𑁩. 𑀅𑀦𑁂𑀓𑀢𑁆𑀣𑀯𑀕𑁆𑀕

𑁭𑁭𑁭. 𑀅𑀦𑁂𑀓𑀢𑁆𑀣𑁂 𑀧𑀯𑀓𑁆𑀔𑀸𑀫𑀺, 𑀕𑀸𑀣𑀸’𑀤𑁆𑀥𑀧𑀸𑀤𑀢𑁄 𑀓𑀫𑀸;

𑀏𑀢𑁆𑀣 𑀮𑀺𑀗𑁆𑀕𑀯𑀺𑀲𑁂𑀲𑀢𑁆𑀣, 𑀫𑁂𑀓𑀲𑁆𑀲 𑀧𑀼𑀦𑀭𑀼𑀢𑁆𑀢𑀢𑀸.

𑁭𑁭𑁮. 𑀲𑀫𑀬𑁄 𑀲𑀫𑀯𑀸𑀬𑁂 𑀘, 𑀲𑀫𑀽𑀳𑁂 𑀓𑀸𑀭𑀡𑁂 𑀔𑀡𑁂;

𑀧𑀝𑀺𑀯𑁂𑀥𑁂 𑀲𑀺𑀬𑀸 𑀓𑀸𑀮𑁂, 𑀧𑀳𑀸𑀦𑁂 𑀮𑀸𑀪 𑀤𑀺𑀝𑁆𑀞𑀺𑀲𑀼.

𑁭𑁭𑁯. 𑀯𑀡𑁆𑀡𑁄 𑀲𑀡𑁆𑀞𑀸𑀦 𑀭𑀽𑀧𑁂𑀲𑀼, 𑀚𑀸𑀢𑀺,𑀘𑁆𑀙𑀯𑀻𑀲𑀼 𑀓𑀸𑀭𑀡𑁂;

𑀧𑀫𑀸𑀡𑁂 𑀘 𑀧𑀲𑀁𑀲𑀸𑀬𑀁, 𑀅𑀓𑁆𑀔𑀭𑁂 𑀘 𑀬𑀲𑁂 𑀕𑀼𑀡𑁂.

𑁭𑁮𑁦. 𑀉𑀤𑁆𑀤𑁂𑀲𑁂 𑀧𑀸𑀢𑀺𑀫𑁄𑀓𑁆𑀔𑀲𑁆𑀲, 𑀧𑀡𑁆𑀡𑀢𑁆𑀢𑀺𑀬 𑀫𑀼𑀧𑁄𑀲𑀣𑁄;

𑀉𑀧𑀯𑀸𑀲𑁂 𑀘 𑀅𑀝𑁆𑀞𑀗𑁆𑀕𑁂, 𑀉𑀧𑁄𑀲𑀣𑀤𑀺𑀦𑁂 𑀲𑀺𑀬𑀸.

𑁭𑁮𑁧. 𑀭𑀣𑀗𑁆𑀕𑁂 𑀮𑀓𑁆𑀔𑀡𑁂 𑀥𑀫𑁆𑀫𑁄, 𑀭𑀘𑀓𑁆𑀓𑁂’𑀲𑁆𑀯𑀻𑀭𑀺𑀬𑀸𑀧𑀣𑁂;

𑀘𑀓𑁆𑀓𑀁 𑀲𑀫𑁆𑀧𑀢𑁆𑀢𑀺𑀬𑀁 𑀘𑀓𑁆𑀓, 𑀭𑀢𑀦𑁂 𑀫𑀡𑁆𑀟𑀮𑁂 𑀩𑀮𑁂.

𑁭𑁮𑁨. 𑀓𑀼𑀮𑀸𑀮𑀪𑀡𑁆𑀟𑁂 𑀆𑀡𑀸𑀬, 𑀫𑀸𑀬𑀼𑀥𑁂 𑀤𑀸𑀦 𑀭𑀸𑀲𑀺𑀲𑀼;

𑁭𑁮𑁩. 𑀤𑀸𑀦𑀲𑁆𑀫𑀺𑀁 𑀩𑁆𑀭𑀳𑁆𑀫𑀘𑀭𑀺𑀬, 𑀫𑀧𑁆𑀧𑀫𑀜𑁆𑀜𑀸𑀲𑀼 𑀲𑀸𑀲𑀦𑁂;

𑀫𑁂𑀣𑀼𑀦𑀸𑀭𑀢𑀺𑀬𑀁 𑀯𑁂𑀬𑁆𑀬𑀸, 𑀯𑀘𑁆𑀘𑁂 𑀲𑀤𑀸𑀭𑀢𑀼𑀝𑁆𑀞𑀺𑀬𑀁;

𑀧𑀜𑁆𑀘𑀲𑀻𑀮𑀸’𑀭𑀺𑀬𑀫𑀕𑁆𑀕𑁄, 𑀧𑁄𑀲𑀣𑀗𑁆𑀕 𑀥𑀺𑀢𑀻𑀲𑀼 [𑀞𑀺𑀢𑀻𑀲𑀼 (𑀓.)] 𑀘.

𑁭𑁮𑁪. 𑀥𑀫𑁆𑀫𑁄 𑀲𑀪𑀸𑀯𑁂 𑀧𑀭𑀺𑀬𑀢𑁆𑀢𑀺𑀧𑀜𑁆𑀜𑀸,

𑀜𑀸𑀬𑁂𑀲𑀼 𑀲𑀘𑁆𑀘𑀧𑁆𑀧𑀓𑀢𑀻𑀲𑀼 𑀧𑀼𑀜𑁆𑀜𑁂;

𑀜𑁂𑀬𑁆𑀬𑁂 𑀕𑀼𑀡𑀸’𑀘𑀸𑀭 𑀲𑀫𑀸𑀥𑀺𑀲𑀽𑀧𑀺,

𑀦𑀺𑀲𑁆𑀲𑀢𑁆𑀢𑀢𑀸’𑀧𑀢𑁆𑀢𑀺𑀲𑀼 𑀓𑀸𑀭𑀡𑀸𑀤𑁄.

𑁭𑁮𑁫. 𑀅𑀢𑁆𑀣𑁄 𑀧𑀬𑁄𑀚𑀦𑁂 𑀲𑀤𑁆𑀤𑀸, 𑀪𑀺𑀥𑁂𑀬𑁆𑀬𑁂 𑀯𑀼𑀤𑁆𑀥𑀺𑀬𑀁 𑀥𑀦𑁂;

𑀯𑀢𑁆𑀣𑀼𑀫𑁆𑀳𑀺 𑀓𑀸𑀭𑀡𑁂 𑀦𑀸𑀲𑁂, 𑀳𑀺𑀢𑁂 𑀧𑀘𑁆𑀙𑀺𑀫𑀧𑀩𑁆𑀩𑀢𑁂.

