𑁭. 𑀧𑀸𑀢𑀸𑀮𑀯𑀕𑁆𑀕

𑁬𑁪𑁯. 𑀅𑀥𑁄𑀪𑀼𑀯𑀦𑀁 𑀧𑀸𑀢𑀸𑀮𑀁, 𑀦𑀸𑀕𑀮𑁄𑀓𑁄 𑀭𑀲𑀸𑀢𑀮𑀁;

𑀭𑀦𑁆𑀥𑀁 𑀢𑀼 𑀯𑀺𑀯𑀭𑀁 𑀙𑀺𑀤𑁆𑀤𑀁, 𑀓𑀼𑀳𑀭𑀁 𑀲𑀼𑀲𑀺𑀭𑀁 𑀩𑀺𑀮𑀁.

𑁬𑁫𑁦. 𑀲𑀼𑀲𑀺’𑀢𑁆𑀣𑀻 𑀙𑀺𑀕𑁆𑀕𑀮𑀁 𑀲𑁄𑀩𑁆𑀪𑀁, 𑀲𑀘𑁆𑀙𑀺𑀤𑁆𑀤𑁂 𑀲𑀼𑀲𑀺𑀭𑀁 𑀢𑀺𑀲𑀼;

𑀣𑀺𑀬𑀁 𑀢𑀼 𑀓𑀸𑀲𑀼 𑀆𑀯𑀸𑀝𑁄, 𑀲𑀧𑁆𑀧𑀭𑀸𑀚𑀸 𑀢𑀼 𑀯𑀸𑀲𑀼𑀓𑀻.

𑁬𑁫𑁧. 𑀅𑀦𑀦𑁆𑀢𑁄 𑀦𑀸𑀕𑀭𑀸𑀚𑀸 𑀣, 𑀯𑀸𑀳𑀲𑁄’𑀚𑀕𑀭𑁄 𑀪𑀯𑁂;

𑀕𑁄𑀦𑀲𑁄 𑀢𑀼 𑀢𑀺𑀮𑀺𑀘𑁆𑀙𑁄 𑀣,

𑀤𑁂𑀟𑁆𑀟𑀼𑀪𑁄 𑀭𑀸𑀚𑀼𑀮𑁄 𑀪𑀯𑁂.

𑁬𑁫𑁨. 𑀓𑀫𑁆𑀩𑀮𑁄’𑀲𑁆𑀲𑀢𑀭𑁄 𑀫𑁂𑀭𑀼, 𑀧𑀸𑀤𑁂 𑀦𑀸𑀕𑀸𑀣 𑀥𑀫𑁆𑀫𑀦𑀻;

𑀲𑀺𑀮𑀼𑀢𑁆𑀢𑁄 𑀖𑀭𑀲𑀧𑁆𑀧𑁄 𑀣, 𑀦𑀻𑀮𑀲𑀧𑁆𑀧𑁄 𑀲𑀺𑀮𑀸𑀪𑀼 𑀘.

𑁬𑁫𑁩. 𑀆𑀲𑀺𑀯𑀺𑀲𑁄 𑀪𑀼𑀚𑀗𑁆𑀕𑁄’𑀳𑀺, 𑀪𑀼𑀚𑀕𑁄 𑀘 𑀪𑀼𑀚𑀗𑁆𑀕𑀫𑁄;

𑀲𑀭𑀻𑀲𑀧𑁄 𑀨𑀡𑀻 𑀲𑀧𑁆𑀧𑀸, 𑀮𑀕𑀤𑁆𑀤𑀸 𑀪𑁄𑀕𑀺 𑀧𑀦𑁆𑀦𑀕𑀸.

𑁬𑁫𑁪. 𑀤𑁆𑀯𑀺𑀚𑀺𑀯𑁆𑀳𑁄 𑀉𑀭𑀕𑁄 𑀯𑀸𑀴𑁄, 𑀤𑀻𑀖𑁄 𑀘 𑀤𑀻𑀖𑀧𑀺𑀝𑁆𑀞𑀺𑀓𑁄;

𑀧𑀸𑀤𑀽𑀤𑀭𑁄 𑀯𑀺𑀲𑀥𑀭𑁄, 𑀪𑁄𑀕𑁄 𑀢𑀼 𑀨𑀡𑀺𑀦𑁄 𑀢𑀦𑀼.

