𑁪. 𑀲𑀫𑀸𑀲𑀓𑀧𑁆𑀧

𑀲𑀢𑁆𑀢𑀫𑀓𑀡𑁆𑀟

𑁩𑁧𑁬. , 𑁩𑁩𑁧. 𑀦𑀸𑀫𑀸𑀦𑀁 𑀲𑀫𑀸𑀲𑁄 𑀬𑀼𑀢𑁆𑀢𑀢𑁆𑀣𑁄.

𑀢𑁂𑀲𑀁 𑀦𑀸𑀫𑀸𑀦𑀁 𑀧𑀬𑀼𑀚𑁆𑀚𑀫𑀸𑀦𑀧𑀤𑀢𑁆𑀣𑀸𑀦𑀁 𑀬𑁄 𑀬𑀼𑀢𑁆𑀢𑀢𑁆𑀣𑁄, 𑀲𑁄 𑀲𑀫𑀸𑀲𑀲𑀜𑁆𑀜𑁄 𑀳𑁄𑀢𑀺.

𑀓𑀣𑀺𑀦𑀤𑀼𑀲𑁆𑀲𑀁, 𑀆𑀕𑀦𑁆𑀢𑀼𑀓𑀪𑀢𑁆𑀢𑀁, 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁, 𑀲𑀫𑀡𑀩𑁆𑀭𑀸𑀳𑁆𑀫𑀡𑀸, 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸, 𑀩𑁆𑀭𑀸𑀳𑁆𑀫𑀡 𑀕𑀳𑀧𑀢𑀺𑀓𑀸.

𑀦𑀸𑀫𑀸𑀦𑀫𑀺𑀢𑀺 𑀓𑀺𑀫𑀢𑁆𑀣𑀁? 𑀤𑁂𑀯𑀤𑀢𑁆𑀢𑁄 𑀧𑀘𑀢𑀺, 𑀬𑀜𑁆𑀜𑀤𑀢𑁆𑀢𑁄 𑀧𑀘𑀢𑀺.

𑀬𑀼𑀢𑁆𑀢𑀢𑁆𑀣𑁄𑀢𑀺 𑀓𑀺𑀫𑀢𑁆𑀣𑀁? 𑀪𑀢𑁄 𑀭𑀜𑁆𑀜𑁄 𑀧𑀼𑀢𑁆𑀢𑁄 𑀤𑁂𑀯𑀤𑀢𑁆𑀢𑀲𑁆𑀲.

𑀲𑀫𑀸𑀲𑀇𑀘𑁆𑀘𑀦𑁂𑀦 𑀓𑁆𑀯𑀢𑁆𑀣𑁄? 𑀓𑁆𑀯𑀘𑀺 𑀲𑀫𑀸𑀲𑀦𑁆𑀢𑀕𑀢𑀸𑀦𑀫𑀓𑀸𑀭𑀦𑁆𑀢𑁄.

𑁩𑁧𑁭. , 𑁩𑁩𑁨. 𑀢𑁂𑀲𑀁 𑀯𑀺𑀪𑀢𑁆𑀢𑀺𑀬𑁄 𑀮𑁄𑀧𑀸 𑀘.

𑀢𑁂𑀲𑀁 𑀬𑀼𑀢𑁆𑀢𑀢𑁆𑀣𑀸𑀦𑀁 𑀲𑀫𑀸𑀲𑀸𑀦𑀁 𑀯𑀺𑀪𑀢𑁆𑀢𑀺𑀬𑁄 𑀮𑁄𑀧𑀸 𑀘 𑀳𑁄𑀦𑁆𑀢𑀺.

𑀓𑀣𑀺𑀦𑀤𑀼𑀲𑁆𑀲𑀁, 𑀆𑀕𑀦𑁆𑀢𑀼𑀓𑀪𑀢𑁆𑀢𑀁.

𑀢𑁂𑀲𑀁𑀕𑀳𑀡𑁂𑀦 𑀲𑀫𑀸𑀲𑀢𑀤𑁆𑀥𑀺𑀢𑀸𑀔𑁆𑀬𑀸𑀢𑀓𑀺𑀢𑀓𑀸𑀦𑀁 𑀯𑀺𑀪𑀢𑁆𑀢𑀺𑀧𑀘𑁆𑀘𑀬𑀧𑀤𑀓𑁆𑀔𑀭𑀸𑀕𑀫𑀸 𑀘 𑀮𑁄𑀧𑀸 𑀳𑁄𑀦𑁆𑀢𑀺. 𑀯𑀸𑀲𑀺𑀝𑁆𑀞𑁄, 𑀯𑁂𑀦𑀢𑁂𑀬𑁆𑀬𑁄.

𑀘𑀕𑁆𑀕𑀳𑀡 𑀫𑀯𑀥𑀸𑀭𑀡𑀢𑁆𑀣𑀁, 𑀧𑀪𑀗𑁆𑀓𑀭𑁄, 𑀅𑀫𑀢𑀤𑁆𑀤𑀤𑁄, 𑀫𑁂𑀥𑀗𑁆𑀓𑀭𑁄, 𑀤𑀻𑀧𑀗𑁆𑀓𑀭𑁄.

𑁩𑁧𑁮. , 𑁩𑁩𑁩. 𑀧𑀓𑀢𑀺 𑀘𑀲𑁆𑀲 𑀲𑀭𑀦𑁆𑀢𑀲𑁆𑀲.

𑀮𑀼𑀢𑁆𑀢𑀸𑀲𑀼 𑀯𑀺𑀪𑀢𑁆𑀢𑀻𑀲𑀼 𑀅𑀲𑁆𑀲 𑀲𑀭𑀦𑁆𑀢𑀲𑁆𑀲 𑀮𑀺𑀗𑁆𑀕𑀲𑁆𑀲 𑀧𑀓𑀢𑀺𑀭𑀽𑀧𑀸𑀦𑀺 𑀳𑁄𑀦𑁆𑀢𑀺.

𑀘𑀓𑁆𑀔𑀼𑀲𑁄𑀢𑀁, 𑀫𑀼𑀔𑀦𑀸𑀲𑀺𑀓𑀁, 𑀭𑀸𑀚𑀧𑀼𑀢𑁆𑀢𑁄, 𑀭𑀸𑀚𑀧𑀼𑀭𑀺𑀲𑁄.

𑁩𑁧𑁯. , 𑁩𑁩𑁦. 𑀉𑀧𑀲𑀕𑁆𑀕𑀦𑀺𑀧𑀸𑀢𑀧𑀼𑀩𑁆𑀩𑀓𑁄 𑀅𑀩𑁆𑀬𑀬𑀻𑀪𑀸𑀯𑁄.

𑀉𑀧𑀲𑀕𑁆𑀕𑀦𑀺𑀧𑀸𑀢𑀧𑀼𑀩𑁆𑀩𑀓𑁄 𑀲𑀫𑀸𑀲𑁄 𑀅𑀩𑁆𑀬𑀬𑀻𑀪𑀸𑀯𑀲𑀜𑁆𑀜𑁄 𑀳𑁄𑀢𑀺.

𑀦𑀕𑀭𑀲𑁆𑀲 𑀲𑀫𑀻𑀧𑁂 𑀧𑀯𑀢𑁆𑀢𑀢𑀺 𑀓𑀣𑀸 𑀇𑀢𑀺 𑀉𑀧𑀦𑀕𑀭𑀁, 𑀤𑀭𑀣𑀸𑀦𑀁 𑀅𑀪𑀸𑀯𑁄 𑀦𑀺𑀤𑁆𑀤𑀭𑀣𑀁, 𑀫𑀓𑀲𑀸𑀦𑀁 𑀅𑀪𑀸𑀯𑁄 𑀦𑀺𑀫𑁆𑀫𑀓𑀲𑀁, 𑀯𑀼𑀟𑁆𑀠𑀸𑀦𑀁 𑀧𑀝𑀺𑀧𑀸𑀝𑀺 𑀬𑀣𑀸𑀯𑀼𑀟𑁆𑀠𑀁, 𑀬𑁂 𑀬𑁂 𑀯𑀼𑀟𑁆𑀠𑀸 𑀯𑀸 𑀬𑀣𑀸𑀯𑀼𑀟𑁆𑀠𑀁, 𑀚𑀻𑀯𑀲𑁆𑀲 𑀬𑀢𑁆𑀢𑀓𑁄 𑀧𑀭𑀺𑀘𑁆𑀙𑁂𑀤𑁄 𑀬𑀸𑀯𑀚𑀻𑀯𑀁, 𑀘𑀺𑀢𑁆𑀢𑀫𑀥𑀺𑀓𑀺𑀘𑁆𑀘 𑀧𑀯𑀢𑁆𑀢𑀦𑁆𑀢𑀺 𑀢𑁂 𑀥𑀫𑁆𑀫𑀸𑀢𑀺 𑀅𑀥𑀺𑀘𑀺𑀢𑁆𑀢𑀁, 𑀧𑀩𑁆𑀩𑀢𑀲𑁆𑀲 𑀢𑀺𑀭𑁄 𑀢𑀺𑀭𑁄𑀧𑀩𑁆𑀩𑀢𑀁, 𑀲𑁄𑀢𑀲𑁆𑀲 𑀧𑀢𑀺 𑀧𑀯𑀢𑁆𑀢𑀢𑀺 𑀦𑀸𑀯𑀸 𑀇𑀢𑀺 𑀧𑀢𑀺𑀲𑁄𑀢𑀁, 𑀧𑀸𑀲𑀸𑀤𑀲𑁆𑀲 𑀅𑀦𑁆𑀢𑁄 𑀅𑀦𑁆𑀢𑁄𑀧𑀸𑀲𑀸𑀤𑀁.

𑀅𑀩𑁆𑀬𑀬𑀻𑀪𑀸𑀯𑀫𑀺𑀘𑁆𑀘𑀦𑁂𑀦 𑀓𑁆𑀯𑀢𑁆𑀣𑁄? 𑀅𑀁𑀯𑀺𑀪𑀢𑁆𑀢𑀻𑀦 𑀫𑀓𑀸𑀭𑀦𑁆𑀢𑀸 𑀅𑀩𑁆𑀬𑀬𑀻𑀪𑀸𑀯𑀸.

𑁩𑁨𑁦. , 𑁩𑁩𑁫. 𑀲𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑁄.

𑀲𑁄 𑀅𑀩𑁆𑀬𑀬𑀻𑀪𑀸𑀯𑀲𑀫𑀸𑀲𑁄 𑀦𑀧𑀼𑀁𑀲𑀓𑀮𑀺𑀗𑁆𑀕𑁄𑀯 𑀤𑀝𑁆𑀞𑀩𑁆𑀩𑁄.

𑀓𑀼𑀫𑀸𑀭𑀻𑀲𑀼 𑀅𑀥𑀺𑀓𑀺𑀘𑁆𑀘 𑀧𑀯𑀢𑁆𑀢𑀢𑀺 𑀓𑀣𑀸 𑀇𑀢𑀺 𑀅𑀥𑀺𑀓𑀼𑀫𑀸𑀭𑀺, 𑀯𑀥𑀼𑀬𑀸 𑀲𑀫𑀻𑀧𑁂 𑀧𑀯𑀢𑁆𑀢𑀢𑀺 𑀓𑀣𑀸 𑀇𑀢𑀺 𑀉𑀧𑀯𑀥𑀼, 𑀕𑀗𑁆𑀕𑀸𑀬 𑀲𑀫𑀻𑀧𑁂 𑀧𑀯𑀢𑁆𑀢𑀢𑀺 𑀓𑀣𑀸 𑀇𑀢𑀺 𑀉𑀧𑀕𑀗𑁆𑀕𑀁, 𑀫𑀡𑀺𑀓𑀸𑀬 𑀲𑀫𑀻𑀧𑁂 𑀧𑀯𑀢𑁆𑀢𑀢𑀺 𑀓𑀣𑀸 𑀇𑀢𑀺 𑀉𑀧𑀫𑀡𑀺𑀓𑀁.

𑁩𑁨𑁧. , 𑁩𑁪𑁯. 𑀤𑀺𑀕𑀼𑀲𑁆𑀲𑁂𑀓𑀢𑁆𑀢𑀁.

𑀤𑀺𑀕𑀼𑀲𑁆𑀲 𑀲𑀫𑀸𑀲𑀲𑁆𑀲 𑀏𑀓𑀢𑁆𑀢𑀁 𑀳𑁄𑀢𑀺, 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁆𑀢𑀜𑁆𑀘.

𑀢𑀬𑁄 𑀮𑁄𑀓𑀸 𑀢𑀺𑀮𑁄𑀓𑀁, 𑀢𑀬𑁄 𑀤𑀡𑁆𑀟𑀸 𑀢𑀺𑀤𑀡𑁆𑀟𑀁, 𑀢𑀻𑀡𑀺 𑀦𑀬𑀦𑀸𑀦𑀺 𑀢𑀺𑀦𑀬𑀦𑀁, 𑀢𑀬𑁄 𑀲𑀺𑀗𑁆𑀕𑀸 𑀢𑀺𑀲𑀺𑀗𑁆𑀕𑀁. 𑀘𑀢𑀲𑁆𑀲𑁄 𑀤𑀺𑀲𑀸 𑀘𑀢𑀼𑀤𑁆𑀤𑀺𑀲𑀁, 𑀧𑀜𑁆𑀘 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀁.

𑁩𑁨𑁨. , 𑁩𑁫𑁯. 𑀢𑀣𑀸 𑀤𑁆𑀯𑀦𑁆𑀤𑁂 𑀧𑀸𑀡𑀺 𑀢𑀽𑀭𑀺𑀬 𑀬𑁄𑀕𑁆𑀕𑀲𑁂𑀦𑀗𑁆𑀕𑀔𑀼𑀤𑁆𑀤𑀚𑀦𑁆𑀢𑀼𑀓 𑀯𑀺𑀯𑀺𑀥𑀯𑀺𑀭𑀼𑀤𑁆𑀥 𑀯𑀺𑀲𑀪𑀸𑀕𑀢𑁆𑀣𑀸𑀤𑀻𑀦𑀜𑁆𑀘.

𑀢𑀣𑀸 𑀤𑁆𑀯𑀦𑁆𑀤𑁂 𑀲𑀫𑀸𑀲𑁂 𑀧𑀸𑀡𑀺 𑀢𑀽𑀭𑀺𑀬 𑀬𑁄𑀕𑁆𑀕 𑀲𑁂𑀦𑀗𑁆𑀕𑀔𑀼𑀤𑁆𑀤𑀚𑀦𑁆𑀢𑀼𑀓 𑀯𑀺𑀯𑀺𑀥𑀯𑀺𑀭𑀼𑀤𑁆𑀥 𑀯𑀺𑀲𑀪𑀸𑀕𑀢𑁆𑀣𑀇𑀘𑁆𑀘𑁂𑀯𑀫𑀸𑀤𑀻𑀦𑀁 𑀏𑀓𑀢𑁆𑀢𑀁 𑀳𑁄𑀢𑀺, 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁆𑀢𑀜𑁆𑀘.

𑀢𑀁 𑀬𑀣𑀸? 𑀘𑀓𑁆𑀔𑀼 𑀘 𑀲𑁄𑀢𑀜𑁆𑀘 𑀘𑀓𑁆𑀔𑀼𑀲𑁄𑀢𑀁, 𑀫𑀼𑀔𑀜𑁆𑀘 𑀦𑀸𑀲𑀺𑀓𑀸 𑀘 𑀫𑀼𑀔𑀦𑀸𑀲𑀺𑀓𑀁, 𑀙𑀯𑀺 𑀘 𑀫𑀁𑀲𑀜𑁆𑀘 𑀮𑁄𑀳𑀺𑀢𑀜𑁆𑀘 𑀙𑀯𑀺𑀫𑀁𑀲𑀮𑁄𑀳𑀺𑀢𑀁. 𑀏𑀯𑀁 𑀧𑀸𑀡𑁆𑀬𑀗𑁆𑀕𑀢𑁆𑀣𑁂.

