𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀅𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀸

𑀩𑀼𑀤𑁆𑀥𑀧𑁆𑀧𑀡𑀸𑀫𑁄

𑁧. 𑀢𑀣𑀸𑀕𑀢𑁄 𑀬𑁄 𑀓𑀭𑀼𑀡𑀸𑀓𑀭𑁄 𑀓𑀭𑁄,

𑀧𑀬𑀸𑀢’𑀫𑁄𑀲𑀚𑁆𑀚 𑀲𑀼𑀔𑀧𑁆𑀧𑀤𑀁 𑀧𑀤𑀁;

𑀅𑀓𑀸 𑀧𑀭𑀢𑁆𑀣𑀁 𑀓𑀮𑀺𑀲𑀫𑁆𑀪𑀯𑁂 𑀪𑀯𑁂,

𑀦𑀫𑀸𑀫𑀺 𑀢𑀁 𑀓𑁂𑀯𑀮𑀤𑀼𑀓𑁆𑀓𑀭𑀁 𑀓𑀭𑀁.

𑀥𑀫𑁆𑀫𑀧𑁆𑀧𑀡𑀸𑀫𑁄

𑁨. 𑀅𑀧𑀽𑀚𑀬𑀼𑀁 𑀬𑀁 𑀫𑀼𑀦𑀺𑀓𑀼𑀜𑁆𑀚𑀭𑀸 𑀚𑀭𑀸,

𑀭𑀼𑀚𑀸𑀤𑀺𑀫𑀼𑀢𑁆𑀢𑀸 𑀬𑀳𑀺𑀫𑀼𑀢𑁆𑀢𑀭𑁂 𑀢𑀭𑁂;

𑀞𑀺𑀢𑀸 𑀢𑀺𑀯𑀝𑁆𑀝𑀫𑁆𑀩𑀼𑀦𑀺𑀥𑀺𑀁 𑀦𑀭𑀸𑀦𑀭𑀸,

𑀢𑀭𑀺𑀁𑀲𑀼 𑀢𑀁 𑀥𑀫𑁆𑀫𑀫𑀖𑀧𑁆𑀧𑀳𑀁 𑀧𑀳𑀁.

𑀲𑀗𑁆𑀖𑀧𑁆𑀧𑀡𑀸𑀫𑁄

𑁩. 𑀕𑀢𑀁 𑀫𑀼𑀦𑀺𑀦𑁆𑀤𑁄’𑀭𑀲𑀲𑀽𑀦𑀼𑀢𑀁 𑀦𑀼𑀢𑀁,

𑀲𑀼𑀧𑀼𑀜𑁆𑀜𑀔𑁂𑀢𑁆𑀢𑀁 𑀪𑀼𑀯𑀦𑁂 𑀲𑀼𑀢𑀁 𑀲𑀼𑀢𑀁;

𑀕𑀡𑀫𑁆𑀧𑀺 𑀧𑀸𑀡𑀻𑀓𑀢𑀲𑀁𑀯𑀭𑀁 𑀯𑀭𑀁,

𑀲𑀤𑀸 𑀕𑀼𑀡𑁄𑀖𑁂𑀦 𑀦𑀺𑀭𑀦𑁆𑀢𑀭’𑀦𑁆𑀢𑀭𑀁.

𑀧𑀝𑀺𑀜𑁆𑀜𑀸

𑁪. 𑀦𑀸𑀫𑀮𑀺𑀗𑁆𑀕𑁂𑀲𑀼 𑀓𑁄𑀲𑀮𑁆𑀮, 𑀫𑀢𑁆𑀣𑀦𑀺𑀘𑁆𑀙𑀬𑀓𑀸𑀭𑀡𑀁;

𑀬𑀢𑁄 𑀫𑀳𑀩𑁆𑀩𑀮𑀁 𑀩𑀼𑀤𑁆𑀥, 𑀯𑀘𑀦𑁂 𑀧𑀸𑀝𑀯𑀢𑁆𑀣𑀺𑀦𑀁.

𑁫. 𑀦𑀸𑀫𑀮𑀺𑀗𑁆𑀕𑀸𑀦𑁆𑀬’𑀢𑁄 𑀩𑀼𑀤𑁆𑀥, 𑀪𑀸𑀲𑀺𑀢𑀲𑁆𑀲𑀸’𑀭𑀳𑀸𑀦𑁆𑀬’𑀳𑀁;

𑀤𑀲𑁆𑀲𑀬𑀦𑁆𑀢𑁄 𑀧𑀓𑀸𑀲𑁂𑀲𑁆𑀲, 𑀫𑀪𑀺𑀥𑀸𑀦𑀧𑁆𑀧𑀤𑀻𑀧𑀺𑀓𑀁.

𑀧𑀭𑀺𑀪𑀸𑀲𑀸

𑁬. 𑀪𑀺𑀬𑁆𑀬𑁄 𑀭𑀽𑀧𑀦𑁆𑀢𑀭𑀸 𑀲𑀸𑀳, 𑀘𑀭𑀺𑀬𑁂𑀦 𑀘 𑀓𑀢𑁆𑀣𑀘𑀺;

𑀓𑁆𑀯𑀘𑀸’ 𑀳𑀘𑁆𑀘𑀯𑀺𑀥𑀸𑀦𑁂𑀦 𑀜𑁂𑀬𑁆𑀬𑀁 𑀣𑀻𑀧𑀼𑀦𑁆𑀦𑀧𑀼𑀁𑀲𑀓𑀁.

𑁭. 𑀅𑀪𑀺𑀦𑁆𑀦𑀮𑀺𑀗𑁆𑀕𑀸𑀦𑀁𑀬𑁂𑀯, 𑀤𑁆𑀯𑀦𑁆𑀤𑁄 𑀘, 𑀮𑀺𑀗𑁆𑀕𑀯𑀸𑀘𑀓𑀸;

𑀕𑀸𑀣𑀸𑀧𑀸𑀤𑀦𑁆𑀢𑀫𑀚𑁆𑀛𑀝𑁆𑀞𑀸, 𑀧𑀼𑀩𑁆𑀩𑀁 𑀬𑀦𑁆𑀢𑁆𑀬𑀧𑀭𑁂 𑀧𑀭𑀁.

