𑁩. 𑀯𑀚𑁆𑀚𑀺𑀲𑀢𑁆𑀢𑀓𑀯𑀕𑁆𑀕𑁄

𑁧. 𑀲𑀸𑀭𑀦𑁆𑀤𑀤𑀲𑀼𑀢𑁆𑀢𑀁

𑁨𑁧. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀲𑀸𑀭𑀦𑁆𑀤𑀤𑁂 𑀘𑁂𑀢𑀺𑀬𑁂. 𑀅𑀣 𑀔𑁄 𑀲𑀫𑁆𑀩𑀳𑀼𑀮𑀸 𑀮𑀺𑀘𑁆𑀙𑀯𑀻 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺𑀁𑀲𑀼; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺𑀁𑀲𑀼. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁂 𑀔𑁄 𑀢𑁂 𑀮𑀺𑀘𑁆𑀙𑀯𑀻 𑀪𑀕𑀯𑀸 𑀏𑀢𑀤𑀯𑁄𑀘 𑁋 ‘‘𑀲𑀢𑁆𑀢 𑀯𑁄, 𑀮𑀺𑀘𑁆𑀙𑀯𑀻, 𑀅𑀧𑀭𑀺𑀳𑀸𑀦𑀺𑀬𑁂 [𑀅𑀧𑀭𑀺𑀳𑀸𑀦𑀻𑀬𑁂 (𑀓.)] 𑀥𑀫𑁆𑀫𑁂 𑀤𑁂𑀲𑁂𑀲𑁆𑀲𑀸𑀫𑀺. 𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀮𑀺𑀘𑁆𑀙𑀯𑀻 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀓𑀢𑀫𑁂 𑀘, 𑀮𑀺𑀘𑁆𑀙𑀯𑀻, 𑀲𑀢𑁆𑀢 𑀅𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸? 𑀬𑀸𑀯𑀓𑀻𑀯𑀜𑁆𑀘, 𑀮𑀺𑀘𑁆𑀙𑀯𑀻, 𑀯𑀚𑁆𑀚𑀻 𑀅𑀪𑀺𑀡𑁆𑀳𑀁 𑀲𑀦𑁆𑀦𑀺𑀧𑀸𑀢𑀸 𑀪𑀯𑀺𑀲𑁆𑀲𑀦𑁆𑀢𑀺 𑀲𑀦𑁆𑀦𑀺𑀧𑀸𑀢𑀩𑀳𑀼𑀮𑀸; 𑀯𑀼𑀤𑁆𑀥𑀺𑀬𑁂𑀯, 𑀮𑀺𑀘𑁆𑀙𑀯𑀻, 𑀯𑀚𑁆𑀚𑀻𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀮𑀺𑀘𑁆𑀙𑀯𑀻, 𑀯𑀚𑁆𑀚𑀻 𑀲𑀫𑀕𑁆𑀕𑀸 𑀲𑀦𑁆𑀦𑀺𑀧𑀢𑀺𑀲𑁆𑀲𑀦𑁆𑀢𑀺, 𑀲𑀫𑀕𑁆𑀕𑀸 𑀯𑀼𑀝𑁆𑀞𑀳𑀺𑀲𑁆𑀲𑀦𑁆𑀢𑀺, 𑀲𑀫𑀕𑁆𑀕𑀸 𑀯𑀚𑁆𑀚𑀺𑀓𑀭𑀡𑀻𑀬𑀸𑀦𑀺 𑀓𑀭𑀺𑀲𑁆𑀲𑀦𑁆𑀢𑀺; 𑀯𑀼𑀤𑁆𑀥𑀺𑀬𑁂𑀯, 𑀮𑀺𑀘𑁆𑀙𑀯𑀻, 𑀯𑀚𑁆𑀚𑀻𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀮𑀺𑀘𑁆𑀙𑀯𑀻, 𑀯𑀚𑁆𑀚𑀻 𑀅𑀧𑀜𑁆𑀜𑀢𑁆𑀢𑀁 𑀦 𑀧𑀜𑁆𑀜𑀸𑀧𑁂𑀲𑁆𑀲𑀦𑁆𑀢𑀺, 𑀧𑀜𑁆𑀜𑀢𑁆𑀢𑀁 𑀦 𑀲𑀫𑀼𑀘𑁆𑀙𑀺𑀦𑁆𑀤𑀺𑀲𑁆𑀲𑀦𑁆𑀢𑀺, 𑀬𑀣𑀸𑀧𑀜𑁆𑀜𑀢𑁆𑀢𑁂 𑀧𑁄𑀭𑀸𑀡𑁂 𑀯𑀚𑁆𑀚𑀺𑀥𑀫𑁆𑀫𑁂 𑀲𑀫𑀸𑀤𑀸𑀬 𑀯𑀢𑁆𑀢𑀺𑀲𑁆𑀲𑀦𑁆𑀢𑀺; 𑀯𑀼𑀤𑁆𑀥𑀺𑀬𑁂𑀯, 𑀮𑀺𑀘𑁆𑀙𑀯𑀻, 𑀯𑀚𑁆𑀚𑀻𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀮𑀺𑀘𑁆𑀙𑀯𑀻, 𑀯𑀚𑁆𑀚𑀻 𑀬𑁂 𑀢𑁂 𑀯𑀚𑁆𑀚𑀻𑀦𑀁 𑀯𑀚𑁆𑀚𑀺𑀫𑀳𑀮𑁆𑀮𑀓𑀸 𑀢𑁂 𑀲𑀓𑁆𑀓𑀭𑀺𑀲𑁆𑀲𑀦𑁆𑀢𑀺 𑀕𑀭𑀼𑀁 𑀓𑀭𑀺𑀲𑁆𑀲𑀦𑁆𑀢𑀺 𑀫𑀸𑀦𑁂𑀲𑁆𑀲𑀦𑁆𑀢𑀺 𑀧𑀽𑀚𑁂𑀲𑁆𑀲𑀦𑁆𑀢𑀺, 𑀢𑁂𑀲𑀜𑁆𑀘 𑀲𑁄𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀦𑁆𑀢𑀺; 𑀯𑀼𑀤𑁆𑀥𑀺𑀬𑁂𑀯, 𑀮𑀺𑀘𑁆𑀙𑀯𑀻, 𑀯𑀚𑁆𑀚𑀻𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀮𑀺𑀘𑁆𑀙𑀯𑀻, 𑀯𑀚𑁆𑀚𑀻 𑀬𑀸 𑀢𑀸 𑀓𑀼𑀮𑀺𑀢𑁆𑀣𑀺𑀬𑁄 𑀓𑀼𑀮𑀓𑀼𑀫𑀸𑀭𑀺𑀬𑁄 𑀢𑀸 𑀦 𑀑𑀓𑀲𑁆𑀲 𑀧𑀲𑀬𑁆𑀳 𑀯𑀸𑀲𑁂𑀲𑁆𑀲𑀦𑁆𑀢𑀺; 𑀯𑀼𑀤𑁆𑀥𑀺𑀬𑁂𑀯, 𑀮𑀺𑀘𑁆𑀙𑀯𑀻, 𑀯𑀚𑁆𑀚𑀻𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀮𑀺𑀘𑁆𑀙𑀯𑀻, 𑀯𑀚𑁆𑀚𑀻 𑀬𑀸𑀦𑀺 𑀢𑀸𑀦𑀺 𑀯𑀚𑁆𑀚𑀻𑀦𑀁 𑀯𑀚𑁆𑀚𑀺𑀘𑁂𑀢𑀺𑀬𑀸𑀦𑀺 𑀅𑀩𑁆𑀪𑀦𑁆𑀢𑀭𑀸𑀦𑀺 𑀘𑁂𑀯 𑀩𑀸𑀳𑀺𑀭𑀸𑀦𑀺 𑀘 𑀢𑀸𑀦𑀺 𑀲𑀓𑁆𑀓𑀭𑀺𑀲𑁆𑀲𑀦𑁆𑀢𑀺 𑀕𑀭𑀼𑀁 𑀓𑀭𑀺𑀲𑁆𑀲𑀦𑁆𑀢𑀺 𑀫𑀸𑀦𑁂𑀲𑁆𑀲𑀦𑁆𑀢𑀺 𑀧𑀽𑀚𑁂𑀲𑁆𑀲𑀦𑁆𑀢𑀺, 𑀢𑁂𑀲𑀜𑁆𑀘 𑀤𑀺𑀦𑁆𑀦𑀧𑀼𑀩𑁆𑀩𑀁 𑀓𑀢𑀧𑀼𑀩𑁆𑀩𑀁 𑀥𑀫𑁆𑀫𑀺𑀓𑀁 𑀩𑀮𑀺𑀁 𑀦𑁄 𑀧𑀭𑀺𑀳𑀸𑀧𑁂𑀲𑁆𑀲𑀦𑁆𑀢𑀺; 𑀯𑀼𑀤𑁆𑀥𑀺𑀬𑁂𑀯, 𑀮𑀺𑀘𑁆𑀙𑀯𑀻, 𑀯𑀚𑁆𑀚𑀻𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀮𑀺𑀘𑁆𑀙𑀯𑀻, 𑀯𑀚𑁆𑀚𑀻𑀦𑀁 𑀅𑀭𑀳𑀦𑁆𑀢𑁂𑀲𑀼 𑀥𑀫𑁆𑀫𑀺𑀓𑀸 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺 𑀲𑀼𑀲𑀁𑀯𑀺𑀳𑀺𑀢𑀸 𑀪𑀯𑀺𑀲𑁆𑀲𑀢𑀺 𑁋 ‘𑀓𑀺𑀦𑁆𑀢𑀺 𑀅𑀦𑀸𑀕𑀢𑀸 𑀘 𑀅𑀭𑀳𑀦𑁆𑀢𑁄 𑀯𑀺𑀚𑀺𑀢𑀁 𑀆𑀕𑀘𑁆𑀙𑁂𑀬𑁆𑀬𑀼𑀁, 𑀆𑀕𑀢𑀸 𑀘 𑀅𑀭𑀳𑀦𑁆𑀢𑁄 𑀯𑀺𑀚𑀺𑀢𑁂 𑀨𑀸𑀲𑀼𑀁 𑀯𑀺𑀳𑀭𑁂𑀬𑁆𑀬𑀼’𑀦𑁆𑀢𑀺; 𑀯𑀼𑀤𑁆𑀥𑀺𑀬𑁂𑀯, 𑀮𑀺𑀘𑁆𑀙𑀯𑀻, 𑀯𑀚𑁆𑀚𑀻𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀮𑀺𑀘𑁆𑀙𑀯𑀻, 𑀇𑀫𑁂 𑀲𑀢𑁆𑀢 𑀅𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸 𑀯𑀚𑁆𑀚𑀻𑀲𑀼 𑀞𑀲𑁆𑀲𑀦𑁆𑀢𑀺 [𑀯𑀢𑁆𑀢𑀺𑀲𑁆𑀲𑀦𑁆𑀢𑀺 (𑀓.)], 𑀇𑀫𑁂𑀲𑀼 𑀘 𑀲𑀢𑁆𑀢𑀲𑀼 𑀅𑀧𑀭𑀺𑀳𑀸𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀯𑀚𑁆𑀚𑀻 𑀲𑀦𑁆𑀤𑀺𑀲𑁆𑀲𑀺𑀲𑁆𑀲𑀦𑁆𑀢𑀺 [𑀲𑀦𑁆𑀤𑀺𑀲𑁆𑀲𑀦𑁆𑀢𑀺 (𑀲𑀻. 𑀧𑀻. 𑀓.)]; 𑀯𑀼𑀤𑁆𑀥𑀺𑀬𑁂𑀯, 𑀮𑀺𑀘𑁆𑀙𑀯𑀻, 𑀯𑀚𑁆𑀚𑀻𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀻’’𑀢𑀺. 𑀧𑀞𑀫𑀁.

