𑁭. 𑀮𑁄𑀓𑀸𑀬𑀢𑀺𑀓𑀲𑀼𑀢𑁆𑀢𑀁

𑁩𑁮. 𑀅𑀣 𑀔𑁄 𑀤𑁆𑀯𑁂 𑀮𑁄𑀓𑀸𑀬𑀢𑀺𑀓𑀸 𑀩𑁆𑀭𑀸𑀳𑁆𑀫𑀡𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁𑀲𑀼. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀢𑁂 𑀩𑁆𑀭𑀸𑀳𑁆𑀫𑀡𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋

‘‘𑀧𑀽𑀭𑀡𑁄, 𑀪𑁄 𑀕𑁄𑀢𑀫, 𑀓𑀲𑁆𑀲𑀧𑁄 𑀲𑀩𑁆𑀩𑀜𑁆𑀜𑀽 𑀲𑀩𑁆𑀩𑀤𑀲𑁆𑀲𑀸𑀯𑀻 𑀅𑀧𑀭𑀺𑀲𑁂𑀲𑀁 𑀜𑀸𑀡𑀤𑀲𑁆𑀲𑀦𑀁 𑀧𑀝𑀺𑀚𑀸𑀦𑀸𑀢𑀺 𑁋 ‘𑀘𑀭𑀢𑁄 𑀘 𑀫𑁂 𑀢𑀺𑀝𑁆𑀞𑀢𑁄 𑀘 𑀲𑀼𑀢𑁆𑀢𑀲𑁆𑀲 𑀘 𑀚𑀸𑀕𑀭𑀲𑁆𑀲 𑀘 𑀲𑀢𑀢𑀁 𑀲𑀫𑀺𑀢𑀁 𑀜𑀸𑀡𑀤𑀲𑁆𑀲𑀦𑀁 𑀧𑀘𑁆𑀘𑀼𑀧𑀝𑁆𑀞𑀺𑀢’𑀦𑁆𑀢𑀺. 𑀲𑁄 𑀏𑀯𑀫𑀸𑀳 𑁋 ‘𑀅𑀳𑀁 𑀅𑀦𑀦𑁆𑀢𑁂𑀦 𑀜𑀸𑀡𑁂𑀦 𑀅𑀦𑀦𑁆𑀢𑀁 𑀮𑁄𑀓𑀁 𑀚𑀸𑀦𑀁 𑀧𑀲𑁆𑀲𑀁 𑀯𑀺𑀳𑀭𑀸𑀫𑀻’𑀢𑀺. 𑀅𑀬𑀫𑁆𑀧𑀺 [𑀅𑀬𑀫𑁆𑀧𑀺 𑀳𑀺 (𑀲𑁆𑀬𑀸. 𑀓.)], 𑀪𑁄 𑀕𑁄𑀢𑀫, 𑀦𑀺𑀕𑀡𑁆𑀞𑁄 𑀦𑀸𑀝𑀧𑀼𑀢𑁆𑀢𑁄 𑀲𑀩𑁆𑀩𑀜𑁆𑀜𑀽 𑀲𑀩𑁆𑀩𑀤𑀲𑁆𑀲𑀸𑀯𑀻 𑀅𑀧𑀭𑀺𑀲𑁂𑀲𑀁 𑀜𑀸𑀡𑀤𑀲𑁆𑀲𑀦𑀁 𑀧𑀝𑀺𑀚𑀸𑀦𑀸𑀢𑀺 𑁋 ‘𑀘𑀭𑀢𑁄 𑀘 𑀫𑁂 𑀢𑀺𑀝𑁆𑀞𑀢𑁄 𑀘 𑀲𑀼𑀢𑁆𑀢𑀲𑁆𑀲 𑀘 𑀚𑀸𑀕𑀭𑀲𑁆𑀲 𑀘 𑀲𑀢𑀢𑀁 𑀲𑀫𑀺𑀢𑀁 𑀜𑀸𑀡𑀤𑀲𑁆𑀲𑀦𑀁 𑀧𑀘𑁆𑀘𑀼𑀧𑀝𑁆𑀞𑀺𑀢’𑀦𑁆𑀢𑀺. 