𑁧. 𑀲𑀫𑁆𑀩𑁄𑀥𑀺𑀯𑀕𑁆𑀕𑁄

𑁧. 𑀲𑀫𑁆𑀩𑁄𑀥𑀺𑀲𑀼𑀢𑁆𑀢𑀁

𑁧. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋

‘‘𑀲𑀘𑁂, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬𑀼𑀁 𑁋 ‘𑀲𑀫𑁆𑀩𑁄𑀥𑀺𑀧𑀓𑁆𑀔𑀺𑀓𑀸𑀦𑀁 [𑀲𑀫𑁆𑀩𑁄𑀥𑀧𑀓𑁆𑀔𑀺𑀓𑀸𑀦𑀁 (𑀲𑀻. 𑀲𑁆𑀬𑀸. 𑀧𑀻.)], 𑀆𑀯𑀼𑀲𑁄, 𑀥𑀫𑁆𑀫𑀸𑀦𑀁 𑀓𑀸 𑀉𑀧𑀦𑀺𑀲𑀸 𑀪𑀸𑀯𑀦𑀸𑀬𑀸’𑀢𑀺, 𑀏𑀯𑀁 𑀧𑀼𑀝𑁆𑀞𑀸 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀢𑁂𑀲𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀓𑀺𑀦𑁆𑀢𑀺 𑀩𑁆𑀬𑀸𑀓𑀭𑁂𑀬𑁆𑀬𑀸𑀣𑀸’’𑀢𑀺? ‘‘𑀪𑀕𑀯𑀁𑀫𑀽𑀮𑀓𑀸 𑀦𑁄, 𑀪𑀦𑁆𑀢𑁂, 𑀥𑀫𑁆𑀫𑀸…𑀧𑁂… 𑀪𑀕𑀯𑀢𑁄 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 𑀥𑀸𑀭𑁂𑀲𑁆𑀲𑀦𑁆𑀢𑀻’’𑀢𑀺.

‘‘𑀢𑁂𑀦 𑀳𑀺, 𑀪𑀺𑀓𑁆𑀔𑀯𑁂, 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀲𑀘𑁂, 𑀪𑀺𑀓𑁆𑀔𑀯𑁂, 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀏𑀯𑀁 𑀧𑀼𑀘𑁆𑀙𑁂𑀬𑁆𑀬𑀼𑀁 𑁋 ‘𑀲𑀫𑁆𑀩𑁄𑀥𑀺𑀧𑀓𑁆𑀔𑀺𑀓𑀸𑀦𑀁, 𑀆𑀯𑀼𑀲𑁄, 𑀥𑀫𑁆𑀫𑀸𑀦𑀁 𑀓𑀸 𑀉𑀧𑀦𑀺𑀲𑀸 𑀪𑀸𑀯𑀦𑀸𑀬𑀸’𑀢𑀺, 𑀏𑀯𑀁 𑀧𑀼𑀝𑁆𑀞𑀸 𑀢𑀼𑀫𑁆𑀳𑁂, 𑀪𑀺𑀓𑁆𑀔𑀯𑁂, 𑀢𑁂𑀲𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀏𑀯𑀁 𑀩𑁆𑀬𑀸𑀓𑀭𑁂𑀬𑁆𑀬𑀸𑀣 𑁋

‘‘𑀇𑀥𑀸𑀯𑀼𑀲𑁄, 𑀪𑀺𑀓𑁆𑀔𑀼 𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀳𑁄𑀢𑀺 𑀓𑀮𑁆𑀬𑀸𑀡𑀲𑀳𑀸𑀬𑁄 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑁄. 𑀲𑀫𑁆𑀩𑁄𑀥𑀺𑀧𑀓𑁆𑀔𑀺𑀓𑀸𑀦𑀁, 𑀆𑀯𑀼𑀲𑁄, 𑀥𑀫𑁆𑀫𑀸𑀦𑀁 𑀅𑀬𑀁 𑀧𑀞𑀫𑀸 𑀉𑀧𑀦𑀺𑀲𑀸 𑀪𑀸𑀯𑀦𑀸𑀬.

‘‘𑀧𑀼𑀦 𑀘𑀧𑀭𑀁, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀲𑀻𑀮𑀯𑀸 𑀳𑁄𑀢𑀺, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀺 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻, 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼. 𑀲𑀫𑁆𑀩𑁄𑀥𑀺𑀧𑀓𑁆𑀔𑀺𑀓𑀸𑀦𑀁, 𑀆𑀯𑀼𑀲𑁄, 𑀥𑀫𑁆𑀫𑀸𑀦𑀁 𑀅𑀬𑀁 𑀤𑀼𑀢𑀺𑀬𑀸 𑀉𑀧𑀦𑀺𑀲𑀸 𑀪𑀸𑀯𑀦𑀸𑀬.

‘‘𑀧𑀼𑀦 𑀘𑀧𑀭𑀁, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀬𑀸𑀬𑀁 𑀓𑀣𑀸 𑀅𑀪𑀺𑀲𑀮𑁆𑀮𑁂𑀔𑀺𑀓𑀸 𑀘𑁂𑀢𑁄𑀯𑀺𑀯𑀭𑀡𑀲𑀧𑁆𑀧𑀸𑀬𑀸, 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀧𑁆𑀧𑀺𑀘𑁆𑀙𑀓𑀣𑀸 𑀲𑀦𑁆𑀢𑀼𑀝𑁆𑀞𑀺𑀓𑀣𑀸 𑀧𑀯𑀺𑀯𑁂𑀓𑀓𑀣𑀸 𑀅𑀲𑀁𑀲𑀕𑁆𑀕𑀓𑀣𑀸 𑀯𑀻𑀭𑀺𑀬𑀸𑀭𑀫𑁆𑀪𑀓𑀣𑀸 𑀲𑀻𑀮𑀓𑀣𑀸 𑀲𑀫𑀸𑀥𑀺𑀓𑀣𑀸 𑀧𑀜𑁆𑀜𑀸𑀓𑀣𑀸 𑀯𑀺𑀫𑀼𑀢𑁆𑀢𑀺𑀓𑀣𑀸 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑀣𑀸, 𑀏𑀯𑀭𑀽𑀧𑀺𑀬𑀸 𑀓𑀣𑀸𑀬 𑀦𑀺𑀓𑀸𑀫𑀮𑀸𑀪𑀻 𑀳𑁄𑀢𑀺 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻. 𑀲𑀫𑁆𑀩𑁄𑀥𑀺𑀧𑀓𑁆𑀔𑀺𑀓𑀸𑀦𑀁, 𑀆𑀯𑀼𑀲𑁄, 𑀥𑀫𑁆𑀫𑀸𑀦𑀁 𑀅𑀬𑀁 𑀢𑀢𑀺𑀬𑀸 𑀉𑀧𑀦𑀺𑀲𑀸 𑀪𑀸𑀯𑀦𑀸𑀬.

‘‘𑀧𑀼𑀦 𑀘𑀧𑀭𑀁, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀆𑀭𑀤𑁆𑀥𑀯𑀻𑀭𑀺𑀬𑁄 𑀯𑀺𑀳𑀭𑀢𑀺 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬, 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑀲𑀫𑁆𑀧𑀤𑀸𑀬, 𑀣𑀸𑀫𑀯𑀸 𑀤𑀴𑁆𑀳𑀧𑀭𑀓𑁆𑀓𑀫𑁄 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁄 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼. 𑀲𑀫𑁆𑀩𑁄𑀥𑀺𑀧𑀓𑁆𑀔𑀺𑀓𑀸𑀦𑀁, 𑀆𑀯𑀼𑀲𑁄, 𑀥𑀫𑁆𑀫𑀸𑀦𑀁 𑀅𑀬𑀁 𑀘𑀢𑀼𑀢𑁆𑀣𑀻 𑀉𑀧𑀦𑀺𑀲𑀸 𑀪𑀸𑀯𑀦𑀸𑀬.

‘‘𑀧𑀼𑀦 𑀘𑀧𑀭𑀁, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀧𑀜𑁆𑀜𑀯𑀸 𑀳𑁄𑀢𑀺 𑀉𑀤𑀬𑀢𑁆𑀣𑀕𑀸𑀫𑀺𑀦𑀺𑀬𑀸 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄 𑀅𑀭𑀺𑀬𑀸𑀬 𑀦𑀺𑀩𑁆𑀩𑁂𑀥𑀺𑀓𑀸𑀬 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀕𑀸𑀫𑀺𑀦𑀺𑀬𑀸. 𑀲𑀫𑁆𑀩𑁄𑀥𑀺𑀧𑀓𑁆𑀔𑀺𑀓𑀸𑀦𑀁, 𑀆𑀯𑀼𑀲𑁄, 𑀥𑀫𑁆𑀫𑀸𑀦𑀁 𑀅𑀬𑀁 𑀧𑀜𑁆𑀘𑀫𑀻 𑀉𑀧𑀦𑀺𑀲𑀸 𑀪𑀸𑀯𑀦𑀸𑀬’’.

‘‘𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲𑁂𑀢𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀸𑀝𑀺𑀓𑀗𑁆𑀔𑀁 𑀓𑀮𑁆𑀬𑀸𑀡𑀲𑀳𑀸𑀬𑀲𑁆𑀲 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑀲𑁆𑀲 𑁋 𑀲𑀻𑀮𑀯𑀸 𑀪𑀯𑀺𑀲𑁆𑀲𑀢𑀺, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀺𑀲𑁆𑀲𑀢𑀺 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻, 𑀲𑀫𑀸𑀤𑀸𑀬 𑀲𑀺𑀓𑁆𑀔𑀺𑀲𑁆𑀲𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼.

‘‘𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲𑁂𑀢𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀸𑀝𑀺𑀓𑀗𑁆𑀔𑀁 𑀓𑀮𑁆𑀬𑀸𑀡𑀲𑀳𑀸𑀬𑀲𑁆𑀲 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑀲𑁆𑀲 𑁋 𑀬𑀸𑀬𑀁 𑀓𑀣𑀸 𑀅𑀪𑀺𑀲𑀮𑁆𑀮𑁂𑀔𑀺𑀓𑀸 𑀘𑁂𑀢𑁄𑀯𑀺𑀯𑀭𑀡𑀲𑀧𑁆𑀧𑀸𑀬𑀸, 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀧𑁆𑀧𑀺𑀘𑁆𑀙𑀓𑀣𑀸 𑀲𑀦𑁆𑀢𑀼𑀝𑁆𑀞𑀺𑀓𑀣𑀸 𑀧𑀯𑀺𑀯𑁂𑀓𑀓𑀣𑀸 𑀅𑀲𑀁𑀲𑀕𑁆𑀕𑀓𑀣𑀸 𑀯𑀻𑀭𑀺𑀬𑀸𑀭𑀫𑁆𑀪𑀓𑀣𑀸 𑀲𑀻𑀮𑀓𑀣𑀸 𑀲𑀫𑀸𑀥𑀺𑀓𑀣𑀸 𑀧𑀜𑁆𑀜𑀸𑀓𑀣𑀸 𑀯𑀺𑀫𑀼𑀢𑁆𑀢𑀺𑀓𑀣𑀸 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑀣𑀸, 𑀏𑀯𑀭𑀽𑀧𑀺𑀬𑀸 𑀓𑀣𑀸𑀬 𑀦𑀺𑀓𑀸𑀫𑀮𑀸𑀪𑀻 𑀪𑀯𑀺𑀲𑁆𑀲𑀢𑀺 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻.

‘‘𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲𑁂𑀢𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀸𑀝𑀺𑀓𑀗𑁆𑀔𑀁 𑀓𑀮𑁆𑀬𑀸𑀡𑀲𑀳𑀸𑀬𑀲𑁆𑀲 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑀲𑁆𑀲 𑁋 𑀆𑀭𑀤𑁆𑀥𑀯𑀻𑀭𑀺𑀬𑁄 𑀯𑀺𑀳𑀭𑀺𑀲𑁆𑀲𑀢𑀺 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬, 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑀲𑀫𑁆𑀧𑀤𑀸𑀬, 𑀣𑀸𑀫𑀯𑀸 𑀤𑀴𑁆𑀳𑀧𑀭𑀓𑁆𑀓𑀫𑁄 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁄 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼.

‘‘𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲𑁂𑀢𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀧𑀸𑀝𑀺𑀓𑀗𑁆𑀔𑀁 𑀓𑀮𑁆𑀬𑀸𑀡𑀲𑀳𑀸𑀬𑀲𑁆𑀲 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑀲𑁆𑀲 𑁋 𑀧𑀜𑁆𑀜𑀯𑀸 𑀪𑀯𑀺𑀲𑁆𑀲𑀢𑀺 𑀉𑀤𑀬𑀢𑁆𑀣𑀕𑀸𑀫𑀺𑀦𑀺𑀬𑀸 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄 𑀅𑀭𑀺𑀬𑀸𑀬 𑀦𑀺𑀩𑁆𑀩𑁂𑀥𑀺𑀓𑀸𑀬 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀕𑀸𑀫𑀺𑀦𑀺𑀬𑀸.

‘‘𑀢𑁂𑀦 𑀘 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀥𑀫𑁆𑀫𑁂𑀲𑀼 𑀧𑀢𑀺𑀝𑁆𑀞𑀸𑀬 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀉𑀢𑁆𑀢𑀭𑀺 [𑀉𑀢𑁆𑀢𑀭𑀺𑀁 (𑀲𑀻. 𑀲𑁆𑀬𑀸. 𑀧𑀻.)] 𑀪𑀸𑀯𑁂𑀢𑀩𑁆𑀩𑀸 𑁋 𑀅𑀲𑀼𑀪𑀸 𑀪𑀸𑀯𑁂𑀢𑀩𑁆𑀩𑀸 𑀭𑀸𑀕𑀲𑁆𑀲 𑀧𑀳𑀸𑀦𑀸𑀬, 𑀫𑁂𑀢𑁆𑀢𑀸 𑀪𑀸𑀯𑁂𑀢𑀩𑁆𑀩𑀸 𑀩𑁆𑀬𑀸𑀧𑀸𑀤𑀲𑁆𑀲 𑀧𑀳𑀸𑀦𑀸𑀬, 𑀆𑀦𑀸𑀧𑀸𑀦𑀲𑁆𑀲𑀢𑀺 [𑀆𑀦𑀸𑀧𑀸𑀦𑀲𑀢𑀺 (𑀲𑀻. 𑀧𑀻.)] 𑀪𑀸𑀯𑁂𑀢𑀩𑁆𑀩𑀸 𑀯𑀺𑀢𑀓𑁆𑀓𑀼𑀧𑀘𑁆𑀙𑁂𑀤𑀸𑀬, 𑀅𑀦𑀺𑀘𑁆𑀘𑀲𑀜𑁆𑀜𑀸 𑀪𑀸𑀯𑁂𑀢𑀩𑁆𑀩𑀸 𑀅𑀲𑁆𑀫𑀺𑀫𑀸𑀦𑀲𑀫𑀼𑀕𑁆𑀖𑀸𑀢𑀸𑀬. 𑀅𑀦𑀺𑀘𑁆𑀘𑀲𑀜𑁆𑀜𑀺𑀦𑁄, 𑀪𑀺𑀓𑁆𑀔𑀯𑁂, 𑀅𑀦𑀢𑁆𑀢𑀲𑀜𑁆𑀜𑀸 𑀲𑀡𑁆𑀞𑀸𑀢𑀺. 𑀅𑀦𑀢𑁆𑀢𑀲𑀜𑁆𑀜𑀻 𑀅𑀲𑁆𑀫𑀺𑀫𑀸𑀦𑀲𑀫𑀼𑀕𑁆𑀖𑀸𑀢𑀁 𑀧𑀸𑀧𑀼𑀡𑀸𑀢𑀺 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀦𑀺𑀩𑁆𑀩𑀸𑀦’’𑀦𑁆𑀢𑀺. 𑀧𑀞𑀫𑀁.

𑁨. 𑀦𑀺𑀲𑁆𑀲𑀬𑀲𑀼𑀢𑁆𑀢𑀁

𑁨. 𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁…𑀧𑁂… 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘‘𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑁄 𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑁄’𑀢𑀺, 𑀪𑀦𑁆𑀢𑁂, 𑀯𑀼𑀘𑁆𑀘𑀢𑀺. 𑀓𑀺𑀢𑁆𑀢𑀸𑀯𑀢𑀸 𑀦𑀼 𑀔𑁄, 𑀪𑀦𑁆𑀢𑁂, 𑀪𑀺𑀓𑁆𑀔𑀼 𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑁄 𑀳𑁄𑀢𑀻’’𑀢𑀺? ‘‘𑀲𑀤𑁆𑀥𑀁 𑀘𑁂, 𑀪𑀺𑀓𑁆𑀔𑀼, 𑀪𑀺𑀓𑁆𑀔𑀼 𑀦𑀺𑀲𑁆𑀲𑀸𑀬 𑀅𑀓𑀼𑀲𑀮𑀁 𑀧𑀚𑀳𑀢𑀺 𑀓𑀼𑀲𑀮𑀁 𑀪𑀸𑀯𑁂𑀢𑀺, 𑀧𑀳𑀻𑀦𑀫𑁂𑀯𑀲𑁆𑀲 𑀢𑀁 𑀅𑀓𑀼𑀲𑀮𑀁 𑀳𑁄𑀢𑀺. 𑀳𑀺𑀭𑀺𑀁 𑀘𑁂, 𑀪𑀺𑀓𑁆𑀔𑀼, 𑀪𑀺𑀓𑁆𑀔𑀼 𑀦𑀺𑀲𑁆𑀲𑀸𑀬…𑀧𑁂… 𑀑𑀢𑁆𑀢𑀧𑁆𑀧𑀁 𑀘𑁂, 𑀪𑀺𑀓𑁆𑀔𑀼, 𑀪𑀺𑀓𑁆𑀔𑀼 𑀦𑀺𑀲𑁆𑀲𑀸𑀬…𑀧𑁂… 𑀯𑀻𑀭𑀺𑀬𑀁 𑀘𑁂, 𑀪𑀺𑀓𑁆𑀔𑀼, 𑀪𑀺𑀓𑁆𑀔𑀼 𑀦𑀺𑀲𑁆𑀲𑀸𑀬…𑀧𑁂… 𑀧𑀜𑁆𑀜𑀁 𑀘𑁂, 𑀪𑀺𑀓𑁆𑀔𑀼, 𑀪𑀺𑀓𑁆𑀔𑀼 𑀦𑀺𑀲𑁆𑀲𑀸𑀬 𑀅𑀓𑀼𑀲𑀮𑀁 𑀧𑀚𑀳𑀢𑀺 𑀓𑀼𑀲𑀮𑀁 𑀪𑀸𑀯𑁂𑀢𑀺, 𑀧𑀳𑀻𑀦𑀫𑁂𑀯𑀲𑁆𑀲 𑀢𑀁 𑀅𑀓𑀼𑀲𑀮𑀁 𑀳𑁄𑀢𑀺. 𑀢𑀁 𑀳𑀺𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀓𑀼𑀲𑀮𑀁 𑀧𑀳𑀻𑀦𑀁 𑀳𑁄𑀢𑀺 𑀲𑀼𑀧𑁆𑀧𑀳𑀻𑀦𑀁, 𑀬𑀁𑀲 𑀅𑀭𑀺𑀬𑀸𑀬 𑀧𑀜𑁆𑀜𑀸𑀬 𑀤𑀺𑀲𑁆𑀯𑀸 𑀧𑀳𑀻𑀦𑀁’’.