𑁨. 𑀯𑀲𑁆𑀲𑀓𑀸𑀭𑀲𑀼𑀢𑁆𑀢𑀁

𑁨𑁨. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀯𑀚𑁆𑀚𑀻 𑀅𑀪𑀺𑀬𑀸𑀢𑀼𑀓𑀸𑀫𑁄 𑀳𑁄𑀢𑀺. 𑀲𑁄 𑀏𑀯𑀫𑀸𑀳 𑁋 ‘‘𑀅𑀳𑀁 𑀳𑀺𑀫𑁂 𑀯𑀚𑁆𑀚𑀻 𑀏𑀯𑀁𑀫𑀳𑀺𑀤𑁆𑀥𑀺𑀓𑁂 𑀏𑀯𑀁𑀫𑀳𑀸𑀦𑀼𑀪𑀸𑀯𑁂 𑀉𑀘𑁆𑀙𑁂𑀘𑁆𑀙𑀸𑀫𑀺 [𑀉𑀘𑁆𑀙𑁂𑀚𑁆𑀚𑀺𑀲𑁆𑀲𑀸𑀫𑀺 (𑀲𑁆𑀬𑀸.), 𑀉𑀘𑁆𑀙𑀺𑀚𑁆𑀚𑀺𑀲𑁆𑀲𑀸𑀫𑀺 (𑀓.)], 𑀯𑀚𑁆𑀚𑀻 𑀯𑀺𑀦𑀸𑀲𑁂𑀲𑁆𑀲𑀸𑀫𑀺, 𑀯𑀚𑁆𑀚𑀻 𑀅𑀦𑀬𑀩𑁆𑀬𑀲𑀦𑀁 𑀆𑀧𑀸𑀤𑁂𑀲𑁆𑀲𑀸𑀫𑀻’’𑀢𑀺 [𑀆𑀧𑀸𑀤𑁂𑀲𑁆𑀲𑀸𑀫𑀺 𑀯𑀚𑁆𑀚𑀻𑀢𑀺 (𑀓.) 𑀤𑀻. 𑀦𑀺. 𑁨.𑁧𑁩𑁧].

𑀅𑀣 𑀔𑁄 𑀭𑀸𑀚𑀸 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀯𑀲𑁆𑀲𑀓𑀸𑀭𑀁 𑀩𑁆𑀭𑀸𑀳𑁆𑀫𑀡𑀁 𑀫𑀸𑀕𑀥𑀫𑀳𑀸𑀫𑀢𑁆𑀢𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀳𑀺 𑀢𑁆𑀯𑀁, 𑀩𑁆𑀭𑀸𑀳𑁆𑀫𑀡, 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀫𑀫 𑀯𑀘𑀦𑁂𑀦 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀸𑀳𑀺, 𑀅𑀧𑁆𑀧𑀸𑀩𑀸𑀥𑀁 𑀅𑀧𑁆𑀧𑀸𑀢𑀗𑁆𑀓𑀁 𑀮𑀳𑀼𑀝𑁆𑀞𑀸𑀦𑀁 𑀩𑀮𑀁 𑀨𑀸𑀲𑀼𑀯𑀺𑀳𑀸𑀭𑀁 𑀧𑀼𑀘𑁆𑀙 𑁋 ‘𑀭𑀸𑀚𑀸, 𑀪𑀦𑁆𑀢𑁂, 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀪𑀕𑀯𑀢𑁄 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀢𑀺, 𑀅𑀧𑁆𑀧𑀸𑀩𑀸𑀥𑀁 𑀅𑀧𑁆𑀧𑀸𑀢𑀗𑁆𑀓𑀁 𑀮𑀳𑀼𑀝𑁆𑀞𑀸𑀦𑀁 𑀩𑀮𑀁 𑀨𑀸𑀲𑀼𑀯𑀺𑀳𑀸𑀭𑀁 𑀧𑀼𑀘𑁆𑀙𑀢𑀻’𑀢𑀺. 𑀏𑀯𑀜𑁆𑀘 𑀯𑀤𑁂𑀳𑀺 𑁋 ‘𑀭𑀸𑀚𑀸, 𑀪𑀦𑁆𑀢𑁂, 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀯𑀚𑁆𑀚𑀻 𑀅𑀪𑀺𑀬𑀸𑀢𑀼𑀓𑀸𑀫𑁄. 𑀲𑁄 𑀏𑀯𑀫𑀸𑀳 𑁋 ‘𑀅𑀳𑀁 𑀳𑀺𑀫𑁂 𑀯𑀚𑁆𑀚𑀻 𑀏𑀯𑀁𑀫𑀳𑀺𑀤𑁆𑀥𑀺𑀓𑁂 𑀏𑀯𑀁𑀫𑀳𑀸𑀦𑀼𑀪𑀸𑀯𑁂 𑀉𑀘𑁆𑀙𑁂𑀘𑁆𑀙𑀸𑀫𑀺, 𑀯𑀚𑁆𑀚𑀻 𑀯𑀺𑀦𑀸𑀲𑁂𑀲𑁆𑀲𑀸𑀫𑀺, 𑀯𑀚𑁆𑀚𑀻 𑀅𑀦𑀬𑀩𑁆𑀬𑀲𑀦𑀁 𑀆𑀧𑀸𑀤𑁂𑀲𑁆𑀲𑀸𑀫𑀻’𑀢𑀺. 𑀬𑀣𑀸 𑀢𑁂 𑀪𑀕𑀯𑀸 𑀩𑁆𑀬𑀸𑀓𑀭𑁄𑀢𑀺, 𑀢𑀁 𑀲𑀸𑀥𑀼𑀓𑀁 𑀉𑀕𑁆𑀕𑀳𑁂𑀢𑁆𑀯𑀸 𑀫𑀫 𑀆𑀭𑁄𑀘𑁂𑀬𑁆𑀬𑀸𑀲𑀺. 𑀦 𑀳𑀺 𑀢𑀣𑀸𑀕𑀢𑀸 𑀯𑀺𑀢𑀣𑀁 𑀪𑀡𑀦𑁆𑀢𑀻’’𑀢𑀺.

‘‘𑀏𑀯𑀁, 𑀪𑁄’’𑀢𑀺 𑀔𑁄 𑀯𑀲𑁆𑀲𑀓𑀸𑀭𑁄 𑀩𑁆𑀭𑀸𑀳𑁆𑀫𑀡𑁄 𑀫𑀸𑀕𑀥𑀫𑀳𑀸𑀫𑀢𑁆𑀢𑁄 𑀭𑀜𑁆𑀜𑁄 𑀫𑀸𑀕𑀥𑀲𑁆𑀲 𑀅𑀚𑀸𑀢𑀲𑀢𑁆𑀢𑀼𑀲𑁆𑀲 𑀯𑁂𑀤𑁂𑀳𑀺𑀧𑀼𑀢𑁆𑀢𑀲𑁆𑀲 𑀧𑀝𑀺𑀲𑁆𑀲𑀼𑀢𑁆𑀯𑀸 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀢𑀸 𑀲𑀤𑁆𑀥𑀺𑀁 𑀲𑀫𑁆𑀫𑁄𑀤𑀺. 𑀲𑀫𑁆𑀫𑁄𑀤𑀦𑀻𑀬𑀁 𑀓𑀣𑀁 𑀲𑀸𑀭𑀡𑀻𑀬𑀁 𑀯𑀻𑀢𑀺𑀲𑀸𑀭𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀯𑀲𑁆𑀲𑀓𑀸𑀭𑁄 𑀩𑁆𑀭𑀸𑀳𑁆𑀫𑀡𑁄 𑀫𑀸𑀕𑀥𑀫𑀳𑀸𑀫𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋 ‘‘𑀭𑀸𑀚𑀸, 𑀪𑁄 𑀕𑁄𑀢𑀫, 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀪𑁄𑀢𑁄 𑀕𑁄𑀢𑀫𑀲𑁆𑀲 𑀧𑀸𑀤𑁂 𑀲𑀺𑀭𑀲𑀸 𑀯𑀦𑁆𑀤𑀢𑀺, 𑀅𑀧𑁆𑀧𑀸𑀩𑀸𑀥𑀁 𑀅𑀧𑁆𑀧𑀸𑀢𑀗𑁆𑀓𑀁 𑀮𑀳𑀼𑀝𑁆𑀞𑀸𑀦𑀁 𑀩𑀮𑀁 𑀨𑀸𑀲𑀼𑀯𑀺𑀳𑀸𑀭𑀁 𑀧𑀼𑀘𑁆𑀙𑀢𑀺. 𑀭𑀸𑀚𑀸 [𑀏𑀯𑀜𑁆𑀘 𑀯𑀤𑁂𑀢𑀺 𑀭𑀸𑀚𑀸 (𑀲𑀻. 𑀓.)], 𑀪𑁄 𑀕𑁄𑀢𑀫, 𑀫𑀸𑀕𑀥𑁄 𑀅𑀚𑀸𑀢𑀲𑀢𑁆𑀢𑀼 𑀯𑁂𑀤𑁂𑀳𑀺𑀧𑀼𑀢𑁆𑀢𑁄 𑀯𑀚𑁆𑀚𑀻 𑀅𑀪𑀺𑀬𑀸𑀢𑀼𑀓𑀸𑀫𑁄. 𑀲𑁄 𑀏𑀯𑀫𑀸𑀳 𑁋 ‘𑀅𑀳𑀁 𑀳𑀺𑀫𑁂 𑀯𑀚𑁆𑀚𑀻 𑀏𑀯𑀁𑀫𑀳𑀺𑀤𑁆𑀥𑀺𑀓𑁂 𑀏𑀯𑀁𑀫𑀳𑀸𑀦𑀼𑀪𑀸𑀯𑁂 𑀉𑀘𑁆𑀙𑁂𑀘𑁆𑀙𑀸𑀫𑀺, 𑀯𑀚𑁆𑀚𑀻 𑀯𑀺𑀦𑀸𑀲𑁂𑀲𑁆𑀲𑀸𑀫𑀺, 𑀯𑀚𑁆𑀚𑀻 𑀅𑀦𑀬𑀩𑁆𑀬𑀲𑀦𑀁 𑀆𑀧𑀸𑀤𑁂𑀲𑁆𑀲𑀸𑀫𑀻’’’𑀢𑀺.

𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀆𑀬𑀲𑁆𑀫𑀸 𑀆𑀦𑀦𑁆𑀤𑁄 𑀪𑀕𑀯𑀢𑁄 𑀧𑀺𑀝𑁆𑀞𑀺𑀢𑁄 𑀞𑀺𑀢𑁄 𑀳𑁄𑀢𑀺 𑀪𑀕𑀯𑀦𑁆𑀢𑀁 𑀩𑀻𑀚𑀬𑀫𑀸𑀦𑁄 [𑀯𑀻𑀚𑀫𑀸𑀦𑁄 (𑀲𑀻. 𑀲𑁆𑀬𑀸.)]. 𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀆𑀦𑀦𑁆𑀤𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀓𑀺𑀦𑁆𑀢𑀺 𑀢𑁂, 𑀆𑀦𑀦𑁆𑀤, 𑀲𑀼𑀢𑀁 𑁋 ‘𑀯𑀚𑁆𑀚𑀻 𑀅𑀪𑀺𑀡𑁆𑀳𑀁 𑀲𑀦𑁆𑀦𑀺𑀧𑀸𑀢𑀸 𑀲𑀦𑁆𑀦𑀺𑀧𑀸𑀢𑀩𑀳𑀼𑀮𑀸’’’𑀢𑀺? ‘‘𑀲𑀼𑀢𑀁 𑀫𑁂𑀢𑀁, 𑀪𑀦𑁆𑀢𑁂 𑁋 ‘𑀯𑀚𑁆𑀚𑀻 𑀅𑀪𑀺𑀡𑁆𑀳𑀁 𑀲𑀦𑁆𑀦𑀺𑀧𑀸𑀢𑀸 𑀲𑀦𑁆𑀦𑀺𑀧𑀸𑀢𑀩𑀳𑀼𑀮𑀸’’’𑀢𑀺. ‘‘𑀬𑀸𑀯𑀓𑀻𑀯𑀜𑁆𑀘, 𑀆𑀦𑀦𑁆𑀤, 𑀯𑀚𑁆𑀚𑀻 𑀅𑀪𑀺𑀡𑁆𑀳𑀁 𑀲𑀦𑁆𑀦𑀺𑀧𑀸𑀢𑀸 𑀪𑀯𑀺𑀲𑁆𑀲𑀦𑁆𑀢𑀺 𑀲𑀦𑁆𑀦𑀺𑀧𑀸𑀢𑀩𑀳𑀼𑀮𑀸; 𑀯𑀼𑀤𑁆𑀥𑀺𑀬𑁂𑀯, 𑀆𑀦𑀦𑁆𑀤, 𑀯𑀚𑁆𑀚𑀻𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀓𑀺𑀦𑁆𑀢𑀺 𑀢𑁂, 𑀆𑀦𑀦𑁆𑀤, 𑀲𑀼𑀢𑀁 𑁋 ‘𑀯𑀚𑁆𑀚𑀻 𑀲𑀫𑀕𑁆𑀕𑀸 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀲𑀫𑀕𑁆𑀕𑀸 𑀯𑀼𑀝𑁆𑀞𑀳𑀦𑁆𑀢𑀺, 𑀲𑀫𑀕𑁆𑀕𑀸 𑀯𑀚𑁆𑀚𑀺𑀓𑀭𑀡𑀻𑀬𑀸𑀦𑀺 𑀓𑀭𑁄𑀦𑁆𑀢𑀻’’’𑀢𑀺? ‘‘𑀲𑀼𑀢𑀁 𑀫𑁂𑀢𑀁, 𑀪𑀦𑁆𑀢𑁂 𑁋 ‘𑀯𑀚𑁆𑀚𑀻 𑀲𑀫𑀕𑁆𑀕𑀸 𑀲𑀦𑁆𑀦𑀺𑀧𑀢𑀦𑁆𑀢𑀺, 𑀲𑀫𑀕𑁆𑀕𑀸 𑀯𑀼𑀝𑁆𑀞𑀳𑀦𑁆𑀢𑀺, 𑀲𑀫𑀕𑁆𑀕𑀸 𑀯𑀚𑁆𑀚𑀺𑀓𑀭𑀡𑀻𑀬𑀸𑀦𑀺 𑀓𑀭𑁄𑀦𑁆𑀢𑀻’’’𑀢𑀺. ‘‘𑀬𑀸𑀯𑀓𑀻𑀯𑀜𑁆𑀘, 𑀆𑀦𑀦𑁆𑀤, 𑀯𑀚𑁆𑀚𑀻 𑀲𑀫𑀕𑁆𑀕𑀸 𑀲𑀦𑁆𑀦𑀺𑀧𑀢𑀺𑀲𑁆𑀲𑀦𑁆𑀢𑀺, 𑀲𑀫𑀕𑁆𑀕𑀸 𑀯𑀼𑀝𑁆𑀞𑀳𑀺𑀲𑁆𑀲𑀦𑁆𑀢𑀺, 𑀲𑀫𑀕𑁆𑀕𑀸 𑀯𑀚𑁆𑀚𑀺𑀓𑀭𑀡𑀻𑀬𑀸𑀦𑀺 𑀓𑀭𑀺𑀲𑁆𑀲𑀦𑁆𑀢𑀺; 𑀯𑀼𑀤𑁆𑀥𑀺𑀬𑁂𑀯, 𑀆𑀦𑀦𑁆𑀤, 𑀯𑀚𑁆𑀚𑀻𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀓𑀺𑀦𑁆𑀢𑀺 𑀢𑁂, 𑀆𑀦𑀦𑁆𑀤, 𑀲𑀼𑀢𑀁 𑁋 ‘𑀯𑀚𑁆𑀚𑀻 𑀅𑀧𑀜𑁆𑀜𑀢𑁆𑀢𑀁 𑀦 𑀧𑀜𑁆𑀜𑀸𑀧𑁂𑀦𑁆𑀢𑀺, 𑀧𑀜𑁆𑀜𑀢𑁆𑀢𑀁 𑀦 𑀲𑀫𑀼𑀘𑁆𑀙𑀺𑀦𑁆𑀤𑀦𑁆𑀢𑀺, 𑀬𑀣𑀸𑀧𑀜𑁆𑀜𑀢𑁆𑀢𑁂 𑀧𑁄𑀭𑀸𑀡𑁂 𑀯𑀚𑁆𑀚𑀺𑀥𑀫𑁆𑀫𑁂 𑀲𑀫𑀸𑀤𑀸𑀬 𑀯𑀢𑁆𑀢𑀦𑁆𑀢𑀻’’’𑀢𑀺? ‘‘𑀲𑀼𑀢𑀁 𑀫𑁂𑀢𑀁, 𑀪𑀦𑁆𑀢𑁂 𑁋 ‘𑀯𑀚𑁆𑀚𑀻 𑀅𑀧𑀜𑁆𑀜𑀢𑁆𑀢𑀁 𑀦 𑀧𑀜𑁆𑀜𑀸𑀧𑁂𑀦𑁆𑀢𑀺, 𑀧𑀜𑁆𑀜𑀢𑁆𑀢𑀁 𑀦 𑀲𑀫𑀼𑀘𑁆𑀙𑀺𑀦𑁆𑀤𑀦𑁆𑀢𑀺, 𑀬𑀣𑀸𑀧𑀜𑁆𑀜𑀢𑁆𑀢𑁂 𑀧𑁄𑀭𑀸𑀡𑁂 𑀯𑀚𑁆𑀚𑀺𑀥𑀫𑁆𑀫𑁂 𑀲𑀫𑀸𑀤𑀸𑀬 𑀯𑀢𑁆𑀢𑀦𑁆𑀢𑀻’’’𑀢𑀺. ‘‘𑀬𑀸𑀯𑀓𑀻𑀯𑀜𑁆𑀘, 𑀆𑀦𑀦𑁆𑀤, 𑀯𑀚𑁆𑀚𑀻 𑀅𑀧𑀜𑁆𑀜𑀢𑁆𑀢𑀁 𑀦 𑀧𑀜𑁆𑀜𑀸𑀧𑁂𑀲𑁆𑀲𑀦𑁆𑀢𑀺, 𑀧𑀜𑁆𑀜𑀢𑁆𑀢𑀁 𑀦 𑀲𑀫𑀼𑀘𑁆𑀙𑀺𑀦𑁆𑀤𑀺𑀲𑁆𑀲𑀦𑁆𑀢𑀺, 𑀬𑀣𑀸𑀧𑀜𑁆𑀜𑀢𑁆𑀢𑁂 𑀧𑁄𑀭𑀸𑀡𑁂 𑀯𑀚𑁆𑀚𑀺𑀥𑀫𑁆𑀫𑁂 𑀲𑀫𑀸𑀤𑀸𑀬 𑀯𑀢𑁆𑀢𑀺𑀲𑁆𑀲𑀦𑁆𑀢𑀺; 𑀯𑀼𑀤𑁆𑀥𑀺𑀬𑁂𑀯, 𑀆𑀦𑀦𑁆𑀤, 𑀯𑀚𑁆𑀚𑀻𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀓𑀺𑀦𑁆𑀢𑀺 𑀢𑁂, 𑀆𑀦𑀦𑁆𑀤, 𑀲𑀼𑀢𑀁 𑁋 ‘𑀯𑀚𑁆𑀚𑀻 𑀬𑁂 𑀢𑁂 𑀯𑀚𑁆𑀚𑀻𑀦𑀁 𑀯𑀚𑁆𑀚𑀺𑀫𑀳𑀮𑁆𑀮𑀓𑀸 𑀢𑁂 𑀲𑀓𑁆𑀓𑀭𑁄𑀦𑁆𑀢𑀺 𑀕𑀭𑀼𑀁 𑀓𑀭𑁄𑀦𑁆𑀢𑀺 𑀫𑀸𑀦𑁂𑀦𑁆𑀢𑀺 𑀧𑀽𑀚𑁂𑀦𑁆𑀢𑀺, 𑀢𑁂𑀲𑀜𑁆𑀘 𑀲𑁄𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀻’’’𑀢𑀺? ‘‘𑀲𑀼𑀢𑀁 𑀫𑁂𑀢𑀁, 𑀪𑀦𑁆𑀢𑁂 𑁋 ‘𑀯𑀚𑁆𑀚𑀻 𑀬𑁂 𑀢𑁂 𑀯𑀚𑁆𑀚𑀻𑀦𑀁 𑀯𑀚𑁆𑀚𑀺𑀫𑀳𑀮𑁆𑀮𑀓𑀸 𑀢𑁂 𑀲𑀓𑁆𑀓𑀭𑁄𑀦𑁆𑀢𑀺 𑀕𑀭𑀼𑀁 𑀓𑀭𑁄𑀦𑁆𑀢𑀺 𑀫𑀸𑀦𑁂𑀦𑁆𑀢𑀺 𑀧𑀽𑀚𑁂𑀦𑁆𑀢𑀺, 𑀢𑁂𑀲𑀜𑁆𑀘 𑀲𑁄𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀻’’’𑀢𑀺. ‘‘𑀬𑀸𑀯𑀓𑀻𑀯𑀜𑁆𑀘, 𑀆𑀦𑀦𑁆𑀤, 𑀯𑀚𑁆𑀚𑀻 𑀬𑁂 𑀢𑁂 𑀯𑀚𑁆𑀚𑀻𑀦𑀁 𑀯𑀚𑁆𑀚𑀺𑀫𑀳𑀮𑁆𑀮𑀓𑀸 𑀢𑁂 𑀲𑀓𑁆𑀓𑀭𑀺𑀲𑁆𑀲𑀦𑁆𑀢𑀺 𑀕𑀭𑀼𑀁 𑀓𑀭𑀺𑀲𑁆𑀲𑀦𑁆𑀢𑀺 𑀫𑀸𑀦𑁂𑀲𑁆𑀲𑀦𑁆𑀢𑀺 𑀧𑀽𑀚𑁂𑀲𑁆𑀲𑀦𑁆𑀢𑀺, 𑀢𑁂𑀲𑀜𑁆𑀘 𑀲𑁄𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀦𑁆𑀢𑀺; 𑀯𑀼𑀤𑁆𑀥𑀺𑀬𑁂𑀯, 𑀆𑀦𑀦𑁆𑀤, 𑀯𑀚𑁆𑀚𑀻𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀓𑀺𑀦𑁆𑀢𑀺 𑀢𑁂, 𑀆𑀦𑀦𑁆𑀤, 𑀲𑀼𑀢𑀁 𑁋 ‘𑀯𑀚𑁆𑀚𑀻 𑀬𑀸 𑀢𑀸 𑀓𑀼𑀮𑀺𑀢𑁆𑀣𑀺𑀬𑁄 𑀓𑀼𑀮𑀓𑀼𑀫𑀸𑀭𑀺𑀬𑁄 𑀢𑀸 𑀦 𑀑𑀓𑀲𑁆𑀲 𑀧𑀲𑀬𑁆𑀳 𑀯𑀸𑀲𑁂𑀦𑁆𑀢𑀻’’’𑀢𑀺? ‘‘𑀲𑀼𑀢𑀁 𑀫𑁂𑀢𑀁, 𑀪𑀦𑁆𑀢𑁂 𑁋 ‘𑀯𑀚𑁆𑀚𑀻 𑀬𑀸 𑀢𑀸 𑀓𑀼𑀮𑀺𑀢𑁆𑀣𑀺𑀬𑁄 𑀓𑀼𑀮𑀓𑀼𑀫𑀸𑀭𑀺𑀬𑁄 𑀢𑀸 𑀦 𑀑𑀓𑀲𑁆𑀲 𑀧𑀲𑀬𑁆𑀳 𑀯𑀸𑀲𑁂𑀦𑁆𑀢𑀻’’’𑀢𑀺. ‘‘𑀬𑀸𑀯𑀓𑀻𑀯𑀜𑁆𑀘, 𑀆𑀦𑀦𑁆𑀤, 𑀯𑀚𑁆𑀚𑀻 𑀬𑀸 𑀢𑀸 𑀓𑀼𑀮𑀺𑀢𑁆𑀣𑀺𑀬𑁄 𑀓𑀼𑀮𑀓𑀼𑀫𑀸𑀭𑀺𑀬𑁄 𑀢𑀸 𑀦 𑀑𑀓𑀲𑁆𑀲 𑀧𑀲𑀬𑁆𑀳 𑀯𑀸𑀲𑁂𑀲𑁆𑀲𑀦𑁆𑀢𑀺; 𑀯𑀼𑀤𑁆𑀥𑀺𑀬𑁂𑀯, 𑀆𑀦𑀦𑁆𑀤, 𑀯𑀚𑁆𑀚𑀻𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀓𑀺𑀦𑁆𑀢𑀺 𑀢𑁂, 𑀆𑀦𑀦𑁆𑀤, 𑀲𑀼𑀢𑀁 𑁋 ‘𑀯𑀚𑁆𑀚𑀻 𑀬𑀸𑀦𑀺 𑀢𑀸𑀦𑀺 𑀯𑀚𑁆𑀚𑀻𑀦𑀁 𑀯𑀚𑁆𑀚𑀺𑀘𑁂𑀢𑀺𑀬𑀸𑀦𑀺 𑀅𑀩𑁆𑀪𑀦𑁆𑀢𑀭𑀸𑀦𑀺 𑀘𑁂𑀯 𑀩𑀸𑀳𑀺𑀭𑀸𑀦𑀺 𑀘 𑀢𑀸𑀦𑀺 𑀲𑀓𑁆𑀓𑀭𑁄𑀦𑁆𑀢𑀺 𑀕𑀭𑀼𑀁 𑀓𑀭𑁄𑀦𑁆𑀢𑀺 𑀫𑀸𑀦𑁂𑀦𑁆𑀢𑀺 𑀧𑀽𑀚𑁂𑀦𑁆𑀢𑀺, 𑀢𑁂𑀲𑀜𑁆𑀘 𑀤𑀺𑀦𑁆𑀦𑀧𑀼𑀩𑁆𑀩𑀁 𑀓𑀢𑀧𑀼𑀩𑁆𑀩𑀁 𑀥𑀫𑁆𑀫𑀺𑀓𑀁 𑀩𑀮𑀺𑀁 𑀦𑁄 𑀧𑀭𑀺𑀳𑀸𑀧𑁂𑀦𑁆𑀢𑀻’’’𑀢𑀺? ‘‘𑀲𑀼𑀢𑀁 𑀫𑁂𑀢𑀁, 𑀪𑀦𑁆𑀢𑁂 𑁋 ‘𑀯𑀚𑁆𑀚𑀻 𑀬𑀸𑀦𑀺 𑀢𑀸𑀦𑀺 𑀯𑀚𑁆𑀚𑀻𑀦𑀁 𑀯𑀚𑁆𑀚𑀺𑀘𑁂𑀢𑀺𑀬𑀸𑀦𑀺 𑀅𑀩𑁆𑀪𑀦𑁆𑀢𑀭𑀸𑀦𑀺 𑀘𑁂𑀯 𑀩𑀸𑀳𑀺𑀭𑀸𑀦𑀺 𑀘 𑀢𑀸𑀦𑀺 𑀲𑀓𑁆𑀓𑀭𑁄𑀦𑁆𑀢𑀺 𑀕𑀭𑀼𑀁 𑀓𑀭𑁄𑀦𑁆𑀢𑀺 𑀫𑀸𑀦𑁂𑀦𑁆𑀢𑀺 𑀧𑀽𑀚𑁂𑀦𑁆𑀢𑀺, 𑀢𑁂𑀲𑀜𑁆𑀘 𑀤𑀺𑀦𑁆𑀦𑀧𑀼𑀩𑁆𑀩𑀁 𑀓𑀢𑀧𑀼𑀩𑁆𑀩𑀁 𑀥𑀫𑁆𑀫𑀺𑀓𑀁 𑀩𑀮𑀺𑀁 𑀦𑁄 𑀧𑀭𑀺𑀳𑀸𑀧𑁂𑀦𑁆𑀢𑀻’’’𑀢𑀺. ‘‘𑀬𑀸𑀯𑀓𑀻𑀯𑀜𑁆𑀘, 𑀆𑀦𑀦𑁆𑀤, 𑀯𑀚𑁆𑀚𑀻 𑀬𑀸𑀦𑀺 𑀢𑀸𑀦𑀺 𑀯𑀚𑁆𑀚𑀻𑀦𑀁 𑀯𑀚𑁆𑀚𑀺𑀘𑁂𑀢𑀺𑀬𑀸𑀦𑀺 𑀅𑀩𑁆𑀪𑀦𑁆𑀢𑀭𑀸𑀦𑀺 𑀘𑁂𑀯 𑀩𑀸𑀳𑀺𑀭𑀸𑀦𑀺 𑀘 𑀢𑀸𑀦𑀺 𑀲𑀓𑁆𑀓𑀭𑀺𑀲𑁆𑀲𑀦𑁆𑀢𑀺 𑀕𑀭𑀼𑀁 𑀓𑀭𑀺𑀲𑁆𑀲𑀦𑁆𑀢𑀺 𑀫𑀸𑀦𑁂𑀲𑁆𑀲𑀦𑁆𑀢𑀺 𑀧𑀽𑀚𑁂𑀲𑁆𑀲𑀦𑁆𑀢𑀺, 𑀢𑁂𑀲𑀜𑁆𑀘 𑀤𑀺𑀦𑁆𑀦𑀧𑀼𑀩𑁆𑀩𑀁 𑀓𑀢𑀧𑀼𑀩𑁆𑀩𑀁 𑀥𑀫𑁆𑀫𑀺𑀓𑀁 𑀩𑀮𑀺𑀁 𑀦𑁄 𑀧𑀭𑀺𑀳𑀸𑀧𑁂𑀲𑁆𑀲𑀦𑁆𑀢𑀺; 𑀯𑀼𑀤𑁆𑀥𑀺𑀬𑁂𑀯, 𑀆𑀦𑀦𑁆𑀤, 𑀯𑀚𑁆𑀚𑀻𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀓𑀺𑀦𑁆𑀢𑀺 𑀢𑁂, 𑀆𑀦𑀦𑁆𑀤, 𑀲𑀼𑀢𑀁 𑁋 ‘𑀯𑀚𑁆𑀚𑀻𑀦𑀁 𑀅𑀭𑀳𑀦𑁆𑀢𑁂𑀲𑀼 𑀥𑀫𑁆𑀫𑀺𑀓𑀸 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺 𑀲𑀼𑀲𑀁𑀯𑀺𑀳𑀺𑀢𑀸 𑁋 𑀓𑀺𑀦𑁆𑀢𑀺 𑀅𑀦𑀸𑀕𑀢𑀸 𑀘 𑀅𑀭𑀳𑀦𑁆𑀢𑁄 𑀯𑀺𑀚𑀺𑀢𑀁 𑀆𑀕𑀘𑁆𑀙𑁂𑀬𑁆𑀬𑀼𑀁, 𑀆𑀕𑀢𑀸 𑀘 𑀅𑀭𑀳𑀦𑁆𑀢𑁄 𑀯𑀺𑀚𑀺𑀢𑁂 𑀨𑀸𑀲𑀼𑀁 𑀯𑀺𑀳𑀭𑁂𑀬𑁆𑀬𑀼’’’𑀦𑁆𑀢𑀺? ‘‘𑀲𑀼𑀢𑀁 𑀫𑁂𑀢𑀁, 𑀪𑀦𑁆𑀢𑁂 𑁋 ‘𑀯𑀚𑁆𑀚𑀻𑀦𑀁 𑀅𑀭𑀳𑀦𑁆𑀢𑁂𑀲𑀼 𑀥𑀫𑁆𑀫𑀺𑀓𑀸 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺 𑀲𑀼𑀲𑀁𑀯𑀺𑀳𑀺𑀢𑀸 𑀪𑀯𑀺𑀲𑁆𑀲𑀢𑀺 𑁋 𑀓𑀺𑀦𑁆𑀢𑀺 𑀅𑀦𑀸𑀕𑀢𑀸 𑀘 𑀅𑀭𑀳𑀦𑁆𑀢𑁄 𑀯𑀺𑀚𑀺𑀢𑀁 𑀆𑀕𑀘𑁆𑀙𑁂𑀬𑁆𑀬𑀼𑀁, 𑀆𑀕𑀢𑀸 𑀘 𑀅𑀭𑀳𑀦𑁆𑀢𑁄 𑀯𑀺𑀚𑀺𑀢𑁂 𑀨𑀸𑀲𑀼𑀁 𑀯𑀺𑀳𑀭𑁂𑀬𑁆𑀬𑀼’’’𑀦𑁆𑀢𑀺. ‘‘𑀬𑀸𑀯𑀓𑀻𑀯𑀜𑁆𑀘, 𑀆𑀦𑀦𑁆𑀤, 𑀯𑀚𑁆𑀚𑀻𑀦𑀁 𑀅𑀭𑀳𑀦𑁆𑀢𑁂𑀲𑀼 𑀥𑀫𑁆𑀫𑀺𑀓𑀸 𑀭𑀓𑁆𑀔𑀸𑀯𑀭𑀡𑀕𑀼𑀢𑁆𑀢𑀺 𑀲𑀼𑀲𑀁𑀯𑀺𑀳𑀺𑀢𑀸 𑀪𑀯𑀺𑀲𑁆𑀲𑀢𑀺 𑁋 ‘𑀓𑀺𑀦𑁆𑀢𑀺 𑀅𑀦𑀸𑀕𑀢𑀸 𑀘 𑀅𑀭𑀳𑀦𑁆𑀢𑁄 𑀯𑀺𑀚𑀺𑀢𑀁 𑀆𑀕𑀘𑁆𑀙𑁂𑀬𑁆𑀬𑀼𑀁, 𑀆𑀕𑀢𑀸 𑀘 𑀅𑀭𑀳𑀦𑁆𑀢𑁄 𑀯𑀺𑀚𑀺𑀢𑁂 𑀨𑀸𑀲𑀼𑀁 𑀯𑀺𑀳𑀭𑁂𑀬𑁆𑀬𑀼’𑀦𑁆𑀢𑀺; 𑀯𑀼𑀤𑁆𑀥𑀺𑀬𑁂𑀯, 𑀆𑀦𑀦𑁆𑀤, 𑀯𑀚𑁆𑀚𑀻𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀻’’𑀢𑀺.