𑁬𑁫𑁫. 𑀆𑀲𑀻’𑀢𑁆𑀣𑀻 𑀲𑀧𑁆𑀧𑀤𑀸𑀞𑀸 𑀣, 𑀦𑀺𑀫𑁆𑀫𑁄𑀓𑁄 𑀓𑀜𑁆𑀘𑀼𑀓𑁄 𑀲𑀫𑀸;

𑀯𑀺𑀲𑀁 𑀢𑁆𑀯’𑀦𑀺𑀢𑁆𑀣𑀻 𑀕𑀭𑀴𑀁, 𑀢𑀩𑁆𑀪𑁂𑀤𑀸 𑀯𑀸 𑀳𑀮𑀸𑀳𑀮𑁄.

𑁬𑁫𑁬. 𑀓𑀸𑀴𑀓𑀽𑀝𑀸𑀤𑀬𑁄 𑀘𑀸𑀣, 𑀯𑀸𑀴𑀕𑁆𑀕𑀸𑀢𑁆𑀬’𑀳𑀺𑀢𑀼𑀡𑁆𑀟𑀺𑀓𑁄;

𑁬𑁫𑁭. 𑀦𑀺𑀭𑀬𑁄 𑀤𑀼𑀕𑁆𑀕𑀢𑀺’𑀢𑁆𑀣𑀻 𑀘, 𑀦𑀭𑀓𑁄, 𑀲𑁄 𑀫𑀳𑀸’𑀝𑁆𑀞𑀥𑀸;

𑀲𑀜𑁆𑀚𑀻𑀯𑁄 𑀓𑀸𑀴𑀲𑀼𑀢𑁆𑀢𑁄 𑀘, 𑀫𑀳𑀸𑀭𑁄𑀭𑀼𑀯 𑀭𑁄𑀭𑀼𑀯𑀸;

𑀧𑀢𑀸𑀧𑀦𑁄 𑀅𑀯𑀻𑀘𑀺’𑀢𑁆𑀣𑀻, 𑀲𑀗𑁆𑀖𑀸𑀢𑁄 𑀢𑀸𑀧𑀦𑁄 𑀇𑀢𑀺.

𑁬𑁫𑁮. 𑀣𑀺𑀬𑀁 𑀯𑁂𑀢𑀭𑀡𑀻 𑀮𑁄𑀳, 𑀓𑀼𑀫𑁆𑀪𑀻 𑀢𑀢𑁆𑀣 𑀚𑀮𑀸𑀲𑀬𑀸;

𑀓𑀸𑀭𑀡𑀺𑀓𑁄 𑀦𑀺𑀭𑀬𑀧𑁄,

𑀦𑁂𑀭𑀬𑀺𑀓𑁄 𑀢𑀼 𑀦𑀸𑀭𑀓𑁄.

𑁬𑁫𑁯. 𑀅𑀡𑁆𑀡𑀯𑁄 𑀲𑀸𑀕𑀭𑁄 𑀲𑀺𑀦𑁆𑀥𑀼, 𑀲𑀫𑀼𑀤𑁆𑀤𑁄 𑀭𑀢𑀦𑀸𑀓𑀭𑁄;

𑀚𑀮𑀦𑀺𑀛𑀼’ 𑀤𑀥𑀺, 𑀢𑀲𑁆𑀲, 𑀪𑁂𑀤𑀸 𑀔𑀻𑀭𑀡𑁆𑀡𑀯𑀸𑀤𑀬𑁄.

𑁬𑁬𑁦. 𑀯𑁂𑀮𑀸’𑀲𑁆𑀲 𑀓𑀽𑀮𑀤𑁂𑀲𑁄 𑀣,

𑀆𑀯𑀝𑁆𑀝𑁄 𑀲𑀮𑀺𑀮𑀩𑁆𑀪𑀫𑁄;

𑀣𑁂𑀯𑁄 𑀢𑀼 𑀩𑀺𑀦𑁆𑀤𑀼 𑀨𑀼𑀲𑀺𑀢𑀁, 𑀪𑀫𑁄 𑀢𑀼 𑀚𑀮𑀦𑀺𑀕𑁆𑀕𑀫𑁄.

