𑀳𑀢𑁆𑀣𑀯𑀦𑀕𑀮𑁆𑀮𑀯𑀺𑀳𑀸𑀭 |𑀑𑁦.𑁦𑁦𑁦𑁧| 𑀯𑀁𑀲𑁄

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑁧. 𑀲𑁆𑀦𑁂𑀳𑀼𑀢𑁆𑀢𑀭𑀸𑀬 𑀳𑀤𑀬𑀸 𑀫𑀮𑀫𑀮𑁆𑀮𑀺𑀓𑀸𑀬,

𑀧𑀚𑁆𑀚𑀸𑀮𑀺𑀢𑁄 𑀫𑀢𑀺𑀤𑀲𑀸𑀬 𑀚𑀺𑀦𑀧𑁆𑀧𑀤𑀻𑀧𑁄;

𑀫𑁄𑀳𑀡𑁆𑀥𑀓𑀸𑀭𑀫𑀔𑀺𑀮𑀁 𑀫𑀫 𑀦𑀻𑀳𑀭𑀦𑁆𑀢𑁄,

𑀦𑀺𑀘𑁆𑀘𑀁 𑀯𑀺𑀪𑀸𑀯𑀬𑀢𑀼 𑀘𑀸𑀭𑀼 𑀧𑀤𑀢𑁆𑀣𑀭𑀸𑀲𑀺𑀁.

𑁨. 𑀮𑀗𑁆𑀓𑀸𑀪𑀺𑀲𑀺𑀢𑁆𑀢𑀯𑀲𑀼𑀥𑀸𑀥𑀺𑀧𑀢𑀻𑀲𑀼 𑀭𑀸𑀚𑀸,

𑀬𑁄 𑀩𑁄𑀥𑀺𑀲𑀢𑁆𑀢𑀕𑀼𑀡𑀯𑀸 𑀲𑀺𑀭𑀺𑀲𑀗𑁆𑀖𑀩𑁄𑀥𑀺;

𑀢𑀲𑁆𑀲𑀸𑀢𑀺𑀘𑀸𑀭𑀼 𑀘𑀭𑀺𑀬𑀸 𑀭𑀘𑀦𑀸𑀫𑀼𑀔𑁂𑀦,

𑀯𑀓𑁆𑀓𑀸𑀫𑀺 𑀳𑀢𑁆𑀣𑀯𑀦𑀕𑀮𑁆𑀮𑀯𑀺𑀳𑀸𑀭 𑀯𑀁𑀲𑀁.

𑁩. 𑀩𑁆𑀭𑀳𑁆𑀫𑀦𑁆𑀯𑀬𑁂𑀦𑀦𑀼𑀕𑀢𑀢𑁆𑀣𑀫𑀦𑁄𑀫𑀤𑀲𑁆𑀲𑀻,

𑀔𑁆𑀬𑀸𑀢𑁂𑀦 𑀲𑀩𑁆𑀩𑀬𑀢𑀺𑀭𑀸𑀚𑀥𑀼𑀭𑀦𑁆𑀥𑀭𑁂𑀦;

𑀯𑁆𑀬𑀸𑀧𑀸𑀭𑀺𑀢𑁄𑀳𑀫𑀺𑀢𑀺𑀪𑀸𑀦𑀼𑀕𑀢𑀁 𑀓𑀣𑀜𑁆𑀘,

𑀦𑀺𑀲𑁆𑀲𑀸𑀬 𑀧𑀼𑀩𑁆𑀩𑀮𑀺𑀔𑀺𑀢𑀁𑀯𑀺𑀥 𑀯𑀸𑀬𑀫𑀸𑀫𑀺.

𑁪. 𑀅𑀭𑁆𑀡𑁆𑀣 𑀲𑀼𑀕𑀢𑀸𑀕𑀫𑀲𑀼𑀥𑀸𑀧𑀕𑀸𑀦𑀺𑀤𑁆𑀥𑁄𑀢𑀓𑀼𑀤𑀺𑀝𑁆𑀞𑀺𑀯𑀺𑀲𑀓𑀮𑀗𑁆𑀓𑀸𑀬 𑀮𑀁𑀓𑀸𑀬 𑀪𑀕𑀯𑀢𑁄 𑀅𑀗𑁆𑀕𑀻𑀭𑀲𑀲𑁆𑀲𑀫𑀳𑀸𑀦𑀸𑀕𑀯𑀦𑀼𑀬𑁆𑀬𑀸𑀦𑁂 𑀲𑀫𑀺𑀢𑀺𑀲𑀫𑀸𑀕𑀢𑀬𑀓𑁆𑀔 𑀭𑀓𑁆𑀔𑀲𑀮𑁄𑀓𑀯𑀺𑀚𑀬𑀸𑀧𑀤𑀸𑀦𑀲𑁆𑀲 𑀲𑀺𑀤𑁆𑀥𑀓𑁆𑀔𑁂𑀦𑁆𑀢𑀪𑀽𑀢𑁄 𑀲𑀻𑀳𑀴𑀫𑀳𑀻𑀫𑀡𑁆𑀟𑀮𑀫𑀡𑁆𑀟𑀦𑀸𑀬 𑀫𑀸𑀦𑁄 𑀯𑀺𑀯𑀺𑀥𑀭𑀢𑀦𑀸𑀓𑀭𑁄𑀧𑀮𑀓𑁆𑀔𑀫𑀸𑀦𑀫𑀳𑀕𑁆𑀖𑀫𑀡𑀺 𑀪𑁂𑀤𑁄 𑀫𑀡𑀺 𑀪𑁂𑀤𑁄 𑀦𑀸𑀫 𑀚𑀦𑀧𑀤𑁄.

𑁫. 𑀮𑀤𑁆𑀥𑀸𑀦 𑀲𑀢𑁆𑀣𑀼 𑀯𑀭𑀡𑀗𑁆𑀓𑀫𑀦𑀜𑁆𑀜𑀮𑀩𑁆𑀪,

𑀫𑀸𑀦𑀡𑁆𑀤𑀺𑀦𑀸 𑀲𑀼𑀫𑀦𑀓𑀽𑀝𑀲𑀺𑀮𑀼𑀘𑁆𑀘𑀬𑁂𑀦;

𑀉𑀲𑁆𑀲𑀸𑀧𑀺𑀢𑀸 𑀯𑀺𑀚𑀬𑀓𑁂𑀢𑀼𑀫𑀢𑀮𑁆𑀮𑀺𑀓𑁂𑀯,

𑀲𑀼𑀤𑁆𑀥𑁄𑀭𑀼𑀯𑀸𑀮𑀼𑀓𑀦𑀤𑀻 𑀬𑀫𑀮𑀗𑁆𑀓𑀭𑁄𑀢𑀺.

𑁬. 𑀮𑀗𑁆𑀓𑀸𑀬 𑀬𑀓𑁆𑀔𑀕𑀡𑀦𑀻𑀳𑀭𑀡𑁂 𑀚𑀺𑀦𑀲𑁆𑀲,

𑀘𑀫𑁆𑀫𑀸𑀲𑀦𑀼𑀕𑁆𑀕𑀦𑀳𑀼𑀦𑀸𑀲𑀦𑀨𑀲𑁆𑀲𑀤𑀸𑀳𑀸;

𑀲𑀁𑀲𑀸𑀭𑀭𑀓𑁆𑀔𑀲𑀯𑀧𑀼𑀩𑁆𑀪𑀯𑀩𑀼𑀩𑁆𑀩𑀼𑀮𑀁𑀘,

𑀬𑀲𑁆𑀫𑀺𑀁 𑀯𑀺𑀳𑀸𑀢𑀺 𑀫𑀳𑀺𑀬𑀗𑁆𑀕𑀡 𑀣𑀽𑀧𑀭𑀸𑀚𑀸.

𑁭. |𑀑𑁦.𑁦𑁦𑁦𑁨|

𑀲𑀤𑀸𑀫𑀳𑁄𑀖𑀸𑀬 𑀫𑀳𑀸𑀧𑀕𑀸𑀬,

𑀧𑀸𑀦𑀻𑀬𑀧𑀸𑀦𑀸𑀬 𑀲𑀫𑁄𑀲𑀝𑀸𑀦𑀁;

𑀲𑀫𑀼𑀘𑁆𑀘𑀬𑁄 𑀲𑀸𑀭𑀤𑀯𑀸𑀭𑀺𑀤𑀸𑀦𑀁,

𑀦𑀽𑀦𑀁 𑀕𑀢𑁄 𑀣𑀸𑀯𑀭𑀣𑀽𑀧𑀭𑀽𑀧𑀁.

𑁮. 𑀢𑀲𑁆𑀲𑀸𑀧𑀕𑀸𑀬 𑀯𑀺𑀫𑀮𑀫𑁆𑀩𑀼𑀦𑀺 𑀤𑀺𑀲𑁆𑀲𑀫𑀸𑀦,

𑀫𑀸𑀮𑁄𑀮𑀯𑀺𑀘𑀺𑀢𑀭𑀮𑀁 𑀧𑀝𑀺𑀩𑀺𑀫𑁆𑀩𑀭𑀽𑀧𑀁;

𑀪𑁄𑀕𑁂𑀳𑀺 𑀯𑁂𑀞𑀺𑀬 𑀦𑀺𑀚𑀁 𑀪𑀯𑀦𑀁 𑀨𑀡𑀻𑀳𑀺,

𑀧𑀽𑀚𑀢𑁆𑀣𑀺𑀓𑁂𑀳𑀺 𑀯𑀺𑀬 𑀭𑀸𑀚𑀢𑀺 𑀦𑀻𑀬𑀫𑀸𑀦𑀁.

𑁯. 𑀢𑀲𑁆𑀲 𑀫𑀳𑀺𑀬𑀗𑁆𑀕𑀡 𑀫𑀳𑀸 𑀯𑀺𑀳𑀸𑀭𑀲𑁆𑀲 𑀧𑀭𑀺𑀬𑀦𑁆𑀢𑀕𑀸𑀫𑀓𑁂 𑀲𑁂𑀮𑀸𑀪𑀬𑁄 𑀦𑀸𑀫 𑀔𑀢𑁆𑀢𑀺𑀬𑁄 𑀧𑀝𑀺𑀯𑀲𑀦𑁆𑀢𑁄 𑀧𑀼𑀢𑁆𑀢𑀁 𑀧𑀝𑀺𑀮𑀪𑀺𑀢𑁆𑀯𑀸 𑀅𑀗𑁆𑀕𑀮𑀓𑁆𑀔𑀡𑀧𑀸𑀞𑀓𑀸𑀦𑀁 𑀤𑀲𑁆𑀲𑁂𑀲𑀺 𑀢𑁂 𑀢𑀲𑁆𑀲 𑀓𑀼𑀫𑀸𑀭𑀲𑁆𑀲 𑀅𑀗𑁆𑀕𑀮𑀓𑁆𑀔𑀡𑀸𑀦𑀺 𑀑𑀮𑁄𑀓𑁂𑀢𑁆𑀯𑀸 ‘‘𑀅𑀬𑀁 𑀓𑀼𑀫𑀸𑀭𑁄 𑀔𑀫𑀓𑀲𑀢𑁆𑀢𑁄 𑀦𑀳𑁄𑀢𑀺. 𑀥𑀜𑁆𑀜𑀧𑀼𑀜𑁆𑀜𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑁄, 𑀲𑀓𑀮𑀫𑁆𑀧𑀺 𑀲𑀻𑀳𑀴𑀤𑀻𑀧𑀁 𑀏𑀓𑀘𑁆𑀙𑀢𑁆𑀢𑀁 𑀓𑀭𑀺𑀢𑁆𑀯𑀸 𑀫𑀳𑀦𑁆𑀢𑀫𑀳𑀦𑁆𑀢𑀸𑀦𑀺 𑀅𑀘𑁆𑀙𑀭𑀺𑀬𑀩𑁆𑀪𑀼𑀢𑀸𑀦𑀺 𑀫𑀳𑀸𑀯𑀻𑀭𑀘𑀭𑀺𑀢𑀸𑀦𑀺 𑀤𑀲𑁆𑀲𑁂𑀲𑁆𑀲𑀢𑀻’’𑀢𑀺 𑀯𑁆𑀬𑀸𑀓𑀭𑀺𑀁𑀲𑀼.

𑁧𑁦. 𑀢𑀢𑁄 𑀲𑁂𑀮𑀸𑀪𑀬 𑀔𑀢𑁆𑀢𑀺𑀬𑁄 𑀧𑀼𑀢𑁆𑀢𑀲𑁆𑀲 𑀅𑀪𑀺𑀲𑁂𑀓𑀸𑀤𑀺𑀲𑀫𑁆𑀧𑀢𑁆𑀢𑀺𑀁 𑀲𑀼𑀢𑁆𑀯𑀸 𑀓𑁄𑀝𑀺𑀧𑁆𑀧𑀢𑁆𑀢𑀧𑀫𑁄𑀤𑀧𑀭𑀯𑀲𑁄𑀧𑀺 𑀢𑀲𑁆𑀫𑀺𑀁 𑀓𑀸𑀮𑁂 𑀅𑀦𑀼𑀭𑀸𑀥𑀧𑀼𑀭𑁂 𑀭𑀚𑁆𑀚𑀁 𑀓𑀸𑀭𑀬𑀢𑀸 ‘‘𑀯𑁄𑀳𑀸𑀭𑀢𑀺𑀲𑁆𑀲𑀫𑀳𑀸𑀭𑀸𑀚𑀢𑁄 𑀓𑀤𑀸𑀘𑀺 𑀓𑁂𑀘𑀺 𑀉𑀧𑀤𑁆𑀤𑀯𑁄 𑀚𑀸𑀬𑀺𑀲𑁆𑀲𑀢𑀻𑀢𑀺. 𑀚𑀸𑀢𑀧𑀭𑀺𑀲𑀗𑁆𑀓𑁄𑀢𑀁 𑀓𑀼𑀫𑀸𑀭𑀫𑀸𑀤𑀸𑀬 𑀫𑀳𑀺𑀬𑀗𑁆𑀕𑀡𑀫𑀳𑀸𑀯𑀺𑀳𑀸𑀭𑁂 𑀩𑁄𑀥𑀺 𑀅𑀗𑁆𑀕𑀡𑁂 𑀧𑀭𑀺𑀢𑁆𑀢𑀕𑁆𑀕𑁂 𑀲𑀦𑁆𑀦𑀺𑀧𑀢𑀺𑀢𑀲𑁆𑀲 𑀦𑀡𑁆𑀤𑀫𑀳𑀸𑀣𑁂𑀭𑀧𑀫𑀼𑀔𑀲𑁆𑀲 𑀫𑀳𑀸𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀫𑀚𑁆𑀛𑁂 𑀦𑀺𑀧𑀚𑁆𑀚𑀸𑀧𑁂𑀢𑁆𑀯𑀸 ‘‘𑀏𑀲𑁄 𑀫𑁂 𑀪𑀦𑁆𑀢𑁂 𑀓𑀼𑀫𑀸𑀭𑁄 𑀫𑀳𑀸𑀲𑀗𑁆𑀖𑀲𑁆𑀲 𑀘 𑀫𑀳𑀸 𑀩𑁄𑀥𑀺𑀧𑀸𑀤𑀲𑁆𑀲 𑀘 𑀲𑀭𑀡𑀁 𑀕𑀘𑁆𑀙𑀢𑀺 𑀢𑀁 𑀲𑀩𑁆𑀩𑁂𑀧𑀺 𑀪𑀤𑀦𑁆𑀢𑀸 𑀭𑀓𑁆𑀔𑀦𑁆𑀢𑀼 𑀲𑀗𑁆𑀖𑀩𑁄𑀥𑀺 𑀦𑀸𑀫𑀓𑁄 𑀘𑀸𑀬𑀁 𑀳𑁄𑀢𑀼’’𑀢𑀺 𑀫𑀳𑀸𑀲𑀗𑁆𑀖𑀲𑁆𑀲 𑀘 𑀩𑁄𑀥𑀺 𑀤𑁂𑀯𑀢𑀸𑀬 𑀘 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀧𑀝𑀺𑀚𑀕𑁆𑀕𑀦𑁆𑀢𑁄 𑀓𑀼𑀫𑀸𑀭𑀲𑁆𑀲 𑀲𑀢𑁆𑀢𑀯𑀲𑁆𑀲𑀺𑀓 𑀓𑀸𑀮𑁂 𑀓𑀸𑀮𑀫𑀓𑀸𑀲𑀺.