𑀅𑀣 𑀔𑁄 𑀪𑀕𑀯𑀸 𑀯𑀲𑁆𑀲𑀓𑀸𑀭𑀁 𑀩𑁆𑀭𑀸𑀳𑁆𑀫𑀡𑀁 𑀫𑀸𑀕𑀥𑀫𑀳𑀸𑀫𑀢𑁆𑀢𑀁 𑀆𑀫𑀦𑁆𑀢𑁂𑀲𑀺 𑁋 ‘‘𑀏𑀓𑀫𑀺𑀤𑀸𑀳𑀁, 𑀩𑁆𑀭𑀸𑀳𑁆𑀫𑀡, 𑀲𑀫𑀬𑀁 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀸𑀫𑀺 𑀲𑀸𑀭𑀦𑁆𑀤𑀤𑁂 𑀘𑁂𑀢𑀺𑀬𑁂. 𑀢𑀢𑁆𑀭𑀸𑀳𑀁, 𑀩𑁆𑀭𑀸𑀳𑁆𑀫𑀡, 𑀯𑀚𑁆𑀚𑀻𑀦𑀁 𑀇𑀫𑁂 𑀲𑀢𑁆𑀢 𑀅𑀧𑀭𑀺𑀳𑀸𑀦𑀺𑀬𑁂 𑀥𑀫𑁆𑀫𑁂 𑀤𑁂𑀲𑁂𑀲𑀺𑀁. 𑀬𑀸𑀯𑀓𑀻𑀯𑀜𑁆𑀘, 𑀩𑁆𑀭𑀸𑀳𑁆𑀫𑀡, 𑀇𑀫𑁂 𑀲𑀢𑁆𑀢 𑀅𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸 𑀯𑀚𑁆𑀚𑀻𑀲𑀼 𑀞𑀲𑁆𑀲𑀦𑁆𑀢𑀺, 𑀇𑀫𑁂𑀲𑀼 𑀘 𑀲𑀢𑁆𑀢𑀲𑀼 𑀅𑀧𑀭𑀺𑀳𑀸𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀯𑀚𑁆𑀚𑀻 𑀲𑀦𑁆𑀤𑀺𑀲𑁆𑀲𑀺𑀲𑁆𑀲𑀦𑁆𑀢𑀺; 𑀯𑀼𑀤𑁆𑀥𑀺𑀬𑁂𑀯, 𑀩𑁆𑀭𑀸𑀳𑁆𑀫𑀡, 𑀯𑀚𑁆𑀚𑀻𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀻’’𑀢𑀺.