𑁬𑁬𑁧. 𑀆𑀧𑁄 𑀧𑀬𑁄 𑀚𑀮𑀁 𑀯𑀸𑀭𑀺, 𑀧𑀸𑀦𑀻𑀬𑀁 𑀲𑀮𑀺𑀮𑀁 𑀤𑀓𑀁;

𑀅𑀡𑁆𑀡𑁄 𑀦𑀻𑀭𑀁 𑀯𑀦𑀁 𑀯𑀸𑀮𑀁, 𑀢𑁄𑀬𑀁 𑀅𑀫𑁆𑀩𑀼’𑀤𑀓𑀜𑁆𑀘 𑀓𑀁.

𑁬𑁬𑁨. 𑀢𑀭𑀗𑁆𑀕𑁄 𑀘 𑀢𑀣𑀸 𑀪𑀗𑁆𑀕𑁄, 𑀊𑀫𑀺 𑀯𑀻𑀘𑀺 𑀧𑀼𑀫𑀺𑀢𑁆𑀣𑀺𑀬𑀁;

𑀉𑀮𑁆𑀮𑁄𑀮𑁄 𑀢𑀼 𑀘 𑀓𑀮𑁆𑀮𑁄𑀮𑁄, 𑀫𑀳𑀸𑀯𑀻𑀘𑀻𑀲𑀼 𑀓𑀣𑁆𑀬𑀢𑁂.

𑁬𑁬𑁩. 𑀚𑀫𑁆𑀩𑀸𑀮𑁄 𑀓𑀮𑀮𑀁 𑀧𑀗𑁆𑀓𑁄, 𑀘𑀺𑀓𑁆𑀔𑀮𑁆𑀮𑀁 𑀓𑀤𑁆𑀤𑀫𑁄 𑀧𑁆𑀬𑀣;

𑀧𑀼𑀮𑀺𑀦𑀁 𑀯𑀸𑀮𑀼𑀓𑀸 𑀯𑀡𑁆𑀡𑀼, 𑀫𑀭𑀽’𑀭𑀼 𑀲𑀺𑀓𑀢𑀸 𑀪𑀯𑁂.

𑁬𑁬𑁪. 𑀅𑀦𑁆𑀢𑀭𑀻𑀧𑀜𑁆𑀘 𑀤𑀻𑀧𑁄 𑀯𑀸, 𑀚𑀮𑀫𑀚𑁆𑀛𑀕𑀢𑀁 𑀣𑀮𑀁;

𑀢𑀻𑀭𑀁 𑀢𑀼 𑀓𑀽𑀮𑀁 𑀭𑁄𑀥𑀜𑁆𑀘, 𑀧𑀢𑀻𑀭𑀜𑁆𑀘 𑀢𑀝𑀁 𑀢𑀺𑀲𑀼.

𑁬𑁬𑁫. 𑀧𑀸𑀭𑀁 𑀧𑀭𑀫𑁆𑀳𑀺 𑀢𑀻𑀭𑀫𑁆𑀳𑀺, 𑀑𑀭𑀁 𑀢𑁆𑀯’𑀧𑀸𑀭 𑀫𑀼𑀘𑁆𑀘𑀢𑁂;

𑀉𑀴𑀼𑀫𑁆𑀧𑁄 [𑀉𑀴𑀼𑀧𑁄 (𑀓.)] 𑀢𑀼 𑀧𑁆𑀮𑀯𑁄 𑀓𑀼𑀮𑁆𑀮𑁄, 𑀢𑀭𑁄 𑀘 𑀧𑀘𑁆𑀘𑀭𑀻’𑀢𑁆𑀣𑀺𑀬𑀁.

𑁬𑁬𑁬. 𑀢𑀭𑀡𑀻 𑀢𑀭𑀺 𑀦𑀸𑀯𑀸 𑀘, 𑀓𑀽𑀧𑀓𑁄 𑀢𑀼 𑀘 𑀓𑀼𑀫𑁆𑀪𑀓𑀁;

𑀧𑀘𑁆𑀙𑀸𑀩𑀦𑁆𑀥𑁄 𑀕𑁄𑀝𑀯𑀺𑀲𑁄, 𑀓𑀡𑁆𑀡𑀥𑀸𑀭𑁄 𑀢𑀼 𑀦𑀸𑀯𑀺𑀓𑁄.

