𑁨. 𑀲𑀻𑀳𑀦𑀸𑀤𑀯𑀕𑁆𑀕𑁄

𑁧. 𑀲𑀻𑀳𑀦𑀸𑀤𑀲𑀼𑀢𑁆𑀢𑀁

𑁧𑁧. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀯𑀼𑀢𑁆𑀣𑁄 𑀫𑁂, 𑀪𑀦𑁆𑀢𑁂, 𑀲𑀸𑀯𑀢𑁆𑀣𑀺𑀬𑀁 𑀯𑀲𑁆𑀲𑀸𑀯𑀸𑀲𑁄. 𑀇𑀘𑁆𑀙𑀸𑀫𑀳𑀁, 𑀪𑀦𑁆𑀢𑁂, 𑀚𑀦𑀧𑀤𑀘𑀸𑀭𑀺𑀓𑀁 𑀧𑀓𑁆𑀓𑀫𑀺𑀢𑀼’’𑀦𑁆𑀢𑀺. ‘‘𑀬𑀲𑁆𑀲𑀤𑀸𑀦𑀺 𑀢𑁆𑀯𑀁, 𑀲𑀸𑀭𑀺𑀧𑀼𑀢𑁆𑀢, 𑀓𑀸𑀮𑀁 𑀫𑀜𑁆𑀜𑀲𑀻’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀉𑀝𑁆𑀞𑀸𑀬𑀸𑀲𑀦𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀸𑀫𑀺. 𑀅𑀣 𑀔𑁄 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀅𑀘𑀺𑀭𑀧𑀓𑁆𑀓𑀦𑁆𑀢𑁂 𑀆𑀬𑀲𑁆𑀫𑀦𑁆𑀢𑁂 𑀲𑀸𑀭𑀺𑀧𑀼𑀢𑁆𑀢𑁂 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀆𑀬𑀲𑁆𑀫𑀸 𑀫𑀁, 𑀪𑀦𑁆𑀢𑁂, 𑀲𑀸𑀭𑀺𑀧𑀼𑀢𑁆𑀢𑁄 𑀆𑀲𑀚𑁆𑀚 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚 𑀘𑀸𑀭𑀺𑀓𑀁 𑀧𑀓𑁆𑀓𑀦𑁆𑀢𑁄’’𑀢𑀺. 𑀅𑀣 𑀔𑁄 𑀪𑀕𑀯𑀸 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀳𑀺 𑀢𑁆𑀯𑀁, 𑀪𑀺𑀓𑁆𑀔𑀼, 𑀫𑀫 𑀯𑀘𑀦𑁂𑀦 𑀲𑀸𑀭𑀺𑀧𑀼𑀢𑁆𑀢𑀁 𑀆𑀫𑀦𑁆𑀢𑁂𑀳𑀺 𑁋 ‘𑀲𑀢𑁆𑀣𑀸 𑀢𑀁, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀆𑀫𑀦𑁆𑀢𑁂𑀢𑀻’’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀲𑁄 𑀪𑀺𑀓𑁆𑀔𑀼 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀢𑁆𑀣𑀸 𑀢𑀁, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀆𑀫𑀦𑁆𑀢𑁂𑀢𑀻’’𑀢𑀺. ‘‘𑀏𑀯𑀫𑀸𑀯𑀼𑀲𑁄’’𑀢𑀺 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀘𑁆𑀘𑀲𑁆𑀲𑁄𑀲𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀘 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 [𑀫𑀳𑀸𑀫𑁄𑀕𑁆𑀕𑀮𑀸𑀦𑁄 (𑀓.)] 𑀆𑀬𑀲𑁆𑀫𑀸 𑀘 𑀆𑀦𑀦𑁆𑀤𑁄 𑀅𑀯𑀸𑀧𑀼𑀭𑀡𑀁 [𑀅𑀧𑀸𑀧𑀼𑀭𑀡𑀁 (𑀲𑁆𑀬𑀸. 𑀓.)] 𑀆𑀤𑀸𑀬 𑀯𑀺𑀳𑀸𑀭𑁂 𑀆𑀳𑀺𑀡𑁆𑀟𑀦𑁆𑀢𑀺 [𑀯𑀺𑀳𑀸𑀭𑁂𑀦 𑀯𑀺𑀳𑀸𑀭𑀁 𑀅𑀦𑁆𑀯𑀸𑀳𑀺𑀡𑁆𑀟𑀦𑁆𑀢𑀺 (𑀲𑀻. 𑀧𑀻.), 𑀯𑀺𑀳𑀸𑀭𑀁 𑀆𑀳𑀺𑀡𑁆𑀟𑀦𑁆𑀢𑀺 (𑀲𑁆𑀬𑀸.)] 𑁋 ‘‘𑀅𑀪𑀺𑀓𑁆𑀓𑀫𑀣𑀸𑀬𑀲𑁆𑀫𑀦𑁆𑀢𑁄, 𑀅𑀪𑀺𑀓𑁆𑀓𑀫𑀣𑀸𑀬𑀲𑁆𑀫𑀦𑁆𑀢𑁄! 𑀇𑀤𑀸𑀦𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀲𑀻𑀳𑀦𑀸𑀤𑀁 𑀦𑀤𑀺𑀲𑁆𑀲𑀢𑀻’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀇𑀥 𑀢𑁂, 𑀲𑀸𑀭𑀺𑀧𑀼𑀢𑁆𑀢, 𑀅𑀜𑁆𑀜𑀢𑀭𑁄 𑀲𑀩𑁆𑀭𑀳𑁆𑀫𑀘𑀸𑀭𑀻 𑀔𑀻𑀬𑀦𑀥𑀫𑁆𑀫𑀁 𑀆𑀧𑀦𑁆𑀦𑁄 𑁋 ‘𑀆𑀬𑀲𑁆𑀫𑀸 𑀫𑀁, 𑀪𑀦𑁆𑀢𑁂, 𑀲𑀸𑀭𑀺𑀧𑀼𑀢𑁆𑀢𑁄 𑀆𑀲𑀚𑁆𑀚 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀘𑀸𑀭𑀺𑀓𑀁 𑀧𑀓𑁆𑀓𑀦𑁆𑀢𑁄’’’𑀢𑀺.

‘‘𑀬𑀲𑁆𑀲 𑀦𑀽𑀦, 𑀪𑀦𑁆𑀢𑁂, 𑀓𑀸𑀬𑁂 𑀓𑀸𑀬𑀕𑀢𑀸𑀲𑀢𑀺 𑀅𑀦𑀼𑀧𑀝𑁆𑀞𑀺𑀢𑀸 𑀅𑀲𑁆𑀲, 𑀲𑁄 𑀇𑀥 𑀅𑀜𑁆𑀜𑀢𑀭𑀁 𑀲𑀩𑁆𑀭𑀳𑁆𑀫𑀘𑀸𑀭𑀺𑀁 𑀆𑀲𑀚𑁆𑀚 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚 𑀘𑀸𑀭𑀺𑀓𑀁 𑀧𑀓𑁆𑀓𑀫𑁂𑀬𑁆𑀬.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀧𑀣𑀯𑀺𑀬𑀁 𑀲𑀼𑀘𑀺𑀫𑁆𑀧𑀺 𑀦𑀺𑀓𑁆𑀔𑀺𑀧𑀦𑁆𑀢𑀺 𑀅𑀲𑀼𑀘𑀺𑀫𑁆𑀧𑀺 𑀦𑀺𑀓𑁆𑀔𑀺𑀧𑀦𑁆𑀢𑀺 𑀕𑀽𑀣𑀕𑀢𑀫𑁆𑀧𑀺 𑀦𑀺𑀓𑁆𑀔𑀺𑀧𑀦𑁆𑀢𑀺 𑀫𑀼𑀢𑁆𑀢𑀕𑀢𑀫𑁆𑀧𑀺 𑀦𑀺𑀓𑁆𑀔𑀺𑀧𑀦𑁆𑀢𑀺 𑀔𑁂𑀴𑀕𑀢𑀫𑁆𑀧𑀺 𑀦𑀺𑀓𑁆𑀔𑀺𑀧𑀦𑁆𑀢𑀺 𑀧𑀼𑀩𑁆𑀩𑀕𑀢𑀫𑁆𑀧𑀺 𑀦𑀺𑀓𑁆𑀔𑀺𑀧𑀦𑁆𑀢𑀺 𑀮𑁄𑀳𑀺𑀢𑀕𑀢𑀫𑁆𑀧𑀺 𑀦𑀺𑀓𑁆𑀔𑀺𑀧𑀦𑁆𑀢𑀺, 𑀦 𑀘 𑀢𑁂𑀦 𑀧𑀣𑀯𑀻 𑀅𑀝𑁆𑀝𑀻𑀬𑀢𑀺 𑀯𑀸 𑀳𑀭𑀸𑀬𑀢𑀺 𑀯𑀸 𑀚𑀺𑀕𑀼𑀘𑁆𑀙𑀢𑀺 𑀯𑀸; 𑀏𑀯𑀫𑁂𑀯𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀧𑀣𑀯𑀻𑀲𑀫𑁂𑀦 𑀘𑁂𑀢𑀲𑀸 𑀯𑀺𑀳𑀭𑀸𑀫𑀺 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦. 𑀬𑀲𑁆𑀲 𑀦𑀽𑀦, 𑀪𑀦𑁆𑀢𑁂, 𑀓𑀸𑀬𑁂 𑀓𑀸𑀬𑀕𑀢𑀸𑀲𑀢𑀺 𑀅𑀦𑀼𑀧𑀝𑁆𑀞𑀺𑀢𑀸 𑀅𑀲𑁆𑀲, 𑀲𑁄 𑀇𑀥 𑀅𑀜𑁆𑀜𑀢𑀭𑀁 𑀲𑀩𑁆𑀭𑀳𑁆𑀫𑀘𑀸𑀭𑀺𑀁 𑀆𑀲𑀚𑁆𑀚 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚 𑀘𑀸𑀭𑀺𑀓𑀁 𑀧𑀓𑁆𑀓𑀫𑁂𑀬𑁆𑀬.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀆𑀧𑀲𑁆𑀫𑀺𑀁 𑀲𑀼𑀘𑀺𑀫𑁆𑀧𑀺 𑀥𑁄𑀯𑀦𑁆𑀢𑀺 𑀅𑀲𑀼𑀘𑀺𑀫𑁆𑀧𑀺 𑀥𑁄𑀯𑀦𑁆𑀢𑀺 𑀕𑀽𑀣𑀕𑀢𑀫𑁆𑀧𑀺… 𑀫𑀼𑀢𑁆𑀢𑀕𑀢𑀫𑁆𑀧𑀺… 𑀔𑁂𑀴𑀕𑀢𑀫𑁆𑀧𑀺… 𑀧𑀼𑀩𑁆𑀩𑀕𑀢𑀫𑁆𑀧𑀺… 𑀮𑁄𑀳𑀺𑀢𑀕𑀢𑀫𑁆𑀧𑀺 𑀥𑁄𑀯𑀦𑁆𑀢𑀺, 𑀦 𑀘 𑀢𑁂𑀦 𑀆𑀧𑁄 𑀅𑀝𑁆𑀝𑀻𑀬𑀢𑀺 𑀯𑀸 𑀳𑀭𑀸𑀬𑀢𑀺 𑀯𑀸 𑀚𑀺𑀕𑀼𑀘𑁆𑀙𑀢𑀺 𑀯𑀸; 𑀏𑀯𑀫𑁂𑀯𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀆𑀧𑁄𑀲𑀫𑁂𑀦 𑀘𑁂𑀢𑀲𑀸 𑀯𑀺𑀳𑀭𑀸𑀫𑀺 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦. 𑀬𑀲𑁆𑀲 𑀦𑀽𑀦, 𑀪𑀦𑁆𑀢𑁂, 𑀓𑀸𑀬𑁂 𑀓𑀸𑀬𑀕𑀢𑀸𑀲𑀢𑀺 𑀅𑀦𑀼𑀧𑀝𑁆𑀞𑀺𑀢𑀸 𑀅𑀲𑁆𑀲, 𑀲𑁄 𑀇𑀥 𑀅𑀜𑁆𑀜𑀢𑀭𑀁 𑀲𑀩𑁆𑀭𑀳𑁆𑀫𑀘𑀸𑀭𑀺𑀁 𑀆𑀲𑀚𑁆𑀚 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚 𑀘𑀸𑀭𑀺𑀓𑀁 𑀧𑀓𑁆𑀓𑀫𑁂𑀬𑁆𑀬.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀢𑁂𑀚𑁄 𑀲𑀼𑀘𑀺𑀫𑁆𑀧𑀺 𑀟𑀳𑀢𑀺 𑀅𑀲𑀼𑀘𑀺𑀫𑁆𑀧𑀺 𑀟𑀳𑀢𑀺 𑀕𑀽𑀣𑀕𑀢𑀫𑁆𑀧𑀺… 𑀫𑀼𑀢𑁆𑀢𑀕𑀢𑀫𑁆𑀧𑀺… 𑀔𑁂𑀴𑀕𑀢𑀫𑁆𑀧𑀺… 𑀧𑀼𑀩𑁆𑀩𑀕𑀢𑀫𑁆𑀧𑀺… 𑀮𑁄𑀳𑀺𑀢𑀕𑀢𑀫𑁆𑀧𑀺 𑀟𑀳𑀢𑀺, 𑀦 𑀘 𑀢𑁂𑀦 𑀢𑁂𑀚𑁄 𑀅𑀝𑁆𑀝𑀻𑀬𑀢𑀺 𑀯𑀸 𑀳𑀭𑀸𑀬𑀢𑀺 𑀯𑀸 𑀚𑀺𑀕𑀼𑀘𑁆𑀙𑀢𑀺 𑀯𑀸; 𑀏𑀯𑀫𑁂𑀯𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀢𑁂𑀚𑁄𑀲𑀫𑁂𑀦 𑀘𑁂𑀢𑀲𑀸 𑀯𑀺𑀳𑀭𑀸𑀫𑀺 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦. 𑀬𑀲𑁆𑀲 𑀦𑀽𑀦, 𑀪𑀦𑁆𑀢𑁂, 𑀓𑀸𑀬𑁂 𑀓𑀸𑀬𑀕𑀢𑀸𑀲𑀢𑀺 𑀅𑀦𑀼𑀧𑀝𑁆𑀞𑀺𑀢𑀸 𑀅𑀲𑁆𑀲, 𑀲𑁄 𑀇𑀥 𑀅𑀜𑁆𑀜𑀢𑀭𑀁 𑀲𑀩𑁆𑀭𑀳𑁆𑀫𑀘𑀸𑀭𑀺𑀁 𑀆𑀲𑀚𑁆𑀚 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚 𑀘𑀸𑀭𑀺𑀓𑀁 𑀧𑀓𑁆𑀓𑀫𑁂𑀬𑁆𑀬.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀯𑀸𑀬𑁄 𑀲𑀼𑀘𑀺𑀫𑁆𑀧𑀺 𑀉𑀧𑀯𑀸𑀬𑀢𑀺 𑀅𑀲𑀼𑀘𑀺𑀫𑁆𑀧𑀺 𑀉𑀧𑀯𑀸𑀬𑀢𑀺 𑀕𑀽𑀣𑀕𑀢𑀫𑁆𑀧𑀺… 𑀫𑀼𑀢𑁆𑀢𑀕𑀢𑀫𑁆𑀧𑀺… 𑀔𑁂𑀴𑀕𑀢𑀫𑁆𑀧𑀺… 𑀧𑀼𑀩𑁆𑀩𑀕𑀢𑀫𑁆𑀧𑀺… 𑀮𑁄𑀳𑀺𑀢𑀕𑀢𑀫𑁆𑀧𑀺 𑀉𑀧𑀯𑀸𑀬𑀢𑀺, 𑀦 𑀘 𑀢𑁂𑀦 𑀯𑀸𑀬𑁄 𑀅𑀝𑁆𑀝𑀻𑀬𑀢𑀺 𑀯𑀸 𑀳𑀭𑀸𑀬𑀢𑀺 𑀯𑀸 𑀚𑀺𑀕𑀼𑀘𑁆𑀙𑀢𑀺 𑀯𑀸; 𑀏𑀯𑀫𑁂𑀯𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀯𑀸𑀬𑁄𑀲𑀫𑁂𑀦 𑀘𑁂𑀢𑀲𑀸 𑀯𑀺𑀳𑀭𑀸𑀫𑀺 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦. 𑀬𑀲𑁆𑀲 𑀦𑀽𑀦, 𑀪𑀦𑁆𑀢𑁂, 𑀓𑀸𑀬𑁂 𑀓𑀸𑀬𑀕𑀢𑀸𑀲𑀢𑀺 𑀅𑀦𑀼𑀧𑀝𑁆𑀞𑀺𑀢𑀸 𑀅𑀲𑁆𑀲, 𑀲𑁄 𑀇𑀥 𑀅𑀜𑁆𑀜𑀢𑀭𑀁 𑀲𑀩𑁆𑀭𑀳𑁆𑀫𑀘𑀸𑀭𑀺𑀁 𑀆𑀲𑀚𑁆𑀚 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚 𑀘𑀸𑀭𑀺𑀓𑀁 𑀧𑀓𑁆𑀓𑀫𑁂𑀬𑁆𑀬.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀭𑀚𑁄𑀳𑀭𑀡𑀁 𑀲𑀼𑀘𑀺𑀫𑁆𑀧𑀺 𑀧𑀼𑀜𑁆𑀙𑀢𑀺 𑀅𑀲𑀼𑀘𑀺𑀫𑁆𑀧𑀺 𑀧𑀼𑀜𑁆𑀙𑀢𑀺 𑀕𑀽𑀣𑀕𑀢𑀫𑁆𑀧𑀺… 𑀫𑀼𑀢𑁆𑀢𑀕𑀢𑀫𑁆𑀧𑀺… 𑀔𑁂𑀴𑀕𑀢𑀫𑁆𑀧𑀺… 𑀧𑀼𑀩𑁆𑀩𑀕𑀢𑀫𑁆𑀧𑀺… 𑀮𑁄𑀳𑀺𑀢𑀕𑀢𑀫𑁆𑀧𑀺 𑀧𑀼𑀜𑁆𑀙𑀢𑀺, 𑀦 𑀘 𑀢𑁂𑀦 𑀭𑀚𑁄𑀳𑀭𑀡𑀁 𑀅𑀝𑁆𑀝𑀻𑀬𑀢𑀺 𑀯𑀸 𑀳𑀭𑀸𑀬𑀢𑀺 𑀯𑀸 𑀚𑀺𑀕𑀼𑀘𑁆𑀙𑀢𑀺 𑀯𑀸; 𑀏𑀯𑀫𑁂𑀯𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀭𑀚𑁄𑀳𑀭𑀡𑀲𑀫𑁂𑀦 𑀘𑁂𑀢𑀲𑀸 𑀯𑀺𑀳𑀭𑀸𑀫𑀺 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦. 𑀬𑀲𑁆𑀲 𑀦𑀽𑀦, 𑀪𑀦𑁆𑀢𑁂, 𑀓𑀸𑀬𑁂 𑀓𑀸𑀬𑀕𑀢𑀸𑀲𑀢𑀺 𑀅𑀦𑀼𑀧𑀝𑁆𑀞𑀺𑀢𑀸 𑀅𑀲𑁆𑀲, 𑀲𑁄 𑀇𑀥 𑀅𑀜𑁆𑀜𑀢𑀭𑀁 𑀲𑀩𑁆𑀭𑀳𑁆𑀫𑀘𑀸𑀭𑀺𑀁 𑀆𑀲𑀚𑁆𑀚 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚 𑀘𑀸𑀭𑀺𑀓𑀁 𑀧𑀓𑁆𑀓𑀫𑁂𑀬𑁆𑀬.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀘𑀡𑁆𑀟𑀸𑀮𑀓𑀼𑀫𑀸𑀭𑀓𑁄 𑀯𑀸 𑀘𑀡𑁆𑀟𑀸𑀮𑀓𑀼𑀫𑀸𑀭𑀺𑀓𑀸 𑀯𑀸 𑀓𑀴𑁄𑀧𑀺𑀳𑀢𑁆𑀣𑁄 𑀦𑀦𑁆𑀢𑀓𑀯𑀸𑀲𑀻 𑀕𑀸𑀫𑀁 𑀯𑀸 𑀦𑀺𑀕𑀫𑀁 𑀯𑀸 𑀧𑀯𑀺𑀲𑀦𑁆𑀢𑁄 𑀦𑀻𑀘𑀘𑀺𑀢𑁆𑀢𑀁𑀬𑁂𑀯 𑀉𑀧𑀝𑁆𑀞𑀧𑁂𑀢𑁆𑀯𑀸 𑀧𑀯𑀺𑀲𑀢𑀺; 𑀏𑀯𑀫𑁂𑀯𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀘𑀡𑁆𑀟𑀸𑀮𑀓𑀼𑀫𑀸𑀭𑀓𑀘𑀡𑁆𑀟𑀸𑀮𑀓𑀼𑀫𑀸𑀭𑀺𑀓𑀸𑀲𑀫𑁂𑀦 𑀘𑁂𑀢𑀲𑀸 𑀯𑀺𑀳𑀭𑀸𑀫𑀺 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦. 𑀬𑀲𑁆𑀲 𑀦𑀽𑀦, 𑀪𑀦𑁆𑀢𑁂, 𑀓𑀸𑀬𑁂 𑀓𑀸𑀬𑀕𑀢𑀸𑀲𑀢𑀺 𑀅𑀦𑀼𑀧𑀝𑁆𑀞𑀺𑀢𑀸 𑀅𑀲𑁆𑀲, 𑀲𑁄 𑀇𑀥 𑀅𑀜𑁆𑀜𑀢𑀭𑀁 𑀲𑀩𑁆𑀭𑀳𑁆𑀫𑀘𑀸𑀭𑀺𑀁 𑀆𑀲𑀚𑁆𑀚 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚 𑀘𑀸𑀭𑀺𑀓𑀁 𑀧𑀓𑁆𑀓𑀫𑁂𑀬𑁆𑀬.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀉𑀲𑀪𑁄 𑀙𑀺𑀦𑁆𑀦𑀯𑀺𑀲𑀸𑀡𑁄 𑀲𑀽𑀭𑀢𑁄 𑀲𑀼𑀤𑀦𑁆𑀢𑁄 𑀲𑀼𑀯𑀺𑀦𑀻𑀢𑁄 𑀭𑀣𑀺𑀬𑀸𑀬 𑀭𑀣𑀺𑀬𑀁 𑀲𑀺𑀗𑁆𑀖𑀸𑀝𑀓𑁂𑀦 𑀲𑀺𑀗𑁆𑀖𑀸𑀝𑀓𑀁 𑀅𑀦𑁆𑀯𑀸𑀳𑀺𑀡𑁆𑀟𑀦𑁆𑀢𑁄 𑀦 𑀓𑀺𑀜𑁆𑀘𑀺 𑀳𑀺𑀁𑀲𑀢𑀺 𑀧𑀸𑀤𑁂𑀦 𑀯𑀸 𑀯𑀺𑀲𑀸𑀡𑁂𑀦 𑀯𑀸; 𑀏𑀯𑀫𑁂𑀯𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀉𑀲𑀪𑀙𑀺𑀦𑁆𑀦𑀯𑀺𑀲𑀸𑀡𑀲𑀫𑁂𑀦 𑀘𑁂𑀢𑀲𑀸 𑀯𑀺𑀳𑀭𑀸𑀫𑀺 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦. 𑀬𑀲𑁆𑀲 𑀦𑀽𑀦, 𑀪𑀦𑁆𑀢𑁂, 𑀓𑀸𑀬𑁂 𑀓𑀸𑀬𑀕𑀢𑀸𑀲𑀢𑀺 𑀅𑀦𑀼𑀧𑀝𑁆𑀞𑀺𑀢𑀸 𑀅𑀲𑁆𑀲, 𑀲𑁄 𑀇𑀥 𑀅𑀜𑁆𑀜𑀢𑀭𑀁 𑀲𑀩𑁆𑀭𑀳𑁆𑀫𑀘𑀸𑀭𑀺𑀁 𑀆𑀲𑀚𑁆𑀚 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚 𑀘𑀸𑀭𑀺𑀓𑀁 𑀧𑀓𑁆𑀓𑀫𑁂𑀬𑁆𑀬.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀇𑀢𑁆𑀣𑀻 𑀯𑀸 𑀧𑀼𑀭𑀺𑀲𑁄 𑀯𑀸 𑀤𑀳𑀭𑁄 𑀬𑀼𑀯𑀸 𑀫𑀡𑁆𑀟𑀦𑀓𑀚𑀸𑀢𑀺𑀓𑁄 𑀲𑀻𑀲𑀁𑀦𑁆𑀳𑀸𑀢𑁄 𑀅𑀳𑀺𑀓𑀼𑀡𑀧𑁂𑀦 𑀯𑀸 𑀓𑀼𑀓𑁆𑀓𑀼𑀭𑀓𑀼𑀡𑀧𑁂𑀦 𑀯𑀸 𑀫𑀦𑀼𑀲𑁆𑀲𑀓𑀼𑀡𑀧𑁂𑀦 𑀯𑀸 𑀓𑀡𑁆𑀞𑁂 𑀆𑀲𑀢𑁆𑀢𑁂𑀦 𑀅𑀝𑁆𑀝𑀻𑀬𑁂𑀬𑁆𑀬 𑀳𑀭𑀸𑀬𑁂𑀬𑁆𑀬 𑀚𑀺𑀕𑀼𑀘𑁆𑀙𑁂𑀬𑁆𑀬; 𑀏𑀯𑀫𑁂𑀯𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀇𑀫𑀺𑀦𑀸 𑀧𑀽𑀢𑀺𑀓𑀸𑀬𑁂𑀦 𑀅𑀝𑁆𑀝𑀻𑀬𑀸𑀫𑀺 𑀳𑀭𑀸𑀬𑀸𑀫𑀺 𑀚𑀺𑀕𑀼𑀘𑁆𑀙𑀸𑀫𑀺. 𑀬𑀲𑁆𑀲 𑀦𑀽𑀦, 𑀪𑀦𑁆𑀢𑁂, 𑀓𑀸𑀬𑁂 𑀓𑀸𑀬𑀕𑀢𑀸𑀲𑀢𑀺 𑀅𑀦𑀼𑀧𑀝𑁆𑀞𑀺𑀢𑀸 𑀅𑀲𑁆𑀲, 𑀲𑁄 𑀇𑀥 𑀅𑀜𑁆𑀜𑀢𑀭𑀁 𑀲𑀩𑁆𑀭𑀳𑁆𑀫𑀘𑀸𑀭𑀺𑀁 𑀆𑀲𑀚𑁆𑀚 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚 𑀘𑀸𑀭𑀺𑀓𑀁 𑀧𑀓𑁆𑀓𑀫𑁂𑀬𑁆𑀬.

