𑁨. 𑀅𑀦𑀼𑀲𑀬𑀯𑀕𑁆𑀕𑁄

𑁧. 𑀧𑀞𑀫𑀅𑀦𑀼𑀲𑀬𑀲𑀼𑀢𑁆𑀢𑀁

𑁧𑁧. ‘‘𑀲𑀢𑁆𑀢𑀺𑀫𑁂, 𑀪𑀺𑀓𑁆𑀔𑀯𑁂, 𑀅𑀦𑀼𑀲𑀬𑀸. 𑀓𑀢𑀫𑁂 𑀲𑀢𑁆𑀢? 𑀓𑀸𑀫𑀭𑀸𑀕𑀸𑀦𑀼𑀲𑀬𑁄, 𑀧𑀝𑀺𑀖𑀸𑀦𑀼𑀲𑀬𑁄, 𑀤𑀺𑀝𑁆𑀞𑀸𑀦𑀼𑀲𑀬𑁄, 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑁄, 𑀫𑀸𑀦𑀸𑀦𑀼𑀲𑀬𑁄, 𑀪𑀯𑀭𑀸𑀕𑀸𑀦𑀼𑀲𑀬𑁄, 𑀅𑀯𑀺𑀚𑁆𑀚𑀸𑀦𑀼𑀲𑀬𑁄. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀅𑀦𑀼𑀲𑀬𑀸’’𑀢𑀺. 𑀧𑀞𑀫𑀁.

𑁨. 𑀤𑀼𑀢𑀺𑀬𑀅𑀦𑀼𑀲𑀬𑀲𑀼𑀢𑁆𑀢𑀁

𑁧𑁨. ‘‘𑀲𑀢𑁆𑀢𑀦𑁆𑀦𑀁, 𑀪𑀺𑀓𑁆𑀔𑀯𑁂, 𑀅𑀦𑀼𑀲𑀬𑀸𑀦𑀁 𑀧𑀳𑀸𑀦𑀸𑀬 𑀲𑀫𑀼𑀘𑁆𑀙𑁂𑀤𑀸𑀬 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀺. 𑀓𑀢𑀫𑁂𑀲𑀁 𑀲𑀢𑁆𑀢𑀦𑁆𑀦𑀁? 𑀓𑀸𑀫𑀭𑀸𑀕𑀸𑀦𑀼𑀲𑀬𑀲𑁆𑀲 𑀧𑀳𑀸𑀦𑀸𑀬 𑀲𑀫𑀼𑀘𑁆𑀙𑁂𑀤𑀸𑀬 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀺, 𑀧𑀝𑀺𑀖𑀸𑀦𑀼𑀲𑀬𑀲𑁆𑀲…𑀧𑁂… 𑀤𑀺𑀝𑁆𑀞𑀸𑀦𑀼𑀲𑀬𑀲𑁆𑀲… 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑀲𑁆𑀲… 𑀫𑀸𑀦𑀸𑀦𑀼𑀲𑀬𑀲𑁆𑀲… 𑀪𑀯𑀭𑀸𑀕𑀸𑀦𑀼𑀲𑀬𑀲𑁆𑀲… 𑀅𑀯𑀺𑀚𑁆𑀚𑀸𑀦𑀼𑀲𑀬𑀲𑁆𑀲 𑀧𑀳𑀸𑀦𑀸𑀬 𑀲𑀫𑀼𑀘𑁆𑀙𑁂𑀤𑀸𑀬 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀺. 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀦𑁆𑀦𑀁 𑀅𑀦𑀼𑀲𑀬𑀸𑀦𑀁 𑀧𑀳𑀸𑀦𑀸𑀬 𑀲𑀫𑀼𑀘𑁆𑀙𑁂𑀤𑀸𑀬 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀺.

‘‘𑀬𑀢𑁄 𑀘 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀓𑀸𑀫𑀭𑀸𑀕𑀸𑀦𑀼𑀲𑀬𑁄 𑀧𑀳𑀻𑀦𑁄 𑀳𑁄𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑁄 𑀢𑀸𑀮𑀸𑀯𑀢𑁆𑀣𑀼𑀓𑀢𑁄 𑀅𑀦𑀪𑀸𑀯𑀁𑀓𑀢𑁄 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑁄. 𑀧𑀝𑀺𑀖𑀸𑀦𑀼𑀲𑀬𑁄…𑀧𑁂… 𑀤𑀺𑀝𑁆𑀞𑀸𑀦𑀼𑀲𑀬𑁄… 𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑁄… 𑀫𑀸𑀦𑀸𑀦𑀼𑀲𑀬𑁄… 𑀪𑀯𑀭𑀸𑀕𑀸𑀦𑀼𑀲𑀬𑁄… 𑀅𑀯𑀺𑀚𑁆𑀚𑀸𑀦𑀼𑀲𑀬𑁄 𑀧𑀳𑀻𑀦𑁄 𑀳𑁄𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑁄 𑀢𑀸𑀮𑀸𑀯𑀢𑁆𑀣𑀼𑀓𑀢𑁄 𑀅𑀦𑀪𑀸𑀯𑀁𑀓𑀢𑁄 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑁄. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀘𑁆𑀙𑁂𑀘𑁆𑀙𑀺 𑀢𑀡𑁆𑀳𑀁, 𑀯𑀺𑀯𑀢𑁆𑀢𑀬𑀺 𑀲𑀁𑀬𑁄𑀚𑀦𑀁, 𑀲𑀫𑁆𑀫𑀸 𑀫𑀸𑀦𑀸𑀪𑀺𑀲𑀫𑀬𑀸 𑀅𑀦𑁆𑀢𑀫𑀓𑀸𑀲𑀺 𑀤𑀼𑀓𑁆𑀔𑀲𑁆𑀲𑀸’’𑀢𑀺. 𑀤𑀼𑀢𑀺𑀬𑀁.