𑀲𑁄 [𑀲𑁄𑀧𑀺 (?)] 𑀏𑀯𑀫𑀸𑀳 𑁋 ‘𑀅𑀳𑀁 𑀅𑀦𑀦𑁆𑀢𑁂𑀦 𑀜𑀸𑀡𑁂𑀦 𑀅𑀦𑀦𑁆𑀢𑀁 𑀮𑁄𑀓𑀁 𑀚𑀸𑀦𑀁 𑀧𑀲𑁆𑀲𑀁 𑀯𑀺𑀳𑀭𑀸𑀫𑀻’𑀢𑀺. 𑀇𑀫𑁂𑀲𑀁, 𑀪𑁄 𑀕𑁄𑀢𑀫, 𑀉𑀪𑀺𑀦𑁆𑀦𑀁 𑀜𑀸𑀡𑀯𑀸𑀤𑀸𑀦𑀁 𑀉𑀪𑀺𑀦𑁆𑀦𑀁 𑀅𑀜𑁆𑀜𑀫𑀜𑁆𑀜𑀁 𑀯𑀺𑀧𑀘𑁆𑀘𑀦𑀻𑀓𑀯𑀸𑀤𑀸𑀦𑀁 𑀓𑁄 𑀲𑀘𑁆𑀘𑀁 𑀆𑀳 𑀓𑁄 𑀫𑀼𑀲𑀸’’𑀢𑀺?

‘‘𑀅𑀮𑀁, 𑀩𑁆𑀭𑀸𑀳𑁆𑀫𑀡𑀸! 𑀢𑀺𑀝𑁆𑀞𑀢𑁂𑀢𑀁 𑁋 ‘𑀇𑀫𑁂𑀲𑀁 𑀉𑀪𑀺𑀦𑁆𑀦𑀁 𑀜𑀸𑀡𑀯𑀸𑀤𑀸𑀦𑀁 𑀉𑀪𑀺𑀦𑁆𑀦𑀁 𑀅𑀜𑁆𑀜𑀫𑀜𑁆𑀜𑀁 𑀯𑀺𑀧𑀘𑁆𑀘𑀦𑀻𑀓𑀯𑀸𑀤𑀸𑀦𑀁 𑀓𑁄 𑀲𑀘𑁆𑀘𑀁 𑀆𑀳 𑀓𑁄 𑀫𑀼𑀲𑀸’𑀢𑀺. 𑀥𑀫𑁆𑀫𑀁 𑀯𑁄, 𑀩𑁆𑀭𑀸𑀳𑁆𑀫𑀡𑀸, 𑀤𑁂𑀲𑁂𑀲𑁆𑀲𑀸𑀫𑀺, 𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑁄’’𑀢𑀺 𑀔𑁄 𑀢𑁂 𑀩𑁆𑀭𑀸𑀳𑁆𑀫𑀡𑀸 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀲𑁂𑀬𑁆𑀬𑀣𑀸𑀧𑀺, 𑀩𑁆𑀭𑀸𑀳𑁆𑀫𑀡𑀸, 𑀘𑀢𑁆𑀢𑀸𑀭𑁄 𑀧𑀼𑀭𑀺𑀲𑀸 𑀘𑀢𑀼𑀤𑁆𑀤𑀺𑀲𑀸 𑀞𑀺𑀢𑀸 𑀧𑀭𑀫𑁂𑀦 𑀚𑀯𑁂𑀦 𑀘 𑀲𑀫𑀦𑁆𑀦𑀸𑀕𑀢𑀸 𑀧𑀭𑀫𑁂𑀦 𑀘 𑀧𑀤𑀯𑀻𑀢𑀺𑀳𑀸𑀭𑁂𑀦. 𑀢𑁂 𑀏𑀯𑀭𑀽𑀧𑁂𑀦 𑀚𑀯𑁂𑀦 𑀲𑀫𑀦𑁆𑀦𑀸𑀕𑀢𑀸 𑀅𑀲𑁆𑀲𑀼, 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀤𑀴𑁆𑀳𑀥𑀫𑁆𑀫𑀸 [𑀤𑀴𑁆𑀳𑀥𑀫𑁆𑀫𑁄 (𑀲𑀩𑁆𑀩𑀢𑁆𑀣) 𑀅. 