𑁫. 𑀫𑀮𑀲𑀼𑀢𑁆𑀢𑀁

𑁧𑁫. ‘‘𑀅𑀝𑁆𑀞𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀫𑀮𑀸𑀦𑀺. 𑀓𑀢𑀫𑀸𑀦𑀺 𑀅𑀝𑁆𑀞? 𑀅𑀲𑀚𑁆𑀛𑀸𑀬𑀫𑀮𑀸, 𑀪𑀺𑀓𑁆𑀔𑀯𑁂, 𑀫𑀦𑁆𑀢𑀸; 𑀅𑀦𑀼𑀝𑁆𑀞𑀸𑀦𑀫𑀮𑀸, 𑀪𑀺𑀓𑁆𑀔𑀯𑁂, 𑀖𑀭𑀸; 𑀫𑀮𑀁, 𑀪𑀺𑀓𑁆𑀔𑀯𑁂, 𑀯𑀡𑁆𑀡𑀲𑁆𑀲 𑀓𑁄𑀲𑀚𑁆𑀚𑀁; 𑀧𑀫𑀸𑀤𑁄, 𑀪𑀺𑀓𑁆𑀔𑀯𑁂, 𑀭𑀓𑁆𑀔𑀢𑁄 𑀫𑀮𑀁; 𑀫𑀮𑀁, 𑀪𑀺𑀓𑁆𑀔𑀯𑁂, 𑀇𑀢𑁆𑀣𑀺𑀬𑀸 𑀤𑀼𑀘𑁆𑀘𑀭𑀺𑀢𑀁; 𑀫𑀘𑁆𑀙𑁂𑀭𑀁, 𑀪𑀺𑀓𑁆𑀔𑀯𑁂, 𑀤𑀤𑀢𑁄 𑀫𑀮𑀁; 𑀫𑀮𑀸, 𑀪𑀺𑀓𑁆𑀔𑀯𑁂, 𑀧𑀸𑀧𑀓𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀲𑁆𑀫𑀺𑀁 𑀮𑁄𑀓𑁂 𑀧𑀭𑀫𑁆𑀳𑀺 𑀘; 𑀢𑀢𑁄 [𑀢𑀢𑁄 𑀘 (𑀲𑁆𑀬𑀸. 𑀧𑀻.)], 𑀪𑀺𑀓𑁆𑀔𑀯𑁂, 𑀫𑀮𑀸 𑀫𑀮𑀢𑀭𑀁 𑀅𑀯𑀺𑀚𑁆𑀚𑀸 𑀧𑀭𑀫𑀁 𑀫𑀮𑀁. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞 𑀫𑀮𑀸𑀦𑀻’’𑀢𑀺.

‘‘𑀅𑀲𑀚𑁆𑀛𑀸𑀬𑀫𑀮𑀸 𑀫𑀦𑁆𑀢𑀸, 𑀅𑀦𑀼𑀝𑁆𑀞𑀸𑀦𑀫𑀮𑀸 𑀖𑀭𑀸;

𑀫𑀮𑀁 𑀯𑀡𑁆𑀡𑀲𑁆𑀲 𑀓𑁄𑀲𑀚𑁆𑀚𑀁, 𑀧𑀫𑀸𑀤𑁄 𑀭𑀓𑁆𑀔𑀢𑁄 𑀫𑀮𑀁.

‘‘𑀫𑀮𑀺𑀢𑁆𑀣𑀺𑀬𑀸 𑀤𑀼𑀘𑁆𑀘𑀭𑀺𑀢𑀁, 𑀫𑀘𑁆𑀙𑁂𑀭𑀁 𑀤𑀤𑀢𑁄 𑀫𑀮𑀁;

𑀫𑀮𑀸 𑀯𑁂 𑀧𑀸𑀧𑀓𑀸 𑀥𑀫𑁆𑀫𑀸, 𑀅𑀲𑁆𑀫𑀺𑀁 𑀮𑁄𑀓𑁂 𑀧𑀭𑀫𑁆𑀳𑀺 𑀘;

𑀢𑀢𑁄 𑀫𑀮𑀸 𑀫𑀮𑀢𑀭𑀁, 𑀅𑀯𑀺𑀚𑁆𑀚𑀸 𑀧𑀭𑀫𑀁 𑀫𑀮’’𑀦𑁆𑀢𑀺. 𑀧𑀜𑁆𑀘𑀫𑀁;