𑁧. 𑀥𑀦𑀯𑀕𑁆𑀕𑁄

𑁧. 𑀧𑀞𑀫𑀧𑀺𑀬𑀲𑀼𑀢𑁆𑀢𑀁

𑁧. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂. 𑀢𑀢𑁆𑀭 𑀔𑁄 𑀪𑀕𑀯𑀸 𑀪𑀺𑀓𑁆𑀔𑀽 𑀆𑀫𑀦𑁆𑀢𑁂𑀲𑀺 𑁋 ‘‘𑀪𑀺𑀓𑁆𑀔𑀯𑁄’’𑀢𑀺. ‘‘𑀪𑀤𑀦𑁆𑀢𑁂’’𑀢𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀘𑁆𑀘𑀲𑁆𑀲𑁄𑀲𑀼𑀁. 𑀪𑀕𑀯𑀸 𑀏𑀢𑀤𑀯𑁄𑀘 𑁋

‘‘𑀲𑀢𑁆𑀢𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀅𑀧𑁆𑀧𑀺𑀬𑁄 𑀘 𑀳𑁄𑀢𑀺 𑀅𑀫𑀦𑀸𑀧𑁄 𑀘 𑀅𑀕𑀭𑀼 𑀘 𑀅𑀪𑀸𑀯𑀦𑀻𑀬𑁄 𑀘. 𑀓𑀢𑀫𑁂𑀳𑀺 𑀲𑀢𑁆𑀢𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀮𑀸𑀪𑀓𑀸𑀫𑁄 𑀘 𑀳𑁄𑀢𑀺, 𑀲𑀓𑁆𑀓𑀸𑀭𑀓𑀸𑀫𑁄 𑀘 𑀳𑁄𑀢𑀺, 𑀅𑀦𑀯𑀜𑁆𑀜𑀢𑁆𑀢𑀺𑀓𑀸𑀫𑁄 𑀘 𑀳𑁄𑀢𑀺, 𑀅𑀳𑀺𑀭𑀺𑀓𑁄 𑀘 𑀳𑁄𑀢𑀺, 𑀅𑀦𑁄𑀢𑁆𑀢𑀧𑁆𑀧𑀻 𑀘, 𑀧𑀸𑀧𑀺𑀘𑁆𑀙𑁄 𑀘, 𑀫𑀺𑀘𑁆𑀙𑀸𑀤𑀺𑀝𑁆𑀞𑀺 𑀘. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀅𑀧𑁆𑀧𑀺𑀬𑁄 𑀘 𑀳𑁄𑀢𑀺 𑀅𑀫𑀦𑀸𑀧𑁄 𑀘 𑀅𑀕𑀭𑀼 𑀘 𑀅𑀪𑀸𑀯𑀦𑀻𑀬𑁄 𑀘.

‘‘𑀲𑀢𑁆𑀢𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀧𑀺𑀬𑁄 𑀘 𑀳𑁄𑀢𑀺, 𑀫𑀦𑀸𑀧𑁄 𑀘 𑀕𑀭𑀼 𑀘 𑀪𑀸𑀯𑀦𑀻𑀬𑁄 𑀘. 𑀓𑀢𑀫𑁂𑀳𑀺 𑀲𑀢𑁆𑀢𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀮𑀸𑀪𑀓𑀸𑀫𑁄 𑀘 𑀳𑁄𑀢𑀺, 𑀦 𑀲𑀓𑁆𑀓𑀸𑀭𑀓𑀸𑀫𑁄 𑀘 𑀳𑁄𑀢𑀺, 𑀦 𑀅𑀦𑀯𑀜𑁆𑀜𑀢𑁆𑀢𑀺𑀓𑀸𑀫𑁄 𑀘 𑀳𑁄𑀢𑀺, 𑀳𑀺𑀭𑀺𑀫𑀸 𑀘 𑀳𑁄𑀢𑀺, 𑀑𑀢𑁆𑀢𑀧𑁆𑀧𑀻 𑀘, 𑀅𑀧𑁆𑀧𑀺𑀘𑁆𑀙𑁄 𑀘, 𑀲𑀫𑁆𑀫𑀸𑀤𑀺𑀝𑁆𑀞𑀺 𑀘. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀧𑀺𑀬𑁄 𑀘 𑀳𑁄𑀢𑀺 𑀫𑀦𑀸𑀧𑁄 𑀘 𑀕𑀭𑀼 𑀘 𑀪𑀸𑀯𑀦𑀻𑀬𑁄 𑀘𑀸’’𑀢𑀺. 𑀧𑀞𑀫𑀁.

𑁨. 𑀤𑀼𑀢𑀺𑀬𑀧𑀺𑀬𑀲𑀼𑀢𑁆𑀢𑀁

𑁨. ‘‘𑀲𑀢𑁆𑀢𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀅𑀧𑁆𑀧𑀺𑀬𑁄 𑀘 𑀳𑁄𑀢𑀺 𑀅𑀫𑀦𑀸𑀧𑁄 𑀘 𑀅𑀕𑀭𑀼 𑀘 𑀅𑀪𑀸𑀯𑀦𑀻𑀬𑁄 𑀘. 𑀓𑀢𑀫𑁂𑀳𑀺 𑀲𑀢𑁆𑀢𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀮𑀸𑀪𑀓𑀸𑀫𑁄 𑀘 𑀳𑁄𑀢𑀺, 𑀲𑀓𑁆𑀓𑀸𑀭𑀓𑀸𑀫𑁄 𑀘 𑀳𑁄𑀢𑀺, 𑀅𑀦𑀯𑀜𑁆𑀜𑀢𑁆𑀢𑀺𑀓𑀸𑀫𑁄 𑀘 𑀳𑁄𑀢𑀺, 𑀅𑀳𑀺𑀭𑀺𑀓𑁄 𑀘 𑀳𑁄𑀢𑀺, 𑀅𑀦𑁄𑀢𑁆𑀢𑀧𑁆𑀧𑀻 𑀘, 𑀇𑀲𑁆𑀲𑀼𑀓𑀻 𑀘, 𑀫𑀘𑁆𑀙𑀭𑀻 𑀘. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀅𑀧𑁆𑀧𑀺𑀬𑁄 𑀘 𑀳𑁄𑀢𑀺 𑀅𑀫𑀦𑀸𑀧𑁄 𑀘 𑀅𑀕𑀭𑀼 𑀘 𑀅𑀪𑀸𑀯𑀦𑀻𑀬𑁄 𑀘.