𑁧𑁧. 𑀅𑀣 𑀫𑀸𑀢𑀼𑀮𑁄 𑀦𑀡𑁆𑀤𑀫𑀳𑀸𑀣𑁂𑀭𑁄 𑀓𑀼𑀫𑀸𑀭𑀓𑀁 𑀯𑀺𑀳𑀸𑀭𑀫𑀸𑀦𑁂𑀢𑁆𑀯𑀸 𑀧𑀝𑀺𑀚𑀕𑁆𑀕𑀦𑁆𑀢𑁄 𑀢𑁂𑀧𑀺𑀝𑀓𑀁 𑀩𑀼𑀤𑁆𑀥𑀯𑀘𑀦𑀁 𑀉𑀕𑁆𑀕𑀡𑁆𑀳𑀸𑀧𑁂𑀢𑁆𑀯𑀸 𑀩𑀸𑀳𑀺𑀭𑀲𑀢𑁆𑀣𑁂𑀲𑀼 𑀘 𑀧𑀭𑀫𑀓𑁄𑀘𑀺𑀤𑀁 𑀓𑀸𑀭𑁂𑀲𑀺. 𑀲𑀗𑁆𑀖𑀩𑁄𑀥𑀺𑀓𑀼𑀫𑀸𑀭𑁄𑀧𑀺 𑀓𑀢𑀸𑀥𑀺𑀓𑀸𑀭𑀢𑁆𑀢𑀸 𑀢𑀺𑀓𑁆𑀔𑀧𑀜𑁆𑀜𑀢𑁆𑀢𑀸 𑀘 𑀜𑀸𑀡𑀯𑀺𑀜𑁆𑀜𑀸𑀡𑀲𑀫𑁆𑀧𑀦𑁆𑀦𑁄 𑀳𑀼𑀢𑁆𑀯𑀸 𑀯𑀬𑀧𑁆𑀧𑀢𑁆𑀢𑁄 𑀮𑁄𑀓𑀲𑁆𑀲 𑀮𑁄𑀘𑀦𑁂𑀳𑀺𑀦𑀺𑀧𑀺𑀬𑀫𑀸𑀦𑀸𑀬 𑀭𑀽𑀧𑀲𑀫𑁆𑀧𑀢𑁆𑀢𑀺𑀬𑀸 𑀲𑀯𑀜𑁆𑀚𑀮𑀺𑀧𑀼𑀝𑁂𑀳𑀺 𑀅𑀲𑁆𑀲𑀸𑀤𑀺𑀬𑀫𑀸𑀦𑀲𑀤𑀸𑀘𑀸𑀭𑀕𑀼𑀡 𑀲𑀫𑁆𑀧𑀢𑁆𑀢𑀺𑀬𑀸 𑀘 𑀧𑀢𑁆𑀣 𑀝 𑀬𑀲𑁄𑀖𑁄𑀲𑁄 𑀅𑀳𑁄𑀲𑀺.

𑁧𑁨. 𑀓𑀺𑀫𑀺𑀳 𑀩𑀳𑀼𑀦𑀸?- 𑀓𑀸𑀤𑀫𑁆𑀩𑀺𑀦𑀻 𑀓𑀤𑀫𑁆𑀩𑀢𑁄 𑀲𑀺𑀦𑀺𑀤𑁆𑀥𑀦𑀻𑀮𑀸𑀬𑀢𑀕𑀼𑀡𑀁𑀥𑀫𑁆𑀫𑀺𑀮𑁆𑀮𑀓𑀮𑀸𑀧𑁂, 𑀧𑀭𑀺𑀧𑀼𑀡𑁆𑀡𑀳𑀭𑀺𑀡𑀗𑁆𑀓𑀫𑀡𑁆𑀟𑀮𑀢𑁄 𑀳𑀺𑀮𑀸𑀤𑀓𑀭𑀧𑀲𑀸𑀤𑀲𑁄𑀫𑁆𑀫𑀕𑀼𑀡𑀁 𑀫𑀼𑀔𑀫𑀡𑁆𑀟𑀮𑁂 𑀘𑀸𑀫𑀻𑀓𑀭𑀧𑀺𑀁𑀚𑀭𑀓𑀫𑁆𑀩𑀼𑀯𑀭𑀢𑁄 𑀫𑁂𑀤𑀼𑀭𑁄𑀤𑀸𑀭𑀩𑀡𑁆𑀥𑀼𑀭𑀪𑀸𑀯𑀁 𑀕𑀻𑀯𑀸𑀯𑀬𑀯𑁂, 𑀓𑀮𑁆𑀬𑀸𑀡𑀲𑀺𑀮𑀼𑀘𑁆𑀘𑀬𑀢𑁄 𑀲𑀁𑀳𑀢 𑀯𑀺𑀮𑀸𑀲𑀁 𑀉𑀭𑀢𑁆𑀣𑀮𑁂, 𑀲𑀼𑀭𑀲𑀸𑀥𑀺𑀲𑀸𑀔𑀢𑁄 |𑀑𑁦.𑁦𑁦𑁦𑁩| 𑀧𑀻𑀯𑀭𑀸𑀬𑀢𑀮𑀮𑀺𑀢𑀭𑀽𑀧𑀁 𑀓𑀸𑀫𑀤𑀸𑀦𑀧𑀤𑀸𑀦𑀤𑁆𑀯 𑀩𑀸𑀳𑀼𑀬𑀼𑀕𑀴𑁂, 𑀲𑀫𑀤𑀕𑀦𑁆𑀥𑀲𑀺𑀦𑁆𑀥𑀼𑀭𑀢𑁄 𑀕𑀫𑀦𑀮𑀻𑀴𑁆𑀳𑀁 𑀓𑀭𑀸𑀓𑀸𑀭𑀤𑁆𑀯 𑀳𑀢𑁆𑀣𑀺𑀬𑀼𑀕𑀴𑁂, 𑀘𑀸𑀭𑀼𑀢𑀭𑀣𑀭𑀼𑀘𑀺𑀭𑁄𑀘𑀫𑀸𑀦𑀘𑀸𑀫𑀻𑀓𑀭𑀫𑀼𑀓𑀼𑀭𑀢𑁄 𑀢𑀤𑀸𑀓𑀸𑀭𑀁 𑀲𑀚𑀸𑀡𑀼𑀫𑀡𑁆𑀟𑀮𑁂 𑀚𑀗𑁆𑀖𑀬𑀼𑀕𑀴𑁂, 𑀦𑀺𑀘𑁆𑀘𑀸 𑀲𑀻𑀦𑀓𑀫𑀮𑀸 𑀓𑀫𑀮𑀢𑁄 𑀭𑀢𑁆𑀢𑀓𑁄𑀫𑀴𑀤𑀮𑀲𑀺𑀭𑀁 𑀘𑀭𑀡𑀬𑀼𑀕𑀴𑁂 𑀆𑀤𑀸𑀬 𑀬𑁄𑀚𑀬𑀢𑀸 𑀧𑀸𑀭𑀫𑀺𑀢𑀸𑀥𑀫𑁆𑀫𑀲𑀺𑀧𑁆𑀧𑀺𑀢𑀸 𑀦𑀺𑀫𑁆𑀫𑀺𑀢𑀲𑁆𑀲 𑀧𑀭𑀫𑀤𑀲𑁆𑀲𑀦𑀻𑀬𑀕𑀭𑀽𑀧𑀯𑀺𑀮𑀸𑀲𑀲𑁆𑀲 𑀢𑀲𑁆𑀲 𑀅𑀢𑁆𑀢𑀪𑀸𑀯𑀲𑁆𑀲 𑀲𑀁𑀯𑀡𑁆𑀡𑀦𑀸𑀕𑀦𑁆𑀣𑀕𑀸𑀭𑀯𑀫𑀸𑀯𑀳𑀢𑀺.

𑁧𑁩. 𑀤𑁂𑀳𑁂 𑀲𑀼𑀮𑀓𑁆𑀔𑀡𑀬𑀼𑀢𑁂 𑀦𑀯𑀬𑁄𑀩𑁆𑀩𑀦𑀟𑁆𑀠𑁂,

𑀢𑀲𑁆𑀲𑀼𑀚𑁆𑀚𑀮𑁂 𑀘 𑀧𑀲𑀫𑀸𑀳𑀭𑀡𑁄𑀤𑀬𑁂𑀦;

𑀓𑀸 𑀯𑀡𑁆𑀡𑀦𑀸 𑀓𑀫𑀮𑀭𑀽𑀧𑀺𑀦𑀺 𑀚𑀸𑀢𑀭𑀽𑀧𑁂,

𑀮𑁄𑀓𑀼𑀢𑁆𑀢𑀭𑀁 𑀧𑀭𑀺𑀫𑀮𑀁 𑀧𑀭𑀺𑀢𑁄 𑀯𑀳𑀦𑁆𑀢𑁂.

𑁧𑁪. 𑀤𑁄𑀲𑀸𑀭𑀬𑁄 𑀳𑀤𑀬𑀤𑀼𑀕𑁆𑀕𑀧𑀼𑀭𑁂 𑀯𑀺𑀚𑀺𑀢𑁆𑀯𑀸,

𑀢𑀢𑁆𑀣𑀸𑀪𑀺𑀲𑀺𑀘𑁆𑀘 𑀲𑀼𑀳𑀤𑀁 𑀯𑀺𑀬 𑀥𑀫𑁆𑀫𑀪𑀽𑀧𑀁;

𑀅𑀢𑁆𑀣𑀸𑀦𑀼𑀲𑀸𑀲𑀦𑀺𑀫𑀺𑀫𑀲𑁆𑀲 𑀯𑀤𑀁 𑀕𑀺𑀭𑀸𑀬,

𑀢𑀢𑁆𑀣𑀧𑁆𑀧𑀯𑀢𑁆𑀢𑀬𑀺 𑀲𑀼𑀥𑀻 𑀦𑀺𑀚𑀓𑀸𑀬𑀓𑀫𑁆𑀫𑀁.

𑀇𑀢𑀺 𑀭𑀸𑀚𑀓𑀼𑀫𑀸𑀭𑀼𑀧𑁆𑀧𑀢𑁆𑀢𑀺 𑀧𑀭𑀺𑀘𑁆𑀙𑁂𑀤𑁄 𑀧𑀞𑀫𑁄.

𑁧𑁫. 𑀅𑀣𑁂𑀓𑀤𑀸 𑀫𑀸𑀢𑀼𑀮𑀫𑀳𑀸𑀣𑁂𑀭𑀸 𑀯𑀬𑀧𑁆𑀧𑀢𑁆𑀢𑀁 𑀲𑀺𑀭𑀺𑀲𑀗𑁆𑀖𑀩𑁄𑀥𑀺 𑀓𑀼𑀫𑀸𑀭𑀁 𑀥𑀫𑁆𑀫𑀲𑀯𑀦𑀸𑀯𑀲𑀸𑀦𑁂 𑀆𑀫𑀦𑁆𑀢𑁂𑀢𑁆𑀯𑀸 𑀏𑀯𑀫𑀸𑀳, ‘‘𑀓𑀼𑀫𑀸𑀭! 𑀫𑀳𑀸𑀪𑀸𑀕𑀥𑁂𑀬𑁆𑀬! 𑀇𑀤𑀸𑀦𑀺 𑀢𑁆𑀯𑀫𑀲𑀺 𑀅𑀥𑀻𑀢𑀲𑀼𑀕𑀢𑀸𑀕𑀫𑁄, 𑀯𑀺𑀤𑀺𑀢𑀲𑀓𑀮 𑀩𑀸𑀳𑀺𑀭𑀲𑀢𑁆𑀣𑁄. 𑀘𑀢𑀼𑀩𑁆𑀩𑀺𑀥𑀧𑀡𑁆𑀟𑀺𑀘𑁆𑀘𑀓𑁄𑀝𑀺𑀧𑁆𑀧𑀢𑁆𑀢𑁄, 𑀢𑀣𑀸𑀧𑀺 𑀅𑀪𑀺𑀫𑀸𑀦𑀥𑀦𑁂 𑀔𑀢𑁆𑀢𑀺𑀬𑀓𑀼𑀮𑁂 𑀚𑀸𑀢𑀺, 𑀲𑀩𑁆𑀩𑀧𑀢𑁆𑀣𑀯𑁆𑀬𑀸𑀧𑀺𑀢𑀸 𑀬𑁄𑀩𑁆𑀩𑀦𑀯𑀺𑀮𑀸𑀲𑁂𑀦 𑀲𑀫𑀮𑀗𑁆𑀓𑀢𑀁 𑀲𑀭𑀻𑀭𑀁, 𑀅𑀧𑁆𑀧𑀝𑀺𑀫𑀸 𑀭𑀽𑀧𑀲𑀺𑀭𑀺, 𑀅𑀫𑀸𑀦𑀼𑀲𑀁 𑀩𑀮𑀜𑁆𑀘𑁂𑀢𑀺 𑀫𑀳𑀢𑀻𑀬 𑀩𑀮𑀯𑀦𑀡𑁆𑀣 𑀧𑀭𑀫𑁆𑀧𑀭𑀸’𑀲𑀩𑁆𑀩𑀸𑀅𑀯𑀺𑀦𑀬𑀸𑀦 𑀫𑁂𑀓𑁂𑀓𑀫𑁆𑀧𑀺 𑀢𑁂𑀲𑀫𑀸𑀬𑀢𑀦𑀁 𑀓𑀺𑀫𑀼𑀢 𑀲𑀫𑀯𑀸𑀬𑁄?‘‘𑀬𑁂𑀪𑀼𑀬𑁆𑀬𑁂𑀦 𑀲𑀢𑁆𑀣𑀲𑀮𑀺𑀮 𑀯𑀺𑀓𑁆𑀔𑀸𑀮𑀦𑀸𑀢𑀺 𑀦𑀺𑀫𑁆𑀫𑀮𑀸𑀧𑀺 𑀓𑀸𑀮𑀼𑀲𑀺𑀬𑀫𑀼𑀧𑀬𑀸𑀦𑀺 𑀩𑀼𑀤𑁆𑀥𑀻, 𑀅𑀦𑀼𑀚𑁆𑀛𑀺𑀢𑀥𑀯𑀮𑀢𑀸𑀧𑀺 𑀲𑀭𑀸𑀕𑀸𑀏𑀯 𑀪𑀯𑀢𑀺 𑀦𑀯𑀬𑁄𑀩𑁆𑀩𑀦𑀕𑀩𑁆𑀩𑀺𑀢𑀸𑀦𑀁 𑀤𑀺𑀝𑁆𑀞𑀺, 𑀅𑀧𑀳𑀭𑀢𑀺 𑀘 𑀯𑀸𑀢𑀫𑀡𑁆𑀟𑀮𑀺 𑀓𑁂𑀯 𑀲𑀼𑀓𑁆𑀔𑀧𑀡𑁆𑀡𑀁 𑀉𑀩𑀪𑀼𑀢𑀭𑀚𑁄 𑀪𑀦𑁆𑀢𑀺 𑀅𑀢𑀺𑀤𑀽𑀭𑀫𑀢𑁆𑀢𑀦𑁄 𑀇𑀘𑁆𑀙𑀸𑀬 𑀬𑁄𑀩𑁆𑀩𑀦𑀲𑀫𑀬𑁂 𑀧𑀼𑀭𑀺𑀲𑀁 𑀧𑀓𑀢𑀺. 𑀇𑀡𑁆𑀤𑁆𑀭𑀺𑀬𑀪𑀭𑀺𑀡𑀪𑀸𑀭𑀺𑀦𑀻 𑀲𑀢𑁆𑀢𑀫𑀢𑀺𑀤𑀼𑀭𑀦𑁆𑀢𑀸𑀬 𑀫𑀼𑀧𑀪𑁄𑀕𑀫𑀺𑀕𑀢𑀡𑀳𑀺𑀓𑀸 𑀢𑀲𑁆𑀫𑀸 𑀅𑀬𑀫𑁂𑀯𑀸𑀦𑀲𑁆𑀲𑀸𑀤𑀺𑀢 𑀯𑀺𑀲𑀬 𑀭𑀲𑀲𑁆𑀲 𑀢𑁂 𑀓𑀸𑀮𑁄 𑀕𑀼𑀭𑀼𑀧𑀤𑁂𑀲𑀲𑁆𑀲. 𑀫𑀤𑀦𑀲𑀭𑀧𑁆𑀧𑀪𑀸𑀭𑀚𑀚𑁆𑀚𑀭𑀺𑀢𑁂 𑀳𑀤𑀬𑁂 𑀚𑀮𑀫𑀺𑀯 𑀕𑀮𑀢𑀺 𑀕𑀼𑀭𑀽𑀦𑀫𑀦𑀼𑀲𑁆𑀲𑀸𑀦𑀁 𑀅𑀓𑀸𑀭𑀡𑀁𑀙𑀯𑀢𑀺 𑀤𑀼𑀧𑁆𑀧𑀓𑀢𑀺 𑀦𑁄 𑀓𑀼𑀮𑀁𑀯𑀸 𑀲𑀼𑀢𑀁 𑀯𑀸 𑀫𑀦𑀬𑀲𑁆𑀲 𑀯𑀡𑁆𑀤𑀦𑀧𑁆𑀧𑀪𑀯𑁄𑀦𑀤𑀳𑀢𑀺 𑀓𑀺𑀁 𑀤𑀳𑀦𑁄? 𑀓𑀺𑀁𑀯𑀸𑀧𑀲𑀫𑀳𑁂𑀢𑀼𑀦𑀸𑀧𑀺 𑀦𑀸𑀢𑀺𑀯𑀡𑁆𑀟𑀢𑀭𑁄 𑀪𑀯𑀢𑀺 𑀯𑀟𑀩𑀸𑀦𑀴𑁄 𑀲𑀮𑀺𑀮𑁂𑀦, 𑀢𑀲𑁆𑀫𑀸 𑀕𑀸𑀴𑁆𑀳𑀢𑀭 𑀫𑀦𑀼𑀲𑀸𑀲𑀻𑀢𑀩𑁆𑀩𑁄𑀲𑀺.