‘‘𑀢𑁂𑀦 𑀘 𑀧𑀦, 𑀪𑀺𑀓𑁆𑀔𑀼, 𑀪𑀺𑀓𑁆𑀔𑀼𑀦𑀸 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀥𑀫𑁆𑀫𑁂𑀲𑀼 𑀧𑀢𑀺𑀝𑁆𑀞𑀸𑀬 𑀘𑀢𑁆𑀢𑀸𑀭𑁄 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀸𑀢𑀩𑁆𑀩𑀸. 𑀓𑀢𑀫𑁂 𑀘𑀢𑁆𑀢𑀸𑀭𑁄? 𑀇𑀥, 𑀪𑀺𑀓𑁆𑀔𑀼, 𑀪𑀺𑀓𑁆𑀔𑀼 𑀲𑀗𑁆𑀔𑀸𑀬𑁂𑀓𑀁 𑀧𑀝𑀺𑀲𑁂𑀯𑀢𑀺, 𑀲𑀗𑁆𑀔𑀸𑀬𑁂𑀓𑀁 𑀅𑀥𑀺𑀯𑀸𑀲𑁂𑀢𑀺, 𑀲𑀗𑁆𑀔𑀸𑀬𑁂𑀓𑀁 𑀧𑀭𑀺𑀯𑀚𑁆𑀚𑁂𑀢𑀺, 𑀲𑀗𑁆𑀔𑀸𑀬𑁂𑀓𑀁 𑀯𑀺𑀦𑁄𑀤𑁂𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀼, 𑀪𑀺𑀓𑁆𑀔𑀼 𑀦𑀺𑀲𑁆𑀲𑀬𑀲𑀫𑁆𑀧𑀦𑁆𑀦𑁄 𑀳𑁄𑀢𑀻’’𑀢𑀺. 𑀤𑀼𑀢𑀺𑀬𑀁.

𑁩. 𑀫𑁂𑀖𑀺𑀬𑀲𑀼𑀢𑁆𑀢𑀁

𑁩. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀘𑀸𑀮𑀺𑀓𑀸𑀬𑀁 𑀯𑀺𑀳𑀭𑀢𑀺 𑀘𑀸𑀮𑀺𑀓𑀸𑀧𑀩𑁆𑀩𑀢𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀫𑁂𑀖𑀺𑀬𑁄 𑀪𑀕𑀯𑀢𑁄 𑀉𑀧𑀝𑁆𑀞𑀸𑀓𑁄 𑀳𑁄𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑁂𑀖𑀺𑀬𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀸𑀲𑀺. 𑀏𑀓𑀫𑀦𑁆𑀢𑀁 𑀞𑀺𑀢𑁄 𑀔𑁄 𑀆𑀬𑀲𑁆𑀫𑀸 𑀫𑁂𑀖𑀺𑀬𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀘𑁆𑀙𑀸𑀫𑀳𑀁, 𑀪𑀦𑁆𑀢𑁂, 𑀚𑀦𑁆𑀢𑀼𑀕𑀸𑀫𑀁 [𑀚𑀢𑀼𑀕𑀸𑀫𑀁 (𑀲𑀻. 𑀅𑀝𑁆𑀞., 𑀲𑁆𑀬𑀸. 𑀅𑀝𑁆𑀞.), 𑀚𑀢𑁆𑀢𑀼𑀕𑀸𑀫𑀁 (𑀓. 𑀅𑀝𑁆𑀞𑀓𑀣𑀸𑀬𑀫𑁆𑀧𑀺 𑀧𑀸𑀞𑀦𑁆𑀢𑀭𑀁)] 𑀧𑀺𑀡𑁆𑀟𑀸𑀬 𑀧𑀯𑀺𑀲𑀺𑀢𑀼’’𑀦𑁆𑀢𑀺. ‘‘𑀬𑀲𑁆𑀲 𑀤𑀸𑀦𑀺 𑀢𑁆𑀯𑀁, 𑀫𑁂𑀖𑀺𑀬, 𑀓𑀸𑀮𑀁 𑀫𑀜𑁆𑀜𑀲𑀻’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀫𑁂𑀖𑀺𑀬𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀚𑀦𑁆𑀢𑀼𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀚𑀦𑁆𑀢𑀼𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀬𑁂𑀦 𑀓𑀺𑀫𑀺𑀓𑀸𑀴𑀸𑀬 𑀦𑀤𑀺𑀬𑀸 𑀢𑀻𑀭𑀁 𑀢𑁂𑀦𑀼𑀧𑀲𑀗𑁆𑀓𑀫𑀺. 𑀅𑀤𑁆𑀤𑀲𑀸 𑀔𑁄 𑀆𑀬𑀲𑁆𑀫𑀸 𑀫𑁂𑀖𑀺𑀬𑁄 𑀓𑀺𑀫𑀺𑀓𑀸𑀴𑀸𑀬 𑀦𑀤𑀺𑀬𑀸 𑀢𑀻𑀭𑁂 𑀚𑀗𑁆𑀖𑀸𑀯𑀺𑀳𑀸𑀭𑀁 [𑀚𑀗𑁆𑀖𑀯𑀺𑀳𑀸𑀭𑀁 (𑀲𑁆𑀬𑀸. 𑀓.)] 𑀅𑀦𑀼𑀘𑀗𑁆𑀓𑀫𑀫𑀸𑀦𑁄 𑀅𑀦𑀼𑀯𑀺𑀘𑀭𑀫𑀸𑀦𑁄 𑀅𑀫𑁆𑀩𑀯𑀦𑀁 𑀧𑀸𑀲𑀸𑀤𑀺𑀓𑀁 𑀭𑀫𑀡𑀻𑀬𑀁. 𑀤𑀺𑀲𑁆𑀯𑀸𑀦𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀧𑀸𑀲𑀸𑀤𑀺𑀓𑀁 𑀯𑀢𑀺𑀤𑀁 𑀅𑀫𑁆𑀩𑀯𑀦𑀁 𑀭𑀫𑀡𑀻𑀬𑀁, 𑀅𑀮𑀁 𑀯𑀢𑀺𑀤𑀁 𑀓𑀼𑀮𑀧𑀼𑀢𑁆𑀢𑀲𑁆𑀲 𑀧𑀥𑀸𑀦𑀢𑁆𑀣𑀺𑀓𑀲𑁆𑀲 𑀧𑀥𑀸𑀦𑀸𑀬. 𑀲𑀘𑁂 𑀫𑀁 𑀪𑀕𑀯𑀸 𑀅𑀦𑀼𑀚𑀸𑀦𑁂𑀬𑁆𑀬, 𑀆𑀕𑀘𑁆𑀙𑁂𑀬𑁆𑀬𑀸𑀳𑀁 𑀇𑀫𑀁 𑀅𑀫𑁆𑀩𑀯𑀦𑀁 𑀧𑀥𑀸𑀦𑀸𑀬𑀸’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀫𑁂𑀖𑀺𑀬𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀫𑁂𑀖𑀺𑀬𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀇𑀥𑀸𑀳𑀁, 𑀪𑀦𑁆𑀢𑁂, 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀚𑀦𑁆𑀢𑀼𑀕𑀸𑀫𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺𑀁. 𑀚𑀦𑁆𑀢𑀼𑀕𑀸𑀫𑁂 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀬𑁂𑀦 𑀓𑀺𑀫𑀺𑀓𑀸𑀴𑀸𑀬 𑀦𑀤𑀺𑀬𑀸 𑀢𑀻𑀭𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀁. 𑀅𑀤𑁆𑀤𑀲𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀓𑀺𑀫𑀺𑀓𑀸𑀴𑀸𑀬 𑀦𑀤𑀺𑀬𑀸 𑀢𑀻𑀭𑁂 𑀚𑀗𑁆𑀖𑀸𑀯𑀺𑀳𑀸𑀭𑀁 𑀅𑀦𑀼𑀘𑀗𑁆𑀓𑀫𑀫𑀸𑀦𑁄 𑀅𑀦𑀼𑀯𑀺𑀘𑀭𑀫𑀸𑀦𑁄 𑀅𑀫𑁆𑀩𑀯𑀦𑀁 𑀧𑀸𑀲𑀸𑀤𑀺𑀓𑀁 𑀭𑀫𑀡𑀻𑀬𑀁. 𑀤𑀺𑀲𑁆𑀯𑀸𑀦 𑀫𑁂 𑀏𑀢𑀤𑀳𑁄𑀲𑀺 𑁋 ‘𑀧𑀸𑀲𑀸𑀤𑀺𑀓𑀁 𑀯𑀢𑀺𑀤𑀁 𑀅𑀫𑁆𑀩𑀯𑀦𑀁 𑀭𑀫𑀡𑀻𑀬𑀁. 𑀅𑀮𑀁 𑀯𑀢𑀺𑀤𑀁 𑀓𑀼𑀮𑀧𑀼𑀢𑁆𑀢𑀲𑁆𑀲 𑀧𑀥𑀸𑀦𑀢𑁆𑀣𑀺𑀓𑀲𑁆𑀲 𑀧𑀥𑀸𑀦𑀸𑀬. 𑀲𑀘𑁂 𑀫𑀁 𑀪𑀕𑀯𑀸 𑀅𑀦𑀼𑀚𑀸𑀦𑁂𑀬𑁆𑀬, 𑀆𑀕𑀘𑁆𑀙𑁂𑀬𑁆𑀬𑀸𑀳𑀁 𑀇𑀫𑀁 𑀅𑀫𑁆𑀩𑀯𑀦𑀁 𑀧𑀥𑀸𑀦𑀸𑀬𑀸’𑀢𑀺. 𑀲𑀘𑁂 𑀫𑀁 𑀪𑀕𑀯𑀸 𑀅𑀦𑀼𑀚𑀸𑀦𑁂𑀬𑁆𑀬, 𑀕𑀘𑁆𑀙𑁂𑀬𑁆𑀬𑀸𑀳𑀁 𑀢𑀁 𑀅𑀫𑁆𑀩𑀯𑀦𑀁 𑀧𑀥𑀸𑀦𑀸𑀬𑀸’’𑀢𑀺. ‘‘𑀆𑀕𑀫𑁂𑀳𑀺 𑀢𑀸𑀯, 𑀫𑁂𑀖𑀺𑀬! 𑀏𑀓𑀓𑀫𑁆𑀳𑀺 [𑀏𑀓𑀓𑀫𑁆𑀳𑀸 (𑀲𑀻. 𑀧𑀻.)] 𑀢𑀸𑀯 [𑀯𑀢 (𑀓.)] 𑀬𑀸𑀯 𑀅𑀜𑁆𑀜𑁄𑀧𑀺 𑀓𑁄𑀘𑀺 𑀪𑀺𑀓𑁆𑀔𑀼 𑀆𑀕𑀘𑁆𑀙𑀢𑀻’’𑀢𑀺 [𑀤𑀺𑀲𑁆𑀲𑀢𑀽𑀢𑀺 (𑀲𑀩𑁆𑀩𑀢𑁆𑀣, 𑀝𑀻𑀓𑀸𑀬𑀫𑁆𑀧𑀺 𑀧𑀸𑀞𑀦𑁆𑀢𑀭𑀁), 𑀆𑀕𑀘𑁆𑀙𑀢𑀽𑀢𑀺, 𑀤𑀺𑀲𑁆𑀲𑀢𑀻𑀢𑀺 (𑀝𑀻𑀓𑀸𑀬𑀁 𑀧𑀸𑀞𑀦𑁆𑀢𑀭𑀸𑀦𑀺)].

𑀤𑀼𑀢𑀺𑀬𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀫𑁂𑀖𑀺𑀬𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀪𑀕𑀯𑀢𑁄, 𑀪𑀦𑁆𑀢𑁂, 𑀦𑀢𑁆𑀣𑀺 𑀓𑀺𑀜𑁆𑀘𑀺 𑀉𑀢𑁆𑀢𑀭𑀺 𑀓𑀭𑀡𑀻𑀬𑀁, 𑀦𑀢𑁆𑀣𑀺 𑀓𑀢𑀲𑁆𑀲 𑀧𑀝𑀺𑀘𑀬𑁄. 𑀫𑀬𑁆𑀳𑀁 𑀔𑁄 𑀧𑀦, 𑀪𑀦𑁆𑀢𑁂, 𑀅𑀢𑁆𑀣𑀺 𑀉𑀢𑁆𑀢𑀭𑀺 𑀓𑀭𑀡𑀻𑀬𑀁, 𑀅𑀢𑁆𑀣𑀺 𑀓𑀢𑀲𑁆𑀲 𑀧𑀝𑀺𑀘𑀬𑁄. 𑀲𑀘𑁂 𑀫𑀁 𑀪𑀕𑀯𑀸 𑀅𑀦𑀼𑀚𑀸𑀦𑁂𑀬𑁆𑀬, 𑀕𑀘𑁆𑀙𑁂𑀬𑁆𑀬𑀸𑀳𑀁 𑀢𑀁 𑀅𑀫𑁆𑀩𑀯𑀦𑀁 𑀧𑀥𑀸𑀦𑀸𑀬𑀸’’𑀢𑀺. ‘‘𑀆𑀕𑀫𑁂𑀳𑀺 𑀢𑀸𑀯, 𑀫𑁂𑀖𑀺𑀬, 𑀏𑀓𑀓𑀫𑁆𑀳𑀺 𑀢𑀸𑀯 𑀬𑀸𑀯 𑀅𑀜𑁆𑀜𑁄𑀧𑀺 𑀓𑁄𑀘𑀺 𑀪𑀺𑀓𑁆𑀔𑀼 𑀆𑀕𑀘𑁆𑀙𑀢𑀻’’𑀢𑀺.

𑀢𑀢𑀺𑀬𑀫𑁆𑀧𑀺 𑀔𑁄 𑀆𑀬𑀲𑁆𑀫𑀸 𑀫𑁂𑀖𑀺𑀬𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀪𑀕𑀯𑀢𑁄, 𑀪𑀦𑁆𑀢𑁂, 𑀦𑀢𑁆𑀣𑀺 𑀓𑀺𑀜𑁆𑀘𑀺 𑀉𑀢𑁆𑀢𑀭𑀺 𑀓𑀭𑀡𑀻𑀬𑀁, 𑀦𑀢𑁆𑀣𑀺 𑀓𑀢𑀲𑁆𑀲 𑀧𑀝𑀺𑀘𑀬𑁄. 𑀫𑀬𑁆𑀳𑀁 𑀔𑁄 𑀧𑀦, 𑀪𑀦𑁆𑀢𑁂, 𑀅𑀢𑁆𑀣𑀺 𑀉𑀢𑁆𑀢𑀭𑀺 𑀓𑀭𑀡𑀻𑀬𑀁, 𑀅𑀢𑁆𑀣𑀺 𑀓𑀢𑀲𑁆𑀲 𑀧𑀝𑀺𑀘𑀬𑁄. 𑀲𑀘𑁂 𑀫𑀁 𑀪𑀕𑀯𑀸 𑀅𑀦𑀼𑀚𑀸𑀦𑁂𑀬𑁆𑀬, 𑀕𑀘𑁆𑀙𑁂𑀬𑁆𑀬𑀸𑀳𑀁 𑀢𑀁 𑀅𑀫𑁆𑀩𑀯𑀦𑀁 𑀧𑀥𑀸𑀦𑀸𑀬𑀸’’𑀢𑀺. ‘‘𑀧𑀥𑀸𑀦𑀦𑁆𑀢𑀺 𑀔𑁄, 𑀫𑁂𑀖𑀺𑀬, 𑀯𑀤𑀫𑀸𑀦𑀁 𑀓𑀺𑀦𑁆𑀢𑀺 𑀯𑀤𑁂𑀬𑁆𑀬𑀸𑀫! 𑀬𑀲𑁆𑀲 𑀤𑀸𑀦𑀺 𑀢𑁆𑀯𑀁, 𑀫𑁂𑀖𑀺𑀬, 𑀓𑀸𑀮𑀁 𑀫𑀜𑁆𑀜𑀲𑀻’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀫𑁂𑀖𑀺𑀬𑁄 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀬𑁂𑀦 𑀢𑀁 𑀅𑀫𑁆𑀩𑀯𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑀁 𑀅𑀫𑁆𑀩𑀯𑀦𑀁 𑀅𑀚𑁆𑀛𑁄𑀕𑀸𑀳𑁂𑀢𑁆𑀯𑀸 𑀅𑀜𑁆𑀜𑀢𑀭𑀲𑁆𑀫𑀺𑀁 𑀭𑀼𑀓𑁆𑀔𑀫𑀽𑀮𑁂 𑀤𑀺𑀯𑀸𑀯𑀺𑀳𑀸𑀭𑀁 𑀦𑀺𑀲𑀻𑀤𑀺. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀫𑁂𑀖𑀺𑀬𑀲𑁆𑀲 𑀢𑀲𑁆𑀫𑀺𑀁 𑀅𑀫𑁆𑀩𑀯𑀦𑁂 𑀯𑀺𑀳𑀭𑀦𑁆𑀢𑀲𑁆𑀲 𑀬𑁂𑀪𑀼𑀬𑁆𑀬𑁂𑀦 𑀢𑀬𑁄 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀯𑀺𑀢𑀓𑁆𑀓𑀸 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀓𑀸𑀫𑀯𑀺𑀢𑀓𑁆𑀓𑁄, 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄, 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀫𑁂𑀖𑀺𑀬𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀘𑁆𑀙𑀭𑀺𑀬𑀁 𑀯𑀢 𑀪𑁄, 𑀅𑀩𑁆𑀪𑀼𑀢𑀁 𑀯𑀢 𑀪𑁄! 𑀲𑀤𑁆𑀥𑀸𑀬 𑀘 𑀯𑀢𑀫𑁆𑀳𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀸; 𑀅𑀣 𑀘 𑀧𑀦𑀺𑀫𑁂𑀳𑀺 𑀢𑀻𑀳𑀺 𑀧𑀸𑀧𑀓𑁂𑀳𑀺 𑀅𑀓𑀼𑀲𑀮𑁂𑀳𑀺 𑀯𑀺𑀢𑀓𑁆𑀓𑁂𑀳𑀺 𑀅𑀦𑁆𑀯𑀸𑀲𑀢𑁆𑀢𑀸 𑁋 𑀓𑀸𑀫𑀯𑀺𑀢𑀓𑁆𑀓𑁂𑀦, 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁂𑀦, 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁂𑀦𑀸’’𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀫𑁂𑀖𑀺𑀬𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀫𑁂𑀖𑀺𑀬𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀇𑀥 𑀫𑀬𑁆𑀳𑀁, 𑀪𑀦𑁆𑀢𑁂, 𑀢𑀲𑁆𑀫𑀺𑀁 𑀅𑀫𑁆𑀩𑀯𑀦𑁂 𑀯𑀺𑀳𑀭𑀦𑁆𑀢𑀲𑁆𑀲 𑀬𑁂𑀪𑀼𑀬𑁆𑀬𑁂𑀦 𑀢𑀬𑁄 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀯𑀺𑀢𑀓𑁆𑀓𑀸 𑀲𑀫𑀼𑀤𑀸𑀘𑀭𑀦𑁆𑀢𑀺, 𑀲𑁂𑀬𑁆𑀬𑀣𑀺𑀤𑀁 𑁋 𑀓𑀸𑀫𑀯𑀺𑀢𑀓𑁆𑀓𑁄, 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁄, 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁄. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀢𑀤𑀳𑁄𑀲𑀺 𑁋 ‘𑀅𑀘𑁆𑀙𑀭𑀺𑀬𑀁 𑀯𑀢 𑀪𑁄, 𑀅𑀩𑁆𑀪𑀼𑀢𑀁 𑀯𑀢 𑀪𑁄! 𑀲𑀤𑁆𑀥𑀸𑀬 𑀘 𑀯𑀢𑀫𑁆𑀳𑀸 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀸; 𑀅𑀣 𑀘 𑀧𑀦𑀺𑀫𑁂𑀳𑀺 𑀢𑀻𑀳𑀺 𑀧𑀸𑀧𑀓𑁂𑀳𑀺 𑀅𑀓𑀼𑀲𑀮𑁂𑀳𑀺 𑀯𑀺𑀢𑀓𑁆𑀓𑁂𑀳𑀺 𑀅𑀦𑁆𑀯𑀸𑀲𑀢𑁆𑀢𑀸 𑁋 𑀓𑀸𑀫𑀯𑀺𑀢𑀓𑁆𑀓𑁂𑀦, 𑀩𑁆𑀬𑀸𑀧𑀸𑀤𑀯𑀺𑀢𑀓𑁆𑀓𑁂𑀦, 𑀯𑀺𑀳𑀺𑀁𑀲𑀸𑀯𑀺𑀢𑀓𑁆𑀓𑁂𑀦𑀸𑀢𑀺’’’.