‘‘𑀲𑀢𑁆𑀢𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼+? 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀧𑀺𑀬𑁄 𑀘 𑀳𑁄𑀢𑀺 𑀫𑀦𑀸𑀧𑁄 𑀘 𑀕𑀭𑀼 𑀘 𑀪𑀸𑀯𑀦𑀻𑀬𑁄 𑀘. 𑀓𑀢𑀫𑁂𑀳𑀺 𑀲𑀢𑁆𑀢𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀦 𑀮𑀸𑀪𑀓𑀸𑀫𑁄 𑀘 𑀳𑁄𑀢𑀺, 𑀦 𑀲𑀓𑁆𑀓𑀸𑀭𑀓𑀸𑀫𑁄 𑀘 𑀳𑁄𑀢𑀺, 𑀦 𑀅𑀦𑀯𑀜𑁆𑀜𑀢𑁆𑀢𑀺𑀓𑀸𑀫𑁄 𑀘 𑀳𑁄𑀢𑀺, 𑀳𑀺𑀭𑀺𑀫𑀸 𑀘 𑀳𑁄𑀢𑀺, 𑀑𑀢𑁆𑀢𑀧𑁆𑀧𑀻 𑀘, 𑀅𑀦𑀺𑀲𑁆𑀲𑀼𑀓𑀻 𑀘, 𑀅𑀫𑀘𑁆𑀙𑀭𑀻 𑀘. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀲𑀩𑁆𑀭𑀳𑁆𑀫𑀘𑀸𑀭𑀻𑀦𑀁 𑀧𑀺𑀬𑁄 𑀘 𑀳𑁄𑀢𑀺 𑀫𑀦𑀸𑀧𑁄 𑀘 𑀕𑀭𑀼 𑀘 𑀪𑀸𑀯𑀦𑀻𑀬𑁄 𑀘𑀸’’𑀢𑀺. 𑀤𑀼𑀢𑀺𑀬𑀁.

𑁩. 𑀲𑀁𑀔𑀺𑀢𑁆𑀢𑀩𑀮𑀲𑀼𑀢𑁆𑀢𑀁

𑁩. 𑀏𑀯𑀁 𑀫𑁂 𑀲𑀼𑀢𑀁 𑁋 𑀏𑀓𑀁 𑀲𑀫𑀬𑀁 𑀪𑀕𑀯𑀸 𑀲𑀸𑀯𑀢𑁆𑀣𑀺𑀬𑀁 𑀯𑀺𑀳𑀭𑀢𑀺 𑀚𑁂𑀢𑀯𑀦𑁂 𑀅𑀦𑀸𑀣𑀧𑀺𑀡𑁆𑀟𑀺𑀓𑀲𑁆𑀲 𑀆𑀭𑀸𑀫𑁂…𑀧𑁂… 𑀲𑀢𑁆𑀢𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀩𑀮𑀸𑀦𑀺. 𑀓𑀢𑀫𑀸𑀦𑀺 𑀲𑀢𑁆𑀢? 𑀲𑀤𑁆𑀥𑀸𑀩𑀮𑀁, 𑀯𑀻𑀭𑀺𑀬𑀩𑀮𑀁, 𑀳𑀺𑀭𑀻𑀩𑀮𑀁, 𑀑𑀢𑁆𑀢𑀧𑁆𑀧𑀩𑀮𑀁, 𑀲𑀢𑀺𑀩𑀮𑀁, 𑀲𑀫𑀸𑀥𑀺𑀩𑀮𑀁, 𑀧𑀜𑁆𑀜𑀸𑀩𑀮𑀁. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀩𑀮𑀸𑀦𑀻𑀢𑀺.

‘‘𑀲𑀤𑁆𑀥𑀸𑀩𑀮𑀁 𑀯𑀻𑀭𑀺𑀬𑀜𑁆𑀘, 𑀳𑀺𑀭𑀻 [𑀳𑀺𑀭𑀺 (𑀲𑀻. 𑀧𑀻. 𑀓.)] 𑀑𑀢𑁆𑀢𑀧𑁆𑀧𑀺𑀬𑀁 𑀩𑀮𑀁;

𑀲𑀢𑀺𑀩𑀮𑀁 𑀲𑀫𑀸𑀥𑀺 𑀘, 𑀧𑀜𑁆𑀜𑀸 𑀯𑁂 𑀲𑀢𑁆𑀢𑀫𑀁 𑀩𑀮𑀁;

𑀏𑀢𑁂𑀳𑀺 𑀩𑀮𑀯𑀸 𑀪𑀺𑀓𑁆𑀔𑀼, 𑀲𑀼𑀔𑀁 𑀚𑀻𑀯𑀢𑀺 𑀧𑀡𑁆𑀟𑀺𑀢𑁄;

‘‘𑀬𑁄𑀦𑀺𑀲𑁄 𑀯𑀺𑀘𑀺𑀦𑁂 𑀥𑀫𑁆𑀫𑀁, 𑀧𑀜𑁆𑀜𑀸𑀬𑀢𑁆𑀣𑀁 𑀯𑀺𑀧𑀲𑁆𑀲𑀢𑀺;

𑀧𑀚𑁆𑀚𑁄𑀢𑀲𑁆𑀲𑁂𑀯 𑀦𑀺𑀩𑁆𑀩𑀸𑀦𑀁, 𑀯𑀺𑀫𑁄𑀓𑁆𑀔𑁄 𑀳𑁄𑀢𑀺 𑀘𑁂𑀢𑀲𑁄’’𑀢𑀺. 𑀢𑀢𑀺𑀬𑀁;