𑁩. 𑀓𑀼𑀮𑀲𑀼𑀢𑁆𑀢𑀁

𑁧𑁩. ‘‘𑀲𑀢𑁆𑀢𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀓𑀼𑀮𑀁 𑀅𑀦𑀼𑀧𑀕𑀦𑁆𑀢𑁆𑀯𑀸 𑀯𑀸 𑀦𑀸𑀮𑀁 𑀉𑀧𑀕𑀦𑁆𑀢𑀼𑀁, 𑀉𑀧𑀕𑀦𑁆𑀢𑁆𑀯𑀸 𑀯𑀸 𑀦𑀸𑀮𑀁 𑀉𑀧𑀦𑀺𑀲𑀻𑀤𑀺𑀢𑀼𑀁. 𑀓𑀢𑀫𑁂𑀳𑀺 𑀲𑀢𑁆𑀢𑀳𑀺? 𑀦 𑀫𑀦𑀸𑀧𑁂𑀦 𑀧𑀘𑁆𑀘𑀼𑀝𑁆𑀞𑁂𑀦𑁆𑀢𑀺, 𑀦 𑀫𑀦𑀸𑀧𑁂𑀦 𑀅𑀪𑀺𑀯𑀸𑀤𑁂𑀦𑁆𑀢𑀺, 𑀦 𑀫𑀦𑀸𑀧𑁂𑀦 𑀆𑀲𑀦𑀁 𑀤𑁂𑀦𑁆𑀢𑀺, 𑀲𑀦𑁆𑀢𑀫𑀲𑁆𑀲 𑀧𑀭𑀺𑀕𑀼𑀳𑀦𑁆𑀢𑀺, 𑀩𑀳𑀼𑀓𑀫𑁆𑀧𑀺 𑀣𑁄𑀓𑀁 𑀤𑁂𑀦𑁆𑀢𑀺, 𑀧𑀡𑀻𑀢𑀫𑁆𑀧𑀺 𑀮𑀽𑀔𑀁 𑀤𑁂𑀦𑁆𑀢𑀺, 𑀅𑀲𑀓𑁆𑀓𑀘𑁆𑀘𑀁 𑀤𑁂𑀦𑁆𑀢𑀺 𑀦𑁄 𑀲𑀓𑁆𑀓𑀘𑁆𑀘𑀁. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀓𑀼𑀮𑀁 𑀅𑀦𑀼𑀧𑀕𑀦𑁆𑀢𑁆𑀯𑀸 𑀯𑀸 𑀦𑀸𑀮𑀁 𑀉𑀧𑀕𑀦𑁆𑀢𑀼𑀁, 𑀉𑀧𑀕𑀦𑁆𑀢𑁆𑀯𑀸 𑀯𑀸 𑀦𑀸𑀮𑀁 𑀉𑀧𑀦𑀺𑀲𑀻𑀤𑀺𑀢𑀼𑀁.

‘‘𑀲𑀢𑁆𑀢𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀓𑀼𑀮𑀁 𑀅𑀦𑀼𑀧𑀕𑀦𑁆𑀢𑁆𑀯𑀸 𑀯𑀸 𑀅𑀮𑀁 𑀉𑀧𑀕𑀦𑁆𑀢𑀼𑀁, 𑀉𑀧𑀕𑀦𑁆𑀢𑁆𑀯𑀸 𑀯𑀸 𑀅𑀮𑀁 𑀉𑀧𑀦𑀺𑀲𑀻𑀤𑀺𑀢𑀼𑀁. 𑀓𑀢𑀫𑁂𑀳𑀺 𑀲𑀢𑁆𑀢𑀳𑀺? 𑀫𑀦𑀸𑀧𑁂𑀦 𑀧𑀘𑁆𑀘𑀼𑀝𑁆𑀞𑁂𑀦𑁆𑀢𑀺, 𑀫𑀦𑀸𑀧𑁂𑀦 𑀅𑀪𑀺𑀯𑀸𑀤𑁂𑀦𑁆𑀢𑀺, 𑀫𑀦𑀸𑀧𑁂𑀦 𑀆𑀲𑀦𑀁 𑀤𑁂𑀦𑁆𑀢𑀺, 𑀲𑀦𑁆𑀢𑀫𑀲𑁆𑀲 𑀦 𑀧𑀭𑀺𑀕𑀼𑀳𑀦𑁆𑀢𑀺, 𑀩𑀳𑀼𑀓𑀫𑁆𑀧𑀺 𑀩𑀳𑀼𑀓𑀁 𑀤𑁂𑀦𑁆𑀢𑀺, 𑀧𑀡𑀻𑀢𑀫𑁆𑀧𑀺 𑀧𑀡𑀻𑀢𑀁 𑀤𑁂𑀦𑁆𑀢𑀺, 𑀲𑀓𑁆𑀓𑀘𑁆𑀘𑀁 𑀤𑁂𑀦𑁆𑀢𑀺 𑀦𑁄 𑀅𑀲𑀓𑁆𑀓𑀘𑁆𑀘𑀁. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀳𑀺 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀓𑀼𑀮𑀁 𑀅𑀦𑀼𑀧𑀕𑀦𑁆𑀢𑁆𑀯𑀸 𑀯𑀸 𑀅𑀮𑀁 𑀉𑀧𑀕𑀦𑁆𑀢𑀼𑀁, 𑀉𑀧𑀕𑀦𑁆𑀢𑁆𑀯𑀸 𑀯𑀸 𑀅𑀮𑀁 𑀉𑀧𑀦𑀺𑀲𑀻𑀤𑀺𑀢𑀼’’𑀦𑁆𑀢𑀺. 𑀢𑀢𑀺𑀬𑀁.