‘‘𑀲𑁂𑀬𑁆𑀬𑀣𑀸𑀧𑀺, 𑀪𑀦𑁆𑀢𑁂, 𑀧𑀼𑀭𑀺𑀲𑁄 𑀫𑁂𑀤𑀓𑀣𑀸𑀮𑀺𑀓𑀁 𑀧𑀭𑀺𑀳𑀭𑁂𑀬𑁆𑀬 𑀙𑀺𑀤𑁆𑀤𑀸𑀯𑀙𑀺𑀤𑁆𑀤𑀁 𑀉𑀕𑁆𑀖𑀭𑀦𑁆𑀢𑀁 𑀧𑀕𑁆𑀖𑀭𑀦𑁆𑀢𑀁; 𑀏𑀯𑀫𑁂𑀯𑀁 𑀔𑁄 𑀅𑀳𑀁, 𑀪𑀦𑁆𑀢𑁂, 𑀇𑀫𑀁 𑀓𑀸𑀬𑀁 𑀧𑀭𑀺𑀳𑀭𑀸𑀫𑀺 𑀙𑀺𑀤𑁆𑀤𑀸𑀯𑀙𑀺𑀤𑁆𑀤𑀁 𑀉𑀕𑁆𑀖𑀭𑀦𑁆𑀢𑀁 𑀧𑀕𑁆𑀖𑀭𑀦𑁆𑀢𑀁. 𑀬𑀲𑁆𑀲 𑀦𑀽𑀦, 𑀪𑀦𑁆𑀢𑁂, 𑀓𑀸𑀬𑁂 𑀓𑀸𑀬𑀕𑀢𑀸𑀲𑀢𑀺 𑀅𑀦𑀼𑀧𑀝𑁆𑀞𑀺𑀢𑀸 𑀅𑀲𑁆𑀲, 𑀲𑁄 𑀇𑀥 𑀅𑀜𑁆𑀜𑀢𑀭𑀁 𑀲𑀩𑁆𑀭𑀳𑁆𑀫𑀘𑀸𑀭𑀺𑀁 𑀆𑀲𑀚𑁆𑀚 𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚 𑀘𑀸𑀭𑀺𑀓𑀁 𑀧𑀓𑁆𑀓𑀫𑁂𑀬𑁆𑀬𑀸’’𑀢𑀺.

𑀅𑀣 𑀔𑁄 𑀲𑁄 𑀪𑀺𑀓𑁆𑀔𑀼 𑀉𑀝𑁆𑀞𑀸𑀬𑀸𑀲𑀦𑀸 𑀏𑀓𑀁𑀲𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀓𑀭𑀺𑀢𑁆𑀯𑀸 𑀪𑀕𑀯𑀢𑁄 𑀧𑀸𑀤𑁂𑀲𑀼 𑀲𑀺𑀭𑀲𑀸 𑀦𑀺𑀧𑀢𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀘𑁆𑀘𑀬𑁄 𑀫𑀁, 𑀪𑀦𑁆𑀢𑁂, 𑀅𑀘𑁆𑀘𑀕𑀫𑀸 𑀬𑀣𑀸𑀩𑀸𑀮𑀁 𑀬𑀣𑀸𑀫𑀽𑀴𑁆𑀳𑀁 𑀬𑀣𑀸𑀅𑀓𑀼𑀲𑀮𑀁, 𑀬𑁄 𑀅𑀳𑀁 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀅𑀲𑀢𑀸 𑀢𑀼𑀘𑁆𑀙𑀸 𑀫𑀼𑀲𑀸 𑀅𑀪𑀽𑀢𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑀺𑀁. 𑀢𑀲𑁆𑀲 𑀫𑁂, 𑀪𑀦𑁆𑀢𑁂, 𑀪𑀕𑀯𑀸 𑀅𑀘𑁆𑀘𑀬𑀁 𑀅𑀘𑁆𑀘𑀬𑀢𑁄 𑀧𑀝𑀺𑀕𑁆𑀕𑀡𑁆𑀳𑀢𑀼 𑀆𑀬𑀢𑀺𑀁 𑀲𑀁𑀯𑀭𑀸𑀬𑀸’’𑀢𑀺. ‘‘𑀢𑀕𑁆𑀖 𑀢𑀁 [𑀢𑁆𑀯𑀁 (𑀲𑀻. 𑀧𑀻.)], 𑀪𑀺𑀓𑁆𑀔𑀼, 𑀅𑀘𑁆𑀘𑀬𑁄 𑀅𑀘𑁆𑀘𑀕𑀫𑀸 𑀬𑀣𑀸𑀩𑀸𑀮𑀁 𑀬𑀣𑀸𑀫𑀽𑀴𑁆𑀳𑀁 𑀬𑀣𑀸𑀅𑀓𑀼𑀲𑀮𑀁, 𑀬𑁄 𑀢𑁆𑀯𑀁 𑀲𑀸𑀭𑀺𑀧𑀼𑀢𑁆𑀢𑀁 𑀅𑀲𑀢𑀸 𑀢𑀼𑀘𑁆𑀙𑀸 𑀫𑀼𑀲𑀸 𑀅𑀪𑀽𑀢𑁂𑀦 𑀅𑀩𑁆𑀪𑀸𑀘𑀺𑀓𑁆𑀔𑀺. 𑀬𑀢𑁄 𑀘 𑀔𑁄 𑀢𑁆𑀯𑀁, 𑀪𑀺𑀓𑁆𑀔𑀼, 𑀅𑀘𑁆𑀘𑀬𑀁 𑀅𑀘𑁆𑀘𑀬𑀢𑁄 𑀤𑀺𑀲𑁆𑀯𑀸 𑀬𑀣𑀸𑀥𑀫𑁆𑀫𑀁 𑀧𑀝𑀺𑀓𑀭𑁄𑀲𑀺, 𑀢𑀁 𑀢𑁂 𑀫𑀬𑀁 𑀧𑀝𑀺𑀕𑁆𑀕𑀡𑁆𑀳𑀸𑀫. 𑀯𑀼𑀟𑁆𑀠𑀺𑀳𑁂𑀲𑀸, 𑀪𑀺𑀓𑁆𑀔𑀼, 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂 𑀬𑁄 𑀅𑀘𑁆𑀘𑀬𑀁 𑀅𑀘𑁆𑀘𑀬𑀢𑁄 𑀤𑀺𑀲𑁆𑀯𑀸 𑀬𑀣𑀸𑀥𑀫𑁆𑀫𑀁 𑀧𑀝𑀺𑀓𑀭𑁄𑀢𑀺 𑀆𑀬𑀢𑀺𑀁 𑀲𑀁𑀯𑀭𑀁 𑀆𑀧𑀚𑁆𑀚𑀢𑀻’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀔𑀫, 𑀲𑀸𑀭𑀺𑀧𑀼𑀢𑁆𑀢, 𑀇𑀫𑀲𑁆𑀲 𑀫𑁄𑀖𑀧𑀼𑀭𑀺𑀲𑀲𑁆𑀲, 𑀧𑀼𑀭𑀸 𑀢𑀲𑁆𑀲 𑀢𑀢𑁆𑀣𑁂𑀯 𑀲𑀢𑁆𑀢𑀥𑀸 𑀫𑀼𑀤𑁆𑀥𑀸 𑀨𑀮𑀢𑀻’’𑀢𑀺 [𑀨𑀮𑀺𑀲𑁆𑀲𑀢𑀻𑀢𑀺 (𑀓. 𑀲𑀻. 𑀲𑁆𑀬𑀸. 𑀧𑀻. 𑀓.) 𑀅𑀝𑁆𑀞𑀓𑀣𑀸𑀲𑀼 𑀧𑀦 ‘‘𑀨𑀮𑀢𑀻𑀢𑀺’’ 𑀇𑀢𑁆𑀯𑁂𑀯 𑀤𑀺𑀲𑁆𑀲𑀢𑀺]. ‘‘𑀔𑀫𑀸𑀫𑀳𑀁, 𑀪𑀦𑁆𑀢𑁂, 𑀢𑀲𑁆𑀲 𑀆𑀬𑀲𑁆𑀫𑀢𑁄 𑀲𑀘𑁂 𑀫𑀁 𑀲𑁄 𑀆𑀬𑀲𑁆𑀫𑀸 𑀏𑀯𑀫𑀸𑀳 𑁋 ‘𑀔𑀫𑀢𑀼 𑀘 𑀫𑁂 𑀲𑁄 𑀆𑀬𑀲𑁆𑀫𑀸’’’𑀢𑀺. 𑀧𑀞𑀫𑀁.

𑁨. 𑀲𑀉𑀧𑀸𑀤𑀺𑀲𑁂𑀲𑀲𑀼𑀢𑁆𑀢𑀁

𑁧𑁨. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀸𑀯𑀢𑁆𑀣𑀺𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺. 𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀏𑀢𑀤𑀳𑁄𑀲𑀺 𑁋 ‘‘𑀅𑀢𑀺𑀧𑁆𑀧𑀕𑁄 𑀔𑁄 𑀢𑀸𑀯 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑀼𑀁, 𑀬𑀁𑀦𑀽𑀦𑀸𑀳𑀁 𑀬𑁂𑀦 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀆𑀭𑀸𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬’’𑀦𑁆𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀬𑁂𑀦 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀆𑀭𑀸𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂𑀳𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑁂𑀳𑀺 𑀧𑀭𑀺𑀩𑁆𑀩𑀸𑀚𑀓𑁂𑀳𑀺 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀢𑁂𑀲𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀲𑀦𑁆𑀦𑀺𑀲𑀺𑀦𑁆𑀦𑀸𑀦𑀁 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀅𑀬𑀫𑀦𑁆𑀢𑀭𑀸𑀓𑀣𑀸 𑀉𑀤𑀧𑀸𑀤𑀺 𑁋 ‘‘𑀬𑁄 𑀳𑀺 𑀓𑁄𑀘𑀺, 𑀆𑀯𑀼𑀲𑁄, 𑀲𑀉𑀧𑀸𑀤𑀺𑀲𑁂𑀲𑁄 𑀓𑀸𑀮𑀁 𑀓𑀭𑁄𑀢𑀺, 𑀲𑀩𑁆𑀩𑁄 𑀲𑁄 𑀅𑀧𑀭𑀺𑀫𑀼𑀢𑁆𑀢𑁄 𑀦𑀺𑀭𑀬𑀸 𑀅𑀧𑀭𑀺𑀫𑀼𑀢𑁆𑀢𑁄 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀸 𑀅𑀧𑀭𑀺𑀫𑀼𑀢𑁆𑀢𑁄 𑀧𑁂𑀢𑁆𑀢𑀺𑀯𑀺𑀲𑀬𑀸 𑀅𑀧𑀭𑀺𑀫𑀼𑀢𑁆𑀢𑁄 𑀅𑀧𑀸𑀬𑀤𑀼𑀕𑁆𑀕𑀢𑀺𑀯𑀺𑀦𑀺𑀧𑀸𑀢𑀸’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀢𑁂𑀲𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀪𑀸𑀲𑀺𑀢𑀁 𑀦𑁂𑀯 𑀅𑀪𑀺𑀦𑀦𑁆𑀤𑀺 𑀦𑀧𑁆𑀧𑀝𑀺𑀓𑁆𑀓𑁄𑀲𑀺. 𑀅𑀦𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀺 𑁋 ‘‘𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀏𑀢𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀆𑀚𑀸𑀦𑀺𑀲𑁆𑀲𑀸𑀫𑀻’’𑀢𑀺. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑁆𑀯𑀸 𑀧𑀘𑁆𑀙𑀸𑀪𑀢𑁆𑀢𑀁 𑀧𑀺𑀡𑁆𑀟𑀧𑀸𑀢𑀧𑀝𑀺𑀓𑁆𑀓𑀦𑁆𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀇𑀥𑀸𑀳𑀁, 𑀪𑀦𑁆𑀢𑁂, 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀲𑀸𑀯𑀢𑁆𑀣𑀺𑀁 𑀧𑀺𑀡𑁆𑀟𑀸𑀬 𑀧𑀸𑀯𑀺𑀲𑀺𑀁. 𑀢𑀲𑁆𑀲 𑀫𑀬𑁆𑀳𑀁, 𑀪𑀦𑁆𑀢𑁂, 𑀏𑀢𑀤𑀳𑁄𑀲𑀺 𑁋 ‘𑀅𑀢𑀺𑀧𑁆𑀧𑀕𑁄 𑀔𑁄 𑀢𑀸𑀯 𑀲𑀸𑀯𑀢𑁆𑀣𑀺𑀬𑀁 𑀧𑀺𑀡𑁆𑀟𑀸𑀬 𑀘𑀭𑀺𑀢𑀼𑀁; 𑀬𑀁𑀦𑀽𑀦𑀸𑀳𑀁 𑀬𑁂𑀦 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀆𑀭𑀸𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑁂𑀬𑁆𑀬’𑀦𑁆𑀢𑀺. 𑀅𑀣 𑀔𑁄 𑀅𑀳𑀁, 𑀪𑀦𑁆𑀢𑁂, 𑀬𑁂𑀦 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀆𑀭𑀸𑀫𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀢𑁂𑀳𑀺 𑀅𑀜𑁆𑀜𑀢𑀺𑀢𑁆𑀣𑀺𑀬𑁂𑀳𑀺 𑀧𑀭𑀺𑀩𑁆𑀩𑀸𑀚𑀓𑁂𑀳𑀺 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺𑀁. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀢𑁂𑀲𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀲𑀦𑁆𑀦𑀺𑀲𑀺𑀦𑁆𑀦𑀸𑀦𑀁 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀅𑀬𑀫𑀦𑁆𑀢𑀭𑀸𑀓𑀣𑀸 𑀉𑀤𑀧𑀸𑀤𑀺 𑁋 ‘𑀬𑁄 𑀳𑀺 𑀓𑁄𑀘𑀺, 𑀆𑀯𑀼𑀲𑁄, 𑀲𑀉𑀧𑀸𑀤𑀺𑀲𑁂𑀲𑁄 𑀓𑀸𑀮𑀁 𑀓𑀭𑁄𑀢𑀺, 𑀲𑀩𑁆𑀩𑁄 𑀲𑁄 𑀅𑀧𑀭𑀺𑀫𑀼𑀢𑁆𑀢𑁄 𑀦𑀺𑀭𑀬𑀸 𑀅𑀧𑀭𑀺𑀫𑀼𑀢𑁆𑀢𑁄 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀸 𑀅𑀧𑀭𑀺𑀫𑀼𑀢𑁆𑀢𑁄 𑀧𑁂𑀢𑁆𑀢𑀺𑀯𑀺𑀲𑀬𑀸 𑀅𑀧𑀭𑀺𑀫𑀼𑀢𑁆𑀢𑁄 𑀅𑀧𑀸𑀬𑀤𑀼𑀕𑁆𑀕𑀢𑀺𑀯𑀺𑀦𑀺𑀧𑀸𑀢𑀸’𑀢𑀺. 𑀅𑀣 𑀔𑁄 𑀅𑀳𑀁, 𑀪𑀦𑁆𑀢𑁂, 𑀢𑁂𑀲𑀁 𑀅𑀜𑁆𑀜𑀢𑀺𑀢𑁆𑀣𑀺𑀬𑀸𑀦𑀁 𑀧𑀭𑀺𑀩𑁆𑀩𑀸𑀚𑀓𑀸𑀦𑀁 𑀪𑀸𑀲𑀺𑀢𑀁 𑀦𑁂𑀯 𑀅𑀪𑀺𑀦𑀦𑁆𑀤𑀺𑀁 𑀦𑀧𑁆𑀧𑀝𑀺𑀓𑁆𑀓𑁄𑀲𑀺𑀁. 𑀅𑀦𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀧𑁆𑀧𑀝𑀺𑀓𑁆𑀓𑁄𑀲𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀫𑀺𑀁 𑁋 ‘𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀏𑀢𑀲𑁆𑀲 𑀪𑀸𑀲𑀺𑀢𑀲𑁆𑀲 𑀅𑀢𑁆𑀣𑀁 𑀆𑀚𑀸𑀦𑀺𑀲𑁆𑀲𑀸𑀫𑀻’’’𑀢𑀺.

