(𑁨𑁬) 𑁬. 𑀉𑀧𑀲𑀫𑁆𑀧𑀤𑀸𑀯𑀕𑁆𑀕𑁄

𑁧. 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀲𑀼𑀢𑁆𑀢𑀁

𑁨𑁫𑁧. [𑀫𑀳𑀸𑀯. 𑁮𑁪] ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀁. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀲𑁂𑀔𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺; 𑀅𑀲𑁂𑀔𑁂𑀦 𑀲𑀫𑀸𑀥𑀺𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺; 𑀅𑀲𑁂𑀔𑁂𑀦 𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺; 𑀅𑀲𑁂𑀔𑁂𑀦 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺; 𑀅𑀲𑁂𑀔𑁂𑀦 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩’’𑀦𑁆𑀢𑀺. 𑀧𑀞𑀫𑀁.

𑁨. 𑀦𑀺𑀲𑁆𑀲𑀬𑀲𑀼𑀢𑁆𑀢𑀁

𑁨𑁫𑁨. [𑀫𑀳𑀸𑀯. 𑁮𑁪] ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀲𑁂𑀔𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺…𑀧𑁂… 𑀅𑀲𑁂𑀔𑁂𑀦 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺. 𑀇𑀫𑁂𑀳𑀺…𑀧𑁂… 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄’’𑀢𑀺. 𑀤𑀼𑀢𑀺𑀬𑀁.

𑁩. 𑀲𑀸𑀫𑀡𑁂𑀭𑀲𑀼𑀢𑁆𑀢𑀁

𑁨𑁫𑁩. [𑀫𑀳𑀸𑀯. 𑁮𑁪] ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀇𑀥, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼 𑀅𑀲𑁂𑀔𑁂𑀦 𑀲𑀻𑀮𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺; 𑀅𑀲𑁂𑀔𑁂𑀦 𑀲𑀫𑀸𑀥𑀺𑀓𑁆𑀔𑀦𑁆𑀥𑁂𑀦… 𑀅𑀲𑁂𑀔𑁂𑀦 𑀧𑀜𑁆𑀜𑀸𑀓𑁆𑀔𑀦𑁆𑀥𑁂𑀦… 𑀅𑀲𑁂𑀔𑁂𑀦 𑀯𑀺𑀫𑀼𑀢𑁆𑀢𑀺𑀓𑁆𑀔𑀦𑁆𑀥𑁂𑀦… 𑀅𑀲𑁂𑀔𑁂𑀦 𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀓𑁆𑀔𑀦𑁆𑀥𑁂𑀦 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀺. 𑀇𑀫𑁂𑀳𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀳𑀺 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁂𑀦 𑀪𑀺𑀓𑁆𑀔𑀼𑀦𑀸 𑀲𑀸𑀫𑀡𑁂𑀭𑁄 𑀉𑀧𑀝𑁆𑀞𑀸𑀧𑁂𑀢𑀩𑁆𑀩𑁄’’𑀢𑀺. 𑀢𑀢𑀺𑀬𑀁.

𑁪. 𑀧𑀜𑁆𑀘𑀫𑀘𑁆𑀙𑀭𑀺𑀬𑀲𑀼𑀢𑁆𑀢𑀁

𑁨𑁫𑁪. ‘‘𑀧𑀜𑁆𑀘𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀫𑀘𑁆𑀙𑀭𑀺𑀬𑀸𑀦𑀺. 𑀓𑀢𑀫𑀸𑀦𑀺 𑀧𑀜𑁆𑀘? 𑀆𑀯𑀸𑀲𑀫𑀘𑁆𑀙𑀭𑀺𑀬𑀁, 𑀓𑀼𑀮𑀫𑀘𑁆𑀙𑀭𑀺𑀬𑀁, 𑀮𑀸𑀪𑀫𑀘𑁆𑀙𑀭𑀺𑀬𑀁, 𑀯𑀡𑁆𑀡𑀫𑀘𑁆𑀙𑀭𑀺𑀬𑀁, 𑀥𑀫𑁆𑀫𑀫𑀘𑁆𑀙𑀭𑀺𑀬𑀁 𑁋 𑀇𑀫𑀸𑀦𑀺 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀫𑀘𑁆𑀙𑀭𑀺𑀬𑀸𑀦𑀺. 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀦𑁆𑀦𑀁 𑀫𑀘𑁆𑀙𑀭𑀺𑀬𑀸𑀦𑀁 𑀏𑀢𑀁 𑀧𑀝𑀺𑀓𑀼𑀝𑁆𑀞𑀁 [𑀧𑀢𑀺𑀓𑀺𑀝𑁆𑀞𑀁 (𑀲𑀻. 𑀧𑀻.), 𑀧𑀝𑀺𑀓𑁆𑀓𑀺𑀝𑁆𑀞𑀁 (𑀲𑁆𑀬𑀸. 𑀓𑀁.), 𑀧𑀝𑀺𑀓𑀺𑀝𑁆𑀞𑀁 (𑀓.)], 𑀬𑀤𑀺𑀤𑀁 𑀥𑀫𑁆𑀫𑀫𑀘𑁆𑀙𑀭𑀺𑀬’’𑀦𑁆𑀢𑀺. 𑀘𑀢𑀼𑀢𑁆𑀣𑀁.