𑀲𑀗𑁆𑀔𑁄 𑀘 𑀧𑀡𑀯𑁄 𑀘 𑀲𑀗𑁆𑀔𑀧𑀡𑀯𑀁, 𑀕𑀻𑀢𑀜𑁆𑀘 𑀯𑀸𑀤𑀺𑀢𑀜𑁆𑀘 𑀕𑀻𑀢𑀯𑀸𑀤𑀺𑀢𑀁, 𑀤𑀤𑁆𑀤𑀭𑀺 𑀘 𑀟𑀺𑀡𑁆𑀟𑀺𑀫𑁄 𑀘 𑀤𑀤𑁆𑀤𑀭𑀺𑀟𑀺𑀡𑁆𑀟𑀺𑀫𑀁. 𑀏𑀯𑀁 𑀢𑀽𑀭𑀺𑀬𑀗𑁆𑀕𑀢𑁆𑀣𑁂.

𑀨𑀸𑀮𑁄 𑀘 𑀧𑀸𑀘𑀦𑀜𑁆𑀘 𑀨𑀸𑀮𑀧𑀸𑀘𑀦𑀁, 𑀬𑀼𑀕𑀜𑁆𑀘 𑀦𑀗𑁆𑀕𑀮𑀜𑁆𑀘 𑀬𑀼𑀕𑀦𑀗𑁆𑀕𑀮𑀁. 𑀏𑀯𑀁 𑀬𑁄𑀕𑁆𑀕𑀗𑁆𑀕𑀢𑁆𑀣𑁂.

𑀅𑀲𑀺 𑀘 𑀘𑀫𑁆𑀫𑀜𑁆𑀘 𑀅𑀲𑀺𑀘𑀫𑁆𑀫𑀁, 𑀥𑀦𑀼 𑀘 𑀓𑀮𑀸𑀧𑁄 𑀘 𑀥𑀦𑀼𑀓𑀮𑀸𑀧𑀁, 𑀳𑀢𑁆𑀣𑀻 𑀘 𑀅𑀲𑁆𑀲𑁄 𑀘 𑀳𑀢𑁆𑀣𑀺𑀅𑀲𑁆𑀲𑀁, 𑀭𑀣𑁄 𑀘 𑀧𑀢𑁆𑀢𑀺𑀓𑁄 𑀘 𑀭𑀣𑀧𑀢𑁆𑀢𑀺𑀓𑀁. 𑀏𑀯𑀁 𑀲𑁂𑀦𑀗𑁆𑀕𑀢𑁆𑀣𑁂.

𑀟𑀁𑀲𑀸 𑀘 𑀫𑀓𑀲𑀸 𑀘 𑀟𑀁𑀲𑀫𑀓𑀲𑀁, 𑀓𑀼𑀦𑁆𑀣𑁄 𑀘 𑀓𑀺𑀧𑀺𑀮𑁆𑀮𑀺𑀓𑁄 𑀘 𑀓𑀼𑀦𑁆𑀣𑀓𑀺𑀧𑀺𑀮𑁆𑀮𑀺𑀓𑀁, 𑀓𑀻𑀝𑁄 𑀘 𑀲𑀭𑀻𑀲𑀧𑁄 𑀘 𑀓𑀻𑀝𑀲𑀭𑀻𑀲𑀧𑀁. 𑀏𑀯𑀁 𑀔𑀼𑀤𑁆𑀤𑀚𑀦𑁆𑀢𑀼𑀓𑀢𑁆𑀣𑁂.

𑀅𑀳𑀺 𑀘 𑀦𑀓𑀼𑀮𑁄 𑀘 𑀅𑀳𑀺𑀦𑀓𑀼𑀮𑀁, 𑀩𑀺𑀴𑀸𑀭𑁄 𑀘 𑀫𑀽𑀲𑀺𑀓𑁄 𑀘 𑀩𑀺𑀴𑀸𑀭𑀫𑀽𑀲𑀺𑀓𑀁, 𑀓𑀸𑀓𑁄 𑀘 𑀉𑀮𑀽𑀓𑁄 𑀘 𑀓𑀸𑀓𑁄𑀮𑀽𑀓𑀁. 𑀏𑀯𑀁 𑀯𑀺𑀯𑀺𑀥𑀯𑀺𑀭𑀼𑀤𑁆𑀥𑀢𑁆𑀣𑁂.

𑀲𑀻𑀮𑀜𑁆𑀘 𑀧𑀜𑁆𑀜𑀸𑀡𑀜𑁆𑀘 𑀲𑀻𑀮𑀧𑀜𑁆𑀜𑀸𑀡𑀁, 𑀲𑀫𑀣𑁄 𑀘 𑀯𑀺𑀧𑀲𑁆𑀲𑀦𑀸 𑀘 𑀲𑀫𑀣𑀯𑀺𑀧𑀲𑁆𑀲𑀦𑀁, 𑀯𑀺𑀚𑁆𑀚𑀸 𑀘 𑀘𑀭𑀡𑀜𑁆𑀘 𑀯𑀺𑀚𑁆𑀚𑀸𑀘𑀭𑀡𑀁. 𑀏𑀯𑀁 𑀯𑀺𑀲𑀪𑀸𑀕𑀢𑁆𑀣𑁂.

𑀆𑀤𑀺𑀕𑁆𑀕𑀳𑀡𑀁 𑀓𑀺𑀫𑀢𑁆𑀣𑀁? 𑀤𑀸𑀲𑀻 𑀘 𑀤𑀸𑀲𑁄 𑀘 𑀤𑀸𑀲𑀺𑀤𑀸𑀲𑀁, 𑀇𑀢𑁆𑀣𑀻 𑀘 𑀧𑀼𑀫𑀸 𑀘 𑀇𑀢𑁆𑀣𑀺𑀧𑀼𑀫𑀁, 𑀧𑀢𑁆𑀢𑁄 𑀘 𑀘𑀻𑀯𑀭𑀜𑁆𑀘 𑀧𑀢𑁆𑀢𑀘𑀻𑀯𑀭𑀁, 𑀙𑀢𑁆𑀢𑀜𑁆𑀘 𑀉𑀧𑀸𑀳𑀦𑀸 𑀘 𑀙𑀢𑁆𑀢𑀼𑀧𑀸𑀳𑀦𑀁, 𑀢𑀺𑀓𑀜𑁆𑀘 𑀘𑀢𑀼𑀓𑁆𑀓𑀜𑁆𑀘 𑀢𑀺𑀓𑀘𑀢𑀼𑀓𑁆𑀓𑀁, 𑀯𑁂𑀦𑁄 𑀘 𑀭𑀣𑀓𑀸𑀭𑁄 𑀘 𑀯𑁂𑀦𑀭𑀣𑀓𑀸𑀭𑀁, 𑀲𑀸𑀓𑀼𑀡𑀺𑀓𑁄 𑀘 𑀫𑀸𑀕𑀯𑀺𑀓𑁄 𑀘 𑀲𑀯𑀓𑀼𑀡𑀺𑀓𑀫𑀸𑀕𑀯𑀺𑀓𑀁, 𑀤𑀻𑀖𑁄 𑀘 𑀫𑀚𑁆𑀛𑀺𑀫𑁄 𑀘 𑀤𑀻𑀖𑀫𑀚𑁆𑀛𑀺𑀫𑀁 𑀇𑀘𑁆𑀘𑁂𑀯𑀫𑀸𑀤𑀺.

𑁩𑁨𑁩. , 𑁩𑁬𑁦. 𑀯𑀺𑀪𑀸𑀲𑀸 𑀭𑀼𑀓𑁆𑀔 𑀢𑀺𑀡 𑀧𑀲𑀼𑀔 𑀦 𑀥𑀜𑁆𑀜 𑀚𑀦𑀧𑀤𑀸𑀤𑀻𑀦𑀜𑁆𑀘.

𑀭𑀼𑀓𑁆𑀔𑀢𑀺𑀡 𑀧𑀲𑀼 𑀥𑀦 𑀥𑀜𑁆𑀜 𑀚𑀦𑀧𑀤𑀇𑀘𑁆𑀘𑁂𑀯𑀫𑀸𑀤𑀻𑀦𑀁 𑀯𑀺𑀪𑀸𑀲𑀸 𑀏𑀓𑀢𑁆𑀢𑀁 𑀳𑁄𑀢𑀺, 𑀦𑀧𑀼𑀁𑀲𑀓𑀮𑀺𑀗𑁆𑀕𑀢𑁆𑀢𑀜𑁆𑀘 𑀤𑁆𑀯𑀦𑁆𑀤𑁂 𑀲𑀫𑀸𑀲𑁂. 𑀅𑀲𑁆𑀲𑀢𑁆𑀣𑁄 𑀘 𑀓𑀧𑀻𑀢𑀦𑁄 𑀘 𑀅𑀲𑁆𑀲𑀢𑁆𑀣𑀓𑀧𑀻𑀢𑀦𑀁, 𑀅𑀲𑁆𑀲𑀢𑁆𑀣𑀓𑀧𑀻𑀢𑀦𑀸 𑀯𑀸. 𑀉𑀲𑀻𑀭𑀜𑁆𑀘 𑀩𑀻𑀭𑀡𑀜𑁆𑀘 𑀉𑀲𑀻𑀭𑀩𑀻𑀭𑀡𑀁, 𑀉𑀲𑀻𑀭𑀩𑀻𑀭𑀡𑀸 𑀯𑀸. 𑀅𑀚𑁄 𑀘 𑀏𑀴𑀓𑁄 𑀘 𑀅𑀚𑁂𑀴𑀓𑀁, 𑀅𑀚𑁂𑀴𑀓𑀸 𑀯𑀸. 𑀳𑀺𑀭𑀜𑁆𑀜𑀜𑁆𑀘 𑀲𑀼𑀯𑀡𑁆𑀡𑀜𑁆𑀘 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀁, 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀸 𑀯𑀸. 𑀲𑀸𑀮𑀺 𑀘 𑀬𑀯𑁄 𑀘 𑀲𑀸𑀮𑀺𑀬𑀯𑀁, 𑀲𑀸𑀮𑀺𑀬𑀯𑀸 𑀯𑀸. 𑀓𑀸𑀲𑀻 𑀘 𑀓𑁄𑀲𑀮𑀸 𑀘 𑀓𑀸𑀲𑀺𑀓𑁄𑀲𑀮𑀁, 𑀓𑀸𑀲𑀺𑀓𑁄𑀲𑀮𑀸 𑀯𑀸.

𑀆𑀤𑀺𑀕𑁆𑀕𑀳𑀡𑀁 𑀓𑀺𑀫𑀢𑁆𑀣𑀁? 𑀲𑀸𑀯𑀚𑁆𑀚𑀜𑁆𑀘 𑀅𑀦𑀯𑀚𑁆𑀚𑀜𑁆𑀘 𑀲𑀸𑀯𑀚𑁆𑀚𑀸𑀦𑀯𑀚𑁆𑀚𑀁, 𑀲𑀸𑀯𑀚𑁆𑀚𑀸 𑀦𑀯𑀚𑁆𑀚𑀸 𑀯𑀸. 𑀳𑀻𑀦𑀜𑁆𑀘 𑀧𑀡𑀻𑀢𑀜𑁆𑀘 𑀳𑀻𑀦𑀧𑀡𑀻𑀢𑀁. 𑀳𑀻𑀦𑀧𑀡𑀻𑀢𑀸 𑀯𑀸. 𑀓𑀡𑁆𑀳𑁄 𑀘 𑀲𑀼𑀓𑁆𑀓𑁄 𑀘 𑀓𑀡𑁆𑀳𑀲𑀼𑀓𑁆𑀓𑀁, 𑀓𑀡𑁆𑀳𑀲𑀼𑀓𑁆𑀓𑀸 𑀯𑀸.

𑁩𑁨𑁪. , 𑁩𑁩𑁯. 𑀤𑁆𑀯𑀺𑀧𑀤𑁂 𑀢𑀼𑀮𑁆𑀬𑀸𑀥𑀺𑀓𑀭𑀡𑁂 𑀓𑀫𑁆𑀫𑀥𑀸𑀭𑀬𑁄.

𑀤𑁆𑀯𑁂 𑀧𑀤𑀸𑀦𑀺 𑀢𑀼𑀮𑁆𑀬𑀸𑀥𑀺𑀓𑀭𑀡𑀸𑀦𑀺 𑀬𑀤𑀸 𑀲𑀫𑀲𑁆𑀬𑀦𑁆𑀢𑁂, 𑀢𑀤𑀸 𑀲𑁄 𑀲𑀫𑀸𑀲𑁄 𑀓𑀫𑁆𑀫𑀥𑀸𑀭𑀬𑀲𑀜𑁆𑀜𑁄 𑀳𑁄𑀢𑀺.

𑀫𑀳𑀦𑁆𑀢𑁄 𑀘 𑀲𑁄 𑀧𑀼𑀭𑀺𑀲𑁄 𑀘𑀸𑀢𑀺 𑀫𑀳𑀸𑀧𑀼𑀭𑀺𑀲𑁄, 𑀓𑀡𑁆𑀳𑁄 𑀘 𑀲𑁄 𑀲𑀧𑁆𑀧𑁄 𑀘𑀸𑀢𑀺 𑀓𑀡𑁆𑀳𑀲𑀧𑁆𑀧𑁄, 𑀦𑀻𑀮𑀜𑁆𑀘 𑀢𑀁 𑀉𑀧𑁆𑀧𑀮𑀜𑁆𑀘𑀸𑀢𑀺 𑀦𑀻𑀮𑀼𑀧𑁆𑀧𑀮𑀁, 𑀮𑁄𑀳𑀺𑀢𑀜𑁆𑀘 𑀢𑀁 𑀘𑀦𑁆𑀤𑀦𑀜𑁆𑀘𑀸𑀢𑀺 𑀮𑁄𑀳𑀺𑀢𑀘𑀦𑁆𑀤𑀦𑀁, 𑀩𑁆𑀭𑀸𑀳𑁆𑀫𑀡𑀻 𑀘 𑀲𑀸 𑀤𑀸𑀭𑀺𑀓𑀸 𑀘𑀸𑀢𑀺 𑀩𑁆𑀭𑀸𑀳𑁆𑀫𑀡𑀤𑀸𑀭𑀺𑀓𑀸, 𑀔𑀢𑁆𑀢𑀺𑀬𑀸 𑀘 𑀲𑀸 𑀓𑀜𑁆𑀜𑀸 𑀘𑀸𑀢𑀺 𑀔𑀢𑁆𑀢𑀺𑀬𑀓𑀜𑁆𑀜𑀸.

𑀓𑀫𑁆𑀫𑀥𑀸𑀭𑀬𑀇𑀘𑁆𑀘𑀦𑁂𑀦 𑀓𑁆𑀯𑀢𑁆𑀣𑁄? 𑀓𑀫𑁆𑀫𑀥𑀸𑀭𑀬𑀲𑀜𑁆𑀜𑁂 𑀘.

𑁩𑁨𑁫. , 𑁩𑁪𑁮. 𑀲𑀗𑁆𑀔𑁆𑀬𑀸𑀧𑀼𑀩𑁆𑀩𑁄 𑀤𑀺𑀕𑀼.

𑀲𑀗𑁆𑀔𑁆𑀬𑀸𑀧𑀼𑀩𑁆𑀩𑁄 𑀓𑀫𑁆𑀫𑀥𑀸𑀭𑀬𑀲𑀫𑀸𑀲𑁄 𑀤𑀺𑀕𑀼𑀲𑀜𑁆𑀜𑁄 𑀳𑁄𑀢𑀺.