𑁪. 𑀯𑀺𑀢𑁆𑀣𑀢𑀩𑀮𑀲𑀼𑀢𑁆𑀢𑀁

𑁪. ‘‘𑀲𑀢𑁆𑀢𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀩𑀮𑀸𑀦𑀺. 𑀓𑀢𑀫𑀸𑀦𑀺 𑀲𑀢𑁆𑀢? 𑀲𑀤𑁆𑀥𑀸𑀩𑀮, 𑀯𑀻𑀭𑀺𑀬𑀩𑀮𑀁, 𑀳𑀺𑀭𑀻𑀩𑀮𑀁, 𑀑𑀢𑁆𑀢𑀧𑁆𑀧𑀩𑀮𑀁, 𑀲𑀢𑀺𑀩𑀮𑀁, 𑀲𑀫𑀸𑀥𑀺𑀩𑀮𑀁, 𑀧𑀜𑁆𑀜𑀸𑀩𑀮𑀁.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀲𑀤𑁆𑀥𑀸𑀩𑀮𑀁? 𑀇𑀥, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀲𑀤𑁆𑀥𑁄 𑀳𑁄𑀢𑀺, 𑀲𑀤𑁆𑀤𑀳𑀢𑀺 𑀢𑀣𑀸𑀕𑀢𑀲𑁆𑀲 𑀩𑁄𑀥𑀺𑀁 𑁋 ‘𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄…𑀧𑁂… 𑀲𑀢𑁆𑀣𑀸 𑀤𑁂𑀯𑀫𑀦𑀼𑀲𑁆𑀲𑀸𑀦𑀁 𑀩𑀼𑀤𑁆𑀥𑁄 𑀪𑀕𑀯𑀸’𑀢𑀺. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀤𑁆𑀥𑀸𑀩𑀮𑀁.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀯𑀻𑀭𑀺𑀬𑀩𑀮𑀁? 𑀇𑀥, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀆𑀭𑀤𑁆𑀥𑀯𑀻𑀭𑀺𑀬𑁄 𑀯𑀺𑀳𑀭𑀢𑀺 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬, 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑀲𑀫𑁆𑀧𑀤𑀸𑀬, 𑀣𑀸𑀫𑀯𑀸 𑀤𑀴𑁆𑀳𑀧𑀭𑀓𑁆𑀓𑀫𑁄 𑀅𑀦𑀺𑀓𑁆𑀔𑀺𑀢𑁆𑀢𑀥𑀼𑀭𑁄 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀯𑀻𑀭𑀺𑀬𑀩𑀮𑀁.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀳𑀺𑀭𑀻𑀩𑀮𑀁? 𑀇𑀥, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀳𑀺𑀭𑀺𑀫𑀸 𑀳𑁄𑀢𑀺, 𑀳𑀺𑀭𑀻𑀬𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦, 𑀳𑀺𑀭𑀻𑀬𑀢𑀺 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑀫𑀸𑀧𑀢𑁆𑀢𑀺𑀬𑀸. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀳𑀺𑀭𑀻𑀩𑀮𑀁.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀑𑀢𑁆𑀢𑀧𑁆𑀧𑀩𑀮𑀁? 𑀇𑀥, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀑𑀢𑁆𑀢𑀧𑁆𑀧𑀻 𑀳𑁄𑀢𑀺, 𑀑𑀢𑁆𑀢𑀧𑁆𑀧𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦, 𑀑𑀢𑁆𑀢𑀧𑁆𑀧𑀢𑀺 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑀫𑀸𑀧𑀢𑁆𑀢𑀺𑀬𑀸. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀑𑀢𑁆𑀢𑀧𑁆𑀧𑀩𑀮𑀁.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀲𑀢𑀺𑀩𑀮𑀁? 𑀇𑀥, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀲𑀢𑀺𑀫𑀸 𑀳𑁄𑀢𑀺 𑀧𑀭𑀫𑁂𑀦 𑀲𑀢𑀺𑀦𑁂𑀧𑀓𑁆𑀓𑁂𑀦 𑀲𑀫𑀦𑁆𑀦𑀸𑀕𑀢𑁄 𑀘𑀺𑀭𑀓𑀢𑀫𑁆𑀧𑀺 𑀘𑀺𑀭𑀪𑀸𑀲𑀺𑀢𑀫𑁆𑀧𑀺 𑀲𑀭𑀺𑀢𑀸 𑀅𑀦𑀼𑀲𑁆𑀲𑀭𑀺𑀢𑀸. 𑀇𑀤𑀁, 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀢𑀺𑀩𑀮𑀁.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀲𑀫𑀸𑀥𑀺𑀩𑀮𑀁? 𑀇𑀥, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀺…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀫𑀸𑀥𑀺𑀩𑀮𑀁.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀜𑁆𑀜𑀸𑀩𑀮𑀁? 𑀇𑀥, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀧𑀜𑁆𑀜𑀯𑀸 𑀳𑁄𑀢𑀺 𑀉𑀤𑀬𑀢𑁆𑀣𑀕𑀸𑀫𑀺𑀦𑀺𑀬𑀸 𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁄 𑀅𑀭𑀺𑀬𑀸𑀬 𑀦𑀺𑀩𑁆𑀩𑁂𑀥𑀺𑀓𑀸𑀬 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀕𑀸𑀫𑀺𑀦𑀺𑀬𑀸. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀜𑀸𑀩𑀮𑀁. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀩𑀮𑀸𑀦𑀻𑀢𑀺.

‘‘𑀲𑀤𑁆𑀥𑀸𑀩𑀮𑀁 𑀯𑀻𑀭𑀺𑀬𑀜𑁆𑀘, 𑀳𑀺𑀭𑀻 𑀑𑀢𑁆𑀢𑀧𑁆𑀧𑀺𑀬𑀁 𑀩𑀮𑀁;

𑀲𑀢𑀺𑀩𑀮𑀁 𑀲𑀫𑀸𑀥𑀺 𑀘, 𑀧𑀜𑁆𑀜𑀸 𑀯𑁂 𑀲𑀢𑁆𑀢𑀫𑀁 𑀩𑀮𑀁;

𑀏𑀢𑁂𑀳𑀺 𑀩𑀮𑀯𑀸 𑀪𑀺𑀓𑁆𑀔𑀼, 𑀲𑀼𑀔𑀁 𑀚𑀻𑀯𑀢𑀺 𑀧𑀡𑁆𑀟𑀺𑀢𑁄.