𑁧𑁬. 𑀅𑀧𑀕𑀢𑀫𑀮𑁂 𑀳𑀺 𑀫𑀦𑀲𑀺 𑀏𑀮𑀺𑀓𑀫𑀡𑀺𑀫𑁆𑀳𑀺 𑀯𑀺𑀬 𑀭𑀚𑀦𑀺𑀓𑀭𑀫𑀬𑀼𑀔𑀸𑀧𑀯𑀺𑀲𑀦𑁆𑀢𑀺, 𑀲𑀼𑀔𑀫𑀼𑀧𑀤𑁂𑀲𑀕𑀼𑀡𑀸, 𑀕𑀼𑀭𑀼𑀯𑀘𑀦𑀫𑀫𑀮𑀫𑁆𑀧𑀺 𑀲𑀮𑀺𑀮𑀫𑀺𑀯 𑀫𑀳𑀦𑁆𑀢𑀁 𑀚𑀸𑀦𑀺𑀫𑀼𑀧𑀚𑀦𑀬𑀢𑀺 𑀲𑀯𑀦𑀳𑀢𑀁 𑀲𑀽𑀮𑀫𑀺𑀯 𑀅𑀪𑀩𑁆𑀩𑀲𑁆𑀲, 𑀪𑀩𑁆𑀩𑀲𑁆𑀲𑀢𑀼 |𑀑𑁦.𑁦𑁦𑁦𑁪| 𑀓𑀭𑀺𑀦𑁄 𑀯𑀺𑀬 𑀲𑀩𑁆𑀩𑀸𑀪𑀭𑀡𑀫𑀸𑀦𑀦𑀲𑁄𑀪𑀸𑀲𑀫𑀼𑀤𑀬𑀫𑀥𑀺𑀓𑀢𑀭 𑀫𑀼𑀧𑀯𑀳𑀢𑀺, 𑀅𑀦𑀸𑀤𑀺𑀲𑀺𑀤𑁆𑀥 𑀢𑀡𑁆𑀳𑀸𑀓𑀲𑀸𑀬𑀺𑀢𑀺𑀡𑁆𑀤𑁆𑀭𑀺𑀬𑀸𑀦𑀼𑀘𑀭𑀜𑁆𑀳𑀺 𑀘𑀺𑀢𑁆𑀢𑀁 𑀦𑀸𑀯𑀳𑀢𑀺 𑀓𑀦𑁆𑀦𑀸𑀫𑀸𑀦𑀢𑁆𑀣𑀁, 𑀢𑀲𑁆𑀫𑀸 𑀭𑀸𑀚 𑀓𑀼𑀫𑀸𑀭𑀸𑀦𑀜𑁆𑀘 𑀬𑀢𑀻𑀦𑀜𑁆𑀘 𑀲𑀢𑀺𑀩𑀮𑁂𑀦 𑀇𑀡𑁆𑀤𑁆𑀭𑀺𑀬𑀯𑀺𑀚𑀬𑁄 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀫𑁆𑀩𑀺𑀮𑀁 𑀓𑀮𑁆𑀬𑀸𑀡𑀚𑀸𑀢𑀫𑀼𑀧𑀚𑀦𑀬𑀢𑀺, 𑀇𑀡𑁆𑀤𑁆𑀭𑀺𑀬𑀯𑀺𑀚𑀬𑁄 𑀘 𑀲𑀫𑁆𑀪𑀯𑀢𑀺 𑀕𑀼𑀭𑀼𑀯𑀼𑀤𑁆𑀥𑁄𑀧𑀲𑁂𑀯𑀸𑀬 𑀢𑀩𑁆𑀩𑀯𑀦𑀫𑀯𑀺𑀭𑀸𑀥𑁂𑀢𑁆𑀯𑀸 𑀧𑀝𑀺𑀧𑀚𑁆𑀚𑀢𑁄, 𑀢𑀲𑁆𑀫𑀸 𑀢𑀬𑀸 𑀆𑀧𑀸𑀡𑀧𑀭𑀺𑀬𑀦𑁆𑀢𑀁 𑀯𑀢𑁆𑀣𑀼𑀢𑁆𑀢𑀬𑀲𑀭𑀡𑀧𑀭𑀸𑀬𑀡𑀢𑀸 𑀦 𑀧𑀳𑀸𑀢𑀩𑁆𑀩𑀸.

𑀦 𑀭𑀸𑀕𑀸𑀧𑀲𑁆𑀫𑀸𑀭𑀯𑀺𑀩𑁄𑀥𑀦𑀁 𑀯𑀺𑀲𑀬𑀤𑀳𑀦𑀲𑀮𑀺𑀮 𑀲𑀁𑀲𑁂𑀯𑀦𑀁 𑀓𑀸𑀢𑀩𑁆𑀩𑀁, 𑀧𑀲𑁆𑀲𑀢𑀽 𑀳𑀺 𑀓𑀮𑁆𑀬𑀸𑀡𑀸𑀪𑀺𑀦𑀺𑀯𑁂𑀲𑀺 𑀘𑀓𑁆𑀔𑀽𑀡𑁆𑀤𑁆𑀭𑀺𑀬𑀮𑀸𑀴𑀦 𑀧𑀭𑀯𑀲𑀲𑁆𑀲 𑀲𑀮𑀪𑀲𑁆𑀲 𑀲𑀫𑀼𑀚𑁆𑀚𑀮𑀺𑀢 𑀤𑀻𑀧𑀲𑀺𑀔𑀸𑀧𑀢𑀦𑀁 𑀲𑁄𑀢𑀺𑀡𑁆𑀤𑁆𑀭𑀺𑀬 𑀲𑀼𑀔𑀸𑀦𑀼𑀬𑀼𑀢𑁆𑀢𑀲𑁆𑀲 𑀢𑀭𑀼𑀡 𑀳𑀭𑀻𑀡𑀲𑁆𑀲 𑀉𑀲𑀼 𑀧𑀸𑀢𑀲𑀫𑁆𑀫𑀼𑀔𑀻𑀪𑀯𑀦𑀁 𑀖𑀸𑀡𑀺𑀡𑁆𑀤𑁆𑀭𑀺𑀬 𑀧𑀭𑀯𑀲𑀲𑁆𑀲 𑀫𑀥𑀼𑀓𑀭𑀲𑁆𑀲 𑀫𑀤𑀯𑀸𑀭𑀡𑀓𑀡𑁆𑀡𑀢𑀸𑀮𑀪𑀦𑁆𑀦𑀁 𑀭𑀲𑀦𑀺𑀡𑁆𑀤𑁆𑀭𑀺𑀬𑀢𑀧𑁆𑀧𑀡𑀯𑁆𑀬𑀲𑀦𑀺𑀦𑁄 𑀧𑀼𑀣𑀼𑀮𑁄𑀫𑀲𑁆𑀲 𑀩𑀮𑀺𑀲𑀸𑀖𑀸𑀲𑀯𑁆𑀬𑀲𑀦𑀁 𑀨𑀲𑁆𑀲𑀻𑀡𑁆𑀤𑁆𑀭𑀺𑀬𑀸𑀦𑀼𑀪𑀯𑀦𑀮𑀸𑀮𑀲𑀲𑁆𑀲𑀫𑀢𑀗𑁆𑀕𑀚𑀲𑁆𑀲𑀯𑀸𑀭𑀺𑀡𑀺 𑀩𑀡𑁆𑀥𑀦𑀸𑀧𑀸𑀬𑀁 𑀇𑀫𑁂𑀳𑀺 𑀇𑀡𑁆𑀤𑁆𑀭𑀺𑀬𑁂𑀳𑀺 𑀫𑀺𑀮𑀺𑀢𑁂𑀳𑀺 𑀏𑀓𑀲𑁆𑀲 𑀓𑀸𑀫𑀺𑀦𑁄 𑀲𑀤𑀺𑀤𑁂𑀯 𑀧𑀜𑁆𑀘𑀦𑁆𑀦𑀁, 𑀯𑀺𑀲𑀬𑀭𑀲𑀸𑀦𑀫𑀼𑀧𑀲𑁂𑀯𑀸𑀬 𑀧𑀢𑁆𑀢𑀩𑁆𑀩𑀁 𑀫𑀳𑀦𑁆𑀢𑀁 𑀤𑀼𑀓𑁆𑀔𑀚𑀸𑀮𑀁 𑀓𑀣𑀫𑀼𑀧𑀯𑀡𑁆𑀡𑀬𑀸𑀫? 𑀇𑀫𑀸𑀦𑀺 𑀘 𑀲𑀼𑀪𑀸𑀲𑀺𑀢𑀸𑀦𑀺 𑀧𑀘𑁆𑀘𑀯𑁂𑀓𑁆𑀔𑀢𑀼 𑀅𑀦𑀼𑀓𑁆𑀔𑀡𑀁 𑀯𑀺𑀘𑀓𑁆𑀔𑀡𑁄.

𑁧𑁭. 𑀦𑀸𑀕𑀸𑀭𑀺𑀓𑀁 𑀲𑀼𑀔𑀫𑀼𑀤𑀺𑀓𑁆𑀔𑀢𑀺 𑀓𑀺𑀜𑁆𑀘𑀺 𑀥𑀻𑀭𑁄,

𑀚𑀸𑀦𑀸𑀢𑀺 𑀤𑁂𑀳𑀧𑀝𑀺𑀚𑀕𑁆𑀕𑀦𑀫𑀢𑁆𑀣𑀢𑁄𑀯𑁂;

𑀲𑀁𑀲𑁂𑀯𑀢𑁄𑀧𑀺 𑀬𑀼𑀯𑀢𑀺𑀁 𑀭𑀢𑀺𑀫𑁄𑀳𑀺𑀢𑀲𑁆𑀲,

𑀓𑀡𑁆𑀟𑀼𑀬𑀦𑁂 𑀯𑀺𑀬 𑀩𑀦𑀲𑁆𑀲 𑀲𑀼𑀔𑀸𑀪𑀺𑀫𑀸𑀦𑁄.

𑁧𑁮. 𑀓𑁄 𑀲𑁂𑀯𑁂𑀬𑁆𑀬 𑀧𑀭𑀁 𑀧𑁄𑀲𑁄 𑀅𑀯𑀫𑀸𑀦𑀁 𑀲𑀳𑁂𑀬𑁆𑀬𑀯𑀯,

𑀦 𑀯𑁂 𑀓𑀮𑀢𑁆𑀢𑀦𑀺𑀕𑀴𑀁 𑀬𑀤𑀺 𑀤𑀼𑀓𑁆𑀔𑀦𑀺𑀩𑀡𑁆𑀥𑀦𑀁.

𑁧𑁯. 𑀆𑀓𑀟𑁆𑀠𑀫𑀸𑀦𑀸 𑀘𑀺𑀲𑀺𑀔𑀸 𑀲𑁆𑀫𑀺𑀧𑀁,

𑀧𑀭𑀫𑁆𑀫𑀼𑀔𑀸𑀬𑁂𑀯 𑀲𑀤𑀸 𑀧𑀯𑀢𑁆𑀢𑀸;

𑀤𑀽𑀭𑀫𑁆𑀧𑀺 𑀕𑀘𑁆𑀙𑀦𑁆𑀢𑀺 𑀕𑀼𑀡𑀁 𑀯𑀺𑀳𑀸𑀬,

𑀧𑀯𑀢𑁆𑀢𑀦𑀁 𑀢𑀸𑀤𑀺𑀲𑀫𑁂𑀯 𑀣𑀻𑀦.

𑁨𑁦. 𑀅𑀲𑀦𑁆𑀣𑀼𑀢𑀁 𑀢𑀸 𑀧𑀼𑀭𑀺𑀲𑀫𑁆𑀧𑀺 𑀅𑀦𑁆𑀢𑁄,

𑀓𑀭𑁄𑀦𑁆𑀢𑀺 𑀆𑀤𑀸𑀬𑀓𑀢𑀸𑀯 𑀪𑀺𑀢𑁆𑀢𑀺;

𑀦𑁂𑀢𑁆𑀢𑀺𑀁 𑀲𑀯𑀮𑁆𑀮𑀻 𑀯𑀺𑀬 𑀳𑀡𑁆𑀣𑀕𑀸𑀧𑀺,

𑀤𑀲𑀸𑀲𑀼 𑀲𑀩𑁆𑀩𑀸𑀲𑀼 𑀘 𑀲𑀗𑁆𑀓𑀦𑀻𑀬𑀸.

𑁨𑁧. 𑀅𑀦𑁆𑀢𑁄𑀭𑀼𑀤𑁆𑀥𑀸 𑀩𑀳𑀺𑀤𑁆𑀥𑀸𑀧𑀺 𑀦𑀺𑀲𑁆𑀲𑀸𑀲𑀸 𑀯𑀺𑀬 𑀦𑀸𑀭𑀺𑀬𑁄,

𑀓𑀭𑁄𑀦𑁆𑀢𑀺 𑀦𑀸𑀲𑀫𑁂𑀯𑀲𑁆𑀲 𑀓𑁄𑀥𑀻𑀫𑀸𑀢𑀸𑀲𑀼 𑀯𑀺𑀲𑁆𑀲𑀲𑁂.

𑁨𑁨. 𑀫𑀸𑀦𑀲 𑀧𑀸𑀧𑀲𑀁𑀦𑀺𑀦𑁆𑀦𑀁 𑀅𑀧𑀸𑀬𑀸 𑀯𑀺𑀯𑀝𑀸 𑀦𑀦𑀸,

𑀲𑀫𑀦𑁆𑀢𑀸 𑀧𑀸𑀧𑀫𑀺𑀢𑁆𑀢𑀸𑀯 𑀫𑁄𑀓𑁆𑀔𑁄 𑀲𑀩𑁆𑀩𑀪𑀬𑀸𑀓𑀣𑀁.