𑁫. 𑀫𑀘𑁆𑀙𑀭𑀺𑀬𑀧𑁆𑀧𑀳𑀸𑀦𑀲𑀼𑀢𑁆𑀢𑀁

𑁨𑁫𑁫. ‘‘𑀧𑀜𑁆𑀘𑀦𑁆𑀦𑀁, 𑀪𑀺𑀓𑁆𑀔𑀯𑁂, 𑀫𑀘𑁆𑀙𑀭𑀺𑀬𑀸𑀦𑀁 𑀧𑀳𑀸𑀦𑀸𑀬 𑀲𑀫𑀼𑀘𑁆𑀙𑁂𑀤𑀸𑀬 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀺. 𑀓𑀢𑀫𑁂𑀲𑀁 𑀧𑀜𑁆𑀘𑀦𑁆𑀦𑀁? 𑀆𑀯𑀸𑀲𑀫𑀘𑁆𑀙𑀭𑀺𑀬𑀲𑁆𑀲 𑀧𑀳𑀸𑀦𑀸𑀬 𑀲𑀫𑀼𑀘𑁆𑀙𑁂𑀤𑀸𑀬 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀺; 𑀓𑀼𑀮𑀫𑀘𑁆𑀙𑀭𑀺𑀬𑀲𑁆𑀲…𑀧𑁂… 𑀮𑀸𑀪𑀫𑀘𑁆𑀙𑀭𑀺𑀬𑀲𑁆𑀲… 𑀯𑀡𑁆𑀡𑀫𑀘𑁆𑀙𑀭𑀺𑀬𑀲𑁆𑀲… 𑀥𑀫𑁆𑀫𑀫𑀘𑁆𑀙𑀭𑀺𑀬𑀲𑁆𑀲 𑀧𑀳𑀸𑀦𑀸𑀬 𑀲𑀫𑀼𑀘𑁆𑀙𑁂𑀤𑀸𑀬 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀺. 𑀇𑀫𑁂𑀲𑀁 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘𑀦𑁆𑀦𑀁 𑀫𑀘𑁆𑀙𑀭𑀺𑀬𑀸𑀦𑀁 𑀧𑀳𑀸𑀦𑀸𑀬 𑀲𑀫𑀼𑀘𑁆𑀙𑁂𑀤𑀸𑀬 𑀩𑁆𑀭𑀳𑁆𑀫𑀘𑀭𑀺𑀬𑀁 𑀯𑀼𑀲𑁆𑀲𑀢𑀻’’𑀢𑀺. 𑀧𑀜𑁆𑀘𑀫𑀁.

𑁬. 𑀧𑀞𑀫𑀛𑀸𑀦𑀲𑀼𑀢𑁆𑀢𑀁

𑁨𑁫𑁬. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂 𑀅𑀧𑁆𑀧𑀳𑀸𑀬 𑀅𑀪𑀩𑁆𑀩𑁄 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀢𑀼𑀁. 𑀓𑀢𑀫𑁂 𑀧𑀜𑁆𑀘? 𑀆𑀯𑀸𑀲𑀫𑀘𑁆𑀙𑀭𑀺𑀬𑀁, 𑀓𑀼𑀮𑀫𑀘𑁆𑀙𑀭𑀺𑀬𑀁, 𑀮𑀸𑀪𑀫𑀘𑁆𑀙𑀭𑀺𑀬𑀁, 𑀯𑀡𑁆𑀡𑀫𑀘𑁆𑀙𑀭𑀺𑀬𑀁, 𑀥𑀫𑁆𑀫𑀫𑀘𑁆𑀙𑀭𑀺𑀬𑀁 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀥𑀫𑁆𑀫𑁂 𑀅𑀧𑁆𑀧𑀳𑀸𑀬 𑀅𑀪𑀩𑁆𑀩𑁄 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀢𑀼𑀁.

‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂 𑀧𑀳𑀸𑀬 𑀪𑀩𑁆𑀩𑁄 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀢𑀼𑀁. 𑀓𑀢𑀫𑁂 𑀧𑀜𑁆𑀘? 𑀆𑀯𑀸𑀲𑀫𑀘𑁆𑀙𑀭𑀺𑀬𑀁, 𑀓𑀼𑀮𑀫𑀘𑁆𑀙𑀭𑀺𑀬𑀁, 𑀮𑀸𑀪𑀫𑀘𑁆𑀙𑀭𑀺𑀬𑀁, 𑀯𑀡𑁆𑀡𑀫𑀘𑁆𑀙𑀭𑀺𑀬𑀁, 𑀥𑀫𑁆𑀫𑀫𑀘𑁆𑀙𑀭𑀺𑀬𑀁 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀥𑀫𑁆𑀫𑁂 𑀧𑀳𑀸𑀬 𑀪𑀩𑁆𑀩𑁄 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀢𑀼’’𑀦𑁆𑀢𑀺. 𑀙𑀝𑁆𑀞𑀁.

𑁭-𑁧𑁩. 𑀤𑀼𑀢𑀺𑀬𑀛𑀸𑀦𑀲𑀼𑀢𑁆𑀢𑀸𑀤𑀺𑀲𑀢𑁆𑀢𑀓𑀁

𑁨𑁫𑁭-𑁨𑁬𑁩. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂 𑀅𑀧𑁆𑀧𑀳𑀸𑀬 𑀅𑀪𑀩𑁆𑀩𑁄 𑀤𑀼𑀢𑀺𑀬𑀁 𑀛𑀸𑀦𑀁…𑀧𑁂… 𑀅𑀪𑀩𑁆𑀩𑁄 𑀢𑀢𑀺𑀬𑀁 𑀛𑀸𑀦𑀁… 𑀅𑀪𑀩𑁆𑀩𑁄 𑀘𑀢𑀼𑀢𑁆𑀣𑀁 𑀛𑀸𑀦𑀁… 𑀅𑀪𑀩𑁆𑀩𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀁… 𑀅𑀪𑀩𑁆𑀩𑁄 𑀲𑀓𑀤𑀸𑀕𑀸𑀫𑀺𑀨𑀮𑀁… 𑀅𑀪𑀩𑁆𑀩𑁄 𑀅𑀦𑀸𑀕𑀸𑀫𑀺𑀨𑀮𑀁… 𑀅𑀪𑀩𑁆𑀩𑁄 𑀅𑀭𑀳𑀢𑁆𑀢𑀁 [𑀅𑀭𑀳𑀢𑁆𑀢𑀨𑀮𑀁 (𑀲𑀻.)] 𑀲𑀘𑁆𑀙𑀺𑀓𑀸𑀢𑀼𑀁. 𑀓𑀢𑀫𑁂 𑀧𑀜𑁆𑀘? 𑀆𑀯𑀸𑀲𑀫𑀘𑁆𑀙𑀭𑀺𑀬𑀁, 𑀓𑀼𑀮𑀫𑀘𑁆𑀙𑀭𑀺𑀬𑀁, 𑀮𑀸𑀪𑀫𑀘𑁆𑀙𑀭𑀺𑀬𑀁, 𑀯𑀡𑁆𑀡𑀫𑀘𑁆𑀙𑀭𑀺𑀬𑀁, 𑀥𑀫𑁆𑀫𑀫𑀘𑁆𑀙𑀭𑀺𑀬𑀁 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀥𑀫𑁆𑀫𑁂 𑀅𑀧𑁆𑀧𑀳𑀸𑀬 𑀅𑀪𑀩𑁆𑀩𑁄 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀸𑀢𑀼𑀁.

‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂 𑀧𑀳𑀸𑀬 𑀪𑀩𑁆𑀩𑁄 𑀤𑀼𑀢𑀺𑀬𑀁 𑀛𑀸𑀦𑀁…𑀧𑁂… 𑀪𑀩𑁆𑀩𑁄 𑀢𑀢𑀺𑀬𑀁 𑀛𑀸𑀦𑀁… 𑀪𑀩𑁆𑀩𑁄 𑀘𑀢𑀼𑀢𑁆𑀣𑀁 𑀛𑀸𑀦𑀁… 𑀪𑀩𑁆𑀩𑁄 𑀲𑁄𑀢𑀸𑀧𑀢𑁆𑀢𑀺𑀨𑀮𑀁… 𑀪𑀩𑁆𑀩𑁄 𑀲𑀓𑀤𑀸𑀕𑀸𑀫𑀺𑀨𑀮𑀁… 𑀪𑀩𑁆𑀩𑁄 𑀅𑀦𑀸𑀕𑀸𑀫𑀺𑀨𑀮𑀁… 𑀪𑀩𑁆𑀩𑁄 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀸𑀢𑀼𑀁. 𑀓𑀢𑀫𑁂 𑀧𑀜𑁆𑀘? 𑀆𑀯𑀸𑀲𑀫𑀘𑁆𑀙𑀭𑀺𑀬𑀁, 𑀓𑀼𑀮𑀫𑀘𑁆𑀙𑀭𑀺𑀬𑀁, 𑀮𑀸𑀪𑀫𑀘𑁆𑀙𑀭𑀺𑀬𑀁, 𑀯𑀡𑁆𑀡𑀫𑀘𑁆𑀙𑀭𑀺𑀬𑀁, 𑀥𑀫𑁆𑀫𑀫𑀘𑁆𑀙𑀭𑀺𑀬𑀁 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀥𑀫𑁆𑀫𑁂 𑀧𑀳𑀸𑀬 𑀪𑀩𑁆𑀩𑁄 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀸𑀢𑀼’’𑀦𑁆𑀢𑀺. 𑀢𑁂𑀭𑀲𑀫𑀁.

𑁧𑁪. 𑀅𑀧𑀭𑀧𑀞𑀫𑀛𑀸𑀦𑀲𑀼𑀢𑁆𑀢𑀁

𑁨𑁬𑁪. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂 𑀅𑀧𑁆𑀧𑀳𑀸𑀬 𑀅𑀪𑀩𑁆𑀩𑁄 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀢𑀼𑀁. 𑀓𑀢𑀫𑁂 𑀧𑀜𑁆𑀘? 𑀆𑀯𑀸𑀲𑀫𑀘𑁆𑀙𑀭𑀺𑀬𑀁, 𑀓𑀼𑀮𑀫𑀘𑁆𑀙𑀭𑀺𑀬𑀁, 𑀮𑀸𑀪𑀫𑀘𑁆𑀙𑀭𑀺𑀬𑀁, 𑀯𑀡𑁆𑀡𑀫𑀘𑁆𑀙𑀭𑀺𑀬𑀁, 𑀅𑀓𑀢𑀜𑁆𑀜𑀼𑀢𑀁 𑀅𑀓𑀢𑀯𑁂𑀤𑀺𑀢𑀁 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀥𑀫𑁆𑀫𑁂 𑀅𑀧𑁆𑀧𑀳𑀸𑀬 𑀅𑀪𑀩𑁆𑀩𑁄 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀢𑀼𑀁.

‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂 𑀧𑀳𑀸𑀬 𑀪𑀩𑁆𑀩𑁄 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀢𑀼𑀁. 𑀓𑀢𑀫𑁂 𑀧𑀜𑁆𑀘? 𑀆𑀯𑀸𑀲𑀫𑀘𑁆𑀙𑀭𑀺𑀬𑀁, 𑀓𑀼𑀮𑀫𑀘𑁆𑀙𑀭𑀺𑀬𑀁, 𑀮𑀸𑀪𑀫𑀘𑁆𑀙𑀭𑀺𑀬𑀁, 𑀯𑀡𑁆𑀡𑀫𑀘𑁆𑀙𑀭𑀺𑀬𑀁, 𑀅𑀓𑀢𑀜𑁆𑀜𑀼𑀢𑀁 𑀅𑀓𑀢𑀯𑁂𑀤𑀺𑀢𑀁 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀥𑀫𑁆𑀫𑁂 𑀧𑀳𑀸𑀬 𑀪𑀩𑁆𑀩𑁄 𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀺𑀢𑀼’’𑀦𑁆𑀢𑀺. 𑀘𑀼𑀤𑁆𑀤𑀲𑀫𑀁.

