𑀠𑀢𑀽𑀢𑀺 𑀯𑀟𑁆𑀠𑀫𑀸𑀦𑁄. 𑀏𑀯𑀫𑀜𑁆𑀜𑁂𑀧𑀺 𑀬𑁄𑀚𑁂𑀢𑀩𑁆𑀩𑀸.

𑁫𑁫𑁩. , 𑁫𑁯𑁯. 𑀇𑀢𑁆𑀣𑀺𑀬𑀫𑀢𑀺𑀬𑀯𑁄 𑀯𑀸.

𑀇𑀢𑁆𑀣𑀺𑀬𑀫𑀪𑀺𑀥𑁂𑀬𑁆𑀬𑀸𑀬𑀁 𑀲𑀩𑁆𑀩𑀥𑀸𑀢𑀽𑀳𑀺 𑀅𑀓𑀸𑀭 𑀢𑀺 𑀬𑀼 𑀇𑀘𑁆𑀘𑁂𑀢𑁂 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀯𑀸.

𑀚𑀻𑀭𑀢𑀻𑀢𑀻 𑀚𑀭𑀸, 𑀫𑀜𑁆𑀜𑀢𑀻𑀢𑀺 𑀫𑀢𑀺, 𑀘𑁂𑀢𑀬𑀢𑀻𑀢𑀺 𑀘𑁂𑀢𑀦𑀸, 𑀯𑁂𑀤𑀬𑀢𑀻𑀢𑀺 𑀯𑁂𑀤𑀦𑀸. 𑀏𑀯𑀫𑀜𑁆𑀜𑁂𑀧𑀺 𑀬𑁄𑀚𑁂𑀢𑀩𑁆𑀩𑀸.

𑁫𑁫𑁪. , 𑁬𑁦𑁧. 𑀓𑀭𑀢𑁄 𑀭𑀺𑀭𑀺𑀬.

𑀓𑀭𑀢𑁄 𑀇𑀢𑁆𑀣𑀺𑀬𑀫𑀦𑀺𑀢𑁆𑀣𑀺𑀬𑀁 𑀯𑀸 𑀅𑀪𑀺𑀔𑁂𑀬𑁆𑀬𑀸𑀬𑀁 𑀭𑀺𑀭𑀻𑀬𑀧𑀘𑁆𑀘𑀬𑁄 𑀳𑁄𑀢𑀺 𑀯𑀸.

𑀓𑀢𑁆𑀢𑀩𑁆𑀩𑀸 𑀓𑀺𑀭𑀺𑀬𑀸, 𑀓𑀭𑀡𑀻𑀬𑀁 𑀓𑀺𑀭𑀺𑀬𑀁.

𑁫𑁫𑁫. , 𑁬𑁧𑁨. 𑀅𑀢𑀻𑀢𑁂 𑀢𑀢𑀯𑀦𑁆𑀢𑀼𑀢𑀸𑀯𑀻.

𑀅𑀢𑀻𑀢𑁂 𑀓𑀸𑀮𑁂 𑀲𑀩𑁆𑀩𑀥𑀸𑀢𑀽𑀳𑀺 𑀢𑀢𑀯𑀦𑁆𑀢𑀼𑀢𑀸𑀯𑀻𑀇𑀘𑁆𑀘𑁂𑀢𑁂 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺.

𑀳𑀼𑀢𑁄, 𑀳𑀼𑀢𑀯𑀸, 𑀳𑀼𑀢𑀸𑀯𑀻. 𑀯𑀼𑀲𑀺𑀢𑁄, 𑀯𑀼𑀲𑀺𑀢𑀯𑀸, 𑀯𑀼𑀲𑀺𑀢𑀸𑀯𑀻. 𑀪𑀼𑀢𑁆𑀢𑁄, 𑀪𑀼𑀢𑁆𑀢𑀯𑀸, 𑀪𑀼𑀢𑁆𑀢𑀸𑀯𑀻.

𑁫𑁫𑁬. , 𑁬𑁨𑁨. 𑀪𑀸𑀯𑀓𑀫𑁆𑀫𑁂𑀲𑀼 𑀢.

𑀪𑀸𑀯𑀓𑀫𑁆𑀫𑁂𑀲𑀼 𑀅𑀢𑀻𑀢𑁂 𑀓𑀸𑀮𑁂 𑀢𑀧𑀘𑁆𑀘𑀬𑁄 𑀳𑁄𑀢𑀺 𑀲𑀩𑁆𑀩𑀥𑀸𑀢𑀽𑀳𑀺.

