𑀚𑀺𑀦𑀘𑀭𑀺𑀢𑀬 |𑀑𑁦.𑁦𑁦𑁦𑁧|

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑁧. 𑀉𑀢𑁆𑀢𑀫𑀁 𑀉𑀢𑁆𑀢𑀫𑀗𑁆𑀕𑁂𑀦 𑀦𑀫𑀲𑁆𑀲𑀺𑀢𑁆𑀯𑀸 𑀫𑀳𑁂𑀲𑀺𑀦𑁄;

𑀦𑀺𑀩𑁆𑀩𑀸𑀡𑀫𑀥𑀼𑀤𑀁 𑀧𑀸𑀤𑀧𑀗𑁆𑀓𑀚𑀁 𑀲𑀚𑁆𑀚𑀦𑀸𑀮𑀺𑀦𑀁.

𑁨. 𑀫𑀳𑀸𑀫𑁄𑀳𑀢𑀫𑀁 𑀮𑁄𑀓𑁂 𑀥𑀁𑀲𑁂𑀦𑁆𑀢𑀁 𑀥𑀫𑁆𑀫𑀪𑀸𑀓𑀭𑀁;

𑀧𑀸𑀢𑀼𑀪𑀽𑀢𑀁 𑀫𑀳𑀸𑀢𑁂𑀚𑀁 𑀥𑀫𑁆𑀫𑀭𑀸𑀚𑁄𑀤𑀬𑀸𑀘𑀮𑁂.

𑁩. 𑀚𑀦𑁆𑀢𑀼𑀘𑀺𑀢𑁆𑀢𑀲𑀭𑁂 𑀚𑀸𑀢𑀁 𑀧𑀲𑀸𑀤𑀓𑀼𑀫𑀼𑀤𑀁 𑀲𑀤𑀸;

𑀩𑁄𑀥𑁂𑀦𑁆𑀢𑀁 𑀲𑀗𑁆𑀖𑀯𑀦𑁆𑀤𑀜𑁆𑀘 𑀲𑀺𑀮𑁄𑀭𑀼𑀓𑀺𑀭𑀡𑀼𑀚𑁆𑀚𑀮𑀁.

𑁪. 𑀢𑀳𑀺𑀁, 𑀢𑀳𑀺𑀁 𑀲𑀼𑀯𑀺𑀢𑁆𑀣𑀺𑀡𑁆𑀡𑀁 𑀚𑀺𑀦𑀲𑁆𑀲 𑀘𑀭𑀺𑀢𑀁 𑀳𑀺𑀢𑀁;

𑀧𑀯𑀓𑁆𑀔𑀸𑀫𑀺 𑀲𑀫𑀸𑀲𑁂𑀦 𑀲𑀤𑀸’𑀦𑀼𑀲𑁆𑀲𑀭𑀡𑀢𑁆𑀣𑀺𑀓𑁄.

𑁫. 𑀧𑀡𑀺𑀢𑀁 𑀢𑀁 𑀲𑀭𑀦𑁆𑀢𑀸𑀦𑀁 𑀤𑀼𑀮𑁆𑀮𑀪𑀫𑁆𑀧𑀺 𑀲𑀺𑀯𑀁𑀧𑀤𑀁;

𑀅𑀤𑀼𑀮𑁆𑀮𑀪𑀁 𑀪𑀯𑁂 𑀪𑁄𑀕𑀧𑀝𑀺𑀮𑀸𑀪𑀫𑁆𑀳𑀺 𑀓𑀸 𑀓𑀣𑀸?

𑁬. 𑀢𑀲𑁆𑀫𑀸 𑀢𑀁 𑀪𑀜𑁆𑀜𑀫𑀸𑀦𑀁 𑀫𑁂 𑀘𑀺𑀢𑁆𑀢𑀯𑀼𑀢𑁆𑀢𑀧𑀤𑀓𑁆𑀓𑀫𑀁;

𑀲𑀼𑀦𑁆𑀤𑀭𑀁 𑀫𑀥𑀼𑀭𑀁 𑀲𑀼𑀤𑁆𑀥𑀁 𑀲𑁄𑀢𑀼𑀲𑁄𑀢𑀭𑀲𑀸𑀬𑀦𑀁.

𑁭. 𑀲𑁄𑀢𑀳𑀢𑁆𑀣𑀧𑀼𑀝𑀸 𑀲𑀫𑁆𑀫𑀸 𑀕𑀳𑁂𑀢𑁆𑀯𑀸𑀦 𑀦𑀺𑀭𑀦𑁆𑀢𑀭𑀁;

𑀅𑀚𑀭𑀸𑀫𑀭𑀫𑀺’𑀘𑁆𑀙𑀦𑁆𑀢𑀸 𑀲𑀸𑀥𑀯𑁄 𑀧𑀭𑀺𑀪𑀼𑀜𑁆𑀚𑀣.

𑁮. 𑀓𑀧𑁆𑀧𑀲𑀢𑀲𑀳𑀲𑁆𑀲𑀲𑁆𑀲 𑀘𑀢𑀼𑀦𑁆𑀦𑀁 𑀘𑀸’𑀧𑀺 𑀫𑀢𑁆𑀣𑀓𑁂;

𑀅𑀲𑀗𑁆𑀔𑁂𑀬𑁆𑀬𑀸𑀦𑀫𑀸’𑀯𑀸𑀲𑀁 𑀲𑀩𑁆𑀩𑀤𑀸 𑀧𑀼𑀜𑁆𑀜𑀓𑀸𑀫𑀺𑀦𑀁.

𑁯. |𑀑𑁦.𑁦𑁦𑁦𑁨|

𑀦𑀸𑀦𑀸𑀭𑀢𑀦𑀲𑀫𑁆𑀧𑀦𑁆𑀦𑀁 𑀦𑀸𑀦𑀸𑀚𑀦𑀲𑀫𑀸𑀓𑀼𑀮𑀁;

𑀯𑀺𑀘𑀺𑀢𑁆𑀢𑀸𑀧𑀡 𑀲𑀁𑀓𑀺𑀡𑁆𑀡𑀁 𑀢𑁄𑀭𑀡 𑀕𑁆𑀖𑀺𑀓 𑀪𑀽𑀲𑀺𑀢𑀁.

