𑁬. 𑀤𑀽𑀢𑁂𑀬𑁆𑀬𑀲𑀼𑀢𑁆𑀢𑀁

𑁧𑁬. [𑀘𑀽𑀴𑀯. 𑁩𑁪𑁭] ‘‘𑀅𑀝𑁆𑀞𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀤𑀽𑀢𑁂𑀬𑁆𑀬𑀁 𑀕𑀦𑁆𑀢𑀼𑀫𑀭𑀳𑀢𑀺. 𑀓𑀢𑀫𑁂𑀳𑀺 𑀅𑀝𑁆𑀞𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑁄𑀢𑀸 𑀘 𑀳𑁄𑀢𑀺, 𑀲𑀸𑀯𑁂𑀢𑀸 𑀘, 𑀉𑀕𑁆𑀕𑀳𑁂𑀢𑀸 𑀘, 𑀥𑀸𑀭𑁂𑀢𑀸 𑀘, 𑀯𑀺𑀜𑁆𑀜𑀸𑀢𑀸 𑀘, 𑀯𑀺𑀜𑁆𑀜𑀸𑀧𑁂𑀢𑀸 𑀘, 𑀓𑀼𑀲𑀮𑁄 𑀘 𑀲𑀳𑀺𑀢𑀸𑀲𑀳𑀺𑀢𑀲𑁆𑀲, 𑀦𑁄 𑀘 𑀓𑀮𑀳𑀓𑀸𑀭𑀓𑁄 𑁋 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀤𑀽𑀢𑁂𑀬𑁆𑀬𑀁 𑀕𑀦𑁆𑀢𑀼𑀫𑀭𑀳𑀢𑀺. 𑀅𑀝𑁆𑀞𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀲𑀸𑀭𑀺𑀧𑀼𑀢𑁆𑀢𑁄 𑀤𑀽𑀢𑁂𑀬𑁆𑀬𑀁 𑀕𑀦𑁆𑀢𑀼𑀫𑀭𑀳𑀢𑀺. 𑀓𑀢𑀫𑁂𑀳𑀺 𑀅𑀝𑁆𑀞𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀲𑀸𑀭𑀺𑀧𑀼𑀢𑁆𑀢𑁄 𑀲𑁄𑀢𑀸 𑀘 𑀳𑁄𑀢𑀺, 𑀲𑀸𑀯𑁂𑀢𑀸 𑀘, 𑀉𑀕𑁆𑀕𑀳𑁂𑀢𑀸 𑀘, 𑀥𑀸𑀭𑁂𑀢𑀸 𑀘, 𑀯𑀺𑀜𑁆𑀜𑀸𑀢𑀸 𑀘, 𑀯𑀺𑀜𑁆𑀜𑀸𑀧𑁂𑀢𑀸 𑀘, 𑀓𑀼𑀲𑀮𑁄 𑀘 𑀲𑀳𑀺𑀢𑀸𑀲𑀳𑀺𑀢𑀲𑁆𑀲, 𑀦𑁄 𑀘 𑀓𑀮𑀳𑀓𑀸𑀭𑀓𑁄. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀲𑀸𑀭𑀺𑀧𑀼𑀢𑁆𑀢𑁄 𑀤𑀽𑀢𑁂𑀬𑁆𑀬𑀁 𑀕𑀦𑁆𑀢𑀼𑀫𑀭𑀳𑀢𑀻’’𑀢𑀺.

‘‘𑀬𑁄 𑀯𑁂 𑀦 𑀩𑁆𑀬𑀣𑀢𑀺 [𑀦 𑀯𑁂𑀥𑀢𑀺 (𑀲𑀻.), 𑀦 𑀩𑁆𑀬𑀸𑀥𑀢𑀺 (𑀲𑁆𑀬𑀸. 𑀧𑀻.)] 𑀧𑀢𑁆𑀯𑀸, 𑀧𑀭𑀺𑀲𑀁 𑀉𑀕𑁆𑀕𑀯𑀸𑀤𑀺𑀦𑀺𑀁 [𑀉𑀕𑁆𑀕𑀯𑀸𑀤𑀺𑀦𑀁 (𑀲𑀻.), 𑀉𑀕𑁆𑀕𑀳𑀯𑀸𑀤𑀺𑀦𑀁 (𑀲𑁆𑀬𑀸. 𑀧𑀻.), 𑀉𑀕𑁆𑀕𑀢𑀯𑀸𑀤𑀺𑀦𑀺𑀁 (𑀓.)];

𑀦 𑀘 𑀳𑀸𑀧𑁂𑀢𑀺 𑀯𑀘𑀦𑀁, 𑀦 𑀘 𑀙𑀸𑀤𑁂𑀢𑀺 𑀲𑀸𑀲𑀦𑀁.

‘‘𑀅𑀲𑀦𑁆𑀤𑀺𑀤𑁆𑀥𑀜𑁆𑀘 𑀪𑀡𑀢𑀺 [𑀅𑀲𑀦𑁆𑀤𑀺𑀤𑁆𑀥𑁄 𑀘 𑀅𑀓𑁆𑀔𑀸𑀢𑀺 (𑀘𑀽𑀴𑀯. 𑁩𑁪𑁭)], 𑀧𑀼𑀘𑁆𑀙𑀺𑀢𑁄 𑀦 𑀘 𑀓𑀼𑀧𑁆𑀧𑀢𑀺;

𑀲 𑀯𑁂 𑀢𑀸𑀤𑀺𑀲𑀓𑁄 𑀪𑀺𑀓𑁆𑀔𑀼, 𑀤𑀽𑀢𑁂𑀬𑁆𑀬𑀁 𑀕𑀦𑁆𑀢𑀼𑀫𑀭𑀳𑀢𑀻’’𑀢𑀺. 𑀙𑀝𑁆𑀞𑀁;