𑁫. 𑀫𑀳𑀸𑀬𑀜𑁆𑀜𑀯𑀕𑁆𑀕𑁄

𑁧. 𑀲𑀢𑁆𑀢𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀲𑀼𑀢𑁆𑀢𑀁

𑁪𑁪. [𑀤𑀻. 𑀦𑀺. 𑁩.𑁩𑁩𑁨; 𑀘𑀽𑀴𑀦𑀺. 𑀧𑁄𑀲𑀸𑀮𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁮𑁩] ‘‘𑀲𑀢𑁆𑀢𑀺𑀫𑀸, 𑀪𑀺𑀓𑁆𑀔𑀯𑁂, 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄. 𑀓𑀢𑀫𑀸 𑀲𑀢𑁆𑀢? 𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀦𑀸𑀦𑀢𑁆𑀢𑀓𑀸𑀬𑀸 𑀦𑀸𑀦𑀢𑁆𑀢𑀲𑀜𑁆𑀜𑀺𑀦𑁄, 𑀲𑁂𑀬𑁆𑀬𑀣𑀸𑀧𑀺 𑀫𑀦𑀼𑀲𑁆𑀲𑀸, 𑀏𑀓𑀘𑁆𑀘𑁂 𑀘 𑀤𑁂𑀯𑀸, 𑀏𑀓𑀘𑁆𑀘𑁂 𑀘 𑀯𑀺𑀦𑀺𑀧𑀸𑀢𑀺𑀓𑀸. 𑀅𑀬𑀁 𑀧𑀞𑀫𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺.

‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀦𑀸𑀦𑀢𑁆𑀢𑀓𑀸𑀬𑀸 𑀏𑀓𑀢𑁆𑀢𑀲𑀜𑁆𑀜𑀺𑀦𑁄, 𑀲𑁂𑀬𑁆𑀬𑀣𑀸𑀧𑀺 𑀤𑁂𑀯𑀸 𑀩𑁆𑀭𑀳𑁆𑀫𑀓𑀸𑀬𑀺𑀓𑀸 𑀧𑀞𑀫𑀸𑀪𑀺𑀦𑀺𑀩𑁆𑀩𑀢𑁆𑀢𑀸. 𑀅𑀬𑀁 𑀤𑀼𑀢𑀺𑀬𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺.

‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀏𑀓𑀢𑁆𑀢𑀓𑀸𑀬𑀸 𑀦𑀸𑀦𑀢𑁆𑀢𑀲𑀜𑁆𑀜𑀺𑀦𑁄, 𑀲𑁂𑀬𑁆𑀬𑀣𑀸𑀧𑀺 𑀤𑁂𑀯𑀸 𑀆𑀪𑀲𑁆𑀲𑀭𑀸. 𑀅𑀬𑀁 𑀢𑀢𑀺𑀬𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺.

‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀏𑀓𑀢𑁆𑀢𑀓𑀸𑀬𑀸 𑀏𑀓𑀢𑁆𑀢𑀲𑀜𑁆𑀜𑀺𑀦𑁄, 𑀲𑁂𑀬𑁆𑀬𑀣𑀸𑀧𑀺 𑀤𑁂𑀯𑀸 𑀲𑀼𑀪𑀓𑀺𑀡𑁆𑀳𑀸. 𑀅𑀬𑀁 𑀘𑀢𑀼𑀢𑁆𑀣𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺.

‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀲𑀩𑁆𑀩𑀲𑁄 𑀭𑀽𑀧𑀲𑀜𑁆𑀜𑀸𑀦𑀁 𑀲𑀫𑀢𑀺𑀓𑁆𑀓𑀫𑀸 𑀧𑀝𑀺𑀖𑀲𑀜𑁆𑀜𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀦𑀸𑀦𑀢𑁆𑀢𑀲𑀜𑁆𑀜𑀸𑀦𑀁 𑀅𑀫𑀦𑀲𑀺𑀓𑀸𑀭𑀸 ‘𑀅𑀦𑀦𑁆𑀢𑁄 𑀆𑀓𑀸𑀲𑁄’𑀢𑀺 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀽𑀧𑀕𑀸. 𑀅𑀬𑀁 𑀧𑀜𑁆𑀘𑀫𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺.

‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀲𑀩𑁆𑀩𑀲𑁄 𑀆𑀓𑀸𑀲𑀸𑀦𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 ‘𑀅𑀦𑀦𑁆𑀢𑀁 𑀯𑀺𑀜𑁆𑀜𑀸𑀡’𑀦𑁆𑀢𑀺 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀽𑀧𑀕𑀸. 𑀅𑀬𑀁 𑀙𑀝𑁆𑀞𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺.

‘‘𑀲𑀦𑁆𑀢𑀺, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸 𑀲𑀩𑁆𑀩𑀲𑁄 𑀯𑀺𑀜𑁆𑀜𑀸𑀡𑀜𑁆𑀘𑀸𑀬𑀢𑀦𑀁 𑀲𑀫𑀢𑀺𑀓𑁆𑀓𑀫𑁆𑀫 ‘𑀦𑀢𑁆𑀣𑀺 𑀓𑀺𑀜𑁆𑀘𑀻’𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀽𑀧𑀕𑀸. 𑀅𑀬𑀁 𑀲𑀢𑁆𑀢𑀫𑀸 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺. 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀯𑀺𑀜𑁆𑀜𑀸𑀡𑀝𑁆𑀞𑀺𑀢𑀺𑀬𑁄’’𑀢𑀺. 𑀧𑀞𑀫𑀁.

𑁨. 𑀲𑀫𑀸𑀥𑀺𑀧𑀭𑀺𑀓𑁆𑀔𑀸𑀭𑀲𑀼𑀢𑁆𑀢𑀁

𑁪𑁫. ‘‘𑀲𑀢𑁆𑀢𑀺𑀫𑁂, 𑀪𑀺𑀓𑁆𑀔𑀯𑁂, 𑀲𑀫𑀸𑀥𑀺𑀧𑀭𑀺𑀓𑁆𑀔𑀸𑀭𑀸. 𑀓𑀢𑀫𑁂 𑀲𑀢𑁆𑀢? 𑀲𑀫𑁆𑀫𑀸𑀤𑀺𑀝𑁆𑀞𑀺, 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑁄, 𑀲𑀫𑁆𑀫𑀸𑀯𑀸𑀘𑀸, 𑀲𑀫𑁆𑀫𑀸𑀓𑀫𑁆𑀫𑀦𑁆𑀢𑁄, 𑀲𑀫𑁆𑀫𑀸𑀆𑀚𑀻𑀯𑁄, 𑀲𑀫𑁆𑀫𑀸𑀯𑀸𑀬𑀸𑀫𑁄, 𑀲𑀫𑁆𑀫𑀸𑀲𑀢𑀺. 𑀬𑀸 𑀔𑁄, 𑀪𑀺𑀓𑁆𑀔𑀯𑁂, 𑀇𑀫𑁂𑀳𑀺 𑀲𑀢𑁆𑀢𑀳𑀗𑁆𑀕𑁂𑀳𑀺 𑀘𑀺𑀢𑁆𑀢𑀲𑁆𑀲𑁂𑀓𑀕𑁆𑀕𑀢𑀸 𑀧𑀭𑀺𑀓𑁆𑀔𑀢𑀸 [‘𑀲𑀧𑀭𑀺𑀓𑁆𑀔𑀸𑀭𑀢𑀸’𑀢𑀺𑀧𑀺, ‘𑀲𑀧𑀭𑀺𑀓𑁆𑀔𑀢𑀸’𑀢𑀺𑀧𑀺 (𑀲𑀁. 𑀦𑀺. 𑁫.𑁨𑁮)], 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑁄 𑀲𑀫𑁆𑀫𑀸𑀲𑀫𑀸𑀥𑀺 [𑀲𑀫𑀸𑀥𑀺 (𑀲𑁆𑀬𑀸.)] 𑀲𑀉𑀧𑀦𑀺𑀲𑁄 𑀇𑀢𑀺𑀧𑀺 𑀲𑀧𑀭𑀺𑀓𑁆𑀔𑀸𑀭𑁄 𑀇𑀢𑀺𑀧𑀻’’𑀢𑀺. 𑀤𑀼𑀢𑀺𑀬𑀁.

𑁩. 𑀧𑀞𑀫𑀅𑀕𑁆𑀕𑀺𑀲𑀼𑀢𑁆𑀢𑀁

𑁪𑁬. ‘‘𑀲𑀢𑁆𑀢𑀺𑀫𑁂, 𑀪𑀺𑀓𑁆𑀔𑀯𑁂, 𑀅𑀕𑁆𑀕𑀻. 𑀓𑀢𑀫𑁂 𑀲𑀢𑁆𑀢? 𑀭𑀸𑀕𑀕𑁆𑀕𑀺, 𑀤𑁄𑀲𑀕𑁆𑀕𑀺, 𑀫𑁄𑀳𑀕𑁆𑀕𑀺, 𑀆𑀳𑀼𑀦𑁂𑀬𑁆𑀬𑀕𑁆𑀕𑀺, 𑀕𑀳𑀧𑀢𑀕𑁆𑀕𑀺, 𑀤𑀓𑁆𑀔𑀺𑀡𑁂𑀬𑁆𑀬𑀕𑁆𑀕𑀺, 𑀓𑀝𑁆𑀞𑀕𑁆𑀕𑀺 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀅𑀕𑁆𑀕𑀻’’𑀢𑀺. 𑀢𑀢𑀺𑀬𑀁.

𑁪. 𑀤𑀼𑀢𑀺𑀬𑀅𑀕𑁆𑀕𑀺𑀲𑀼𑀢𑁆𑀢𑀁

𑁪𑁭. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀉𑀕𑁆𑀕𑀢𑀲𑀭𑀻𑀭𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀫𑀳𑀸𑀬𑀜𑁆𑀜𑁄 𑀉𑀧𑀓𑁆𑀔𑀝𑁄 𑀳𑁄𑀢𑀺. 𑀧𑀜𑁆𑀘 𑀉𑀲𑀪𑀲𑀢𑀸𑀦𑀺 𑀣𑀽𑀡𑀽𑀧𑀦𑀻𑀢𑀸𑀦𑀺 𑀳𑁄𑀦𑁆𑀢𑀺 𑀬𑀜𑁆𑀜𑀢𑁆𑀣𑀸𑀬, 𑀧𑀜𑁆𑀘 𑀯𑀘𑁆𑀙𑀢𑀭𑀲𑀢𑀸𑀦𑀺 𑀣𑀽𑀡𑀽𑀧𑀦𑀻𑀢𑀸𑀦𑀺 𑀳𑁄𑀦𑁆𑀢𑀺 𑀬𑀜𑁆𑀜𑀢𑁆𑀣𑀸𑀬, 𑀧𑀜𑁆𑀘 𑀯𑀘𑁆𑀙𑀢𑀭𑀺𑀲𑀢𑀸𑀦𑀺 𑀣𑀽𑀡𑀽𑀧𑀦𑀻𑀢𑀸𑀦𑀺 𑀳𑁄𑀦𑁆𑀢𑀺 𑀬𑀜𑁆𑀜𑀢𑁆𑀣𑀸𑀬, 𑀧𑀜𑁆𑀘 𑀅𑀚𑀲𑀢𑀸𑀦𑀺 𑀣𑀽𑀡𑀽𑀧𑀦𑀻𑀢𑀸𑀦𑀺 𑀳𑁄𑀦𑁆𑀢𑀺 𑀬𑀜𑁆𑀜𑀢𑁆𑀣𑀸𑀬, 𑀧𑀜𑁆𑀘 𑀉𑀭𑀩𑁆𑀪𑀲𑀢𑀸𑀦𑀺 𑀣𑀽𑀡𑀽𑀧𑀦𑀻𑀢𑀸𑀦𑀺 𑀳𑁄𑀦𑁆𑀢𑀺 𑀬𑀜𑁆𑀜𑀢𑁆𑀣𑀸𑀬. 𑀅𑀣 𑀔𑁄 𑀉𑀕𑁆𑀕𑀢𑀲𑀭𑀻𑀭𑁄 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀉𑀕𑁆𑀕𑀢𑀲𑀭𑀻𑀭𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀲𑀼𑀢𑀁 𑀫𑁂𑀢𑀁, 𑀪𑁄 𑀕𑁄𑀢𑀫, 𑀅𑀕𑁆𑀕𑀺𑀲𑁆𑀲 𑀆𑀤𑀸𑀦𑀁 [𑀆𑀥𑀸𑀦𑀁 (𑀲𑀻. 𑀲𑁆𑀬𑀸.)] 𑀬𑀽𑀧𑀲𑁆𑀲 𑀉𑀲𑁆𑀲𑀸𑀧𑀦𑀁 𑀫𑀳𑀧𑁆𑀨𑀮𑀁 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲’’𑀦𑁆𑀢𑀺. ‘‘𑀫𑀬𑀸𑀧𑀺 𑀔𑁄 𑀏𑀢𑀁, 𑀩𑁆𑀭𑀸𑀳𑁆𑀫𑀡, 𑀲𑀼𑀢𑀁 𑀅𑀕𑁆𑀕𑀺𑀲𑁆𑀲 𑀆𑀤𑀸𑀦𑀁 𑀬𑀽𑀧𑀲𑁆𑀲 𑀉𑀲𑁆𑀲𑀸𑀧𑀦𑀁 𑀫𑀳𑀧𑁆𑀨𑀮𑀁 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲’’𑀦𑁆𑀢𑀺. 𑀤𑀼𑀢𑀺𑀬𑀫𑁆𑀧𑀺 𑀔𑁄 𑀉𑀕𑁆𑀕𑀢𑀲𑀭𑀻𑀭𑁄 𑀩𑁆𑀭𑀸𑀳𑁆𑀫𑀡𑁄…𑀧𑁂… 𑀢𑀢𑀺𑀬𑀫𑁆𑀧𑀺 𑀔𑁄 𑀉𑀕𑁆𑀕𑀢𑀲𑀭𑀻𑀭𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀲𑀼𑀢𑀁 𑀫𑁂𑀢𑀁, 𑀪𑁄 𑀕𑁄𑀢𑀫, 𑀅𑀕𑁆𑀕𑀺𑀲𑁆𑀲 𑀆𑀤𑀸𑀦𑀁 𑀬𑀽𑀧𑀲𑁆𑀲 𑀉𑀲𑁆𑀲𑀸𑀧𑀦𑀁 𑀫𑀳𑀧𑁆𑀨𑀮𑀁 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲’’𑀦𑁆𑀢𑀺. ‘‘𑀫𑀬𑀸𑀧𑀺 𑀔𑁄 𑀏𑀢𑀁, 𑀩𑁆𑀭𑀸𑀳𑁆𑀫𑀡, 𑀲𑀼𑀢𑀁 𑀅𑀕𑁆𑀕𑀺𑀲𑁆𑀲 𑀆𑀤𑀸𑀦𑀁 𑀬𑀽𑀧𑀲𑁆𑀲 𑀉𑀲𑁆𑀲𑀸𑀧𑀦𑀁 𑀫𑀳𑀧𑁆𑀨𑀮𑀁 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲’’𑀦𑁆𑀢𑀺. ‘‘𑀢𑀬𑀺𑀤𑀁, 𑀪𑁄 𑀕𑁄𑀢𑀫, 𑀲𑀫𑁂𑀢𑀺 𑀪𑁄𑀢𑁄 𑀘𑁂𑀯 𑀕𑁄𑀢𑀫𑀲𑁆𑀲 𑀅𑀫𑁆𑀳𑀸𑀓𑀜𑁆𑀘, 𑀬𑀤𑀺𑀤𑀁 𑀲𑀩𑁆𑀩𑁂𑀦 𑀲𑀩𑁆𑀩𑀁’’.

𑀏𑀯𑀁 𑀯𑀼𑀢𑁆𑀢𑁂 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀉𑀕𑁆𑀕𑀢𑀲𑀭𑀻𑀭𑀁 𑀩𑁆𑀭𑀸𑀳𑁆𑀫𑀡𑀁 𑀏𑀢𑀤𑀯𑁄𑀘 𑁋 ‘‘𑀦 𑀔𑁄, 𑀩𑁆𑀭𑀸𑀳𑁆𑀫𑀡, 𑀢𑀣𑀸𑀕𑀢𑀸 𑀏𑀯𑀁 𑀧𑀼𑀘𑁆𑀙𑀺𑀢𑀩𑁆𑀩𑀸 𑁋 ‘𑀲𑀼𑀢𑀁 𑀫𑁂𑀢𑀁, 𑀪𑁄 𑀕𑁄𑀢𑀫, 𑀅𑀕𑁆𑀕𑀺𑀲𑁆𑀲 𑀆𑀤𑀸𑀦𑀁 𑀬𑀽𑀧𑀲𑁆𑀲 𑀉𑀲𑁆𑀲𑀸𑀧𑀦𑀁 𑀫𑀳𑀧𑁆𑀨𑀮𑀁 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲’𑀦𑁆𑀢𑀺. 𑀏𑀯𑀁 𑀔𑁄, 𑀩𑁆𑀭𑀸𑀳𑁆𑀫𑀡, 𑀢𑀣𑀸𑀕𑀢𑀸 𑀧𑀼𑀘𑁆𑀙𑀺𑀢𑀩𑁆𑀩𑀸 𑁋 ‘𑀅𑀳𑀜𑁆𑀳𑀺, 𑀪𑀦𑁆𑀢𑁂, 𑀅𑀕𑁆𑀕𑀺𑀁 [𑀅𑀕𑁆𑀕𑀺𑀲𑁆𑀲 (𑀓.)] 𑀆𑀤𑀸𑀢𑀼𑀓𑀸𑀫𑁄, [𑀆𑀥𑀸𑀢𑀼𑀓𑀸𑀫𑁄 (𑀲𑀻. 𑀲𑁆𑀬𑀸.)] 𑀬𑀽𑀧𑀁 𑀉𑀲𑁆𑀲𑀸𑀧𑁂𑀢𑀼𑀓𑀸𑀫𑁄. 𑀑𑀯𑀤𑀢𑀼 𑀫𑀁, 𑀪𑀦𑁆𑀢𑁂, 𑀪𑀕𑀯𑀸. 𑀅𑀦𑀼𑀲𑀸𑀲𑀢𑀼 𑀫𑀁, 𑀪𑀦𑁆𑀢𑁂, 𑀪𑀕𑀯𑀸 𑀬𑀁 𑀫𑀫 𑀅𑀲𑁆𑀲 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’’’𑀢𑀺.

𑀅𑀣 𑀔𑁄 𑀉𑀕𑁆𑀕𑀢𑀲𑀭𑀻𑀭𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀳𑀜𑁆𑀳𑀺, 𑀪𑁄 𑀕𑁄𑀢𑀫, 𑀅𑀕𑁆𑀕𑀺𑀁 𑀆𑀤𑀸𑀢𑀼𑀓𑀸𑀫𑁄 𑀬𑀽𑀧𑀁 𑀉𑀲𑁆𑀲𑀸𑀧𑁂𑀢𑀼𑀓𑀸𑀫𑁄. 𑀑𑀯𑀤𑀢𑀼 𑀫𑀁 𑀪𑀯𑀁 𑀕𑁄𑀢𑀫𑁄. 𑀅𑀦𑀼𑀲𑀸𑀲𑀢𑀼 𑀫𑀁 𑀪𑀯𑀁 𑀕𑁄𑀢𑀫𑁄 𑀬𑀁 𑀫𑀫 𑀅𑀲𑁆𑀲 𑀤𑀻𑀖𑀭𑀢𑁆𑀢𑀁 𑀳𑀺𑀢𑀸𑀬 𑀲𑀼𑀔𑀸𑀬𑀸’’𑀢𑀺.

‘‘𑀅𑀕𑁆𑀕𑀺𑀁, 𑀩𑁆𑀭𑀸𑀳𑁆𑀫𑀡, 𑀆𑀤𑁂𑀦𑁆𑀢𑁄 [𑀆𑀥𑁂𑀦𑁆𑀢𑁄 (𑀲𑀻. 𑀲𑁆𑀬𑀸.)] 𑀬𑀽𑀧𑀁 𑀉𑀲𑁆𑀲𑀸𑀧𑁂𑀦𑁆𑀢𑁄 𑀧𑀼𑀩𑁆𑀩𑁂𑀯 𑀬𑀜𑁆𑀜𑀸 𑀢𑀻𑀡𑀺 𑀲𑀢𑁆𑀣𑀸𑀦𑀺 𑀉𑀲𑁆𑀲𑀸𑀧𑁂𑀢𑀺 𑀅𑀓𑀼𑀲𑀮𑀸𑀦𑀺 𑀤𑀼𑀓𑁆𑀔𑀼𑀤𑁆𑀭𑀬𑀸𑀦𑀺 [𑀤𑀼𑀓𑁆𑀔𑀼𑀤𑁆𑀤𑀬𑀸𑀦𑀺 (𑀲𑀻.)] 𑀤𑀼𑀓𑁆𑀔𑀯𑀺𑀧𑀸𑀓𑀸𑀦𑀺. 𑀓𑀢𑀫𑀸𑀦𑀺 𑀢𑀻𑀡𑀺? 𑀓𑀸𑀬𑀲𑀢𑁆𑀣𑀁, 𑀯𑀘𑀻𑀲𑀢𑁆𑀣𑀁, 𑀫𑀦𑁄𑀲𑀢𑁆𑀣𑀁. 𑀅𑀕𑁆𑀕𑀺𑀁, 𑀩𑁆𑀭𑀸𑀳𑁆𑀫𑀡, 𑀆𑀤𑁂𑀦𑁆𑀢𑁄 𑀬𑀽𑀧𑀁 𑀉𑀲𑁆𑀲𑀸𑀧𑁂𑀦𑁆𑀢𑁄 𑀧𑀼𑀩𑁆𑀩𑁂𑀯 𑀬𑀜𑁆𑀜𑀸 𑀏𑀯𑀁 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀲𑀺 𑁋 ‘𑀏𑀢𑁆𑀢𑀓𑀸 𑀉𑀲𑀪𑀸 𑀳𑀜𑁆𑀜𑀦𑁆𑀢𑀼 𑀬𑀜𑁆𑀜𑀢𑁆𑀣𑀸𑀬, 𑀏𑀢𑁆𑀢𑀓𑀸 𑀯𑀘𑁆𑀙𑀢𑀭𑀸 𑀳𑀜𑁆𑀜𑀦𑁆𑀢𑀼 𑀬𑀜𑁆𑀜𑀢𑁆𑀣𑀸𑀬, 𑀏𑀢𑁆𑀢𑀓𑀸 𑀯𑀘𑁆𑀙𑀢𑀭𑀺𑀬𑁄 𑀳𑀜𑁆𑀜𑀦𑁆𑀢𑀼 𑀬𑀜𑁆𑀜𑀢𑁆𑀣𑀸𑀬, 𑀏𑀢𑁆𑀢𑀓𑀸 𑀅𑀚𑀸 𑀳𑀜𑁆𑀜𑀦𑁆𑀢𑀼 𑀬𑀜𑁆𑀜𑀢𑁆𑀣𑀸𑀬, 𑀏𑀢𑁆𑀢𑀓𑀸 𑀉𑀭𑀩𑁆𑀪𑀸 𑀳𑀜𑁆𑀜𑀦𑁆𑀢𑀼 𑀬𑀜𑁆𑀜𑀢𑁆𑀣𑀸𑀬𑀸’𑀢𑀺. 𑀲𑁄 ‘𑀧𑀼𑀜𑁆𑀜𑀁 𑀓𑀭𑁄𑀫𑀻’𑀢𑀺 𑀅𑀧𑀼𑀜𑁆𑀜𑀁 𑀓𑀭𑁄𑀢𑀺, ‘𑀓𑀼𑀲𑀮𑀁 𑀓𑀭𑁄𑀫𑀻’𑀢𑀺 𑀅𑀓𑀼𑀲𑀮𑀁 𑀓𑀭𑁄𑀢𑀺, ‘𑀲𑀼𑀕𑀢𑀺𑀬𑀸 𑀫𑀕𑁆𑀕𑀁 𑀧𑀭𑀺𑀬𑁂𑀲𑀸𑀫𑀻’𑀢𑀺 𑀤𑀼𑀕𑁆𑀕𑀢𑀺𑀬𑀸 𑀫𑀕𑁆𑀕𑀁 𑀧𑀭𑀺𑀬𑁂𑀲𑀢𑀺. 𑀅𑀕𑁆𑀕𑀺𑀁, 𑀩𑁆𑀭𑀸𑀳𑁆𑀫𑀡, 𑀆𑀤𑁂𑀦𑁆𑀢𑁄 𑀬𑀽𑀧𑀁 𑀉𑀲𑁆𑀲𑀸𑀧𑁂𑀦𑁆𑀢𑁄 𑀧𑀼𑀩𑁆𑀩𑁂𑀯 𑀬𑀜𑁆𑀜𑀸 𑀇𑀤𑀁 𑀧𑀞𑀫𑀁 𑀫𑀦𑁄𑀲𑀢𑁆𑀣𑀁 𑀉𑀲𑁆𑀲𑀸𑀧𑁂𑀢𑀺 𑀅𑀓𑀼𑀲𑀮𑀁 𑀤𑀼𑀓𑁆𑀔𑀼𑀤𑁆𑀭𑀬𑀁 𑀤𑀼𑀓𑁆𑀔𑀯𑀺𑀧𑀸𑀓𑀁.