𑁧𑁦. 𑀬𑀼𑀢𑁆𑀢𑀁 𑀤𑀲𑀳𑀺 𑀲𑀤𑁆𑀤𑁂𑀳𑀺 𑀤𑁂𑀯𑀺𑀦𑁆𑀤𑀧𑀼𑀭𑀲𑀦𑁆𑀦𑀺𑀪𑀁;

𑀧𑀼𑀭𑀁 𑀅𑀫𑀭𑀲𑀗𑁆𑀔𑀸𑀢𑀁 𑀅𑀳𑁄𑀲𑀻 𑀭𑀼𑀘𑀺𑀭𑀁 𑀯𑀭𑀁.

𑁧𑁧. 𑀢𑀳𑀺𑀁 𑀩𑁆𑀭𑀸𑀳𑁆𑀫𑀦𑁆𑀯𑀬𑁂 𑀚𑀸𑀢𑁄 𑀲𑀩𑁆𑀩𑀮𑁄𑀓𑀸𑀪𑀺𑀧𑀽𑀚𑀺𑀢𑁄;

𑀫𑀳𑀸𑀤𑀬𑁄 𑀫𑀳𑀸𑀧𑀜𑁆𑀜𑁄 𑀅𑀪𑀺𑀭𑀽𑀧𑁄 𑀫𑀦𑁄𑀭𑀫𑁄.

𑁧𑁨. 𑀲𑀼𑀫𑁂𑀥𑁄 𑀦𑀸𑀫 𑀦𑀸𑀫𑁂𑀦 𑀯𑁂𑀤𑀲𑀸𑀕𑀭𑀧𑀸𑀭𑀕𑀽;

𑀓𑀼𑀫𑀸𑀭𑁄’𑀲𑀺 𑀕𑀭𑀽𑀦𑀁 𑀲𑁄 𑀅𑀯𑀲𑀸𑀦𑁂 𑀚𑀺𑀦𑀁𑀓𑀼𑀭𑁄.

𑁧𑁩. 𑀭𑀸𑀲𑀺𑀯𑀟𑁆𑀠𑀓𑀫𑀘𑁆𑀘𑁂𑀦 𑀤𑀲𑁆𑀲𑀺𑀢𑀁 𑀅𑀫𑀺𑀢𑀁 𑀥𑀦𑀁;

𑀅𑀦𑁂𑀓𑀲𑀢𑀕𑀩𑁆𑀪𑁂𑀲𑀼 𑀦𑀺𑀘𑀺𑀢𑀁 𑀢𑀁 𑀉𑀤𑀺𑀓𑁆𑀔𑀺𑀬.

𑁧𑁪. 𑀥𑀦𑀲𑀦𑁆𑀦𑀺𑀘𑀬𑀁 𑀓𑀢𑁆𑀯𑀸 𑀅𑀳𑁄 𑀫𑀬𑁆𑀳𑀁 𑀧𑀺𑀢𑀸𑀤𑀬𑁄;

𑀕𑀢𑀸 𑀫𑀸𑀲𑀓𑀫𑁂’𑀓𑀫𑁆𑀧𑀺 𑀦𑁂𑀯𑀸’𑀤𑀸𑀬 𑀤𑀺𑀯𑀁 𑀇𑀢𑀺.

𑁧𑁫. 𑀲𑀁𑀯𑁂𑀕𑀫𑀼’𑀧𑀬𑀸𑀢𑁄’𑀯𑀘𑀻𑀫𑀦𑁆𑀢𑁂𑀲𑀻’𑀢𑀺 𑀕𑀼𑀡𑀸𑀓𑀭𑁄;

𑀥𑀦𑀲𑀸𑀭𑀁 𑀇𑀳𑀁 𑀕𑀬𑁆𑀳 𑀕𑀦𑁆𑀢𑀼𑀁 𑀬𑀼𑀢𑁆𑀢𑀦𑁆𑀢𑀺 𑀫𑁂 𑀧𑀦.

𑁧𑁬. 𑀭𑀳𑁄𑀕𑀢𑁄 𑀦𑀺𑀲𑀻𑀤𑀺𑀢𑁆𑀯𑀸 𑀲𑀼𑀦𑁆𑀤𑀭𑁂 𑀦𑀺𑀚𑀫𑀦𑁆𑀤𑀺𑀭𑁂;

𑀤𑁂𑀳𑁂 𑀤𑁄𑀲𑁄 𑀉𑀤𑀺𑀓𑁆𑀔𑀦𑁆𑀢𑁄 𑀑𑀯𑀤𑀦𑁆𑀢𑁄’𑀧𑀺 𑀅𑀢𑁆𑀢𑀦𑁄.

𑁧𑁭. 𑀪𑁂𑀤𑀦𑀁 𑀢𑀦𑀼𑀦𑁄𑀤𑀼𑀓𑁆𑀔𑀁 𑀤𑀼𑀓𑁆𑀔𑁄 𑀢𑀲𑁆𑀲𑁄’𑀤𑀬𑁄’𑀧𑀺 𑀘;

𑀚𑀸𑀢𑀺𑀥𑀫𑁆𑀫𑁄 𑀚𑀭𑀸𑀥𑀫𑁆𑀫𑁄 𑀯𑁆𑀬𑀸𑀥𑀺𑀥𑀫𑁆𑀫𑁄 𑀅𑀳𑀁 𑀇𑀢𑀺.

𑁧𑁮. 𑀏𑀯𑀫𑀸’𑀤𑀻𑀳𑀺 𑀤𑁂𑀳𑀲𑁆𑀫𑀺𑀁 𑀤𑀺𑀲𑁆𑀯𑀸 𑀤𑁄𑀲𑁂 𑀅𑀦𑁂𑀓𑀥𑀸;

𑀧𑀼𑀭𑁂 𑀪𑁂𑀭𑀺𑀁 𑀘𑀭𑀸𑀧𑁂𑀢𑁆𑀯𑀸 𑀆𑀭𑁄𑀘𑁂𑀢𑁆𑀯𑀸𑀦 𑀭𑀸𑀚𑀺𑀦𑁄.

