𑁮. 𑀤𑁂𑀯𑀸𑀲𑀼𑀭𑀲𑀗𑁆𑀕𑀸𑀫𑀲𑀼𑀢𑁆𑀢𑀁

𑁩𑁯. ‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀤𑁂𑀯𑀸𑀲𑀼𑀭𑀲𑀗𑁆𑀕𑀸𑀫𑁄 𑀲𑀫𑀼𑀧𑀩𑁆𑀬𑀽𑀴𑁆𑀳𑁄 [𑀲𑀫𑀼𑀧𑀩𑁆𑀩𑀽𑀴𑁆𑀳𑁄 (𑀲𑀻. 𑀧𑀻.)] 𑀅𑀳𑁄𑀲𑀺. 𑀢𑀲𑁆𑀫𑀺𑀁 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀗𑁆𑀕𑀸𑀫𑁂 𑀅𑀲𑀼𑀭𑀸 𑀚𑀺𑀦𑀺𑀁𑀲𑀼, 𑀤𑁂𑀯𑀸 𑀧𑀭𑀸𑀚𑀬𑀺𑀁𑀲𑀼 [𑀧𑀭𑀸𑀚𑀺𑀬𑀺𑀁𑀲𑀼 (𑀲𑀻. 𑀲𑁆𑀬𑀸. 𑀓.)]. 𑀧𑀭𑀸𑀚𑀺𑀢𑀸 𑀘, 𑀪𑀺𑀓𑁆𑀔𑀯𑁂, 𑀤𑁂𑀯𑀸 [𑀤𑁂𑀯𑀸 𑀪𑀻𑀢𑀸 (𑀧𑀻.)] 𑀅𑀧𑀬𑀺𑀁𑀲𑀼𑀬𑁂𑀯 [𑀅𑀧𑀬𑀁𑀲𑁆𑀯𑁂𑀯 (𑀲𑀻.)] 𑀉𑀢𑁆𑀢𑀭𑁂𑀦𑀸𑀪𑀺𑀫𑀼𑀔𑀸, 𑀅𑀪𑀺𑀬𑀺𑀁𑀲𑀼 [𑀅𑀪𑀺𑀬𑀁𑀲𑀼 (𑀲𑀻.)] 𑀅𑀲𑀼𑀭𑀸. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀤𑁂𑀯𑀸𑀦𑀁 𑀏𑀢𑀤𑀳𑁄𑀲𑀺 𑁋 ‘𑀅𑀪𑀺𑀬𑀦𑁆𑀢𑁂𑀯 𑀔𑁄 𑀅𑀲𑀼𑀭𑀸. 𑀬𑀁𑀦𑀽𑀦 𑀫𑀬𑀁 𑀤𑀼𑀢𑀺𑀬𑀫𑁆𑀧𑀺 𑀅𑀲𑀼𑀭𑁂𑀳𑀺 𑀲𑀗𑁆𑀕𑀸𑀫𑁂𑀬𑁆𑀬𑀸𑀫𑀸’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑁂𑀯𑀸 𑀅𑀲𑀼𑀭𑁂𑀳𑀺 𑀲𑀗𑁆𑀕𑀸𑀫𑁂𑀲𑀼𑀁. 𑀤𑀼𑀢𑀺𑀬𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀲𑀼𑀭𑀸𑀯 𑀚𑀺𑀦𑀺𑀁𑀲𑀼, 𑀤𑁂𑀯𑀸 𑀧𑀭𑀸𑀚𑀬𑀺𑀁𑀲𑀼. 𑀧𑀭𑀸𑀚𑀺𑀢𑀸 𑀘, 𑀪𑀺𑀓𑁆𑀔𑀯𑁂, 𑀤𑁂𑀯𑀸 𑀅𑀧𑀬𑀺𑀁𑀲𑀼𑀬𑁂𑀯 𑀉𑀢𑁆𑀢𑀭𑁂𑀦𑀸𑀪𑀺𑀫𑀼𑀔𑀸, 𑀅𑀪𑀺𑀬𑀺𑀁𑀲𑀼 𑀅𑀲𑀼𑀭𑀸’’.

𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀤𑁂𑀯𑀸𑀦𑀁 𑀏𑀢𑀤𑀳𑁄𑀲𑀺 𑁋 ‘𑀅𑀪𑀺𑀬𑀦𑁆𑀢𑁂𑀯 𑀔𑁄 𑀅𑀲𑀼𑀭𑀸. 𑀬𑀁𑀦𑀽𑀦 𑀫𑀬𑀁 𑀢𑀢𑀺𑀬𑀫𑁆𑀧𑀺 𑀅𑀲𑀼𑀭𑁂𑀳𑀺 𑀲𑀗𑁆𑀕𑀸𑀫𑁂𑀬𑁆𑀬𑀸𑀫𑀸’𑀢𑀺. 𑀢𑀢𑀺𑀬𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑁂𑀯𑀸 𑀅𑀲𑀼𑀭𑁂𑀳𑀺 𑀲𑀗𑁆𑀕𑀸𑀫𑁂𑀲𑀼𑀁. 𑀢𑀢𑀺𑀬𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀲𑀼𑀭𑀸𑀯 𑀚𑀺𑀦𑀺𑀁𑀲𑀼, 𑀤𑁂𑀯𑀸 𑀧𑀭𑀸𑀚𑀬𑀺𑀁𑀲𑀼. 𑀧𑀭𑀸𑀚𑀺𑀢𑀸 𑀘, 𑀪𑀺𑀓𑁆𑀔𑀯𑁂, 𑀤𑁂𑀯𑀸 𑀪𑀻𑀢𑀸 𑀤𑁂𑀯𑀧𑀼𑀭𑀁𑀬𑁂𑀯 𑀧𑀯𑀺𑀲𑀺𑀁𑀲𑀼. 𑀤𑁂𑀯𑀧𑀼𑀭𑀕𑀢𑀸𑀦𑀜𑁆𑀘 𑀧𑀦 [𑀧𑀼𑀦 (𑀓.)], 𑀪𑀺𑀓𑁆𑀔𑀯𑁂, 𑀤𑁂𑀯𑀸𑀦𑀁 𑀏𑀢𑀤𑀳𑁄𑀲𑀺 𑁋 ‘𑀪𑀻𑀭𑀼𑀢𑁆𑀢𑀸𑀦𑀕𑀢𑁂𑀦 𑀔𑁄 𑀤𑀸𑀦𑀺 𑀫𑀬𑀁 𑀏𑀢𑀭𑀳𑀺 𑀅𑀢𑁆𑀢𑀦𑀸 𑀯𑀺𑀳𑀭𑀸𑀫 𑀅𑀓𑀭𑀡𑀻𑀬𑀸 𑀅𑀲𑀼𑀭𑁂𑀳𑀻’𑀢𑀺. 𑀅𑀲𑀼𑀭𑀸𑀦𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀏𑀢𑀤𑀳𑁄𑀲𑀺 𑁋 ‘𑀪𑀻𑀭𑀼𑀢𑁆𑀢𑀸𑀦𑀕𑀢𑁂𑀦 𑀔𑁄 𑀤𑀸𑀦𑀺 𑀤𑁂𑀯𑀸 𑀏𑀢𑀭𑀳𑀺 𑀅𑀢𑁆𑀢𑀦𑀸 𑀯𑀺𑀳𑀭𑀦𑁆𑀢𑀺 𑀅𑀓𑀭𑀡𑀻𑀬𑀸 𑀅𑀫𑁆𑀳𑁂𑀳𑀻’𑀢𑀺.