‘‘𑀅𑀧𑀭𑀺𑀧𑀓𑁆𑀓𑀸𑀬, 𑀫𑁂𑀖𑀺𑀬, 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀧𑀜𑁆𑀘 𑀥𑀫𑁆𑀫𑀸 𑀧𑀭𑀺𑀧𑀓𑁆𑀓𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂 𑀧𑀜𑁆𑀘? 𑀇𑀥, 𑀫𑁂𑀖𑀺𑀬, 𑀪𑀺𑀓𑁆𑀔𑀼 𑀓𑀮𑁆𑀬𑀸𑀡𑀫𑀺𑀢𑁆𑀢𑁄 𑀳𑁄𑀢𑀺 𑀓𑀮𑁆𑀬𑀸𑀡𑀲𑀳𑀸𑀬𑁄 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑁄. 𑀅𑀧𑀭𑀺𑀧𑀓𑁆𑀓𑀸𑀬, 𑀫𑁂𑀖𑀺𑀬, 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀅𑀬𑀁 𑀧𑀞𑀫𑁄 𑀥𑀫𑁆𑀫𑁄 𑀧𑀭𑀺𑀧𑀓𑁆𑀓𑀸𑀬 𑀲𑀁𑀯𑀢𑁆𑀢𑀢𑀺.

‘‘𑀧𑀼𑀦 𑀘𑀧𑀭𑀁, 𑀫𑁂𑀖𑀺𑀬, 𑀪𑀺𑀓𑁆𑀔𑀼 𑀲𑀻𑀮𑀯𑀸 𑀳𑁄𑀢𑀺, 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄 𑀯𑀺𑀳𑀭𑀢𑀺 𑀆𑀘𑀸𑀭𑀕𑁄𑀘𑀭𑀲𑀫𑁆𑀧𑀦𑁆𑀦𑁄 𑀅𑀡𑀼𑀫𑀢𑁆𑀢𑁂𑀲𑀼 𑀯𑀚𑁆𑀚𑁂𑀲𑀼 𑀪𑀬𑀤𑀲𑁆𑀲𑀸𑀯𑀻, 𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼. 𑀅𑀧𑀭𑀺𑀧𑀓𑁆𑀓𑀸𑀬, 𑀫𑁂𑀖𑀺𑀬, 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀅𑀬𑀁 𑀤𑀼𑀢𑀺𑀬𑁄 𑀥𑀫𑁆𑀫𑁄 𑀧𑀭𑀺𑀧𑀓𑁆𑀓𑀸𑀬 𑀲𑀁𑀯𑀢𑁆𑀢𑀢𑀺.

‘‘𑀧𑀼𑀦 𑀘𑀧𑀭𑀁, 𑀫𑁂𑀖𑀺𑀬, 𑀬𑀸𑀬𑀁 𑀓𑀣𑀸 𑀅𑀪𑀺𑀲𑀮𑁆𑀮𑁂𑀔𑀺𑀓𑀸 𑀘𑁂𑀢𑁄𑀯𑀺𑀯𑀭𑀡𑀲𑀧𑁆𑀧𑀸𑀬𑀸, 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀧𑁆𑀧𑀺𑀘𑁆𑀙𑀓𑀣𑀸 𑀲𑀦𑁆𑀢𑀼𑀝𑁆𑀞𑀺𑀓𑀣𑀸 𑀧𑀯𑀺𑀯𑁂𑀓𑀓𑀣𑀸 𑀅𑀲𑀁𑀲𑀕𑁆𑀕𑀓𑀣𑀸 𑀯𑀻𑀭𑀺𑀬𑀸𑀭𑀫𑁆𑀪𑀓𑀣𑀸 𑀲𑀻𑀮𑀓𑀣𑀸 𑀲𑀫𑀸𑀥𑀺𑀓𑀣𑀸 𑀧𑀜𑁆𑀜𑀸𑀓𑀣𑀸 𑀯𑀺𑀫𑀼𑀢𑁆𑀢𑀺𑀓𑀣𑀸 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑀣𑀸, 𑀏𑀯𑀭𑀽𑀧𑀺𑀬𑀸 𑀓𑀣𑀸𑀬 𑀦𑀺𑀓𑀸𑀫𑀮𑀸𑀪𑀻 𑀳𑁄𑀢𑀺 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻. 𑀅𑀧𑀭𑀺𑀧𑀓𑁆𑀓𑀸𑀬, 𑀫𑁂𑀖𑀺𑀬, 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀅𑀬𑀁 𑀢𑀢𑀺𑀬𑁄 𑀥𑀫𑁆𑀫𑁄 𑀧𑀭𑀺𑀧𑀓𑁆𑀓𑀸𑀬 𑀲𑀁𑀯𑀢𑁆𑀢𑀢𑀺.

‘‘𑀧𑀼𑀦 𑀘𑀧𑀭𑀁, 𑀫𑁂𑀖𑀺𑀬, 𑀪𑀺𑀓𑁆𑀔𑀼 𑀆𑀭𑀤𑁆𑀥𑀯𑀻𑀭𑀺𑀬𑁄 𑀯𑀺𑀳𑀭𑀢𑀺 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬, 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑀲𑀫𑁆𑀧𑀤𑀸𑀬, 𑀣𑀸𑀫𑀯𑀸 𑀤𑀴𑁆𑀳𑀧𑀭𑀓𑁆𑀓𑀫𑁄 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁄 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼. 𑀅𑀧𑀭𑀺𑀧𑀓𑁆𑀓𑀸𑀬, 𑀫𑁂𑀖𑀺𑀬, 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀅𑀬𑀁 𑀘𑀢𑀼𑀢𑁆𑀣𑁄 𑀥𑀫𑁆𑀫𑁄 𑀧𑀭𑀺𑀧𑀓𑁆𑀓𑀸𑀬 𑀲𑀁𑀯𑀢𑁆𑀢𑀢𑀺.

‘‘𑀧𑀼𑀦 𑀘𑀧𑀭𑀁, 𑀫𑁂𑀖𑀺𑀬, 𑀪𑀺𑀓𑁆𑀔𑀼 𑀧𑀜𑁆𑀜𑀯𑀸 𑀳𑁄𑀢𑀺 𑀉𑀤𑀬𑀢𑁆𑀣𑀕𑀸𑀫𑀺𑀦𑀺𑀬𑀸 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄 𑀅𑀭𑀺𑀬𑀸𑀬 𑀦𑀺𑀩𑁆𑀩𑁂𑀥𑀺𑀓𑀸𑀬 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀕𑀸𑀫𑀺𑀦𑀺𑀬𑀸. 𑀅𑀧𑀭𑀺𑀧𑀓𑁆𑀓𑀸𑀬, 𑀫𑁂𑀖𑀺𑀬, 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀬𑀸 𑀅𑀬𑀁 𑀧𑀜𑁆𑀘𑀫𑁄 𑀥𑀫𑁆𑀫𑁄 𑀧𑀭𑀺𑀧𑀓𑁆𑀓𑀸𑀬 𑀲𑀁𑀯𑀢𑁆𑀢𑀢𑀺.

‘‘𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲𑁂𑀢𑀁, 𑀫𑁂𑀖𑀺𑀬, 𑀪𑀺𑀓𑁆𑀔𑀼𑀦𑁄 𑀧𑀸𑀝𑀺𑀓𑀗𑁆𑀔𑀁 𑀓𑀮𑁆𑀬𑀸𑀡𑀲𑀳𑀸𑀬𑀲𑁆𑀲 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑀲𑁆𑀲 𑁋 ‘𑀲𑀻𑀮𑀯𑀸 𑀪𑀯𑀺𑀲𑁆𑀲𑀢𑀺…𑀧𑁂. … 𑀲𑀫𑀸𑀤𑀸𑀬 𑀲𑀺𑀓𑁆𑀔𑀺𑀲𑁆𑀲𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀼’’’.

‘‘𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲𑁂𑀢𑀁, 𑀫𑁂𑀖𑀺𑀬, 𑀪𑀺𑀓𑁆𑀔𑀼𑀦𑁄 𑀧𑀸𑀝𑀺𑀓𑀗𑁆𑀔𑀁 𑀓𑀮𑁆𑀬𑀸𑀡𑀲𑀳𑀸𑀬𑀲𑁆𑀲 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑀲𑁆𑀲 𑁋 ‘𑀬𑀸𑀬𑀁 𑀓𑀣𑀸 𑀅𑀪𑀺𑀲𑀮𑁆𑀮𑁂𑀔𑀺𑀓𑀸 𑀘𑁂𑀢𑁄𑀯𑀺𑀯𑀭𑀡𑀲𑀧𑁆𑀧𑀸𑀬𑀸, 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀧𑁆𑀧𑀺𑀘𑁆𑀙𑀓𑀣𑀸…𑀧𑁂… 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑀣𑀸, 𑀏𑀯𑀭𑀽𑀧𑀺𑀬𑀸 𑀓𑀣𑀸𑀬 𑀦𑀺𑀓𑀸𑀫𑀮𑀸𑀪𑀻 𑀪𑀯𑀺𑀲𑁆𑀲𑀢𑀺 𑀅𑀓𑀺𑀘𑁆𑀙𑀮𑀸𑀪𑀻 𑀅𑀓𑀲𑀺𑀭𑀮𑀸𑀪𑀻’’’.

‘‘𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲𑁂𑀢𑀁, 𑀫𑁂𑀖𑀺𑀬, 𑀪𑀺𑀓𑁆𑀔𑀼𑀦𑁄 𑀧𑀸𑀝𑀺𑀓𑀗𑁆𑀔𑀁 𑀓𑀮𑁆𑀬𑀸𑀡𑀲𑀳𑀸𑀬𑀲𑁆𑀲 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑀲𑁆𑀲 𑁋 ‘𑀆𑀭𑀤𑁆𑀥𑀯𑀻𑀭𑀺𑀬𑁄 𑀯𑀺𑀳𑀭𑀺𑀲𑁆𑀲𑀢𑀺…𑀧𑁂… 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁄 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼’’’.

‘‘𑀓𑀮𑁆𑀬𑀸𑀡𑀫𑀺𑀢𑁆𑀢𑀲𑁆𑀲𑁂𑀢𑀁, 𑀫𑁂𑀖𑀺𑀬, 𑀪𑀺𑀓𑁆𑀔𑀼𑀦𑁄 𑀧𑀸𑀝𑀺𑀓𑀗𑁆𑀔𑀁 𑀓𑀮𑁆𑀬𑀸𑀡𑀲𑀳𑀸𑀬𑀲𑁆𑀲 𑀓𑀮𑁆𑀬𑀸𑀡𑀲𑀫𑁆𑀧𑀯𑀗𑁆𑀓𑀲𑁆𑀲 𑁋 ‘𑀧𑀜𑁆𑀜𑀯𑀸 𑀪𑀯𑀺𑀲𑁆𑀲𑀢𑀺…𑀧𑁂… 𑀲𑀫𑁆𑀫𑀸𑀤𑀼𑀓𑁆𑀔𑀓𑁆𑀔𑀬𑀕𑀸𑀫𑀺𑀦𑀺𑀬𑀸’’’.

‘‘𑀢𑁂𑀦 𑀘 𑀧𑀦, 𑀫𑁂𑀖𑀺𑀬, 𑀪𑀺𑀓𑁆𑀔𑀼𑀦𑀸 𑀇𑀫𑁂𑀲𑀼 𑀧𑀜𑁆𑀘𑀲𑀼 𑀥𑀫𑁆𑀫𑁂𑀲𑀼 𑀧𑀢𑀺𑀝𑁆𑀞𑀸𑀬 𑀘𑀢𑁆𑀢𑀸𑀭𑁄 𑀥𑀫𑁆𑀫𑀸 𑀉𑀢𑁆𑀢𑀭𑀺 𑀪𑀸𑀯𑁂𑀢𑀩𑁆𑀩𑀸 𑁋 𑀅𑀲𑀼𑀪𑀸 𑀪𑀸𑀯𑁂𑀢𑀩𑁆𑀩𑀸 𑀭𑀸𑀕𑀲𑁆𑀲 𑀧𑀳𑀸𑀦𑀸𑀬, 𑀫𑁂𑀢𑁆𑀢𑀸 𑀪𑀸𑀯𑁂𑀢𑀩𑁆𑀩𑀸 𑀩𑁆𑀬𑀸𑀧𑀸𑀤𑀲𑁆𑀲 𑀧𑀳𑀸𑀦𑀸𑀬, 𑀆𑀦𑀸𑀧𑀸𑀦𑀲𑁆𑀲𑀢𑀺 𑀪𑀸𑀯𑁂𑀢𑀩𑁆𑀩𑀸 𑀯𑀺𑀢𑀓𑁆𑀓𑀼𑀧𑀘𑁆𑀙𑁂𑀤𑀸𑀬, 𑀅𑀦𑀺𑀘𑁆𑀘𑀲𑀜𑁆𑀜𑀸 𑀪𑀸𑀯𑁂𑀢𑀩𑁆𑀩𑀸 𑀅𑀲𑁆𑀫𑀺𑀫𑀸𑀦𑀲𑀫𑀼𑀕𑁆𑀖𑀸𑀢𑀸𑀬. 𑀅𑀦𑀺𑀘𑁆𑀘𑀲𑀜𑁆𑀜𑀺𑀦𑁄, 𑀫𑁂𑀖𑀺𑀬, 𑀅𑀦𑀢𑁆𑀢𑀲𑀜𑁆𑀜𑀸 𑀲𑀡𑁆𑀞𑀸𑀢𑀺. 𑀅𑀦𑀢𑁆𑀢𑀲𑀜𑁆𑀜𑀻 𑀅𑀲𑁆𑀫𑀺𑀫𑀸𑀦𑀲𑀫𑀼𑀕𑁆𑀖𑀸𑀢𑀁 𑀧𑀸𑀧𑀼𑀡𑀸𑀢𑀺 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀦𑀺𑀩𑁆𑀩𑀸𑀦’’𑀦𑁆𑀢𑀺. 𑀢𑀢𑀺𑀬𑀁.

𑁪. 𑀦𑀦𑁆𑀤𑀓𑀲𑀼𑀢𑁆𑀢𑀁

𑁪. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀦𑀦𑁆𑀤𑀓𑁄 𑀉𑀧𑀝𑁆𑀞𑀸𑀦𑀲𑀸𑀮𑀸𑀬𑀁 𑀪𑀺𑀓𑁆𑀔𑀽 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑀺 𑀲𑀫𑀸𑀤𑀧𑁂𑀢𑀺 𑀲𑀫𑀼𑀢𑁆𑀢𑁂𑀚𑁂𑀢𑀺 𑀲𑀫𑁆𑀧𑀳𑀁𑀲𑁂𑀢𑀺. 𑀅𑀣 𑀔𑁄 𑀪𑀕𑀯𑀸 𑀲𑀸𑀬𑀦𑁆𑀳𑀲𑀫𑀬𑀁 𑀧𑀝𑀺𑀲𑀮𑁆𑀮𑀸𑀦𑀸 𑀯𑀼𑀝𑁆𑀞𑀺𑀢𑁄 𑀬𑁂𑀦𑀼𑀧𑀝𑁆𑀞𑀸𑀦𑀲𑀸𑀮𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀩𑀳𑀺𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀅𑀝𑁆𑀞𑀸𑀲𑀺 𑀓𑀣𑀸𑀧𑀭𑀺𑀬𑁄𑀲𑀸𑀦𑀁 𑀆𑀕𑀫𑀬𑀫𑀸𑀦𑁄. 𑀅𑀣 𑀔𑁄 𑀪𑀕𑀯𑀸 𑀓𑀣𑀸𑀧𑀭𑀺𑀬𑁄𑀲𑀸𑀦𑀁 𑀯𑀺𑀤𑀺𑀢𑁆𑀯𑀸 𑀉𑀓𑁆𑀓𑀸𑀲𑁂𑀢𑁆𑀯𑀸 𑀅𑀕𑁆𑀕𑀴𑀁 𑀆𑀓𑁄𑀝𑁂𑀲𑀺. 𑀯𑀺𑀯𑀭𑀺𑀁𑀲𑀼 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀤𑁆𑀯𑀸𑀭𑀁.

