𑁩. 𑀓𑀸𑀭𑀓𑀓𑀧𑁆𑀧

𑀙𑀝𑁆𑀞𑀓𑀡𑁆𑀟

𑁨𑁭𑁧. , 𑁮𑁮, 𑁩𑁦𑁮. 𑀬𑀲𑁆𑀫𑀸 𑀤𑀧𑁂𑀢𑀺 𑀪𑀬𑀫𑀸𑀤𑀢𑁆𑀢𑁂 𑀯𑀸 𑀢𑀤𑀧𑀸𑀤𑀸𑀦𑀁.

𑀬𑀲𑁆𑀫𑀸 𑀯𑀸 𑀅𑀧𑁂𑀢𑀺, 𑀬𑀲𑁆𑀫𑀸 𑀯𑀸 𑀪𑀬𑀁 𑀚𑀸𑀬𑀢𑁂, 𑀬𑀲𑁆𑀫𑀸 𑀯𑀸 𑀆𑀤𑀢𑁆𑀢𑁂, 𑀢𑀁 𑀓𑀸𑀭𑀓𑀁 𑀅𑀧𑀸𑀤𑀸𑀦𑀲𑀜𑁆𑀜𑀁 𑀳𑁄𑀢𑀺.

𑀢𑀁 𑀬𑀣𑀸? 𑀕𑀸𑀫𑀸 𑀅𑀧𑁂𑀦𑁆𑀢𑀺 𑀫𑀼𑀦𑀬𑁄, 𑀦𑀕𑀭𑀸 𑀦𑀺𑀕𑁆𑀕𑀢𑁄 𑀭𑀸𑀚𑀸, 𑀘𑁄𑀭𑀸 𑀪𑀬𑀁 𑀚𑀸𑀬𑀢𑁂, 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑁂𑀳𑀺 𑀲𑀺𑀓𑁆𑀔𑀁 𑀕𑀡𑁆𑀳𑀸𑀢𑀺 𑀲𑀺𑀲𑁆𑀲𑁄.

𑀅𑀧𑀸𑀤𑀸𑀦𑀫𑀺𑀘𑁆𑀘𑀦𑁂𑀦 𑀓𑁆𑀯𑀢𑁆𑀣𑁄? 𑀅𑀧𑀸𑀤𑀸𑀦𑁂 𑀧𑀜𑁆𑀘𑀫𑀻.

𑁨𑁭𑁨. , 𑁩𑁦𑁯. 𑀥𑀸𑀢𑀼𑀦𑀸 𑀫𑀸𑀦𑀫𑀼𑀧𑀲𑀕𑁆𑀕𑀬𑁄𑀕𑀸𑀤𑁆𑀯𑀻𑀲𑁆𑀯𑀧𑀺 𑀘.

𑀥𑀸𑀢𑀼𑀦𑀸𑀫𑀸𑀦𑀁 𑀧𑀬𑁄𑀕𑁂 𑀘 𑀉𑀧𑀲𑀕𑁆𑀕𑀬𑁄𑀕𑀸𑀤𑀻𑀲𑁆𑀯𑀧𑀺 𑀘 𑀢𑀁 𑀓𑀸𑀭𑀓𑀁 𑀅𑀧𑀸𑀤𑀸𑀦𑀲𑀜𑁆𑀜𑀁 𑀳𑁄𑀢𑀺.

𑀥𑀸𑀢𑀽𑀦𑀁 𑀧𑀬𑁄𑀕𑁂 𑀢𑀸𑀯 𑀚𑀺𑀇𑀘𑁆𑀘𑁂𑀢𑀲𑁆𑀲 𑀥𑀸𑀢𑀼𑀲𑁆𑀲 𑀧𑀭𑀸𑀧𑀼𑀩𑁆𑀩𑀲𑁆𑀲 𑀧𑀬𑁄𑀕𑁂 𑀬𑁄 𑀅𑀲𑀳𑁄, 𑀲𑁄 𑀅𑀧𑀸𑀤𑀸𑀦𑀲𑀜𑁆𑀜𑁄 𑀳𑁄𑀢𑀺.

𑀢𑀁 𑀬𑀣𑀸? 𑀩𑀼𑀤𑁆𑀥𑀲𑁆𑀫𑀸 𑀧𑀭𑀸𑀚𑁂𑀦𑁆𑀢𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑀸.

𑀪𑀽𑀇𑀘𑁆𑀘𑁂𑀢𑀲𑁆𑀲 𑀥𑀸𑀢𑀼𑀲𑁆𑀲 𑀧𑀧𑀼𑀩𑁆𑀩𑀲𑁆𑀲 𑀧𑀬𑁄𑀕𑁂 𑀬𑀢𑁄 𑀅𑀘𑁆𑀙𑀺𑀦𑁆𑀦𑀧𑁆𑀧𑀪𑀯𑁄, 𑀲𑁄 𑀅𑀧𑀸𑀤𑀸𑀦𑀲𑀜𑁆𑀜𑁄 𑀳𑁄𑀢𑀺.

𑀢𑀁 𑀬𑀣𑀸? 𑀳𑀺𑀫𑀯𑀢𑀸 𑀧𑀪𑀯𑀦𑁆𑀢𑀺 𑀧𑀜𑁆𑀘 𑀫𑀳𑀸𑀦𑀤𑀺𑀬𑁄, 𑀅𑀦𑀯𑀢𑀢𑁆𑀢𑀫𑁆𑀳𑀸 𑀧𑀪𑀯𑀦𑁆𑀢𑀺 𑀫𑀳𑀸𑀲𑀭𑀸, 𑀅𑀘𑀺𑀭𑀯𑀢𑀺𑀬𑀸 𑀧𑀪𑀯𑀦𑁆𑀢𑀺 𑀓𑀼𑀦𑁆𑀦𑀤𑀺𑀬𑁄.

𑀦𑀸𑀫𑀧𑁆𑀧𑀬𑁄𑀕𑁂𑀧𑀺 𑀢𑀁 𑀓𑀸𑀭𑀓𑀁 𑀅𑀧𑀸𑀤𑀸𑀦𑀲𑀜𑁆𑀜𑀁 𑀳𑁄𑀢𑀺.

𑀢𑀁 𑀬𑀣𑀸? 𑀉𑀭𑀲𑁆𑀫𑀸 𑀚𑀸𑀢𑁄 𑀧𑀼𑀢𑁆𑀢𑁄, 𑀪𑀽𑀫𑀺𑀢𑁄 𑀦𑀺𑀕𑁆𑀕𑀢𑁄 𑀭𑀲𑁄, 𑀉𑀪𑀢𑁄 𑀲𑀼𑀚𑀸𑀢𑁄 𑀧𑀼𑀢𑁆𑀢𑁄 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘.

𑀉𑀧𑀲𑀕𑁆𑀕𑀬𑁄𑀕𑁂 𑀢𑀁 𑀓𑀸𑀭𑀓𑀁 𑀅𑀧𑀸𑀤𑀸𑀦𑀲𑀜𑁆𑀜𑀁 𑀳𑁄𑀢𑀺.

𑀢𑀁 𑀬𑀣𑀸? 𑀅𑀧𑀲𑀸𑀮𑀸𑀬 𑀆𑀬𑀦𑁆𑀢𑀺 𑀯𑀸𑀡𑀺𑀚𑀸, 𑀆𑀩𑁆𑀭𑀳𑁆𑀫𑀮𑁄𑀓𑀸 𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀘𑁆𑀙𑀢𑀺 𑀉𑀧𑀭𑀺 𑀧𑀩𑁆𑀩𑀢𑀸 𑀤𑁂𑀯𑁄 𑀯𑀲𑁆𑀲𑀢𑀺, 𑀩𑀼𑀤𑁆𑀥𑀲𑁆𑀫𑀸 𑀧𑀢𑀺 𑀲𑀸𑀭𑀺𑀧𑀼𑀢𑁆𑀢𑁄 𑀥𑀫𑁆𑀫𑀤𑁂𑀲𑀦𑀸𑀬 𑀪𑀺𑀓𑁆𑀔𑀽 𑀆𑀮𑀧𑀢𑀺 𑀢𑁂𑀫𑀸𑀲𑀁, 𑀖𑀢𑀫𑀲𑁆𑀲 𑀢𑁂𑀮𑀲𑁆𑀫𑀸 𑀧𑀢𑀺 𑀤𑀤𑀸𑀢𑀺, 𑀉𑀧𑁆𑀧𑀮𑀫𑀲𑁆𑀲 𑀧𑀤𑀼𑀫𑀲𑁆𑀫𑀸 𑀧𑀢𑀺 𑀤𑀤𑀸𑀢𑀺, 𑀓𑀦𑀓𑀫𑀲𑁆𑀲 𑀳𑀺𑀭𑀜𑁆𑀜𑀲𑁆𑀫𑀸 𑀧𑀢𑀺 𑀤𑀤𑀸𑀢𑀺.

𑀆𑀤𑀺𑀕𑁆𑀕𑀳𑀡𑁂𑀦 𑀓𑀸𑀭𑀓𑀫𑀚𑁆𑀛𑁂𑀧𑀺 𑀧𑀜𑁆𑀘𑀫𑀻𑀯𑀺𑀪𑀢𑁆𑀢𑀺 𑀳𑁄𑀢𑀺. 𑀇𑀢𑁄 𑀧𑀓𑁆𑀔𑀲𑁆𑀫𑀸 𑀯𑀺𑀚𑁆𑀛𑀢𑀺 𑀫𑀺𑀕𑀁 𑀮𑀼𑀤𑁆𑀤𑀓𑁄, 𑀓𑁄𑀲𑀸 𑀯𑀺𑀚𑁆𑀛𑀢𑀺 𑀓𑀼𑀜𑁆𑀚𑀭𑀁, 𑀫𑀸𑀲𑀲𑁆𑀫𑀸 𑀪𑀼𑀜𑁆𑀚𑀢𑀺 𑀪𑁄𑀚𑀦𑀁.

𑀅𑀧𑀺𑀕𑁆𑀕𑀳𑀡𑁂𑀦 𑀦𑀺𑀧𑀸𑀢𑀧𑀬𑁄𑀕𑁂𑀧𑀺 𑀧𑀜𑁆𑀘𑀫𑀻𑀯𑀺𑀪𑀢𑁆𑀢𑀺 𑀳𑁄𑀢𑀺 𑀤𑀼𑀢𑀺𑀬𑀸 𑀘 𑀢𑀢𑀺𑀬𑀸 𑀘. 𑀭𑀳𑀺𑀢𑀸 𑀫𑀸𑀢𑀼𑀚𑀸 𑀧𑀼𑀜𑁆𑀜𑀁 𑀓𑀢𑁆𑀯𑀸 𑀤𑀸𑀦𑀁 𑀤𑁂𑀢𑀺, 𑀭𑀳𑀺𑀢𑀸 𑀫𑀸𑀢𑀼𑀚𑀁, 𑀭𑀳𑀺𑀢𑀸 𑀫𑀸𑀢𑀼𑀚𑁂𑀦 𑀯𑀸. 𑀭𑀺𑀢𑁂 𑀲𑀤𑁆𑀥𑀫𑁆𑀫𑀸 𑀓𑀼𑀢𑁄 𑀲𑀼𑀔𑀁 𑀮𑀪𑀢𑀺, 𑀭𑀺𑀢𑁂 𑀲𑀤𑁆𑀥𑀫𑁆𑀫𑀁, 𑀭𑀺𑀢𑁂 𑀲𑀤𑁆𑀥𑀫𑁆𑀫𑁂𑀦 𑀯𑀸. 𑀢𑁂 𑀪𑀺𑀓𑁆𑀔𑀽 𑀦𑀸𑀦𑀸 𑀓𑀼𑀮𑀸 𑀧𑀩𑁆𑀩𑀚𑀺𑀢𑀸, 𑀯𑀺𑀦𑀸 𑀲𑀤𑁆𑀥𑀫𑁆𑀫𑀸 𑀦𑀢𑁆𑀣𑀜𑁆𑀜𑁄 𑀓𑁄𑀘𑀺 𑀦𑀸𑀣𑁄 𑀮𑁄𑀓𑁂 𑀯𑀺𑀚𑁆𑀚𑀢𑀺, 𑀯𑀺𑀦𑀸 𑀲𑀤𑁆𑀥𑀫𑁆𑀫𑀁, 𑀯𑀺𑀦𑀸 𑀲𑀤𑁆𑀥𑀫𑁆𑀫𑁂𑀦 𑀯𑀸. 𑀯𑀺𑀦𑀸 𑀩𑀼𑀤𑁆𑀥𑀲𑁆𑀫𑀸, 𑀯𑀺𑀦𑀸 𑀩𑀼𑀤𑁆𑀥𑀁, 𑀯𑀺𑀦𑀸 𑀩𑀼𑀤𑁆𑀥𑁂𑀦 𑀯𑀸.