𑀢𑀻𑀡𑀺 𑀫𑀮𑀸𑀦𑀺 𑀢𑀺𑀫𑀮𑀁, 𑀢𑀻𑀡𑀺 𑀨𑀮𑀸𑀦𑀺 𑀢𑀺𑀨𑀮𑀁, 𑀢𑀬𑁄 𑀮𑁄𑀓𑀸 𑀢𑀺𑀮𑁄𑀓𑀁, 𑀢𑀬𑁄 𑀤𑀡𑁆𑀟𑀸 𑀢𑀺𑀤𑀡𑁆𑀟𑀁, 𑀘𑀢𑀲𑁆𑀲𑁄 𑀤𑀺𑀲𑀸 𑀘𑀢𑀼𑀤𑁆𑀤𑀺𑀲𑀁, 𑀧𑀜𑁆𑀘 𑀇𑀦𑁆𑀤𑁆𑀭𑀺𑀬𑀸𑀦𑀺 𑀧𑀜𑁆𑀘𑀺𑀦𑁆𑀤𑁆𑀭𑀺𑀬𑀁, 𑀲𑀢𑁆𑀢 𑀕𑁄𑀤𑀸𑀯𑀭𑀺𑀬𑁄 𑀲𑀢𑁆𑀢𑀕𑁄𑀤𑀸𑀯𑀭𑀁.

𑀤𑀺𑀕𑀼𑀇𑀘𑁆𑀘𑀦𑁂𑀦 𑀓𑁆𑀯𑀢𑁆𑀣𑁄? 𑀤𑀺𑀕𑀼𑀲𑁆𑀲𑁂 𑀓𑀢𑁆𑀢𑀁.

𑁩𑁨𑁬. , 𑁩𑁪𑁧. 𑀉𑀪𑁂 𑀢𑀧𑁆𑀧𑀼𑀭𑀺𑀲𑀸.

𑀉𑀪𑁂 𑀤𑀺𑀕𑀼𑀓𑀫𑁆𑀫𑀥𑀸𑀭𑀬𑀲𑀫𑀸𑀲𑀸 𑀢𑀧𑁆𑀧𑀼𑀭𑀺𑀲𑀲𑀜𑁆𑀜𑀸 𑀳𑁄𑀦𑁆𑀢𑀺.

𑀦 𑀩𑁆𑀭𑀸𑀳𑁆𑀫𑀡𑁄 𑀅𑀩𑁆𑀭𑀸𑀳𑁆𑀫𑀡𑁄, 𑀦 𑀯𑀲𑀮𑁄 𑀅𑀯𑀲𑀮𑁄, 𑀦 𑀪𑀺𑀓𑁆𑀔𑀼 𑀅𑀪𑀺𑀓𑁆𑀔𑀼, 𑀦 𑀧𑀜𑁆𑀘𑀯𑀲𑁆𑀲𑀁 𑀅𑀧𑀜𑁆𑀘𑀯𑀲𑁆𑀲𑀁, 𑀦 𑀧𑀜𑁆𑀘𑀧𑀽𑀮𑀻 𑀅𑀧𑀜𑁆𑀘𑀧𑀽𑀮𑀻, 𑀦 𑀲𑀢𑁆𑀢𑀕𑁄𑀤𑀸𑀯𑀭𑀁𑀅𑀲𑀢𑁆𑀢𑀕𑁄𑀤𑀸𑀯𑀭𑀁, 𑀦 𑀤𑀲𑀕𑀯𑀁 𑀅𑀤𑀲𑀕𑀯𑀁, 𑀦 𑀧𑀜𑁆𑀘𑀕𑀯𑀁 𑀅𑀧𑀜𑁆𑀘𑀕𑀯𑀁.

𑀢𑀧𑁆𑀧𑀼𑀭𑀺𑀲𑀇𑀘𑁆𑀘𑀦𑁂𑀦 𑀓𑁆𑀯𑀢𑁆𑀣𑁄? 𑀅𑀢𑁆𑀢𑀁 𑀦𑀲𑁆𑀲 𑀢𑀧𑁆𑀧𑀼𑀭𑀺𑀲𑁂.

𑁩𑁨𑁭. , 𑁩𑁫𑁧. 𑀅𑀫𑀸𑀤𑀬𑁄 𑀧𑀭𑀧𑀤𑁂𑀪𑀺.

𑀢𑀸 𑀅𑀫𑀸𑀤𑀬𑁄 𑀦𑀸𑀫𑁂𑀳𑀺 𑀧𑀭𑀧𑀤𑁂𑀪𑀺 𑀬𑀤𑀸 𑀲𑀫𑀲𑁆𑀬𑀦𑁆𑀢𑁂, 𑀢𑀤𑀸 𑀲𑁄 𑀲𑀫𑀸𑀲𑁄 𑀢𑀧𑁆𑀧𑀼𑀭𑀺𑀲𑀲𑀜𑁆𑀜𑁄 𑀳𑁄𑀢𑀺.

𑀪𑀽𑀫𑀺𑀁 𑀕𑀢𑁄 𑀪𑀽𑀫𑀺𑀕𑀢𑁄, 𑀲𑀩𑁆𑀩𑀭𑀢𑁆𑀢𑀺𑀁 𑀲𑁄𑀪𑀡𑁄 𑀲𑀩𑁆𑀩𑀭𑀢𑁆𑀢𑀺𑀲𑁄𑀪𑀡𑁄. 𑀅𑀧𑀸𑀬𑀁 𑀕𑀢𑁄 𑀅𑀧𑀸𑀬𑀕𑀢𑁄, 𑀇𑀲𑁆𑀲𑀭𑁂𑀦 𑀓𑀢𑀁 𑀇𑀲𑁆𑀲𑀭𑀓𑀢𑀁, 𑀲𑀮𑁆𑀮𑁂𑀦 𑀯𑀺𑀤𑁆𑀥𑁄 𑀲𑀮𑁆𑀮𑀯𑀺𑀤𑁆𑀥𑁄, 𑀓𑀣𑀺𑀦𑀲𑁆𑀲 𑀤𑀼𑀲𑁆𑀲𑀁 𑀓𑀣𑀺𑀦𑀤𑀼𑀲𑁆𑀲𑀁, 𑀆𑀕𑀦𑁆𑀢𑀼𑀓𑀲𑁆𑀲 𑀪𑀢𑁆𑀢𑀁 𑀆𑀕𑀦𑁆𑀢𑀼𑀓𑀪𑀢𑁆𑀢𑀁, 𑀫𑁂𑀣𑀼𑀦𑀸 𑀅𑀧𑁂𑀢𑁄 𑀫𑁂𑀣𑀼𑀦𑀸𑀧𑁂𑀢𑁄, 𑀘𑁄𑀭𑀸 𑀪𑀬𑀁 𑀘𑁄𑀭𑀪𑀬𑀁, 𑀭𑀜𑁆𑀜𑁄 𑀧𑀼𑀢𑁆𑀢𑁄 𑀭𑀸𑀚𑀧𑀼𑀢𑁆𑀢𑁄, 𑀥𑀜𑁆𑀜𑀸𑀦𑀁 𑀭𑀸𑀲𑀺 𑀥𑀜𑁆𑀜𑀭𑀸𑀲𑀺, 𑀭𑀽𑀧𑁂 𑀲𑀜𑁆𑀜𑀸 𑀭𑀽𑀧𑀲𑀜𑁆𑀜𑀸, 𑀲𑀁𑀲𑀸𑀭𑁂 𑀤𑀼𑀓𑁆𑀔𑀁 𑀲𑀁𑀲𑀸𑀭𑀤𑀼𑀓𑁆𑀔𑀁.

𑁩𑁨𑁮. , 𑁩𑁫𑁨. 𑀅𑀜𑁆𑀜𑀧𑀤𑀢𑁆𑀣𑁂𑀲𑀼 𑀩𑀳𑀼𑀩𑁆𑀩𑀻𑀳𑀺.

𑀅𑀜𑁆𑀜𑁂𑀲𑀁 𑀧𑀤𑀸𑀦𑀁 𑀅𑀢𑁆𑀣𑁂𑀲𑀼 𑀤𑁆𑀯𑁂 𑀦𑀸𑀫𑀸𑀦𑀺 𑀩𑀳𑀽𑀦𑀺 𑀦𑀸𑀫𑀸𑀦𑀺 𑀬𑀤𑀸 𑀲𑀫𑀲𑁆𑀬𑀦𑁆𑀢𑁂, 𑀢𑀤𑀸 𑀲𑁄 𑀲𑀫𑀸𑀲𑁄 𑀩𑀳𑀼𑀩𑁆𑀩𑀻𑀳𑀺 𑀲𑀜𑁆𑀜𑁄 𑀳𑁄𑀢𑀺.

𑀆𑀕𑀢𑀸 𑀲𑀫𑀡𑀸 𑀇𑀫𑀁 𑀲𑀗𑁆𑀖𑀸𑀭𑀸𑀫𑀁 𑀲𑁄𑀬𑀁 𑀆𑀕𑀢𑀲𑀫𑀡𑁄, 𑀲𑀗𑁆𑀖𑀸𑀭𑀸𑀫𑁄. 𑀚𑀺𑀢𑀸𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀅𑀦𑁂𑀦 𑀲𑀫𑀡𑁂𑀦 𑀲𑁄𑀬𑀁 𑀚𑀺𑀢𑀺𑀦𑁆𑀤𑁆𑀭𑀺𑀬𑁄, 𑀲𑀫𑀡𑁄. 𑀤𑀺𑀦𑁆𑀦𑁄 𑀲𑀼𑀗𑁆𑀓𑁄 𑀬𑀲𑁆𑀲 𑀭𑀜𑁆𑀜𑁄 𑀲𑁄𑀬𑀁 𑀤𑀺𑀦𑁆𑀦𑀲𑀼𑀗𑁆𑀓𑁄, 𑀭𑀸𑀚𑀸. 𑀦𑀺𑀕𑁆𑀕𑀢𑀸 𑀚𑀦𑀸 𑀅𑀲𑁆𑀫𑀸 𑀕𑀸𑀫𑀸 𑀲𑁄𑀬𑀁 𑀦𑀺𑀕𑁆𑀕𑀢𑀚𑀦𑁄, 𑀕𑀸𑀫𑁄. 𑀙𑀺𑀦𑁆𑀦𑁄 𑀳𑀢𑁆𑀢𑁄 𑀬𑀲𑁆𑀲 𑀧𑀼𑀭𑀺𑀲𑀲𑁆𑀲 𑀲𑁄𑀬𑀁 𑀙𑀺𑀦𑁆𑀦𑀳𑀢𑁆𑀣𑁄, 𑀧𑀼𑀭𑀺𑀲𑁄. 𑀲𑀫𑁆𑀧𑀦𑁆𑀦𑀸𑀦𑀺 𑀲𑀲𑁆𑀲𑀸𑀦𑀺 𑀬𑀲𑁆𑀫𑀺𑀁 𑀚𑀦𑀧𑀤𑁂 𑀲𑁄𑀬𑀁 𑀲𑀫𑁆𑀧𑀦𑁆𑀦𑀲𑀲𑁆𑀲𑁄, 𑀚𑀦𑀧𑀤𑁄.

𑀦𑀺𑀕𑁆𑀭𑁄𑀥𑀲𑁆𑀲 𑀧𑀭𑀺𑀫𑀡𑁆𑀟𑀮𑁄 𑀦𑀺𑀕𑁆𑀭𑁄𑀥𑀧𑀭𑀺𑀫𑀡𑁆𑀟𑀮𑁄, 𑀦𑀺𑀕𑁆𑀭𑁄𑀥𑀧𑀭𑀺𑀫𑀡𑁆𑀟𑀮𑁄 𑀇𑀯 𑀧𑀭𑀺𑀫𑀡𑁆𑀟𑀮𑁄 𑀬𑁄 𑀭𑀸𑀚𑀓𑀼𑀫𑀸𑀭𑁄 𑀲𑁄𑀬𑀁 𑀦𑀺𑀕𑁆𑀭𑁄𑀥𑀧𑀭𑀺𑀫𑀡𑁆𑀟𑀮𑁄. 𑀅𑀣 𑀯𑀸 𑀦𑀺𑀕𑁆𑀭𑁄𑀥𑀧𑀭𑀺𑀫𑀡𑁆𑀟𑀮𑁄 𑀇𑀯 𑀧𑀭𑀺𑀫𑀡𑁆𑀟𑀮𑁄 𑀬𑀲𑁆𑀲 𑀭𑀸𑀚𑀓𑀼𑀫𑀸𑀭𑀲𑁆𑀲 𑀲𑁄𑀬𑀁 𑀦𑀺𑀕𑁆𑀭𑁄𑀥𑀧𑀭𑀺𑀫𑀡𑁆𑀟𑀮𑁄, 𑀭𑀸𑀚𑀓𑀼𑀫𑀸𑀭𑁄.

𑀘𑀓𑁆𑀔𑀼𑀦𑁄 𑀪𑀽𑀢𑁄 𑀘𑀓𑁆𑀔𑀼𑀪𑀽𑀢𑁄, 𑀘𑀓𑁆𑀔𑀼𑀪𑀽𑀢𑁄 𑀇𑀯 𑀪𑀽𑀢𑁄 𑀬𑁄 𑀪𑀕𑀯𑀸 𑀲𑁄𑀬𑀁 𑀘𑀓𑁆𑀔𑀼𑀪𑀽𑀢𑁄, 𑀪𑀕𑀯𑀸.

𑀲𑀼𑀯𑀡𑁆𑀡𑀲𑁆𑀲 𑀯𑀡𑁆𑀡𑁄 𑀲𑀼𑀯𑀡𑁆𑀡𑀯𑀡𑁆𑀡𑁄, 𑀲𑀼𑀯𑀡𑁆𑀡𑀯𑀡𑁆𑀡𑁄 𑀯𑀺𑀬 𑀯𑀡𑁆𑀡𑁄 𑀬𑀲𑁆𑀲 𑀪𑀕𑀯𑀢𑁄 𑀲𑁄𑀬𑀁 𑀲𑀼𑀯𑀡𑁆𑀡𑀯𑀡𑁆𑀡𑁄, 𑀪𑀕𑀯𑀸.

𑀩𑁆𑀭𑀳𑁆𑀫𑀼𑀦𑁄 𑀲𑀭𑁄 𑀩𑁆𑀭𑀳𑁆𑀫𑀲𑁆𑀲𑀭𑁄, 𑀩𑁆𑀭𑀳𑁆𑀫𑀲𑁆𑀲𑀭𑁄 𑀯𑀺𑀬 𑀲𑀭𑁄 𑀬𑀲𑁆𑀲 𑀪𑀕𑀯𑀢𑁄 𑀲𑁄𑀬𑀁 𑀩𑁆𑀭𑀳𑁆𑀫𑀲𑁆𑀲𑀭𑁄, 𑀪𑀕𑀯𑀸.

