𑁭. 𑀲𑀜𑁆𑀜𑀸𑀲𑀼𑀢𑁆𑀢𑀁

𑁨𑁭. ‘‘𑀲𑀢𑁆𑀢 𑀯𑁄, 𑀪𑀺𑀓𑁆𑀔𑀯𑁂, 𑀅𑀧𑀭𑀺𑀳𑀸𑀦𑀺𑀬𑁂 𑀥𑀫𑁆𑀫𑁂 𑀤𑁂𑀲𑁂𑀲𑁆𑀲𑀸𑀫𑀺. 𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣…𑀧𑁂…. 𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀅𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸? 𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀅𑀦𑀺𑀘𑁆𑀘𑀲𑀜𑁆𑀜𑀁 𑀪𑀸𑀯𑁂𑀲𑁆𑀲𑀦𑁆𑀢𑀺; 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀅𑀦𑀢𑁆𑀢𑀲𑀜𑁆𑀜𑀁 𑀪𑀸𑀯𑁂𑀲𑁆𑀲𑀦𑁆𑀢𑀺…𑀧𑁂… 𑀅𑀲𑀼𑀪𑀲𑀜𑁆𑀜𑀁 𑀪𑀸𑀯𑁂𑀲𑁆𑀲𑀦𑁆𑀢𑀺… 𑀆𑀤𑀻𑀦𑀯𑀲𑀜𑁆𑀜𑀁 𑀪𑀸𑀯𑁂𑀲𑁆𑀲𑀦𑁆𑀢𑀺… 𑀧𑀳𑀸𑀦𑀲𑀜𑁆𑀜𑀁 𑀪𑀸𑀯𑁂𑀲𑁆𑀲𑀦𑁆𑀢𑀺… 𑀯𑀺𑀭𑀸𑀕𑀲𑀜𑁆𑀜𑀁 𑀪𑀸𑀯𑁂𑀲𑁆𑀲𑀦𑁆𑀢𑀺… 𑀦𑀺𑀭𑁄𑀥𑀲𑀜𑁆𑀜𑀁 𑀪𑀸𑀯𑁂𑀲𑁆𑀲𑀦𑁆𑀢𑀺; 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺. ‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀇𑀫𑁂 𑀲𑀢𑁆𑀢 𑀅𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸 𑀪𑀺𑀓𑁆𑀔𑀽𑀲𑀼 𑀞𑀲𑁆𑀲𑀦𑁆𑀢𑀺, 𑀇𑀫𑁂𑀲𑀼 𑀘 𑀲𑀢𑁆𑀢𑀲𑀼 𑀅𑀧𑀭𑀺𑀳𑀸𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀼, 𑀪𑀺𑀓𑁆𑀔𑀽 𑀲𑀦𑁆𑀤𑀺𑀲𑁆𑀲𑀺𑀲𑁆𑀲𑀦𑁆𑀢𑀺; 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀻’’𑀢𑀺 [𑀤𑀻. 𑀦𑀺. 𑁨.𑁧𑁩𑁮]. 𑀲𑀢𑁆𑀢𑀫𑀁.