𑁬𑁬𑁭. 𑀅𑀭𑀺𑀢𑁆𑀢𑀁 𑀓𑁂𑀦𑀺𑀧𑀸𑀢𑁄 𑀣,

𑀧𑁄𑀢𑀯𑀸𑀳𑁄 𑀦𑀺𑀬𑀸𑀫𑀓𑁄;

𑀲𑀁𑀬𑀢𑁆𑀢𑀺𑀓𑀸 𑀢𑀼 𑀦𑀸𑀯𑀸𑀬, 𑀯𑀸𑀡𑀺𑀚𑁆𑀚𑀫𑀸𑀘𑀭𑀦𑁆𑀢𑀺 𑀬𑁂.

𑁬𑁬𑁮. 𑀦𑀸𑀯𑀸𑀬’𑀗𑁆𑀕𑀸’ 𑀮𑀗𑁆𑀓𑀸𑀭𑁄 𑀘, 𑀯𑀝𑀸𑀓𑀸𑀭𑁄 𑀨𑀺𑀬𑀸𑀤𑀬𑁄;

𑀧𑁄𑀢𑁄 𑀧𑀯𑀳𑀦𑀁 𑀯𑀼𑀢𑁆𑀢𑀁, 𑀤𑁄𑀡𑀺 𑀢𑁆𑀯𑀺’𑀢𑁆𑀣𑀻 𑀢𑀣𑀸’𑀫𑁆𑀩𑀡𑀁 [𑀅𑀫𑁆𑀫𑀡𑀁 (𑀲𑀻.)].

𑁬𑁬𑁯. 𑀕𑀪𑀻𑀭 𑀦𑀺𑀦𑁆𑀦 𑀕𑀫𑁆𑀪𑀻𑀭𑀸, 𑀣𑁄 𑀢𑁆𑀢𑀸𑀦𑀁 𑀢𑀩𑁆𑀩𑀺𑀧𑀓𑁆𑀔𑀓𑁂;

𑀅𑀕𑀸𑀥𑀁 𑀢𑁆𑀯’𑀢𑀮𑀫𑁆𑀨𑀲𑁆𑀲𑀁, 𑀅𑀦𑀘𑁆𑀙𑁄 𑀓𑀮𑀼𑀲𑀸’𑀯𑀺𑀮𑀸.

𑁬𑁭𑁦. 𑀅𑀘𑁆𑀙𑁄 𑀧𑀲𑀦𑁆𑀦𑁄 𑀯𑀺𑀫𑀮𑁄, 𑀕𑀪𑀻𑀭𑀧𑁆𑀧𑀪𑀼𑀢𑀻 𑀢𑀺𑀲𑀼;

𑀥𑀻𑀯𑀭𑁄 𑀫𑀘𑁆𑀙𑀺𑀓𑁄 𑀫𑀘𑁆𑀙, 𑀩𑀦𑁆𑀥 𑀓𑁂𑀯𑀝𑁆𑀝 𑀚𑀸𑀮𑀺𑀓𑀸.

𑁬𑁭𑁧. 𑀫𑀘𑁆𑀙𑁄 𑀫𑀻𑀦𑁄 𑀚𑀮𑀘𑀭𑁄, 𑀧𑀼𑀣𑀼𑀮𑁄𑀫𑁄’𑀫𑁆𑀩𑀼𑀚𑁄 𑀛𑀲𑁄;

𑀭𑁄𑀳𑀺𑀢𑁄 𑀫𑀕𑁆𑀕𑀼𑀭𑁄 𑀲𑀺𑀗𑁆𑀕𑀻, 𑀩𑀮𑀚𑁄 𑀫𑀼𑀜𑁆𑀚 𑀧𑀸𑀯𑀼𑀲𑀸.

𑁬𑁭𑁨. 𑀲𑀢𑁆𑀢𑀯𑀗𑁆𑀓𑁄 𑀲𑀯𑀗𑁆𑀓𑁄 𑀘, 𑀦𑀴𑀫𑀻𑀦𑁄 𑀘 𑀕𑀡𑁆𑀟𑀓𑁄;

𑀲𑀼𑀲𑀼𑀓𑀸 𑀲𑀨𑀭𑀻 𑀫𑀘𑁆𑀙, 𑀧𑁆𑀧𑀪𑁂𑀤𑀸 𑀫𑀓𑀭𑀸𑀤𑀬𑁄.

