𑁨. 𑀧𑀼𑀭𑀯𑀕𑁆𑀕

𑁧𑁯𑁮. 𑀧𑀼𑀭𑀁 𑀦𑀕𑀭 𑀫𑀺𑀢𑁆𑀣𑀻 𑀯𑀸, 𑀞𑀸𑀦𑀻𑀬𑀁 𑀧𑀼𑀝𑀪𑁂𑀤𑀦𑀁;

𑀣𑀺𑀬𑀁 𑀢𑀼 𑀭𑀸𑀚𑀥𑀸𑀦𑀻 [𑀭𑀸𑀚𑀞𑀸𑀦𑀻 (𑀝𑀻.)] 𑀘, 𑀔𑀦𑁆𑀥𑀸𑀯𑀸𑀭𑁄 𑀪𑀯𑁂 𑀣 𑀘.

𑁧𑁯𑁯. 𑀲𑀸𑀔𑀸𑀦𑀕𑀭 𑀫𑀜𑁆𑀜𑀢𑁆𑀭, 𑀬𑀁 𑀢𑀁 𑀫𑀽𑀮𑀧𑀼𑀭𑀸 𑀧𑀼𑀭𑀁;

𑀩𑀸𑀭𑀸𑀡𑀲𑀻 𑀘 𑀲𑀸𑀯𑀢𑁆𑀣𑀺, 𑀯𑁂𑀲𑀸𑀮𑀻 𑀫𑀺𑀣𑀺𑀮𑀸, 𑀴𑀯𑀻.

𑁨𑁦𑁦. 𑀓𑁄𑀲𑀫𑁆𑀩𑀼, 𑀚𑁆𑀚𑁂𑀦𑀺𑀬𑁄 𑀢𑀓𑁆𑀓, 𑀲𑀺𑀮𑀸 𑀘𑀫𑁆𑀧𑀸 𑀘 𑀲𑀸𑀕𑀮𑀁;

𑀲𑀼𑀲𑀼𑀫𑀸𑀭𑀕𑀺𑀭𑀁 [𑀲𑀁𑀲𑀼𑀫𑀸𑀭 (𑀝𑀻𑀓𑀸)] 𑀭𑀸𑀚, 𑀕𑀳𑀁 𑀓𑀧𑀺𑀮𑀯𑀢𑁆𑀣𑀼 𑀘.

𑁨𑁦𑁧. 𑀲𑀸𑀓𑁂𑀢, 𑀫𑀺𑀦𑁆𑀤𑀧𑀢𑁆𑀣𑀜𑁆𑀘𑁄, 𑀓𑁆𑀓𑀝𑁆𑀞𑀸 𑀧𑀸𑀝𑀮𑀺𑀧𑀼𑀢𑁆𑀢𑀓𑀁;

𑀚𑁂𑀢𑀼𑀢𑁆𑀢𑀭𑀜𑁆𑀘 𑀲𑀗𑁆𑀓𑀲𑁆𑀲𑀁, 𑀓𑀼𑀲𑀺𑀦𑀸𑀭𑀸𑀤𑀬𑁄 𑀧𑀼𑀭𑀻.

𑁨𑁦𑁨. 𑀭𑀘𑁆𑀙𑀸 𑀘 𑀯𑀺𑀲𑀺𑀔𑀸 𑀯𑀼𑀢𑁆𑀢𑀸, 𑀭𑀣𑀺𑀓𑀸 𑀯𑀻𑀣𑀺 𑀘𑀸𑀧𑁆𑀬𑀣;

𑀩𑁆𑀬𑀽𑀳𑁄 𑀭𑀘𑁆𑀙𑀸 𑀅𑀦𑀺𑀩𑁆𑀩𑀺𑀤𑁆𑀥𑀸, 𑀦𑀺𑀩𑁆𑀩𑀺𑀤𑁆𑀥𑀸 𑀢𑀼 𑀧𑀣𑀤𑁆𑀥𑀺 𑀘.