𑀦𑀺. 𑁪.𑁪𑁫; 𑀫. 𑀦𑀺. 𑁧.𑁧𑁧𑁬 𑀘, 𑀢𑀁𑀲𑀁𑀯𑀡𑁆𑀡𑀦𑀸𑀝𑀻𑀓𑀸𑀬𑁄 𑀘 𑀫𑁄𑀕𑁆𑀕𑀮𑁆𑀮𑀸𑀦𑀩𑁆𑀬𑀸𑀓𑀭𑀡𑀜𑁆𑀘 𑀑𑀮𑁄𑀓𑁂𑀢𑀩𑁆𑀩𑀸] 𑀥𑀦𑀼𑀕𑁆𑀕𑀳𑁄 𑀲𑀺𑀓𑁆𑀔𑀺𑀢𑁄 𑀓𑀢𑀳𑀢𑁆𑀣𑁄 𑀓𑀢𑀽𑀧𑀸𑀲𑀦𑁄 𑀮𑀳𑀼𑀓𑁂𑀦 𑀅𑀲𑀦𑁂𑀦 𑀅𑀧𑁆𑀧𑀓𑀲𑀺𑀭𑁂𑀦 𑀢𑀺𑀭𑀺𑀬𑀁 𑀢𑀸𑀮𑀘𑁆𑀙𑀸𑀬𑀁 [𑀢𑀸𑀮𑀘𑁆𑀙𑀸𑀢𑀺𑀁 (𑀲𑀻. 𑀲𑁆𑀬𑀸. 𑀧𑀻.), 𑀢𑀸𑀮𑀘𑁆𑀙𑀸𑀤𑀺𑀁 (𑀓.) 𑀅. 𑀦𑀺. 𑁪.𑁪𑁫; 𑀫. 𑀦𑀺. 𑁧.𑁧𑁬𑁧 𑀧𑀲𑁆𑀲𑀺𑀢𑀩𑁆𑀩𑀁] 𑀅𑀢𑀺𑀧𑀸𑀢𑁂𑀬𑁆𑀬; 𑀏𑀯𑀭𑀽𑀧𑁂𑀦 𑀘 𑀧𑀤𑀯𑀻𑀢𑀺𑀳𑀸𑀭𑁂𑀦, 𑀲𑁂𑀬𑁆𑀬𑀣𑀸𑀧𑀺 𑀦𑀸𑀫 𑀧𑀼𑀭𑀢𑁆𑀣𑀺𑀫𑀸 𑀲𑀫𑀼𑀤𑁆𑀤𑀸 𑀧𑀘𑁆𑀙𑀺𑀫𑁄 𑀲𑀫𑀼𑀤𑁆𑀤𑁄 𑀅𑀣 𑀧𑀼𑀭𑀢𑁆𑀣𑀺𑀫𑀸𑀬 𑀤𑀺𑀲𑀸𑀬 𑀞𑀺𑀢𑁄 𑀧𑀼𑀭𑀺𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀅𑀳𑀁 𑀕𑀫𑀦𑁂𑀦 𑀮𑁄𑀓𑀲𑁆𑀲 𑀅𑀦𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀸𑀫𑀻’𑀢𑀺. 𑀲𑁄 𑀅𑀜𑁆𑀜𑀢𑁆𑀭𑁂𑀯 𑀅𑀲𑀺𑀢𑀧𑀻𑀢𑀔𑀸𑀬𑀺𑀢𑀲𑀸𑀬𑀺𑀢𑀸 𑀅𑀜𑁆𑀜𑀢𑁆𑀭 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀓𑀫𑁆𑀫𑀸 𑀅𑀜𑁆𑀜𑀢𑁆𑀭 𑀦𑀺𑀤𑁆𑀤𑀸𑀓𑀺𑀮𑀫𑀣𑀧𑀝𑀺𑀯𑀺𑀦𑁄𑀤𑀦𑀸 𑀯𑀲𑁆𑀲𑀲𑀢𑀸𑀬𑀼𑀓𑁄 𑀯𑀲𑁆𑀲𑀲𑀢𑀚𑀻𑀯𑀻 𑀯𑀲𑁆𑀲𑀲𑀢𑀁 𑀕𑀦𑁆𑀢𑁆𑀯𑀸 𑀅𑀧𑁆𑀧𑀢𑁆𑀯𑀸𑀯 𑀮𑁄𑀓𑀲𑁆𑀲 𑀅𑀦𑁆𑀢𑀁 𑀅𑀦𑁆𑀢𑀭𑀸 𑀓𑀸𑀮𑀁 𑀓𑀭𑁂𑀬𑁆𑀬. 