𑀘𑀕𑁆𑀕𑀳𑀡𑁂𑀦 𑀅𑀜𑁆𑀜𑀢𑁆𑀣𑀸𑀧𑀺 𑀧𑀜𑁆𑀘𑀫𑀻𑀯𑀺𑀪𑀢𑁆𑀢𑀺 𑀳𑁄𑀢𑀺. 𑀬𑀢𑁄𑀳𑀁 𑀪𑀕𑀺𑀦𑀺 𑀅𑀭𑀺𑀬𑀸𑀬 𑀚𑀸𑀢𑀺𑀬𑀸 𑀚𑀸𑀢𑁄. 𑀬𑀢𑁄 𑀲𑀭𑀸𑀫𑀺 𑀅𑀢𑁆𑀢𑀸𑀦𑀁, 𑀬𑀢𑁄 𑀧𑀢𑁆𑀢𑁄𑀲𑁆𑀫𑀺 𑀯𑀺𑀜𑁆𑀜𑀼𑀢𑀁, 𑀬𑀢𑁆𑀯𑀸𑀥𑀺𑀓𑀭𑀡𑀫𑁂𑀦𑀁 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀅𑀲𑀁𑀯𑀼𑀢𑀁 𑀯𑀺𑀳𑀭𑀦𑁆𑀢𑀁 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑁆𑀯𑀸𑀲𑀯𑁂𑀬𑁆𑀬𑀼𑀁.

𑁨𑁭𑁩. , 𑁩𑁧𑁦. 𑀭𑀓𑁆𑀔𑀡𑀢𑁆𑀣𑀸𑀦𑀫𑀺𑀘𑁆𑀙𑀺𑀢𑀁.

𑀭𑀓𑁆𑀔𑀡𑀢𑁆𑀣𑀸𑀦𑀁 𑀥𑀸𑀢𑀽𑀦𑀁 𑀧𑀬𑁄𑀕𑁂 𑀬𑀁 𑀇𑀘𑁆𑀙𑀺𑀢𑀁, 𑀢𑀁 𑀓𑀸𑀭𑀓𑀁 𑀅𑀧𑀸𑀤𑀸𑀦𑀲𑀜𑁆𑀜𑀁 𑀳𑁄𑀢𑀺.

𑀓𑀸𑀓𑁂 𑀭𑀓𑁆𑀔𑀦𑁆𑀢𑀺 𑀢𑀡𑁆𑀟𑀼𑀮𑀸, 𑀬𑀯𑀸 𑀧𑀝𑀺𑀲𑁂𑀥𑁂𑀦𑁆𑀢𑀺 𑀕𑀸𑀯𑁄.

𑁨𑁭𑁪. , 𑁩𑁧𑁧. 𑀬𑁂𑀦 𑀯𑀸’ 𑀤𑀲𑁆𑀲𑀦𑀁.

𑀬𑁂𑀦 𑀯𑀸 𑀅𑀤𑀲𑁆𑀲𑀦𑀫𑀺𑀘𑁆𑀙𑀺𑀢𑀁, 𑀢𑀁 𑀓𑀸𑀭𑀓𑀁 𑀅𑀧𑀸𑀤𑀸𑀦𑀲𑀜𑁆𑀜𑀁 𑀳𑁄𑀢𑀺.

𑀉𑀧𑀚𑁆𑀛𑀸𑀬𑀸 𑀅𑀦𑁆𑀢𑀭𑀥𑀸𑀬𑀢𑀺 𑀲𑀺𑀲𑁆𑀲𑁄, 𑀫𑀸𑀢𑀭𑀸 𑀘 𑀧𑀺𑀢𑀭𑀸 𑀘 𑀅𑀦𑁆𑀢𑀭𑀥𑀸𑀬𑀢𑀺 𑀧𑀼𑀢𑁆𑀢𑁄.

𑀯𑀸𑀢𑀺 𑀓𑀺𑀫𑀢𑁆𑀣𑀁? 𑀲𑀢𑁆𑀢𑀫𑀻𑀯𑀺𑀪𑀢𑁆𑀬𑀢𑁆𑀢𑀁. 𑀚𑁂𑀢𑀯𑀦𑁂 𑀅𑀦𑁆𑀢𑀭𑀥𑀸𑀬𑀢𑀺 𑀪𑀕𑀯𑀸.

𑁨𑁭𑁫. , 𑁩𑁧𑁨. 𑀤𑀽𑀭𑀦𑁆𑀢𑀺 𑀓𑀤𑁆𑀥 𑀓𑀸𑀮 𑀦𑀺𑀫𑁆𑀫𑀸𑀦 𑀢𑁆𑀯𑀸𑀮𑁄𑀧 𑀤𑀺𑀲𑀸𑀬𑁄𑀕𑀯𑀺𑀪𑀢𑁆𑀢𑀸𑀭𑀧𑁆𑀧𑀬𑁄𑀕 𑀲𑀼𑀤𑁆𑀥𑀧𑁆𑀧𑀫𑁄𑀘𑀦 𑀳𑁂𑀢𑀼 𑀯𑀺𑀯𑀺𑀢𑁆𑀢𑀧𑁆𑀧𑀫𑀸𑀡 𑀧𑀼𑀩𑁆𑀩𑀬𑁄𑀕𑀩𑀦𑁆𑀥𑀦 𑀕𑀼𑀡𑀯𑀘𑀦 𑀧𑀜𑁆𑀳 𑀓𑀣𑀦 𑀣𑁄𑀓𑀸𑀓𑀢𑁆𑀢𑀽𑀲𑀼 𑀘.

𑀤𑀽𑀭𑀢𑁆𑀣𑁂, 𑀅𑀦𑁆𑀢𑀺𑀓𑀢𑁆𑀣𑁂, 𑀅𑀤𑁆𑀥𑀦𑀺𑀫𑁆𑀫𑀸𑀦𑁂, 𑀓𑀸𑀮𑀦𑀺𑀫𑁆𑀫𑀸𑀦𑁂, 𑀢𑁆𑀯𑀸𑀮𑁄𑀧𑁂, 𑀤𑀺𑀲𑀸𑀬𑁄𑀕𑁂, 𑀯𑀺𑀪𑀢𑁆𑀢𑁂, 𑀆𑀭𑀧𑁆𑀧𑀬𑁄𑀕𑁂, 𑀲𑀼𑀤𑁆𑀥𑁂, 𑀧𑀫𑁄𑀘𑀦𑁂, 𑀳𑁂𑀢𑁆𑀯𑀢𑁆𑀣𑁂, 𑀯𑀺𑀯𑀺𑀢𑁆𑀢𑀢𑁆𑀣𑁂, 𑀧𑀫𑀸𑀡𑁂, 𑀧𑀼𑀩𑁆𑀩𑀬𑁄𑀕𑁂, 𑀩𑀦𑁆𑀥𑀦𑀢𑁆𑀣𑁂, 𑀕𑀼𑀡𑀯𑀘𑀦𑁂, 𑀧𑀜𑁆𑀳𑁂, 𑀓𑀣𑀦𑁂, 𑀣𑁄𑀓𑁂, 𑀅𑀓𑀢𑁆𑀢𑀭𑀺 𑀘 𑀇𑀘𑁆𑀘𑁂𑀢𑁂𑀲𑁆𑀯𑀢𑁆𑀣𑁂𑀲𑀼, 𑀧𑀬𑁄𑀕𑁂𑀲𑀼 𑀘, 𑀢𑀁 𑀓𑀸𑀭𑀓𑀁 𑀅𑀧𑀸𑀤𑀸𑀦𑀲𑀜𑁆𑀜𑀁 𑀳𑁄𑀢𑀺.

𑀤𑀽𑀭𑀢𑁆𑀣𑁂𑀢𑀸𑀯 𑁋 𑀓𑀻𑀯 𑀤𑀽𑀭𑁄 𑀇𑀢𑁄 𑀦𑀴𑀓𑀸𑀭𑀕𑀸𑀫𑁄, 𑀤𑀽𑀭𑀢𑁄 𑀯𑀸 𑀕𑀫𑁆𑀫, 𑀆𑀭𑀓𑀸 𑀢𑁂 𑀫𑁄𑀖𑀧𑀼𑀭𑀺𑀲𑀸 𑀇𑀫𑀲𑁆𑀫𑀸 𑀥𑀫𑁆𑀫𑀯𑀺𑀦𑀬𑀸. 𑀤𑀼𑀢𑀺𑀬𑀸 𑀘 𑀢𑀢𑀺𑀬𑀸 𑀘, 𑀤𑀽𑀭𑀁 𑀕𑀸𑀫𑀁 𑀆𑀯𑀢𑁄, 𑀤𑀽𑀭𑁂𑀦 𑀕𑀸𑀫𑁂𑀦 𑀯𑀸 𑀆𑀕𑀢𑁄. 𑀆𑀭𑀓𑀸 𑀇𑀫𑀁 𑀥𑀫𑁆𑀫𑀯𑀺𑀦𑀬𑀁, 𑀅𑀦𑁂𑀦 𑀥𑀫𑁆𑀫𑀯𑀺𑀦𑀬𑁂𑀦 𑀯𑀸 𑀇𑀘𑁆𑀘𑁂𑀯𑀫𑀸𑀤𑀺.

𑀅𑀦𑁆𑀢𑀺𑀓𑀢𑁆𑀣𑁂 𑁋 𑀅𑀦𑁆𑀢𑀺𑀓𑀁 𑀕𑀸𑀫𑀸, 𑀆𑀲𑀦𑁆𑀦𑀁 𑀕𑀸𑀫𑀸, 𑀲𑀫𑀻𑀧𑀁 𑀕𑀸𑀫𑀸, 𑀲𑀫𑀻𑀧𑀁 𑀲𑀤𑁆𑀥𑀫𑁆𑀫𑀸. 𑀤𑀼𑀢𑀺𑀬𑀸 𑀘 𑀢𑀢𑀺𑀬𑀸 𑀘, 𑀅𑀦𑁆𑀢𑀺𑀓𑀁 𑀕𑀸𑀫𑀁, 𑀅𑀦𑁆𑀢𑀺𑀓𑀁 𑀕𑀸𑀫𑁂𑀦 𑀯𑀸. 𑀆𑀲𑀦𑁆𑀦𑀁 𑀕𑀸𑀫𑀁, 𑀆𑀲𑀦𑁆𑀦𑀁 𑀕𑀸𑀫𑁂𑀦 𑀯𑀸. 𑀲𑀫𑀻𑀧𑀁 𑀕𑀸𑀫𑀁. 𑀲𑀫𑀻𑀧𑀁 𑀕𑀸𑀫𑁂𑀦 𑀯𑀸. 𑀲𑀫𑀻𑀧𑀁 𑀲𑀤𑁆𑀥𑀫𑁆𑀫𑀁, 𑀲𑀫𑀻𑀧𑀁 𑀲𑀤𑁆𑀥𑀫𑁆𑀫𑁂𑀦 𑀯𑀸 𑀇𑀘𑁆𑀘𑁂𑀯𑀫𑀸𑀤𑀺.

𑀅𑀤𑁆𑀥𑀦𑀺𑀫𑁆𑀫𑀸𑀦𑁂 𑁋 𑀇𑀢𑁄 𑀫𑀣𑀼𑀭𑀸𑀬 𑀘𑀢𑀽𑀲𑀼 𑀬𑁄𑀚𑀦𑁂𑀲𑀼 𑀲𑀗𑁆𑀓𑀲𑁆𑀲𑀁 𑀦𑀸𑀫 𑀦𑀕𑀭𑀁 𑀅𑀢𑁆𑀣𑀺, 𑀢𑀢𑁆𑀣 𑀩𑀳𑀽 𑀚𑀦𑀸 𑀯𑀲𑀦𑁆𑀢𑀺 𑀇𑀘𑁆𑀘𑁂𑀯𑀫𑀸𑀤𑀺.

𑀓𑀸𑀮𑀦𑀺𑀫𑁆𑀫𑀸𑀦𑁂 𑁋 𑀇𑀢𑁄 𑀪𑀺𑀓𑁆𑀔𑀯𑁂 𑀏𑀓𑀦𑀯𑀼𑀢𑀺𑀓𑀧𑁆𑀧𑁂 𑀯𑀺𑀧𑀲𑁆𑀲𑀻 𑀦𑀸𑀫 𑀪𑀕𑀯𑀸 𑀮𑁄𑀓𑁂 𑀉𑀤𑀧𑀸𑀤𑀺, 𑀇𑀢𑁄 𑀢𑀺𑀡𑁆𑀡𑀁 𑀫𑀸𑀲𑀸𑀦𑀁 𑀅𑀘𑁆𑀘𑀬𑁂𑀦 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀢𑀺 𑀇𑀘𑁆𑀘𑁂𑀯𑀫𑀸𑀤𑀺.

