𑁨. 𑀪𑀽𑀓𑀡𑁆𑀟

𑁧. 𑀪𑀽𑀫𑀺𑀯𑀕𑁆𑀕

𑁧𑁮𑁦. 𑀯𑀕𑁆𑀕𑀸 𑀪𑀽𑀫𑀺, 𑀧𑀼𑀭𑀻, 𑀫𑀘𑁆𑀘, 𑀘𑀢𑀼𑀩𑁆𑀩𑀡𑁆𑀡, 𑀯𑀦𑀸𑀤𑀺𑀳𑀺;

𑀧𑀸𑀢𑀸𑀮𑁂𑀦 𑀘 𑀯𑀼𑀘𑁆𑀘𑀦𑁆𑀢𑁂, 𑀲𑀗𑁆𑀕𑁄’𑀧𑀗𑁆𑀕𑁂𑀳𑀺’𑀥’𑀓𑁆𑀓𑀫𑀸.

𑁧𑁮𑁧. 𑀯𑀲𑀼𑀦𑁆𑀥𑀭𑀸 𑀙𑀫𑀸 𑀪𑀽𑀫𑀺, 𑀧𑀣𑀯𑀻 𑀫𑁂𑀤𑀦𑀻 𑀫𑀳𑀻;

𑀉𑀩𑁆𑀩𑀻 𑀯𑀲𑀼𑀫𑀢𑀻 𑀕𑁄 𑀓𑀼, 𑀯𑀲𑀼𑀥𑀸 𑀥𑀭𑀡𑀻 𑀥𑀭𑀸;

𑀧𑀼𑀣𑀯𑀻 𑀚𑀕𑀢𑀻 𑀪𑀽𑀭𑀻, 𑀪𑀽 𑀘 𑀪𑀽𑀢𑀥𑀭𑀸’ 𑀯𑀦𑀻.

𑁧𑁮𑁨. 𑀔𑀸𑀭𑀸 𑀢𑀼 𑀫𑀢𑁆𑀢𑀺𑀓𑀸 𑀊𑀲𑁄, 𑀊𑀲𑀯𑀸 𑀢𑀽𑀲𑀭𑁄 𑀢𑀺𑀲𑀼;

𑀣𑀮𑀁 𑀣𑀮𑀻𑀢𑁆𑀣𑀻 𑀪𑀽𑀪𑀸𑀕𑁂, 𑀣𑀤𑁆𑀥𑀮𑀽𑀔𑀫𑁆𑀳𑀺 𑀚𑀗𑁆𑀕𑀮𑁄.

𑁧𑁮𑁩. 𑀧𑀼𑀩𑁆𑀩𑀯𑀺𑀤𑁂𑀳𑁄 𑀘𑀸𑀧𑀭, 𑀕𑁄𑀬𑀸𑀦𑀁 𑀚𑀫𑁆𑀩𑀼𑀤𑀻𑀧𑁄 𑀘;

𑀉𑀢𑁆𑀢𑀭𑀓𑀼𑀭𑀼 𑀘𑁂𑀢𑀺 𑀲𑀺𑀬𑀼𑀁, 𑀘𑀢𑁆𑀢𑀸𑀭𑁄𑀫𑁂 𑀫𑀳𑀸𑀤𑀻𑀧𑀸.

𑁧𑁮𑁪. 𑀧𑀼𑀫𑁆𑀩𑀳𑀼𑀢𑁆𑀢𑁂 𑀓𑀼𑀭𑀽 𑀲𑀓𑁆𑀓𑀸, 𑀓𑁄𑀲𑀮𑀸 𑀫𑀕𑀥𑀸 𑀲𑀺𑀯𑀻;

𑀓𑀮𑀺𑀗𑁆𑀕𑀸’𑀯𑀦𑁆𑀢𑀺 𑀧𑀜𑁆𑀘𑀸𑀮𑀸, 𑀯𑀚𑁆𑀚𑀻 𑀕𑀦𑁆𑀥𑀸𑀭 𑀘𑁂𑀢𑀬𑁄.