𑀅𑀣 𑀧𑀘𑁆𑀙𑀺𑀫𑀸𑀬 𑀤𑀺𑀲𑀸𑀬…𑀧𑁂… 𑀅𑀣 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬… 𑀅𑀣 𑀤𑀓𑁆𑀔𑀺𑀡𑀸𑀬 𑀤𑀺𑀲𑀸𑀬 𑀞𑀺𑀢𑁄 𑀧𑀼𑀭𑀺𑀲𑁄 𑀏𑀯𑀁 𑀯𑀤𑁂𑀬𑁆𑀬 𑁋 ‘𑀅𑀳𑀁 𑀕𑀫𑀦𑁂𑀦 𑀮𑁄𑀓𑀲𑁆𑀲 𑀅𑀦𑁆𑀢𑀁 𑀧𑀸𑀧𑀼𑀡𑀺𑀲𑁆𑀲𑀸𑀫𑀻’𑀢𑀺. 𑀲𑁄 𑀅𑀜𑁆𑀜𑀢𑁆𑀭𑁂𑀯 𑀅𑀲𑀺𑀢𑀧𑀻𑀢𑀔𑀸𑀬𑀺𑀢𑀲𑀸𑀬𑀺𑀢𑀸 𑀅𑀜𑁆𑀜𑀢𑁆𑀭 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀓𑀫𑁆𑀫𑀸 𑀅𑀜𑁆𑀜𑀢𑁆𑀭 𑀦𑀺𑀤𑁆𑀤𑀸𑀓𑀺𑀮𑀫𑀣𑀧𑀝𑀺𑀯𑀺𑀦𑁄𑀤𑀦𑀸 𑀯𑀲𑁆𑀲𑀲𑀢𑀸𑀬𑀼𑀓𑁄 𑀯𑀲𑁆𑀲𑀲𑀢𑀚𑀻𑀯𑀻 𑀯𑀲𑁆𑀲𑀲𑀢𑀁 𑀕𑀦𑁆𑀢𑁆𑀯𑀸 𑀅𑀧𑁆𑀧𑀢𑁆𑀯𑀸𑀯 𑀮𑁄𑀓𑀲𑁆𑀲 𑀅𑀦𑁆𑀢𑀁 𑀅𑀦𑁆𑀢𑀭𑀸 𑀓𑀸𑀮𑀁 𑀓𑀭𑁂𑀬𑁆𑀬. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀦𑀸𑀳𑀁, 𑀩𑁆𑀭𑀸𑀳𑁆𑀫𑀡𑀸, 𑀏𑀯𑀭𑀽𑀧𑀸𑀬 𑀲𑀦𑁆𑀥𑀸𑀯𑀦𑀺𑀓𑀸𑀬 𑀮𑁄𑀓𑀲𑁆𑀲 𑀅𑀦𑁆𑀢𑀁 𑀜𑀸𑀢𑁂𑀬𑁆𑀬𑀁 𑀤𑀝𑁆𑀞𑁂𑀬𑁆𑀬𑀁 𑀧𑀢𑁆𑀢𑁂𑀬𑁆𑀬𑀦𑁆𑀢𑀺 𑀯𑀤𑀸𑀫𑀺. 𑀦 𑀘𑀸𑀳𑀁, 𑀩𑁆𑀭𑀸𑀳𑁆𑀫𑀡𑀸, 𑀅𑀧𑁆𑀧𑀢𑁆𑀯𑀸𑀯 𑀮𑁄𑀓𑀲𑁆𑀲 𑀅𑀦𑁆𑀢𑀁 𑀤𑀼𑀓𑁆𑀔𑀲𑁆𑀲 𑀅𑀦𑁆𑀢𑀓𑀺𑀭𑀺𑀬𑀁 𑀯𑀤𑀸𑀫𑀺.