𑀢𑁆𑀯𑀸𑀮𑁄𑀧𑁂 𑀓𑀫𑁆𑀫𑀸𑀥𑀺𑀓𑀭𑀡𑁂𑀲𑀼 𑁋 𑀧𑀸𑀲𑀸𑀤𑀸 𑀲𑀗𑁆𑀓𑀫𑁂𑀬𑁆𑀬, 𑀧𑀸𑀲𑀸𑀤𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀯𑀸. 𑀧𑀩𑁆𑀩𑀢𑀸 𑀲𑀗𑁆𑀓𑀫𑁂𑀬𑁆𑀬, 𑀧𑀩𑁆𑀩𑀢𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀯𑀸. 𑀳𑀢𑁆𑀣𑀺𑀓𑁆𑀔𑀦𑁆𑀥𑀸 𑀲𑀗𑁆𑀓𑀫𑁂𑀬𑁆𑀬, 𑀳𑀢𑁆𑀣𑀺𑀓𑁆𑀔𑀦𑁆𑀥𑀁 𑀅𑀪𑀺𑀭𑀼𑀳𑀺𑀢𑁆𑀯𑀸 𑀯𑀸. 𑀆𑀲𑀦𑀸 𑀯𑀼𑀝𑁆𑀞𑀳𑁂𑀬𑁆𑀬. 𑀆𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀯𑀸 𑀇𑀘𑁆𑀘𑁂𑀯𑀫𑀸𑀤𑀺.

𑀤𑀺𑀲𑀸𑀬𑁄𑀕𑁂 𑁋 𑀅𑀯𑀺𑀘𑀺𑀢𑁄 𑀬𑀸𑀯 𑀉𑀧𑀭𑀺𑀪𑀯𑀕𑁆𑀕𑀫𑀦𑁆𑀢𑀭𑁂 𑀩𑀳𑀽 𑀲𑀢𑁆𑀢𑀦𑀺𑀓𑀸𑀬𑀸 𑀯𑀲𑀦𑁆𑀢𑀺, 𑀬𑀢𑁄 𑀔𑁂𑀫𑀁 𑀢𑀢𑁄 𑀪𑀬𑀁, 𑀧𑀼𑀭𑀢𑁆𑀣𑀺𑀫𑀢𑁄, 𑀤𑀓𑁆𑀔𑀺𑀡𑀢𑁄, 𑀧𑀘𑁆𑀙𑀺𑀫𑀢𑁄, 𑀉𑀢𑁆𑀢𑀭𑀢𑁄 𑀅𑀕𑁆𑀕𑀻 𑀧𑀚𑁆𑀚𑀮𑀦𑁆𑀢𑀺, 𑀬𑀢𑁄 𑀅𑀲𑁆𑀲𑁄𑀲𑀼𑀁 𑀪𑀕𑀯𑀦𑁆𑀢𑀁, 𑀉𑀤𑁆𑀥𑀁 𑀧𑀸𑀤𑀢𑀮𑀸 𑀅𑀥𑁄 𑀓𑁂𑀲𑀫𑀢𑁆𑀣𑀓𑀸 𑀇𑀘𑁆𑀘𑁂𑀯𑀫𑀸𑀤𑀺.

𑀯𑀺𑀪𑀢𑁆𑀢𑁂 𑁋 𑀬𑀢𑁄 𑀧𑀡𑀻𑀢𑀢𑀭𑁄 𑀯𑀸 𑀯𑀺𑀲𑀺𑀝𑁆𑀞𑀢𑀭𑁄 𑀯𑀸 𑀦𑀢𑁆𑀣𑀺. 𑀙𑀝𑁆𑀞𑀻 𑀘, 𑀙𑀦𑁆𑀦𑀯𑀼𑀢𑀻𑀦𑀁 𑀧𑀸𑀲𑀡𑁆𑀟𑀸𑀦𑀁, 𑀥𑀫𑁆𑀫𑀸𑀦𑀁 𑀧𑀯𑀭𑀁 𑀬𑀤𑀺𑀤𑀁 𑀲𑀼𑀕𑀢𑀯𑀺𑀦𑀬𑁄 𑀇𑀘𑁆𑀘𑁂𑀯𑀫𑀸𑀤𑀺.

𑀆𑀭𑀧𑁆𑀧𑀬𑁄𑀕𑁂 𑁋 𑀕𑀸𑀫𑀥𑀫𑁆𑀫𑀸 𑀯𑀲𑀮𑀥𑀫𑁆𑀫𑀸 𑀅𑀲𑀤𑁆𑀥𑀫𑁆𑀫𑀸 𑀆𑀭𑀢𑀺 𑀯𑀺𑀭𑀢𑀺 𑀧𑀝𑀺𑀯𑀺𑀭𑀢𑀺, 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀻 𑀇𑀘𑁆𑀘𑁂𑀯𑀫𑀸𑀤𑀺.

𑀲𑀼𑀤𑁆𑀥𑁂 𑁋 𑀮𑁄𑀪𑀦𑀺𑀬𑁂𑀳𑀺 𑀥𑀫𑁆𑀫𑁂𑀳𑀺 𑀲𑀼𑀤𑁆𑀥𑁄 𑀅𑀲𑀁𑀲𑀝𑁆𑀞𑁄, 𑀫𑀸𑀢𑀺𑀢𑁄 𑀘 𑀧𑀺𑀢𑀺𑀢𑁄 𑀘 𑀲𑀼𑀤𑁆𑀥𑁄 𑀅𑀲𑀁𑀲𑀝𑁆𑀞𑁄 𑀅𑀦𑀼𑀧𑀓𑀼𑀤𑁆𑀥𑁄 𑀅𑀕𑀭𑀳𑀺𑀢𑁄 𑀇𑀘𑁆𑀘𑁂𑀯𑀫𑀸𑀤𑀺.

𑀧𑀫𑁄𑀘𑀦𑁂 𑁋 𑀧𑀭𑀺𑀫𑀼𑀢𑁆𑀢𑁄 𑀤𑀼𑀓𑁆𑀔𑀲𑁆𑀫𑀸𑀢𑀺 𑀯𑀤𑀸𑀫𑀺, 𑀫𑀼𑀢𑁆𑀢𑁄𑀲𑁆𑀫𑀺 𑀫𑀸𑀭𑀩𑀦𑁆𑀥𑀦𑀸, 𑀦 𑀢𑁂 𑀫𑀼𑀘𑁆𑀘𑀦𑁆𑀢𑀺 𑀫𑀘𑁆𑀘𑀼𑀦𑀸 𑀇𑀘𑁆𑀘𑁂𑀯𑀫𑀸𑀤𑀺.

𑀳𑁂𑀢𑁆𑀯𑀢𑁆𑀣𑁂 𑁋 𑀓𑀲𑁆𑀫𑀸 𑀳𑁂𑀢𑀼𑀦𑀸, 𑀓𑁂𑀦 𑀳𑁂𑀢𑀼𑀦𑀸, 𑀓𑀺𑀲𑁆𑀲 𑀳𑁂𑀢𑀼𑀦𑀸, 𑀓𑀲𑁆𑀫𑀸 𑀦𑀼 𑀢𑀼𑀫𑁆𑀳𑀁 𑀤𑀳𑀭𑀸 𑀦 𑀫𑀻𑀬𑀭𑁂, 𑀓𑀲𑁆𑀫𑀸 𑀇𑀥𑁂𑀯 𑀫𑀭𑀡𑀁 𑀪𑀯𑀺𑀲𑁆𑀲𑀢𑀺 𑀇𑀘𑁆𑀘𑁂𑀯𑀫𑀸𑀤𑀺.

𑀯𑀺𑀯𑀺𑀢𑁆𑀢𑀢𑁆𑀣𑁂 𑁋 𑀯𑀺𑀯𑀺𑀢𑁆𑀢𑁄 𑀧𑀸𑀧𑀓𑀸 𑀥𑀫𑁆𑀫𑀸, 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀇𑀘𑁆𑀘𑁂𑀯𑀫𑀸𑀤𑀺.

𑀧𑀫𑀸𑀡𑁂 𑁋 𑀤𑀻𑀖𑀲𑁄 𑀦𑀯𑀯𑀺𑀤𑀢𑁆𑀣𑀺𑀬𑁄 𑀲𑀼𑀕𑀢𑀯𑀺𑀤𑀢𑁆𑀣𑀺𑀬𑀸 𑀧𑀫𑀸𑀡𑀺𑀓𑀸 𑀓𑀸𑀭𑁂𑀢𑀩𑁆𑀩𑀸, 𑀫𑀚𑁆𑀛𑀺𑀫𑀲𑁆𑀲 𑀧𑀼𑀭𑀺𑀲𑀲𑁆𑀲 𑀅𑀟𑁆𑀠 𑀢𑁂𑀴𑀲𑀳𑀢𑁆𑀣𑀸 𑀇𑀘𑁆𑀘𑁂𑀯𑀫𑀸𑀤𑀺.

𑀧𑀼𑀩𑁆𑀩𑀬𑁄𑀕𑁂 𑁋 𑀧𑀼𑀩𑁆𑀩𑁂𑀯 𑀲𑀫𑁆𑀫𑁄𑀥𑀸 𑀇𑀘𑁆𑀘𑁂𑀯𑀫𑀸𑀤𑀺.

𑀩𑀦𑁆𑀥𑀦𑀢𑁆𑀣𑁂 𑁋 𑀲𑀢𑀲𑁆𑀫𑀸 𑀩𑀦𑁆𑀥𑁄 𑀦𑀭𑁄. 𑀢𑀢𑀺𑀬𑀸 𑀘, 𑀲𑀢𑁂𑀦 𑀩𑀦𑁆𑀥𑁄 𑀦𑀭𑁄 𑀭𑀜𑁆𑀜𑀸 𑀇𑀡𑀢𑁆𑀣𑁂𑀦 𑀇𑀘𑁆𑀘𑁂𑀯𑀫𑀸𑀤𑀺.

𑀕𑀼𑀡𑀯𑀘𑀦𑁂 𑁋 𑀧𑀼𑀜𑁆𑀜𑀸𑀬 𑀲𑀼𑀕𑀢𑀺𑀁 𑀬𑀦𑁆𑀢𑀺, 𑀘𑀸𑀕𑀸𑀬 𑀯𑀺𑀧𑀼𑀮𑀁 𑀥𑀦𑀁, 𑀧𑀜𑁆𑀜𑀸𑀬 𑀯𑀺𑀫𑀼𑀢𑁆𑀢𑀺𑀫𑀦𑁄, 𑀇𑀲𑁆𑀲𑀭𑀺𑀬𑀸𑀬 𑀚𑀦𑀁 𑀭𑀓𑁆𑀔𑀢𑀺 𑀭𑀸𑀚𑀸 𑀇𑀘𑁆𑀘𑁂𑀯𑀫𑀸𑀤𑀺.

𑀧𑀜𑁆𑀳𑁂 𑀢𑁆𑀯𑀸𑀮𑁄𑀧𑁂 𑀓𑀫𑁆𑀫𑀸𑀥𑀺𑀓𑀭𑀡𑁂𑀲𑀼 𑁋 𑀅𑀪𑀺𑀥𑀫𑁆𑀫𑀸 𑀧𑀼𑀘𑁆𑀙𑀦𑁆𑀢𑀺, 𑀅𑀪𑀺𑀥𑀫𑁆𑀫𑀁 𑀲𑀼𑀢𑁆𑀯𑀸, 𑀅𑀪𑀺𑀥𑀫𑁆𑀫𑁂 𑀞𑀢𑁆𑀯𑀸 𑀯𑀸. 𑀯𑀺𑀦𑀬𑀸 𑀧𑀼𑀘𑁆𑀙𑀦𑁆𑀢𑀺, 𑀯𑀺𑀦𑀬𑀁 𑀲𑀼𑀢𑁆𑀯𑀸, 𑀯𑀺𑀦𑀬𑁂 𑀞𑀢𑁆𑀯𑀸 𑀯𑀸. 𑀤𑀼𑀢𑀺𑀬𑀸 𑀘 𑀢𑀢𑀺𑀬𑀸 𑀘, 𑀅𑀪𑀺𑀥𑀫𑁆𑀫𑀁, 𑀅𑀪𑀺𑀥𑀫𑁆𑀫𑁂𑀦 𑀯𑀸. 𑀯𑀺𑀦𑀬𑀁, 𑀯𑀺𑀦𑀬𑁂𑀦 𑀯𑀸. 𑀏𑀯 𑀲𑀼𑀢𑁆𑀢𑀸, 𑀕𑁂𑀬𑁆𑀬𑀸, 𑀕𑀸𑀣𑀸𑀬, 𑀯𑁂𑀬𑁆𑀬𑀸𑀓𑀭𑀡𑀸, 𑀉𑀤𑀸𑀦𑀸, 𑀇𑀢𑀺𑀯𑀼𑀢𑁆𑀢𑀓𑀸, 𑀚𑀸𑀢𑀓𑀸, 𑀅𑀩𑁆𑀪𑀼𑀢𑀥𑀫𑁆𑀫𑀸, 𑀯𑁂𑀤𑀮𑁆𑀮𑀸 𑀇𑀘𑁆𑀘𑁂𑀯𑀫𑀸𑀤𑀺.