𑁧𑁯. 𑀪𑁂𑀭𑀺𑀦𑀸𑀤𑀲𑀼𑀕𑀦𑁆𑀥𑁂𑀦 𑀬𑀸𑀘𑀓𑀸𑀮𑀺𑀲𑀫𑀸𑀕𑀢𑁂;

𑀤𑀸𑀦𑀓𑀺𑀜𑁆𑀚𑀓𑁆𑀔𑀑𑀖𑁂𑀦 𑀲𑀢𑁆𑀢𑀸𑀳𑀁 𑀧𑀻𑀦𑀬𑀻 𑀢𑀢𑁄.

𑁨𑁦. 𑀤𑀸𑀦𑀕𑁆𑀕𑀳𑀺𑀫𑀩𑀺𑀦𑁆𑀤𑀽𑀦𑀁 𑀦𑀺𑀧𑀸𑀢𑁂𑀦𑀸’𑀧𑀺 𑀥𑀁𑀲𑀦𑀁;

𑀅𑀬𑀸𑀢𑀁 𑀢𑀁 𑀯𑀺𑀮𑁄𑀓𑁂𑀢𑁆𑀯𑀸 𑀭𑀢𑀦𑀫𑁆𑀩𑀼𑀚𑀓𑀸𑀦𑀦𑀁.

𑁨𑁧. 𑀭𑀼𑀤𑀢𑁄 𑀜𑀸𑀢𑀺𑀲𑀗𑁆𑀖𑀲𑁆𑀲 𑀚𑀮𑀺𑀢𑀸𑀦𑀮𑀓𑀸𑀦𑀦𑀸;

𑀕𑀚𑀺𑀦𑁆𑀤𑁄 𑀯𑀺𑀬 𑀕𑁂𑀳𑀫𑁆𑀳𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀫𑀦𑁄𑀭𑀫𑀸.

𑁨𑁨. |𑀑𑁦.𑁦𑁦𑁦𑁩|

𑀫𑀳𑀦𑁆𑀢𑀁 𑀲𑁄 𑀫𑀳𑀸𑀯𑀻𑀭𑁄 𑀉𑀧𑀕𑀜𑁆𑀙𑀺 𑀳𑀺𑀫𑀸𑀮𑀬𑀁;

𑀳𑀭𑀺𑀘𑀦𑁆𑀤𑀦𑀓𑀧𑁆𑀧𑀽𑀭𑀸𑀕𑀭𑀼𑀕𑀦𑁆𑀥𑁂𑀳𑀺 𑀯𑀸𑀲𑀺𑀢𑀁.

𑁨𑁩. 𑀲𑀼𑀨𑀮𑁆𑀮𑀘𑀫𑁆𑀧𑀓𑀸𑀲𑁄𑀓𑀧𑀸𑀝𑀮𑀻𑀢𑀺𑀮𑀓𑁂𑀳𑀺 𑀘;

𑀧𑀽𑀕𑀧𑀼𑀦𑁆𑀦𑀸𑀕𑀦𑀸𑀕𑀸𑀤𑀺𑀧𑀸𑀤𑀧𑁂𑀳𑀺 𑀘 𑀫𑀡𑁆𑀟𑀺𑀢𑀁.

𑁨𑁪. 𑀲𑀻𑀳𑀯𑁆𑀬𑀕𑁆𑀖𑀢𑀭𑀘𑁆𑀙𑁂𑀳𑀺 𑀇𑀪𑀤𑀻𑀧𑀺𑀓𑀧𑀻𑀳𑀺 𑀘;

𑀢𑀼𑀭𑀗𑁆𑀕𑀫𑀸𑀤𑀺𑀦𑁂𑀓𑁂𑀳𑀺 𑀫𑀺𑀕𑁂𑀳𑀺 𑀘 𑀲𑀫𑀸𑀓𑀼𑀮𑀁.

𑁨𑁫. 𑀲𑀸𑀴𑀺𑀓𑀸𑀭𑀯𑀺𑀳𑀁𑀲𑁂𑀳𑀺 𑀳𑀁𑀲𑀓𑁄𑀜𑁆𑀘𑀲𑀼𑀯𑁂𑀳𑀺 𑀘;

𑀓𑀧𑁄𑀢𑀓𑀭𑀯𑀻𑀓𑀸𑀤𑀺𑀲𑀓𑀼𑀦𑁆𑀢𑁂𑀳𑀺 𑀘 𑀓𑀽𑀚𑀺𑀢𑀁.

𑁨𑁬. 𑀬𑀓𑁆𑀔𑀭𑀓𑁆𑀔𑀲𑀕𑀦𑁆𑀥𑀩𑁆𑀩𑀤𑁂𑀯𑀤𑀸𑀦𑀯𑀓𑁂𑀳𑀺 𑀘;

𑀲𑀺𑀤𑁆𑀥𑀯𑀺𑀚𑁆𑀚𑀸𑀥𑀭𑀸𑀤𑀻𑀳𑀺 𑀪𑀽𑀢𑁂𑀳𑀺 𑀘 𑀦𑀺𑀲𑁂𑀯𑀺𑀢𑀁.

𑁨𑁭. 𑀫𑀦𑁄𑀲𑀻𑀮𑀺𑀦𑁆𑀤𑀦𑀻𑀮𑁄𑀭𑀼𑀘𑀸𑀭𑀼𑀧𑀩𑁆𑀩𑀢𑀧𑀦𑁆𑀢𑀺𑀳𑀺;

𑀲𑀚𑁆𑀛𑀼𑀳𑁂𑀫𑀸𑀤𑀺𑀦𑁂𑀓𑁂𑀳𑀺 𑀪𑀽𑀥𑀭𑁂𑀳𑀺 𑀘 𑀪𑀸𑀲𑀼𑀭𑀁.