‘‘𑀧𑀜𑁆𑀘𑀺𑀫𑁂, 𑀩𑁆𑀭𑀸𑀳𑁆𑀫𑀡𑀸, 𑀓𑀸𑀫𑀕𑀼𑀡𑀸 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀮𑁄𑀓𑁄𑀢𑀺 𑀯𑀼𑀘𑁆𑀘𑀢𑀺. 𑀓𑀢𑀫𑁂 𑀧𑀜𑁆𑀘? 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸 𑀭𑀽𑀧𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸; 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸 𑀲𑀤𑁆𑀤𑀸…𑀧𑁂… 𑀖𑀸𑀦𑀯𑀺𑀜𑁆𑀜𑁂𑀬𑁆𑀬𑀸 𑀕𑀦𑁆𑀥𑀸… 𑀚𑀺𑀯𑁆𑀳𑀸𑀯𑀺𑀜𑁆𑀜𑁂𑀬𑁆𑀬𑀸 𑀭𑀲𑀸… 𑀓𑀸𑀬𑀯𑀺𑀜𑁆𑀜𑁂𑀬𑁆𑀬𑀸 𑀨𑁄𑀝𑁆𑀞𑀩𑁆𑀩𑀸 𑀇𑀝𑁆𑀞𑀸 𑀓𑀦𑁆𑀢𑀸 𑀫𑀦𑀸𑀧𑀸 𑀧𑀺𑀬𑀭𑀽𑀧𑀸 𑀓𑀸𑀫𑀽𑀧𑀲𑀁𑀳𑀺𑀢𑀸 𑀭𑀚𑀦𑀻𑀬𑀸; 𑀇𑀫𑁂 𑀔𑁄, 𑀩𑁆𑀭𑀸𑀳𑁆𑀫𑀡𑀸, 𑀧𑀜𑁆𑀘 𑀓𑀸𑀫𑀕𑀼𑀡𑀸 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀮𑁄𑀓𑁄𑀢𑀺 𑀯𑀼𑀘𑁆𑀘𑀢𑀺.

‘‘𑀇𑀥, 𑀩𑁆𑀭𑀸𑀳𑁆𑀫𑀡𑀸, 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀩𑁆𑀭𑀸𑀳𑁆𑀫𑀡𑀸, ‘𑀪𑀺𑀓𑁆𑀔𑀼 𑀮𑁄𑀓𑀲𑁆𑀲 𑀅𑀦𑁆𑀢𑀫𑀸𑀕𑀫𑁆𑀫, 𑀮𑁄𑀓𑀲𑁆𑀲 𑀅𑀦𑁆𑀢𑁂 𑀯𑀺𑀳𑀭𑀢𑀺’. 𑀢𑀫𑀜𑁆𑀜𑁂 𑀏𑀯𑀫𑀸𑀳𑀁𑀲𑀼 𑁋 ‘𑀅𑀬𑀫𑁆𑀧𑀺 𑀮𑁄𑀓𑀧𑀭𑀺𑀬𑀸𑀧𑀦𑁆𑀦𑁄, 𑀅𑀬𑀫𑁆𑀧𑀺 𑀅𑀦𑀺𑀲𑁆𑀲𑀝𑁄 𑀮𑁄𑀓𑀫𑁆𑀳𑀸’𑀢𑀺. 𑀅𑀳𑀫𑁆𑀧𑀺 𑀳𑀺 [𑀅𑀳𑀫𑁆𑀧𑀺 (𑀲𑀻. 𑀧𑀻.)], 𑀩𑁆𑀭𑀸𑀳𑁆𑀫𑀡𑀸, 𑀏𑀯𑀁 𑀯𑀤𑀸𑀫𑀺 𑁋 ‘𑀅𑀬𑀫𑁆𑀧𑀺 𑀮𑁄𑀓𑀧𑀭𑀺𑀬𑀸𑀧𑀦𑁆𑀦𑁄, 𑀅𑀬𑀫𑁆𑀧𑀺 𑀅𑀦𑀺𑀲𑁆𑀲𑀝𑁄 𑀮𑁄𑀓𑀫𑁆𑀳𑀸’’’𑀢𑀺.