𑀓𑀣𑀦𑁂 𑀢𑁆𑀯𑀸𑀮𑁄𑀧𑁂 𑀓𑀫𑁆𑀫𑀸𑀥𑀺𑀓𑀭𑀡𑁂𑀲𑀼 𑁋 𑀅𑀪𑀺𑀥𑀫𑁆𑀫𑀸 𑀓𑀣𑀬𑀦𑁆𑀢𑀺, 𑀅𑀪𑀺𑀥𑀫𑁆𑀫𑀁 𑀲𑀼𑀢𑁆𑀯𑀸, 𑀅𑀪𑀺𑀥𑀫𑁆𑀫𑁂 𑀞𑀢𑁆𑀯𑀸 𑀯𑀸. 𑀯𑀺𑀦𑀬𑀸 𑀓𑀣𑀬𑀦𑁆𑀢𑀺, 𑀯𑀺𑀦𑀬𑀁 𑀲𑀼𑀢𑁆𑀯𑀸, 𑀯𑀺𑀦𑀬𑁂 𑀞𑀢𑁆𑀯𑀸 𑀯𑀸. 𑀤𑀼𑀢𑀺𑀬𑀸 𑀘 𑀢𑀢𑀺𑀬𑀸 𑀘, 𑀅𑀪𑀺𑀥𑀫𑁆𑀫𑀁, 𑀅𑀪𑀺𑀥𑀫𑁆𑀫𑁂𑀦 𑀯𑀸. 𑀯𑀺𑀦𑀬𑀁 𑀯𑀺𑀦𑀬𑁂𑀦 𑀯𑀸. 𑀏𑀯𑀁 𑀲𑀼𑀢𑁆𑀢𑀸, 𑀕𑁂𑀬𑁆𑀬𑀸, 𑀕𑀸𑀣𑀸𑀬, 𑀯𑁂𑀬𑁆𑀬𑀸𑀓𑀭𑀡𑀸, 𑀉𑀤𑀸𑀦𑀸, 𑀇𑀢𑀺𑀯𑀼𑀢𑁆𑀢𑀓𑀸, 𑀚𑀸𑀢𑀓𑀸, 𑀅𑀩𑁆𑀪𑀼𑀢𑀥𑀫𑁆𑀫𑀸, 𑀯𑁂𑀤𑀮𑁆𑀮𑀸 𑀇𑀘𑁆𑀘𑁂𑀯𑀫𑀸𑀤𑀺.

𑀣𑁄𑀓𑁂 𑁋 𑀣𑁄𑀓𑀸 𑀫𑀼𑀘𑁆𑀘𑀦𑁆𑀢𑀺. 𑀅𑀧𑁆𑀧𑀫𑀢𑁆𑀢𑀓𑀸 𑀫𑀼𑀘𑁆𑀘𑀦𑁆𑀢𑀺, 𑀓𑀺𑀘𑁆𑀙𑀸 𑀫𑀼𑀘𑁆𑀘𑀦𑁆𑀢𑀺. 𑀢𑀢𑀺𑀬𑀸 𑀘. 𑀣𑁄𑀓𑁂𑀦, 𑀅𑀧𑁆𑀧𑀫𑀢𑁆𑀢𑀓𑁂𑀦, 𑀓𑀺𑀘𑁆𑀙𑁂𑀦 𑀯𑀸 𑀇𑀘𑁆𑀘𑁂𑀯𑀫𑀸𑀤𑀺.

𑀅𑀓𑀢𑁆𑀢𑀭𑀺𑀘 𑁋 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀉𑀧𑀘𑀺𑀢𑀢𑁆𑀢𑀸 𑀉𑀲𑁆𑀲𑀦𑁆𑀦𑀢𑁆𑀢𑀸 𑀯𑀺𑀧𑀼𑀮𑀢𑁆𑀢𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀺 𑀇𑀘𑁆𑀘𑁂𑀯𑀫𑀸𑀤𑀺.

𑀘𑀕𑁆𑀕𑀳𑀡𑁂𑀦 𑀲𑁂𑀲𑁂𑀲𑀼𑀧𑀺 𑀬𑁂 𑀫𑀬𑀸 𑀦𑁄𑀧𑀤𑀺𑀝𑁆𑀞𑀸 𑀅𑀧𑀸𑀤𑀸𑀦𑀧𑀬𑁄𑀕𑀺𑀓𑀸, 𑀢𑁂 𑀧𑀬𑁄𑀕𑀯𑀺𑀘𑀓𑁆𑀔𑀡𑁂𑀳𑀺 𑀬𑀣𑀸𑀬𑁄𑀕𑀁 𑀬𑁄𑀚𑁂𑀢𑀩𑁆𑀩𑀸.

𑁨𑁭𑁬. , 𑁩𑁦𑁨. 𑀬𑀲𑁆𑀲 𑀤𑀸𑀢𑀼𑀓𑀸𑀫𑁄 𑀭𑁄𑀘𑀢𑁂 𑀥𑀸𑀭𑀬𑀢𑁂 𑀯𑀸 𑀢𑀁 𑀲𑀫𑁆𑀧𑀤𑀸𑀦𑀁.

𑀬𑀲𑁆𑀲 𑀯𑀸 𑀤𑀸𑀢𑀼𑀓𑀸𑀫𑁄 𑀬𑀲𑁆𑀲 𑀯𑀸𑀭𑁄𑀘𑀢𑁂, 𑀬𑀲𑁆𑀲 𑀯𑀸 𑀥𑀸𑀭𑀬𑀢𑁂, 𑀢𑀁 𑀓𑀸𑀭𑀓𑀁 𑀲𑀫𑁆𑀧𑀤𑀸𑀦𑀲𑀜𑁆𑀜𑀁 𑀳𑁄𑀢𑀺.

𑀲𑀫𑀡𑀲𑁆𑀲 𑀘𑀻𑀯𑀭𑀁 𑀤𑀤𑀸𑀢𑀺, 𑀲𑀫𑀡𑀲𑁆𑀲 𑀭𑁄𑀘𑀢𑁂 𑀲𑀘𑁆𑀘𑀁, 𑀤𑁂𑀯𑀤𑀢𑁆𑀢𑀲𑁆𑀲 𑀲𑀼𑀯𑀡𑁆𑀡𑀘𑁆𑀙𑀢𑁆𑀢𑀁 𑀥𑀸𑀭𑀬𑀢𑁂 𑀬𑀜𑁆𑀜𑀤𑀢𑁆𑀢𑁄.

𑀲𑀫𑁆𑀧𑀤𑀸𑀦𑀫𑀺𑀘𑁆𑀘𑀦𑁂𑀦 𑀓𑁆𑀯𑀢𑁆𑀣𑁄? 𑀲𑀫𑁆𑀧𑀤𑀸𑀦𑁂 𑀘𑀢𑀼𑀢𑁆𑀣𑀻.

𑀯𑀸𑀢𑀺 𑀯𑀺𑀓𑀧𑁆𑀧𑀦𑀢𑁆𑀣𑀁, 𑀥𑀸𑀢𑀼𑀦𑀸𑀫𑀸𑀦𑀁 𑀧𑀬𑁄𑀕𑁂 𑀯𑀸 𑀉𑀧𑀲𑀕𑁆𑀕𑀧𑁆𑀧𑀬𑁄𑀕𑁂 𑀯𑀸 𑀦𑀺𑀧𑀸𑀢𑀧𑁆𑀧𑀬𑁄𑀕𑁂 𑀯𑀸 𑀲𑀢𑀺 𑀅𑀢𑁆𑀣𑀯𑀺𑀓𑀧𑁆𑀧𑀦𑀢𑁆𑀣𑀁 𑀯𑀸𑀢𑀺 𑀧𑀤𑀁 𑀧𑀬𑀼𑀚𑁆𑀚𑀢𑀺.

𑁨𑁭𑁭. , 𑁩𑁦𑁩. 𑀲𑀺𑀮𑀸𑀖 𑀳𑀦𑀼 𑀞𑀸 𑀲𑀧 𑀥𑀸𑀭 𑀧𑀺𑀳 𑀓𑀼𑀥 𑀤𑀼𑀳𑀺𑀲𑁆𑀲𑁄𑀲𑀽𑀬 𑀭𑀸𑀥𑀺𑀓𑁆𑀔 𑀧𑀘𑁆𑀘𑀸𑀲𑀼𑀡 𑀅𑀦𑀼𑀧𑀢𑀺𑀕𑀺𑀡 𑀧𑀼𑀩𑁆𑀩𑀓𑀢𑁆𑀢𑀸𑀭𑁄𑀘𑀦𑀢𑁆𑀣 𑀢𑀤𑀢𑁆𑀣 𑀢𑀼𑀫𑀢𑁆𑀣𑀸𑀮𑀫𑀢𑁆𑀣 𑀫𑀜𑁆𑀜𑀸𑀦𑀸𑀤𑀭𑀧𑁆𑀧𑀸𑀡𑀺𑀦𑀺, 𑀕𑀢𑁆𑀬𑀢𑁆𑀣𑀓𑀫𑁆𑀫𑀦𑀺, 𑀆𑀲𑀻𑀲𑀢𑁆𑀣 𑀲𑀫𑁆𑀫𑀼𑀢𑀺 𑀪𑀺𑀬𑁆𑀬 𑀲𑀢𑁆𑀢𑀫𑁆𑀬𑀢𑁆𑀣𑁂𑀲𑀼 𑀘.

𑀲𑀺𑀮𑀸𑀖 𑀳𑀦𑀼 𑀞𑀸 𑀲𑀧 𑀥𑀸𑀭 𑀧𑀺𑀳 𑀓𑀼𑀥 𑀤𑀼𑀳 𑀇𑀲𑁆𑀲𑀇𑀘𑁆𑀘𑁂𑀢𑁂𑀲𑀁 𑀥𑀸𑀢𑀽𑀦𑀁 𑀧𑀬𑁄𑀕𑁂, 𑀉𑀲𑀽𑀬𑀢𑁆𑀣𑀸𑀦𑀜𑁆𑀘 𑀧𑀬𑁄𑀕𑁂, 𑀭𑀸𑀥𑀺𑀓𑁆𑀔𑀧𑁆𑀧𑀬𑁄𑀕𑁂, 𑀧𑀘𑁆𑀘𑀸𑀲𑀼𑀡𑀅𑀦𑀼𑀧𑀢𑀺𑀕𑀺𑀡𑀸𑀦𑀁 𑀧𑀼𑀩𑁆𑀩𑀓𑀢𑁆𑀢𑀭𑀺, 𑀆𑀭𑁄𑀘𑀦𑀢𑁆𑀣𑁂, 𑀢𑀤𑀢𑁆𑀣𑁂, 𑀢𑀼𑀫𑀢𑁆𑀣𑁂, 𑀅𑀮𑀫𑀢𑁆𑀣𑁂, 𑀫𑀜𑁆𑀜𑀢𑀺𑀧𑁆𑀧𑀬𑁄𑀕𑁂 𑀅𑀦𑀸𑀤𑀭𑁂 𑀅𑀧𑁆𑀧𑀸𑀡𑀺𑀦𑀺, 𑀕𑀢𑁆𑀬𑀢𑁆𑀣𑀸𑀦𑀁 𑀥𑀸𑀢𑀽𑀦𑀁 𑀓𑀫𑁆𑀫𑀦𑀺, 𑀆𑀲𑀻𑀲𑀢𑁆𑀣𑁂 𑀘 𑀲𑀫𑁆𑀫𑀼𑀢𑀺 𑀪𑀺𑀬𑁆𑀬 𑀲𑀢𑁆𑀢𑀫𑁆𑀬𑀢𑁆𑀣𑁂𑀲𑀼 𑀘, 𑀢𑀁 𑀓𑀸𑀭𑀓𑀁 𑀲𑀫𑁆𑀧𑀤𑀸𑀦𑀲𑀜𑁆𑀜𑀁 𑀳𑁄𑀢𑀺.

𑀲𑀺𑀮𑀸𑀖𑀧𑁆𑀧𑀬𑁄𑀕𑁂 𑀢𑀸𑀯 𑁋 𑀩𑀼𑀤𑁆𑀥𑀲𑁆𑀲 𑀲𑀺𑀮𑀸𑀖𑀢𑁂, 𑀥𑀫𑁆𑀫𑀲𑁆𑀲 𑀲𑀺𑀮𑀸𑀖𑀢𑁂, 𑀲𑀗𑁆𑀖𑀲𑁆𑀲 𑀲𑀺𑀮𑀸𑀖𑀢𑁂, 𑀲𑀓𑀁𑀉𑀧𑀚𑁆𑀛𑀸𑀬𑀲𑁆𑀲 𑀲𑀺𑀮𑀸𑀖𑀢𑁂, 𑀢𑀯 𑀲𑀺𑀮𑀸𑀖𑀢𑁂 𑀫𑀫 𑀲𑀺𑀮𑀸𑀖𑀢𑁂 𑀇𑀘𑁆𑀘𑁂𑀯𑀫𑀸𑀤𑀺.