‘‘𑀬𑁄𑀦𑀺𑀲𑁄 𑀯𑀺𑀘𑀺𑀦𑁂 𑀥𑀫𑁆𑀫𑀁, 𑀧𑀜𑁆𑀜𑀸𑀬𑀢𑁆𑀣𑀁 𑀯𑀺𑀧𑀲𑁆𑀲𑀢𑀺;

𑀧𑀚𑁆𑀚𑁄𑀢𑀲𑁆𑀲𑁂𑀯 𑀦𑀺𑀩𑁆𑀩𑀸𑀦𑀁, 𑀯𑀺𑀫𑁄𑀓𑁆𑀔𑁄 𑀳𑁄𑀢𑀺 𑀘𑁂𑀢𑀲𑁄’’𑀢𑀺. 𑀘𑀢𑀼𑀢𑁆𑀣𑀁;

𑁫. 𑀲𑀁𑀔𑀺𑀢𑁆𑀢𑀥𑀦𑀲𑀼𑀢𑁆𑀢𑀁

𑁫. ‘‘𑀲𑀢𑁆𑀢𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀥𑀦𑀸𑀦𑀺. 𑀓𑀢𑀫𑀸𑀦𑀺 𑀲𑀢𑁆𑀢? 𑀲𑀤𑁆𑀥𑀸𑀥𑀦𑀁, 𑀲𑀻𑀮𑀥𑀦𑀁, 𑀳𑀺𑀭𑀻𑀥𑀦𑀁, 𑀑𑀢𑁆𑀢𑀧𑁆𑀧𑀥𑀦𑀁, 𑀲𑀼𑀢𑀥𑀦𑀁, 𑀘𑀸𑀕𑀥𑀦𑀁, 𑀧𑀜𑁆𑀜𑀸𑀥𑀦𑀁. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀥𑀦𑀸𑀦𑀻𑀢𑀺.

‘‘𑀲𑀤𑁆𑀥𑀸𑀥𑀦𑀁 𑀲𑀻𑀮𑀥𑀦𑀁, 𑀳𑀺𑀭𑀻 𑀑𑀢𑁆𑀢𑀧𑁆𑀧𑀺𑀬𑀁 𑀥𑀦𑀁;

𑀲𑀼𑀢𑀥𑀦𑀜𑁆𑀘 𑀘𑀸𑀕𑁄 𑀘, 𑀧𑀜𑁆𑀜𑀸 𑀯𑁂 𑀲𑀢𑁆𑀢𑀫𑀁 𑀥𑀦𑀁.

‘‘𑀬𑀲𑁆𑀲 𑀏𑀢𑁂 𑀥𑀦𑀸 𑀅𑀢𑁆𑀣𑀺, 𑀇𑀢𑁆𑀣𑀺𑀬𑀸 𑀧𑀼𑀭𑀺𑀲𑀲𑁆𑀲 𑀯𑀸;

𑀅𑀤𑀮𑀺𑀤𑁆𑀤𑁄𑀢𑀺 𑀢𑀁 𑀆𑀳𑀼, 𑀅𑀫𑁄𑀖𑀁 𑀢𑀲𑁆𑀲 𑀚𑀻𑀯𑀺𑀢𑀁.

‘‘𑀢𑀲𑁆𑀫𑀸 𑀲𑀤𑁆𑀥𑀜𑁆𑀘 𑀲𑀻𑀮𑀜𑁆𑀘, 𑀧𑀲𑀸𑀤𑀁 𑀥𑀫𑁆𑀫𑀤𑀲𑁆𑀲𑀦𑀁;

𑀅𑀦𑀼𑀬𑀼𑀜𑁆𑀚𑁂𑀣 𑀫𑁂𑀥𑀸𑀯𑀻, 𑀲𑀭𑀁 [𑀯𑀭𑀁 (𑀓.)] 𑀩𑀼𑀤𑁆𑀥𑀸𑀦 𑀲𑀸𑀲𑀦’’𑀦𑁆𑀢𑀺. 𑀧𑀜𑁆𑀘𑀫𑀁;