𑁨𑁩. |𑀑𑁦.𑁦𑁦𑁦𑁫| 𑀅𑀧𑀺 𑀘 𑀳𑀤𑀬𑀢𑀭𑀼𑀓𑁄𑀝𑀭 𑀓𑀼𑀝𑀻𑀭𑁄 𑀓𑁄𑀥 𑀓𑀼𑀡𑁆𑀟𑀮𑀻𑀦 𑀓𑀤𑀸𑀘𑀺 𑀩𑀳𑀺 𑀓𑀸𑀢𑀩𑁆𑀩𑁄. 𑀅𑀧𑀺 𑀢𑀼’𑀢𑀺𑀢𑀺𑀓𑁆𑀔𑀸𑀫𑀦𑁆𑀢𑁂𑀦 𑀅𑀘𑀺𑀧𑁆𑀨𑀡𑁆𑀤𑀦𑁆𑀢𑀁 𑀉𑀧𑀦𑁂𑀢𑀩𑁆𑀩𑁄.

𑁨𑁪. 𑀲𑀢𑀁 𑀢𑀺𑀢𑀺𑀓𑁆𑀔𑀸𑀓𑀯𑀘𑁂 𑀯𑀺𑀕𑀼𑀡𑁆𑀞𑀺𑀢𑀸,

𑀲𑀺𑀬𑀼𑀁 𑀤𑀼𑀭𑀸𑀮𑀸𑀧𑀔𑀕𑀸 𑀔𑀮𑀸𑀦𑀁;

𑀲𑀪𑀸𑀧𑀲𑀁𑀲𑀸𑀓𑀼𑀲𑀼𑀫𑀢𑁆𑀢 𑀫𑁂𑀢𑀸,

𑀦𑀺𑀩𑀚𑁆𑀛𑀭𑁂 𑀢𑀸 𑀕𑀼𑀡 𑀫𑀸𑀮𑀺𑀓𑀸𑀬.

𑁨𑁫. 𑀮𑁄𑀓𑀸𑀥𑀺𑀧𑀘𑁆𑀘𑀁 𑀯𑀺𑀧𑀼𑀮𑁂𑀥𑀦𑁂 𑀘,

𑀫𑀦𑁄𑀦𑀼𑀓𑀽𑀮𑁂 𑀢𑀦𑀬𑁂 𑀘 𑀤𑀸𑀭𑁂;

𑀮𑀤𑁆𑀥𑀸𑀧𑀺 𑀬𑀸𑀬𑁂𑀢𑀺 𑀦 𑀚𑀸𑀢𑀼 𑀢𑀺𑀢𑀢𑀺𑀁,

𑀩𑀸𑀥𑁂𑀢𑀼 𑀲𑀸𑀢𑀁 𑀦 𑀧𑀧𑀜𑁆𑀘 𑀢𑀡𑁆𑀳𑀸.

𑁨𑁬. 𑀯𑀡𑁆𑀡𑀧𑁆𑀧𑀲𑀸𑀤𑀸 𑀬𑀲𑁆𑀲𑀸 𑀲𑀼𑀔𑀸𑀯,

𑀥𑀦𑀸 𑀘 𑀳𑀸𑀬𑀦𑁆𑀢𑀼𑀧 𑀚𑀻𑀯𑀺𑀓𑀸𑀘;

𑀬𑁂𑀦𑀸𑀪𑀺𑀪𑀽𑀢𑀸𑀭𑀺𑀧𑀼𑀦𑁂𑀯 𑀲𑀢𑁆𑀢𑀸,

𑀤𑁄𑀲𑀕𑁆𑀕𑀺 𑀲𑁄 𑀢𑁂 𑀳𑀤𑀬𑀁 𑀚𑀳𑀸𑀢𑀼.

𑁨𑁭. 𑀔𑁂𑀤𑁄 𑀯𑀺𑀧𑀢𑁆𑀢𑀻𑀲𑀼 𑀧𑀝𑀺𑀓𑀺𑀭𑀬𑀸 𑀦,

𑀢𑀲𑁆𑀫𑀸 𑀦 𑀤𑀻𑀦𑀧𑁆𑀧 𑀓𑀢𑀺𑀁 𑀪𑀚𑁂𑀬𑁆𑀬;

𑀧𑀜𑁆𑀜𑀸𑀦𑀼𑀬𑀸𑀢𑀁 𑀯𑀻𑀭𑀺𑀬𑀁 𑀯𑀤𑀦𑁆𑀢𑀺,

𑀲𑀩𑁆𑀩𑀢𑁆𑀣 𑀲𑀺𑀤𑁆𑀥𑀺𑀕𑁆𑀕𑀳𑀡𑀕𑁆𑀕𑀳𑀡𑁆𑀣𑀁.

𑁨𑁮. 𑀯𑁆𑀬𑀸𑀧𑀸𑀭𑀸 𑀲𑀩𑁆𑀩𑀪𑀽𑀢𑀸𑀦𑀁 𑀲𑀼𑀔𑀢𑁆𑀣𑀸𑀬 𑀯𑀺𑀥𑀻𑀬𑀭𑁂;

𑀲𑀼𑀔𑀜𑁆𑀘 𑀦 𑀯𑀺𑀦𑀸 𑀥𑀫𑁆𑀫𑀁 𑀢𑀲𑁆𑀫𑀸 𑀥𑀫𑁆𑀫𑀧𑀭𑁄 𑀪𑀯𑀸’𑀢𑀺.

𑁨𑁯. 𑀏𑀯𑀫𑀸𑀤𑀺𑀓𑀁 𑀲𑀧𑁆𑀧𑀼𑀭𑀺𑀲𑀦𑀻𑀢𑀺𑀧𑀣𑀁 𑀆𑀤𑀺𑀲𑀦𑁆𑀢𑁂 𑀫𑀳𑀸𑀣𑁂𑀭𑁂 𑀢𑁂𑀦 𑀓𑀮𑁆𑀬𑀸𑀡𑀥𑀫𑁆𑀫𑁂𑀦 𑀅𑀲𑁄𑀢𑀩𑁆𑀩𑀢𑀸𑀦𑀸𑀤𑀭𑀺𑀬𑀭𑀘𑀺𑀢𑀪𑀼𑀓𑀽𑀝𑀺𑀓 𑀫𑀼𑀔𑁂𑀦 𑀯𑀸 𑀤𑀺𑀲𑀸𑀘𑀺𑀓𑁆𑀔𑀺𑀢𑁆𑀢𑀘𑀓𑁆𑀔𑀼𑀦𑀸 𑀘 𑀅𑀳𑀗𑁆𑀓𑀸𑀭𑀧𑀭𑀯𑀲𑁂𑀦 𑀕𑀚𑀦𑀺𑀫𑀺𑀮𑀺𑀢𑀫𑀼𑀩𑁆𑀪𑀸𑀯𑀬𑀢𑀸 𑀯𑀸 𑀅𑀢𑁆𑀢𑀦𑁄 𑀧𑀜𑁆𑀜𑀸𑀥𑀺𑀓𑁆𑀔𑁂𑀧𑀫𑀺𑀯𑀘 𑀅𑀘𑀺𑀦𑁆𑀢𑀬𑀢𑀸 𑀘𑀼𑀴𑀸𑀯𑀺𑀦𑀺𑀳𑀺𑀢𑀓𑁄𑀫𑀴𑀜𑁆𑀚𑀮𑀺𑀧𑀼𑀝𑁂𑀦 𑀢𑀦𑁆𑀦𑀺𑀦𑁆𑀦𑁂𑀦, 𑀢𑀧𑁆𑀧𑁄𑀡𑁂𑀦 𑀲𑀺𑀭𑀲𑀸 𑀘 𑀧𑀻𑀢𑀺 𑀲𑀫𑀼𑀤𑀺𑀢 𑀲𑀸𑀥𑀼𑀯𑀸𑀤𑀯𑀺𑀓𑀲𑀺𑀢𑀓𑀧𑁄𑀮𑁂𑀦𑀫𑀼𑀔𑁂𑀦 𑀘. 𑀲𑀓𑀮𑀸𑀯𑀬𑀯𑀘𑀺𑀢𑁆𑀣𑀝𑀭𑁄𑀫𑀜𑁆𑀘 𑀓𑀜𑁆𑀘𑀼𑀓𑀺𑀢𑁂𑀦 𑀤𑁂𑀳𑁂𑀦 𑀘 𑀪𑀽𑀫𑀺𑀬𑀁 𑀦𑀺𑀧𑀚𑁆𑀚𑀺𑀢𑁆𑀯𑀸 𑀤𑀻𑀖𑀧𑁆𑀧𑀫𑀸𑀡 𑀧𑀫𑀸𑀡 𑀫𑀸𑀯𑀭𑀢𑁆𑀢𑀸𑀫𑀕𑁆𑀕𑀨𑀮𑀮𑀸𑀪𑀢𑁄𑀯𑀺𑀬 𑀯𑀺𑀲𑀺𑀝𑁆𑀞𑀢𑀭𑀁 𑀧𑀫𑀼𑀤𑀺𑀢𑀫𑀸𑀯𑀺𑀓𑀢𑀫𑀸𑀲𑀺.

𑀇𑀢𑀺 𑀅𑀦𑀼𑀲𑀸𑀲𑀦 𑀧𑀭𑀺𑀘𑁆𑀙𑁂𑀤𑁄 𑀤𑀼𑀢𑀺𑀬𑁄.

𑁩𑁦. 𑀢𑀢𑁄 𑀧𑀝𑁆𑀞𑀸𑀬 𑀬𑀣𑀸𑀯𑀼𑀢𑁆𑀢𑀧𑀝𑀺𑀧𑀤𑀁 𑀅𑀯𑀺𑀭𑀸𑀥𑁂𑀢𑁆𑀯𑀸 𑀲𑀫𑀸𑀯𑀭𑀡𑁂𑀦 𑀲𑀦𑁆𑀢𑀼𑀝𑁆𑀞𑁄 𑀢𑀲𑁆𑀲 𑀲𑀗𑁆𑀖𑀩𑁄𑀥𑀺 𑀲𑀫𑀜𑁆𑀜𑀁 𑀕𑁄𑀧𑁂𑀢𑀼𑀓𑀸𑀫𑁄 𑀫𑀸𑀢𑀼𑀮𑀫𑀳𑀸𑀣𑁂𑀭𑁄 𑀥𑀫𑁆𑀫𑀺𑀓𑁄𑀢𑀺 𑀯𑁄𑀳𑀸𑀭𑀁 𑀧𑀝𑁆𑀞𑀧𑁂𑀲𑀺.

𑁩𑁧. 𑀮𑀓𑁆𑀔𑀡𑀧𑀸𑀞𑀓𑀸𑀦𑀁 𑀯𑀘𑀦𑀁 𑀲𑀤𑁆𑀤𑀳𑀦𑁆𑀢𑁄 𑀪𑀸𑀕𑀺𑀦𑁂𑀬𑁆𑀬𑀁 𑀧𑀩𑁆𑀩𑀚𑀺𑀢𑀼𑀓𑀸𑀫𑀫𑁆𑀧𑀺 |𑀑𑁦.𑁦𑁦𑁦𑁬| 𑀅𑀧𑀩𑁆𑀩𑀸𑀚𑁂𑀢𑁆𑀯𑀸 ‘‘𑀇𑀥 𑀯𑀸𑀲𑀢𑁄 𑀅𑀦𑀼𑀭𑀸𑀥𑀧𑀼𑀭𑁂 𑀯𑀸𑀲𑁄𑀬𑁂𑀯 𑀓𑀼𑀫𑀸𑀭𑀲𑁆𑀲 𑀬𑁄𑀕𑀓𑁆𑀔𑁂𑀫𑀸𑀯𑀳𑁄, 𑀧𑀼𑀜𑁆𑀜𑀸𑀦𑀼𑀭𑀽𑀧𑁂𑀦 𑀚𑀸𑀬𑀫𑀸𑀦𑀲𑁆𑀲 𑀯𑀺𑀧𑀸𑀓𑀲𑁆𑀲 𑀘 𑀞𑀸𑀦𑀁 𑀳𑁄𑀢𑀺, 𑀫𑀳𑀸𑀘𑁂𑀢𑀺𑀬𑀲𑁆𑀲 𑀯𑀢𑁆𑀢𑀧𑀝𑀺𑀯𑀢𑁆𑀢𑀲𑀫𑀸𑀘𑀭𑀡𑁂𑀦𑀘 𑀫𑀳𑀦𑁆𑀢𑁄 𑀧𑀼𑀜𑁆𑀜𑀓𑁆𑀔𑀡𑁆𑀥𑁄 𑀲𑀫𑁆𑀧𑀚𑀺𑀲𑁆𑀲𑀢𑀺’’𑀢𑀺 𑀫𑀜𑁆𑀜𑀫𑀸𑀦𑁄 𑀢𑀁 𑀓𑀼𑀫𑀸𑀭𑀫𑀸𑀤𑀸𑀬 𑀕𑀘𑁆𑀙𑀦𑁆𑀢𑁄 𑀅𑀦𑀼𑀭𑀸𑀥𑀧𑀼𑀭𑀁 𑀕𑀦𑁆𑀢𑀼𑀓𑀸𑀫𑁄 𑀦𑀺𑀓𑁆𑀔𑀫𑀺. 𑀲𑀗𑁆𑀖𑀢𑀺𑀲𑁆𑀲𑁄𑀕𑁄𑀞𑀸𑀪𑀬𑁄𑀢𑀺 𑀘 𑀮𑀫𑁆𑀩𑀓𑀡𑁆𑀡𑀸 𑀭𑀸𑀚 𑀓𑀼𑀫𑀸𑀭𑀸 𑀅𑀧𑀭𑁂𑀧𑀺 𑀤𑀼𑀘𑁂 𑀢𑀲𑁆𑀲 𑀧𑀁𑀲𑀼𑀓𑀻𑀴𑀦𑀢𑁄 𑀧𑀝𑁆𑀞𑀸𑀬 𑀲𑀳𑀸𑀬𑀸𑀢𑁂𑀦 𑀓𑀼𑀫𑀸𑀭𑁂𑀦 𑀲𑀤𑁆𑀥𑀺𑀁 𑀦𑀺𑀓𑁆𑀔𑀫𑀺𑀁𑀲𑀼 𑀢𑁂 𑀢𑀬𑁄 𑀓𑀼𑀫𑀸𑀭𑁂 𑀆𑀤𑀸𑀬 𑀕𑀘𑁆𑀙𑀦𑁆𑀢𑁄 𑀫𑀳𑀸𑀣𑁂𑀭𑁄 𑀧𑀼𑀭𑁂𑀢𑀭𑀫𑁂𑀯 𑀅𑀦𑀼𑀭𑀸𑀥𑀧𑀼𑀭𑀁 𑀧𑀸𑀯𑀺𑀲𑀺. 𑀫𑀳𑀸𑀣𑁂𑀭𑀫𑀦𑀼𑀕𑀘𑁆𑀙𑀦𑁆𑀢𑁂𑀲𑀼 𑀢𑁂𑀲𑀼 𑀓𑀼𑀫𑀸𑀭𑁂𑀲𑀼 𑀚𑁂𑀝𑁆𑀞𑁄 𑀲𑀗𑁆𑀖𑀢𑀺𑀲𑁆𑀲𑁄 𑀫𑀚𑁆𑀛𑀺𑀫𑁄 𑀲𑀗𑁆𑀖𑀩𑁄𑀥𑀺 𑀓𑀦𑀺𑀝𑁆𑀞𑁄 𑀕𑁄𑀞𑀸𑀪𑀬𑁄𑀢𑀺 𑀢𑁂 𑀣𑁂𑀭𑀁 𑀧𑀘𑁆𑀙𑀢𑁄 𑀅𑀦𑀼𑀕𑀘𑁆𑀙𑀦𑁆𑀢𑀸 𑀢𑀬𑁄𑀧𑀺 𑀧𑀝𑀺𑀧𑀸𑀝𑀺 𑀬𑀸 𑀢𑀺𑀲𑁆𑀲𑀯𑀸𑀧𑀺𑀬𑀸 𑀲𑁂𑀢𑀼𑀫𑀢𑁆𑀣𑀓𑁂𑀦 𑀕𑀘𑁆𑀙𑀦𑁆𑀢𑀺.