‘‘𑀓𑁂 𑀘 [𑀓𑁂𑀘𑀺 (𑀲𑁆𑀬𑀸. 𑀧𑀻.), 𑀢𑁂 𑀘 (𑀓.)], 𑀲𑀸𑀭𑀺𑀧𑀼𑀢𑁆𑀢, 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀩𑀸𑀮𑀸 𑀅𑀩𑁆𑀬𑀢𑁆𑀢𑀸, 𑀓𑁂 𑀘 [𑀓𑁂𑀘𑀺 (𑀲𑁆𑀬𑀸. 𑀧𑀻. 𑀓.) 𑀅. 𑀦𑀺. 𑁬.𑁪𑁪 𑀧𑀸𑀴𑀺𑀬𑀸 𑀲𑀁𑀲𑀦𑁆𑀤𑁂𑀢𑀩𑁆𑀩𑀁] 𑀲𑀉𑀧𑀸𑀤𑀺𑀲𑁂𑀲𑀁 𑀯𑀸 ‘𑀲𑀉𑀧𑀸𑀤𑀺𑀲𑁂𑀲𑁄’𑀢𑀺 𑀚𑀸𑀦𑀺𑀲𑁆𑀲𑀦𑁆𑀢𑀺, 𑀅𑀦𑀼𑀧𑀸𑀤𑀺𑀲𑁂𑀲𑀁 𑀯𑀸 ‘𑀅𑀦𑀼𑀧𑀸𑀤𑀺𑀲𑁂𑀲𑁄’𑀢𑀺 𑀚𑀸𑀦𑀺𑀲𑁆𑀲𑀦𑁆𑀢𑀺’’!

‘‘𑀦𑀯𑀬𑀺𑀫𑁂, 𑀲𑀸𑀭𑀺𑀧𑀼𑀢𑁆𑀢, 𑀧𑀼𑀕𑁆𑀕𑀮𑀸 𑀲𑀉𑀧𑀸𑀤𑀺𑀲𑁂𑀲𑀸 𑀓𑀸𑀮𑀁 𑀓𑀼𑀭𑀼𑀫𑀸𑀦𑀸 𑀧𑀭𑀺𑀫𑀼𑀢𑁆𑀢𑀸 𑀦𑀺𑀭𑀬𑀸 𑀧𑀭𑀺𑀫𑀼𑀢𑁆𑀢𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀸 𑀧𑀭𑀺𑀫𑀼𑀢𑁆𑀢𑀸 𑀧𑁂𑀢𑁆𑀢𑀺𑀯𑀺𑀲𑀬𑀸 𑀧𑀭𑀺𑀫𑀼𑀢𑁆𑀢𑀸 𑀅𑀧𑀸𑀬𑀤𑀼𑀕𑁆𑀕𑀢𑀺𑀯𑀺𑀦𑀺𑀧𑀸𑀢𑀸. 𑀓𑀢𑀫𑁂 𑀦𑀯? 𑀇𑀥, 𑀲𑀸𑀭𑀺𑀧𑀼𑀢𑁆𑀢, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀻 𑀳𑁄𑀢𑀺, 𑀲𑀫𑀸𑀥𑀺𑀲𑁆𑀫𑀺𑀁 𑀧𑀭𑀺𑀧𑀽𑀭𑀓𑀸𑀭𑀻, 𑀧𑀜𑁆𑀜𑀸𑀬 𑀫𑀢𑁆𑀢𑀲𑁄 𑀓𑀸𑀭𑀻. 𑀲𑁄 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺. 𑀅𑀬𑀁, 𑀲𑀸𑀭𑀺𑀧𑀼𑀢𑁆𑀢, 𑀧𑀞𑀫𑁄 𑀧𑀼𑀕𑁆𑀕𑀮𑁄 𑀲𑀉𑀧𑀸𑀤𑀺𑀲𑁂𑀲𑁄 𑀓𑀸𑀮𑀁 𑀓𑀼𑀭𑀼𑀫𑀸𑀦𑁄 𑀧𑀭𑀺𑀫𑀼𑀢𑁆𑀢𑁄 𑀦𑀺𑀭𑀬𑀸 𑀧𑀭𑀺𑀫𑀼𑀢𑁆𑀢𑁄 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀸 𑀧𑀭𑀺𑀫𑀼𑀢𑁆𑀢𑁄 𑀧𑁂𑀢𑁆𑀢𑀺𑀯𑀺𑀲𑀬𑀸 𑀧𑀭𑀺𑀫𑀼𑀢𑁆𑀢𑁄 𑀅𑀧𑀸𑀬𑀤𑀼𑀕𑁆𑀕𑀢𑀺𑀯𑀺𑀦𑀺𑀧𑀸𑀢𑀸.

‘‘𑀧𑀼𑀦 𑀘𑀧𑀭𑀁, 𑀲𑀸𑀭𑀺𑀧𑀼𑀢𑁆𑀢, 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀻 𑀳𑁄𑀢𑀺, 𑀲𑀫𑀸𑀥𑀺𑀲𑁆𑀫𑀺𑀁 𑀧𑀭𑀺𑀧𑀽𑀭𑀓𑀸𑀭𑀻, 𑀧𑀜𑁆𑀜𑀸𑀬 𑀫𑀢𑁆𑀢𑀲𑁄 𑀓𑀸𑀭𑀻. 𑀲𑁄 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺…𑀧𑁂… 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺…𑀧𑁂… 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺…𑀧𑁂… 𑀉𑀤𑁆𑀥𑀁𑀲𑁄𑀢𑁄 𑀳𑁄𑀢𑀺 𑀅𑀓𑀦𑀺𑀝𑁆𑀞𑀕𑀸𑀫𑀻. 𑀅𑀬𑀁, 𑀲𑀸𑀭𑀺𑀧𑀼𑀢𑁆𑀢, 𑀧𑀜𑁆𑀘𑀫𑁄 𑀧𑀼𑀕𑁆𑀕𑀮𑁄 𑀲𑀉𑀧𑀸𑀤𑀺𑀲𑁂𑀲𑁄 𑀓𑀸𑀮𑀁 𑀓𑀼𑀭𑀼𑀫𑀸𑀦𑁄 𑀧𑀭𑀺𑀫𑀼𑀢𑁆𑀢𑁄 𑀦𑀺𑀭𑀬𑀸 𑀧𑀭𑀺𑀫𑀼𑀢𑁆𑀢𑁄 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀸 𑀧𑀭𑀺𑀫𑀼𑀢𑁆𑀢𑁄 𑀧𑁂𑀢𑁆𑀢𑀺𑀯𑀺𑀲𑀬𑀸 𑀧𑀭𑀺𑀫𑀼𑀢𑁆𑀢𑁄 𑀅𑀧𑀸𑀬𑀤𑀼𑀕𑁆𑀕𑀢𑀺𑀯𑀺𑀦𑀺𑀧𑀸𑀢𑀸.

‘‘𑀧𑀼𑀦 𑀘𑀧𑀭𑀁, 𑀲𑀸𑀭𑀺𑀧𑀼𑀢𑁆𑀢, 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀻 𑀳𑁄𑀢𑀺, 𑀲𑀫𑀸𑀥𑀺𑀲𑁆𑀫𑀺𑀁 𑀫𑀢𑁆𑀢𑀲𑁄 𑀓𑀸𑀭𑀻, 𑀧𑀜𑁆𑀜𑀸𑀬 𑀫𑀢𑁆𑀢𑀲𑁄 𑀓𑀸𑀭𑀻. 𑀲𑁄 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀭𑀸𑀕𑀤𑁄𑀲𑀫𑁄𑀳𑀸𑀦𑀁 𑀢𑀦𑀼𑀢𑁆𑀢𑀸 𑀲𑀓𑀤𑀸𑀕𑀸𑀫𑀻 𑀳𑁄𑀢𑀺, 𑀲𑀓𑀺𑀤𑁂𑀯 𑀇𑀫𑀁 𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀢𑀺. 𑀅𑀬𑀁, 𑀲𑀸𑀭𑀺𑀧𑀼𑀢𑁆𑀢, 𑀙𑀝𑁆𑀞𑁄 𑀧𑀼𑀕𑁆𑀕𑀮𑁄 𑀲𑀉𑀧𑀸𑀤𑀺𑀲𑁂𑀲𑁄 𑀓𑀸𑀮𑀁 𑀓𑀼𑀭𑀼𑀫𑀸𑀦𑁄 𑀧𑀭𑀺𑀫𑀼𑀢𑁆𑀢𑁄 𑀦𑀺𑀭𑀬𑀸…𑀧𑁂… 𑀧𑀭𑀺𑀫𑀼𑀢𑁆𑀢𑁄 𑀅𑀧𑀸𑀬𑀤𑀼𑀕𑁆𑀕𑀢𑀺𑀯𑀺𑀦𑀺𑀧𑀸𑀢𑀸.

‘‘𑀧𑀼𑀦 𑀘𑀧𑀭𑀁, 𑀲𑀸𑀭𑀺𑀧𑀼𑀢𑁆𑀢, 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀻 𑀳𑁄𑀢𑀺, 𑀲𑀫𑀸𑀥𑀺𑀲𑁆𑀫𑀺𑀁 𑀫𑀢𑁆𑀢𑀲𑁄 𑀓𑀸𑀭𑀻, 𑀧𑀜𑁆𑀜𑀸𑀬 𑀫𑀢𑁆𑀢𑀲𑁄 𑀓𑀸𑀭𑀻. 𑀲𑁄 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀏𑀓𑀩𑀻𑀚𑀻 𑀳𑁄𑀢𑀺, 𑀏𑀓𑀁𑀬𑁂𑀯 𑀫𑀸𑀦𑀼𑀲𑀓𑀁 𑀪𑀯𑀁 𑀦𑀺𑀩𑁆𑀩𑀢𑁆𑀢𑁂𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀢𑀺. 𑀅𑀬𑀁, 𑀲𑀸𑀭𑀺𑀧𑀼𑀢𑁆𑀢, 𑀲𑀢𑁆𑀢𑀫𑁄 𑀧𑀼𑀕𑁆𑀕𑀮𑁄 𑀲𑀉𑀧𑀸𑀤𑀺𑀲𑁂𑀲𑁄 𑀓𑀸𑀮𑀁 𑀓𑀼𑀭𑀼𑀫𑀸𑀦𑁄 𑀧𑀭𑀺𑀫𑀼𑀢𑁆𑀢𑁄 𑀦𑀺𑀭𑀬𑀸…𑀧𑁂… 𑀧𑀭𑀺𑀫𑀼𑀢𑁆𑀢𑁄 𑀅𑀧𑀸𑀬𑀤𑀼𑀕𑁆𑀕𑀢𑀺𑀯𑀺𑀦𑀺𑀧𑀸𑀢𑀸.

‘‘𑀧𑀼𑀦 𑀘𑀧𑀭𑀁, 𑀲𑀸𑀭𑀺𑀧𑀼𑀢𑁆𑀢, 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀻 𑀳𑁄𑀢𑀺, 𑀲𑀫𑀸𑀥𑀺𑀲𑁆𑀫𑀺𑀁 𑀫𑀢𑁆𑀢𑀲𑁄 𑀓𑀸𑀭𑀻, 𑀧𑀜𑁆𑀜𑀸𑀬 𑀫𑀢𑁆𑀢𑀲𑁄 𑀓𑀸𑀭𑀻. 𑀲𑁄 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀓𑁄𑀮𑀁𑀓𑁄𑀮𑁄 𑀳𑁄𑀢𑀺, 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸 𑀓𑀼𑀮𑀸𑀦𑀺 𑀲𑀦𑁆𑀥𑀸𑀯𑀺𑀢𑁆𑀯𑀸 𑀲𑀁𑀲𑀭𑀺𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀢𑀺. 𑀅𑀬𑀁, 𑀲𑀸𑀭𑀺𑀧𑀼𑀢𑁆𑀢, 𑀅𑀝𑁆𑀞𑀫𑁄 𑀧𑀼𑀕𑁆𑀕𑀮𑁄 𑀲𑀉𑀧𑀸𑀤𑀺𑀲𑁂𑀲𑁄 𑀓𑀸𑀮𑀁 𑀓𑀼𑀭𑀼𑀫𑀸𑀦𑁄 𑀧𑀭𑀺𑀫𑀼𑀢𑁆𑀢𑁄 𑀦𑀺𑀭𑀬𑀸…𑀧𑁂… 𑀧𑀭𑀺𑀫𑀼𑀢𑁆𑀢𑁄 𑀅𑀧𑀸𑀬𑀤𑀼𑀕𑁆𑀕𑀢𑀺𑀯𑀺𑀦𑀺𑀧𑀸𑀢𑀸.

‘‘𑀧𑀼𑀦 𑀘𑀧𑀭𑀁, 𑀲𑀸𑀭𑀺𑀧𑀼𑀢𑁆𑀢, 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀲𑀻𑀮𑁂𑀲𑀼 𑀧𑀭𑀺𑀧𑀽𑀭𑀓𑀸𑀭𑀻 𑀳𑁄𑀢𑀺, 𑀲𑀫𑀸𑀥𑀺𑀲𑁆𑀫𑀺𑀁 𑀫𑀢𑁆𑀢𑀲𑁄 𑀓𑀸𑀭𑀻, 𑀧𑀜𑁆𑀜𑀸𑀬 𑀫𑀢𑁆𑀢𑀲𑁄 𑀓𑀸𑀭𑀻. 𑀲𑁄 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑁄 𑀳𑁄𑀢𑀺, 𑀲𑀢𑁆𑀢𑀓𑁆𑀔𑀢𑁆𑀢𑀼𑀧𑀭𑀫𑀁 𑀤𑁂𑀯𑁂 𑀘 𑀫𑀦𑀼𑀲𑁆𑀲𑁂 𑀘 𑀲𑀦𑁆𑀥𑀸𑀯𑀺𑀢𑁆𑀯𑀸 𑀲𑀁𑀲𑀭𑀺𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀢𑀺. 𑀅𑀬𑀁, 𑀲𑀸𑀭𑀺𑀧𑀼𑀢𑁆𑀢, 𑀦𑀯𑀫𑁄 𑀧𑀼𑀕𑁆𑀕𑀮𑁄 𑀲𑀉𑀧𑀸𑀤𑀺𑀲𑁂𑀲𑁄 𑀓𑀸𑀮𑀁 𑀓𑀼𑀭𑀼𑀫𑀸𑀦𑁄 𑀧𑀭𑀺𑀫𑀼𑀢𑁆𑀢𑁄 𑀦𑀺𑀭𑀬𑀸 𑀧𑀭𑀺𑀫𑀼𑀢𑁆𑀢𑁄 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀸 𑀧𑀭𑀺𑀫𑀼𑀢𑁆𑀢𑁄 𑀧𑁂𑀢𑁆𑀢𑀺𑀯𑀺𑀲𑀬𑀸 𑀧𑀭𑀺𑀫𑀼𑀢𑁆𑀢𑁄 𑀅𑀧𑀸𑀬𑀤𑀼𑀕𑁆𑀕𑀢𑀺𑀯𑀺𑀦𑀺𑀧𑀸𑀢𑀸.

‘‘𑀓𑁂 𑀘, 𑀲𑀸𑀭𑀺𑀧𑀼𑀢𑁆𑀢, 𑀅𑀜𑁆𑀜𑀢𑀺𑀢𑁆𑀣𑀺𑀬𑀸 𑀧𑀭𑀺𑀩𑁆𑀩𑀸𑀚𑀓𑀸 𑀩𑀸𑀮𑀸 𑀅𑀩𑁆𑀬𑀢𑁆𑀢𑀸, 𑀓𑁂 𑀘 𑀲𑀉𑀧𑀸𑀤𑀺𑀲𑁂𑀲𑀁 𑀯𑀸 ‘𑀲𑀉𑀧𑀸𑀤𑀺𑀲𑁂𑀲𑁄’𑀢𑀺 𑀚𑀸𑀦𑀺𑀲𑁆𑀲𑀦𑁆𑀢𑀺, 𑀅𑀦𑀼𑀧𑀸𑀤𑀺𑀲𑁂𑀲𑀁 𑀯𑀸 ‘𑀅𑀦𑀼𑀧𑀸𑀤𑀺𑀲𑁂𑀲𑁄’𑀢𑀺 𑀚𑀸𑀦𑀺𑀲𑁆𑀲𑀦𑁆𑀢𑀺! 𑀇𑀫𑁂 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀦𑀯 𑀧𑀼𑀕𑁆𑀕𑀮𑀸 𑀲𑀉𑀧𑀸𑀤𑀺𑀲𑁂𑀲𑀸 𑀓𑀸𑀮𑀁 𑀓𑀼𑀭𑀼𑀫𑀸𑀦𑀸 𑀧𑀭𑀺𑀫𑀼𑀢𑁆𑀢𑀸 𑀦𑀺𑀭𑀬𑀸 𑀧𑀭𑀺𑀫𑀼𑀢𑁆𑀢𑀸 𑀢𑀺𑀭𑀘𑁆𑀙𑀸𑀦𑀬𑁄𑀦𑀺𑀬𑀸 𑀧𑀭𑀺𑀫𑀼𑀢𑁆𑀢𑀸 𑀧𑁂𑀢𑁆𑀢𑀺𑀯𑀺𑀲𑀬𑀸 𑀧𑀭𑀺𑀫𑀼𑀢𑁆𑀢𑀸 𑀅𑀧𑀸𑀬𑀤𑀼𑀕𑁆𑀕𑀢𑀺𑀯𑀺𑀦𑀺𑀧𑀸𑀢𑀸. 𑀦 𑀢𑀸𑀯𑀸𑀬𑀁, 𑀲𑀸𑀭𑀺𑀧𑀼𑀢𑁆𑀢, 𑀥𑀫𑁆𑀫𑀧𑀭𑀺𑀬𑀸𑀬𑁄 𑀧𑀝𑀺𑀪𑀸𑀲𑀺 𑀪𑀺𑀓𑁆𑀔𑀽𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀉𑀧𑀸𑀲𑀓𑀸𑀦𑀁 𑀉𑀧𑀸𑀲𑀺𑀓𑀸𑀦𑀁. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀫𑀸𑀬𑀺𑀫𑀁 𑀥𑀫𑁆𑀫𑀧𑀭𑀺𑀬𑀸𑀬𑀁 𑀲𑀼𑀢𑁆𑀯𑀸 𑀧𑀫𑀸𑀤𑀁 𑀆𑀳𑀭𑀺𑀁𑀲𑀽𑀢𑀺 [𑀆𑀳𑀭𑀺𑀁𑀲𑀼 (𑀲𑀻. 𑀧𑀻.)]. 𑀅𑀧𑀺 𑀘 𑀫𑀬𑀸 [𑀅𑀧𑀺 𑀘𑀸𑀬𑀁 (?)], 𑀲𑀸𑀭𑀺𑀧𑀼𑀢𑁆𑀢, 𑀥𑀫𑁆𑀫𑀧𑀭𑀺𑀬𑀸𑀬𑁄 𑀧𑀜𑁆𑀳𑀸𑀥𑀺𑀧𑁆𑀧𑀸𑀬𑁂𑀦 𑀪𑀸𑀲𑀺𑀢𑁄’’𑀢𑀺. 𑀤𑀼𑀢𑀺𑀬𑀁.

𑁩. 𑀓𑁄𑀝𑁆𑀞𑀺𑀓𑀲𑀼𑀢𑁆𑀢𑀁

𑁧𑁩. 𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑁄𑀝𑁆𑀞𑀺𑀓𑁄 [𑀫𑀳𑀸𑀓𑁄𑀝𑁆𑀞𑀺𑀢𑁄 (𑀲𑀻. 𑀲𑁆𑀬𑀸. 𑀧𑀻.)] 𑀬𑁂𑀦𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀢𑀸 𑀲𑀸𑀭𑀺𑀧𑀼𑀢𑁆𑀢𑁂𑀦 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑁄𑀝𑁆𑀞𑀺𑀓𑁄 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, ‘𑀬𑀁 𑀓𑀫𑁆𑀫𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁, 𑀢𑀁 𑀫𑁂 𑀓𑀫𑁆𑀫𑀁 𑀲𑀫𑁆𑀧𑀭𑀸𑀬𑀯𑁂𑀤𑀦𑀻𑀬𑀁 𑀳𑁄𑀢𑀽’𑀢𑀺, 𑀏𑀢𑀲𑁆𑀲 𑀅𑀢𑁆𑀣𑀸𑀬 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’’𑀢𑀺? ‘‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’’.

‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, ‘𑀬𑀁 𑀓𑀫𑁆𑀫𑀁 𑀲𑀼𑀔𑀯𑁂𑀤𑀦𑀻𑀬𑀁 [𑀲𑀼𑀔𑀯𑁂𑀤𑀦𑀺𑀬𑀁 (𑀓.) 𑀫. 𑀦𑀺. 𑁩.𑁮 𑀧𑀲𑁆𑀲𑀺𑀢𑀩𑁆𑀩𑀁], 𑀢𑀁 𑀫𑁂 𑀓𑀫𑁆𑀫𑀁 𑀤𑀼𑀓𑁆𑀔𑀯𑁂𑀤𑀦𑀻𑀬𑀁 [𑀤𑀼𑀓𑁆𑀔𑀯𑁂𑀤𑀦𑀺𑀬𑀁 (𑀓.)] 𑀳𑁄𑀢𑀽’𑀢𑀺, 𑀏𑀢𑀲𑁆𑀲 𑀅𑀢𑁆𑀣𑀸𑀬 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’’𑀢𑀺? ‘‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’’.

‘‘𑀓𑀺𑀁 𑀧𑀦𑀸𑀯𑀼𑀲𑁄, 𑀲𑀸𑀭𑀺𑀧𑀼𑀢𑁆𑀢, ‘𑀬𑀁 𑀓𑀫𑁆𑀫𑀁 𑀤𑀼𑀓𑁆𑀔𑀯𑁂𑀤𑀦𑀻𑀬𑀁, 𑀢𑀁 𑀫𑁂 𑀓𑀫𑁆𑀫𑀁 𑀲𑀼𑀔𑀯𑁂𑀤𑀦𑀻𑀬𑀁 𑀳𑁄𑀢𑀽’𑀢𑀺, 𑀏𑀢𑀲𑁆𑀲 𑀅𑀢𑁆𑀣𑀸𑀬 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’’𑀢𑀺? ‘‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’’.

‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, ‘𑀬𑀁 𑀓𑀫𑁆𑀫𑀁 𑀧𑀭𑀺𑀧𑀓𑁆𑀓𑀯𑁂𑀤𑀦𑀻𑀬𑀁, 𑀢𑀁 𑀫𑁂 𑀓𑀫𑁆𑀫𑀁 𑀅𑀧𑀭𑀺𑀧𑀓𑁆𑀓𑀯𑁂𑀤𑀦𑀻𑀬𑀁 𑀳𑁄𑀢𑀽’𑀢𑀺, 𑀏𑀢𑀲𑁆𑀲 𑀅𑀢𑁆𑀣𑀸𑀬 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’’𑀢𑀺? ‘‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’’.

‘‘𑀓𑀺𑀁 𑀧𑀦𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, ‘𑀬𑀁 𑀓𑀫𑁆𑀫𑀁 𑀅𑀧𑀭𑀺𑀧𑀓𑁆𑀓𑀯𑁂𑀤𑀦𑀻𑀬𑀁, 𑀢𑀁 𑀫𑁂 𑀓𑀫𑁆𑀫𑀁 𑀧𑀭𑀺𑀧𑀓𑁆𑀓𑀯𑁂𑀤𑀦𑀻𑀬𑀁 𑀳𑁄𑀢𑀽’𑀢𑀺, 𑀏𑀢𑀲𑁆𑀲 𑀅𑀢𑁆𑀣𑀸𑀬 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’’𑀢𑀺? ‘‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’’.

‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, ‘𑀬𑀁 𑀓𑀫𑁆𑀫𑀁 𑀩𑀳𑀼𑀯𑁂𑀤𑀦𑀻𑀬𑀁, 𑀢𑀁 𑀫𑁂 𑀓𑀫𑁆𑀫𑀁 𑀅𑀧𑁆𑀧𑀯𑁂𑀤𑀦𑀻𑀬𑀁 𑀳𑁄𑀢𑀽’𑀢𑀺, 𑀏𑀢𑀲𑁆𑀲 𑀅𑀢𑁆𑀣𑀸𑀬 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’’𑀢𑀺? ‘‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’’.

‘‘𑀓𑀺𑀁 𑀧𑀦𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, ‘𑀬𑀁 𑀓𑀫𑁆𑀫𑀁 𑀅𑀧𑁆𑀧𑀯𑁂𑀤𑀦𑀻𑀬𑀁, 𑀢𑀁 𑀫𑁂 𑀓𑀫𑁆𑀫𑀁 𑀩𑀳𑀼𑀯𑁂𑀤𑀦𑀻𑀬𑀁 𑀳𑁄𑀢𑀽’𑀢𑀺, 𑀏𑀢𑀲𑁆𑀲 𑀅𑀢𑁆𑀣𑀸𑀬 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’’𑀢𑀺? ‘‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’’.

‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, ‘𑀬𑀁 𑀓𑀫𑁆𑀫𑀁 𑀯𑁂𑀤𑀦𑀻𑀬𑀁, 𑀢𑀁 𑀫𑁂 𑀓𑀫𑁆𑀫𑀁 𑀅𑀯𑁂𑀤𑀦𑀻𑀬𑀁 𑀳𑁄𑀢𑀽’𑀢𑀺, 𑀏𑀢𑀲𑁆𑀲 𑀅𑀢𑁆𑀣𑀸𑀬 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’’𑀢𑀺? ‘‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’’.

‘‘𑀓𑀺𑀁 𑀧𑀦𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, ‘𑀬𑀁 𑀓𑀫𑁆𑀫𑀁 𑀅𑀯𑁂𑀤𑀦𑀻𑀬𑀁, 𑀢𑀁 𑀫𑁂 𑀓𑀫𑁆𑀫𑀁 𑀯𑁂𑀤𑀦𑀻𑀬𑀁 𑀳𑁄𑀢𑀽’𑀢𑀺, 𑀏𑀢𑀲𑁆𑀲 𑀅𑀢𑁆𑀣𑀸𑀬 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’’𑀢𑀺? ‘‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’’.

‘‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀬𑀁 𑀓𑀫𑁆𑀫𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀢𑀁 𑀫𑁂 𑀓𑀫𑁆𑀫𑀁 𑀲𑀫𑁆𑀧𑀭𑀸𑀬𑀯𑁂𑀤𑀦𑀻𑀬𑀁 𑀳𑁄𑀢𑀽𑀢𑀺, 𑀏𑀢𑀲𑁆𑀲 𑀅𑀢𑁆𑀣𑀸𑀬 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’𑀢𑀺, 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 ‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’𑀢𑀺 𑀯𑀤𑁂𑀲𑀺.

‘‘‘𑀓𑀺𑀁 𑀧𑀦𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀬𑀁 𑀓𑀫𑁆𑀫𑀁 𑀲𑀫𑁆𑀧𑀭𑀸𑀬𑀯𑁂𑀤𑀦𑀻𑀬𑀁 𑀢𑀁 𑀫𑁂 𑀓𑀫𑁆𑀫𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀳𑁄𑀢𑀽𑀢𑀺, 𑀏𑀢𑀲𑁆𑀲 𑀅𑀢𑁆𑀣𑀸𑀬 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’𑀢𑀺, 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 ‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’𑀢𑀺 𑀯𑀤𑁂𑀲𑀺.

‘‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀬𑀁 𑀓𑀫𑁆𑀫𑀁 𑀲𑀼𑀔𑀯𑁂𑀤𑀦𑀻𑀬𑀁 𑀢𑀁 𑀫𑁂 𑀓𑀫𑁆𑀫𑀁 𑀤𑀼𑀓𑁆𑀔𑀯𑁂𑀤𑀦𑀻𑀬𑀁 𑀳𑁄𑀢𑀽𑀢𑀺, 𑀏𑀢𑀲𑁆𑀲 𑀅𑀢𑁆𑀣𑀸𑀬 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’𑀢𑀺, 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 ‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’𑀢𑀺 𑀯𑀤𑁂𑀲𑀺.

‘‘‘𑀓𑀺𑀁 𑀧𑀦𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀬𑀁 𑀓𑀫𑁆𑀫𑀁 𑀤𑀼𑀓𑁆𑀔𑀯𑁂𑀤𑀦𑀻𑀬𑀁 𑀢𑀁 𑀫𑁂 𑀓𑀫𑁆𑀫𑀁 𑀲𑀼𑀔𑀯𑁂𑀤𑀦𑀻𑀬𑀁 𑀳𑁄𑀢𑀽𑀢𑀺, 𑀏𑀢𑀲𑁆𑀲 𑀅𑀢𑁆𑀣𑀸𑀬 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’𑀢𑀺, 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 ‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’𑀢𑀺 𑀯𑀤𑁂𑀲𑀺.

‘‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀬𑀁 𑀓𑀫𑁆𑀫𑀁 𑀧𑀭𑀺𑀧𑀓𑁆𑀓𑀯𑁂𑀤𑀦𑀻𑀬𑀁 𑀢𑀁 𑀫𑁂 𑀓𑀫𑁆𑀫𑀁 𑀅𑀧𑀭𑀺𑀧𑀓𑁆𑀓𑀯𑁂𑀤𑀦𑀻𑀬𑀁 𑀳𑁄𑀢𑀽𑀢𑀺, 𑀏𑀢𑀲𑁆𑀲 𑀅𑀢𑁆𑀣𑀸𑀬 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’𑀢𑀺, 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 ‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’𑀢𑀺 𑀯𑀤𑁂𑀲𑀺.

‘‘‘𑀓𑀺𑀁 𑀧𑀦𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀬𑀁 𑀓𑀫𑁆𑀫𑀁 𑀅𑀧𑀭𑀺𑀧𑀓𑁆𑀓𑀯𑁂𑀤𑀦𑀻𑀬𑀁 𑀢𑀁 𑀫𑁂 𑀓𑀫𑁆𑀫𑀁 𑀧𑀭𑀺𑀧𑀓𑁆𑀓𑀯𑁂𑀤𑀦𑀻𑀬𑀁 𑀳𑁄𑀢𑀽𑀢𑀺, 𑀏𑀢𑀲𑁆𑀲 𑀅𑀢𑁆𑀣𑀸𑀬 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’𑀢𑀺, 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 ‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’𑀢𑀺 𑀯𑀤𑁂𑀲𑀺.

‘‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀬𑀁 𑀓𑀫𑁆𑀫𑀁 𑀩𑀳𑀼𑀯𑁂𑀤𑀦𑀻𑀬𑀁 𑀢𑀁 𑀫𑁂 𑀓𑀫𑁆𑀫𑀁 𑀅𑀧𑁆𑀧𑀯𑁂𑀤𑀦𑀻𑀬𑀁 𑀳𑁄𑀢𑀽𑀢𑀺, 𑀏𑀢𑀲𑁆𑀲 𑀅𑀢𑁆𑀣𑀸𑀬 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’𑀢𑀺, 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 ‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’𑀢𑀺 𑀯𑀤𑁂𑀲𑀺.

‘‘‘𑀓𑀺𑀁 𑀧𑀦𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀬𑀁 𑀓𑀫𑁆𑀫𑀁 𑀅𑀧𑁆𑀧𑀯𑁂𑀤𑀦𑀻𑀬𑀁 𑀢𑀁 𑀫𑁂 𑀓𑀫𑁆𑀫𑀁 𑀩𑀳𑀼𑀯𑁂𑀤𑀦𑀻𑀬𑀁 𑀳𑁄𑀢𑀽𑀢𑀺, 𑀏𑀢𑀲𑁆𑀲 𑀅𑀢𑁆𑀣𑀸𑀬 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’𑀢𑀺, 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 ‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’𑀢𑀺 𑀯𑀤𑁂𑀲𑀺.

‘‘‘𑀓𑀺𑀁 𑀦𑀼 𑀔𑁄, 𑀆𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀬𑀁 𑀓𑀫𑁆𑀫𑀁 𑀯𑁂𑀤𑀦𑀻𑀬𑀁 𑀢𑀁 𑀫𑁂 𑀓𑀫𑁆𑀫𑀁 𑀅𑀯𑁂𑀤𑀦𑀻𑀬𑀁 𑀳𑁄𑀢𑀽𑀢𑀺, 𑀏𑀢𑀲𑁆𑀲 𑀅𑀢𑁆𑀣𑀸𑀬 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’𑀢𑀺, 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 ‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’𑀢𑀺 𑀯𑀤𑁂𑀲𑀺.

‘‘‘𑀓𑀺𑀁 𑀧𑀦𑀸𑀯𑀼𑀲𑁄 𑀲𑀸𑀭𑀺𑀧𑀼𑀢𑁆𑀢, 𑀬𑀁 𑀓𑀫𑁆𑀫𑀁 𑀅𑀯𑁂𑀤𑀦𑀻𑀬𑀁 𑀢𑀁 𑀫𑁂 𑀓𑀫𑁆𑀫𑀁 𑀯𑁂𑀤𑀦𑀻𑀬𑀁 𑀳𑁄𑀢𑀽𑀢𑀺, 𑀏𑀢𑀲𑁆𑀲 𑀅𑀢𑁆𑀣𑀸𑀬 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’𑀢𑀺, 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 ‘𑀦𑁄 𑀳𑀺𑀤𑀁, 𑀆𑀯𑀼𑀲𑁄’𑀢𑀺 𑀯𑀤𑁂𑀲𑀺. 𑀅𑀣 𑀓𑀺𑀫𑀢𑁆𑀣𑀁 𑀘𑀭𑀳𑀸𑀯𑀼𑀲𑁄, 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’’𑀢𑀺?

‘‘𑀬𑀁 𑀔𑁆𑀯𑀲𑁆𑀲 [𑀬𑀁 𑀔𑁄 (𑀓.)], 𑀆𑀯𑀼𑀲𑁄, 𑀅𑀜𑁆𑀜𑀸𑀢𑀁 𑀅𑀤𑀺𑀝𑁆𑀞𑀁 𑀅𑀧𑁆𑀧𑀢𑁆𑀢𑀁 𑀅𑀲𑀘𑁆𑀙𑀺𑀓𑀢𑀁 𑀅𑀦𑀪𑀺𑀲𑀫𑁂𑀢𑀁, 𑀢𑀲𑁆𑀲 𑀜𑀸𑀡𑀸𑀬 𑀤𑀲𑁆𑀲𑀦𑀸𑀬 𑀧𑀢𑁆𑀢𑀺𑀬𑀸 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀅𑀪𑀺𑀲𑀫𑀬𑀸𑀬 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’’𑀢𑀺 [𑀯𑀼𑀲𑁆𑀲𑀢𑀺 (𑀲𑁆𑀬𑀸.)]. (‘‘𑀓𑀺𑀁 𑀧𑀦𑀲𑁆𑀲𑀸𑀯𑀼𑀲𑁄, 𑀅𑀜𑁆𑀜𑀸𑀢𑀁 𑀅𑀤𑀺𑀝𑁆𑀞𑀁 𑀅𑀧𑁆𑀧𑀢𑁆𑀢𑀁 𑀅𑀲𑀘𑁆𑀙𑀺𑀓𑀢𑀁 𑀅𑀦𑀪𑀺𑀲𑀫𑁂𑀢𑀁, 𑀬𑀲𑁆𑀲 𑀜𑀸𑀡𑀸𑀬 𑀤𑀲𑁆𑀲𑀦𑀸𑀬 𑀧𑀢𑁆𑀢𑀺𑀬𑀸 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀅𑀪𑀺𑀲𑀫𑀬𑀸𑀬 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’’𑀢𑀺?) [( ) 𑀲𑁆𑀬𑀸. 𑀓. 𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺] ‘‘‘𑀇𑀤𑀁 𑀤𑀼𑀓𑁆𑀔’𑀦𑁆𑀢𑀺 𑀔𑁆𑀯𑀲𑁆𑀲 [𑀔𑁄 𑀬𑀁 (𑀓.)], 𑀆𑀯𑀼𑀲𑁄, 𑀅𑀜𑁆𑀜𑀸𑀢𑀁 𑀅𑀤𑀺𑀝𑁆𑀞𑀁 𑀅𑀧𑁆𑀧𑀢𑁆𑀢𑀁 𑀅𑀲𑀘𑁆𑀙𑀺𑀓𑀢𑀁 𑀅𑀦𑀪𑀺𑀲𑀫𑁂𑀢𑀁. 𑀢𑀲𑁆𑀲 𑀜𑀸𑀡𑀸𑀬 𑀤𑀲𑁆𑀲𑀦𑀸𑀬 𑀧𑀢𑁆𑀢𑀺𑀬𑀸 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀅𑀪𑀺𑀲𑀫𑀬𑀸𑀬 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀺. 𑀅𑀬𑀁 ‘𑀤𑀼𑀓𑁆𑀔𑀲𑀫𑀼𑀤𑀬𑁄’𑀢𑀺 𑀔𑁆𑀯𑀲𑁆𑀲, 𑀆𑀯𑀼𑀲𑁄…𑀧𑁂… ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑁄’𑀢𑀺 𑀔𑁆𑀯𑀲𑁆𑀲, 𑀆𑀯𑀼𑀲𑁄…𑀧𑁂… ‘𑀅𑀬𑀁 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀻 𑀧𑀝𑀺𑀧𑀤𑀸’𑀢𑀺 𑀔𑁆𑀯𑀲𑁆𑀲, 𑀆𑀯𑀼𑀲𑁄, 𑀅𑀜𑁆𑀜𑀸𑀢𑀁 𑀅𑀤𑀺𑀝𑁆𑀞𑀁 𑀅𑀧𑁆𑀧𑀢𑁆𑀢𑀁 𑀅𑀲𑀘𑁆𑀙𑀺𑀓𑀢𑀁 𑀅𑀦𑀪𑀺𑀲𑀫𑁂𑀢𑀁. 𑀢𑀲𑁆𑀲 𑀜𑀸𑀡𑀸𑀬 𑀤𑀲𑁆𑀲𑀦𑀸𑀬 𑀧𑀢𑁆𑀢𑀺𑀬𑀸 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀅𑀪𑀺𑀲𑀫𑀬𑀸𑀬 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀺. 𑀇𑀤𑀁 𑀔𑁆𑀯𑀲𑁆𑀲 [𑀇𑀢𑀺 𑀔𑁄 𑀬𑀁 (𑀓.)], 𑀆𑀯𑀼𑀲𑁄, 𑀅𑀜𑁆𑀜𑀸𑀢𑀁 𑀅𑀤𑀺𑀝𑁆𑀞𑀁 𑀅𑀧𑁆𑀧𑀢𑁆𑀢𑀁 𑀅𑀲𑀘𑁆𑀙𑀺𑀓𑀢𑀁 𑀅𑀦𑀪𑀺𑀲𑀫𑁂𑀢𑀁. 𑀢𑀲𑁆𑀲 [𑀬𑀲𑁆𑀲 (?)] 𑀜𑀸𑀡𑀸𑀬 𑀤𑀲𑁆𑀲𑀦𑀸𑀬 𑀧𑀢𑁆𑀢𑀺𑀬𑀸 𑀲𑀘𑁆𑀙𑀺𑀓𑀺𑀭𑀺𑀬𑀸𑀬 𑀅𑀪𑀺𑀲𑀫𑀬𑀸𑀬 𑀪𑀕𑀯𑀢𑀺 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’’𑀢𑀺. 𑀢𑀢𑀺𑀬𑀁.