𑁭𑁮𑁬. 𑀬𑁂𑀪𑀼𑀬𑁆𑀬𑀢𑀸’𑀩𑁆𑀬𑀸𑀫𑀺𑀲𑁆𑀲𑁂𑀲𑀼, 𑀯𑀺𑀲𑀁𑀬𑁄𑀕𑁂 𑀘 𑀓𑁂𑀯𑀮𑀁;

𑀤𑀴𑁆𑀳𑀢𑁆𑀣𑁂’𑀦𑀢𑀺𑀭𑁂𑀓𑁂 𑀘𑀸, 𑀦𑀯𑀲𑁂𑀲𑀫𑁆𑀳𑀺 𑀢𑀁 𑀢𑀺𑀲𑀼.

𑁭𑁮𑁭. 𑀕𑀼𑀡𑁄 𑀧𑀝𑀮 𑀭𑀸𑀲𑀻𑀲𑀼, 𑀆𑀦𑀺𑀲𑀁𑀲𑁂 𑀘 𑀩𑀦𑁆𑀥𑀦𑁂;

𑀅𑀧𑁆𑀧𑀥𑀸𑀦𑁂 𑀘 𑀲𑀻𑀮𑀸𑀤𑁄, 𑀲𑀼𑀓𑁆𑀓𑀸𑀤𑀺𑀫𑁆𑀳𑀺 𑀚𑀺𑀬𑀸𑀬 𑀘.

𑁭𑁮𑁮. 𑀭𑀼𑀓𑁆𑀔𑀸𑀤𑁄 𑀯𑀺𑀚𑁆𑀚𑀫𑀸𑀦𑁂 𑀘𑀸, 𑀭𑀳𑀦𑁆𑀢𑁂 𑀔𑀦𑁆𑀥𑀧𑀜𑁆𑀘𑀓𑁂;

𑀪𑀽𑀢𑁄 𑀲𑀢𑁆𑀢 𑀫𑀳𑀸𑀪𑀽𑀢𑀸, 𑀫𑀦𑀼𑀲𑁆𑀲𑁂𑀲𑀼 𑀦 𑀦𑀸𑀭𑀺𑀬𑀁.

𑁭𑁮𑁯. 𑀯𑀸𑀘𑁆𑀘𑀮𑀺𑀗𑁆𑀕𑁄 𑀅𑀢𑀻𑀢𑀲𑁆𑀫𑀺𑀁, 𑀚𑀸𑀢𑁂 𑀧𑀢𑁆𑀢𑁂 𑀲𑀫𑁂 𑀫𑀢𑁄;

𑁭𑁯𑁦. 𑀲𑀼𑀦𑁆𑀤𑀭𑁂 𑀤𑀴𑁆𑀳𑀺𑀓𑀫𑁆𑀫𑁂 𑀘𑀸, 𑀬𑀸𑀘𑀦𑁂 𑀲𑀫𑁆𑀧𑀝𑀺𑀘𑁆𑀙𑀦𑁂;

𑀲𑀚𑁆𑀚𑀦𑁂 𑀲𑀫𑁆𑀧𑀳𑀁𑀲𑀸𑀬𑀁, 𑀲𑀸𑀥𑁆𑀯𑀸’𑀪𑀺𑀥𑁂𑀬𑁆𑀬𑀮𑀺𑀗𑁆𑀕𑀺𑀓𑀁.

𑁭𑁯𑁧. 𑀅𑀦𑁆𑀢𑁄 𑀦𑀺𑀢𑁆𑀣𑀻 𑀲𑀫𑀻𑀧𑁂 𑀘𑀸, 𑀯𑀲𑀸𑀦𑁂 𑀧𑀤𑀧𑀽𑀭𑀡𑁂;

𑀤𑁂𑀳𑀸𑀯𑀬𑀯𑁂 𑀓𑁄𑀝𑁆𑀞𑀸𑀲𑁂, 𑀦𑀸𑀲 𑀲𑀻𑀫𑀸𑀲𑀼 𑀮𑀸𑀫𑀓𑁂.

𑁭𑁯𑁨. 𑀦𑀺𑀓𑀸𑀬𑁂 𑀲𑀦𑁆𑀥𑀺 𑀲𑀸𑀫𑀜𑁆𑀜, 𑀧𑁆𑀧𑀲𑀽𑀢𑀻𑀲𑀼 𑀓𑀼𑀮𑁂 𑀪𑀯𑁂;

𑀯𑀺𑀲𑁂𑀲𑁂 𑀲𑀼𑀫𑀦𑀸𑀬𑀜𑁆𑀘, 𑀚𑀸𑀢𑀺 𑀲𑀗𑁆𑀔𑀢𑀮𑀓𑁆𑀔𑀡𑁂.

𑁭𑁯𑁩. 𑀪𑀯𑀪𑁂𑀤𑁂 𑀧𑀢𑀺𑀝𑁆𑀞𑀸𑀬𑀁, 𑀦𑀺𑀝𑁆𑀞𑀸’𑀚𑁆𑀛𑀸𑀲𑀬𑀩𑀼𑀤𑁆𑀥𑀺𑀲𑀼;

𑀯𑀸𑀲𑀝𑁆𑀞𑀸𑀦𑁂 𑀘 𑀕𑀫𑀦𑁂, 𑀯𑀺𑀲𑀝𑀢𑁆𑀢𑁂 [𑀯𑀺𑀲𑀭𑀢𑁆𑀢 𑀯𑀺𑀲𑀤𑀢𑁆𑀢𑁂] 𑀕𑀢𑀻𑀭𑀺𑀢𑀸.

𑁭𑁯𑁪. 𑀨𑀮𑁂 𑀯𑀺𑀧𑀲𑁆𑀲𑀦𑀸 𑀤𑀺𑀩𑁆𑀩, 𑀘𑀓𑁆𑀔𑀼 𑀲𑀩𑁆𑀩𑀜𑁆𑀜𑀼𑀢𑀸𑀲𑀼 𑀘;

𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀫𑁆𑀳𑀺, 𑀫𑀕𑁆𑀕𑁂 𑀘 𑀜𑀸𑀡𑀤𑀲𑁆𑀲𑀦𑀁.

𑁭𑁯𑁫. 𑀓𑀫𑁆𑀫𑀸𑀭𑀼𑀤𑁆𑀥𑀦 𑀅𑀗𑁆𑀕𑀸𑀭, 𑀓𑀧𑀮𑁆𑀮 𑀤𑀻𑀧𑀺𑀓𑀸𑀲𑀼 𑀘;

𑀲𑀼𑀯𑀡𑁆𑀡𑀓𑀸𑀭𑀫𑀽𑀲𑀸𑀬𑀁, 𑀉𑀓𑁆𑀓𑀸 𑀯𑁂𑀕𑁂 𑀘 𑀯𑀸𑀬𑀼𑀦𑁄.