𑁩𑁨. 𑀢𑀢𑁆𑀣 𑀲𑁂𑀢𑀼𑀲𑀸𑀮𑀸𑀬 𑀦𑀺𑀲𑀺𑀦𑁆𑀦𑁄 𑀓𑁄𑀘𑀺 𑀅𑀡𑁆𑀥𑁄𑀯𑀺𑀘𑀓𑁆𑀔𑀡𑁄 𑀢𑁂𑀲𑀁 𑀢𑀺𑀡𑁆𑀡𑀦𑁆𑀢𑀁 𑀓𑀼𑀫𑀸𑀭𑀸𑀦𑀁 𑀧𑀤𑀯𑀺𑀜𑁆𑀜𑀸𑀲𑀤𑁆𑀤𑀁 𑀲𑀼𑀢𑁆𑀯𑀸 𑀮𑀓𑁆𑀔𑀡𑀸𑀦𑀼𑀲𑀸𑀭𑁂𑀦 𑀉𑀧𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀏𑀢𑁂 𑀢𑀬𑁄𑀧𑀺 𑀲𑀻𑀳𑀴𑀤𑀻𑀧𑁂 𑀧𑀣𑀯𑀺𑀲𑁆𑀲𑀭𑀸 𑀪𑀯𑀺𑀲𑁆𑀲𑀦𑁆𑀢𑀻’’𑀢𑀺 𑀢𑀢𑁆𑀣 𑀦𑀺𑀲𑀺𑀦𑁆𑀦𑀸𑀦𑀁 𑀯𑁆𑀬𑀸𑀓𑀸𑀲𑀺. 𑀢𑀁𑀯𑀘𑀦𑀁 𑀧𑀘𑁆𑀙𑀸 𑀕𑀘𑁆𑀙𑀦𑁆𑀢𑁄 𑀕𑁄𑀞𑀸𑀪𑀬𑁄 𑀲𑀼𑀢𑁆𑀯𑀸 𑀇𑀢𑀭𑁂𑀲𑀁 𑀕𑀘𑁆𑀙𑀦𑁆𑀢𑀸𑀦𑀁 𑀅𑀦𑀺𑀯𑁂𑀤𑀬𑀺𑀢𑁆𑀯𑀸 𑀧𑀘𑁆𑀘𑀸𑀕𑀫𑁆𑀫 ‘‘𑀓𑀢𑀫𑁄 𑀘𑀺𑀭𑀁 𑀭𑀚𑁆𑀚𑀁 𑀓𑀸𑀭𑁂𑀲𑁆𑀲𑀢𑀺? 𑀘𑀁𑀲𑀝𑁆𑀞𑀺𑀢𑀺𑀜𑁆𑀘 𑀓𑀭𑁄𑀢𑀺’’𑀢𑀺? 𑀧𑀼𑀘𑁆𑀙𑀺𑀢𑁆𑀯𑀸 𑀧𑀘𑁆𑀙𑀺𑀫𑁄𑀢𑀺 𑀯𑀼𑀢𑁆𑀢𑁂 𑀳𑀝𑁆𑀞𑀧𑀳𑀝𑁆𑀞𑁄 𑀉𑀤𑀕𑁆𑀕𑀼𑀤𑀕𑁆𑀕𑁄 𑀲𑀻𑀖𑀢𑀭𑀁 𑀆𑀕𑀫𑁆𑀫 𑀢𑁂𑀳𑀺 𑀲𑀤𑁆𑀥𑀺𑀁 𑀕𑀘𑁆𑀙𑀦𑁆𑀢𑁄 𑀢𑀺𑀔𑀺𑀡 𑀫𑀦𑁆𑀢𑀺𑀢𑀸𑀬 𑀕𑀫𑁆𑀪𑀻𑀭𑀪𑀸𑀯𑀢𑁄 𑀘 𑀓𑀜𑁆𑀘𑀺 𑀅𑀚𑀸𑀦𑀸𑀧𑁂𑀢𑁆𑀯𑀸 𑀅𑀦𑁆𑀢𑁄𑀧𑀼𑀭𑀁 𑀧𑀸𑀯𑀺𑀲𑀺. 𑀢𑁂 𑀢𑀬𑁄𑀧𑀺 𑀧𑀢𑀺𑀭𑀽𑀧𑁂 𑀦𑀺𑀯𑀸𑀲𑁂 𑀯𑀸𑀲𑀁 𑀕𑀡𑁆𑀳𑀺𑀁𑀲𑀼.

𑁩𑁩. 𑀅𑀣 𑀓𑀦𑀺𑀝𑁆𑀞𑁄 ‘‘𑀏𑀢𑁂 𑀤𑁆𑀯𑁂𑀧𑀺 𑀅𑀧𑁆𑀧𑀸𑀬𑀼𑀓𑀢𑁆𑀢𑀸 𑀭𑀚𑁆𑀚𑁂 𑀧𑀢𑀺𑀝𑁆𑀞𑀺𑀢𑀸𑀧𑀺 𑀦 𑀘𑀺𑀭𑀁 𑀚𑀻𑀯𑀦𑁆𑀢𑀺 𑀓𑀺𑀭 𑀅𑀳𑀫𑁂𑀯 𑀢𑁂𑀲𑀁 𑀭𑀚𑁆𑀚𑀁 𑀤𑀼𑀧𑁂𑀲𑁆𑀲𑀸𑀫𑀺’’𑀢𑀺 𑀢𑀤𑀦𑀼𑀭𑀽𑀧𑁂𑀦 𑀉𑀧𑀸𑀬𑁂𑀦𑀧𑀝𑀺𑀚𑁆𑀚𑀦𑁆𑀢𑁄 𑀢𑁂𑀲𑀁 𑀭𑀚𑁆𑀚𑀮𑀸𑀪𑀸𑀬 𑀉𑀧𑀸𑀬𑀁 𑀤𑀲𑁆𑀲𑁂𑀦𑁆𑀢𑁄 𑀅𑀪𑀺𑀡𑁆𑀳𑀁 𑀫𑀢𑁆𑀢𑁂𑀢𑀺. 𑀚𑁂𑀝𑁆𑀞𑁄𑀧𑀺 𑀢𑀲𑁆𑀫𑀺𑀁 𑀅𑀢𑀺𑀧𑀺𑀬𑀸𑀲𑀫𑀸𑀦𑁄 𑀢𑁂𑀦𑁄𑀧𑀤𑀺𑀝𑁆𑀞𑀫𑁂𑀯 𑀲𑀫𑀸𑀘𑀭𑀦𑁆𑀢𑁄𑀭𑀸𑀚𑀸𑀦𑀁 𑀤𑀺𑀲𑁆𑀯𑀸 𑀮𑀤𑁆𑀥 𑀲𑀫𑁆𑀫𑀸𑀦𑁄 𑀲𑀩𑁆𑀩𑁂𑀲𑀼 𑀭𑀸𑀚𑀓𑀺𑀘𑁆𑀘𑁂𑀲𑀼 𑀧𑀼𑀩𑁆𑀩𑀗𑁆𑀕𑀫𑁄 𑀳𑀼𑀢𑁆𑀯𑀸 𑀦 𑀘𑀺𑀭𑀲𑁆𑀲𑁂𑀯 𑀭𑀸𑀚𑀯𑀮𑁆𑀮𑀪𑁄 𑀅𑀳𑁄𑀲𑀺? 𑀢𑀲𑁆𑀫𑀺𑀁 𑀓𑀸𑀮𑁂 𑀭𑀚𑁆𑀚𑀁 𑀓𑀸𑀭𑁂𑀦𑁆𑀢𑁄 𑀯𑀺𑀚𑀬 𑀭𑀸𑀚𑀸 𑀦𑀸𑀫 𑀔𑀢𑁆𑀢𑀺𑀬𑁄 𑀢𑀲𑁆𑀫𑀺𑀁 𑀧𑀲𑀦𑁆𑀦𑁄 𑀲𑀩𑁆𑀩𑁂𑀲𑀼 𑀭𑀸𑀚𑀓𑀺𑀘𑁆𑀘𑁂𑀲𑀼 𑀢𑀫𑀫𑁂𑀯 𑀧𑀥𑀸𑀦𑀪𑀽𑀢𑀁 𑀓𑀢𑁆𑀯𑀸 𑀲𑁂𑀦𑀸𑀧𑀢𑀺𑀁 𑀅𑀓𑀸𑀲𑀺.

𑁩𑁪. 𑀥𑀫𑁆𑀫𑀺𑀓𑁄 𑀧𑀦 𑀭𑀚𑁆𑀚𑁂𑀦 𑀅𑀦𑀢𑁆𑀣𑀺𑀓𑀢𑀸𑀬 𑀭𑀚𑁆𑀚𑀮𑀸𑀪𑀸𑀬 𑀘𑀺𑀢𑁆𑀢𑀫𑁆𑀧𑀺 𑀅𑀦𑀼𑀧𑁆𑀧𑀸𑀤𑁂𑀢𑁆𑀯𑀸 𑀓𑁂𑀯𑀮𑀁 𑀫𑀳𑀸𑀣𑁂𑀭𑀲𑁆𑀲 𑀅𑀦𑀼𑀲𑀸𑀲𑀦𑀫𑀢𑁆𑀢𑁂𑀦𑁂𑀯 𑀭𑀸𑀚𑀼𑀧𑀝𑁆𑀞𑀸𑀦𑀯𑁂𑀮𑀸𑀬𑀁 𑀅𑀦𑀼𑀘𑀭𑀡𑀫𑀢𑁆𑀢𑀫𑀸𑀘𑀭𑀦𑁆𑀢𑁄 𑀭𑀸𑀚𑀕𑁂𑀳𑀁 𑀧𑀯𑀺𑀲𑀺𑀢𑁆𑀯𑀸 𑀢𑀢𑁄 𑀢𑁂𑀳𑀺 𑀲𑀤𑁆𑀥𑀺𑀁 𑀦𑀺𑀓𑁆𑀔𑀫𑁆𑀫 𑀲𑀸𑀬𑀁 𑀫𑀳𑀸 𑀣𑁂𑀭𑀲𑁆𑀲 𑀯𑀺𑀳𑀸𑀭𑁂𑀬𑁂𑀯 𑀯𑀲𑀦𑁆𑀢𑁄 𑀅𑀢𑁆𑀢𑀦𑁄 𑀥𑀫𑁆𑀫𑀺𑀓𑀸𑀦𑀼𑀝𑁆𑀞𑀸𑀦𑀁 𑀅𑀳𑀸𑀧𑁂𑀢𑁆𑀯𑀸 𑀫𑀳𑀸𑀘𑁂𑀢𑀺𑀬𑁄 𑀧𑀝𑁆𑀞𑀸𑀦𑀕𑀺𑀮𑀸𑀦𑀼𑀧𑀝𑁆𑀞𑀸𑀦𑀸𑀤𑀺𑀓𑀁 |𑀑𑁦.𑁦𑁦𑁦𑁭| 𑀅𑀦𑀯𑀚𑁆𑀚 𑀥𑀫𑁆𑀫𑀁𑀘𑀭𑀦𑁆𑀢𑁄 𑀓𑀸𑀮𑀁 𑀯𑀻𑀢𑀺𑀦𑀸𑀫𑁂𑀢𑀺.

𑀢𑀤𑀸 𑀲𑀗𑁆𑀖𑀢𑀺𑀲𑁆𑀲𑁄 𑀲𑀓𑀮𑀭𑀚𑁆𑀚𑀜𑁆𑀘 𑀧𑀼𑀭𑀜𑁆𑀘 𑀅𑀢𑁆𑀢𑀦𑁄𑀳𑀢𑁆𑀣𑀕𑀢𑀁 𑀓𑀢𑁆𑀯𑀸 𑀏𑀓𑀲𑁆𑀫𑀺𑀁 𑀤𑀺𑀦𑁂 𑀮𑀤𑁆𑀥𑁄𑀓𑀸𑀲𑁄 𑀭𑀸𑀚𑀸𑀦𑀁 𑀅𑀦𑁆𑀢𑁄𑀪𑀯𑀦𑁂𑀬𑁂𑀯 𑀕𑁄𑀞𑀸𑀪𑀬𑁂𑀦 𑀫𑀸𑀭𑀸𑀧𑁂𑀢𑁆𑀯𑀸 𑀲𑀬𑀁 𑀭𑀚𑁆𑀚𑁂 𑀧𑀢𑀺𑀝𑁆𑀞𑀢𑀺.

𑀇𑀢𑀺 𑀅𑀦𑀼𑀭𑀸𑀥𑀧𑀼𑀭𑀧𑁆𑀧𑀯𑁂𑀲𑀧𑀭𑀺𑀘𑁆𑀙𑁂𑀤𑁄 𑀢𑀢𑀺𑀬𑁄.

𑁩𑁫. 𑀅𑀣 𑀕𑁄𑀞𑀸𑀪𑀬𑁄 𑀥𑀫𑁆𑀫𑀺𑀓𑀁 𑀅𑀦𑀺𑀘𑁆𑀙𑀸𑀫𑀸𑀦𑀫𑁆𑀧𑀺 𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑁂 𑀞𑀧𑁂𑀢𑁆𑀯𑀸 𑀆𑀬𑀢𑀺𑀁 𑀅𑀧𑁂𑀓𑁆𑀔𑀫𑀸𑀦𑁄 𑀲𑀬𑀁 𑀪𑀡𑁆𑀟𑀸𑀕𑀸𑀭𑀺𑀓𑁄 𑀅𑀳𑁄𑀲𑀺. 𑀅𑀣 𑀲𑀗𑁆𑀖𑀢𑀺𑀲𑁆𑀲𑁄 𑀭𑀸𑀚𑀸 𑀩𑀳𑀼𑀁 𑀧𑀼𑀜𑁆𑀜𑁆𑀘 𑀅𑀧𑀼𑀜𑁆𑀜𑁆𑀘 𑀧𑀲𑀯𑀦𑁆𑀢𑁄 𑀚𑀫𑁆𑀩𑀼𑀨𑀮𑀧𑀸𑀓𑀓𑀸𑀮𑁂 𑀲𑀲𑁂𑀦𑁄 𑀲𑀸𑀫𑀘𑁆𑀘𑁄 𑀲𑀪𑁄𑀭𑁄𑀥𑁄 𑀅𑀪𑀺𑀡𑁆𑀳𑀁 𑀧𑀸𑀘𑀻𑀦 𑀤𑁂𑀲𑀁 𑀕𑀦𑁆𑀢𑁆𑀯𑀸 𑀚𑀫𑁆𑀩𑀼𑀨𑀮𑀸𑀦𑀺 𑀔𑀸𑀤𑀢𑀺. 𑀭𑀜𑁆𑀜𑁄 𑀬𑁂𑀪𑀼𑀬𑁆𑀬𑁂𑀦 𑀕𑀫𑀦𑀸 𑀕𑀫𑀦𑁂𑀦 𑀉𑀧𑀤𑁆𑀤𑀼𑀢𑀸 𑀭𑀝𑁆𑀞𑀯𑀸𑀲𑀺𑀦𑁄 𑀭𑀸𑀚𑀼𑀧𑀪𑁄𑀕𑀸𑀭𑀳𑁂𑀲𑀼 𑀚𑀫𑁆𑀩𑀼𑀨𑀮𑁂𑀲𑀼 𑀯𑀺𑀲𑀁 𑀬𑁄𑀚𑁂𑀲𑀼𑀁. 𑀅𑀣 𑀲𑁄 𑀲𑀗𑁆𑀖𑀢𑀺𑀲𑁆𑀲𑁄 𑀭𑀸𑀚𑀸 𑀢𑁂𑀦 𑀯𑀺𑀲𑁂𑀦 𑀢𑀢𑁆𑀣𑁂𑀯 𑀓𑀸𑀮𑀫𑀓𑀸𑀲𑀺.