𑁬. 𑀯𑀺𑀢𑁆𑀣𑀢𑀥𑀦𑀲𑀼𑀢𑁆𑀢𑀁

𑁬. ‘‘𑀲𑀢𑁆𑀢𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀥𑀦𑀸𑀦𑀺. 𑀓𑀢𑀫𑀸𑀦𑀺 𑀲𑀢𑁆𑀢? 𑀲𑀤𑁆𑀥𑀸𑀥𑀦𑀁, 𑀲𑀻𑀮𑀥𑀦𑀁, 𑀳𑀺𑀭𑀻𑀥𑀦𑀁, 𑀑𑀢𑁆𑀢𑀧𑁆𑀧𑀥𑀦𑀁, 𑀲𑀼𑀢𑀥𑀦𑀁, 𑀘𑀸𑀕𑀥𑀦𑀁, 𑀧𑀜𑁆𑀜𑀸𑀥𑀦𑀁.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀲𑀤𑁆𑀥𑀸𑀥𑀦𑀁? 𑀇𑀥, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀲𑀤𑁆𑀥𑁄 𑀳𑁄𑀢𑀺, 𑀲𑀤𑁆𑀤𑀳𑀢𑀺 𑀢𑀣𑀸𑀕𑀢𑀲𑁆𑀲 𑀩𑁄𑀥𑀺𑀁 𑁋 ‘𑀇𑀢𑀺𑀧𑀺 𑀲𑁄 𑀪𑀕𑀯𑀸 𑀅𑀭𑀳𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄…𑀧𑁂… 𑀩𑀼𑀤𑁆𑀥𑁄 𑀪𑀕𑀯𑀸’𑀢𑀺. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀤𑁆𑀥𑀸𑀥𑀦𑀁.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀲𑀻𑀮𑀥𑀦𑀁? 𑀇𑀥, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀧𑀸𑀡𑀸𑀢𑀺𑀧𑀸𑀢𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺…𑀧𑁂… 𑀲𑀼𑀭𑀸𑀫𑁂𑀭𑀬𑀫𑀚𑁆𑀚𑀧𑀫𑀸𑀤𑀝𑁆𑀞𑀸𑀦𑀸 𑀧𑀝𑀺𑀯𑀺𑀭𑀢𑁄 𑀳𑁄𑀢𑀺. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀻𑀮𑀥𑀦𑀁.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀳𑀺𑀭𑀻𑀥𑀦𑀁? 𑀇𑀥, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀳𑀺𑀭𑀻𑀫𑀸 𑀳𑁄𑀢𑀺, 𑀳𑀺𑀭𑀻𑀬𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦, 𑀳𑀺𑀭𑀻𑀬𑀢𑀺 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑀫𑀸𑀧𑀢𑁆𑀢𑀺𑀬𑀸. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀳𑀺𑀭𑀻𑀥𑀦𑀁.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀑𑀢𑁆𑀢𑀧𑁆𑀧𑀥𑀦𑀁? 𑀇𑀥, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀑𑀢𑁆𑀢𑀧𑁆𑀧𑀻 𑀳𑁄𑀢𑀺, 𑀑𑀢𑁆𑀢𑀧𑁆𑀧𑀢𑀺 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀯𑀘𑀻𑀤𑀼𑀘𑁆𑀘𑀭𑀺𑀢𑁂𑀦 𑀫𑀦𑁄𑀤𑀼𑀘𑁆𑀘𑀭𑀺𑀢𑁂𑀦, 𑀑𑀢𑁆𑀢𑀧𑁆𑀧𑀢𑀺 𑀧𑀸𑀧𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀲𑀫𑀸𑀧𑀢𑁆𑀢𑀺𑀬𑀸. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀑𑀢𑁆𑀢𑀧𑁆𑀧𑀥𑀦𑀁.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀲𑀼𑀢𑀥𑀦𑀁? 𑀇𑀥, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀩𑀳𑀼𑀲𑁆𑀲𑀼𑀢𑁄 𑀳𑁄𑀢𑀺 𑀲𑀼𑀢𑀥𑀭𑁄 𑀲𑀼𑀢𑀲𑀦𑁆𑀦𑀺𑀘𑀬𑁄. 𑀬𑁂 𑀢𑁂 𑀥𑀫𑁆𑀫𑀸 𑀆𑀤𑀺𑀓𑀮𑁆𑀬𑀸𑀡𑀸 𑀫𑀚𑁆𑀛𑁂𑀓𑀮𑁆𑀬𑀸𑀡𑀸 𑀧𑀭𑀺𑀬𑁄𑀲𑀸𑀦𑀓𑀮𑁆𑀬𑀸𑀡𑀸 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁, 𑀓𑁂𑀯𑀮𑀧𑀭𑀺𑀧𑀼𑀡𑁆𑀡𑀁 𑀧𑀭𑀺𑀲𑀼𑀤𑁆𑀥𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀪𑀺𑀯𑀤𑀦𑁆𑀢𑀺. 𑀢𑀣𑀸𑀭𑀽𑀧𑀸𑀲𑁆𑀲 𑀥𑀫𑁆𑀫𑀸 𑀩𑀳𑀼𑀲𑁆𑀲𑀼𑀢𑀸 𑀳𑁄𑀦𑁆𑀢𑀺 𑀥𑀸𑀢𑀸 𑀯𑀘𑀲𑀸 𑀧𑀭𑀺𑀘𑀺𑀢𑀸 𑀫𑀦𑀲𑀸𑀦𑀼𑀧𑁂𑀓𑁆𑀔𑀺𑀢𑀸 𑀤𑀺𑀝𑁆𑀞𑀺𑀬𑀸 𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀸. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀲𑀼𑀢𑀥𑀦𑀁.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀘𑀸𑀕𑀥𑀦𑀁? 𑀇𑀥, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀯𑀺𑀕𑀢𑀫𑀮𑀫𑀘𑁆𑀙𑁂𑀭𑁂𑀦 𑀘𑁂𑀢𑀲𑀸 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀺 𑀫𑀼𑀢𑁆𑀢𑀘𑀸𑀕𑁄 𑀧𑀬𑀢𑀧𑀸𑀡𑀺 𑀯𑁄𑀲𑁆𑀲𑀕𑁆𑀕𑀭𑀢𑁄 𑀬𑀸𑀘𑀬𑁄𑀕𑁄 𑀤𑀸𑀦𑀲𑀁𑀯𑀺𑀪𑀸𑀕𑀭𑀢𑁄. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀘𑀸𑀕𑀥𑀦𑀁.

‘‘𑀓𑀢𑀫𑀜𑁆𑀘, 𑀪𑀺𑀓𑁆𑀔𑀯𑁂, 𑀧𑀜𑁆𑀜𑀸𑀥𑀦𑀁? 𑀇𑀥, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀸𑀯𑀓𑁄 𑀧𑀜𑁆𑀜𑀯𑀸 𑀳𑁄𑀢𑀺…𑀧𑁂… 𑀲𑀫𑁆𑀫𑀸 𑀤𑀼𑀓𑁆𑀔𑀓𑁆𑀔𑀬𑀕𑀸𑀫𑀺𑀦𑀺𑀬𑀸. 𑀇𑀤𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀧𑀜𑁆𑀜𑀸𑀥𑀦𑀁. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀥𑀦𑀸𑀦𑀻𑀢𑀺.

‘‘𑀲𑀤𑁆𑀥𑀸𑀥𑀦𑀁 𑀲𑀻𑀮𑀥𑀦𑀁, 𑀳𑀺𑀭𑀻 𑀑𑀢𑁆𑀢𑀧𑁆𑀧𑀺𑀬𑀁 𑀥𑀦𑀁;

𑀲𑀼𑀢𑀥𑀦𑀜𑁆𑀘 𑀘𑀸𑀕𑁄 𑀘, 𑀧𑀜𑁆𑀜𑀸 𑀯𑁂 𑀲𑀢𑁆𑀢𑀫𑀁 𑀥𑀦𑀁.