𑁪. 𑀧𑀼𑀕𑁆𑀕𑀮𑀲𑀼𑀢𑁆𑀢𑀁

𑁧𑁪. ‘‘𑀲𑀢𑁆𑀢𑀺𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀆𑀳𑀼𑀦𑁂𑀬𑁆𑀬𑀸 𑀧𑀸𑀳𑀼𑀦𑁂𑀬𑁆𑀬𑀸 𑀤𑀓𑁆𑀔𑀺𑀡𑁂𑀬𑁆𑀬𑀸 𑀅𑀜𑁆𑀚𑀮𑀺𑀓𑀭𑀡𑀻𑀬𑀸 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲. 𑀓𑀢𑀫𑁂 𑀲𑀢𑁆𑀢? 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄, 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑁄, 𑀓𑀸𑀬𑀲𑀓𑁆𑀔𑀻, 𑀤𑀺𑀝𑁆𑀞𑀺𑀧𑁆𑀧𑀢𑁆𑀢𑁄 [𑀤𑀺𑀝𑁆𑀞𑀧𑁆𑀧𑀢𑁆𑀢𑁄 (𑀓.)], 𑀲𑀤𑁆𑀥𑀸𑀯𑀺𑀫𑀼𑀢𑁆𑀢𑁄, 𑀥𑀫𑁆𑀫𑀸𑀦𑀼𑀲𑀸𑀭𑀻, 𑀲𑀤𑁆𑀥𑀸𑀦𑀼𑀲𑀸𑀭𑀻. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀧𑀼𑀕𑁆𑀕𑀮𑀸 𑀆𑀳𑀼𑀦𑁂𑀬𑁆𑀬𑀸 𑀧𑀸𑀳𑀼𑀦𑁂𑀬𑁆𑀬𑀸 𑀤𑀓𑁆𑀔𑀺𑀡𑁂𑀬𑁆𑀬𑀸 𑀅𑀜𑁆𑀚𑀮𑀺𑀓𑀭𑀡𑀻𑀬𑀸 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸’’𑀢𑀺. 𑀘𑀢𑀼𑀢𑁆𑀣𑀁.