‘‘𑀧𑀼𑀦 𑀘𑀧𑀭𑀁, 𑀩𑁆𑀭𑀸𑀳𑁆𑀫𑀡, 𑀅𑀕𑁆𑀕𑀺𑀁 𑀆𑀤𑁂𑀦𑁆𑀢𑁄 𑀬𑀽𑀧𑀁 𑀉𑀲𑁆𑀲𑀸𑀧𑁂𑀦𑁆𑀢𑁄 𑀧𑀼𑀩𑁆𑀩𑁂𑀯 𑀬𑀜𑁆𑀜𑀸 𑀏𑀯𑀁 𑀯𑀸𑀘𑀁 𑀪𑀸𑀲𑀢𑀺 𑁋 ‘𑀏𑀢𑁆𑀢𑀓𑀸 𑀉𑀲𑀪𑀸 𑀳𑀜𑁆𑀜𑀦𑁆𑀢𑀼 𑀬𑀜𑁆𑀜𑀢𑁆𑀣𑀸𑀬, 𑀏𑀢𑁆𑀢𑀓𑀸 𑀯𑀘𑁆𑀙𑀢𑀭𑀸 𑀳𑀜𑁆𑀜𑀦𑁆𑀢𑀼 𑀬𑀜𑁆𑀜𑀢𑁆𑀣𑀸𑀬, 𑀏𑀢𑁆𑀢𑀓𑀸 𑀯𑀘𑁆𑀙𑀢𑀭𑀺𑀬𑁄 𑀳𑀜𑁆𑀜𑀦𑁆𑀢𑀼 𑀬𑀜𑁆𑀜𑀢𑁆𑀣𑀸𑀬, 𑀏𑀢𑁆𑀢𑀓𑀸 𑀅𑀚𑀸 𑀳𑀜𑁆𑀜𑀦𑁆𑀢𑀼 𑀬𑀜𑁆𑀜𑀢𑁆𑀣𑀸𑀬, 𑀏𑀢𑁆𑀢𑀓𑀸 𑀉𑀭𑀩𑁆𑀪𑀸 𑀳𑀜𑁆𑀜𑀦𑁆𑀢𑀼 𑀬𑀜𑁆𑀜𑀢𑁆𑀣𑀸𑀬𑀸’𑀢𑀺. 𑀲𑁄 ‘𑀧𑀼𑀜𑁆𑀜𑀁 𑀓𑀭𑁄𑀫𑀻’𑀢𑀺 𑀅𑀧𑀼𑀜𑁆𑀜𑀁 𑀓𑀭𑁄𑀢𑀺, ‘𑀓𑀼𑀲𑀮𑀁 𑀓𑀭𑁄𑀫𑀻’𑀢𑀺 𑀅𑀓𑀼𑀲𑀮𑀁 𑀓𑀭𑁄𑀢𑀺, ‘𑀲𑀼𑀕𑀢𑀺𑀬𑀸 𑀫𑀕𑁆𑀕𑀁 𑀧𑀭𑀺𑀬𑁂𑀲𑀸𑀫𑀻’𑀢𑀺 𑀤𑀼𑀕𑁆𑀕𑀢𑀺𑀬𑀸 𑀫𑀕𑁆𑀕𑀁 𑀧𑀭𑀺𑀬𑁂𑀲𑀢𑀺. 𑀅𑀕𑁆𑀕𑀺𑀁, 𑀩𑁆𑀭𑀸𑀳𑁆𑀫𑀡, 𑀆𑀤𑁂𑀦𑁆𑀢𑁄 𑀬𑀽𑀧𑀁 𑀉𑀲𑁆𑀲𑀸𑀧𑁂𑀦𑁆𑀢𑁄 𑀧𑀼𑀩𑁆𑀩𑁂𑀯 𑀬𑀜𑁆𑀜𑀸 𑀇𑀤𑀁 𑀤𑀼𑀢𑀺𑀬𑀁 𑀯𑀘𑀻𑀲𑀢𑁆𑀣𑀁 𑀉𑀲𑁆𑀲𑀸𑀧𑁂𑀢𑀺 𑀅𑀓𑀼𑀲𑀮𑀁 𑀤𑀼𑀓𑁆𑀔𑀼𑀤𑁆𑀭𑀬𑀁 𑀤𑀼𑀓𑁆𑀔𑀯𑀺𑀧𑀸𑀓𑀁.

‘‘𑀧𑀼𑀦 𑀘𑀧𑀭𑀁, 𑀩𑁆𑀭𑀸𑀳𑁆𑀫𑀡, 𑀅𑀕𑁆𑀕𑀺𑀁 𑀆𑀤𑁂𑀦𑁆𑀢𑁄 𑀬𑀽𑀧𑀁 𑀉𑀲𑁆𑀲𑀸𑀧𑁂𑀦𑁆𑀢𑁄 𑀧𑀼𑀩𑁆𑀩𑁂𑀯 𑀬𑀜𑁆𑀜𑀸 𑀲𑀬𑀁 𑀧𑀞𑀫𑀁 𑀲𑀫𑀸𑀭𑀫𑁆𑀪𑀢𑀺 [𑀲𑀫𑀸𑀭𑀩𑁆𑀪𑀢𑀺 (𑀲𑀻. 𑀓.), 𑀲𑀫𑀸𑀭𑀪𑀢𑀺 (𑀲𑁆𑀬𑀸.)] 𑀉𑀲𑀪𑀸 𑀳𑀦𑁆𑀢𑀼𑀁 [𑀳𑀜𑁆𑀜𑀦𑁆𑀢𑀼 (𑀲𑀻. 𑀲𑁆𑀬𑀸.)] 𑀬𑀜𑁆𑀜𑀢𑁆𑀣𑀸𑀬, 𑀲𑀬𑀁 𑀧𑀞𑀫𑀁 𑀲𑀫𑀸𑀭𑀫𑁆𑀪𑀢𑀺 𑀯𑀘𑁆𑀙𑀢𑀭𑀸 𑀳𑀦𑁆𑀢𑀼𑀁 𑀬𑀜𑁆𑀜𑀢𑁆𑀣𑀸𑀬, 𑀲𑀬𑀁 𑀧𑀞𑀫𑀁 𑀲𑀫𑀸𑀭𑀫𑁆𑀪𑀢𑀺 𑀯𑀘𑁆𑀙𑀢𑀭𑀺𑀬𑁄 𑀳𑀦𑁆𑀢𑀼𑀁 𑀬𑀜𑁆𑀜𑀢𑁆𑀣𑀸𑀬, 𑀲𑀬𑀁 𑀧𑀞𑀫𑀁 𑀲𑀫𑀸𑀭𑀫𑁆𑀪𑀢𑀺 𑀅𑀚𑀸 𑀳𑀦𑁆𑀢𑀼𑀁 𑀬𑀜𑁆𑀜𑀢𑁆𑀣𑀸𑀬, 𑀲𑀬𑀁 𑀧𑀞𑀫𑀁 𑀲𑀫𑀸𑀭𑀫𑁆𑀪𑀢𑀺 𑀉𑀭𑀩𑁆𑀪𑀸 𑀳𑀦𑁆𑀢𑀼𑀁 𑀬𑀜𑁆𑀜𑀢𑁆𑀣𑀸𑀬 [𑀳𑀜𑁆𑀜𑀦𑁆𑀢𑀼 𑀬𑀜𑁆𑀜𑀢𑁆𑀣𑀸𑀬𑀸𑀢𑀺 (𑀲𑀻. 𑀲𑁆𑀬𑀸.)]. 𑀲𑁄 ‘𑀧𑀼𑀜𑁆𑀜𑀁 𑀓𑀭𑁄𑀫𑀻’𑀢𑀺 𑀅𑀧𑀼𑀜𑁆𑀜𑀁 𑀓𑀭𑁄𑀢𑀺, ‘𑀓𑀼𑀲𑀮𑀁 𑀓𑀭𑁄𑀫𑀻’𑀢𑀺 𑀅𑀓𑀼𑀲𑀮𑀁 𑀓𑀭𑁄𑀢𑀺, ‘𑀲𑀼𑀕𑀢𑀺𑀬𑀸 𑀫𑀕𑁆𑀕𑀁 𑀧𑀭𑀺𑀬𑁂𑀲𑀸𑀫𑀻’𑀢𑀺 𑀤𑀼𑀕𑁆𑀕𑀢𑀺𑀬𑀸 𑀫𑀕𑁆𑀕𑀁 𑀧𑀭𑀺𑀬𑁂𑀲𑀢𑀺. 𑀅𑀕𑁆𑀕𑀺𑀁, 𑀩𑁆𑀭𑀸𑀳𑁆𑀫𑀡, 𑀆𑀤𑁂𑀦𑁆𑀢𑁄 𑀬𑀽𑀧𑀁 𑀉𑀲𑁆𑀲𑀸𑀧𑁂𑀦𑁆𑀢𑁄 𑀧𑀼𑀩𑁆𑀩𑁂𑀯 𑀬𑀜𑁆𑀜𑀸 𑀇𑀤𑀁 𑀢𑀢𑀺𑀬𑀁 𑀓𑀸𑀬𑀲𑀢𑁆𑀣𑀁 𑀉𑀲𑁆𑀲𑀸𑀧𑁂𑀢𑀺 𑀅𑀓𑀼𑀲𑀮𑀁 𑀤𑀼𑀓𑁆𑀔𑀼𑀤𑁆𑀭𑀬𑀁 𑀤𑀼𑀓𑁆𑀔𑀯𑀺𑀧𑀸𑀓𑀁. 𑀅𑀕𑁆𑀕𑀺𑀁, 𑀩𑁆𑀭𑀸𑀳𑁆𑀫𑀡, 𑀆𑀤𑁂𑀦𑁆𑀢𑁄 𑀬𑀽𑀧𑀁 𑀉𑀲𑁆𑀲𑀸𑀧𑁂𑀦𑁆𑀢𑁄 𑀧𑀼𑀩𑁆𑀩𑁂𑀯 𑀬𑀜𑁆𑀜𑀸 𑀇𑀫𑀸𑀦𑀺 𑀢𑀻𑀡𑀺 𑀲𑀢𑁆𑀣𑀸𑀦𑀺 𑀉𑀲𑁆𑀲𑀸𑀧𑁂𑀢𑀺 𑀅𑀓𑀼𑀲𑀮𑀸𑀦𑀺 𑀤𑀼𑀓𑁆𑀔𑀼𑀤𑁆𑀭𑀬𑀸𑀦𑀺 𑀤𑀼𑀓𑁆𑀔𑀯𑀺𑀧𑀸𑀓𑀸𑀦𑀺.

‘‘𑀢𑀬𑁄𑀫𑁂, 𑀩𑁆𑀭𑀸𑀳𑁆𑀫𑀡, 𑀅𑀕𑁆𑀕𑀻 𑀧𑀳𑀸𑀢𑀩𑁆𑀩𑀸 𑀧𑀭𑀺𑀯𑀚𑁆𑀚𑁂𑀢𑀩𑁆𑀩𑀸, 𑀦 𑀲𑁂𑀯𑀺𑀢𑀩𑁆𑀩𑀸. 𑀓𑀢𑀫𑁂 𑀢𑀬𑁄? 𑀭𑀸𑀕𑀕𑁆𑀕𑀺, 𑀤𑁄𑀲𑀕𑁆𑀕𑀺, 𑀫𑁄𑀳𑀕𑁆𑀕𑀺.

‘‘𑀓𑀲𑁆𑀫𑀸 𑀘𑀸𑀬𑀁, 𑀩𑁆𑀭𑀸𑀳𑁆𑀫𑀡, 𑀭𑀸𑀕𑀕𑁆𑀕𑀺 𑀧𑀳𑀸𑀢𑀩𑁆𑀩𑁄 𑀧𑀭𑀺𑀯𑀚𑁆𑀚𑁂𑀢𑀩𑁆𑀩𑁄, 𑀦 𑀲𑁂𑀯𑀺𑀢𑀩𑁆𑀩𑁄? 𑀭𑀢𑁆𑀢𑁄 𑀔𑁄, 𑀩𑁆𑀭𑀸𑀳𑁆𑀫𑀡, 𑀭𑀸𑀕𑁂𑀦 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺. 𑀲𑁄 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸, 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸, 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺. 𑀢𑀲𑁆𑀫𑀸𑀬𑀁 𑀭𑀸𑀕𑀕𑁆𑀕𑀺 𑀧𑀳𑀸𑀢𑀩𑁆𑀩𑁄 𑀧𑀭𑀺𑀯𑀚𑁆𑀚𑁂𑀢𑀩𑁆𑀩𑁄, 𑀦 𑀲𑁂𑀯𑀺𑀢𑀩𑁆𑀩𑁄.

‘‘𑀓𑀲𑁆𑀫𑀸 𑀘𑀸𑀬𑀁, 𑀩𑁆𑀭𑀸𑀳𑁆𑀫𑀡, 𑀤𑁄𑀲𑀕𑁆𑀕𑀺 𑀧𑀳𑀸𑀢𑀩𑁆𑀩𑁄 𑀧𑀭𑀺𑀯𑀚𑁆𑀚𑁂𑀢𑀩𑁆𑀩𑁄, 𑀦 𑀲𑁂𑀯𑀺𑀢𑀩𑁆𑀩𑁄? 𑀤𑀼𑀝𑁆𑀞𑁄 𑀔𑁄, 𑀩𑁆𑀭𑀸𑀳𑁆𑀫𑀡, 𑀤𑁄𑀲𑁂𑀦 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺. 𑀲𑁄 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸, 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸, 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺. 𑀢𑀲𑁆𑀫𑀸𑀬𑀁 𑀤𑁄𑀲𑀕𑁆𑀕𑀺 𑀧𑀳𑀸𑀢𑀩𑁆𑀩𑁄 𑀧𑀭𑀺𑀯𑀚𑁆𑀚𑁂𑀢𑀩𑁆𑀩𑁄, 𑀦 𑀲𑁂𑀯𑀺𑀢𑀩𑁆𑀩𑁄.

‘‘𑀓𑀲𑁆𑀫𑀸 𑀘𑀸𑀬𑀁, 𑀩𑁆𑀭𑀸𑀳𑁆𑀫𑀡, 𑀫𑁄𑀳𑀕𑁆𑀕𑀺 𑀧𑀳𑀸𑀢𑀩𑁆𑀩𑁄 𑀧𑀭𑀺𑀯𑀚𑁆𑀚𑁂𑀢𑀩𑁆𑀩𑁄, 𑀦 𑀲𑁂𑀯𑀺𑀢𑀩𑁆𑀩𑁄? 𑀫𑀽𑀴𑁆𑀳𑁄 𑀔𑁄, 𑀩𑁆𑀭𑀸𑀳𑁆𑀫𑀡, 𑀫𑁄𑀳𑁂𑀦 𑀅𑀪𑀺𑀪𑀽𑀢𑁄 𑀧𑀭𑀺𑀬𑀸𑀤𑀺𑀦𑁆𑀦𑀘𑀺𑀢𑁆𑀢𑁄 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺, 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀢𑀺. 𑀲𑁄 𑀓𑀸𑀬𑁂𑀦 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸, 𑀯𑀸𑀘𑀸𑀬 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸, 𑀫𑀦𑀲𑀸 𑀤𑀼𑀘𑁆𑀘𑀭𑀺𑀢𑀁 𑀘𑀭𑀺𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀅𑀧𑀸𑀬𑀁 𑀤𑀼𑀕𑁆𑀕𑀢𑀺𑀁 𑀯𑀺𑀦𑀺𑀧𑀸𑀢𑀁 𑀦𑀺𑀭𑀬𑀁 𑀉𑀧𑀧𑀚𑁆𑀚𑀢𑀺. 𑀢𑀲𑁆𑀫𑀸𑀬𑀁 𑀫𑁄𑀳𑀕𑁆𑀕𑀺 𑀧𑀳𑀸𑀢𑀩𑁆𑀩𑁄 𑀧𑀭𑀺𑀯𑀚𑁆𑀚𑁂𑀢𑀩𑁆𑀩𑁄, 𑀦 𑀲𑁂𑀯𑀺𑀢𑀩𑁆𑀩𑁄. 𑀇𑀫𑁂 𑀔𑁄 𑀢𑀬𑁄, 𑀩𑁆𑀭𑀸𑀳𑁆𑀫𑀡, 𑀅𑀕𑁆𑀕𑀻 𑀧𑀳𑀸𑀢𑀩𑁆𑀩𑀸 𑀧𑀭𑀺𑀯𑀚𑁆𑀚𑁂𑀢𑀩𑁆𑀩𑀸, 𑀦 𑀲𑁂𑀯𑀺𑀢𑀩𑁆𑀩𑀸.

‘‘𑀢𑀬𑁄 𑀔𑁄, 𑀩𑁆𑀭𑀸𑀳𑁆𑀫𑀡, 𑀅𑀕𑁆𑀕𑀻 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀫𑀸𑀦𑁂𑀢𑁆𑀯𑀸 𑀧𑀽𑀚𑁂𑀢𑁆𑀯𑀸 𑀲𑀫𑁆𑀫𑀸 𑀲𑀼𑀔𑀁 𑀧𑀭𑀺𑀳𑀸𑀢𑀩𑁆𑀩𑀸. 𑀓𑀢𑀫𑁂 𑀢𑀬𑁄? 𑀆𑀳𑀼𑀦𑁂𑀬𑁆𑀬𑀕𑁆𑀕𑀺, 𑀕𑀳𑀧𑀢𑀕𑁆𑀕𑀺, 𑀤𑀓𑁆𑀔𑀺𑀡𑁂𑀬𑁆𑀬𑀕𑁆𑀕𑀺.

‘‘𑀓𑀢𑀫𑁄 𑀘, 𑀩𑁆𑀭𑀸𑀳𑁆𑀫𑀡, 𑀆𑀳𑀼𑀦𑁂𑀬𑁆𑀬𑀕𑁆𑀕𑀺? 𑀇𑀥, 𑀩𑁆𑀭𑀸𑀳𑁆𑀫𑀡, 𑀬𑀲𑁆𑀲 𑀢𑁂 𑀳𑁄𑀦𑁆𑀢𑀺 𑀫𑀸𑀢𑀸𑀢𑀺 𑀯𑀸 𑀧𑀺𑀢𑀸𑀢𑀺 𑀯𑀸, 𑀅𑀬𑀁 𑀯𑀼𑀘𑁆𑀘𑀢𑀺, 𑀩𑁆𑀭𑀸𑀳𑁆𑀫𑀡, 𑀆𑀳𑀼𑀦𑁂𑀬𑁆𑀬𑀕𑁆𑀕𑀺. 𑀢𑀁 𑀓𑀺𑀲𑁆𑀲 𑀳𑁂𑀢𑀼? 𑀅𑀢𑁄𑀳𑀬𑀁 [𑀇𑀢𑁄𑀧𑀸𑀬𑀁 (𑀓.)], 𑀩𑁆𑀭𑀸𑀳𑁆𑀫𑀡, 𑀆𑀳𑀼𑀢𑁄 𑀲𑀫𑁆𑀪𑀽𑀢𑁄, 𑀢𑀲𑁆𑀫𑀸𑀬𑀁 𑀆𑀳𑀼𑀦𑁂𑀬𑁆𑀬𑀕𑁆𑀕𑀺 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀫𑀸𑀦𑁂𑀢𑁆𑀯𑀸 𑀧𑀽𑀚𑁂𑀢𑁆𑀯𑀸 𑀲𑀫𑁆𑀫𑀸 𑀲𑀼𑀔𑀁 𑀧𑀭𑀺𑀳𑀸𑀢𑀩𑁆𑀩𑁄.

‘‘𑀓𑀢𑀫𑁄 𑀘, 𑀩𑁆𑀭𑀸𑀳𑁆𑀫𑀡, 𑀕𑀳𑀧𑀢𑀕𑁆𑀕𑀺? 𑀇𑀥, 𑀩𑁆𑀭𑀸𑀳𑁆𑀫𑀡, 𑀬𑀲𑁆𑀲 𑀢𑁂 𑀳𑁄𑀦𑁆𑀢𑀺 𑀧𑀼𑀢𑁆𑀢𑀸𑀢𑀺 𑀯𑀸 𑀤𑀸𑀭𑀸𑀢𑀺 𑀯𑀸 𑀤𑀸𑀲𑀸𑀢𑀺 𑀯𑀸 𑀧𑁂𑀲𑁆𑀲𑀸𑀢𑀺 𑀯𑀸 𑀓𑀫𑁆𑀫𑀓𑀭𑀸𑀢𑀺 𑀯𑀸, 𑀅𑀬𑀁 𑀯𑀼𑀘𑁆𑀘𑀢𑀺, 𑀩𑁆𑀭𑀸𑀳𑁆𑀫𑀡, 𑀕𑀳𑀧𑀢𑀕𑁆𑀕𑀺. 𑀢𑀲𑁆𑀫𑀸𑀬𑀁 𑀕𑀳𑀧𑀢𑀕𑁆𑀕𑀺 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀫𑀸𑀦𑁂𑀢𑁆𑀯𑀸 𑀧𑀽𑀚𑁂𑀢𑁆𑀯𑀸 𑀲𑀫𑁆𑀫𑀸 𑀲𑀼𑀔𑀁 𑀧𑀭𑀺𑀳𑀸𑀢𑀩𑁆𑀩𑁄.

‘‘𑀓𑀢𑀫𑁄 𑀘, 𑀩𑁆𑀭𑀸𑀳𑁆𑀫𑀡, 𑀤𑀓𑁆𑀔𑀺𑀡𑁂𑀬𑁆𑀬𑀕𑁆𑀕𑀺? 𑀇𑀥, 𑀩𑁆𑀭𑀸𑀳𑁆𑀫𑀡, 𑀬𑁂 𑀢𑁂 𑀲𑀫𑀡𑀩𑁆𑀭𑀸𑀳𑁆𑀫𑀡𑀸 𑀧𑀭𑀧𑁆𑀧𑀯𑀸𑀤𑀸 𑀧𑀝𑀺𑀯𑀺𑀭𑀢𑀸 𑀔𑀦𑁆𑀢𑀺𑀲𑁄𑀭𑀘𑁆𑀘𑁂 𑀦𑀺𑀯𑀺𑀝𑁆𑀞𑀸 𑀏𑀓𑀫𑀢𑁆𑀢𑀸𑀦𑀁 𑀤𑀫𑁂𑀦𑁆𑀢𑀺, 𑀏𑀓𑀫𑀢𑁆𑀢𑀸𑀦𑀁 𑀲𑀫𑁂𑀦𑁆𑀢𑀺, 𑀏𑀓𑀫𑀢𑁆𑀢𑀸𑀦𑀁 𑀧𑀭𑀺𑀦𑀺𑀩𑁆𑀩𑀸𑀧𑁂𑀦𑁆𑀢𑀺, 𑀅𑀬𑀁 𑀯𑀼𑀘𑁆𑀘𑀢𑀺, 𑀩𑁆𑀭𑀸𑀳𑁆𑀫𑀡, 𑀤𑀓𑁆𑀔𑀺𑀡𑁂𑀬𑁆𑀬𑀕𑁆𑀕𑀺. 𑀢𑀲𑁆𑀫𑀸𑀬𑀁 𑀤𑀓𑁆𑀔𑀺𑀡𑁂𑀬𑁆𑀬𑀕𑁆𑀕𑀺 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀫𑀸𑀦𑁂𑀢𑁆𑀯𑀸 𑀧𑀽𑀚𑁂𑀢𑁆𑀯𑀸 𑀲𑀫𑁆𑀫𑀸 𑀲𑀼𑀔𑀁 𑀧𑀭𑀺𑀳𑀸𑀢𑀩𑁆𑀩𑁄. 𑀇𑀫𑁂 𑀔𑁄, 𑀩𑁆𑀭𑀸𑀳𑁆𑀫𑀡, 𑀢𑀬𑁄 𑀅𑀕𑁆𑀕𑀻 𑀲𑀓𑁆𑀓𑀢𑁆𑀯𑀸 𑀕𑀭𑀼𑀁 𑀓𑀢𑁆𑀯𑀸 𑀫𑀸𑀦𑁂𑀢𑁆𑀯𑀸 𑀧𑀽𑀚𑁂𑀢𑁆𑀯𑀸 𑀲𑀫𑁆𑀫𑀸 𑀲𑀼𑀔𑀁 𑀧𑀭𑀺𑀳𑀸𑀢𑀩𑁆𑀩𑀸.

‘‘𑀅𑀬𑀁 𑀔𑁄 𑀧𑀦, 𑀩𑁆𑀭𑀸𑀳𑁆𑀫𑀡, 𑀓𑀝𑁆𑀞𑀕𑁆𑀕𑀺 𑀓𑀸𑀮𑁂𑀦 𑀓𑀸𑀮𑀁 𑀉𑀚𑁆𑀚𑀮𑁂𑀢𑀩𑁆𑀩𑁄, 𑀓𑀸𑀮𑁂𑀦 𑀓𑀸𑀮𑀁 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀩𑁆𑀩𑁄, 𑀓𑀸𑀮𑁂𑀦 𑀓𑀸𑀮𑀁 𑀦𑀺𑀩𑁆𑀩𑀸𑀧𑁂𑀢𑀩𑁆𑀩𑁄, 𑀓𑀸𑀮𑁂𑀦 𑀓𑀸𑀮𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑁄’’𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀉𑀕𑁆𑀕𑀢𑀲𑀭𑀻𑀭𑁄 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫; 𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫…𑀧𑁂… 𑀉𑀧𑀸𑀲𑀓𑀁 𑀫𑀁 𑀪𑀯𑀁 𑀕𑁄𑀢𑀫𑁄 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢𑀦𑁆𑀢𑀺. 𑀏𑀲𑀸𑀳𑀁, 𑀪𑁄 𑀕𑁄𑀢𑀫, 𑀧𑀜𑁆𑀘 𑀉𑀲𑀪𑀲𑀢𑀸𑀦𑀺 𑀫𑀼𑀜𑁆𑀘𑀸𑀫𑀺 𑀚𑀻𑀯𑀺𑀢𑀁 𑀤𑁂𑀫𑀺, 𑀧𑀜𑁆𑀘 𑀯𑀘𑁆𑀙𑀢𑀭𑀲𑀢𑀸𑀦𑀺 𑀫𑀼𑀜𑁆𑀘𑀸𑀫𑀺 𑀚𑀻𑀯𑀺𑀢𑀁 𑀤𑁂𑀫𑀺, 𑀧𑀜𑁆𑀘 𑀯𑀘𑁆𑀙𑀢𑀭𑀺𑀲𑀢𑀸𑀦𑀺 𑀫𑀼𑀜𑁆𑀘𑀸𑀫𑀺 𑀚𑀻𑀯𑀺𑀢𑀁 𑀤𑁂𑀫𑀺, 𑀧𑀜𑁆𑀘 𑀅𑀚𑀲𑀢𑀸𑀦𑀺 𑀫𑀼𑀜𑁆𑀘𑀸𑀫𑀺 𑀚𑀻𑀯𑀺𑀢𑀁 𑀤𑁂𑀫𑀺, 𑀧𑀜𑁆𑀘 𑀉𑀭𑀩𑁆𑀪𑀲𑀢𑀸𑀦𑀺 𑀫𑀼𑀜𑁆𑀘𑀸𑀫𑀺 𑀚𑀻𑀯𑀺𑀢𑀁 𑀤𑁂𑀫𑀺. 𑀳𑀭𑀺𑀢𑀸𑀦𑀺 𑀘𑁂𑀯 𑀢𑀺𑀡𑀸𑀦𑀺 𑀔𑀸𑀤𑀦𑁆𑀢𑀼, 𑀲𑀻𑀢𑀸𑀦𑀺 𑀘 𑀧𑀸𑀦𑀻𑀬𑀸𑀦𑀺 𑀧𑀺𑀯𑀦𑁆𑀢𑀼, 𑀲𑀻𑀢𑁄 𑀘 𑀦𑁂𑀲𑀁 𑀯𑀸𑀢𑁄 𑀉𑀧𑀯𑀸𑀬𑀢’’𑀦𑁆𑀢𑀺 [𑀉𑀧𑀯𑀸𑀬𑀢𑀽𑀢𑀺 (𑀓.)]. 𑀘𑀢𑀼𑀢𑁆𑀣𑀁.

𑁫. 𑀧𑀞𑀫𑀲𑀜𑁆𑀜𑀸𑀲𑀼𑀢𑁆𑀢𑀁

𑁪𑁮. ‘‘𑀲𑀢𑁆𑀢𑀺𑀫𑀸, 𑀪𑀺𑀓𑁆𑀔𑀯𑁂, 𑀲𑀜𑁆𑀜𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀫𑀳𑀧𑁆𑀨𑀮𑀸 𑀳𑁄𑀦𑁆𑀢𑀺 𑀫𑀳𑀸𑀦𑀺𑀲𑀁𑀲𑀸 𑀅𑀫𑀢𑁄𑀕𑀥𑀸 𑀅𑀫𑀢𑀧𑀭𑀺𑀬𑁄𑀲𑀸𑀦𑀸.