‘‘𑀪𑀽𑀢𑀧𑀼𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀤𑁂𑀯𑀸𑀲𑀼𑀭𑀲𑀗𑁆𑀕𑀸𑀫𑁄 𑀲𑀫𑀼𑀧𑀩𑁆𑀬𑀽𑀴𑁆𑀳𑁄 𑀅𑀳𑁄𑀲𑀺. 𑀢𑀲𑁆𑀫𑀺𑀁 𑀔𑁄 𑀧𑀦, 𑀪𑀺𑀓𑁆𑀔𑀯𑁂, 𑀲𑀗𑁆𑀕𑀸𑀫𑁂 𑀤𑁂𑀯𑀸 𑀚𑀺𑀦𑀺𑀁𑀲𑀼, 𑀅𑀲𑀼𑀭𑀸 𑀧𑀭𑀸𑀚𑀬𑀺𑀁𑀲𑀼. 𑀧𑀭𑀸𑀚𑀺𑀢𑀸 𑀘, 𑀪𑀺𑀓𑁆𑀔𑀯𑁂, 𑀅𑀲𑀼𑀭𑀸 𑀅𑀧𑀬𑀺𑀁𑀲𑀼𑀬𑁂𑀯 𑀤𑀓𑁆𑀔𑀺𑀡𑁂𑀦𑀸𑀪𑀺𑀫𑀼𑀔𑀸, 𑀅𑀪𑀺𑀬𑀺𑀁𑀲𑀼 𑀤𑁂𑀯𑀸. 𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀅𑀲𑀼𑀭𑀸𑀦𑀁 𑀏𑀢𑀤𑀳𑁄𑀲𑀺 𑁋 ‘𑀅𑀪𑀺𑀬𑀦𑁆𑀢𑁂𑀯 𑀔𑁄 𑀤𑁂𑀯𑀸. 𑀬𑀁𑀦𑀽𑀦 𑀫𑀬𑀁 𑀤𑀼𑀢𑀺𑀬𑀫𑁆𑀧𑀺 𑀤𑁂𑀯𑁂𑀳𑀺 𑀲𑀗𑁆𑀕𑀸𑀫𑁂𑀬𑁆𑀬𑀸𑀫𑀸’𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀲𑀼𑀭𑀸 𑀤𑁂𑀯𑁂𑀳𑀺 𑀲𑀗𑁆𑀕𑀸𑀫𑁂𑀲𑀼𑀁. 𑀤𑀼𑀢𑀺𑀬𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑁂𑀯𑀸 𑀚𑀺𑀦𑀺𑀁𑀲𑀼, 𑀅𑀲𑀼𑀭𑀸 𑀧𑀭𑀸𑀚𑀬𑀺𑀁𑀲𑀼. 𑀧𑀭𑀸𑀚𑀺𑀢𑀸 𑀘, 𑀪𑀺𑀓𑁆𑀔𑀯𑁂, 𑀅𑀲𑀼𑀭𑀸 𑀅𑀧𑀬𑀺𑀁𑀲𑀼𑀬𑁂𑀯 𑀤𑀓𑁆𑀔𑀺𑀡𑁂𑀦𑀸𑀪𑀺𑀫𑀼𑀔𑀸, 𑀅𑀪𑀺𑀬𑀺𑀁𑀲𑀼 𑀤𑁂𑀯𑀸’’.

𑀅𑀣 𑀔𑁄, 𑀪𑀺𑀓𑁆𑀔𑀯𑁂, 𑀅𑀲𑀼𑀭𑀸𑀦𑀁 𑀏𑀢𑀤𑀳𑁄𑀲𑀺 𑁋 ‘𑀅𑀪𑀺𑀬𑀦𑁆𑀢𑁂𑀯 𑀔𑁄 𑀤𑁂𑀯𑀸. 𑀬𑀁𑀦𑀽𑀦 𑀫𑀬𑀁 𑀢𑀢𑀺𑀬𑀫𑁆𑀧𑀺 𑀤𑁂𑀯𑁂𑀳𑀺 𑀲𑀗𑁆𑀕𑀸𑀫𑁂𑀬𑁆𑀬𑀸𑀫𑀸’𑀢𑀺. 𑀢𑀢𑀺𑀬𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀲𑀼𑀭𑀸 𑀤𑁂𑀯𑁂𑀳𑀺 𑀲𑀗𑁆𑀕𑀸𑀫𑁂𑀲𑀼𑀁. 