‘‘𑀬𑀲𑁆𑀲 𑀏𑀢𑁂 𑀥𑀦𑀸 𑀅𑀢𑁆𑀣𑀺, 𑀇𑀢𑁆𑀣𑀺𑀬𑀸 𑀧𑀼𑀭𑀺𑀲𑀲𑁆𑀲 𑀯𑀸;

𑀅𑀤𑀮𑀺𑀤𑁆𑀤𑁄𑀢𑀺 𑀢𑀁 𑀆𑀳𑀼, 𑀅𑀫𑁄𑀖𑀁 𑀢𑀲𑁆𑀲 𑀚𑀻𑀯𑀺𑀢𑀁.

‘‘𑀢𑀲𑁆𑀫𑀸 𑀲𑀤𑁆𑀥𑀜𑁆𑀘 𑀲𑀻𑀮𑀜𑁆𑀘, 𑀧𑀲𑀸𑀤𑀁 𑀥𑀫𑁆𑀫𑀤𑀲𑁆𑀲𑀦𑀁;

𑀅𑀦𑀼𑀬𑀼𑀜𑁆𑀚𑁂𑀣 𑀫𑁂𑀥𑀸𑀯𑀻, 𑀲𑀭𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦’’𑀦𑁆𑀢𑀺. 𑀙𑀝𑁆𑀞𑀁;

𑁭. 𑀉𑀕𑁆𑀕𑀲𑀼𑀢𑁆𑀢𑀁

𑁭. 𑀅𑀣 𑀔𑁄 𑀉𑀕𑁆𑀕𑁄 𑀭𑀸𑀚𑀫𑀳𑀸𑀫𑀢𑁆𑀢𑁄 𑀬𑁂𑀦 𑀪𑀕𑀯𑀸 𑀢𑁂𑀦𑀼𑀧𑀲𑀗𑁆𑀓𑀫𑀺; 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀪𑀕𑀯𑀦𑁆𑀢𑀁 𑀅𑀪𑀺𑀯𑀸𑀤𑁂𑀢𑁆𑀯𑀸 𑀏𑀓𑀫𑀦𑁆𑀢𑀁 𑀦𑀺𑀲𑀻𑀤𑀺. 𑀏𑀓𑀫𑀦𑁆𑀢𑀁 𑀦𑀺𑀲𑀺𑀦𑁆𑀦𑁄 𑀔𑁄 𑀉𑀕𑁆𑀕𑁄 𑀭𑀸𑀚𑀫𑀳𑀸𑀫𑀢𑁆𑀢𑁄 𑀪𑀕𑀯𑀦𑁆𑀢𑀁 𑀏𑀢𑀤𑀯𑁄𑀘 𑁋

‘‘𑀅𑀘𑁆𑀙𑀭𑀺𑀬𑀁, 𑀪𑀦𑁆𑀢𑁂, 𑀅𑀩𑁆𑀪𑀼𑀢𑀁, 𑀪𑀦𑁆𑀢𑁂! 𑀬𑀸𑀯 𑀅𑀟𑁆𑀠𑁄 𑀘𑀸𑀬𑀁, 𑀪𑀦𑁆𑀢𑁂, 𑀫𑀺𑀕𑀸𑀭𑁄 𑀭𑁄𑀳𑀡𑁂𑀬𑁆𑀬𑁄 𑀬𑀸𑀯 𑀫𑀳𑀤𑁆𑀥𑀦𑁄 𑀬𑀸𑀯 𑀫𑀳𑀸𑀪𑁄𑀕𑁄’’𑀢𑀺. ‘‘𑀓𑀻𑀯 𑀅𑀟𑁆𑀠𑁄 𑀧𑀦𑀼𑀕𑁆𑀕, 𑀫𑀺𑀕𑀸𑀭𑁄 𑀭𑁄𑀳𑀡𑁂𑀬𑁆𑀬𑁄, 𑀓𑀻𑀯 𑀫𑀳𑀤𑁆𑀥𑀦𑁄, 𑀓𑀻𑀯 𑀫𑀳𑀸𑀪𑁄𑀕𑁄’’𑀢𑀺? ‘‘𑀲𑀢𑀁, 𑀪𑀦𑁆𑀢𑁂, 𑀲𑀢𑀲𑀳𑀲𑁆𑀲𑀸𑀦𑀁 [𑀲𑀳𑀲𑁆𑀲𑀸𑀦𑀁 (𑀲𑀻.), 𑀲𑀳𑀲𑁆𑀲𑀸𑀦𑀺 (𑀲𑁆𑀬𑀸.), 𑀲𑀢𑀲𑀳𑀲𑁆𑀲𑀸𑀦𑀺 (?)] 𑀳𑀺𑀭𑀜𑁆𑀜𑀲𑁆𑀲, 𑀓𑁄 𑀧𑀦 𑀯𑀸𑀤𑁄 𑀭𑀽𑀧𑀺𑀬𑀲𑁆𑀲𑀸’’𑀢𑀺! ‘‘𑀅𑀢𑁆𑀣𑀺 𑀔𑁄 𑀏𑀢𑀁, 𑀉𑀕𑁆𑀕, 𑀥𑀦𑀁 𑀦𑁂𑀢𑀁 ‘𑀦𑀢𑁆𑀣𑀻’𑀢𑀺 𑀯𑀤𑀸𑀫𑀻𑀢𑀺. 𑀢𑀜𑁆𑀘 𑀔𑁄 𑀏𑀢𑀁, 𑀉𑀕𑁆𑀕, 𑀥𑀦𑀁 𑀲𑀸𑀥𑀸𑀭𑀡𑀁 𑀅𑀕𑁆𑀕𑀺𑀦𑀸 𑀉𑀤𑀓𑁂𑀦 𑀭𑀸𑀚𑀽𑀳𑀺 𑀘𑁄𑀭𑁂𑀳𑀺 𑀅𑀧𑁆𑀧𑀺𑀬𑁂𑀳𑀺 𑀤𑀸𑀬𑀸𑀤𑁂𑀳𑀺. 𑀲𑀢𑁆𑀢 𑀔𑁄 𑀇𑀫𑀸𑀦𑀺, 𑀉𑀕𑁆𑀕, 𑀥𑀦𑀸𑀦𑀺 𑀅𑀲𑀸𑀥𑀸𑀭𑀡𑀸𑀦𑀺 𑀅𑀕𑁆𑀕𑀺𑀦𑀸 𑀉𑀤𑀓𑁂𑀦 𑀭𑀸𑀚𑀽𑀳𑀺 𑀘𑁄𑀭𑁂𑀳𑀺 𑀅𑀧𑁆𑀧𑀺𑀬𑁂𑀳𑀺 𑀤𑀸𑀬𑀸𑀤𑁂𑀳𑀺. 𑀓𑀢𑀫𑀸𑀦𑀺 𑀲𑀢𑁆𑀢? 𑀲𑀤𑁆𑀥𑀸𑀥𑀦𑀁, 𑀲𑀻𑀮𑀥𑀦𑀁, 𑀳𑀺𑀭𑀻𑀥𑀦𑀁, 𑀑𑀢𑁆𑀢𑀧𑁆𑀧𑀥𑀦𑀁, 𑀲𑀼𑀢𑀥𑀦𑀁, 𑀘𑀸𑀕𑀥𑀦𑀁, 𑀧𑀜𑁆𑀜𑀸𑀥𑀦𑀁. 𑀇𑀫𑀸𑀦𑀺 𑀔𑁄, 𑀉𑀕𑁆𑀕, 𑀲𑀢𑁆𑀢 𑀥𑀦𑀸𑀦𑀺 𑀅𑀲𑀸𑀥𑀸𑀭𑀡𑀸𑀦𑀺 𑀅𑀕𑁆𑀕𑀺𑀦𑀸 𑀉𑀤𑀓𑁂𑀦 𑀭𑀸𑀚𑀽𑀳𑀺 𑀘𑁄𑀭𑁂𑀳𑀺 𑀅𑀧𑁆𑀧𑀺𑀬𑁂𑀳𑀺 𑀤𑀸𑀬𑀸𑀤𑁂𑀳𑀻𑀢𑀺.