‘‘𑀓𑀢𑀫𑀸 𑀲𑀢𑁆𑀢? 𑀅𑀲𑀼𑀪𑀲𑀜𑁆𑀜𑀸, 𑀫𑀭𑀡𑀲𑀜𑁆𑀜𑀸, 𑀆𑀳𑀸𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀸, 𑀲𑀩𑁆𑀩𑀮𑁄𑀓𑁂 𑀅𑀦𑀪𑀺𑀭𑀢𑀲𑀜𑁆𑀜𑀸, 𑀅𑀦𑀺𑀘𑁆𑀘𑀲𑀜𑁆𑀜𑀸, 𑀅𑀦𑀺𑀘𑁆𑀘𑁂 𑀤𑀼𑀓𑁆𑀔𑀲𑀜𑁆𑀜𑀸, 𑀤𑀼𑀓𑁆𑀔𑁂 𑀅𑀦𑀢𑁆𑀢𑀲𑀜𑁆𑀜𑀸. 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀲𑀜𑁆𑀜𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀫𑀳𑀧𑁆𑀨𑀮𑀸 𑀳𑁄𑀦𑁆𑀢𑀺 𑀫𑀳𑀸𑀦𑀺𑀲𑀁𑀲𑀸 𑀅𑀫𑀢𑁄𑀕𑀥𑀸 𑀅𑀫𑀢𑀧𑀭𑀺𑀬𑁄𑀲𑀸𑀦𑀸’’𑀢𑀺. 𑀧𑀜𑁆𑀘𑀫𑀁.

𑁬. 𑀤𑀼𑀢𑀺𑀬𑀲𑀜𑁆𑀜𑀸𑀲𑀼𑀢𑁆𑀢𑀁

𑁪𑁯. ‘‘𑀲𑀢𑁆𑀢𑀺𑀫𑀸, 𑀪𑀺𑀓𑁆𑀔𑀯𑁂, 𑀲𑀜𑁆𑀜𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀫𑀳𑀧𑁆𑀨𑀮𑀸 𑀳𑁄𑀦𑁆𑀢𑀺 𑀫𑀳𑀸𑀦𑀺𑀲𑀁𑀲𑀸 𑀅𑀫𑀢𑁄𑀕𑀥𑀸 𑀅𑀫𑀢𑀧𑀭𑀺𑀬𑁄𑀲𑀸𑀦𑀸. 𑀓𑀢𑀫𑀸 𑀲𑀢𑁆𑀢? 𑀅𑀲𑀼𑀪𑀲𑀜𑁆𑀜𑀸, 𑀫𑀭𑀡𑀲𑀜𑁆𑀜𑀸, 𑀆𑀳𑀸𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀸, 𑀲𑀩𑁆𑀩𑀮𑁄𑀓𑁂 𑀅𑀦𑀪𑀺𑀭𑀢𑀲𑀜𑁆𑀜𑀸, 𑀅𑀦𑀺𑀘𑁆𑀘𑀲𑀜𑁆𑀜𑀸, 𑀅𑀦𑀺𑀘𑁆𑀘𑁂 𑀤𑀼𑀓𑁆𑀔𑀲𑀜𑁆𑀜𑀸, 𑀤𑀼𑀓𑁆𑀔𑁂 𑀅𑀦𑀢𑁆𑀢𑀲𑀜𑁆𑀜𑀸. 𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀲𑀜𑁆𑀜𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀫𑀳𑀧𑁆𑀨𑀮𑀸 𑀳𑁄𑀦𑁆𑀢𑀺 𑀫𑀳𑀸𑀦𑀺𑀲𑀁𑀲𑀸 𑀅𑀫𑀢𑁄𑀕𑀥𑀸 𑀅𑀫𑀢𑀧𑀭𑀺𑀬𑁄𑀲𑀸𑀦𑀸𑀢𑀺.

‘‘‘𑀅𑀲𑀼𑀪𑀲𑀜𑁆𑀜𑀸, 𑀪𑀺𑀓𑁆𑀔𑀯𑁂, 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀫𑀳𑀧𑁆𑀨𑀮𑀸 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀸 𑀅𑀫𑀢𑁄𑀕𑀥𑀸 𑀅𑀫𑀢𑀧𑀭𑀺𑀬𑁄𑀲𑀸𑀦𑀸’𑀢𑀺. 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀅𑀲𑀼𑀪𑀲𑀜𑁆𑀜𑀸𑀧𑀭𑀺𑀘𑀺𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀘𑁂𑀢𑀲𑀸 𑀩𑀳𑀼𑀮𑀁 𑀯𑀺𑀳𑀭𑀢𑁄 𑀫𑁂𑀣𑀼𑀦𑀥𑀫𑁆𑀫𑀲𑀫𑀸𑀧𑀢𑁆𑀢𑀺𑀬𑀸 𑀘𑀺𑀢𑁆𑀢𑀁 𑀧𑀢𑀺𑀮𑀻𑀬𑀢𑀺 𑀧𑀢𑀺𑀓𑀼𑀝𑀢𑀺 𑀧𑀢𑀺𑀯𑀢𑁆𑀢𑀢𑀺, 𑀦 𑀲𑀫𑁆𑀧𑀲𑀸𑀭𑀺𑀬𑀢𑀺 𑀉𑀧𑁂𑀓𑁆𑀔𑀸 𑀯𑀸 𑀧𑀸𑀝𑀺𑀓𑀼𑀮𑁆𑀬𑀢𑀸 𑀯𑀸 𑀲𑀡𑁆𑀞𑀸𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀓𑀼𑀓𑁆𑀓𑀼𑀝𑀧𑀢𑁆𑀢𑀁 𑀯𑀸 𑀦𑁆𑀳𑀸𑀭𑀼𑀤𑀤𑁆𑀤𑀼𑀮𑀁 𑀯𑀸 𑀅𑀕𑁆𑀕𑀺𑀫𑁆𑀳𑀺 𑀧𑀓𑁆𑀔𑀺𑀢𑁆𑀢𑀁 𑀧𑀢𑀺𑀮𑀻𑀬𑀢𑀺 𑀧𑀢𑀺𑀓𑀼𑀝𑀢𑀺 𑀧𑀢𑀺𑀯𑀢𑁆𑀢𑀢𑀺, 𑀦 𑀲𑀫𑁆𑀧𑀲𑀸𑀭𑀺𑀬𑀢𑀺. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀲𑀼𑀪𑀲𑀜𑁆𑀜𑀸𑀧𑀭𑀺𑀘𑀺𑀢𑁂𑀦 𑀘𑁂𑀢𑀲𑀸 𑀩𑀳𑀼𑀮𑀁 𑀯𑀺𑀳𑀭𑀢𑁄 𑀫𑁂𑀣𑀼𑀦𑀥𑀫𑁆𑀫𑀲𑀫𑀸𑀧𑀢𑁆𑀢𑀺𑀬𑀸 𑀘𑀺𑀢𑁆𑀢𑀁 𑀧𑀢𑀺𑀮𑀻𑀬𑀢𑀺 𑀧𑀢𑀺𑀓𑀼𑀝𑀢𑀺 𑀧𑀢𑀺𑀯𑀢𑁆𑀢𑀢𑀺, 𑀦 𑀲𑀫𑁆𑀧𑀲𑀸𑀭𑀺𑀬𑀢𑀺 𑀉𑀧𑁂𑀓𑁆𑀔𑀸 𑀯𑀸 𑀧𑀸𑀝𑀺𑀓𑀼𑀮𑁆𑀬𑀢𑀸 𑀯𑀸 𑀲𑀡𑁆𑀞𑀸𑀢𑀺.

‘‘𑀲𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀲𑀼𑀪𑀲𑀜𑁆𑀜𑀸𑀧𑀭𑀺𑀘𑀺𑀢𑁂𑀦 𑀘𑁂𑀢𑀲𑀸 𑀩𑀳𑀼𑀮𑀁 𑀯𑀺𑀳𑀭𑀢𑁄 𑀫𑁂𑀣𑀼𑀦𑀥𑀫𑁆𑀫𑀲𑀫𑀸𑀧𑀢𑁆𑀢𑀺𑀬𑀸 𑀘𑀺𑀢𑁆𑀢𑀁 𑀅𑀦𑀼𑀲𑀦𑁆𑀤𑀳𑀢𑀺 [𑀅𑀦𑀼𑀲𑀡𑁆𑀞𑀸𑀢𑀺 (𑀲𑀻.)] 𑀅𑀧𑁆𑀧𑀝𑀺𑀓𑀼𑀮𑁆𑀬𑀢𑀸 𑀲𑀡𑁆𑀞𑀸𑀢𑀺; 𑀯𑁂𑀤𑀺𑀢𑀩𑁆𑀩𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 ‘𑀅𑀪𑀸𑀯𑀺𑀢𑀸 𑀫𑁂 𑀅𑀲𑀼𑀪𑀲𑀜𑁆𑀜𑀸, 𑀦𑀢𑁆𑀣𑀺 𑀫𑁂 𑀧𑀼𑀩𑁆𑀩𑁂𑀦𑀸𑀧𑀭𑀁 𑀯𑀺𑀲𑁂𑀲𑁄, 𑀅𑀧𑁆𑀧𑀢𑁆𑀢𑀁 𑀫𑁂 𑀪𑀸𑀯𑀦𑀸𑀩𑀮’𑀦𑁆𑀢𑀺. 𑀇𑀢𑀺𑀳 𑀢𑀢𑁆𑀣 𑀲𑀫𑁆𑀧𑀚𑀸𑀦𑁄 𑀳𑁄𑀢𑀺. 𑀲𑀘𑁂 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀲𑀼𑀪𑀲𑀜𑁆𑀜𑀸𑀧𑀭𑀺𑀘𑀺𑀢𑁂𑀦 𑀘𑁂𑀢𑀲𑀸 𑀩𑀳𑀼𑀮𑀁 𑀯𑀺𑀳𑀭𑀢𑁄 𑀫𑁂𑀣𑀼𑀦𑀥𑀫𑁆𑀫𑀲𑀫𑀸𑀧𑀢𑁆𑀢𑀺𑀬𑀸 𑀘𑀺𑀢𑁆𑀢𑀁 𑀧𑀢𑀺𑀮𑀻𑀬𑀢𑀺 𑀧𑀢𑀺𑀓𑀼𑀝𑀢𑀺 𑀧𑀢𑀺𑀯𑀢𑁆𑀢𑀢𑀺, 𑀦 𑀲𑀫𑁆𑀧𑀲𑀸𑀭𑀺𑀬𑀢𑀺 𑀉𑀧𑁂𑀓𑁆𑀔𑀸 𑀯𑀸 𑀧𑀸𑀝𑀺𑀓𑀼𑀮𑁆𑀬𑀢𑀸 𑀯𑀸 𑀲𑀡𑁆𑀞𑀸𑀢𑀺; 𑀯𑁂𑀤𑀺𑀢𑀩𑁆𑀩𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 ‘𑀲𑀼𑀪𑀸𑀯𑀺𑀢𑀸 𑀫𑁂 𑀅𑀲𑀼𑀪𑀲𑀜𑁆𑀜𑀸, 𑀅𑀢𑁆𑀣𑀺 𑀫𑁂 𑀧𑀼𑀩𑁆𑀩𑁂𑀦𑀸𑀧𑀭𑀁 𑀯𑀺𑀲𑁂𑀲𑁄, 𑀧𑀢𑁆𑀢𑀁 𑀫𑁂 𑀪𑀸𑀯𑀦𑀸𑀩𑀮’𑀦𑁆𑀢𑀺. 𑀇𑀢𑀺𑀳 𑀢𑀢𑁆𑀣 𑀲𑀫𑁆𑀧𑀚𑀸𑀦𑁄 𑀳𑁄𑀢𑀺. ‘𑀅𑀲𑀼𑀪𑀲𑀜𑁆𑀜𑀸, 𑀪𑀺𑀓𑁆𑀔𑀯𑁂, 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀫𑀳𑀧𑁆𑀨𑀮𑀸 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀸 𑀅𑀫𑀢𑁄𑀕𑀥𑀸 𑀅𑀫𑀢𑀧𑀭𑀺𑀬𑁄𑀲𑀸𑀦𑀸’𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘‘𑀫𑀭𑀡𑀲𑀜𑁆𑀜𑀸, 𑀪𑀺𑀓𑁆𑀔𑀯𑁂, 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀫𑀳𑀧𑁆𑀨𑀮𑀸 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀸 𑀅𑀫𑀢𑁄𑀕𑀥𑀸 𑀅𑀫𑀢𑀧𑀭𑀺𑀬𑁄𑀲𑀸𑀦𑀸’𑀢𑀺, 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀫𑀭𑀡𑀲𑀜𑁆𑀜𑀸𑀧𑀭𑀺𑀘𑀺𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀘𑁂𑀢𑀲𑀸 𑀩𑀳𑀼𑀮𑀁 𑀯𑀺𑀳𑀭𑀢𑁄 𑀚𑀻𑀯𑀺𑀢𑀦𑀺𑀓𑀦𑁆𑀢𑀺𑀬𑀸 𑀘𑀺𑀢𑁆𑀢𑀁 𑀧𑀢𑀺𑀮𑀻𑀬𑀢𑀺 𑀧𑀢𑀺𑀓𑀼𑀝𑀢𑀺 𑀧𑀢𑀺𑀯𑀢𑁆𑀢𑀢𑀺, 𑀦 𑀲𑀫𑁆𑀧𑀲𑀸𑀭𑀺𑀬𑀢𑀺 𑀉𑀧𑁂𑀓𑁆𑀔𑀸 𑀯𑀸 𑀧𑀸𑀝𑀺𑀓𑀼𑀮𑁆𑀬𑀢𑀸 𑀯𑀸 𑀲𑀡𑁆𑀞𑀸𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀓𑀼𑀓𑁆𑀓𑀼𑀝𑀧𑀢𑁆𑀢𑀁 𑀯𑀸 𑀦𑁆𑀳𑀸𑀭𑀼𑀤𑀤𑁆𑀤𑀼𑀮𑀁 𑀯𑀸 𑀅𑀕𑁆𑀕𑀺𑀫𑁆𑀳𑀺 𑀧𑀓𑁆𑀔𑀺𑀢𑁆𑀢𑀁 𑀧𑀢𑀺𑀮𑀻𑀬𑀢𑀺 𑀧𑀢𑀺𑀓𑀼𑀝𑀢𑀺 𑀧𑀢𑀺𑀯𑀢𑁆𑀢𑀢𑀺, 𑀦 𑀲𑀫𑁆𑀧𑀲𑀸𑀭𑀺𑀬𑀢𑀺. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀫𑀭𑀡𑀲𑀜𑁆𑀜𑀸𑀧𑀭𑀺𑀘𑀺𑀢𑁂𑀦 𑀘𑁂𑀢𑀲𑀸 𑀩𑀳𑀼𑀮𑀁 𑀯𑀺𑀳𑀭𑀢𑁄 𑀚𑀻𑀯𑀺𑀢𑀦𑀺𑀓𑀦𑁆𑀢𑀺𑀬𑀸 𑀘𑀺𑀢𑁆𑀢𑀁 𑀧𑀢𑀺𑀮𑀻𑀬𑀢𑀺 𑀧𑀢𑀺𑀓𑀼𑀝𑀢𑀺 𑀧𑀢𑀺𑀯𑀢𑁆𑀢𑀢𑀺, 𑀦 𑀲𑀫𑁆𑀧𑀲𑀸𑀭𑀺𑀬𑀢𑀺 𑀉𑀧𑁂𑀓𑁆𑀔𑀸 𑀯𑀸 𑀧𑀸𑀝𑀺𑀓𑀼𑀮𑁆𑀬𑀢𑀸 𑀯𑀸 𑀲𑀡𑁆𑀞𑀸𑀢𑀺.

‘‘𑀲𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀫𑀭𑀡𑀲𑀜𑁆𑀜𑀸𑀧𑀭𑀺𑀘𑀺𑀢𑁂𑀦 𑀘𑁂𑀢𑀲𑀸 𑀩𑀳𑀼𑀮𑀁 𑀯𑀺𑀳𑀭𑀢𑁄 𑀚𑀻𑀯𑀺𑀢𑀦𑀺𑀓𑀦𑁆𑀢𑀺𑀬𑀸 𑀘𑀺𑀢𑁆𑀢𑀁 𑀅𑀦𑀼𑀲𑀦𑁆𑀤𑀳𑀢𑀺 𑀅𑀧𑁆𑀧𑀝𑀺𑀓𑀼𑀮𑁆𑀬𑀢𑀸 𑀲𑀡𑁆𑀞𑀸𑀢𑀺; 𑀯𑁂𑀤𑀺𑀢𑀩𑁆𑀩𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 ‘𑀅𑀪𑀸𑀯𑀺𑀢𑀸 𑀫𑁂 𑀫𑀭𑀡𑀲𑀜𑁆𑀜𑀸, 𑀦𑀢𑁆𑀣𑀺 𑀫𑁂 𑀧𑀼𑀩𑁆𑀩𑁂𑀦𑀸𑀧𑀭𑀁 𑀯𑀺𑀲𑁂𑀲𑁄, 𑀅𑀧𑁆𑀧𑀢𑁆𑀢𑀁 𑀫𑁂 𑀪𑀸𑀯𑀦𑀸𑀩𑀮’𑀦𑁆𑀢𑀺. 𑀇𑀢𑀺𑀳 𑀢𑀢𑁆𑀣 𑀲𑀫𑁆𑀧𑀚𑀸𑀦𑁄 𑀳𑁄𑀢𑀺. 𑀲𑀘𑁂 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀫𑀭𑀡𑀲𑀜𑁆𑀜𑀸𑀧𑀭𑀺𑀘𑀺𑀢𑁂𑀦 𑀘𑁂𑀢𑀲𑀸 𑀩𑀳𑀼𑀮𑀁 𑀯𑀺𑀳𑀭𑀢𑁄 𑀚𑀻𑀯𑀺𑀢𑀦𑀺𑀓𑀦𑁆𑀢𑀺𑀬𑀸 𑀘𑀺𑀢𑁆𑀢𑀁 𑀧𑀢𑀺𑀮𑀻𑀬𑀢𑀺 𑀧𑀢𑀺𑀓𑀼𑀝𑀢𑀺 𑀧𑀢𑀺𑀯𑀢𑁆𑀢𑀢𑀺, 𑀦 𑀲𑀫𑁆𑀧𑀲𑀸𑀭𑀺𑀬𑀢𑀺 𑀉𑀧𑁂𑀓𑁆𑀔𑀸 𑀯𑀸 𑀧𑀸𑀝𑀺𑀓𑀼𑀮𑁆𑀬𑀢𑀸 𑀯𑀸 𑀲𑀡𑁆𑀞𑀸𑀢𑀺; 𑀯𑁂𑀤𑀺𑀢𑀩𑁆𑀩𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 ‘𑀲𑀼𑀪𑀸𑀯𑀺𑀢𑀸 𑀫𑁂 𑀫𑀭𑀡𑀲𑀜𑁆𑀜𑀸, 𑀅𑀢𑁆𑀣𑀺 𑀫𑁂 𑀧𑀼𑀩𑁆𑀩𑁂𑀦𑀸𑀧𑀭𑀁 𑀯𑀺𑀲𑁂𑀲𑁄, 𑀧𑀢𑁆𑀢𑀁 𑀫𑁂 𑀪𑀸𑀯𑀦𑀸𑀩𑀮’𑀦𑁆𑀢𑀺. 𑀇𑀢𑀺𑀳 𑀢𑀢𑁆𑀣 𑀲𑀫𑁆𑀧𑀚𑀸𑀦𑁄 𑀳𑁄𑀢𑀺. ‘𑀫𑀭𑀡𑀲𑀜𑁆𑀜𑀸, 𑀪𑀺𑀓𑁆𑀔𑀯𑁂, 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀫𑀳𑀧𑁆𑀨𑀮𑀸 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀸 𑀅𑀫𑀢𑁄𑀕𑀥𑀸 𑀅𑀫𑀢𑀧𑀭𑀺𑀬𑁄𑀲𑀸𑀦𑀸’𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘‘𑀆𑀳𑀸𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀸, 𑀪𑀺𑀓𑁆𑀔𑀯𑁂, 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀫𑀳𑀧𑁆𑀨𑀮𑀸 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀸 𑀅𑀫𑀢𑁄𑀕𑀥𑀸 𑀅𑀫𑀢𑀧𑀭𑀺𑀬𑁄𑀲𑀸𑀦𑀸’𑀢𑀺, 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁, 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀆𑀳𑀸𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀸𑀧𑀭𑀺𑀘𑀺𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀘𑁂𑀢𑀲𑀸 𑀩𑀳𑀼𑀮𑀁 𑀯𑀺𑀳𑀭𑀢𑁄 𑀭𑀲𑀢𑀡𑁆𑀳𑀸𑀬 𑀘𑀺𑀢𑁆𑀢𑀁 𑀧𑀢𑀺𑀮𑀻𑀬𑀢𑀺 …𑀧𑁂… 𑀉𑀧𑁂𑀓𑁆𑀔𑀸 𑀯𑀸 𑀧𑀸𑀝𑀺𑀓𑀼𑀮𑁆𑀬𑀢𑀸 𑀯𑀸 𑀲𑀡𑁆𑀞𑀸𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀓𑀼𑀓𑁆𑀓𑀼𑀝𑀧𑀢𑁆𑀢𑀁 𑀯𑀸 𑀦𑁆𑀳𑀸𑀭𑀼𑀤𑀤𑁆𑀤𑀼𑀮𑀁 𑀯𑀸 𑀅𑀕𑁆𑀕𑀺𑀫𑁆𑀳𑀺 𑀧𑀓𑁆𑀔𑀺𑀢𑁆𑀢𑀁 𑀧𑀢𑀺𑀮𑀻𑀬𑀢𑀺 𑀧𑀢𑀺𑀓𑀼𑀝𑀢𑀺 𑀧𑀢𑀺𑀯𑀢𑁆𑀢𑀢𑀺, 𑀦 𑀲𑀫𑁆𑀧𑀲𑀸𑀭𑀺𑀬𑀢𑀺. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀆𑀳𑀸𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀸𑀧𑀭𑀺𑀘𑀺𑀢𑁂𑀦 𑀘𑁂𑀢𑀲𑀸 𑀩𑀳𑀼𑀮𑀁 𑀯𑀺𑀳𑀭𑀢𑁄 𑀭𑀲𑀢𑀡𑁆𑀳𑀸𑀬 𑀘𑀺𑀢𑁆𑀢𑀁 𑀧𑀢𑀺𑀮𑀻𑀬𑀢𑀺…𑀧𑁂… 𑀉𑀧𑁂𑀓𑁆𑀔𑀸 𑀯𑀸 𑀧𑀸𑀝𑀺𑀓𑀼𑀮𑁆𑀬𑀢𑀸 𑀯𑀸 𑀲𑀡𑁆𑀞𑀸𑀢𑀺.

‘‘𑀲𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀆𑀳𑀸𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀸𑀧𑀭𑀺𑀘𑀺𑀢𑁂𑀦 𑀘𑁂𑀢𑀲𑀸 𑀩𑀳𑀼𑀮𑀁 𑀯𑀺𑀳𑀭𑀢𑁄 𑀭𑀲𑀢𑀡𑁆𑀳𑀸𑀬 𑀘𑀺𑀢𑁆𑀢𑀁 𑀅𑀦𑀼𑀲𑀦𑁆𑀤𑀳𑀢𑀺 𑀅𑀧𑁆𑀧𑀝𑀺𑀓𑀼𑀮𑁆𑀬𑀢𑀸 𑀲𑀡𑁆𑀞𑀸𑀢𑀺; 𑀯𑁂𑀤𑀺𑀢𑀩𑁆𑀩𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 ‘𑀅𑀪𑀸𑀯𑀺𑀢𑀸 𑀫𑁂 𑀆𑀳𑀸𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀸, 𑀦𑀢𑁆𑀣𑀺 𑀫𑁂 𑀧𑀼𑀩𑁆𑀩𑁂𑀦𑀸𑀧𑀭𑀁 𑀯𑀺𑀲𑁂𑀲𑁄, 𑀅𑀧𑁆𑀧𑀢𑁆𑀢𑀁 𑀫𑁂 𑀪𑀸𑀯𑀦𑀸𑀩𑀮’𑀦𑁆𑀢𑀺. 𑀇𑀢𑀺𑀳 𑀢𑀢𑁆𑀣 𑀲𑀫𑁆𑀧𑀚𑀸𑀦𑁄 𑀳𑁄𑀢𑀺. 𑀲𑀘𑁂 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀆𑀳𑀸𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀸𑀧𑀭𑀺𑀘𑀺𑀢𑁂𑀦 𑀘𑁂𑀢𑀲𑀸 𑀩𑀳𑀼𑀮𑀁 𑀯𑀺𑀳𑀭𑀢𑁄 𑀭𑀲𑀢𑀡𑁆𑀳𑀸𑀬 𑀘𑀺𑀢𑁆𑀢𑀁 𑀧𑀢𑀺𑀮𑀻𑀬𑀢𑀺…𑀧𑁂… 𑀉𑀧𑁂𑀓𑁆𑀔𑀸 𑀯𑀸 𑀧𑀸𑀝𑀺𑀓𑀼𑀮𑁆𑀬𑀢𑀸 𑀯𑀸 𑀲𑀡𑁆𑀞𑀸𑀢𑀺; 𑀯𑁂𑀤𑀺𑀢𑀩𑁆𑀩𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 ‘𑀲𑀼𑀪𑀸𑀯𑀺𑀢𑀸 𑀫𑁂 𑀆𑀳𑀸𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀸, 𑀅𑀢𑁆𑀣𑀺 𑀫𑁂 𑀧𑀼𑀩𑁆𑀩𑁂𑀦𑀸𑀧𑀭𑀁 𑀯𑀺𑀲𑁂𑀲𑁄, 𑀧𑀢𑁆𑀢𑀁 𑀫𑁂 𑀪𑀸𑀯𑀦𑀸𑀩𑀮’𑀦𑁆𑀢𑀺. 𑀇𑀢𑀺𑀳 𑀢𑀢𑁆𑀣 𑀲𑀫𑁆𑀧𑀚𑀸𑀦𑁄 𑀳𑁄𑀢𑀺. ‘𑀆𑀳𑀸𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀸, 𑀪𑀺𑀓𑁆𑀔𑀯𑁂, 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀫𑀳𑀧𑁆𑀨𑀮𑀸 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀸 𑀅𑀫𑀢𑁄𑀕𑀥𑀸 𑀅𑀫𑀢𑀧𑀭𑀺𑀬𑁄𑀲𑀸𑀦𑀸’𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘‘𑀲𑀩𑁆𑀩𑀮𑁄𑀓𑁂 𑀅𑀦𑀪𑀺𑀭𑀢𑀲𑀜𑁆𑀜𑀸, 𑀪𑀺𑀓𑁆𑀔𑀯𑁂, 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀫𑀳𑀧𑁆𑀨𑀮𑀸 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀸 𑀅𑀫𑀢𑁄𑀕𑀥𑀸 𑀅𑀫𑀢𑀧𑀭𑀺𑀬𑁄𑀲𑀸𑀦𑀸’𑀢𑀺, 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀲𑀩𑁆𑀩𑀮𑁄𑀓𑁂 𑀅𑀦𑀪𑀺𑀭𑀢𑀲𑀜𑁆𑀜𑀸𑀧𑀭𑀺𑀘𑀺𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀘𑁂𑀢𑀲𑀸 𑀩𑀳𑀼𑀮𑀁 𑀯𑀺𑀳𑀭𑀢𑁄 𑀮𑁄𑀓𑀘𑀺𑀢𑁆𑀭𑁂𑀲𑀼 𑀘𑀺𑀢𑁆𑀢𑀁 𑀧𑀢𑀺𑀮𑀻𑀬𑀢𑀺…𑀧𑁂… 𑀲𑁂𑀬𑁆𑀬𑀣𑀸𑀧𑀺 𑀪𑀺𑀓𑁆𑀔𑀯𑁂…𑀧𑁂… 𑀧𑀢𑀺𑀮𑀻𑀬𑀢𑀺 𑀧𑀢𑀺𑀓𑀼𑀝𑀢𑀺 𑀧𑀢𑀺𑀯𑀢𑁆𑀢𑀢𑀺, 𑀦 𑀲𑀫𑁆𑀧𑀲𑀸𑀭𑀺𑀬𑀢𑀺. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀲𑀩𑁆𑀩𑀮𑁄𑀓𑁂 𑀅𑀦𑀪𑀺𑀭𑀢𑀲𑀜𑁆𑀜𑀸𑀧𑀭𑀺𑀘𑀺𑀢𑁂𑀦 𑀘𑁂𑀢𑀲𑀸 𑀩𑀳𑀼𑀮𑀁 𑀯𑀺𑀳𑀭𑀢𑁄 𑀮𑁄𑀓𑀘𑀺𑀢𑁆𑀭𑁂𑀲𑀼 𑀘𑀺𑀢𑁆𑀢𑀁 𑀧𑀢𑀺𑀮𑀻𑀬𑀢𑀺 𑀧𑀢𑀺𑀓𑀼𑀝𑀢𑀺 𑀧𑀢𑀺𑀯𑀢𑁆𑀢𑀢𑀺, 𑀦 𑀲𑀫𑁆𑀧𑀲𑀸𑀭𑀺𑀬𑀢𑀺 𑀉𑀧𑁂𑀓𑁆𑀔𑀸 𑀯𑀸 𑀧𑀸𑀝𑀺𑀓𑀼𑀮𑁆𑀬𑀢𑀸 𑀯𑀸 𑀲𑀡𑁆𑀞𑀸𑀢𑀺.