𑁭𑁯𑁬. 𑀓𑁂𑀲𑁄𑀳𑀸𑀭𑀡, 𑀚𑀻𑀯𑀺𑀢, 𑀯𑀼𑀢𑁆𑀢𑀺𑀲𑀼 𑀯𑀧𑀦𑁂 𑀘 𑀯𑀸𑀧𑀲𑀫𑀓𑀭𑀡𑁂;

𑀓𑀣𑀦𑁂 𑀧𑀫𑀼𑀢𑁆𑀢𑀪𑀸𑀯, 𑀚𑁆𑀛𑁂𑀦𑀸𑀤𑁄 [𑀚𑁆𑀛𑁂𑀲𑀦𑀸𑀤𑁄 (𑀲𑀻.)] 𑀯𑀼𑀢𑁆𑀢 𑀫𑀧𑀺 𑀢𑀻𑀲𑀼.

𑁭𑁯𑁭. 𑀕𑀫𑀦𑁂 𑀯𑀺𑀲𑁆𑀲𑀼𑀢𑁂 𑀘𑀸’𑀯, 𑀥𑀸𑀭𑀺𑀢𑁄’𑀧𑀘𑀺𑀢𑁂𑀲𑀼 𑀘;

𑀅𑀦𑀼𑀬𑁄𑀕𑁂 𑀓𑀺𑀮𑀺𑀦𑁆𑀦𑁂 𑀘, 𑀲𑀼𑀢𑁄’ 𑀪𑀺𑀥𑁂𑀬𑁆𑀬𑀮𑀺𑀗𑁆𑀕𑀺𑀓𑁄.

𑁭𑁯𑁮. 𑀲𑁄𑀢𑀯𑀺𑀜𑁆𑀜𑁂𑀬𑁆𑀬 𑀲𑀢𑁆𑀣𑁂𑀲𑀼, 𑀲𑀼𑀢𑀁 𑀧𑀼𑀢𑁆𑀢𑁂 𑀲𑀼𑀢𑁄 𑀲𑀺𑀬𑀸;

𑁭𑁯𑁯. 𑀓𑀧𑁆𑀧𑁄 𑀓𑀸𑀮𑁂 𑀬𑀼𑀕𑁂 𑀮𑁂𑀲𑁂, 𑀧𑀜𑁆𑀜𑀢𑁆𑀢𑀺 𑀧𑀭𑀫𑀸𑀬𑀼𑀲𑀼;

𑀲𑀤𑀺𑀲𑁂 𑀢𑀻𑀲𑀼 𑀲𑀫𑀡, 𑀯𑁄𑀳𑀸𑀭 𑀓𑀧𑁆𑀧𑀩𑀺𑀦𑁆𑀤𑀼𑀲𑀼;

𑀲𑀫𑀦𑁆𑀢𑀢𑁆𑀣𑁂’𑀦𑁆𑀢𑀭𑀓𑀧𑁆𑀧𑀸, 𑀤𑀺𑀓𑁂 𑀢𑀓𑁆𑀓𑁂 𑀯𑀺𑀥𑀺𑀫𑁆𑀳𑀺 𑀘.

𑁮𑁦𑁦. 𑀦𑀺𑀩𑁆𑀩𑀸𑀦 𑀫𑀕𑁆𑀕 𑀯𑀺𑀭𑀢𑀺, 𑀲𑀧𑀣𑁂 𑀲𑀘𑁆𑀘𑀪𑀸𑀲𑀺𑀢𑁂;

𑀢𑀘𑁆𑀙𑁂 𑀘𑀸’𑀭𑀺𑀬𑀲𑀘𑁆𑀘𑀫𑁆𑀳𑀺, 𑀤𑀺𑀝𑁆𑀞𑀺𑀬𑀁 𑀲𑀘𑁆𑀘 𑀫𑀻𑀭𑀺𑀢𑀁.

𑁮𑁦𑁧. 𑀲𑀜𑁆𑀚𑀸𑀢𑀺𑀤𑁂𑀲𑁂 𑀳𑁂𑀢𑀼𑀫𑁆𑀳𑀺, 𑀯𑀸𑀲𑀝𑁆𑀞𑀸𑀦𑀸’𑀓𑀭𑁂𑀲𑀼 𑀘;

𑀲𑀫𑁄𑀲𑀭𑀡𑀝𑁆𑀞𑀸𑀦𑁂 𑀘𑀸, 𑀬𑀢𑀦𑀁 𑀧𑀤𑀧𑀽𑀭𑀡𑁂.

𑁮𑁦𑁨. 𑀅𑀦𑁆𑀢𑀭𑀁 𑀫𑀚𑁆𑀛 𑀯𑀢𑁆𑀣’𑀜𑁆𑀜, 𑀔𑀡𑁄’𑀓𑀸𑀲𑁄’𑀥𑀺 𑀳𑁂𑀢𑀼𑀲𑀼;

𑀩𑁆𑀬𑀯𑀥𑀸𑀦𑁂 𑀯𑀺𑀦𑀝𑁆𑀞𑁂 𑀘, 𑀪𑁂𑀤𑁂 𑀙𑀺𑀤𑁆𑀤𑁂 𑀫𑀦𑀲𑁆𑀬’𑀧𑀺.

𑁮𑁦𑁩. 𑀆𑀭𑁄𑀕𑁆𑀬𑁂 𑀓𑀼𑀲𑀮𑀁 𑀇𑀝𑁆𑀞, 𑀯𑀺𑀧𑀸𑀓𑁂 𑀓𑀼𑀲𑀮𑁄 𑀢𑀣𑀸;

𑀅𑀦𑀯𑀚𑁆𑀚𑀫𑁆𑀳𑀺 𑀙𑁂𑀓𑁂 𑀘, 𑀓𑀣𑀺𑀢𑁄 𑀯𑀸𑀘𑁆𑀘𑀮𑀺𑀗𑁆𑀕𑀺𑀓𑁄.

𑁮𑁦𑁪. 𑀤𑁆𑀭𑀯𑀸’𑀘𑀸𑀭𑁂𑀲𑀼 𑀯𑀻𑀭𑀺𑀬𑁂, 𑀫𑀥𑀼𑀭𑀸𑀤𑀻𑀲𑀼 𑀧𑀸𑀭𑀤𑁂;

𑀲𑀺𑀗𑁆𑀕𑀸𑀭𑀸𑀤𑁄 𑀥𑀸𑀢𑀼𑀪𑁂𑀤𑁂, 𑀓𑀺𑀘𑁆𑀘𑁂 𑀲𑀫𑁆𑀧𑀢𑁆𑀢𑀺𑀬𑀁 𑀭𑀲𑁄.