‘‘𑀲𑀤𑁆𑀥𑀸𑀥𑀦𑀁 𑀲𑀻𑀮𑀥𑀦𑀁, 𑀳𑀺𑀭𑀻 𑀑𑀢𑁆𑀢𑀧𑁆𑀧𑀺𑀬𑀁 𑀥𑀦𑀁;

𑀲𑀼𑀢𑀥𑀦𑀜𑁆𑀘 𑀘𑀸𑀕𑁄 𑀘, 𑀧𑀜𑁆𑀜𑀸 𑀯𑁂 𑀲𑀢𑁆𑀢𑀫𑀁 𑀥𑀦𑀁.

‘‘𑀬𑀲𑁆𑀲 𑀏𑀢𑁂 𑀥𑀦𑀸 𑀅𑀢𑁆𑀣𑀺, 𑀇𑀢𑁆𑀣𑀺𑀬𑀸 𑀧𑀼𑀭𑀺𑀲𑀲𑁆𑀲 𑀯𑀸;

𑀲 𑀯𑁂 𑀫𑀳𑀤𑁆𑀥𑀦𑁄 𑀮𑁄𑀓𑁂, 𑀅𑀚𑁂𑀬𑁆𑀬𑁄 𑀤𑁂𑀯𑀫𑀸𑀦𑀼𑀲𑁂.

‘‘𑀢𑀲𑁆𑀫𑀸 𑀲𑀤𑁆𑀥𑀜𑁆𑀘 𑀲𑀻𑀮𑀜𑁆𑀘, 𑀧𑀲𑀸𑀤𑀁 𑀥𑀫𑁆𑀫𑀤𑀲𑁆𑀲𑀦𑀁;

𑀅𑀦𑀼𑀬𑀼𑀜𑁆𑀚𑁂𑀣 𑀫𑁂𑀥𑀸𑀯𑀻, 𑀲𑀭𑀁 𑀩𑀼𑀤𑁆𑀥𑀸𑀦 𑀲𑀸𑀲𑀦’’𑀦𑁆𑀢𑀺. 𑀲𑀢𑁆𑀢𑀫𑀁;

𑁮. 𑀲𑀁𑀬𑁄𑀚𑀦𑀲𑀼𑀢𑁆𑀢𑀁

𑁮. ‘‘𑀲𑀢𑁆𑀢𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀲𑀁𑀬𑁄𑀚𑀦𑀸𑀦𑀺. 𑀓𑀢𑀫𑀸𑀦𑀺 𑀲𑀢𑁆𑀢? 𑀅𑀦𑀼𑀦𑀬𑀲𑀁𑀬𑁄𑀚𑀦𑀁, 𑀧𑀝𑀺𑀖𑀲𑀁𑀬𑁄𑀚𑀦𑀁, 𑀤𑀺𑀝𑁆𑀞𑀺𑀲𑀁𑀬𑁄𑀚𑀦𑀁, 𑀯𑀺𑀘𑀺𑀓𑀺𑀘𑁆𑀙𑀸𑀲𑀁𑀬𑁄𑀚𑀦𑀁, 𑀫𑀸𑀦𑀲𑀁𑀬𑁄𑀚𑀦𑀁, 𑀪𑀯𑀭𑀸𑀕𑀲𑀁𑀬𑁄𑀚𑀦𑀁, 𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦𑀁. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀲𑀁𑀬𑁄𑀚𑀦𑀸𑀦𑀻’’𑀢𑀺. 𑀅𑀝𑁆𑀞𑀫𑀁.