𑀅𑀣 𑀔𑁄 𑀪𑀕𑀯𑀸 𑀉𑀧𑀝𑁆𑀞𑀸𑀦𑀲𑀸𑀮𑀁 𑀧𑀯𑀺𑀲𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑀸𑀲𑀦𑁂 𑀦𑀺𑀲𑀻𑀤𑀺. 𑀦𑀺𑀲𑀚𑁆𑀚 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀦𑀦𑁆𑀤𑀓𑀁 𑀏𑀢𑀤𑀯𑁄𑀘 𑁋 ‘‘𑀤𑀻𑀖𑁄 𑀔𑁄 𑀢𑁆𑀬𑀸𑀬𑀁, 𑀦𑀦𑁆𑀤𑀓, 𑀥𑀫𑁆𑀫𑀧𑀭𑀺𑀬𑀸𑀬𑁄 𑀪𑀺𑀓𑁆𑀔𑀽𑀦𑀁 𑀧𑀝𑀺𑀪𑀸𑀲𑀺. 𑀅𑀧𑀺 𑀫𑁂 𑀧𑀺𑀝𑁆𑀞𑀺 𑀆𑀕𑀺𑀮𑀸𑀬𑀢𑀺 𑀩𑀳𑀺𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀞𑀺𑀢𑀲𑁆𑀲 𑀓𑀣𑀸𑀧𑀭𑀺𑀬𑁄𑀲𑀸𑀦𑀁 𑀆𑀕𑀫𑀬𑀫𑀸𑀦𑀲𑁆𑀲𑀸’’𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀆𑀬𑀲𑁆𑀫𑀸 𑀦𑀦𑁆𑀤𑀓𑁄 𑀲𑀸𑀭𑀚𑁆𑀚𑀫𑀸𑀦𑀭𑀽𑀧𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀦 𑀔𑁄 𑀧𑀦 𑀫𑀬𑀁, 𑀪𑀦𑁆𑀢𑁂, 𑀚𑀸𑀦𑀸𑀫 ‘𑀪𑀕𑀯𑀸 𑀩𑀳𑀺𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀞𑀺𑀢𑁄’𑀢𑀺. 𑀲𑀘𑁂 𑀳𑀺 𑀫𑀬𑀁, 𑀪𑀦𑁆𑀢𑁂, 𑀚𑀸𑀦𑁂𑀬𑁆𑀬𑀸𑀫 ‘𑀪𑀕𑀯𑀸 𑀩𑀳𑀺𑀤𑁆𑀯𑀸𑀭𑀓𑁄𑀝𑁆𑀞𑀓𑁂 𑀞𑀺𑀢𑁄’𑀢𑀺, 𑀏𑀢𑁆𑀢𑀓𑀫𑁆𑀧𑀺 ( ) [(𑀥𑀫𑁆𑀫𑀁) 𑀓𑀢𑁆𑀣𑀘𑀺] 𑀦𑁄 𑀦𑀧𑁆𑀧𑀝𑀺𑀪𑀸𑀲𑁂𑀬𑁆𑀬𑀸’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀦𑀦𑁆𑀤𑀓𑀁 𑀲𑀸𑀭𑀚𑁆𑀚𑀫𑀸𑀦𑀭𑀽𑀧𑀁 𑀯𑀺𑀤𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀦𑀦𑁆𑀤𑀓𑀁 𑀏𑀢𑀤𑀯𑁄𑀘 𑁋 ‘‘𑀲𑀸𑀥𑀼, 𑀲𑀸𑀥𑀼, 𑀦𑀦𑁆𑀤𑀓! 𑀏𑀢𑀁 𑀔𑁄, 𑀦𑀦𑁆𑀤𑀓, 𑀢𑀼𑀫𑁆𑀳𑀸𑀓𑀁 𑀧𑀢𑀺𑀭𑀽𑀧𑀁 𑀓𑀼𑀮𑀧𑀼𑀢𑁆𑀢𑀸𑀦𑀁 𑀲𑀤𑁆𑀥𑀸𑀬 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑀸𑀦𑀁, 𑀬𑀁 𑀢𑀼𑀫𑁆𑀳𑁂 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀦𑀺𑀲𑀻𑀤𑁂𑀬𑁆𑀬𑀸𑀣. 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀯𑁄, 𑀦𑀦𑁆𑀤𑀓, 𑀤𑁆𑀯𑀬𑀁 𑀓𑀭𑀡𑀻𑀬𑀁 𑁋 𑀥𑀫𑁆𑀫𑀻 𑀯𑀸 𑀓𑀣𑀸 𑀅𑀭𑀺𑀬𑁄 𑀯𑀸 𑀢𑀼𑀡𑁆𑀳𑀻𑀪𑀸𑀯𑁄. [𑀅. 𑀦𑀺. 𑁮.𑁭𑁧; 𑁯.𑁧] 𑀲𑀤𑁆𑀥𑁄 𑀘, 𑀦𑀦𑁆𑀤𑀓, 𑀪𑀺𑀓𑁆𑀔𑀼 𑀳𑁄𑀢𑀺, 𑀦𑁄 𑀘 𑀲𑀻𑀮𑀯𑀸. 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀅𑀧𑀭𑀺𑀧𑀽𑀭𑁄 𑀳𑁄𑀢𑀺. 𑀢𑁂𑀦 𑀢𑀁 𑀅𑀗𑁆𑀕𑀁 𑀧𑀭𑀺𑀧𑀽𑀭𑁂𑀢𑀩𑁆𑀩𑀁 𑁋 ‘𑀓𑀺𑀦𑁆𑀢𑀸𑀳𑀁 𑀲𑀤𑁆𑀥𑁄 𑀘 𑀅𑀲𑁆𑀲𑀁 𑀲𑀻𑀮𑀯𑀸 𑀘𑀸’𑀢𑀺. 𑀬𑀢𑁄 𑀘 𑀔𑁄, 𑀦𑀦𑁆𑀤𑀓, 𑀪𑀺𑀓𑁆𑀔𑀼 𑀲𑀤𑁆𑀥𑁄 𑀘 𑀳𑁄𑀢𑀺 𑀲𑀻𑀮𑀯𑀸 𑀘, 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀧𑀭𑀺𑀧𑀽𑀭𑁄 𑀳𑁄𑀢𑀺.

‘‘𑀲𑀤𑁆𑀥𑁄 𑀘, 𑀦𑀦𑁆𑀤𑀓, 𑀪𑀺𑀓𑁆𑀔𑀼 𑀳𑁄𑀢𑀺 𑀲𑀻𑀮𑀯𑀸 𑀘, 𑀦𑁄 𑀘 𑀮𑀸𑀪𑀻 𑀅𑀚𑁆𑀛𑀢𑁆𑀢𑀁 𑀘𑁂𑀢𑁄𑀲𑀫𑀸𑀥𑀺𑀲𑁆𑀲. 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀅𑀧𑀭𑀺𑀧𑀽𑀭𑁄 𑀳𑁄𑀢𑀺. 𑀢𑁂𑀦 𑀢𑀁 𑀅𑀗𑁆𑀕𑀁 𑀧𑀭𑀺𑀧𑀽𑀭𑁂𑀢𑀩𑁆𑀩𑀁 𑁋 ‘𑀓𑀺𑀦𑁆𑀢𑀸𑀳𑀁 𑀲𑀤𑁆𑀥𑁄 𑀘 𑀅𑀲𑁆𑀲𑀁 𑀲𑀻𑀮𑀯𑀸 𑀘 𑀮𑀸𑀪𑀻 𑀘 𑀅𑀚𑁆𑀛𑀢𑁆𑀢𑀁 𑀘𑁂𑀢𑁄𑀲𑀫𑀸𑀥𑀺𑀲𑁆𑀲𑀸’𑀢𑀺. 𑀬𑀢𑁄 𑀘 𑀔𑁄, 𑀦𑀦𑁆𑀤𑀓, 𑀪𑀺𑀓𑁆𑀔𑀼 𑀲𑀤𑁆𑀥𑁄 𑀘 𑀳𑁄𑀢𑀺 𑀲𑀻𑀮𑀯𑀸 𑀘 𑀮𑀸𑀪𑀻 𑀘 𑀅𑀚𑁆𑀛𑀢𑁆𑀢𑀁 𑀘𑁂𑀢𑁄𑀲𑀫𑀸𑀥𑀺𑀲𑁆𑀲, 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀧𑀭𑀺𑀧𑀽𑀭𑁄 𑀳𑁄𑀢𑀺.

‘‘𑀲𑀤𑁆𑀥𑁄 𑀘, 𑀦𑀦𑁆𑀤𑀓, 𑀪𑀺𑀓𑁆𑀔𑀼 𑀳𑁄𑀢𑀺 𑀲𑀻𑀮𑀯𑀸 𑀘 𑀮𑀸𑀪𑀻 𑀘 𑀅𑀚𑁆𑀛𑀢𑁆𑀢𑀁 𑀘𑁂𑀢𑁄𑀲𑀫𑀸𑀥𑀺𑀲𑁆𑀲, 𑀦 𑀮𑀸𑀪𑀻 𑀅𑀥𑀺𑀧𑀜𑁆𑀜𑀸𑀥𑀫𑁆𑀫𑀯𑀺𑀧𑀲𑁆𑀲𑀦𑀸𑀬. 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀅𑀧𑀭𑀺𑀧𑀽𑀭𑁄 𑀳𑁄𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀦𑀦𑁆𑀤𑀓, 𑀧𑀸𑀡𑀓𑁄 𑀘𑀢𑀼𑀧𑁆𑀧𑀸𑀤𑀓𑁄 𑀅𑀲𑁆𑀲. 𑀢𑀲𑁆𑀲 𑀏𑀓𑁄 𑀧𑀸𑀤𑁄 𑀑𑀫𑀓𑁄 𑀮𑀸𑀫𑀓𑁄. 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀅𑀧𑀭𑀺𑀧𑀽𑀭𑁄 𑀅𑀲𑁆𑀲. 𑀏𑀯𑀫𑁂𑀯𑀁 𑀔𑁄, 𑀦𑀦𑁆𑀤𑀓, 𑀪𑀺𑀓𑁆𑀔𑀼 𑀲𑀤𑁆𑀥𑁄 𑀘 𑀳𑁄𑀢𑀺 𑀲𑀻𑀮𑀯𑀸 𑀘 𑀮𑀸𑀪𑀻 𑀘 𑀅𑀚𑁆𑀛𑀢𑁆𑀢𑀁 𑀘𑁂𑀢𑁄𑀲𑀫𑀸𑀥𑀺𑀲𑁆𑀲, 𑀦 𑀮𑀸𑀪𑀻 𑀅𑀥𑀺𑀧𑀜𑁆𑀜𑀸𑀥𑀫𑁆𑀫𑀯𑀺𑀧𑀲𑁆𑀲𑀦𑀸𑀬. 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀅𑀧𑀭𑀺𑀧𑀽𑀭𑁄 𑀳𑁄𑀢𑀺. 𑀢𑁂𑀦 𑀢𑀁 𑀅𑀗𑁆𑀕𑀁 𑀧𑀭𑀺𑀧𑀽𑀭𑁂𑀢𑀩𑁆𑀩𑀁 𑁋 ‘𑀓𑀺𑀦𑁆𑀢𑀸𑀳𑀁 𑀲𑀤𑁆𑀥𑁄 𑀘 𑀅𑀲𑁆𑀲𑀁 𑀲𑀻𑀮𑀯𑀸 𑀘 𑀮𑀸𑀪𑀻 𑀘 𑀅𑀚𑁆𑀛𑀢𑁆𑀢𑀁 𑀘𑁂𑀢𑁄𑀲𑀫𑀸𑀥𑀺𑀲𑁆𑀲 𑀮𑀸𑀪𑀻 𑀘 𑀅𑀥𑀺𑀧𑀜𑁆𑀜𑀸𑀥𑀫𑁆𑀫𑀯𑀺𑀧𑀲𑁆𑀲𑀦𑀸𑀬𑀸’’’𑀢𑀺.

‘‘𑀬𑀢𑁄 𑀘 𑀔𑁄, 𑀦𑀦𑁆𑀤𑀓, 𑀪𑀺𑀓𑁆𑀔𑀼 𑀲𑀤𑁆𑀥𑁄 𑀘 𑀳𑁄𑀢𑀺 𑀲𑀻𑀮𑀯𑀸 𑀘 𑀮𑀸𑀪𑀻 𑀘 𑀅𑀚𑁆𑀛𑀢𑁆𑀢𑀁 𑀘𑁂𑀢𑁄𑀲𑀫𑀸𑀥𑀺𑀲𑁆𑀲 𑀮𑀸𑀪𑀻 𑀘 𑀅𑀥𑀺𑀧𑀜𑁆𑀜𑀸𑀥𑀫𑁆𑀫𑀯𑀺𑀧𑀲𑁆𑀲𑀦𑀸𑀬, 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀧𑀭𑀺𑀧𑀽𑀭𑁄 𑀳𑁄𑀢𑀻’’𑀢𑀺. 𑀇𑀤𑀫𑀯𑁄𑀘 𑀪𑀕𑀯𑀸. 𑀇𑀤𑀁 𑀯𑀢𑁆𑀯𑀸𑀦 𑀲𑀼𑀕𑀢𑁄 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀸𑀯𑀺𑀲𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀦𑀦𑁆𑀤𑀓𑁄 𑀅𑀘𑀺𑀭𑀧𑀓𑁆𑀓𑀦𑁆𑀢𑀲𑁆𑀲 𑀪𑀕𑀯𑀢𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀇𑀤𑀸𑀦𑀺, 𑀆𑀯𑀼𑀲𑁄, 𑀪𑀕𑀯𑀸 𑀘𑀢𑀽𑀳𑀺 𑀧𑀤𑁂𑀳𑀺 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀯𑀺𑀳𑀸𑀭𑀁 𑀧𑀯𑀺𑀝𑁆𑀞𑁄 𑁋 ‘𑀲𑀤𑁆𑀥𑁄 𑀘, 𑀦𑀦𑁆𑀤𑀓, 𑀪𑀺𑀓𑁆𑀔𑀼 𑀳𑁄𑀢𑀺, 𑀦𑁄 𑀘 𑀲𑀻𑀮𑀯𑀸. 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀅𑀧𑀭𑀺𑀧𑀽𑀭𑁄 𑀳𑁄𑀢𑀺. 𑀢𑁂𑀦 𑀢𑀁 𑀅𑀗𑁆𑀕𑀁 𑀧𑀭𑀺𑀧𑀽𑀭𑁂𑀢𑀩𑁆𑀩𑀁 𑁋 𑀓𑀺𑀦𑁆𑀢𑀸𑀳𑀁 𑀲𑀤𑁆𑀥𑁄 𑀘 𑀅𑀲𑁆𑀲𑀁 𑀲𑀻𑀮𑀯𑀸 𑀘𑀸’𑀢𑀺. 𑀬𑀢𑁄 𑀘 𑀔𑁄 𑀦𑀦𑁆𑀤𑀓 𑀪𑀺𑀓𑁆𑀔𑀼 𑀲𑀤𑁆𑀥𑁄 𑀘 𑀳𑁄𑀢𑀺 𑀲𑀻𑀮𑀯𑀸 𑀘, 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀧𑀭𑀺𑀧𑀽𑀭𑁄 𑀳𑁄𑀢𑀺. 𑀲𑀤𑁆𑀥𑁄 𑀘 𑀦𑀦𑁆𑀤𑀓 𑀪𑀺𑀓𑁆𑀔𑀼 𑀳𑁄𑀢𑀺 𑀲𑀻𑀮𑀯𑀸 𑀘, 𑀦𑁄 𑀘 𑀮𑀸𑀪𑀻 𑀅𑀚𑁆𑀛𑀢𑁆𑀢𑀁 𑀘𑁂𑀢𑁄𑀲𑀫𑀸𑀥𑀺𑀲𑁆𑀲…𑀧𑁂… 𑀮𑀸𑀪𑀻 𑀘 𑀅𑀚𑁆𑀛𑀢𑁆𑀢𑀁 𑀘𑁂𑀢𑁄𑀲𑀫𑀸𑀥𑀺𑀲𑁆𑀲, 𑀦 𑀮𑀸𑀪𑀻 𑀅𑀥𑀺𑀧𑀜𑁆𑀜𑀸𑀥𑀫𑁆𑀫𑀯𑀺𑀧𑀲𑁆𑀲𑀦𑀸𑀬, 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀅𑀧𑀭𑀺𑀧𑀽𑀭𑁄 𑀳𑁄𑀢𑀺. 𑀲𑁂𑀬𑁆𑀬𑀣𑀸𑀧𑀺 𑀦𑀦𑁆𑀤𑀓 𑀧𑀸𑀡𑀓𑁄 𑀘𑀢𑀼𑀧𑁆𑀧𑀸𑀤𑀓𑁄 𑀅𑀲𑁆𑀲, 𑀢𑀲𑁆𑀲 𑀏𑀓𑁄 𑀧𑀸𑀤𑁄 𑀑𑀫𑀓𑁄 𑀮𑀸𑀫𑀓𑁄, 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀅𑀧𑀭𑀺𑀧𑀽𑀭𑁄 𑀅𑀲𑁆𑀲. 𑀏𑀯𑀫𑁂𑀯𑀁 𑀔𑁄, 𑀦𑀦𑁆𑀤𑀓, 𑀪𑀺𑀓𑁆𑀔𑀼 𑀲𑀤𑁆𑀥𑁄 𑀘 𑀳𑁄𑀢𑀺 𑀲𑀻𑀮𑀯𑀸 𑀘, 𑀮𑀸𑀪𑀻 𑀘 𑀅𑀚𑁆𑀛𑀢𑁆𑀢𑀁 𑀘𑁂𑀢𑁄𑀲𑀫𑀸𑀥𑀺𑀲𑁆𑀲, 𑀦 𑀮𑀸𑀪𑀻 𑀅𑀥𑀺𑀧𑀜𑁆𑀜𑀸𑀥𑀫𑁆𑀫𑀯𑀺𑀧𑀲𑁆𑀲𑀦𑀸𑀬, 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀅𑀧𑀭𑀺𑀧𑀽𑀭𑁄 𑀳𑁄𑀢𑀺, 𑀢𑁂𑀦 𑀢𑀁 𑀅𑀗𑁆𑀕𑀁 𑀧𑀭𑀺𑀧𑀽𑀭𑁂𑀢𑀩𑁆𑀩𑀁 ‘𑀓𑀺𑀦𑁆𑀢𑀸𑀳𑀁 𑀲𑀤𑁆𑀥𑁄 𑀘 𑀅𑀲𑁆𑀲𑀁 𑀲𑀻𑀮𑀯𑀸 𑀘, 𑀮𑀸𑀪𑀻 𑀘 𑀅𑀚𑁆𑀛𑀢𑁆𑀢𑀁 𑀘𑁂𑀢𑁄𑀲𑀫𑀸𑀥𑀺𑀲𑁆𑀲, 𑀮𑀸𑀪𑀻 𑀘 𑀅𑀥𑀺𑀧𑀜𑁆𑀜𑀸𑀥𑀫𑁆𑀫𑀯𑀺𑀧𑀲𑁆𑀲𑀦𑀸𑀬𑀸’𑀢𑀺. 𑀬𑀢𑁄 𑀘 𑀔𑁄, 𑀦𑀦𑁆𑀤𑀓, 𑀪𑀺𑀓𑁆𑀔𑀼 𑀲𑀤𑁆𑀥𑁄 𑀘 𑀳𑁄𑀢𑀺 𑀲𑀻𑀮𑀯𑀸 𑀘 𑀮𑀸𑀪𑀻 𑀘 𑀅𑀚𑁆𑀛𑀢𑁆𑀢𑀁 𑀘𑁂𑀢𑁄𑀲𑀫𑀸𑀥𑀺𑀲𑁆𑀲 𑀮𑀸𑀪𑀻 𑀘 𑀅𑀥𑀺𑀧𑀜𑁆𑀜𑀸𑀥𑀫𑁆𑀫𑀯𑀺𑀧𑀲𑁆𑀲𑀦𑀸𑀬, 𑀏𑀯𑀁 𑀲𑁄 𑀢𑁂𑀦𑀗𑁆𑀕𑁂𑀦 𑀧𑀭𑀺𑀧𑀽𑀭𑁄 𑀳𑁄𑀢𑀻’’𑀢𑀺.