𑀪𑀸𑀯𑁂 𑀢𑀸𑀯 𑁋 𑀢𑀲𑁆𑀲 𑀕𑀻𑀢𑀁, 𑀦𑀘𑁆𑀘𑀁, 𑀦𑀝𑁆𑀝𑀁, 𑀳𑀲𑀺𑀢𑀁.

𑀓𑀫𑁆𑀫𑀦𑀺 𑀢𑀸𑀯 𑁋 𑀢𑁂𑀦 𑀪𑀸𑀲𑀺𑀢𑀁, 𑀤𑁂𑀲𑀺𑀢𑀁.

𑁫𑁫𑁭. , 𑁬𑁦𑁬. 𑀩𑀼𑀥𑀕𑀫𑀸𑀤𑀺𑀢𑁆𑀣𑁂 𑀓𑀢𑁆𑀢𑀭𑀺.

𑀩𑀼𑀥𑀕𑀫𑀼𑀇𑀘𑁆𑀘𑁂𑀯𑀫𑀸𑀤𑀻𑀳𑀺 𑀥𑀸𑀢𑀽𑀳𑀺 𑀢𑀤𑀢𑁆𑀣𑁂 𑀕𑀫𑁆𑀬𑀫𑀸𑀦𑁂 𑀢𑀧𑀘𑁆𑀘𑀬𑁄 𑀳𑁄𑀢𑀺 𑀓𑀢𑁆𑀢𑀭𑀺 𑀲𑀩𑁆𑀩𑀓𑀸𑀮𑁂.

𑀲𑀩𑁆𑀩𑁂 𑀲𑀗𑁆𑀔𑀢𑀸𑀲𑀗𑁆𑀔𑀢𑁂 𑀥𑀫𑁆𑀫𑁂 𑀩𑀼𑀚𑁆𑀛𑀢𑀺 𑀅𑀩𑀼𑀚𑁆𑀛𑀺 𑀩𑀼𑀚𑁆𑀛𑀺𑀲𑁆𑀲𑀢𑀻𑀢𑀺 𑀩𑀼𑀤𑁆𑀥𑁄, 𑀲𑀭𑀡𑀗𑁆𑀕𑀢𑁄, 𑀲𑀫𑀣𑀗𑁆𑀕𑀢𑁄, 𑀅𑀫𑀣𑀗𑁆𑀕𑀢𑁄, 𑀚𑀸𑀦𑀸𑀢𑀺 𑀅𑀚𑀸𑀦𑀺 𑀚𑀸𑀦𑀺𑀲𑁆𑀲𑀢𑀻𑀢𑀺 𑀜𑀸𑀢𑁄, 𑀇𑀘𑁆𑀘𑁂𑀯𑀫𑀸𑀤𑀺.

𑁫𑁫𑁮. , 𑁬𑁦𑁨. 𑀚𑀺𑀢𑁄 𑀇𑀦 𑀲𑀩𑁆𑀩𑀢𑁆𑀣.

𑀚𑀺𑀇𑀘𑁆𑀘𑁂𑀢𑀸𑀬 𑀥𑀸𑀢𑀼𑀬𑀸 𑀇𑀦𑀧𑀘𑁆𑀘𑀬𑁄 𑀳𑁄𑀢𑀺 𑀲𑀩𑁆𑀩𑀓𑀸𑀮𑁂 𑀓𑀢𑁆𑀢𑀭𑀺.

𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀚𑀺𑀦𑀸𑀢𑀺 𑀅𑀚𑀺𑀦𑀺 𑀚𑀺𑀦𑀺𑀲𑁆𑀲𑀢𑀻𑀢𑀺 𑀚𑀺𑀦𑁄.

𑁫𑁫𑁯. , 𑁬𑁦𑁩. 𑀲𑀼𑀧𑀢𑁄 𑀘.

𑀲𑀼𑀧𑀇𑀘𑁆𑀘𑁂𑀢𑀸𑀬 𑀥𑀸𑀢𑀼𑀬𑀸 𑀇𑀦𑀧𑀘𑁆𑀘𑀬𑁄 𑀳𑁄𑀢𑀺 𑀓𑀢𑁆𑀢𑀭𑀺, 𑀪𑀸𑀯𑁂 𑀘.

𑀲𑀼𑀧𑀢𑀻𑀢𑀺 𑀲𑀼𑀧𑀺𑀦𑀁, 𑀲𑀼𑀧𑀻𑀬𑀢𑁂 𑀲𑀼𑀧𑀺𑀦𑀁.

𑁫𑁬𑁦. , 𑁬𑁦𑁪. 𑀈𑀲𑀁𑀤𑀼𑀲𑀽𑀳𑀺 𑀔.