𑁨𑁮. 𑀲𑀼𑀯𑀡𑁆𑀡𑀫𑀡𑀺𑀲𑁄𑀧𑀸𑀦𑀦𑁂𑀓𑀢𑀺𑀢𑁆𑀣𑀲𑀭𑁂𑀳𑀺 𑀘;

𑀲𑁄𑀪𑀺𑀢𑀁 𑀢𑀢𑁆𑀣 𑀓𑀻𑀴𑀦𑁆𑀢𑀦𑁂𑀓𑀤𑁂𑀯𑀗𑁆𑀕𑀦𑀸𑀳𑀺 𑀘.

𑁨𑁯. 𑀲𑀻𑀢𑀲𑀻𑀓𑀭𑀲𑀜𑁆𑀙𑀦𑁆𑀦𑀦𑀺𑀚𑁆𑀛𑀭𑀸𑀦𑀁 𑀲𑀢𑁂𑀳𑀺 𑀘;

𑀓𑀺𑀡𑁆𑀡𑀭𑁄𑀭𑀕𑀭𑀗𑁆𑀕𑁂𑀳𑀺 𑀭𑀫𑁆𑀫𑁂𑀳𑀺 𑀯𑀺𑀭𑀸𑀚𑀺𑀢𑀁.

𑁩𑁦. 𑀲𑀺𑀔𑀡𑁆𑀟𑀺𑀲𑀡𑁆𑀟𑀦𑀘𑁆𑀘𑁂𑀳𑀺 𑀮𑀢𑀸𑀦𑀁 𑀫𑀡𑁆𑀟𑀧𑁂𑀳𑀺 𑀘;

𑀲𑁂𑀢𑀯𑀸𑀮𑀼𑀓𑀲𑀜𑁆𑀙𑀦𑁆𑀦𑀫𑀸𑀮𑀓𑁂𑀳𑀺 𑀘 𑀫𑀡𑁆𑀟𑀺𑀢𑀁.

𑁩𑁧. 𑀲𑀼𑀯𑀡𑁆𑀡𑀫𑀡𑀺𑀫𑀼𑀢𑁆𑀢𑀸𑀤𑀺 𑀅𑀦𑁂𑀓𑀭𑀢𑀦𑀸𑀓𑀭𑀁;

𑀇𑀘𑁆𑀙𑀦𑁆𑀢𑀸𑀦𑀁 𑀚𑀦𑀸𑀮𑀻𑀦𑀁 𑀧𑀼𑀜𑁆𑀜𑀓𑀺𑀜𑁆𑀚𑀓𑁆𑀔𑀫𑀸’𑀮𑀬𑀁.

𑁩𑁨. 𑀢𑀫’𑀚𑁆𑀛𑁄𑀕𑀬𑁆𑀳 𑀲𑁄 𑀥𑀻𑀭𑁄 𑀲𑀳𑀲𑁆𑀲𑀓𑁆𑀔𑁂𑀦 𑀫𑀸𑀧𑀺𑀢𑁂;

𑀤𑀺𑀲𑁆𑀯𑀸 𑀇𑀲𑀺𑀧𑀭𑀺𑀓𑁆𑀔𑀸𑀭𑁂 𑀧𑀡𑁆𑀡𑀲𑀸𑀮𑀯𑀭𑁂 𑀢𑀳𑀺𑀁.

𑁩𑁩. 𑀇𑀲𑀺𑀯𑁂𑀲𑀁 𑀕𑀳𑁂𑀢𑁆𑀯𑀸𑀦 𑀯𑀺𑀳𑀭𑀦𑁆𑀢𑁄 𑀲𑀫𑀸𑀳𑀺𑀢𑁄;

𑀲𑀢𑁆𑀢𑀸𑀳’𑀩𑁆𑀪𑀦𑁆𑀢𑀭𑁂 𑀧𑀜𑁆𑀘 𑀅𑀪𑀺𑀜𑁆𑀜’𑀝𑁆𑀞𑀯𑀺𑀥𑀸’𑀧𑀺 𑀘.

𑁩𑁪. 𑀉𑀧𑁆𑀧𑀸𑀤𑁂𑀢𑁆𑀯𑀸 𑀲𑀫𑀸𑀧𑀢𑁆𑀢𑀺𑀲𑀼𑀔𑁂𑀦𑁂’𑀘 𑀢𑀧𑁄𑀥𑀦𑁄;

𑀦𑀪𑀲𑀸 𑀤𑀺𑀯𑀲𑁂’𑀓𑀲𑁆𑀫𑀺𑀁 𑀕𑀘𑁆𑀙𑀦𑁆𑀢𑁄 𑀚𑀦𑀢𑀁 𑀇𑀲𑀺.

𑁩𑁫. |𑀑𑁦.𑁦𑁦𑁦𑁪|

𑀲𑁄𑀥𑁂𑀦𑁆𑀢𑀫’𑀜𑁆𑀚𑀲𑀁 𑀤𑀺𑀲𑁆𑀯𑀸 𑀑𑀢𑀭𑀺𑀢𑁆𑀯𑀸 𑀦𑀪𑀸 𑀢𑀳𑀺𑀁;

𑀇𑀢𑀺 𑀢𑀁 𑀚𑀦𑀢𑀁 𑀧𑀼𑀘𑁆𑀙𑀺 𑀓𑀲𑁆𑀫𑀸 𑀲𑁄𑀥𑁂𑀣 𑀅𑀜𑁆𑀚𑀲𑀁.

𑁩𑁬. 𑀲𑀼𑀫𑁂𑀥 𑀢𑁆𑀯𑀁 𑀦𑀚𑀸𑀦𑀸𑀲𑀺 𑀤𑀻𑀧𑀗𑁆𑀓𑀭𑀢𑀣𑀸𑀕𑀢𑁄;

𑀲𑀫𑁆𑀩𑁄𑀥𑀺𑀫𑀼’𑀢𑁆𑀢𑀫𑀁 𑀧𑀢𑁆𑀯𑀸 𑀥𑀫𑁆𑀫𑀘𑀓𑁆𑀓𑀫’𑀦𑀼𑀢𑁆𑀢𑀭𑀁.