𑁧𑁮𑁫. 𑀯𑀗𑁆𑀕𑀸 𑀯𑀺𑀤𑁂𑀳𑀸 𑀓𑀫𑁆𑀩𑁄𑀚𑀸, 𑀫𑀤𑁆𑀤𑀸 𑀪𑀕𑁆𑀕’𑀗𑁆𑀕 𑀲𑀻𑀳𑀴𑀸;

𑀓𑀲𑁆𑀫𑀻𑀭𑀸 𑀓𑀸𑀲𑀺 𑀧𑀡𑁆𑀟𑀯𑀸𑀤𑀻, 𑀲𑀺𑀬𑀼𑀁 𑀚𑀦𑀧𑀤𑀦𑁆𑀢𑀭𑀸.

𑁧𑁮𑁬. 𑀮𑁄𑀓𑁄 𑀘 𑀪𑀼𑀯𑀦𑀁 𑀯𑀼𑀢𑁆𑀢𑀁, 𑀤𑁂𑀲𑁄 𑀢𑀼 𑀯𑀺𑀲𑀬𑁄 𑀧𑁆𑀬𑀣;

𑀫𑀺𑀮𑀓𑁆𑀔𑀤𑁂𑀲𑁄 𑀧𑀘𑁆𑀘𑀦𑁆𑀢𑁄, 𑀫𑀚𑁆𑀛𑀤𑁂𑀲𑁄 𑀢𑀼 𑀫𑀚𑁆𑀛𑀺𑀫𑁄.

𑁧𑁮𑁭. 𑀅𑀦𑀽𑀧𑁄 𑀲𑀮𑀺𑀮𑀧𑁆𑀧𑀸𑀬𑁄, 𑀓𑀘𑁆𑀙𑀁 𑀧𑀼𑀫 𑀦𑀧𑀼𑀁𑀲𑀓𑁂;

𑀲𑀤𑁆𑀤𑀮𑁄 𑀳𑀭𑀺𑀢𑁂 𑀤𑁂𑀲𑁂, 𑀢𑀺𑀡𑁂𑀦𑀸, 𑀪𑀺𑀦𑀯𑁂𑀦 𑀳𑀺.

𑁧𑁮𑁮. 𑀦𑀤𑁆𑀬𑀫𑁆𑀩𑀼𑀚𑀻𑀯𑀦𑁄 𑀤𑁂𑀲𑁄, 𑀯𑀼𑀝𑁆𑀞𑀺𑀦𑀺𑀧𑁆𑀧𑀚𑁆𑀚𑀲𑀲𑁆𑀲𑀓𑁄;

𑀬𑁄 𑀦𑀤𑀻𑀫𑀸𑀢𑀺𑀓𑁄 𑀤𑁂𑀯,

𑀫𑀸𑀢𑀺𑀓𑁄 𑀘 𑀓𑀫𑁂𑀦 𑀲𑁄.

𑁧𑁮𑁯. 𑀢𑀻𑀲𑁆𑀯𑀦𑀽𑀧𑀸𑀤𑁆𑀬𑀣𑁄 𑀘𑀦𑁆𑀤, 𑀲𑀽𑀭𑀸𑀤𑁄 𑀲𑀲𑁆𑀲𑀢𑀻𑀭𑀺𑀢𑁄;

𑀭𑀝𑁆𑀞𑀁 𑀢𑀼 𑀯𑀺𑀚𑀺𑀢𑀜𑁆𑀘𑀸𑀣, 𑀧𑀼𑀭𑀺𑀲𑁂 𑀲𑁂𑀢𑀼 𑀆𑀮𑀺𑀬𑀁.

𑁧𑁯𑁦. 𑀉𑀧𑀸𑀦𑁆𑀢𑀪𑀽 𑀧𑀭𑀺𑀲𑀭𑁄, 𑀕𑁄𑀝𑁆𑀞𑀁 𑀢𑀼 𑀕𑁄𑀓𑀼𑀮𑀁 𑀯𑀚𑁄;

𑀫𑀕𑁆𑀕𑁄 𑀧𑀦𑁆𑀣𑁄 𑀧𑀣𑁄 𑀅𑀤𑁆𑀥𑀸, 𑀅𑀜𑁆𑀚𑀲𑀁 𑀯𑀝𑀼𑀫𑀁 𑀢𑀣𑀸.

𑁧𑁯𑁧. 𑀧𑀚𑁆𑀚𑁄 [𑀧𑀚𑁆𑀚𑀸…. (𑀓.)], 𑀬𑀦𑀜𑁆𑀘 𑀧𑀤𑀯𑀻, 𑀯𑀢𑁆𑀢𑀦𑀻 𑀧𑀤𑁆𑀥𑀢𑀺𑀢𑁆𑀣𑀺𑀬𑀁;

𑀢𑀩𑁆𑀪𑁂𑀤𑀸 𑀚𑀗𑁆𑀖, 𑀲𑀓𑀝, 𑀫𑀕𑁆𑀕𑀸 𑀢𑁂 𑀘 𑀫𑀳𑀤𑁆𑀥𑀦𑀺.