𑁩𑁬. 𑀅𑀣 𑀕𑁄𑀞𑀸𑀪𑀬𑁄 𑀅𑀡𑁆𑀥𑀯𑀺𑀘𑀓𑁆𑀔𑀡𑀲𑁆𑀲 𑀯𑀘𑀦𑀁 𑀅𑀦𑀼𑀲𑁆𑀲𑀭𑀦𑁆𑀢𑁄 𑀅𑀦𑀼𑀓𑁆𑀓𑀫𑁂𑀦 𑀭𑀚𑁆𑀚𑀁 𑀤𑀸𑀧𑁂𑀢𑁆𑀯𑀸 𑀧𑀘𑁆𑀙𑀸 𑀅𑀳𑀁 𑀲𑀼𑀧𑁆𑀧𑀢𑀺𑀝𑁆𑀞𑁄 𑀪𑀯𑀺𑀲𑁆𑀲𑀸𑀫𑀺’𑀢𑀺 𑀫𑀜𑁆𑀜𑀫𑀸𑀦𑁄 𑀲𑀸𑀫𑀘𑁆𑀘𑁄 𑀲𑀲𑁂𑀦𑁄 𑀲𑀗𑁆𑀖𑀩𑁄𑀥𑀺𑀓𑀼𑀫𑀸𑀭𑀁 𑀭𑀚𑁆𑀚𑁂𑀦 𑀦𑀺𑀫𑀦𑁆𑀢𑁂𑀲𑀺. 𑀲𑁄 𑀢𑁂𑀫𑀺𑀬 𑀫𑀳𑀸𑀩𑁄𑀥𑀺𑀲𑀢𑁆𑀢𑁂𑀦 𑀤𑀺𑀝𑁆𑀞𑀸𑀤𑀻𑀦𑀯𑀢𑁆𑀢𑀸 𑀭𑀚𑁆𑀚𑀲𑀼𑀔𑀸𑀧𑀭𑀺𑀘𑁆𑀘𑀸𑀕𑀸𑀦𑀼𑀪𑀽𑀢𑀁 𑀫𑀳𑀦𑁆𑀢𑀁 𑀤𑀼𑀓𑁆𑀔𑀚𑀸𑀮𑀁 𑀅𑀦𑀼𑀲𑁆𑀲𑀭𑀺𑀢𑁆𑀯𑀸 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀺𑀬𑀫𑀸𑀦𑁄𑀧𑀺 𑀧𑀝𑀺𑀓𑁆𑀔𑀺𑀧𑀺𑀬𑁂𑀯 𑀅𑀪𑀬𑁄 𑀕𑀸𑀫𑀦𑀺𑀕𑀫𑀭𑀸𑀚𑀥𑀸𑀦𑀻𑀲𑀼 𑀲𑀩𑁆𑀩𑁂𑀧𑀺 𑀫𑀦𑀼𑀲𑁆𑀲𑁂 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀦𑀸𑀦𑀸𑀧𑁆𑀧𑀓𑀸𑀭𑀁 𑀬𑀸𑀘𑀫𑀸𑀦𑁄𑀧𑀺 𑀲𑀫𑁆𑀧𑀝𑀺𑀘𑁆𑀙𑀸𑀧𑁂𑀢𑀼𑀁 𑀦𑀸𑀲𑀓𑁆𑀔𑀺. 𑀅𑀣 𑀲𑀩𑁆𑀩𑁂𑀧𑀺 𑀭𑀝𑁆𑀞𑀯𑀸𑀲𑀺𑀦𑁄 𑀲𑀸𑀫𑀘𑁆𑀘𑀸𑀫𑀳𑀸𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀫𑀳𑀸 𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸 𑀲𑀗𑁆𑀖 𑀫𑀚𑁆𑀛𑁂 𑀲𑀗𑁆𑀖𑀩𑁄𑀥𑀺𑀓𑀼𑀫𑀸𑀭𑁄 𑀫𑀳𑀸 𑀲𑀗𑁆𑀖𑀁 𑀪𑀽𑀫𑀺𑀬𑀁 𑀦𑀺𑀧𑀚𑁆𑀚 𑀦𑀫𑀲𑁆𑀲𑀺𑀢𑁆𑀯𑀸 𑀮𑀤𑁆𑀥𑁄𑀓𑀸𑀲𑁄 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀢𑁆𑀯𑀸 𑀏𑀯𑀁 𑀯𑀢𑁆𑀢𑀼𑀫𑀸𑀭𑀪𑀻.

𑁩𑁭. 𑀅𑀬𑀜𑁆𑀳𑀺 𑀭𑀸𑀚𑀮𑀓𑁆𑀔𑀻𑀦𑀸𑀫 𑀬𑀣𑀸 𑀬𑀣𑀸 𑀤𑀺𑀧𑁆𑀧𑀢𑁂, 𑀢𑀣𑀸 𑀢𑀣𑀸 𑀓𑀧𑁆𑀧𑀼𑀭𑀤𑀻𑀧𑀲𑀺𑀔𑁂𑀯 𑀓𑀚𑁆𑀚𑀺𑀮𑀁𑀫𑀮𑀺𑀦𑀫𑁂𑀯 𑀓𑀫𑁆𑀫𑀚𑀸𑀢𑀁 𑀓𑁂𑀯𑀮𑀫𑀼𑀩𑁆𑀩𑀫𑀢𑀺. 𑀢𑀣𑀸𑀳𑀺 𑀅𑀬𑀁 𑀲𑀁𑀯𑀥𑀦𑀯𑀸𑀭𑀺𑀥𑀸𑀭𑀸 𑀢𑀡𑁆𑀳𑀸𑀯𑀺𑀲𑀯𑀮𑁆𑀮𑀻𑀦𑀁, 𑀦𑁂𑀦𑀸𑀤 𑀫𑀥𑀼𑀭𑀪𑀻𑀢𑀺𑀓𑀸 𑀅𑀬𑀁 𑀇𑀡𑁆𑀤𑁆𑀭𑀺𑀬𑀫𑀺𑀕𑀸𑀦𑀁, 𑀧𑀭𑀸𑀫𑀸𑀲𑀥𑀼𑀫𑀮𑁂𑀔𑀸 𑀲𑀼𑀘𑀭𑀺𑀢 𑀘𑀺𑀢𑁆𑀢𑀓𑀫𑁆𑀫𑀲𑁆𑀲 𑀯𑀺𑀩𑁆𑀪𑀫𑀲𑁂𑀬𑁆𑀬𑀸 𑀫𑁄𑀳𑀦𑀺𑀤𑁆𑀤𑀸𑀦𑀁 𑀢𑀺𑀫𑀺𑀭𑀼𑀕𑁆𑀕𑀢𑀺 𑀧𑀜𑁆𑀜𑀸𑀤𑀺𑀝𑁆𑀞𑀻𑀦𑀁, 𑀧𑀼𑀭𑀲𑁆𑀲𑀭𑀧𑀢𑀸𑀓𑀸 𑀅𑀯𑀺𑀦𑀬𑀫𑀳𑀸𑀲𑁂𑀦𑀸𑀬, 𑀉𑀧𑁆𑀧𑀢𑁆𑀢𑀺𑀦𑀺𑀦𑁆𑀦𑀦𑀸 𑀓𑁄𑀥𑀯𑁂𑀕 𑀓𑀼𑀫𑁆𑀪𑀺𑀮𑀸𑀦𑀁, 𑀆𑀧𑀸𑀦𑀪𑀽𑀫𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀯𑀤𑀦𑀁. 𑀲𑀁𑀕𑀻𑀢𑀺 𑀲𑀸𑀮𑀸 𑀇𑀲𑁆𑀲𑀭𑀺𑀬 𑀯𑀺𑀓𑀸𑀭𑀦𑀸𑀝𑀓𑀸𑀦𑀁 𑀆𑀯𑀸𑀲𑀤𑀭𑀻𑀤𑁄𑀲𑀸𑀲𑀺𑀯𑀺𑀲𑀸𑀦𑀁, 𑀉𑀲𑁆𑀲𑀸𑀭𑀡𑀯𑁂𑀢𑁆𑀢𑀮𑀢𑀸 𑀲𑀧𑁆𑀧𑀼𑀭𑀺𑀲𑀯𑁄𑀳𑀸𑀭𑀸𑀦𑀁, 𑀅𑀓𑀸𑀮𑀚𑀤𑀸𑀕𑀫𑁄 𑀲𑀼𑀘𑀭𑀺𑀢 𑀳𑀁𑀲𑀸𑀦𑀁, 𑀧𑀢𑁆𑀣𑀸𑀯𑀦𑀸 𑀓𑀧𑀝𑀦𑀸𑀝𑀓𑀸𑀦𑀁, 𑀓𑀤𑀮𑀺𑀓𑀸 𑀓𑀸𑀫𑀓𑀭𑀺𑀦𑁄 𑀯𑀚𑁆𑀛𑀯𑀸𑀮𑀸 𑀲𑀸𑀥𑀼𑀪𑀸𑀯𑀲𑁆𑀲, 𑀭𑀸𑀳𑀼𑀫𑀼𑀔𑀁 𑀥𑀫𑁆𑀫𑀘𑀡𑁆𑀤 |𑀑𑁦.𑁦𑁦𑁦𑁮| 𑀫𑀡𑁆𑀟𑀮𑀲𑁆𑀲, 𑀦𑀳𑀺 𑀢𑀁 𑀧𑀲𑁆𑀲𑀸𑀫𑀺 𑀬𑁄𑀳𑀺 𑀅𑀧𑀭𑀺𑀘𑀺𑀢𑀸𑀬𑀸𑀧𑀺 𑀏𑀢𑀸𑀬 𑀦𑀺𑀩𑁆𑀪𑀭𑀫𑀼𑀧𑀕𑀼𑀮𑁆𑀳𑁄 𑀦 𑀯𑀺𑀧𑁆𑀧𑀮𑀤𑁆𑀥𑁄, 𑀅𑀧𑀺𑀘, 𑀅𑀪𑀺𑀲𑁂𑀓𑀲𑀫𑀬𑁂 𑀭𑀸𑀚𑀜𑁆𑀜𑀸𑀦𑀁 𑀫𑀗𑁆𑀕𑀮𑀓𑀮𑀲𑀚𑀮𑁂𑀳𑀺 𑀯𑀺𑀬 𑀯𑀺𑀓𑁆𑀔𑀸𑀮𑀦𑀫𑀼𑀧𑀬𑀸𑀢𑀺 𑀤𑀓𑁆𑀔𑀺𑀜𑁆𑀜𑀁 𑀅𑀕𑁆𑀕𑀺𑀳𑀼𑀢𑀢𑀥𑀼𑀫𑁂𑀦𑁂𑀯 𑀫𑀮𑀺𑀦𑀻𑀪𑀯𑀢𑀺 𑀳𑀤𑀬𑀁 𑀧𑀼𑀭𑁄𑀳𑀺𑀢 𑀓𑀼𑀲𑀕𑁆𑀕 𑀲𑀫𑀚𑁆𑀚𑀢𑁂𑀦 𑀯𑀺𑀬 𑀅𑀧𑀦𑀺𑀬𑀢𑁂 𑀢𑀺𑀢𑀺𑀓𑁆𑀔𑀸, 𑀉𑀡𑁆𑀳𑀻𑀲 𑀧𑀝𑁆𑀝 𑀩𑀡𑁆𑀥𑀦𑁂𑀦 𑀯𑀺𑀬 𑀙𑀸𑀤𑀻𑀬𑀢𑀻 𑀚𑀭𑀸𑀕𑀫𑀤𑀲𑁆𑀲𑀦𑀁, 𑀆𑀢𑀧𑀢𑁆𑀢 𑀫𑀡𑁆𑀟𑀮𑁂𑀦 𑀯𑀺𑀬 𑀢𑀺𑀭𑁄𑀓𑀭𑀻𑀬𑀢𑀺 𑀧𑀭𑀮𑁄𑀓𑀸𑀧𑁂𑀓𑁆𑀔𑀡𑀁, 𑀘𑀸𑀫𑀭𑀧𑀯𑀦𑁂𑀦 𑀯𑀺𑀬 𑀤𑀼𑀭𑀫𑀼𑀤𑁆𑀥𑀼𑀬𑀢𑁂 𑀲𑀘𑁆𑀘𑀸𑀤𑀺𑀢𑀸 𑀯𑁂𑀢𑁆𑀢𑀮𑀢𑀸𑀧𑁆𑀧𑀳𑀸𑀭𑁂𑀦 𑀯𑀺𑀬 𑀤𑀼𑀭𑀫𑀧𑀬𑀦𑁆𑀢𑀺 𑀲𑀕𑁆𑀕𑀼𑀡𑀸 𑀏𑀓𑁂 𑀭𑀚𑁆𑀚𑀲𑀺𑀭𑀺 𑀫𑀤𑀺𑀭𑀸 𑀫𑀤𑀫𑀢𑁆𑀢𑀸 𑀲𑀓𑀢𑁆𑀣𑀦𑀺𑀧𑁆𑀨𑀸𑀤𑀦𑀧𑀭𑁂𑀳𑀺 𑀥𑀦𑀧𑀺𑀲𑀺𑀢𑀸𑀖𑀸𑀲𑀕𑀺𑀚𑁆𑀛𑁂𑀳𑀺 𑀲𑀳𑀸𑀦𑀮𑀻𑀦𑀻𑀩𑀓𑁂𑀳𑀺 𑀤𑀽𑀢𑀁 𑀯𑀺𑀦𑁄𑀤𑀦𑀦𑁆𑀢𑀺, 𑀧𑀭𑀤𑀸𑀭𑀸𑀪𑀺𑀕𑀫𑀦𑀁 𑀯𑀺𑀤𑁆𑀥𑀢𑀸𑀢𑀺, 𑀫𑀻𑀕𑀯𑀦 𑀧𑀭𑀺𑀲𑁆𑀲𑀫𑁄𑀢𑀺, 𑀲𑀼𑀭𑀸𑀧𑀸𑀦𑀁 𑀯𑀺𑀮𑀸𑀲𑁄𑀢𑀺, 𑀦𑀺𑀘𑁆𑀘𑀧𑁆𑀧𑀫𑀢𑁆𑀢𑀢𑀸, 𑀲𑀼𑀭𑀪𑀸𑀯𑁄𑀢𑀺 𑀲𑀤𑀸𑀭𑀧𑁆𑀧𑀺𑀘𑁆𑀘𑀸𑀕𑀁 𑀅𑀯𑁆𑀬𑀲𑀦𑀺𑀢𑀸𑀦𑀺, 𑀕𑀼𑀭𑀼𑀯𑀘𑀦𑀸𑀯𑀥𑀻𑀭𑀡𑀁 𑀅𑀧𑀭𑀧𑁆𑀧𑀦𑁂𑀬𑀢𑁆𑀢𑀫𑀺𑀢𑀺 𑀅𑀚𑀺𑀢𑀳𑀘𑁆𑀘𑀢𑀁 𑀲𑀼𑀔𑁄𑀧𑀲𑁂𑀯𑀢𑁆𑀢𑀫𑀻𑀢𑀺, 𑀦𑀘𑁆𑀘𑀕𑀻𑀢 𑀕𑀡𑀸𑀓𑀸𑀦𑀼𑀲𑀢𑁆𑀢𑀺 𑀭𑀲𑀺𑀓𑀢𑁂𑀳𑀺 𑀧𑀭𑀺𑀪𑀯𑀲𑀳𑀢𑁆𑀢𑀁 𑀔𑀫𑁂𑀢𑀺, 𑀲𑁂𑀭𑀻𑀪𑀸𑀯𑀁 𑀧𑀡𑁆𑀟𑀺𑀘𑁆𑀘𑀸𑀫𑀺𑀢𑀺 𑀯𑀡𑁆𑀤𑀺𑀚𑀦 𑀦𑀯𑀘𑀦𑀁 𑀬𑀲𑁂𑀁𑀖𑁄𑀲𑁄𑀢𑀺 𑀢𑀭𑀮𑀢𑀸 𑀉𑀲𑁆𑀲𑀸𑀳𑁄𑀢𑀺. 𑀅𑀯𑀺𑀲𑁂𑀲𑀜𑁆𑀜𑀼𑀢𑁆𑀢𑀁 𑀅𑀧𑀓𑁆𑀔𑀧𑀸𑀢𑀺𑀢𑁆𑀢𑀫𑀺𑀢𑀺? 𑀏𑀯 𑀤𑁄𑀲𑀕𑀡𑀫𑁆𑀧𑀺 𑀕𑀼𑀡𑀧𑀓𑁆𑀔𑁂 𑀅𑀚𑁆𑀛𑀸𑀭𑁄𑀧𑀬𑀦𑁆𑀢𑁂𑀳𑀺 𑀲𑀬𑀫𑁆𑀧𑀺 𑀅𑀦𑁆𑀢𑁄 𑀳 𑀲𑀦𑁆𑀢𑁂𑀳𑀺 𑀧𑀢𑀸𑀭𑀡𑀓𑀼𑀲𑀮𑁂𑀳𑀺 𑀥𑀼𑀢𑁆𑀢𑁂𑀳𑀺 𑀅𑀫𑀸𑀦𑀼𑀲𑁄𑀘𑀺𑀢𑀸𑀳𑀺 𑀣𑁄𑀫𑀸𑀦𑀸𑀳𑀺 𑀧𑀢𑀸𑀭𑀺𑀬𑀫𑀸𑀦𑀸, 𑀘𑀺𑀢𑁆𑀢𑀫𑀤𑀫𑀢𑁆𑀢 𑀘𑀺𑀢𑁆𑀢𑀸 𑀦𑀺𑀘𑁆𑀘𑁂𑀢 𑀦 𑀢𑀸𑀬 𑀢𑀣𑁂𑀢𑀺 𑀅𑀢𑁆𑀢𑀦𑀺 𑀅𑀚𑁆𑀛𑀸𑀭𑁄𑀧𑀬𑀦𑁆𑀢𑀸 𑀅𑀮𑀺𑀓𑀸𑀪𑀺𑀫𑀸𑀦𑀁 𑀫𑀘𑁆𑀘𑀥𑀫𑁆𑀫𑀲𑀫𑀸𑀦𑀸𑀧𑀺 𑀤𑀺𑀩𑁆𑀩𑀁 𑀲𑀸𑀯𑀢𑀺𑀡𑁆𑀡𑀫𑀺𑀯 𑀅𑀫𑀸𑀦𑀼𑀲𑀫𑀺𑀯 𑀅𑀢𑁆𑀢𑀸𑀦 𑀫𑀜𑁆𑀜𑀫𑀸𑀦𑀸 𑀆𑀭𑀥𑀤𑀺𑀩𑁆𑀩𑁄𑀘𑀺𑀢𑀓𑀺𑀭𑀬𑀸𑀦𑀼 𑀪𑀸𑀯𑀸 𑀲𑀩𑁆𑀩𑀚𑀦𑁄 𑀧𑀪𑀲𑀦𑀻𑀬 𑀪𑀸𑀯𑀫𑀼𑀧𑀬𑀦𑁆𑀢𑀺. 𑀅𑀢𑁆𑀢 𑀫𑀺𑀮𑀫𑁆𑀩𑀦𑀜𑁆𑀘 𑀅𑀦𑀼 𑀚𑀻𑀯𑀺𑀚𑀦𑁂𑀦 𑀓𑀭𑀻𑀬𑀫𑀸𑀦𑀁 𑀅𑀪𑀺𑀦𑀡𑁆𑀤𑀦𑁆𑀢𑀺.