‘‘𑀲𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀲𑀩𑁆𑀩𑀮𑁄𑀓𑁂 𑀅𑀦𑀪𑀺𑀭𑀢𑀲𑀜𑁆𑀜𑀸𑀧𑀭𑀺𑀘𑀺𑀢𑁂𑀦 𑀘𑁂𑀢𑀲𑀸 𑀩𑀳𑀼𑀮𑀁 𑀯𑀺𑀳𑀭𑀢𑁄 𑀮𑁄𑀓𑀘𑀺𑀢𑁆𑀭𑁂𑀲𑀼 𑀘𑀺𑀢𑁆𑀢𑀁 𑀅𑀦𑀼𑀲𑀦𑁆𑀤𑀳𑀢𑀺 𑀅𑀧𑁆𑀧𑀝𑀺𑀓𑀼𑀮𑁆𑀬𑀢𑀸 𑀲𑀡𑁆𑀞𑀸𑀢𑀺; 𑀯𑁂𑀤𑀺𑀢𑀩𑁆𑀩𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 ‘𑀅𑀪𑀸𑀯𑀺𑀢𑀸 𑀫𑁂 𑀲𑀩𑁆𑀩𑀮𑁄𑀓𑁂 𑀅𑀦𑀪𑀺𑀭𑀢𑀲𑀜𑁆𑀜𑀸, 𑀦𑀢𑁆𑀣𑀺 𑀫𑁂 𑀧𑀼𑀩𑁆𑀩𑁂𑀦𑀸𑀧𑀭𑀁 𑀯𑀺𑀲𑁂𑀲𑁄, 𑀅𑀧𑁆𑀧𑀢𑁆𑀢𑀁 𑀫𑁂 𑀪𑀸𑀯𑀦𑀸𑀩𑀮’𑀦𑁆𑀢𑀺. 𑀇𑀢𑀺𑀳 𑀢𑀢𑁆𑀣 𑀲𑀫𑁆𑀧𑀚𑀸𑀦𑁄 𑀳𑁄𑀢𑀺. 𑀲𑀘𑁂 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀲𑀩𑁆𑀩𑀮𑁄𑀓𑁂 𑀅𑀦𑀪𑀺𑀭𑀢𑀲𑀜𑁆𑀜𑀸𑀧𑀭𑀺𑀘𑀺𑀢𑁂𑀦 𑀘𑁂𑀢𑀲𑀸 𑀩𑀳𑀼𑀮𑀁 𑀯𑀺𑀳𑀭𑀢𑁄 𑀮𑁄𑀓𑀘𑀺𑀢𑁆𑀭𑁂𑀲𑀼 𑀘𑀺𑀢𑁆𑀢𑀁 𑀧𑀢𑀺𑀮𑀻𑀬𑀢𑀺…𑀧𑁂… 𑀉𑀧𑁂𑀓𑁆𑀔𑀸 𑀯𑀸 𑀧𑀸𑀝𑀺𑀓𑀼𑀮𑁆𑀬𑀢𑀸 𑀯𑀸 𑀲𑀡𑁆𑀞𑀸𑀢𑀺; 𑀯𑁂𑀤𑀺𑀢𑀩𑁆𑀩𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 ‘𑀲𑀼𑀪𑀸𑀯𑀺𑀢𑀸 𑀫𑁂 𑀲𑀩𑁆𑀩𑀮𑁄𑀓𑁂 𑀅𑀦𑀪𑀺𑀭𑀢𑀲𑀜𑁆𑀜𑀸, 𑀅𑀢𑁆𑀣𑀺 𑀫𑁂 𑀧𑀼𑀩𑁆𑀩𑁂𑀦𑀸𑀧𑀭𑀁 𑀯𑀺𑀲𑁂𑀲𑁄, 𑀧𑀢𑁆𑀢𑀁 𑀫𑁂 𑀪𑀸𑀯𑀦𑀸𑀩𑀮’𑀦𑁆𑀢𑀺. 𑀇𑀢𑀺𑀳 𑀢𑀢𑁆𑀣 𑀲𑀫𑁆𑀧𑀚𑀸𑀦𑁄 𑀳𑁄𑀢𑀺. ‘𑀲𑀩𑁆𑀩𑀮𑁄𑀓𑁂 𑀅𑀦𑀪𑀺𑀭𑀢𑀲𑀜𑁆𑀜𑀸, 𑀪𑀺𑀓𑁆𑀔𑀯𑁂, 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀫𑀳𑀧𑁆𑀨𑀮𑀸 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀸 𑀅𑀫𑀢𑁄𑀕𑀥𑀸 𑀅𑀫𑀢𑀧𑀭𑀺𑀬𑁄𑀲𑀸𑀦𑀸’𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘‘𑀅𑀦𑀺𑀘𑁆𑀘𑀲𑀜𑁆𑀜𑀸, 𑀪𑀺𑀓𑁆𑀔𑀯𑁂, 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀫𑀳𑀧𑁆𑀨𑀮𑀸 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀸 𑀅𑀫𑀢𑁄𑀕𑀥𑀸 𑀅𑀫𑀢𑀧𑀭𑀺𑀬𑁄𑀲𑀸𑀦𑀸’𑀢𑀺, 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀅𑀦𑀺𑀘𑁆𑀘𑀲𑀜𑁆𑀜𑀸𑀧𑀭𑀺𑀘𑀺𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀘𑁂𑀢𑀲𑀸 𑀩𑀳𑀼𑀮𑀁 𑀯𑀺𑀳𑀭𑀢𑁄 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁂 𑀘𑀺𑀢𑁆𑀢𑀁 𑀧𑀢𑀺𑀮𑀻𑀬𑀢𑀺…𑀧𑁂… 𑀉𑀧𑁂𑀓𑁆𑀔𑀸 𑀯𑀸 𑀧𑀸𑀝𑀺𑀓𑀼𑀮𑁆𑀬𑀢𑀸 𑀯𑀸 𑀲𑀡𑁆𑀞𑀸𑀢𑀺. 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀓𑀼𑀓𑁆𑀓𑀼𑀝𑀧𑀢𑁆𑀢𑀁 𑀯𑀸 𑀦𑁆𑀳𑀸𑀭𑀼𑀤𑀤𑁆𑀤𑀼𑀮𑀁 𑀯𑀸 𑀅𑀕𑁆𑀕𑀺𑀫𑁆𑀳𑀺 𑀧𑀓𑁆𑀔𑀺𑀢𑁆𑀢𑀁 𑀧𑀢𑀺𑀮𑀻𑀬𑀢𑀺 𑀧𑀢𑀺𑀓𑀼𑀝𑀢𑀺 𑀧𑀢𑀺𑀯𑀢𑁆𑀢𑀢𑀺 𑀦 𑀲𑀫𑁆𑀧𑀲𑀸𑀭𑀺𑀬𑀢𑀺. 𑀏𑀯𑀫𑁂𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀦𑀺𑀘𑁆𑀘𑀲𑀜𑁆𑀜𑀸𑀧𑀭𑀺𑀘𑀺𑀢𑁂𑀦 𑀘𑁂𑀢𑀲𑀸 𑀩𑀳𑀼𑀮𑀁 𑀯𑀺𑀳𑀭𑀢𑁄 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁂 𑀘𑀺𑀢𑁆𑀢𑀁 𑀧𑀢𑀺𑀮𑀻𑀬𑀢𑀺…𑀧𑁂… 𑀉𑀧𑁂𑀓𑁆𑀔𑀸 𑀯𑀸 𑀧𑀸𑀝𑀺𑀓𑀼𑀮𑁆𑀬𑀢𑀸 𑀯𑀸 𑀲𑀡𑁆𑀞𑀸𑀢𑀺.

‘‘𑀲𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀦𑀺𑀘𑁆𑀘𑀲𑀜𑁆𑀜𑀸𑀧𑀭𑀺𑀘𑀺𑀢𑁂𑀦 𑀘𑁂𑀢𑀲𑀸 𑀩𑀳𑀼𑀮𑀁 𑀯𑀺𑀳𑀭𑀢𑁄 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁂 𑀘𑀺𑀢𑁆𑀢𑀁 𑀅𑀦𑀼𑀲𑀦𑁆𑀤𑀳𑀢𑀺 𑀅𑀧𑁆𑀧𑀝𑀺𑀓𑀼𑀮𑁆𑀬𑀢𑀸 𑀲𑀡𑁆𑀞𑀸𑀢𑀺; 𑀯𑁂𑀤𑀺𑀢𑀩𑁆𑀩𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 ‘𑀅𑀪𑀸𑀯𑀺𑀢𑀸 𑀫𑁂 𑀅𑀦𑀺𑀘𑁆𑀘𑀲𑀜𑁆𑀜𑀸, 𑀦𑀢𑁆𑀣𑀺 𑀫𑁂 𑀧𑀼𑀩𑁆𑀩𑁂𑀦𑀸𑀧𑀭𑀁 𑀯𑀺𑀲𑁂𑀲𑁄, 𑀅𑀧𑁆𑀧𑀢𑁆𑀢𑀁 𑀫𑁂 𑀪𑀸𑀯𑀦𑀸𑀩𑀮’𑀦𑁆𑀢𑀺. 𑀇𑀢𑀺𑀳 𑀢𑀢𑁆𑀣 𑀲𑀫𑁆𑀧𑀚𑀸𑀦𑁄 𑀳𑁄𑀢𑀺. 𑀲𑀘𑁂 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀦𑀺𑀘𑁆𑀘𑀲𑀜𑁆𑀜𑀸𑀧𑀭𑀺𑀘𑀺𑀢𑁂𑀦 𑀘𑁂𑀢𑀲𑀸 𑀩𑀳𑀼𑀮𑀁 𑀯𑀺𑀳𑀭𑀢𑁄 𑀮𑀸𑀪𑀲𑀓𑁆𑀓𑀸𑀭𑀲𑀺𑀮𑁄𑀓𑁂 𑀘𑀺𑀢𑁆𑀢𑀁 𑀧𑀢𑀺𑀮𑀻𑀬𑀢𑀺 𑀧𑀢𑀺𑀓𑀼𑀝𑀢𑀺 𑀧𑀢𑀺𑀯𑀢𑁆𑀢𑀢𑀺, 𑀦 𑀲𑀫𑁆𑀧𑀲𑀸𑀭𑀺𑀬𑀢𑀺 𑀉𑀧𑁂𑀓𑁆𑀔𑀸 𑀯𑀸 𑀧𑀸𑀝𑀺𑀓𑀼𑀮𑁆𑀬𑀢𑀸 𑀯𑀸 𑀲𑀡𑁆𑀞𑀸𑀢𑀺; 𑀯𑁂𑀤𑀺𑀢𑀩𑁆𑀩𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 ‘𑀲𑀼𑀪𑀸𑀯𑀺𑀢𑀸 𑀫𑁂 𑀅𑀦𑀺𑀘𑁆𑀘𑀲𑀜𑁆𑀜𑀸, 𑀅𑀢𑁆𑀣𑀺 𑀫𑁂 𑀧𑀼𑀩𑁆𑀩𑁂𑀦𑀸𑀧𑀭𑀁 𑀯𑀺𑀲𑁂𑀲𑁄, 𑀧𑀢𑁆𑀢𑀁 𑀫𑁂 𑀪𑀸𑀯𑀦𑀸𑀩𑀮’𑀦𑁆𑀢𑀺. 𑀇𑀢𑀺𑀳 𑀢𑀢𑁆𑀣 𑀲𑀫𑁆𑀧𑀚𑀸𑀦𑁄 𑀳𑁄𑀢𑀺. ‘𑀅𑀦𑀺𑀘𑁆𑀘𑀲𑀜𑁆𑀜𑀸, 𑀪𑀺𑀓𑁆𑀔𑀯𑁂, 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀫𑀳𑀧𑁆𑀨𑀮𑀸 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀸 𑀅𑀫𑀢𑁄𑀕𑀥𑀸 𑀅𑀫𑀢𑀧𑀭𑀺𑀬𑁄𑀲𑀸𑀦𑀸’𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘‘𑀅𑀦𑀺𑀘𑁆𑀘𑁂 𑀤𑀼𑀓𑁆𑀔𑀲𑀜𑁆𑀜𑀸, 𑀪𑀺𑀓𑁆𑀔𑀯𑁂, 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀫𑀳𑀧𑁆𑀨𑀮𑀸 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀸 𑀅𑀫𑀢𑁄𑀕𑀥𑀸 𑀅𑀫𑀢𑀧𑀭𑀺𑀬𑁄𑀲𑀸𑀦𑀸’𑀢𑀺, 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀅𑀦𑀺𑀘𑁆𑀘𑁂 𑀤𑀼𑀓𑁆𑀔𑀲𑀜𑁆𑀜𑀸𑀧𑀭𑀺𑀘𑀺𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀘𑁂𑀢𑀲𑀸 𑀩𑀳𑀼𑀮𑀁 𑀯𑀺𑀳𑀭𑀢𑁄 𑀆𑀮𑀲𑁆𑀬𑁂 𑀓𑁄𑀲𑀚𑁆𑀚𑁂 𑀯𑀺𑀲𑁆𑀲𑀝𑁆𑀞𑀺𑀬𑁂 𑀧𑀫𑀸𑀤𑁂 𑀅𑀦𑀦𑀼𑀬𑁄𑀕𑁂 𑀅𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀢𑀺𑀩𑁆𑀩𑀸 𑀪𑀬𑀲𑀜𑁆𑀜𑀸 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀳𑁄𑀢𑀺, 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀉𑀓𑁆𑀔𑀺𑀢𑁆𑀢𑀸𑀲𑀺𑀓𑁂 𑀯𑀥𑀓𑁂.

‘‘𑀲𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀦𑀺𑀘𑁆𑀘𑁂 𑀤𑀼𑀓𑁆𑀔𑀲𑀜𑁆𑀜𑀸𑀧𑀭𑀺𑀘𑀺𑀢𑁂𑀦 𑀘𑁂𑀢𑀲𑀸 𑀩𑀳𑀼𑀮𑀁 𑀯𑀺𑀳𑀭𑀢𑁄 𑀆𑀮𑀲𑁆𑀬𑁂 𑀓𑁄𑀲𑀚𑁆𑀚𑁂 𑀯𑀺𑀲𑁆𑀲𑀝𑁆𑀞𑀺𑀬𑁂 𑀧𑀫𑀸𑀤𑁂 𑀅𑀦𑀦𑀼𑀬𑁄𑀕𑁂 𑀅𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀢𑀺𑀩𑁆𑀩𑀸 𑀪𑀬𑀲𑀜𑁆𑀜𑀸, 𑀦 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀳𑁄𑀢𑀺, 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀉𑀓𑁆𑀔𑀺𑀢𑁆𑀢𑀸𑀲𑀺𑀓𑁂 𑀯𑀥𑀓𑁂. 𑀯𑁂𑀤𑀺𑀢𑀩𑁆𑀩𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 ‘𑀅𑀪𑀸𑀯𑀺𑀢𑀸 𑀫𑁂 𑀅𑀦𑀺𑀘𑁆𑀘𑁂 𑀤𑀼𑀓𑁆𑀔𑀲𑀜𑁆𑀜𑀸, 𑀦𑀢𑁆𑀣𑀺 𑀫𑁂 𑀧𑀼𑀩𑁆𑀩𑁂𑀦𑀸𑀧𑀭𑀁 𑀯𑀺𑀲𑁂𑀲𑁄, 𑀅𑀧𑁆𑀧𑀢𑁆𑀢𑀁 𑀫𑁂 𑀪𑀸𑀯𑀦𑀸𑀩𑀮’𑀦𑁆𑀢𑀺. 𑀇𑀢𑀺𑀳 𑀢𑀢𑁆𑀣 𑀲𑀫𑁆𑀧𑀚𑀸𑀦𑁄 𑀳𑁄𑀢𑀺. 𑀲𑀘𑁂 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀦𑀺𑀘𑁆𑀘𑁂 𑀤𑀼𑀓𑁆𑀔𑀲𑀜𑁆𑀜𑀸𑀧𑀭𑀺𑀘𑀺𑀢𑁂𑀦 𑀘𑁂𑀢𑀲𑀸 𑀩𑀳𑀼𑀮𑀁 𑀯𑀺𑀳𑀭𑀢𑁄 𑀆𑀮𑀲𑁆𑀬𑁂 𑀓𑁄𑀲𑀚𑁆𑀚𑁂 𑀯𑀺𑀲𑁆𑀲𑀝𑁆𑀞𑀺𑀬𑁂 𑀧𑀫𑀸𑀤𑁂 𑀅𑀦𑀦𑀼𑀬𑁄𑀕𑁂 𑀅𑀧𑀘𑁆𑀘𑀯𑁂𑀓𑁆𑀔𑀡𑀸𑀬 𑀢𑀺𑀩𑁆𑀩𑀸 𑀪𑀬𑀲𑀜𑁆𑀜𑀸 𑀧𑀘𑁆𑀘𑀼𑀧𑀝𑁆𑀞𑀺𑀢𑀸 𑀳𑁄𑀢𑀺, 𑀲𑁂𑀬𑁆𑀬𑀣𑀸𑀧𑀺, 𑀪𑀺𑀓𑁆𑀔𑀯𑁂, 𑀉𑀓𑁆𑀔𑀺𑀢𑁆𑀢𑀸𑀲𑀺𑀓𑁂 𑀯𑀥𑀓𑁂. 𑀯𑁂𑀤𑀺𑀢𑀩𑁆𑀩𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 ‘𑀲𑀼𑀪𑀸𑀯𑀺𑀢𑀸 𑀫𑁂 𑀅𑀦𑀺𑀘𑁆𑀘𑁂 𑀤𑀼𑀓𑁆𑀔𑀲𑀜𑁆𑀜𑀸, 𑀅𑀢𑁆𑀣𑀺 𑀫𑁂 𑀧𑀼𑀩𑁆𑀩𑁂𑀦𑀸𑀧𑀭𑀁 𑀯𑀺𑀲𑁂𑀲𑁄, 𑀧𑀢𑁆𑀢𑀁 𑀫𑁂 𑀪𑀸𑀯𑀦𑀸𑀩𑀮’𑀦𑁆𑀢𑀺. 𑀇𑀢𑀺𑀳 𑀢𑀢𑁆𑀣 𑀲𑀫𑁆𑀧𑀚𑀸𑀦𑁄 𑀳𑁄𑀢𑀺. ‘𑀅𑀦𑀺𑀘𑁆𑀘𑁂 𑀤𑀼𑀓𑁆𑀔𑀲𑀜𑁆𑀜𑀸, 𑀪𑀺𑀓𑁆𑀔𑀯𑁂, 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀫𑀳𑀧𑁆𑀨𑀮𑀸 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀸 𑀅𑀫𑀢𑁄𑀕𑀥𑀸 𑀅𑀫𑀢𑀧𑀭𑀺𑀬𑁄𑀲𑀸𑀦𑀸’𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘‘𑀤𑀼𑀓𑁆𑀔𑁂 𑀅𑀦𑀢𑁆𑀢𑀲𑀜𑁆𑀜𑀸, 𑀪𑀺𑀓𑁆𑀔𑀯𑁂, 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀫𑀳𑀧𑁆𑀨𑀮𑀸 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀸 𑀅𑀫𑀢𑁄𑀕𑀥𑀸 𑀅𑀫𑀢𑀧𑀭𑀺𑀬𑁄𑀲𑀸𑀦𑀸’𑀢𑀺, 𑀇𑀢𑀺 𑀔𑁄 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀓𑀺𑀜𑁆𑀘𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁? 𑀤𑀼𑀓𑁆𑀔𑁂 𑀅𑀦𑀢𑁆𑀢𑀲𑀜𑁆𑀜𑀸𑀧𑀭𑀺𑀘𑀺𑀢𑁂𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀘𑁂𑀢𑀲𑀸 𑀩𑀳𑀼𑀮𑀁 𑀯𑀺𑀳𑀭𑀢𑁄 𑀇𑀫𑀲𑁆𑀫𑀺𑀜𑁆𑀘 𑀲𑀯𑀺𑀜𑁆𑀜𑀸𑀡𑀓𑁂 𑀓𑀸𑀬𑁂 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀲𑀼 𑀅𑀳𑀗𑁆𑀓𑀸𑀭𑀫𑀫𑀗𑁆𑀓𑀸𑀭𑀫𑀸𑀦𑀸𑀧𑀕𑀢𑀁 𑀫𑀸𑀦𑀲𑀁 𑀳𑁄𑀢𑀺 𑀯𑀺𑀥𑀸𑀲𑀫𑀢𑀺𑀓𑁆𑀓𑀦𑁆𑀢𑀁 𑀲𑀦𑁆𑀢𑀁 𑀲𑀼𑀯𑀺𑀫𑀼𑀢𑁆𑀢𑀁.

‘‘𑀲𑀘𑁂, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀤𑀼𑀓𑁆𑀔𑁂 𑀅𑀦𑀢𑁆𑀢𑀲𑀜𑁆𑀜𑀸𑀧𑀭𑀺𑀘𑀺𑀢𑁂𑀦 𑀘𑁂𑀢𑀲𑀸 𑀩𑀳𑀼𑀮𑀁 𑀯𑀺𑀳𑀭𑀢𑁄 𑀇𑀫𑀲𑁆𑀫𑀺𑀜𑁆𑀘 𑀲𑀯𑀺𑀜𑁆𑀜𑀸𑀡𑀓𑁂 𑀓𑀸𑀬𑁂 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀲𑀼 𑀦 𑀅𑀳𑀗𑁆𑀓𑀸𑀭𑀫𑀫𑀗𑁆𑀓𑀸𑀭𑀫𑀸𑀦𑀸𑀧𑀕𑀢𑀁 𑀫𑀸𑀦𑀲𑀁 𑀳𑁄𑀢𑀺 𑀯𑀺𑀥𑀸𑀲𑀫𑀢𑀺𑀓𑁆𑀓𑀦𑁆𑀢𑀁 𑀲𑀦𑁆𑀢𑀁 𑀲𑀼𑀯𑀺𑀫𑀼𑀢𑁆𑀢𑀁. 𑀯𑁂𑀤𑀺𑀢𑀩𑁆𑀩𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 ‘𑀅𑀪𑀸𑀯𑀺𑀢𑀸 𑀫𑁂 𑀤𑀼𑀓𑁆𑀔𑁂 𑀅𑀦𑀢𑁆𑀢𑀲𑀜𑁆𑀜𑀸, 𑀦𑀢𑁆𑀣𑀺 𑀫𑁂 𑀧𑀼𑀩𑁆𑀩𑁂𑀦𑀸𑀧𑀭𑀁 𑀯𑀺𑀲𑁂𑀲𑁄, 𑀅𑀧𑁆𑀧𑀢𑁆𑀢𑀁 𑀫𑁂 𑀪𑀸𑀯𑀦𑀸𑀩𑀮’𑀦𑁆𑀢𑀺. 𑀇𑀢𑀺𑀳 𑀢𑀢𑁆𑀣 𑀲𑀫𑁆𑀧𑀚𑀸𑀦𑁄 𑀳𑁄𑀢𑀺.

‘‘𑀲𑀘𑁂 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀤𑀼𑀓𑁆𑀔𑁂 𑀅𑀦𑀢𑁆𑀢𑀲𑀜𑁆𑀜𑀸𑀧𑀭𑀺𑀘𑀺𑀢𑁂𑀦 𑀘𑁂𑀢𑀲𑀸 𑀩𑀳𑀼𑀮𑀁 𑀯𑀺𑀳𑀭𑀢𑁄 𑀇𑀫𑀲𑁆𑀫𑀺𑀜𑁆𑀘 𑀲𑀯𑀺𑀜𑁆𑀜𑀸𑀡𑀓𑁂 𑀓𑀸𑀬𑁂 𑀩𑀳𑀺𑀤𑁆𑀥𑀸 𑀘 𑀲𑀩𑁆𑀩𑀦𑀺𑀫𑀺𑀢𑁆𑀢𑁂𑀲𑀼 𑀅𑀳𑀗𑁆𑀓𑀸𑀭𑀫𑀫𑀗𑁆𑀓𑀸𑀭𑀫𑀸𑀦𑀸𑀧𑀕𑀢𑀁 𑀫𑀸𑀦𑀲𑀁 𑀳𑁄𑀢𑀺 𑀯𑀺𑀥𑀸𑀲𑀫𑀢𑀺𑀓𑁆𑀓𑀦𑁆𑀢𑀁 𑀲𑀦𑁆𑀢𑀁 𑀲𑀼𑀯𑀺𑀫𑀼𑀢𑁆𑀢𑀁. 𑀯𑁂𑀤𑀺𑀢𑀩𑁆𑀩𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑀸 ‘𑀲𑀼𑀪𑀸𑀯𑀺𑀢𑀸 𑀫𑁂 𑀤𑀼𑀓𑁆𑀔𑁂 𑀅𑀦𑀢𑁆𑀢𑀲𑀜𑁆𑀜𑀸, 𑀅𑀢𑁆𑀣𑀺 𑀫𑁂 𑀧𑀼𑀩𑁆𑀩𑁂𑀦𑀸𑀧𑀭𑀁 𑀯𑀺𑀲𑁂𑀲𑁄, 𑀧𑀢𑁆𑀢𑀁 𑀫𑁂 𑀪𑀸𑀯𑀦𑀸𑀩𑀮’𑀦𑁆𑀢𑀺. 𑀇𑀢𑀺𑀳 𑀢𑀢𑁆𑀣 𑀲𑀫𑁆𑀧𑀚𑀸𑀦𑁄 𑀳𑁄𑀢𑀺. ‘𑀤𑀼𑀓𑁆𑀔𑁂 𑀅𑀦𑀢𑁆𑀢𑀲𑀜𑁆𑀜𑀸, 𑀪𑀺𑀓𑁆𑀔𑀯𑁂, 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀫𑀳𑀧𑁆𑀨𑀮𑀸 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲𑀸 𑀅𑀫𑀢𑁄𑀕𑀥𑀸 𑀅𑀫𑀢𑀧𑀭𑀺𑀬𑁄𑀲𑀸𑀦𑀸’𑀢𑀺, 𑀇𑀢𑀺 𑀬𑀁 𑀢𑀁 𑀯𑀼𑀢𑁆𑀢𑀁 𑀇𑀤𑀫𑁂𑀢𑀁 𑀧𑀝𑀺𑀘𑁆𑀘 𑀯𑀼𑀢𑁆𑀢𑀁.