𑁮𑁦𑁫. 𑀩𑁄𑀥𑀺 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂, 𑀭𑀺𑀬𑀫𑀕𑁆𑀕𑁂 𑀘 𑀦𑀸𑀭𑀺𑀬𑀁;

𑀧𑀜𑁆𑀜𑀢𑁆𑀢𑀺𑀬𑀁 𑀧𑀼𑀫𑁂’ 𑀲𑁆𑀲𑀢𑁆𑀣, 𑀭𑀼𑀓𑁆𑀔𑀫𑁆𑀳𑀺 𑀧𑀼𑀭𑀺𑀲𑀺𑀢𑁆𑀣𑀺𑀬𑀁.

𑁮𑁦𑁬. 𑀲𑁂𑀯𑀺𑀢𑁄 𑀬𑁂𑀦 𑀬𑁄 𑀦𑀺𑀘𑁆𑀘𑀁, 𑀢𑀢𑁆𑀣𑀸𑀧𑀺 𑀯𑀺𑀲𑀬𑁄 𑀲𑀺𑀬𑀸;

𑀭𑀽𑀧𑀸𑀤𑀺𑀓𑁂 𑀚𑀦𑀧𑀤𑁂, 𑀢𑀣𑀸 𑀤𑁂𑀲𑁂 𑀘 𑀕𑁄𑀘𑀭𑁂.

𑁮𑁦𑁭. 𑀪𑀸𑀯𑁄 𑀧𑀤𑀢𑁆𑀣𑁂 𑀲𑀢𑁆𑀢𑀸𑀬, 𑀫𑀥𑀺𑀧𑁆𑀧𑀸𑀬 𑀓𑁆𑀭𑀺𑀬𑀸𑀲𑀼 𑀘;

𑀲𑀪𑀸𑀯𑀲𑁆𑀫𑀺𑀜𑁆𑀘 𑀮𑀻𑀮𑀸𑀬𑀁, 𑀧𑀼𑀭𑀺𑀲𑀺’𑀢𑁆𑀣𑀺𑀦𑁆𑀤𑁆𑀭𑀺𑀬𑁂𑀲𑀼 𑀘.

𑁮𑁦𑁮. 𑀲𑁄 𑀩𑀦𑁆𑀥𑀯𑁂’𑀢𑁆𑀢𑀦𑀺 𑀘 𑀲𑀁, 𑀲𑁄 𑀥𑀦𑀲𑁆𑀫𑀺 𑀫𑀦𑀺𑀢𑁆𑀣𑀺𑀬𑀁;

𑀲𑀸 𑀧𑀼𑀫𑁂 𑀲𑀼𑀦𑀔𑁂 𑀯𑀼𑀢𑁆𑀢𑁄, 𑀢𑁆𑀢𑀦𑀺𑀬𑁂 𑀲𑁄 𑀢𑀺𑀮𑀺𑀗𑁆𑀕𑀺𑀓𑁄.

𑁮𑁦𑁯. 𑀲𑀼𑀯𑀡𑁆𑀡𑀁 𑀓𑀦𑀓𑁂 𑀯𑀼𑀢𑁆𑀢𑀁, 𑀲𑀼𑀯𑀡𑁆𑀡𑁄 𑀕𑀭𑀼𑀴𑁂 𑀢𑀣𑀸;

𑀧𑀜𑁆𑀘𑀥𑀭𑀡𑀫𑀢𑁆𑀢𑁂 𑀘, 𑀙𑀯𑀺 𑀲𑀫𑁆𑀧𑀢𑁆𑀢𑀺𑀬𑀫𑁆𑀧𑀺 𑀘.

𑁮𑁧𑁦. 𑀯𑀭𑁄 𑀤𑁂𑀯𑀸𑀤𑀺𑀓𑀸 [𑀤𑁂𑀯𑀸𑀤𑀺𑀢𑁄 (𑀲𑀻.)] 𑀇𑀝𑁆𑀞𑁂, 𑀚𑀸𑀫𑀸𑀢𑀭𑀺 𑀧𑀢𑀺𑀫𑁆𑀳𑀺 𑀘,

𑀉𑀢𑁆𑀢𑀫𑁂 𑀯𑀸𑀘𑁆𑀘𑀮𑀺𑀗𑁆𑀕𑁄 𑀲𑁄, 𑀯𑀭𑀁 𑀫𑀦𑁆𑀤𑀧𑁆𑀧𑀺𑀬𑁂 𑀩𑁆𑀬𑀬𑀁.

𑁮𑁧. 𑁧.

𑀫𑀓𑀼𑀮𑁂 𑀥𑀦𑀭𑀸𑀲𑀺𑀫𑁆𑀳𑀺, 𑀲𑀺𑀬𑀸 𑀓𑁄𑀲 𑀫𑀦𑀺𑀢𑁆𑀣𑀺𑀬𑀁;

𑀦𑁂𑀢𑁆𑀢𑀺𑀁𑀲𑀸𑀤𑀺 𑀧𑀺𑀥𑀸𑀦𑁂 𑀘, 𑀥𑀦𑀼𑀧𑀜𑁆𑀘𑀲𑀢𑁂𑀧𑀺 𑀘.

𑁮𑁧𑁨. 𑀧𑀺𑀢𑀸𑀫𑀳𑁂 𑀚𑀺𑀦𑁂 𑀲𑁂𑀝𑁆𑀞𑁂, 𑀩𑁆𑀭𑀸𑀳𑁆𑀫𑀡𑁂 𑀘 𑀧𑀺𑀢𑀽𑀲𑁆𑀯𑀧𑀺;

𑀩𑁆𑀭𑀳𑁆𑀫𑀸 𑀯𑀼𑀢𑁆𑀢𑁄 𑀢𑀣𑀸 𑀩𑁆𑀭𑀳𑁆𑀫𑀁, 𑀯𑁂𑀤𑁂 𑀢𑀧𑀲𑀺 𑀯𑀼𑀘𑁆𑀘𑀢𑁂.

𑁮𑁧𑁩. 𑀳𑀢𑁆𑀣𑀻𑀦𑀁 𑀫𑀚𑁆𑀛𑀩𑀦𑁆𑀥𑁂 𑀘, 𑀧𑀓𑁄𑀝𑁆𑀞𑁂 𑀓𑀘𑁆𑀙𑀩𑀦𑁆𑀥𑀦𑁂;

𑀫𑁂𑀔𑀮𑀸𑀬𑀁 𑀫𑀢𑀸 𑀓𑀘𑁆𑀙𑀸, 𑀓𑀘𑁆𑀙𑁄 𑀯𑀼𑀢𑁆𑀢𑁄 𑀮𑀢𑀸𑀬 𑀘.