𑁪. 𑀲𑀫𑀺𑀤𑁆𑀥𑀺𑀲𑀼𑀢𑁆𑀢𑀁

𑁧𑁪. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀫𑀺𑀤𑁆𑀥𑀺 𑀬𑁂𑀦𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀆𑀬𑀲𑁆𑀫𑀦𑁆𑀢𑀁 𑀲𑀫𑀺𑀤𑁆𑀥𑀺𑀁 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀏𑀢𑀤𑀯𑁄𑀘 𑁋 ‘‘𑀓𑀺𑀫𑀸𑀭𑀫𑁆𑀫𑀡𑀸, 𑀲𑀫𑀺𑀤𑁆𑀥𑀺, 𑀧𑀼𑀭𑀺𑀲𑀲𑁆𑀲 𑀲𑀗𑁆𑀓𑀧𑁆𑀧𑀯𑀺𑀢𑀓𑁆𑀓𑀸 𑀉𑀧𑁆𑀧𑀚𑁆𑀚𑀦𑁆𑀢𑀻’’𑀢𑀺? ‘‘𑀦𑀸𑀫𑀭𑀽𑀧𑀸𑀭𑀫𑁆𑀫𑀡𑀸, 𑀪𑀦𑁆𑀢𑁂’’𑀢𑀺. ‘‘𑀢𑁂 𑀧𑀦, 𑀲𑀫𑀺𑀤𑁆𑀥𑀺, 𑀓𑁆𑀯 𑀦𑀸𑀦𑀢𑁆𑀢𑀁 𑀕𑀘𑁆𑀙𑀦𑁆𑀢𑀻’’𑀢𑀺? ‘‘𑀥𑀸𑀢𑀽𑀲𑀼, 𑀪𑀦𑁆𑀢𑁂’’𑀢𑀺. ‘‘𑀢𑁂 𑀧𑀦, 𑀲𑀫𑀺𑀤𑁆𑀥𑀺, 𑀓𑀺𑀁𑀲𑀫𑀼𑀤𑀬𑀸’’𑀢𑀺? ‘‘𑀨𑀲𑁆𑀲𑀲𑀫𑀼𑀤𑀬𑀸, 𑀪𑀦𑁆𑀢𑁂’’𑀢𑀺. ‘‘𑀢𑁂 𑀧𑀦, 𑀲𑀫𑀺𑀤𑁆𑀥𑀺, 𑀓𑀺𑀁𑀲𑀫𑁄𑀲𑀭𑀡𑀸’’𑀢𑀺? ‘‘𑀯𑁂𑀤𑀦𑀸𑀲𑀫𑁄𑀲𑀭𑀡𑀸, 𑀪𑀦𑁆𑀢𑁂’’𑀢𑀺. ‘‘𑀢𑁂 𑀧𑀦, 𑀲𑀫𑀺𑀤𑁆𑀥𑀺, 𑀓𑀺𑀁𑀧𑀫𑀼𑀔𑀸’’𑀢𑀺? ‘‘𑀲𑀫𑀸𑀥𑀺𑀧𑁆𑀧𑀫𑀼𑀔𑀸, 𑀪𑀦𑁆𑀢𑁂’’𑀢𑀺. ‘‘𑀢𑁂 𑀧𑀦, 𑀲𑀫𑀺𑀤𑁆𑀥𑀺, 𑀓𑀺𑀁𑀅𑀥𑀺𑀧𑀢𑁂𑀬𑁆𑀬𑀸’’𑀢𑀺? ‘‘𑀲𑀢𑀸𑀥𑀺𑀧𑀢𑁂𑀬𑁆𑀬𑀸, 𑀪𑀦𑁆𑀢𑁂’’𑀢𑀺. ‘‘𑀢𑁂 𑀧𑀦, 𑀲𑀫𑀺𑀤𑁆𑀥𑀺, 𑀓𑀺𑀁𑀉𑀢𑁆𑀢𑀭𑀸’’𑀢𑀺? ‘‘𑀧𑀜𑁆𑀜𑀼𑀢𑁆𑀢𑀭𑀸, 𑀪𑀦𑁆𑀢𑁂’’𑀢𑀺. ‘‘𑀢𑁂 𑀧𑀦, 𑀲𑀫𑀺𑀤𑁆𑀥𑀺, 𑀓𑀺𑀁𑀲𑀸𑀭𑀸’’𑀢𑀺? ‘‘𑀯𑀺𑀫𑀼𑀢𑁆𑀢𑀺𑀲𑀸𑀭𑀸, 𑀪𑀦𑁆𑀢𑁂’’𑀢𑀺. ‘‘𑀢𑁂 𑀧𑀦, 𑀲𑀫𑀺𑀤𑁆𑀥𑀺, 𑀓𑀺𑀁𑀑𑀕𑀥𑀸’’𑀢𑀺? ‘‘𑀅𑀫𑀢𑁄𑀕𑀥𑀸, 𑀪𑀦𑁆𑀢𑁂’’𑀢𑀺.

‘‘‘𑀓𑀺𑀫𑀸𑀭𑀫𑁆𑀫𑀡𑀸, 𑀲𑀫𑀺𑀤𑁆𑀥𑀺, 𑀧𑀼𑀭𑀺𑀲𑀲𑁆𑀲 𑀲𑀗𑁆𑀓𑀧𑁆𑀧𑀯𑀺𑀢𑀓𑁆𑀓𑀸 𑀉𑀧𑁆𑀧𑀚𑁆𑀚𑀦𑁆𑀢𑀻’𑀢𑀺, 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 ‘𑀦𑀸𑀫𑀭𑀽𑀧𑀸𑀭𑀫𑁆𑀫𑀡𑀸, 𑀪𑀦𑁆𑀢𑁂’𑀢𑀺 𑀯𑀤𑁂𑀲𑀺. ‘𑀢𑁂 𑀧𑀦, 𑀲𑀫𑀺𑀤𑁆𑀥𑀺, 𑀓𑁆𑀯 𑀦𑀸𑀦𑀢𑁆𑀢𑀁 𑀕𑀘𑁆𑀙𑀦𑁆𑀢𑀻’𑀢𑀺, 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 ‘𑀥𑀸𑀢𑀽𑀲𑀼, 𑀪𑀦𑁆𑀢𑁂’𑀢𑀺 𑀯𑀤𑁂𑀲𑀺. ‘𑀢𑁂 𑀧𑀦, 𑀲𑀫𑀺𑀤𑁆𑀥𑀺, 𑀓𑀺𑀁𑀲𑀫𑀼𑀤𑀬𑀸’𑀢𑀺, 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 ‘𑀨𑀲𑁆𑀲𑀲𑀫𑀼𑀤𑀬𑀸, 𑀪𑀦𑁆𑀢𑁂’𑀢𑀺 𑀯𑀤𑁂𑀲𑀺. ‘𑀢𑁂 𑀧𑀦, 𑀲𑀫𑀺𑀤𑁆𑀥𑀺, 𑀓𑀺𑀁𑀲𑀫𑁄𑀲𑀭𑀡𑀸’𑀢𑀺, 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 ‘𑀯𑁂𑀤𑀦𑀸𑀲𑀫𑁄𑀲𑀭𑀡𑀸, 𑀪𑀦𑁆𑀢𑁂’𑀢𑀺 𑀯𑀤𑁂𑀲𑀺. ‘𑀢𑁂 𑀧𑀦, 𑀲𑀫𑀺𑀤𑁆𑀥𑀺, 𑀓𑀺𑀁𑀧𑀫𑀼𑀔𑀸’𑀢𑀺, 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 ‘𑀲𑀫𑀸𑀥𑀺𑀧𑁆𑀧𑀫𑀼𑀔𑀸, 𑀪𑀦𑁆𑀢𑁂’𑀢𑀺 𑀯𑀤𑁂𑀲𑀺. ‘𑀢𑁂 𑀧𑀦, 𑀲𑀫𑀺𑀤𑁆𑀥𑀺, 𑀓𑀺𑀁𑀅𑀥𑀺𑀧𑀢𑁂𑀬𑁆𑀬𑀸’𑀢𑀺, 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 ‘𑀲𑀢𑀸𑀥𑀺𑀧𑀢𑁂𑀬𑁆𑀬𑀸, 𑀪𑀦𑁆𑀢𑁂’𑀢𑀺 𑀯𑀤𑁂𑀲𑀺. ‘𑀢𑁂 𑀧𑀦, 𑀲𑀫𑀺𑀤𑁆𑀥𑀺, 𑀓𑀺𑀁𑀉𑀢𑁆𑀢𑀭𑀸’𑀢𑀺, 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 ‘𑀧𑀜𑁆𑀜𑀼𑀢𑁆𑀢𑀭𑀸, 𑀪𑀦𑁆𑀢𑁂’𑀢𑀺 𑀯𑀤𑁂𑀲𑀺. ‘𑀢𑁂 𑀧𑀦, 𑀲𑀫𑀺𑀤𑁆𑀥𑀺, 𑀓𑀺𑀁𑀲𑀸𑀭𑀸’𑀢𑀺, 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 ‘𑀯𑀺𑀫𑀼𑀢𑁆𑀢𑀺𑀲𑀸𑀭𑀸, 𑀪𑀦𑁆𑀢𑁂’𑀢𑀺 𑀯𑀤𑁂𑀲𑀺. ‘𑀢𑁂 𑀧𑀦, 𑀲𑀫𑀺𑀤𑁆𑀥𑀺, 𑀓𑀺𑀁𑀑𑀕𑀥𑀸’𑀢𑀺, 𑀇𑀢𑀺 𑀧𑀼𑀝𑁆𑀞𑁄 𑀲𑀫𑀸𑀦𑁄 ‘𑀅𑀫𑀢𑁄𑀕𑀥𑀸, 𑀪𑀦𑁆𑀢𑁂’𑀢𑀺 𑀯𑀤𑁂𑀲𑀺. 𑀲𑀸𑀥𑀼 𑀲𑀸𑀥𑀼, 𑀲𑀫𑀺𑀤𑁆𑀥𑀺! 𑀲𑀸𑀥𑀼 𑀔𑁄 𑀢𑁆𑀯𑀁, 𑀲𑀫𑀺𑀤𑁆𑀥𑀺, 𑀧𑀼𑀝𑁆𑀞𑁄 [𑀧𑀜𑁆𑀳𑀁 (𑀲𑀻. 𑀲𑁆𑀬𑀸. 𑀧𑀻.)] 𑀧𑀼𑀝𑁆𑀞𑁄 𑀯𑀺𑀲𑁆𑀲𑀚𑁆𑀚𑁂𑀲𑀺, 𑀢𑁂𑀦 𑀘 𑀫𑀸 𑀫𑀜𑁆𑀜𑀻’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀕𑀡𑁆𑀟𑀲𑀼𑀢𑁆𑀢𑀁

𑁧𑁫. ‘‘𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀕𑀡𑁆𑀟𑁄 𑀅𑀦𑁂𑀓𑀯𑀲𑁆𑀲𑀕𑀡𑀺𑀓𑁄. 𑀢𑀲𑁆𑀲𑀲𑁆𑀲𑀼 𑀕𑀡𑁆𑀟𑀲𑁆𑀲 𑀦𑀯 𑀯𑀡𑀫𑀼𑀔𑀸𑀦𑀺 𑀦𑀯 𑀅𑀪𑁂𑀤𑀦𑀫𑀼𑀔𑀸𑀦𑀺. 𑀢𑀢𑁄 𑀬𑀁 𑀓𑀺𑀜𑁆𑀘𑀺 𑀧𑀕𑁆𑀖𑀭𑁂𑀬𑁆𑀬 𑁋 𑀅𑀲𑀼𑀘𑀺𑀬𑁂𑀯 𑀧𑀕𑁆𑀖𑀭𑁂𑀬𑁆𑀬, 𑀤𑀼𑀕𑁆𑀕𑀦𑁆𑀥𑀁𑀬𑁂𑀯 𑀧𑀕𑁆𑀖𑀭𑁂𑀬𑁆𑀬, 𑀚𑁂𑀕𑀼𑀘𑁆𑀙𑀺𑀬𑀁𑀬𑁂𑀯 [𑀚𑁂𑀕𑀼𑀘𑁆𑀙𑀺𑀬𑁂𑀯 (𑀓.)] 𑀧𑀕𑁆𑀖𑀭𑁂𑀬𑁆𑀬; 𑀬𑀁 𑀓𑀺𑀜𑁆𑀘𑀺 𑀧𑀲𑀯𑁂𑀬𑁆𑀬 𑁋 𑀅𑀲𑀼𑀘𑀺𑀬𑁂𑀯 𑀧𑀲𑀯𑁂𑀬𑁆𑀬, 𑀤𑀼𑀕𑁆𑀕𑀦𑁆𑀥𑀁𑀬𑁂𑀯 𑀧𑀲𑀯𑁂𑀬𑁆𑀬, 𑀚𑁂𑀕𑀼𑀘𑁆𑀙𑀺𑀬𑀁𑀬𑁂𑀯 𑀧𑀲𑀯𑁂𑀬𑁆𑀬.

‘‘𑀕𑀡𑁆𑀟𑁄𑀢𑀺 𑀔𑁄, 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀲𑁂𑀢𑀁 𑀘𑀸𑀢𑀼𑀫𑀳𑀸𑀪𑀽𑀢𑀺𑀓𑀲𑁆𑀲 [𑀘𑀸𑀢𑀼𑀫𑁆𑀫𑀳𑀸𑀪𑀽𑀢𑀺𑀓𑀲𑁆𑀲 (𑀲𑀻. 𑀲𑁆𑀬𑀸. 𑀧𑀻.)] 𑀓𑀸𑀬𑀲𑁆𑀲 𑀅𑀥𑀺𑀯𑀘𑀦𑀁 𑀫𑀸𑀢𑀸𑀧𑁂𑀢𑁆𑀢𑀺𑀓𑀲𑀫𑁆𑀪𑀯𑀲𑁆𑀲 𑀑𑀤𑀦𑀓𑀼𑀫𑁆𑀫𑀸𑀲𑀽𑀧𑀘𑀬𑀲𑁆𑀲 𑀅𑀦𑀺𑀘𑁆𑀘𑀼𑀘𑁆𑀙𑀸𑀤𑀦𑀧𑀭𑀺𑀫𑀤𑁆𑀤𑀦𑀪𑁂𑀤𑀦𑀯𑀺𑀤𑁆𑀥𑀁𑀲𑀦𑀥𑀫𑁆𑀫𑀲𑁆𑀲. 𑀢𑀲𑁆𑀲𑀲𑁆𑀲𑀼 𑀕𑀡𑁆𑀟𑀲𑁆𑀲 𑀦𑀯 𑀯𑀡𑀫𑀼𑀔𑀸𑀦𑀺 𑀦𑀯 𑀅𑀪𑁂𑀤𑀦𑀫𑀼𑀔𑀸𑀦𑀺. 𑀢𑀢𑁄 𑀬𑀁 𑀓𑀺𑀜𑁆𑀘𑀺 𑀧𑀕𑁆𑀖𑀭𑀢𑀺 𑁋 𑀅𑀲𑀼𑀘𑀺𑀬𑁂𑀯 𑀧𑀕𑁆𑀖𑀭𑀢𑀺, 𑀤𑀼𑀕𑁆𑀕𑀦𑁆𑀥𑀁𑀬𑁂𑀯 𑀧𑀕𑁆𑀖𑀭𑀢𑀺, 𑀚𑁂𑀕𑀼𑀘𑁆𑀙𑀺𑀬𑀁𑀬𑁂𑀯 𑀧𑀕𑁆𑀖𑀭𑀢𑀺; 𑀬𑀁 𑀓𑀺𑀜𑁆𑀘𑀺 𑀧𑀲𑀯𑀢𑀺 𑁋 𑀅𑀲𑀼𑀘𑀺𑀬𑁂𑀯 𑀧𑀲𑀯𑀢𑀺, 𑀤𑀼𑀕𑁆𑀕𑀦𑁆𑀥𑀁𑀬𑁂𑀯 𑀧𑀲𑀯𑀢𑀺, 𑀚𑁂𑀕𑀼𑀘𑁆𑀙𑀺𑀬𑀁𑀬𑁂𑀯 𑀧𑀲𑀯𑀢𑀺. 𑀢𑀲𑁆𑀫𑀸𑀢𑀺𑀳, 𑀪𑀺𑀓𑁆𑀔𑀯𑁂, 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀦𑀺𑀩𑁆𑀩𑀺𑀦𑁆𑀤𑀣𑀸’’𑀢𑀺. 𑀧𑀜𑁆𑀘𑀫𑀁.

𑁬. 𑀲𑀜𑁆𑀜𑀸𑀲𑀼𑀢𑁆𑀢𑀁

𑁧𑁬. ‘‘𑀦𑀯𑀬𑀺𑀫𑀸, 𑀪𑀺𑀓𑁆𑀔𑀯𑁂, 𑀲𑀜𑁆𑀜𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀫𑀳𑀧𑁆𑀨𑀮𑀸 𑀳𑁄𑀦𑁆𑀢𑀺 𑀫𑀳𑀸𑀦𑀺𑀲𑀁𑀲𑀸 𑀅𑀫𑀢𑁄𑀕𑀥𑀸 𑀅𑀫𑀢𑀧𑀭𑀺𑀬𑁄𑀲𑀸𑀦𑀸. 𑀓𑀢𑀫𑀸 𑀦𑀯? 𑀅𑀲𑀼𑀪𑀲𑀜𑁆𑀜𑀸, 𑀫𑀭𑀡𑀲𑀜𑁆𑀜𑀸, 𑀆𑀳𑀸𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀸 [𑀧𑀝𑀺𑀓𑁆𑀓𑀽𑀮𑀲𑀜𑁆𑀜𑀸 (𑀲𑀻. 𑀲𑁆𑀬𑀸. 𑀧𑀻.)], 𑀲𑀩𑁆𑀩𑀮𑁄𑀓𑁂 𑀅𑀦𑀪𑀺𑀭𑀢𑀲𑀜𑁆𑀜𑀸 [𑀅𑀦𑀪𑀺𑀭𑀢𑀺𑀲𑀜𑁆𑀜𑀸 (𑀓.) 𑀅. 𑀦𑀺. 𑁫.𑁧𑁨𑁧-𑁧𑁨𑁨], 𑀅𑀦𑀺𑀘𑁆𑀘𑀲𑀜𑁆𑀜𑀸, 𑀅𑀦𑀺𑀘𑁆𑀘𑁂 𑀤𑀼𑀓𑁆𑀔𑀲𑀜𑁆𑀜𑀸, 𑀤𑀼𑀓𑁆𑀔𑁂 𑀅𑀦𑀢𑁆𑀢𑀲𑀜𑁆𑀜𑀸, 𑀧𑀳𑀸𑀦𑀲𑀜𑁆𑀜𑀸, 𑀯𑀺𑀭𑀸𑀕𑀲𑀜𑁆𑀜𑀸 𑁋 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀦𑀯 𑀲𑀜𑁆𑀜𑀸, 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀫𑀳𑀧𑁆𑀨𑀮𑀸 𑀳𑁄𑀦𑁆𑀢𑀺 𑀫𑀳𑀸𑀦𑀺𑀲𑀁𑀲𑀸 𑀅𑀫𑀢𑁄𑀕𑀥𑀸 𑀅𑀫𑀢𑀧𑀭𑀺𑀬𑁄𑀲𑀸𑀦𑀸’’𑀢𑀺. 𑀙𑀝𑁆𑀞𑀁.

𑁭. 𑀓𑀼𑀮𑀲𑀼𑀢𑁆𑀢𑀁

𑁧𑁭. ‘‘𑀦𑀯𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀓𑀼𑀮𑀁 𑀅𑀦𑀼𑀧𑀕𑀦𑁆𑀢𑁆𑀯𑀸 𑀯𑀸 𑀦𑀸𑀮𑀁 𑀉𑀧𑀕𑀦𑁆𑀢𑀼𑀁, 𑀉𑀧𑀕𑀦𑁆𑀢𑁆𑀯𑀸 𑀯𑀸 𑀦𑀸𑀮𑀁 𑀦𑀺𑀲𑀻𑀤𑀺𑀢𑀼𑀁. 𑀓𑀢𑀫𑁂𑀳𑀺 𑀦𑀯𑀳𑀺? 𑀦 𑀫𑀦𑀸𑀧𑁂𑀦 𑀧𑀘𑁆𑀘𑀼𑀝𑁆𑀞𑁂𑀦𑁆𑀢𑀺, 𑀦 𑀫𑀦𑀸𑀧𑁂𑀦 𑀅𑀪𑀺𑀯𑀸𑀤𑁂𑀦𑁆𑀢𑀺, 𑀦 𑀫𑀦𑀸𑀧𑁂𑀦 𑀆𑀲𑀦𑀁 𑀤𑁂𑀦𑁆𑀢𑀺, 𑀲𑀦𑁆𑀢𑀫𑀲𑁆𑀲 𑀧𑀭𑀺𑀕𑀼𑀳𑀦𑁆𑀢𑀺, 𑀩𑀳𑀼𑀓𑀫𑁆𑀧𑀺 𑀣𑁄𑀓𑀁 𑀤𑁂𑀦𑁆𑀢𑀺, 𑀧𑀡𑀻𑀢𑀫𑁆𑀧𑀺 𑀮𑀽𑀔𑀁 𑀤𑁂𑀦𑁆𑀢𑀺, 𑀅𑀲𑀓𑁆𑀓𑀘𑁆𑀘𑀁 𑀤𑁂𑀦𑁆𑀢𑀺 𑀦𑁄 𑀲𑀓𑁆𑀓𑀘𑁆𑀘𑀁, 𑀦 𑀉𑀧𑀦𑀺𑀲𑀻𑀤𑀦𑁆𑀢𑀺 𑀥𑀫𑁆𑀫𑀲𑁆𑀲𑀯𑀦𑀸𑀬, 𑀪𑀸𑀲𑀺𑀢𑀫𑀲𑁆𑀲 𑀦 𑀲𑀼𑀲𑁆𑀲𑀽𑀲𑀦𑁆𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀦𑀯𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀓𑀼𑀮𑀁 𑀅𑀦𑀼𑀧𑀕𑀦𑁆𑀢𑁆𑀯𑀸 𑀯𑀸 𑀦𑀸𑀮𑀁 𑀉𑀧𑀕𑀦𑁆𑀢𑀼𑀁 𑀉𑀧𑀕𑀦𑁆𑀢𑁆𑀯𑀸 𑀯𑀸 𑀦𑀸𑀮𑀁 𑀦𑀺𑀲𑀻𑀤𑀺𑀢𑀼𑀁.