‘‘𑀇𑀫𑀸 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀲𑀜𑁆𑀜𑀸 𑀪𑀸𑀯𑀺𑀢𑀸 𑀩𑀳𑀼𑀮𑀻𑀓𑀢𑀸 𑀫𑀳𑀧𑁆𑀨𑀮𑀸 𑀳𑁄𑀦𑁆𑀢𑀺 𑀫𑀳𑀸𑀦𑀺𑀲𑀁𑀲𑀸 𑀅𑀫𑀢𑁄𑀕𑀥𑀸 𑀅𑀫𑀢𑀧𑀭𑀺𑀬𑁄𑀲𑀸𑀦𑀸’’𑀢𑀺. 𑀙𑀝𑁆𑀞𑀁.

𑁭. 𑀫𑁂𑀣𑀼𑀦𑀲𑀼𑀢𑁆𑀢𑀁

𑁫𑁦. 𑀅𑀣 𑀔𑁄 𑀚𑀸𑀡𑀼𑀲𑁆𑀲𑁄𑀡𑀺 𑀩𑁆𑀭𑀸𑀳𑁆𑀫𑀡𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀚𑀸𑀡𑀼𑀲𑁆𑀲𑁄𑀡𑀺 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀪𑀯𑀫𑁆𑀧𑀺 𑀦𑁄 𑀕𑁄𑀢𑀫𑁄 𑀩𑁆𑀭𑀳𑁆𑀫𑀘𑀸𑀭𑀻 𑀧𑀝𑀺𑀚𑀸𑀦𑀸𑀢𑀻’’𑀢𑀺? ‘‘𑀬𑀜𑁆𑀳𑀺 𑀢𑀁, 𑀩𑁆𑀭𑀸𑀳𑁆𑀫𑀡, 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀅𑀔𑀡𑁆𑀟𑀁 𑀅𑀘𑁆𑀙𑀺𑀤𑁆𑀤𑀁 𑀅𑀲𑀩𑀮𑀁 𑀅𑀓𑀫𑁆𑀫𑀸𑀲𑀁 𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀻’𑀢𑀺, 𑀫𑀫𑁂𑀯 𑀢𑀁, 𑀩𑁆𑀭𑀸𑀳𑁆𑀫𑀡, 𑀲𑀫𑁆𑀫𑀸 𑀯𑀤𑀫𑀸𑀦𑁄 𑀯𑀤𑁂𑀬𑁆𑀬 𑁋 ‘𑀅𑀳𑀜𑁆𑀳𑀺, 𑀩𑁆𑀭𑀸𑀳𑁆𑀫𑀡, 𑀅𑀔𑀡𑁆𑀟𑀁 𑀅𑀘𑁆𑀙𑀺𑀤𑁆𑀤𑀁 𑀅𑀲𑀩𑀮𑀁 𑀅𑀓𑀫𑁆𑀫𑀸𑀲𑀁 𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀸𑀫𑀻’’’𑀢𑀺. ‘‘𑀓𑀺𑀁 𑀧𑀦, 𑀪𑁄 𑀕𑁄𑀢𑀫, 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀔𑀡𑁆𑀟𑀫𑁆𑀧𑀺 𑀙𑀺𑀤𑁆𑀤𑀫𑁆𑀧𑀺 𑀲𑀩𑀮𑀫𑁆𑀧𑀺 𑀓𑀫𑁆𑀫𑀸𑀲𑀫𑁆𑀧𑀻’’𑀢𑀺?

‘‘𑀇𑀥, 𑀩𑁆𑀭𑀸𑀳𑁆𑀫𑀡, 𑀏𑀓𑀘𑁆𑀘𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀲𑀫𑁆𑀫𑀸 𑀩𑁆𑀭𑀳𑁆𑀫𑀘𑀸𑀭𑀻 𑀧𑀝𑀺𑀚𑀸𑀦𑀫𑀸𑀦𑁄 𑀦 𑀳𑁂𑀯 𑀔𑁄 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀤𑁆𑀯𑀬𑀁𑀤𑁆𑀯𑀬𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀢𑀺; 𑀅𑀧𑀺 𑀘 𑀔𑁄 𑀫𑀸𑀢𑀼𑀕𑀸𑀫𑀲𑁆𑀲 𑀉𑀘𑁆𑀙𑀸𑀤𑀦𑀧𑀭𑀺𑀫𑀤𑁆𑀤𑀦𑀦𑁆𑀳𑀸𑀧𑀦𑀲𑀫𑁆𑀩𑀸𑀳𑀦𑀁 𑀲𑀸𑀤𑀺𑀬𑀢𑀺. 𑀲𑁄 𑀢𑀁 𑀅𑀲𑁆𑀲𑀸𑀤𑁂𑀢𑀺 [𑀲𑁄 𑀢𑀤𑀲𑁆𑀲𑀸𑀤𑁂𑀢𑀺 (𑀲𑀻.)], 𑀢𑀁 𑀦𑀺𑀓𑀸𑀫𑁂𑀢𑀺, 𑀢𑁂𑀦 𑀘 𑀯𑀺𑀢𑁆𑀢𑀺𑀁 𑀆𑀧𑀚𑁆𑀚𑀢𑀺. 𑀇𑀤𑀫𑁆𑀧𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀔𑀡𑁆𑀟𑀫𑁆𑀧𑀺 𑀙𑀺𑀤𑁆𑀤𑀫𑁆𑀧𑀺 𑀲𑀩𑀮𑀫𑁆𑀧𑀺 𑀓𑀫𑁆𑀫𑀸𑀲𑀫𑁆𑀧𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀩𑁆𑀭𑀸𑀳𑁆𑀫𑀡, 𑀅𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀺, 𑀲𑀁𑀬𑀼𑀢𑁆𑀢𑁄 𑀫𑁂𑀣𑀼𑀦𑁂𑀦 𑀲𑀁𑀬𑁄𑀕𑁂𑀦 𑀦 𑀧𑀭𑀺𑀫𑀼𑀘𑁆𑀘𑀢𑀺 𑀚𑀸𑀢𑀺𑀬𑀸 𑀚𑀭𑀸𑀬 𑀫𑀭𑀡𑁂𑀦 [𑀚𑀭𑀸𑀫𑀭𑀡𑁂𑀦 (𑀲𑀻. 𑀲𑁆𑀬𑀸.)] 𑀲𑁄𑀓𑁂𑀳𑀺 𑀧𑀭𑀺𑀤𑁂𑀯𑁂𑀳𑀺 𑀤𑀼𑀓𑁆𑀔𑁂𑀳𑀺 𑀤𑁄𑀫𑀦𑀲𑁆𑀲𑁂𑀳𑀺 𑀉𑀧𑀸𑀬𑀸𑀲𑁂𑀳𑀺, 𑀦 𑀧𑀭𑀺𑀫𑀼𑀘𑁆𑀘𑀢𑀺 𑀤𑀼𑀓𑁆𑀔𑀲𑁆𑀫𑀸𑀢𑀺 𑀯𑀤𑀸𑀫𑀺.

‘‘𑀧𑀼𑀦 𑀘𑀧𑀭𑀁, 𑀩𑁆𑀭𑀸𑀳𑁆𑀫𑀡, 𑀇𑀥𑁂𑀓𑀘𑁆𑀘𑁄 𑀲𑀫𑀡𑁄 𑀯𑀸 𑀩𑁆𑀭𑀸𑀳𑁆𑀫𑀡𑁄 𑀯𑀸 𑀲𑀫𑁆𑀫𑀸 𑀩𑁆𑀭𑀳𑁆𑀫𑀘𑀸𑀭𑀻 𑀧𑀝𑀺𑀚𑀸𑀦𑀫𑀸𑀦𑁄 𑀦 𑀳𑁂𑀯 𑀔𑁄 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀤𑁆𑀯𑀬𑀁𑀤𑁆𑀯𑀬𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀢𑀺, 𑀦𑀧𑀺 𑀫𑀸𑀢𑀼𑀕𑀸𑀫𑀲𑁆𑀲 𑀉𑀘𑁆𑀙𑀸𑀤𑀦𑀧𑀭𑀺𑀫𑀤𑁆𑀤𑀦𑀦𑁆𑀳𑀸𑀧𑀦𑀲𑀫𑁆𑀩𑀸𑀳𑀦𑀁 𑀲𑀸𑀤𑀺𑀬𑀢𑀺; 𑀅𑀧𑀺 𑀘 𑀔𑁄 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀲𑀜𑁆𑀚𑀕𑁆𑀖𑀢𑀺 𑀲𑀁𑀓𑀻𑀴𑀢𑀺 𑀲𑀁𑀓𑁂𑀮𑀸𑀬𑀢𑀺…𑀧𑁂… 𑀦𑀧𑀺 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀲𑀜𑁆𑀚𑀕𑁆𑀖𑀢𑀺 𑀲𑀁𑀓𑀻𑀴𑀢𑀺 𑀲𑀁𑀓𑁂𑀮𑀸𑀬𑀢𑀺; 𑀅𑀧𑀺 𑀘 𑀔𑁄 𑀫𑀸𑀢𑀼𑀕𑀸𑀫𑀲𑁆𑀲 𑀘𑀓𑁆𑀔𑀼𑀦𑀸 𑀘𑀓𑁆𑀔𑀼𑀁 𑀉𑀧𑀦𑀺𑀚𑁆𑀛𑀸𑀬𑀢𑀺 𑀧𑁂𑀓𑁆𑀔𑀢𑀺…𑀧𑁂… 𑀦𑀧𑀺 𑀫𑀸𑀢𑀼𑀕𑀸𑀫𑀲𑁆𑀲 𑀘𑀓𑁆𑀔𑀼𑀦𑀸 𑀘𑀓𑁆𑀔𑀼𑀁 𑀉𑀧𑀦𑀺𑀚𑁆𑀛𑀸𑀬𑀢𑀺 𑀧𑁂𑀓𑁆𑀔𑀢𑀺; 𑀅𑀧𑀺 𑀘 𑀔𑁄 𑀫𑀸𑀢𑀼𑀕𑀸𑀫𑀲𑁆𑀲 𑀲𑀤𑁆𑀤𑀁 𑀲𑀼𑀡𑀸𑀢𑀺 𑀢𑀺𑀭𑁄𑀓𑀼𑀝𑁆𑀝𑀁 𑀯𑀸 𑀢𑀺𑀭𑁄𑀧𑀸𑀓𑀸𑀭𑀁 𑀯𑀸 𑀳𑀲𑀦𑁆𑀢𑀺𑀬𑀸 𑀯𑀸 𑀪𑀡𑀦𑁆𑀢𑀺𑀬𑀸 𑀯𑀸 𑀕𑀸𑀬𑀦𑁆𑀢𑀺𑀬𑀸 𑀯𑀸 𑀭𑁄𑀤𑀦𑁆𑀢𑀺𑀬𑀸 𑀯𑀸…𑀧𑁂… 𑀦𑀧𑀺 𑀫𑀸𑀢𑀼𑀕𑀸𑀫𑀲𑁆𑀲 𑀲𑀤𑁆𑀤𑀁 𑀲𑀼𑀡𑀸𑀢𑀺 𑀢𑀺𑀭𑁄𑀓𑀼𑀝𑁆𑀝𑀁 𑀯𑀸 𑀢𑀺𑀭𑁄𑀧𑀸𑀓𑀸𑀭𑀁 𑀯𑀸 𑀳𑀲𑀦𑁆𑀢𑀺𑀬𑀸 𑀯𑀸 𑀪𑀡𑀦𑁆𑀢𑀺𑀬𑀸 𑀯𑀸 𑀕𑀸𑀬𑀦𑁆𑀢𑀺𑀬𑀸 𑀯𑀸 𑀭𑁄𑀤𑀦𑁆𑀢𑀺𑀬𑀸 𑀯𑀸; 𑀅𑀧𑀺 𑀘 𑀔𑁄 𑀬𑀸𑀦𑀺𑀲𑁆𑀲 𑀢𑀸𑀦𑀺 𑀧𑀼𑀩𑁆𑀩𑁂 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀳𑀲𑀺𑀢𑀮𑀧𑀺𑀢𑀓𑀻𑀴𑀺𑀢𑀸𑀦𑀺 𑀢𑀸𑀦𑀺 𑀅𑀦𑀼𑀲𑁆𑀲𑀭𑀢𑀺…𑀧𑁂… 𑀦𑀧𑀺 𑀬𑀸𑀦𑀺𑀲𑁆𑀲 𑀢𑀸𑀦𑀺 𑀧𑀼𑀩𑁆𑀩𑁂 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁 𑀳𑀲𑀺𑀢𑀮𑀧𑀺𑀢𑀓𑀻𑀴𑀺𑀢𑀸𑀦𑀺 𑀢𑀸𑀦𑀺 𑀅𑀦𑀼𑀲𑁆𑀲𑀭𑀢𑀺; 𑀅𑀧𑀺 𑀘 𑀔𑁄 𑀧𑀲𑁆𑀲𑀢𑀺 𑀕𑀳𑀧𑀢𑀺𑀁 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑀁 𑀯𑀸 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑀁 𑀲𑀫𑀗𑁆𑀕𑀻𑀪𑀽𑀢𑀁 𑀧𑀭𑀺𑀘𑀸𑀭𑀬𑀫𑀸𑀦𑀁…𑀧𑁂… 𑀦𑀧𑀺 𑀧𑀲𑁆𑀲𑀢𑀺 𑀕𑀳𑀧𑀢𑀺𑀁 𑀯𑀸 𑀕𑀳𑀧𑀢𑀺𑀧𑀼𑀢𑁆𑀢𑀁 𑀯𑀸 𑀧𑀜𑁆𑀘𑀳𑀺 𑀓𑀸𑀫𑀕𑀼𑀡𑁂𑀳𑀺 𑀲𑀫𑀧𑁆𑀧𑀺𑀢𑀁 𑀲𑀫𑀗𑁆𑀕𑀻𑀪𑀽𑀢𑀁 𑀧𑀭𑀺𑀘𑀸𑀭𑀬𑀫𑀸𑀦𑀁; 𑀅𑀧𑀺 𑀘 𑀔𑁄 𑀅𑀜𑁆𑀜𑀢𑀭𑀁 𑀤𑁂𑀯𑀦𑀺𑀓𑀸𑀬𑀁 𑀧𑀡𑀺𑀥𑀸𑀬 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀺 𑀇𑀫𑀺𑀦𑀸𑀳𑀁 𑀲𑀻𑀮𑁂𑀦 𑀯𑀸 𑀯𑀢𑁂𑀦 𑀯𑀸 𑀢𑀧𑁂𑀦 𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑁂𑀦 𑀯𑀸 𑀤𑁂𑀯𑁄 𑀯𑀸 𑀪𑀯𑀺𑀲𑁆𑀲𑀸𑀫𑀺 𑀤𑁂𑀯𑀜𑁆𑀜𑀢𑀭𑁄 𑀯𑀸𑀢𑀺. 𑀲𑁄 𑀢𑀁 𑀅𑀲𑁆𑀲𑀸𑀤𑁂𑀢𑀺, 𑀢𑀁 𑀦𑀺𑀓𑀸𑀫𑁂𑀢𑀺, 𑀢𑁂𑀦 𑀘 𑀯𑀺𑀢𑁆𑀢𑀺𑀁 𑀆𑀧𑀚𑁆𑀚𑀢𑀺. 𑀇𑀤𑀫𑁆𑀧𑀺 𑀔𑁄, 𑀩𑁆𑀭𑀸𑀳𑁆𑀫𑀡, 𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀔𑀡𑁆𑀟𑀫𑁆𑀧𑀺 𑀙𑀺𑀤𑁆𑀤𑀫𑁆𑀧𑀺 𑀲𑀩𑀮𑀫𑁆𑀧𑀺 𑀓𑀫𑁆𑀫𑀸𑀲𑀫𑁆𑀧𑀺. 𑀅𑀬𑀁 𑀯𑀼𑀘𑁆𑀘𑀢𑀺, 𑀩𑁆𑀭𑀸𑀳𑁆𑀫𑀡, 𑀅𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀺 𑀲𑀁𑀬𑀼𑀢𑁆𑀢𑁄 𑀫𑁂𑀣𑀼𑀦𑁂𑀦 𑀲𑀁𑀬𑁄𑀕𑁂𑀦, 𑀦 𑀧𑀭𑀺𑀫𑀼𑀘𑁆𑀘𑀢𑀺 𑀚𑀸𑀢𑀺𑀬𑀸 𑀚𑀭𑀸𑀬 𑀫𑀭𑀡𑁂𑀦 𑀲𑁄𑀓𑁂𑀳𑀺 𑀧𑀭𑀺𑀤𑁂𑀯𑁂𑀳𑀺 𑀤𑀼𑀓𑁆𑀔𑁂𑀳𑀺 𑀤𑁄𑀫𑀦𑀲𑁆𑀲𑁂𑀳𑀺 𑀉𑀧𑀸𑀬𑀸𑀲𑁂𑀳𑀺, 𑀦 𑀧𑀭𑀺𑀫𑀼𑀘𑁆𑀘𑀢𑀺 𑀤𑀼𑀓𑁆𑀔𑀲𑁆𑀫𑀸𑀢𑀺 𑀯𑀤𑀸𑀫𑀺.

‘‘𑀬𑀸𑀯𑀓𑀻𑀯𑀜𑁆𑀘𑀸𑀳𑀁, 𑀩𑁆𑀭𑀸𑀳𑁆𑀫𑀡, 𑀇𑀫𑁂𑀲𑀁 𑀲𑀢𑁆𑀢𑀦𑁆𑀦𑀁 𑀫𑁂𑀣𑀼𑀦𑀲𑀁𑀬𑁄𑀕𑀸𑀦𑀁 𑀅𑀜𑁆𑀜𑀢𑀭𑀜𑁆𑀜𑀢𑀭𑀫𑁂𑀣𑀼𑀦𑀲𑀁𑀬𑁄𑀕𑀁 [𑀅𑀜𑁆𑀜𑀢𑀭𑀁 𑀫𑁂𑀣𑀼𑀦𑀲𑀁𑀬𑁄𑀕𑀁 (𑀲𑀻. 𑀲𑁆𑀬𑀸.)] 𑀅𑀢𑁆𑀢𑀦𑀺 𑀅𑀧𑁆𑀧𑀳𑀻𑀦𑀁 𑀲𑀫𑀦𑀼𑀧𑀲𑁆𑀲𑀺𑀁, 𑀦𑁂𑀯 𑀢𑀸𑀯𑀸𑀳𑀁, 𑀩𑁆𑀭𑀸𑀳𑁆𑀫𑀡, 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀧𑀘𑁆𑀘𑀜𑁆𑀜𑀸𑀲𑀺𑀁 [𑀅𑀪𑀺𑀲𑀫𑁆𑀩𑀼𑀤𑁆𑀥𑁄 𑀧𑀘𑁆𑀘𑀜𑁆𑀜𑀸𑀲𑀺𑀁 (𑀲𑀻. 𑀲𑁆𑀬𑀸.)].

‘‘𑀬𑀢𑁄 𑀘 𑀔𑁄𑀳𑀁, 𑀩𑁆𑀭𑀸𑀳𑁆𑀫𑀡, 𑀇𑀫𑁂𑀲𑀁 𑀲𑀢𑁆𑀢𑀦𑁆𑀦𑀁 𑀫𑁂𑀣𑀼𑀦𑀲𑀁𑀬𑁄𑀕𑀸𑀦𑀁 𑀅𑀜𑁆𑀜𑀢𑀭𑀜𑁆𑀜𑀢𑀭𑀫𑁂𑀣𑀼𑀦𑀲𑀁𑀬𑁄𑀕𑀁 𑀅𑀢𑁆𑀢𑀦𑀺 𑀅𑀧𑁆𑀧𑀳𑀻𑀦𑀁 𑀦 𑀲𑀫𑀦𑀼𑀧𑀲𑁆𑀲𑀺𑀁, 𑀅𑀣𑀸𑀳𑀁, 𑀩𑁆𑀭𑀸𑀳𑁆𑀫𑀡, 𑀲𑀤𑁂𑀯𑀓𑁂 𑀮𑁄𑀓𑁂 𑀲𑀫𑀸𑀭𑀓𑁂 𑀲𑀩𑁆𑀭𑀳𑁆𑀫𑀓𑁂 𑀲𑀲𑁆𑀲𑀫𑀡𑀩𑁆𑀭𑀸𑀳𑁆𑀫𑀡𑀺𑀬𑀸 𑀧𑀚𑀸𑀬 𑀲𑀤𑁂𑀯𑀫𑀦𑀼𑀲𑁆𑀲𑀸𑀬 𑀅𑀦𑀼𑀢𑁆𑀢𑀭𑀁 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀅𑀪𑀺𑀲𑀫𑁆𑀩𑀼𑀤𑁆𑀥𑁄𑀢𑀺 𑀧𑀘𑁆𑀘𑀜𑁆𑀜𑀸𑀲𑀺𑀁. ‘𑀜𑀸𑀡𑀜𑁆𑀘 𑀧𑀦 𑀫𑁂 𑀤𑀲𑁆𑀲𑀦𑀁 𑀉𑀤𑀧𑀸𑀤𑀺, 𑀅𑀓𑀼𑀧𑁆𑀧𑀸 𑀫𑁂 𑀯𑀺𑀫𑀼𑀢𑁆𑀢𑀺 [𑀘𑁂𑀢𑁄𑀯𑀺𑀫𑀼𑀢𑁆𑀢𑀺 (𑀲𑀻. 𑀓.)], 𑀅𑀬𑀫𑀦𑁆𑀢𑀺𑀫𑀸 𑀚𑀸𑀢𑀺, 𑀦𑀢𑁆𑀣𑀺 𑀤𑀸𑀦𑀺 𑀧𑀼𑀦𑀩𑁆𑀪𑀯𑁄’’’𑀢𑀺.

𑀏𑀯𑀁 𑀯𑀼𑀢𑁆𑀢𑁂 𑀚𑀸𑀡𑀼𑀲𑁆𑀲𑁄𑀡𑀺 𑀩𑁆𑀭𑀸𑀳𑁆𑀫𑀡𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫; 𑀅𑀪𑀺𑀓𑁆𑀓𑀦𑁆𑀢𑀁, 𑀪𑁄 𑀕𑁄𑀢𑀫…𑀧𑁂… 𑀉𑀧𑀸𑀲𑀓𑀁 𑀫𑀁 𑀪𑀯𑀁 𑀕𑁄𑀢𑀫𑁄 𑀥𑀸𑀭𑁂𑀢𑀼 𑀅𑀚𑁆𑀚𑀢𑀕𑁆𑀕𑁂 𑀧𑀸𑀡𑀼𑀧𑁂𑀢𑀁 𑀲𑀭𑀡𑀁 𑀕𑀢’’𑀦𑁆𑀢𑀺. 𑀲𑀢𑁆𑀢𑀫𑀁.

𑁮. 𑀲𑀁𑀬𑁄𑀕𑀲𑀼𑀢𑁆𑀢𑀁

𑁫𑁧. ‘‘𑀲𑀁𑀬𑁄𑀕𑀯𑀺𑀲𑀁𑀬𑁄𑀕𑀁 𑀯𑁄, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀧𑀭𑀺𑀬𑀸𑀬𑀁 𑀤𑁂𑀲𑁂𑀲𑁆𑀲𑀸𑀫𑀺. 𑀢𑀁 𑀲𑀼𑀡𑀸𑀣…𑀧𑁂… 𑀓𑀢𑀫𑁄 𑀘 𑀲𑁄, 𑀪𑀺𑀓𑁆𑀔𑀯𑁂, 𑀲𑀁𑀬𑁄𑀕𑁄 𑀯𑀺𑀲𑀁𑀬𑁄𑀕𑁄 𑀥𑀫𑁆𑀫𑀧𑀭𑀺𑀬𑀸𑀬𑁄?

‘‘𑀇𑀢𑁆𑀣𑀻, 𑀪𑀺𑀓𑁆𑀔𑀯𑁂, 𑀅𑀚𑁆𑀛𑀢𑁆𑀢𑀁 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀫𑀦𑀲𑀺 𑀓𑀭𑁄𑀢𑀺 𑁋 𑀇𑀢𑁆𑀣𑀺𑀓𑀼𑀢𑁆𑀢𑀁 𑀇𑀢𑁆𑀣𑀸𑀓𑀧𑁆𑀧𑀁 𑀇𑀢𑁆𑀣𑀺𑀯𑀺𑀥𑀁 𑀇𑀢𑁆𑀣𑀺𑀘𑁆𑀙𑀦𑁆𑀤𑀁 𑀇𑀢𑁆𑀣𑀺𑀲𑁆𑀲𑀭𑀁 𑀇𑀢𑁆𑀣𑀸𑀮𑀗𑁆𑀓𑀸𑀭𑀁. 𑀲𑀸 𑀢𑀢𑁆𑀣 𑀭𑀚𑁆𑀚𑀢𑀺 𑀢𑀢𑁆𑀭𑀸𑀪𑀺𑀭𑀫𑀢𑀺. 𑀲𑀸 𑀢𑀢𑁆𑀣 𑀭𑀢𑁆𑀢𑀸 𑀢𑀢𑁆𑀭𑀸𑀪𑀺𑀭𑀢𑀸 𑀩𑀳𑀺𑀤𑁆𑀥𑀸 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀫𑀦𑀲𑀺 𑀓𑀭𑁄𑀢𑀺 𑁋 𑀧𑀼𑀭𑀺𑀲𑀓𑀼𑀢𑁆𑀢𑀁 𑀧𑀼𑀭𑀺𑀲𑀸𑀓𑀧𑁆𑀧𑀁 𑀧𑀼𑀭𑀺𑀲𑀯𑀺𑀥𑀁 𑀧𑀼𑀭𑀺𑀲𑀘𑁆𑀙𑀦𑁆𑀤𑀁 𑀧𑀼𑀭𑀺𑀲𑀲𑁆𑀲𑀭𑀁 𑀧𑀼𑀭𑀺𑀲𑀸𑀮𑀗𑁆𑀓𑀸𑀭𑀁. 𑀲𑀸 𑀢𑀢𑁆𑀣 𑀭𑀚𑁆𑀚𑀢𑀺 𑀢𑀢𑁆𑀭𑀸𑀪𑀺𑀭𑀫𑀢𑀺. 𑀲𑀸 𑀢𑀢𑁆𑀣 𑀭𑀢𑁆𑀢𑀸 𑀢𑀢𑁆𑀭𑀸𑀪𑀺𑀭𑀢𑀸 𑀩𑀳𑀺𑀤𑁆𑀥𑀸 𑀲𑀁𑀬𑁄𑀕𑀁 𑀆𑀓𑀗𑁆𑀔𑀢𑀺. 𑀬𑀜𑁆𑀘𑀲𑁆𑀲𑀸 𑀲𑀁𑀬𑁄𑀕𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁 𑀢𑀜𑁆𑀘 𑀆𑀓𑀗𑁆𑀔𑀢𑀺. 𑀇𑀢𑁆𑀣𑀢𑁆𑀢𑁂, 𑀪𑀺𑀓𑁆𑀔𑀯𑁂, 𑀅𑀪𑀺𑀭𑀢𑀸 𑀲𑀢𑁆𑀢𑀸 𑀧𑀼𑀭𑀺𑀲𑁂𑀲𑀼 𑀲𑀁𑀬𑁄𑀕𑀁 𑀕𑀢𑀸. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀇𑀢𑁆𑀣𑀻 𑀇𑀢𑁆𑀣𑀢𑁆𑀢𑀁 𑀦𑀸𑀢𑀺𑀯𑀢𑁆𑀢𑀢𑀺.