𑁮𑁧𑁪. 𑀢𑀣𑁂𑀯 𑀩𑀸𑀳𑀼𑀫𑀽𑀮𑀫𑁆𑀳𑀺, 𑀅𑀦𑀽𑀧𑀫𑁆𑀳𑀺 𑀢𑀺𑀡𑁂𑀧𑀺 𑀘;

𑁮𑁧𑁫. 𑀧𑀫𑀸𑀡𑀁 𑀳𑁂𑀢𑀼 𑀲𑀢𑁆𑀣𑁂𑀲𑀼, 𑀫𑀸𑀦𑁂 𑀘 𑀲𑀘𑁆𑀘𑀯𑀸𑀤𑀺𑀦𑀺;

𑀧𑀫𑀸𑀢𑀭𑀺 𑀘 𑀦𑀺𑀘𑁆𑀘𑀫𑁆𑀳𑀺, 𑀫𑀭𑀺𑀬𑀸𑀤𑀸𑀬 𑀫𑀼𑀘𑁆𑀘𑀢𑁂.

𑁮𑁧𑁬. 𑀲𑀢𑁆𑀢𑀁 𑀤𑀩𑁆𑀩’𑀢𑁆𑀢𑀪𑀸𑀯𑁂𑀲𑀼, 𑀧𑀸𑀡𑁂𑀲𑀼 𑀘 𑀩𑀮𑁂, 𑀲𑀺𑀬𑀸 [𑀩𑀮𑁂 𑀲𑀓𑁆𑀓𑀸 (𑀝𑀻.)];

𑀲𑀢𑁆𑀢𑀸𑀬𑀜𑁆𑀘, 𑀚𑀦𑁂𑀲𑀢𑁆𑀢𑁄, 𑀆𑀲𑀢𑁆𑀢𑁂 𑀲𑁄 𑀢𑀺𑀮𑀺𑀗𑁆𑀕𑀺𑀓𑁄.

𑁮𑁧𑁭. 𑀲𑁂𑀫𑁆𑀳𑀸𑀤𑁄 𑀭𑀲𑀭𑀢𑁆𑀢𑀸𑀤𑁄, 𑀫𑀳𑀸𑀪𑀽𑀢𑁂 𑀧𑀪𑀸𑀤𑀺𑀓𑁂;

𑀥𑀸𑀢𑀼 𑀤𑁆𑀯𑀻𑀲𑁆𑀯’𑀝𑁆𑀞𑀺𑀘𑀓𑁆𑀔𑀸’𑀤𑀺, 𑀪𑁆𑀯𑀸’𑀤𑀻𑀲𑀼 𑀕𑁂𑀭𑀺𑀓𑀸𑀤𑀺𑀲𑀼.

𑁮𑁧𑁮. 𑀅𑀫𑀘𑁆𑀘𑀸𑀤𑁄 𑀲𑀪𑀸𑀯𑁂 𑀘, 𑀬𑁄𑀦𑀺𑀬𑀁 𑀧𑀓𑀢𑀻’𑀭𑀺𑀢𑀸;

𑀲𑀢𑁆𑀯𑀸𑀤𑀺𑀲𑀸𑀫𑁆𑀬𑀸’𑀯𑀢𑁆𑀣𑀸𑀬𑀁, 𑀧𑀘𑁆𑀘𑀬𑀸 𑀧𑀞𑀫𑁂𑀧𑀺 𑀘.

𑁮𑁧𑁯. 𑀧𑀤𑀁 𑀞𑀸𑀦𑁂 𑀧𑀭𑀺𑀢𑁆𑀢𑀸𑀡𑁂, 𑀦𑀺𑀩𑁆𑀩𑀸𑀦𑀫𑁆𑀳𑀺 𑀘 𑀓𑀸𑀭𑀡𑁂;

𑀲𑀤𑁆𑀤𑁂 𑀯𑀢𑁆𑀣𑀼𑀫𑁆𑀳𑀺 𑀓𑁄𑀝𑁆𑀞𑀸𑀲𑁂, 𑀧𑀸𑀤𑁂 𑀢𑀮𑁆𑀮𑀜𑁆𑀙𑀦𑁂 𑀫𑀢𑀁.

𑁮𑁨𑁦. 𑀮𑁄𑀳𑀫𑀼𑀕𑁆𑀕𑀭 𑀫𑁂𑀖𑁂𑀲𑀼, 𑀖𑀦𑁄, 𑀢𑀸𑀮𑀸𑀤𑀺𑀓𑁂 𑀖𑀦𑀁,;

𑀦𑀺𑀭𑀦𑁆𑀢𑀭𑁂 𑀘 𑀓𑀞𑀺𑀦𑁂, 𑀯𑀸𑀘𑁆𑀘𑀮𑀺𑀗𑁆𑀕𑀺𑀓 𑀫𑀼𑀘𑁆𑀘𑀢𑁂.

𑁮𑁨𑁧. 𑀔𑀼𑀤𑁆𑀤𑀸 𑀘 𑀫𑀓𑁆𑀔𑀺𑀓𑀸𑀪𑁂𑀤𑁂, 𑀫𑀥𑀼𑀫𑁆𑀳𑀺 𑀔𑀼𑀤𑁆𑀤, 𑀫𑀧𑁆𑀧𑀓𑁂;

𑀅𑀥𑀫𑁂 𑀓𑀧𑀡𑁂 𑀘𑀸𑀧𑀺, 𑀩𑀳𑀼𑀫𑁆𑀳𑀺 𑀘𑀢𑀽𑀲𑀼 𑀢𑁆𑀢𑀺𑀲𑀼.

𑁮𑁨𑁨. 𑀢𑀓𑁆𑀓𑁂 𑀫𑀭𑀡𑀮𑀺𑀗𑁆𑀕𑁂 𑀘, 𑀅𑀭𑀺𑀝𑁆𑀞𑀁 𑀅𑀲𑀼𑀪𑁂 𑀲𑀼𑀪𑁂,;

𑀅𑀭𑀺𑀝𑁆𑀞𑁄 𑀆𑀲𑀯𑁂 𑀓𑀸𑀓𑁂, 𑀦𑀺𑀫𑁆𑀩𑁂 𑀘 𑀨𑁂𑀦𑀺𑀮𑀤𑁆𑀤𑀼𑀫𑁂.