𑁬𑁭𑁩. 𑀫𑀳𑀸𑀫𑀘𑁆𑀙𑀸 𑀢𑀺𑀫𑀺 𑀢𑀺𑀫𑀺, 𑀗𑁆𑀕𑀮𑁄 𑀢𑀺𑀫𑀺𑀭𑀧𑀺𑀗𑁆𑀕𑀮𑁄;

𑀆𑀦𑀦𑁆𑀤𑁄 𑀢𑀺𑀫𑀺𑀦𑀦𑁆𑀤𑁄 𑀘, 𑀅𑀚𑁆𑀛𑀸𑀭𑁄𑀳𑁄 𑀫𑀳𑀸𑀢𑀺𑀫𑀺.

𑁬𑁭𑁪. 𑀧𑀸𑀲𑀸𑀡𑀫𑀘𑁆𑀙𑁄 𑀧𑀸𑀞𑀻𑀦𑁄, 𑀯𑀗𑁆𑀓𑁄 𑀢𑀼 𑀩𑀴𑀺𑀲𑁄 𑀪𑀯𑁂;

𑀲𑀼𑀲𑀼𑀫𑀸𑀭𑁄 [𑀲𑀁𑀲𑀼𑀫𑀸𑀭𑁄 (𑀝𑀻.), 𑀲𑀼𑀁𑀲𑀼𑀫𑀸𑀭𑁄 (𑀲𑀻.)] 𑀢𑀼 𑀓𑀼𑀫𑁆𑀪𑀻𑀮𑁄,

𑀦𑀓𑁆𑀓𑁄 𑀓𑀼𑀫𑁆𑀫𑁄 𑀢𑀼 𑀓𑀘𑁆𑀙𑀧𑁄.

𑁬𑁭𑁫. 𑀓𑀓𑁆𑀓𑀝𑀓𑁄 𑀓𑀼𑀴𑀻𑀭𑁄 𑀘, 𑀚𑀮𑀽𑀓𑀸 𑀢𑀼 𑀘 𑀭𑀢𑁆𑀢𑀧𑀸;

𑀫𑀡𑁆𑀟𑀽𑀓𑁄 𑀤𑀤𑁆𑀤𑀼𑀭𑁄 𑀪𑁂𑀓𑁄;

𑀕𑀡𑁆𑀟𑀼𑀧𑁆𑀧𑀸𑀤𑁄 𑀫𑀳𑀻𑀮𑀢𑀸.

𑁬𑁭𑁬. 𑀅𑀣 𑀲𑀺𑀧𑁆𑀧𑀻 𑀘 𑀲𑀼𑀢𑁆𑀢𑀺’𑀢𑁆𑀣𑀻, 𑀲𑀗𑁆𑀔𑁂 𑀢𑀼 𑀓𑀫𑁆𑀩𑀼’𑀦𑀺𑀢𑁆𑀣𑀺𑀬𑀁;

𑀔𑀼𑀤𑁆𑀤𑀲𑀗𑁆𑀔𑁆𑀬𑁂 𑀲𑀗𑁆𑀔𑀦𑀔𑁄, 𑀚𑀮𑀲𑀼𑀢𑁆𑀢𑀺 𑀘 𑀲𑀫𑁆𑀩𑀼𑀓𑁄.

𑁬𑁭𑁭. 𑀚𑀮𑀸𑀲𑀬𑁄 𑀚𑀮𑀸𑀥𑀸𑀭𑁄, 𑀕𑀫𑁆𑀪𑀻𑀭𑁄 𑀭𑀳𑀤𑁄 𑀣 𑀘;

𑀉𑀤𑀧𑀸𑀦𑁄 𑀧𑀸𑀦𑀓𑀽𑀧𑁄, 𑀔𑀸𑀢𑀁 𑀧𑁄𑀓𑁆𑀔𑀭𑀡𑀻’𑀢𑁆𑀣𑀺𑀬𑀁.

𑁬𑁭𑁮. 𑀢𑀴𑀸𑀓𑁄 𑀘 𑀲𑀭𑁄’𑀦𑀺𑀢𑁆𑀣𑀻, 𑀯𑀸𑀧𑀻 𑀘 𑀲𑀭𑀲𑀻’𑀢𑁆𑀣𑀺𑀬𑀁;

𑀤𑀳𑁄’𑀫𑁆𑀩𑀼𑀚𑀸𑀓𑀭𑁄 𑀘𑀸𑀣, 𑀧𑀮𑁆𑀮𑀮𑀁 𑀔𑀼𑀤𑁆𑀤𑀓𑁄 𑀲𑀭𑁄.