‘‘𑀦𑀯𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀓𑀼𑀮𑀁 𑀅𑀦𑀼𑀧𑀕𑀦𑁆𑀢𑁆𑀯𑀸 𑀯𑀸 𑀅𑀮𑀁 𑀉𑀧𑀕𑀦𑁆𑀢𑀼𑀁, 𑀉𑀧𑀕𑀦𑁆𑀢𑁆𑀯𑀸 𑀯𑀸 𑀅𑀮𑀁 𑀦𑀺𑀲𑀻𑀤𑀺𑀢𑀼𑀁. 𑀓𑀢𑀫𑁂𑀳𑀺 𑀦𑀯𑀳𑀺? 𑀫𑀦𑀸𑀧𑁂𑀦 𑀧𑀘𑁆𑀘𑀼𑀝𑁆𑀞𑁂𑀦𑁆𑀢𑀺, 𑀫𑀦𑀸𑀧𑁂𑀦 𑀅𑀪𑀺𑀯𑀸𑀤𑁂𑀦𑁆𑀢𑀺, 𑀫𑀦𑀸𑀧𑁂𑀦 𑀆𑀲𑀦𑀁 𑀤𑁂𑀦𑁆𑀢𑀺, 𑀲𑀦𑁆𑀢𑀫𑀲𑁆𑀲 𑀦 𑀧𑀭𑀺𑀕𑀼𑀳𑀦𑁆𑀢𑀺, 𑀩𑀳𑀼𑀓𑀫𑁆𑀧𑀺 𑀩𑀳𑀼𑀓𑀁 𑀤𑁂𑀦𑁆𑀢𑀺, 𑀧𑀡𑀻𑀢𑀫𑁆𑀧𑀺 𑀧𑀡𑀻𑀢𑀁 𑀤𑁂𑀦𑁆𑀢𑀺, 𑀲𑀓𑁆𑀓𑀘𑁆𑀘𑀁 𑀤𑁂𑀦𑁆𑀢𑀺 𑀦𑁄 𑀅𑀲𑀓𑁆𑀓𑀘𑁆𑀘𑀁, 𑀉𑀧𑀦𑀺𑀲𑀻𑀤𑀦𑁆𑀢𑀺 𑀥𑀫𑁆𑀫𑀲𑁆𑀲𑀯𑀦𑀸𑀬, 𑀪𑀸𑀲𑀺𑀢𑀫𑀲𑁆𑀲 𑀲𑀼𑀲𑁆𑀲𑀽𑀲𑀦𑁆𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀦𑀯𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀓𑀼𑀮𑀁 𑀅𑀦𑀼𑀧𑀕𑀦𑁆𑀢𑁆𑀯𑀸 𑀯𑀸 𑀅𑀮𑀁 𑀉𑀧𑀕𑀦𑁆𑀢𑀼𑀁, 𑀉𑀧𑀕𑀦𑁆𑀢𑁆𑀯𑀸 𑀯𑀸 𑀅𑀮𑀁 𑀦𑀺𑀲𑀻𑀤𑀺𑀢𑀼’’𑀦𑁆𑀢𑀺. 𑀲𑀢𑁆𑀢𑀫𑀁.

𑁮. 𑀦𑀯𑀗𑁆𑀕𑀼𑀧𑁄𑀲𑀣𑀲𑀼𑀢𑁆𑀢𑀁

𑁧𑁮. ‘‘𑀦𑀯𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀉𑀧𑁄𑀲𑀣𑁄 𑀉𑀧𑀯𑀼𑀢𑁆𑀣𑁄 𑀫𑀳𑀧𑁆𑀨𑀮𑁄 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑁄 𑀫𑀳𑀸𑀚𑀼𑀢𑀺𑀓𑁄 𑀫𑀳𑀸𑀯𑀺𑀧𑁆𑀨𑀸𑀭𑁄. 𑀓𑀣𑀁 𑀉𑀧𑀯𑀼𑀢𑁆𑀣𑁄 𑀘, 𑀪𑀺𑀓𑁆𑀔𑀯𑁂, 𑀦𑀯𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀉𑀧𑁄𑀲𑀣𑁄 𑀫𑀳𑀧𑁆𑀨𑀮𑁄 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑁄 𑀫𑀳𑀸𑀚𑀼𑀢𑀺𑀓𑁄 𑀫𑀳𑀸𑀯𑀺𑀧𑁆𑀨𑀸𑀭𑁄? 𑀇𑀥, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀬𑀸𑀯𑀚𑀻𑀯𑀁 𑀅𑀭𑀳𑀦𑁆𑀢𑁄 𑀧𑀸𑀡𑀸𑀢𑀺𑀧𑀸𑀢𑀁 𑀧𑀳𑀸𑀬 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑀸 𑀦𑀺𑀳𑀺𑀢𑀤𑀡𑁆𑀟𑀸 𑀦𑀺𑀳𑀺𑀢𑀲𑀢𑁆𑀣𑀸 𑀮𑀚𑁆𑀚𑀻 𑀤𑀬𑀸𑀧𑀦𑁆𑀦𑀸 𑀲𑀩𑁆𑀩𑀧𑀸𑀡𑀪𑀽𑀢𑀳𑀺𑀢𑀸𑀦𑀼𑀓𑀫𑁆𑀧𑀺𑀦𑁄 𑀯𑀺𑀳𑀭𑀦𑁆𑀢𑀺; 𑀅𑀳𑀫𑁆𑀧𑀚𑁆𑀚 𑀇𑀫𑀜𑁆𑀘 𑀭𑀢𑁆𑀢𑀺𑀁 𑀇𑀫𑀜𑁆𑀘 𑀤𑀺𑀯𑀲𑀁 𑀧𑀸𑀡𑀸𑀢𑀺𑀧𑀸𑀢𑀁 𑀧𑀳𑀸𑀬 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀦𑀺𑀳𑀺𑀢𑀤𑀡𑁆𑀟𑁄 𑀦𑀺𑀳𑀺𑀢𑀲𑀢𑁆𑀣𑁄 𑀮𑀚𑁆𑀚𑀻 𑀤𑀬𑀸𑀧𑀦𑁆𑀦𑁄 𑀲𑀩𑁆𑀩𑀧𑀸𑀡𑀪𑀽𑀢𑀳𑀺𑀢𑀸𑀦𑀼𑀓𑀫𑁆𑀧𑀻 𑀯𑀺𑀳𑀭𑀸𑀫𑀺. 𑀇𑀫𑀺𑀦𑀸𑀧𑀗𑁆𑀕𑁂𑀦 [𑀇𑀫𑀺𑀦𑀸𑀧𑀺 𑀅𑀗𑁆𑀕𑁂𑀦 (𑀓. 𑀲𑀻.)] 𑀅𑀭𑀳𑀢𑀁 𑀅𑀦𑀼𑀓𑀭𑁄𑀫𑀺; 𑀉𑀧𑁄𑀲𑀣𑁄 𑀘 𑀫𑁂 𑀉𑀧𑀯𑀼𑀢𑁆𑀣𑁄 𑀪𑀯𑀺𑀲𑁆𑀲𑀢𑀻’𑀢𑀺. 𑀇𑀫𑀺𑀦𑀸 𑀧𑀞𑀫𑁂𑀦 𑀅𑀗𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺…𑀧𑁂. ….

‘‘‘𑀬𑀸𑀯𑀚𑀻𑀯𑀁 𑀅𑀭𑀳𑀦𑁆𑀢𑁄 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀁 𑀧𑀳𑀸𑀬 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀸 𑀧𑀝𑀺𑀯𑀺𑀭𑀢𑀸 𑀦𑀻𑀘𑀲𑁂𑀬𑁆𑀬𑀁 𑀓𑀧𑁆𑀧𑁂𑀦𑁆𑀢𑀺 𑁋 𑀫𑀜𑁆𑀘𑀓𑁂 𑀯𑀸 𑀢𑀺𑀡𑀲𑀦𑁆𑀣𑀸𑀭𑀓𑁂 𑀯𑀸; 𑀅𑀳𑀫𑁆𑀧𑀚𑁆𑀚 𑀇𑀫𑀜𑁆𑀘 𑀭𑀢𑁆𑀢𑀺𑀁 𑀇𑀫𑀜𑁆𑀘 𑀤𑀺𑀯𑀲𑀁 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀁 𑀧𑀳𑀸𑀬 𑀉𑀘𑁆𑀘𑀸𑀲𑀬𑀦𑀫𑀳𑀸𑀲𑀬𑀦𑀸 𑀧𑀝𑀺𑀯𑀺𑀭𑀢𑁄 𑀦𑀻𑀘𑀲𑁂𑀬𑁆𑀬𑀁 𑀓𑀧𑁆𑀧𑁂𑀫𑀺 𑁋 𑀫𑀜𑁆𑀘𑀓𑁂 𑀯𑀸 𑀢𑀺𑀡𑀲𑀦𑁆𑀣𑀸𑀭𑀓𑁂 𑀯𑀸. 𑀇𑀫𑀺𑀦𑀸𑀧𑀗𑁆𑀕𑁂𑀦 𑀅𑀭𑀳𑀢𑀁 𑀅𑀦𑀼𑀓𑀭𑁄𑀫𑀺; 𑀉𑀧𑁄𑀲𑀣𑁄 𑀘 𑀫𑁂 𑀉𑀧𑀯𑀼𑀢𑁆𑀣𑁄 𑀪𑀯𑀺𑀲𑁆𑀲𑀢𑀻’𑀢𑀺. 𑀇𑀫𑀺𑀦𑀸 𑀅𑀝𑁆𑀞𑀫𑁂𑀦 𑀅𑀗𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺.

‘‘𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀏𑀓𑀁 𑀤𑀺𑀲𑀁 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺, 𑀢𑀣𑀸 𑀤𑀼𑀢𑀺𑀬𑀁 𑀢𑀣𑀸 𑀢𑀢𑀺𑀬𑀁 𑀢𑀣𑀸 𑀘𑀢𑀼𑀢𑁆𑀣𑀁. 𑀇𑀢𑀺 𑀉𑀤𑁆𑀥𑀫𑀥𑁄 𑀢𑀺𑀭𑀺𑀬𑀁 𑀲𑀩𑁆𑀩𑀥𑀺 𑀲𑀩𑁆𑀩𑀢𑁆𑀢𑀢𑀸𑀬 𑀲𑀩𑁆𑀩𑀸𑀯𑀦𑁆𑀢𑀁 𑀮𑁄𑀓𑀁 𑀫𑁂𑀢𑁆𑀢𑀸𑀲𑀳𑀕𑀢𑁂𑀦 𑀘𑁂𑀢𑀲𑀸 𑀯𑀺𑀧𑀼𑀮𑁂𑀦 𑀫𑀳𑀕𑁆𑀕𑀢𑁂𑀦 𑀅𑀧𑁆𑀧𑀫𑀸𑀡𑁂𑀦 𑀅𑀯𑁂𑀭𑁂𑀦 𑀅𑀩𑁆𑀬𑀸𑀧𑀚𑁆𑀚𑁂𑀦 [𑀅𑀩𑁆𑀬𑀸𑀧𑀚𑁆𑀛𑁂𑀦 (𑀓.), 𑀅𑀩𑁆𑀬𑀸𑀩𑀚𑁆𑀛𑁂𑀦 (?)] 𑀨𑀭𑀺𑀢𑁆𑀯𑀸 𑀯𑀺𑀳𑀭𑀢𑀺. 𑀇𑀫𑀺𑀦𑀸 𑀦𑀯𑀫𑁂𑀦 𑀅𑀗𑁆𑀕𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺. 𑀏𑀯𑀁 𑀉𑀧𑀯𑀼𑀢𑁆𑀣𑁄 𑀔𑁄, 𑀪𑀺𑀓𑁆𑀔𑀯𑁂, 𑀦𑀯𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀉𑀧𑁄𑀲𑀣𑁄 𑀫𑀳𑀧𑁆𑀨𑀮𑁄 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑁄 𑀫𑀳𑀸𑀚𑀼𑀢𑀺𑀓𑁄 𑀫𑀳𑀸𑀯𑀺𑀧𑁆𑀨𑀸𑀭𑁄’’𑀢𑀺. 𑀅𑀝𑁆𑀞𑀫𑀁.

𑁯. 𑀤𑁂𑀯𑀢𑀸𑀲𑀼𑀢𑁆𑀢𑀁

𑁧𑁯. ‘‘𑀇𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀭𑀢𑁆𑀢𑀺𑀁 𑀲𑀫𑁆𑀩𑀳𑀼𑀮𑀸 𑀤𑁂𑀯𑀢𑀸 𑀅𑀪𑀺𑀓𑁆𑀓𑀦𑁆𑀢𑀸𑀬 𑀭𑀢𑁆𑀢𑀺𑀬𑀸 𑀅𑀪𑀺𑀓𑁆𑀓𑀦𑁆𑀢𑀯𑀡𑁆𑀡𑀸 𑀓𑁂𑀯𑀮𑀓𑀧𑁆𑀧𑀁 𑀚𑁂𑀢𑀯𑀦𑀁 𑀑𑀪𑀸𑀲𑁂𑀢𑁆𑀯𑀸 𑀬𑁂𑀦𑀸𑀳𑀁 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼. 𑀏𑀓𑀫𑀦𑁆𑀢𑀁 𑀞𑀺𑀢𑀸 𑀔𑁄, 𑀪𑀺𑀓𑁆𑀔𑀯𑁂, 𑀢𑀸 𑀤𑁂𑀯𑀢𑀸 𑀫𑀁 𑀏𑀢𑀤𑀯𑁄𑀘𑀼𑀁 𑁋 ‘𑀉𑀧𑀲𑀗𑁆𑀓𑀫𑀺𑀁𑀲𑀼 𑀦𑁄, 𑀪𑀦𑁆𑀢𑁂, 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑀸𑀦𑀁 𑀧𑀩𑁆𑀩𑀚𑀺𑀢𑀸 𑀅𑀕𑀸𑀭𑀸𑀦𑀺. 𑀢𑁂 𑀫𑀬𑀁, 𑀪𑀦𑁆𑀢𑁂, 𑀧𑀘𑁆𑀘𑀼𑀝𑁆𑀞𑀺𑀫𑁆𑀳, 𑀦𑁄 𑀘 𑀔𑁄 𑀅𑀪𑀺𑀯𑀸𑀤𑀺𑀫𑁆𑀳. 𑀢𑀸 𑀫𑀬𑀁, 𑀪𑀦𑁆𑀢𑁂, 𑀅𑀧𑀭𑀺𑀧𑀼𑀡𑁆𑀡𑀓𑀫𑁆𑀫𑀦𑁆𑀢𑀸 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑀺𑀬𑁄 𑀧𑀘𑁆𑀘𑀸𑀦𑀼𑀢𑀸𑀧𑀺𑀦𑀺𑀬𑁄 𑀳𑀻𑀦𑀁 𑀓𑀸𑀬𑀁 𑀉𑀧𑀧𑀦𑁆𑀦𑀸’’’𑀢𑀺.

‘‘𑀅𑀧𑀭𑀸𑀧𑀺 𑀫𑀁, 𑀪𑀺𑀓𑁆𑀔𑀯𑁂, 𑀲𑀫𑁆𑀩𑀳𑀼𑀮𑀸 𑀤𑁂𑀯𑀢𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀤𑀯𑁄𑀘𑀼𑀁 𑁋 ‘𑀉𑀧𑀲𑀗𑁆𑀓𑀫𑀺𑀁𑀲𑀼 𑀦𑁄, 𑀪𑀦𑁆𑀢𑁂, 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑀸𑀦𑀁 𑀧𑀩𑁆𑀩𑀚𑀺𑀢𑀸 𑀅𑀕𑀸𑀭𑀸𑀦𑀺. 𑀢𑁂 𑀫𑀬𑀁, 𑀪𑀦𑁆𑀢𑁂, 𑀧𑀘𑁆𑀘𑀼𑀝𑁆𑀞𑀺𑀫𑁆𑀳 𑀅𑀪𑀺𑀯𑀸𑀤𑀺𑀫𑁆𑀳 [𑀧𑀘𑁆𑀘𑀼𑀝𑁆𑀞𑀺𑀫𑁆𑀳 𑀘 𑀅𑀪𑀺𑀯𑀸𑀤𑀺𑀫𑁆𑀳 𑀘 (𑀲𑁆𑀬𑀸.)], 𑀦𑁄 𑀘 𑀢𑁂𑀲𑀁 𑀆𑀲𑀦𑀁 𑀅𑀤𑀫𑁆𑀳. 𑀢𑀸 𑀫𑀬𑀁, 𑀪𑀦𑁆𑀢𑁂, 𑀅𑀧𑀭𑀺𑀧𑀼𑀡𑁆𑀡𑀓𑀫𑁆𑀫𑀦𑁆𑀢𑀸 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑀺𑀬𑁄 𑀧𑀘𑁆𑀘𑀸𑀦𑀼𑀢𑀸𑀧𑀺𑀦𑀺𑀬𑁄 𑀳𑀻𑀦𑀁 𑀓𑀸𑀬𑀁 𑀉𑀧𑀧𑀦𑁆𑀦𑀸’’’𑀢𑀺.

‘‘𑀅𑀧𑀭𑀸𑀧𑀺 𑀫𑀁, 𑀪𑀺𑀓𑁆𑀔𑀯𑁂, 𑀲𑀫𑁆𑀩𑀳𑀼𑀮𑀸 𑀤𑁂𑀯𑀢𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀤𑀯𑁄𑀘𑀼𑀁 𑁋 ‘𑀉𑀧𑀲𑀗𑁆𑀓𑀫𑀺𑀁𑀲𑀼 𑀦𑁄, 𑀪𑀦𑁆𑀢𑁂, 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑀸𑀦𑀁 𑀧𑀩𑁆𑀩𑀚𑀺𑀢𑀸 𑀅𑀕𑀸𑀭𑀸𑀦𑀺. 𑀢𑁂 𑀫𑀬𑀁, 𑀪𑀦𑁆𑀢𑁂, 𑀧𑀘𑁆𑀘𑀼𑀝𑁆𑀞𑀺𑀫𑁆𑀳 𑀅𑀪𑀺𑀯𑀸𑀤𑀺𑀫𑁆𑀳 [𑀧𑀘𑁆𑀘𑀼𑀝𑁆𑀞𑀺𑀫𑁆𑀳 𑀘 𑀅𑀪𑀺𑀯𑀸𑀤𑀺𑀫𑁆𑀳 𑀘 (𑀲𑁆𑀬𑀸.)] 𑀆𑀲𑀦𑀁 [𑀆𑀲𑀦𑀜𑁆𑀘 (𑀲𑀻. 𑀲𑁆𑀬𑀸.)] 𑀅𑀤𑀫𑁆𑀳, 𑀦𑁄 𑀘 𑀔𑁄 𑀬𑀣𑀸𑀲𑀢𑁆𑀢𑀺 𑀬𑀣𑀸𑀩𑀮𑀁 𑀲𑀁𑀯𑀺𑀪𑀚𑀺𑀫𑁆𑀳…𑀧𑁂… 𑀬𑀣𑀸𑀲𑀢𑁆𑀢𑀺 𑀬𑀣𑀸𑀩𑀮𑀁 [𑀬𑀣𑀸𑀩𑀮𑀁 𑀘 (?)] 𑀲𑀁𑀯𑀺𑀪𑀚𑀺𑀫𑁆𑀳, 𑀦𑁄 𑀘 𑀔𑁄 𑀉𑀧𑀦𑀺𑀲𑀻𑀤𑀺𑀫𑁆𑀳 𑀥𑀫𑁆𑀫𑀲𑁆𑀲𑀯𑀦𑀸𑀬…𑀧𑁂… 𑀉𑀧𑀦𑀺𑀲𑀻𑀤𑀺𑀫𑁆𑀳 [𑀉𑀧𑀦𑀺𑀲𑀻𑀤𑀺𑀫𑁆𑀳 𑀘 (𑀲𑁆𑀬𑀸.)] 𑀥𑀫𑁆𑀫𑀲𑁆𑀲𑀯𑀦𑀸𑀬, 𑀦𑁄 𑀘 𑀔𑁄 𑀑𑀳𑀺𑀢𑀲𑁄𑀢𑀸 𑀥𑀫𑁆𑀫𑀁 𑀲𑀼𑀡𑀺𑀫𑁆𑀳…𑀧𑁂… 𑀑𑀳𑀺𑀢𑀲𑁄𑀢𑀸 𑀘 𑀥𑀫𑁆𑀫𑀁 𑀲𑀼𑀡𑀺𑀫𑁆𑀳, 𑀦𑁄 𑀘 𑀔𑁄 𑀲𑀼𑀢𑁆𑀯𑀸 𑀥𑀫𑁆𑀫𑀁 𑀥𑀸𑀭𑀬𑀺𑀫𑁆𑀳…𑀧𑁂… 𑀲𑀼𑀢𑁆𑀯𑀸 𑀘 𑀥𑀫𑁆𑀫𑀁 𑀥𑀸𑀭𑀬𑀺𑀫𑁆𑀳, 𑀦𑁄 𑀘 𑀔𑁄 𑀥𑀸𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀢𑁆𑀣𑀁 𑀉𑀧𑀧𑀭𑀺𑀓𑁆𑀔𑀺𑀫𑁆𑀳…𑀧𑁂… 𑀥𑀸𑀢𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀅𑀢𑁆𑀣𑀁 𑀉𑀧𑀧𑀭𑀺𑀓𑁆𑀔𑀺𑀫𑁆𑀳, 𑀦𑁄 𑀘 𑀔𑁄 𑀅𑀢𑁆𑀣𑀫𑀜𑁆𑀜𑀸𑀬 𑀥𑀫𑁆𑀫𑀫𑀜𑁆𑀜𑀸𑀬 𑀥𑀫𑁆𑀫𑀸𑀦𑀼𑀥𑀫𑁆𑀫𑀁 𑀧𑀝𑀺𑀧𑀚𑁆𑀚𑀺𑀫𑁆𑀳. 𑀢𑀸 𑀫𑀬𑀁, 𑀪𑀦𑁆𑀢𑁂, 𑀅𑀧𑀭𑀺𑀧𑀼𑀡𑁆𑀡𑀓𑀫𑁆𑀫𑀦𑁆𑀢𑀸 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑀺𑀬𑁄 𑀧𑀘𑁆𑀘𑀸𑀦𑀼𑀢𑀸𑀧𑀺𑀦𑀺𑀬𑁄 𑀳𑀻𑀦𑀁 𑀓𑀸𑀬𑀁 𑀉𑀧𑀧𑀦𑁆𑀦𑀸’’’𑀢𑀺.