𑁧𑁯𑁨. 𑀏𑀓𑀧𑀤𑁆𑀬𑁂𑀓𑀧𑀤𑀺𑀓𑁂, 𑀓𑀦𑁆𑀢𑀸𑀭𑁄 𑀢𑀼 𑀘 𑀤𑀼𑀕𑁆𑀕𑀫𑁂;

𑁧𑁯𑁩. 𑀧𑀝𑀺𑀫𑀕𑁆𑀕𑁄 𑀧𑀝𑀺𑀧𑀣𑁄, 𑀅𑀤𑁆𑀥𑀸𑀦𑀁 𑀤𑀻𑀖 𑀫𑀜𑁆𑀚𑀲𑀁;

𑀲𑀼𑀧𑁆𑀧𑀣𑁄 𑀢𑀼 𑀲𑀼𑀧𑀦𑁆𑀣𑁄 𑀘, 𑀉𑀧𑁆𑀧𑀣𑀁 𑀢𑁆𑀯𑀧𑀣𑀁 𑀪𑀯𑁂.

𑁧𑁯𑁪. 𑀙𑀢𑁆𑀢𑀺𑀁𑀲𑀧𑀭𑀫𑀸𑀡𑀽𑀦, 𑀫𑁂𑀓𑁄 𑀡𑀼 𑀘 𑀙𑀢𑁆𑀢𑀺𑀁𑀲 𑀢𑁂;

𑀢𑀚𑁆𑀚𑀸𑀭𑀻 𑀢𑀸𑀧𑀺 𑀙𑀢𑁆𑀢𑀺𑀁𑀲, 𑀭𑀣𑀭𑁂𑀡𑀼 𑀙𑀢𑁆𑀢𑀺𑀁𑀲 𑀢𑁂.

𑁧𑁯𑁫. 𑀮𑀺𑀓𑁆𑀔𑀸𑀢𑀸 𑀲𑀢𑁆𑀢 𑀊𑀓𑀸 𑀢𑀸, 𑀥𑀜𑁆𑀜𑀫𑀸𑀲𑁄𑀢𑀺 𑀲𑀢𑁆𑀢 𑀢𑁂;

𑀲𑀢𑁆𑀢 𑀗𑁆𑀕𑀼𑀮’ 𑀫𑀫𑀼 𑀤𑁆𑀯𑀺𑀘𑁆𑀙, 𑀯𑀺𑀤𑀢𑁆𑀣𑀺 𑀢𑀸 𑀤𑀼𑀯𑁂 𑀲𑀺𑀬𑀼𑀁.

𑁧𑁯𑁬. 𑀭𑀢𑀦𑀁 𑀢𑀸𑀦𑀺 𑀲𑀢𑁆𑀢𑁂𑀯, 𑀬𑀝𑁆𑀞𑀺 𑀢𑀸 𑀯𑀻𑀲𑀢𑀽 𑀲𑀪𑀁;

𑀕𑀸𑀯𑀼𑀢 𑀫𑀼𑀲𑀪𑀸𑀲𑀻𑀢𑀺, 𑀬𑁄𑀚𑀦𑀁 𑀘𑀢𑀼𑀕𑀸𑀯𑀼𑀢𑀁.

𑁧𑁯𑁭. 𑀥𑀦𑀼𑀧𑀜𑁆𑀘𑀲𑀢𑀁 𑀓𑁄𑀲𑁄, 𑀓𑀭𑀻𑀲𑀁 𑀘𑀢𑀼𑀭𑀫𑁆𑀩𑀡𑀁;

𑀅𑀩𑁆𑀪𑀦𑁆𑀢𑀭𑀁 𑀢𑀼 𑀳𑀢𑁆𑀣𑀸𑀦, 𑀫𑀝𑁆𑀞𑀯𑀻𑀲 𑀧𑀫𑀸𑀡𑀢𑁄.

𑀪𑀽𑀫𑀺𑀯𑀕𑁆𑀕𑁄 𑀦𑀺𑀝𑁆𑀞𑀺𑀢𑁄.