𑁯. 𑀧𑀳𑀸𑀦𑀲𑀼𑀢𑁆𑀢𑀁

𑁯. ‘‘𑀲𑀢𑁆𑀢𑀦𑁆𑀦𑀁, 𑀪𑀺𑀓𑁆𑀔𑀯𑁂, 𑀲𑀁𑀬𑁄𑀚𑀦𑀸𑀦𑀁 𑀧𑀳𑀸𑀦𑀸𑀬 𑀲𑀫𑀼𑀘𑁆𑀙𑁂𑀤𑀸𑀬 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀺. 𑀓𑀢𑀫𑁂𑀲𑀁 𑀲𑀢𑁆𑀢𑀦𑁆𑀦𑀁? 𑀅𑀦𑀼𑀦𑀬𑀲𑀁𑀬𑁄𑀚𑀦𑀲𑁆𑀲 𑀧𑀳𑀸𑀦𑀸𑀬 𑀲𑀫𑀼𑀘𑁆𑀙𑁂𑀤𑀸𑀬 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀺, 𑀧𑀝𑀺𑀖𑀲𑀁𑀬𑁄𑀚𑀦𑀲𑁆𑀲…𑀧𑁂… 𑀤𑀺𑀝𑁆𑀞𑀺𑀲𑀁𑀬𑁄𑀚𑀦𑀲𑁆𑀲… 𑀯𑀺𑀘𑀺𑀓𑀺𑀘𑁆𑀙𑀸𑀲𑀁𑀬𑁄𑀚𑀦𑀲𑁆𑀲… 𑀫𑀸𑀦𑀲𑀁𑀬𑁄𑀚𑀦𑀲𑁆𑀲… 𑀪𑀯𑀭𑀸𑀕𑀲𑀁𑀬𑁄𑀚𑀦𑀲𑁆𑀲 … 𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦𑀲𑁆𑀲 𑀧𑀳𑀸𑀦𑀸𑀬 𑀲𑀫𑀼𑀘𑁆𑀙𑁂𑀤𑀸𑀬 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀺. 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀦𑁆𑀦𑀁 𑀲𑀁𑀬𑁄𑀚𑀦𑀸𑀦𑀁 𑀧𑀳𑀸𑀦𑀸𑀬 𑀲𑀫𑀼𑀘𑁆𑀙𑁂𑀤𑀸𑀬 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀺. 𑀬𑀢𑁄 𑀘 𑀔𑁄, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀅𑀦𑀼𑀦𑀬𑀲𑀁𑀬𑁄𑀚𑀦𑀁 𑀧𑀳𑀻𑀦𑀁 𑀳𑁄𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀁 𑀢𑀸𑀮𑀸𑀯𑀢𑁆𑀣𑀼𑀓𑀢𑀁 𑀅𑀦𑀪𑀸𑀯𑀁 𑀓𑀢𑀁 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀁. 𑀧𑀝𑀺𑀖𑀲𑀁𑀬𑁄𑀚𑀦𑀁…𑀧𑁂… 𑀤𑀺𑀝𑁆𑀞𑀺𑀲𑀁𑀬𑁄𑀚𑀦𑀁… 𑀯𑀺𑀘𑀺𑀓𑀺𑀘𑁆𑀙𑀸𑀲𑀁𑀬𑁄𑀚𑀦𑀁… 𑀫𑀸𑀦𑀲𑀁𑀬𑁄𑀚𑀦𑀁… 𑀪𑀯𑀭𑀸𑀕𑀲𑀁𑀬𑁄𑀚𑀦𑀁… 𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦𑀁 𑀧𑀳𑀻𑀦𑀁 𑀳𑁄𑀢𑀺 𑀉𑀘𑁆𑀙𑀺𑀦𑁆𑀦𑀫𑀽𑀮𑀁 𑀢𑀸𑀮𑀸𑀯𑀢𑁆𑀣𑀼𑀓𑀢𑀁 𑀅𑀦𑀪𑀸𑀯𑀁 𑀓𑀢𑀁 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀁. 𑀅𑀬𑀁 𑀯𑀼𑀘𑁆𑀘𑀢𑀺, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀘𑁆𑀙𑁂𑀘𑁆𑀙𑀺 𑀢𑀡𑁆𑀳𑀁, 𑀯𑀺𑀯𑀢𑁆𑀢𑀬𑀺 𑀲𑀁𑀬𑁄𑀚𑀦𑀁, 𑀲𑀫𑁆𑀫𑀸 𑀫𑀸𑀦𑀸𑀪𑀺𑀲𑀫𑀬𑀸 𑀅𑀦𑁆𑀢𑀫𑀓𑀸𑀲𑀺 𑀤𑀼𑀓𑁆𑀔𑀲𑁆𑀲𑀸’’𑀢𑀺. 𑀦𑀯𑀫𑀁.

𑁧𑁦. 𑀫𑀘𑁆𑀙𑀭𑀺𑀬𑀲𑀼𑀢𑁆𑀢𑀁

𑁧𑁦. ‘‘𑀲𑀢𑁆𑀢𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀲𑀁𑀬𑁄𑀚𑀦𑀸𑀦𑀺. 𑀓𑀢𑀫𑀸𑀦𑀺 𑀲𑀢𑁆𑀢? 𑀅𑀦𑀼𑀦𑀬𑀲𑀁𑀬𑁄𑀚𑀦𑀁, 𑀧𑀝𑀺𑀖𑀲𑀁𑀬𑁄𑀚𑀦𑀁, 𑀤𑀺𑀝𑁆𑀞𑀺𑀲𑀁𑀬𑁄𑀚𑀦𑀁, 𑀯𑀺𑀘𑀺𑀓𑀺𑀘𑁆𑀙𑀸𑀲𑀁𑀬𑁄𑀚𑀦𑀁, 𑀫𑀸𑀦𑀲𑀁𑀬𑁄𑀚𑀦𑀁, 𑀇𑀲𑁆𑀲𑀸𑀲𑀁𑀬𑁄𑀚𑀦𑀁, 𑀫𑀘𑁆𑀙𑀭𑀺𑀬𑀲𑀁𑀬𑁄𑀚𑀦𑀁. 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀲𑀢𑁆𑀢 𑀲𑀁𑀬𑁄𑀚𑀦𑀸𑀦𑀻’’𑀢𑀺. 𑀤𑀲𑀫𑀁.

𑀥𑀦𑀯𑀕𑁆𑀕𑁄 𑀧𑀞𑀫𑁄.