𑀳𑀦𑀼𑀧𑁆𑀧𑀬𑁄𑀕𑁂 𑁋 𑀳𑀦𑀼𑀢𑁂 𑀢𑀼𑀬𑁆𑀳𑀫𑁂𑀯, 𑀳𑀦𑀼𑀢𑁂 𑀫𑀬𑁆𑀳𑀫𑁂𑀯 𑀇𑀘𑁆𑀘𑁂𑀯𑀫𑀸𑀤𑀺.

𑀞𑀸𑀧𑀬𑁄𑀕𑁂 𑁋 𑀉𑀧𑀢𑀺𑀝𑁆𑀞𑁂𑀬𑁆𑀬 𑀲𑀓𑁆𑀬𑀧𑀼𑀢𑁆𑀢𑀸𑀦𑀁 𑀯𑀟𑁆𑀠𑀓𑀻, 𑀪𑀺𑀓𑁆𑀔𑀼𑀲𑁆𑀲 𑀪𑀼𑀜𑁆𑀚𑀦𑁆𑀢𑀲𑁆𑀲 𑀧𑀸𑀦𑀻𑀬𑁂𑀦 𑀯𑀸 𑀯𑀺𑀥𑀽𑀧𑀦𑁂𑀦 𑀯𑀸 𑀉𑀧𑀢𑀺𑀝𑁆𑀞𑁂𑀬𑁆𑀬 𑀪𑀺𑀓𑁆𑀔𑀼𑀦𑀻 𑀇𑀘𑁆𑀘𑁂𑀯𑀫𑀸𑀤𑀺.

𑀲𑀧𑀧𑁆𑀧𑀬𑁄𑀕𑁂 𑁋 𑀢𑀼𑀬𑁆𑀳𑀁 𑀲𑀧𑀢𑁂, 𑀫𑀬𑁆𑀳𑀁 𑀲𑀧𑀢𑁂 𑀇𑀘𑁆𑀘𑁂𑀯𑀫𑀸𑀤𑀺.

𑀥𑀸𑀭𑀧𑁆𑀧𑀬𑁄𑀕𑁂 𑁋 𑀲𑀼𑀯𑀡𑁆𑀡𑀁 𑀢𑁂 𑀥𑀸𑀭𑀬𑀢𑁂 𑀇𑀘𑁆𑀘𑁂𑀯𑀫𑀸𑀤𑀺.

𑀧𑀺𑀳𑀧𑁆𑀧𑀬𑁄𑀕𑁂 𑁋 𑀩𑀼𑀤𑁆𑀥𑀲𑁆𑀲 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀺𑀳𑀬𑀦𑁆𑀢𑀺, 𑀤𑁂𑀯𑀸 𑀤𑀲𑁆𑀲𑀦𑀓𑀸𑀫𑀸 𑀢𑁂, 𑀬𑀢𑁄 𑀇𑀘𑁆𑀙𑀸𑀫𑀺 𑀪𑀤𑁆𑀤𑀦𑁆𑀢𑀲𑁆𑀲, 𑀲𑀫𑀺𑀤𑁆𑀥𑀸𑀦𑀁 𑀧𑀺𑀳𑀬𑀦𑁆𑀢𑀺 𑀤𑀮𑀺𑀤𑁆𑀤𑀸 𑀇𑀘𑁆𑀘𑁂𑀯𑀫𑀸𑀤𑀺.

𑀓𑀼𑀥𑀤𑀼𑀳𑀇𑀲𑁆𑀲𑀉𑀲𑀽𑀬𑀧𑁆𑀧𑀬𑁄𑀕𑁂 𑁋 𑀓𑁄𑀥𑀬𑀢𑀺 𑀤𑁂𑀯 𑀤𑀢𑁆𑀢𑀲𑁆𑀲, 𑀢𑀲𑁆𑀲 𑀓𑀼𑀚𑁆𑀛 𑀫𑀳𑀸𑀯𑀻𑀭, 𑀫𑀸 𑀭𑀝𑁆𑀞𑀁 𑀯𑀺𑀦𑀲𑁆𑀲 𑀇𑀤𑀁. 𑀤𑀼𑀳𑀬𑀢𑀺 𑀤𑀺𑀲𑀸𑀦𑀁 𑀫𑁂𑀖𑁄, 𑀢𑀺𑀢𑁆𑀣𑀺𑀬𑀸 𑀲𑀫𑀡𑀸𑀦𑀁 𑀇𑀲𑁆𑀲𑀬𑀦𑁆𑀢𑀺 𑀕𑀼𑀡𑀕𑀺𑀤𑁆𑀥𑁂𑀦, 𑀢𑀺𑀢𑁆𑀣𑀺𑀬𑀸 𑀲𑀫𑀡𑀸𑀦𑀁 𑀇𑀲𑁆𑀲𑀬𑀦𑁆𑀢𑀺 𑀮𑀸𑀪𑀕𑀺𑀤𑁆𑀥𑁂𑀦, 𑀤𑀼𑀚𑁆𑀚𑀦𑀸 𑀕𑀼𑀡𑀯𑀦𑁆𑀢𑀸𑀦𑀁 𑀉𑀲𑀽𑀬𑀦𑁆𑀢𑀺 𑀕𑀼𑀡𑀕𑀺𑀤𑁆𑀥𑁂𑀦, 𑀓𑀸 𑀉𑀲𑀽𑀬𑀸 𑀯𑀺𑀚𑀸𑀦𑀢𑀁 𑀇𑀘𑁆𑀘𑁂𑀯𑀫𑀸𑀤𑀺.

𑀭𑀸𑀥 𑀇𑀓𑁆𑀔 𑀇𑀘𑁆𑀘𑁂𑀢𑁂𑀲𑀁 𑀥𑀸𑀢𑀽𑀦𑀁 𑀧𑀬𑁄𑀕𑁂 𑀬𑀲𑁆𑀲 𑀅𑀓𑀣𑀺𑀢𑀲𑁆𑀲 𑀧𑀼𑀘𑁆𑀙𑀦𑀁 𑀓𑀫𑁆𑀫𑀯𑀺𑀓𑁆𑀔𑁆𑀬𑀸𑀧𑀦𑀢𑁆𑀣𑀜𑁆𑀘, 𑀢𑀁 𑀓𑀸𑀭𑀓𑀁 𑀲𑀫𑁆𑀧𑀤𑀸𑀦𑀲𑀜𑁆𑀜𑀁 𑀳𑁄𑀢𑀺, 𑀤𑀼𑀢𑀺𑀬𑀸 𑀘.

𑀆𑀭𑀸𑀥𑁄𑀳𑀁 𑀭𑀜𑁆𑀜𑁄, 𑀆𑀭𑀸𑀥𑁄𑀳𑀁 𑀭𑀸𑀚𑀸𑀦𑀁, 𑀓𑁆𑀬𑀸𑀳𑀁 𑀅𑀬𑁆𑀬𑀸𑀦𑀁 𑀅𑀧𑀭𑀚𑁆𑀛𑀸𑀫𑀺, 𑀓𑁆𑀬𑀸𑀳𑀁 𑀅𑀬𑁆𑀬𑁂 𑀅𑀧𑀭𑀚𑁆𑀛𑀸𑀫𑀺, 𑀘𑀓𑁆𑀔𑀼𑀁 𑀚𑀦𑀲𑁆𑀲 𑀤𑀲𑁆𑀲𑀦𑀸𑀬 𑀢𑀁 𑀯𑀺𑀬 𑀫𑀜𑁆𑀜𑁂, 𑀆𑀬𑀲𑁆𑀫𑀢𑁄 𑀉𑀧𑀸𑀮𑀺𑀢𑁆𑀣𑁂𑀭𑀲𑁆𑀲 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑁄 𑀉𑀧𑀢𑀺𑀲𑁆𑀲𑁄, 𑀆𑀬𑀲𑁆𑀫𑀦𑁆𑀢𑀁 𑀯𑀸 𑀇𑀘𑁆𑀘𑁂𑀯𑀫𑀸𑀤𑀺.

𑀧𑀘𑁆𑀘𑀸𑀲𑀼𑀡 𑀅𑀦𑀼𑀧𑀢𑀺𑀕𑀺𑀡𑀸𑀦𑀁 𑀧𑀼𑀩𑁆𑀩𑀓𑀢𑁆𑀢𑀭𑀺 𑀲𑀼𑀡𑁄𑀢𑀺𑀲𑁆𑀲 𑀧𑀘𑁆𑀘𑀸𑀬𑁄𑀕𑁂 𑀬𑀲𑁆𑀲 𑀓𑀫𑁆𑀫𑀼𑀦𑁄 𑀧𑀼𑀩𑁆𑀩𑀲𑁆𑀲 𑀬𑁄 𑀓𑀢𑁆𑀢𑀸, 𑀲𑁄 𑀲𑀫𑁆𑀧𑀤𑀸𑀦𑀲𑀜𑁆𑀜𑁄 𑀳𑁄𑀢𑀺.

𑀢𑀁 𑀬𑀣𑀸? 𑀪𑀕𑀯𑀸 𑀪𑀺𑀓𑁆𑀔𑀽 𑀏𑀢𑀤𑀯𑁄𑀘.

𑀪𑀺𑀓𑁆𑀔𑀽𑀢𑀺 𑀅𑀓𑀣𑀻𑀢 𑀓𑀫𑁆𑀫𑀁, 𑀏𑀢𑀦𑁆𑀢𑀺 𑀓𑀣𑀺𑀢𑀓𑀫𑁆𑀫𑀁. 𑀬𑀲𑁆𑀲 𑀓𑀫𑁆𑀫𑀼𑀦𑁄 𑀧𑀼𑀩𑁆𑀩𑀲𑁆𑀲 𑀬𑁄 𑀓𑀢𑁆𑀢𑀸, 𑀲𑁄‘𑀪𑀕𑀯𑀸’𑀢𑀺 ‘‘𑀬𑁄 𑀓𑀭𑁄𑀢𑀺 𑀲 𑀓𑀢𑁆𑀢𑀸’’𑀢𑀺 𑀲𑀼𑀢𑁆𑀢𑀯𑀘𑀦𑁂𑀦 𑀓𑀢𑁆𑀢𑀼𑀲𑀜𑁆𑀜𑁄. 𑀏𑀯𑀁 𑀬𑀲𑁆𑀲 𑀓𑀫𑁆𑀫𑀼𑀦𑁄 𑀧𑀼𑀩𑁆𑀩𑀲𑁆𑀲 𑀬𑁄 𑀓𑀢𑁆𑀢𑀸, 𑀲𑁄 𑀲𑀫𑁆𑀧𑀤𑀸𑀦𑀲𑀜𑁆𑀜𑁄 𑀳𑁄𑀢𑀺.

𑀢𑀁 𑀬𑀣𑀸? 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁, 𑀆𑀲𑀼𑀡𑀦𑁆𑀢𑀺 𑀩𑀼𑀤𑁆𑀥𑀲𑁆𑀲 𑀪𑀺𑀓𑁆𑀔𑀽.

𑀕𑀺𑀡𑀲𑁆𑀲 𑀅𑀦𑀼𑀧𑀢𑀺𑀬𑁄𑀕𑁂 𑀬𑀲𑁆𑀲 𑀓𑀫𑁆𑀫𑀼𑀦𑁄 𑀧𑀼𑀩𑁆𑀩𑀲𑁆𑀲 𑀬𑁄 𑀓𑀢𑁆𑀢𑀸, 𑀲𑁄 𑀲𑀫𑁆𑀧𑀤𑀸𑀦𑀲𑀜𑁆𑀜𑁄 𑀳𑁄𑀢𑀺.

𑀢𑀁 𑀬𑀣𑀸? 𑀪𑀺𑀓𑁆𑀔𑀼 𑀚𑀦𑀁 𑀥𑀫𑁆𑀫𑀁 𑀲𑀸𑀯𑁂𑀢𑀺, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀚𑀦𑁄 𑀅𑀦𑀼𑀕𑀺𑀡𑀸𑀢𑀺, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀚𑀦𑁄 𑀧𑀢𑀺𑀕𑀺𑀡𑀸𑀢𑀺.

𑀬𑁄 𑀯𑀤𑁂𑀢𑀺 𑀲‘𑀓𑀢𑁆𑀢𑀸’𑀢𑀺,

𑀯𑀼𑀢𑁆𑀢𑀁 ‘𑀓𑀫𑁆𑀫’𑀦𑁆𑀢𑀺 𑀯𑀼𑀘𑁆𑀘𑀢𑀺;

𑀬𑁄 𑀧𑀝𑀺𑀕𑁆𑀕𑀸𑀳𑀓𑁄 𑀢𑀲𑁆𑀲,

‘𑀲𑀫𑁆𑀧𑀤𑀸𑀦𑀁’ 𑀯𑀺𑀚𑀸𑀦𑀺𑀬𑀸.

𑀇𑀘𑁆𑀘𑁂𑀯𑀫𑀸𑀤𑀺.