𑁩𑁮. 𑀫𑀸𑀦𑀲𑀸 𑀤𑁂𑀯𑀢𑀸𑀚𑁆𑀛𑀸𑀭𑁄𑀧𑀡𑀧𑁆𑀧𑀢𑀸𑀭𑀡 𑀲𑀫𑁆𑀪𑀽𑀢 𑀲𑀫𑁆𑀪𑀸𑀯𑀦𑁄 𑀧𑀳𑀢𑀜𑁆𑀘 𑀅𑀦𑁆𑀢𑁄 𑀧𑀯𑀺𑀝𑁆𑀞 𑀅𑀧𑀭𑀪𑀼𑀚𑀬𑀼𑀕𑀁 𑀯𑀺𑀬 𑀅𑀢𑁆𑀢𑀦𑁄 𑀩𑀸𑀳𑀼𑀬𑀼𑀕𑀁 𑀲𑀫𑁆𑀪𑀸𑀯𑀬𑀦𑁆𑀢𑀺. 𑀢𑀘𑀦𑁆𑀢𑀭𑀺𑀢 𑀮𑁄𑀘𑀦𑀁𑀲𑀓𑀮𑀮𑀸𑀝 𑀫𑀸𑀲𑀁𑀓𑀦𑁆𑀢𑀺, 𑀅𑀮𑀺𑀓𑀲𑀫𑁆𑀪𑀸𑀯𑀦𑀸𑀪𑀺𑀫𑀸𑀦𑀪𑀭𑀺𑀢𑀸 𑀦 𑀦𑀫𑀲𑁆𑀲𑀦𑁆𑀢𑀺 𑀤𑁂𑀯𑀢𑀸𑀬𑁄 𑀦 𑀧𑀽𑀚𑀬𑀦𑁆𑀢𑀺 𑀲𑀫𑀡 𑀩𑁆𑀭𑀸𑀳𑁆𑀫𑀡𑁂 𑀦 𑀫𑀸𑀦𑀬𑀦𑁆𑀢𑀻 𑀫𑀸𑀦𑀦𑀻𑀬𑁂, 𑀦 𑀉𑀧𑀢𑀺𑀝𑁆𑀞𑀦𑁆𑀢𑀺 𑀕𑀼𑀭𑀼𑀤𑀲𑁆𑀲𑀦𑁂𑀧𑀺 𑀅𑀦𑀢𑁆𑀣𑀓𑀸𑀬𑀸 𑀲𑀸𑀦𑁆𑀢𑀭𑀻𑀢, 𑀯𑀺𑀲𑀬𑁄 𑀧𑀪𑁄𑀕𑀲𑀼𑀔𑀸𑀢𑀺 𑀅𑀧𑀳𑀲𑀦𑁆𑀢𑀺 𑀬𑀢𑀺𑀦𑁄? 𑀚𑀭𑀸𑀪𑀺 𑀪𑀯𑀧𑀮𑀧𑀺𑀫𑀺𑀢𑀺 𑀦 𑀲𑀼𑀡𑀦𑁆𑀢𑀺 𑀯𑀼𑀤𑁆𑀥𑀚𑀦𑀼𑀧𑀤𑁂𑀲𑀁, 𑀅𑀢𑁆𑀢𑀦𑁄 𑀧𑀜𑁆𑀜𑀸 𑀧𑀭𑀺𑀪𑀯𑁄𑀢𑀺 𑀉𑀲𑀼𑀲𑀦𑁆𑀢𑀺 𑀲𑀘𑀺𑀯𑁄 𑀧𑀳𑁂𑀲𑀲𑁆𑀲,𑀓𑀼𑀜𑁆𑀚𑀦𑁆𑀢𑀺 𑀏𑀓𑀦𑁆𑀢 𑀳𑀺𑀢𑀯𑀸𑀤𑀺𑀦𑀁 𑀏𑀯𑀫𑀸𑀤𑀺𑀦𑀸 𑀓𑀸𑀓𑀡𑁂𑀦 𑀩𑀳𑀼𑀦𑁆𑀦𑀁 𑀤𑁄𑀲𑀸𑀦𑀁 𑀫𑀸𑀓𑀭 𑀪𑀽𑀢𑀁𑀭𑀚𑁆𑀚𑀻𑀯𑀺𑀪𑀯𑀁 𑀅𑀬𑀁 𑀦 𑀇𑀘𑁆𑀙𑀸𑀫𑀻’𑀢𑀺 𑀅𑀯𑁄𑀘.

𑁩𑁯. 𑀅𑀣 𑀫𑀳𑀸𑀚𑀦𑁂𑀦 𑀲𑀸𑀤𑀭 𑀫𑀚𑁆𑀛𑁂𑀲𑀺𑀢𑁄 𑀫𑀳𑀸𑀲𑀗𑁆𑀖𑁄 𑀓𑀼𑀫𑀸𑀭𑀪𑀺𑀫𑀼𑀔𑁄 𑀳𑀼𑀢𑁆𑀯𑀸 ‘‘𑀫𑀳𑀸𑀪𑀸𑀕𑀥𑁂𑀬𑁆𑀬! 𑀣𑀦𑀘𑀼𑀘𑀼𑀓𑁂 𑀮𑀕𑁆𑀕𑀺𑀢𑀸𑀚𑀮𑀼𑀓 𑀢𑀺𑀓𑁆𑀔𑀟𑀲𑀦𑁂𑀦𑀢𑀢𑁆𑀣 𑀯𑁂𑀤𑀦𑀼𑀧𑁆𑀧𑀸𑀤𑀬𑀦𑁆𑀢𑀺 𑀮𑁄𑀳𑀺𑀢𑀫𑁂𑀯 𑀆𑀓𑀟𑁆𑀠𑀢𑀺, 𑀤𑀸𑀭𑀓𑁄 𑀧𑀦 𑀓𑁄𑀫𑀮𑁂𑀦 𑀫𑀼𑀔𑀧𑀼𑀝𑁂𑀦𑀫𑀸𑀢𑀼 𑀲𑀼𑀔𑀲𑀜𑁆𑀜𑀁 𑀉𑀧𑁆𑀧𑀸𑀤𑀬𑀦𑁆𑀢𑁄 𑀔𑀻𑀭𑀫𑁂𑀯 𑀅𑀯𑁆𑀳𑁂𑀢𑀺.

𑁪𑁦. |𑀑𑁦.𑁦𑁦𑁦𑁯| 𑀏𑀯𑀫𑁂𑀯 𑀭𑀚𑁆𑀚𑀯𑀺𑀪𑀯𑀁 𑀧𑀢𑁆𑀢𑁄 𑀅𑀥𑀻𑀭𑁄 𑀩𑀸𑀮𑁄 𑀩𑀳𑀼𑀁 𑀅𑀧𑀼𑀜𑁆𑀜𑀫𑁂𑀯 𑀲𑀜𑁆𑀘𑀺𑀡𑀸𑀦𑀺, 𑀫𑁂𑀥𑀸𑀯𑀺 𑀥𑀺𑀭𑀧𑀼𑀭𑀺𑀲𑁄 𑀧𑀦 𑀆𑀬𑀼𑀲𑀗𑁆𑀔𑀸𑀭𑀲𑁆𑀲 𑀤𑀼𑀩𑁆𑀩𑀮𑀢𑁆𑀢𑀜𑁆𑀘 𑀥𑀦𑀲𑀜𑁆𑀘𑀬𑀲𑁆𑀲 𑀦𑀺𑀲𑁆𑀲𑀸𑀭𑀢𑁆𑀢𑀜𑁆𑀘 𑀧𑀜𑁆𑀜𑀸𑀬 𑀉𑀧 𑀧𑀭𑀺𑀓𑁆𑀔𑀺𑀢𑁆𑀯𑀸 𑀤𑀲 𑀓𑀼𑀲𑀮𑀓𑀫𑁆𑀫𑀸𑀦𑀺 𑀧𑀽𑀭𑁂𑀦𑁆𑀢𑁄 𑀢𑀸𑀤𑀺𑀲𑁂𑀦 𑀫𑀳𑀢𑀸 𑀪𑁄𑀕𑀓𑁆𑀔𑀡𑁆𑀥𑁂𑀦 𑀫𑀳𑀦𑁆𑀢𑀁 𑀓𑀼𑀲𑀮𑀭𑀸𑀲𑀺𑀁 𑀉𑀧𑀘𑀺𑀡𑀸𑀢𑀺, 𑀢𑁆𑀯𑀫𑀲𑀺𑀓𑀢𑀸𑀥𑀺 𑀓𑀸𑀭𑁄 𑀫𑀳𑀸𑀲𑀢𑁆𑀢𑀥𑀼𑀭𑀡𑁆𑀥𑀭𑁄, 𑀏𑀢𑀸𑀤𑀺𑀲𑀁 𑀧𑀼𑀜𑁆𑀜𑀸𑀬𑀢𑀦𑀝𑁆𑀞𑀸𑀦𑀁 𑀮𑀤𑁆𑀥𑀸 𑀥𑀫𑁆𑀫𑁂𑀦 𑀲𑀫𑁂𑀦 𑀮𑁄𑀓𑀁 𑀧𑀭𑀺𑀧𑀸𑀮𑁂𑀦𑁆𑀢𑁄 𑀲𑀼𑀕𑀢𑀲𑀸𑀲𑀦𑀁 𑀧𑀕𑁆𑀕𑀡𑁆𑀳𑀦𑁆𑀢𑁄 𑀤𑀸𑀦𑀧𑀸𑀭𑀫𑀺𑀓𑁄𑀝𑀺𑀧𑁆𑀧𑀢𑁆𑀢𑀁 𑀓𑀢𑁆𑀯𑀸 𑀧𑀘𑁆𑀙𑀸 𑀅𑀪𑀺𑀦𑀺𑀓𑁆𑀔𑀫𑀡𑀜𑁆𑀘 𑀓𑀭𑁄𑀦𑁆𑀢𑁄 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑁂 𑀧𑀭𑀺𑀧𑀸𑀘𑁂𑀳𑀻’’𑀢𑀺 𑀅𑀦𑀼𑀲𑀸𑀲𑀺.

𑁪𑁧. 𑀅𑀣 𑀲𑁄 𑀫𑀳𑀚𑁆𑀛𑀸𑀲𑀬𑁄 𑀧𑀼𑀭𑀺𑀲𑀯𑀭𑁄 𑀫𑀳𑀸𑀲𑀗𑁆𑀖𑀲𑁆𑀲 𑀅𑀦𑀼𑀲𑀸𑀲𑀦𑀺𑀁 𑀫𑀤𑁆𑀤𑀺𑀢𑀼 𑀫𑀲𑀫𑀡𑁆𑀣𑁄 𑀅𑀥𑀺𑀯𑀸𑀲𑁂𑀲𑀻. 𑀅𑀦𑀦𑁆𑀢𑀭𑀜𑁆𑀘 𑀫𑀳𑀸𑀚𑀦𑀓𑀸𑀬𑁄 𑀲𑀗𑁆𑀖𑀲𑁆𑀲 𑀅𑀦𑀼𑀜𑁆𑀜𑀸𑀬 𑀲𑀓𑀮𑀁 𑀲𑀻𑀮𑀤𑀻𑀧𑀁 𑀏𑀓𑀘𑁆𑀙𑀢𑁆𑀢𑀁 𑀓𑀢𑁆𑀯𑀸 𑀅𑀪𑀺𑀲𑀺𑀜𑁆𑀘𑀺𑀬 𑀥𑀫𑁆𑀫𑀺𑀓 𑀲𑀺𑀭𑀺𑀲𑀗𑁆𑀖𑀩𑁄𑀥𑀺𑀭𑀸𑀚𑀸𑀢𑀺 𑀯𑁄𑀳𑀸𑀭𑀁 𑀧𑀝𑁆𑀞𑀧𑁂𑀲𑀺 𑀕𑁄𑀞𑀸𑀪𑀬𑀜𑁆𑀘 𑀲𑁂𑀦𑀸𑀧𑀢𑀺𑀝𑁆𑀞𑀸𑀦𑁂 𑀞𑀧𑁂𑀲𑀺.

𑁪𑁨. 𑀤𑀸𑀦𑀁 𑀅𑀤𑀸 𑀥𑀸𑀭𑀬𑀺 𑀦𑀺𑀘𑁆𑀘𑀲𑀻𑀮𑀁,

𑀯𑀳𑀻 𑀢𑀺𑀢𑀺𑀓𑁆𑀔𑀁 𑀪𑀚𑀺 𑀅𑀧𑁆𑀧𑀫𑀸𑀤𑀁;

𑀧𑀚𑀸 𑀳𑀺𑀢𑀚𑁆𑀛𑀸𑀲𑀬 𑀲𑁄𑀫𑁆𑀫𑀭𑀽𑀧𑁄,

𑀥𑀫𑁆𑀫𑁄 𑀘 𑀲𑁄 𑀯𑀺𑀕𑁆𑀕𑀪𑀯𑀸 𑀯𑀺𑀭𑁄𑀘𑀻.