𑁩𑁭. 𑀧𑀯𑀢𑁆𑀢𑁂𑀢𑁆𑀯𑀸𑀦 𑀮𑁄𑀓𑀲𑁆𑀲 𑀓𑀭𑁄𑀦𑁆𑀢𑁄 𑀥𑀫𑁆𑀫𑀲𑀗𑁆𑀕𑀳𑀁;

𑀭𑀫𑁆𑀫𑀁 𑀭𑀫𑁆𑀫𑀧𑀼𑀭𑀁 𑀧𑀢𑁆𑀯𑀸 𑀯𑀲𑀢𑀻’𑀳 𑀲𑀼𑀤𑀲𑁆𑀲𑀦𑁂.

𑁩𑁮. 𑀪𑀺𑀓𑁆𑀔𑀼𑀲𑀢𑀲𑀳𑀲𑁆𑀲𑁂𑀳𑀺 𑀘𑀢𑀽𑀳𑀺 𑀯𑀺𑀫𑀮𑁂𑀳𑀺 𑀢𑀁;

𑀦𑀺𑀫𑀦𑁆𑀢𑀬𑀺𑀫𑁆𑀳 𑀤𑀸𑀦𑁂𑀦 𑀫𑀬𑀁 𑀮𑁄𑀓𑁂𑀓𑀦𑀸𑀬𑀓.

𑁩𑁯. 𑀢𑀲𑁆𑀲 𑀆𑀕𑀫𑀦𑀢𑁆𑀣𑀸𑀬 𑀫𑀕𑁆𑀕𑀁 𑀲𑁄𑀥𑁂𑀫 𑀘𑀓𑁆𑀔𑀼𑀫;

𑀇𑀢𑀺 𑀲𑁄𑀢𑀲𑁆𑀲 𑀲𑁄 𑀢𑀲𑁆𑀲 𑀲𑀼𑀔𑀁 𑀤𑁂𑀦𑁆𑀢𑁄 𑀚𑀦𑁄’𑀩𑁆𑀭𑀯𑀺𑀁.

𑁪𑁦. 𑀩𑀼𑀤𑁆𑀥𑁄’𑀢𑀺 𑀯𑀘𑀦𑀁 𑀲𑀼𑀢𑁆𑀯𑀸 𑀧𑀻𑀢𑀺𑀬𑁄’𑀤𑀕𑁆𑀕𑀫𑀸𑀦𑀲𑁄;

𑀲𑀓𑀪𑀸𑀯𑁂𑀦 𑀲𑀡𑁆𑀞𑀸𑀢𑀼𑀁 𑀦𑁂𑀯𑀲𑀓𑁆𑀔𑀺 𑀕𑀼𑀡𑀸𑀓𑀭𑁄.

𑁪𑁧. 𑀢𑁂𑀦𑀸’𑀭𑀤𑁆𑀥𑀜𑁆𑀚𑀲𑀸 𑀥𑀻𑀭𑁄 𑀬𑀸𑀘𑀺𑀢𑁆𑀯𑀸𑀦 𑀧𑀤𑁂𑀲𑀓𑀁;

𑀮𑀪𑀺𑀢𑁆𑀯𑀸 𑀯𑀺𑀲𑀫𑀁 𑀞𑀸𑀦𑀁 𑀲𑀫𑀁 𑀓𑀸𑀢𑀼𑀁 𑀲𑀫𑀸𑀭𑀪𑀺.

𑁪𑁨. 𑀦𑀸’𑀮𑀗𑁆𑀓𑀢𑁂𑀬𑁂𑀯 𑀢𑀳𑀺𑀁 𑀧𑀤𑁂𑀲𑁂,

𑀮𑁄𑀓𑁂𑀓𑀦𑀸𑀣𑁄 𑀲𑀦𑀭𑀸𑀫𑀭𑁂𑀳𑀺;

𑀲𑀫𑁆𑀧𑀽𑀚𑀺𑀢𑁄 𑀮𑁄𑀓𑀳𑀺𑀢𑁄 𑀫𑀳𑁂𑀲𑀺,

𑀯𑀲𑀻𑀳𑀺 𑀲𑀤𑁆𑀥𑀺𑀁 𑀧𑀝𑀺𑀧𑀚𑁆𑀚𑀺 𑀫𑀕𑁆𑀕𑀁.

𑁪𑁩. 𑀙𑀩𑁆𑀩𑀡𑁆𑀡𑀭𑀁𑀲𑀺𑀚𑀸𑀮𑁂𑀳𑀺 𑀧𑀚𑁆𑀚𑀮𑀦𑁆𑀢𑀁 𑀢𑀣𑀸𑀕𑀢𑀁;

𑀆𑀕𑀘𑁆𑀙𑀦𑁆𑀢𑀁 𑀢𑀳𑀺 𑀤𑀺𑀲𑁆𑀯𑀸 𑀫𑁄𑀤𑀫𑀸𑀦𑁄 𑀯𑀺𑀘𑀺𑀦𑁆𑀢𑀬𑀺.

𑁪𑁪. 𑀬𑀦𑁆𑀦𑀽𑀦𑀺’𑀫𑀲𑁆𑀲 𑀥𑀻𑀭𑀲𑁆𑀲 𑀲𑁂𑀢𑀼𑀁 𑀓𑀢𑁆𑀯𑀸𑀦 𑀓𑀤𑁆𑀤𑀫𑁂;

𑀲𑀓𑀢𑁆𑀢𑀸𑀦𑀁 𑀦𑀺𑀧𑀚𑁆𑀚𑀬𑁂 𑀲𑀲𑀗𑁆𑀖𑀲𑁆𑀲 𑀫𑀳𑁂𑀲𑀺𑀦𑁄.

