𑁩. 𑀭𑀸𑀕𑀧𑁂𑀬𑁆𑀬𑀸𑀮𑀁

𑁩𑁦𑁩. ‘‘𑀭𑀸𑀕𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀪𑀺𑀜𑁆𑀜𑀸𑀬 𑀧𑀜𑁆𑀘 𑀥𑀫𑁆𑀫𑀸 𑀪𑀸𑀯𑁂𑀢𑀩𑁆𑀩𑀸. 𑀓𑀢𑀫𑁂 𑀧𑀜𑁆𑀘? 𑀅𑀲𑀼𑀪𑀲𑀜𑁆𑀜𑀸, 𑀫𑀭𑀡𑀲𑀜𑁆𑀜𑀸, 𑀆𑀤𑀻𑀦𑀯𑀲𑀜𑁆𑀜𑀸, 𑀆𑀳𑀸𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀸, 𑀲𑀩𑁆𑀩𑀮𑁄𑀓𑁂 𑀅𑀦𑀪𑀺𑀭𑀢𑀲𑀜𑁆𑀜𑀸 [𑀲𑀩𑁆𑀩𑀢𑁆𑀣𑀧𑀺 𑀏𑀯𑀫𑁂𑀯 𑀤𑀺𑀲𑁆𑀲𑀢𑀺] 𑁋 𑀭𑀸𑀕𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀪𑀺𑀜𑁆𑀜𑀸𑀬 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀪𑀸𑀯𑁂𑀢𑀩𑁆𑀩𑀸’’𑀢𑀺.

𑁩𑁦𑁪. ‘‘𑀭𑀸𑀕𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀪𑀺𑀜𑁆𑀜𑀸𑀬 𑀧𑀜𑁆𑀘 𑀥𑀫𑁆𑀫𑀸 𑀪𑀸𑀯𑁂𑀢𑀩𑁆𑀩𑀸. 𑀓𑀢𑀫𑁂 𑀧𑀜𑁆𑀘? 𑀅𑀦𑀺𑀘𑁆𑀘𑀲𑀜𑁆𑀜𑀸, 𑀅𑀦𑀢𑁆𑀢𑀲𑀜𑁆𑀜𑀸, 𑀫𑀭𑀡𑀲𑀜𑁆𑀜𑀸, 𑀆𑀳𑀸𑀭𑁂 𑀧𑀝𑀺𑀓𑀽𑀮𑀲𑀜𑁆𑀜𑀸, 𑀲𑀩𑁆𑀩𑀮𑁄𑀓𑁂 𑀅𑀦𑀪𑀺𑀭𑀢𑀲𑀜𑁆𑀜𑀸 𑁋 𑀭𑀸𑀕𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀪𑀺𑀜𑁆𑀜𑀸𑀬 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀪𑀸𑀯𑁂𑀢𑀩𑁆𑀩𑀸’’𑀢𑀺.

𑁩𑁦𑁫. ‘‘𑀭𑀸𑀕𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀪𑀺𑀜𑁆𑀜𑀸𑀬 𑀧𑀜𑁆𑀘 𑀥𑀫𑁆𑀫𑀸 𑀪𑀸𑀯𑁂𑀢𑀩𑁆𑀩𑀸. 𑀓𑀢𑀫𑁂 𑀧𑀜𑁆𑀘? 𑀅𑀦𑀺𑀘𑁆𑀘𑀲𑀜𑁆𑀜𑀸, 𑀅𑀦𑀺𑀘𑁆𑀘𑁂 𑀤𑀼𑀓𑁆𑀔𑀲𑀜𑁆𑀜𑀸, 𑀤𑀼𑀓𑁆𑀔𑁂 𑀅𑀦𑀢𑁆𑀢𑀲𑀜𑁆𑀜𑀸, 𑀧𑀳𑀸𑀦𑀲𑀜𑁆𑀜𑀸, 𑀯𑀺𑀭𑀸𑀕𑀲𑀜𑁆𑀜𑀸 𑁋 𑀭𑀸𑀕𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀪𑀺𑀜𑁆𑀜𑀸𑀬 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀪𑀸𑀯𑁂𑀢𑀩𑁆𑀩𑀸’’𑀢𑀺.

𑁩𑁦𑁬. ‘‘𑀭𑀸𑀕𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀪𑀺𑀜𑁆𑀜𑀸𑀬 𑀧𑀜𑁆𑀘 𑀥𑀫𑁆𑀫𑀸 𑀪𑀸𑀯𑁂𑀢𑀩𑁆𑀩𑀸. 𑀓𑀢𑀫𑁂 𑀧𑀜𑁆𑀘? 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀁, 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀁, 𑀲𑀢𑀺𑀦𑁆𑀤𑁆𑀭𑀺𑀬𑀁, 𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀁, 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁 𑁋 𑀭𑀸𑀕𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀪𑀺𑀜𑁆𑀜𑀸𑀬 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀪𑀸𑀯𑁂𑀢𑀩𑁆𑀩𑀸’’𑀢𑀺.