𑁪𑁩. 𑀯𑀺𑀜𑁆𑀜𑀸𑀬 𑀮𑁄𑀓𑀲𑁆𑀲 𑀳𑀺 𑀲𑁄 𑀲𑀪𑀸𑀯𑀁,

𑀧𑀥𑀸𑀦𑀯𑀢𑁆𑀢𑀸𑀦𑀼 𑀕𑀢𑀺𑀧𑁆𑀧𑀥𑀸𑀦𑀁;

𑀦𑀺𑀥𑀸𑀢𑀼𑀓𑀸𑀫𑁄 𑀚𑀦𑁆𑀢𑀸𑀲𑀼 𑀥𑀫𑁆𑀫𑀁,

𑀲𑀬𑀫𑁆𑀧𑀺 𑀥𑀫𑁆𑀫𑀸 𑀯𑀭𑀡𑀫𑁆𑀳𑀺 𑀲𑀢𑁆𑀢𑁄.

𑀇𑀢𑀺 𑀭𑀚𑁆𑀚𑀸𑀪𑀺𑀲𑁂𑀓 𑀧𑀭𑀺𑀘𑁆𑀙𑁂𑀤𑁄 𑀘𑀢𑀼𑀢𑁆𑀣𑁄.

𑁪𑁪. 𑀲𑁄 𑀭𑀸𑀚𑀸 𑀫𑀳𑀸 𑀯𑀺𑀳𑀸𑀭𑁂 𑀫𑀳𑀕𑁆𑀖 𑀫𑀳𑀸𑀯𑀺𑀲𑀸𑀮𑀁 𑀲𑀮𑀸𑀓𑀕𑁆𑀕𑀁 𑀓𑀸𑀭𑀸𑀧𑁂𑀢𑁆𑀯𑀸 𑀅𑀦𑁂𑀓𑀲𑀳𑀲𑁆𑀲𑀸𑀦𑀁 𑀪𑀺𑀓𑁆𑀔𑀽𑀦𑀁 𑀦𑀺𑀘𑁆𑀘𑀁 𑀲𑀮𑀸𑀓 𑀪𑀢𑁆𑀢𑀁 𑀧𑀝𑁆𑀞𑀧𑁂𑀲𑀺. 𑀫𑀸𑀢𑀼𑀮𑀫𑀳𑀸𑀣𑁂𑀭𑀲𑁆𑀲𑀁𑀘 𑀲𑀓𑀦𑀸𑀫 𑀥𑁂𑀬𑁆𑀬𑁂𑀦 𑀫𑀳𑀦𑁆𑀢𑀁 𑀧𑀭𑀺𑀯𑁂𑀡 𑀯𑀺𑀳𑀸𑀭𑀁 𑀓𑀸𑀭𑀸𑀧𑁂𑀢𑁆𑀯𑀸 𑀅𑀦𑁂𑀓𑁂𑀳𑀺 𑀓𑀧𑁆𑀧𑀺𑀬𑀪𑀡𑁆𑀟𑁂𑀳𑀺 𑀲𑀤𑁆𑀥𑀺𑀁 𑀲𑀧𑀭𑀺𑀯𑀸𑀭 𑀯𑁂𑀡𑀸 𑀓𑀸𑀦𑀺 𑀕𑀸𑀫𑀓𑁆𑀔𑁂𑀢𑁆𑀢𑀸𑀦𑀺 𑀲𑀗𑀲𑀧𑀭𑀺𑀪𑁄𑀕𑀸𑀭𑀳𑀸𑀦𑀺 𑀓𑀢𑁆𑀯𑀸 𑀤𑀸𑀧𑁂𑀲𑀺 𑀲𑀢𑁆𑀢𑀫𑁂𑀯 𑀦𑀺𑀲𑀻𑀣𑀓𑀸𑀮𑁂 𑀭𑀳𑁄𑀕𑀢𑁄 𑀫𑀳𑀸𑀩𑁄𑀥𑀺𑀲𑀢𑁆𑀢𑀲𑁆𑀲 𑀤𑀼𑀓𑁆𑀓𑀭𑀘𑀭𑀺𑀢𑀸𑀦𑀺 𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀢𑀸𑀤𑀺𑀲𑀸𑀧𑀤𑀸𑀦𑀁 𑀅𑀢𑁆𑀢𑀦𑀺 𑀲𑀫𑁆𑀧𑀸𑀤𑁂𑀢𑀼𑀫𑀸𑀲𑀺𑀁𑀲𑀺. 𑀢𑀣𑀸 𑀳𑀺

𑁪𑁫. 𑀤𑁂𑀳𑀻𑀢𑀺 𑀯𑀢𑁆𑀣𑀼𑀫𑀲𑀼𑀓𑀁 𑀕𑀤𑀺𑀢𑁄𑀢𑁆𑀣𑀺𑀓𑁂𑀳𑀺,

𑀦𑀸𑀮𑀁 𑀓𑀣𑁂𑀢𑀼𑀫𑁆𑀳 𑀦𑀢𑁆𑀣𑀺 𑀦 𑀤𑁂𑀫𑀺𑀘𑀸𑀢𑀺;

𑀘𑀺𑀢𑁆𑀢𑁂 𑀫𑀳𑀸𑀓𑀭𑀼𑀡𑀸𑀬 𑀧𑀳𑀝𑀸𑀯𑀓𑀸𑀲𑀸𑀯,

𑀤𑀼𑀭𑀁𑀚𑀕𑀸𑀫 𑀯𑀺𑀬 𑀢𑀲𑁆𑀲 𑀪𑀯𑀢𑁆𑀣𑀼 𑀢𑀡𑁆𑀳𑀸.

𑀏𑀯𑀫𑀫𑁆𑀳𑀸𑀓𑀁 |𑀑𑁦.𑁦𑁦𑁧𑁦| 𑀩𑁄𑀥𑀺𑀲𑀢𑁆𑀢𑀲𑁆𑀲 𑀯𑀺𑀬 𑀩𑀸𑀳𑀺𑀭 𑀯𑀢𑁆𑀣𑀼𑀧𑀭𑀺𑀘𑁆𑀘𑀸𑀕𑀫𑀳𑀼𑀲𑁆𑀲𑀯𑁄 𑀓𑀤𑀸 𑀫𑁂 𑀪𑀯𑀺𑀲𑁆𑀲𑀢𑀺𑀢𑀺 𑀘,

𑁪𑁬. 𑀆𑀦𑀻𑀬𑀢𑁂 𑀦𑀺𑀲𑀺𑀢 𑀲𑀢𑁆𑀣𑀦𑀺𑀧𑀸𑀢𑀦𑁂𑀦,

𑀦𑀺𑀓𑁆𑀓𑀟𑁆𑀠𑀢𑁂 𑀘 𑀫𑀼𑀳𑀼 𑀤𑀸𑀦𑁆𑀳𑀯𑀸𑀬𑀭𑀢𑁆𑀬𑀸;

𑀏𑀯𑀁 𑀧𑀼𑀦𑀧𑁆𑀧𑀼𑀦 𑀕𑀢𑀸𑀕𑀢𑀯𑁂𑀕𑀔𑀺𑀦𑁆𑀦𑀁,

𑀤𑀼𑀓𑁆𑀔𑀁 𑀦 𑀢𑀲𑁆𑀲 𑀳𑀤𑀬𑀁 𑀯𑀢 𑀧𑀻𑀴𑀬𑀺𑀢𑁆𑀣.

𑀏𑀯𑀁 𑀓𑀺𑀭𑀲𑁆𑀲 𑀫𑀳𑀸𑀲𑀢𑁆𑀢𑀲𑁆𑀲 𑀫𑀁𑀲 𑀮𑁄𑀳𑀺𑀢𑀸𑀤𑀺 𑀅𑀚𑁆𑀛𑀢𑁆𑀢𑀺𑀓𑀯𑀢𑁆𑀣𑀼𑀤𑀸𑀦𑀲𑀫𑀬𑁂 𑀤𑀼𑀓𑁆𑀔𑀯𑁂𑀤𑀦𑀸 𑀫𑀦𑀁 𑀦 𑀲𑀫𑁆𑀩𑀸𑀥𑁂𑀲𑀺. 𑀫𑀫𑀸𑀧𑀺 𑀈𑀤𑀺𑀲𑀁 𑀅𑀚𑁆𑀛𑀢𑁆𑀢𑀺𑀓 𑀤𑀸𑀦𑀫𑀳𑀸𑀫𑀗𑁆𑀕𑀮𑀁 𑀓𑀤𑀸 𑀪𑀯𑀺𑀲𑁆𑀲𑀢𑀻𑀢𑀺 𑀘.

𑁪𑁭. 𑀲𑁄 𑀲𑀁𑀔𑀧𑀸𑀮𑀪𑀽𑀚𑀕𑁄 𑀯𑀺𑀲𑀯𑁂𑀕𑀯𑀸𑀧𑀺,

𑀲𑀻𑀮𑀲𑁆𑀲 𑀪𑁂𑀤𑀦𑀪𑀬𑁂𑀦 𑀅𑀓𑀼𑀧𑁆𑀧𑀫𑀸𑀦𑁄;

𑀇𑀘𑁆𑀙𑀁 𑀲𑀤𑁂𑀳𑀳𑀭𑀯𑀸𑀪𑀺𑀚𑀦𑁂 𑀤𑀬𑀸𑀬,

𑀕𑀦𑁆𑀢𑀼𑀁 𑀲𑀬𑀁 𑀅𑀧𑀤𑀢𑀸𑀬 𑀲𑀼𑀲𑁄𑀘𑀦𑀽𑀦𑀁.

𑀏𑀯𑀁 𑀲𑀻𑀮 𑀭𑀓𑁆𑀔𑀦𑀸𑀧𑀤𑀸𑀦𑀲𑀺𑀭𑀺𑀁 𑀓𑀤𑀸 𑀯𑀺𑀦𑁆𑀤𑀸𑀫𑀻𑀢𑀺 𑀘,

𑁪𑁮. 𑀧𑀺𑀯𑁂𑀬𑁆𑀬 𑀣𑀜𑁆𑀜𑀁 𑀅𑀫𑀢𑀜𑁆𑀘 𑀩𑀸𑀮𑁄,

𑀯𑀼𑀤𑁆𑀥𑀺𑀁 𑀕𑀢𑁄 𑀲𑁄𑀯 𑀚𑀺𑀕𑀼𑀘𑁆𑀙𑀺𑀢𑁂 𑀢𑀁;

𑀲 𑀚𑀸𑀢𑀼 𑀏𑀯𑀁 𑀅𑀦𑀼𑀪𑀽𑀬 𑀭𑀚𑁆𑀚𑀁,

𑀜𑀸𑀡𑀲𑁆𑀲 𑀧𑀸𑀓𑁂 𑀲𑀢𑀢𑀁 𑀚𑀳𑀸𑀢𑀺.

𑀏𑀯𑀁 𑀫𑀬𑀸𑀧𑀺 𑀅𑀘𑀺𑀭𑀲𑁆𑀲𑁂𑀯 𑀅𑀯𑀲𑁆𑀲𑀁 𑀅𑀪𑀺𑀦𑀺𑀓𑁆𑀔𑀫𑀦𑀁 𑀓𑀸𑀢𑀩𑁆𑀩𑀦𑁆𑀢𑀺 𑀘,

𑁪𑁯. 𑀲𑁄 𑀲𑁂𑀦𑀓𑁄 𑀤𑁆𑀯𑀺𑀚𑀧𑀲𑀺𑀩𑁆𑀩𑀓𑀲𑀸𑀬𑀺𑀲𑀧𑁆𑀧𑀁,

𑀅𑀜𑁆𑀜𑀸𑀲𑀺 𑀤𑁄𑀲𑀓𑀮𑀼𑀲𑀸𑀬 𑀥𑀺𑀬𑀸𑀩𑁆𑀪𑀼𑀢𑀁𑀢𑀁;

𑀓𑀸 𑀯𑀡𑁆𑀡𑀦𑀸𑀲𑁆𑀲 𑀔𑀮𑀼 𑀤𑁄𑀲𑀯𑀺𑀦𑀺𑀕𑁆𑀕𑀢𑀸𑀬,

𑀲𑀩𑁆𑀩𑀜𑁆𑀜𑀼𑀢𑀸𑀬 𑀤𑀲𑀧𑀸𑀭𑀫𑀺𑀲𑀸𑀥𑀺𑀢𑀸𑀬.

𑀏𑀯𑀁𑀯𑀺𑀥𑀸 𑀓𑀮𑁆𑀬𑀸𑀦𑀜𑀸𑀡𑀲𑀫𑁆𑀧𑀢𑁆𑀢𑀺 𑀓𑀤𑀸 𑀫𑁂 𑀲𑀫𑀺𑀚𑁆𑀛𑀺𑀲𑁆𑀲𑀢𑀻𑀢𑀺 𑀘,

𑁫𑁦. 𑀯𑀸𑀮𑁂𑀦 𑀲𑁄 𑀓𑀺𑀲𑀓𑀮𑀡𑁆𑀤𑀓𑀚𑀸𑀢𑀺𑀬𑀫𑁆𑀧𑀺,

𑀉𑀲𑁆𑀲𑀺𑀜𑁆𑀘𑀺𑀢𑀼𑀁 𑀲𑀮𑀺𑀮𑀫𑀼𑀲𑁆𑀲𑀳𑀺 𑀲𑀸𑀕𑀭𑀲𑁆𑀲;

𑀢𑀁 𑀫𑀼𑀤𑁆𑀥𑀢𑀸𑀬 𑀦 𑀪𑀯𑁂 𑀫𑀢𑀺𑀬𑀸 𑀫𑀳𑀦𑁆𑀬𑀸,

𑀲𑀫𑁆𑀧𑀸𑀤𑀦𑀸𑀬 𑀪𑀺𑀫𑀢𑀲𑁆𑀲 𑀲𑀫𑀢𑁆𑀣𑀢𑀸𑀬.

𑀏𑀯𑀁 𑀯𑀺𑀥𑀸𑀬 𑀯𑀻𑀭𑀺𑀬𑀧𑀸𑀭𑀫𑀺𑀬𑀸 𑀓𑀤𑀸 𑀪𑀸𑀚𑀦𑀁 𑀪𑀯𑀺𑀲𑁆𑀲𑀸𑀫𑀺𑀢𑀺 𑀘

𑁫𑁧. 𑀓𑀮𑀸𑀩𑀼𑀭𑀸𑀚𑁂𑀦 𑀳𑀺 𑀔𑀦𑁆𑀢𑀺𑀯𑀸𑀤𑀺,

𑀯𑀥𑀁 𑀯𑀺𑀥𑀸𑀬𑀸𑀧𑀺 𑀅𑀢𑀺𑀢𑁆𑀢𑀓𑁂𑀦;

𑀳𑀢𑁂 𑀧𑀤𑁂𑀦𑁄𑀭𑀲𑀺 𑀔𑀦𑁆𑀢𑀺𑀲𑁄𑀥𑁂,

𑀲𑁄 𑀓𑀽𑀝𑀲𑀡𑁆𑀥𑀺𑀕𑁆𑀕𑀳𑀡𑀁 𑀩𑀼𑀩𑁄𑀥.

𑀏𑀯𑀁 𑀯𑀺𑀥𑀸𑀬 𑀔𑀢𑁆𑀢𑀺𑀧𑀸𑀭𑀫𑀺𑀬𑀸 𑀅𑀢𑁆𑀢𑀸𑀦𑀁 𑀓𑀤𑀸 𑀅𑀮𑀁𑀓𑀭𑀺𑀲𑁆𑀲𑀸𑀫𑀺𑀢𑀺 𑀘

𑁫𑁨. |𑀑𑁦.𑁦𑁦𑁧𑁧|

𑀫𑀺𑀘𑁆𑀙𑀸𑀪𑀺𑀬𑁄𑀕𑀁 𑀦 𑀲𑀳𑀺𑀁𑀲𑀼 𑀢𑀲𑁆𑀲,

𑀭𑀸𑀫𑀸𑀪𑀺𑀥𑀸𑀦𑀲𑁆𑀲𑀧𑀺 𑀧𑀸𑀤𑀼𑀓𑀸𑀬𑁄;

𑀲𑀘𑁆𑀘𑀜𑁆𑀘𑀬𑀸 𑀦𑀸𑀜𑁆𑀜𑀫𑀪𑀸𑀲𑀺𑀥𑀻𑀭𑁄,