𑀆𑀭𑁄𑀘𑀦𑀢𑁆𑀣𑁂 𑁋 𑀆𑀭𑁄𑀘𑀬𑀸𑀫𑀺 𑀯𑁄 𑀪𑀺𑀓𑁆𑀔𑀯𑁂, 𑀆𑀫𑀦𑁆𑀢𑀬𑀸𑀫𑀺 𑀯𑁄 𑀪𑀺𑀓𑁆𑀔𑀯𑁂, 𑀧𑀝𑀺𑀯𑁂𑀤𑀬𑀸𑀫𑀺 𑀯𑁄 𑀪𑀺𑀓𑁆𑀔𑀯𑁂, 𑀆𑀭𑁄𑀘𑀬𑀸𑀫𑀺 𑀢𑁂 𑀫𑀳𑀸𑀭𑀸𑀚, 𑀆𑀫𑀦𑁆𑀢𑀬𑀸𑀫𑀺 𑀢𑁂 𑀫𑀳𑀸𑀭𑀸𑀚, 𑀧𑀝𑀺𑀯𑁂𑀤𑀬𑀸𑀫𑀺 𑀢𑁂 𑀫𑀳𑀸𑀭𑀸𑀚 𑀇𑀘𑁆𑀘𑁂𑀯𑀫𑀸𑀤𑀺.

𑀢𑀤𑀢𑁆𑀣𑁂 𑁋 𑀊𑀦𑀲𑁆𑀲 𑀧𑀸𑀭𑀺𑀧𑀽𑀭𑀺𑀬𑀸 𑀢𑀁 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀩𑀼𑀤𑁆𑀥𑀲𑁆𑀲 𑀅𑀢𑁆𑀣𑀸𑀬, 𑀥𑀫𑁆𑀫𑀲𑁆𑀲 𑀅𑀢𑁆𑀣𑀸𑀬, 𑀲𑀗𑁆𑀖𑀲𑁆𑀲 𑀅𑀢𑁆𑀣𑀸𑀬, 𑀚𑀻𑀯𑀺𑀢𑀁 𑀧𑀭𑀺𑀘𑁆𑀘𑀚𑀸𑀫𑀺 𑀇𑀘𑁆𑀘𑁂𑀯𑀫𑀸𑀤𑀺.

𑀢𑀼𑀫𑀢𑁆𑀣𑁂 -𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀅𑀢𑁆𑀣𑀸𑀬 𑀳𑀺𑀢𑀸𑀬 𑀲𑀼𑀔𑀸𑀬 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀮𑁄𑀓𑁂 𑀉𑀧𑁆𑀧𑀚𑁆𑀚𑀢𑀺. 𑀪𑀺𑀓𑁆𑀔𑀽𑀦𑀁 𑀨𑀸𑀲𑀼𑀯𑀺𑀳𑀸𑀭𑀸𑀬 𑀯𑀺𑀦𑀬𑁄 𑀧𑀜𑁆𑀜𑀢𑁆𑀢𑁄 𑀇𑀘𑁆𑀘𑁂𑀯𑀫𑀸𑀤𑀺.

𑀅𑀮𑀫𑀢𑁆𑀣𑀧𑁆𑀧𑀬𑁄𑀕𑁂-𑀅𑀮𑀫𑀺𑀢𑀺 𑀅𑀭𑀳𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑁂𑀲𑀼. 𑀅𑀮𑀁 𑀫𑁂 𑀩𑀼𑀤𑁆𑀥𑁄, 𑀅𑀮𑀁 𑀫𑁂 𑀭𑀚𑁆𑀚𑀁, 𑀅𑀮𑀁 𑀪𑀺𑀓𑁆𑀔𑀼 𑀧𑀢𑁆𑀢𑀲𑁆𑀲, 𑀅𑀮𑀁 𑀫𑀮𑁆𑀮𑁄 𑀫𑀮𑁆𑀮𑀲𑁆𑀲, 𑀅𑀭𑀳𑀢𑀺 𑀫𑀮𑁆𑀮𑁄 𑀫𑀮𑁆𑀮𑀲𑁆𑀲. 𑀧𑀝𑀺𑀓𑁆𑀔𑀺𑀢𑁆𑀢𑁂 𑀅𑀮𑀁 𑀢𑁂 𑀭𑀽𑀧𑀁 𑀓𑀭𑀡𑀻𑀬𑀁, 𑀅𑀮𑀁 𑀫𑁂 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑁂𑀦 𑀇𑀘𑁆𑀘𑁂𑀯𑀫𑀸𑀤𑀺.

𑀫𑀜𑁆𑀜𑀢𑀺𑀧𑁆𑀧𑀬𑁄𑀕𑁂 𑀅𑀦𑀸𑀤𑀭𑁂 𑀅𑀧𑁆𑀧𑀸𑀡𑀺𑀦𑀺-𑀓𑀝𑁆𑀞𑀲𑁆𑀲 𑀢𑀼𑀯𑀁 𑀫𑀜𑁆𑀜𑁂, 𑀓𑀮𑀺𑀗𑁆𑀕𑀭𑀲𑁆𑀲 𑀢𑀼𑀯𑀁 𑀫𑀜𑁆𑀜𑁂.

𑀅𑀦𑀸𑀤𑀭𑁂𑀢𑀺 𑀓𑀺𑀫𑀢𑁆𑀣𑀁? 𑀲𑀼𑀯𑀡𑁆𑀡𑀁 𑀯𑀺𑀬 𑀢𑀁 𑀫𑀜𑁆𑀜𑁂.

𑀅𑀧𑁆𑀧𑀸𑀡𑀺𑀦𑀻𑀢𑀺 𑀓𑀺𑀫𑀢𑁆𑀣𑀁? 𑀕𑀤𑁆𑀭𑀪𑀁 𑀢𑀼𑀯𑀁 𑀫𑀜𑁆𑀜𑁂 𑀇𑀘𑁆𑀘𑁂𑀯𑀫𑀸𑀤𑀺.

𑀕𑀢𑁆𑀬𑀢𑁆𑀣𑀓𑀫𑁆𑀫𑀦𑀺-𑀕𑀸𑀫𑀲𑁆𑀲 𑀧𑀸𑀤𑁂𑀦 𑀕𑀢𑁄, 𑀦𑀕𑀭𑀲𑁆𑀲 𑀧𑀸𑀤𑁂𑀦 𑀕𑀢𑁄, 𑀅𑀧𑁆𑀧𑁄 𑀲𑀕𑁆𑀕𑀸𑀬 𑀕𑀘𑁆𑀙𑀢𑀺, 𑀲𑀕𑁆𑀕𑀲𑁆𑀲 𑀕𑀫𑀦𑁂𑀦 𑀯𑀸, 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑁂𑀬𑁆𑀬 𑀲𑀗𑁆𑀖𑁄. 𑀤𑀼𑀢𑀺𑀬𑀸 𑀘, 𑀕𑀸𑀫𑀁 𑀧𑀸𑀤𑁂𑀦 𑀕𑀢𑁄, 𑀦𑀕𑀭𑀁 𑀧𑀸𑀤𑁂𑀦 𑀕𑀢𑁄, 𑀅𑀧𑁆𑀧𑁄 𑀲𑀕𑁆𑀕𑀁 𑀕𑀘𑁆𑀙𑀢𑀺, 𑀲𑀕𑁆𑀕𑀁 𑀕𑀫𑀦𑁂𑀦 𑀯𑀸, 𑀫𑀽𑀮𑀁 𑀧𑀝𑀺𑀓𑀲𑁆𑀲𑁂𑀬𑁆𑀬 𑀲𑀗𑁆𑀖𑁄 𑀇𑀘𑁆𑀘𑁂𑀯𑀫𑀸𑀤𑀺.

𑀆𑀲𑀻𑀲𑀢𑁆𑀣𑁂-𑀆𑀬𑀲𑁆𑀫𑀢𑁄 𑀤𑀻𑀖𑀸𑀬𑀼𑀓𑁄 𑀳𑁄𑀢𑀼, 𑀪𑀤𑁆𑀤𑀁 𑀪𑀯𑀢𑁄 𑀳𑁄𑀢𑀼, 𑀓𑀼𑀲𑀮𑀁 𑀪𑀯𑀢𑁄 𑀳𑁄𑀢𑀼, 𑀅𑀦𑀸𑀫𑀬𑀁 𑀪𑀯𑀢𑁄 𑀳𑁄𑀢𑀼, 𑀲𑀼𑀔𑀁 𑀪𑀯𑀢𑁄 𑀳𑁄𑀢𑀼, 𑀲𑁆𑀯𑀸𑀕𑀢𑀁 𑀪𑀯𑀢𑁄 𑀳𑁄𑀢𑀼, 𑀅𑀢𑁆𑀣𑁄 𑀪𑀯𑀢𑁄 𑀳𑁄𑀢𑀼, 𑀳𑀺𑀢𑀁 𑀪𑀯𑀢𑁄 𑀳𑁄𑀢𑀼 𑀇𑀘𑁆𑀘𑁂𑀯𑀫𑀸𑀤𑀺.

𑀲𑀫𑁆𑀫𑀼𑀢𑀺𑀧𑁆𑀧𑀬𑁄𑀕𑁂𑁋 𑀅𑀜𑁆𑀜𑀢𑁆𑀭 𑀲𑀗𑁆𑀖𑀲𑀫𑁆𑀫𑀼𑀢𑀺𑀬𑀸 𑀪𑀺𑀓𑁆𑀔𑀼𑀲𑁆𑀲 𑀯𑀺𑀧𑁆𑀧𑀯𑀢𑁆𑀣𑀼𑀁 𑀦 𑀯𑀝𑁆𑀝𑀢𑀺, 𑀲𑀸𑀥𑀼 𑀲𑀫𑁆𑀫𑀼𑀢𑀺 𑀫𑁂 𑀢𑀲𑁆𑀲 𑀪𑀕𑀯𑀢𑁄 𑀤𑀲𑁆𑀲𑀦𑀸𑀬 𑀇𑀘𑁆𑀘𑁂𑀯𑀫𑀸𑀤𑀺.

𑀪𑀺𑀬𑁆𑀬𑀧𑁆𑀧𑀬𑁄𑀕𑁂 𑁋 𑀪𑀺𑀬𑁆𑀬𑁄𑀲𑁄 𑀫𑀢𑁆𑀢𑀸𑀬𑀁 𑀇𑀘𑁆𑀘𑁂𑀯𑀫𑀸𑀤𑀺.

𑀲𑀢𑁆𑀢𑀫𑁆𑀬𑀢𑁆𑀣𑁂 𑁋 𑀢𑀼𑀬𑁆𑀳𑀜𑁆𑀘𑀲𑁆𑀲 𑀆𑀯𑀺 𑀓𑀭𑁄𑀫𑀺, 𑀢𑀲𑁆𑀲 𑀫𑁂 𑀲𑀓𑁆𑀓𑁄 𑀧𑀸𑀢𑀼𑀭𑀳𑁄𑀲𑀺 𑀇𑀘𑁆𑀘𑁂𑀯𑀫𑀸𑀤𑀺.

𑀅𑀢𑁆𑀣𑀕𑁆𑀕𑀳𑀡𑁂𑀦 𑀩𑀳𑀽𑀲𑀼 𑀅𑀓𑁆𑀔𑀭𑀧𑁆𑀧𑀬𑁄𑀕𑁂𑀲𑀼 𑀤𑀺𑀲𑁆𑀲𑀢𑀺.

𑀢𑀁 𑀬𑀣𑀸? 𑀉𑀧𑀫𑀁 𑀫𑀢 𑀓𑀭𑀺𑀲𑁆𑀲𑀸𑀫𑀺, 𑀥𑀫𑁆𑀫𑀁 𑀯𑁄 𑀤𑁂𑀲𑁂𑀲𑁆𑀲𑀸𑀫𑀺.