‘‘𑀧𑀼𑀦 𑀘𑀧𑀭𑀁, 𑀩𑁆𑀭𑀸𑀳𑁆𑀫𑀡𑀸, 𑀪𑀺𑀓𑁆𑀔𑀼 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸…𑀧𑁂… 𑀤𑀼𑀢𑀺𑀬𑀁 𑀛𑀸𑀦𑀁… 𑀢𑀢𑀺𑀬𑀁 𑀛𑀸𑀦𑀁… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀩𑁆𑀭𑀸𑀳𑁆𑀫𑀡𑀸, ‘𑀪𑀺𑀓𑁆𑀔𑀼 𑀮𑁄𑀓𑀲𑁆𑀲 𑀅𑀦𑁆𑀢𑀫𑀸𑀕𑀫𑁆𑀫 𑀮𑁄𑀓𑀲𑁆𑀲 𑀅𑀦𑁆𑀢𑁂 𑀯𑀺𑀳𑀭𑀢𑀺’. 𑀢𑀫𑀜𑁆𑀜𑁂 𑀏𑀯𑀫𑀸𑀳𑀁𑀲𑀼 𑁋 ‘𑀅𑀬𑀫𑁆𑀧𑀺 𑀮𑁄𑀓𑀧𑀭𑀺𑀬𑀸𑀧𑀦𑁆𑀦𑁄, 𑀅𑀬𑀫𑁆𑀧𑀺 𑀅𑀦𑀺𑀲𑁆𑀲𑀝𑁄 𑀮𑁄𑀓𑀫𑁆𑀳𑀸’𑀢𑀺. 𑀅𑀳𑀫𑁆𑀧𑀺 𑀳𑀺, 𑀩𑁆𑀭𑀸𑀳𑁆𑀫𑀡𑀸, 𑀏𑀯𑀁 𑀯𑀤𑀸𑀫𑀺 𑁋 ‘𑀅𑀬𑀫𑁆𑀧𑀺 𑀮𑁄𑀓𑀧𑀭𑀺𑀬𑀸𑀧𑀦𑁆𑀦𑁄, 𑀅𑀬𑀫𑁆𑀧𑀺 𑀅𑀦𑀺𑀲𑁆𑀲𑀝𑁄 𑀮𑁄𑀓𑀫𑁆𑀳𑀸’’’𑀢𑀺.

‘‘𑀧𑀼𑀦 𑀘𑀧𑀭𑀁, 𑀩𑁆𑀭𑀸𑀳𑁆𑀫𑀡𑀸, 𑀪𑀺𑀓𑁆𑀔𑀼 𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸 𑀧𑀝𑀺𑀖𑀲𑀜𑁆𑀜𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 ‘𑀅𑀦𑀦𑁆𑀢𑁄 𑀆𑀓𑀸𑀲𑁄’𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀩𑁆𑀭𑀸𑀳𑁆𑀫𑀡𑀸, ‘𑀪𑀺𑀓𑁆𑀔𑀼 𑀮𑁄𑀓𑀲𑁆𑀲 𑀅𑀦𑁆𑀢𑀫𑀸𑀕𑀫𑁆𑀫 𑀮𑁄𑀓𑀲𑁆𑀲 𑀅𑀦𑁆𑀢𑁂 𑀯𑀺𑀳𑀭𑀢𑀺’. 𑀢𑀫𑀜𑁆𑀜𑁂 𑀏𑀯𑀫𑀸𑀳𑀁𑀲𑀼 𑁋 ‘𑀅𑀬𑀫𑁆𑀧𑀺 𑀮𑁄𑀓𑀧𑀭𑀺𑀬𑀸𑀧𑀦𑁆𑀦𑁄, 𑀅𑀬𑀫𑁆𑀧𑀺 𑀅𑀦𑀺𑀲𑁆𑀲𑀝𑁄 𑀮𑁄𑀓𑀫𑁆𑀳𑀸’𑀢𑀺. 𑀅𑀳𑀫𑁆𑀧𑀺 𑀳𑀺, 𑀩𑁆𑀭𑀸𑀳𑁆𑀫𑀡𑀸, 𑀏𑀯𑀁 𑀯𑀤𑀸𑀫𑀺 𑁋 ‘𑀅𑀬𑀫𑁆𑀧𑀺 𑀮𑁄𑀓𑀧𑀭𑀺𑀬𑀸𑀧𑀦𑁆𑀦𑁄, 𑀅𑀬𑀫𑁆𑀧𑀺 𑀅𑀦𑀺𑀲𑁆𑀲𑀝𑁄 𑀮𑁄𑀓𑀫𑁆𑀳𑀸’’’𑀢𑀺.