𑁪𑁫. 𑀤𑀻𑀖𑀭𑀢𑁆𑀢𑀸𑀫’𑀮𑀁 𑀢𑀁 𑀫𑁂 𑀳𑀺𑀢𑀸𑀬 𑀘 𑀲𑀼𑀔𑀸𑀬 𑀘;

𑀇𑀘𑁆𑀘𑁂’𑀯𑀁 𑀘𑀺𑀦𑁆𑀢𑀬𑀺𑀢𑁆𑀯𑀸𑀦 𑀦𑀺𑀧𑀦𑁆𑀦𑁄’𑀲𑁄 𑀚𑀺𑀦𑀗𑁆𑀓𑀼𑀭𑁄.

𑁪𑁬. 𑀧𑀩𑁄𑀥𑁂𑀢𑁆𑀯𑀸𑀦 𑀤𑀺𑀲𑁆𑀯𑀸𑀦 𑀘𑀸𑀭𑀼𑀮𑁄𑀘𑀦𑀧𑀗𑁆𑀓𑀚𑁂;

𑀧𑀼𑀦’𑀧𑁂’𑀯𑀁 𑀯𑀺𑀘𑀺𑀦𑁆𑀢𑁂𑀲𑀺 𑀦𑀺𑀧𑀦𑁆𑀦𑁄 𑀥𑀺𑀢𑀺𑀫𑀸 𑀢𑀳𑀺𑀁.

𑁪𑁭. |𑀑𑁦.𑁦𑁦𑁦𑁫|

𑀇𑀘𑁆𑀙𑁂𑀬𑁆𑀬𑀁 𑀘𑁂’𑀳𑀫’𑀚𑁆𑀚𑁂’𑀯 𑀳𑀦𑁆𑀢𑁆𑀯𑀸’𑀦𑀦𑁆𑀢𑀭𑀡𑁂 𑀪𑀯𑁂;

𑀲𑀗𑁆𑀖𑀲𑁆𑀲 𑀦𑀯𑀓𑁄 𑀳𑀼𑀢𑁆𑀯𑀸 𑀧𑀯𑀺𑀲𑁂𑀬𑁆𑀬𑀁 𑀧𑀼𑀭𑀁 𑀯𑀭𑀁.

𑁪𑁮. 𑀓𑀺𑀫’𑀜𑁆𑀜𑀸𑀢𑀓𑀯𑁂𑀲𑁂𑀦 𑀓𑁆𑀮𑁂𑀲𑀦𑀺𑀩𑁆𑀩𑀸𑀧𑀡𑁂𑀦 𑀫𑁂;

𑀅𑀬𑀁 𑀩𑀼𑀤𑁆𑀥𑁄’𑀯’𑀳𑀁 𑀩𑀼𑀤𑁆𑀥𑁄 𑀳𑀼𑀢𑁆𑀯𑀸 𑀮𑁄𑀓𑁂 𑀅𑀦𑀼𑀢𑁆𑀢𑀭𑁄.

𑁪𑁯. 𑀚𑀦𑀢𑀁 𑀥𑀫𑁆𑀫𑀦𑀸𑀯𑀸𑀬 𑀢𑀸𑀭𑁂𑀢𑁆𑀯𑀸𑀦 𑀪𑀯𑀡𑁆𑀡𑀯𑀸𑀯;

𑀦𑀺𑀩𑁆𑀩𑀸𑀡𑀧𑀼𑀭𑀫𑀸’𑀦𑁂𑀢𑁆𑀯𑀸 𑀲𑁂𑀬𑁆𑀬𑀁 𑀫𑁂 𑀧𑀭𑀺𑀦𑀺𑀩𑁆𑀩𑀼𑀢𑀁.

𑁫𑁦. 𑀇𑀘𑁆𑀘𑁂’𑀯𑀁 𑀘𑀺𑀦𑁆𑀢𑀬𑀺𑀢𑁆𑀯𑀸𑀦 𑀦𑀺𑀧𑀦𑁆𑀦𑁄 𑀓𑀤𑁆𑀤𑀫𑁂 𑀢𑀳𑀺𑀁;

𑀲𑀼𑀯𑀡𑁆𑀡𑀓𑀤𑀮𑀺𑀓𑁆𑀔𑀦𑁆𑀥𑀲𑀦𑁆𑀦𑀺𑀪𑁄 𑀲𑁄’𑀢𑀺 𑀲𑁄𑀪𑀢𑀺.

𑁫𑁧. 𑀙𑀩𑁆𑀩𑀡𑁆𑀡𑀭𑀁𑀲𑀻𑀳𑀺 𑀯𑀺𑀭𑀸𑀚𑀫𑀸𑀦𑀁,

𑀤𑀺𑀲𑁆𑀯𑀸 𑀫𑀦𑀼𑀜𑁆𑀜𑀁 𑀲𑀼𑀕𑀢𑀢𑁆𑀢𑀪𑀸𑀯𑀁;

𑀲𑀜𑁆𑀚𑀸𑀢𑀧𑀻𑀢𑀻𑀳𑀺 𑀉𑀤𑀕𑁆𑀕𑀘𑀺𑀢𑁆𑀢𑁄,

𑀲𑀫𑁆𑀩𑁄𑀥𑀺𑀬𑀸 𑀙𑀦𑁆𑀤𑀫’𑀓𑀸𑀲𑀺 𑀥𑀻𑀭𑁄.

𑁫𑁨. 𑀆𑀕𑀦𑁆𑀢𑁆𑀯𑀸𑀦 𑀢𑀳𑀺𑀁 𑀞𑀸𑀦𑀁 𑀇𑀲𑀺𑀁 𑀧𑀗𑁆𑀓𑁂 𑀦𑀺𑀧𑀦𑁆𑀦𑀓𑀁;

𑀮𑁄𑀓𑀲𑁆𑀲 𑀲𑁂𑀢𑀼𑀪𑀽𑀢𑁄’𑀧𑀺 𑀲𑁂𑀢𑀼𑀪𑀽𑀢𑀁 𑀢𑀫’𑀢𑁆𑀢𑀦𑁄.