‘‘𑀧𑀼𑀭𑀺𑀲𑁄, 𑀪𑀺𑀓𑁆𑀔𑀯𑁂, 𑀅𑀚𑁆𑀛𑀢𑁆𑀢𑀁 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀫𑀦𑀲𑀺 𑀓𑀭𑁄𑀢𑀺 𑁋 𑀧𑀼𑀭𑀺𑀲𑀓𑀼𑀢𑁆𑀢𑀁 𑀧𑀼𑀭𑀺𑀲𑀸𑀓𑀧𑁆𑀧𑀁 𑀧𑀼𑀭𑀺𑀲𑀯𑀺𑀥𑀁 𑀧𑀼𑀭𑀺𑀲𑀘𑁆𑀙𑀦𑁆𑀤𑀁 𑀧𑀼𑀭𑀺𑀲𑀲𑁆𑀲𑀭𑀁 𑀧𑀼𑀭𑀺𑀲𑀸𑀮𑀗𑁆𑀓𑀸𑀭𑀁. 𑀲𑁄 𑀢𑀢𑁆𑀣 𑀭𑀚𑁆𑀚𑀢𑀺 𑀢𑀢𑁆𑀭𑀸𑀪𑀺𑀭𑀫𑀢𑀺. 𑀲𑁄 𑀢𑀢𑁆𑀣 𑀭𑀢𑁆𑀢𑁄 𑀢𑀢𑁆𑀭𑀸𑀪𑀺𑀭𑀢𑁄 𑀩𑀳𑀺𑀤𑁆𑀥𑀸 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀫𑀦𑀲𑀺 𑀓𑀭𑁄𑀢𑀺 𑁋 𑀇𑀢𑁆𑀣𑀺𑀓𑀼𑀢𑁆𑀢𑀁 𑀇𑀢𑁆𑀣𑀸𑀓𑀧𑁆𑀧𑀁 𑀇𑀢𑁆𑀣𑀺𑀯𑀺𑀥𑀁 𑀇𑀢𑁆𑀣𑀺𑀘𑁆𑀙𑀦𑁆𑀤𑀁 𑀇𑀢𑁆𑀣𑀺𑀲𑁆𑀲𑀭𑀁 𑀇𑀢𑁆𑀣𑀸𑀮𑀗𑁆𑀓𑀸𑀭𑀁. 𑀲𑁄 𑀢𑀢𑁆𑀣 𑀭𑀚𑁆𑀚𑀢𑀺 𑀢𑀢𑁆𑀭𑀸𑀪𑀺𑀭𑀫𑀢𑀺. 𑀲𑁄 𑀢𑀢𑁆𑀣 𑀭𑀢𑁆𑀢𑁄 𑀢𑀢𑁆𑀭𑀸𑀪𑀺𑀭𑀢𑁄 𑀩𑀳𑀺𑀤𑁆𑀥𑀸 𑀲𑀁𑀬𑁄𑀕𑀁 𑀆𑀓𑀗𑁆𑀔𑀢𑀺. 𑀬𑀜𑁆𑀘𑀲𑁆𑀲 𑀲𑀁𑀬𑁄𑀕𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁 𑀢𑀜𑁆𑀘 𑀆𑀓𑀗𑁆𑀔𑀢𑀺. 𑀧𑀼𑀭𑀺𑀲𑀢𑁆𑀢𑁂, 𑀪𑀺𑀓𑁆𑀔𑀯𑁂, 𑀅𑀪𑀺𑀭𑀢𑀸 𑀲𑀢𑁆𑀢𑀸 𑀇𑀢𑁆𑀣𑀻𑀲𑀼 𑀲𑀁𑀬𑁄𑀕𑀁 𑀕𑀢𑀸. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀧𑀼𑀭𑀺𑀲𑀢𑁆𑀢𑀁 𑀦𑀸𑀢𑀺𑀯𑀢𑁆𑀢𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀲𑀁𑀬𑁄𑀕𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀯𑀺𑀲𑀁𑀬𑁄𑀕𑁄 𑀳𑁄𑀢𑀺? 𑀇𑀢𑁆𑀣𑀻, 𑀪𑀺𑀓𑁆𑀔𑀯𑁂, 𑀅𑀚𑁆𑀛𑀢𑁆𑀢𑀁 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀦 𑀫𑀦𑀲𑀺 𑀓𑀭𑁄𑀢𑀺 𑁋 𑀇𑀢𑁆𑀣𑀺𑀓𑀼𑀢𑁆𑀢𑀁 𑀇𑀢𑁆𑀣𑀸𑀓𑀧𑁆𑀧𑀁 𑀇𑀢𑁆𑀣𑀺𑀯𑀺𑀥𑀁 𑀇𑀢𑁆𑀣𑀺𑀘𑁆𑀙𑀦𑁆𑀤𑀁 𑀇𑀢𑁆𑀣𑀺𑀲𑁆𑀲𑀭𑀁 𑀇𑀢𑁆𑀣𑀸𑀮𑀗𑁆𑀓𑀸𑀭𑀁. 𑀲𑀸 𑀢𑀢𑁆𑀣 𑀦 𑀭𑀚𑁆𑀚𑀢𑀺, 𑀲𑀸 𑀢𑀢𑁆𑀭 𑀦𑀸𑀪𑀺𑀭𑀫𑀢𑀺. 𑀲𑀸 𑀢𑀢𑁆𑀣 𑀅𑀭𑀢𑁆𑀢𑀸 𑀢𑀢𑁆𑀭 𑀅𑀦𑀪𑀺𑀭𑀢𑀸 𑀩𑀳𑀺𑀤𑁆𑀥𑀸 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀦 𑀫𑀦𑀲𑀺 𑀓𑀭𑁄𑀢𑀺 𑁋 𑀧𑀼𑀭𑀺𑀲𑀓𑀼𑀢𑁆𑀢𑀁 𑀧𑀼𑀭𑀺𑀲𑀸𑀓𑀧𑁆𑀧𑀁 𑀧𑀼𑀭𑀺𑀲𑀯𑀺𑀥𑀁 𑀧𑀼𑀭𑀺𑀲𑀘𑁆𑀙𑀦𑁆𑀤𑀁 𑀧𑀼𑀭𑀺𑀲𑀲𑁆𑀲𑀭𑀁 𑀧𑀼𑀭𑀺𑀲𑀸𑀮𑀗𑁆𑀓𑀸𑀭𑀁. 𑀲𑀸 𑀢𑀢𑁆𑀣 𑀦 𑀭𑀚𑁆𑀚𑀢𑀺, 𑀢𑀢𑁆𑀭 𑀦𑀸𑀪𑀺𑀭𑀫𑀢𑀺. 𑀲𑀸 𑀢𑀢𑁆𑀣 𑀅𑀭𑀢𑁆𑀢𑀸 𑀢𑀢𑁆𑀭 𑀅𑀦𑀪𑀺𑀭𑀢𑀸 𑀩𑀳𑀺𑀤𑁆𑀥𑀸 𑀲𑀁𑀬𑁄𑀕𑀁 𑀦𑀸𑀓𑀗𑁆𑀔𑀢𑀺. 𑀬𑀜𑁆𑀘𑀲𑁆𑀲𑀸 𑀲𑀁𑀬𑁄𑀕𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁 𑀢𑀜𑁆𑀘 𑀦𑀸𑀓𑀗𑁆𑀔𑀢𑀺. 𑀇𑀢𑁆𑀣𑀢𑁆𑀢𑁂, 𑀪𑀺𑀓𑁆𑀔𑀯𑁂, 𑀅𑀦𑀪𑀺𑀭𑀢𑀸 𑀲𑀢𑁆𑀢𑀸 𑀧𑀼𑀭𑀺𑀲𑁂𑀲𑀼 𑀯𑀺𑀲𑀁𑀬𑁄𑀕𑀁 𑀕𑀢𑀸. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀇𑀢𑁆𑀣𑀻 𑀇𑀢𑁆𑀣𑀢𑁆𑀢𑀁 𑀅𑀢𑀺𑀯𑀢𑁆𑀢𑀢𑀺.

‘‘𑀧𑀼𑀭𑀺𑀲𑁄, 𑀪𑀺𑀓𑁆𑀔𑀯𑁂, 𑀅𑀚𑁆𑀛𑀢𑁆𑀢𑀁 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀦 𑀫𑀦𑀲𑀺 𑀓𑀭𑁄𑀢𑀺 𑁋 𑀧𑀼𑀭𑀺𑀲𑀓𑀼𑀢𑁆𑀢𑀁 𑀧𑀼𑀭𑀺𑀲𑀸𑀓𑀧𑁆𑀧𑀁 𑀧𑀼𑀭𑀺𑀲𑀯𑀺𑀥𑀁 𑀧𑀼𑀭𑀺𑀲𑀘𑁆𑀙𑀦𑁆𑀤𑀁 𑀧𑀼𑀭𑀺𑀲𑀲𑁆𑀲𑀭𑀁 𑀧𑀼𑀭𑀺𑀲𑀸𑀮𑀗𑁆𑀓𑀸𑀭𑀁. 𑀲𑁄 𑀢𑀢𑁆𑀣 𑀦 𑀭𑀚𑁆𑀚𑀢𑀺, 𑀲𑁄 𑀢𑀢𑁆𑀭 𑀦𑀸𑀪𑀺𑀭𑀫𑀢𑀺. 𑀲𑁄 𑀢𑀢𑁆𑀣 𑀅𑀭𑀢𑁆𑀢𑁄 𑀢𑀢𑁆𑀭 𑀅𑀦𑀪𑀺𑀭𑀢𑁄 𑀩𑀳𑀺𑀤𑁆𑀥𑀸 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀦 𑀫𑀦𑀲𑀺 𑀓𑀭𑁄𑀢𑀺 𑁋 𑀇𑀢𑁆𑀣𑀺𑀓𑀼𑀢𑁆𑀢𑀁 𑀇𑀢𑁆𑀣𑀸𑀓𑀧𑁆𑀧𑀁 𑀇𑀢𑁆𑀣𑀺𑀯𑀺𑀥𑀁 𑀇𑀢𑁆𑀣𑀺𑀘𑁆𑀙𑀦𑁆𑀤𑀁 𑀇𑀢𑁆𑀣𑀺𑀲𑁆𑀲𑀭𑀁 𑀇𑀢𑁆𑀣𑀸𑀮𑀗𑁆𑀓𑀸𑀭𑀁. 𑀲𑁄 𑀢𑀢𑁆𑀣 𑀦 𑀭𑀚𑁆𑀚𑀢𑀺, 𑀢𑀢𑁆𑀭 𑀦𑀸𑀪𑀺𑀭𑀫𑀢𑀺. 𑀲𑁄 𑀢𑀢𑁆𑀣 𑀅𑀭𑀢𑁆𑀢𑁄 𑀢𑀢𑁆𑀭 𑀅𑀦𑀪𑀺𑀭𑀢𑁄 𑀩𑀳𑀺𑀤𑁆𑀥𑀸 𑀲𑀁𑀬𑁄𑀕𑀁 𑀦𑀸𑀓𑀗𑁆𑀔𑀢𑀺. 𑀬𑀜𑁆𑀘𑀲𑁆𑀲 𑀲𑀁𑀬𑁄𑀕𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁 𑀢𑀜𑁆𑀘 𑀦𑀸𑀓𑀗𑁆𑀔𑀢𑀺. 𑀧𑀼𑀭𑀺𑀲𑀢𑁆𑀢𑁂, 𑀪𑀺𑀓𑁆𑀔𑀯𑁂, 𑀅𑀦𑀪𑀺𑀭𑀢𑀸 𑀲𑀢𑁆𑀢𑀸 𑀇𑀢𑁆𑀣𑀻𑀲𑀼 𑀯𑀺𑀲𑀁𑀬𑁄𑀕𑀁 𑀕𑀢𑀸. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀭𑀺𑀲𑁄 𑀧𑀼𑀭𑀺𑀲𑀢𑁆𑀢𑀁 𑀅𑀢𑀺𑀯𑀢𑁆𑀢𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀯𑀺𑀲𑀁𑀬𑁄𑀕𑁄 𑀳𑁄𑀢𑀺. 𑀅𑀬𑀁 𑀔𑁄, 𑀪𑀺𑀓𑁆𑀔𑀯𑁂, 𑀲𑀁𑀬𑁄𑀕𑁄 𑀯𑀺𑀲𑀁𑀬𑁄𑀕𑁄 𑀥𑀫𑁆𑀫𑀧𑀭𑀺𑀬𑀸𑀬𑁄’’𑀢𑀺. 𑀅𑀝𑁆𑀞𑀫𑀁.

𑁯. 𑀤𑀸𑀦𑀫𑀳𑀧𑁆𑀨𑀮𑀲𑀼𑀢𑁆𑀢𑀁

𑁫𑁨. 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀘𑀫𑁆𑀧𑀸𑀬𑀁 𑀯𑀺𑀳𑀭𑀢𑀺 𑀕𑀕𑁆𑀕𑀭𑀸𑀬 𑀧𑁄𑀓𑁆𑀔𑀭𑀡𑀺𑀬𑀸 𑀢𑀻𑀭𑁂. 𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀘𑀫𑁆𑀧𑁂𑀬𑁆𑀬𑀓𑀸 𑀉𑀧𑀸𑀲𑀓𑀸 𑀬𑁂𑀦 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀸 𑀔𑁄 𑀘𑀫𑁆𑀧𑁂𑀬𑁆𑀬𑀓𑀸 𑀉𑀧𑀸𑀲𑀓𑀸 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀏𑀢𑀤𑀯𑁄𑀘𑀼𑀁 𑁋 ‘‘𑀘𑀺𑀭𑀲𑁆𑀲𑀼𑀢𑀸 𑀦𑁄, 𑀪𑀦𑁆𑀢𑁂 [𑀪𑀦𑁆𑀢𑁂 𑀲𑀸𑀭𑀺𑀧𑀼𑀢𑁆𑀢 (𑀲𑀻.)], 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀥𑀫𑁆𑀫𑀻𑀓𑀣𑀸. 𑀲𑀸𑀥𑀼 𑀫𑀬𑀁, 𑀪𑀦𑁆𑀢𑁂, 𑀮𑀪𑁂𑀬𑁆𑀬𑀸𑀫 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀥𑀫𑁆𑀫𑀺𑀁 𑀓𑀣𑀁 [𑀪𑀕𑀯𑀢𑁄 𑀲𑀦𑁆𑀢𑀺𑀓𑀸 𑀥𑀫𑁆𑀫𑀺𑀁 𑀓𑀣𑀁 (𑀲𑀻.), 𑀪𑀕𑀯𑀢𑁄 𑀥𑀫𑁆𑀫𑀺𑀁 𑀓𑀣𑀁 (𑀲𑁆𑀬𑀸.)] 𑀲𑀯𑀦𑀸𑀬𑀸’’𑀢𑀺. ‘‘𑀢𑁂𑀦𑀳𑀸𑀯𑀼𑀲𑁄, 𑀢𑀤𑀳𑀼𑀧𑁄𑀲𑀣𑁂 𑀆𑀕𑀘𑁆𑀙𑁂𑀬𑁆𑀬𑀸𑀣, 𑀅𑀧𑁆𑀧𑁂𑀯 𑀦𑀸𑀫 𑀮𑀪𑁂𑀬𑁆𑀬𑀸𑀣 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 [𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 (𑀲𑁆𑀬𑀸.)] 𑀥𑀫𑁆𑀫𑀺𑀁 𑀓𑀣𑀁 𑀲𑀯𑀦𑀸𑀬𑀸’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀘𑀫𑁆𑀧𑁂𑀬𑁆𑀬𑀓𑀸 𑀉𑀧𑀸𑀲𑀓𑀸 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀧𑀤𑀓𑁆𑀔𑀺𑀡𑀁 𑀓𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀼.

𑀅𑀣 𑀔𑁄 𑀘𑀫𑁆𑀧𑁂𑀬𑁆𑀬𑀓𑀸 𑀉𑀧𑀸𑀲𑀓𑀸 𑀢𑀤𑀳𑀼𑀧𑁄𑀲𑀣𑁂 𑀬𑁂𑀦𑀸𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀅𑀝𑁆𑀞𑀁𑀲𑀼. 𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀢𑁂𑀳𑀺 𑀘𑀫𑁆𑀧𑁂𑀬𑁆𑀬𑀓𑁂𑀳𑀺 𑀉𑀧𑀸𑀲𑀓𑁂𑀳𑀺 𑀲𑀤𑁆𑀥𑀺𑀁 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀲𑀺𑀬𑀸 𑀦𑀼 𑀔𑁄, 𑀪𑀦𑁆𑀢𑁂, 𑀇𑀥𑁂𑀓𑀘𑁆𑀘𑀲𑁆𑀲 𑀢𑀸𑀤𑀺𑀲𑀁𑀬𑁂𑀯 𑀤𑀸𑀦𑀁 𑀤𑀺𑀦𑁆𑀦𑀁 𑀦 𑀫𑀳𑀧𑁆𑀨𑀮𑀁 𑀳𑁄𑀢𑀺 𑀦 𑀫𑀳𑀸𑀦𑀺𑀲𑀁𑀲𑀁; 𑀲𑀺𑀬𑀸 𑀧𑀦, 𑀪𑀦𑁆𑀢𑁂, 𑀇𑀥𑁂𑀓𑀘𑁆𑀘𑀲𑁆𑀲 𑀢𑀸𑀤𑀺𑀲𑀁𑀬𑁂𑀯 𑀤𑀸𑀦𑀁 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲’’𑀦𑁆𑀢𑀺? ‘‘𑀲𑀺𑀬𑀸, 𑀲𑀸𑀭𑀺𑀧𑀼𑀢𑁆𑀢, 𑀇𑀥𑁂𑀓𑀘𑁆𑀘𑀲𑁆𑀲 𑀢𑀸𑀤𑀺𑀲𑀁𑀬𑁂𑀯 𑀤𑀸𑀦𑀁 𑀤𑀺𑀦𑁆𑀦𑀁 𑀦 𑀫𑀳𑀧𑁆𑀨𑀮𑀁 𑀳𑁄𑀢𑀺 𑀦 𑀫𑀳𑀸𑀦𑀺𑀲𑀁𑀲𑀁; 𑀲𑀺𑀬𑀸 𑀧𑀦, 𑀲𑀸𑀭𑀺𑀧𑀼𑀢𑁆𑀢, 𑀇𑀥𑁂𑀓𑀘𑁆𑀘𑀲𑁆𑀲 𑀢𑀸𑀤𑀺𑀲𑀁𑀬𑁂𑀯 𑀤𑀸𑀦𑀁 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲’’𑀦𑁆𑀢𑀺. ‘‘𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄 𑀬𑁂𑀦 𑀫𑀺𑀥𑁂𑀓𑀘𑁆𑀘𑀲𑁆𑀲 𑀢𑀸𑀤𑀺𑀲𑀁𑀬𑁂𑀯 𑀤𑀸𑀦𑀁 𑀤𑀺𑀦𑁆𑀦𑀁 𑀦 𑀫𑀳𑀧𑁆𑀨𑀮𑀁 𑀳𑁄𑀢𑀺 𑀦 𑀫𑀳𑀸𑀦𑀺𑀲𑀁𑀲𑀁; 𑀓𑁄 𑀦𑀼 𑀔𑁄, 𑀪𑀦𑁆𑀢𑁂, 𑀳𑁂𑀢𑀼 𑀓𑁄 𑀧𑀘𑁆𑀘𑀬𑁄 𑀬𑁂𑀦 𑀫𑀺𑀥𑁂𑀓𑀘𑁆𑀘𑀲𑁆𑀲 𑀢𑀸𑀤𑀺𑀲𑀁𑀬𑁂𑀯 𑀤𑀸𑀦𑀁 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲’’𑀦𑁆𑀢𑀺?

‘‘𑀇𑀥, 𑀲𑀸𑀭𑀺𑀧𑀼𑀢𑁆𑀢, 𑀏𑀓𑀘𑁆𑀘𑁄 𑀲𑀸𑀧𑁂𑀔𑁄 [𑀲𑀸𑀧𑁂𑀓𑁆𑀔𑁄 (𑀲𑁆𑀬𑀸.)] 𑀤𑀸𑀦𑀁 𑀤𑁂𑀢𑀺, 𑀧𑀢𑀺𑀩𑀤𑁆𑀥𑀘𑀺𑀢𑁆𑀢𑁄 [𑀧𑀢𑀺𑀩𑀦𑁆𑀥𑀘𑀺𑀢𑁆𑀢𑁄 (𑀓.)] 𑀤𑀸𑀦𑀁 𑀤𑁂𑀢𑀺, 𑀲𑀦𑁆𑀦𑀺𑀥𑀺𑀧𑁂𑀔𑁄 𑀤𑀸𑀦𑀁 𑀤𑁂𑀢𑀺, ‘𑀇𑀫𑀁 𑀧𑁂𑀘𑁆𑀘 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫𑀻’𑀢𑀺 𑀤𑀸𑀦𑀁 𑀤𑁂𑀢𑀺. 𑀲𑁄 𑀢𑀁 𑀤𑀸𑀦𑀁 𑀤𑁂𑀢𑀺 𑀲𑀫𑀡𑀲𑁆𑀲 𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀸 𑀅𑀦𑁆𑀦𑀁 𑀧𑀸𑀦𑀁 𑀯𑀢𑁆𑀣𑀁 𑀬𑀸𑀦𑀁 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀁 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀁. 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀲𑀸𑀭𑀺𑀧𑀼𑀢𑁆𑀢, 𑀤𑀤𑁂𑀬𑁆𑀬 𑀇𑀥𑁂𑀓𑀘𑁆𑀘𑁄 𑀏𑀯𑀭𑀽𑀧𑀁 𑀤𑀸𑀦’’𑀦𑁆𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’.

‘‘𑀢𑀢𑁆𑀭, 𑀲𑀸𑀭𑀺𑀧𑀼𑀢𑁆𑀢, 𑀬𑁆𑀯𑀸𑀬𑀁 𑀲𑀸𑀧𑁂𑀔𑁄 𑀤𑀸𑀦𑀁 𑀤𑁂𑀢𑀺, 𑀧𑀢𑀺𑀩𑀤𑁆𑀥𑀘𑀺𑀢𑁆𑀢𑁄 𑀤𑀸𑀦𑀁 𑀤𑁂𑀢𑀺, 𑀲𑀦𑁆𑀦𑀺𑀥𑀺𑀧𑁂𑀔𑁄 𑀤𑀸𑀦𑀁 𑀤𑁂𑀢𑀺, ‘𑀇𑀫𑀁 𑀧𑁂𑀘𑁆𑀘 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫𑀻’𑀢𑀺 𑀤𑀸𑀦𑀁 𑀤𑁂𑀢𑀺. 𑀲𑁄 𑀢𑀁 𑀤𑀸𑀦𑀁 𑀤𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀺. 𑀲𑁄 𑀢𑀁 𑀓𑀫𑁆𑀫𑀁 𑀔𑁂𑀧𑁂𑀢𑁆𑀯𑀸 𑀢𑀁 𑀇𑀤𑁆𑀥𑀺𑀁 𑀢𑀁 𑀬𑀲𑀁 𑀢𑀁 𑀆𑀥𑀺𑀧𑀘𑁆𑀘𑀁 𑀆𑀕𑀸𑀫𑀻 𑀳𑁄𑀢𑀺 𑀆𑀕𑀦𑁆𑀢𑀸 𑀇𑀢𑁆𑀣𑀢𑁆𑀢𑀁.