𑀲𑀬𑀁 𑀧𑀢𑀺𑀢 𑀧𑀡𑁆𑀡 𑀧𑀼𑀧𑁆𑀨𑀨𑀮𑀯𑀸𑀬𑀼𑀢𑁄𑀬𑀸𑀳𑀸𑀭𑀸𑀢𑀺 𑀧𑀡𑁆𑀡𑀜𑁆𑀘 𑀧𑀼𑀧𑁆𑀨𑀜𑁆𑀘 𑀨𑀮𑀜𑁆𑀘 𑀧𑀡𑁆𑀡𑀧𑀼𑀧𑁆𑀨𑀨𑀮𑀸𑀦𑀺, 𑀲𑀬𑀫𑁂𑀯 𑀧𑀢𑀺𑀢𑀸𑀦𑀺 𑀲𑀬𑀁𑀧𑀢𑀺𑀢𑀸𑀦𑀺, 𑀲𑀬𑀁𑀧𑀢𑀺𑀢𑀸𑀦𑀺 𑀘 𑀢𑀸𑀦𑀺 𑀧𑀡𑁆𑀡𑀧𑀼𑀧𑁆𑀨𑀨𑀮𑀸𑀦𑀺 𑀘𑁂𑀢𑀺 𑀲𑀬𑀁𑀧𑀢𑀺𑀢𑀧𑀡𑁆𑀡𑀧𑀼𑀧𑁆𑀨𑀨𑀮𑀸𑀦𑀺 𑀯𑀸𑀬𑀼 𑀘 𑀢𑁄𑀬𑀜𑁆𑀘 𑀯𑀸𑀬𑀼𑀢𑁄𑀬𑀸𑀦𑀺, 𑀲𑀬𑀁𑀧𑀢𑀺𑀢𑀧𑀡𑁆𑀡𑀧𑀼𑀧𑁆𑀨𑀨𑀮𑀸𑀦𑀺 𑀘 𑀯𑀸𑀬𑀼𑀢𑁄𑀬𑀸𑀦𑀺 𑀘 𑀲𑀬𑀁𑀧𑀢𑀺𑀢𑀧𑀡𑁆𑀡𑀧𑀼𑀧𑁆𑀨𑀨𑀮𑀯𑀸𑀬𑀼𑀢𑁄𑀬𑀸𑀦𑀺. 𑀲𑀬𑀁𑀧𑀢𑀺𑀢𑀧𑀡𑁆𑀡𑀧𑀼𑀧𑁆𑀨𑀨𑀮𑀯𑀸𑀬𑀼𑀢𑁄𑀬𑀸𑀦𑀺 𑀆𑀳𑀸𑀭𑀸 𑀬𑁂𑀲𑀁 𑀢𑁂 𑀲𑀬𑀁𑀧𑀢𑀺𑀢𑀧𑀡𑁆𑀡𑀧𑀼𑀧𑁆𑀨𑀨𑀮𑀯𑀸𑀬𑀼𑀢𑁄𑀬𑀸𑀳𑀸𑀭𑀸, 𑀇𑀲𑀬𑁄. 𑀬𑀫𑁂𑀢𑁆𑀣 𑀯𑀢𑁆𑀢𑀩𑁆𑀩𑀁, 𑀢𑀁 𑀳𑁂𑀝𑁆𑀞𑀸 𑀯𑀼𑀢𑁆𑀢𑀫𑁂𑀯. 𑀅𑀬𑀁 𑀧𑀦 𑀤𑁆𑀯𑀦𑁆𑀤𑀓𑀫𑁆𑀫𑀥𑀸𑀭𑀬𑀕𑀩𑁆𑀪𑁄 𑀢𑀼𑀮𑁆𑀬𑀸𑀥𑀺𑀓𑀭𑀡𑀧𑀳𑀼𑀩𑁆𑀩𑀻𑀳𑀺.

𑀅𑀣 𑀯𑀸 𑁋 𑀲𑀬𑀁𑀧𑀢𑀺𑀢𑀧𑀡𑁆𑀡𑀧𑀼𑀧𑁆𑀨𑀨𑀮𑀯𑀸𑀬𑀼𑀢𑁄𑀬𑁂𑀳𑀺 𑀆𑀳𑀸𑀭𑀸 𑀬𑁂𑀲𑀁 𑀢𑁂 𑀲𑀬𑀁𑀧𑀢𑀺𑀢𑀧𑀡𑁆𑀡𑀧𑀼𑀧𑁆𑀨𑀨𑀮𑀯𑀸𑀬𑀼𑀢𑁄𑀬𑀸𑀳𑀸𑀭𑀸. 𑀅𑀬𑀁 𑀧𑀦 𑀪𑀺𑀦𑁆𑀦𑀸𑀥𑀺𑀓𑀭𑀡𑀩𑀳𑀼𑀩𑁆𑀩𑀻𑀳𑀺.

𑀦𑀸𑀦𑀸 𑀤𑀼𑀫𑀧𑀢𑀺𑀢 𑀧𑀼𑀧𑁆𑀨𑀯𑀸𑀲𑀺𑀢 𑀲𑀸𑀦𑀽𑀢𑀺 𑀦𑀸𑀦𑀸𑀧𑀓𑀸𑀭𑀸 𑀤𑀼𑀫𑀸 𑀦𑀸𑀦𑀸𑀤𑀼𑀫𑀸, 𑀦𑀸𑀦𑀸𑀤𑀼𑀫𑁂𑀳𑀺 𑀧𑀢𑀺𑀢𑀸𑀦𑀺 𑀦𑀸𑀦𑀸𑀤𑀼𑀫𑀧𑀢𑀺 𑀢𑀸𑀦𑀺, 𑀦𑀸𑀦𑀸𑀤𑀼𑀫𑀧𑀢𑀺𑀢𑀸𑀦𑀺 𑀘 𑀢𑀸𑀦𑀺 𑀧𑀼𑀧𑁆𑀨𑀸𑀦𑀺 𑀘𑁂𑀢𑀺 𑀦𑀸𑀦𑀸𑀤𑀼𑀫𑀧𑀢𑀺𑀢𑀧𑀼𑀧𑁆𑀨𑀸𑀦𑀺, 𑀦𑀸𑀦𑀸𑀤𑀼𑀫𑀧𑀢𑀺𑀢𑀧𑀼𑀧𑁆𑀨𑁂𑀳𑀺 𑀯𑀸𑀲𑀺𑀢𑀸 𑀦𑀸𑀦𑀸𑀤𑀼𑀫𑀧𑀢𑀺𑀢𑀧𑀼𑀧𑁆𑀨𑀯𑀸𑀲𑀺𑀢𑀸, 𑀦𑀸𑀦𑀸𑀤𑀼𑀫𑀧𑀢𑀺𑀢𑀧𑀼𑀧𑁆𑀨𑀯𑀸𑀲𑀺𑀢𑀸 𑀲𑀸𑀦𑀽 𑀬𑀲𑁆𑀲 𑀧𑀩𑁆𑀩𑀢𑀭𑀸𑀚𑀲𑁆𑀲 𑀲𑁄𑀬𑀁 𑀦𑀸𑀦𑀸𑀤𑀼𑀫𑀧𑀢𑀺𑀢𑀧𑀼𑀧𑁆𑀨𑀯𑀸𑀲𑀺𑀢𑀲𑀸𑀦𑀼, 𑀧𑀩𑁆𑀩𑀢𑀭𑀸𑀚𑀸. 𑀅𑀬𑀁 𑀧𑀦 𑀓𑀫𑁆𑀫𑀥𑀸𑀭𑀬𑀢𑀧𑁆𑀧𑀼𑀭𑀺𑀲𑀕𑀩𑁆𑀪𑁄 𑀢𑀼𑀮𑁆𑀬𑀸𑀥𑀺𑀓𑀭𑀡𑀩𑀳𑀼𑀩𑁆𑀩𑀻𑀳𑀺.

𑀅𑀣 𑀯𑀸 𑁋 𑀯𑀸𑀲𑀺𑀢𑀸 𑀲𑀸𑀦𑀽 𑀯𑀸𑀲𑀺𑀢𑀲𑀸𑀦𑀼, 𑀲𑀸𑀧𑁂𑀓𑁆𑀔𑀢𑁆𑀢𑁂 𑀲𑀢𑀺𑀧𑀺 𑀕𑀫𑀓𑀢𑁆𑀢𑀸 𑀲𑀫𑀸𑀲𑁄. 𑀦𑀸𑀦𑀸𑀤𑀼𑀫𑀧𑀢𑀺𑀢𑀧𑀼𑀧𑁆𑀨𑁂𑀳𑀺 𑀯𑀸𑀲𑀺𑀢𑀲𑀸𑀦𑀽 𑀬𑀲𑁆𑀲 𑀧𑀩𑁆𑀩𑀢𑀭𑀸𑀚𑀲𑁆𑀲 𑀲𑁄𑀬𑀁 𑀦𑀸𑀦𑀸𑀤𑀼𑀫𑀧𑀢𑀺𑀢𑀧𑀼𑀧𑁆𑀨𑀯𑀸𑀲𑀺𑀢𑀲𑀸𑀦𑀼, 𑀧𑀩𑁆𑀩𑀢𑀭𑀸𑀚𑀸. 𑀅𑀬𑀁 𑀧𑀦 𑀪𑀺𑀦𑁆𑀦𑀸𑀥𑀺𑀓𑀭𑀡𑀩𑀳𑀼𑀩𑁆𑀩𑀻𑀳𑀺.

𑀩𑁆𑀬𑀸𑀮𑀫𑁆𑀩𑀫𑁆𑀩𑀼𑀥𑀭𑀩𑀺𑀦𑁆𑀤𑀼𑀘𑀼𑀫𑁆𑀩𑀺𑀢𑀓𑀽𑀝𑁄𑀢𑀺 𑀅𑀫𑁆𑀩𑀼𑀁 𑀥𑀸𑀭𑁂𑀢𑀻𑀢𑀺 𑀅𑀫𑁆𑀩𑀼𑀥𑀭𑁄, 𑀓𑁄 𑀲𑁄? 𑀧𑀚𑁆𑀚𑀼𑀦𑁆𑀦𑁄. 𑀯𑀺𑀯𑀺𑀥𑀸 𑀆𑀮𑀫𑁆𑀩𑁄 𑀩𑁆𑀬𑀸𑀮𑀫𑁆𑀩𑁄, 𑀩𑁆𑀬𑀸𑀮𑀫𑁆𑀩𑁄 𑀘 𑀲𑁄 𑀅𑀫𑁆𑀩𑀼𑀥𑀭𑁄 𑀘𑀸𑀢𑀺 𑀩𑁆𑀬𑀸𑀮𑀫𑁆𑀩𑀫𑁆𑀩𑀼𑀥𑀭𑁄, 𑀩𑁆𑀬𑀸𑀮𑀫𑁆𑀩𑀫𑁆𑀩𑀼𑀥𑀭𑀲𑁆𑀲 𑀩𑀺𑀦𑁆𑀤𑀽 𑀩𑁆𑀬𑀸𑀮𑀫𑁆𑀩𑀫𑁆𑀩𑀼𑀥𑀭𑀩𑀺𑀦𑁆𑀤𑀽, 𑀩𑁆𑀬𑀸𑀮𑀫𑁆𑀩𑀫𑁆𑀩𑀼𑀥𑀭𑀩𑀺𑀦𑁆𑀤𑀽𑀳𑀺 𑀘𑀼𑀫𑁆𑀩𑀺𑀢𑁄 𑀩𑁆𑀬𑀸𑀮𑀫𑁆𑀩𑀫𑁆𑀩𑀼𑀥𑀭𑀩𑀺𑀦𑁆𑀤𑀼𑀘𑀼𑀫𑁆𑀩𑀺𑀢𑁄, 𑀩𑁆𑀬𑀸𑀮𑀫𑁆𑀩𑀫𑁆𑀩𑀼𑀭𑁂𑀩𑀺𑀦𑁆𑀤𑀼𑀘𑀼𑀫𑁆𑀩𑀺𑀢𑁄 𑀓𑀽𑀝𑁄 𑀬𑀲𑁆𑀲 𑀧𑀩𑁆𑀩𑀢𑀭𑀸𑀚𑀲𑁆𑀲 𑀲𑁄𑀬𑀁 𑀩𑁆𑀬𑀸𑀮𑀫𑁆𑀩𑀫𑁆𑀩𑀼𑀥𑀭𑀩𑀺𑀦𑁆𑀤𑀼𑀘𑀼𑀫𑁆𑀩𑀺𑀢𑀓𑀽𑀝𑁄. 𑀅𑀬𑀁 𑀧𑀦 𑀓𑀫𑁆𑀫𑀥𑀸𑀭𑀬𑀢𑀧𑁆𑀧𑀼𑀭𑀺𑀲𑀕𑀩𑁆𑀪𑁄 𑀢𑀼𑀮𑁆𑀬𑀸𑀥𑀺𑀓𑀭𑀡𑀩𑀳𑀼𑀩𑁆𑀩𑀻𑀳𑀺.

𑀅𑀣 𑀯𑀸 𑁋 𑀘𑀼𑀫𑁆𑀩𑀺𑀢𑁄 𑀓𑀽𑀝𑁄 𑀘𑀼𑀫𑁆𑀩𑀺𑀢𑀓𑀽𑀝𑁄, 𑀲𑀸𑀧𑁂𑀓𑁆𑀔𑀢𑁆𑀢𑁂 𑀲𑀢𑀺𑀧𑀺 𑀕𑀫𑀓𑀢𑁆𑀢𑀸 𑀲𑀫𑀸𑀲𑁄. 𑀩𑁆𑀬𑀸𑀮𑀫𑁆𑀩𑀫𑁆𑀩𑀼𑀥𑀭𑀩𑀺𑀦𑁆𑀤𑀽𑀳𑀺 𑀘𑀼𑀫𑁆𑀩𑀺𑀢𑀓𑀽𑀝𑁄 𑀬𑀲𑁆𑀲 𑀧𑀩𑁆𑀩𑀢𑀭𑀸𑀚𑀲𑁆𑀲 𑀲𑁄𑀬𑀁 𑀩𑁆𑀬𑀸𑀮𑀫𑁆𑀩𑀫𑁆𑀩𑀼𑀥𑀭𑀩𑀺𑀦𑁆𑀤𑀼𑀘𑀼𑀫𑁆𑀩𑀺𑀢𑀓𑀽𑀝𑁄. 𑀅𑀬𑀁 𑀧𑀦 𑀪𑀺𑀦𑁆𑀦𑀸𑀥𑀺𑀓𑀭𑀡𑀩𑀳𑀼𑀩𑁆𑀩𑀻𑀳𑀺.

𑀅𑀫𑀺𑀢 𑀩𑀮 𑀧𑀭𑀓𑁆𑀓𑀫𑀚𑀼𑀢𑀻𑀢𑀺 𑀦 𑀫𑀺𑀢𑀸 𑀅𑀫𑀺𑀢𑀸, 𑀩𑀮𑀜𑁆𑀘 𑀧𑀭𑀓𑁆𑀓𑀫𑁄 𑀘 𑀚𑀼𑀢𑀺 𑀘 𑀩𑀮𑀧𑀭𑀓𑁆𑀓𑀫𑀚𑀼𑀢𑀺𑀬𑁄, 𑀅𑀫𑀺𑀢𑀸 𑀩𑀮𑀧𑀭𑀓𑁆𑀓𑀫𑀚𑀼𑀢𑀺𑀬𑁄 𑀬𑀲𑁆𑀲 𑀲𑁄𑀬𑀁 𑀅𑀫𑀺𑀢𑀩𑀮𑀧𑀭𑀓𑁆𑀓𑀫𑀚𑀼𑀢𑀺, 𑀅𑀬𑀁 𑀧𑀦 𑀓𑀫𑁆𑀫𑀥𑀸𑀭𑀬𑀤𑁆𑀯𑀦𑁆𑀤𑀕𑀩𑁆𑀪𑁄 𑀢𑀼𑀮𑁆𑀬𑀸𑀥𑀺𑀓𑀭𑀡𑀩𑀳𑀼𑀩𑁆𑀩𑀻𑀳𑀺.

𑀧𑀻𑀡𑁄𑀭𑀓𑁆𑀔𑀁𑀲 𑀩𑀸𑀳𑀽𑀢𑀺 𑀉𑀭𑁄 𑀘 𑀅𑀓𑁆𑀔𑀜𑁆𑀘 𑀅𑀁𑀲𑁄 𑀘 𑀩𑀸𑀳𑀼 𑀘 𑀉𑀭𑀓𑁆𑀔𑀁𑀲𑀩𑀸𑀳𑀯𑁄, 𑀧𑀻𑀡𑀸 𑀉𑀭𑀓𑁆𑀔𑀁𑀲𑀩𑀸𑀳𑀯𑁄 𑀬𑀲𑁆𑀲 𑀪𑀕𑀯𑀢𑁄 𑀲𑁄𑀬𑀁 𑀧𑀻𑀡𑁄𑀭𑀓𑁆𑀔𑀁𑀲𑀩𑀸𑀳𑀼. 𑀅𑀬𑀁 𑀧𑀦 𑀤𑁆𑀯𑀦𑁆𑀤𑀯𑀩𑁆𑀪𑁄 𑀢𑀼𑀮𑁆𑀬𑀸𑀥𑀺𑀓𑀭𑀡𑀩𑀳𑀼𑀩𑁆𑀩𑀻𑀳𑀺.