𑁩𑁦𑁭. ‘‘𑀭𑀸𑀕𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀪𑀺𑀜𑁆𑀜𑀸𑀬 𑀧𑀜𑁆𑀘 𑀥𑀫𑁆𑀫𑀸 𑀪𑀸𑀯𑁂𑀢𑀩𑁆𑀩𑀸. 𑀓𑀢𑀫𑁂 𑀧𑀜𑁆𑀘? 𑀲𑀤𑁆𑀥𑀸𑀩𑀮𑀁, 𑀯𑀻𑀭𑀺𑀬𑀩𑀮𑀁, 𑀲𑀢𑀺𑀩𑀮𑀁, 𑀲𑀫𑀸𑀥𑀺𑀩𑀮𑀁, 𑀧𑀜𑁆𑀜𑀸𑀩𑀮𑀁 𑁋 𑀭𑀸𑀕𑀲𑁆𑀲, 𑀪𑀺𑀓𑁆𑀔𑀯𑁂, 𑀅𑀪𑀺𑀜𑁆𑀜𑀸𑀬 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀪𑀸𑀯𑁂𑀢𑀩𑁆𑀩𑀸’’𑀢𑀺.

𑁩𑁦𑁮-𑁧𑁧𑁫𑁧. ‘‘𑀭𑀸𑀕𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀭𑀺𑀜𑁆𑀜𑀸𑀬… 𑀧𑀭𑀺𑀓𑁆𑀔𑀬𑀸𑀬… 𑀧𑀳𑀸𑀦𑀸𑀬… 𑀔𑀬𑀸𑀬… 𑀯𑀬𑀸𑀬… 𑀯𑀺𑀭𑀸𑀕𑀸𑀬… 𑀦𑀺𑀭𑁄𑀥𑀸𑀬… 𑀘𑀸𑀕𑀸𑀬… 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀬 𑀧𑀜𑁆𑀘 𑀥𑀫𑁆𑀫𑀸 𑀪𑀸𑀯𑁂𑀢𑀩𑁆𑀩𑀸. 𑀤𑁄𑀲𑀲𑁆𑀲… 𑀫𑁄𑀳𑀲𑁆𑀲… 𑀓𑁄𑀥𑀲𑁆𑀲… 𑀉𑀧𑀦𑀸𑀳𑀲𑁆𑀲… 𑀫𑀓𑁆𑀔𑀲𑁆𑀲… 𑀧𑀴𑀸𑀲𑀲𑁆𑀲… 𑀇𑀲𑁆𑀲𑀸𑀬… 𑀫𑀘𑁆𑀙𑀭𑀺𑀬𑀲𑁆𑀲… 𑀫𑀸𑀬𑀸𑀬… 𑀲𑀸𑀞𑁂𑀬𑁆𑀬𑀲𑁆𑀲… 𑀣𑀫𑁆𑀪𑀲𑁆𑀲… 𑀲𑀸𑀭𑀫𑁆𑀪𑀲𑁆𑀲… 𑀫𑀸𑀦𑀲𑁆𑀲… 𑀅𑀢𑀺𑀫𑀸𑀦𑀲𑁆𑀲 … 𑀫𑀤𑀲𑁆𑀲… 𑀧𑀫𑀸𑀤𑀲𑁆𑀲 𑀅𑀪𑀺𑀜𑁆𑀜𑀸𑀬… 𑀧𑀭𑀺𑀜𑁆𑀜𑀸𑀬… 𑀧𑀭𑀺𑀓𑁆𑀔𑀬𑀸𑀬… 𑀧𑀳𑀸𑀦𑀸𑀬… 𑀔𑀬𑀸𑀬… 𑀯𑀬𑀸𑀬… 𑀯𑀺𑀭𑀸𑀕𑀸𑀬… 𑀦𑀺𑀭𑁄𑀥𑀸𑀬… 𑀘𑀸𑀕𑀸𑀬… 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀬 𑀧𑀜𑁆𑀘 𑀥𑀫𑁆𑀫𑀸 𑀪𑀸𑀯𑁂𑀢𑀩𑁆𑀩𑀸.

‘‘𑀓𑀢𑀫𑁂 𑀧𑀜𑁆𑀘? 𑀲𑀤𑁆𑀥𑀸𑀩𑀮𑀁, 𑀯𑀻𑀭𑀺𑀬𑀩𑀮𑀁, 𑀲𑀢𑀺𑀩𑀮𑀁, 𑀲𑀫𑀸𑀥𑀺𑀩𑀮𑀁, 𑀧𑀜𑁆𑀜𑀸𑀩𑀮𑀁 𑁋 𑀧𑀫𑀸𑀤𑀲𑁆𑀲, 𑀪𑀺𑀓𑁆𑀔𑀯𑁂, 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀬 𑀇𑀫𑁂 𑀧𑀜𑁆𑀘 𑀥𑀫𑁆𑀫𑀸 𑀪𑀸𑀯𑁂𑀢𑀩𑁆𑀩𑀸’’𑀢𑀺.

𑀭𑀸𑀕𑀧𑁂𑀬𑁆𑀬𑀸𑀮𑀁 𑀦𑀺𑀝𑁆𑀞𑀺𑀢𑀁.