𑁮𑁨𑁩. 𑀫𑀸𑀦𑀪𑀡𑁆𑀟𑁂 𑀧𑀮𑀲𑀢𑁂, 𑀲𑀤𑀺𑀲𑀢𑁆𑀢𑁂 𑀢𑀼𑀮𑀸 𑀢𑀣𑀸;

𑀕𑁂𑀳𑀸𑀦𑀁 𑀤𑀸𑀭𑀼𑀩𑀦𑁆𑀥𑀢𑁆𑀣, 𑀧𑀻𑀞𑀺𑀓𑀸𑀬𑀜𑁆𑀘 𑀤𑀺𑀲𑁆𑀲𑀢𑀺.

𑁮𑁨𑁪. 𑀫𑀺𑀢𑁆𑀢𑀓𑀸𑀭𑁂 𑀮𑀜𑁆𑀚𑀤𑀸𑀦𑁂, 𑀩𑀮𑁂 𑀭𑀸𑀲𑀺 𑀯𑀺𑀧𑀢𑁆𑀢𑀺𑀲𑀼 [𑀩𑀮𑀭𑀸𑀲𑀺 𑀯𑀺𑀧𑀢𑁆𑀢𑀺𑀲𑀼 (𑀓.)];

𑀬𑀼𑀤𑁆𑀥𑁂 𑀘𑁂𑀯 𑀧𑀝𑀺𑀜𑁆𑀜𑀸𑀬𑀁, 𑀲𑀗𑁆𑀕𑀭𑁄 𑀲𑀫𑁆𑀧𑀓𑀸𑀲𑀺𑀢𑁄.

𑁮𑁨𑁫. 𑀔𑀦𑁆𑀥𑁂 𑀪𑀯𑁂 𑀦𑀺𑀫𑀺𑀢𑁆𑀢𑀫𑁆𑀳𑀺, 𑀭𑀽𑀧𑀁 𑀯𑀡𑁆𑀡𑁂 𑀘 𑀧𑀘𑁆𑀘𑀬𑁂;

𑀲𑀪𑀸𑀯 𑀲𑀤𑁆𑀤 𑀲𑀡𑁆𑀞𑀸𑀦, 𑀭𑀽𑀧𑀚𑁆𑀛𑀸𑀦 𑀯𑀧𑀽𑀲𑀼 𑀘.

𑁮𑁨𑁬. 𑀯𑀢𑁆𑀣𑀼 𑀓𑀺𑀮𑁂𑀲 𑀓𑀸𑀫𑁂𑀲𑀼, 𑀇𑀘𑁆𑀙𑀸𑀬𑀁 𑀫𑀤𑀦𑁂 𑀭𑀢𑁂;

𑀓𑀸𑀫𑁄, 𑀓𑀸𑀫𑀁 𑀦𑀺𑀓𑀸𑀫𑁂, 𑀘𑀸, 𑀦𑀼𑀜𑁆𑀜𑀸𑀬𑀁 𑀓𑀸𑀫 𑀫𑀩𑁆𑀬𑀬𑀁.

𑁮𑁨𑁭. 𑀧𑁄𑀓𑁆𑀔𑀭𑀁 𑀧𑀤𑀼𑀫𑁂 𑀤𑁂𑀳𑁂, 𑀯𑀚𑁆𑀚𑀪𑀡𑁆𑀟𑀫𑀼𑀔𑁂𑀧𑀺 𑀘;

𑀲𑀼𑀦𑁆𑀤𑀭𑀢𑁆𑀢𑁂 𑀘 𑀲𑀮𑀺𑀮𑁂, 𑀫𑀸𑀢𑀗𑁆𑀕𑀓𑀭𑀓𑁄𑀝𑀺𑀬𑀁.

𑁮𑁨𑁮. 𑀭𑀸𑀲𑀺𑀦𑀺𑀘𑁆𑀘𑀮 𑀫𑀸𑀬𑀸𑀲𑀼, 𑀤𑀫𑁆𑀪𑀸’𑀲𑀘𑁆𑀘𑁂𑀲𑁆𑀯’𑀬𑁄𑀖𑀦𑁂;

𑀕𑀺𑀭𑀺𑀲𑀺𑀗𑁆𑀕𑀫𑁆𑀳𑀺 𑀲𑀻𑀭𑀗𑁆𑀕𑁂, 𑀬𑀦𑁆𑀢𑁂 𑀓𑀽𑀝 𑀫𑀦𑀺𑀢𑁆𑀣𑀺𑀬𑀁.

𑁮𑁨𑁯. 𑀯𑀼𑀤𑁆𑀥𑀺𑀬𑀁 𑀚𑀦𑀦𑁂 𑀓𑀸𑀫, 𑀥𑀸𑀢𑁆𑀯𑀸𑀤𑀻𑀫𑁆𑀳𑀺 𑀘 𑀧𑀢𑁆𑀢𑀺𑀬𑀁;

𑀲𑀢𑁆𑀢𑀸𑀬𑀜𑁆𑀘𑁂𑀯 𑀲𑀁𑀲𑀸𑀭𑁂, 𑀪𑀯𑁄 𑀲𑀲𑁆𑀲𑀢𑀤𑀺𑀝𑁆𑀞𑀺𑀬𑀁.

𑁮𑁩𑁦. 𑀧𑀝𑀺𑀯𑀸𑀓𑁆𑀬𑁄’𑀢𑁆𑀢𑀭𑀸𑀲𑀗𑁆𑀕𑁂, 𑀲𑀼’𑀢𑁆𑀢𑀭𑀁 𑀉𑀢𑁆𑀢𑀭𑁄 𑀢𑀺𑀲𑀼;

𑀲𑁂𑀝𑁆𑀞𑁂 𑀤𑀺𑀲𑀸𑀤𑀺𑀪𑁂𑀤𑁂 𑀘, 𑀧𑀭𑀲𑁆𑀫𑀺 𑀫𑀼𑀧𑀭𑀻’𑀭𑀺𑀢𑁄.

𑁮𑁩𑁧. 𑀦𑁂𑀓𑁆𑀔𑀫𑁆𑀫𑀁 𑀧𑀞𑀫𑀚𑁆𑀛𑀸𑀦𑁂, 𑀧𑀩𑁆𑀩𑀚𑁆𑀚𑀸𑀬𑀁 𑀯𑀺𑀫𑀼𑀢𑁆𑀢𑀺𑀬𑀁;

𑀯𑀺𑀧𑀲𑁆𑀲𑀦𑀸𑀬 𑀦𑀺𑀲𑁆𑀲𑁂𑀲, 𑀓𑀼𑀲𑀮𑀫𑁆𑀳𑀺 𑀘 𑀤𑀺𑀲𑁆𑀲𑀢𑀺.