𑀧𑀻𑀡 𑀕𑀡𑁆𑀟 𑀯𑀤𑀦 𑀣𑀦𑀽𑀭𑀼𑀚𑀖𑀦𑀸𑀢𑀺 𑀕𑀡𑁆𑀟𑁄 𑀘 𑀯𑀤𑀦𑀜𑁆𑀘 𑀣𑀦𑁄 𑀘 𑀊𑀭𑀼 𑀘 𑀚𑀖𑀦𑀜𑁆𑀘 𑀕𑀡𑁆𑀟𑀯𑀤𑀦𑀣𑀦𑀽𑀭𑀼𑀚𑀖𑀦𑀸, 𑀧𑀻𑀡𑀸 𑀕𑀡𑁆𑀟𑀯𑀤𑀦𑀣𑀦𑀽𑀭𑀼𑀚𑀖𑀦𑀸 𑀬𑀲𑁆𑀲𑀸 𑀲𑀸𑀬𑀁 𑀧𑀻𑀡𑀕𑀡𑁆𑀟𑀯𑀤𑀦𑀣𑀦𑀽𑀭𑀼𑀚𑀖𑀦𑀸. 𑀅𑀬𑀫𑁆𑀧𑀺 𑀤𑁆𑀯𑀦𑁆𑀤𑀕𑀩𑁆𑀪𑁄 𑀢𑀼𑀮𑁆𑀬𑀸𑀥𑀺𑀓𑀭𑀡𑀩𑀳𑀼𑀩𑁆𑀩𑀻𑀳𑀺.

𑀯𑀯𑀭 𑀲𑀼𑀭𑀸𑀲𑀼𑀭 𑀕𑀭𑀼𑀟 𑀫𑀦𑀼𑀚 𑀪𑀼𑀚𑀕 𑀕𑀦𑁆𑀥𑀩𑁆𑀩 𑀫𑀓𑀼𑀝 𑀓𑀽𑀝 𑀘𑀼𑀫𑁆𑀩𑀺𑀢 𑀲𑁂𑀮𑀲𑀗𑁆𑀖𑀝𑁆𑀝𑀺𑀢 𑀘𑀭𑀡𑁄𑀢𑀺 𑀲𑀼𑀭𑀸 𑀘 𑀅𑀲𑀼𑀭𑀸 𑀘 𑀕𑀭𑀼𑀟𑀸 𑀘 𑀫𑀦𑀼𑀚𑀸 𑀘 𑀪𑀼𑀚𑀕𑀸 𑀘 𑀕𑀦𑁆𑀥𑀩𑁆𑀩𑀸 𑀘 𑀲𑀼𑀭𑀸𑀲𑀼𑀭𑀕𑀭𑀼𑀟𑀫𑀦𑀼𑀚𑀪𑀼𑀚𑀕𑀕𑀦𑁆𑀥𑀩𑁆𑀩𑀸, 𑀧𑀯𑀭𑀸 𑀘 𑀢𑁂 𑀲𑀼𑀭𑀸𑀲𑀼𑀭𑀕𑀭𑀼𑀟𑀫𑀦𑀼𑀚𑀪𑀼𑀚𑀕 𑀕𑀦𑁆𑀥𑀩𑁆𑀩𑀸 𑀘𑁂𑀢𑀺 𑀧𑀯𑀭𑀲𑀼𑀭𑀸𑀲𑀼𑀭𑀕𑀭𑀼𑀟𑀫𑀦𑀼𑀚𑀪𑀼𑀚𑀕𑀕𑀦𑁆𑀥𑀩𑁆𑀩𑀸, 𑀧𑀯𑀭𑀲𑀼𑀭𑀸𑀲𑀼𑀭𑀕𑀭𑀼𑀟𑀫𑀦𑀼𑀚𑀪𑀼𑀚𑀕𑀕𑀦𑁆𑀥𑀩𑁆𑀩𑀸𑀦𑀁 𑀫𑀓𑀼𑀝𑀸𑀦𑀺 𑀧𑀯𑀭𑀲𑀼𑀭𑀸𑀲𑀼𑀭𑀕𑀭𑀼𑀟𑀫𑀦𑀼𑀚𑀪𑀼𑀚𑀕𑀕𑀦𑁆𑀥𑀩𑁆𑀩𑀫𑀓𑀼𑀝𑀸𑀦𑀺, 𑀧𑀯𑀭𑀲𑀼𑀭𑀸𑀲𑀼𑀭𑀕𑀭𑀼𑀟𑀫𑀦𑀼𑀚𑀪𑀼𑀚𑀕𑀕𑀦𑁆𑀥𑀩𑁆𑀩𑀫𑀓𑀼𑀝𑀸𑀦𑀁 𑀓𑀽𑀝𑀸𑀦𑀺 𑀧𑀯𑀭𑀲𑀼𑀭𑀸𑀲𑀼𑀭𑀕𑀭𑀼𑀟𑀫𑀦𑀼𑀚𑀪𑀼𑀚𑀕𑀕𑀦𑁆𑀥𑀩𑁆𑀩𑀫𑀓𑀼𑀝𑀓𑀽𑀝𑀸𑀦𑀺, 𑀧𑀯𑀭𑀲𑀼𑀭𑀸𑀲𑀼𑀭𑀕𑀭𑀼𑀟𑀫𑀦𑀼𑀚𑀪𑀼𑀚𑀕𑀕𑀦𑁆𑀥𑀩𑁆𑀩𑀫𑀓𑀼𑀝𑀓𑀽𑀝𑁂𑀲𑀼 𑀘𑀼𑀫𑁆𑀩𑀺𑀢𑀸 𑀧𑀯𑀭𑀲𑀼𑀭𑀸𑀲𑀼𑀭𑀕𑀭𑀼𑀟𑀫𑀦𑀼𑀚𑀪𑀼𑀚𑀕𑀕𑀦𑁆𑀥𑀩𑁆𑀩𑀫𑀓𑀼𑀝𑀓𑀽𑀝𑀘𑀼𑀫𑁆𑀩𑀺𑀢𑀸, 𑀧𑀯𑀭𑀲𑀼𑀭𑀸𑀲𑀼𑀭𑀕𑀭𑀼𑀟𑀫𑀦𑀼𑀚𑀪𑀼𑀚𑀕𑀕𑀦𑁆𑀥𑀩𑁆𑀩𑀫𑀓𑀼𑀝𑀓𑀽𑀝𑀘𑀼𑀫𑁆𑀩𑀺𑀢𑀸 𑀘 𑀢𑁂 𑀲𑁂𑀮𑀸 𑀘𑀸𑀢𑀺 𑀧𑀯𑀭𑀲𑀼𑀭𑀸𑀲𑀼𑀭𑀕𑀭𑀼𑀟𑀫𑀦𑀼𑀚𑀪𑀼𑀚𑀕𑀕𑀦𑁆𑀥𑀩𑁆𑀩𑀫𑀓𑀼𑀝𑀓𑀽𑀝𑀘𑀼𑀫𑁆𑀩𑀺𑀢𑀲𑁂𑀮𑀸, 𑀧𑀯𑀭𑀲𑀼𑀭𑀸𑀲𑀼𑀭 𑀕𑀭𑀼𑀟𑀫𑀦𑀼𑀚𑀪𑀼𑀚𑀕𑀕𑀦𑁆𑀥𑀩𑁆𑀩𑀫𑀓𑀼𑀝𑀓𑀽𑀝𑀘𑀼𑀫𑁆𑀩𑀺𑀢𑀲𑁂𑀮𑁂𑀳𑀺 𑀲𑀗𑁆𑀖𑀝𑁆𑀝𑀺𑀢𑀸 𑀧𑀯𑀭𑀲𑀼𑀭𑀸𑀲𑀼𑀭 𑀕𑀭𑀼𑀟𑀫𑀦𑀼𑀚𑀪𑀼𑀚𑀕𑀕𑀦𑁆𑀥𑀩𑁆𑀩𑀫𑀓𑀼𑀝𑀓𑀽𑀝𑀘𑀼𑀫𑁆𑀩𑀺𑀢𑀲𑁂𑀮𑀲𑀗𑁆𑀖𑀝𑁆𑀝𑀺𑀢𑀸, 𑀧𑀯𑀭𑀲𑀼𑀭𑀸𑀲𑀼𑀭𑀕𑀭𑀼𑀟𑀫𑀦𑀼𑀚𑀪𑀼𑀚𑀕𑀕𑀦𑁆𑀥𑀩𑁆𑀩𑀫𑀓𑀼𑀝𑀓𑀽𑀝𑀘𑀼𑀫𑁆𑀩𑀺𑀢𑀲𑁂𑀮𑀲𑀗𑁆𑀖𑀝𑁆𑀝𑀺𑀢𑀸 𑀘𑀭𑀡𑀸 𑀬𑀲𑁆𑀲 𑀢𑀣𑀸𑀕𑀢𑀲𑁆𑀲 𑀲𑁄𑀬𑀁 𑀧𑀯𑀭𑀲𑀼𑀭𑀸𑀲𑀼𑀭𑀕𑀭𑀼𑀟𑀫𑀦𑀼𑀚𑀪𑀼𑀚𑀕𑀕𑀦𑁆𑀥𑀩𑁆𑀩𑀫𑀓𑀼𑀝𑀓𑀽𑀝𑀘𑀼𑀫𑁆𑀩𑀺𑀢𑀲𑁂𑀮𑀲𑀗𑁆𑀖𑀝𑁆𑀝𑀺𑀢𑀘𑀭𑀡𑁄, 𑀢𑀣𑀸𑀕𑀢𑁄, 𑀅𑀬𑀁 𑀧𑀦 𑀤𑁆𑀯𑀦𑁆𑀤𑀓𑀫𑁆𑀫𑀥𑀸𑀭𑀬𑀢𑀧𑁆𑀧𑀼𑀭𑀺𑀲𑀕𑀩𑁆𑀪𑁄 𑀢𑀼𑀮𑁆𑀬𑀸𑀥𑀺𑀓𑀭𑀡𑀩𑀳𑀼𑀩𑁆𑀩𑀻𑀳𑀺.

𑀅𑀣 𑀯𑀸𑁋𑀲𑀗𑁆𑀖𑀝𑁆𑀝𑀺𑀢𑀸 𑀘𑀭𑀡𑀸 𑀲𑀗𑁆𑀖𑀝𑁆𑀝𑀺𑀢𑀘𑀭𑀡𑀸, 𑀲𑀸𑀧𑁂𑀓𑁆𑀔𑀢𑁆𑀢𑁂 𑀲𑀢𑀺𑀧𑀺 𑀕𑀫𑀓𑀢𑁆𑀢𑀸 𑀲𑀫𑀸𑀲𑁄. 𑀧𑀯𑀭𑀲𑀼𑀭𑀸𑀲𑀼𑀭 𑀕𑀭𑀼𑀟𑀫𑀦𑀼𑀚𑀪𑀼𑀚𑀕 𑀕𑀦𑁆𑀥𑀩𑁆𑀩𑀫𑀓𑀼𑀝𑀓𑀽𑀝𑀘𑀼𑀫𑁆𑀩𑀺𑀢𑀲𑁂𑀮𑁂𑀳𑀺 𑀲𑀗𑁆𑀖𑀝𑁆𑀝𑀺𑀢𑀘𑀭𑀡𑀸 𑀬𑀲𑁆𑀲 𑀢𑀣𑀸𑀕𑀢𑀲𑁆𑀲 𑀲𑁄𑀬𑀁 𑀧𑀯𑀭𑀲𑀼𑀭𑀸𑀲𑀼𑀭𑀕𑀭𑀼𑀟 𑀫𑀦𑀼𑀚𑀪𑀼𑀚𑀕 𑀕𑀦𑁆𑀥𑀩𑁆𑀩𑀫𑀓𑀼𑀝𑀓𑀽𑀝𑀘𑀼𑀫𑁆𑀩𑀺𑀢𑀲𑁂𑀮𑀲𑀗𑁆𑀖𑀝𑁆𑀝𑀺𑀢 𑀘𑀭𑀡𑁄. 𑀅𑀬𑀁 𑀧𑀦 𑀪𑀺𑀦𑁆𑀦𑀸𑀥𑀺𑀓𑀭𑀡𑀩𑀳𑀼𑀩𑁆𑀩𑀻𑀳𑀺.

𑀘𑀢𑀼𑀤𑁆𑀤𑀺𑀲𑁄𑀢𑀺 𑀘𑀢𑀲𑁆𑀲𑁄 𑀤𑀺𑀲𑀸 𑀬𑀲𑁆𑀲 𑀲𑁄𑀬𑀁 𑀘𑀢𑀼𑀤𑁆𑀤𑀺𑀲𑁄, 𑀪𑀕𑀯𑀸.

𑀧𑀜𑁆𑀘𑀘𑀓𑁆𑀔𑀽𑀢𑀺 𑀧𑀜𑁆𑀘 𑀘𑀓𑁆𑀔𑀽𑀦𑀺 𑀬𑀲𑁆𑀲 𑀢𑀣𑀸𑀕𑀢𑀲𑁆𑀲 𑀲𑁄𑀬𑀁 𑀧𑀜𑁆𑀘𑀘𑀓𑁆𑀔𑀼, 𑀢𑀣𑀸𑀕𑀢𑁄.

𑀤𑀲𑀩𑀮𑁄𑀢𑀺 𑀤𑀲 𑀩𑀮𑀸𑀦𑀺 𑀬𑀲𑁆𑀲 𑀲𑁄𑀬𑀁 𑀤𑀲𑀩𑀮𑁄, 𑀪𑀕𑀯𑀸.

𑀅𑀦𑀦𑁆𑀢𑀜𑀸𑀡𑁄𑀢𑀺 𑀦𑀲𑁆𑀲 𑀅𑀦𑁆𑀢𑁄 𑀅𑀦𑀦𑁆𑀢𑀁, 𑀅𑀦𑀦𑁆𑀢𑀁 𑀜𑀸𑀡𑀁 𑀬𑀲𑁆𑀲 𑀢𑀣𑀸𑀕𑀢𑀲𑁆𑀲 𑀲𑁄𑀬𑀁 𑀅𑀦𑀦𑁆𑀢𑀜𑀸𑀡𑁄, 𑀢𑀣𑀸𑀕𑀢𑁄.

𑀅𑀫𑀺𑀢 𑀖𑀦 𑀲𑀭𑀻𑀭𑁄𑀢𑀺 𑀦 𑀫𑀺𑀢𑀁 𑀅𑀫𑀺𑀢𑀁, 𑀖𑀦𑀁 𑀏𑀯 𑀲𑀭𑀻𑀭𑀁 𑀖𑀦𑀲𑀭𑀻𑀭𑀁, 𑀅𑀫𑀺𑀢𑀁 𑀖𑀦𑀲𑀭𑀻𑀭𑀁 𑀬𑀲𑁆𑀲 𑀢𑀣𑀸𑀕𑀢𑀲𑁆𑀲 𑀲𑁄𑀬𑀁 𑀅𑀫𑀺𑀢𑀖𑀦𑀲𑀭𑀻𑀭𑁄, 𑀢𑀣𑀸𑀕𑀢𑁄.

𑀅𑀫𑀺𑀢 𑀩𑀮 𑀧𑀭𑀓𑁆𑀓𑀫 𑀧𑀢𑁆𑀢𑁄𑀢𑀺 𑀦 𑀫𑀺𑀢𑀸 𑀅𑀫𑀺𑀢𑀸, 𑀩𑀮𑀜𑁆𑀘 𑀧𑀭𑀓𑁆𑀓𑀫𑁄 𑀘 𑀩𑀮𑀧𑀭𑀓𑁆𑀓𑀫𑀸, 𑀅𑀫𑀺𑀢𑀸 𑀏𑀯 𑀩𑀮𑀧𑀭𑀓𑁆𑀓𑀫𑀸 𑀅𑀫𑀺𑀢𑀩𑀮𑀧𑀭𑀓𑁆𑀓𑀫𑀸, 𑀅𑀫𑀺𑀢𑀩𑀮𑀧𑀭𑀓𑁆𑀓𑀫𑀸 𑀧𑀢𑁆𑀢𑀸 𑀬𑁂𑀦 𑀲𑁄𑀬𑀁 𑀅𑀫𑀺𑀢𑀩𑀮𑀧𑀭𑀓𑁆𑀓𑀫𑀧𑀢𑁆𑀢𑁄, 𑀪𑀕𑀯𑀸. 𑀅𑀬𑀁 𑀧𑀦 𑀓𑀫𑁆𑀫𑀥𑀸𑀭𑀬𑀤𑁆𑀯𑀦𑁆𑀤𑀕𑀩𑁆𑀪𑁄 𑀢𑀼𑀮𑁆𑀬𑀸𑀥𑀺𑀓𑀭𑀡𑀩𑀳𑀼𑀩𑁆𑀩𑀻𑀳𑀺.