‘‘𑀏𑀓𑀫𑁂𑀓𑁂𑀦𑀧𑀺 [𑀏𑀓𑀫𑁂𑀓𑁂𑀦𑀧𑀺 𑀢𑁂𑀦 𑀔𑁄 (𑀓.) 𑀤𑀻. 𑀦𑀺. 𑁨.𑁧𑁩𑁫] 𑀪𑁄, 𑀕𑁄𑀢𑀫, 𑀅𑀧𑀭𑀺𑀳𑀸𑀦𑀺𑀬𑁂𑀦 𑀥𑀫𑁆𑀫𑁂𑀦 𑀲𑀫𑀦𑁆𑀦𑀸𑀕𑀢𑀸𑀦𑀁 𑀯𑀚𑁆𑀚𑀻𑀦𑀁 𑀯𑀼𑀤𑁆𑀥𑀺𑀬𑁂𑀯 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺; 𑀓𑁄 𑀧𑀦 𑀯𑀸𑀤𑁄 𑀲𑀢𑁆𑀢𑀳𑀺 𑀅𑀧𑀭𑀺𑀳𑀸𑀦𑀺𑀬𑁂𑀳𑀺 𑀥𑀫𑁆𑀫𑁂𑀳𑀺! 𑀅𑀓𑀭𑀡𑀻𑀬𑀸 𑀘, 𑀪𑁄 𑀕𑁄𑀢𑀫, 𑀯𑀚𑁆𑀚𑀻 𑀭𑀜𑁆𑀜𑀸 𑀫𑀸𑀕𑀥𑁂𑀦 𑀅𑀚𑀸𑀢𑀲𑀢𑁆𑀢𑀼𑀦𑀸 𑀯𑁂𑀤𑁂𑀳𑀺𑀧𑀼𑀢𑁆𑀢𑁂𑀦 𑀬𑀤𑀺𑀤𑀁 𑀬𑀼𑀤𑁆𑀥𑀲𑁆𑀲, 𑀅𑀜𑁆𑀜𑀢𑁆𑀭 𑀉𑀧𑀮𑀸𑀧𑀦𑀸𑀬 [𑀉𑀧𑀮𑀸𑀧𑀦𑀸 (𑀓. 𑀲𑀻. 𑀓.)], 𑀅𑀜𑁆𑀜𑀢𑁆𑀭 𑀫𑀺𑀣𑀼𑀪𑁂𑀤𑀸. 𑀳𑀦𑁆𑀤 𑀘 𑀤𑀸𑀦𑀺 𑀫𑀬𑀁, 𑀪𑁄 𑀕𑁄𑀢𑀫, 𑀕𑀘𑁆𑀙𑀸𑀫, 𑀩𑀳𑀼𑀓𑀺𑀘𑁆𑀘𑀸 𑀫𑀬𑀁 𑀩𑀳𑀼𑀓𑀭𑀡𑀻𑀬𑀸’’𑀢𑀺. ‘‘𑀬𑀲𑁆𑀲𑀤𑀸𑀦𑀺 𑀢𑁆𑀯𑀁, 𑀩𑁆𑀭𑀸𑀳𑁆𑀫𑀡, 𑀓𑀸𑀮𑀁 𑀫𑀜𑁆𑀜𑀲𑀻’’𑀢𑀺. 𑀅𑀣 𑀔𑁄 𑀯𑀲𑁆𑀲𑀓𑀸𑀭𑁄 𑀩𑁆𑀭𑀸𑀳𑁆𑀫𑀡𑁄 𑀫𑀸𑀕𑀥𑀫𑀳𑀸𑀫𑀢𑁆𑀢𑁄 𑀪𑀕𑀯𑀢𑁄 𑀪𑀸𑀲𑀺𑀢𑀁 𑀅𑀪𑀺𑀦𑀦𑁆𑀤𑀺𑀢𑁆𑀯𑀸 𑀅𑀦𑀼𑀫𑁄𑀤𑀺𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀸𑀫𑀻𑀢𑀺. 𑀤𑀼𑀢𑀺𑀬𑀁.

𑁩. 𑀧𑀞𑀫𑀲𑀢𑁆𑀢𑀓𑀲𑀼𑀢𑁆𑀢𑀁

𑁨𑁩. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀭𑀸𑀚𑀕𑀳𑁂 𑀯𑀺𑀳𑀭𑀢𑀺 𑀕𑀺𑀚𑁆𑀛𑀓𑀽𑀝𑁂 𑀧𑀩𑁆𑀩𑀢𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀲𑀢𑁆𑀢 𑀯𑁄, 𑀪𑀺𑀓𑁆𑀔𑀯𑁂, 𑀅𑀧𑀭𑀺𑀳𑀸𑀦𑀺𑀬𑁂 𑀥𑀫𑁆𑀫𑁂 𑀤𑁂𑀲𑁂𑀲𑁆𑀲𑀸𑀫𑀺. 𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣; 𑀪𑀸𑀲𑀺𑀲𑁆𑀲𑀸𑀫𑀻’’𑀢𑀺. ‘‘𑀏𑀯𑀁, 𑀪𑀦𑁆𑀢𑁂’’𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀅𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸? 𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀅𑀪𑀺𑀡𑁆𑀳𑀁 𑀲𑀦𑁆𑀦𑀺𑀧𑀸𑀢𑀸 𑀪𑀯𑀺𑀲𑁆𑀲𑀦𑁆𑀢𑀺 𑀲𑀦𑁆𑀦𑀺𑀧𑀸𑀢𑀩𑀳𑀼𑀮𑀸; 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀲𑀫𑀕𑁆𑀕𑀸 𑀲𑀦𑁆𑀦𑀺𑀧𑀢𑀺𑀲𑁆𑀲𑀦𑁆𑀢𑀺, 𑀲𑀫𑀕𑁆𑀕𑀸 𑀯𑀼𑀝𑁆𑀞𑀳𑀺𑀲𑁆𑀲𑀦𑁆𑀢𑀺, 𑀲𑀫𑀕𑁆𑀕𑀸 𑀲𑀗𑁆𑀖𑀓𑀭𑀡𑀻𑀬𑀸𑀦𑀺 𑀓𑀭𑀺𑀲𑁆𑀲𑀦𑁆𑀢𑀺; 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀅𑀧𑀜𑁆𑀜𑀢𑁆𑀢𑀁 𑀦 𑀧𑀜𑁆𑀜𑀸𑀧𑁂𑀲𑁆𑀲𑀦𑁆𑀢𑀺, 𑀧𑀜𑁆𑀜𑀢𑁆𑀢𑀁 𑀦 𑀲𑀫𑀼𑀘𑁆𑀙𑀺𑀦𑁆𑀤𑀺𑀲𑁆𑀲𑀦𑁆𑀢𑀺, 𑀬𑀣𑀸𑀧𑀜𑁆𑀜𑀢𑁆𑀢𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀫𑀸𑀤𑀸𑀬 𑀯𑀢𑁆𑀢𑀺𑀲𑁆𑀲𑀦𑁆𑀢𑀺; 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀬𑁂 𑀢𑁂 𑀪𑀺𑀓𑁆𑀔𑀽 𑀣𑁂𑀭𑀸 𑀭𑀢𑁆𑀢𑀜𑁆𑀜𑀽 𑀘𑀺𑀭𑀧𑀩𑁆𑀩𑀚𑀺𑀢𑀸 𑀲𑀗𑁆𑀖𑀧𑀺𑀢𑀭𑁄 𑀲𑀗𑁆𑀖𑀧𑀭𑀺𑀡𑀸𑀬𑀓𑀸 𑀢𑁂 𑀲𑀓𑁆𑀓𑀭𑀺𑀲𑁆𑀲𑀦𑁆𑀢𑀺 𑀕𑀭𑀼𑀁 𑀓𑀭𑀺𑀲𑁆𑀲𑀦𑁆𑀢𑀺 𑀫𑀸𑀦𑁂𑀲𑁆𑀲𑀦𑁆𑀢𑀺 𑀧𑀽𑀚𑁂𑀲𑁆𑀲𑀦𑁆𑀢𑀺, 𑀢𑁂𑀲𑀜𑁆𑀘 𑀲𑁄𑀢𑀩𑁆𑀩𑀁 𑀫𑀜𑁆𑀜𑀺𑀲𑁆𑀲𑀦𑁆𑀢𑀺; 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀉𑀧𑁆𑀧𑀦𑁆𑀦𑀸𑀬 𑀢𑀡𑁆𑀳𑀸𑀬 𑀧𑁄𑀦𑁄𑀪𑀯𑀺𑀓𑀸𑀬 𑀦 𑀯𑀲𑀁 𑀕𑀘𑁆𑀙𑀺𑀲𑁆𑀲𑀦𑁆𑀢𑀺; 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀆𑀭𑀜𑁆𑀜𑀓𑁂𑀲𑀼 𑀲𑁂𑀦𑀸𑀲𑀦𑁂𑀲𑀼 𑀲𑀸𑀧𑁂𑀓𑁆𑀔𑀸 𑀪𑀯𑀺𑀲𑁆𑀲𑀦𑁆𑀢𑀺; 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀧𑀘𑁆𑀘𑀢𑁆𑀢𑀜𑁆𑀜𑁂𑀯 𑀲𑀢𑀺𑀁 𑀉𑀧𑀝𑁆𑀞𑀸𑀧𑁂𑀲𑁆𑀲𑀦𑁆𑀢𑀺 𑁋 ‘𑀓𑀺𑀦𑁆𑀢𑀺 𑀅𑀦𑀸𑀕𑀢𑀸 𑀘 𑀧𑁂𑀲𑀮𑀸 𑀲𑀩𑁆𑀭𑀳𑁆𑀫𑀘𑀸𑀭𑀻 𑀆𑀕𑀘𑁆𑀙𑁂𑀬𑁆𑀬𑀼𑀁, 𑀆𑀕𑀢𑀸 𑀘 𑀧𑁂𑀲𑀮𑀸 𑀲𑀩𑁆𑀭𑀳𑁆𑀫𑀘𑀸𑀭𑀻 𑀨𑀸𑀲𑀼𑀁 𑀯𑀺𑀳𑀭𑁂𑀬𑁆𑀬𑀼’𑀦𑁆𑀢𑀺; 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀇𑀫𑁂 𑀲𑀢𑁆𑀢 𑀅𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸 𑀪𑀺𑀓𑁆𑀔𑀽𑀲𑀼 𑀞𑀲𑁆𑀲𑀦𑁆𑀢𑀺, 𑀇𑀫𑁂𑀲𑀼 𑀘 𑀲𑀢𑁆𑀢𑀲𑀼 𑀅𑀧𑀭𑀺𑀳𑀸𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀽 𑀲𑀦𑁆𑀤𑀺𑀲𑁆𑀲𑀺𑀲𑁆𑀲𑀦𑁆𑀢𑀺; 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀻’’𑀢𑀺. 𑀢𑀢𑀺𑀬𑀁.