𑁮𑁩𑁨. 𑀲𑀗𑁆𑀔𑀸𑀭𑁄 𑀲𑀗𑁆𑀔𑀢𑁂 𑀧𑀼𑀜𑁆𑀜𑀸, 𑀪𑀺𑀲𑀗𑁆𑀔𑀸𑀭𑀸𑀤𑀺𑀓𑁂𑀧𑀺 𑀘;

𑀧𑀬𑁄𑀕𑁂 𑀓𑀸𑀬𑀲𑀗𑁆𑀔𑀸𑀭𑀸, 𑀤𑁆𑀬’𑀪𑀺𑀲𑀗𑁆𑀔𑀭𑀡𑁂𑀲𑀼 𑀘.

𑁮𑁩𑁩. 𑀆𑀭𑀫𑁆𑀫𑀡𑁂 𑀘 𑀲𑀁𑀲𑀝𑁆𑀞𑁂, 𑀯𑁄𑀓𑀺𑀡𑁆𑀡𑁂 𑀦𑀺𑀲𑁆𑀲𑀬𑁂 𑀢𑀣𑀸;

𑀢𑀩𑁆𑀪𑀸𑀯𑁂 𑀘𑀸𑀧𑁆𑀬𑀪𑀺𑀥𑁂𑀬𑁆𑀬, 𑀮𑀺𑀗𑁆𑀕𑁄 𑀲𑀳𑀕𑀢𑁄 𑀪𑀯𑁂.

𑁮𑁩𑁪. 𑀢𑀻𑀲𑀼 𑀙𑀦𑁆𑀦𑀁 𑀧𑀢𑀺𑀭𑀽𑀧𑁂, 𑀙𑀸𑀤𑀺𑀢𑁂 𑀘 𑀦𑀺𑀕𑀽𑀳𑀺𑀢𑁂;

𑀦𑀺𑀯𑀸𑀲𑀦 𑀧𑀸𑀭𑀼𑀧𑀦𑁂, 𑀭𑀳𑁄 𑀧𑀜𑁆𑀜𑀢𑁆𑀢𑀺𑀬𑀁 𑀧𑀼𑀫𑁂.

𑁮𑁩𑁫. 𑀩𑀼𑀤𑁆𑀥𑀲𑀫𑀦𑁆𑀢𑀘𑀓𑁆𑀔𑀽𑀲𑀼, 𑀘𑀓𑁆𑀔𑀼 𑀧𑀜𑁆𑀜𑀸𑀬 𑀫𑀻𑀭𑀺𑀢𑀁;

𑀥𑀫𑁆𑀫𑀘𑀓𑁆𑀔𑀼𑀫𑁆𑀳𑀺 𑀘 𑀫𑀁𑀲, 𑀤𑀺𑀩𑁆𑀩𑀘𑀓𑁆𑀔𑀼𑀤𑁆𑀯𑀬𑁂𑀲𑀼 𑀘.

𑁮𑁩𑁬. 𑀯𑀸𑀘𑁆𑀘𑀮𑀺𑀗𑁆𑀕𑁄 𑀅𑀪𑀺𑀓𑁆𑀓𑀦𑁆𑀢𑁄, 𑀲𑀼𑀦𑁆𑀤𑀭𑀫𑁆𑀳𑀺 𑀅𑀪𑀺𑀓𑁆𑀓𑀫𑁂;

𑀅𑀪𑀺𑀭𑀽𑀧𑁂 𑀔𑀬𑁂 𑀯𑀼𑀢𑁆𑀢𑁄, 𑀢𑀣𑁂𑀯’𑀩𑁆𑀪𑀦𑀼𑀫𑁄𑀤𑀦𑁂.

𑁮𑁩𑁭. 𑀓𑀸𑀭𑀡𑁂 𑀤𑁂𑀲𑀦𑀸𑀬𑀜𑁆𑀘, 𑀯𑀸𑀭𑁂 𑀯𑁂𑀯𑀘𑀦𑁂𑀧𑀺 𑀘;

𑀧𑀸𑀓𑀸𑀭𑀲𑁆𑀫𑀺𑀁 [𑀧𑀓𑀸𑀭𑀲𑁆𑀫𑀺𑀁 (𑀓.)] 𑀅𑀯𑀲𑀭𑁂, 𑀧𑀭𑀺𑀬𑀸𑀬𑁄 𑀓𑀣𑀻𑀬𑀢𑀺.

𑁮𑁩𑁮. 𑀯𑀺𑀜𑁆𑀜𑀸𑀡𑁂 𑀘𑀺𑀢𑁆𑀢𑀓𑀫𑁆𑀫𑁂 𑀘, 𑀯𑀺𑀘𑀺𑀢𑁆𑀢𑁂 𑀘𑀺𑀢𑁆𑀢 𑀫𑀼𑀘𑁆𑀘𑀢𑁂;

𑀧𑀜𑁆𑀜𑀢𑁆𑀢𑀺 𑀘𑀺𑀢𑁆𑀢𑀫𑀸𑀲𑁂𑀲𑀼, 𑀘𑀺𑀢𑁆𑀢𑁄, 𑀢𑀸𑀭𑀦𑁆𑀢𑀭𑁂 𑀣𑀺𑀬𑀁.

𑁮𑁩𑁯. 𑀲𑀸𑀫𑀁 𑀯𑁂𑀤𑀦𑁆𑀢𑀭𑁂 𑀲𑀸𑀦𑁆𑀢𑁆𑀯𑁂, 𑀢𑀁 𑀧𑀻𑀢𑁂 𑀲𑀸𑀫𑀮𑁂 𑀢𑀺𑀲𑀼;

𑀲𑀬𑀫𑀢𑁆𑀣𑁂 𑀩𑁆𑀬𑀬𑀁 𑀲𑀸𑀫𑀁, 𑀲𑀸𑀫𑀸 𑀘 𑀲𑀸𑀭𑀺𑀯𑀸𑀬𑀧𑀺.

𑁮𑁪𑁦. 𑀧𑀼𑀫𑁂 𑀆𑀘𑀭𑀺𑀬𑀸𑀤𑀺𑀫𑁆𑀳𑀺, 𑀕𑀭𑀼 [𑀕𑀼𑀭𑀼 (𑀓. 𑀝𑀻.)] 𑀫𑀸𑀢𑀸𑀧𑀺𑀢𑀽𑀲𑁆𑀯𑀧𑀺;

𑀕𑀭𑀼 𑀢𑀻𑀲𑀼 𑀫𑀳𑀦𑁆𑀢𑁂 𑀘, 𑀤𑀼𑀚𑁆𑀚𑀭𑀸’𑀮𑀳𑀼𑀓𑁂𑀲𑀼 𑀘.