𑁫. 𑀉𑀤𑀓𑀽𑀧𑀫𑀸𑀲𑀼𑀢𑁆𑀢𑀁

𑁧𑁫. ‘‘𑀲𑀢𑁆𑀢𑀺𑀫𑁂, 𑀪𑀺𑀓𑁆𑀔𑀯𑁂, 𑀉𑀤𑀓𑀽𑀧𑀫𑀸 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺𑀁. 𑀓𑀢𑀫𑁂 𑀲𑀢𑁆𑀢? [𑀧𑀼. 𑀧. 𑁨𑁦𑁩; 𑀓𑀣𑀸. 𑁮𑁫𑁨] 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀲𑀓𑀺𑀁 𑀦𑀺𑀫𑀼𑀕𑁆𑀕𑁄 𑀦𑀺𑀫𑀼𑀕𑁆𑀕𑁄𑀯 𑀳𑁄𑀢𑀺; 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀦𑀺𑀫𑀼𑀚𑁆𑀚𑀢𑀺; 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀞𑀺𑀢𑁄 𑀳𑁄𑀢𑀺; 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀢𑀺 𑀯𑀺𑀮𑁄𑀓𑁂𑀢𑀺; 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀧𑀢𑀭𑀢𑀺; 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀧𑀢𑀺𑀕𑀸𑀥𑀧𑁆𑀧𑀢𑁆𑀢𑁄 𑀳𑁄𑀢𑀺; 𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀢𑀺𑀡𑁆𑀡𑁄 𑀳𑁄𑀢𑀺 𑀧𑀸𑀭𑀗𑁆𑀕𑀢𑁄 [𑀧𑀸𑀭𑀕𑀢𑁄 (𑀲𑀻. 𑀲𑁆𑀬𑀸. 𑀓𑀁.)] 𑀣𑀮𑁂 𑀢𑀺𑀝𑁆𑀞𑀢𑀺 𑀩𑁆𑀭𑀸𑀳𑁆𑀫𑀡𑁄.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀲𑀓𑀺𑀁 𑀦𑀺𑀫𑀼𑀕𑁆𑀕𑁄 𑀦𑀺𑀫𑀼𑀕𑁆𑀕𑁄𑀯 𑀳𑁄𑀢𑀺? 𑀇𑀥 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺 𑀏𑀓𑀦𑁆𑀢𑀓𑀸𑀴𑀓𑁂𑀳𑀺 𑀅𑀓𑀼𑀲𑀮𑁂𑀳𑀺 𑀥𑀫𑁆𑀫𑁂𑀳𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀲𑀓𑀺𑀁 𑀦𑀺𑀫𑀼𑀕𑁆𑀕𑁄 𑀦𑀺𑀫𑀼𑀕𑁆𑀕𑁄𑀯 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀦𑀺𑀫𑀼𑀚𑁆𑀚𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀉𑀫𑁆𑀫𑀼𑀚𑁆𑀚𑀢𑀺 𑀲𑀸𑀥𑀼 𑀲𑀤𑁆𑀥𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀲𑀸𑀥𑀼 𑀳𑀺𑀭𑀻…𑀧𑁂… 𑀲𑀸𑀥𑀼 𑀑𑀢𑁆𑀢𑀧𑁆𑀧𑀁… 𑀲𑀸𑀥𑀼 𑀯𑀻𑀭𑀺𑀬𑀁 [𑀯𑀺𑀭𑀺𑀬𑀁 (𑀲𑀻. 𑀲𑁆𑀬𑀸. 𑀓𑀁. 𑀧𑀻.)] … 𑀲𑀸𑀥𑀼 𑀧𑀜𑁆𑀜𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽𑀢𑀺. 𑀢𑀲𑁆𑀲 𑀲𑀸 𑀲𑀤𑁆𑀥𑀸 𑀦𑁂𑀯 𑀢𑀺𑀝𑁆𑀞𑀢𑀺 𑀦𑁄 𑀯𑀟𑁆𑀠𑀢𑀺 𑀳𑀸𑀬𑀢𑀺𑀬𑁂𑀯, 𑀢𑀲𑁆𑀲 𑀲𑀸 𑀳𑀺𑀭𑀻…𑀧𑁂… 𑀢𑀲𑁆𑀲 𑀢𑀁 𑀑𑀢𑁆𑀢𑀧𑁆𑀧𑀁… 𑀢𑀲𑁆𑀲 𑀢𑀁 𑀯𑀻𑀭𑀺𑀬𑀁… 𑀢𑀲𑁆𑀲 𑀲𑀸 𑀧𑀜𑁆𑀜𑀸 𑀦𑁂𑀯 𑀢𑀺𑀝𑁆𑀞𑀢𑀺 𑀦𑁄 𑀯𑀟𑁆𑀠𑀢𑀺 𑀳𑀸𑀬𑀢𑀺𑀬𑁂𑀯. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀦𑀺𑀫𑀼𑀚𑁆𑀚𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀞𑀺𑀢𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀉𑀫𑁆𑀫𑀼𑀚𑁆𑀚𑀢𑀺 𑀲𑀸𑀥𑀼 𑀲𑀤𑁆𑀥𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀲𑀸𑀥𑀼 𑀳𑀺𑀭𑀻…𑀧𑁂… 𑀲𑀸𑀥𑀼 𑀑𑀢𑁆𑀢𑀧𑁆𑀧𑀁… 𑀲𑀸𑀥𑀼 𑀯𑀻𑀭𑀺𑀬𑀁… 𑀲𑀸𑀥𑀼 𑀧𑀜𑁆𑀜𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽𑀢𑀺. 𑀢𑀲𑁆𑀲 𑀲𑀸 𑀲𑀤𑁆𑀥𑀸 𑀦𑁂𑀯 𑀳𑀸𑀬𑀢𑀺 𑀦𑁄 𑀯𑀟𑁆𑀠𑀢𑀺 𑀞𑀺𑀢𑀸 𑀳𑁄𑀢𑀺. 𑀢𑀲𑁆𑀲 𑀲𑀸 𑀳𑀺𑀭𑀻…𑀧𑁂… 𑀢𑀲𑁆𑀲 𑀢𑀁 𑀑𑀢𑁆𑀢𑀧𑁆𑀧𑀁… 𑀢𑀲𑁆𑀲 𑀢𑀁 𑀯𑀻𑀭𑀺𑀬𑀁… 𑀢𑀲𑁆𑀲 𑀲𑀸 𑀧𑀜𑁆𑀜𑀸 𑀦𑁂𑀯 𑀳𑀸𑀬𑀢𑀺 𑀦𑁄 𑀯𑀟𑁆𑀠𑀢𑀺 𑀞𑀺𑀢𑀸 𑀳𑁄𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀞𑀺𑀢𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀢𑀺 𑀯𑀺𑀮𑁄𑀓𑁂𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀉𑀫𑁆𑀫𑀼𑀚𑁆𑀚𑀢𑀺 𑀲𑀸𑀥𑀼 𑀲𑀤𑁆𑀥𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀲𑀸𑀥𑀼 𑀳𑀺𑀭𑀻…𑀧𑁂… 𑀲𑀸𑀥𑀼 𑀑𑀢𑁆𑀢𑀧𑁆𑀧𑀁… 𑀲𑀸𑀥𑀼 𑀯𑀻𑀭𑀺𑀬𑀁… 𑀲𑀸𑀥𑀼 𑀧𑀜𑁆𑀜𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽𑀢𑀺. 𑀲𑁄 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀲𑁄𑀢𑀸𑀧𑀦𑁆𑀦𑁄 𑀳𑁄𑀢𑀺 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄 𑀦𑀺𑀬𑀢𑁄 𑀲𑀫𑁆𑀩𑁄𑀥𑀺𑀧𑀭𑀸𑀬𑀡𑁄. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀯𑀺𑀧𑀲𑁆𑀲𑀢𑀺 𑀯𑀺𑀮𑁄𑀓𑁂𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀧𑀢𑀭𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀉𑀫𑁆𑀫𑀼𑀚𑁆𑀚𑀢𑀺 𑀲𑀸𑀥𑀼 𑀲𑀤𑁆𑀥𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀲𑀸𑀥𑀼 𑀳𑀺𑀭𑀻…𑀧𑁂… 𑀲𑀸𑀥𑀼 𑀑𑀢𑁆𑀢𑀧𑁆𑀧𑀁… 𑀲𑀸𑀥𑀼 𑀯𑀻𑀭𑀺𑀬𑀁… 𑀲𑀸𑀥𑀼 𑀧𑀜𑁆𑀜𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽𑀢𑀺. 𑀲𑁄 𑀢𑀺𑀡𑁆𑀡𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀭𑀸𑀕𑀤𑁄𑀲𑀫𑁄𑀳𑀸𑀦𑀁 𑀢𑀦𑀼𑀢𑁆𑀢𑀸 𑀲𑀓𑀤𑀸𑀕𑀸𑀫𑀻 𑀳𑁄𑀢𑀺, 𑀲𑀓𑀺𑀤𑁂𑀯 [𑀲𑀓𑀺𑀁𑀤𑁂𑀯 (𑀓.)] 𑀇𑀫𑀁 𑀮𑁄𑀓𑀁 𑀆𑀕𑀦𑁆𑀢𑁆𑀯𑀸 𑀤𑀼𑀓𑁆𑀔𑀲𑁆𑀲𑀦𑁆𑀢𑀁 𑀓𑀭𑁄𑀢𑀺 [𑀤𑀼𑀓𑁆𑀔𑀲𑁆𑀲𑀦𑁆𑀢𑀓𑀭𑁄 𑀳𑁄𑀢𑀺 (𑀓.)]. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀧𑀢𑀭𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀧𑀢𑀺𑀕𑀸𑀥𑀧𑁆𑀧𑀢𑁆𑀢𑁄 𑀳𑁄𑀢𑀺? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀉𑀫𑁆𑀫𑀼𑀚𑁆𑀚𑀢𑀺 𑀲𑀸𑀥𑀼 𑀲𑀤𑁆𑀥𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀲𑀸𑀥𑀼 𑀳𑀺𑀭𑀻…𑀧𑁂… 𑀲𑀸𑀥𑀼 𑀑𑀢𑁆𑀢𑀧𑁆𑀧𑀁… 𑀲𑀸𑀥𑀼 𑀯𑀻𑀭𑀺𑀬𑀁… 𑀲𑀸𑀥𑀼 𑀧𑀜𑁆𑀜𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽𑀢𑀺. 𑀲𑁄 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀑𑀧𑀧𑀸𑀢𑀺𑀓𑁄 𑀳𑁄𑀢𑀺 𑀢𑀢𑁆𑀣 𑀧𑀭𑀺𑀦𑀺𑀩𑁆𑀩𑀸𑀬𑀻 𑀅𑀦𑀸𑀯𑀢𑁆𑀢𑀺𑀥𑀫𑁆𑀫𑁄 𑀢𑀲𑁆𑀫𑀸 𑀮𑁄𑀓𑀸. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀧𑀢𑀺𑀕𑀸𑀥𑀧𑁆𑀧𑀢𑁆𑀢𑁄 𑀳𑁄𑀢𑀺.