𑁪. 𑀤𑀼𑀢𑀺𑀬𑀲𑀢𑁆𑀢𑀓𑀲𑀼𑀢𑁆𑀢𑀁

𑁨𑁪. [𑀤𑀻. 𑀦𑀺. 𑁨.𑁧𑁩𑁮] ‘‘𑀲𑀢𑁆𑀢 𑀯𑁄, 𑀪𑀺𑀓𑁆𑀔𑀯𑁂, 𑀅𑀧𑀭𑀺𑀳𑀸𑀦𑀺𑀬𑁂 𑀥𑀫𑁆𑀫𑁂 𑀤𑁂𑀲𑁂𑀲𑁆𑀲𑀸𑀫𑀺. 𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣…𑀧𑁂… 𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀅𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸?

𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀦 𑀓𑀫𑁆𑀫𑀸𑀭𑀸𑀫𑀸 𑀪𑀯𑀺𑀲𑁆𑀲𑀦𑁆𑀢𑀺, 𑀦 𑀓𑀫𑁆𑀫𑀭𑀢𑀸, 𑀦 𑀓𑀫𑁆𑀫𑀸𑀭𑀸𑀫𑀢𑀁 𑀅𑀦𑀼𑀬𑀼𑀢𑁆𑀢𑀸; 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀦 𑀪𑀲𑁆𑀲𑀸𑀭𑀸𑀫𑀸 𑀪𑀯𑀺𑀲𑁆𑀲𑀦𑁆𑀢𑀺…𑀧𑁂… 𑀦 𑀦𑀺𑀤𑁆𑀤𑀸𑀭𑀸𑀫𑀸 𑀪𑀯𑀺𑀲𑁆𑀲𑀦𑁆𑀢𑀺… 𑀦 𑀲𑀗𑁆𑀕𑀡𑀺𑀓𑀸𑀭𑀸𑀫𑀸 𑀪𑀯𑀺𑀲𑁆𑀲𑀦𑁆𑀢𑀺… 𑀦 𑀧𑀸𑀧𑀺𑀘𑁆𑀙𑀸 𑀪𑀯𑀺𑀲𑁆𑀲𑀦𑁆𑀢𑀺 𑀦 𑀧𑀸𑀧𑀺𑀓𑀸𑀦𑀁 𑀇𑀘𑁆𑀙𑀸𑀦𑀁 𑀯𑀲𑀁 𑀕𑀢𑀸… 𑀦 𑀧𑀸𑀧𑀫𑀺𑀢𑁆𑀢𑀸 𑀪𑀯𑀺𑀲𑁆𑀲𑀦𑁆𑀢𑀺 𑀦 𑀧𑀸𑀧𑀲𑀳𑀸𑀬𑀸 𑀦 𑀧𑀸𑀧𑀲𑀫𑁆𑀧𑀯𑀗𑁆𑀓𑀸… 𑀦 𑀑𑀭𑀫𑀢𑁆𑀢𑀓𑁂𑀦 𑀯𑀺𑀲𑁂𑀲𑀸𑀥𑀺𑀕𑀫𑁂𑀦 𑀅𑀦𑁆𑀢𑀭𑀸𑀯𑁄𑀲𑀸𑀦𑀁 𑀆𑀧𑀚𑁆𑀚𑀺𑀲𑁆𑀲𑀦𑁆𑀢𑀺; 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

𑁫. 𑀢𑀢𑀺𑀬𑀲𑀢𑁆𑀢𑀓𑀲𑀼𑀢𑁆𑀢𑀁

𑁨𑁫. ‘‘𑀲𑀢𑁆𑀢 𑀯𑁄, 𑀪𑀺𑀓𑁆𑀔𑀯𑁂, 𑀅𑀧𑀭𑀺𑀳𑀸𑀦𑀺𑀬𑁂 𑀥𑀫𑁆𑀫𑁂 𑀤𑁂𑀲𑁂𑀲𑁆𑀲𑀸𑀫𑀺. 𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣…𑀧𑁂… 𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀅𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸? 𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀲𑀤𑁆𑀥𑀸 𑀪𑀯𑀺𑀲𑁆𑀲𑀦𑁆𑀢𑀺; 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀳𑀺𑀭𑀺𑀫𑀦𑁆𑀢𑁄 [𑀳𑀺𑀭𑀻𑀫𑀸 (𑀲𑀻.), 𑀳𑀺𑀭𑀺𑀫𑀦𑀸 (𑀤𑀻. 𑀦𑀺. 𑁨.𑁧𑁩𑁮)] 𑀪𑀯𑀺𑀲𑁆𑀲𑀦𑁆𑀢𑀺…𑀧𑁂… 𑀑𑀢𑁆𑀢𑀧𑁆𑀧𑀺𑀦𑁄 [𑀑𑀢𑁆𑀢𑀸𑀧𑀻𑀦𑁄 (𑀲𑀻.)] 𑀪𑀯𑀺𑀲𑁆𑀲𑀦𑁆𑀢𑀺… 𑀩𑀳𑀼𑀲𑁆𑀲𑀼𑀢𑀸 𑀪𑀯𑀺𑀲𑁆𑀲𑀦𑁆𑀢𑀺… 𑀆𑀭𑀤𑁆𑀥𑀯𑀻𑀭𑀺𑀬𑀸 𑀪𑀯𑀺𑀲𑁆𑀲𑀦𑁆𑀢𑀺… 𑀲𑀢𑀺𑀫𑀦𑁆𑀢𑁄 𑀪𑀯𑀺𑀲𑁆𑀲𑀦𑁆𑀢𑀺… 𑀧𑀜𑁆𑀜𑀯𑀦𑁆𑀢𑁄 𑀪𑀯𑀺𑀲𑁆𑀲𑀦𑁆𑀢𑀺; 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺. ‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀇𑀫𑁂 𑀲𑀢𑁆𑀢 𑀅𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸 𑀪𑀺𑀓𑁆𑀔𑀽𑀲𑀼 𑀞𑀲𑁆𑀲𑀦𑁆𑀢𑀺, 𑀇𑀫𑁂𑀲𑀼 𑀘 𑀲𑀢𑁆𑀢𑀲𑀼 𑀅𑀧𑀭𑀺𑀳𑀸𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀽 𑀲𑀦𑁆𑀤𑀺𑀲𑁆𑀲𑀺𑀲𑁆𑀲𑀦𑁆𑀢𑀺; 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀻’’𑀢𑀺. 𑀧𑀜𑁆𑀘𑀫𑀁.

𑁬. 𑀩𑁄𑀚𑁆𑀛𑀗𑁆𑀕𑀲𑀼𑀢𑁆𑀢𑀁

𑁨𑁬. ‘‘𑀲𑀢𑁆𑀢 𑀯𑁄, 𑀪𑀺𑀓𑁆𑀔𑀯𑁂, 𑀅𑀧𑀭𑀺𑀳𑀸𑀦𑀺𑀬𑁂 𑀥𑀫𑁆𑀫𑁂 𑀤𑁂𑀲𑁂𑀲𑁆𑀲𑀸𑀫𑀺. 𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣…𑀧𑁂… 𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀅𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸? 𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀲𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀲𑁆𑀲𑀦𑁆𑀢𑀺; 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀥𑀫𑁆𑀫𑀯𑀺𑀘𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀲𑁆𑀲𑀦𑁆𑀢𑀺…𑀧𑁂… 𑀯𑀻𑀭𑀺𑀬𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀲𑁆𑀲𑀦𑁆𑀢𑀺… 𑀧𑀻𑀢𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀲𑁆𑀲𑀦𑁆𑀢𑀺… 𑀧𑀲𑁆𑀲𑀤𑁆𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀲𑁆𑀲𑀦𑁆𑀢𑀺… 𑀲𑀫𑀸𑀥𑀺𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀲𑁆𑀲𑀦𑁆𑀢𑀺… 𑀉𑀧𑁂𑀓𑁆𑀔𑀸𑀲𑀫𑁆𑀩𑁄𑀚𑁆𑀛𑀗𑁆𑀕𑀁 𑀪𑀸𑀯𑁂𑀲𑁆𑀲𑀦𑁆𑀢𑀺; 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺. ‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀇𑀫𑁂 𑀲𑀢𑁆𑀢 𑀅𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸 𑀪𑀺𑀓𑁆𑀔𑀽𑀲𑀼 𑀞𑀲𑁆𑀲𑀦𑁆𑀢𑀺, 𑀇𑀫𑁂𑀲𑀼 𑀘 𑀲𑀢𑁆𑀢𑀲𑀼 𑀅𑀧𑀭𑀺𑀳𑀸𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀼 𑀪𑀺𑀓𑁆𑀔𑀽 𑀲𑀦𑁆𑀤𑀺𑀲𑁆𑀲𑀺𑀲𑁆𑀲𑀦𑁆𑀢𑀺; 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀻’’𑀢𑀺. 𑀙𑀝𑁆𑀞𑀁.

𑁭. 𑀲𑀜𑁆𑀜𑀸𑀲𑀼𑀢𑁆𑀢𑀁

𑁨𑁭. ‘‘𑀲𑀢𑁆𑀢 𑀯𑁄, 𑀪𑀺𑀓𑁆𑀔𑀯𑁂, 𑀅𑀧𑀭𑀺𑀳𑀸𑀦𑀺𑀬𑁂 𑀥𑀫𑁆𑀫𑁂 𑀤𑁂𑀲𑁂𑀲𑁆𑀲𑀸𑀫𑀺. 𑀢𑀁 𑀲𑀼𑀡𑀸𑀣, 𑀲𑀸𑀥𑀼𑀓𑀁 𑀫𑀦𑀲𑀺 𑀓𑀭𑁄𑀣…𑀧𑁂…. 𑀓𑀢𑀫𑁂 𑀘, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀅𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸? 𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀅𑀦𑀺𑀘𑁆𑀘𑀲𑀜𑁆𑀜𑀁 𑀪𑀸𑀯𑁂𑀲𑁆𑀲𑀦𑁆𑀢𑀺; 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺.

‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽 𑀅𑀦𑀢𑁆𑀢𑀲𑀜𑁆𑀜𑀁 𑀪𑀸𑀯𑁂𑀲𑁆𑀲𑀦𑁆𑀢𑀺…𑀧𑁂… 𑀅𑀲𑀼𑀪𑀲𑀜𑁆𑀜𑀁 𑀪𑀸𑀯𑁂𑀲𑁆𑀲𑀦𑁆𑀢𑀺… 𑀆𑀤𑀻𑀦𑀯𑀲𑀜𑁆𑀜𑀁 𑀪𑀸𑀯𑁂𑀲𑁆𑀲𑀦𑁆𑀢𑀺… 𑀧𑀳𑀸𑀦𑀲𑀜𑁆𑀜𑀁 𑀪𑀸𑀯𑁂𑀲𑁆𑀲𑀦𑁆𑀢𑀺… 𑀯𑀺𑀭𑀸𑀕𑀲𑀜𑁆𑀜𑀁 𑀪𑀸𑀯𑁂𑀲𑁆𑀲𑀦𑁆𑀢𑀺… 𑀦𑀺𑀭𑁄𑀥𑀲𑀜𑁆𑀜𑀁 𑀪𑀸𑀯𑁂𑀲𑁆𑀲𑀦𑁆𑀢𑀺; 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀺. ‘‘𑀬𑀸𑀯𑀓𑀻𑀯𑀜𑁆𑀘, 𑀪𑀺𑀓𑁆𑀔𑀯𑁂, 𑀇𑀫𑁂 𑀲𑀢𑁆𑀢 𑀅𑀧𑀭𑀺𑀳𑀸𑀦𑀺𑀬𑀸 𑀥𑀫𑁆𑀫𑀸 𑀪𑀺𑀓𑁆𑀔𑀽𑀲𑀼 𑀞𑀲𑁆𑀲𑀦𑁆𑀢𑀺, 𑀇𑀫𑁂𑀲𑀼 𑀘 𑀲𑀢𑁆𑀢𑀲𑀼 𑀅𑀧𑀭𑀺𑀳𑀸𑀦𑀺𑀬𑁂𑀲𑀼 𑀥𑀫𑁆𑀫𑁂𑀲𑀼, 𑀪𑀺𑀓𑁆𑀔𑀽 𑀲𑀦𑁆𑀤𑀺𑀲𑁆𑀲𑀺𑀲𑁆𑀲𑀦𑁆𑀢𑀺; 𑀯𑀼𑀤𑁆𑀥𑀺𑀬𑁂𑀯, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀽𑀦𑀁 𑀧𑀸𑀝𑀺𑀓𑀗𑁆𑀔𑀸, 𑀦𑁄 𑀧𑀭𑀺𑀳𑀸𑀦𑀻’’𑀢𑀺 [𑀤𑀻. 𑀦𑀺. 𑁨.𑁧𑁩𑁮]. 𑀲𑀢𑁆𑀢𑀫𑀁.

𑁮. 𑀧𑀞𑀫𑀧𑀭𑀺𑀳𑀸𑀦𑀺𑀲𑀼𑀢𑁆𑀢𑀁

𑁨𑁮. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀲𑀢𑁆𑀢𑀺𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑁂𑀔𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂 𑀲𑀢𑁆𑀢? 𑀓𑀫𑁆𑀫𑀸𑀭𑀸𑀫𑀢𑀸, 𑀪𑀲𑁆𑀲𑀸𑀭𑀸𑀫𑀢𑀸, 𑀦𑀺𑀤𑁆𑀤𑀸𑀭𑀸𑀫𑀢𑀸, 𑀲𑀗𑁆𑀕𑀡𑀺𑀓𑀸𑀭𑀸𑀫𑀢𑀸, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀅𑀕𑀼𑀢𑁆𑀢𑀤𑁆𑀯𑀸𑀭𑀢𑀸, 𑀪𑁄𑀚𑀦𑁂 𑀅𑀫𑀢𑁆𑀢𑀜𑁆𑀜𑀼𑀢𑀸, 𑀲𑀦𑁆𑀢𑀺 𑀔𑁄 𑀧𑀦 𑀲𑀗𑁆𑀖𑁂 𑀲𑀗𑁆𑀖𑀓𑀭𑀡𑀻𑀬𑀸𑀦𑀺; 𑀢𑀢𑁆𑀭 𑀲𑁂𑀔𑁄 𑀪𑀺𑀓𑁆𑀔𑀼 [𑀢𑀢𑁆𑀭 𑀪𑀺𑀓𑁆𑀔𑀼 (𑀲𑀻. 𑀲𑁆𑀬𑀸.)] 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀲𑀦𑁆𑀢𑀺 𑀔𑁄 𑀧𑀦 𑀲𑀗𑁆𑀖𑁂 𑀣𑁂𑀭𑀸 [𑀔𑁄 𑀲𑀁𑀖𑀢𑁆𑀣𑁂𑀭𑀸 (𑀓.)] 𑀭𑀢𑁆𑀢𑀜𑁆𑀜𑀽 𑀘𑀺𑀭𑀧𑀩𑁆𑀩𑀚𑀺𑀢𑀸 𑀪𑀸𑀭𑀯𑀸𑀳𑀺𑀦𑁄, 𑀢𑁂 [𑀦 𑀢𑁂 (𑀓.)] 𑀢𑁂𑀦 𑀧𑀜𑁆𑀜𑀸𑀬𑀺𑀲𑁆𑀲𑀦𑁆𑀢𑀻’𑀢𑀺 𑀅𑀢𑁆𑀢𑀦𑀸 𑀢𑁂𑀲𑀼 𑀬𑁄𑀕𑀁 [𑀅𑀢𑁆𑀢𑀦𑀸 𑀯𑁄𑀬𑁄𑀕𑀁 (𑀲𑀻. 𑀲𑁆𑀬𑀸.)] 𑀆𑀧𑀚𑁆𑀚𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀥𑀫𑁆𑀫𑀸 𑀲𑁂𑀔𑀲𑁆𑀲 𑀪𑀺𑀓𑁆𑀔𑀼𑀦𑁄 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺.

‘‘𑀲𑀢𑁆𑀢𑀺𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀲𑁂𑀔𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂 𑀲𑀢𑁆𑀢? 𑀦 𑀓𑀫𑁆𑀫𑀸𑀭𑀸𑀫𑀢𑀸, 𑀦 𑀪𑀲𑁆𑀲𑀸𑀭𑀸𑀫𑀢𑀸, 𑀦 𑀦𑀺𑀤𑁆𑀤𑀸𑀭𑀸𑀫𑀢𑀸, 𑀦 𑀲𑀗𑁆𑀕𑀡𑀺𑀓𑀸𑀭𑀸𑀫𑀢𑀸, 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑀢𑀸, 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀼𑀢𑀸, 𑀲𑀦𑁆𑀢𑀺 𑀔𑁄 𑀧𑀦 𑀲𑀗𑁆𑀖𑁂 𑀲𑀗𑁆𑀖𑀓𑀭𑀡𑀻𑀬𑀸𑀦𑀺; 𑀢𑀢𑁆𑀭 𑀲𑁂𑀔𑁄 𑀪𑀺𑀓𑁆𑀔𑀼 𑀇𑀢𑀺 𑀧𑀝𑀺𑀲𑀜𑁆𑀘𑀺𑀓𑁆𑀔𑀢𑀺 𑁋 ‘𑀲𑀦𑁆𑀢𑀺 𑀔𑁄 𑀧𑀦 𑀲𑀗𑁆𑀖𑁂 𑀣𑁂𑀭𑀸 𑀭𑀢𑁆𑀢𑀜𑁆𑀜𑀽 𑀘𑀺𑀭𑀧𑀩𑁆𑀩𑀚𑀺𑀢𑀸 𑀪𑀸𑀭𑀯𑀸𑀳𑀺𑀦𑁄, 𑀢𑁂 𑀢𑁂𑀦 𑀧𑀜𑁆𑀜𑀸𑀬𑀺𑀲𑁆𑀲𑀦𑁆𑀢𑀻’𑀢𑀺 𑀅𑀢𑁆𑀢𑀦𑀸 𑀦 𑀢𑁂𑀲𑀼 𑀬𑁄𑀕𑀁 𑀆𑀧𑀚𑁆𑀚𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀥𑀫𑁆𑀫𑀸 𑀲𑁂𑀔𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺. 𑀅𑀝𑁆𑀞𑀫𑀁.

𑁯. 𑀤𑀼𑀢𑀺𑀬𑀧𑀭𑀺𑀳𑀸𑀦𑀺𑀲𑀼𑀢𑁆𑀢𑀁

𑁨𑁯. ‘‘𑀲𑀢𑁆𑀢𑀺𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀉𑀧𑀸𑀲𑀓𑀲𑁆𑀲 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂 𑀲𑀢𑁆𑀢? 𑀪𑀺𑀓𑁆𑀔𑀼𑀤𑀲𑁆𑀲𑀦𑀁 𑀳𑀸𑀧𑁂𑀢𑀺, 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀁 𑀧𑀫𑀚𑁆𑀚𑀢𑀺, 𑀅𑀥𑀺𑀲𑀻𑀮𑁂 𑀦 𑀲𑀺𑀓𑁆𑀔𑀢𑀺, 𑀅𑀧𑁆𑀧𑀲𑀸𑀤𑀩𑀳𑀼𑀮𑁄 𑀳𑁄𑀢𑀺, 𑀪𑀺𑀓𑁆𑀔𑀽𑀲𑀼 𑀣𑁂𑀭𑁂𑀲𑀼 𑀘𑁂𑀯 𑀦𑀯𑁂𑀲𑀼 𑀘 𑀫𑀚𑁆𑀛𑀺𑀫𑁂𑀲𑀼 𑀘 𑀉𑀧𑀸𑀭𑀫𑁆𑀪𑀘𑀺𑀢𑁆𑀢𑁄 𑀥𑀫𑁆𑀫𑀁 𑀲𑀼𑀡𑀸𑀢𑀺 𑀭𑀦𑁆𑀥𑀕𑀯𑁂𑀲𑀻, 𑀇𑀢𑁄 𑀩𑀳𑀺𑀤𑁆𑀥𑀸 𑀤𑀓𑁆𑀔𑀺𑀡𑁂𑀬𑁆𑀬𑀁 𑀕𑀯𑁂𑀲𑀢𑀺, 𑀢𑀢𑁆𑀣 𑀘 𑀧𑀼𑀩𑁆𑀩𑀓𑀸𑀭𑀁 𑀓𑀭𑁄𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀥𑀫𑁆𑀫𑀸 𑀉𑀧𑀸𑀲𑀓𑀲𑁆𑀲 𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺.