𑁮. 𑀧𑀼𑀫𑀺𑀢𑁆𑀣𑀺𑀬𑀁 𑀧𑀤𑀁 𑀤𑁆𑀯𑀻𑀲𑀼, 𑀲𑀩𑁆𑀩𑀮𑀺𑀗𑁆𑀕𑁂 𑀘 𑀢𑀻𑀲𑁆𑀯𑀺𑀢𑀺;

𑀅𑀪𑀺𑀥𑀸𑀦𑀦𑁆𑀢𑀭𑀸𑀭𑀫𑁆𑀪𑁂, 𑀜𑁂𑀬𑁆𑀬𑀁 𑀢𑁆𑀯’𑀦𑁆𑀢 𑀫𑀣𑀸𑀤𑀺 𑀘.

𑁯. 𑀪𑀺𑀬𑁆𑀬𑁄 𑀧𑀬𑁄𑀕 𑀫𑀸𑀕𑀫𑁆𑀫, 𑀲𑁄𑀕𑀢𑁂 𑀆𑀕𑀫𑁂 𑀓𑁆𑀯𑀘𑀺;

𑀦𑀺𑀖𑀡𑁆𑀟𑀼 𑀬𑀼𑀢𑁆𑀢𑀺 𑀜𑁆𑀘𑀸𑀦𑀻𑀬, 𑀦𑀸𑀫𑀮𑀺𑀗𑁆𑀕𑀁 𑀓𑀣𑀻𑀬𑀢𑀻𑀢𑀺.

𑁧. 𑀲𑀕𑁆𑀕𑀓𑀡𑁆𑀟

𑁧. 𑀩𑀼𑀤𑁆𑀥𑁄 𑀤𑀲𑀩𑀮𑁄 𑀲𑀢𑁆𑀣𑀸, 𑀲𑀩𑁆𑀩𑀜𑁆𑀜𑀽 𑀤𑁆𑀯𑀺𑀧𑀤𑀼𑀢𑁆𑀢𑀫𑁄;

𑀫𑀼𑀦𑀺𑀦𑁆𑀤𑁄 𑀪𑀕𑀯𑀸 𑀦𑀸𑀣𑁄, 𑀘𑀓𑁆𑀔𑀼𑀫’𑀗𑁆𑀕𑀻𑀭𑀲𑁄 𑀫𑀼𑀦𑀺.

𑁨. 𑀮𑁄𑀓𑀦𑀸𑀣𑁄’ 𑀦𑀥𑀺𑀯𑀭𑁄, 𑀫𑀳𑁂𑀲𑀺 𑀘 𑀯𑀺𑀦𑀸𑀬𑀓𑁄;

𑀲𑀫𑀦𑁆𑀢𑀘𑀓𑁆𑀔𑀼 𑀲𑀼𑀕𑀢𑁄, 𑀪𑀽𑀭𑀺𑀧𑀜𑁆𑀜𑁄 𑀘 𑀫𑀸𑀭𑀚𑀺.

𑁩. 𑀦𑀭𑀲𑀻𑀳𑁄 𑀦𑀭𑀯𑀭𑁄, 𑀥𑀫𑁆𑀫𑀭𑀸𑀚𑀸 𑀫𑀳𑀸𑀫𑀼𑀦𑀺;

𑀤𑁂𑀯𑀤𑁂𑀯𑁄 𑀮𑁄𑀓𑀕𑀭𑀼, 𑀥𑀫𑁆𑀫𑀲𑁆𑀲𑀸𑀫𑀻 𑀢𑀣𑀸𑀕𑀢𑁄.

𑁪. 𑀲𑀬𑀫𑁆𑀪𑀽 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄, 𑀯𑀭𑀧𑀜𑁆𑀜𑁄 𑀘 𑀦𑀸𑀬𑀓𑁄;

𑀚𑀺𑀦𑁄, 𑀲𑀓𑁆𑀓𑁄 𑀢𑀼 𑀲𑀺𑀤𑁆𑀥𑀢𑁆𑀣𑁄, 𑀲𑀼𑀤𑁆𑀥𑁄𑀤𑀦𑀺 𑀘 𑀕𑁄𑀢𑀫𑁄.

𑁫. 𑀲𑀓𑁆𑀬𑀲𑀻𑀳𑁄 𑀢𑀣𑀸 𑀲𑀓𑁆𑀬, 𑀫𑀼𑀦𑀺 𑀘𑀸𑀤𑀺𑀘𑁆𑀘𑀩𑀦𑁆𑀥𑀼 𑀘;

𑁬. 𑀫𑁄𑀓𑁆𑀔𑁄 𑀦𑀺𑀭𑁄𑀥𑁄 𑀦𑀺𑀩𑁆𑀩𑀸𑀦𑀁, 𑀤𑀻𑀧𑁄 𑀢𑀡𑁆𑀳𑀓𑁆𑀔𑀬𑁄 𑀧𑀭𑀁;

𑀢𑀸𑀡𑀁 𑀮𑁂𑀡 𑀫𑀭𑀽𑀧𑀜𑁆𑀘, 𑀲𑀦𑁆𑀢𑀁 𑀲𑀘𑁆𑀘 𑀫𑀦𑀸𑀮𑀬𑀁.

𑁭. 𑀅𑀲𑀗𑁆𑀔𑀢𑀁 𑀲𑀺𑀯 𑀫𑀫𑀢𑀁 𑀲𑀼𑀤𑀼𑀤𑁆𑀤𑀲𑀁,

𑀧𑀭𑀸𑀬𑀡𑀁 𑀲𑀭𑀡 𑀫𑀦𑀻𑀢𑀺𑀓𑀁 𑀢𑀣𑀸;

𑀅𑀦𑀸𑀲𑀯𑀁 𑀥𑀼𑀯 𑀫𑀦𑀺𑀤𑀲𑁆𑀲𑀦𑀸’ 𑀓𑀢𑀸,

𑀧𑀮𑁄𑀓𑀺𑀢𑀁 𑀦𑀺𑀧𑀼𑀡 𑀫𑀦𑀦𑁆𑀢 𑀫𑀓𑁆𑀔𑀭𑀁.