𑁫𑁩. 𑀤𑀺𑀲𑁆𑀯𑀸 𑀉𑀲𑁆𑀲𑀻𑀲𑀓𑁂 𑀢𑀲𑁆𑀲 𑀞𑀢𑁆𑀯𑀸 𑀮𑁄𑀓𑁂𑀓𑀲𑁂𑀢𑀼𑀦𑁄;

𑀮𑁄𑀓𑁂𑀓𑀮𑁄𑀘𑀦𑁄 𑀥𑀻𑀭𑁄 𑀤𑀻𑀧𑀗𑁆𑀓𑀭𑀢𑀣𑀸𑀕𑀢𑁄.

𑁫𑁪. 𑀕𑁄𑀢𑀫𑁄 𑀦𑀸𑀫 𑀦𑀸𑀫𑁂𑀦 𑀲𑀫𑁆𑀩𑀼𑀤𑁆𑀥𑁄’𑀬𑀁 𑀅𑀦𑀸𑀕𑀢𑁂;

𑀪𑀯𑀺𑀲𑁆𑀲𑀢𑀻𑀢𑀺 𑀯𑁆𑀬𑀸𑀓𑀸𑀲𑀺 𑀲𑀸𑀯𑀓𑁂 𑀘 𑀧𑀼𑀭𑀸𑀤𑀺𑀓𑁂.

𑁫𑁫. 𑀇𑀤𑀁 𑀯𑀢𑁆𑀯𑀸𑀦 𑀓𑀢𑁆𑀯𑀸𑀦 𑀲𑀲𑀗𑁆𑀖𑁄 𑀢𑀁 𑀧𑀤𑀓𑁆𑀔𑀺𑀡𑀁;

𑀧𑀽𑀚𑁂𑀲𑀺 𑀅𑀝𑁆𑀞𑀫𑀼𑀝𑁆𑀞𑀺𑀳𑀺 𑀓𑀼𑀲𑀼𑀫𑁂𑀳𑀺 𑀕𑀼𑀡𑀧𑁆𑀧𑀺𑀬𑁄.

𑁫𑁬. 𑀇𑀢𑀺 𑀓𑀸𑀢𑀽𑀦 𑀧𑀸𑀬𑀸𑀲𑀺 𑀲𑀲𑀗𑁆𑀖𑁄 𑀮𑁄𑀓𑀦𑀸𑀬𑀓𑁄𑀯;

𑀭𑀫𑁆𑀫𑀓𑀁 𑀦𑀸𑀫 𑀦𑀕𑀭𑀁 𑀭𑀫𑁆𑀫𑀸𑀭𑀸𑀫𑀸𑀮𑀬𑀸𑀮𑀬𑀁

𑁫𑁭. 𑀚𑀺𑀦𑀲𑁆𑀲 𑀯𑀘𑀦𑀁 𑀲𑀼𑀢𑁆𑀯𑀸 𑀉𑀝𑁆𑀞𑀳𑀺𑀢𑁆𑀯𑀸𑀦 𑀧𑀗𑁆𑀓𑀢𑁄;

𑀫𑀼𑀤𑀺𑀢𑁄 𑀤𑁂𑀯𑀲𑀗𑁆𑀖𑁂𑀳𑀺 𑀓𑀼𑀲𑀼𑀫𑀸𑀤𑀻𑀳𑀺 𑀧𑀽𑀚𑀺𑀢𑁄.

𑁫𑁮. 𑀧𑀮𑁆𑀮𑀗𑁆𑀓𑀫𑀸’𑀪𑀼𑀚𑀺𑀢𑁆𑀯𑀸𑀦 𑀦𑀺𑀲𑀻𑀤𑀺 𑀓𑀼𑀲𑀼𑀫𑀸𑀲𑀦𑁂;

𑀫𑀳𑀸𑀢𑀧𑁄 𑀫𑀳𑀸𑀧𑀜𑁆𑀜𑁄 𑀲𑀼𑀫𑁂𑀥𑁄 𑀤𑀫𑀺𑀢𑀺𑀦𑁆𑀤𑁆𑀭𑀺𑀬𑁄.

𑁫𑁯. |𑀑𑁦.𑁦𑁦𑁦𑁬|

𑀤𑁂𑀯𑀸 𑀤𑀲𑀲𑀳𑀲𑁆𑀲𑁂𑀲𑀼 𑀘𑀓𑁆𑀓𑀯𑀸𑀴𑁂𑀲𑀼 𑀫𑁄𑀤𑀺𑀢𑀸;

𑀅𑀪𑀺𑀢𑁆𑀯𑀯𑀺𑀁𑀲𑀼 𑀢𑀁 𑀥𑀻𑀭𑀁 𑀦𑀺𑀲𑀺𑀦𑁆𑀦𑀁 𑀓𑀼𑀲𑀼𑀫𑀸𑀲𑀦𑁂.

𑁬𑁦. 𑀦𑀺𑀲𑀺𑀦𑁆𑀦𑁄 𑀉𑀧𑀥𑀸𑀭𑁂𑀲𑀺 𑀥𑀫𑁆𑀫𑁂 𑀩𑀼𑀤𑁆𑀥𑀓𑀭𑁂 𑀢𑀤𑀸;

𑀓𑀺𑀫𑀼𑀤𑁆𑀥𑀁 𑀯𑀸 𑀅𑀥𑁄 𑀯𑀸’𑀧𑀺 𑀤𑀺𑀲𑀸𑀲𑀼 𑀯𑀺𑀤𑀺𑀲𑀸𑀲𑀼 𑀘.

𑁬𑁧. 𑀇𑀘𑁆𑀘𑁂’𑀯𑀁 𑀯𑀺𑀘𑀺𑀦𑀦𑁆𑀢𑁄 𑀲𑁄 𑀲𑀓𑀮𑀁 𑀥𑀫𑁆𑀫𑀥𑀸𑀢𑀼𑀓𑀁;

𑀅𑀤𑁆𑀤𑀓𑁆𑀔𑀺 𑀲𑀓𑀲𑀦𑁆𑀢𑀸𑀦𑁂 𑀧𑀞𑀫𑀁 𑀤𑀸𑀦𑀧𑀸𑀭𑀫𑀺𑀁.