‘‘𑀧𑀜𑁆𑀘𑀺𑀫𑁂, 𑀆𑀯𑀼𑀲𑁄, 𑀆𑀦𑀺𑀲𑀁𑀲𑀸 𑀓𑀸𑀮𑁂𑀦 𑀥𑀫𑁆𑀫𑀲𑁆𑀲𑀯𑀦𑁂 𑀓𑀸𑀮𑁂𑀦 𑀥𑀫𑁆𑀫𑀲𑀸𑀓𑀘𑁆𑀙𑀸𑀬. 𑀓𑀢𑀫𑁂 𑀧𑀜𑁆𑀘? 𑀇𑀥𑀸𑀯𑀼𑀲𑁄, 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁, 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀺. 𑀬𑀣𑀸 𑀬𑀣𑀸, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁, 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀺, 𑀢𑀣𑀸 𑀢𑀣𑀸 𑀲𑁄 𑀲𑀢𑁆𑀣𑀼 𑀧𑀺𑀬𑁄 𑀘 𑀳𑁄𑀢𑀺 𑀫𑀦𑀸𑀧𑁄 𑀘 𑀕𑀭𑀼 𑀘 𑀪𑀸𑀯𑀦𑀻𑀬𑁄 𑀘. 𑀅𑀬𑀁, 𑀆𑀯𑀼𑀲𑁄, 𑀧𑀞𑀫𑁄 𑀆𑀦𑀺𑀲𑀁𑀲𑁄 𑀓𑀸𑀮𑁂𑀦 𑀥𑀫𑁆𑀫𑀲𑁆𑀲𑀯𑀦𑁂 𑀓𑀸𑀮𑁂𑀦 𑀥𑀫𑁆𑀫𑀲𑀸𑀓𑀘𑁆𑀙𑀸𑀬.

‘‘𑀧𑀼𑀦 𑀘𑀧𑀭𑀁, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁, 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀺. 𑀬𑀣𑀸 𑀬𑀣𑀸, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀆𑀤𑀺𑀓𑀮𑁆𑀬𑀸𑀡𑀁…𑀧𑁂… 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀺, 𑀢𑀣𑀸 𑀢𑀣𑀸 𑀲𑁄 𑀢𑀲𑁆𑀫𑀺𑀁 𑀥𑀫𑁆𑀫𑁂 𑀅𑀢𑁆𑀣𑀧𑁆𑀧𑀝𑀺𑀲𑀁𑀯𑁂𑀤𑀻 𑀘 𑀳𑁄𑀢𑀺 𑀥𑀫𑁆𑀫𑀧𑁆𑀧𑀝𑀺𑀲𑀁𑀯𑁂𑀤𑀻 𑀘. 𑀅𑀬𑀁, 𑀆𑀯𑀼𑀲𑁄, 𑀤𑀼𑀢𑀺𑀬𑁄 𑀆𑀦𑀺𑀲𑀁𑀲𑁄 𑀓𑀸𑀮𑁂𑀦 𑀥𑀫𑁆𑀫𑀲𑁆𑀲𑀯𑀦𑁂 𑀓𑀸𑀮𑁂𑀦 𑀥𑀫𑁆𑀫𑀲𑀸𑀓𑀘𑁆𑀙𑀸𑀬.

‘‘𑀧𑀼𑀦 𑀘𑀧𑀭𑀁, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁, 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀺. 𑀬𑀣𑀸 𑀬𑀣𑀸, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀆𑀤𑀺𑀓𑀮𑁆𑀬𑀸𑀡𑀁…𑀧𑁂… 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀺, 𑀢𑀣𑀸 𑀢𑀣𑀸 𑀲𑁄 𑀢𑀲𑁆𑀫𑀺𑀁 𑀥𑀫𑁆𑀫𑁂 𑀕𑀫𑁆𑀪𑀻𑀭𑀁 𑀅𑀢𑁆𑀣𑀧𑀤𑀁 𑀧𑀜𑁆𑀜𑀸𑀬 𑀅𑀢𑀺𑀯𑀺𑀚𑁆𑀛 𑀧𑀲𑁆𑀲𑀢𑀺. 𑀅𑀬𑀁, 𑀆𑀯𑀼𑀲𑁄, 𑀢𑀢𑀺𑀬𑁄 𑀆𑀦𑀺𑀲𑀁𑀲𑁄 𑀓𑀸𑀮𑁂𑀦 𑀥𑀫𑁆𑀫𑀲𑁆𑀲𑀯𑀦𑁂 𑀓𑀸𑀮𑁂𑀦 𑀥𑀫𑁆𑀫𑀲𑀸𑀓𑀘𑁆𑀙𑀸𑀬.

‘‘𑀧𑀼𑀦 𑀘𑀧𑀭𑀁, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀆𑀤𑀺𑀓𑀮𑁆𑀬𑀸𑀡𑀁…𑀧𑁂… 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀺. 𑀬𑀣𑀸 𑀬𑀣𑀸, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀆𑀤𑀺𑀓𑀮𑁆𑀬𑀸𑀡𑀁…𑀧𑁂… 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀺, 𑀢𑀣𑀸 𑀢𑀣𑀸 𑀦𑀁 𑀲𑀩𑁆𑀭𑀳𑁆𑀫𑀘𑀸𑀭𑀻 𑀉𑀢𑁆𑀢𑀭𑀺 𑀲𑀫𑁆𑀪𑀸𑀯𑁂𑀦𑁆𑀢𑀺 𑁋 ‘𑀅𑀤𑁆𑀥𑀸 𑀅𑀬𑀫𑀸𑀬𑀲𑁆𑀫𑀸 𑀧𑀢𑁆𑀢𑁄 𑀯𑀸 𑀧𑀚𑁆𑀚𑀢𑀺 𑀯𑀸’. 𑀅𑀬𑀁, 𑀆𑀯𑀼𑀲𑁄, 𑀘𑀢𑀼𑀢𑁆𑀣𑁄 𑀆𑀦𑀺𑀲𑀁𑀲𑁄 𑀓𑀸𑀮𑁂𑀦 𑀥𑀫𑁆𑀫𑀲𑁆𑀲𑀯𑀦𑁂 𑀓𑀸𑀮𑁂𑀦 𑀥𑀫𑁆𑀫𑀲𑀸𑀓𑀘𑁆𑀙𑀸𑀬.

‘‘𑀧𑀼𑀦 𑀘𑀧𑀭𑀁, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁, 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀺. 𑀬𑀣𑀸 𑀬𑀣𑀸, 𑀆𑀯𑀼𑀲𑁄, 𑀪𑀺𑀓𑁆𑀔𑀼 𑀪𑀺𑀓𑁆𑀔𑀽𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀆𑀤𑀺𑀓𑀮𑁆𑀬𑀸𑀡𑀁 𑀫𑀚𑁆𑀛𑁂𑀓𑀮𑁆𑀬𑀸𑀡𑀁 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀁 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁, 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀺, 𑀢𑀢𑁆𑀣 𑀬𑁂 𑀔𑁄 𑀪𑀺𑀓𑁆𑀔𑀽 𑀲𑁂𑀔𑀸 𑀅𑀧𑁆𑀧𑀢𑁆𑀢𑀫𑀸𑀦𑀲𑀸 𑀅𑀦𑀼𑀢𑁆𑀢𑀭𑀁 𑀬𑁄𑀕𑀓𑁆𑀔𑁂𑀫𑀁 𑀧𑀢𑁆𑀣𑀬𑀫𑀸𑀦𑀸 𑀯𑀺𑀳𑀭𑀦𑁆𑀢𑀺, 𑀢𑁂 𑀢𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀯𑀻𑀭𑀺𑀬𑀁 𑀆𑀭𑀪𑀦𑁆𑀢𑀺 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬. 𑀬𑁂 𑀧𑀦 𑀢𑀢𑁆𑀣 𑀪𑀺𑀓𑁆𑀔𑀽 𑀅𑀭𑀳𑀦𑁆𑀢𑁄 𑀔𑀻𑀡𑀸𑀲𑀯𑀸 𑀯𑀼𑀲𑀺𑀢𑀯𑀦𑁆𑀢𑁄 𑀓𑀢𑀓𑀭𑀡𑀻𑀬𑀸 𑀑𑀳𑀺𑀢𑀪𑀸𑀭𑀸 𑀅𑀦𑀼𑀧𑁆𑀧𑀢𑁆𑀢𑀲𑀤𑀢𑁆𑀣𑀸 𑀧𑀭𑀺𑀓𑁆𑀔𑀻𑀡𑀪𑀯𑀲𑀁𑀬𑁄𑀚𑀦𑀸 𑀲𑀫𑁆𑀫𑀤𑀜𑁆𑀜𑀸𑀯𑀺𑀫𑀼𑀢𑁆𑀢𑀸, 𑀢𑁂 𑀢𑀁 𑀥𑀫𑁆𑀫𑀁 𑀲𑀼𑀢𑁆𑀯𑀸 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀁𑀬𑁂𑀯 𑀅𑀦𑀼𑀬𑀼𑀢𑁆𑀢𑀸 𑀯𑀺𑀳𑀭𑀦𑁆𑀢𑀺. 𑀅𑀬𑀁, 𑀆𑀯𑀼𑀲𑁄, 𑀧𑀜𑁆𑀘𑀫𑁄 𑀆𑀦𑀺𑀲𑀁𑀲𑁄 𑀓𑀸𑀮𑁂𑀦 𑀥𑀫𑁆𑀫𑀲𑁆𑀲𑀯𑀦𑁂 𑀓𑀸𑀮𑁂𑀦 𑀥𑀫𑁆𑀫𑀲𑀸𑀓𑀘𑁆𑀙𑀸𑀬. 𑀇𑀫𑁂 𑀔𑁄, 𑀆𑀯𑀼𑀲𑁄, 𑀧𑀜𑁆𑀘 𑀆𑀦𑀺𑀲𑀁𑀲𑀸 𑀓𑀸𑀮𑁂𑀦 𑀥𑀫𑁆𑀫𑀲𑁆𑀲𑀯𑀦𑁂 𑀓𑀸𑀮𑁂𑀦 𑀥𑀫𑁆𑀫𑀲𑀸𑀓𑀘𑁆𑀙𑀸𑀬𑀸’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀩𑀮𑀲𑀼𑀢𑁆𑀢𑀁

𑁫. ‘‘𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀩𑀮𑀸𑀦𑀺. 𑀓𑀢𑀫𑀸𑀦𑀺 𑀘𑀢𑁆𑀢𑀸𑀭𑀺? 𑀧𑀜𑁆𑀜𑀸𑀩𑀮𑀁, 𑀯𑀻𑀭𑀺𑀬𑀩𑀮𑀁, 𑀅𑀦𑀯𑀚𑁆𑀚𑀩𑀮𑀁, 𑀲𑀗𑁆𑀕𑀸𑀳𑀩𑀮𑀁. 𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀜𑁆𑀜𑀸𑀩𑀮𑀁? 𑀬𑁂 𑀥𑀫𑁆𑀫𑀸 𑀓𑀼𑀲𑀮𑀸 𑀓𑀼𑀲𑀮𑀲𑀗𑁆𑀔𑀸𑀢𑀸 𑀬𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸 𑀅𑀓𑀼𑀲𑀮𑀲𑀗𑁆𑀔𑀸𑀢𑀸 𑀬𑁂 𑀥𑀫𑁆𑀫𑀸 𑀲𑀸𑀯𑀚𑁆𑀚𑀸 𑀲𑀸𑀯𑀚𑁆𑀚𑀲𑀗𑁆𑀔𑀸𑀢𑀸 𑀬𑁂 𑀥𑀫𑁆𑀫𑀸 𑀅𑀦𑀯𑀚𑁆𑀚𑀸 𑀅𑀦𑀯𑀚𑁆𑀚𑀲𑀗𑁆𑀔𑀸𑀢𑀸 𑀬𑁂 𑀥𑀫𑁆𑀫𑀸 𑀓𑀡𑁆𑀳𑀸 𑀓𑀡𑁆𑀳𑀲𑀗𑁆𑀔𑀸𑀢𑀸 𑀬𑁂 𑀥𑀫𑁆𑀫𑀸 𑀲𑀼𑀓𑁆𑀓𑀸 𑀲𑀼𑀓𑁆𑀓𑀲𑀗𑁆𑀔𑀸𑀢𑀸 𑀬𑁂 𑀥𑀫𑁆𑀫𑀸 𑀲𑁂𑀯𑀺𑀢𑀩𑁆𑀩𑀸 𑀲𑁂𑀯𑀺𑀢𑀩𑁆𑀩𑀲𑀗𑁆𑀔𑀸𑀢𑀸 𑀬𑁂 𑀥𑀫𑁆𑀫𑀸 𑀅𑀲𑁂𑀯𑀺𑀢𑀩𑁆𑀩𑀸 𑀅𑀲𑁂𑀯𑀺𑀢𑀩𑁆𑀩𑀲𑀗𑁆𑀔𑀸𑀢𑀸 𑀬𑁂 𑀥𑀫𑁆𑀫𑀸 𑀦𑀸𑀮𑀫𑀭𑀺𑀬𑀸 𑀦𑀸𑀮𑀫𑀭𑀺𑀬𑀲𑀗𑁆𑀔𑀸𑀢𑀸 𑀬𑁂 𑀥𑀫𑁆𑀫𑀸 𑀅𑀮𑀫𑀭𑀺𑀬𑀸 𑀅𑀮𑀫𑀭𑀺𑀬𑀲𑀗𑁆𑀔𑀸𑀢𑀸, 𑀢𑁆𑀬𑀸𑀲𑁆𑀲 𑀥𑀫𑁆𑀫𑀸 𑀧𑀜𑁆𑀜𑀸𑀬 𑀯𑁄𑀤𑀺𑀝𑁆𑀞𑀸 𑀳𑁄𑀦𑁆𑀢𑀺 𑀯𑁄𑀘𑀭𑀺𑀢𑀸. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀜𑀸𑀩𑀮𑀁.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀯𑀻𑀭𑀺𑀬𑀩𑀮𑀁? 𑀬𑁂 𑀥𑀫𑁆𑀫𑀸 𑀅𑀓𑀼𑀲𑀮𑀸 𑀅𑀓𑀼𑀲𑀮𑀲𑀗𑁆𑀔𑀸𑀢𑀸 𑀬𑁂 𑀥𑀫𑁆𑀫𑀸 𑀲𑀸𑀯𑀚𑁆𑀚𑀸 𑀲𑀸𑀯𑀚𑁆𑀚𑀲𑀗𑁆𑀔𑀸𑀢𑀸 𑀬𑁂 𑀥𑀫𑁆𑀫𑀸 𑀓𑀡𑁆𑀳𑀸 𑀓𑀡𑁆𑀳𑀲𑀗𑁆𑀔𑀸𑀢𑀸 𑀬𑁂 𑀥𑀫𑁆𑀫𑀸 𑀅𑀲𑁂𑀯𑀺𑀢𑀩𑁆𑀩𑀸 𑀅𑀲𑁂𑀯𑀺𑀢𑀩𑁆𑀩𑀲𑀗𑁆𑀔𑀸𑀢𑀸 𑀬𑁂 𑀥𑀫𑁆𑀫𑀸 𑀦𑀸𑀮𑀫𑀭𑀺𑀬𑀸 𑀦𑀸𑀮𑀫𑀭𑀺𑀬𑀲𑀗𑁆𑀔𑀸𑀢𑀸, 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬 𑀙𑀦𑁆𑀤𑀁 𑀚𑀦𑁂𑀢𑀺 𑀯𑀸𑀬𑀫𑀢𑀺 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺. 𑀬𑁂 𑀥𑀫𑁆𑀫𑀸 𑀓𑀼𑀲𑀮𑀸 𑀓𑀼𑀲𑀮𑀲𑀗𑁆𑀔𑀸𑀢𑀸 𑀬𑁂 𑀥𑀫𑁆𑀫𑀸 𑀅𑀦𑀯𑀚𑁆𑀚𑀸 𑀅𑀦𑀯𑀚𑁆𑀚𑀲𑀗𑁆𑀔𑀸𑀢𑀸 𑀬𑁂 𑀥𑀫𑁆𑀫𑀸 𑀲𑀼𑀓𑁆𑀓𑀸 𑀲𑀼𑀓𑁆𑀓𑀲𑀗𑁆𑀔𑀸𑀢𑀸 𑀬𑁂 𑀥𑀫𑁆𑀫𑀸 𑀲𑁂𑀯𑀺𑀢𑀩𑁆𑀩𑀸 𑀲𑁂𑀯𑀺𑀢𑀩𑁆𑀩𑀲𑀗𑁆𑀔𑀸𑀢𑀸 𑀬𑁂 𑀥𑀫𑁆𑀫𑀸 𑀅𑀮𑀫𑀭𑀺𑀬𑀸 𑀅𑀮𑀫𑀭𑀺𑀬𑀲𑀗𑁆𑀔𑀸𑀢𑀸, 𑀢𑁂𑀲𑀁 𑀥𑀫𑁆𑀫𑀸𑀦𑀁 𑀧𑀝𑀺𑀮𑀸𑀪𑀸𑀬 𑀙𑀦𑁆𑀤𑀁 𑀚𑀦𑁂𑀢𑀺 𑀯𑀸𑀬𑀫𑀢𑀺 𑀯𑀻𑀭𑀺𑀬𑀁 𑀆𑀭𑀪𑀢𑀺 𑀘𑀺𑀢𑁆𑀢𑀁 𑀧𑀕𑁆𑀕𑀡𑁆𑀳𑀸𑀢𑀺 𑀧𑀤𑀳𑀢𑀺. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀯𑀻𑀭𑀺𑀬𑀩𑀮𑀁.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀅𑀦𑀯𑀚𑁆𑀚𑀩𑀮𑀁? 𑀇𑀥, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀅𑀦𑀯𑀚𑁆𑀚𑁂𑀦 𑀓𑀸𑀬𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀦𑀯𑀚𑁆𑀚𑁂𑀦 𑀯𑀘𑀻𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺, 𑀅𑀦𑀯𑀚𑁆𑀚𑁂𑀦 𑀫𑀦𑁄𑀓𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀦𑀯𑀚𑁆𑀚𑀩𑀮𑀁.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀲𑀗𑁆𑀕𑀸𑀳𑀩𑀮𑀁? 𑀘𑀢𑁆𑀢𑀸𑀭𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀕𑀳𑀯𑀢𑁆𑀣𑀽𑀦𑀺 𑁋 𑀤𑀸𑀦𑀁, 𑀧𑁂𑀬𑁆𑀬𑀯𑀚𑁆𑀚𑀁, 𑀅𑀢𑁆𑀣𑀘𑀭𑀺𑀬𑀸, 𑀲𑀫𑀸𑀦𑀢𑁆𑀢𑀢𑀸. 𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀤𑀸𑀦𑀸𑀦𑀁 𑀬𑀤𑀺𑀤𑀁 𑀥𑀫𑁆𑀫𑀤𑀸𑀦𑀁. 𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀧𑁂𑀬𑁆𑀬𑀯𑀚𑁆𑀚𑀸𑀦𑀁 𑀬𑀤𑀺𑀤𑀁 𑀅𑀢𑁆𑀣𑀺𑀓𑀲𑁆𑀲 𑀑𑀳𑀺𑀢𑀲𑁄𑀢𑀲𑁆𑀲 𑀧𑀼𑀦𑀧𑁆𑀧𑀼𑀦𑀁 𑀥𑀫𑁆𑀫𑀁 𑀤𑁂𑀲𑁂𑀢𑀺. 𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀅𑀢𑁆𑀣𑀘𑀭𑀺𑀬𑀸𑀦𑀁 𑀬𑀤𑀺𑀤𑀁 𑀅𑀲𑁆𑀲𑀤𑁆𑀥𑀁 𑀲𑀤𑁆𑀥𑀸𑀲𑀫𑁆𑀧𑀤𑀸𑀬 𑀲𑀫𑀸𑀤𑀧𑁂𑀢𑀺 𑀦𑀺𑀯𑁂𑀲𑁂𑀢𑀺 𑀧𑀢𑀺𑀝𑁆𑀞𑀸𑀧𑁂𑀢𑀺, 𑀤𑀼𑀲𑁆𑀲𑀻𑀮𑀁 𑀲𑀻𑀮𑀲𑀫𑁆𑀧𑀤𑀸𑀬… 𑀧𑁂… 𑀫𑀘𑁆𑀙𑀭𑀺𑀁 𑀘𑀸𑀕𑀲𑀫𑁆𑀧𑀤𑀸𑀬…𑀧𑁂… 𑀤𑀼𑀧𑁆𑀧𑀜𑁆𑀜𑀁 𑀧𑀜𑁆𑀜𑀸𑀲𑀫𑁆𑀧𑀤𑀸𑀬 𑀲𑀫𑀸𑀤𑀧𑁂𑀢𑀺 𑀦𑀺𑀯𑁂𑀲𑁂𑀢𑀺 𑀧𑀢𑀺𑀝𑁆𑀞𑀸𑀧𑁂𑀢𑀺. 𑀏𑀢𑀤𑀕𑁆𑀕𑀁, 𑀪𑀺𑀓𑁆𑀔𑀯𑁂, 𑀲𑀫𑀸𑀦𑀢𑁆𑀢𑀢𑀸𑀦𑀁 𑀬𑀤𑀺𑀤𑀁 𑀲𑁄𑀢𑀸𑀧𑀦𑁆𑀦𑁄 𑀲𑁄𑀢𑀸𑀧𑀦𑁆𑀦𑀲𑁆𑀲 𑀲𑀫𑀸𑀦𑀢𑁆𑀢𑁄, 𑀲𑀓𑀤𑀸𑀕𑀸𑀫𑀻 𑀲𑀓𑀤𑀸𑀕𑀸𑀫𑀺𑀲𑁆𑀲 𑀲𑀫𑀸𑀦𑀢𑁆𑀢𑁄, 𑀅𑀦𑀸𑀕𑀸𑀫𑀻 𑀅𑀦𑀸𑀕𑀸𑀫𑀺𑀲𑁆𑀲 𑀲𑀫𑀸𑀦𑀢𑁆𑀢𑁄, 𑀅𑀭𑀳𑀸 𑀅𑀭𑀳𑀢𑁄 𑀲𑀫𑀸𑀦𑀢𑁆𑀢𑁄. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀗𑁆𑀕𑀸𑀳𑀩𑀮𑀁. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑁆𑀢𑀸𑀭𑀺 𑀩𑀮𑀸𑀦𑀺.