𑀢𑀢𑀺𑀬𑀫𑁆𑀧𑀺 𑀔𑁄, 𑀪𑀺𑀓𑁆𑀔𑀯𑁂, 𑀤𑁂𑀯𑀸 𑀚𑀺𑀦𑀺𑀁𑀲𑀼, 𑀅𑀲𑀼𑀭𑀸 𑀧𑀭𑀸𑀚𑀬𑀺𑀁𑀲𑀼. 𑀧𑀭𑀸𑀚𑀺𑀢𑀸 𑀘, 𑀪𑀺𑀓𑁆𑀔𑀯𑁂, 𑀅𑀲𑀼𑀭𑀸 𑀪𑀻𑀢𑀸 𑀅𑀲𑀼𑀭𑀧𑀼𑀭𑀁𑀬𑁂𑀯 𑀧𑀯𑀺𑀲𑀺𑀁𑀲𑀼. 𑀅𑀲𑀼𑀭𑀧𑀼𑀭𑀕𑀢𑀸𑀦𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀅𑀲𑀼𑀭𑀸𑀦𑀁 𑀏𑀢𑀤𑀳𑁄𑀲𑀺 𑁋 ‘𑀪𑀻𑀭𑀼𑀢𑁆𑀢𑀸𑀦𑀕𑀢𑁂𑀦 𑀔𑁄 𑀤𑀸𑀦𑀺 𑀫𑀬𑀁 𑀏𑀢𑀭𑀳𑀺 𑀅𑀢𑁆𑀢𑀦𑀸 𑀯𑀺𑀳𑀭𑀸𑀫 𑀅𑀓𑀭𑀡𑀻𑀬𑀸 𑀤𑁂𑀯𑁂𑀳𑀻’𑀢𑀺. 𑀤𑁂𑀯𑀸𑀦𑀫𑁆𑀧𑀺, 𑀪𑀺𑀓𑁆𑀔𑀯𑁂, 𑀏𑀢𑀤𑀳𑁄𑀲𑀺 𑁋 ‘𑀪𑀻𑀭𑀼𑀢𑁆𑀢𑀸𑀦𑀕𑀢𑁂𑀦 𑀔𑁄 𑀤𑀸𑀦𑀺 𑀅𑀲𑀼𑀭𑀸 𑀏𑀢𑀭𑀳𑀺 𑀅𑀢𑁆𑀢𑀦𑀸 𑀯𑀺𑀳𑀭𑀦𑁆𑀢𑀺 𑀅𑀓𑀭𑀡𑀻𑀬𑀸 𑀅𑀫𑁆𑀳𑁂𑀳𑀻’𑀢𑀺.

‘‘𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀬𑀲𑁆𑀫𑀺𑀁 𑀲𑀫𑀬𑁂 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀢𑀲𑁆𑀫𑀺𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀪𑀺𑀓𑁆𑀔𑀼𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀪𑀻𑀭𑀼𑀢𑁆𑀢𑀸𑀦𑀕𑀢𑁂𑀦 𑀔𑁄 𑀤𑀸𑀦𑀸𑀳𑀁 𑀏𑀢𑀭𑀳𑀺 𑀅𑀢𑁆𑀢𑀦𑀸 𑀯𑀺𑀳𑀭𑀸𑀫𑀺 𑀅𑀓𑀭𑀡𑀻𑀬𑁄 𑀫𑀸𑀭𑀲𑁆𑀲𑀸’𑀢𑀺. 𑀫𑀸𑀭𑀲𑁆𑀲𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀸𑀧𑀺𑀫𑀢𑁄 𑀏𑀯𑀁 𑀳𑁄𑀢𑀺 𑁋 ‘𑀪𑀻𑀭𑀼𑀢𑁆𑀢𑀸𑀦𑀕𑀢𑁂𑀦 𑀔𑁄 𑀤𑀸𑀦𑀺 𑀪𑀺𑀓𑁆𑀔𑀼 𑀏𑀢𑀭𑀳𑀺 𑀅𑀢𑁆𑀢𑀦𑀸 𑀯𑀺𑀳𑀭𑀢𑀺 𑀅𑀓𑀭𑀡𑀻𑀬𑁄 𑀫𑀬𑁆𑀳’’’𑀦𑁆𑀢𑀺.