𑁮. 𑀤𑀼𑀓𑁆𑀔𑀓𑁆𑀔𑀬𑁄 𑀩𑁆𑀬𑀸𑀩𑀚𑁆𑀛𑀜𑁆𑀘 [𑀩𑁆𑀬𑀸𑀧𑀚𑁆𑀚𑀁 (𑀝𑀻𑀓𑀸)], 𑀯𑀺𑀯𑀝𑁆𑀝𑀁 𑀔𑁂𑀫 𑀓𑁂𑀯𑀮𑀁;

𑀅𑀧𑀯𑀕𑁆𑀕𑁄 𑀯𑀺𑀭𑀸𑀕𑁄 𑀘, 𑀧𑀡𑀻𑀢 𑀫𑀘𑁆𑀘𑀼𑀢𑀁 𑀧𑀤𑀁.

𑁯. 𑀬𑁄𑀕𑀓𑁆𑀔𑁂𑀫𑁄 𑀧𑀸𑀭 𑀫𑀧𑀺, 𑀫𑀼𑀢𑁆𑀢𑀺 𑀲𑀦𑁆𑀢𑀺 𑀯𑀺𑀲𑀼𑀤𑁆𑀥𑀺𑀬𑁄;

𑀯𑀺𑀫𑀼𑀢𑁆𑀬’ 𑀲𑀗𑁆𑀔𑀢𑀥𑀸𑀢𑀼, 𑀲𑀼𑀤𑁆𑀥𑀺 𑀦𑀺𑀩𑁆𑀩𑀼𑀢𑀺𑀬𑁄 𑀲𑀺𑀬𑀼𑀁.

𑁧𑁦. 𑀔𑀻𑀡𑀸𑀲𑀯𑁄 𑀢𑁆𑀯’𑀲𑁂𑀓𑁆𑀔𑁄 𑀘, 𑀯𑀻𑀢𑀭𑀸𑀕𑁄 𑀢𑀣𑀸’ 𑀭𑀳𑀸;

𑀤𑁂𑀯𑀮𑁄𑀓𑁄 𑀤𑀺𑀯𑁄 𑀲𑀕𑁆𑀕𑁄 [𑀦𑀸𑀓𑁄 (𑀲𑀻.)],

𑀢𑀺𑀤𑀺𑀯𑁄 𑀢𑀺𑀤𑀲𑀸𑀮𑀬𑁄.

𑁧𑁧. 𑀢𑀺𑀤𑀲𑀸 𑀢𑁆𑀯’𑀫𑀭𑀸 𑀤𑁂𑀯𑀸, 𑀯𑀺𑀩𑀼𑀥𑀸 𑀘 𑀲𑀼𑀥𑀸𑀲𑀺𑀦𑁄;

𑀲𑀼𑀭𑀸 𑀫𑀭𑀽 𑀤𑀺𑀯𑁄𑀓𑀸 𑀘𑀸, 𑀫𑀢𑀧𑀸 𑀲𑀕𑁆𑀕𑀯𑀸𑀲𑀺𑀦𑁄.

𑁧𑁨. 𑀦𑀺𑀚𑁆𑀚𑀭𑀸’ 𑀦𑀺𑀫𑀺𑀲𑀸 𑀤𑀺𑀩𑁆𑀩𑀸, 𑀅𑀧𑀼𑀫𑁂 𑀤𑁂𑀯𑀢𑀸𑀦𑀺 𑀘 [𑀤𑁂𑀯𑀢𑀸 𑀏𑀯 𑀤𑁂𑀯𑀢𑀸𑀦𑀺, 𑀲𑀓𑀢𑁆𑀣𑁂 𑀦𑀺𑀧𑀘𑁆𑀘𑀬𑁄 (𑀝𑀻𑀓𑀸)];

𑁧𑁩. 𑀲𑀺𑀤𑁆𑀥𑁄 𑀪𑀽𑀢𑁄 𑀘 𑀕𑀦𑁆𑀥𑀩𑁆𑀩𑁄, 𑀕𑀼𑀬𑁆𑀳𑀓𑁄 𑀬𑀓𑁆𑀔 𑀭𑀓𑁆𑀔𑀲𑀸;

𑀓𑀼𑀫𑁆𑀪𑀡𑁆𑀟𑁄 𑀘 𑀧𑀺𑀲𑀸𑀘𑀸’𑀤𑀻, 𑀦𑀺𑀤𑁆𑀤𑀺𑀝𑁆𑀞𑀸 𑀤𑁂𑀯𑀬𑁄𑀦𑀺𑀬𑁄.

𑁧𑁪. 𑀧𑀼𑀩𑁆𑀩𑀤𑁂𑀯𑀸 𑀲𑀼𑀭𑀭𑀺𑀧𑀽, 𑀅𑀲𑀼𑀭𑀸 𑀤𑀸𑀦𑀯𑀸 𑀧𑀼𑀫𑁂;

𑀢𑀩𑁆𑀩𑀺𑀲𑁂𑀲𑀸 𑀧𑀳𑀸𑀭𑀸𑀤𑁄, 𑀲𑀫𑁆𑀩𑀭𑁄 𑀩𑀮𑀺𑀆𑀤𑀬𑁄.

𑁧𑁫. 𑀧𑀺𑀢𑀸𑀫𑀳𑁄 𑀧𑀺𑀢𑀸 𑀩𑁆𑀭𑀳𑁆𑀫𑀸, 𑀮𑁄𑀓𑁂𑀲𑁄 𑀓𑀫𑀮𑀸𑀲𑀦𑁄;

𑀢𑀣𑀸 𑀳𑀺𑀭𑀜𑁆𑀜𑀕𑀩𑁆𑀪𑁄 𑀘, 𑀲𑀼𑀭𑀚𑁂𑀝𑁆𑀞𑁄 𑀧𑀚𑀸𑀧𑀢𑀺.