𑁮𑁪𑁧. 𑀅𑀘𑁆𑀘𑀺𑀢𑁂 𑀯𑀺𑀚𑁆𑀚𑀫𑀸𑀦𑁂 𑀘, 𑀧𑀲𑀢𑁆𑀣𑁂 𑀲𑀘𑁆𑀘 𑀲𑀸𑀥𑀼𑀲𑀼;

𑀔𑀺𑀦𑁆𑀦𑁂 𑀘 𑀲𑀫𑀺𑀢𑁂 𑀘𑁂𑀯, 𑀲𑀦𑁆𑀢𑁄𑀪𑀺𑀥𑁂𑀬𑁆𑀬𑀮𑀺𑀗𑁆𑀕𑀺𑀓𑁄𑀢𑀺.

𑀇𑀢𑀺 𑀕𑀸𑀣𑀸𑀅𑀦𑁂𑀓𑀢𑁆𑀣𑀯𑀕𑁆𑀕𑁄.

𑁮𑁪𑁨. 𑀤𑁂𑀯𑁄 𑀯𑀺𑀲𑀼𑀤𑁆𑀥𑀺𑀤𑁂𑀯𑀸’𑀤𑁄, 𑀫𑁂𑀖 𑀫𑀘𑁆𑀘𑀼 𑀦𑀪𑁂𑀲𑀼 𑀘;

𑀅𑀣𑁄𑀧𑀺 𑀢𑀭𑀼𑀡𑁂 𑀲𑀢𑁆𑀢𑁂, 𑀘𑁄𑀭𑁂𑀧𑀺 𑀫𑀸𑀡𑀯𑁄 𑀪𑀯𑁂.

𑁮𑁪𑁩. 𑀆𑀤𑀺 𑀓𑁄𑀝𑁆𑀞𑀸𑀲 𑀓𑁄𑀝𑀻𑀲𑀼, 𑀧𑀼𑀭𑀢𑁄’𑀕𑁆𑀕𑀁𑀯𑀭𑁂 𑀢𑀻𑀲𑀼;

𑀧𑀘𑁆𑀘𑀦𑀻𑀓𑁄’𑀢𑁆𑀢𑀫𑁂𑀲𑁆𑀯’𑀜𑁆𑀜𑁂, 𑀧𑀘𑁆𑀙𑀸𑀪𑀸𑀕𑁂 𑀧𑀭𑁄 𑀢𑀺𑀲𑀼.

𑁮𑁪𑁪. 𑀬𑁄𑀦𑀺 𑀓𑀸𑀫 𑀲𑀺𑀭𑀺’𑀲𑁆𑀲𑀭𑁂, 𑀥𑀫𑁆𑀫𑀼’𑀬𑁆𑀬𑀸𑀫 𑀬𑀲𑁂 𑀪𑀕𑀁;

𑀉𑀴𑀸𑀭𑁄 𑀢𑀻𑀲𑀼 𑀯𑀺𑀧𑀼𑀮𑁂, 𑀲𑁂𑀝𑁆𑀞𑁂 𑀘 𑀫𑀥𑀼𑀭𑁂 𑀲𑀺𑀬𑀸.

𑁮𑁪𑁫. 𑀲𑀫𑁆𑀧𑀦𑁆𑀦𑁄 𑀢𑀻𑀲𑀼 𑀲𑀫𑁆𑀧𑀼𑀡𑁆𑀡𑁂, 𑀫𑀥𑀼𑀭𑁂 𑀘 𑀲𑀫𑀗𑁆𑀕𑀺𑀦𑀺;

𑀲𑀗𑁆𑀔𑀸 𑀢𑀼 𑀜𑀸𑀡𑁂 𑀓𑁄𑀝𑁆𑀞𑀸𑀲, 𑀧𑀜𑁆𑀜𑀢𑁆𑀢𑀺 𑀕𑀡𑀦𑁂𑀲𑀼 𑀘.

𑁮𑁪𑁬. 𑀞𑀸𑀦𑀁 𑀇𑀲𑁆𑀲𑀭𑀺𑀬𑁄’𑀓𑀸𑀲, 𑀳𑁂𑀢𑀽𑀲𑀼 𑀞𑀺𑀢𑀺𑀬𑀫𑁆𑀧𑀺 𑀘;

𑀅𑀣𑁄 𑀫𑀸𑀦𑁂 𑀧𑀓𑀸𑀭𑁂𑀘, 𑀓𑁄𑀝𑁆𑀞𑀸𑀲𑁂𑀘 𑀯𑀺𑀥𑁄 𑀤𑁆𑀯𑀺𑀲𑀼.

𑁮𑁪𑁭. 𑀧𑀜𑁆𑀜𑁄’𑀧𑀯𑀸𑀲 𑀔𑀦𑁆𑀢𑀻𑀲𑀼, 𑀤𑀫𑁄 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁂;

𑀜𑀸𑀡𑁂 𑀘 𑀲𑁄𑀫𑀦𑀲𑁆𑀲𑁂𑀘, 𑀯𑁂𑀤𑁄 𑀙𑀦𑁆𑀤𑀲𑀺 𑀘𑁄’𑀘𑁆𑀘𑀢𑁂.

𑁮𑁪𑁮. 𑀔𑀦𑁆𑀥𑀓𑁄𑀝𑁆𑀞𑀸𑀲, 𑀧𑀲𑁆𑀲𑀸𑀯, 𑀫𑀕𑁆𑀕, 𑀳𑁂𑀢𑀽𑀲𑀼 𑀬𑁄𑀦𑀺 𑀲𑀸 [𑀬𑁄𑀦𑀺 𑀲𑁄 (𑀝𑀻.)];

𑀓𑀸𑀮𑁂 𑀢𑀼 𑀓𑀽𑀮𑁂 𑀲𑀻𑀫𑀸𑀬𑀁, 𑀯𑁂𑀮𑀸 𑀭𑀸𑀲𑀺𑀫𑁆𑀳𑀺 𑀪𑀸𑀲𑀺𑀢𑀸.

𑁮𑁪𑁯. 𑀯𑁄𑀳𑀸𑀭𑁄 𑀲𑀤𑁆𑀤 𑀧𑀡𑁆𑀡𑀢𑁆𑀢𑀺, 𑀯𑀡𑀺𑀚𑁆𑀚𑀸 𑀘𑁂𑀢𑀦𑀸𑀲𑀼 𑀘;

𑀦𑀸𑀕𑁄 𑀢𑀼’𑀭𑀕 𑀳𑀢𑁆𑀣𑀻𑀲𑀼, 𑀦𑀸𑀕𑀭𑀼𑀓𑁆𑀔𑁂 𑀢𑀣𑀼’𑀢𑁆𑀢𑀫𑁂.

𑁮𑁫𑁦. 𑀲𑁂𑀝𑁆𑀞𑀸’𑀲𑀳𑀸𑀬 𑀲𑀗𑁆𑀔𑁆𑀬𑀸’𑀜𑁆𑀜,