‘‘𑀓𑀣𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀢𑀺𑀡𑁆𑀡𑁄 𑀳𑁄𑀢𑀺 𑀧𑀸𑀭𑀗𑁆𑀕𑀢𑁄 𑀣𑀮𑁂 𑀢𑀺𑀝𑁆𑀞𑀢𑀺 𑀩𑁆𑀭𑀸𑀳𑁆𑀫𑀡𑁄. 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀉𑀫𑁆𑀫𑀼𑀚𑁆𑀚𑀢𑀺 𑀲𑀸𑀥𑀼 𑀲𑀤𑁆𑀥𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼, 𑀲𑀸𑀥𑀼 𑀳𑀺𑀭𑀻…𑀧𑁂… 𑀲𑀸𑀥𑀼 𑀑𑀢𑁆𑀢𑀧𑁆𑀧𑀁… 𑀲𑀸𑀥𑀼 𑀯𑀻𑀭𑀺𑀬𑀁… 𑀲𑀸𑀥𑀼 𑀧𑀜𑁆𑀜𑀸 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀽𑀢𑀺. 𑀲𑁄 𑀆𑀲𑀯𑀸𑀦𑀁 𑀔𑀬𑀸 𑀅𑀦𑀸𑀲𑀯𑀁 𑀘𑁂𑀢𑁄𑀯𑀺𑀫𑀼𑀢𑁆𑀢𑀺𑀁 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀁 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀬𑀁 𑀅𑀪𑀺𑀜𑁆𑀜𑀸 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀏𑀯𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑁄 𑀉𑀫𑁆𑀫𑀼𑀚𑁆𑀚𑀺𑀢𑁆𑀯𑀸 𑀢𑀺𑀡𑁆𑀡𑁄 𑀳𑁄𑀢𑀺 𑀧𑀸𑀭𑀗𑁆𑀕𑀢𑁄 𑀣𑀮𑁂 𑀢𑀺𑀝𑁆𑀞𑀢𑀺 𑀩𑁆𑀭𑀸𑀳𑁆𑀫𑀡𑁄.

‘‘𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀉𑀤𑀓𑀽𑀧𑀫𑀸 𑀧𑀼𑀕𑁆𑀕𑀮𑀸 𑀲𑀦𑁆𑀢𑁄 𑀲𑀁𑀯𑀺𑀚𑁆𑀚𑀫𑀸𑀦𑀸 𑀮𑁄𑀓𑀲𑁆𑀫𑀺’’𑀦𑁆𑀢𑀺. 𑀧𑀜𑁆𑀘𑀫𑀁.