𑁧𑁬. 𑀯𑀸𑀲𑀼𑀤𑁂𑀯𑁄 𑀳𑀭𑀺 [𑀳𑀭𑀻 (𑀝𑀻𑀓𑀸)] 𑀓𑀡𑁆𑀳𑁄, 𑀓𑁂𑀲𑀯𑁄 𑀘𑀓𑁆𑀓𑀧𑀸𑀡𑁆𑀬’𑀣;

𑀫𑀳𑀺𑀲𑁆𑀲𑀭𑁄 𑀲𑀺𑀯𑁄 𑀲𑀽𑀮𑀻, 𑀇𑀲𑁆𑀲𑀭𑁄 𑀧𑀲𑀼𑀧𑀢𑁆𑀬’𑀧𑀺.

𑁧𑁭. 𑀳𑀭𑁄 𑀯𑀼𑀢𑁆𑀢𑁄 𑀓𑀼𑀫𑀸𑀭𑁄 𑀢𑀼, 𑀔𑀦𑁆𑀥𑁄 𑀲𑀢𑁆𑀢𑀺𑀥𑀭𑁄 𑀪𑀯𑁂;

𑁧𑁮. 𑀲𑀓𑁆𑀓𑁄 𑀧𑀼𑀭𑀺𑀦𑁆𑀤𑀤𑁄 𑀤𑁂𑀯, 𑀭𑀸𑀚𑀸 𑀯𑀚𑀺𑀭𑀧𑀸𑀡𑀺 𑀘;

𑀲𑀼𑀚𑀫𑁆𑀧𑀢𑀺 𑀲𑀳𑀲𑁆𑀲𑀓𑁆𑀔𑁄, 𑀫𑀳𑀺𑀦𑁆𑀤𑁄 𑀯𑀚𑀺𑀭𑀸𑀯𑀼𑀥𑁄.

𑁧𑁯. 𑀯𑀸𑀲𑀯𑁄 𑀘 𑀤𑀲𑀲𑀢, 𑀦𑀬𑀦𑁄 𑀢𑀺𑀤𑀺𑀯𑀸𑀥𑀺𑀪𑀽;

𑀲𑀼𑀭𑀦𑀸𑀣𑁄 𑀘 𑀯𑀚𑀺𑀭, 𑀳𑀢𑁆𑀣𑁄 𑀘 𑀪𑀽𑀢𑀧𑀢𑁆𑀬’𑀧𑀺.

𑁨𑁦. 𑀫𑀖𑀯𑀸 𑀓𑁄𑀲𑀺𑀬𑁄 𑀇𑀦𑁆𑀤𑁄, 𑀯𑀢𑁆𑀭𑀪𑀽 𑀧𑀸𑀓𑀲𑀸𑀲𑀦𑁄;

𑀯𑀺𑀟𑁄𑀚𑁄 𑀣 𑀲𑀼𑀚𑀸 𑀢𑀲𑁆𑀲 [𑀲𑀼𑀚𑀸𑀢𑀸’𑀲𑁆𑀲 (𑀝𑀻𑀓𑀸)], 𑀪𑀭𑀺𑀬𑀸 𑀣 𑀧𑀼𑀭𑀁 𑀪𑀯𑁂.

𑁨𑁧. 𑀫𑀲𑀓𑁆𑀓𑀲𑀸𑀭𑀸 [𑀫𑀲𑀓𑁆𑀓𑀲𑀸𑀭𑁄 (𑀲𑀻.)] 𑀯𑀲𑁆𑀲𑁄𑀓, 𑀲𑀸𑀭𑀸 𑀘𑁂𑀯𑀸’ 𑀫𑀭𑀸𑀯𑀢𑀻;

𑀯𑁂𑀚𑀬𑀦𑁆𑀢𑁄 𑀢𑀼 𑀧𑀸𑀲𑀸𑀤𑁄,

𑀲𑀼𑀥𑀫𑁆𑀫𑀸 𑀢𑀼 𑀲𑀪𑀸 𑀫𑀢𑀸.

𑁨𑁨. 𑀯𑁂𑀚𑀬𑀦𑁆𑀢𑁄 𑀭𑀣𑁄 𑀢𑀲𑁆𑀲,

𑀯𑀼𑀢𑁆𑀢𑁄 𑀫𑀸𑀢𑀮𑀺 𑀲𑀸𑀭𑀣𑀺;

𑀏𑀭𑀸𑀯𑀡𑁄 𑀕𑀚𑁄 𑀧𑀡𑁆𑀟𑀼, 𑀓𑀫𑁆𑀩𑀮𑁄 𑀢𑀼 𑀲𑀺𑀮𑀸𑀲𑀦𑀁.

𑁨𑁩. 𑀲𑀼𑀯𑀻𑀭𑁄𑀘𑁆𑀘𑀸𑀤𑀬𑁄 𑀧𑀼𑀢𑁆𑀢𑀸, 𑀦𑀦𑁆𑀤𑀸 𑀧𑁄𑀓𑁆𑀔𑀭𑀡𑀻 𑀪𑀯𑁂;

𑀦𑀦𑁆𑀤𑀦𑀁 𑀫𑀺𑀲𑁆𑀲𑀓𑀁 𑀘𑀺𑀢𑁆𑀢, 𑀮𑀢𑀸 𑀨𑀸𑀭𑀼𑀲𑀓𑀁 𑀯𑀦𑀸.