𑀲𑀸𑀭𑀢𑁆𑀣𑁂 𑀘 𑁋 𑀤𑁂𑀲𑁂𑀢𑀼 𑀪𑀦𑁆𑀢𑁂 𑀪𑀕𑀯𑀸 𑀥𑀫𑁆𑀫𑀁 𑀪𑀺𑀓𑁆𑀔𑀽𑀦𑀁. 𑀢𑀲𑁆𑀲 𑀨𑀸𑀲𑀼 𑀯𑀺𑀳𑀸𑀭𑀸𑀬 𑀳𑁄𑀢𑀺, 𑀏𑀢𑀲𑁆𑀲 𑀧𑀳𑀺𑀡𑁂𑀬𑁆𑀬, 𑀬𑀣𑀸 𑀦𑁄 𑀪𑀕𑀯𑀸 𑀩𑁆𑀬𑀸𑀓𑀭𑁂𑀬𑁆𑀬, 𑀢𑀣𑀸𑀧𑀺 𑀢𑁂𑀲𑀁 𑀩𑁆𑀬𑀸𑀓𑀭𑀺𑀲𑁆𑀲𑀸𑀫, 𑀓𑀧𑁆𑀧𑀢𑀺 𑀲𑀫𑀡𑀸𑀦𑀁 𑀆𑀬𑁄𑀕𑁄, 𑀅𑀫𑁆𑀳𑀸𑀓𑀁 𑀫𑀡𑀺𑀦𑀸 𑀅𑀢𑁆𑀣𑁄, 𑀓𑀺𑀫𑀢𑁆𑀣𑁄 𑀫𑁂 𑀩𑀼𑀤𑁆𑀥𑁂𑀦, 𑀲𑁂𑀬𑁆𑀬𑁄 𑀫𑁂 𑀅𑀢𑁆𑀣𑁄, 𑀩𑀳𑀽𑀧𑀓𑀸𑀭𑀸 𑀪𑀦𑁆𑀢𑁂 𑀫𑀳𑀸𑀧𑀚𑀸 𑀧𑀢𑀺𑀕𑁄𑀢𑀫𑀻 𑀪𑀕𑀯𑀢𑁄, 𑀩𑀳𑀽𑀧𑀓𑀸𑀭𑀸 𑀪𑀺𑀓𑁆𑀔𑀯𑁂 𑀫𑀸𑀢𑀸𑀧𑀺𑀢𑀭𑁄 𑀧𑀼𑀢𑁆𑀢𑀸𑀦𑀁 𑀇𑀘𑁆𑀘𑁂𑀯𑀫𑀸𑀤𑀺.

𑀲𑁂𑀲𑁂𑀲𑀼 𑀅𑀓𑁆𑀔𑀭𑀧𑁆𑀧𑀬𑁄𑀕𑁂𑀲𑀼𑀧𑀺 𑀅𑀜𑁆𑀜𑁂𑀧𑀺 𑀧𑀬𑁄𑀕𑀸 𑀧𑀬𑁄𑀕𑀯𑀺𑀘𑀓𑁆𑀔𑀡𑁂𑀳𑀺 𑀬𑁄𑀚𑁂𑀢𑀩𑁆𑀩𑀸.

𑀘𑀕𑁆𑀕𑀳𑀡𑀁 𑀯𑀺𑀓𑀧𑁆𑀧𑀦𑀢𑁆𑀣𑀯𑀸𑀕𑁆𑀕𑀳𑀡𑀸𑀦𑀼𑀓𑀟𑁆𑀠𑀦𑀢𑁆𑀣𑀁. 𑀬𑁂 𑀓𑁂𑀘𑀺 𑀲𑀤𑁆𑀤𑀸 𑀲𑀫𑁆𑀧𑀤𑀸𑀦𑀧𑁆𑀧𑀬𑁄𑀕𑀺𑀓𑀸 𑀫𑀬𑀸 𑀦𑁄𑀧𑀤𑀺𑀝𑁆𑀞𑀸, 𑀢𑁂𑀲𑀁 𑀕𑀳𑀡𑀢𑁆𑀣𑀁 𑀇𑀥 𑀯𑀺𑀓𑀧𑁆𑀧𑀻𑀬𑀢𑀺 𑀯𑀸𑀲𑀤𑁆𑀤𑁄.

𑀢𑀁 𑀬𑀣𑀸? 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀧𑀪𑀽 𑀅𑀬𑀁 𑀪𑀕𑀯𑀸, 𑀤𑁂𑀲𑀲𑁆𑀲 𑀧𑀪𑀽 𑀅𑀬𑀁 𑀭𑀸𑀚𑀸. 𑀔𑁂𑀢𑁆𑀢𑀲𑁆𑀲 𑀧𑀪𑀽 𑀅𑀬𑀁 𑀕𑀳𑀧𑀢𑀺, 𑀅𑀭𑀜𑁆𑀜𑀲𑁆𑀲 𑀧𑀪𑀽 𑀅𑀬𑀁 𑀮𑀼𑀤𑁆𑀤𑀓𑁄 𑀇𑀘𑁆𑀘𑁂𑀯𑀫𑀸𑀤𑀺. 𑀓𑁆𑀯𑀘𑀺 𑀤𑀼𑀢𑀺𑀬𑀸 𑀢𑀢𑀺𑀬𑀸 𑀧𑀜𑁆𑀘𑀫𑀻 𑀙𑀝𑁆𑀞𑀻 𑀲𑀢𑁆𑀢𑀫𑁆𑀬𑀢𑁆𑀣𑁂𑀲𑀼 𑀘.

𑁧𑁭𑁮. , 𑁩𑁨𑁦. 𑀬𑁄𑀥𑀸𑀭𑁄 𑀢𑀫𑁄𑀓𑀸𑀲𑀁.

𑀬𑁄 𑀆𑀥𑀸𑀭𑁄, 𑀢𑀁 𑀑𑀓𑀸𑀲𑀲𑀜𑁆𑀜𑀁 𑀳𑁄𑀢𑀺. 𑀲𑁆𑀯𑀸𑀥𑀸𑀭𑁄 𑀘𑀢𑀼𑀩𑁆𑀩𑀺𑀥𑁄 𑀩𑁆𑀬𑀸𑀧𑀺𑀓𑁄, 𑀑𑀧𑀲𑀺𑀮𑁂𑀲𑀺𑀓𑁄, 𑀯𑁂𑀲𑀬𑀺𑀓𑁄 𑀲𑀸𑀫𑀻𑀧𑀺𑀓𑁄 𑀘𑀸𑀢𑀺.

𑀢𑀢𑁆𑀣 𑀩𑁆𑀬𑀸𑀧𑀺𑀓𑁄 𑀢𑀸𑀯𑁋𑀚𑀮𑁂𑀲𑀼 𑀔𑀻𑀭𑀁 𑀢𑀺𑀝𑁆𑀞𑀢𑀺, 𑀢𑀺𑀮𑁂𑀲𑀼 𑀢𑁂𑀮𑀁, 𑀉𑀘𑁆𑀙𑀽𑀲𑀼 𑀭𑀲𑁄.

𑀑𑀧𑀲𑀺𑀮𑁂𑀲𑀺𑀓𑁄𑁋𑀧𑀭𑀺𑀬𑀗𑁆𑀓𑁂 𑀭𑀸𑀚𑀸 𑀲𑁂𑀢𑀺, 𑀆𑀲𑀦𑁂 𑀉𑀧𑀯𑀺𑀝𑁆𑀞𑁄 𑀲𑀗𑁆𑀖𑁄.

𑀯𑁂𑀲𑀬𑀺𑀓𑁄𑁋𑀪𑀽𑀫𑀻𑀲𑀼 𑀫𑀦𑀼𑀲𑁆𑀲𑀸 𑀘𑀭𑀦𑁆𑀢𑀺, 𑀅𑀦𑁆𑀢𑀮𑀺𑀓𑁆𑀔𑁂 𑀯𑀸𑀬𑀽 𑀯𑀸𑀬𑀦𑁆𑀢𑀺. 𑀆𑀓𑀸𑀲𑁂 𑀲𑀓𑀼𑀡𑀸 𑀧𑀓𑁆𑀔𑀦𑁆𑀤𑀦𑁆𑀢𑀺.

𑀲𑀸𑀫𑀻𑀧𑀺𑀓𑁄𑁋𑀯𑀦𑁂 𑀳𑀢𑁆𑀣𑀺𑀦𑁄 𑀘𑀭𑀦𑁆𑀢𑀺, 𑀕𑀗𑁆𑀕𑀸𑀬𑀁 𑀖𑁄𑀲𑁄 𑀢𑀺𑀝𑁆𑀞𑀢𑀺, 𑀯𑀚𑁂 𑀕𑀸𑀯𑁄 𑀤𑀼𑀳𑀦𑁆𑀢𑀺, 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂.

𑀑𑀓𑀸𑀲𑀫𑀺𑀘𑁆𑀘𑀦𑁂𑀦 𑀓𑁆𑀯𑀢𑁆𑀣𑁄? 𑀑𑀓𑀸𑀲𑁂 𑀲𑀢𑁆𑀢𑀫𑀻.

𑁨𑁭𑁯. , 𑁨𑁯𑁨. 𑀬𑁂𑀦 𑀯𑀸 𑀓𑀬𑀺𑀭𑀢𑁂 𑀢𑀁 𑀓𑀭𑀡𑀁.

𑀬𑁂𑀦 𑀯𑀸 𑀓𑀬𑀺𑀭𑀢𑁂, 𑀬𑁂𑀦 𑀯𑀸 𑀧𑀲𑁆𑀲𑀢𑀺, 𑀬𑁂𑀦 𑀯𑀸 𑀲𑀼𑀡𑀸𑀢𑀺, 𑀢𑀁 𑀓𑀸𑀭𑀓𑀁 𑀓𑀭𑀡𑀲𑀜𑁆𑀜𑀁 𑀳𑁄𑀢𑀺.

𑀤𑀢𑁆𑀢𑁂𑀦 𑀯𑀺𑀳𑀺𑀁 𑀮𑀼𑀦𑀸𑀢𑀺, 𑀯𑀸𑀲𑀺𑀬𑀸 𑀓𑀝𑁆𑀞𑀁 𑀢𑀘𑁆𑀙𑀢𑀺, 𑀨𑀭𑀲𑀼𑀦𑀸 𑀭𑀼𑀓𑁆𑀔𑀁 𑀙𑀺𑀦𑁆𑀤𑀢𑀺, 𑀓𑀼𑀤𑀸𑀮𑁂𑀦 𑀧𑀣𑀯𑀺𑀁 𑀔𑀡𑀢𑀺, 𑀲𑀢𑁆𑀣𑁂𑀦 𑀓𑀫𑁆𑀫𑀁 𑀓𑀭𑁄𑀢𑀺. 𑀘𑀓𑁆𑀔𑀼𑀦𑀸 𑀭𑀽𑀧𑀁 𑀧𑀲𑁆𑀲𑀢𑀺.

𑀓𑀭𑀡𑀫𑀺𑀘𑁆𑀘𑀦𑁂𑀦 𑀓𑁆𑀯𑀢𑁆𑀣𑁄? 𑀓𑀭𑀡𑁂 𑀢𑀢𑀺𑀬𑀸.

𑁨𑁮𑁦. , 𑁨𑁮𑁫. 𑀬𑀁 𑀓𑀭𑁄𑀢𑀺 𑀢𑀁 𑀓𑀫𑁆𑀫𑀁.

𑀬𑀁 𑀯𑀸 𑀓𑀭𑁄𑀢𑀺, 𑀬𑀁 𑀯𑀸 𑀧𑀲𑁆𑀲𑀢𑀺, 𑀬𑀁 𑀯𑀸 𑀲𑀼𑀡𑀸𑀢𑀺, 𑀢𑀁 𑀓𑀸𑀭𑀓𑀁 𑀓𑀫𑁆𑀫𑀲𑀜𑁆𑀜𑀁 𑀳𑁄𑀢𑀺.

𑀙𑀢𑁆𑀢𑀁 𑀓𑀭𑁄𑀢𑀺, 𑀭𑀣𑀁 𑀓𑀭𑁄𑀢𑀺, 𑀭𑀽𑀧𑀁 𑀧𑀲𑁆𑀲𑀢𑀺, 𑀲𑀤𑁆𑀤𑀁 𑀲𑀼𑀡𑀸𑀢𑀺, 𑀓𑀡𑁆𑀝𑀓𑀁 𑀫𑀤𑁆𑀤𑀢𑀺, 𑀯𑀺𑀲𑀁 𑀕𑀺𑀮𑀢𑀺.

𑀓𑀫𑁆𑀫𑀫𑀺𑀘𑁆𑀘𑀦𑁂𑀦 𑀓𑁆𑀯𑀢𑁆𑀣𑁄? 𑀓𑀫𑁆𑀫𑀢𑁆𑀣𑁂 𑀤𑀼𑀢𑀺𑀬𑀸.

𑁨𑁮𑁧. , 𑁨𑁯𑁪. 𑀬𑁄 𑀓𑀭𑁄𑀢𑀺 𑀲 𑀓𑀢𑁆𑀢𑀸.

𑀬𑁄 𑀓𑀭𑁄𑀢𑀺, 𑀲𑁄 𑀓𑀢𑁆𑀢𑀼𑀲𑀜𑁆𑀜𑁄 𑀳𑁄𑀢𑀺.

𑀅𑀳𑀺𑀦𑀸 𑀤𑀝𑁆𑀞𑁄 𑀦𑀭𑁄, 𑀕𑀭𑀼𑀴𑁂𑀦 𑀳𑀢𑁄 𑀦𑀸𑀕𑁄. 𑀩𑀼𑀤𑁆𑀥𑁂𑀦 𑀚𑀺𑀢𑁄 𑀫𑀸𑀭𑁄, 𑀉𑀧𑀕𑀼𑀢𑁆𑀢𑁂𑀦 𑀫𑀸𑀭𑁄 𑀩𑀦𑁆𑀥𑁄.

𑀓𑀢𑁆𑀢𑀼𑀇𑀘𑁆𑀘𑀦𑁂𑀦 𑀓𑁆𑀯𑀢𑁆𑀣𑁄? 𑀓𑀢𑁆𑀢𑀭𑀺 𑀘.