𑀫𑀢𑁆𑀢 𑀪𑀫𑀭 𑀕𑀡 𑀘𑀼𑀫𑁆𑀩𑀺𑀢 𑀯𑀺𑀓𑀲𑀺𑀢𑀧𑀼𑀧𑁆𑀨𑀯𑀮𑁆𑀮𑀺𑀦𑀸𑀕𑀭𑀼𑀓𑁆𑀔𑁄 𑀧𑀲𑁄𑀪𑀺𑀢 𑀓𑀦𑁆𑀤𑀭𑁄𑀢𑀺 𑀫𑀢𑁆𑀢𑀸 𑀏𑀯 𑀪𑀫𑀭𑀸 𑀫𑀢𑁆𑀢𑀪𑀫𑀭𑀸, 𑀫𑀢𑁆𑀢𑀪𑀫𑀭𑀸𑀦𑀁 𑀕𑀡𑀸 𑀫𑀢𑁆𑀢𑀪𑀫𑀭𑀕𑀡𑀸, 𑀫𑀢𑁆𑀢𑀪𑀫𑀭𑀕𑀡𑁂𑀳𑀺 𑀘𑀼𑀫𑁆𑀩𑀺𑀢𑀸𑀦𑀺 𑀫𑀢𑁆𑀢𑀪𑀫𑀭𑀡𑀘𑀼𑀫𑁆𑀩𑀺𑀢𑀸𑀦𑀺, 𑀯𑀺𑀓𑀲𑀺𑀢𑀸𑀦𑀺 𑀏𑀯 𑀧𑀼𑀧𑁆𑀨𑀸𑀦𑀺 𑀯𑀺𑀓𑀲𑀺𑀢𑀧𑀼𑀧𑁆𑀨𑀸𑀦𑀺, 𑀫𑀢𑁆𑀢𑀪𑀫𑀭𑀕𑀡𑀘𑀼𑀫𑁆𑀩𑀺𑀢𑀸𑀦𑀺 𑀯𑀺𑀓𑀲𑀺𑀢𑀧𑀼𑀧𑁆𑀨𑀸𑀦𑀺 𑀬𑁂𑀲𑀁 𑀢𑁂𑀳𑀺 𑀫𑀢𑁆𑀢𑀪𑀫𑀭𑀕𑀡𑀘𑀼𑀫𑁆𑀩𑀺𑀢𑀯𑀺𑀓𑀲𑀺𑀢𑀧𑀼𑀧𑁆𑀨𑀸, 𑀯𑀮𑁆𑀮𑀺 𑀘 𑀦𑀸𑀕𑀭𑀼𑀓𑁆𑀔𑁄 𑀘 𑀫𑀮𑁆𑀮𑀺𑀦𑀸𑀕𑀭𑀼𑀓𑁆𑀔𑀸, 𑀫𑀢𑁆𑀢𑀪𑀫𑀭𑀕𑀡𑀘𑀼𑀫𑁆𑀩𑀺𑀢𑀯𑀺𑀓𑀲𑀺𑀢𑀧𑀼𑀧𑁆𑀨𑀸 𑀘 𑀢𑁂 𑀯𑀮𑁆𑀮𑀺𑀦𑀸𑀕𑀭𑀼𑀓𑁆𑀔𑀸 𑀘𑁂𑀢𑀺 𑀫𑀢𑁆𑀢𑀪𑀫𑀭𑀕𑀡𑀘𑀼𑀫𑁆𑀩𑀺𑀢𑀯𑀺𑀓𑀲𑀺𑀢𑀧𑀼𑀧𑁆𑀨𑀯𑀮𑁆𑀮𑀺𑀦𑀸𑀕𑀭𑀼𑀓𑁆𑀔𑀸, 𑀫𑀢𑁆𑀢𑀪𑀫𑀭𑀕𑀡𑀘𑀼𑀫𑁆𑀩𑀺𑀢𑀯𑀺𑀓𑀲𑀺𑀢𑀧𑀼𑀧𑁆𑀨𑀯𑀮𑁆𑀮𑀺𑀦𑀸𑀕𑀭𑀼𑀓𑁆𑀔𑁂𑀳𑀺 𑀉𑀧𑀲𑁄𑀪𑀺𑀢𑀸𑀦𑀺 𑀫𑀢𑁆𑀢𑀪𑀫𑀭𑀕𑀡𑀘𑀼𑀫𑁆𑀩𑀺𑀢𑀯𑀺𑀓𑀲𑀺𑀢𑀧𑀼𑀧𑁆𑀨𑀯𑀮𑁆𑀮𑀺𑀦𑀸𑀕𑀭𑀼𑀓𑁆𑀔𑁄 𑀧𑀲𑁄𑀪𑀺𑀢𑀸𑀦𑀺, 𑀫𑀢𑁆𑀢𑀪𑀫𑀭𑀕𑀡𑀘𑀼𑀫𑁆𑀩𑀺𑀢𑀯𑀺𑀓𑀲𑀺𑀢𑀧𑀼𑀧𑁆𑀨𑀯𑀮𑁆𑀮𑀺𑀦𑀸𑀕𑀭𑀼𑀓𑁆𑀔𑁄 𑀧𑀲𑁄𑀪𑀺𑀢𑀸𑀦𑀺 𑀓𑀦𑁆𑀤𑀭𑀸𑀦𑀺 𑀬𑀲𑁆𑀲 𑀧𑀩𑁆𑀩𑀢𑀭𑀸𑀚𑀲𑁆𑀲 𑀲𑁄𑀬𑀁 𑀫𑀢𑁆𑀢𑀪𑀫𑀭𑀕𑀡𑀘𑀼𑀫𑁆𑀩𑀺𑀢𑀯𑀺𑀓𑀲𑀺𑀢𑀧𑀼𑀧𑁆𑀨 𑀯𑀮𑁆𑀮𑀺𑀦𑀸𑀕𑀭𑀼𑀓𑁆𑀔𑁄 𑀧𑀲𑁄 𑀪𑀺𑀢𑀓𑀦𑁆𑀤𑀭𑁄, 𑀧𑀩𑁆𑀩𑀢𑀭𑀸𑀚𑀸. 𑀅𑀬𑀁 𑀧𑀦 𑀤𑁆𑀯𑀦𑁆𑀤𑀓𑀫𑁆𑀫𑀥𑀸𑀭𑀬𑀢𑀧𑁆𑀧𑀼𑀭𑀺𑀲𑀕𑀩𑁆𑀪𑁄 𑀢𑀼𑀮𑁆𑀬𑀸𑀥𑀺𑀓𑀭𑀡𑀩𑀳𑀼𑀩𑁆𑀩𑀻𑀳𑀺.

𑀅𑀣 𑀯𑀸𑁋𑀉𑀧𑀲𑁄𑀪𑀺𑀢𑀸𑀦𑀺 𑀓𑀦𑁆𑀤𑀭𑀸𑀦𑀺 𑀉𑀧𑀲𑁄𑀪𑀺𑀢𑀓𑀦𑁆𑀤𑀭𑀸𑀦𑀺, 𑀲𑀸𑀧𑁂𑀓𑁆𑀔𑀢𑁆𑀢𑁂 𑀲𑀢𑀺𑀧𑀺 𑀕𑀫𑀓𑀢𑁆𑀢𑀸 𑀲𑀫𑀸𑀲𑁄. 𑀫𑀢𑁆𑀢𑀪𑀫𑀭𑀕𑀡𑀘𑀼𑀫𑁆𑀩𑀺𑀢𑀯𑀺𑀓𑀲𑀺𑀢𑀧𑀼𑀧𑁆𑀨𑀯𑀮𑁆𑀮𑀺𑀦𑀸𑀕𑀭𑀼𑀓𑁆𑀔𑁂𑀳𑀺 𑀉𑀧𑀲𑁄𑀪𑀺𑀢𑀓𑀦𑁆𑀤𑀭𑀸𑀦𑀺 𑀬𑀲𑁆𑀲 𑀧𑀩𑁆𑀩𑀢𑀭𑀸𑀚𑀲𑁆𑀲 𑀲𑁄𑀬𑀁 𑀫𑀢𑁆𑀢𑀪𑀫𑀭𑀕𑀡𑀘𑀼𑀫𑁆𑀩𑀺𑀢𑀯𑀺𑀓𑀲𑀺𑀢𑀧𑀼𑀧𑁆𑀨𑀯𑀮𑁆𑀮𑀺𑀦𑀸𑀕𑀭𑀼𑀓𑁆𑀔𑁄 𑀧𑀲𑁄𑀪𑀺𑀢𑀓𑀦𑁆𑀤𑀭𑁄, 𑀧𑀩𑁆𑀩𑀢𑀭𑀸𑀚𑀸. 𑀅𑀬𑀁 𑀧𑀦 𑀪𑀺𑀦𑁆𑀦𑀸𑀥𑀺𑀓𑀭𑀡𑀩𑀳𑀼𑀩𑁆𑀩𑀻𑀳𑀺.

𑀦𑀸𑀦𑀸 𑀭𑀼𑀓𑁆𑀔 𑀢𑀺𑀡 𑀧𑀢𑀺𑀢 𑀧𑀼𑀧𑁆𑀨𑁄𑀧𑀲𑁄𑀪𑀺𑀢 𑀓𑀦𑁆𑀤𑀭𑁄𑀢𑀺 𑀭𑀼𑀓𑁆𑀔𑁄 𑀘 𑀢𑀺𑀡𑀜𑁆𑀘 𑀭𑀼𑀓𑁆𑀔𑀢𑀺𑀡𑀸𑀦𑀺, 𑀦𑀸𑀦𑀸 𑀧𑀓𑀸𑀭𑀸𑀦𑀺 𑀏𑀯 𑀭𑀼𑀓𑁆𑀔𑀢𑀺𑀡𑀸𑀦𑀺 𑀦𑀸𑀦𑀸𑀭𑀼𑀓𑁆𑀔𑀢𑀺𑀡𑀸𑀦𑀺, 𑀦𑀸𑀦𑀸𑀭𑀼𑀓𑁆𑀔𑀢𑀺𑀡𑁂𑀳𑀺 𑀧𑀢𑀺𑀢𑀸𑀦𑀺 𑀦𑀸𑀦𑀸𑀭𑀼𑀓𑁆𑀔𑀢𑀺𑀡𑀧𑀢𑀺𑀢𑀸𑀦𑀺, 𑀦𑀸𑀦𑀸𑀭𑀼𑀓𑁆𑀔𑀢𑀺𑀡𑀧𑀢𑀺𑀢𑀸𑀦𑀺 𑀘 𑀢𑀸𑀦𑀺 𑀧𑀼𑀧𑁆𑀨𑀸𑀦𑀺 𑀘𑁂𑀢𑀺 𑀦𑀸𑀦𑀸𑀭𑀼𑀓𑁆𑀔𑀢𑀺𑀡𑀧𑀢𑀺𑀢𑀧𑀼𑀧𑁆𑀨𑀸𑀦𑀺, 𑀦𑀸𑀦𑀸𑀭𑀼𑀓𑁆𑀔𑀢𑀺𑀡𑀧𑀢𑀺𑀢𑀧𑀼𑀧𑁆𑀨𑁂𑀳𑀺 𑀉𑀧𑀲𑁄𑀪𑀺𑀢𑀸𑀦𑀺 𑀦𑀸𑀦𑀸𑀭𑀼𑀓𑁆𑀔𑀢𑀺𑀡𑀧𑀢𑀺𑀢 𑀧𑀼𑀧𑁆𑀨𑁄𑀧𑀲𑁄𑀪𑀺𑀢𑀸𑀦𑀺, 𑀦𑀸𑀦𑀸𑀭𑀼𑀓𑁆𑀔𑀢𑀺𑀡𑀧𑀢𑀺𑀢𑀧𑀼𑀧𑁆𑀨𑁄𑀧𑀲𑁄𑀪𑀺𑀢𑀸𑀦𑀺 𑀓𑀦𑁆𑀤𑀭𑀸𑀦𑀺 𑀬𑀲𑁆𑀲 𑀧𑀩𑁆𑀩𑀢𑀭𑀸𑀚𑀲𑁆𑀲 𑀲𑁄𑀬𑀁 𑀦𑀸𑀦𑀸𑀭𑀼𑀓𑁆𑀔𑀢𑀺𑀡𑀧𑀢𑀺𑀢𑀧𑀼𑀧𑁆𑀨𑁄𑀧𑀲𑁄𑀪𑀺𑀢𑀓𑀦𑁆𑀤𑀭𑁄, 𑀧𑀩𑁆𑀩𑀢𑀭𑀸𑀚𑀸. 𑀅𑀬𑀁 𑀧𑀦 𑀤𑁆𑀯𑀦𑁆𑀤𑀓𑀫𑁆𑀫𑀥𑀸𑀭𑀬𑀢𑀧𑁆𑀧𑀼𑀭𑀺𑀲𑀕𑀩𑁆𑀪𑁄 𑀢𑀼𑀮𑁆𑀬𑀸𑀥𑀺𑀓𑀭𑀡𑀩𑀳𑀼𑀩𑁆𑀩𑀻𑀳𑀺.

𑀅𑀣 𑀯𑀸𑁋𑀉𑀧𑀲𑁄𑀪𑀺𑀢𑀸𑀦𑀺 𑀏𑀯 𑀓𑀦𑁆𑀤𑀭𑀸𑀦𑀺 𑀉𑀧𑀲𑁄𑀪𑀺𑀢𑀓𑀦𑁆𑀤𑀭𑀸𑀦𑀺, (𑀲𑀸𑀧𑁂𑀓𑁆𑀔𑀢𑁆𑀢𑁂 𑀲𑀢𑀺𑀧𑀺 𑀕𑀫𑀓𑀢𑁆𑀢𑀸 𑀲𑀫𑀸𑀲𑁄.) 𑀦𑀸𑀦𑀸𑀭𑀼𑀓𑁆𑀔𑀢𑀺𑀡𑀧𑀢𑀺𑀢𑀧𑀼𑀧𑁆𑀨𑁂𑀳𑀺 𑀉𑀧𑀲𑁄𑀪𑀺𑀢𑀓𑀦𑁆𑀤𑀭𑀸𑀦𑀺 𑀬𑀲𑁆𑀲 𑀧𑀩𑁆𑀩𑀢𑀭𑀸𑀚𑀲𑁆𑀲 𑀲𑁄𑀬𑀁 𑀦𑀸𑀦𑀸𑀭𑀼𑀓𑁆𑀔𑀢𑀺𑀡𑀧𑀢𑀺𑀢𑀧𑀼𑀧𑁆𑀨𑁄𑀧𑀲𑁄𑀪𑀺𑀢𑀓𑀦𑁆𑀤𑀭𑁄, 𑀧𑀩𑁆𑀩𑀢𑀭𑀸𑀚𑀸. 𑀅𑀬𑀁 𑀧𑀦 𑀪𑀺𑀦𑁆𑀦𑀸𑀥𑀺𑀓𑀭𑀡𑀩𑀳𑀼𑀩𑁆𑀩𑀻𑀳𑀺.