𑁬𑁨. 𑀏𑀯𑀫𑁂’𑀯𑀁 𑀕𑀯𑁂𑀲𑀦𑁆𑀢𑁄 𑀉𑀢𑁆𑀢𑀭𑀺𑀁 𑀧𑀸𑀭𑀫𑀻 𑀯𑀺𑀤𑀽;

𑀲𑀩𑁆𑀩𑀸 𑀧𑀸𑀭𑀫𑀺𑀬𑁄 𑀤𑀺𑀲𑁆𑀯𑀸 𑀅𑀢𑁆𑀢𑀦𑁄 𑀜𑀸𑀡𑀘𑀓𑁆𑀔𑀼𑀦𑀸.

𑁬𑁩. 𑀲𑀁𑀲𑀸𑀭𑁂 𑀲𑀁𑀲𑀭𑀦𑁆𑀢𑁄 𑀲𑁄 𑀩𑀳𑀼𑀁 𑀤𑀼𑀓𑁆𑀔𑀁 𑀢𑀺𑀢𑀺𑀓𑁆𑀔𑀺𑀬;

𑀕𑀯𑁂𑀲𑀦𑁆𑀢𑁄’𑀫𑀢𑀁 𑀲𑀦𑁆𑀢𑁄 𑀧𑀽𑀭𑁂𑀢𑁆𑀯𑀸 𑀤𑀸𑀦𑀧𑀸𑀭𑀫𑀺𑀁.

𑁬𑁪. 𑀲𑀢𑁆𑀢𑀦𑀁 𑀓𑀧𑁆𑀧𑀭𑀼𑀓𑁆𑀔𑁄’𑀯 𑀘𑀺𑀦𑁆𑀢𑀸𑀫𑀡𑀺’𑀯 𑀓𑀸𑀫𑀤𑁄;

𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀫𑀦𑁆𑀦𑀸𑀤𑀺𑀁 𑀤𑀤𑀦𑁆𑀢𑁄 𑀤𑀤𑀢𑀁 𑀯𑀭𑁄.

𑁬𑁫. 𑀢𑀸𑀭𑀓𑀸𑀳𑀺 𑀩𑀳𑀼𑀁 𑀓𑀢𑁆𑀯𑀸 𑀦𑀪𑁂 𑀘𑀸𑀭𑀼𑀯𑀺𑀮𑁄𑀘𑀦𑁂;

𑀉𑀧𑁆𑀧𑀸𑀝𑁂𑀢𑁆𑀯𑀸 𑀤𑀤𑀁 𑀥𑀻𑀭𑁄 𑀬𑀸𑀘𑀓𑀸𑀦𑀁 𑀧𑀫𑁄𑀤𑀺𑀢𑁄.

𑁬𑁬. 𑀫𑀳𑀺𑀬𑀸 𑀧𑀁𑀲𑀼𑀢𑁄 𑀘𑀸’𑀧𑀺 𑀲𑀫𑀼𑀤𑁆𑀤𑁄𑀤𑀓𑀢𑁄’𑀥𑀺𑀓𑀁;

𑀤𑀤𑀁 𑀲𑀭𑀻𑀭𑀫𑀁𑀲𑀜𑁆𑀘 𑀮𑁄𑀳𑀺𑀢𑀫𑁆𑀧𑀺 𑀘 𑀅𑀢𑁆𑀢𑀦𑁄.

𑁬𑁭. 𑀫𑁄𑀮𑀺𑀦𑀸’𑀮𑀗𑁆𑀓𑀢𑁂 𑀲𑀻𑀲𑁂’𑀥𑀺𑀓𑀁 𑀓𑀢𑁆𑀯𑀸 𑀲𑀺𑀦𑁂𑀭𑀼𑀢𑁄;

𑀓𑀫𑁆𑀧𑀬𑀺𑀢𑁆𑀯𑀸 𑀫𑀳𑀺𑀁 𑀤𑁂𑀦𑁆𑀢𑁄 𑀲𑀼𑀢𑁂 𑀘𑀸’𑀧𑀺 𑀲𑀓𑀗𑁆𑀕𑀢𑀸𑀯.

𑁬𑁮. 𑀲𑀻𑀮𑀦𑁂𑀓𑁆𑀓𑀫𑁆𑀫𑀧𑀜𑁆𑀜𑀸𑀤𑀻 𑀧𑀽𑀭𑁂𑀢𑁆𑀯𑀸 𑀲𑀩𑁆𑀩𑀧𑀸𑀭𑀫𑀻;

𑀯𑁂𑀲𑁆𑀲𑀦𑁆𑀢𑀭𑀢𑁆𑀢𑀪𑀸𑀯𑁂’ 𑀯𑀫𑁆𑀧𑀢𑁆𑀯𑀸 𑀢𑀫𑁆𑀪𑀸 𑀘𑀼𑀢𑁄 𑀧𑀦.

𑁬𑁯. 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀲𑀼𑀭𑀸𑀯𑀸𑀲𑁂 𑀲𑀼𑀦𑁆𑀤𑀭𑁂 𑀢𑀼𑀲𑀺𑀢𑁂 𑀧𑀼𑀭𑁂;

𑀯𑀲𑀦𑁆𑀢𑁄 𑀲𑀼𑀘𑀺𑀭𑀁 𑀓𑀸𑀮𑀁 𑀪𑀼𑀢𑁆𑀯𑀸𑀦𑀸’𑀢𑀦𑁆𑀢𑀲𑀫𑁆𑀧𑀤𑀁.

𑁭𑁦. 𑀓𑀢𑀜𑁆𑀚𑀮𑀻𑀳𑀺 𑀤𑁂𑀯𑁂𑀳𑀺 𑀬𑀸𑀘𑀺𑀢𑁄 𑀤𑀺𑀧𑀤𑀼𑀢𑁆𑀢𑀫𑁄;