𑁨𑁦𑁩. 𑀘𑀢𑀼𑀓𑁆𑀓𑀁 𑀘𑀘𑁆𑀘𑀭𑁂 𑀫𑀕𑁆𑀕, 𑀲𑀦𑁆𑀥𑀺 𑀲𑀺𑀗𑁆𑀖𑀸𑀝𑀓𑀁 𑀪𑀯𑁂;

𑀧𑀸𑀓𑀸𑀭𑁄 𑀯𑀭𑀡𑁄 𑀘𑀸𑀣, 𑀉𑀤𑀸𑀧𑁄 [𑀉𑀤𑁆𑀤𑀸𑀧, 𑀉𑀤𑁆𑀤𑀸𑀧] 𑀉𑀧𑀓𑀸𑀭𑀺𑀓𑀸.

𑁨𑁦𑁪. 𑀓𑀼𑀝𑁆𑀝𑀁 𑀢𑀼 𑀪𑀺𑀢𑁆𑀢𑀺 𑀦𑀸𑀭𑀻 𑀣, 𑀕𑁄𑀧𑀼𑀭𑀁 𑀤𑁆𑀯𑀸𑀭𑀓𑁄𑀝𑁆𑀞𑀓𑁄;

𑀏𑀲𑀺𑀓𑀸 𑀇𑀦𑁆𑀤𑀔𑀻𑀮𑁄 𑀘, 𑀅𑀝𑁆𑀝𑁄 𑀢𑁆𑀯𑀝𑁆𑀝𑀸𑀮𑀓𑁄 𑀪𑀯𑁂.

𑁨𑁦𑁫. 𑀢𑁄𑀭𑀡𑀁 𑀢𑀼 𑀩𑀳𑀺𑀤𑁆𑀯𑀸𑀭𑀁, 𑀧𑀭𑀺𑀔𑀸𑀢𑀼 𑀘 𑀤𑀻𑀖𑀺𑀓𑀸;

𑀫𑀦𑁆𑀤𑀺𑀭𑀁 𑀲𑀤𑀦𑀸, 𑀕𑀸𑀭𑀁, 𑀦𑀺𑀓𑀸𑀬𑁄 𑀦𑀺𑀮𑀬𑀸, 𑀮𑀬𑁄.

𑁨𑁦𑁬. 𑀆𑀯𑀸𑀲𑁄 𑀪𑀯𑀦𑀁 𑀯𑁂𑀲𑁆𑀫𑀁, 𑀦𑀺𑀓𑁂𑀢𑀦𑀁 𑀦𑀺𑀯𑁂𑀲𑀦𑀁;

𑀖𑀭𑀁 𑀕𑀳𑀜𑁆𑀘𑀸, 𑀯𑀲𑀣𑁄, 𑀲𑀭𑀡𑀜𑁆𑀘 𑀧𑀢𑀺𑀲𑁆𑀲𑀬𑁄.

𑁨𑁦𑁭. 𑀑𑀓𑀁 𑀲𑀸𑀮𑀸 𑀔𑀬𑁄 𑀯𑀸𑀲𑁄, 𑀣𑀺𑀬𑀁 𑀓𑀼𑀝𑀺 𑀯𑀲𑀢𑁆𑀬’𑀧𑀺;

𑀕𑁂𑀳𑀜𑁆𑀘𑀸, 𑀦𑀺𑀢𑁆𑀣𑀺 𑀲𑀤𑀼𑀫𑀁, 𑀘𑁂𑀢𑀺𑀬𑀸, 𑀬𑀢𑀦𑀸𑀦𑀺 𑀢𑀼.

𑁨𑁦𑁮. 𑀧𑀸𑀲𑀸𑀤𑁄 𑀘𑁂𑀯 𑀬𑀽𑀧𑁄 𑀣, 𑀫𑀼𑀡𑁆𑀟𑀘𑁆𑀙𑀤𑁄 𑀘 𑀳𑀫𑁆𑀫𑀺𑀬𑀁;

𑀬𑀽𑀧𑁄𑀢𑀼 𑀕𑀚𑀓𑀼𑀫𑁆𑀪𑀫𑁆𑀳𑀺, 𑀳𑀢𑁆𑀣𑀺𑀦𑀔𑁄 𑀧𑀢𑀺𑀝𑁆𑀞𑀺𑀢𑁄.