𑁨𑁪. 𑀅𑀲𑀦𑀺 𑀤𑁆𑀯𑀻𑀲𑀼 𑀓𑀼𑀮𑀺𑀲𑀁, 𑀯𑀚𑀺𑀭𑀁 𑀧𑀼𑀦𑁆𑀦𑀧𑀼𑀁𑀲𑀓𑁂;

𑀅𑀘𑁆𑀙𑀭𑀸𑀬𑁄𑀢𑁆𑀣𑀺𑀬𑀁 𑀯𑀼𑀢𑁆𑀢𑀸, 𑀭𑀫𑁆𑀪𑀸 𑀅𑀮𑀫𑁆𑀩𑀼𑀲𑀸𑀤𑀬𑁄;

𑀤𑁂𑀯𑀺𑀢𑁆𑀣𑀺𑀬𑁄 𑀣 𑀕𑀦𑁆𑀥𑀩𑁆𑀩𑀸, 𑀧𑀜𑁆𑀘𑀲𑀺𑀔𑁄𑀢𑀺 𑀆𑀤𑀬𑁄.

𑁨𑁫. 𑀯𑀺𑀫𑀸𑀦𑁄 𑀦𑀺𑀢𑁆𑀣𑀺𑀬𑀁 𑀩𑁆𑀬𑀫𑁆𑀳𑀁, 𑀧𑀻𑀬𑀽𑀲𑀁 𑀢𑁆𑀯𑀫𑀢𑀁 𑀲𑀼𑀥𑀸;

𑀲𑀺𑀦𑁂𑀭𑀼 𑀫𑁂𑀭𑀼 𑀢𑀺𑀤𑀺𑀯𑀸, 𑀥𑀸𑀭𑁄 𑀦𑁂𑀭𑀼 𑀲𑀼𑀫𑁂𑀭𑀼 𑀘.

𑁨𑁬. 𑀬𑀼𑀕𑀦𑁆𑀥𑀭𑁄 𑀈𑀲𑀥𑀭𑁄, 𑀓𑀭𑀯𑀻𑀓𑁄 𑀲𑀼𑀤𑀲𑁆𑀲𑀦𑁄;

𑀦𑁂𑀫𑀺𑀦𑁆𑀥𑀭𑁄 𑀯𑀺𑀦𑀢𑀓𑁄, 𑀅𑀲𑁆𑀲𑀓𑀡𑁆𑀡𑁄 𑀓𑀼𑀮𑀸𑀘𑀮𑀸.

𑁨𑁭. 𑀫𑀦𑁆𑀤𑀸𑀓𑀺𑀦𑀻 𑀢𑀣𑀸’𑀓𑀸𑀲, 𑀕𑀗𑁆𑀕𑀸 𑀲𑀼𑀭𑀦𑀤𑀻 𑀧𑁆𑀬𑀣;

𑁨𑁮. 𑀓𑁄𑀯𑀺𑀴𑀸𑀭𑁄 𑀢𑀣𑀸 𑀧𑀸𑀭𑀺, 𑀘𑁆𑀙𑀢𑁆𑀢𑀓𑁄 𑀧𑀸𑀭𑀺𑀚𑀸𑀢𑀓𑁄;

𑀓𑀧𑁆𑀧𑀭𑀼𑀓𑁆𑀔𑁄 𑀢𑀼 𑀲𑀦𑁆𑀢𑀸𑀦𑀸, 𑀤𑀬𑁄 𑀤𑁂𑀯𑀤𑁆𑀤𑀼𑀫𑀸 𑀲𑀺𑀬𑀼𑀁.

𑁨𑁯. 𑀧𑀸𑀘𑀻 𑀧𑀢𑀻𑀛𑀼’ 𑀤𑀻𑀘𑀺’𑀢𑁆𑀣𑀻, 𑀧𑀼𑀩𑁆𑀩 𑀧𑀘𑁆𑀙𑀺𑀫 𑀉𑀢𑁆𑀢𑀭𑀸;

𑀤𑀺𑀲𑀸𑀣 𑀤𑀓𑁆𑀔𑀺𑀡𑀸’ 𑀧𑀸𑀘𑀻, 𑀯𑀺𑀤𑀺𑀲𑀸’𑀦𑀼𑀤𑀺𑀲𑀸 𑀪𑀯𑁂.

𑁩𑁦. 𑀏𑀭𑀸𑀯𑀢𑁄 [𑀏𑀭𑀸𑀯𑀡𑁄 (𑀲𑀻.), 𑀅𑀫𑀭𑀓𑁄𑀲𑁂 𑀧𑀦 𑀏𑀭𑀸𑀯𑀢𑁄 𑀏𑀯 𑀅𑀢𑁆𑀣𑀺] 𑀧𑀼𑀡𑁆𑀟𑀭𑀻𑀓𑁄, 𑀯𑀸𑀫𑀦𑁄 𑀓𑀼𑀫𑀼𑀤𑁄’ 𑀜𑁆𑀚𑀦𑁄;

𑀧𑀼𑀧𑁆𑀨𑀤𑀦𑁆𑀢𑁄 𑀲𑀩𑁆𑀩𑀪𑀼𑀫𑁆𑀫𑁄, 𑀲𑀼𑀧𑁆𑀧𑀢𑀻𑀓𑁄 𑀤𑀺𑀲𑀸𑀕𑀚𑀸.

𑁩𑁧. 𑀥𑀢𑀭𑀝𑁆𑀞𑁄 𑀘 𑀕𑀦𑁆𑀥𑀩𑁆𑀩𑀸, 𑀥𑀺𑀧𑁄, 𑀓𑀼𑀫𑁆𑀪𑀡𑁆𑀟𑀲𑀸𑀫𑀺 𑀢𑀼;

𑀯𑀺𑀭𑀼𑀴𑁆𑀳𑀓𑁄, 𑀯𑀺𑀭𑀽𑀧𑀓𑁆𑀔𑁄, 𑀢𑀼 𑀦𑀸𑀕𑀸𑀥𑀺𑀧𑀢𑀻𑀭𑀺𑀢𑁄.