𑁬. 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀻𑀲𑀼𑀢𑁆𑀢𑀁

𑁧𑁬. ‘‘𑀲𑀢𑁆𑀢𑀺𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀆𑀳𑀼𑀦𑁂𑀬𑁆𑀬𑀸 𑀧𑀸𑀳𑀼𑀦𑁂𑀬𑁆𑀬𑀸 𑀤𑀓𑁆𑀔𑀺𑀡𑁂𑀬𑁆𑀬𑀸 𑀅𑀜𑁆𑀚𑀮𑀺𑀓𑀭𑀡𑀻𑀬𑀸 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲. 𑀓𑀢𑀫𑁂 𑀲𑀢𑁆𑀢? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀅𑀦𑀺𑀘𑁆𑀘𑀲𑀜𑁆𑀜𑀻, 𑀅𑀦𑀺𑀘𑁆𑀘𑀧𑀝𑀺𑀲𑀁𑀯𑁂𑀤𑀻 𑀲𑀢𑀢𑀁 𑀲𑀫𑀺𑀢𑀁 𑀅𑀩𑁆𑀩𑁄𑀓𑀺𑀡𑁆𑀡𑀁 𑀘𑁂𑀢𑀲𑀸 𑀅𑀥𑀺𑀫𑀼𑀘𑁆𑀘𑀫𑀸𑀦𑁄 𑀧𑀜𑁆𑀜𑀸𑀬 𑀧𑀭𑀺𑀬𑁄𑀕𑀸𑀳𑀫𑀸𑀦𑁄. 𑀲𑁄 𑀆𑀲𑀯𑀸𑀦𑀁 𑀔𑀬𑀸…𑀧𑁂… 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀁, 𑀪𑀺𑀓𑁆𑀔𑀯𑁂, 𑀧𑀞𑀫𑁄 𑀧𑀼𑀕𑁆𑀕𑀮𑁄 𑀆𑀳𑀼𑀦𑁂𑀬𑁆𑀬𑁄 𑀧𑀸𑀳𑀼𑀦𑁂𑀬𑁆𑀬𑁄 𑀤𑀓𑁆𑀔𑀺𑀡𑁂𑀬𑁆𑀬𑁄 𑀅𑀜𑁆𑀚𑀮𑀺𑀓𑀭𑀡𑀻𑀬𑁄 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀅𑀦𑀺𑀘𑁆𑀘𑀲𑀜𑁆𑀜𑀻, 𑀅𑀦𑀺𑀘𑁆𑀘𑀧𑀝𑀺𑀲𑀁𑀯𑁂𑀤𑀻 𑀲𑀢𑀢𑀁 𑀲𑀫𑀺𑀢𑀁 𑀅𑀩𑁆𑀩𑁄𑀓𑀺𑀡𑁆𑀡𑀁 𑀘𑁂𑀢𑀲𑀸 𑀅𑀥𑀺𑀫𑀼𑀘𑁆𑀘𑀫𑀸𑀦𑁄 𑀧𑀜𑁆𑀜𑀸𑀬 𑀧𑀭𑀺𑀬𑁄𑀕𑀸𑀳𑀫𑀸𑀦𑁄. 𑀢𑀲𑁆𑀲 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀆𑀲𑀯𑀧𑀭𑀺𑀬𑀸𑀤𑀸𑀦𑀜𑁆𑀘 𑀳𑁄𑀢𑀺 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀜𑁆𑀘. 𑀅𑀬𑀁, 𑀪𑀺𑀓𑁆𑀔𑀯𑁂, 𑀤𑀼𑀢𑀺𑀬𑁄 𑀧𑀼𑀕𑁆𑀕𑀮𑁄 𑀆𑀳𑀼𑀦𑁂𑀬𑁆𑀬𑁄…𑀧𑁂… 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺, 𑀅𑀦𑀺𑀘𑁆𑀘𑀲𑀜𑁆𑀜𑀻, 𑀅𑀦𑀺𑀘𑁆𑀘𑀧𑀝𑀺𑀲𑀁𑀯𑁂𑀤𑀻 𑀲𑀢𑀢𑀁 𑀲𑀫𑀺𑀢𑀁 𑀅𑀩𑁆𑀩𑁄𑀓𑀺𑀡𑁆𑀡𑀁 𑀘𑁂𑀢𑀲𑀸 𑀅𑀥𑀺𑀫𑀼𑀘𑁆𑀘𑀫𑀸𑀦𑁄 𑀧𑀜𑁆𑀜𑀸𑀬 𑀧𑀭𑀺𑀬𑁄𑀕𑀸𑀳𑀫𑀸𑀦𑁄. 𑀲𑁄 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺…𑀧𑁂… 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺…𑀧𑁂… 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺…𑀧𑁂… 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺…𑀧𑁂… 𑀉𑀤𑁆𑀥𑀁𑀲𑁄𑀢𑁄 𑀳𑁄𑀢𑀺 𑀅𑀓𑀦𑀺𑀝𑁆𑀞𑀕𑀸𑀫𑀻. 𑀅𑀬𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀫𑁄 𑀧𑀼𑀕𑁆𑀕𑀮𑁄 𑀆𑀳𑀼𑀦𑁂𑀬𑁆𑀬𑁄 𑀧𑀸𑀳𑀼𑀦𑁂𑀬𑁆𑀬𑁄 𑀤𑀓𑁆𑀔𑀺𑀡𑁂𑀬𑁆𑀬𑁄 𑀅𑀜𑁆𑀚𑀮𑀺𑀓𑀭𑀡𑀻𑀬𑁄 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀧𑀼𑀕𑁆𑀕𑀮𑀸 𑀆𑀳𑀼𑀦𑁂𑀬𑁆𑀬𑀸 𑀧𑀸𑀳𑀼𑀦𑁂𑀬𑁆𑀬𑀸 𑀤𑀓𑁆𑀔𑀺𑀡𑁂𑀬𑁆𑀬𑀸 𑀅𑀜𑁆𑀚𑀮𑀺𑀓𑀭𑀡𑀻𑀬𑀸 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸’’𑀢𑀺. 𑀙𑀝𑁆𑀞𑀁.

𑁭. 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀻𑀲𑀼𑀢𑁆𑀢𑀁

𑁧𑁭. 𑀲𑀢𑁆𑀢𑀺𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸 𑀆𑀳𑀼𑀦𑁂𑀬𑁆𑀬𑀸…𑀧𑁂… 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲. 𑀓𑀢𑀫𑁂 𑀲𑀢𑁆𑀢? 𑀇𑀥, 𑀪𑀺𑀓𑁆𑀔𑀯𑁂, 𑀏𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀲𑀩𑁆𑀩𑀲𑀗𑁆𑀔𑀸𑀭𑁂𑀲𑀼 𑀤𑀼𑀓𑁆𑀔𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺…𑀧𑁂…. 𑀲𑀢𑁆𑀢𑀫𑀁.

𑁮. 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀻𑀲𑀼𑀢𑁆𑀢𑀁

𑁧𑁮. 𑀲𑀩𑁆𑀩𑁂𑀲𑀼 𑀥𑀫𑁆𑀫𑁂𑀲𑀼 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺…𑀧𑁂…. 𑀅𑀝𑁆𑀞𑀫𑀁.