‘‘𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀽𑀳𑀺 𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀭𑀺𑀬𑀲𑀸𑀯𑀓𑁄 𑀧𑀜𑁆𑀘 𑀪𑀬𑀸𑀦𑀺 𑀲𑀫𑀢𑀺𑀓𑁆𑀓𑀦𑁆𑀢𑁄 𑀳𑁄𑀢𑀺. 𑀓𑀢𑀫𑀸𑀦𑀺 𑀧𑀜𑁆𑀘? 𑀆𑀚𑀻𑀯𑀺𑀓𑀪𑀬𑀁, 𑀅𑀲𑀺𑀮𑁄𑀓𑀪𑀬𑀁, 𑀧𑀭𑀺𑀲𑀲𑀸𑀭𑀚𑁆𑀚𑀪𑀬𑀁, 𑀫𑀭𑀡𑀪𑀬𑀁, 𑀤𑀼𑀕𑁆𑀕𑀢𑀺𑀪𑀬𑀁. 𑀲 𑀔𑁄 𑀲𑁄, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀦𑀸𑀳𑀁 𑀆𑀚𑀻𑀯𑀺𑀓𑀪𑀬𑀲𑁆𑀲 𑀪𑀸𑀬𑀸𑀫𑀺. 𑀓𑀺𑀲𑁆𑀲𑀸𑀳𑀁 𑀆𑀚𑀻𑀯𑀺𑀓𑀪𑀬𑀲𑁆𑀲 𑀪𑀸𑀬𑀺𑀲𑁆𑀲𑀸𑀫𑀺? 𑀅𑀢𑁆𑀣𑀺 𑀫𑁂 𑀘𑀢𑁆𑀢𑀸𑀭𑀺 𑀩𑀮𑀸𑀦𑀺 𑁋 𑀧𑀜𑁆𑀜𑀸𑀩𑀮𑀁, 𑀯𑀻𑀭𑀺𑀬𑀩𑀮𑀁, 𑀅𑀦𑀯𑀚𑁆𑀚𑀩𑀮𑀁, 𑀲𑀗𑁆𑀕𑀸𑀳𑀩𑀮𑀁. 𑀤𑀼𑀧𑁆𑀧𑀜𑁆𑀜𑁄 𑀔𑁄 𑀆𑀚𑀻𑀯𑀺𑀓𑀪𑀬𑀲𑁆𑀲 𑀪𑀸𑀬𑁂𑀬𑁆𑀬. 𑀓𑀼𑀲𑀻𑀢𑁄 𑀆𑀚𑀻𑀯𑀺𑀓𑀪𑀬𑀲𑁆𑀲 𑀪𑀸𑀬𑁂𑀬𑁆𑀬. 𑀲𑀸𑀯𑀚𑁆𑀚𑀓𑀸𑀬𑀓𑀫𑁆𑀫𑀦𑁆𑀢𑀯𑀘𑀻𑀓𑀫𑁆𑀫𑀦𑁆𑀢𑀫𑀦𑁄𑀓𑀫𑁆𑀫𑀦𑁆𑀢𑁄 𑀆𑀚𑀻𑀯𑀺𑀓𑀪𑀬𑀲𑁆𑀲 𑀪𑀸𑀬𑁂𑀬𑁆𑀬. 𑀅𑀲𑀗𑁆𑀕𑀸𑀳𑀓𑁄 𑀆𑀚𑀻𑀯𑀺𑀓𑀪𑀬𑀲𑁆𑀲 𑀪𑀸𑀬𑁂𑀬𑁆𑀬. 𑀦𑀸𑀳𑀁 𑀅𑀲𑀺𑀮𑁄𑀓𑀪𑀬𑀲𑁆𑀲 𑀪𑀸𑀬𑀸𑀫𑀺…𑀧𑁂… 𑀦𑀸𑀳𑀁 𑀧𑀭𑀺𑀲𑀲𑀸𑀭𑀚𑁆𑀚𑀪𑀬𑀲𑁆𑀲 𑀪𑀸𑀬𑀸𑀫𑀺…𑀧𑁂… 𑀦𑀸𑀳𑀁 𑀫𑀭𑀡𑀪𑀬𑀲𑁆𑀲 𑀪𑀸𑀬𑀸𑀫𑀺…𑀧𑁂… 𑀦𑀸𑀳𑀁 𑀤𑀼𑀕𑁆𑀕𑀢𑀺𑀪𑀬𑀲𑁆𑀲 𑀪𑀸𑀬𑀸𑀫𑀺. 𑀓𑀺𑀲𑁆𑀲𑀸𑀳𑀁 𑀤𑀼𑀕𑁆𑀕𑀢𑀺𑀪𑀬𑀲𑁆𑀲 𑀪𑀸𑀬𑀺𑀲𑁆𑀲𑀸𑀫𑀺? 𑀅𑀢𑁆𑀣𑀺 𑀫𑁂 𑀘𑀢𑁆𑀢𑀸𑀭𑀺 𑀩𑀮𑀸𑀦𑀺 𑁋 𑀧𑀜𑁆𑀜𑀸𑀩𑀮𑀁, 𑀯𑀻𑀭𑀺𑀬𑀩𑀮𑀁, 𑀅𑀦𑀯𑀚𑁆𑀚𑀩𑀮𑀁, 𑀲𑀗𑁆𑀕𑀸𑀳𑀩𑀮𑀁. 𑀤𑀼𑀧𑁆𑀧𑀜𑁆𑀜𑁄 𑀔𑁄 𑀤𑀼𑀕𑁆𑀕𑀢𑀺𑀪𑀬𑀲𑁆𑀲 𑀪𑀸𑀬𑁂𑀬𑁆𑀬. 𑀓𑀼𑀲𑀻𑀢𑁄 𑀤𑀼𑀕𑁆𑀕𑀢𑀺𑀪𑀬𑀲𑁆𑀲 𑀪𑀸𑀬𑁂𑀬𑁆𑀬. 𑀲𑀸𑀯𑀚𑁆𑀚𑀓𑀸𑀬𑀓𑀫𑁆𑀫𑀦𑁆𑀢𑀯𑀘𑀻𑀓𑀫𑁆𑀫𑀦𑁆𑀢𑀫𑀦𑁄𑀓𑀫𑁆𑀫𑀦𑁆𑀢𑁄 𑀤𑀼𑀕𑁆𑀕𑀢𑀺𑀪𑀬𑀲𑁆𑀲 𑀪𑀸𑀬𑁂𑀬𑁆𑀬. 𑀅𑀲𑀗𑁆𑀕𑀸𑀳𑀓𑁄 𑀤𑀼𑀕𑁆𑀕𑀢𑀺𑀪𑀬𑀲𑁆𑀲 𑀪𑀸𑀬𑁂𑀬𑁆𑀬. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀘𑀢𑀽𑀳𑀺 𑀩𑀮𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀅𑀭𑀺𑀬𑀲𑀸𑀯𑀓𑁄 𑀇𑀫𑀸𑀦𑀺 𑀧𑀜𑁆𑀘 𑀪𑀬𑀸𑀦𑀺 𑀲𑀫𑀢𑀺𑀓𑁆𑀓𑀦𑁆𑀢𑁄 𑀳𑁄𑀢𑀻’’𑀢𑀺. 𑀧𑀜𑁆𑀘𑀫𑀁.

𑁬. 𑀲𑁂𑀯𑀦𑀸𑀲𑀼𑀢𑁆𑀢𑀁

𑁬. 𑀢𑀢𑁆𑀭 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺…𑀧𑁂… 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀏𑀢𑀤𑀯𑁄𑀘 𑁋

‘‘𑀧𑀼𑀕𑁆𑀕𑀮𑁄𑀧𑀺, 𑀆𑀯𑀼𑀲𑁄, 𑀤𑀼𑀯𑀺𑀥𑁂𑀦 𑀯𑁂𑀤𑀺𑀢𑀩𑁆𑀩𑁄 𑁋 𑀲𑁂𑀯𑀺𑀢𑀩𑁆𑀩𑁄𑀧𑀺 𑀅𑀲𑁂𑀯𑀺𑀢𑀩𑁆𑀩𑁄𑀧𑀺. 𑀘𑀻𑀯𑀭𑀫𑁆𑀧𑀺, 𑀆𑀯𑀼𑀲𑁄, 𑀤𑀼𑀯𑀺𑀥𑁂𑀦 𑀯𑁂𑀤𑀺𑀢𑀩𑁆𑀩𑀁 𑁋 𑀲𑁂𑀯𑀺𑀢𑀩𑁆𑀩𑀫𑁆𑀧𑀺 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀺. 𑀧𑀺𑀡𑁆𑀟𑀧𑀸𑀢𑁄𑀧𑀺, 𑀆𑀯𑀼𑀲𑁄, 𑀤𑀼𑀯𑀺𑀥𑁂𑀦 𑀯𑁂𑀤𑀺𑀢𑀩𑁆𑀩𑁄 𑁋 𑀲𑁂𑀯𑀺𑀢𑀩𑁆𑀩𑁄𑀧𑀺 𑀅𑀲𑁂𑀯𑀺𑀢𑀩𑁆𑀩𑁄𑀧𑀺. 𑀲𑁂𑀦𑀸𑀲𑀦𑀫𑁆𑀧𑀺, 𑀆𑀯𑀼𑀲𑁄, 𑀤𑀼𑀯𑀺𑀥𑁂𑀦 𑀯𑁂𑀤𑀺𑀢𑀩𑁆𑀩𑀁 𑁋 𑀲𑁂𑀯𑀺𑀢𑀩𑁆𑀩𑀫𑁆𑀧𑀺 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀺. 𑀕𑀸𑀫𑀦𑀺𑀕𑀫𑁄𑀧𑀺, 𑀆𑀯𑀼𑀲𑁄, 𑀤𑀼𑀯𑀺𑀥𑁂𑀦 𑀯𑁂𑀤𑀺𑀢𑀩𑁆𑀩𑁄 𑁋 𑀲𑁂𑀯𑀺𑀢𑀩𑁆𑀩𑁄𑀧𑀺 𑀅𑀲𑁂𑀯𑀺𑀢𑀩𑁆𑀩𑁄𑀧𑀺. 𑀚𑀦𑀧𑀤𑀧𑀤𑁂𑀲𑁄𑀧𑀺 𑀆𑀯𑀼𑀲𑁄, 𑀤𑀼𑀯𑀺𑀥𑁂𑀦 𑀯𑁂𑀤𑀺𑀢𑀩𑁆𑀩𑁄 𑁋 𑀲𑁂𑀯𑀺𑀢𑀩𑁆𑀩𑁄𑀧𑀺 𑀅𑀲𑁂𑀯𑀺𑀢𑀩𑁆𑀩𑁄𑀧𑀺.

‘‘‘𑀧𑀼𑀕𑁆𑀕𑀮𑁄𑀧𑀺, 𑀆𑀯𑀼𑀲𑁄, 𑀤𑀼𑀯𑀺𑀥𑁂𑀦 𑀯𑁂𑀤𑀺𑀢𑀩𑁆𑀩𑁄 𑁋 𑀲𑁂𑀯𑀺𑀢𑀩𑁆𑀩𑁄𑀧𑀺 𑀅𑀲𑁂𑀯𑀺𑀢𑀩𑁆𑀩𑁄𑀧𑀻’𑀢𑀺, 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀢𑀢𑁆𑀣 𑀬𑀁 𑀚𑀜𑁆𑀜𑀸 𑀧𑀼𑀕𑁆𑀕𑀮𑀁 𑁋 ‘𑀇𑀫𑀁 𑀔𑁄 𑀫𑁂 𑀧𑀼𑀕𑁆𑀕𑀮𑀁 𑀲𑁂𑀯𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺; 𑀬𑁂 𑀘 𑀔𑁄 𑀫𑁂 𑀧𑀩𑁆𑀩𑀚𑀺𑀢𑁂𑀦 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑀸 𑀲𑀫𑀼𑀤𑀸𑀦𑁂𑀢𑀩𑁆𑀩𑀸 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸 𑀢𑁂 𑀘 𑀓𑀲𑀺𑀭𑁂𑀦 𑀲𑀫𑀼𑀤𑀸𑀕𑀘𑁆𑀙𑀦𑁆𑀢𑀺; 𑀬𑀲𑁆𑀲 𑀘𑀫𑁆𑀳𑀺 𑀅𑀢𑁆𑀣𑀸𑀬 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄 𑀲𑁄 𑀘 𑀫𑁂 𑀲𑀸𑀫𑀜𑁆𑀜𑀢𑁆𑀣𑁄 𑀦 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀻’𑀢𑀺, 𑀢𑁂𑀦𑀸𑀯𑀼𑀲𑁄, 𑀧𑀼𑀕𑁆𑀕𑀮𑁂𑀦 𑀲𑁄 𑀧𑀼𑀕𑁆𑀕𑀮𑁄 𑀭𑀢𑁆𑀢𑀺𑀪𑀸𑀕𑀁 𑀯𑀸 𑀤𑀺𑀯𑀲𑀪𑀸𑀕𑀁 𑀯𑀸 𑀲𑀗𑁆𑀔𑀸𑀧𑀺 𑀅𑀦𑀸𑀧𑀼𑀘𑁆𑀙𑀸 𑀧𑀓𑁆𑀓𑀫𑀺𑀢𑀩𑁆𑀩𑀁 𑀦𑀸𑀦𑀼𑀩𑀦𑁆𑀥𑀺𑀢𑀩𑁆𑀩𑁄.

‘‘𑀢𑀢𑁆𑀣 𑀬𑀁 𑀚𑀜𑁆𑀜𑀸 𑀧𑀼𑀕𑁆𑀕𑀮𑀁 𑁋 ‘𑀇𑀫𑀁 𑀔𑁄 𑀫𑁂 𑀧𑀼𑀕𑁆𑀕𑀮𑀁 𑀲𑁂𑀯𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺; 𑀬𑁂 𑀘 𑀔𑁄 𑀫𑁂 𑀧𑀩𑁆𑀩𑀚𑀺𑀢𑁂𑀦 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑀸 𑀲𑀫𑀼𑀤𑀸𑀦𑁂𑀢𑀩𑁆𑀩𑀸 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸 𑀢𑁂 𑀘 𑀅𑀧𑁆𑀧𑀓𑀲𑀺𑀭𑁂𑀦 𑀲𑀫𑀼𑀤𑀸𑀕𑀘𑁆𑀙𑀦𑁆𑀢𑀺; 𑀬𑀲𑁆𑀲 𑀘𑀫𑁆𑀳𑀺 𑀅𑀢𑁆𑀣𑀸𑀬 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄 𑀲𑁄 𑀘 𑀫𑁂 𑀲𑀸𑀫𑀜𑁆𑀜𑀢𑁆𑀣𑁄 𑀦 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀻’𑀢𑀺, 𑀢𑁂𑀦𑀸𑀯𑀼𑀲𑁄, 𑀧𑀼𑀕𑁆𑀕𑀮𑁂𑀦 𑀲𑁄 𑀧𑀼𑀕𑁆𑀕𑀮𑁄 𑀲𑀗𑁆𑀔𑀸𑀧𑀺 𑀅𑀦𑀸𑀧𑀼𑀘𑁆𑀙𑀸 𑀧𑀓𑁆𑀓𑀫𑀺𑀢𑀩𑁆𑀩𑀁 𑀦𑀸𑀦𑀼𑀩𑀦𑁆𑀥𑀺𑀢𑀩𑁆𑀩𑁄.

‘‘𑀢𑀢𑁆𑀣 𑀬𑀁 𑀚𑀜𑁆𑀜𑀸 𑀧𑀼𑀕𑁆𑀕𑀮𑀁 𑁋 ‘𑀇𑀫𑀁 𑀔𑁄 𑀫𑁂 𑀧𑀼𑀕𑁆𑀕𑀮𑀁 𑀲𑁂𑀯𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀺; 𑀬𑁂 𑀘 𑀔𑁄 𑀫𑁂 𑀧𑀩𑁆𑀩𑀚𑀺𑀢𑁂𑀦 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑀸 𑀲𑀫𑀼𑀤𑀸𑀦𑁂𑀢𑀩𑁆𑀩𑀸 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸 𑀢𑁂 𑀘 𑀓𑀲𑀺𑀭𑁂𑀦 𑀲𑀫𑀼𑀤𑀸𑀕𑀘𑁆𑀙𑀦𑁆𑀢𑀺; 𑀬𑀲𑁆𑀲 𑀘𑀫𑁆𑀳𑀺 𑀅𑀢𑁆𑀣𑀸𑀬 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄 𑀲𑁄 𑀘 𑀫𑁂 𑀲𑀸𑀫𑀜𑁆𑀜𑀢𑁆𑀣𑁄 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀻’𑀢𑀺, 𑀢𑁂𑀦𑀸𑀯𑀼𑀲𑁄, 𑀧𑀼𑀕𑁆𑀕𑀮𑁂𑀦 𑀲𑁄 𑀧𑀼𑀕𑁆𑀕𑀮𑁄 𑀲𑀗𑁆𑀔𑀸𑀧𑀺 𑀅𑀦𑀼𑀩𑀦𑁆𑀥𑀺𑀢𑀩𑁆𑀩𑁄 𑀦 𑀧𑀓𑁆𑀓𑀫𑀺𑀢𑀩𑁆𑀩𑀁.