𑀦𑀸𑀦𑀸 𑀫𑀼𑀲𑀮 𑀨𑀸𑀮 𑀧𑀩𑁆𑀩𑀢 𑀢𑀭𑀼 𑀓𑀮𑀺𑀗𑁆𑀕𑀭 𑀲𑀭 𑀥𑀦𑀼𑀕𑀤𑀸𑀲𑀺 𑀢𑁄𑀫𑀭𑀳𑀢𑁆𑀣𑀸𑀢𑀺 𑀫𑀼𑀲𑀮𑁄 𑀘 𑀨𑀸𑀮𑁄 𑀘 𑀧𑀩𑁆𑀩𑀢𑁄 𑀘 𑀢𑀭𑀼 𑀘 𑀓𑀮𑀺𑀗𑁆𑀕𑀭𑁄 𑀘 𑀲𑀭𑁄 𑀘 𑀥𑀦𑀼 𑀘 𑀕𑀤𑀸 𑀘𑀅𑀲𑀺 𑀘 𑀢𑁄𑀫𑀭𑁄, 𑀘 𑀫𑀼𑀲𑀮𑀨𑀸𑀮𑀧𑀩𑁆𑀩𑀢𑀢𑀭𑀼𑀓𑀮𑀺𑀗𑁆𑀕𑀭𑀲𑀭𑀥𑀦𑀼𑀕𑀤𑀸𑀲𑀺𑀢𑁄𑀫𑀭𑀸, 𑀦𑀸𑀦𑀸 𑀧𑀓𑀸𑀭𑀸 𑀏𑀯 𑀫𑀼𑀲𑀮𑀨𑀸𑀮𑀧𑀩𑁆𑀩𑀢𑀢𑀭𑀼𑀓𑀮𑀺𑀗𑁆𑀕𑀭𑀲𑀭𑀥𑀦𑀼𑀕𑀤𑀸𑀲𑀺𑀢𑁄𑀫𑀭𑀸 𑀦𑀸𑀦𑀸𑀫𑀼𑀲𑀮𑀨𑀸𑀮𑀧𑀩𑁆𑀩𑀢𑀢𑀭𑀼𑀓𑀮𑀺𑀗𑁆𑀕𑀭𑀲𑀭𑀥𑀦𑀼𑀕𑀤𑀸𑀲𑀺𑀢𑁄𑀫𑀭𑀸, 𑀦𑀸𑀦𑀸𑀫𑀼𑀲𑀮𑀨𑀸𑀮𑀧𑀩𑁆𑀩𑀢𑀢𑀭𑀼𑀓𑀮𑀺𑀗𑁆𑀕𑀭𑀲𑀭𑀥𑀦𑀼𑀕𑀤𑀸𑀲𑀺𑀢𑁄𑀫𑀭𑀸 𑀳𑀢𑁆𑀣𑁂𑀲𑀼 𑀬𑁂𑀲𑀁 𑀢𑁂 𑀦𑀸𑀦𑀸𑀫𑀼𑀲𑀮𑀨𑀸𑀮𑀧𑀩𑁆𑀩𑀢𑀢𑀭𑀼𑀓𑀮𑀺𑀗𑁆𑀕𑀭 𑀲𑀭𑀥𑀦𑀼𑀕𑀤𑀸𑀲𑀺𑀢𑁄𑀫𑀭𑀳𑀢𑁆𑀣𑀸. 𑀅𑀬𑀁 𑀧𑀦 𑀤𑁆𑀯𑀦𑁆𑀤𑀓𑀫𑁆𑀫𑀥𑀸𑀭𑀬𑀕𑀩𑁆𑀪𑁄 𑀪𑀺𑀦𑁆𑀦𑀸𑀥𑀺𑀓𑀭𑀡𑀩𑀳𑀼𑀩𑁆𑀩𑀻𑀳𑀺.

𑀩𑀳𑀼𑀩𑁆𑀩𑀻𑀳𑀺 𑀇𑀘𑁆𑀘𑀦𑁂𑀦 𑀓𑁆𑀯𑀢𑁆𑀣𑁄? 𑀩𑀳𑀼𑀩𑁆𑀩𑀻𑀳𑀺𑀫𑁆𑀳𑀺 𑀘.

𑁩𑁨𑁯. , 𑁩𑁫𑁭. 𑀦𑀸𑀫𑀸𑀦𑀁 𑀲𑀫𑀼𑀘𑁆𑀘𑀬𑁄 𑀤𑁆𑀯𑀦𑁆𑀤𑁄.

𑀦𑀸𑀫𑀸𑀦𑀁 𑀏𑀓𑀯𑀺𑀪𑀢𑁆𑀢𑀺𑀓𑀸𑀦𑀁 𑀬𑁄 𑀲𑀫𑀼𑀘𑁆𑀘𑀬𑁄, 𑀲𑁄 𑀤𑁆𑀯𑀦𑁆𑀤𑀲𑀜𑁆𑀜𑁄 𑀳𑁄𑀢𑀺.

𑀘𑀦𑁆𑀤𑀺𑀫𑀸 𑀘 𑀲𑀽𑀭𑀺𑀬𑁄 𑀘 𑀘𑀦𑁆𑀤𑀺𑀫𑀲𑀽𑀭𑀺𑀬𑀸, 𑀲𑀫𑀡𑁄 𑀘 𑀩𑁆𑀭𑀸𑀳𑁆𑀫𑀡𑁄 𑀘 𑀲𑀫𑀡𑀩𑁆𑀭𑀸𑀳𑁆𑀫𑀡𑀸, 𑀲𑀸𑀭𑀺𑀧𑀼𑀢𑁆𑀢𑁄 𑀘 𑀫𑁄𑀕𑁆𑀕𑀮𑁆𑀮𑀸𑀦𑁄 𑀘 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀸, 𑀩𑁆𑀭𑀸𑀳𑁆𑀫𑀡𑁄 𑀘 𑀕𑀳𑀧𑀢𑀺𑀓𑁄 𑀘 𑀩𑁆𑀭𑀸𑀳𑁆𑀫𑀡𑀕𑀳𑀧𑀢𑀺𑀓𑀸, 𑀬𑀫𑁄 𑀘 𑀯𑀭𑀼𑀡𑁄 𑀘 𑀬𑀫𑀯𑀭𑀼𑀡𑀸, 𑀓𑀼𑀯𑁂𑀭𑁄 𑀘 𑀯𑀸𑀲𑀯𑁄 𑀘 𑀓𑀼𑀯𑁂𑀭𑀯𑀸𑀲𑀯𑀸.

𑀤𑁆𑀯𑀦𑁆𑀤𑀇𑀘𑁆𑀘𑀦𑁂𑀦 𑀓𑁆𑀯𑀢𑁆𑀣𑁄? 𑀤𑁆𑀯𑀦𑁆𑀤𑀝𑁆𑀞𑀸 𑀯𑀸.

𑁩𑁩𑁦. , 𑁩𑁪𑁦. 𑀫𑀳𑀢𑀁 𑀫𑀳𑀸 𑀢𑀼𑀮𑁆𑀬𑀸𑀥𑀺𑀓𑀭𑀡𑁂 𑀧𑀤𑁂.

𑀢𑁂𑀲𑀁 𑀫𑀳𑀦𑁆𑀢𑀲𑀤𑁆𑀤𑀸𑀦𑀁 𑀫𑀳𑀸𑀆𑀤𑁂𑀲𑁄 𑀳𑁄𑀢𑀺 𑀢𑀼𑀮𑁆𑀬𑀸𑀥𑀺𑀓𑀭𑀡𑁂 𑀧𑀤𑁂.

𑀫𑀳𑀦𑁆𑀢𑁄 𑀘 𑀲𑁄 𑀧𑀼𑀭𑀺𑀲𑁄 𑀘𑀸𑀢𑀺 𑀫𑀳𑀸𑀧𑀼𑀭𑀺𑀲𑁄, 𑀫𑀳𑀦𑁆𑀢𑀻 𑀘 𑀲𑀸 𑀤𑁂𑀯𑀻 𑀘𑀸𑀢𑀺 𑀫𑀳𑀸𑀤𑁂𑀯𑀻, 𑀫𑀳𑀦𑁆𑀢𑀜𑁆𑀘 𑀢𑀁 𑀩𑀮𑀜𑁆𑀘𑀸𑀢𑀺 𑀫𑀳𑀸𑀩𑀮𑀁, 𑀫𑀳𑀦𑁆𑀢𑁄 𑀘 𑀲𑁄 𑀦𑀸𑀕𑁄 𑀘𑀸𑀢𑀺 𑀫𑀳𑀸𑀦𑀸𑀕𑁄, 𑀫𑀳𑀦𑁆𑀢𑁄 𑀘 𑀲𑁄 𑀬𑀲𑁄 𑀘𑀸𑀢𑀺 𑀫𑀳𑀸𑀬𑀲𑁄, 𑀫𑀳𑀦𑁆𑀢𑀜𑁆𑀘 𑀢𑀁 𑀧𑀤𑀼𑀫𑀯𑀦𑀜𑁆𑀘𑀸𑀢𑀺 𑀫𑀳𑀸𑀧𑀤𑀼𑀫𑀯𑀦𑀁, 𑀫𑀳𑀦𑁆𑀢𑀻 𑀘 𑀲𑀸 𑀦𑀤𑀻 𑀘𑀸𑀢𑀺 𑀫𑀳𑀸𑀦𑀤𑀻, 𑀫𑀳𑀦𑁆𑀢𑁄 𑀘 𑀲𑁄 𑀫𑀡𑀺 𑀘𑀸𑀢𑀺 𑀫𑀳𑀸𑀫𑀡𑀺, 𑀫𑀳𑀦𑁆𑀢𑁄 𑀘 𑀲𑁄 𑀕𑀳𑀧𑀢𑀺𑀓𑁄 𑀘𑀸𑀢𑀺 𑀫𑀳𑀸𑀕𑀳𑀧𑀢𑀺𑀓𑁄, 𑀫𑀳𑀦𑁆𑀢𑀜𑁆𑀘 𑀢𑀁 𑀥𑀦𑀜𑁆𑀘𑀸𑀢𑀺 𑀫𑀳𑀸𑀥𑀦𑀁, 𑀫𑀳𑀦𑁆𑀢𑁄 𑀘 𑀲𑁄 𑀧𑀼𑀜𑁆𑀜𑁄 𑀘𑀸𑀢𑀺 𑀫𑀳𑀸𑀧𑀼𑀜𑁆𑀜𑁄.

𑀩𑀳𑀼𑀯𑀘𑀦𑀕𑁆𑀕𑀳𑀡𑁂𑀦 𑀓𑁆𑀯𑀘𑀺 𑀫𑀳𑀦𑁆𑀢 𑀲𑀤𑁆𑀤𑀲𑁆𑀲 𑀫𑀳𑀸𑀤𑁂𑀲𑁄 𑀳𑁄𑀢𑀺. 𑀫𑀳𑀦𑁆𑀢𑀜𑁆𑀘 𑀢𑀁 𑀨𑀮𑀜𑁆𑀘𑀸𑀢𑀺 𑀫𑀳𑀧𑁆𑀨𑀮𑀁, 𑀫𑀳𑀩𑁆𑀩𑀮𑀁, 𑀏𑀯𑀁 𑀫𑀳𑀤𑁆𑀥𑀦𑀁, 𑀫𑀳𑀩𑁆𑀪𑀬𑀁.

𑁩𑁩𑁧. , 𑁩𑁫𑁩. 𑀇𑀢𑁆𑀣𑀺𑀬𑀁 𑀪𑀸𑀲𑀺𑀢𑀧𑀼𑀫𑀺𑀢𑁆𑀣𑀻 𑀧𑀼𑀫𑀸𑀯 𑀘𑁂.

𑀇𑀢𑁆𑀣𑀺𑀬𑀁 𑀢𑀼𑀮𑁆𑀬𑀸𑀥𑀺𑀓𑀭𑀡𑁂 𑀧𑀤𑁂 𑀘𑁂 𑀪𑀸𑀲𑀺𑀢𑀧𑀼𑀫𑀺𑀢𑁆𑀣𑀻 𑀧𑀼𑀫𑀸𑀯 𑀤𑀝𑁆𑀞𑀩𑁆𑀩𑀸.

𑀤𑀻𑀖𑀸 𑀚𑀗𑁆𑀖𑀸 𑀬𑀲𑁆𑀲 𑀲𑁄𑀬𑀁 𑀤𑀻𑀖𑀚𑀗𑁆𑀖𑁄, 𑀓𑀮𑁆𑀬𑀸𑀡𑀪𑀭𑀺𑀬𑁄, 𑀧𑀳𑀽𑀢𑀧𑀜𑁆𑀜𑁄.

𑀪𑀸𑀲𑀺𑀢𑀧𑀼𑀧𑁂𑀢𑀺 𑀓𑀺𑀫𑀢𑁆𑀣𑀁? 𑀩𑁆𑀭𑀸𑀳𑁆𑀫𑀡𑀩𑀦𑁆𑀥𑀼 𑀘 𑀲𑀸 𑀪𑀭𑀺𑀬𑀸 𑀘𑀸𑀢𑀺𑀩𑁆𑀭𑀸𑀳𑁆𑀫𑀡𑀩𑀦𑁆𑀥𑀼𑀪𑀭𑀺𑀬𑀸.

𑁩𑁩𑁨. , 𑁩𑁪𑁩. 𑀓𑀫𑁆𑀫𑀥𑀸𑀭𑀬𑀲𑀜𑁆𑀜𑁂 𑀘.

𑀓𑀫𑁆𑀫𑀥𑀸𑀭𑀬𑀲𑀜𑁆𑀜𑁂 𑀘 𑀲𑀫𑀸𑀲𑁂 𑀇𑀢𑁆𑀣𑀺𑀬𑀁 𑀢𑀼𑀮𑁆𑀬𑀸𑀥𑀺𑀓𑀭𑀡𑁂 𑀧𑀤𑁂 𑀧𑀼𑀩𑁆𑀩𑁂 𑀪𑀸𑀲𑀺𑀢𑀧𑀼𑀫𑀺𑀢𑁆𑀣𑀻 𑀘𑁂, 𑀧𑀼𑀫𑀸𑀯 𑀤𑀝𑁆𑀞𑀩𑁆𑀩𑀸. 𑀩𑁆𑀭𑀸𑀳𑁆𑀫𑀡𑀤𑀸𑀭𑀺𑀓𑀸, 𑀔𑀢𑁆𑀢𑀺𑀬𑀓𑀜𑁆𑀜𑀸, 𑀔𑀢𑁆𑀢𑀺𑀬𑀓𑀼𑀫𑀸𑀭𑀺𑀓𑀸.

𑀪𑀸𑀲𑀺𑀢𑀧𑀼𑀫𑁂𑀢𑀺 𑀓𑀺𑀫𑀢𑁆𑀣𑀁? 𑀔𑀢𑁆𑀢𑀺𑀬𑀩𑀦𑁆𑀥𑀼𑀤𑀸𑀭𑀺𑀓𑀸, 𑀩𑁆𑀭𑀸𑀳𑁆𑀫𑀡𑀩𑀦𑁆𑀥𑀼𑀤𑀸𑀭𑀺𑀓𑀸.

𑁩𑁩𑁩. , 𑁩𑁪𑁪. 𑀅𑀢𑁆𑀢𑀁 𑀦𑀲𑁆𑀲 𑀢𑀧𑁆𑀧𑀼𑀭𑀺𑀲𑁂.

𑀦𑀲𑁆𑀲 𑀧𑀤𑀲𑁆𑀲 𑀢𑀧𑁆𑀧𑀼𑀭𑀺𑀲𑁂 𑀉𑀢𑁆𑀢𑀭𑀧𑀤𑁂 𑀅𑀢𑁆𑀢𑀁 𑀳𑁄𑀢𑀺.

𑀦𑀩𑁆𑀭𑀸𑀳𑁆𑀫𑀡𑁄 𑀅𑀩𑁆𑀭𑀸𑀳𑁆𑀫𑀡𑁄, 𑀅𑀯𑀲𑀮𑁄, 𑀅𑀪𑀺𑀓𑁆𑀔𑀼, 𑀅𑀧𑀜𑁆𑀘𑀯𑀲𑁆𑀲𑀁, 𑀅𑀧𑀜𑁆𑀘𑀕𑀯𑀁.

𑁩𑁩𑁪. , 𑁩𑁪𑁫. 𑀲𑀭𑁂 𑀅𑀦.

𑀦𑀲𑁆𑀲 𑀧𑀤𑀲𑁆𑀲 𑀢𑀧𑁆𑀧𑀼𑀭𑀺𑀲𑁂 𑀅𑀦 𑀆𑀤𑁂𑀲𑁄 𑀳𑁄𑀢𑀺 𑀲𑀭𑁂 𑀧𑀭𑁂.