𑁨𑁮𑁨. , 𑁨𑁯𑁫. 𑀬𑁄 𑀓𑀸𑀭𑁂𑀢𑀺 𑀲 𑀳𑁂𑀢𑀼.

𑀬𑁄 𑀓𑀢𑁆𑀢𑀸𑀭𑀁 𑀓𑀸𑀭𑁂𑀢𑀺, 𑀲𑁄 𑀳𑁂𑀢𑀼𑀲𑀜𑁆𑀜𑁄 𑀳𑁄𑀢𑀺, 𑀓𑀢𑁆𑀢𑀸 𑀘.

𑀲𑁄 𑀧𑀼𑀭𑀺𑀲𑁄 𑀢𑀁 𑀧𑀼𑀭𑀺𑀲𑀁 𑀓𑀫𑁆𑀫𑀁 𑀓𑀸𑀭𑁂𑀢𑀺 𑀲𑁄 𑀧𑀼𑀭𑀺𑀲𑁄 𑀢𑁂𑀦 𑀧𑀼𑀭𑀺𑀲𑁂𑀦 𑀓𑀫𑁆𑀫𑀁 𑀓𑀸𑀭𑁂𑀢𑀺, 𑀲𑁄 𑀧𑀼𑀭𑀺𑀲𑁄 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀓𑀫𑁆𑀫𑀁 𑀓𑀸𑀭𑁂𑀢𑀺. 𑀏𑀯𑀁 𑀳𑀸𑀭𑁂𑀢𑀺 𑀧𑀸𑀞𑁂𑀢𑀺 𑀧𑀸𑀘𑁂𑀢𑀺, 𑀥𑀸𑀭𑁂𑀢𑀺.

𑀳𑁂𑀢𑀼𑀇𑀘𑁆𑀘𑀦𑁂𑀦 𑀓𑁆𑀯𑀢𑁆𑀣𑁄? 𑀥𑀸𑀢𑀽𑀳𑀺 𑀡𑁂 𑀡𑀬 𑀡𑀸𑀧𑁂 𑀡𑀸𑀧𑀬𑀸 𑀓𑀸𑀭𑀺𑀢𑀸𑀦𑀺 𑀳𑁂𑀢𑁆𑀯𑀢𑁆𑀣𑁂.

𑁨𑁮𑁩. , 𑁩𑁧𑁬. 𑀬𑀲𑁆𑀲 𑀯𑀸 𑀧𑀭𑀺𑀕𑁆𑀕𑀳𑁄 𑀢𑀁 𑀲𑀸𑀫𑀻.

𑀬𑀲𑁆𑀲 𑀯𑀸 𑀧𑀭𑀺𑀕𑁆𑀕𑀳𑁄, 𑀢𑀁 𑀲𑀸𑀫𑀻𑀲𑀜𑁆𑀜𑀁 𑀳𑁄𑀢𑀺.

𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀝𑀺𑀯𑀻𑀲𑁄, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀢𑁆𑀢𑁄, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀘𑀻𑀯𑀭𑀁, 𑀅𑀢𑁆𑀢𑀦𑁄 𑀫𑀼𑀔𑀁.

𑀲𑀸𑀫𑀻𑀇𑀘𑁆𑀘𑀦𑁂𑀦 𑀓𑁆𑀯𑀢𑁆𑀣𑁄? 𑀲𑀸𑀫𑀺𑀲𑁆𑀫𑀺𑀁 𑀙𑀝𑁆𑀞𑀻.

𑁨𑁮𑁪. , 𑁨𑁮𑁩. 𑀮𑀺𑀗𑁆𑀕𑀢𑁆𑀣𑁂 𑀧𑀞𑀫𑀸.

𑀮𑀺𑀗𑁆𑀕𑀢𑁆𑀣𑀸𑀪𑀺𑀥𑀸𑀦𑀫𑀢𑁆𑀢𑁂 𑀧𑀞𑀫𑀸𑀯𑀺𑀪𑀢𑁆𑀢𑀺 𑀳𑁄𑀢𑀺.

𑀧𑀼𑀭𑀺𑀲𑁄, 𑀧𑀼𑀭𑀺𑀲𑀸, 𑀏𑀓𑁄, 𑀤𑁆𑀯𑁂, 𑀘, 𑀯𑀸, 𑀳𑁂, 𑀅𑀳𑁂, 𑀭𑁂, 𑀅𑀭𑁂.

𑁨𑁮𑁫. , 𑁭𑁦. 𑀆𑀮𑀧𑀦𑁂 𑀘.

𑀆𑀮𑀧𑀦𑀢𑁆𑀣𑀸 𑀥𑀺𑀓𑁂 𑀮𑀺𑀗𑁆𑀕𑀢𑁆𑀣𑀸𑀪𑀺𑀥𑀸𑀦𑀫𑀢𑁆𑀢𑁂 𑀘 𑀧𑀞𑀫𑀸𑀯𑀺𑀪𑀢𑁆𑀢𑀺 𑀳𑁄𑀢𑀺.

𑀪𑁄 𑀧𑀼𑀭𑀺𑀲, 𑀪𑀯𑀦𑁆𑀢𑁄 𑀧𑀼𑀭𑀺𑀲𑀸, 𑀪𑁄 𑀭𑀸𑀚, 𑀪𑀯𑀦𑁆𑀢𑁄 𑀭𑀸𑀚𑀸𑀦𑁄, 𑀳𑁂 𑀲𑀔𑁂, 𑀳𑁂 𑀲𑀔𑀺𑀦𑁄.

𑁨𑁮𑁬. , 𑁨𑁯𑁧. 𑀓𑀭𑀡𑁂 𑀢𑀢𑀺𑀬𑀸.

𑀓𑀭𑀡𑀓𑀸𑀭𑀓𑁂 𑀢𑀢𑀺𑀬𑀸𑀯𑀺𑀪𑀢𑁆𑀢𑀺 𑀳𑁄𑀢𑀺.

𑀅𑀕𑁆𑀕𑀺𑀦𑀸 𑀓𑀼𑀝𑀺𑀁 𑀛𑀸𑀧𑁂𑀢𑀺, 𑀫𑀦𑀲𑀸 𑀘𑁂 𑀧𑀤𑀼𑀝𑁆𑀞𑁂𑀦, 𑀫𑀦𑀲𑀸 𑀘𑁂 𑀧𑀲𑀦𑁆𑀦𑁂𑀦, 𑀓𑀸𑀬𑁂𑀦 𑀓𑀫𑁆𑀫𑀁 𑀓𑀭𑁄𑀢𑀺.

𑁨𑁮𑁭. , 𑁨𑁯𑁯. 𑀲𑀳𑀸𑀤𑀺𑀬𑁄𑀕𑁂 𑀘.

𑀲𑀳𑀸𑀤𑀺𑀬𑁄𑀕𑀢𑁆𑀣𑁂 𑀘 𑀢𑀢𑀺𑀬𑀸𑀯𑀺𑀪𑀢𑁆𑀢𑀺 𑀳𑁄𑀢𑀺.

𑀲𑀳𑀸𑀧𑀺 𑀕𑀕𑁆𑀕𑁂𑀦 𑀲𑀗𑁆𑀖𑁄 𑀉𑀧𑁄𑀲𑀣𑀁 𑀓𑀭𑁂𑀬𑁆𑀬, 𑀯𑀺𑀦𑀸𑀧𑀺 𑀕𑀕𑁆𑀕𑁂𑀦, 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁, 𑀲𑀳𑀲𑁆𑀲𑁂𑀦 𑀲𑀫𑀁 𑀫𑀺𑀢𑀸.

𑁨𑁮𑁮. , 𑁨𑁯𑁩. 𑀓𑀢𑁆𑀢𑀭𑀺 𑀘.

𑀓𑀢𑁆𑀢𑀭𑀺 𑀘 𑀢𑀢𑀺𑀬𑀸𑀯𑀺𑀪𑀢𑁆𑀢𑀺 𑀳𑁄𑀢𑀺.

𑀭𑀜𑁆𑀜𑀸 𑀳𑀢𑁄 𑀧𑁄𑀲𑁄, 𑀬𑀓𑁆𑀔𑁂𑀦 𑀤𑀺𑀦𑁆𑀦𑁄 𑀯𑀭𑁄, 𑀅𑀳𑀺𑀦𑀸 𑀤𑀝𑁆𑀞𑁄 𑀦𑀭𑁄.

𑁨𑁮𑁯. , 𑁨𑁯𑁭. 𑀳𑁂𑀢𑁆𑀯𑀢𑁆𑀣𑁂 𑀘.

𑀳𑁂𑀢𑁆𑀯𑀢𑁆𑀣𑁂 𑀘 𑀢𑀢𑀺𑀬𑀸𑀯𑀺𑀪𑀢𑁆𑀢𑀺 𑀳𑁄𑀢𑀺.

𑀅𑀦𑁆𑀦𑁂𑀦 𑀯𑀲𑀢𑀺, 𑀥𑀫𑁆𑀫𑁂𑀦 𑀯𑀲𑀢𑀺, 𑀯𑀺𑀚𑁆𑀚𑀸𑀬 𑀯𑀲𑀢𑀺, 𑀲𑀓𑁆𑀓𑀸𑀭𑁂𑀦 𑀯𑀲𑀢𑀺.

𑁨𑁯𑁦. , 𑁨𑁯𑁮. 𑀲𑀢𑁆𑀢𑀫𑁆𑀬𑀢𑁆𑀣𑁂 𑀘.

𑀲𑀢𑁆𑀢𑀫𑁆𑀬𑀢𑁆𑀣𑁂 𑀘 𑀢𑀢𑀺𑀬𑀸𑀯𑀺𑀪𑀢𑁆𑀢𑀺 𑀳𑁄𑀢𑀺.

𑀢𑁂𑀦 𑀓𑀸𑀮𑁂𑀦, 𑀢𑁂𑀦 𑀲𑀫𑀬𑁂𑀦. (𑀬𑁂𑀦 𑀓𑀸𑀮𑁂𑀦, 𑀬𑁂𑀦 𑀲𑀫𑀬𑁂𑀦,) 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦.

𑁨𑁯𑁧. , 𑁨𑁯𑁯. 𑀬𑁂𑀦𑀗𑁆𑀕𑀯𑀺𑀓𑀸𑀭𑁄.

𑀬𑁂𑀦 𑀩𑁆𑀬𑀸𑀥𑀺𑀫𑀢𑀸 𑀅𑀗𑁆𑀕𑁂𑀦 𑀅𑀗𑁆𑀕𑀺𑀦𑁄 𑀯𑀺𑀓𑀸𑀭𑁄 𑀮𑀓𑁆𑀔𑀻𑀬𑀢𑁂. 𑀢𑀢𑁆𑀣 𑀢𑀢𑀺𑀬𑀸𑀯𑀺𑀪𑀢𑁆𑀢𑀺 𑀳𑁄𑀢𑀺.

𑀅𑀓𑁆𑀔𑀺𑀦𑀸 𑀓𑀸𑀡𑁄, 𑀳𑀢𑁆𑀣𑁂𑀦 𑀓𑀼𑀡𑀻, 𑀓𑀸𑀡𑀁 𑀧𑀲𑁆𑀲𑀢𑀺 𑀦𑁂𑀢𑁆𑀢𑁂𑀦, 𑀧𑀸𑀤𑁂𑀦 𑀔𑀜𑁆𑀚𑁄, 𑀧𑀺𑀝𑁆𑀞𑀺𑀬𑀸 𑀔𑀼𑀚𑁆𑀚𑁄.

𑁨𑁯𑁨. , 𑁩𑁦𑁦. 𑀯𑀺𑀲𑁂𑀲𑀦𑁂 𑀘.

𑀯𑀺𑀲𑁂𑀲𑀦𑀢𑁆𑀣𑁂 𑀘 𑀢𑀢𑀺𑀬𑀸𑀯𑀺𑀪𑀢𑁆𑀢𑀺 𑀳𑁄𑀢𑀺.

𑀕𑁄𑀢𑁆𑀢𑁂𑀦 𑀕𑁄𑀢𑀫𑁄 𑀦𑀸𑀣𑁄, 𑀲𑀼𑀯𑀡𑁆𑀡𑁂𑀦 𑀅𑀪𑀺𑀭𑀽𑀧𑁄, 𑀢𑀧𑀲𑀸 𑀉𑀢𑁆𑀢𑀫𑁄.

𑁨𑁯𑁩. , 𑁩𑁦𑁧. 𑀲𑀫𑁆𑀧𑀤𑀸𑀦𑁂 𑀘𑀢𑀼𑀢𑁆𑀣𑀻.

𑀲𑀫𑁆𑀧𑀤𑀸𑀦𑀓𑀸𑀭𑀓𑁂 𑀘𑀢𑀼𑀢𑁆𑀣𑀻𑀯𑀺𑀪𑀢𑁆𑀢𑀺 𑀳𑁄𑀢𑀺.