𑁩𑁨. 𑀬𑀓𑁆𑀔𑀸𑀥𑀺𑀧𑁄 𑀯𑁂𑀲𑁆𑀲𑀯𑀡𑁄, 𑀓𑀼𑀯𑁂𑀭𑁄 𑀦𑀭𑀯𑀸𑀳𑀦𑁄;

𑀅𑀴𑀓𑀸 [𑀅𑀮𑀓𑀸 (𑀅𑀫𑀭𑀓𑁄𑀲)] 𑀴𑀓𑀫𑀦𑁆𑀤𑀸𑀲𑁆𑀲, 𑀧𑀼𑀭𑀻, 𑀧𑀳𑀭𑀡𑀁 𑀕𑀤𑀸;

𑀘𑀢𑀼𑀤𑁆𑀤𑀺𑀲𑀸𑀦 𑀫𑀥𑀺𑀧𑀸, 𑀧𑀼𑀩𑁆𑀩𑀸𑀤𑀻𑀦𑀁 𑀓𑀫𑀸 𑀇𑀫𑁂.

𑁩𑁩. 𑀚𑀸𑀢𑀯𑁂𑀤𑁄 𑀲𑀺𑀔𑀻 𑀚𑁄𑀢𑀺, 𑀧𑀸𑀯𑀓𑁄 𑀤𑀳𑀦𑁄’ 𑀦𑀮𑁄;

𑀳𑀼𑀢𑀸𑀯𑀳𑁄’ 𑀘𑁆𑀘𑀺𑀫𑀸 𑀥𑀽𑀫, 𑀓𑁂𑀢𑁆𑀯’𑀕𑁆𑀕𑀺 𑀕𑀺𑀦𑀺 𑀪𑀸𑀦𑀼𑀫𑀸.

𑁩𑁪. 𑀢𑁂𑀚𑁄 𑀥𑀽𑀫𑀲𑀺𑀔𑁄 𑀯𑀸𑀬𑀼, 𑀲𑀔𑁄 𑀘 𑀓𑀡𑁆𑀳𑀯𑀢𑁆𑀢𑀦𑀻;

𑀯𑁂𑀲𑁆𑀲𑀸𑀦𑀭𑁄 𑀳𑀼𑀢𑀸𑀲𑁄 𑀣, 𑀲𑀺𑀔𑀸𑀚𑀸𑀮’𑀘𑁆𑀘𑀺 𑀘𑀸𑀧𑀼𑀫𑁂.

𑁩𑁫. 𑀯𑀺𑀧𑁆𑀨𑀼𑀮𑀺𑀗𑁆𑀕𑀁 𑀨𑀼𑀮𑀺𑀗𑁆𑀕𑀜𑁆𑀘, 𑀪𑀲𑁆𑀫𑀸 [‘𑀪𑀲𑁆𑀫𑀸’ 𑀢𑀺𑀧𑀤𑀁 𑀭𑀸𑀚𑀸𑀤𑀺𑀕𑀡𑁂 𑀧𑀭𑀺𑀬𑀸𑀧𑀦𑁆𑀦𑀁 (𑀭𑀽𑀧𑀲𑀺𑀤𑁆𑀥𑀺-𑀉𑀡𑀸𑀤𑀺), 𑀪𑀲𑁆𑀫𑀁 (𑀲𑀻.)] 𑀢𑀼 𑀲𑁂𑀝𑁆𑀞𑀺 𑀙𑀸𑀭𑀺𑀓𑀸;

𑁩𑁬. 𑀓𑀼𑀓𑁆𑀓𑀼𑀴𑁄 𑀢𑀼’𑀡𑁆𑀳𑀪𑀲𑁆𑀫𑀲𑁆𑀫𑀺, 𑀫𑀗𑁆𑀕𑀸𑀭𑁄’𑀮𑀸𑀢 𑀫𑀼𑀫𑁆𑀫𑀼𑀓𑀁 [𑀢𑀺𑀓𑀁 𑀤𑀺𑀢𑁆𑀢𑀓𑀝𑁆𑀞𑀸𑀤𑀺𑀦𑁆𑀥𑀦𑁂 (𑀝𑀻𑀓𑀸)];

𑀲𑀫𑀺𑀥𑀸 𑀇𑀥𑀼𑀫𑀁 𑀘𑁂’𑀥𑁄, 𑀉𑀧𑀸𑀤𑀸𑀦𑀁 𑀢𑀣𑀺𑀦𑁆𑀥𑀦𑀁.

𑁩𑁭. 𑀅𑀣𑁄’𑀪𑀸𑀲𑁄 𑀧𑀓𑀸𑀲𑁄 𑀘𑀸,

'𑀮𑁄𑀓𑁄’𑀚𑁆𑀚𑁄𑀢𑀸’𑀢𑀧𑀸 𑀲𑀫𑀸;

𑀫𑀸𑀮𑀼𑀢𑁄 𑀧𑀯𑀦𑁄 𑀯𑀸𑀬𑀼, 𑀯𑀸𑀢𑁄’𑀦𑀺𑀮 𑀲𑀫𑀻𑀭𑀡𑀸;

𑀕𑀦𑁆𑀥𑀯𑀸𑀳𑁄 𑀢𑀣𑀸 𑀯𑀸𑀬𑁄, 𑀲𑀫𑀻𑀭𑁄 𑀘 𑀲𑀤𑀸𑀕𑀢𑀺.

𑁩𑁮. 𑀯𑀸𑀬𑀼𑀪𑁂𑀤𑀸 𑀇𑀫𑁂 𑀙𑀼’𑀤𑁆𑀥, 𑀗𑁆𑀕𑀫𑁄 𑀘𑀸𑀥𑁄𑀕𑀫𑁄 𑀢𑀣𑀸;

𑀓𑀼𑀘𑁆𑀙𑀺𑀝𑁆𑀞𑁄 𑀘 𑀓𑁄𑀝𑁆𑀞𑀸𑀲𑀬𑁄, 𑀅𑀲𑁆𑀲𑀸𑀲𑀗𑁆𑀕𑀸𑀦𑀼𑀲𑀸𑀭𑀺𑀦𑁄.

𑁩𑁯. 𑀅𑀣𑁄 𑀅𑀧𑀸𑀦𑀁 𑀧𑀲𑁆𑀲𑀸𑀲𑁄,

𑀅𑀲𑁆𑀲𑀸𑀲𑁄 𑀆𑀦 𑀫𑀼𑀘𑁆𑀘𑀢𑁂.