𑁬𑁭𑁯. 𑀅𑀦𑁄𑀢𑀢𑁆𑀢𑁄 𑀢𑀣𑀸 𑀓𑀡𑁆𑀡, 𑀫𑀼𑀡𑁆𑀟𑁄 𑀘 𑀭𑀣𑀓𑀸𑀭𑀓𑁄;

𑀙𑀤𑁆𑀤𑀦𑁆𑀢𑁄 𑀘 𑀓𑀼𑀡𑀸𑀮𑁄 𑀘, 𑀯𑀼𑀢𑁆𑀢𑀸 𑀫𑀦𑁆𑀤𑀸𑀓𑀺𑀦𑀻’𑀢𑁆𑀣𑀺𑀬𑀁.

𑁬𑁮𑁦. 𑀢𑀣𑀸 𑀲𑀻𑀳𑀧𑁆𑀧𑀧𑀸𑀢𑁄𑀢𑀺, 𑀏𑀢𑁂 𑀲𑀢𑁆𑀢 𑀫𑀳𑀸𑀲𑀭𑀸;

𑀆𑀳𑀸𑀯𑁄 𑀢𑀼 𑀦𑀺𑀧𑀸𑀦𑀜𑁆𑀘𑀸, 𑀔𑀸𑀢𑀁 𑀢𑀼 𑀤𑁂𑀯𑀔𑀸𑀢𑀓𑀁.

𑁬𑁮𑁧. 𑀲𑀯𑀦𑁆𑀢𑀻 𑀦𑀺𑀦𑁆𑀦𑀕𑀸 𑀲𑀺𑀦𑁆𑀥𑀼, 𑀲𑀭𑀺𑀢𑀸 𑀆𑀧𑀕𑀸 𑀦𑀤𑀻;

𑀪𑀸𑀕𑀻𑀭𑀣𑀻 𑀢𑀼 𑀕𑀗𑁆𑀕𑀸 𑀣, 𑀲𑀫𑁆𑀪𑁂𑀤𑁄 𑀲𑀺𑀦𑁆𑀥𑀼𑀲𑀗𑁆𑀕𑀫𑁄.

𑁬𑁮𑁨. 𑀕𑀗𑁆𑀕𑀸’𑀘𑀺𑀭𑀯𑀢𑀻 𑀘𑁂𑀯, 𑀬𑀫𑀼𑀦𑀸 𑀲𑀭𑀪𑀽 (𑀲𑀭𑀩𑀽 [𑀲𑀭𑀬𑀽 (𑀓.)] ) 𑀫𑀳𑀻;

𑀇𑀫𑀸 𑀫𑀳𑀸𑀦𑀤𑀻 𑀧𑀜𑁆𑀘, 𑀘𑀦𑁆𑀤𑀪𑀸𑀕𑀸 𑀲𑀭𑀲𑁆𑀲𑀢𑀻 [𑀲𑀭𑀲𑁆𑀯𑀢𑀻 (𑀲𑀻. 𑀝𑀻.)].

𑁬𑁮𑁩. 𑀦𑁂𑀭𑀜𑁆𑀚𑀭𑀸 𑀘 𑀓𑀸𑀯𑁂𑀭𑀻, 𑀦𑀫𑁆𑀫𑀤𑀸𑀤𑀻 𑀘 𑀦𑀺𑀦𑁆𑀦𑀕𑀸;

𑀯𑀸𑀭𑀺𑀫𑀕𑁆𑀕𑁄 𑀧𑀡𑀸𑀮𑀻’𑀢𑁆𑀣𑀻 [𑀧𑀦𑀸𑀴𑀻 (𑀝𑀻.)], 𑀧𑀼𑀫𑁂 𑀘𑀦𑁆𑀤𑀦𑀺𑀓𑀸 𑀢𑀼 𑀘.

𑁬𑁮𑁪. 𑀚𑀫𑁆𑀩𑀸𑀮𑀻 𑀑𑀮𑀺𑀕𑀮𑁆𑀮𑁄 𑀘, 𑀕𑀸𑀫𑀤𑁆𑀯𑀸𑀭𑀫𑁆𑀳𑀺 𑀓𑀸𑀲𑀼𑀬𑀁;

𑀲𑀭𑁄𑀭𑀼𑀳𑀁 𑀲𑀢𑀧𑀢𑁆𑀢𑀁, 𑀅𑀭𑀯𑀺𑀦𑁆𑀤𑀜𑁆𑀘 𑀯𑀸𑀭𑀺𑀚𑀁.