𑀈𑀲𑀁𑀤𑀼𑀲𑀼𑀲𑀤𑁆𑀤𑀸𑀤𑀻𑀳𑀺 𑀲𑀩𑁆𑀩𑀥𑀸𑀢𑀽𑀳𑀺 𑀔𑀧𑀘𑁆𑀘𑀬𑁄 𑀳𑁄𑀢𑀺.

𑀈𑀲𑀲𑁆𑀲𑀬𑁄, 𑀤𑀼𑀲𑁆𑀲𑀬𑁄, 𑀲𑀼𑀲𑁆𑀲𑀬𑁄 𑀪𑀯𑀢𑀸, 𑀈𑀲𑀓𑁆𑀓𑀭𑀁, 𑀤𑀼𑀓𑁆𑀓𑀭𑀁, 𑀲𑀼𑀓𑀭𑀁, 𑀪𑀯𑀢𑀸.

𑁫𑁬𑁧. , 𑁬𑁩𑁬. 𑀇𑀘𑁆𑀙𑀢𑁆𑀣𑁂𑀲𑀼 𑀲𑀫𑀸𑀦𑀓𑀢𑁆𑀢𑀼𑀓𑁂𑀲𑀼 𑀢𑀯𑁂 𑀢𑀼𑀁 𑀯𑀸.

𑀇𑀘𑁆𑀙𑀢𑁆𑀣𑁂𑀲𑀼 𑀲𑀫𑀸𑀦𑀓𑀢𑁆𑀢𑀼𑀓𑁂𑀲𑀼 𑀲𑀩𑁆𑀩𑀥𑀸𑀢𑀽𑀳𑀺𑀢𑀯𑁂𑀢𑀼𑀁𑀇𑀘𑁆𑀘𑁂𑀢𑁂 𑀧𑀘𑁆𑀘𑀬𑀸 𑀳𑁄𑀦𑁆𑀢𑀺 𑀲𑀩𑁆𑀩𑀓𑀸𑀮𑁂 𑀓𑀢𑁆𑀢𑀭𑀺.

𑀧𑀼𑀜𑁆𑀜𑀸𑀦𑀺 𑀓𑀸𑀢𑀯𑁂, 𑀲𑀤𑁆𑀥𑀫𑁆𑀫𑀁 𑀲𑁄𑀢𑀼 𑀫𑀺𑀘𑁆𑀙𑀢𑀺.

𑁫𑁬𑁨. , 𑁬𑁩𑁮. 𑀅𑀭𑀳𑀲𑀓𑁆𑀓𑀸𑀤𑀻𑀲𑀼 𑀘.

𑀅𑀭𑀳𑀲𑀓𑁆𑀓𑀸𑀤𑀻𑀲𑀼 𑀘 𑀅𑀢𑁆𑀣𑁂𑀲𑀼 𑀲𑀩𑁆𑀩𑀥𑀸𑀢𑀽𑀳𑀺 𑀢𑀼𑀁𑀧𑀘𑁆𑀘𑀬𑁄 𑀳𑁄𑀢𑀺.

𑀓𑁄 𑀢𑀁 𑀦𑀺𑀦𑁆𑀤𑀺𑀢𑀼𑀫𑀭𑀳𑀢𑀺, 𑀲𑀓𑁆𑀓𑀸 𑀚𑁂𑀢𑀼𑀁 𑀥𑀦𑁂𑀦 𑀯𑀸. 𑀏𑀯𑀫𑀜𑁆𑀜𑁂𑀧𑀺 𑀬𑁄𑀚𑁂𑀢𑀩𑁆𑀩𑀸.

𑁫𑁬𑁩. , 𑁬𑁩𑁯. 𑀧𑀢𑁆𑀢𑀯𑀘𑀦𑁂 𑀅𑀮𑀫𑀢𑁆𑀣𑁂𑀲𑀼 𑀘.

𑀧𑀢𑁆𑀢𑀯𑀘𑀦𑁂 𑀅𑀮𑀫𑀢𑁆𑀣𑁂𑀲𑀼 𑀲𑀩𑁆𑀩𑀥𑀸𑀢𑀽𑀳𑀺 𑀢𑀼𑀁𑀧𑀘𑁆𑀘𑀬𑁄 𑀳𑁄𑀢𑀺.

𑀅𑀮𑀫𑁂𑀯 𑀤𑀸𑀦𑀸𑀦𑀺 𑀤𑀸𑀢𑀼𑀁, 𑀅𑀮𑀫𑁂𑀯 𑀧𑀼𑀜𑁆𑀜𑀸𑀦𑀺 𑀓𑀸𑀢𑀼𑀁.