‘‘𑀅𑀧𑀭𑀸𑀧𑀺 𑀫𑀁, 𑀪𑀺𑀓𑁆𑀔𑀯𑁂, 𑀲𑀫𑁆𑀩𑀳𑀼𑀮𑀸 𑀤𑁂𑀯𑀢𑀸 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀏𑀢𑀤𑀯𑁄𑀘𑀼𑀁 𑁋 ‘𑀉𑀧𑀲𑀗𑁆𑀓𑀫𑀺𑀁𑀲𑀼 𑀦𑁄, 𑀪𑀦𑁆𑀢𑁂, 𑀧𑀼𑀩𑁆𑀩𑁂 𑀫𑀦𑀼𑀲𑁆𑀲𑀪𑀽𑀢𑀸𑀦𑀁 𑀧𑀩𑁆𑀩𑀚𑀺𑀢𑀸 𑀅𑀕𑀸𑀭𑀸𑀦𑀺. 𑀢𑁂 𑀫𑀬𑀁, 𑀪𑀦𑁆𑀢𑁂, 𑀧𑀘𑁆𑀘𑀼𑀝𑁆𑀞𑀺𑀫𑁆𑀳 𑀅𑀪𑀺𑀯𑀸𑀤𑀺𑀫𑁆𑀳 [𑀧𑀘𑁆𑀘𑀼𑀝𑁆𑀞𑀺𑀫𑁆𑀳 𑀘 𑀅𑀪𑀺𑀯𑀸𑀤𑀺𑀫𑁆𑀳 𑀘 (𑀲𑁆𑀬𑀸.)], 𑀆𑀲𑀦𑀁 [𑀆𑀲𑀦𑀜𑁆𑀘 (𑀲𑀻. 𑀲𑁆𑀬𑀸.)] 𑀅𑀤𑀫𑁆𑀳, 𑀬𑀣𑀸𑀲𑀢𑁆𑀢𑀺 𑀬𑀣𑀸𑀩𑀮𑀁 [𑀬𑀣𑀸𑀩𑀮𑀁 𑀘 (?)] 𑀲𑀁𑀯𑀺𑀪𑀚𑀺𑀫𑁆𑀳, 𑀉𑀧𑀦𑀺𑀲𑀻𑀤𑀺𑀫𑁆𑀳 [𑀉𑀧𑀦𑀺𑀲𑀻𑀤𑀺𑀫𑁆𑀳 𑀘 (𑀲𑁆𑀬𑀸.)] 𑀥𑀫𑁆𑀫𑀲𑁆𑀲𑀯𑀦𑀸𑀬, 𑀑𑀳𑀺𑀢𑀲𑁄𑀢𑀸 𑀘 𑀥𑀫𑁆𑀫𑀁 𑀲𑀼𑀡𑀺𑀫𑁆𑀳, 𑀲𑀼𑀢𑁆𑀯𑀸 𑀘 𑀥𑀫𑁆𑀫𑀁 𑀥𑀸𑀭𑀬𑀺𑀫𑁆𑀳, 𑀥𑀸𑀢𑀸𑀦𑀜𑁆𑀘 𑀥𑀫𑁆𑀫𑀸𑀦𑀁 𑀅𑀢𑁆𑀣𑀁 𑀉𑀧𑀧𑀭𑀺𑀓𑁆𑀔𑀺𑀫𑁆𑀳, 𑀅𑀢𑁆𑀣𑀫𑀜𑁆𑀜𑀸𑀬 𑀥𑀫𑁆𑀫𑀫𑀜𑁆𑀜𑀸𑀬 𑀥𑀫𑁆𑀫𑀸𑀦𑀼𑀥𑀫𑁆𑀫𑀁 [𑀥𑀫𑁆𑀫𑀸𑀦𑀼𑀥𑀫𑁆𑀫𑀜𑁆𑀘 (?)] 𑀧𑀝𑀺𑀧𑀚𑁆𑀚𑀺𑀫𑁆𑀳. 𑀢𑀸 𑀫𑀬𑀁, 𑀪𑀦𑁆𑀢𑁂, 𑀧𑀭𑀺𑀧𑀼𑀡𑁆𑀡𑀓𑀫𑁆𑀫𑀦𑁆𑀢𑀸 𑀅𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑀺𑀬𑁄 𑀅𑀧𑀘𑁆𑀘𑀸𑀦𑀼𑀢𑀸𑀧𑀺𑀦𑀺𑀬𑁄 𑀧𑀡𑀻𑀢𑀁 𑀓𑀸𑀬𑀁 𑀉𑀧𑀧𑀦𑁆𑀦𑀸’𑀢𑀺. 𑀏𑀢𑀸𑀦𑀺, 𑀪𑀺𑀓𑁆𑀔𑀯𑁂, 𑀭𑀼𑀓𑁆𑀔𑀫𑀽𑀮𑀸𑀦𑀺 𑀏𑀢𑀸𑀦𑀺 𑀲𑀼𑀜𑁆𑀜𑀸𑀕𑀸𑀭𑀸𑀦𑀺. 𑀛𑀸𑀬𑀣, 𑀪𑀺𑀓𑁆𑀔𑀯𑁂, 𑀫𑀸 𑀧𑀫𑀸𑀤𑀢𑁆𑀣, 𑀫𑀸 𑀧𑀘𑁆𑀙𑀸 𑀯𑀺𑀧𑁆𑀧𑀝𑀺𑀲𑀸𑀭𑀺𑀦𑁄 𑀅𑀳𑀼𑀯𑀢𑁆𑀣 𑀲𑁂𑀬𑁆𑀬𑀣𑀸𑀧𑀺 𑀢𑀸 𑀧𑀼𑀭𑀺𑀫𑀺𑀓𑀸 𑀤𑁂𑀯𑀢𑀸’’𑀢𑀺. 𑀦𑀯𑀫𑀁.

𑁧𑁦. 𑀯𑁂𑀮𑀸𑀫𑀲𑀼𑀢𑁆𑀢𑀁

𑁨𑁦. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀅𑀣 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑁄 𑀕𑀳𑀧𑀢𑀺 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀅𑀦𑀸𑀣𑀧𑀺𑀡𑁆𑀟𑀺𑀓𑀁 𑀕𑀳𑀧𑀢𑀺𑀁 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀅𑀧𑀺 𑀦𑀼 𑀢𑁂, 𑀕𑀳𑀧𑀢𑀺, 𑀓𑀼𑀮𑁂 𑀤𑀸𑀦𑀁 𑀤𑀻𑀬𑀢𑀻’’𑀢𑀺? ‘‘𑀤𑀻𑀬𑀢𑀺 𑀫𑁂, 𑀪𑀦𑁆𑀢𑁂, 𑀓𑀼𑀮𑁂 𑀤𑀸𑀦𑀁; 𑀢𑀜𑁆𑀘 𑀔𑁄 𑀮𑀽𑀔𑀁 𑀓𑀡𑀸𑀚𑀓𑀁 𑀩𑀺𑀴𑀗𑁆𑀕𑀤𑀼𑀢𑀺𑀬’’𑀦𑁆𑀢𑀺. ‘‘𑀮𑀽𑀔𑀜𑁆𑀘𑁂𑀧𑀺 [𑀮𑀽𑀔𑀁 𑀯𑀸𑀧𑀺 (𑀲𑁆𑀬𑀸.), 𑀮𑀽𑀔𑀜𑁆𑀘𑀸𑀧𑀺 (𑀓.)], 𑀕𑀳𑀧𑀢𑀺, 𑀤𑀸𑀦𑀁 𑀤𑁂𑀢𑀺 𑀧𑀡𑀻𑀢𑀁 𑀯𑀸; 𑀢𑀜𑁆𑀘 𑀅𑀲𑀓𑁆𑀓𑀘𑁆𑀘𑀁 𑀤𑁂𑀢𑀺, 𑀅𑀘𑀺𑀢𑁆𑀢𑀻𑀓𑀢𑁆𑀯𑀸 [𑀅𑀘𑀺𑀢𑁆𑀢𑀺𑀁 𑀓𑀢𑁆𑀯𑀸 (𑀓.), 𑀅𑀧𑀘𑀺𑀢𑁆𑀢𑀺𑀁 𑀓𑀢𑁆𑀯𑀸 (𑀲𑁆𑀬𑀸.), 𑀅𑀘𑀺𑀢𑁆𑀢𑀺𑀓𑀢𑁆𑀯𑀸 (𑀧𑀻.)] 𑀤𑁂𑀢𑀺, 𑀅𑀲𑀳𑀢𑁆𑀣𑀸 𑀤𑁂𑀢𑀺, 𑀅𑀧𑀯𑀺𑀤𑁆𑀥𑀁 [𑀅𑀧𑀯𑀺𑀝𑁆𑀞𑀁 (𑀲𑁆𑀬𑀸.)] 𑀤𑁂𑀢𑀺, 𑀅𑀦𑀸𑀕𑀫𑀦𑀤𑀺𑀝𑁆𑀞𑀺𑀓𑁄 𑀤𑁂𑀢𑀺. 𑀬𑀢𑁆𑀣 𑀬𑀢𑁆𑀣 𑀢𑀲𑁆𑀲 𑀢𑀲𑁆𑀲 𑀤𑀸𑀦𑀲𑁆𑀲 𑀯𑀺𑀧𑀸𑀓𑁄 𑀦𑀺𑀩𑁆𑀩𑀢𑁆𑀢𑀢𑀺, 𑀦 𑀉𑀴𑀸𑀭𑀸𑀬 𑀪𑀢𑁆𑀢𑀪𑁄𑀕𑀸𑀬 𑀘𑀺𑀢𑁆𑀢𑀁 𑀦𑀫𑀢𑀺, 𑀦 𑀉𑀴𑀸𑀭𑀸𑀬 𑀯𑀢𑁆𑀣𑀪𑁄𑀕𑀸𑀬 𑀘𑀺𑀢𑁆𑀢𑀁 𑀦𑀫𑀢𑀺, 𑀦 𑀉𑀴𑀸𑀭𑀸𑀬 𑀬𑀸𑀦𑀪𑁄𑀕𑀸𑀬 𑀘𑀺𑀢𑁆𑀢𑀁 𑀦𑀫𑀢𑀺, 𑀦 𑀉𑀴𑀸𑀭𑁂𑀲𑀼 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀪𑁄𑀕𑀸𑀬 𑀘𑀺𑀢𑁆𑀢𑀁 𑀦𑀫𑀢𑀺. 𑀬𑁂𑀧𑀺𑀲𑁆𑀲 𑀢𑁂 𑀳𑁄𑀦𑁆𑀢𑀺 𑀧𑀼𑀢𑁆𑀢𑀸𑀢𑀺 𑀯𑀸 𑀤𑀸𑀭𑀸𑀢𑀺 𑀯𑀸 𑀤𑀸𑀲𑀸𑀢𑀺 𑀯𑀸 𑀧𑁂𑀲𑁆𑀲𑀸𑀢𑀺 𑀯𑀸 𑀓𑀫𑁆𑀫𑀓𑀭𑀸𑀢𑀺 𑀯𑀸, 𑀢𑁂𑀧𑀺 𑀦 𑀲𑀼𑀲𑁆𑀲𑀽𑀲𑀦𑁆𑀢𑀺 𑀦 𑀲𑁄𑀢𑀁 𑀑𑀤𑀳𑀦𑁆𑀢𑀺 𑀦 𑀅𑀜𑁆𑀜𑀸 𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀏𑀯𑀜𑁆𑀳𑁂𑀢𑀁 [𑀏𑀯𑀜𑁆𑀘𑁂𑀢𑀁 (𑀲𑁆𑀬𑀸. 𑀓.)], 𑀕𑀳𑀧𑀢𑀺, 𑀳𑁄𑀢𑀺 𑀅𑀲𑀓𑁆𑀓𑀘𑁆𑀘𑀁 𑀓𑀢𑀸𑀦𑀁 𑀓𑀫𑁆𑀫𑀸𑀦𑀁 𑀯𑀺𑀧𑀸𑀓𑁄’’.

‘‘𑀮𑀽𑀔𑀜𑁆𑀘𑁂𑀧𑀺, 𑀕𑀳𑀧𑀢𑀺, 𑀤𑀸𑀦𑀁 𑀤𑁂𑀢𑀺 𑀧𑀡𑀻𑀢𑀁 𑀯𑀸; 𑀢𑀜𑁆𑀘 𑀲𑀓𑁆𑀓𑀘𑁆𑀘𑀁 𑀤𑁂𑀢𑀺, 𑀘𑀺𑀢𑁆𑀢𑀻𑀓𑀢𑁆𑀯𑀸 𑀤𑁂𑀢𑀺, 𑀲𑀳𑀢𑁆𑀣𑀸 𑀤𑁂𑀢𑀺, 𑀅𑀦𑀧𑀯𑀺𑀤𑁆𑀥𑀁 𑀤𑁂𑀢𑀺, 𑀆𑀕𑀫𑀦𑀤𑀺𑀝𑁆𑀞𑀺𑀓𑁄 𑀤𑁂𑀢𑀺. 𑀬𑀢𑁆𑀣 𑀬𑀢𑁆𑀣 𑀢𑀲𑁆𑀲 𑀢𑀲𑁆𑀲 𑀤𑀸𑀦𑀲𑁆𑀲 𑀯𑀺𑀧𑀸𑀓𑁄 𑀦𑀺𑀩𑁆𑀩𑀢𑁆𑀢𑀢𑀺, 𑀉𑀴𑀸𑀭𑀸𑀬 𑀪𑀢𑁆𑀢𑀪𑁄𑀕𑀸𑀬 𑀘𑀺𑀢𑁆𑀢𑀁 𑀦𑀫𑀢𑀺, 𑀉𑀴𑀸𑀭𑀸𑀬 𑀯𑀢𑁆𑀣𑀪𑁄𑀕𑀸𑀬 𑀘𑀺𑀢𑁆𑀢𑀁 𑀦𑀫𑀢𑀺, 𑀉𑀴𑀸𑀭𑀸𑀬 𑀬𑀸𑀦𑀪𑁄𑀕𑀸𑀬 𑀘𑀺𑀢𑁆𑀢𑀁 𑀦𑀫𑀢𑀺, 𑀉𑀴𑀸𑀭𑁂𑀲𑀼 𑀧𑀜𑁆𑀘𑀲𑀼 𑀓𑀸𑀫𑀕𑀼𑀡𑁂𑀲𑀼 𑀪𑁄𑀕𑀸𑀬 𑀘𑀺𑀢𑁆𑀢𑀁 𑀦𑀫𑀢𑀺. 𑀬𑁂𑀧𑀺𑀲𑁆𑀲 𑀢𑁂 𑀳𑁄𑀦𑁆𑀢𑀺 𑀧𑀼𑀢𑁆𑀢𑀸𑀢𑀺 𑀯𑀸 𑀤𑀸𑀭𑀸𑀢𑀺 𑀯𑀸 𑀤𑀸𑀲𑀸𑀢𑀺 𑀯𑀸 𑀧𑁂𑀲𑁆𑀲𑀸𑀢𑀺 𑀯𑀸 𑀓𑀫𑁆𑀫𑀓𑀭𑀸𑀢𑀺 𑀯𑀸, 𑀢𑁂𑀧𑀺 𑀲𑀼𑀲𑁆𑀲𑀽𑀲𑀦𑁆𑀢𑀺 𑀲𑁄𑀢𑀁 𑀑𑀤𑀳𑀦𑁆𑀢𑀺 𑀅𑀜𑁆𑀜𑀸 𑀘𑀺𑀢𑁆𑀢𑀁 𑀉𑀧𑀝𑁆𑀞𑀧𑁂𑀦𑁆𑀢𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀏𑀯𑀜𑁆𑀳𑁂𑀢𑀁, 𑀕𑀳𑀧𑀢𑀺, 𑀳𑁄𑀢𑀺 𑀲𑀓𑁆𑀓𑀘𑁆𑀘𑀁 𑀓𑀢𑀸𑀦𑀁 𑀓𑀫𑁆𑀫𑀸𑀦𑀁 𑀯𑀺𑀧𑀸𑀓𑁄.