𑁯. 𑀦𑀺𑀩𑁆𑀩𑀸𑀦𑀲𑀼𑀢𑁆𑀢𑀁

𑁧𑁯. [𑀓𑀣𑀸. 𑁫𑁪𑁭-𑁫𑁪𑁮] ‘‘𑀦𑀺𑀩𑁆𑀩𑀸𑀦𑁂 𑀲𑀼𑀔𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀲𑀼𑀔𑀲𑀜𑁆𑀜𑀻 𑀲𑀼𑀔𑀧𑀝𑀺𑀲𑀁𑀯𑁂𑀤𑀻 𑀲𑀢𑀢𑀁 𑀲𑀫𑀺𑀢𑀁 𑀅𑀩𑁆𑀩𑁄𑀓𑀺𑀡𑁆𑀡𑀁 𑀘𑁂𑀢𑀲𑀸 𑀅𑀥𑀺𑀫𑀼𑀘𑁆𑀘𑀫𑀸𑀦𑁄 𑀧𑀜𑁆𑀜𑀸𑀬 𑀧𑀭𑀺𑀬𑁄𑀕𑀸𑀳𑀫𑀸𑀦𑁄. 𑀲𑁄 𑀆𑀲𑀯𑀸𑀦𑀁 𑀔𑀬𑀸…𑀧𑁂… 𑀲𑀘𑁆𑀙𑀺𑀓𑀢𑁆𑀯𑀸 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀅𑀬𑀁 𑀪𑀺𑀓𑁆𑀔𑀯𑁂, 𑀧𑀞𑀫𑁄 𑀧𑀼𑀕𑁆𑀕𑀮𑁄 𑀆𑀳𑀼𑀦𑁂𑀬𑁆𑀬𑁄…𑀧𑁂… 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀦𑀺𑀩𑁆𑀩𑀸𑀦𑁂 𑀲𑀼𑀔𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀲𑀼𑀔𑀲𑀜𑁆𑀜𑀻 𑀲𑀼𑀔𑀧𑀝𑀺𑀲𑀁𑀯𑁂𑀤𑀻 𑀲𑀢𑀢𑀁 𑀲𑀫𑀺𑀢𑀁 𑀅𑀩𑁆𑀩𑁄𑀓𑀺𑀡𑁆𑀡𑀁 𑀘𑁂𑀢𑀲𑀸 𑀅𑀥𑀺𑀫𑀼𑀘𑁆𑀘𑀫𑀸𑀦𑁄 𑀧𑀜𑁆𑀜𑀸𑀬 𑀧𑀭𑀺𑀬𑁄𑀕𑀸𑀳𑀫𑀸𑀦𑁄. 𑀢𑀲𑁆𑀲 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫𑀁 𑀆𑀲𑀯𑀧𑀭𑀺𑀬𑀸𑀤𑀸𑀦𑀜𑁆𑀘 𑀳𑁄𑀢𑀺 𑀚𑀻𑀯𑀺𑀢𑀧𑀭𑀺𑀬𑀸𑀤𑀸𑀦𑀜𑁆𑀘. 𑀅𑀬𑀁, 𑀪𑀺𑀓𑁆𑀔𑀯𑁂, 𑀤𑀼𑀢𑀺𑀬𑁄 𑀧𑀼𑀕𑁆𑀕𑀮𑁄 𑀆𑀳𑀼𑀦𑁂𑀬𑁆𑀬𑁄…𑀧𑁂… 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲.

‘‘𑀧𑀼𑀦 𑀘𑀧𑀭𑀁, 𑀪𑀺𑀓𑁆𑀔𑀯𑁂, 𑀇𑀥𑁂𑀓𑀘𑁆𑀘𑁄 𑀧𑀼𑀕𑁆𑀕𑀮𑁄 𑀦𑀺𑀩𑁆𑀩𑀸𑀦𑁂 𑀲𑀼𑀔𑀸𑀦𑀼𑀧𑀲𑁆𑀲𑀻 𑀯𑀺𑀳𑀭𑀢𑀺 𑀲𑀼𑀔𑀲𑀜𑁆𑀜𑀻 𑀲𑀼𑀔𑀧𑀝𑀺𑀲𑀁𑀯𑁂𑀤𑀻 𑀲𑀢𑀢𑀁 𑀲𑀫𑀺𑀢𑀁 𑀅𑀩𑁆𑀩𑁄𑀓𑀺𑀡𑁆𑀡𑀁 𑀘𑁂𑀢𑀲𑀸 𑀅𑀥𑀺𑀫𑀼𑀘𑁆𑀘𑀫𑀸𑀦𑁄 𑀧𑀜𑁆𑀜𑀸𑀬 𑀧𑀭𑀺𑀬𑁄𑀕𑀸𑀳𑀫𑀸𑀦𑁄. 𑀲𑁄 𑀧𑀜𑁆𑀘𑀦𑁆𑀦𑀁 𑀑𑀭𑀫𑁆𑀪𑀸𑀕𑀺𑀬𑀸𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀭𑀺𑀓𑁆𑀔𑀬𑀸 𑀅𑀦𑁆𑀢𑀭𑀸𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺…𑀧𑁂… 𑀉𑀧𑀳𑀘𑁆𑀘𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺…𑀧𑁂… 𑀅𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺…𑀧𑁂… 𑀲𑀲𑀗𑁆𑀔𑀸𑀭𑀧𑀭𑀺𑀦𑀺𑀩𑁆𑀩𑀸𑀬𑀻 𑀳𑁄𑀢𑀺…𑀧𑁂… 𑀉𑀤𑁆𑀥𑀁𑀲𑁄𑀢𑁄 𑀳𑁄𑀢𑀺 𑀅𑀓𑀦𑀺𑀝𑁆𑀞𑀕𑀸𑀫𑀻. 𑀅𑀬𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀫𑁄 𑀧𑀼𑀕𑁆𑀕𑀮𑁄 𑀆𑀳𑀼𑀦𑁂𑀬𑁆𑀬𑁄…𑀧𑁂… 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲. 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀧𑀼𑀕𑁆𑀕𑀮𑀸 𑀆𑀳𑀼𑀦𑁂𑀬𑁆𑀬𑀸…𑀧𑁂… 𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸’’𑀢𑀺. 𑀦𑀯𑀫𑀁.