𑁪𑁦. 𑀯𑁂𑀕𑁄 𑀚𑀯𑁄 𑀭𑀬𑁄 𑀔𑀺𑀧𑁆𑀧𑀁, 𑀢𑀼 𑀲𑀻𑀖𑀁 𑀢𑀼𑀭𑀺𑀢𑀁 𑀮𑀳𑀼;

𑀆𑀲𑀼 𑀢𑀼𑀡𑁆𑀡 𑀫𑀭𑀁 𑀘𑀸𑀯𑀺, 𑀮𑀫𑁆𑀩𑀺𑀢𑀁 𑀢𑀼𑀯𑀝𑀁𑀧𑀺 𑀘.

𑁪𑁧. 𑀲𑀢𑀢𑀁 𑀦𑀺𑀘𑁆𑀘 𑀫𑀯𑀺𑀭𑀢𑀸, 𑀦𑀸𑀭𑀢 𑀲𑀦𑁆𑀢𑀢 𑀫𑀦𑀯𑀭𑀢𑀜𑁆𑀘 𑀥𑀼𑀯𑀁;

𑀪𑀼𑀲 𑀫𑀢𑀺𑀲𑀬𑁄 𑀘 𑀤𑀴𑁆𑀳𑀁, 𑀢𑀺𑀩𑁆𑀩𑁂’𑀓𑀦𑁆𑀢𑀸’𑀢𑀺𑀫𑀢𑁆𑀢, 𑀩𑀸𑀴𑁆𑀳𑀸𑀦𑀺;

𑀔𑀺𑀧𑁆𑀧𑀸𑀤𑀻 𑀧𑀡𑁆𑀟𑀓𑁂 𑀤𑀩𑁆𑀩𑁂, 𑀤𑀩𑁆𑀩𑀕𑀸 𑀢𑁂𑀲𑀼 𑀬𑁂 𑀢𑀺𑀲𑀼.

𑁪𑁨. 𑀅𑀯𑀺𑀕𑁆𑀕𑀳𑁄 𑀢𑀼 𑀓𑀸𑀫𑁄 𑀘, 𑀫𑀦𑁄𑀪𑀽 𑀫𑀤𑀦𑁄 𑀪𑀯𑁂;

𑀅𑀦𑁆𑀢𑀓𑁄 𑀯𑀲𑀯𑀢𑁆𑀢𑀻 𑀘, 𑀧𑀸𑀧𑀺𑀫𑀸 𑀘 𑀧𑀚𑀸𑀧𑀢𑀺.

𑁪𑁩. 𑀧𑀫𑀢𑁆𑀢𑀩𑀦𑁆𑀥𑀼 𑀓𑀡𑁆𑀳𑁄 𑀘, 𑀫𑀸𑀭𑁄 𑀦𑀫𑀼𑀘𑀺, 𑀢𑀲𑁆𑀲 𑀢𑀼;

𑀢𑀡𑁆𑀳𑀸’𑀭𑀢𑀻 𑀭𑀕𑀸 𑀥𑀻𑀢𑀽, 𑀳𑀢𑁆𑀣𑀻 𑀢𑀼 𑀕𑀺𑀭𑀺𑀫𑁂𑀔𑀮𑁄.

𑁪𑁪. 𑀬𑀫𑀭𑀸𑀚𑀸 𑀘 𑀯𑁂𑀲𑀸𑀬𑀻, 𑀬𑀫𑁄’𑀲𑁆𑀲 𑀦𑀬𑀦𑀸𑀯𑀼𑀥𑀁;

𑀯𑁂𑀧𑀘𑀺𑀢𑁆𑀢𑀺 𑀧𑀼𑀮𑁄𑀫𑁄 𑀘, 𑀓𑀺𑀫𑁆𑀧𑀼𑀭𑀺𑀲𑁄 𑀢𑀼 𑀓𑀺𑀦𑁆𑀦𑀭𑁄.

𑁪𑁫. 𑀅𑀦𑁆𑀢𑀮𑀺𑀓𑁆𑀔𑀁 𑀔’𑀫𑀸𑀤𑀺𑀘𑁆𑀘, 𑀧𑀣𑁄’𑀩𑁆𑀪𑀁 𑀕𑀕𑀦’𑀫𑁆𑀩𑀭𑀁;

𑀯𑁂𑀳𑀸𑀲𑁄 𑀘𑀸𑀦𑀺𑀮𑀧𑀣𑁄, 𑀆𑀓𑀸𑀲𑁄 𑀦𑀺𑀢𑁆𑀣𑀺𑀬𑀁 𑀦𑀪𑀁.

𑁪𑁬. 𑀤𑁂𑀯𑁄 𑀯𑁂𑀳𑀸𑀬𑀲𑁄 𑀢𑀸𑀭𑀸,

𑀧𑀣𑁄 𑀲𑀼𑀭𑀧𑀣𑁄 𑀅𑀖𑀁.

𑁪𑁭. 𑀫𑁂𑀖𑁄 𑀯𑀮𑀸𑀳𑀓𑁄 𑀤𑁂𑀯𑁄, 𑀧𑀚𑁆𑀚𑀼𑀦𑁆𑀦𑁄’𑀫𑁆𑀩𑀼𑀥𑀭𑁄 𑀖𑀦𑁄;

𑀥𑀸𑀭𑀸𑀥𑀭𑁄 𑀘 𑀚𑀻𑀫𑀽𑀢𑁄, 𑀯𑀸𑀭𑀺𑀯𑀸𑀳𑁄 𑀢𑀣𑀸’𑀫𑁆𑀩𑀼𑀤𑁄.