𑁨𑁦𑁯. 𑀲𑀼𑀧𑀡𑁆𑀡𑀯𑀗𑁆𑀓𑀘𑁆𑀙𑀤𑀦, 𑀫𑀟𑁆𑀠𑀬𑁄𑀕𑁄 𑀲𑀺𑀬𑀸 𑀣 𑀘;

𑀏𑀓𑀓𑀽𑀝𑀬𑀼𑀢𑁄 𑀫𑀸𑀴𑁄,

𑀧𑀸𑀲𑀸𑀤𑁄 𑀘𑀢𑀼𑀭𑀲𑁆𑀲𑀓𑁄.

𑁨𑁧𑁦. 𑀲𑀪𑀸𑀬𑀜𑁆𑀘 𑀲𑀪𑀸 𑀘𑀸𑀣, 𑀫𑀡𑁆𑀟𑀧𑀁 𑀯𑀸 𑀚𑀦𑀸𑀮𑀬𑁄;

𑀅𑀣𑁄 𑀆𑀲𑀦𑀲𑀸𑀮𑀸𑀬𑀁, 𑀧𑀝𑀺𑀓𑁆𑀓𑀫𑀦 𑀫𑀻𑀭𑀺𑀢𑀁.

𑁨𑁧𑁧. 𑀚𑀺𑀦𑀲𑁆𑀲 𑀯𑀸𑀲𑀪𑀯𑀦, 𑀫𑀺𑀢𑁆𑀣𑀻 𑀕𑀦𑁆𑀥𑀓𑀼𑀝𑀺 𑀧𑁆𑀬𑀣;

𑀣𑀺𑀬𑀁 𑀭𑀲𑀯𑀢𑀻 𑀧𑀸𑀓, 𑀝𑁆𑀞𑀸𑀦𑀜𑁆𑀘𑁂𑀯 𑀫𑀳𑀸𑀦𑀲𑀁.

𑁨𑁧𑁨. 𑀆𑀯𑁂𑀲𑀦𑀁 𑀲𑀺𑀧𑁆𑀧𑀲𑀸𑀮𑀸, 𑀲𑁄𑀡𑁆𑀟𑀸 𑀢𑀼 𑀧𑀸𑀦𑀫𑀦𑁆𑀤𑀺𑀭𑀁;

𑀯𑀘𑁆𑀘𑀝𑁆𑀞𑀸𑀦𑀁 𑀯𑀘𑁆𑀘𑀓𑀼𑀝𑀺, 𑀫𑀼𑀦𑀻𑀦𑀁 𑀞𑀸𑀦 𑀫𑀲𑁆𑀲𑀫𑁄.

𑁨𑁧𑁩. 𑀧𑀡𑁆𑀬𑀯𑀺𑀓𑁆𑀓𑀬𑀲𑀸𑀮𑀸 𑀓𑀼, 𑀆𑀧𑀡𑁄 𑀧𑀡𑁆𑀬𑀯𑀻𑀣𑀺𑀓𑀸;

𑀉𑀤𑁄𑀲𑀺𑀢𑁄 𑀪𑀡𑁆𑀟𑀲𑀸𑀮𑀸, 𑀘𑀗𑁆𑀓𑀫𑀦𑀁 𑀢𑀼 𑀘𑀗𑁆𑀓𑀫𑁄.

𑁨𑁧𑁪. 𑀚𑀦𑁆𑀢𑀸𑀖𑀭𑀁 𑀢𑁆𑀯𑀕𑁆𑀕𑀺𑀲𑀸𑀮𑀸, 𑀧𑀧𑀸 𑀧𑀸𑀦𑀻𑀬𑀲𑀸𑀮𑀺𑀓𑀸;

𑀕𑀩𑁆𑀪𑁄 𑀑𑀯𑀭𑀓𑁄 𑀯𑀸𑀲𑀸, 𑀕𑀸𑀭𑀁 𑀢𑀼 𑀲𑀬𑀦𑀺𑀕𑁆𑀕𑀳𑀁.