‘‘𑀧𑀼𑀦 𑀘𑀧𑀭𑀁, 𑀩𑁆𑀭𑀸𑀳𑁆𑀫𑀡𑀸, 𑀪𑀺𑀓𑁆𑀔𑀼 𑀲𑀩𑁆𑀩𑀲𑁄 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 ‘𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡’𑀦𑁆𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺…𑀧𑁂… 𑀲𑀩𑁆𑀩𑀲𑁄 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 ‘𑀦𑀢𑁆𑀣𑀺 𑀓𑀺𑀜𑁆𑀘𑀻’𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺…𑀧𑁂… 𑀲𑀩𑁆𑀩𑀲𑁄 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀩𑁆𑀭𑀸𑀳𑁆𑀫𑀡𑀸, ‘𑀪𑀺𑀓𑁆𑀔𑀼 𑀮𑁄𑀓𑀲𑁆𑀲 𑀅𑀦𑁆𑀢𑀫𑀸𑀕𑀫𑁆𑀫 𑀮𑁄𑀓𑀲𑁆𑀲 𑀅𑀦𑁆𑀢𑁂 𑀯𑀺𑀳𑀭𑀢𑀺’. 𑀢𑀫𑀜𑁆𑀜𑁂 𑀏𑀯𑀫𑀸𑀳𑀁𑀲𑀼 𑁋 ‘𑀅𑀬𑀫𑁆𑀧𑀺 𑀮𑁄𑀓𑀧𑀭𑀺𑀬𑀸𑀧𑀦𑁆𑀦𑁄, 𑀅𑀬𑀫𑁆𑀧𑀺 𑀅𑀦𑀺𑀲𑁆𑀲𑀝𑁄 𑀮𑁄𑀓𑀫𑁆𑀳𑀸’𑀢𑀺. 𑀅𑀳𑀫𑁆𑀧𑀺 𑀳𑀺, 𑀩𑁆𑀭𑀸𑀳𑁆𑀫𑀡𑀸, 𑀏𑀯𑀁 𑀯𑀤𑀸𑀫𑀺 𑁋 ‘𑀅𑀬𑀫𑁆𑀧𑀺 𑀮𑁄𑀓𑀧𑀭𑀺𑀬𑀸𑀧𑀦𑁆𑀦𑁄, 𑀅𑀬𑀫𑁆𑀧𑀺 𑀅𑀦𑀺𑀲𑁆𑀲𑀝𑁄 𑀮𑁄𑀓𑀫𑁆𑀳𑀸’’’𑀢𑀺.

‘‘𑀧𑀼𑀦 𑀘𑀧𑀭𑀁, 𑀩𑁆𑀭𑀸𑀳𑁆𑀫𑀡𑀸, 𑀪𑀺𑀓𑁆𑀔𑀼 𑀲𑀩𑁆𑀩𑀲𑁄 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀩𑁆𑀭𑀸𑀳𑁆𑀫𑀡𑀸, ‘𑀪𑀺𑀓𑁆𑀔𑀼 𑀮𑁄𑀓𑀲𑁆𑀲 𑀅𑀦𑁆𑀢𑀫𑀸𑀕𑀫𑁆𑀫 𑀮𑁄𑀓𑀲𑁆𑀲 𑀅𑀦𑁆𑀢𑁂 𑀯𑀺𑀳𑀭𑀢𑀺 𑀢𑀺𑀡𑁆𑀡𑁄 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓’’’𑀦𑁆𑀢𑀺. 𑀲𑀢𑁆𑀢𑀫𑀁.