𑁫. 𑀲𑀁𑀔𑀺𑀢𑁆𑀢𑀥𑀦𑀲𑀼𑀢𑁆𑀢𑀁

𑁫. ‘‘𑀲𑀢𑁆𑀢𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀥𑀦𑀸𑀦𑀺. 𑀓𑀢𑀫𑀸𑀦𑀺 𑀲𑀢𑁆𑀢? 𑀲𑀤𑁆𑀥𑀸𑀥𑀦𑀁, 𑀲𑀻𑀮𑀥𑀦𑀁, 𑀳𑀺𑀭𑀻𑀥𑀦𑀁, 𑀑𑀢𑁆𑀢𑀧𑁆𑀧𑀥𑀦𑀁, 𑀲𑀼𑀢𑀥𑀦𑀁, 𑀘𑀸𑀕𑀥𑀦𑀁, 𑀧𑀜𑁆𑀜𑀸𑀥𑀦𑀁. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀥𑀦𑀸𑀦𑀻𑀢𑀺.

‘‘𑀲𑀤𑁆𑀥𑀸𑀥𑀦𑀁 𑀲𑀻𑀮𑀥𑀦𑀁, 𑀳𑀺𑀭𑀻 𑀑𑀢𑁆𑀢𑀧𑁆𑀧𑀺𑀬𑀁 𑀥𑀦𑀁;

𑀲𑀼𑀢𑀥𑀦𑀜𑁆𑀘 𑀘𑀸𑀕𑁄 𑀘, 𑀧𑀜𑁆𑀜𑀸 𑀯𑁂 𑀲𑀢𑁆𑀢𑀫𑀁 𑀥𑀦𑀁.

‘‘𑀬𑀲𑁆𑀲 𑀏𑀢𑁂 𑀥𑀦𑀸 𑀅𑀢𑁆𑀣𑀺, 𑀇𑀢𑁆𑀣𑀺𑀬𑀸 𑀧𑀼𑀭𑀺𑀲𑀲𑁆𑀲 𑀯𑀸;

𑀅𑀤𑀮𑀺𑀤𑁆𑀤𑁄𑀢𑀺 𑀢𑀁 𑀆𑀳𑀼, 𑀅𑀫𑁄𑀖𑀁 𑀢𑀲𑁆𑀲 𑀚𑀻𑀯𑀺𑀢𑀁.

‘‘𑀢𑀲𑁆𑀫𑀸 𑀲𑀤𑁆𑀥𑀜𑁆𑀘 𑀲𑀻𑀮𑀜𑁆𑀘, 𑀧𑀲𑀸𑀤𑀁 𑀥𑀫𑁆𑀫𑀤𑀲𑁆𑀲𑀦𑀁;

𑀅𑀦𑀼𑀬𑀼𑀜𑁆𑀚𑁂𑀣 𑀫𑁂𑀥𑀸𑀯𑀻, 𑀲𑀭𑀁 [𑀯𑀭𑀁 (𑀓.)] 𑀩𑀼𑀤𑁆𑀥𑀸𑀦 𑀲𑀸𑀲𑀦’’𑀦𑁆𑀢𑀺. 𑀧𑀜𑁆𑀘𑀫𑀁;