‘‘𑀇𑀥 𑀧𑀦, 𑀲𑀸𑀭𑀺𑀧𑀼𑀢𑁆𑀢, 𑀏𑀓𑀘𑁆𑀘𑁄 𑀦 𑀳𑁂𑀯 𑀔𑁄 𑀲𑀸𑀧𑁂𑀔𑁄 𑀤𑀸𑀦𑀁 𑀤𑁂𑀢𑀺, 𑀦 𑀧𑀢𑀺𑀩𑀤𑁆𑀥𑀘𑀺𑀢𑁆𑀢𑁄 𑀤𑀸𑀦𑀁 𑀤𑁂𑀢𑀺, 𑀦 𑀲𑀦𑁆𑀦𑀺𑀥𑀺𑀧𑁂𑀔𑁄 𑀤𑀸𑀦𑀁 𑀤𑁂𑀢𑀺, 𑀦 ‘𑀇𑀫𑀁 𑀧𑁂𑀘𑁆𑀘 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫𑀻’𑀢𑀺 𑀤𑀸𑀦𑀁 𑀤𑁂𑀢𑀺; 𑀅𑀧𑀺 𑀘 𑀔𑁄 ‘𑀲𑀸𑀳𑀼 𑀤𑀸𑀦’𑀦𑁆𑀢𑀺 𑀤𑀸𑀦𑀁 𑀤𑁂𑀢𑀺…𑀧𑁂… 𑀦𑀧𑀺 ‘𑀲𑀸𑀳𑀼 𑀤𑀸𑀦’𑀦𑁆𑀢𑀺 𑀤𑀸𑀦𑀁 𑀤𑁂𑀢𑀺; 𑀅𑀧𑀺 𑀘 𑀔𑁄 ‘𑀤𑀺𑀦𑁆𑀦𑀧𑀼𑀩𑁆𑀩𑀁 𑀓𑀢𑀧𑀼𑀩𑁆𑀩𑀁 𑀧𑀺𑀢𑀼𑀧𑀺𑀢𑀸𑀫𑀳𑁂𑀳𑀺 𑀦 𑀅𑀭𑀳𑀸𑀫𑀺 𑀧𑁄𑀭𑀸𑀡𑀁 𑀓𑀼𑀮𑀯𑀁𑀲𑀁 𑀳𑀸𑀧𑁂𑀢𑀼’𑀦𑁆𑀢𑀺 𑀤𑀸𑀦𑀁 𑀤𑁂𑀢𑀺…𑀧𑁂… 𑀦𑀧𑀺 ‘𑀤𑀺𑀦𑁆𑀦𑀧𑀼𑀩𑁆𑀩𑀁 𑀓𑀢𑀧𑀼𑀩𑁆𑀩𑀁 𑀧𑀺𑀢𑀼𑀧𑀺𑀢𑀸𑀫𑀳𑁂𑀳𑀺 𑀦 𑀅𑀭𑀳𑀸𑀫𑀺 𑀧𑁄𑀭𑀸𑀡𑀁 𑀓𑀼𑀮𑀯𑀁𑀲𑀁 𑀳𑀸𑀧𑁂𑀢𑀼’𑀦𑁆𑀢𑀺 𑀤𑀸𑀦𑀁 𑀤𑁂𑀢𑀺; 𑀅𑀧𑀺 𑀘 𑀔𑁄 ‘𑀅𑀳𑀁 𑀧𑀘𑀸𑀫𑀺, 𑀇𑀫𑁂 𑀦 𑀧𑀘𑀦𑁆𑀢𑀺, 𑀦𑀸𑀭𑀳𑀸𑀫𑀺 𑀧𑀘𑀦𑁆𑀢𑁄 𑀅𑀧𑀘𑀦𑁆𑀢𑀸𑀦𑀁 𑀤𑀸𑀦𑀁 𑀅𑀤𑀸𑀢𑀼’𑀦𑁆𑀢𑀺 𑀤𑀸𑀦𑀁 𑀤𑁂𑀢𑀺…𑀧𑁂… 𑀦𑀧𑀺 ‘𑀅𑀳𑀁 𑀧𑀘𑀸𑀫𑀺, 𑀇𑀫𑁂 𑀦 𑀧𑀘𑀦𑁆𑀢𑀺, 𑀦𑀸𑀭𑀳𑀸𑀫𑀺 𑀧𑀘𑀦𑁆𑀢𑁄 𑀅𑀧𑀘𑀦𑁆𑀢𑀸𑀦𑀁 𑀤𑀸𑀦𑀁 𑀅𑀤𑀸𑀢𑀼’𑀦𑁆𑀢𑀺 𑀤𑀸𑀦𑀁 𑀤𑁂𑀢𑀺; 𑀅𑀧𑀺 𑀘 𑀔𑁄 ‘𑀬𑀣𑀸 𑀢𑁂𑀲𑀁 𑀧𑀼𑀩𑁆𑀩𑀓𑀸𑀦𑀁 𑀇𑀲𑀻𑀦𑀁 𑀢𑀸𑀦𑀺 𑀫𑀳𑀸𑀬𑀜𑁆𑀜𑀸𑀦𑀺 𑀅𑀳𑁂𑀲𑀼𑀁, 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀝𑁆𑀞𑀓𑀲𑁆𑀲 𑀯𑀸𑀫𑀓𑀲𑁆𑀲 𑀯𑀸𑀫𑀤𑁂𑀯𑀲𑁆𑀲 𑀯𑁂𑀲𑁆𑀲𑀸𑀫𑀺𑀢𑁆𑀢𑀲𑁆𑀲 𑀬𑀫𑀤𑀕𑁆𑀕𑀺𑀦𑁄 𑀅𑀗𑁆𑀕𑀻𑀭𑀲𑀲𑁆𑀲 𑀪𑀸𑀭𑀤𑁆𑀯𑀸𑀚𑀲𑁆𑀲 𑀯𑀸𑀲𑁂𑀝𑁆𑀞𑀲𑁆𑀲 𑀓𑀲𑁆𑀲𑀧𑀲𑁆𑀲 𑀪𑀕𑀼𑀦𑁄, 𑀏𑀯𑀁 𑀫𑁂 𑀅𑀬𑀁 𑀤𑀸𑀦𑀲𑀁𑀯𑀺𑀪𑀸𑀕𑁄 𑀪𑀯𑀺𑀲𑁆𑀲𑀢𑀻’𑀢𑀺 𑀤𑀸𑀦𑀁 𑀤𑁂𑀢𑀺…𑀧𑁂… 𑀦𑀧𑀺 ‘𑀬𑀣𑀸 𑀢𑁂𑀲𑀁 𑀧𑀼𑀩𑁆𑀩𑀓𑀸𑀦𑀁 𑀇𑀲𑀻𑀦𑀁 𑀢𑀸𑀦𑀺 𑀫𑀳𑀸𑀬𑀜𑁆𑀜𑀸𑀦𑀺 𑀅𑀳𑁂𑀲𑀼𑀁, 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀝𑁆𑀞𑀓𑀲𑁆𑀲 𑀯𑀸𑀫𑀓𑀲𑁆𑀲 𑀯𑀸𑀫𑀤𑁂𑀯𑀲𑁆𑀲 𑀯𑁂𑀲𑁆𑀲𑀸𑀫𑀺𑀢𑁆𑀢𑀲𑁆𑀲 𑀬𑀫𑀤𑀕𑁆𑀕𑀺𑀦𑁄 𑀅𑀗𑁆𑀕𑀻𑀭𑀲𑀲𑁆𑀲 𑀪𑀸𑀭𑀤𑁆𑀯𑀸𑀚𑀲𑁆𑀲 𑀯𑀸𑀲𑁂𑀝𑁆𑀞𑀲𑁆𑀲 𑀓𑀲𑁆𑀲𑀧𑀲𑁆𑀲 𑀪𑀕𑀼𑀦𑁄, 𑀏𑀯𑀁 𑀫𑁂 𑀅𑀬𑀁 𑀤𑀸𑀦𑀲𑀁𑀯𑀺𑀪𑀸𑀕𑁄 𑀪𑀯𑀺𑀲𑁆𑀲𑀢𑀻’𑀢𑀺 𑀤𑀸𑀦𑀁 𑀤𑁂𑀢𑀺; 𑀅𑀧𑀺 𑀘 𑀔𑁄 ‘𑀇𑀫𑀁 𑀫𑁂 𑀤𑀸𑀦𑀁 𑀤𑀤𑀢𑁄 𑀘𑀺𑀢𑁆𑀢𑀁 𑀧𑀲𑀻𑀤𑀢𑀺, 𑀅𑀢𑁆𑀢𑀫𑀦𑀢𑀸 𑀲𑁄𑀫𑀦𑀲𑁆𑀲𑀁 𑀉𑀧𑀚𑀸𑀬𑀢𑀻’𑀢𑀺 𑀤𑀸𑀦𑀁 𑀤𑁂𑀢𑀺…𑀧𑁂… 𑀦𑀧𑀺 ‘𑀇𑀫𑀁 𑀫𑁂 𑀤𑀸𑀦𑀁 𑀤𑀤𑀢𑁄 𑀘𑀺𑀢𑁆𑀢𑀁 𑀧𑀲𑀻𑀤𑀢𑀺, 𑀅𑀢𑁆𑀢𑀫𑀦𑀢𑀸 𑀲𑁄𑀫𑀦𑀲𑁆𑀲𑀁 𑀉𑀧𑀚𑀸𑀬𑀢𑀻’𑀢𑀺 𑀤𑀸𑀦𑀁 𑀤𑁂𑀢𑀺; 𑀅𑀧𑀺 𑀘 𑀔𑁄 𑀘𑀺𑀢𑁆𑀢𑀸𑀮𑀗𑁆𑀓𑀸𑀭𑀘𑀺𑀢𑁆𑀢𑀧𑀭𑀺𑀓𑁆𑀔𑀸𑀭𑀁 𑀤𑀸𑀦𑀁 𑀤𑁂𑀢𑀺. 𑀲𑁄 𑀢𑀁 𑀤𑀸𑀦𑀁 𑀤𑁂𑀢𑀺 𑀲𑀫𑀡𑀲𑁆𑀲 𑀯𑀸 𑀩𑁆𑀭𑀸𑀳𑁆𑀫𑀡𑀲𑁆𑀲 𑀯𑀸 𑀅𑀦𑁆𑀦𑀁 𑀧𑀸𑀦𑀁 𑀯𑀢𑁆𑀣𑀁 𑀬𑀸𑀦𑀁 𑀫𑀸𑀮𑀸𑀕𑀦𑁆𑀥𑀯𑀺𑀮𑁂𑀧𑀦𑀁 𑀲𑁂𑀬𑁆𑀬𑀸𑀯𑀲𑀣𑀧𑀤𑀻𑀧𑁂𑀬𑁆𑀬𑀁. 𑀢𑀁 𑀓𑀺𑀁 𑀫𑀜𑁆𑀜𑀲𑀺, 𑀲𑀸𑀭𑀺𑀧𑀼𑀢𑁆𑀢, 𑀤𑀤𑁂𑀬𑁆𑀬 𑀇𑀥𑁂𑀓𑀘𑁆𑀘𑁄 𑀏𑀯𑀭𑀽𑀧𑀁 𑀤𑀸𑀦’’𑀦𑁆𑀢𑀺? ‘‘𑀏𑀯𑀁, 𑀪𑀦𑁆𑀢𑁂’’.

‘‘𑀢𑀢𑁆𑀭, 𑀲𑀸𑀭𑀺𑀧𑀼𑀢𑁆𑀢, 𑀬𑁆𑀯𑀸𑀬𑀁 𑀦 𑀳𑁂𑀯 [𑀦𑀳𑁂𑀯 𑀔𑁄 (𑀲𑀻. 𑀲𑁆𑀬𑀸.)] 𑀲𑀸𑀧𑁂𑀔𑁄 𑀤𑀸𑀦𑀁 𑀤𑁂𑀢𑀺; 𑀦 𑀧𑀢𑀺𑀩𑀤𑁆𑀥𑀘𑀺𑀢𑁆𑀢𑁄 𑀤𑀸𑀦𑀁 𑀤𑁂𑀢𑀺; 𑀦 𑀲𑀦𑁆𑀦𑀺𑀥𑀺𑀧𑁂𑀔𑁄 𑀤𑀸𑀦𑀁 𑀤𑁂𑀢𑀺; 𑀦 ‘𑀇𑀫𑀁 𑀧𑁂𑀘𑁆𑀘 𑀧𑀭𑀺𑀪𑀼𑀜𑁆𑀚𑀺𑀲𑁆𑀲𑀸𑀫𑀻’𑀢𑀺 𑀤𑀸𑀦𑀁 𑀤𑁂𑀢𑀺; 𑀦𑀧𑀺 ‘𑀲𑀸𑀳𑀼 𑀤𑀸𑀦’𑀦𑁆𑀢𑀺 𑀤𑀸𑀦𑀁 𑀤𑁂𑀢𑀺; 𑀦𑀧𑀺 ‘𑀤𑀺𑀦𑁆𑀦𑀧𑀼𑀩𑁆𑀩𑀁 𑀓𑀢𑀧𑀼𑀩𑁆𑀩𑀁 𑀧𑀺𑀢𑀼𑀧𑀺𑀢𑀸𑀫𑀳𑁂𑀳𑀺 𑀦 𑀅𑀭𑀳𑀸𑀫𑀺 𑀧𑁄𑀭𑀸𑀡𑀁 𑀓𑀼𑀮𑀯𑀁𑀲𑀁 𑀳𑀸𑀧𑁂𑀢𑀼’𑀦𑁆𑀢𑀺 𑀤𑀸𑀦𑀁 𑀤𑁂𑀢𑀺; 𑀦𑀧𑀺 ‘𑀅𑀳𑀁 𑀧𑀘𑀸𑀫𑀺, 𑀇𑀫𑁂 𑀦 𑀧𑀘𑀦𑁆𑀢𑀺, 𑀦𑀸𑀭𑀳𑀸𑀫𑀺 𑀧𑀘𑀦𑁆𑀢𑁄 𑀅𑀧𑀘𑀦𑁆𑀢𑀸𑀦𑀁 𑀤𑀸𑀦𑀁 𑀅𑀤𑀸𑀢𑀼’𑀦𑁆𑀢𑀺 𑀤𑀸𑀦𑀁 𑀤𑁂𑀢𑀺; 𑀦𑀧𑀺 ‘𑀬𑀣𑀸 𑀢𑁂𑀲𑀁 𑀧𑀼𑀩𑁆𑀩𑀓𑀸𑀦𑀁 𑀇𑀲𑀻𑀦𑀁 𑀢𑀸𑀦𑀺 𑀫𑀳𑀸𑀬𑀜𑁆𑀜𑀸𑀦𑀺 𑀅𑀳𑁂𑀲𑀼𑀁, 𑀲𑁂𑀬𑁆𑀬𑀣𑀺𑀤𑀁 𑁋 𑀅𑀝𑁆𑀞𑀓𑀲𑁆𑀲 𑀯𑀸𑀫𑀓𑀲𑁆𑀲 𑀯𑀸𑀫𑀤𑁂𑀯𑀲𑁆𑀲 𑀯𑁂𑀲𑁆𑀲𑀸𑀫𑀺𑀢𑁆𑀢𑀲𑁆𑀲 𑀬𑀫𑀤𑀕𑁆𑀕𑀺𑀦𑁄 𑀅𑀗𑁆𑀕𑀻𑀭𑀲𑀲𑁆𑀲 𑀪𑀸𑀭𑀤𑁆𑀯𑀸𑀚𑀲𑁆𑀲 𑀯𑀸𑀲𑁂𑀝𑁆𑀞𑀲𑁆𑀲 𑀓𑀲𑁆𑀲𑀧𑀲𑁆𑀲 𑀪𑀕𑀼𑀦𑁄, 𑀏𑀯𑀁 𑀫𑁂 𑀅𑀬𑀁 𑀤𑀸𑀦𑀲𑀁𑀯𑀺𑀪𑀸𑀕𑁄 𑀪𑀯𑀺𑀲𑁆𑀲𑀢𑀻’𑀢𑀺 𑀤𑀸𑀦𑀁 𑀤𑁂𑀢𑀺; 𑀦𑀧𑀺 ‘𑀇𑀫𑀁 𑀫𑁂 𑀤𑀸𑀦𑀁 𑀤𑀤𑀢𑁄 𑀘𑀺𑀢𑁆𑀢𑀁 𑀧𑀲𑀻𑀤𑀢𑀺, 𑀅𑀢𑁆𑀢𑀫𑀦𑀢𑀸 𑀲𑁄𑀫𑀦𑀲𑁆𑀲𑀁 𑀉𑀧𑀚𑀸𑀬𑀢𑀻’𑀢𑀺 𑀤𑀸𑀦𑀁 𑀤𑁂𑀢𑀺; 𑀅𑀧𑀺 𑀘 𑀔𑁄 𑀘𑀺𑀢𑁆𑀢𑀸𑀮𑀗𑁆𑀓𑀸𑀭𑀘𑀺𑀢𑁆𑀢𑀧𑀭𑀺𑀓𑁆𑀔𑀸𑀭𑀁 𑀤𑀸𑀦𑀁 𑀤𑁂𑀢𑀺. 𑀲𑁄 𑀢𑀁 𑀤𑀸𑀦𑀁 𑀤𑀢𑁆𑀯𑀸 𑀓𑀸𑀬𑀲𑁆𑀲 𑀪𑁂𑀤𑀸 𑀧𑀭𑀁 𑀫𑀭𑀡𑀸 𑀩𑁆𑀭𑀳𑁆𑀫𑀓𑀸𑀬𑀺𑀓𑀸𑀦𑀁 𑀤𑁂𑀯𑀸𑀦𑀁 𑀲𑀳𑀩𑁆𑀬𑀢𑀁 𑀉𑀧𑀧𑀚𑁆𑀚𑀢𑀺. 𑀲𑁄 𑀢𑀁 𑀓𑀫𑁆𑀫𑀁 𑀔𑁂𑀧𑁂𑀢𑁆𑀯𑀸 𑀢𑀁 𑀇𑀤𑁆𑀥𑀺𑀁 𑀢𑀁 𑀬𑀲𑀁 𑀢𑀁 𑀆𑀥𑀺𑀧𑀘𑁆𑀘𑀁 𑀅𑀦𑀸𑀕𑀸𑀫𑀻 𑀳𑁄𑀢𑀺 𑀅𑀦𑀸𑀕𑀦𑁆𑀢𑀸 𑀇𑀢𑁆𑀣𑀢𑁆𑀢𑀁. 𑀅𑀬𑀁 𑀔𑁄, 𑀲𑀸𑀭𑀺𑀧𑀼𑀢𑁆𑀢, 𑀳𑁂𑀢𑀼 𑀅𑀬𑀁 𑀧𑀘𑁆𑀘𑀬𑁄 𑀬𑁂𑀦 𑀫𑀺𑀥𑁂𑀓𑀘𑁆𑀘𑀲𑁆𑀲 𑀢𑀸𑀤𑀺𑀲𑀁𑀬𑁂𑀯 𑀤𑀸𑀦𑀁 𑀤𑀺𑀦𑁆𑀦𑀁 𑀦 𑀫𑀳𑀧𑁆𑀨𑀮𑀁 𑀳𑁄𑀢𑀺 𑀦 𑀫𑀳𑀸𑀦𑀺𑀲𑀁𑀲𑀁. 𑀅𑀬𑀁 𑀧𑀦, 𑀲𑀸𑀭𑀺𑀧𑀼𑀢𑁆𑀢, 𑀳𑁂𑀢𑀼 𑀅𑀬𑀁 𑀧𑀘𑁆𑀘𑀬𑁄 𑀬𑁂𑀦 𑀫𑀺𑀥𑁂𑀓𑀘𑁆𑀘𑀲𑁆𑀲 𑀢𑀸𑀤𑀺𑀲𑀁𑀬𑁂𑀯 𑀤𑀸𑀦𑀁 𑀤𑀺𑀦𑁆𑀦𑀁 𑀫𑀳𑀧𑁆𑀨𑀮𑀁 𑀳𑁄𑀢𑀺 𑀫𑀳𑀸𑀦𑀺𑀲𑀁𑀲’’𑀦𑁆𑀢𑀺. 𑀦𑀯𑀫𑀁.

𑁧𑁦. 𑀦𑀦𑁆𑀤𑀫𑀸𑀢𑀸𑀲𑀼𑀢𑁆𑀢𑀁

𑁫𑁩. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀆𑀬𑀲𑁆𑀫𑀸 𑀘 𑀲𑀸𑀭𑀺𑀧𑀼𑀢𑁆𑀢𑁄 𑀆𑀬𑀲𑁆𑀫𑀸 𑀘 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑁄 𑀤𑀓𑁆𑀔𑀺𑀡𑀸𑀕𑀺𑀭𑀺𑀲𑁆𑀫𑀺𑀁 𑀘𑀸𑀭𑀺𑀓𑀁 𑀘𑀭𑀦𑁆𑀢𑀺 𑀫𑀳𑀢𑀸 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀲𑀤𑁆𑀥𑀺𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑁂𑀴𑀼𑀓𑀡𑁆𑀟𑀓𑀻 [𑀯𑁂𑀴𑀼𑀓𑀡𑁆𑀟𑀓𑀻 (𑀲𑁆𑀬𑀸.) 𑀅. 𑀦𑀺. 𑁬.𑁩𑁭; 𑁨.𑁧𑁩𑁪; 𑀲𑀁. 𑀦𑀺. 𑁨.𑁧𑁭𑁩 𑀧𑀲𑁆𑀲𑀺𑀢𑀩𑁆𑀩𑀁] 𑀦𑀦𑁆𑀤𑀫𑀸𑀢𑀸 𑀉𑀧𑀸𑀲𑀺𑀓𑀸 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀼𑀝𑁆𑀞𑀸𑀬 𑀧𑀸𑀭𑀸𑀬𑀦𑀁 [𑀘𑀽𑀴𑀦𑀺. 𑀧𑀸𑀭𑀸𑀬𑀦𑀯𑀕𑁆𑀕, 𑀯𑀢𑁆𑀣𑀼𑀕𑀸𑀣𑀸] 𑀲𑀭𑁂𑀦 𑀪𑀸𑀲𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑁂𑀲𑁆𑀲𑀯𑀡𑁄 𑀫𑀳𑀸𑀭𑀸𑀚𑀸 𑀉𑀢𑁆𑀢𑀭𑀸𑀬 𑀤𑀺𑀲𑀸𑀬 𑀤𑀓𑁆𑀔𑀺𑀡𑀁 𑀤𑀺𑀲𑀁 𑀕𑀘𑁆𑀙𑀢𑀺 𑀓𑁂𑀦𑀘𑀺𑀤𑁂𑀯 𑀓𑀭𑀡𑀻𑀬𑁂𑀦. 𑀅𑀲𑁆𑀲𑁄𑀲𑀺 𑀔𑁄 𑀯𑁂𑀲𑁆𑀲𑀯𑀡𑁄 𑀫𑀳𑀸𑀭𑀸𑀚𑀸 𑀦𑀦𑁆𑀤𑀫𑀸𑀢𑀸𑀬 𑀉𑀧𑀸𑀲𑀺𑀓𑀸𑀬 𑀧𑀸𑀭𑀸𑀬𑀦𑀁 𑀲𑀭𑁂𑀦 𑀪𑀸𑀲𑀦𑁆𑀢𑀺𑀬𑀸, 𑀲𑀼𑀢𑁆𑀯𑀸 𑀓𑀣𑀸𑀧𑀭𑀺𑀬𑁄𑀲𑀸𑀦𑀁 𑀆𑀕𑀫𑀬𑀫𑀸𑀦𑁄 𑀅𑀝𑁆𑀞𑀸𑀲𑀺.

𑀅𑀣 𑀔𑁄 𑀦𑀦𑁆𑀤𑀫𑀸𑀢𑀸 𑀉𑀧𑀸𑀲𑀺𑀓𑀸 𑀧𑀸𑀭𑀸𑀬𑀦𑀁 𑀲𑀭𑁂𑀦 𑀪𑀸𑀲𑀺𑀢𑁆𑀯𑀸 𑀢𑀼𑀡𑁆𑀳𑀻 𑀅𑀳𑁄𑀲𑀺. 𑀅𑀣 𑀔𑁄 𑀯𑁂𑀲𑁆𑀲𑀯𑀡𑁄 𑀫𑀳𑀸𑀭𑀸𑀚𑀸 𑀦𑀦𑁆𑀤𑀫𑀸𑀢𑀸𑀬 𑀉𑀧𑀸𑀲𑀺𑀓𑀸𑀬 𑀓𑀣𑀸𑀧𑀭𑀺𑀬𑁄𑀲𑀸𑀦𑀁 𑀯𑀺𑀤𑀺𑀢𑁆𑀯𑀸 𑀅𑀩𑁆𑀪𑀸𑀦𑀼𑀫𑁄𑀤𑀺 𑁋 ‘‘𑀲𑀸𑀥𑀼 𑀪𑀕𑀺𑀦𑀺, 𑀲𑀸𑀥𑀼 𑀪𑀕𑀺𑀦𑀻’’𑀢𑀺! ‘‘𑀓𑁄 𑀧𑀦𑁂𑀲𑁄, 𑀪𑀤𑁆𑀭𑀫𑀼𑀔𑀸’’𑀢𑀺? ‘‘𑀅𑀳𑀁 𑀢𑁂, 𑀪𑀕𑀺𑀦𑀺, 𑀪𑀸𑀢𑀸 𑀯𑁂𑀲𑁆𑀲𑀯𑀡𑁄, 𑀫𑀳𑀸𑀭𑀸𑀚𑀸’’𑀢𑀺. ‘‘𑀲𑀸𑀥𑀼, 𑀪𑀤𑁆𑀭𑀫𑀼𑀔, 𑀢𑁂𑀦 𑀳𑀺 𑀬𑁄 𑀫𑁂 𑀅𑀬𑀁 𑀥𑀫𑁆𑀫𑀧𑀭𑀺𑀬𑀸𑀬𑁄 𑀪𑀡𑀺𑀢𑁄 𑀇𑀤𑀁 𑀢𑁂 𑀳𑁄𑀢𑀼 𑀆𑀢𑀺𑀣𑁂𑀬𑁆𑀬’’𑀦𑁆𑀢𑀺. ‘‘𑀲𑀸𑀥𑀼, 𑀪𑀕𑀺𑀦𑀺, 𑀏𑀢𑀜𑁆𑀘𑁂𑀯 𑀫𑁂 𑀳𑁄𑀢𑀼 𑀆𑀢𑀺𑀣𑁂𑀬𑁆𑀬𑀁. 𑀲𑁆𑀯𑁂𑀯 [𑀲𑁆𑀯𑁂 𑀘 (𑀲𑀻.)] 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀧𑁆𑀧𑀫𑀼𑀔𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀅𑀓𑀢𑀧𑀸𑀢𑀭𑀸𑀲𑁄 𑀯𑁂𑀴𑀼𑀓𑀡𑁆𑀟𑀓𑀁 𑀆𑀕𑀫𑀺𑀲𑁆𑀲𑀢𑀺, 𑀢𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀯𑀺𑀲𑀺𑀢𑁆𑀯𑀸 𑀫𑀫 𑀤𑀓𑁆𑀔𑀺𑀡𑀁 𑀆𑀤𑀺𑀲𑁂𑀬𑁆𑀬𑀸𑀲𑀺. 𑀏𑀢𑀜𑁆𑀘𑁂𑀯 [𑀏𑀯𑀜𑁆𑀘 (𑀲𑀻. 𑀲𑁆𑀬𑀸.), 𑀏𑀢𑀜𑁆𑀘 (?)] 𑀫𑁂 𑀪𑀯𑀺𑀲𑁆𑀲𑀢𑀺 𑀆𑀢𑀺𑀣𑁂𑀬𑁆𑀬’’𑀦𑁆𑀢𑀺.