𑁧𑁦. 𑀦𑀺𑀤𑁆𑀤𑀲𑀯𑀢𑁆𑀣𑀼𑀲𑀼𑀢𑁆𑀢𑀁

𑁨𑁦. ‘‘𑀲𑀢𑁆𑀢𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀦𑀺𑀤𑁆𑀤𑀲𑀯𑀢𑁆𑀣𑀽𑀦𑀺. 𑀓𑀢𑀫𑀸𑀦𑀺 𑀲𑀢𑁆𑀢? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀲𑀺𑀓𑁆𑀔𑀸𑀲𑀫𑀸𑀤𑀸𑀦𑁂 𑀢𑀺𑀩𑁆𑀩𑀘𑁆𑀙𑀦𑁆𑀤𑁄 𑀳𑁄𑀢𑀺 𑀆𑀬𑀢𑀺𑀜𑁆𑀘 𑀲𑀺𑀓𑁆𑀔𑀸𑀲𑀫𑀸𑀤𑀸𑀦𑁂 𑀅𑀯𑀺𑀕𑀢𑀧𑁂𑀫𑁄 [𑀅𑀥𑀺𑀕𑀢𑀧𑁂𑀫𑁄 (𑀲𑁆𑀬𑀸.) 𑀅. 𑀦𑀺. 𑁭.𑁪𑁨; 𑀤𑀻. 𑀦𑀺. 𑁩.𑁩𑁩𑁧], 𑀥𑀫𑁆𑀫𑀦𑀺𑀲𑀦𑁆𑀢𑀺𑀬𑀸 𑀢𑀺𑀩𑁆𑀩𑀘𑁆𑀙𑀦𑁆𑀤𑁄 𑀳𑁄𑀢𑀺 𑀆𑀬𑀢𑀺𑀜𑁆𑀘 𑀥𑀫𑁆𑀫𑀦𑀺𑀲𑀦𑁆𑀢𑀺𑀬𑀸 𑀅𑀯𑀺𑀕𑀢𑀧𑁂𑀫𑁄, 𑀇𑀘𑁆𑀙𑀸𑀯𑀺𑀦𑀬𑁂 𑀢𑀺𑀩𑁆𑀩𑀘𑁆𑀙𑀦𑁆𑀤𑁄 𑀳𑁄𑀢𑀺 𑀆𑀬𑀢𑀺𑀜𑁆𑀘 𑀇𑀘𑁆𑀙𑀸𑀯𑀺𑀦𑀬𑁂 𑀅𑀯𑀺𑀕𑀢𑀧𑁂𑀫𑁄, 𑀧𑀝𑀺𑀲𑀮𑁆𑀮𑀸𑀦𑁂 𑀢𑀺𑀩𑁆𑀩𑀘𑁆𑀙𑀦𑁆𑀤𑁄 𑀳𑁄𑀢𑀺 𑀆𑀬𑀢𑀺𑀜𑁆𑀘 𑀧𑀝𑀺𑀲𑀮𑁆𑀮𑀸𑀦𑁂 𑀅𑀯𑀺𑀕𑀢𑀧𑁂𑀫𑁄, 𑀯𑀻𑀭𑀺𑀬𑀸𑀭𑀫𑁆𑀪𑁂 [𑀯𑀻𑀭𑀺𑀬𑀸𑀭𑀩𑁆𑀪𑁂 (𑀓.)] 𑀢𑀺𑀩𑁆𑀩𑀘𑁆𑀙𑀦𑁆𑀤𑁄 𑀳𑁄𑀢𑀺 𑀆𑀬𑀢𑀺𑀜𑁆𑀘 𑀯𑀻𑀭𑀺𑀬𑀸𑀭𑀫𑁆𑀪𑁂 𑀅𑀯𑀺𑀕𑀢𑀧𑁂𑀫𑁄, 𑀲𑀢𑀺𑀦𑁂𑀧𑀓𑁆𑀓𑁂 𑀢𑀺𑀩𑁆𑀩𑀘𑁆𑀙𑀦𑁆𑀤𑁄 𑀳𑁄𑀢𑀺 𑀆𑀬𑀢𑀺𑀜𑁆𑀘 𑀲𑀢𑀺𑀦𑁂𑀧𑀓𑁆𑀓𑁂 𑀅𑀯𑀺𑀕𑀢𑀧𑁂𑀫𑁄, 𑀤𑀺𑀝𑁆𑀞𑀺𑀧𑀝𑀺𑀯𑁂𑀥𑁂 𑀢𑀺𑀩𑁆𑀩𑀘𑁆𑀙𑀦𑁆𑀤𑁄 𑀳𑁄𑀢𑀺 𑀆𑀬𑀢𑀺𑀜𑁆𑀘 𑀤𑀺𑀝𑁆𑀞𑀺𑀧𑀝𑀺𑀯𑁂𑀥𑁂 𑀅𑀯𑀺𑀕𑀢𑀧𑁂𑀫𑁄. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀦𑀺𑀤𑁆𑀤𑀲𑀯𑀢𑁆𑀣𑀽𑀦𑀻’’𑀢𑀺. 𑀤𑀲𑀫𑀁.

𑀅𑀦𑀼𑀲𑀬𑀯𑀕𑁆𑀕𑁄 𑀤𑀼𑀢𑀺𑀬𑁄.