𑁬𑁮𑁫. 𑀅𑀦𑀺𑀢𑁆𑀣𑀻 𑀧𑀤𑀼𑀫𑀁 𑀧𑀗𑁆𑀓𑁂, 𑀭𑀼𑀳𑀁 𑀦𑀮𑀺𑀦 𑀧𑁄𑀓𑁆𑀔𑀭𑀁;

𑀫𑀼𑀴𑀸𑀮𑀧𑀼𑀧𑁆𑀨𑀁 𑀓𑀫𑀮𑀁, 𑀪𑀺𑀲𑀧𑀼𑀧𑁆𑀨𑀁 𑀓𑀼𑀲𑁂𑀲𑀬𑀁.

𑁬𑁮𑁬. 𑀧𑀼𑀡𑁆𑀟𑀭𑀻𑀓𑀁 𑀲𑀺𑀢𑀁, 𑀭𑀢𑁆𑀢𑀁, 𑀓𑁄𑀓𑀦𑀤𑀁 𑀓𑁄𑀓𑀸𑀲𑀓𑁄;

𑀓𑀺𑀜𑁆𑀚𑀓𑁆𑀔𑁄 𑀓𑁂𑀲𑀭𑁄 𑀦𑀺𑀢𑁆𑀣𑀻, 𑀤𑀡𑁆𑀟𑁄 𑀢𑀼 𑀦𑀸𑀮 𑀫𑀼𑀘𑁆𑀘𑀢𑁂.

𑁬𑁮𑁭. 𑀪𑀺𑀲𑀁 𑀫𑀼𑀴𑀸𑀮𑁄 𑀦𑀺𑀢𑁆𑀣𑀻 𑀘, 𑀩𑀻𑀚𑀓𑁄𑀲𑁄 𑀢𑀼 𑀓𑀡𑁆𑀡𑀺𑀓𑀸;

𑀧𑀤𑀼𑀫𑀸𑀤𑀺𑀲𑀫𑀽𑀳𑁂 𑀢𑀼, 𑀪𑀯𑁂 𑀲𑀡𑁆𑀟𑀫𑀦𑀺𑀢𑁆𑀣𑀺𑀬𑀁.

𑁬𑁮𑁮. 𑀉𑀧𑁆𑀧𑀮𑀁 𑀓𑀼𑀯𑀮𑀬𑀜𑁆𑀘, 𑀦𑀻𑀮𑀁 𑀢𑁆𑀯𑀺’𑀦𑁆𑀤𑀻𑀯𑀭𑀁 𑀲𑀺𑀬𑀸;

𑀲𑁂𑀢𑁂𑀢𑀼 𑀓𑀼𑀫𑀼𑀤𑀜𑁆𑀘𑀲𑁆𑀲, 𑀓𑀦𑁆𑀤𑁄 𑀲𑀸𑀮𑀽𑀓 𑀫𑀼𑀘𑁆𑀘𑀢𑁂.

𑁬𑁮𑁯. 𑀲𑁄𑀕𑀦𑁆𑀥𑀺𑀓𑀁 𑀓𑀮𑁆𑀮𑀳𑀸𑀭𑀁, 𑀤𑀓𑀲𑀻𑀢𑀮𑀺𑀓𑀁 𑀧𑁆𑀬𑀣;

𑀲𑁂𑀯𑀸𑀮𑁄 𑀦𑀻𑀮𑀺𑀓𑀸 𑀘𑀸𑀣, 𑀪𑀺𑀲𑀺𑀦𑁆𑀬’𑀫𑁆𑀩𑀼𑀚𑀺𑀦𑀻 𑀪𑀯𑁂.

𑁬𑁯𑁦. 𑀲𑁂𑀯𑀸𑀮𑀸 𑀢𑀺𑀮𑀩𑀻𑀚𑀜𑁆𑀘, 𑀲𑀗𑁆𑀔𑁂 𑀘 𑀧𑀡𑀓𑀸𑀤𑀬𑁄𑀢𑀺.

𑀇𑀢𑀺 𑀧𑀸𑀢𑀸𑀮𑀯𑀕𑁆𑀕𑁄.

𑀪𑀽𑀓𑀡𑁆𑀟𑁄 𑀤𑀼𑀢𑀺𑀬𑁄.