𑀅𑀣 𑀔𑁄 𑀦𑀦𑁆𑀤𑀫𑀸𑀢𑀸 𑀉𑀧𑀸𑀲𑀺𑀓𑀸 𑀢𑀲𑁆𑀲𑀸 𑀭𑀢𑁆𑀢𑀺𑀬𑀸 𑀅𑀘𑁆𑀘𑀬𑁂𑀦 𑀲𑀓𑁂 𑀦𑀺𑀯𑁂𑀲𑀦𑁂 𑀧𑀡𑀻𑀢𑀁 𑀔𑀸𑀤𑀦𑀻𑀬𑀁 𑀪𑁄𑀚𑀦𑀻𑀬𑀁 𑀧𑀝𑀺𑀬𑀸𑀤𑀸𑀧𑁂𑀲𑀺. 𑀅𑀣 𑀔𑁄 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀧𑁆𑀧𑀫𑀼𑀔𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀅𑀓𑀢𑀧𑀸𑀢𑀭𑀸𑀲𑁄 𑀬𑁂𑀦 𑀯𑁂𑀴𑀼𑀓𑀡𑁆𑀟𑀓𑁄 𑀢𑀤𑀯𑀲𑀭𑀺. 𑀅𑀣 𑀔𑁄 𑀦𑀦𑁆𑀤𑀫𑀸𑀢𑀸 𑀉𑀧𑀸𑀲𑀺𑀓𑀸 𑀅𑀜𑁆𑀜𑀢𑀭𑀁 𑀧𑀼𑀭𑀺𑀲𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀳𑀺 𑀢𑁆𑀯𑀁, 𑀅𑀫𑁆𑀪𑁄 𑀧𑀼𑀭𑀺𑀲, 𑀆𑀭𑀸𑀫𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀓𑀸𑀮𑀁 𑀆𑀭𑁄𑀘𑁂𑀳𑀺 𑁋 ‘𑀓𑀸𑀮𑁄, 𑀪𑀦𑁆𑀢𑁂, 𑀅𑀬𑁆𑀬𑀸𑀬 𑀦𑀦𑁆𑀤𑀫𑀸𑀢𑀼𑀬𑀸 𑀦𑀺𑀯𑁂𑀲𑀦𑁂 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢’’’𑀦𑁆𑀢𑀺. ‘‘𑀏𑀯𑀁, 𑀅𑀬𑁆𑀬𑁂’’𑀢𑀺 𑀔𑁄 𑀲𑁄 𑀧𑀼𑀭𑀺𑀲𑁄 𑀦𑀦𑁆𑀤𑀫𑀸𑀢𑀸𑀬 𑀉𑀧𑀸𑀲𑀺𑀓𑀸𑀬 𑀧𑀝𑀺𑀲𑁆𑀲𑀼𑀢𑁆𑀯𑀸 𑀆𑀭𑀸𑀫𑀁 𑀕𑀦𑁆𑀢𑁆𑀯𑀸 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀓𑀸𑀮𑀁 𑀆𑀭𑁄𑀘𑁂𑀲𑀺 𑁋 ‘‘𑀓𑀸𑀮𑁄, 𑀪𑀦𑁆𑀢𑁂, 𑀅𑀬𑁆𑀬𑀸𑀬 𑀦𑀦𑁆𑀤𑀫𑀸𑀢𑀼𑀬𑀸 𑀦𑀺𑀯𑁂𑀲𑀦𑁂 𑀦𑀺𑀝𑁆𑀞𑀺𑀢𑀁 𑀪𑀢𑁆𑀢’’𑀦𑁆𑀢𑀺. 𑀅𑀣 𑀔𑁄 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀧𑁆𑀧𑀫𑀼𑀔𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀧𑀼𑀩𑁆𑀩𑀡𑁆𑀳𑀲𑀫𑀬𑀁 𑀦𑀺𑀯𑀸𑀲𑁂𑀢𑁆𑀯𑀸 𑀧𑀢𑁆𑀢𑀘𑀻𑀯𑀭𑀫𑀸𑀤𑀸𑀬 𑀬𑁂𑀦 𑀦𑀦𑁆𑀤𑀫𑀸𑀢𑀸𑀬 𑀉𑀧𑀸𑀲𑀺𑀓𑀸𑀬 𑀦𑀺𑀯𑁂𑀲𑀦𑀁 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀜𑁆𑀜𑀢𑁆𑀢𑁂 𑀆𑀲𑀦𑁂 𑀦𑀺𑀲𑀻𑀤𑀺. 𑀅𑀣 𑀔𑁄 𑀦𑀦𑁆𑀤𑀫𑀸𑀢𑀸 𑀉𑀧𑀸𑀲𑀺𑀓𑀸 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀧𑁆𑀧𑀫𑀼𑀔𑀁 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀡𑀻𑀢𑁂𑀦 𑀔𑀸𑀤𑀦𑀻𑀬𑁂𑀦 𑀪𑁄𑀚𑀦𑀻𑀬𑁂𑀦 𑀲𑀳𑀢𑁆𑀣𑀸 𑀲𑀦𑁆𑀢𑀧𑁆𑀧𑁂𑀲𑀺 𑀲𑀫𑁆𑀧𑀯𑀸𑀭𑁂𑀲𑀺.

𑀅𑀣 𑀔𑁄 𑀦𑀦𑁆𑀤𑀫𑀸𑀢𑀸 𑀉𑀧𑀸𑀲𑀺𑀓𑀸 𑀆𑀬𑀲𑁆𑀫𑀦𑁆𑀢𑀁 𑀲𑀸𑀭𑀺𑀧𑀼𑀢𑁆𑀢𑀁 𑀪𑀼𑀢𑁆𑀢𑀸𑀯𑀺𑀁 𑀑𑀦𑀻𑀢𑀧𑀢𑁆𑀢𑀧𑀸𑀡𑀺𑀁 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑀁 𑀔𑁄 𑀦𑀦𑁆𑀤𑀫𑀸𑀢𑀭𑀁 𑀉𑀧𑀸𑀲𑀺𑀓𑀁 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀏𑀢𑀤𑀯𑁄𑀘 𑁋 ‘‘𑀓𑁄 𑀧𑀦 𑀢𑁂, 𑀦𑀦𑁆𑀤𑀫𑀸𑀢𑁂, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀅𑀩𑁆𑀪𑀸𑀕𑀫𑀦𑀁 𑀆𑀭𑁄𑀘𑁂𑀲𑀻’’𑀢𑀺?

‘‘𑀇𑀥𑀸𑀳𑀁, 𑀪𑀦𑁆𑀢𑁂, 𑀭𑀢𑁆𑀢𑀺𑀬𑀸 𑀧𑀘𑁆𑀘𑀽𑀲𑀲𑀫𑀬𑀁 𑀧𑀘𑁆𑀘𑀼𑀝𑁆𑀞𑀸𑀬 𑀧𑀸𑀭𑀸𑀬𑀦𑀁 𑀲𑀭𑁂𑀦 𑀪𑀸𑀲𑀺𑀢𑁆𑀯𑀸 𑀢𑀼𑀡𑁆𑀳𑀻 𑀅𑀳𑁄𑀲𑀺𑀁. 𑀅𑀣 𑀔𑁄, 𑀪𑀦𑁆𑀢𑁂, 𑀯𑁂𑀲𑁆𑀲𑀯𑀡𑁄 𑀫𑀳𑀸𑀭𑀸𑀚𑀸 𑀫𑀫 𑀓𑀣𑀸𑀧𑀭𑀺𑀬𑁄𑀲𑀸𑀦𑀁 𑀯𑀺𑀤𑀺𑀢𑁆𑀯𑀸 𑀅𑀩𑁆𑀪𑀸𑀦𑀼𑀫𑁄𑀤𑀺 𑁋 ‘𑀲𑀸𑀥𑀼, 𑀪𑀕𑀺𑀦𑀺, 𑀲𑀸𑀥𑀼, 𑀪𑀕𑀺𑀦𑀻’𑀢𑀺! ‘𑀓𑁄 𑀧𑀦𑁂𑀲𑁄, 𑀪𑀤𑁆𑀭𑀫𑀼𑀔𑀸’𑀢𑀺? ‘𑀅𑀳𑀁 𑀢𑁂, 𑀪𑀕𑀺𑀦𑀺, 𑀪𑀸𑀢𑀸 𑀯𑁂𑀲𑁆𑀲𑀯𑀡𑁄, 𑀫𑀳𑀸𑀭𑀸𑀚𑀸’𑀢𑀺. ‘𑀲𑀸𑀥𑀼, 𑀪𑀤𑁆𑀭𑀫𑀼𑀔, 𑀢𑁂𑀦 𑀳𑀺 𑀬𑁄 𑀫𑁂 𑀅𑀬𑀁 𑀥𑀫𑁆𑀫𑀧𑀭𑀺𑀬𑀸𑀬𑁄 𑀪𑀡𑀺𑀢𑁄 𑀇𑀤𑀁 𑀢𑁂 𑀳𑁄𑀢𑀼 𑀆𑀢𑀺𑀣𑁂𑀬𑁆𑀬’𑀦𑁆𑀢𑀺. ‘𑀲𑀸𑀥𑀼, 𑀪𑀕𑀺𑀦𑀺, 𑀏𑀢𑀜𑁆𑀘𑁂𑀯 𑀫𑁂 𑀳𑁄𑀢𑀼 𑀆𑀢𑀺𑀣𑁂𑀬𑁆𑀬𑀁. 𑀲𑁆𑀯𑁂𑀯 𑀲𑀸𑀭𑀺𑀧𑀼𑀢𑁆𑀢𑀫𑁄𑀕𑁆𑀕𑀮𑁆𑀮𑀸𑀦𑀧𑁆𑀧𑀫𑀼𑀔𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀅𑀓𑀢𑀧𑀸𑀢𑀭𑀸𑀲𑁄 𑀯𑁂𑀴𑀼𑀓𑀡𑁆𑀟𑀓𑀁 𑀆𑀕𑀫𑀺𑀲𑁆𑀲𑀢𑀺, 𑀢𑀜𑁆𑀘 𑀪𑀺𑀓𑁆𑀔𑀼𑀲𑀗𑁆𑀖𑀁 𑀧𑀭𑀺𑀯𑀺𑀲𑀺𑀢𑁆𑀯𑀸 𑀫𑀫 𑀤𑀓𑁆𑀔𑀺𑀡𑀁 𑀆𑀤𑀺𑀲𑁂𑀬𑁆𑀬𑀸𑀲𑀺. 𑀏𑀢𑀜𑁆𑀘𑁂𑀯 [𑀏𑀢𑀜𑁆𑀘 (𑀲𑀻.), 𑀏𑀯𑀜𑁆𑀘 (𑀲𑁆𑀬𑀸.)] 𑀫𑁂 𑀪𑀯𑀺𑀲𑁆𑀲𑀢𑀺 𑀆𑀢𑀺𑀣𑁂𑀬𑁆𑀬’𑀦𑁆𑀢𑀺. 𑀬𑀤𑀺𑀤𑀁 [𑀬𑀫𑀺𑀤𑀁 (𑀫. 𑀦𑀺. 𑁧.𑁩𑁬𑁩)], 𑀪𑀦𑁆𑀢𑁂, 𑀤𑀸𑀦𑁂 [𑀧𑀼𑀜𑁆𑀜𑀁 𑀳𑀺 𑀢𑀁 (𑀲𑀻.), 𑀧𑀼𑀜𑁆𑀜𑀁 𑀧𑀼𑀜𑁆𑀜𑀫𑀳𑀺𑀢𑀁 (𑀲𑁆𑀬𑀸.), 𑀧𑀼𑀜𑁆𑀜𑀁 𑀯𑀸 𑀧𑀼𑀜𑁆𑀜𑀫𑀳𑀁 𑀯𑀸 (𑀧𑀻.), 𑀧𑀼𑀜𑁆𑀜𑀁 𑀯𑀸 𑀧𑀼𑀜𑁆𑀜𑀫𑀳𑀻 𑀯𑀸 (𑀓.)] 𑀧𑀼𑀜𑁆𑀜𑀜𑁆𑀘 𑀧𑀼𑀜𑁆𑀜𑀫𑀳𑀻 𑀘 𑀢𑀁 [𑀧𑀼𑀜𑁆𑀜𑀁 𑀳𑀺 𑀢𑀁 (𑀲𑀻.), 𑀧𑀼𑀜𑁆𑀜𑀁 𑀧𑀼𑀜𑁆𑀜𑀫𑀳𑀺𑀢𑀁 (𑀲𑁆𑀬𑀸.), 𑀧𑀼𑀜𑁆𑀜𑀁 𑀯𑀸 𑀧𑀼𑀜𑁆𑀜𑀫𑀳𑀁 𑀯𑀸 (𑀧𑀻.), 𑀧𑀼𑀜𑁆𑀜𑀁 𑀯𑀸 𑀧𑀼𑀜𑁆𑀜𑀫𑀳𑀻 𑀯𑀸 (𑀓.)] 𑀯𑁂𑀲𑁆𑀲𑀯𑀡𑀲𑁆𑀲 𑀫𑀳𑀸𑀭𑀸𑀚𑀲𑁆𑀲 𑀲𑀼𑀔𑀸𑀬 𑀳𑁄𑀢𑀽’’𑀢𑀺.

‘‘𑀅𑀘𑁆𑀙𑀭𑀺𑀬𑀁, 𑀦𑀦𑁆𑀤𑀫𑀸𑀢𑁂, 𑀅𑀩𑁆𑀪𑀼𑀢𑀁, 𑀦𑀦𑁆𑀤𑀫𑀸𑀢𑁂! 𑀬𑀢𑁆𑀭 𑀳𑀺 𑀦𑀸𑀫 𑀯𑁂𑀲𑁆𑀲𑀯𑀡𑁂𑀦 𑀫𑀳𑀸𑀭𑀸𑀚𑁂𑀦 𑀏𑀯𑀁𑀫𑀳𑀺𑀤𑁆𑀥𑀺𑀓𑁂𑀦 𑀏𑀯𑀁𑀫𑀳𑁂𑀲𑀓𑁆𑀔𑁂𑀦 𑀤𑁂𑀯𑀧𑀼𑀢𑁆𑀢𑁂𑀦 𑀲𑀫𑁆𑀫𑀼𑀔𑀸 𑀲𑀮𑁆𑀮𑀧𑀺𑀲𑁆𑀲𑀲𑀻’’𑀢𑀺.

‘‘𑀦 𑀔𑁄 𑀫𑁂, 𑀪𑀦𑁆𑀢𑁂, 𑀏𑀲𑁂𑀯 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄. 𑀅𑀢𑁆𑀣𑀺 𑀫𑁂 𑀅𑀜𑁆𑀜𑁄𑀧𑀺 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄. 𑀇𑀥 𑀫𑁂, 𑀪𑀦𑁆𑀢𑁂, 𑀦𑀦𑁆𑀤𑁄 𑀦𑀸𑀫 𑀏𑀓𑀧𑀼𑀢𑁆𑀢𑀓𑁄 𑀧𑀺𑀬𑁄 𑀫𑀦𑀸𑀧𑁄. 𑀢𑀁 𑀭𑀸𑀚𑀸𑀦𑁄 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀧𑀓𑀭𑀡𑁂 𑀑𑀓𑀲𑁆𑀲 𑀧𑀲𑀬𑁆𑀳 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀲𑀼𑀁. 𑀢𑀲𑁆𑀫𑀺𑀁 𑀔𑁄 𑀧𑀦𑀸𑀳𑀁, 𑀪𑀦𑁆𑀢𑁂, 𑀤𑀸𑀭𑀓𑁂 𑀕𑀳𑀺𑀢𑁂 𑀯𑀸 𑀕𑀬𑁆𑀳𑀫𑀸𑀦𑁂 𑀯𑀸 𑀯𑀥𑁂 𑀯𑀸 𑀯𑀚𑁆𑀛𑀫𑀸𑀦𑁂 𑀯𑀸 𑀳𑀢𑁂 𑀯𑀸 𑀳𑀜𑁆𑀜𑀫𑀸𑀦𑁂 𑀯𑀸 𑀦𑀸𑀪𑀺𑀚𑀸𑀦𑀸𑀫𑀺 𑀘𑀺𑀢𑁆𑀢𑀲𑁆𑀲 𑀅𑀜𑁆𑀜𑀣𑀢𑁆𑀢’’𑀦𑁆𑀢𑀺. ‘‘𑀅𑀘𑁆𑀙𑀭𑀺𑀬𑀁, 𑀦𑀦𑁆𑀤𑀫𑀸𑀢𑁂, 𑀅𑀩𑁆𑀪𑀼𑀢𑀁 𑀦𑀦𑁆𑀤𑀫𑀸𑀢𑁂! 𑀬𑀢𑁆𑀭 𑀳𑀺 𑀦𑀸𑀫 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑁆𑀧𑀺 [𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑀫𑁆𑀧𑀺 (𑀲𑁆𑀬𑀸.)] 𑀧𑀭𑀺𑀲𑁄𑀥𑁂𑀲𑁆𑀲𑀲𑀻’’𑀢𑀺.

‘‘𑀦 𑀔𑁄 𑀫𑁂, 𑀪𑀦𑁆𑀢𑁂, 𑀏𑀲𑁂𑀯 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄. 𑀅𑀢𑁆𑀣𑀺 𑀫𑁂 𑀅𑀜𑁆𑀜𑁄𑀧𑀺 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄. 𑀇𑀥 𑀫𑁂, 𑀪𑀦𑁆𑀢𑁂, 𑀲𑀸𑀫𑀺𑀓𑁄 𑀓𑀸𑀮𑀗𑁆𑀓𑀢𑁄 𑀅𑀜𑁆𑀜𑀢𑀭𑀁 𑀬𑀓𑁆𑀔𑀬𑁄𑀦𑀺𑀁 𑀉𑀧𑀧𑀦𑁆𑀦𑁄. 𑀲𑁄 𑀫𑁂 𑀢𑁂𑀦𑁂𑀯 𑀧𑀼𑀭𑀺𑀫𑁂𑀦 𑀅𑀢𑁆𑀢𑀪𑀸𑀯𑁂𑀦 𑀉𑀤𑁆𑀤𑀲𑁆𑀲𑁂𑀲𑀺. 𑀦 𑀔𑁄 𑀧𑀦𑀸𑀳𑀁, 𑀪𑀦𑁆𑀢𑁂, 𑀅𑀪𑀺𑀚𑀸𑀦𑀸𑀫𑀺 𑀢𑀢𑁄𑀦𑀺𑀤𑀸𑀦𑀁 𑀘𑀺𑀢𑁆𑀢𑀲𑁆𑀲 𑀅𑀜𑁆𑀜𑀣𑀢𑁆𑀢’’𑀦𑁆𑀢𑀺. ‘‘𑀅𑀘𑁆𑀙𑀭𑀺𑀬𑀁, 𑀦𑀦𑁆𑀤𑀫𑀸𑀢𑁂, 𑀅𑀩𑁆𑀪𑀼𑀢𑀁, 𑀦𑀦𑁆𑀤𑀫𑀸𑀢𑁂! 𑀬𑀢𑁆𑀭 𑀳𑀺 𑀦𑀸𑀫 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑁆𑀧𑀺 𑀧𑀭𑀺𑀲𑁄𑀥𑁂𑀲𑁆𑀲𑀲𑀻’’𑀢𑀺.

‘‘𑀦 𑀔𑁄 𑀫𑁂, 𑀪𑀦𑁆𑀢𑁂, 𑀏𑀲𑁂𑀯 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄. 𑀅𑀢𑁆𑀣𑀺 𑀫𑁂 𑀅𑀜𑁆𑀜𑁄𑀧𑀺 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄. 𑀬𑀢𑁄𑀳𑀁, 𑀪𑀦𑁆𑀢𑁂, 𑀲𑀸𑀫𑀺𑀓𑀲𑁆𑀲 𑀤𑀳𑀭𑀲𑁆𑀲𑁂𑀯 𑀤𑀳𑀭𑀸 𑀆𑀦𑀻𑀢𑀸 𑀦𑀸𑀪𑀺𑀚𑀸𑀦𑀸𑀫𑀺 𑀲𑀸𑀫𑀺𑀓𑀁 𑀫𑀦𑀲𑀸𑀧𑀺 𑀅𑀢𑀺𑀘𑀭𑀺𑀢𑀸 [𑀅𑀢𑀺𑀘𑀭𑀺𑀢𑀼𑀁 (𑀲𑁆𑀬𑀸.), 𑀅𑀢𑀺𑀘𑀸𑀭𑀺𑀢𑁆𑀢𑀁 (𑀓.)], 𑀓𑀼𑀢𑁄 𑀧𑀦 𑀓𑀸𑀬𑁂𑀦𑀸’’𑀢𑀺! ‘‘𑀅𑀘𑁆𑀙𑀭𑀺𑀬𑀁, 𑀦𑀦𑁆𑀤𑀫𑀸𑀢𑁂, 𑀅𑀩𑁆𑀪𑀼𑀢𑀁, 𑀦𑀦𑁆𑀤𑀫𑀸𑀢𑁂! 𑀬𑀢𑁆𑀭 𑀳𑀺 𑀦𑀸𑀫 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑁆𑀧𑀺 𑀧𑀭𑀺𑀲𑁄𑀥𑁂𑀲𑁆𑀲𑀲𑀻’’𑀢𑀺.

‘‘𑀦 𑀔𑁄 𑀫𑁂, 𑀪𑀦𑁆𑀢𑁂, 𑀏𑀲𑁂𑀯 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄. 𑀅𑀢𑁆𑀣𑀺 𑀫𑁂 𑀅𑀜𑁆𑀜𑁄𑀧𑀺 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄. 𑀬𑀤𑀸𑀳𑀁, 𑀪𑀦𑁆𑀢𑁂, 𑀉𑀧𑀸𑀲𑀺𑀓𑀸 𑀧𑀝𑀺𑀤𑁂𑀲𑀺𑀢𑀸 𑀦𑀸𑀪𑀺𑀚𑀸𑀦𑀸𑀫𑀺 𑀓𑀺𑀜𑁆𑀘𑀺 𑀲𑀺𑀓𑁆𑀔𑀸𑀧𑀤𑀁 𑀲𑀜𑁆𑀘𑀺𑀘𑁆𑀘 𑀯𑀻𑀢𑀺𑀓𑁆𑀓𑀫𑀺𑀢𑀸’’𑀢𑀺. ‘‘𑀅𑀘𑁆𑀙𑀭𑀺𑀬𑀁, 𑀦𑀦𑁆𑀤𑀫𑀸𑀢𑁂, 𑀅𑀩𑁆𑀪𑀼𑀢𑀁, 𑀦𑀦𑁆𑀤𑀫𑀸𑀢𑁂’’𑀢𑀺!

‘‘𑀦 𑀔𑁄 𑀫𑁂, 𑀪𑀦𑁆𑀢𑁂, 𑀏𑀲𑁂𑀯 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄. 𑀅𑀢𑁆𑀣𑀺 𑀫𑁂 𑀅𑀜𑁆𑀜𑁄𑀧𑀺 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄. 𑀇𑀥𑀸𑀳𑀁, 𑀪𑀦𑁆𑀢𑁂, 𑀬𑀸𑀯𑀤𑁂𑀯 [𑀬𑀸𑀯𑀤𑁂𑀯 (𑀲𑀻. 𑀲𑁆𑀬𑀸.) 𑀲𑀁. 𑀦𑀺. 𑁨.𑁧𑁫𑁨 𑀧𑀸𑀴𑀺 𑀘 𑀅𑀝𑁆𑀞𑀓𑀣𑀸𑀝𑀻𑀓𑀸 𑀘 𑀧𑀲𑁆𑀲𑀺𑀢𑀩𑁆𑀩𑀸] 𑀆𑀓𑀗𑁆𑀔𑀸𑀫𑀺 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺 𑀯𑀺𑀯𑀺𑀘𑁆𑀘 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺 𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺. 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀦𑀁 𑀯𑀽𑀧𑀲𑀫𑀸 𑀅𑀚𑁆𑀛𑀢𑁆𑀢𑀁 𑀲𑀫𑁆𑀧𑀲𑀸𑀤𑀦𑀁 𑀘𑁂𑀢𑀲𑁄 𑀏𑀓𑁄𑀤𑀺𑀪𑀸𑀯𑀁 𑀅𑀯𑀺𑀢𑀓𑁆𑀓𑀁 𑀅𑀯𑀺𑀘𑀸𑀭𑀁 𑀯𑀺𑀯𑁂𑀓𑀚𑀁 𑀧𑀻𑀢𑀺𑀲𑀼𑀔𑀁 𑀤𑀼𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺. 𑀧𑀻𑀢𑀺𑀬𑀸 𑀘 𑀯𑀺𑀭𑀸𑀕𑀸 𑀉𑀧𑁂𑀓𑁆𑀔𑀺𑀓𑀸 𑀘 𑀯𑀺𑀳𑀭𑀸𑀫𑀺 𑀲𑀢𑀸 𑀘 𑀲𑀫𑁆𑀧𑀚𑀸𑀦𑀸 𑀲𑀼𑀔𑀜𑁆𑀘 𑀓𑀸𑀬𑁂 𑀧𑀝𑀺𑀲𑀁𑀯𑁂𑀤𑁂𑀫𑀺, 𑀬𑀁 𑀢𑀁 𑀅𑀭𑀺𑀬𑀸 𑀆𑀘𑀺𑀓𑁆𑀔𑀦𑁆𑀢𑀺 𑁋 ‘𑀉𑀧𑁂𑀓𑁆𑀔𑀓𑁄 𑀲𑀢𑀺𑀫𑀸 𑀲𑀼𑀔𑀯𑀺𑀳𑀸𑀭𑀻’𑀢𑀺 𑀢𑀢𑀺𑀬𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀺. 𑀲𑀼𑀔𑀲𑁆𑀲 𑀘 𑀧𑀳𑀸𑀦𑀸 𑀤𑀼𑀓𑁆𑀔𑀲𑁆𑀲 𑀘 𑀧𑀳𑀸𑀦𑀸 𑀧𑀼𑀩𑁆𑀩𑁂𑀯 𑀲𑁄𑀫𑀦𑀲𑁆𑀲𑀤𑁄𑀫𑀦𑀲𑁆𑀲𑀸𑀦𑀁 𑀅𑀢𑁆𑀣𑀗𑁆𑀕𑀫𑀸 𑀅𑀤𑀼𑀓𑁆𑀔𑀫𑀲𑀼𑀔𑀁 𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀁 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀸𑀫𑀻’’𑀢𑀺. ‘‘𑀅𑀘𑁆𑀙𑀭𑀺𑀬𑀁, 𑀦𑀦𑁆𑀤𑀫𑀸𑀢𑁂, 𑀅𑀩𑁆𑀪𑀼𑀢𑀁, 𑀦𑀦𑁆𑀤𑀫𑀸𑀢𑁂’’𑀢𑀺!

‘‘𑀦 𑀔𑁄 𑀫𑁂, 𑀪𑀦𑁆𑀢𑁂, 𑀏𑀲𑁂𑀯 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄. 𑀅𑀢𑁆𑀣𑀺 𑀫𑁂 𑀅𑀜𑁆𑀜𑁄𑀧𑀺 𑀅𑀘𑁆𑀙𑀭𑀺𑀬𑁄 𑀅𑀩𑁆𑀪𑀼𑀢𑁄 𑀥𑀫𑁆𑀫𑁄. 𑀬𑀸𑀦𑀺𑀫𑀸𑀦𑀺, 𑀪𑀦𑁆𑀢𑁂, 𑀪𑀕𑀯𑀢𑀸 𑀤𑁂𑀲𑀺𑀢𑀸𑀦𑀺 𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀺 𑀦𑀸𑀳𑀁 𑀢𑁂𑀲𑀁 𑀓𑀺𑀜𑁆𑀘𑀺 𑀅𑀢𑁆𑀢𑀦𑀺 𑀅𑀧𑁆𑀧𑀳𑀻𑀦𑀁 𑀲𑀫𑀦𑀼𑀧𑀲𑁆𑀲𑀸𑀫𑀻’’𑀢𑀺. ‘‘𑀅𑀘𑁆𑀙𑀭𑀺𑀬𑀁, 𑀦𑀦𑁆𑀤𑀫𑀸𑀢𑁂, 𑀅𑀩𑁆𑀪𑀼𑀢𑀁, 𑀦𑀦𑁆𑀤𑀫𑀸𑀢𑁂’’𑀢𑀺!

𑀅𑀣 𑀔𑁄 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀦𑀦𑁆𑀤𑀫𑀸𑀢𑀭𑀁 𑀉𑀧𑀸𑀲𑀺𑀓𑀁 𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀢𑁆𑀯𑀸 𑀲𑀫𑀸𑀤𑀧𑁂𑀢𑁆𑀯𑀸 𑀲𑀫𑀼𑀢𑁆𑀢𑁂𑀚𑁂𑀢𑁆𑀯𑀸 𑀲𑀫𑁆𑀧𑀳𑀁𑀲𑁂𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀻𑀢𑀺. 𑀤𑀲𑀫𑀁.

𑀫𑀳𑀸𑀬𑀜𑁆𑀜𑀯𑀕𑁆𑀕𑁄 𑀧𑀜𑁆𑀘𑀫𑁄.