𑁧𑁫-𑁨𑁧. 𑀅𑀧𑀭𑀤𑀼𑀢𑀺𑀬𑀛𑀸𑀦𑀲𑀼𑀢𑁆𑀢𑀸𑀤𑀺𑀲𑀢𑁆𑀢𑀓𑀁

𑁨𑁬𑁫-𑁨𑁭𑁧. ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂 𑀅𑀧𑁆𑀧𑀳𑀸𑀬 𑀅𑀪𑀩𑁆𑀩𑁄 𑀤𑀼𑀢𑀺𑀬𑀁 𑀛𑀸𑀦𑀁…𑀧𑁂… 𑀢𑀢𑀺𑀬𑀁 𑀛𑀸𑀦𑀁… 𑀘𑀢𑀼𑀢𑁆𑀣𑀁 𑀛𑀸𑀦𑀁… 𑀲𑁄𑀢𑀸𑀧𑀢𑁆𑀢𑀺𑀨𑀮𑀁… 𑀲𑀓𑀤𑀸𑀕𑀸𑀫𑀺𑀨𑀮𑀁… 𑀅𑀦𑀸𑀕𑀸𑀫𑀺𑀨𑀮𑀁… 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀸𑀢𑀼𑀁. 𑀓𑀢𑀫𑁂 𑀧𑀜𑁆𑀘? 𑀆𑀯𑀸𑀲𑀫𑀘𑁆𑀙𑀭𑀺𑀬𑀁, 𑀓𑀼𑀮𑀫𑀘𑁆𑀙𑀭𑀺𑀬𑀁, 𑀮𑀸𑀪𑀫𑀘𑁆𑀙𑀭𑀺𑀬𑀁, 𑀯𑀡𑁆𑀡𑀫𑀘𑁆𑀙𑀭𑀺𑀬𑀁, 𑀅𑀓𑀢𑀜𑁆𑀜𑀼𑀢𑀁 𑀅𑀓𑀢𑀯𑁂𑀤𑀺𑀢𑀁 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀥𑀫𑁆𑀫𑁂 𑀅𑀧𑁆𑀧𑀳𑀸𑀬 𑀅𑀪𑀩𑁆𑀩𑁄 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀸𑀢𑀼𑀁.

‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂 𑀧𑀳𑀸𑀬 𑀪𑀩𑁆𑀩𑁄 𑀤𑀼𑀢𑀺𑀬𑀁 𑀛𑀸𑀦𑀁…𑀧𑁂… 𑀢𑀢𑀺𑀬𑀁 𑀛𑀸𑀦𑀁… 𑀘𑀢𑀼𑀢𑁆𑀣𑀁 𑀛𑀸𑀦𑀁… 𑀲𑁄𑀢𑀸𑀧𑀢𑁆𑀢𑀺𑀨𑀮𑀁… 𑀲𑀓𑀤𑀸𑀕𑀸𑀫𑀺𑀨𑀮𑀁… 𑀅𑀦𑀸𑀕𑀸𑀫𑀺𑀨𑀮𑀁… 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀸𑀢𑀼𑀁. 𑀓𑀢𑀫𑁂 𑀧𑀜𑁆𑀘? 𑀆𑀯𑀸𑀲𑀫𑀘𑁆𑀙𑀭𑀺𑀬𑀁, 𑀓𑀼𑀮𑀫𑀘𑁆𑀙𑀭𑀺𑀬𑀁, 𑀮𑀸𑀪𑀫𑀘𑁆𑀙𑀭𑀺𑀬𑀁, 𑀯𑀡𑁆𑀡𑀫𑀘𑁆𑀙𑀭𑀺𑀬𑀁, 𑀅𑀓𑀢𑀜𑁆𑀜𑀼𑀢𑀁 𑀅𑀓𑀢𑀯𑁂𑀤𑀺𑀢𑀁 𑁋 𑀇𑀫𑁂 𑀔𑁄, 𑀪𑀺𑀓𑁆𑀔𑀯𑁂, 𑀧𑀜𑁆𑀘 𑀥𑀫𑁆𑀫𑁂 𑀧𑀳𑀸𑀬 𑀪𑀩𑁆𑀩𑁄 𑀅𑀭𑀳𑀢𑁆𑀢𑀁 𑀲𑀘𑁆𑀙𑀺𑀓𑀸𑀢𑀼’’𑀦𑁆𑀢𑀺. 𑀏𑀓𑀯𑀻𑀲𑀢𑀺𑀫𑀁.

𑀉𑀧𑀲𑀫𑁆𑀧𑀤𑀸𑀯𑀕𑁆𑀕𑁄 𑀙𑀝𑁆𑀞𑁄.