𑁨𑁧𑁫. 𑀇𑀢𑁆𑀣𑀸𑀕𑀸𑀭𑀁 𑀢𑀼 𑀑𑀭𑁄𑀥𑁄, 𑀲𑀼𑀤𑁆𑀥𑀦𑁆𑀢𑁄’ 𑀦𑁆𑀢𑁂𑀧𑀼𑀭𑀫𑁆𑀧𑀺 𑀘;

𑀅𑀲𑀩𑁆𑀩𑀯𑀺𑀲𑀬𑀝𑁆𑀞𑀸𑀦𑀁, 𑀭𑀜𑁆𑀜𑀁 𑀓𑀘𑁆𑀙𑀦𑁆𑀢𑀭𑀁 𑀫𑀢𑀁.

𑁨𑁧𑁬. 𑀲𑁄𑀧𑀸𑀦𑁄 𑀯𑀸’𑀭𑁄𑀳𑀡𑀜𑁆𑀘,

𑀦𑀺𑀲𑁆𑀲𑁂𑀡𑀻 𑀲𑀸, 𑀥𑀺𑀭𑁄𑀳𑀺𑀡𑀻;

𑀯𑀸𑀢𑀧𑀸𑀦𑀁 𑀕𑀯𑀓𑁆𑀔𑁄 𑀘, 𑀚𑀸𑀮𑀜𑁆𑀘 𑀲𑀻𑀳𑀧𑀜𑁆𑀚𑀭𑀁.

𑁨𑁧𑁭. 𑀆𑀮𑁄𑀓𑀲𑀦𑁆𑀥𑀺 𑀯𑀼𑀢𑁆𑀢𑁄 𑀣, 𑀮𑀗𑁆𑀕𑀻’𑀢𑁆𑀣𑀻 𑀧𑀮𑀺𑀖𑁄 𑀪𑀯𑁂;

𑀓𑀧𑀺𑀲𑀻𑀲𑁄, 𑀕𑁆𑀕𑀮𑀢𑁆𑀣𑀫𑁆𑀪𑁄, 𑀦𑀺𑀩𑁆𑀩𑀁 𑀢𑀼 𑀙𑀤𑁆𑀤𑀓𑁄𑀝𑀺𑀬𑀁.

𑁨𑁧𑁮. 𑀙𑀤𑀦𑀁 𑀧𑀝𑀮𑀁 𑀙𑀤𑁆𑀤, 𑀫𑀚𑀺𑀭𑀁 𑀘𑀘𑁆𑀘𑀭𑁄, 𑀗𑁆𑀕𑀡𑀁;

𑀧𑀖𑀸𑀦𑁄 𑀧𑀖𑀦𑀸, 𑀮𑀺𑀦𑁆𑀤𑁄, 𑀧𑀫𑀼𑀔𑀁 𑀤𑁆𑀯𑀸𑀭𑀩𑀦𑁆𑀥𑀦𑀁.

𑁨𑁧𑁯. 𑀧𑀺𑀝𑁆𑀞𑀲𑀗𑁆𑀖𑀸𑀝𑀓𑀁 𑀤𑁆𑀯𑀸𑀭, 𑀩𑀸𑀳𑀸 𑀓𑀽𑀝𑀁 𑀢𑀼 𑀓𑀡𑁆𑀡𑀺𑀓𑀸;

𑀤𑁆𑀯𑀸𑀭𑀜𑁆𑀘 𑀧𑀝𑀺𑀳𑀸𑀭𑁄 𑀣, 𑀉𑀫𑁆𑀫𑀸𑀭𑁄 𑀤𑁂𑀳𑀦𑀻, 𑀢𑁆𑀣𑀺𑀬𑀁.

𑁨𑁨𑁦. 𑀏𑀴𑀓𑁄 𑀇𑀦𑁆𑀤𑀔𑀻𑀮𑁄 𑀣, 𑀣𑀫𑁆𑀪𑁄 𑀣𑀽𑀡𑁄 𑀧𑀼𑀫𑀺𑀢𑁆𑀣𑀺𑀬𑀁;

𑀧𑀸𑀝𑀺𑀓𑀸, 𑀟𑁆𑀠𑁂𑀦𑁆𑀤𑀼𑀧𑀸𑀲𑀸𑀡𑁂, 𑀕𑀺𑀜𑁆𑀚𑀓𑀸 𑀢𑀼 𑀘 𑀇𑀝𑁆𑀞𑀓𑀸.