𑁪𑁮. 𑀅𑀩𑁆𑀪𑀁 𑀢𑀻𑀲𑁆𑀯𑀣 𑀯𑀲𑁆𑀲𑀜𑁆𑀘, 𑀯𑀲𑁆𑀲𑀦𑀁 𑀯𑀼𑀝𑁆𑀞𑀺 𑀦𑀸𑀭𑀺𑀬𑀁;

𑀲𑀢𑁂𑀭𑀢𑀸’𑀓𑁆𑀔𑀡𑀸 𑀯𑀺𑀚𑁆𑀚𑀼, 𑀯𑀺𑀚𑁆𑀚𑀼𑀢𑀸 𑀘𑀸𑀘𑀺𑀭𑀧𑁆𑀧𑀪𑀸.

𑁪𑁯. 𑀫𑁂𑀖𑀦𑀸𑀤𑁂 𑀢𑀼 𑀥𑀦𑀺𑀢𑀁, 𑀕𑀚𑁆𑀚𑀺𑀢𑀁 𑀭𑀲𑀺𑀢𑀸𑀤𑀺 𑀘;

𑀇𑀦𑁆𑀤𑀸𑀯𑀼𑀥𑀁 𑀇𑀦𑁆𑀤𑀥𑀦𑀼, 𑀯𑀸𑀢𑀓𑁆𑀔𑀺𑀢𑁆𑀢𑀫𑁆𑀩𑀼 𑀲𑀻𑀓𑀭𑁄.

𑁫𑁦. 𑀆𑀲𑀸𑀭𑁄 𑀥𑀸𑀭𑀸 𑀲𑀫𑁆𑀧𑀸𑀢𑁄,

𑀓𑀭𑀓𑀸 𑀢𑀼 𑀖𑀦𑁄𑀧𑀮𑀁;

𑀤𑀼𑀤𑁆𑀤𑀺𑀦𑀁 𑀫𑁂𑀖𑀘𑁆𑀙𑀦𑁆𑀦𑀸𑀳𑁂, 𑀧𑀺𑀥𑀸𑀦𑀁 𑀢𑁆𑀯𑀧𑀥𑀸𑀭𑀡𑀁.

𑁫𑁧. 𑀢𑀺𑀭𑁄𑀥𑀸𑀦’𑀦𑁆𑀢𑀭𑀥𑀸𑀦𑀸, 𑀧𑀺𑀥𑀸𑀦 𑀙𑀸𑀤𑀦𑀸𑀦𑀺 𑀘;

𑀇𑀦𑁆𑀤𑀼 𑀘𑀦𑁆𑀤𑁄 𑀘 𑀦𑀓𑁆𑀔𑀢𑁆𑀢, 𑀭𑀸𑀚𑀸 𑀲𑁄𑀫𑁄 𑀦𑀺𑀲𑀸𑀓𑀭𑁄.

𑁫𑁨. 𑀑𑀲𑀥𑀻𑀲𑁄 𑀳𑀺𑀫𑀭𑀁𑀲𑀺, 𑀲𑀲𑀗𑁆𑀓𑁄 𑀘𑀦𑁆𑀤𑀺𑀫𑀸 𑀲𑀲𑀻;

𑀲𑀻𑀢𑀭𑀁𑀲𑀺 𑀦𑀺𑀲𑀸𑀦𑀸𑀣𑁄, 𑀉𑀴𑀼𑀭𑀸𑀚𑀸 𑀘 𑀫𑀸 𑀧𑀼𑀫𑁂.

𑁫𑁩. 𑀓𑀮𑀸 𑀲𑁄𑀴𑀲𑀫𑁄 𑀪𑀸𑀕𑁄, 𑀩𑀺𑀫𑁆𑀩𑀁 𑀢𑀼 𑀫𑀡𑁆𑀟𑀮𑀁 𑀪𑀯𑁂;

𑀅𑀟𑁆𑀠𑁄 𑀢𑁆𑀯𑀤𑁆𑀥𑁄 𑀉𑀧𑀟𑁆𑀠𑁄 𑀘, 𑀯𑀸 𑀔𑀡𑁆𑀟𑀁 𑀲𑀓𑀮𑀁 𑀧𑀼𑀫𑁂.

𑁫𑁪. 𑀅𑀤𑁆𑀥𑀁 𑀯𑀼𑀢𑁆𑀢𑀁 𑀲𑀫𑁂 𑀪𑀸𑀕𑁂, 𑀧𑀲𑀸𑀤𑁄 𑀢𑀼 𑀧𑀲𑀦𑁆𑀦𑀢𑀸;

𑀓𑁄𑀫𑀼𑀤𑀻 𑀘𑀦𑁆𑀤𑀺𑀓𑀸 𑀚𑀼𑀡𑁆𑀳𑀸, 𑀓𑀦𑁆𑀢𑀺 𑀲𑁄𑀪𑀸 𑀚𑀼𑀢𑀺 𑀘𑁆𑀙𑀯𑀺.

𑁫𑁫. 𑀓𑀮𑀗𑁆𑀓𑁄 𑀮𑀜𑁆𑀙𑀦𑀁 𑀮𑀓𑁆𑀔𑀁, 𑀅𑀗𑁆𑀓𑁄’𑀪𑀺𑀜𑁆𑀜𑀸𑀡 𑀮𑀓𑁆𑀔𑀡𑀁;

𑀘𑀺𑀳𑀦𑀁 𑀘𑀸𑀧𑀺 𑀲𑁄𑀪𑀸 𑀢𑀼, 𑀧𑀭𑀫𑀸 𑀲𑀼𑀲𑀫𑀸 𑀣 𑀘.

𑁫𑁬. 𑀲𑀻𑀢𑀁 𑀕𑀼𑀡𑁂, 𑀕𑀼𑀡𑀺𑀮𑀺𑀗𑁆𑀕𑀸, 𑀲𑀻𑀢 𑀲𑀺𑀲𑀺𑀭 𑀲𑀻𑀢𑀮𑀸;

𑀳𑀺𑀫𑀁 𑀢𑀼𑀳𑀺𑀦 𑀫𑀼𑀲𑁆𑀲𑀸𑀯𑁄, 𑀦𑀻𑀳𑀸𑀭𑁄 𑀫𑀳𑀺𑀓𑀸 𑀧𑁆𑀬𑀣.