‘‘𑀢𑀢𑁆𑀣 𑀬𑀁 𑀚𑀜𑁆𑀜𑀸 𑀧𑀼𑀕𑁆𑀕𑀮𑀁 𑁋 ‘𑀇𑀫𑀁 𑀔𑁄 𑀫𑁂 𑀧𑀼𑀕𑁆𑀕𑀮𑀁 𑀲𑁂𑀯𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀺; 𑀬𑁂 𑀘 𑀔𑁄 𑀫𑁂 𑀧𑀩𑁆𑀩𑀚𑀺𑀢𑁂𑀦 𑀚𑀻𑀯𑀺𑀢𑀧𑀭𑀺𑀓𑁆𑀔𑀸𑀭𑀸 𑀲𑀫𑀼𑀤𑀸𑀦𑁂𑀢𑀩𑁆𑀩𑀸 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀲𑁂𑀦𑀸𑀲𑀦𑀕𑀺𑀮𑀸𑀦𑀧𑀘𑁆𑀘𑀬𑀪𑁂𑀲𑀚𑁆𑀚𑀧𑀭𑀺𑀓𑁆𑀔𑀸𑀭𑀸 𑀢𑁂 𑀘 𑀅𑀧𑁆𑀧𑀓𑀲𑀺𑀭𑁂𑀦 𑀲𑀫𑀼𑀤𑀸𑀕𑀘𑁆𑀙𑀦𑁆𑀢𑀺; 𑀬𑀲𑁆𑀲 𑀘𑀫𑁆𑀳𑀺 𑀅𑀢𑁆𑀣𑀸𑀬 𑀅𑀕𑀸𑀭𑀲𑁆𑀫𑀸 𑀅𑀦𑀕𑀸𑀭𑀺𑀬𑀁 𑀧𑀩𑁆𑀩𑀚𑀺𑀢𑁄 𑀲𑁄 𑀘 𑀫𑁂 𑀲𑀸𑀫𑀜𑁆𑀜𑀢𑁆𑀣𑁄 𑀪𑀸𑀯𑀦𑀸𑀧𑀸𑀭𑀺𑀧𑀽𑀭𑀺𑀁 𑀕𑀘𑁆𑀙𑀢𑀻’𑀢𑀺, 𑀢𑁂𑀦𑀸𑀯𑀼𑀲𑁄, 𑀧𑀼𑀕𑁆𑀕𑀮𑁂𑀦 𑀲𑁄 𑀧𑀼𑀕𑁆𑀕𑀮𑁄 𑀬𑀸𑀯𑀚𑀻𑀯𑀁 𑀅𑀦𑀼𑀩𑀦𑁆𑀥𑀺𑀢𑀩𑁆𑀩𑁄 𑀦 𑀧𑀓𑁆𑀓𑀫𑀺𑀢𑀩𑁆𑀩𑀁 𑀅𑀧𑀺 𑀧𑀦𑀼𑀚𑁆𑀚𑀫𑀸𑀦𑁂𑀦 [𑀧𑀡𑀼𑀚𑁆𑀚𑀫𑀸𑀦𑁂𑀦 (?)]. ‘𑀧𑀼𑀕𑁆𑀕𑀮𑁄𑀧𑀺, 𑀆𑀯𑀼𑀲𑁄, 𑀤𑀼𑀯𑀺𑀥𑁂𑀦 𑀯𑁂𑀤𑀺𑀢𑀩𑁆𑀩𑁄 𑁋 𑀲𑁂𑀯𑀺𑀢𑀩𑁆𑀩𑁄𑀧𑀺 𑀅𑀲𑁂𑀯𑀺𑀢𑀩𑁆𑀩𑁄𑀧𑀻’𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁, 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘‘𑀘𑀻𑀯𑀭𑀫𑁆𑀧𑀺, 𑀆𑀯𑀼𑀲𑁄, 𑀤𑀼𑀯𑀺𑀥𑁂𑀦 𑀯𑁂𑀤𑀺𑀢𑀩𑁆𑀩𑀁 𑁋 𑀲𑁂𑀯𑀺𑀢𑀩𑁆𑀩𑀫𑁆𑀧𑀺 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀻’𑀢𑀺, 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀢𑀢𑁆𑀣 𑀬𑀁 𑀚𑀜𑁆𑀜𑀸 𑀘𑀻𑀯𑀭𑀁 𑁋 ‘𑀇𑀤𑀁 𑀔𑁄 𑀫𑁂 𑀘𑀻𑀯𑀭𑀁 𑀲𑁂𑀯𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀻’𑀢𑀺, 𑀏𑀯𑀭𑀽𑀧𑀁 𑀘𑀻𑀯𑀭𑀁 𑀦 𑀲𑁂𑀯𑀺𑀢𑀩𑁆𑀩𑀁. 𑀢𑀢𑁆𑀣 𑀬𑀁 𑀚𑀜𑁆𑀜𑀸 𑀘𑀻𑀯𑀭𑀁 𑁋 ‘𑀇𑀤𑀁 𑀔𑁄 𑀫𑁂 𑀘𑀻𑀯𑀭𑀁 𑀲𑁂𑀯𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀻’𑀢𑀺, 𑀏𑀯𑀭𑀽𑀧𑀁 𑀘𑀻𑀯𑀭𑀁 𑀲𑁂𑀯𑀺𑀢𑀩𑁆𑀩𑀁. ‘𑀘𑀻𑀯𑀭𑀫𑁆𑀧𑀺, 𑀆𑀯𑀼𑀲𑁄, 𑀤𑀼𑀯𑀺𑀥𑁂𑀦 𑀯𑁂𑀤𑀺𑀢𑀩𑁆𑀩𑀁 𑁋 𑀲𑁂𑀯𑀺𑀢𑀩𑁆𑀩𑀫𑁆𑀧𑀺 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀻’𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁, 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘‘𑀧𑀺𑀡𑁆𑀟𑀧𑀸𑀢𑁄𑀧𑀺, 𑀆𑀯𑀼𑀲𑁄, 𑀤𑀼𑀯𑀺𑀥𑁂𑀦 𑀯𑁂𑀤𑀺𑀢𑀩𑁆𑀩𑁄 𑁋 𑀲𑁂𑀯𑀺𑀢𑀩𑁆𑀩𑁄𑀧𑀺 𑀅𑀲𑁂𑀯𑀺𑀢𑀩𑁆𑀩𑁄𑀧𑀻’𑀢𑀺, 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀢𑀢𑁆𑀣 𑀬𑀁 𑀚𑀜𑁆𑀜𑀸 𑀧𑀺𑀡𑁆𑀟𑀧𑀸𑀢𑀁 𑁋 ‘𑀇𑀫𑀁 𑀔𑁄 𑀫𑁂 𑀧𑀺𑀡𑁆𑀟𑀧𑀸𑀢𑀁 𑀲𑁂𑀯𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀻’𑀢𑀺, 𑀏𑀯𑀭𑀽𑀧𑁄 𑀧𑀺𑀡𑁆𑀟𑀧𑀸𑀢𑁄 𑀦 𑀲𑁂𑀯𑀺𑀢𑀩𑁆𑀩𑁄. 𑀢𑀢𑁆𑀣 𑀬𑀁 𑀚𑀜𑁆𑀜𑀸 𑀧𑀺𑀡𑁆𑀟𑀧𑀸𑀢𑀁 𑁋 ‘𑀇𑀫𑀁 𑀔𑁄 𑀫𑁂 𑀧𑀺𑀡𑁆𑀟𑀧𑀸𑀢𑀁 𑀲𑁂𑀯𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀻’𑀢𑀺, 𑀏𑀯𑀭𑀽𑀧𑁄 𑀧𑀺𑀡𑁆𑀟𑀧𑀸𑀢𑁄 𑀲𑁂𑀯𑀺𑀢𑀩𑁆𑀩𑁄. ‘𑀧𑀺𑀡𑁆𑀟𑀧𑀸𑀢𑁄𑀧𑀺, 𑀆𑀯𑀼𑀲𑁄, 𑀤𑀼𑀯𑀺𑀥𑁂𑀦 𑀯𑁂𑀤𑀺𑀢𑀩𑁆𑀩𑁄 𑁋 𑀲𑁂𑀯𑀺𑀢𑀩𑁆𑀩𑁄𑀧𑀺 𑀅𑀲𑁂𑀯𑀺𑀢𑀩𑁆𑀩𑁄𑀧𑀻’𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁, 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘‘𑀲𑁂𑀦𑀸𑀲𑀦𑀫𑁆𑀧𑀺, 𑀆𑀯𑀼𑀲𑁄, 𑀤𑀼𑀯𑀺𑀥𑁂𑀦 𑀯𑁂𑀤𑀺𑀢𑀩𑁆𑀩𑀁 𑁋 𑀲𑁂𑀯𑀺𑀢𑀩𑁆𑀩𑀫𑁆𑀧𑀺 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀻’𑀢𑀺, 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀢𑀢𑁆𑀣 𑀬𑀁 𑀚𑀜𑁆𑀜𑀸 𑀲𑁂𑀦𑀸𑀲𑀦𑀁 𑁋 ‘‘𑀇𑀤𑀁 𑀔𑁄 𑀫𑁂 𑀲𑁂𑀦𑀸𑀲𑀦𑀁 𑀲𑁂𑀯𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀻’𑀢𑀺, 𑀏𑀯𑀭𑀽𑀧𑀁 𑀲𑁂𑀦𑀸𑀲𑀦𑀁 𑀦 𑀲𑁂𑀯𑀺𑀢𑀩𑁆𑀩𑀁. 𑀢𑀢𑁆𑀣 𑀬𑀁 𑀚𑀜𑁆𑀜𑀸 𑀲𑁂𑀦𑀸𑀲𑀦𑀁 𑁋 ‘𑀇𑀤𑀁 𑀔𑁄 𑀫𑁂 𑀲𑁂𑀦𑀸𑀲𑀦𑀁 𑀲𑁂𑀯𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀻’𑀢𑀺, 𑀏𑀯𑀭𑀽𑀧𑀁 𑀲𑁂𑀦𑀸𑀲𑀦𑀁 𑀲𑁂𑀯𑀺𑀢𑀩𑁆𑀩𑀁. ‘𑀲𑁂𑀦𑀸𑀲𑀦𑀫𑁆𑀧𑀺, 𑀆𑀯𑀼𑀲𑁄, 𑀤𑀼𑀯𑀺𑀥𑁂𑀦 𑀯𑁂𑀤𑀺𑀢𑀩𑁆𑀩𑀁 𑁋 𑀲𑁂𑀯𑀺𑀢𑀩𑁆𑀩𑀫𑁆𑀧𑀺 𑀅𑀲𑁂𑀯𑀺𑀢𑀩𑁆𑀩𑀫𑁆𑀧𑀻’𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁, 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘‘𑀕𑀸𑀫𑀦𑀺𑀕𑀫𑁄𑀧𑀺, 𑀆𑀯𑀼𑀲𑁄, 𑀤𑀼𑀯𑀺𑀥𑁂𑀦 𑀯𑁂𑀤𑀺𑀢𑀩𑁆𑀩𑁄 𑁋 𑀲𑁂𑀯𑀺𑀢𑀩𑁆𑀩𑁄𑀧𑀺 𑀅𑀲𑁂𑀯𑀺𑀢𑀩𑁆𑀩𑁄𑀧𑀻’𑀢𑀺, 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀢𑀢𑁆𑀣 𑀬𑀁 𑀚𑀜𑁆𑀜𑀸 𑀕𑀸𑀫𑀦𑀺𑀕𑀫𑀁 𑁋 ‘𑀇𑀫𑀁 𑀔𑁄 𑀫𑁂 𑀕𑀸𑀫𑀦𑀺𑀕𑀫𑀁 𑀲𑁂𑀯𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀻’𑀢𑀺, 𑀏𑀯𑀭𑀽𑀧𑁄 𑀕𑀸𑀫𑀦𑀺𑀕𑀫𑁄 𑀦 𑀲𑁂𑀯𑀺𑀢𑀩𑁆𑀩𑁄. 𑀢𑀢𑁆𑀣 𑀬𑀁 𑀚𑀜𑁆𑀜𑀸 𑀕𑀸𑀫𑀦𑀺𑀕𑀫𑀁 𑁋 ‘𑀇𑀫𑀁 𑀔𑁄, 𑀫𑁂 𑀕𑀸𑀫𑀦𑀺𑀕𑀫𑀁 𑀲𑁂𑀯𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀻’𑀢𑀺, 𑀏𑀯𑀭𑀽𑀧𑁄 𑀕𑀸𑀫𑀦𑀺𑀕𑀫𑁄 𑀲𑁂𑀯𑀺𑀢𑀩𑁆𑀩𑁄. ‘𑀕𑀸𑀫𑀦𑀺𑀕𑀫𑁄𑀧𑀺, 𑀆𑀯𑀼𑀲𑁄, 𑀤𑀼𑀯𑀺𑀥𑁂𑀦 𑀯𑁂𑀤𑀺𑀢𑀩𑁆𑀩𑁄 𑁋 𑀲𑁂𑀯𑀺𑀢𑀩𑁆𑀩𑁄𑀧𑀺 𑀅𑀲𑁂𑀯𑀺𑀢𑀩𑁆𑀩𑁄𑀧𑀻’𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁, 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘‘𑀚𑀦𑀧𑀤𑀧𑀤𑁂𑀲𑁄𑀧𑀺, 𑀆𑀯𑀼𑀲𑁄, 𑀤𑀼𑀯𑀺𑀥𑁂𑀦 𑀯𑁂𑀤𑀺𑀢𑀩𑁆𑀩𑁄 𑁋 𑀲𑁂𑀯𑀺𑀢𑀩𑁆𑀩𑁄𑀧𑀺 𑀅𑀲𑁂𑀯𑀺𑀢𑀩𑁆𑀩𑁄𑀧𑀻’𑀢𑀺, 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀢𑀢𑁆𑀣 𑀬𑀁 𑀚𑀜𑁆𑀜𑀸 𑀚𑀦𑀧𑀤𑀧𑀤𑁂𑀲𑀁 𑁋 ‘𑀇𑀫𑀁 𑀔𑁄 𑀫𑁂 𑀚𑀦𑀧𑀤𑀧𑀤𑁂𑀲𑀁 𑀲𑁂𑀯𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀻’𑀢𑀺, 𑀏𑀯𑀭𑀽𑀧𑁄 𑀚𑀦𑀧𑀤𑀧𑀤𑁂𑀲𑁄 𑀦 𑀲𑁂𑀯𑀺𑀢𑀩𑁆𑀩𑁄. 𑀢𑀢𑁆𑀣 𑀬𑀁 𑀚𑀜𑁆𑀜𑀸 𑀚𑀦𑀧𑀤𑀧𑀤𑁂𑀲𑀁 𑁋 ‘𑀇𑀫𑀁 𑀔𑁄 𑀫𑁂 𑀚𑀦𑀧𑀤𑀧𑀤𑁂𑀲𑀁 𑀲𑁂𑀯𑀢𑁄 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀧𑀭𑀺𑀳𑀸𑀬𑀦𑁆𑀢𑀺, 𑀓𑀼𑀲𑀮𑀸 𑀥𑀫𑁆𑀫𑀸 𑀅𑀪𑀺𑀯𑀟𑁆𑀠𑀦𑁆𑀢𑀻’𑀢𑀺, 𑀏𑀯𑀭𑀽𑀧𑁄 𑀚𑀦𑀧𑀤𑀧𑀤𑁂𑀲𑁄 𑀲𑁂𑀯𑀺𑀢𑀩𑁆𑀩𑁄. ‘𑀚𑀦𑀧𑀤𑀧𑀤𑁂𑀲𑁄𑀧𑀺, 𑀆𑀯𑀼𑀲𑁄, 𑀤𑀼𑀯𑀺𑀥𑁂𑀦 𑀯𑁂𑀤𑀺𑀢𑀩𑁆𑀩𑁄 𑁋 𑀲𑁂𑀯𑀺𑀢𑀩𑁆𑀩𑁄𑀧𑀺 𑀅𑀲𑁂𑀯𑀺𑀢𑀩𑁆𑀩𑁄𑀧𑀻’𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁, 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢’’𑀦𑁆𑀢𑀺. 𑀙𑀝𑁆𑀞𑀁.

𑁭. 𑀲𑀼𑀢𑀯𑀸𑀲𑀼𑀢𑁆𑀢𑀁

𑁭. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂. 𑀅𑀣 𑀔𑁄 𑀲𑀼𑀢𑀯𑀸 𑀧𑀭𑀺𑀩𑁆𑀩𑀸𑀚𑀓𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑀼𑀢𑀯𑀸 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀏𑀓𑀫𑀺𑀤𑀸𑀳𑀁, 𑀪𑀦𑁆𑀢𑁂, 𑀲𑀫𑀬𑀁 𑀪𑀕𑀯𑀸 𑀇𑀥𑁂𑀯 𑀭𑀸𑀚𑀕𑀳𑁂 𑀯𑀺𑀳𑀭𑀸𑀫𑀺 𑀕𑀺𑀭𑀺𑀩𑁆𑀩𑀚𑁂. 𑀢𑀢𑁆𑀭 𑀫𑁂, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀲𑀼𑀢𑀁 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑁋 ‘𑀬𑁄 𑀲𑁄, 𑀲𑀼𑀢𑀯𑀸 [𑀲𑀼𑀢𑀯 (𑀲𑁆𑀬𑀸.)], 𑀪𑀺𑀓𑁆𑀔𑀼 𑀅𑀭𑀳𑀁 𑀔𑀻𑀡𑀸𑀲𑀯𑁄 𑀯𑀼𑀲𑀺𑀢𑀯𑀸 𑀓𑀢𑀓𑀭𑀡𑀻𑀬𑁄 𑀑𑀳𑀺𑀢𑀪𑀸𑀭𑁄 𑀅𑀦𑀼𑀧𑁆𑀧𑀢𑁆𑀢𑀲𑀤𑀢𑁆𑀣𑁄 𑀧𑀭𑀺𑀓𑁆𑀔𑀻𑀡𑀪𑀯𑀲𑀁𑀬𑁄𑀚𑀦𑁄 𑀲𑀫𑁆𑀫𑀤𑀜𑁆𑀜𑀸𑀯𑀺𑀫𑀼𑀢𑁆𑀢𑁄, 𑀅𑀪𑀩𑁆𑀩𑁄 𑀲𑁄 𑀧𑀜𑁆𑀘 𑀞𑀸𑀦𑀸𑀦𑀺 𑀅𑀚𑁆𑀛𑀸𑀘𑀭𑀺𑀢𑀼𑀁 𑁋 𑀅𑀪𑀩𑁆𑀩𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀲𑀜𑁆𑀘𑀺𑀘𑁆𑀘 𑀧𑀸𑀡𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀼𑀁, 𑀅𑀪𑀩𑁆𑀩𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀅𑀤𑀺𑀦𑁆𑀦𑀁 𑀣𑁂𑀬𑁆𑀬𑀲𑀗𑁆𑀔𑀸𑀢𑀁 𑀆𑀤𑀸𑀢𑀼𑀁, 𑀅𑀪𑀩𑁆𑀩𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺𑀢𑀼𑀁, 𑀅𑀪𑀩𑁆𑀩𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀲𑀫𑁆𑀧𑀚𑀸𑀦𑀫𑀼𑀲𑀸 [𑀲𑀫𑁆𑀧𑀚𑀸𑀦𑀁 𑀫𑀼𑀲𑀸 (𑀓. 𑀲𑀻.)] 𑀪𑀸𑀲𑀺𑀢𑀼𑀁, 𑀅𑀪𑀩𑁆𑀩𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀲𑀦𑁆𑀦𑀺𑀥𑀺𑀓𑀸𑀭𑀓𑀁 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀲𑁂𑀬𑁆𑀬𑀣𑀸𑀧𑀺 𑀧𑀼𑀩𑁆𑀩𑁂 𑀅𑀕𑀸𑀭𑀺𑀬𑀪𑀽𑀢𑁄’𑀢𑀺. 𑀓𑀘𑁆𑀘𑀺 𑀫𑁂𑀢𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀼𑀲𑁆𑀲𑀼𑀢𑀁 𑀲𑀼𑀕𑁆𑀕𑀳𑀺𑀢𑀁 𑀲𑀼𑀫𑀦𑀲𑀺𑀓𑀢𑀁 𑀲𑀽𑀧𑀥𑀸𑀭𑀺𑀢’’𑀦𑁆𑀢𑀺?