‘‘𑀲𑀢𑁆𑀢𑀺𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀉𑀧𑀸𑀲𑀓𑀲𑁆𑀲 𑀅𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀺. 𑀓𑀢𑀫𑁂 𑀲𑀢𑁆𑀢? 𑀪𑀺𑀓𑁆𑀔𑀼𑀤𑀲𑁆𑀲𑀦𑀁 𑀦 𑀳𑀸𑀧𑁂𑀢𑀺, 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀁 𑀦𑀧𑁆𑀧𑀫𑀚𑁆𑀚𑀢𑀺, 𑀅𑀥𑀺𑀲𑀻𑀮𑁂 𑀲𑀺𑀓𑁆𑀔𑀢𑀺, 𑀧𑀲𑀸𑀤𑀩𑀳𑀼𑀮𑁄 𑀳𑁄𑀢𑀺, 𑀪𑀺𑀓𑁆𑀔𑀽𑀲𑀼 𑀣𑁂𑀭𑁂𑀲𑀼 𑀘𑁂𑀯 𑀦𑀯𑁂𑀲𑀼 𑀘 𑀫𑀚𑁆𑀛𑀺𑀫𑁂𑀲𑀼 𑀘 𑀅𑀦𑀼𑀧𑀸𑀭𑀫𑁆𑀪𑀘𑀺𑀢𑁆𑀢𑁄 𑀥𑀫𑁆𑀫𑀁 𑀲𑀼𑀡𑀸𑀢𑀺 𑀦 𑀭𑀦𑁆𑀥𑀕𑀯𑁂𑀲𑀻, 𑀦 𑀇𑀢𑁄 𑀩𑀳𑀺𑀤𑁆𑀥𑀸 𑀤𑀓𑁆𑀔𑀺𑀡𑁂𑀬𑁆𑀬𑀁 𑀕𑀯𑁂𑀲𑀢𑀺, 𑀇𑀥 𑀘 𑀧𑀼𑀩𑁆𑀩𑀓𑀸𑀭𑀁 𑀓𑀭𑁄𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀥𑀫𑁆𑀫𑀸 𑀉𑀧𑀸𑀲𑀓𑀲𑁆𑀲 𑀅𑀧𑀭𑀺𑀳𑀸𑀦𑀸𑀬 𑀲𑀁𑀯𑀢𑁆𑀢𑀦𑁆𑀢𑀻’’𑀢𑀺. 𑀇𑀤𑀫𑀯𑁄𑀘 𑀪𑀕𑀯𑀸. 𑀇𑀤𑀁 𑀯𑀢𑁆𑀯𑀸𑀦 𑀲𑀼𑀕𑀢𑁄 𑀅𑀣𑀸𑀧𑀭𑀁 𑀏𑀢𑀤𑀯𑁄𑀘 𑀲𑀢𑁆𑀣𑀸 𑁋

‘‘𑀤𑀲𑁆𑀲𑀦𑀁 𑀪𑀸𑀯𑀺𑀢𑀢𑁆𑀢𑀸𑀦𑀁, 𑀬𑁄 𑀳𑀸𑀧𑁂𑀢𑀺 𑀉𑀧𑀸𑀲𑀓𑁄;

𑀲𑀯𑀦𑀜𑁆𑀘 𑀅𑀭𑀺𑀬𑀥𑀫𑁆𑀫𑀸𑀦𑀁, 𑀅𑀥𑀺𑀲𑀻𑀮𑁂 𑀦 𑀲𑀺𑀓𑁆𑀔𑀢𑀺.

‘‘𑀅𑀧𑁆𑀧𑀲𑀸𑀤𑁄 𑀘 𑀪𑀺𑀓𑁆𑀔𑀽𑀲𑀼, 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀧𑀯𑀟𑁆𑀠𑀢𑀺;

𑀉𑀧𑀸𑀭𑀫𑁆𑀪𑀓𑀘𑀺𑀢𑁆𑀢𑁄 𑀘, 𑀲𑀤𑁆𑀥𑀫𑁆𑀫𑀁 𑀲𑁄𑀢𑀼𑀫𑀺𑀘𑁆𑀙𑀢𑀺.

‘‘𑀇𑀢𑁄 𑀘 𑀩𑀳𑀺𑀤𑁆𑀥𑀸 𑀅𑀜𑁆𑀜𑀁, 𑀤𑀓𑁆𑀔𑀺𑀡𑁂𑀬𑁆𑀬𑀁 𑀕𑀯𑁂𑀲𑀢𑀺;

𑀢𑀢𑁆𑀣𑁂𑀯 𑀘 𑀧𑀼𑀩𑁆𑀩𑀓𑀸𑀭𑀁, 𑀬𑁄 𑀓𑀭𑁄𑀢𑀺 𑀉𑀧𑀸𑀲𑀓𑁄.

‘‘𑀏𑀢𑁂 𑀔𑁄 𑀧𑀭𑀺𑀳𑀸𑀦𑀺𑀬𑁂, 𑀲𑀢𑁆𑀢 𑀥𑀫𑁆𑀫𑁂 𑀲𑀼𑀤𑁂𑀲𑀺𑀢𑁂;

𑀉𑀧𑀸𑀲𑀓𑁄 𑀲𑁂𑀯𑀫𑀸𑀦𑁄, 𑀲𑀤𑁆𑀥𑀫𑁆𑀫𑀸 𑀧𑀭𑀺𑀳𑀸𑀬𑀢𑀺.

‘‘𑀤𑀲𑁆𑀲𑀦𑀁 𑀪𑀸𑀯𑀺𑀢𑀢𑁆𑀢𑀸𑀦𑀁, 𑀬𑁄 𑀦 𑀳𑀸𑀧𑁂𑀢𑀺 𑀉𑀧𑀸𑀲𑀓𑁄;

𑀲𑀯𑀦𑀜𑁆𑀘 𑀅𑀭𑀺𑀬𑀥𑀫𑁆𑀫𑀸𑀦𑀁, 𑀅𑀥𑀺𑀲𑀻𑀮𑁂 𑀘 𑀲𑀺𑀓𑁆𑀔𑀢𑀺.

‘‘𑀧𑀲𑀸𑀤𑁄 𑀘𑀲𑁆𑀲 𑀪𑀺𑀓𑁆𑀔𑀽𑀲𑀼, 𑀪𑀺𑀬𑁆𑀬𑁄 𑀪𑀺𑀬𑁆𑀬𑁄 𑀧𑀯𑀟𑁆𑀠𑀢𑀺;

𑀅𑀦𑀼𑀧𑀸𑀭𑀫𑁆𑀪𑀘𑀺𑀢𑁆𑀢𑁄 𑀘, 𑀲𑀤𑁆𑀥𑀫𑁆𑀫𑀁 𑀲𑁄𑀢𑀼𑀫𑀺𑀘𑁆𑀙𑀢𑀺.

‘‘𑀦 𑀇𑀢𑁄 𑀩𑀳𑀺𑀤𑁆𑀥𑀸 𑀅𑀜𑁆𑀜𑀁, 𑀤𑀓𑁆𑀔𑀺𑀡𑁂𑀬𑁆𑀬𑀁 𑀕𑀯𑁂𑀲𑀢𑀺;

𑀇𑀥𑁂𑀯 𑀘 𑀧𑀼𑀩𑁆𑀩𑀓𑀸𑀭𑀁, 𑀬𑁄 𑀓𑀭𑁄𑀢𑀺 𑀉𑀧𑀸𑀲𑀓𑁄.

‘‘𑀏𑀢𑁂 𑀔𑁄 𑀅𑀧𑀭𑀺𑀳𑀸𑀦𑀺𑀬𑁂, 𑀲𑀢𑁆𑀢 𑀥𑀫𑁆𑀫𑁂 𑀲𑀼𑀤𑁂𑀲𑀺𑀢𑁂;

𑀉𑀧𑀸𑀲𑀓𑁄 𑀲𑁂𑀯𑀫𑀸𑀦𑁄, 𑀲𑀤𑁆𑀥𑀫𑁆𑀫𑀸 𑀦 𑀧𑀭𑀺𑀳𑀸𑀬𑀢𑀻’’𑀢𑀺. 𑀦𑀯𑀫𑀁;

𑁧𑁦. 𑀯𑀺𑀧𑀢𑁆𑀢𑀺𑀲𑀼𑀢𑁆𑀢𑀁

𑁩𑁦. 𑀲𑀢𑁆𑀢𑀺𑀫𑀸, 𑀪𑀺𑀓𑁆𑀔𑀯𑁂, 𑀉𑀧𑀸𑀲𑀓𑀲𑁆𑀲 𑀯𑀺𑀧𑀢𑁆𑀢𑀺𑀬𑁄…𑀧𑁂… 𑀲𑀢𑁆𑀢𑀺𑀫𑀸, 𑀪𑀺𑀓𑁆𑀔𑀯𑁂, 𑀉𑀧𑀸𑀲𑀓𑀲𑁆𑀲 𑀲𑀫𑁆𑀧𑀤𑀸…𑀧𑁂…. 𑀤𑀲𑀫𑀁.

𑁧𑁧. 𑀧𑀭𑀸𑀪𑀯𑀲𑀼𑀢𑁆𑀢𑀁

𑁩𑁧. ‘‘𑀲𑀢𑁆𑀢𑀺𑀫𑁂, 𑀪𑀺𑀓𑁆𑀔𑀯𑁂, 𑀉𑀧𑀸𑀲𑀓𑀲𑁆𑀲 𑀧𑀭𑀸𑀪𑀯𑀸…𑀧𑁂… 𑀲𑀢𑁆𑀢𑀺𑀫𑁂, 𑀪𑀺𑀓𑁆𑀔𑀯𑁂, 𑀉𑀧𑀸𑀲𑀓𑀲𑁆𑀲 𑀲𑀫𑁆𑀪𑀯𑀸. 𑀓𑀢𑀫𑁂 𑀲𑀢𑁆𑀢? 𑀪𑀺𑀓𑁆𑀔𑀼𑀤𑀲𑁆𑀲𑀦𑀁 𑀦 𑀳𑀸𑀧𑁂𑀢𑀺, 𑀲𑀤𑁆𑀥𑀫𑁆𑀫𑀲𑁆𑀲𑀯𑀦𑀁 𑀦𑀧𑁆𑀧𑀫𑀚𑁆𑀚𑀢𑀺, 𑀅𑀥𑀺𑀲𑀻𑀮𑁂 𑀲𑀺𑀓𑁆𑀔𑀢𑀺, 𑀧𑀲𑀸𑀤𑀩𑀳𑀼𑀮𑁄 𑀳𑁄𑀢𑀺, 𑀪𑀺𑀓𑁆𑀔𑀽𑀲𑀼 𑀣𑁂𑀭𑁂𑀲𑀼 𑀘𑁂𑀯 𑀦𑀯𑁂𑀲𑀼 𑀘 𑀫𑀚𑁆𑀛𑀺𑀫𑁂𑀲𑀼 𑀘 𑀅𑀦𑀼𑀧𑀸𑀭𑀫𑁆𑀪𑀘𑀺𑀢𑁆𑀢𑁄 𑀥𑀫𑁆𑀫𑀁 𑀲𑀼𑀡𑀸𑀢𑀺 𑀦 𑀭𑀦𑁆𑀥𑀕𑀯𑁂𑀲𑀻, 𑀦 𑀇𑀢𑁄 𑀩𑀳𑀺𑀤𑁆𑀥𑀸 𑀤𑀓𑁆𑀔𑀺𑀡𑁂𑀬𑁆𑀬𑀁 𑀕𑀯𑁂𑀲𑀢𑀺, 𑀇𑀥 𑀘 𑀧𑀼𑀩𑁆𑀩𑀓𑀸𑀭𑀁 𑀓𑀭𑁄𑀢𑀺. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀉𑀧𑀸𑀲𑀓𑀲𑁆𑀲 𑀲𑀫𑁆𑀪𑀯𑀸𑀢𑀺.