‘‘𑀪𑀽𑀢𑀧𑀼𑀩𑁆𑀩𑀁, 𑀕𑀳𑀧𑀢𑀺, 𑀯𑁂𑀮𑀸𑀫𑁄 𑀦𑀸𑀫 𑀩𑁆𑀭𑀸𑀳𑁆𑀫𑀡𑁄 𑀅𑀳𑁄𑀲𑀺. 𑀲𑁄 𑀏𑀯𑀭𑀽𑀧𑀁 𑀤𑀸𑀦𑀁 𑀅𑀤𑀸𑀲𑀺 𑀫𑀳𑀸𑀤𑀸𑀦𑀁. 𑀘𑀢𑀼𑀭𑀸𑀲𑀻𑀢𑀺 𑀲𑀼𑀯𑀡𑁆𑀡𑀧𑀸𑀢𑀺𑀲𑀳𑀲𑁆𑀲𑀸𑀦𑀺 𑀅𑀤𑀸𑀲𑀺 𑀭𑀽𑀧𑀺𑀬𑀧𑀽𑀭𑀸𑀦𑀺, 𑀘𑀢𑀼𑀭𑀸𑀲𑀻𑀢𑀺 𑀭𑀽𑀧𑀺𑀬𑀧𑀸𑀢𑀺𑀲𑀳𑀲𑁆𑀲𑀸𑀦𑀺 𑀅𑀤𑀸𑀲𑀺 𑀲𑀼𑀯𑀡𑁆𑀡𑀧𑀽𑀭𑀸𑀦𑀺, 𑀘𑀢𑀼𑀭𑀸𑀲𑀻𑀢𑀺 𑀓𑀁𑀲𑀧𑀸𑀢𑀺𑀲𑀳𑀲𑁆𑀲𑀸𑀦𑀺 𑀅𑀤𑀸𑀲𑀺 𑀳𑀺𑀭𑀜𑁆𑀜𑀧𑀽𑀭𑀸𑀦𑀺, 𑀘𑀢𑀼𑀭𑀸𑀲𑀻𑀢𑀺 𑀳𑀢𑁆𑀣𑀺𑀲𑀳𑀲𑁆𑀲𑀸𑀦𑀺 𑀅𑀤𑀸𑀲𑀺 𑀲𑁄𑀯𑀡𑁆𑀡𑀸𑀮𑀗𑁆𑀓𑀸𑀭𑀸𑀦𑀺 𑀲𑁄𑀯𑀡𑁆𑀡𑀥𑀚𑀸𑀦𑀺 𑀳𑁂𑀫𑀚𑀸𑀮𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀺 [𑀳𑁂𑀫𑀚𑀸𑀮𑀲𑀜𑁆𑀙𑀦𑁆𑀦𑀸𑀦𑀺 (𑀲𑀻. 𑀧𑀻.)], 𑀘𑀢𑀼𑀭𑀸𑀲𑀻𑀢𑀺 𑀭𑀣𑀲𑀳𑀲𑁆𑀲𑀸𑀦𑀺 𑀅𑀤𑀸𑀲𑀺 𑀲𑀻𑀳𑀘𑀫𑁆𑀫𑀧𑀭𑀺𑀯𑀸𑀭𑀸𑀦𑀺 𑀩𑁆𑀬𑀕𑁆𑀖𑀘𑀫𑁆𑀫𑀧𑀭𑀺𑀯𑀸𑀭𑀸𑀦𑀺 𑀤𑀻𑀧𑀺𑀘𑀫𑁆𑀫𑀧𑀭𑀺𑀯𑀸𑀭𑀸𑀦𑀺 𑀧𑀡𑁆𑀟𑀼𑀓𑀫𑁆𑀩𑀮𑀧𑀭𑀺𑀯𑀸𑀭𑀸𑀦𑀺 𑀲𑁄𑀯𑀡𑁆𑀡𑀸𑀮𑀗𑁆𑀓𑀸𑀭𑀸𑀦𑀺 𑀲𑁄𑀯𑀡𑁆𑀡𑀥𑀚𑀸𑀦𑀺 𑀳𑁂𑀫𑀚𑀸𑀮𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀦𑀺, 𑀘𑀢𑀼𑀭𑀸𑀲𑀻𑀢𑀺 𑀥𑁂𑀦𑀼𑀲𑀳𑀲𑁆𑀲𑀸𑀦𑀺 𑀅𑀤𑀸𑀲𑀺 𑀤𑀼𑀓𑀽𑀮𑀲𑀦𑁆𑀥𑀦𑀸𑀦𑀺 [𑀤𑀼𑀓𑀽𑀮𑀲𑀦𑁆𑀤𑀲𑁆𑀲𑀦𑀸𑀦𑀺 (𑀲𑀻.), 𑀤𑀼𑀓𑀽𑀮𑀲𑀡𑁆𑀞𑀦𑀸𑀦𑀺 (𑀲𑁆𑀬𑀸.), 𑀤𑀼𑀓𑀽𑀮𑀲𑀦𑁆𑀣𑀦𑀸𑀦𑀺 (𑀧𑀻.), 𑀤𑀼𑀳𑀲𑀦𑁆𑀤𑀦𑀸𑀦𑀺 (𑀤𑀻. 𑀦𑀺. 𑁨.𑁨𑁬𑁩), 𑀤𑀼𑀓𑀽𑀮𑀲𑀦𑁆𑀤𑀦𑀸𑀦𑀺 (𑀢𑀢𑁆𑀣 𑀧𑀸𑀞𑀦𑁆𑀢𑀭𑀁)] 𑀓𑀁𑀲𑀽𑀧𑀥𑀸𑀭𑀡𑀸𑀦𑀺, 𑀘𑀢𑀼𑀭𑀸𑀲𑀻𑀢𑀺 𑀓𑀜𑁆𑀜𑀸𑀲𑀳𑀲𑁆𑀲𑀸𑀦𑀺 𑀅𑀤𑀸𑀲𑀺 𑀆𑀫𑀼𑀢𑁆𑀢𑀫𑀡𑀺𑀓𑀼𑀡𑁆𑀟𑀮𑀸𑀬𑁄 [𑀆𑀫𑀼𑀓𑁆𑀓𑀫𑀡𑀺𑀓𑀼𑀡𑁆𑀟𑀮𑀸𑀬𑁄 (?)], 𑀘𑀢𑀼𑀭𑀸𑀲𑀻𑀢𑀺 𑀧𑀮𑁆𑀮𑀗𑁆𑀓𑀲𑀳𑀲𑁆𑀲𑀸𑀦𑀺 𑀅𑀤𑀸𑀲𑀺 𑀕𑁄𑀦𑀓𑀢𑁆𑀣𑀢𑀸𑀦𑀺 𑀧𑀝𑀺𑀓𑀢𑁆𑀣𑀢𑀸𑀦𑀺 𑀧𑀝𑀮𑀺𑀓𑀢𑁆𑀣𑀢𑀸𑀦𑀺 𑀓𑀤𑀮𑀺𑀫𑀺𑀕𑀧𑀯𑀭𑀧𑀘𑁆𑀘𑀢𑁆𑀣𑀭𑀡𑀸𑀦𑀺 𑀲𑀉𑀢𑁆𑀢𑀭𑀘𑁆𑀙𑀤𑀸𑀦𑀺 𑀉𑀪𑀢𑁄𑀮𑁄𑀳𑀺𑀢𑀓𑀽𑀧𑀥𑀸𑀦𑀸𑀦𑀺, 𑀘𑀢𑀼𑀭𑀸𑀲𑀻𑀢𑀺 𑀯𑀢𑁆𑀣𑀓𑁄𑀝𑀺𑀲𑀳𑀲𑁆𑀲𑀸𑀦𑀺 𑀅𑀤𑀸𑀲𑀺 𑀔𑁄𑀫𑀲𑀼𑀔𑀼𑀫𑀸𑀦𑀁 𑀓𑁄𑀲𑁂𑀬𑁆𑀬𑀲𑀼𑀔𑀼𑀫𑀸𑀦𑀁 𑀓𑀫𑁆𑀩𑀮𑀲𑀼𑀔𑀼𑀫𑀸𑀦𑀁 𑀓𑀧𑁆𑀧𑀸𑀲𑀺𑀓𑀲𑀼𑀔𑀼𑀫𑀸𑀦𑀁, 𑀓𑁄 𑀧𑀦 𑀯𑀸𑀤𑁄 𑀅𑀦𑁆𑀦𑀲𑁆𑀲 𑀧𑀸𑀦𑀲𑁆𑀲 𑀔𑀚𑁆𑀚𑀲𑁆𑀲 𑀪𑁄𑀚𑁆𑀚𑀲𑁆𑀲 𑀮𑁂𑀬𑁆𑀬𑀲𑁆𑀲 𑀧𑁂𑀬𑁆𑀬𑀲𑁆𑀲, 𑀦𑀚𑁆𑀚𑁄 𑀫𑀜𑁆𑀜𑁂 𑀯𑀺𑀲𑁆𑀲𑀦𑁆𑀤𑀦𑁆𑀢𑀺 [𑀯𑀺𑀲𑁆𑀲𑀦𑁆𑀤𑀢𑀺 (𑀲𑀻. 𑀧𑀻.)].

‘‘𑀲𑀺𑀬𑀸 𑀔𑁄 𑀧𑀦 𑀢𑁂, 𑀕𑀳𑀧𑀢𑀺, 𑀏𑀯𑀫𑀲𑁆𑀲 𑁋 ‘𑀅𑀜𑁆𑀜𑁄 𑀦𑀽𑀦 𑀢𑁂𑀦 𑀲𑀫𑀬𑁂𑀦 𑀯𑁂𑀮𑀸𑀫𑁄 𑀩𑁆𑀭𑀸𑀳𑁆𑀫𑀡𑁄 𑀅𑀳𑁄𑀲𑀺, 𑀲𑁄 [𑀬𑁄 (?)] 𑀢𑀁 𑀤𑀸𑀦𑀁 𑀅𑀤𑀸𑀲𑀺 𑀫𑀳𑀸𑀤𑀸𑀦’𑀦𑁆𑀢𑀺. 𑀦 𑀔𑁄 𑀧𑀦𑁂𑀢𑀁, 𑀕𑀳𑀧𑀢𑀺, 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀅𑀳𑀁 𑀢𑁂𑀦 𑀲𑀫𑀬𑁂𑀦 𑀯𑁂𑀮𑀸𑀫𑁄 𑀩𑁆𑀭𑀸𑀳𑁆𑀫𑀡𑁄 𑀅𑀳𑁄𑀲𑀺𑀁. 𑀅𑀳𑀁 𑀢𑀁 𑀤𑀸𑀦𑀁 𑀅𑀤𑀸𑀲𑀺𑀁 𑀫𑀳𑀸𑀤𑀸𑀦𑀁. 𑀢𑀲𑁆𑀫𑀺𑀁 𑀔𑁄 𑀧𑀦, 𑀕𑀳𑀧𑀢𑀺, 𑀤𑀸𑀦𑁂 𑀦 𑀓𑁄𑀘𑀺 𑀤𑀓𑁆𑀔𑀺𑀡𑁂𑀬𑁆𑀬𑁄 𑀅𑀳𑁄𑀲𑀺, 𑀦 𑀢𑀁 𑀓𑁄𑀘𑀺 𑀤𑀓𑁆𑀔𑀺𑀡𑀁 𑀯𑀺𑀲𑁄𑀥𑁂𑀢𑀺.

‘‘𑀬𑀁, 𑀕𑀳𑀧𑀢𑀺, 𑀯𑁂𑀮𑀸𑀫𑁄 𑀩𑁆𑀭𑀸𑀳𑁆𑀫𑀡𑁄 𑀤𑀸𑀦𑀁 𑀅𑀤𑀸𑀲𑀺 𑀫𑀳𑀸𑀤𑀸𑀦𑀁, 𑀬𑁄 𑀘𑁂𑀓𑀁 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑀁 𑀪𑁄𑀚𑁂𑀬𑁆𑀬, 𑀇𑀤𑀁 𑀢𑀢𑁄 𑀫𑀳𑀧𑁆𑀨𑀮𑀢𑀭𑀁.

( ) [(𑀬𑀜𑁆𑀘 𑀕𑀳𑀧𑀢𑀺 𑀯𑁂𑀮𑀸𑀫𑁄 𑀩𑁆𑀭𑀸𑀳𑁆𑀫𑀡𑁄 𑀤𑀸𑀦𑀁 𑀅𑀤𑀸𑀲𑀺 𑀫𑀳𑀸𑀤𑀸𑀦𑀁) (𑀲𑀻. 𑀧𑀻.)] ‘‘𑀬𑁄 𑀘 𑀲𑀢𑀁 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑀸𑀦𑀁 𑀪𑁄𑀚𑁂𑀬𑁆𑀬, 𑀬𑁄 𑀘𑁂𑀓𑀁 𑀲𑀓𑀤𑀸𑀕𑀸𑀫𑀺𑀁 𑀪𑁄𑀚𑁂𑀬𑁆𑀬, 𑀇𑀤𑀁 𑀢𑀢𑁄 𑀫𑀳𑀧𑁆𑀨𑀮𑀢𑀭𑀁.

( ) [(𑀬𑀜𑁆𑀘 𑀕𑀳𑀧𑀢𑀺 𑀯𑁂𑀮𑀸𑀫𑁄 𑀩𑁆𑀭𑀸𑀳𑁆𑀫𑀡𑁄 𑀤𑀸𑀦𑀁 𑀅𑀤𑀸𑀲𑀺 𑀫𑀳𑀸𑀤𑀸𑀦𑀁) (𑀲𑀻. 𑀧𑀻.)] ‘‘𑀬𑁄 𑀘 𑀲𑀢𑀁 𑀲𑀓𑀤𑀸𑀕𑀸𑀫𑀻𑀦𑀁 𑀪𑁄𑀚𑁂𑀬𑁆𑀬, 𑀬𑁄 𑀘𑁂𑀓𑀁 𑀅𑀦𑀸𑀕𑀸𑀫𑀺𑀁 𑀪𑁄𑀚𑁂𑀬𑁆𑀬…𑀧𑁂… 𑀬𑁄 𑀘 𑀲𑀢𑀁 𑀅𑀦𑀸𑀕𑀸𑀫𑀻𑀦𑀁 𑀪𑁄𑀚𑁂𑀬𑁆𑀬, 𑀬𑁄 𑀘𑁂𑀓𑀁 𑀅𑀭𑀳𑀦𑁆𑀢𑀁 𑀪𑁄𑀚𑁂𑀬𑁆𑀬… 𑀬𑁄 𑀘 𑀲𑀢𑀁 𑀅𑀭𑀳𑀦𑁆𑀢𑀸𑀦𑀁 𑀪𑁄𑀚𑁂𑀬𑁆𑀬, 𑀬𑁄 𑀘𑁂𑀓𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀪𑁄𑀚𑁂𑀬𑁆𑀬 … 𑀬𑁄 𑀘 𑀲𑀢𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀪𑁄𑀚𑁂𑀬𑁆𑀬, 𑀬𑁄 𑀘 𑀢𑀣𑀸𑀕𑀢𑀁 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀪𑁄𑀚𑁂𑀬𑁆𑀬… 𑀬𑁄 𑀘 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀪𑁄𑀚𑁂𑀬𑁆𑀬… 𑀬𑁄 𑀘 𑀘𑀸𑀢𑀼𑀤𑁆𑀤𑀺𑀲𑀁 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀯𑀺𑀳𑀸𑀭𑀁 𑀓𑀸𑀭𑀸𑀧𑁂𑀬𑁆𑀬… 𑀬𑁄 𑀘 𑀧𑀲𑀦𑁆𑀦𑀘𑀺𑀢𑁆𑀢𑁄 𑀩𑀼𑀤𑁆𑀥𑀜𑁆𑀘 𑀥𑀫𑁆𑀫𑀜𑁆𑀘 𑀲𑀗𑁆𑀖𑀜𑁆𑀘 𑀲𑀭𑀡𑀁 𑀕𑀘𑁆𑀙𑁂𑀬𑁆𑀬… 𑀬𑁄 𑀘 𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀫𑀸𑀤𑀺𑀬𑁂𑀬𑁆𑀬 𑁋 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺𑀁, 𑀅𑀤𑀺𑀦𑁆𑀦𑀸𑀤𑀸𑀦𑀸 𑀯𑁂𑀭𑀫𑀡𑀺𑀁, 𑀓𑀸𑀫𑁂𑀲𑀼𑀫𑀺𑀘𑁆𑀙𑀸𑀘𑀸𑀭𑀸 𑀯𑁂𑀭𑀫𑀡𑀺𑀁, 𑀫𑀼𑀲𑀸𑀯𑀸𑀤𑀸 𑀯𑁂𑀭𑀫𑀡𑀺𑀁, 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀯𑁂𑀭𑀫𑀡𑀺𑀁, 𑀬𑁄 𑀘 𑀅𑀦𑁆𑀢𑀫𑀲𑁄 𑀕𑀦𑁆𑀥𑁄𑀳𑀦𑀫𑀢𑁆𑀢𑀫𑁆𑀧𑀺 [𑀕𑀦𑁆𑀥𑀽𑀳𑀦𑀫𑀢𑁆𑀢𑀫𑁆𑀧𑀺 (𑀲𑀻.), 𑀕𑀤𑁆𑀤𑀽𑀳𑀦𑀫𑀢𑁆𑀢𑀫𑁆𑀧𑀺 (𑀲𑁆𑀬𑀸. 𑀧𑀻.) 𑀫. 𑀦𑀺. 𑁩.𑁨𑁧𑁧] 𑀫𑁂𑀢𑁆𑀢𑀘𑀺𑀢𑁆𑀢𑀁 𑀪𑀸𑀯𑁂𑀬𑁆𑀬, ( ) [(𑀬𑁄 𑀘 𑀅𑀘𑁆𑀙𑀭𑀸𑀲𑀗𑁆𑀖𑀸𑀢𑀫𑀢𑁆𑀢𑀫𑁆𑀧𑀺 𑀅𑀦𑀺𑀘𑁆𑀘𑀲𑀜𑁆𑀜𑀁 𑀪𑀸𑀯𑁂𑀬𑁆𑀬) (𑀓.)] 𑀇𑀤𑀁 𑀢𑀢𑁄 𑀫𑀳𑀧𑁆𑀨𑀮𑀢𑀭𑀁.

‘‘𑀬𑀜𑁆𑀘, 𑀕𑀳𑀧𑀢𑀺, 𑀯𑁂𑀮𑀸𑀫𑁄 𑀩𑁆𑀭𑀸𑀳𑁆𑀫𑀡𑁄 𑀤𑀸𑀦𑀁 𑀅𑀤𑀸𑀲𑀺 𑀫𑀳𑀸𑀤𑀸𑀦𑀁, 𑀬𑁄 𑀘𑁂𑀓𑀁 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑀁 𑀪𑁄𑀚𑁂𑀬𑁆𑀬… 𑀬𑁄 𑀘 𑀲𑀢𑀁 𑀤𑀺𑀝𑁆𑀞𑀺𑀲𑀫𑁆𑀧𑀦𑁆𑀦𑀸𑀦𑀁 𑀪𑁄𑀚𑁂𑀬𑁆𑀬, 𑀬𑁄 𑀘𑁂𑀓𑀁 𑀲𑀓𑀤𑀸𑀕𑀸𑀫𑀺𑀁 𑀪𑁄𑀚𑁂𑀬𑁆𑀬… 𑀬𑁄 𑀘 𑀲𑀢𑀁 𑀲𑀓𑀤𑀸𑀕𑀸𑀫𑀻𑀦𑀁 𑀪𑁄𑀚𑁂𑀬𑁆𑀬, 𑀬𑁄 𑀘𑁂𑀓𑀁 𑀅𑀦𑀸𑀕𑀸𑀫𑀺𑀁 𑀪𑁄𑀚𑁂𑀬𑁆𑀬… 𑀬𑁄 𑀘 𑀲𑀢𑀁 𑀅𑀦𑀸𑀕𑀸𑀫𑀻𑀦𑀁 𑀪𑁄𑀚𑁂𑀬𑁆𑀬, 𑀬𑁄 𑀘𑁂𑀓𑀁 𑀅𑀭𑀳𑀦𑁆𑀢𑀁 𑀪𑁄𑀚𑁂𑀬𑁆𑀬… 𑀬𑁄 𑀘 𑀲𑀢𑀁 𑀅𑀭𑀳𑀦𑁆𑀢𑀸𑀦𑀁 𑀪𑁄𑀚𑁂𑀬𑁆𑀬, 𑀬𑁄 𑀘𑁂𑀓𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀁 𑀪𑁄𑀚𑁂𑀬𑁆𑀬… 𑀬𑁄 𑀘 𑀲𑀢𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀦𑀁 𑀪𑁄𑀚𑁂𑀬𑁆𑀬, 𑀬𑁄 𑀘 𑀢𑀣𑀸𑀕𑀢𑀁 𑀅𑀭𑀳𑀦𑁆𑀢𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀁 𑀪𑁄𑀚𑁂𑀬𑁆𑀬… 𑀬𑁄 𑀘 𑀩𑀼𑀤𑁆𑀥𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀪𑁄𑀚𑁂𑀬𑁆𑀬, 𑀬𑁄 𑀘 𑀘𑀸𑀢𑀼𑀤𑁆𑀤𑀺𑀲𑀁 𑀲𑀗𑁆𑀖𑀁 𑀉𑀤𑁆𑀤𑀺𑀲𑁆𑀲 𑀯𑀺𑀳𑀸𑀭𑀁 𑀓𑀸𑀭𑀸𑀧𑁂𑀬𑁆𑀬… 𑀬𑁄 𑀘 𑀧𑀲𑀦𑁆𑀦𑀘𑀺𑀢𑁆𑀢𑁄 𑀩𑀼𑀤𑁆𑀥𑀜𑁆𑀘 𑀥𑀫𑁆𑀫𑀜𑁆𑀘 𑀲𑀗𑁆𑀖𑀜𑁆𑀘 𑀲𑀭𑀡𑀁 𑀕𑀘𑁆𑀙𑁂𑀬𑁆𑀬, 𑀬𑁄 𑀘 𑀧𑀲𑀦𑁆𑀦𑀘𑀺𑀢𑁆𑀢𑁄 𑀲𑀺𑀓𑁆𑀔𑀸𑀧𑀤𑀸𑀦𑀺 𑀲𑀫𑀸𑀤𑀺𑀬𑁂𑀬𑁆𑀬 𑁋 𑀧𑀸𑀡𑀸𑀢𑀺𑀧𑀸𑀢𑀸 𑀯𑁂𑀭𑀫𑀡𑀺𑀁… 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀯𑁂𑀭𑀫𑀡𑀺𑀁, 𑀬𑁄 𑀘 𑀅𑀦𑁆𑀢𑀫𑀲𑁄 𑀕𑀦𑁆𑀥𑁄𑀳𑀦𑀫𑀢𑁆𑀢𑀫𑁆𑀧𑀺 𑀫𑁂𑀢𑁆𑀢𑀘𑀺𑀢𑁆𑀢𑀁 𑀪𑀸𑀯𑁂𑀬𑁆𑀬, 𑀬𑁄 𑀘 𑀅𑀘𑁆𑀙𑀭𑀸𑀲𑀗𑁆𑀖𑀸𑀢𑀫𑀢𑁆𑀢𑀫𑁆𑀧𑀺 𑀅𑀦𑀺𑀘𑁆𑀘𑀲𑀜𑁆𑀜𑀁 𑀪𑀸𑀯𑁂𑀬𑁆𑀬, 𑀇𑀤𑀁 𑀢𑀢𑁄 𑀫𑀳𑀧𑁆𑀨𑀮𑀢𑀭’’𑀦𑁆𑀢𑀺. 𑀤𑀲𑀫𑀁.

𑀲𑀻𑀳𑀦𑀸𑀤𑀯𑀕𑁆𑀕𑁄 𑀤𑀼𑀢𑀺𑀬𑁄.