‘‘𑀢𑀕𑁆𑀖 𑀢𑁂 𑀏𑀢𑀁, 𑀲𑀼𑀢𑀯𑀸, 𑀲𑀼𑀲𑁆𑀲𑀼𑀢𑀁 𑀲𑀼𑀕𑁆𑀕𑀳𑀺𑀢𑀁 𑀲𑀼𑀫𑀦𑀲𑀺𑀓𑀢𑀁 𑀲𑀽𑀧𑀥𑀸𑀭𑀺𑀢𑀁. 𑀧𑀼𑀩𑁆𑀩𑁂 𑀘𑀸𑀳𑀁, 𑀲𑀼𑀢𑀯𑀸, 𑀏𑀢𑀭𑀳𑀺 𑀘 𑀏𑀯𑀁 𑀯𑀤𑀸𑀫𑀺 𑁋 ‘𑀬𑁄 𑀲𑁄 𑀪𑀺𑀓𑁆𑀔𑀼 𑀅𑀭𑀳𑀁 𑀔𑀻𑀡𑀸𑀲𑀯𑁄 𑀯𑀼𑀲𑀺𑀢𑀯𑀸 𑀓𑀢𑀓𑀭𑀡𑀻𑀬𑁄 𑀑𑀳𑀺𑀢𑀪𑀸𑀭𑁄 𑀅𑀦𑀼𑀧𑁆𑀧𑀢𑁆𑀢𑀲𑀤𑀢𑁆𑀣𑁄 𑀧𑀭𑀺𑀓𑁆𑀔𑀻𑀡𑀪𑀯𑀲𑀁𑀬𑁄𑀚𑀦𑁄 𑀲𑀫𑁆𑀫𑀤𑀜𑁆𑀜𑀸𑀯𑀺𑀫𑀼𑀢𑁆𑀢𑁄, 𑀅𑀪𑀩𑁆𑀩𑁄 𑀲𑁄 𑀦𑀯 𑀞𑀸𑀦𑀸𑀦𑀺 𑀅𑀚𑁆𑀛𑀸𑀘𑀭𑀺𑀢𑀼𑀁 𑁋 𑀅𑀪𑀩𑁆𑀩𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀲𑀜𑁆𑀘𑀺𑀘𑁆𑀘 𑀧𑀸𑀡𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀼𑀁, 𑀅𑀪𑀩𑁆𑀩𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀅𑀤𑀺𑀦𑁆𑀦𑀁 𑀣𑁂𑀬𑁆𑀬𑀲𑀗𑁆𑀔𑀸𑀢𑀁 𑀆𑀤𑀸𑀢𑀼𑀁, 𑀅𑀪𑀩𑁆𑀩𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺𑀢𑀼𑀁, 𑀅𑀪𑀩𑁆𑀩𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀺𑀢𑀼𑀁, 𑀅𑀪𑀩𑁆𑀩𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀲𑀦𑁆𑀦𑀺𑀥𑀺𑀓𑀸𑀭𑀓𑀁 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀲𑁂𑀬𑁆𑀬𑀣𑀸𑀧𑀺 𑀧𑀼𑀩𑁆𑀩𑁂 𑀅𑀕𑀸𑀭𑀺𑀬𑀪𑀽𑀢𑁄, 𑀅𑀪𑀩𑁆𑀩𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀙𑀦𑁆𑀤𑀸𑀕𑀢𑀺𑀁 𑀕𑀦𑁆𑀢𑀼𑀁, 𑀅𑀪𑀩𑁆𑀩𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀤𑁄𑀲𑀸𑀕𑀢𑀺𑀁 𑀕𑀦𑁆𑀢𑀼𑀁, 𑀅𑀪𑀩𑁆𑀩𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀫𑁄𑀳𑀸𑀕𑀢𑀺𑀁 𑀕𑀦𑁆𑀢𑀼𑀁, 𑀅𑀪𑀩𑁆𑀩𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀪𑀬𑀸𑀕𑀢𑀺𑀁 𑀕𑀦𑁆𑀢𑀼𑀁’. 𑀧𑀼𑀩𑁆𑀩𑁂 𑀘𑀸𑀳𑀁, 𑀲𑀼𑀢𑀯𑀸, 𑀏𑀢𑀭𑀳𑀺 𑀘 𑀏𑀯𑀁 𑀯𑀤𑀸𑀫𑀺 𑁋 ‘𑀬𑁄 𑀲𑁄 𑀪𑀺𑀓𑁆𑀔𑀼 𑀅𑀭𑀳𑀁 𑀔𑀻𑀡𑀸𑀲𑀯𑁄 𑀯𑀼𑀲𑀺𑀢𑀯𑀸 𑀓𑀢𑀓𑀭𑀡𑀻𑀬𑁄 𑀑𑀳𑀺𑀢𑀪𑀸𑀭𑁄 𑀅𑀦𑀼𑀧𑁆𑀧𑀢𑁆𑀢𑀲𑀤𑀢𑁆𑀣𑁄 𑀧𑀭𑀺𑀓𑁆𑀔𑀻𑀡𑀪𑀯𑀲𑀁𑀬𑁄𑀚𑀦𑁄 𑀲𑀫𑁆𑀫𑀤𑀜𑁆𑀜𑀸𑀯𑀺𑀫𑀼𑀢𑁆𑀢𑁄, 𑀅𑀪𑀩𑁆𑀩𑁄 𑀲𑁄 𑀇𑀫𑀸𑀦𑀺 𑀦𑀯 𑀞𑀸𑀦𑀸𑀦𑀺 𑀅𑀚𑁆𑀛𑀸𑀘𑀭𑀺𑀢𑀼’’’𑀦𑁆𑀢𑀺. 𑀲𑀢𑁆𑀢𑀫𑀁.

𑁮. 𑀲𑀚𑁆𑀛𑀲𑀼𑀢𑁆𑀢𑀁

𑁮. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂. 𑀅𑀣 𑀔𑁄 𑀲𑀚𑁆𑀛𑁄 𑀧𑀭𑀺𑀩𑁆𑀩𑀸𑀚𑀓𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀲𑀚𑁆𑀛𑁄 𑀧𑀭𑀺𑀩𑁆𑀩𑀸𑀚𑀓𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀏𑀓𑀫𑀺𑀤𑀸𑀳𑀁, 𑀪𑀦𑁆𑀢𑁂, 𑀲𑀫𑀬𑀁 𑀪𑀕𑀯𑀸 𑀇𑀥𑁂𑀯 𑀭𑀸𑀚𑀕𑀳𑁂 𑀯𑀺𑀳𑀭𑀸𑀫𑀺 𑀕𑀺𑀭𑀺𑀩𑁆𑀩𑀚𑁂. 𑀢𑀢𑁆𑀭 𑀫𑁂, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀲𑀼𑀢𑀁 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑁋 ‘𑀬𑁄 𑀲𑁄, 𑀲𑀚𑁆𑀛, 𑀪𑀺𑀓𑁆𑀔𑀼 𑀅𑀭𑀳𑀁 𑀔𑀻𑀡𑀸𑀲𑀯𑁄 𑀯𑀼𑀲𑀺𑀢𑀯𑀸 𑀓𑀢𑀓𑀭𑀡𑀻𑀬𑁄 𑀑𑀳𑀺𑀢𑀪𑀸𑀭𑁄 𑀅𑀦𑀼𑀧𑁆𑀧𑀢𑁆𑀢𑀲𑀤𑀢𑁆𑀣𑁄 𑀧𑀭𑀺𑀓𑁆𑀔𑀻𑀡𑀪𑀯𑀲𑀁𑀬𑁄𑀚𑀦𑁄 𑀲𑀫𑁆𑀫𑀤𑀜𑁆𑀜𑀸𑀯𑀺𑀫𑀼𑀢𑁆𑀢𑁄, 𑀅𑀪𑀩𑁆𑀩𑁄 𑀲𑁄 𑀧𑀜𑁆𑀘 𑀞𑀸𑀦𑀸𑀦𑀺 𑀅𑀚𑁆𑀛𑀸𑀘𑀭𑀺𑀢𑀼𑀁 𑁋 𑀅𑀪𑀩𑁆𑀩𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀲𑀜𑁆𑀘𑀺𑀘𑁆𑀘 𑀧𑀸𑀡𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀼𑀁, 𑀅𑀪𑀩𑁆𑀩𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀅𑀤𑀺𑀦𑁆𑀦𑀁 𑀣𑁂𑀬𑁆𑀬𑀲𑀗𑁆𑀔𑀸𑀢𑀁 𑀆𑀤𑀸𑀢𑀼𑀁, 𑀅𑀪𑀩𑁆𑀩𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺𑀢𑀼𑀁, 𑀅𑀪𑀩𑁆𑀩𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀺𑀢𑀼𑀁, 𑀅𑀪𑀩𑁆𑀩𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀲𑀦𑁆𑀦𑀺𑀥𑀺𑀓𑀸𑀭𑀓𑀁 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀲𑁂𑀬𑁆𑀬𑀣𑀸𑀧𑀺 𑀧𑀼𑀩𑁆𑀩𑁂 𑀅𑀕𑀸𑀭𑀺𑀬𑀪𑀽𑀢𑁄’𑀢𑀺. 𑀓𑀘𑁆𑀘𑀺 𑀫𑁂𑀢𑀁, 𑀪𑀦𑁆𑀢𑁂, 𑀪𑀕𑀯𑀢𑁄 𑀲𑀼𑀲𑁆𑀲𑀼𑀢𑀁 𑀲𑀼𑀕𑁆𑀕𑀳𑀺𑀢𑀁 𑀲𑀼𑀫𑀦𑀲𑀺𑀓𑀢𑀁 𑀲𑀽𑀧𑀥𑀸𑀭𑀺𑀢’’𑀦𑁆𑀢𑀺?

‘‘𑀢𑀕𑁆𑀖 𑀢𑁂 𑀏𑀢𑀁, 𑀲𑀚𑁆𑀛, 𑀲𑀼𑀲𑁆𑀲𑀼𑀢𑀁 𑀲𑀼𑀕𑁆𑀕𑀳𑀺𑀢𑀁 𑀲𑀼𑀫𑀦𑀲𑀺𑀓𑀢𑀁 𑀲𑀽𑀧𑀥𑀸𑀭𑀺𑀢𑀁. 𑀧𑀼𑀩𑁆𑀩𑁂 𑀘𑀸𑀳𑀁, 𑀲𑀚𑁆𑀛, 𑀏𑀢𑀭𑀳𑀺 𑀘 𑀏𑀯𑀁 𑀯𑀤𑀸𑀫𑀺 𑁋 ‘𑀬𑁄 𑀲𑁄 𑀪𑀺𑀓𑁆𑀔𑀼 𑀅𑀭𑀳𑀁 𑀔𑀻𑀡𑀸𑀲𑀯𑁄 𑀯𑀼𑀲𑀺𑀢𑀯𑀸 𑀓𑀢𑀓𑀭𑀡𑀻𑀬𑁄 𑀑𑀳𑀺𑀢𑀪𑀸𑀭𑁄 𑀅𑀦𑀼𑀧𑁆𑀧𑀢𑁆𑀢𑀲𑀤𑀢𑁆𑀣𑁄 𑀧𑀭𑀺𑀓𑁆𑀔𑀻𑀡𑀪𑀯𑀲𑀁𑀬𑁄𑀚𑀦𑁄 𑀲𑀫𑁆𑀫𑀤𑀜𑁆𑀜𑀸𑀯𑀺𑀫𑀼𑀢𑁆𑀢𑁄, 𑀅𑀪𑀩𑁆𑀩𑁄 𑀲𑁄 𑀦𑀯 𑀞𑀸𑀦𑀸𑀦𑀺 𑀅𑀚𑁆𑀛𑀸𑀘𑀭𑀺𑀢𑀼𑀁 𑁋 𑀅𑀪𑀩𑁆𑀩𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀲𑀜𑁆𑀘𑀺𑀘𑁆𑀘 𑀧𑀸𑀡𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀢𑀼𑀁…𑀧𑁂… 𑀅𑀪𑀩𑁆𑀩𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀲𑀦𑁆𑀦𑀺𑀥𑀺𑀓𑀸𑀭𑀓𑀁 𑀓𑀸𑀫𑁂 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀲𑁂𑀬𑁆𑀬𑀣𑀸𑀧𑀺 𑀧𑀼𑀩𑁆𑀩𑁂 𑀅𑀕𑀸𑀭𑀺𑀬𑀪𑀽𑀢𑁄, 𑀅𑀪𑀩𑁆𑀩𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀩𑀼𑀤𑁆𑀥𑀁 𑀧𑀘𑁆𑀘𑀓𑁆𑀔𑀸𑀢𑀼𑀁, 𑀅𑀪𑀩𑁆𑀩𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀥𑀫𑁆𑀫𑀁 𑀧𑀘𑁆𑀘𑀓𑁆𑀔𑀸𑀢𑀼𑀁, 𑀅𑀪𑀩𑁆𑀩𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀲𑀗𑁆𑀖𑀁 𑀧𑀘𑁆𑀘𑀓𑁆𑀔𑀸𑀢𑀼𑀁, 𑀅𑀪𑀩𑁆𑀩𑁄 𑀔𑀻𑀡𑀸𑀲𑀯𑁄 𑀪𑀺𑀓𑁆𑀔𑀼 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀢𑀼𑀁’. 𑀧𑀼𑀩𑁆𑀩𑁂 𑀘𑀸𑀳𑀁, 𑀲𑀚𑁆𑀛, 𑀏𑀢𑀭𑀳𑀺 𑀘 𑀏𑀯𑀁 𑀯𑀤𑀸𑀫𑀺 𑁋 ‘𑀬𑁄 𑀲𑁄 𑀪𑀺𑀓𑁆𑀔𑀼 𑀅𑀭𑀳𑀁 𑀔𑀻𑀡𑀸𑀲𑀯𑁄 𑀯𑀼𑀲𑀺𑀢𑀯𑀸 𑀓𑀢𑀓𑀭𑀡𑀻𑀬𑁄 𑀑𑀳𑀺𑀢𑀪𑀸𑀭𑁄 𑀅𑀦𑀼𑀧𑁆𑀧𑀢𑁆𑀢𑀲𑀤𑀢𑁆𑀣𑁄 𑀧𑀭𑀺𑀓𑁆𑀔𑀻𑀡𑀪𑀯𑀲𑀁𑀬𑁄𑀚𑀦𑁄 𑀲𑀫𑁆𑀫𑀤𑀜𑁆𑀜𑀸𑀯𑀺𑀫𑀼𑀢𑁆𑀢𑁄, 𑀅𑀪𑀩𑁆𑀩𑁄 𑀲𑁄 𑀇𑀫𑀸𑀦𑀺 𑀦𑀯 𑀞𑀸𑀦𑀸𑀦𑀺 𑀅𑀚𑁆𑀛𑀸𑀘𑀭𑀺𑀢𑀼’’’𑀦𑁆𑀢𑀺. 𑀅𑀝𑁆𑀞𑀫𑀁.

𑁯. 𑀧𑀼𑀕𑁆𑀕𑀮𑀲𑀼𑀢𑁆𑀢𑀁

𑁯. ‘‘𑀦𑀯𑀬𑀺𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀦𑀯? 𑀅𑀭𑀳𑀸, 𑀅𑀭𑀳𑀢𑁆𑀢𑀸𑀬 𑀧𑀝𑀺𑀧𑀦𑁆𑀦𑁄, 𑀅𑀦𑀸𑀕𑀸𑀫𑀻, 𑀅𑀦𑀸𑀕𑀸𑀫𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁄, 𑀲𑀓𑀤𑀸𑀕𑀸𑀫𑀻, 𑀲𑀓𑀤𑀸𑀕𑀸𑀫𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁄, 𑀲𑁄𑀢𑀸𑀧𑀦𑁆𑀦𑁄, 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁄, 𑀧𑀼𑀣𑀼𑀚𑁆𑀚𑀦𑁄 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀦𑀯 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺’’𑀦𑁆𑀢𑀺. 𑀦𑀯𑀫𑀁.

𑁧𑁦. 𑀆𑀳𑀼𑀦𑁂𑀬𑁆𑀬𑀲𑀼𑀢𑁆𑀢𑀁

𑁧𑁦. ‘‘𑀦𑀯𑀬𑀺𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀆𑀳𑀼𑀦𑁂𑀬𑁆𑀬𑀸 𑀧𑀸𑀳𑀼𑀦𑁂𑀬𑁆𑀬𑀸 𑀤𑀓𑁆𑀔𑀺𑀡𑁂𑀬𑁆𑀬𑀸 𑀅𑀜𑁆𑀚𑀮𑀺𑀓𑀭𑀡𑀻𑀬𑀸 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲. 𑀓𑀢𑀫𑁂 𑀦𑀯? 𑀅𑀭𑀳𑀸, 𑀅𑀭𑀳𑀢𑁆𑀢𑀸𑀬 𑀧𑀝𑀺𑀧𑀦𑁆𑀦𑁄, 𑀅𑀦𑀸𑀕𑀸𑀫𑀻, 𑀅𑀦𑀸𑀕𑀸𑀫𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁄, 𑀲𑀓𑀤𑀸𑀕𑀸𑀫𑀻, 𑀲𑀓𑀤𑀸𑀕𑀸𑀫𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁄, 𑀲𑁄𑀢𑀸𑀧𑀦𑁆𑀦𑁄, 𑀲𑁄𑀢𑀸𑀧𑀢𑁆𑀢𑀺𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀧𑀝𑀺𑀧𑀦𑁆𑀦𑁄, 𑀕𑁄𑀢𑁆𑀭𑀪𑀽 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀦𑀯 𑀧𑀼𑀕𑁆𑀕𑀮𑀸 𑀆𑀳𑀼𑀦𑁂𑀬𑁆𑀬𑀸…𑀧𑁂… 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸’’𑀢𑀺. 𑀤𑀲𑀫𑀁.

𑀲𑀫𑁆𑀩𑁄𑀥𑀺𑀯𑀕𑁆𑀕𑁄 𑀧𑀞𑀫𑁄.