𑁨𑁨𑁧. 𑀯𑀮𑀪𑀺𑀘𑁆𑀙𑀸𑀤𑀺𑀤𑀸𑀭𑀼𑀫𑁆𑀳𑀺, 𑀯𑀗𑁆𑀓𑁂 𑀕𑁄𑀧𑀸𑀦𑀲𑀻, 𑀢𑁆𑀣𑀺𑀬𑀁;

𑀓𑀧𑁄𑀢𑀧𑀸𑀮𑀺𑀓𑀸𑀬𑀁 𑀢𑀼, 𑀯𑀺𑀝𑀗𑁆𑀓𑁄 𑀦𑀺𑀢𑁆𑀣𑀺𑀬𑀁 𑀪𑀯𑁂.

𑁨𑁨𑁨. 𑀓𑀼𑀜𑁆𑀘𑀺𑀓𑀸𑀯𑀺𑀯𑀭𑀁 𑀢𑀸𑀴, 𑀘𑁆𑀙𑀺𑀕𑁆𑀕𑀮𑁄 𑀧𑁆𑀬𑀣 𑀓𑀼𑀜𑁆𑀘𑀺𑀓𑀸;

𑀢𑀸𑀴𑁄’𑀯𑀸𑀧𑀼𑀭𑀡𑀁 𑀘𑀸𑀣, 𑀯𑁂𑀤𑀺𑀓𑀸 𑀯𑁂𑀤𑀺 𑀓𑀣𑁆𑀬𑀢𑁂.

𑁨𑁨𑁩. 𑀲𑀗𑁆𑀖𑀸𑀢𑁄 𑀧𑀓𑁆𑀔𑀧𑀸𑀲𑁄 𑀘, 𑀫𑀦𑁆𑀤𑀺𑀭𑀗𑁆𑀕𑀸 𑀢𑀼𑀮𑀸 𑀅𑀧𑀺;

𑀣𑀺𑀬𑀁 𑀲𑀫𑁆𑀫𑀼𑀚𑁆𑀚𑀦𑀻 𑀘𑁂𑀯, 𑀲𑀫𑁆𑀫𑀚𑁆𑀚𑀦𑀻 𑀘 𑀲𑁄𑀥𑀦𑀻.

𑁨𑁨𑁪. 𑀲𑀗𑁆𑀓𑀝𑀻𑀭𑀁 𑀢𑀼 𑀲𑀗𑁆𑀓𑀸𑀭, 𑀝𑁆𑀞𑀸𑀦𑀁 𑀲𑀗𑁆𑀓𑀸𑀭𑀓𑀽𑀝𑀓𑀁;

𑀅𑀣𑁄 𑀓𑀘𑀯𑀭𑁄, 𑀓𑁆𑀮𑀸𑀧𑁄, 𑀲𑀗𑁆𑀓𑀸𑀭𑁄 𑀘 𑀓𑀲𑀫𑁆𑀩𑀼𑀧𑀺.

𑁨𑁨𑁫. 𑀖𑀭𑀸𑀤𑀺𑀪𑀽𑀫𑀺 𑀢𑀁 𑀯𑀢𑁆𑀣𑀼, 𑀕𑀸𑀫𑁄 𑀲𑀁𑀯𑀲𑀣𑁄 𑀣 𑀲𑁄;

𑀧𑀸𑀓𑀝𑁄 𑀦𑀺𑀕𑀫𑁄 𑀪𑁄𑀕, 𑀫𑀘𑁆𑀘𑀸𑀤𑀺𑀪𑁆𑀬𑁄 𑀥𑀺 𑀢𑀽𑀤𑀺𑀢𑁄 [‘𑀅𑀥𑀺𑀪𑀽’𑀢𑀺 𑀈𑀭𑀺𑀢𑁄 𑀓𑀣𑀺𑀢𑁄 (𑀝𑀻.)].

𑁨𑁨𑁬. 𑀲𑀻𑀫𑀸 𑀘 𑀫𑀭𑀺𑀬𑀸𑀤𑀸 𑀣,

𑀖𑁄𑀲𑁄 𑀕𑁄𑀧𑀸𑀮𑀕𑀸𑀫𑀓𑁄𑀢𑀺.

𑀧𑀼𑀭𑀯𑀕𑁆𑀕𑁄 𑀦𑀺𑀝𑁆𑀞𑀺𑀢𑁄.