‘‘𑀬𑀲𑁆𑀫𑀺𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀪𑀺𑀓𑁆𑀔𑀼 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸…𑀧𑁂… 𑀤𑀼𑀢𑀺𑀬𑀁 𑀛𑀸𑀦𑀁… 𑀢𑀢𑀺𑀬𑀁 𑀛𑀸𑀦𑀁… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀢𑀲𑁆𑀫𑀺𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀪𑀺𑀓𑁆𑀔𑀼𑀲𑁆𑀲 𑀏𑀯𑀁 𑀳𑁄𑀢𑀺 𑁋 ‘𑀪𑀻𑀭𑀼𑀢𑁆𑀢𑀸𑀦𑀕𑀢𑁂𑀦 𑀔𑁄 𑀤𑀸𑀦𑀸𑀳𑀁 𑀏𑀢𑀭𑀳𑀺 𑀅𑀢𑁆𑀢𑀦𑀸 𑀯𑀺𑀳𑀭𑀸𑀫𑀺 𑀅𑀓𑀭𑀡𑀻𑀬𑁄 𑀫𑀸𑀭𑀲𑁆𑀲𑀸’𑀢𑀺. 𑀫𑀸𑀭𑀲𑁆𑀲𑀸𑀧𑀺, 𑀪𑀺𑀓𑁆𑀔𑀯𑁂, 𑀧𑀸𑀧𑀺𑀫𑀢𑁄 𑀏𑀯𑀁 𑀳𑁄𑀢𑀺 𑁋 ‘𑀪𑀻𑀭𑀼𑀢𑁆𑀢𑀸𑀦𑀕𑀢𑁂𑀦 𑀔𑁄 𑀤𑀸𑀦𑀺 𑀪𑀺𑀓𑁆𑀔𑀼 𑀏𑀢𑀭𑀳𑀺 𑀅𑀢𑁆𑀢𑀦𑀸 𑀯𑀺𑀳𑀭𑀢𑀺, 𑀅𑀓𑀭𑀡𑀻𑀬𑁄 𑀫𑀬𑁆𑀳’’’𑀦𑁆𑀢𑀺.

‘‘𑀬𑀲𑁆𑀫𑀺𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀪𑀺𑀓𑁆𑀔𑀼 𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸 𑀧𑀝𑀺𑀖𑀲𑀜𑁆𑀜𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 ‘𑀅𑀦𑀦𑁆𑀢𑁄 𑀆𑀓𑀸𑀲𑁄’𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, ‘𑀪𑀺𑀓𑁆𑀔𑀼 𑀅𑀦𑁆𑀢𑀫𑀓𑀸𑀲𑀺 𑀫𑀸𑀭𑀁, 𑀅𑀧𑀤𑀁 𑀯𑀥𑀺𑀢𑁆𑀯𑀸 𑀫𑀸𑀭𑀘𑀓𑁆𑀔𑀼𑀁 𑀅𑀤𑀲𑁆𑀲𑀦𑀁 𑀕𑀢𑁄 𑀧𑀸𑀧𑀺𑀫𑀢𑁄 𑀢𑀺𑀡𑁆𑀡𑁄 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓’’’𑀦𑁆𑀢𑀺.

‘‘𑀬𑀲𑁆𑀫𑀺𑀁, 𑀪𑀺𑀓𑁆𑀔𑀯𑁂, 𑀲𑀫𑀬𑁂 𑀪𑀺𑀓𑁆𑀔𑀼 𑀲𑀩𑁆𑀩𑀲𑁄 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 ‘𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡’𑀦𑁆𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺… 𑀲𑀩𑁆𑀩𑀲𑁄 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 ‘𑀦𑀢𑁆𑀣𑀺 𑀓𑀺𑀜𑁆𑀘𑀻’𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺… 𑀲𑀩𑁆𑀩𑀲𑁄 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺… 𑀲𑀩𑁆𑀩𑀲𑁄 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 𑀲𑀜𑁆𑀜𑀸𑀯𑁂𑀤𑀬𑀺𑀢𑀦𑀺𑀭𑁄𑀥𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺, 𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, ‘𑀪𑀺𑀓𑁆𑀔𑀼 𑀅𑀦𑁆𑀢𑀫𑀓𑀸𑀲𑀺 𑀫𑀸𑀭𑀁, 𑀅𑀧𑀤𑀁 𑀯𑀥𑀺𑀢𑁆𑀯𑀸 𑀫𑀸𑀭𑀘𑀓𑁆𑀔𑀼𑀁 𑀅𑀤𑀲𑁆𑀲𑀦𑀁 𑀕𑀢𑁄 𑀧𑀸𑀧𑀺𑀫𑀢𑁄 𑀢𑀺𑀡𑁆𑀡𑁄 𑀮𑁄𑀓𑁂 𑀯𑀺𑀲𑀢𑁆𑀢𑀺𑀓’’’𑀦𑁆𑀢𑀺. 𑀅𑀝𑁆𑀞𑀫𑀁.