𑀦 𑀅𑀲𑁆𑀲𑁄 𑀅𑀦𑀲𑁆𑀲𑁄, 𑀅𑀦𑀺𑀲𑁆𑀲𑀭𑁄, 𑀅𑀦𑀭𑀺𑀬𑁄.

𑁩𑁩𑁫. , 𑁩𑁪𑁬. 𑀓𑀤 𑀓𑀼𑀲𑁆𑀲.

𑀓𑀼𑀇𑀘𑁆𑀘𑁂𑀢𑀲𑁆𑀲 𑀓𑀤 𑀳𑁄𑀢𑀺 𑀲𑀭𑁂 𑀧𑀭𑁂.

𑀓𑀼𑀘𑁆𑀙𑀺𑀢𑀁 𑀅𑀦𑁆𑀦𑀁 𑀓𑀤𑀦𑁆𑀦𑀁, 𑀓𑀼𑀘𑁆𑀙𑀺𑀢𑀁 𑀅𑀲𑀦𑀁 𑀓𑀤𑀲𑁆𑀲𑀦𑀁.

𑀲𑀭𑁂𑀢𑀺 𑀓𑀺𑀫𑀢𑁆𑀣𑀁? 𑀓𑀼𑀘𑁆𑀙𑀺𑀢𑀸 𑀤𑀸𑀭𑀸 𑀬𑁂𑀲𑀁 (𑀅𑀧𑀼𑀜𑁆𑀜𑀓𑀸𑀭𑀸𑀦𑀁) 𑀢𑁂 𑀳𑁄𑀦𑁆𑀢𑀻𑀢𑀺 𑀓𑀼𑀤𑀸𑀭𑀸, 𑀓𑀼𑀚𑀦𑀸. 𑀏𑀯𑀁 𑀓𑀼𑀧𑀼𑀢𑁆𑀢𑀸, 𑀓𑀼𑀕𑁂𑀳𑀸, 𑀓𑀼𑀯𑀢𑁆𑀣𑀸, 𑀓𑀼𑀤𑀸𑀲𑀸.

𑁩𑁩𑁬. , 𑁩𑁪𑁭. 𑀓𑀸’𑀧𑁆𑀧𑀢𑁆𑀣𑁂𑀲𑀼 𑀘.

𑀓𑀼𑀇𑀘𑁆𑀘𑁂𑀢𑀲𑁆𑀲 𑀓𑀸 𑀳𑁄𑀢𑀺 𑀅𑀧𑁆𑀧𑀢𑁆𑀣𑁂𑀲𑀼 𑀘.

𑀓𑀸𑀮𑀯𑀡𑀁, 𑀓𑀸𑀧𑀼𑀧𑁆𑀨𑀁.

𑀩𑀳𑀼𑀯𑀘𑀦𑀕𑁆𑀕𑀳𑀡𑀁 𑀓𑀺𑀫𑀢𑁆𑀣𑀁? 𑀓𑀼𑀇𑀘𑁆𑀘𑁂𑀢𑀲𑁆𑀲 𑀅𑀦𑀧𑁆𑀧𑀢𑀢𑁆𑀣𑁂𑀲𑀼𑀧𑀺 𑀓𑁆𑀯𑀘𑀺 𑀓𑀸 𑀳𑁄𑀢𑀺, 𑀓𑀸𑀧𑀼𑀭𑀺𑀲𑀸.

𑁩𑁩𑁭. , 𑁩𑁫𑁦. 𑀓𑁆𑀯𑀘𑀺 𑀲𑀫𑀸𑀲𑀦𑁆𑀢𑀕𑀢𑀸𑀦𑀫𑀓𑀸𑀭𑀦𑁆𑀢𑁄.

𑀲𑀫𑀸𑀲𑀦𑁆𑀢𑀕𑀢𑀸𑀦𑀁 𑀦𑀸𑀫𑀸𑀦𑀫𑀦𑁆𑀢𑁄 𑀲𑀭𑁄 𑀓𑁆𑀯𑀘𑀺 𑀅𑀓𑀸𑀭𑁄 𑀳𑁄𑀢𑀺.

𑀤𑁂𑀯𑀸𑀦𑀁 𑀭𑀸𑀚𑀸 𑀤𑁂𑀯𑀭𑀸𑀚𑁄, 𑀤𑁂𑀯𑀭𑀸𑀚𑀸, 𑀤𑁂𑀯𑀸𑀦𑀁 𑀲𑀔𑀸 𑀤𑁂𑀯𑀲𑀔𑁄, 𑀤𑁂𑀯𑀲𑀔𑀸, 𑀧𑀜𑁆𑀘 𑀅𑀳𑀸𑀦𑀺 𑀧𑀜𑁆𑀘𑀸𑀳𑀁, 𑀲𑀢𑁆𑀢𑀸𑀳𑀁, 𑀧𑀜𑁆𑀘𑀕𑀯𑀁, 𑀙𑀢𑁆𑀢𑀼𑀧𑀸𑀳𑀦𑀁, 𑀉𑀧𑀲𑀭𑀤𑀁, 𑀯𑀺𑀲𑀸𑀮𑀓𑁆𑀔𑁄, 𑀯𑀺𑀫𑀼𑀔𑁄.

𑀓𑀸𑀭𑀕𑁆𑀕𑀳𑀡𑀁 𑀓𑀺𑀫𑀢𑁆𑀣𑀁? 𑀆𑀓𑀸𑀭𑀦𑁆𑀢 𑀇𑀓𑀸𑀭𑀦𑁆𑀢𑀸 𑀘 𑀳𑁄𑀦𑁆𑀢𑀺, 𑀧𑀘𑁆𑀘𑀓𑁆𑀔𑀸 𑀥𑀫𑁆𑀫𑀸 𑀬𑀲𑁆𑀲 𑀲𑁄𑀬𑀦𑁆𑀢𑀺 𑀧𑀘𑁆𑀘𑀓𑁆𑀔𑀥𑀫𑁆𑀫𑀸, 𑀲𑀼𑀭𑀪𑀺𑀦𑁄 𑀕𑀦𑁆𑀥𑁄 𑀲𑀼𑀭𑀪𑀺𑀕𑀦𑁆𑀥𑀺, 𑀲𑀼𑀦𑁆𑀤𑀭𑁄 𑀕𑀦𑁆𑀥𑁄 𑀲𑀼𑀕𑀦𑁆𑀥𑀺, 𑀧𑀽𑀢𑀺𑀦𑁄 𑀕𑀦𑁆𑀥𑁄 𑀧𑀽𑀢𑀺𑀕𑀦𑁆𑀥𑀺, 𑀓𑀼𑀘𑁆𑀙𑀺𑀢𑁄 𑀕𑀦𑁆𑀥𑁄 𑀓𑀼𑀕𑀦𑁆𑀥𑀺, 𑀤𑀼𑀝𑁆𑀞𑀼 𑀕𑀦𑁆𑀥𑁄 𑀬𑀲𑁆𑀲 𑀲𑁄𑀬𑀦𑁆𑀢𑀺 𑀤𑀼𑀕𑀦𑁆𑀥𑀺, 𑀧𑀽𑀢𑀺 𑀏𑀯 𑀕𑀦𑁆𑀥𑁄 𑀧𑀽𑀢𑀺𑀕𑀦𑁆𑀥𑀺.

𑀦𑀤𑀻𑀅𑀦𑁆𑀢𑀸 𑀘 𑀓𑀢𑁆𑀢𑀼𑀅𑀦𑁆𑀢𑀸 𑀘 𑀓𑀧𑀘𑁆𑀘𑀬𑁄 𑀳𑁄𑀢𑀺 𑀲𑀫𑀸𑀲𑀦𑁆𑀢𑁂.

𑀩𑀳𑀽 𑀦𑀤𑀺𑀬𑁄 𑀬𑀲𑁆𑀫𑀺𑀁 𑀲𑁄𑀬𑀁 𑀩𑀳𑀼𑀦𑀤𑀺𑀓𑁄, 𑀚𑀦𑀧𑀤𑁄. 𑀩𑀳𑀯𑁄 𑀓𑀢𑁆𑀢𑀸𑀭𑁄 𑀬𑀲𑁆𑀲 𑀲𑁄𑀬𑀁 𑀩𑀳𑀼𑀓𑀢𑁆𑀢𑀼𑀓𑁄, 𑀧𑀼𑀭𑀺𑀲𑁄.

𑁩𑁩𑁮. , 𑁩𑁫𑁬. 𑀦𑀤𑀺𑀫𑁆𑀳𑀸 𑀘.

𑀦𑀤𑀺𑀫𑁆𑀳𑀸 𑀘 𑀓𑀧𑀘𑁆𑀘𑀬𑁄 𑀳𑁄𑀢𑀺 𑀲𑀫𑀸𑀲𑀦𑁆𑀢𑁂.

𑀩𑀳𑀽 𑀦𑀤𑀺𑀬𑁄 𑀬𑀲𑁆𑀫𑀺𑀁 𑀲𑁄𑀬𑀦𑁆𑀢𑀺 𑀩𑀳𑀼𑀦𑀤𑀺𑀓𑁄. 𑀩𑀳𑀽 𑀓𑀦𑁆𑀢𑀺𑀬𑁄 𑀬𑀲𑁆𑀲 𑀲𑁄𑀬𑀦𑁆𑀢𑀺 𑀩𑀳𑀼𑀓𑀦𑁆𑀢𑀺𑀓𑁄. 𑀩𑀳𑀼𑀦𑀸𑀭𑀺𑀓𑁄.

𑁩𑁩𑁯. , 𑁩𑁫𑁮. 𑀚𑀸𑀬𑀸𑀬 𑀢𑀼𑀤𑀁 𑀚𑀸𑀦𑀺 𑀧𑀢𑀺𑀫𑁆𑀳𑀺.

𑀚𑀸𑀬𑀸𑀇𑀘𑁆𑀘𑁂𑀢𑀸𑀬 𑀢𑀼𑀤𑀁 𑀚𑀸𑀦𑀺𑀇𑀘𑁆𑀘𑁂𑀢𑁂 𑀆𑀤𑁂𑀲𑀸 𑀳𑁄𑀦𑁆𑀢𑀺 𑀧𑀢𑀺𑀫𑁆𑀳𑀺 𑀧𑀭𑁂.

𑀢𑀼𑀤𑀁𑀧𑀢𑀻, 𑀚𑀸𑀦𑀺𑀧𑀢𑀻.

𑁩𑁪𑁦. , 𑁩𑁫𑁫. 𑀥𑀦𑀼𑀫𑁆𑀳𑀸 𑀘.

𑀥𑀦𑀼𑀫𑁆𑀳𑀸 𑀘 𑀆𑀧𑀘𑁆𑀘𑀬𑁄 𑀳𑁄𑀢𑀺 𑀲𑀫𑀸𑀲𑀦𑁆𑀢𑁂.

𑀕𑀸𑀡𑁆𑀟𑀻𑀯𑁄 𑀥𑀦𑀼 𑀬𑀲𑁆𑀲 𑀲𑁄𑀬𑀁 𑀕𑀸𑀡𑁆𑀟𑀻𑀯𑀥𑀦𑁆𑀯𑀸.

𑁩𑁪𑁧. , 𑁩𑁩𑁬. 𑀅𑀁 𑀯𑀺𑀪𑀢𑁆𑀢𑀻𑀦𑀫𑀓𑀸𑀭𑀦𑁆𑀢𑀸 𑀅𑀩𑁆𑀬𑀬𑀻𑀪𑀸𑀯𑀸.

𑀢𑀲𑁆𑀫𑀸 𑀅𑀓𑀸𑀭𑀦𑁆𑀢𑀸 𑀅𑀩𑁆𑀬𑀬𑀻𑀪𑀸𑀯𑀲𑀫𑀸𑀲𑀸 𑀧𑀭𑀸𑀲𑀁 𑀯𑀺𑀪𑀢𑁆𑀢𑀻𑀦𑀁 𑀓𑁆𑀯𑀘𑀺 𑀅𑀁 𑀳𑁄𑀢𑀺.

𑀅𑀥𑀺𑀘𑀺𑀢𑁆𑀢𑀁, 𑀬𑀣𑀸𑀯𑀼𑀟𑁆𑀠𑀁, 𑀉𑀧𑀓𑀼𑀫𑁆𑀪𑀁, 𑀬𑀸𑀯𑀚𑀻𑀯𑀁, 𑀢𑀺𑀭𑁄𑀧𑀩𑁆𑀩𑀢𑀁, 𑀢𑀺𑀭𑁄𑀧𑀸𑀓𑀸𑀭𑀁, 𑀢𑀺𑀭𑁄𑀓𑀼𑀝𑁆𑀝𑀁, 𑀅𑀦𑁆𑀢𑁄𑀧𑀸𑀲𑀸𑀤𑀁.

𑀓𑁆𑀯𑀘𑀻𑀢𑀺 𑀓𑀺𑀫𑀢𑁆𑀣𑀁? 𑀅𑀥𑀺𑀘𑀺𑀢𑁆𑀢𑀲𑁆𑀲 𑀪𑀺𑀓𑁆𑀔𑀼𑀦𑁄.

𑁩𑁪𑁨. , 𑁩𑁩𑁭. 𑀲𑀭𑁄 𑀭𑀲𑁆𑀲𑁄 𑀦𑀧𑀼𑀁𑀲𑀓𑁂.

𑀦𑀧𑀼𑀁𑀲𑀓𑁂 𑀯𑀢𑁆𑀢𑀫𑀸𑀦𑀲𑁆𑀲 𑀅𑀩𑁆𑀬𑀬𑀻𑀪𑀸𑀯𑀲𑀫𑀸𑀲𑀲𑁆𑀲 𑀮𑀺𑀗𑁆𑀕𑀲𑁆𑀲 𑀲𑀭𑁄 𑀭𑀲𑁆𑀲𑁄 𑀳𑁄𑀢𑀺.

𑀓𑀼𑀫𑀸𑀭𑀻𑀲𑀼 𑀅𑀥𑀺𑀓𑀺𑀘𑁆𑀘 𑀧𑀯𑀢𑁆𑀢𑀢𑀺 𑀓𑀣𑀸 𑀇𑀢𑀺 𑀅𑀥𑀺𑀓𑀼𑀫𑀸𑀭𑀺. 𑀉𑀧𑀯𑀥𑀼, 𑀉𑀧𑀕𑀗𑁆𑀕𑀁, 𑀉𑀧𑀫𑀡𑀺𑀓𑀁.

𑁩𑁪𑁩. , 𑁩𑁩𑁮. 𑀅𑀜𑁆𑀜𑀲𑁆𑀫𑀸 𑀮𑁄𑀧𑁄 𑀘.

𑀅𑀜𑁆𑀜𑀲𑁆𑀫𑀸 𑀅𑀩𑁆𑀬𑀬𑀻𑀪𑀸𑀯𑀲𑀫𑀸𑀲𑀸 𑀅𑀦𑀓𑀸𑀭𑀦𑁆𑀢𑀸 𑀧𑀭𑀸𑀲𑀁 𑀯𑀺𑀪𑀢𑁆𑀢𑀻𑀦𑀁 𑀮𑁄𑀧𑁄 𑀘 𑀳𑁄𑀢𑀺.

𑀅𑀥𑀺𑀢𑁆𑀣𑀺, 𑀅𑀥𑀺𑀓𑀼𑀫𑀸𑀭𑀺, 𑀉𑀧𑀯𑀥𑀼.

𑀇𑀢𑀺 𑀦𑀸𑀫𑀓𑀧𑁆𑀧𑁂 𑀲𑀫𑀸𑀲𑀓𑀧𑁆𑀧𑁄 𑀲𑀢𑁆𑀢𑀫𑁄 𑀓𑀡𑁆𑀟𑁄.

𑀲𑀫𑀸𑀲𑀓𑀧𑁆𑀧𑁄 𑀦𑀺𑀝𑁆𑀞𑀺𑀢𑁄.